མཁའ་འགྲོ་བདེ་ཆེན་རྒྱ་མཚོ།
བསྐྱེད་རིམ་ཡིད་བཞིན་ནོར་བུ།
མཁའ་འགྲོ་བདེ་ཆེན་རྒྱ་མཚོ་བཞུགས་སོ༔ རིན་ཆེན་ཤོག་སེར་སྐོར་བསྐྱེད་རིམ་ཡིད་བཞིན་ནོར་བུའོཿ
དངོས་གྲུབ་ཕུན་ཚོགས་འབྱུང་བའི་གཞི༔ རྡོ་རྗེ་ཕག་མོ་ལ་བཏུད་དེ༔ མཁའ་འགྲོ་བདེ་ཆེན་རྒྱ་མཚོ་ལས༔ བསྐྱེད་རིམ་ཡིད་བཞིན་ནོར་བུ་བཤད༔ སྐད་ཅིག་གིས་སྟོང་པའི་ངང་ལས་ཆོས་འབྱུང་དམར་པོ་སུམ་བརྩེགས་དབུས་སུ་པདྨ་འདབ་བཞིའི་སྟེང་དུ༔ ཟླ་བ་དང་༔ ཉི་མ་དང་༔ རོའི་སྟེང་དུ༔ ཧྲཱི་དམར་པོ་ལས་འོད་འཕྲོས་སྣང་སྲིད་ཐམས་ཅད་ལ་ཕོག༔ འོད་ཟེར་དམར་པོ་གཅིག་ཏུ་གྱུར་ནས་ཚུར་འདུས༔ ཡི་གེ་གཉིས་ལ་ཐིམ་པས་རང་ཉིད་རྡོ་རྗེ་ཕག་མོ་དམར་མོ་གཅེར་བུ་སྤྱན་གསུམ་དང་༔ ཕག་ཞལ་ནག་མོ་ངུར་བ་མེ་ལོང་དྲིལ་བུའི་ཕྲེང་བ་འཁྲོལ་བ༔ ཞབས་གཡོན་རོའི་སྙིང་གར་བརྐྱང་ཞིང་༔ གཡས་བསྐུམས་པའི་རྟིང་པ་བྷ་ག་ལ་གཏད་པ༔ སྐྲ་འཕྱངས་ཤིང་ཁ་ཊྭཱཾ་ག་མཆན་ཁུང་དུ་བཅུག་པར་བསམ་པའི་པང་དུ་དཔའ་བོ་རྟ་མགྲིན་དམར་པོ་སྤྱི་གཙུག་ན་རྟ་མགོ་ལྗང་ནག་འཚེར་བ༔ ཞབས་གཉིས་ཡུམ་ལ་འཁྲིལ་པ༔ སྤྱན་གསུམ་པ་མཆེ་བ་གཙིགས་པ༔ དེ་གཉིས་ཀའི་ཕྱག་གཡས་གཉིས་ན་གྲི་གུག་དང་༔ གཡོན་གཉིས་ན་ཐོད་པ་ཁྲག་གིས་བཀང་བ་བསྣམས་པ་༔ རིན་པོ་ཆེ་དང་རུས་པའི་རྒྱན་ཐམས་ཅད་ཀྱིས་བརྒྱན་པར་བསམ་མོ༔ སྤྱི་བོའི་རྩ་འདབ་བཞི་ལ་པད་ཉི་ཟླ་བའི་སྟེང་དུ༔ དབུས་སུ་ཧ་དང་ར་ལས་སྐྱེས་པའི་རྡོ་རྗེ་དཔའ་བོ་ཡབ་ཡུམ་དཀར་པོ་དང་༔ འདབ་མ་བཞི་ལ་ཧ་རི་ནི་ས་བཞི་ལས་དེ་དང་འདྲ་བའི་རིགས་བཞི་མཁའ་འགྲོ་ཡབ་ཡུམ་གཡས་གཡོན་གྲི་གུག་དང་ཐོད་པ་འཛིན་པ༔ རྒྱན་ཐམས་ཅད་ཀྱིས་བརྒྱན་པ༔ ཁ་ཊྭཱཾ་ག་མཆན་ཁུང་ན་ཡོད་པ༔ སྤྱན་གསུམ་པའི་ཐུགས་ཀར་གཡུང་དྲུང་དཀར་པོའི་ལྟེ་བར་ཧ་དང་ར༔ ཡན་ལག་བཞི་ལ་ཨ་རི་ནི་ས་བཞི་ཡོད་པའོ༔ མགྲིན་པའི་རྩ་འདབ་བཞི་ལ༔ དབུས་སུ་རི་དང་ཙ་ལས་རིན་ཆེན་མཁའ་འགྲོ་ཡབ་ཡུམ་སེར་པོ༔ འདབ་མ་བཞི་ལ་ཧ་ཨ་ནི་ས་བཞི་ལས་རིན་ཆེན་དཔའ་བོ་དེ་དང་འདྲ་བའི་འཁོར་བཞི༔ རྒྱན་དང་ཕྱག་མཚན་གོང་དང་འདྲ་བའི་ཐུགས་
ཀར༔ གཡུང་དྲུང་སེར་པོའི་དབུས་སུ་རི་དང་རྩ༔ ཡན་ལག་བཞི་ལ་ཧ་ཨ་ནི་སའོ༔ སྙིང་གར་པད་འདབ་བཞི་དང་ཉི་ཟླའི་དབུས་སུ་མ་དང་ཧཱུྃ་ལས་སངས་རྒྱས་མཁའ་འགྲོ་ཡབ་ཡུམ་མཐིང་ཀ་འདབ་མ་བཞི་ལ་ཧ་རི་ན་ས་ལས་དེ་འདྲ་བའི་འཁོར་བཞི༔ སྙིང་གར་གཡུང་དྲུང་འགྱིལ་བའི་དབུས་སུ་མ་དང་ཧཱུྃ༔ ཡན་ལག་བཞི་ལ་ཧ་རི་ནི་སའོ༔ ལྟེ་བར་པད་འདབ་བཞིའི་དབུས་སུ་ཉི་ཟླ་ལ་ནི་དང་ཧྲཱིཿདམར་པོ་ལས༔ པདྨ་མཁའ་འགྲོ་ཡབ་ཡུམ་དམར་པོ༔ འདབ་མ་བཞི་ལ་ཧ་རི་ཨ་ས་བཞི་ལས༔ དེ་འདྲ་བའི་འཁོར་བཞི༔ ཐུགས་ཀར་གཡུང་དྲུང་དམར་པོའི་དབུས་སུ་ནི་དང་ཧྲི་ཧྲཱི༔ ཡན་ལག་བཞི་ལ་ཧ་རི་ཨ་སའོ༔ གསང་བར་པད་འདབ་བཞིའི་ལྟེ་བར་ཉི་ཟླ་ལ་ས་དང་ཡ་ལས༔ ལས་ཀྱི་མཁའ་འགྲོ་ལྗང་གུ༔ འདབ་མ་བཞི་ལ་ཧ་རི་ནི་ཨ་ལས༔ དེ་འདྲ་བའི་འཁོར༔ ཐུགས་ཀར་གཡུང་དྲུང་ལྗང་གུའི་དབུས་སུ་ས་དང་ཡ༔ ཡན་ལག་བཞི་ལ་ཧ་རི་ནི་ཨའོ༔ དེ་ཐམས་ཅད་ཀྱང་སྣང་ལ་རང་བཞིན་མེད་པ་རྒྱན་ཆ་ལུགས་ཡོངས་སུ་རྫོགས་པ༔ འོག་མིན་དང་ཕྱོགས་བཞིའི་འཇིག་རྟེན་ནས༔ ཡེ་ཤེས་པ་བསྟིམ་ལ་རླུང་ཁ་སྦྱོར་དུ་བཟུང་བས་ལྷ་དེ་རྣམས་ཀྱི་འོད་ཟེར་གྱིས༔ འཇིག་རྟེན་ཐམས་ཅད་གཡོ་འདེགས་འཕར་བ་ལས༔ སྐྱེ་འགྲོ་ཐམས་ཅད་དབང་དུ་བསྡུས༔ ཟས་ནོར་གྱི་ཆར་ཕབ༔ ནད་གདོན་བར་ཆད་ཞི་བར་བསམ་ལ༔ ཨཱོཾ་ཧྲཱི་མ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛ༔ ཨཱོཾ་བུདྡྷ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛ༔ དེ་བཞིན་དུཿཨཱོཾ་བཛྲ་ཌཱ་ཀི་ནི་ཧ་རི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛ༔ ཨཱོཾ་རཏྣ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛ༔ །ཨཱོཾ་པདྨ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་ཙཏྟ་ཧྲིཾ་ཧྲིཾ་ཛཿཛ༔ ཨཱོཾ་ཀརྨ་ཌཱ་ཀི་ནི་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛ༔ ཞེས་བརྗོད་པས༔ འཁོར་ལོ་ལྔའི་ལྷའི་ཐུགས་ཀའི་གཡུང་དྲུང་རྣམས་དྲག་ཏུ་འཁོར་བས༔ ལྷ་དེ་རྣམས་རང་གི་སྙིང་ག་ན་འཁྲབ་ཅིང་གར་བྱེད་པས༔ སྐྱེ་འགྲོ་
ཐམས་ཅད་ཀྱི་དྲན་པ་མྱོས་པར་བྱས་ཏེ་དབང་དུ་བསྡུས་ནས་བདག་གི་རྐང་པའི་དྲུང་དུ་ལྷགས་པར་བསམ་ཞིང་༔ རླུང་ཕྱིར་སོང་བས་འོད་ཟེར་དམར་པོ་ལྕགས་ཀྱུ་དང་༔ ཞགས་པ་དང་༔ ལྕགས་སྒྲོག་དང་༔ དྲིལ་བུའི་རྣམ་པས༔ འགྲོ་བ་རྣམས་བཀུག༔ བཅིངས༔ བསྡམས༔ དབང་དུ་བྱས༔ ནང་དུ་རྔུབས་པས་དེ་རྣམས་སྙིང་ག་དང་གསང་གནས་སུ་ཐིམ་པར་བསམ་ལ༔ ལུས་ལྷ༔ ངག་སྔགས༔ སེམས་ཏིང་འཛིན་ལས་མ་ཡེངས་པར་རབ་ཏུ་ཆགས་པས་བཀུག་པར་བྱའོ༔ སྐབས་སུ་ཐིག་ལེའི་འགྲེམས་སྡུད་ཀྱིས་བདེ་སྟོང་སྤར་བཞིན་མཁའ་འགྲོ་རྣམས་མཉེས་པར་བྱའོ༔ དེ་ལྟར་ཞག་བདུན་ནི་བསྙེན་པའོ༔ དེ་ནས་སྒྲུབ་པ་དང་ལས་སྦྱོར་ནི༔ གང་ལ་དམིགས་པའི་བསྒྲུབ་བྱ་དེའི་སྙིང་གའི་ནང་ན་བདག་ཉིད་ཡོད་པར་བསམ་ལ༔ སྔགས་བཟླས་དམིགས་པས་གཅུན་ལ༔ ཁོ་རང་དབང་མེད་པར་རང་ལ་འདུད་ཅིང་དགའ་བར་བསམ་སྟེ༔ ཨཱོཾ་ཧྲཱི་མ་ཧ་རི་ནི་ས༔ ར་ཙ་ཧྲི་ཡ་ཆྒཻ་མོ་ཨ་ཀཪྴ་ཡ་ནྲྀ་ཁུག་ཛཿཛ༔ ཞེས་པས་རྣམ་ཤེས་ཨའི་རྣམ་པ་ཅན་རང་གི་གསང་གནས་དང་༔ སྙིང་གར་ཐིམ་པར་བསམ་ལ༔ དྲག་ཏུ་བཟླས་པས་ཞག་གསུམ་ན་རང་དབང་མེད་པར་ཁུག་གོ༔ དེ་བཞིན་དུ་ནོར་སྒྲུབ་པའི་ཚེ་རང་གི་སྙིང་གའི་འོད་ཀྱིས་ཕྱོགས་བཅུའི་ནོར་ལྷ་བཀུག་ལ༔ སྒྲུབ་ཁང་དུ་ནོར་གྱི་ཆར་འབེབས་པར་བསམ༔ ཨཱོཾ་ཧྲཱི་མ་ཧ་རི་ནི་ས་ར་ཙ་ཧྲི་ཡ་སིདྡྷི་ཕ་ལ་བེ་ཤྲ་མ་ནེ་ཙིཏྟ་ཧྲིཾ་ཧྲིཾ་ཛཿཛ༔ ཞེས་སོ༔ ནད་གདོན་དང་སྡིག་པ་ཞི་བ་ལ་ནི༔ འོད་ཟེར་དཀར་པོས་རང་གི་ལུས་ངག་ཡིད་གསུམ་གྱི་བར་ཆད་སྡིག་སྒྲིབ་སྦྱངས་པར་བསྒོམ་ལ༔ ཨཱོཾ་ཧྲཱི་མ་ཧ་རི་ནི་ས༔ ནད་གདོན་སྡིག་སྒྲིབ་ཤཱནྟིང་ཀུ་རུ་ཡེ་སྭཱཧཱ༔ ཞེས་སོ༔ ལྷ་ལ་གང་སྒྲུབ་ཀྱང་དེ་དང་མཐུན་པའི་སྐུ་མདོག་དང་འོད་ཟེར་དུ་གསལ་བའི་ཐུགས་ཀ་ནས་འོད་ཟེར་གྱི་སྤྲོ་བསྡུ་དང་༔ རིགས་དེའི་ལྷའི་སྔགས་ཐོག་མར་འདྲེན་པ་ནི་གནད་དོ༔ དེ་ལྟར་
བཟླས་པའི་རྣལ་འབྱོར་པས་འཁོར་ལོ་ལྔ་གསལ་བཏབ་སྟེ༔ བཟའ་བཏུང་མཁའ་འགྲོའི་ཚོགས་འཁོར་བྱ༔ གལ་ཏེ་ལས་རྣམས་མ་གྲུབ་ན༔ འཁོར་ལོ་ལྔ་ཡི་མཁའ་འགྲོ་མ༔ གང་ཡིན་འཁྲབ་ཅིང་གཟིར་བ་དང་༔ དེ་ཡི་སྲོག་སྔགས་ཐོག་མར་བགྲང་༔ དེས་ནི་ཐེ་ཚོམ་མེད་པ་འོ༔ སངས་རྒྱས་མཁའ་འགྲོའི་དམ་ཚིག་ཏུ༔ སྐྱེ་མེད་དོན་ལ་གནས་པར་བྱ༔ རྡོ་རྗེ་མཁའ་འགྲོའི་དམ་ཚིག་ཏུ༔ སེམས་ཅན་ཀུན་ལ་བྱམས་པ་སྒོམས༔ རིན་ཆེན་མཁའ་འགྲོའི་དམ་ཚིག་ཏུ༔ མ་ཆགས་སྦྱིན་པ་ཕྱོགས་མེད་གཏང་༔ པདྨ་མཁའ་འགྲོའི་དམ་ཚིག་ཏུ༔ གཏུམ་མོ་སྒོམ་ཞིང་བདེ་སྟོང་སྤར༔ ལས་ཀྱི་མཁའ་འགྲོའི་དམ་ཚིག་ཏུ༔ སྨྱོན་སྤྱོད་གདུག་རྩུབ་སྣ་ཚོགས་བྱ༔ མེ་ནང་མཁའ་འགྲོ་ལྔ་བསྐྱེད་ལ༔ ཟས་སྣ་འབྲུ་སྣ་སྣ་ཚོགས་བསྲེག༔ ཚོགས་གཏོར་བུད་མེད་སྟོན་མོ་བྱ༔ དེས་ནི་མྱུར་དུ་འགྲུབ་པར་འགྱུར༔ བསྐྱེད་རིམ་ཡིད་བཞིན་ནོར་བུ་ཞེས་བྱ་བ༔ གངས་རི་ཐོད་དཀར་དུ་བཀོད་པ༔ ཨྠྀི༔ རྒྱ་རྒྱ་རྒྱ༔
རྫོགས་རིམ།
རྫོགས་རིམ་བཞུགས༔ མཁའ་འགྲོ་བདེ་ཆེན་རྒྱ་མཚོ་ལས༔ རྫོགས་རིམ་ཡེ་ཤེས་འཁོར་ལོ་བཤད༔ དེ་ཡང་ཡེ་ཤེས་སེམས་གཉིས་ལས༔ ལྔ་ལྡན་འོད་ཀྱི་རིམ་པ་ནི༔ བདེ་བའི་སྟན་ལ་འདུག་ནས་ཀྱང་༔ སངས་རྒྱས་མཁའ་འགྲོའི་ཞིང་ཁམས་སུ༔ རྡོ་རྗེ་མཁའ་འགྲོའི་མེ་ལོང་ལ༔ པདྨ་མཁའ་འགྲོའི་སྒོ་ཕྱེ་སྟེ༔ སྒོ་ལ་ལས་ཀྱི་མཁའ་འགྲོ་བྱོན༔ རིན་ཆེན་མཁའ་འགྲོ་མཁའ་ལ་སྣང་༔ མི་འགུལ་མི་བསམ་མི་ཡེངས་པར༔ ཡེ་ཤེས་ཉིད་ལས་འབྲལ་མི་བྱ༔ ཚེ་འདི་ཉིད་ལ་རྫོགས་སངས་རྒྱས༔ སེམས་ཀྱི་རྫོགས་རིམ་རྣམ་གསུམ་ལས༔ བདེ་བ་ཉིད་ནི་བསྒོམ་འདོད་ན༔ འཁོར་ལོ་ལྔ་ཡི་དབུས་དག་ན༔ རྩ་གསུམ་སྦུག་མ་སྟོང་པ་ལ༔ ཡར་སྣ་ཚང་བུག་ཡི་གེ་ཧཾ༔ མར་སྣ་གསང་གནས་
ཡི་གེ་ཨ༔ ལྟེ་བར་རཾ་ལས་མེ་འབར་བས༔ ཧཾ་ལས་བྱང་སེམས་འོ་རྒྱུན་བབ༔ གསང་གནས་བར་དུ་ཁྱབ་པ་ལ༔ ཨ་དང་འདྲེས་པས་བདེ་སྟོང་སྐྱེས༔ སླར་བཟློག་ཧཱུྃ་རིང་བཞི་བརྗོད་ནས༔ ནི་ནྲྀ་ཧིང་ནི་ཉེར་གཅིག་གིས༔ སྒལ་ཚིགས་དྲངས་ལ་དགྲམ་པར་བྱ༔ དེ་ཉིད་འབྱངས་ནས་བཙུན་མོ་དང་༔ མཉམ་དུ་སྦྱར་བས་བདེ་སྟོང་སྒོམ༔ མི་རྟོག་ཀ་དག་ངང་ལ་གཞག༔ གཉིས་པ་གསལ་སྟོང་ཡེ་ཤེས་ནི༔ གང་ཤར་རིག་པ་ངོས་བཟུང་ལ༔ མི་དགག་མི་སྒྲུབ་རང་སར་བཞག༔ ཁྱད་པར་རྩ་གསུམ་གསལ་བཏབ་ལ༔ བུམ་པ་ཅན་དུ་བསྐྱིལ་བ་དང་༔ སེངྒེ་རྣམ་གྲོལ་འཆིང་བ་དང་༔ ཆུ་སྲིན་ཅན་དུ་མཉམ་པར་གནས༔ དང་པོར་རླུང་རོ་ཕུད་ནས་ཀྱང་༔ ལྟེ་འོག་ཨ་ལ་སེམས་བཟུང་ལ༔ འོག་རླུང་གཙོ་བོར་བསྐྱིལ་བ་ཡིན༔ གཉིས་པ་སྟེང་རླུང་འཆིང་བ་སྟེ༔ སྙིང་ཀའི་ཧ་རི་ནི་ས་ལ༔ སེམས་བཟུང་གཙོ་བོར་སྟེང་རླུང་མནན༔ གསུམ་པ་བར་རླུང་སྦྱང་བ་སྟེ༔ མཉམ་གནས་གང་ལའང་མི་རྟོག་པས༔ འགྲོ་འོང་རབ་ཏུ་དལ་བ་ཡིན༔ དེ་དུས་གསལ་ལ་མི་རྟོག་པའི༔ ཡེ་ཤེས་དོན་དེ་ངོས་བཟུང་ལ༔ ཡུན་དུ་བསྒོམ་པ་རབ་ཏུ་གཅེས༔ ལུས་གཅུན་འཁྲུལ་འཁོར་སྣ་ཚོགས་བྱ༔ གཡོན་དང་མཉམ་རྒྱུའི་རླུང་དང་ནི༔ དད་དང་ངེས་འབྱུང་སྐྱེས་ཚེ་གཟུང་༔ ཆགས་སོགས་ཉོན་མོངས་སྐྱེས་ཚེ་འབུད༔ ནང་དུ་མི་གཟུང་དྲག་ཏུ་འདོན༔ དེས་ནི་གསལ་སྟོང་ཆོས་སྐུ་སྐྱེ༔ གསུམ་པ་མི་རྟོག་ཡེ་ཤེས་ནི༔ ལུས་བསྲང་ཨེ་ཡི་འདུག་སྟངས་ཀྱིས༔ སྟེང་འོག་རླུང་སྦྱར་མིག་མི་འགུལ༔ བར་སྣང་མདའ་གང་ཚད་དུ་གཏད༔ གང་ཡང་མི་སེམས་མི་རྟོག་ཅིང་༔ མ་བཅོས་མ་བསླད་འགྱུར་བ་མེད༔ ཇི་ལྟར་ནམ་མཁའ་དག་པ་བཞིན༔ མི་རྟོག་མཐའ་དབུས་མེད་པར་བཞག༔ འཕྲོ་ན་འཕྲོ་མཁན་རང་གི་སེམས༔ ཁ་དོག་དབྱིབས་བྲལ་ངོས་གཟུང་མེད༔ གནས་ན་གནས་མཁན་རང་གི་སེམས༔ ཡེ་གྲོལ་གདོད་མའི་གནས་ལུགས་ཉིད༔ བླང་དོར་རེ་
དོགས་རྩིས་གདབ་མེད༔ ཡེ་སྟོང་རྩ་བྲལ་ཆེན་པོར་གཞག༔ རྗེས་ལ་ཕྱི་ནང་སྣང་སྲིད་ཀུན༔ རང་སྣང་ཡིན་ཏེ་རྨི་ལམ་འདྲ༔ སྣང་ལ་བདེན་མེད་ཆུ་ཟླ་འདྲ༔ རྟེན་འབྲེལ་ཙམ་སྟེ་སྒྱུ་མ་འདྲ༔ ཆགས་སྡང་རེ་དོགས་མེད་པར་བལྟ༔ ཉོན་མོངས་དུག་ལྔ་གང་སྐྱེས་ཀྱང་༔ རླབས་ཉིད་རྒྱ་མཚོར་ཐིམ་པ་ལྟར༔ རང་ཤར་ཆོས་སྐུའི་ལམ་ཁྱེར་བྱ༔ ཡོད་མེད་སྣང་སྟོང་བཏགས་པ་ཙམ༔ འཁོར་འདས་རང་སྣང་རྨི་ལམ་ཙམ༔ བླང་དོར་རེ་དོགས་བློས་བཏགས་ཙམ༔ དོན་ལ་གཉིས་མེད་ཆོས་སྐུར་སྦྱར༔ དེ་ལྟར་ཤེས་པའི་རྣལ་འབྱོར་ལ༔ ཐམས་ཅད་རྣམ་དག་བདེ་བའི་ཞིང་༔ ཨོ་རྒྱན་ཡེ་ཤེས་མཁའ་འགྲོའི་ཞིང་༔ ལོགས་ན་མེད་དེ་རང་ལ་ཚང་༔ མཁའ་འགྲོ་སྤྲིན་བཞིན་ངང་གིས་འདུ༔ མཆོག་དང་ཐུན་མོང་དངོས་གྲུབ་ཐོབ༔ བདག་འདྲ་དྲི་མེད་འོད་ཟེར་གྱིས༔ མཁའ་འགྲོའི་གནད་ཡིག་གསང་བ་འདི༔ གངས་རི་ཐོད་དཀར་མགུལ་དུ་བཀོད༔ ཨྠྀི༔ རྒྱ་རྒྱ་རྒྱཿ
རླུང་དྲུག་རྡོ་རྗེའི་ཆིངས།
རླུང་དྲུག་རྡོ་རྗེའི་ཆིངས་བཞུགསཿ ཤོག་སེར་སྐོར༔ མཁའ་འགྲོ་བདེ་ཆེན་རྒྱ་མཚོ་ལས༔ རླུང་དྲུག་རྡོ་རྗེའི་ཆིངས་ཉིད་བཤད༔ ཆོས་ཀུན་སྟོང་པའི་ངང་ཉིད་ལས༔ འདབ་བཞི་ཆོས་འབྱུང་དམར་གསལ་དབུས༔ ཧཱུྃ་ལས་རང་ཉིད་ཕག་མོའི་སྐུ༔ མཐིང་ནག་གྲི་གུག་ཐོད་ཁྲག་འཛིན༔ ཁ་ཊྭཱཾ་དྲིལ་བུའི་ཕྲེང་བས་བརྒྱན༔ རོ་སྟེང་གཡས་བསྐུམ་གཡོན་བརྐྱང་ཞིང་༔ ཕག་ཞལ་སྤྱན་གསུམ་ཁྲོས་པར་བསམ༔ སྙིང་གར་པདྨ་ཉི་ཟླའི་དབུས༔ ཨེ་དང་ཧ་རི་ནི་ས་ལས༔ གཙོ་མོ་འདྲ་བའི་མཁའ་འགྲོ་ལྔ༔ ཐུགས་ཀར་ས་བོན་ཡིག་འབྲུས་མཚན༔ སྟོང་གསུམ་རང་ལ་ཐིམ་པར་བསམ༔ རླུང་ནི་མཉམ་གནས་ཐུབ་ཐང་གཟུང་༔ ཕྱིར་རྒྱུ་ཨཱོཾ་དཀར་ནང་འཇུག་ཨཱ༔ གནས་པ་ཧཱུྃ་ཡིན་སྣོད་བཅུད་བསྡུ༔ ཐུགས་ཀར་ལྷ་ལྔ་གར་བྱེད་པས༔ ཐམས་ཅད་དབང་བསྡུས་རླུང་ཉིད་བསྒོམ༔ རྩ་བའི་རླུང་ནི་དང་པོ་ཡིན༔ ཡན་ལག་རླུང་ནི་སྤྱི་བོ་རུ༔ རྡོ་རྗེ་མཁའ་འགྲོ་ཡབ་ཡུམ་དཀར༔ སྙིང་གར་ཧ་དང་ཕྱོགས་བཞི་རུ༔ ཨ་རི་ནི་ས་
འཁོར་བ་ཡིས༔ འཇིག་རྟེན་བསྡུ་ཞིང་སྤྱི་གཙུག་ཏུ༔ དམིགས་པ་གཏད་པས་རླུང་གཟུང་འགྱུར༔ དེ་བཞིན་མགྲིན་པར་པད་ཟླའི་སྟེང་༔ རིན་ཆེན་མཁའ་འགྲོ་སེར་གསལ་ཏེ༔ ཐུགས་ཀར་རི་དང་ཕྱོགས་བཞི་རུ༔ ཧ་ཨ་ནི་ས་སེར་པོ་བསྒོམ༔ སྙིང་གར་སྔར་བཞིན་དམིགས་པ་སྟེ༔ ལྟེ་བར་པདྨ་མཁའ་འགྲོ་དམར༔ ཐུགས་ཀར་ནི་ལ་ཧ་རི་ཨ༔ ས་གཞི་དག་གིས་བསྐོར་བ་ལས༔ བུད་མེད་རྣམས་ནི་གཙོ་བོར་དགུག༔ ཆགས་པས་བདེ་སྟོང་བསྒོམ་པར་བྱ༔ གསང་བར་ལས་ཀྱི་མཁའ་འགྲོ་ལྗང༔ ཐུགས་ཀར་ས་ལ་ཧ་རི་ནི༔ ཨ་བཞིས་བསྐོར་བའི་འོད་ཟེར་གྱིས༔ སྐྱེས་པ་རྣམས་ནི་གཙོ་བོར་དགུག༔ དེ་ལྟར་འཁོར་ལོ་ལྔ་དབུས་སུ༔ མཁའ་འགྲོ་ལྔ་ཚན་ལྔ་བསྒོམས་ལ༔ རང་དང་མཐུན་པའི་འོད་ཟེར་ནི༔ ཡི་གེ་གསུམ་གྱི་རྣམ་པ་ཡིས༔ རྡོ་རྗེ་རླུང་གི་བཟླས་པ་ཡིས༔ ཞག་དྲུག་བསྒོམས་པའི་རྣལ་འབྱོར་མ༔ མཁའ་འགྲོས་དངོས་སུ་ལུང་སྟོན་ཅིང་༔ མཆོག་དང་ཐུན་མོང་དངོས་གྲུབ་ཐོབ༔ དམ་ཚིག་ཆགས་ཞེན་ཆུང་བ་དང་༔ བུད་མེད་མི་སྤང་བདེ་སྟོང་བསྒོམ༔ བྱམས་དང་སྙིང་རྗེ་བྱང་སེམས་བསྒོམ༔ ལྟ་བ་ནམ་མཁའ་ཡངས་པ་ལས༔ སྨྱོན་སྤྱོད་ཐོ་ཅོ་སྐབས་སུ་བརྩམ༔ གཏད་མེད་རང་གྲོལ་ལམ་ཁྱེར་བྱ༔ ཇི་སྲིད་ཆེད་འཛིན་ཞིག་པ་ན༔ མཁའ་འགྲོའི་དངོས་གྲུབ་མཐར་ཐུག་ཡིན༔ རླུང་དྲུག་རྡོ་རྗེའི་ཆིངས་ཞེས་བྱ་བ༔ མཁའ་འགྲོ་བདེ་ཆེན་རྒྱ་མཚོ་རྫོགས་སོ༔ ཨྠྀི༔ རྒྱ་རྒྱ་རྒྱ༔ ཤུ་བྷཾ༔ ༔ཧཱུྃ