ངག་རླུང་བྱིན་གྱིས་རླབས་ཚུལ།
ན་མོ་གུ་རུ་བྷྱཿ དེ་ལ་ནངས་པར་གཉིད་སད་མ་ཐག་ཏུ་གུ་རུ་རིན་པོ་ཆེ་འཁོར་དཔའ་བོ་དང་མཁའ་འགྲོའི་ཚོགས་དང་བཅས་པའི་ཕྱག་གིས་ཌ་དྲིལ་དང་གསུང་དབྱངས་སྔགས་ཀྱི་སྒྲས་གཉིད་ལས་སད་པར་བསམ། ཀྱེ་མ་ཀྱེ་ཧུད་སོགས། དེ་ནས་སེམས་ལྷོད་ཀྱིས་བཞག་ནས་རླུང་རོ་བསལ། སྤྱིར་ཀློང་ཆེན་སྙིང་ཐིག་གི་སྐབས་སོགས་སུ་རྩ་དབུ་མ་མཐིང་ག་དང་། གཡས་རོ་མ་དཀར་པོ། གཡོན་རྐྱང་མ་དམར་མོ་ཡིན་པར་ཤེས་དགོས། དེ་ལ་སྲིན་རྩ་མཐེ་བོང་གིས་མནན་ནས་འཛུབ་མོ་འོག་མ་གསུམ་བསྐུམས། ལག་གཡོན་པའི་གོང་མོས་སྣ་བུག་གཡོན་མནན་ནས། གཡས་ནས་རླུང་ཕྱི་ལ་ལན་གསུམ་འབུད། དེས་ཚེ་རབས་ཐོག་མེད་ནས་ཉོན་མོངས་པ་ཞེ་སྡང་གི་སྒོ་ནས་བསགས་པའི་ལས་ངན་སྡིག་སྒྲིབ་བག་ཆགས་ཐམས་ཅད་དང༌། ཕོ་གདོན་རྒྱལ་འགོང་གི་གནོད་པ་ཐམས་ཅད་ཕྱིར་སངས་ཀྱིས་སོང་བར་བསམ། དེ་བཞིན་གཡོན་ནས་ལན་གསུམ་འབུད་པ་སོགས་གོང་བཞིན་བྱ། ཉོན་མོངས་པ་འདོད་ཆགས་སོགས་ནས་མོ་གདོན་འདྲེ་མོའི་གནོད་པ་ཐམས་ཅད་ཕྱིར་སོང་བར་བསམ། དེ་ནས་ལག་གཉིས་པུས་མོར་བཀབ་སྟེ་དྲང་པོར་བཞུགས། སྣ་བུག་གཉིས་ནས་རླུང་ལན་གསུམ་འབུད་ཉོན་མོངས་པ་གཏི་མུག་དང༌། ཀླུ་གདོན་ས་བདག་གི་གནོད་པ་ཐམས་ཅད་ཕྱིར་སོང་བར་བསམ། དམིགས་སྐོར་འགའ་ཞིག་ན་རཾ་ལས་ཡེ་ཤེས་ཀྱི་མེས་བསྲེགས་པར་བསམ་པ་ལྟ་བུ་ཡོད་ཀྱང༌། ཕྱི་རོལ་སངས་ཀྱིས་སོང་བར་བསམ་ན་ཆོག
རླུང་བྱིན་རླབས་ནི། རླུང་ཚུར་ནང་དུ་འཇུག་པའི་དུས་ཨོཾ་དཀར་པོའི་རྣམ་པར་བསམ་ནས་རྔུབས། ནང་དུ་གནས་པའི་དུས་ཨཱཿདམར་པོའི་རྣམ་པ་དང༌། ཕྱིར་འབྱིན་དུས་ཧཱུྃ་སྔོན་པོའི་རྣམ་པར་བསམ་ལ་རླུང་རང་བབས་བཞག་པས་ཆོག རླུང་ཁུག་འཛིན་པ་དང༌། ངག་གི་བརྗོད་པ་སོགས་གང་ཡང་མི་དགོས། རླུང་འབྱིན་འཇུག་གནས་གསུམ་པོ་གཅིག་ཏུ་བགྲང་ནས་ཉེར་གཅིག་གམ་བདུན་ཙམ་ཞིག་བྱ།
དེ་ནས་ངག་བྱིན་རླབས་ནི། ལྕེ་དབང་རཾ་ཡིག་སོགས་ཏེ། ཐོག་མར་རཾ་ལས་བྱུང་བའི་མེས་རྣམ་སྨིན་གདོས་བཅས་བག་ཆགས་ཀྱི་རྣམ་པ་དེ་སྦྱངས་པར་བསམ་ཞིང་། ལྕེ་གསུང་རྡོ་རྗེའི་ངོ་བོ་ཅན་དུ་རྡོ་རྗེ་དམར་པོ་རྩེ་གསུམ་པ་ཅན་དུ་གསལ། བླ་མ་རྣམས་ཀྱི་གསུང་རྒྱུན་ནི། ལྕེ་ཐོག་ལ་ཨ་ཡིག་དཀར་པོ་གསལ་བའམ། མི་ཕམ་གསུང་ལྟར་ན་ལྕེ་ཐོག་ཏུ་ཨོཾ་ཨཱཿ ཧཱུྃ་བརྩེགས་མར་གསལ། དེ་གཉིས་གང་མོས་མཐར། སྤྱིར་ཨཱ་ལི་ཤེས་རབ་ཀྱི་རང་བཞིན་དང་། ཀཱ་ལི་ཐབས་ཀྱི་རང་བཞིན་གཙོ་ཆེར་གསུངས་མོད། འདི་སྐབས་སུ་རང་གི་ལྕེ་ཐོག་ཏུ་ཨ་ཡིག་དཀར་པོ་གསལ་བ་དེ་ལ་གཡས་བསྐོར་དུ་ཨ་ཨཱ་ཨི་སོགས་དཀར་པོའི་རྣམ་པ་གཡས་སུ་གསལ་བར་བསྒོམ་ཞིང༌། ཨཱ་ལི་དཀར་པོ་དེ་ལས་འོད་འཕྲོས་རྒྱལ་བ་སྲས་བཅས་མཆོད། སླར་འདུས་ནས་བྱིན་རླབས་དངོས་གྲུབ་ཐམས་ཅད་རང་ལ་བསྟིམ། དེ་ནས་སྔར་གྱི་ཨ་ཡིག་དེ་དམར་པོར་གསལ། ཀ་ཁ་ག་གྷ་སོགས་གསལ་བྱེད་རྣམས་དམར་པོའི་རྣམ་པ་གཡོན་བསྐོར་དུ་གསལ། དེ་ལས་འོད་འཕྲོས་སོགས་སྔར་ལྟར་མཐར་མི་དམིགས་པར་བཞག ཡང་ཨ་སྔོན་པོའམ་སེར་པོ་གསལ། འདི་ལ་ཀོང་སྤྲུལ་ཡོན་ཏན་རྒྱ་མཚོས་ཡེ་དྷརྨ་སྔོན་པོ་གསུངས། འདིར་༼ཨ་འཛོམས་རྒྱལ་སྲས༽ཞལ་རྒྱུན་ལྟར་ན་ཡེ་དྷརྨ་སེར་པོ་གསུངས། དེས་ན་སེར་སྔོན་གང་རུང་གཡས་བསྐོར་དུ་གསལ། དེ་ལས་འོད་འཕྲོས་སོགས་གོང་བཞིན་བྱ། དེ་རྣམས་ལྷན་ཅིག་ཏུ་གསལ་ན་ཐོག་མར་ལྕེ་ཐོག་ཏུ་ཨོཾ་ཨཱཿཧཱུྃ་བརྩེགས་མར་གསལ་བའམ། ཡང་ན་ཨ་ཡིག་དཀར་པོ་ལ་ཨཱ་ལི་དཀར་པོ་གཡས་བསྐོར། ཀཱ་ལི་དམར་པོ་གཡོན་བསྐོར། རྟེན་སྙིང་སེར་པོ་གཡས་བསྐོར། དེ་རྣམས་ཕྱི་རིམ་ནང་རིམ་དུ་འཁོད་པར་བསམ། དེ་ལས་འོད་འཕྲོས་སོགས་སྔར་ལྟར་རོ། །ཞེས་ཀུན་གཟིགས་མཁན་ཆེན་བླ་མའི་སྔོན་འགྲོའི་འཆད་ཁྲིད་ལས་གསུང་ཟིན་བཀོལ་བ་ལགས།