ཡང་ཏིག་གཅེས་སྒྲོན་གྱི་ཁྲིད་རྒྱུན་བཀྲ་བཟང་ལུགས་ཀྱི་ཆོས་ཐུན་རྐང་གྲངས། རིག་འཛིན་འགྱུར་མེད་རྡོ་རྗེ།
ཡང་ཏིག་གཅེས་སྒྲོན་གྱི་ཁྲིད་རྒྱུན་བཀྲ་བཟང་ལུགས་ཀྱི་ཆོས་ཐུན་རྐང་གྲངས་བཞུགས་སོ། རིག་འཛིན་འགྱུར་མེད་རྡོ་རྗེ། །ༀ་བླ་མ་ལ་ཕྱག་འཚལ་ལོ། །དེ་དང་གཉིས་སུ་མེད་པའི་རང་སེམས་གདོད་མའི་མགོན་པོ་ལ་ཡང་ཕྱག་འཚལ་ལོ། །ཡང་ཏིག་གཅེས་སྒྲོན་གྱི་ཁྲིད་རྒྱུན་བཀྲ་བཟང་པའི་ལུགས་ཀྱི་ཆོས་ཐུན་རྐང་གྲངས་ནི། སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་ལས། དང་པོ་སྔོན་འགྲོ་རྩ་བར། ཨེ་མ་ཕྱིན་ཆད་ང་ཡི་རྗེས་འཇུག་རྣམས༔སོགས་ཚིག་དྲུག །རིན་པོ་ཆེ་གནད་ཀྱིས་གཟེར་ལྔས་ཆོས་ཀྱི་སྒོ་དབྱེ་བ་ལ། ༼༡༽ལམ་ལོག་པ་ལས་ལྡོག་ཕྱིར་སྐྱབས་འགྲོ། ༼༢༽ལམ་དམན་པ་ལས་ལྡོག་ཕྱིར་སེམས་བསྐྱེད། ༼༣༽ཚོགས་བསགས་པ་མཎྜལ་ཕྱི་ནང་གསང་གསུམ། ༼༤༽སྡིག་པ་སྦྱོང་བ་རྡོར་སེམས་ཡིག་བརྒྱའི་སྒོམ་བཟླས། ༼༥༽འཁོར་བ་ལས་ངེས་པར་ཕྱུང་བ་མི་རྟག་བསྐུལ་འདེབས་དང་བྱིན་རླབས་མྱུར་འཇུག་བླ་མའི་རྣལ་འབྱོར་གྱི་རིམ་པ་རྣམས་སོ། །དོན་གཉིས་པ་དངོས་གཞི་ལ། བསྐྱེད་རིམ་དང་རྫོགས་རིམ་གཉིས་ཀྱི། ༼༦༽དང་པོ་ལུས་ལྷ། ༼༧༽ངག་སྔགས། སེམས་ཆོས་ཉིད་ཀྱི་དཀྱིལ་འཁོར་དུ་སྟོན་པ་དང་གསུམ། དང་པོ་ལུས་ལྷའི་དཀྱིལ་འཁོར་དུ་སྟོན་པ་ལ། རྩ་བར། མ་ཧཱ་གུ་རུ་རྡོ་རྗེ་དྲག་པོ་རྩལ༔ང་ཡི་སྐུ་འཚོབ་ཡིན་པས་གསལ་བར་སྒོམ༔ཧཱུྃ་གི་སྒྲ་གདངས་ཀྱིས་ལྷའི་དཀྱིལ་འཁོར་དུ་བསྐྱེད་པ། ༼༨༽རྣམ་པ་སྤྱི་ལ་སེམས་འཛིན། ༼༩༽བྱེ་བྲག་ལ་སེམས་འཛིན། ༼༡༠༽དག་དྲན་ལ་སེམས་འཛིན། ༼༡༡༽ང་རྒྱལ་ལ་སེམས་འཛིན་པ་རྣམས་སོ། །གཉིས་པ་ངག་སྔགས་ཀྱི་དཀྱིལ་འཁོར་ལ། ཡང་ཏིག་དཔའ་བོ་འབྲུ་གཅིག་སྔགས་ཀྱི་འབྲུ༔ང་ཡི་གསུང་འཚོབ་ཡིན་པས་རྒྱུན་དུ་ཟློས༔༼༡༢༽བསྙེན་པ། ༼༡༣༽སྒྲུབ་
པ། ༼༡༤༽སྒྲུབ་ཆེན། ༼༡༥༽ལས་སྦྱོར་དང་བཞིའོ། །༼༡༦༽གསུམ་པ་ཐུགས་ཆོས་ཉིད་ཀྱི་དཀྱིལ་འཁོར་དུ་བལྟ་བ། སྔ་མའི་རྗེས་འབྲེལ་དུ་སྐབས་འདིར། ལུས་དཀྱིལ་སྟོན། ༼༡༧༽དོན་གཉིས་པ་རྫོགས་པའི་རིམ་པ་ལ། ༼༡༨༽བསམ་གཏན་གྱི་གཞི་བཅའ་བ། ལུས་ཀྱི་གནད་ནི་མཉམ་བཞག་དྲང་པོར་བསྲང་༔སོགས་ཚིག་ལྔ། ༼༡༩༽རང་སེམས་བླ་མར་བསྲེ་བ། ཐོ་རེངས་དུས་ནས་ཧཱུྃ་གི་སྣང་གླུ་བླང་༔སོགས་ཚིགས་དྲུག །དེའི་གེགས་སེལ་བཞི་ལས། དང་པོ་གཏི་མུག་གི་བྱིང་བ་སེལ་བ། དེ་ལ་སྒོམ་གྱི་རྐྱེན་ལྔ་བསལ་བ། བྱིངས་ཤིང་འཐིབ་ན་གཏི་མུག་ལས་ངན་སློང་༔སོགས་བཞི། ༼༢༠༽གནས་སོགས་ཀྱིས་སེལ་བ། ༼༢༡༽དམིགས་པས་སེལ་བ། གུ་རུ་དམར་སྨུག་མདངས་ལྡན་བདག་ལ་བསྟིམ༔སོགས་གསུམ། ༼༢༢༽གཉིས་པ་ཞེ་སྡང་གི་རྒོད་པ་སེལ་བ། རྣམ་རྟོག་རྒོད་ཅིང་ཧྲག་ན་ཞེ་སྡང་སློང་༔སོགས་དགུ། གསུམ་པ་འདོད་ཆགས་ཀྱི་རྒོད་པ་སེལ་བ། ཤེས་པ་རྗེ་འཁོར་སོགས་གཉིས། ༼༢༣༽གཏུམ་མོས་སེལ་བ། ལྟེ་བའི་འོག་ནས་མེ་བྱུང་སོགས་བཞི། ༼༢༤༽དམིགས་པས་སེལ་བ། གུ་རུ་མཐིང་ནག་སོགས་གསུམ། ༼༢༥༽བཞི་པ་དུག་གསུམ་ཆ་མཉམ་གྱི་གེགས་སེལ་བ། གཏད་མེད་བསྒོམ་དང་ཤེས་པ་རྗེ་འཁོར་ནས་སོགས་བཅུ་བཞི། ༼༢༦༽འཁྲུལ་སྣང་སྟོང་པར་བལྟ་བ་དང་། མན་ཤེལ་སོགས་ཀྱིས་སེལ་བ། ནམ་མཁའ་མན་ཤེལ་དག་ལ་ཤེས་པ་གཏད༔སོགས་གསུམ། ༼༢༧༽ཞི་གནས་ཀྱི་བསྒོམ་གྱི་གཞི་བཅའ་བ། གུ་རུ་འོད་ཟེར་ལྔ་ལྡན་བདག་ལ་བསྟིམ༔སོགས་བཅུ་གཉིས། ༼༢༨༽ལྷག་མཐོང་གིས་རྩལ་སྦྱང་བ། དེ་ལ་ཞེན་ནས་རིག་པ་འཐས་པ་ན༔སོགས་ཚིག་ཞེ་བདུན། ༼༢༩༽སེམས་ཀྱི་བྱུང་ས་བལྟ་བ། དེ་ནས་རྣལ་འབྱོར་སེམས་ཀྱི་སོགས་བཞི། ༼༣༠༽གཟུགས་སོགས་ལ་བལྟ་བ། ༼༣༡༽སེམས་ཀྱི་འགྲོ་ས་བལྟ་བ། དེ་ནས་ཞག་གསུམ་སེམས་ཀྱིས་འགྲོ་ས་སོགས་བཞི། ༼༣༢༽གནས་ལུགས་རྟོགས་ནས་མཉམ་བཞག་བྱ། ངེས་པར་རྟོགས་ནས་སེམས་ཀྱི་ངོ་བོ་འདི༔སོགས་བཅོ་བརྒྱད། དོན་གསུམ་པ་རྗེས་ཀྱི་རིམ་པ་ལྔ་ལས། ༼༣༣༽དང་པོ་ནམ་མཁའ་དཔེས་ངོ་བོ་ཉིད་དུ་ངོ་སྤྲོད་པ། རིགས་ཀྱི་བུ་སྣང་སྲིད་འཁོར་འདས་སོགས། གཉིས་པ་མན་ཤེལ་གྱིས་མདངས་འགགས་མེད་དུ་ངོ་སྤྲོད་པ། རིགས་ཀྱི་བུ་ཉོན་ཅིག་སོགས། གསུམ་པ་སྙིང་གར་མཛུབ་མོ་བཙུགས་པའི་དཔེས་རང་སེམས་གདོད་མའི་མགོན་པོར་ངོ་སྤྲོད་པ། རིགས་ཀྱི་བུ་ལུས་མཉམ་པར་ཞོག་སོགས། མཐའ་བརྟེན་དུ་ཕྱི་གཟུང་ཡུལ་དང་
ནང་འཛིན་སེམས་གཞི་མེད་རྩ་བྲལ་དུ་དག་པ། ད་ཕྱི་གཟུང་བའི་ཡུལ་ཇི་ལྟར་དག་ན་སོགས། བར་དུ་འོད་གསལ་མ་བུ་སྤྲོད་པ། བར་དུ་འོད་གསལ་མ་བུ་འཕྲོད་པ་རང་ངོ་ཤེས་པ་སོགས་ཨོ་རྒྱན་པདྨ་འབྱུང་གནས་བདག་སོགས་སོ། །རྗེས་གཏད་རྒྱས་གདབ་པའོ། །དེ་ལྟར་དམིགས་རིམ་གྱི་ས་བཅད་དཀྱུས་དང་། གཞུང་རྣམས་མཆན་དུ་བཀོད་པ་བཀྲ་བཟང་པའི་ལུགས་སོར་བཞག་དང་ནུབ་དགོན་པའི་ལུགས་ལ་བསྐྱེད་རིམ་གྱི་སྐབས་སུ་རྗེས་གཞིག་དང་རིལ་འཛིན་གྱི་དམིགས་སྐོར་བརླན་པར་བྱས་པ་ཡིན་ནོ། །ཞེས་པའང་འགྱུར་མེད་རྡོ་རྗེས་སོ།། །།