ཆོས་ཐང་དགོན་དུ་ཞབས་སོར་བཀོད་ནས་རིས་མེད་སློབ་གླིང་གི་འགྲོ་ཕྱོགས་ལམ་སྟོན་དང་སྔོན་འགྲོ་བསགས་སྦྱང་གི་སྲོལ་བཙུགས་པའི་བསྐོར་གྱི་རྣམ་ཐར།

ཕྱི་ལོ། ༢༠༡༣ རབ་གནས་ཆུ་སྦྲུལ་ལོའི་བོད་ཟླ་དང་བོའི་ཚེས་ཉི་ཤུ་གསུམ་གྱི་ཉིན་པར་བཤེས་གཉེན་རིན་པོ་ཆེའི་ཞབས་ཟུང་བྱིན་རླབས་ཀྱི་གཟི་འོད་འབར་བ་དེ་ཉིད་ཆོས་ཐང་དགོན་དུ་ཉེ་བར་བཀོད་པ་ན། ཕྱོགས་དང་ཕྱོགས་ནས་བུང་བ་མེ་ཏོག་གི་ཚལ་ལ་འདུ་བ་བཞིན་དུ་སྐལ་ལྡན་སློབ་གཉེར་བའི་ཚོགས་མང་པོ་ཆོས་བརྒྱུད་སོ་སོ་དང་ས་ཕྱོགས་དང་དགོན་ཁག་མི་གཅིག་པ་ཐག་ཉེ་རིང་ཀུན་ནས་ངང་གིས་འདུས་ཏེ། ཚེས་ཉེར་ལྔའི་ཉིན་ནང་པ་སངས་རྒྱས་པའི་ཆོས་ཐམས་ཅད་ཀྱི་འཇུག་སྒོ་སྐྱབས་འགྲོ་ཡིན་པས། བཤེས་གཉེན་རིན་པོ་ཆེ་ཉིད་ཀྱིས་མཛད་པའི་སྐྱབས་འགྲོའི་རྣམ་བཤད་མ་ནོར་ལམ་བཟང་གསལ་བའི་ཉི་མ་ཞེས་བྱ་བའི་སྟེང་ནས་ཆོས་ཁྲིད་ཀྱི་དབུ་བཟུང༌། ད་ལྟའི་ཆར་གངས་ལྗོངས་རིས་མེད་མཐོ་སློབ་གཙུག་ལག་སློབ་གཉེར་ཁང་གི་སྒྲིག་ཡིག་གམ་སྲོལ་ཡིག་གཏན་འབེབས་ནང་དུ་ཡང༌། ལོ་རེའི་སློབ་འགོ་ཚུགས་པ་ན་སྐྱབས་འགྲོའི་ཆོས་ཁྲིད་བྱེད་དགོས་ཀྱི་གཏན་ཁེལ་དེ་ཉིད་ཀྱང་སྒོ་གསུམ་ཆོས་དང་མཐུན་པའི་བཤེས་གཉེན་རིན་པོ་ཆེ་མཆོག་གི་ཐུགས་བཀོད་བདུད་རྩིའི་ཟེགས་མ་ལྟ་བུ་ཡིན་ནོ། །ཚེས་ཉི་ཤུ་བདུན་གྱི་ཉིན་ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་གྱི་ཆོས་ཁྲིད་དང༌། ཚེས་ཉེར་བརྒྱད་ཉིན་ལོ་ན་རྒན་གྲས་ཆོས་རར་ཕེབས་མི་ཐུབ་པ་རྣམས་ལ་ལམ་རིམ་གྱི་ཁྲིད་དང༌། ཕར་ཕྱིན་གསར་སྦྱང་སྟེ་གཞུང་གསར་འཛིན་གྲྭ་ལ་ས་ལམ་གྱི་རྣམ་བཞག་ཤེལ་དཀར་མེ་ལོང་དང༌། ཕར་ཕྱིན་ལོ་རིམ་གཉིས་པ་སྟེ་སྐབས་དང་པོའི་འཛིན་གྲྭ་དང༌། ལོ་རིམ་གསུམ་པ་སྐབས་བཞི་བ་འཛིན་གྲྭའི་ཁྲིད་རྣམས་དབུ་བཙུགས། ཚེས་ཉེར་དགུའི་ཉིན་མཛོད་གསར་སྦྱང་གི་འཛིན་གྲྭ་ལ་མཛོད་འགྲེལ་ཟླ་བའི་འོད་ཟེར་གྱི་སྟེང་ནས་མཆིམས་མཛོད་སོགས་ཀྱིས་ཟུར་བརྒྱན་ཏེ་ཁྲིད་འགོ་བཟུང་ཞིང༌། ཛ་འགོའི་རི་ཁྲོད་ནས་ལོ་སྔ་མར་མཛོད་མཐར་ཕྱིན་རྣམས་ཀྱི་གཙོས་ཕར་ཕྱིན་དང་མཛོད་སྦྱངས་ཟིན་དག་ལ། བོད་གངས་ཅན་གྱི་ཉེ་བར་འཁོར་ཆེན་པོ་འདུལ་བ་འབུམ་སྡེའི་མངའ་བདག་ཀུན་མཁྱེན་མཚོ་སྣ་བ་ཤེས་རབ་བཟང་པོས་མཛད་པའི་འདུལ་ཊཱིཀ་ཉི་མའི་འོད་ཟེར་གྱི་སྟེང་ནས་ཁྲིད་གནང་སྟེ་འདུལ་བའི་འཛིན་གྲྭ་གསར་དུ་ཚུགས། རྣམ་འབྱེད་དགེ་འདུན་ལྷག་མའི་བར་གཞུང་ཆེན་དེ་ཉིད་ཀྱི་སྟེང་ནས་དང༌། ལྟུང་བྱེད་ནས་ལྟུང་བའི་སྡེ་ལྷག་མ་རྣམས་བཤེས་གཉེན་རིན་པོ་ཆེ་ཉིད་ཀྱིས་མཛད་པའི་སྡོམ་གསུམ་གྱི་རྣམ་བཞག་གི་ཐོག་ནས་ཁྲིད་མཛད་དེ། ལོ་དེར་ཞུ་བ་སྤྱིར་བསྟན་གྱི་དབུ་བར་དུ་ཁྲིད། ཛ་འགོ་བརྩེ་ཆེན་སློབ་གླིང་དུ་ཨ་སྐྱོང་དགོན་མཁན་བསམ་བཟང་དཔེ་ཁྲིད་བྱེད་མིར་མངགས། བཀྲ་ཤིས་ཆོས་ཐང་དགོན་དུ་འཆད་གྲྭ་རྐྱང་བའི་ལམ་ནས་འབའ་མདའ་ཡབ་སྲས་ཀྱི་གསུང་ལ་སློབ་གཉེར་བྱེད་པའི་བཤད་གྲྭ་ལྔ་རིག་དར་རྒྱས་གླིང་ཞེས་པ་དེ་ཉིད་ཆད་པ་བསྐྱར་གསོ་དང་ལྷན་དུ། ཕྱིན་ཆད་བཤེས་གཉེན་རིན་པོ་ཆེ་ཉིད་ཀྱི་དགོན་པ་དང་ས་ཕྱོགས་གང་དུ་ཕེབས་ན་ཡང་ཁོང་གིས་གཙོ་སྐྱོང་གི་སློབ་གླིང་དེའི་མིང་ལ་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཞེས་མཚན་གསོལ་ནས། གནས་སྐབས་དགོན་པ་གང་དུ་ཆགས་ཀྱང་དགོན་པ་དེ་ཉིད་ཀྱི་བཤད་གྲྭ་ཡོད་ན་དེ་དང་གཞི་གཅིག་ཏུ་གནས་སྐབས་འབྲེལ་བ་ལས། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཞེས་པའི་མཚན་གནས་སྐབས་ཙམ་གྱི་དབང་གིས་དགོན་པ་སོ་སོར་མཚན་དེ་བདག་དབང་མེད་པར་གཏན་ཁེལ་བྱས། སློབ་གླིང་དེ་ཉིད་ཀྱི་མཚན་འདོགས་ཚུལ་ཡང་ཞལ་སྔ་ནས། གངས་ལྗོངས་གསོལ་བ་དེ་སྒང་བ་བོད་ཀྱི་ནང་བསྟན་རིག་གཞུང་རྩ་བར་བཟུང་སྟེ་ཆོས་རིག་གི་སྒོ་ཀུན་ལ་ཉམས་པ་སླར་གསོ་དང་མ་ཉམས་གོང་འཕེལ་གྱི་ཆེད་དུ་དམིགས་པས་ཡིན་པ་དང༌། རིས་མེད་ཅེས་གསོལ་བ་ནི། ཁོ་བོར་མཚོན་ན་ཆུང་དུས་ནས་བཟུང་ད་བར་དུ་ཆོས་བརྒྱུད་ཕྱོགས་མེད་དུ་བླ་མ་བསྟེན་ཞིང༌། དབང་བཀའ་ཐམས་ཅད་རིས་མེད་དུ་ནོད་པ་ཡིན། ཁྱད་པར་དུ་བོད་ཀྱི་ཆོས་བརྒྱུད་ཐམས་ཅད་ལ་དག་སྣང་གི་ཁྱད་པར་སྤུ་ཙམ་ཡང་མེད། ཡིན་ན་ཡང་ད་ཐེངས་མེ་ཏོག་ལྷ་ལ་ཕཽག་པའི་ལྷ་སྐལ་ཀུན་མཁྱེན་ཇོ་ནང་བ་ཡིན་པ་དང༌། ཆོས་བརྒྱུད་འདི་ཤིན་ཏུ་ཉམ་ཆུང་ཉག་ཕྲ་བའི་རྒྱུ་མཚན་གྱིས་གཙོ་བོར་འདི་ལ་སྟོང་བརྐོས་ཤིག་འདུག་བསམས་ནས་རང་ནུས་ཅི་ཡོད་ཀྱིས་འབད་འབུངས་བྱས་པ་ཡིན་པ་ལས། ཕྱོགས་རིས་བྱས་པ་མིན་ལ་བྱེད་བསམ་པ་ཡང་སྐྱེ་མྱོང་མེད། དེས་ན་སློབ་གླིང་འདིར་སློབ་གཉེར་བ་ཕལ་ཆེར་ཇོ་ནང་བ་ཡིན་པ་སོགས་ཀྱི་རྐྱེན་གྱིས་ཇོ་ནང་གི་ཡིག་ཆ་རྩལ་འདོན་གནང་བཞིན་པ་ཡིན་ལ། མ་འོངས་པ་རིམ་པས་ཆོས་བརྒྱུད་གཞན་པ་དག་གི་གཞུང་ཡང་ཁྲིད་རྒྱུ་བྱུང་ན་བསམ་ནས་རེ་བ་ཆེན་པོ་འཆིང་བཞིན་ཡོད། དཔེ་ཆ་བ་རྣམས་པས་ཀྱང་དཔེ་ཀློག་ཕྱོགས་མེད་དུ་བྱེད་དགོས། ལྷག་པར་དུ་འཛིན་གྲྭ་མཐོ་ཤོས་ལ་སླེབས་ཏེ་གཞུང་ལྟ་ཀློག་གི་ནུས་པ་རྒྱས་ཡོད་པ་རྣམ་པས་ངེས་པར་དུ་དཔེ་ཆ་ཕྱོགས་མེད་དུ་བལྟ་དགོས། དེང་སང་རང་རང་གི་ཡིག་ཆའི་གསུང་སྒྲོས་ཙམ་རེ་ལ་ཧ་ཅང་བྱང་ཆུབ་པ་ཡིན་ཡང༌། ཆོས་བརྒྱུད་གྲུབ་མཐའ་གཞན་གྱི་གསུང་སྒྲོས་ལ་རྒྱུས་མེད་པས། སྐུར་འདེབས་བྱེད་མི། མཁས་གྲུབ་གཞན་ལ་སྡང་ཞུགས་བྱེད་མཁན། རང་གི་ཡིག་ཆའི་གསུང་ཟིན་ཙམ་རེ་དང་ཅུང་མ་འདྲ་ན་ཧང་སང་འགྲོ་མཁན་ཡང་མི་ཉུང་རེ་འདུག་པས། དེ་འདྲ་ནམ་ཡང་གནང་མི་རུང༌། རྗེ་ཙོང་ཁ་བའི་ལེགས་བཤད་གསེར་ཕྲེང་ལས། གཞུང་ལུགས་རྣམས་ལ་འདོད་པ་དུ་མ་ཡོད་པས། དེ་དག་ཕྱོགས་གཅིག་ཏུ་གྲིལ་བར་མི་ནུས་པས་རང་གང་འཆད་པའི་གཞུང་དེ་ཚད་མར་བྱའོ་ཞེས་པ་ལྟར། གཞུང་གང་ལ་ལྟ་ན་གཞུང་དེ་དང་དེའི་གསུང་ཟིན་དགོངས་པ་གང་ལ་གནས་ཞིབ་ཏུ་ཨེ་གོ་བལྟས་ཏེ། གནས་སྐབས་ཚིག་གི་འཛིན་མཚམས་ཕྱོགས་གཅིག་ཏུ་གྲིལ་མ་ནུས་ན། རང་གི་གོ་བ་ལེན་སླ་བའམ་རྩ་བའི་སྦྱང་གཞིའི་ཡིག་ཆ་དེའི་གསུང་ཟིན་ལྟར་སྨྲས་ཏེ། དད་པ་དག་སྣང་ཁྱད་མེད་དུ་མཛད་དགོས་པ་རེད། ཀུན་ལས་བཏུས་ཀྱི་འགྲེལ་བར་ས་བཟང་མ་ཏི་པཎ་ཆེན་གྱིས། བཤད་ཟིན་པ་དང་འཆད་པར་འགྱུར་བའི་དགག་སྒྲུབ་ཀྱི་སྐབས་མང་པོར་རང་གཞན་གྱི་ཕྱོགས་གཉི་ག་སྨོས་པ་ནི། རྣམ་གྲངས་ལ་མཁས་པས་ཤེས་རབ་འཕེལ་བའི་ཆེད་དུ་བསྟན་པ་ཡིན་གྱི། འདི་ནི་བདེན་གྱི་གཞན་ནི་གཏི་མུག་གོ་ཞེས་བྱ་བར་ནི་མཐའ་གཅིག་ཏུ་མི་གཟུང་ཞིང༌། གང་ལུང་རིགས་དང་མཐུན་པ་དེ་ཉིད་འཐད་ལྡན་དུ་གཟུང་བར་བྱའོ། །ཞེས་པ་ལྟར། འདི་བདེན་གཞན་གཏི་མུག་གོ་ཞེས་མཐའ་གཅིག་ཏུ་དོར་ན་རང་གི་ཤེས་རབ་མི་འཕེལ་བ་དང༌། ཆོས་སྤོང་གི་ལས་སུ་ཡང་འགྱུར་ཉེན་ཆེ་བ་རེད། དཀོན་མཆོག་དཔང་བཙུགས་ཏེ་འཇིག་རྟེན་པ་དག་གིས་མནའ་ཟོས་པ་དེ་ཡང༌། མཁས་གྲུབ་ཀརྨ་ཆགས་མེད་ཀྱིས་བདེ་སྨོན་ལས། དཀོན་མཆོག་ལྷ་ཁང་གསུང་རབ་རྟེན་གསུམ་སོགས། །དཔང་ཞེས་ཚད་བཙུགས་མནའ་ཟོས་ལ་སོགས་པ། །ཆོས་སྤངས་ལས་ངན་བསགས་པ་མཐོལ་ལོ་བཤགས། །ཞེས་པ་ལྟར་ཆོས་སྤོང་གི་ལས་ཚབ་ཆེན་ཡིན་པར་གསུང་ཡོད་པ་ལྟར་ལོས་ཡིན་ཏེ། ད་དུང་ཆོས་བརྒྱུད་གྲུབ་མཐའི་ཞེན་པ་བྱས་ཏེ་བསྟན་བཅོས་རྣམ་དག་ལ་བསྟན་བཅོས་མ་དག་པ་རེད་ཅེས་དང༌། ལྟ་བ་རྣམ་དག་ལ་ལྟ་བ་ཕྱིན་ཅི་ལོག་པ་རེད་ཅེས་དང༌། བོད་གངས་ཅན་གྱི་ཆོས་བརྒྱུད་འཛིན་པའི་སྐྱེས་ཆེན་གོང་མ་ཐམས་ཅད་གཅིག་སློབ་གཅིག་གིས་བྱས་ཏེ་དམ་ཚིག་འོ་ཆུ་གཅིག་འདྲེས་བྱས་ཏེ་འོངས་བ་ལ། ཆོས་བརྒྱུད་གཞན་གྱི་བླ་མ་ཞེས་དམ་པ་གོང་མ་དག་ལ་ཕྱོགས་སུ་བཅད་དེ་ཆགས་སྡང་བྱས་ན། རང་གི་བརྒྱུད་པའི་བླ་མ་གོང་མ་ལ་སྐྱོན་ནས་སྨྲས་པ་ཡིན་པས། ཆོས་སྤོང་དང་ཉམས་ཆགས་ཚབ་པོ་ཆེ་ཅིག་ཅར་དུ་བསགས་པ་ཡིན། རང་ལེགས་སུ་འདོད་པ་རྣམས་ཀྱིས་གནས་དེ་ལྟ་བུ་ལ་ཧ་ཅང་གཟབ་པ་གལ་ཆེ། དེས་ན་སློབ་གླིང་འདིའི་ནང་ཆོས་བརྒྱུད་གྲུབ་མཐའི་ཞེན་ཕྱོགས་ཀྱི་སྐད་ཆ་ཨ་མཚར་རྩེད་མོ་ཙམ་དུ་ཡང་སྨྲ་མི་ཆོག །ཁ་རབ་གནས་མ་ཐང་བ་ཁ་ཤས་ཆོས་བརྒྱུད་ཅིག་ཅིག་ཟེར་ནས་ཨ་མཚར་རྩེ་འདུག་པ་གོ་སོང༌། ཕྱིན་ཆད་རྩ་བ་ཉིད་ནས་ཨ་མཚར་ཙམ་ཡང་འདིའི་ཕྱོགས་ནས་བཤད་མི་ཆོག །སྤྱིར་བཏང༌། བན་ཆོས་མེད་ལ་གྲུབ་མཐའི་ལོ་རྒྱུས། །མགོ་སྤུ་མེད་ལ་རལ་བའི་ལོ་རྒྱུས་ཟེར་བའི་གཏམ་དཔེ་ཞིག་ཡོད་པ་རེད། དགོས་ངེས་ལུང་རིགས་ཀྱི་བརྡར་ཤ་བཅད་ནས་གྲུབ་མཐའ་བཞག་མི་ཤེས། ཅིག་བྱེད་ཡོང་དུས་ཆགས་སྡང་གིས་བརྫི་འདུག་པ་དེ་ཚོ་ངོ་མ་བན་ཆོས་མེད་ལ་གྲུབ་མཐའི་ལོ་རྒྱུས་ཞེས་པ་དེ་རེད། ཕྱིན་ཆད་ཀྱང་སློབ་གླིང་འདི་ཉིད་ཀྱང་འདིའི་ནང་གི་སློབ་གཉེར་བ་ཚང་མས་ཡིན་པ་ལས། དམིགས་བསལ་ཇོ་ནང་གཅིག་པུའི་ཡིན་ཟེར་བ་དེ་འདྲ་གཏན་ནས་མེད། ད་ལྟ་སློབ་གཉེར་གྱི་རྐང་འཛུགས་བཞིན་པ་ཡིན་པས། སློབ་གཉེར་གྱི་རྐང་འཐུས་ཚང་བརྟན་པོ་འདྲ་ཞིག་ཡོང་ཕྱིན་ཆད་ལྷག་པར་དུ་རིས་མེད་ཀྱི་གཞུང་ལ་འཆད་ཉན་ནུས་པ་ཇེ་ཆེར་གཏོང་རྒྱུའི་རེ་བ་ཡོད། དེར་མ་ཟད། ཀུན་མཁྱེན་དོལ་པོ་པ་དུས་གསུམ་སངས་རྒྱས་ཀྱི་མཚན་ལ་ཕྱོགས་མེད་རིས་མེད་པ་རྟོན་པ་བཞི་ལྡན་ཞེས་ཁོང་རང་གིས་བརྩམས་པའི་གཞུང་ལུགས་ཁག་གི་གཞུག་ཏུ་རང་ལ་མཚན་གསོལ་ཡོད་པ་རེད། སྐུ་ཚེའི་མཛད་པ་ལ་བལྟས་ན་ཡང་དེ་འདྲ་རེད། ཁོང་གི་མཚན་ཟུར་ལས་གྲས་ཏེ་གསོལ་བ་ཡིན་ཟེར་ནའང་མི་ཆོག་པ་མེད། སྤྱིར་གདན་ས་བྱིན་ཆེན་དང༌། མཁས་གྲུབ་ཁྱད་པར་ཅན་གྱི་མཚན་ཟུར་གྲས་ཏེ་མིང་གསོལ་ལུགས་ཤིག་སྔོན་ནས་བྱུང་འདུག །དེ་ལྟར་བྱས་ན་བྱིན་རླབས་ཀྱི་སྒོ་ཁྱད་ཅིག་ཀྱང་ཡོད་པར་མཐོང༌། ཆོས་འདུལ་བ་ནས་ཀྱང་མཁན་པོའི་མིང་ནས་གྲས་ཏེ་སློབ་མ་ལ་མིང་འདོགས་པར་བཤད་པ་ལྟ་བུ་རེད། ལྔ་རིག་ཅེས་པ་ནི་བསླབ་བྱ་རིག་པའི་གནས་ཆེ་ཆུང་ལྔ་ཕྲག་གཉིས་ཀྱི་སྒོ་ནས་བཏག་པ་ཡིན། མཐོ་སློབ་ཞེས་པ་ཡོན་ཚད་རེད། དེང་སང་བྱེས་ཀྱི་དགོན་སྡེ་ཁག་ན་ཡང་མཐོ་སློབ་བཏག་བཞག་པ་ཁ་ཤས་འདུག །ཅེས་གསུངས་སོ། །ལོ་དེའི་ས་ག་ཟླ་བའི་ནང་དུ་དགོས་གལ་མང་པོ་ལ་གཟིགས་ཏེ། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོ་ནས། ཕྱག་དང༌། སེམས་བསྐྱེད། རྡོར་སེམས་བསྒོམ་བཟླས། མཎྜལ་འབུལ་བ། བླ་མའི་རྣལ་འབྱོར་བཅས་སྔོན་འགྲོའི་ཆོས་ལྔ་ཐོས་བསམ་སློབ་གཉེར་བ་རྣམས་ཀྱིས་ཚོམས་བུ་གཅིག་སྒྲུབ་ཀྱིས་ལོ་རེ་བཞིན་ཆད་མེད་དུ་བྱེད་པའི་དབུ་འཛུགས་མཛད། མགོན་པོ་གང་ཉིད་ནི་དཔེ་ཁྲིད་ཙམ་ཞིག་བྱས་ཏེ། འགན་ཁུར་མཐའ་དག་འགྲུབ་ཡོད་ཡོད་ཀྱིས་བཞུགས་པའི་རིགས་གཏན་ནས་མ་ཡིན་པར། སློབ་མ་རྣམས་ཀྱི་འཚོ་བ་དང་སྒྲིག་ཀུན་སྤྱོད་མ་ལུས་པར་སྐུ་ཚེགས་འཛེམས་མེད་དང༌། ཐ་ན་ལུས་དང་སྲོག་ལ་ཡང་ལྟོས་པ་མེད་ཅིང་ཕངས་པ་མེད་པར་རྗེས་སུ་འབྲངས་པའི་སློབ་མ་ཚོའི་དོན་དུ་ཕུལ་བར་བྱེད་པའི་ཤ་ཚ་སྙིང་ཉེ་བ་ཞིག་ཡིན་པར་མ་ཟད། ནམ་རྒྱུན་གྱི་བཀའ་སློབ་ལས། ཐོས་པ་ཐོས་རྐྱང་དུ་སོང་ན་སེམས་རྒྱུད་ཆོས་དང་མི་འདྲེས་ཤིང་ཕན་པ་མེད་པར་འགྱུར་ཉེན་ཡོད་ལ། ལྷག་པར་དུ་སྙིགས་མའི་རང་མཚང་མ་ལུས་ལུས་པ་མེད་པར་ཤེད་ཀྱིས་འཕྱུར་བའི་དུས་སྐབས་སུ། དུས་དང་བསོད་ནམས་གང་གི་ཆ་ནས་ཡིན་ཡང༌། སྐྱེ་བོ་ཐམས་ཅད་ཉོན་མོངས་རྒོད་ལ། དྲན་འགྱུ་མང་ཞིང་མི་བརྟན་པ་རྩྭ་འགོའི་ཟིལ་བ་དང་སྒང་ཁའི་དར་ལྕོགས་ཀྱི་དཔེ་ལ་སྙེག་པའི་དུས་འདི་ལྟ་བུ་ལ། སེམས་རྒྱུད་ཆོས་དང་འདྲེས་པ་ཞིག་ཡོང་རྒྱུ་ཧ་ཅང་དཀའ་བའི་ཚོད་ཡིན་པས། རང་རེ་རྣམས་ཀྱིས་ཀྱང་སྒོ་ཀུན་ནས་རང་སེམས་བསྐོར་བ་མ་བརྒྱབ་ན། ཆོས་པའི་གཟུགས་ཀྱིས་ཆོས་མིན་དུ་དུས་འདའ་བ། ཁ་ནས་ཆོས་སྐད་ཤ་ར་ར་འཐེན་ཡང༌། རྒྱུད་དཀོན་མཆོག་དང་ལས་འབྲས་སོགས་ལ་ཡིད་མི་ཆེས་པ་ཞིག་ཏུ་གྱུར་སོང་ན་ཕན་པ་ཅི་འདུག་ལྟོས་དང༌། དེས་ན། རང་རེ་དག་གིས་གཞུང་ཆེན་ཁག་གི་སློབ་གཉེར་དང་ལྷན་དུ་ལམ་རིམ་བློ་སྦྱོང་རེ་ཆག་མེད་དུ་ཁྲིད་བཞིན་པ་འདི་ཡང༌། གལ་ཆུང་ཞིག་ཏུ་མི་འཛིན་པར་ཐུགས་དམ་གྱི་མཐིལ་ཏུ་འཛིན་རྒྱུའི་རེ་བ་ཡོད། འཕགས་ཡུལ་ན་ཡོད་དུས། བླ་མ་སྤྱན་རས་གཟིགས་དབང་གི་ཞལ་སྔ་ནས་ཀྱང༌། དེང་གི་དུས་འདིར་ལམ་རིམ་བློ་སྦྱོང་གི་འཆད་ཉན་འདི་གལ་ཆེ་ཚུལ་དང༌། གཞུང་ལ་སློབ་གཉེར་བྱེད་པའི་ཞར་ལ་ལམ་རིམ་བློ་སྦྱོང་གི་ཆོས་བསྐོར་རེ་འཆད་ཉན་བྱེད་རྒྱུའི་བཀའ་གསུང་ཐེངས་འགའ་ལ་ལྷུག་པར་བསྩལ་མྱོང་པ་ཡིན། ད་ལན་ལམ་རིམ་བློ་སྦྱོང་དེ་ཡང་བཤད་པ་ཙམ་དུ་མ་བཞག་པར། རྒྱུད་ལ་ཅུང་ཟད་ཅིག་འེ་འབྱོར་སྙམ་པའི་རེ་བ་ཆེན་པོ་བྱས་ཏེ། ད་ལོ་ནས་བཟུང་སྟེ་ལོ་རེ་ལ་སློབ་གླིང་འདི་ནས་ཚོམས་བུ་གཅིག་སྒྲུབ་ཀྱི་ཚུལ་དུ་སྔོན་འགྲོའི་ཆོས་ལྔ་ཆ་ཚང་རེ་མ་ཆད་པར་ལག་ལེན་ལ་བསྟར་ཐུབ་པའི་འཆར་གཞི་ཙམ་བཟོས་པ་ཡིན། ད་དུང་གཞུང་ཆེན་པོ་ལ་ལྟ་རྟོག་བྱེད་མི་ཤ་སྟག་ཡིན་ན། གཞུང་གི་དོན་གྱི་མཐིལ་ལོན་པ་དང༌། གང་གོ་བ་དེ་རང་རྒྱུད་འདུལ་བྱེད་དང༌། གཞན་རྒྱུད་རྗེས་སུ་འཛིན་པའི་ལམ་འགྲོ་ཡག་པོ་ཞིག་འབྱུང་པ་ལ། བསོད་ནམས་རྒྱ་ཆེན་པོ་ཞིག་དགོས་པ་རེད། མདོ་ལས། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་གསུངས་པ་དང༌། རྗེ་བདག་ཉིད་ཆེན་པོས། ཐོག་མར་ཞིང་གི་མཐུ་ལ་བརྟེན་ནས་ནི། །ནང་གི་བསམ་པའི་སྟོབས་ནི་སྐྱེ་འགྱུར་བ། །དགེ་བའི་བཤེས་དང་དཀོན་མཆོག་མཆོད་པ་ལ། །རྒྱུན་ཆད་མེད་པའི་སྦྱོར་བ་བསྟེན་འཚལ་ལོ། །དེ་ལྟར་རྩ་བ་བརྟེན་ལ་གཙོར་འབད་ན། །ཟབ་ཅིང་རྒྱ་ཆེའི་ཆོས་རྣམས་མ་ལུས་པ། །ཁ་ཅིག་ད་ལྟ་ལག་ཏུ་བླང་བ་དང༌། །གཞན་དག་སྨོན་ལམ་ཡུལ་དུ་བྱས་གྱུར་ཏེ། །གཅིག་ཀྱང་མི་སྤོང་ཀུན་ཀྱང་སངས་རྒྱས་ཐབས། །དེ་ལྟར་རྒྱལ་བའི་བསྟན་པ་ཡོངས་རྫོགས་པ། །ལམ་དུ་བསྲེལ་བ་ཤེས་ན་མཁས་པའི་ཕུལ། །ཞེས་དང༌། བྱང་ཆུབ་ལམ་རིམ་ཆེན་མོ་ལས་ཀྱང༌། ཞིང་དམ་པ་ལ་དགེ་རྩ་བསྐྲུན་པའི་མཐུ་ལས་ལམ་གྱི་རིམ་པ་རྣམས་ལ་བློའི་མཐུ་ཇེ་རྒྱས་སུ་འགྲོ་བས། མཉན་ན་ཚིག་མི་ཟིན། བསམས་ན་དོན་མི་གོ །བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཡིན་ནོ། །ཞེས་གསུངས་པ་ལྟར། ཚོགས་གསོག་སྒྲིབ་སྦྱོང་གི་མཐུ་ལ་བརྟེན་ནས་འགྲོ་རྒྱུ་གལ་ཆེན་ཡིན་པ་རེད་མ་གཏོགས། དཔྱད་པ་རྐྱང་བས་གཞུང་དོན་ལ་སྦྱངས་ན་ཤེས་རབ་འཆལ་བའི་གང་ཟག་ཏུ་འགྱུར་རྒྱུ་ལ་ཉེན་ཁ་ཆེན་པོ་རེད། དེས་ན། དད་པའི་ཚོམས་ལས། དད་དང་ཤེས་རབ་སྟེན་བྱེད་པ། །དེ་དག་དེ་ཡི་ནོར་མཆོག་སྟེ། །དེ་ཡི་ནོར་གཞན་ཕལ་པར་ཟད། །ཅེས་དང༌། ཁྲོན་པ་སྐམ་པོ་ཇི་ལྟ་བར། །དད་པ་མེད་པ་བསྟེན་མི་བྱ། །ཇི་སྟེ་དེ་ལ་ཡོངས་བརྐོས་ཀྱང༌། །འདམ་ཆུ་དྲི་ང་འབྱུང་བར་འགྱུར། །ཆུ་མང་རྣམ་པར་དང་བ་དང༌། །བསིལ་བར་གྱུར་ཅིང་རྙོག་མེད་པའི། །མཚོ་ལ་ཆུ་འདོང་ཇི་ལྟ་བར། །ཤེས་རབ་ཅན་གྱིས་དད་ལྡན་བསྟེན། །ཞེས་དད་པ་དང་ཤེས་རབ་ཟུང་དུ་འཇུག་དགོས་པའི་གདམས་ངག་མང་དུ་བསྩལ་བ་ལྟར། དད་པ་མེད་ཚར་ནས་བཟུང་ཤེས་རབ་ཡོད་པས་རྒྱུད་ལ་ཕན་པ་འབྱུང་གི་མ་རེད། དེང་སང་གི་ཆར་ཆོས་ཤེས་མི་དཀོན་མོ་རེད་དེ། དེ་ལས་ཀྱང་ཆོས་ལ་དད་པ་ཅན་ཇེ་དཀོན་དུ་འགྲོ་བའི་དུས་ངན་ཞིག་ཡིན་པས། དད་པ་ གཙང ་སེང་ངེ་བ་ཞིག་ཨེ་འཁྱོངས་བལྟ་རྒྱུ་གལ་འགངས་གནད་ཆེན་པོ་རེད་སྙམ་གྱིན་ཡོད། ཕྱག་འཚལ་ཤེས་རྒྱུ་རྩ་བ་ཡིན་ཡང༌། ཕྱག་འཚལ་ཚུལ་འདི་རེད་གན་རེད་ཟེར་ནས་ཕྱག་རྡོག་གཅིག་ཀྱང་མ་འཚལ་ན་ཇི་འདྲ་འདུག །གཞི་དང་ལམ་དང་འབྲས་བུའི་རྣམ་བཞག་མང་པོ་ཚིག་ཁ་ནས་ཁྱེར་ཡང༌། སེམས་ཐོག་ལ་ཅུང་ཟད་ཀྱང་མ་ལོན་ན། ཉིང་དགོས་སྟོར་ཏེ་མེད་པར་གྱུར་སོང་བ་རེད། དེས་ན། ནང་པ་སངས་རྒྱས་པའི་བསྟན་པའི་འཇུག་སྒོ་སྐྱབས་འགྲོ་རྣམ་པར་དག་པ་འདི་རེད། དེ་ལྟར་ཞུ་འོང་དུས་སློབ་གཉེར་བྱེད་པ་དེ་གལ་ཆུང་ཞིག་ཏུ་བཤད་པ་དང༌། མ་སྦྱངས་མ་བསླབས་པར་ཉམས་ལེན་ཞེས་ཅང་འཇུ་བྱེད་བཞག་ས་ཞིག་ཡོད་པའི་དོན་གཏན་ནས་མིན། ཤེས་པ་དང་སྒོམ་པ་ཟུང་དུ་འཇུག་པ་ཞིག་ཅེས་ཀྱང་གལ་ཆེ་བ་ཡིན། ཚོམས་བུ་གཅིག་ཏུ་འདུན་པ་གཅིག་གྲིལ་གྱིས་དགེ་བ་སྒྲུབ་ན་སྡིག་པ་འདག་ཚབ་ཆེ་བ་དང་དགེ་བ་འཕེལ་སྟོབས་ཆེ་བ་ཡོང་ཐུབ་པས། སྔོན་འགྲོའི་ཆོས་ལྔ་ཚོམས་སྒྲུབ་འདི་དགོས་ཉིང་དགོས་མང་པོ་ལ་བལྟས་ཏེ་བཙུགས་པ་ཡིན་པས། ཚང་མས་ཆོས་གཤའ་མ་ཞིག་ཏུ་འགྲོ་རྒྱུའི་ཐུགས་འདུན་གནངས་རོགས་བྱེད་དགོས་ཞེས། ལག་ཐལ་མོ་སྦྱར་ནས་ཞུས་པ་ཡིན། ཞེས་སོགས་གསུངས་སོ། །བཤེས་གཉེན་རིན་པོ་ཆེ་ཉིད་ནས་བརྩམས་པའི། དགེ་བ་མང་པོ་དང་སྟོབས་ཆེན་ཚེགས་ཆུང་ངུས་བསག་ཚུལ། ཞེས་པ་འདིར་འགོད་ན། དགེ་འདུན་པ་ཡིན་ན་འདྲ། སྐྱ་སེར་སུ་ཡིན་ན་དགེ་བ་སྒྲུབ་ཚེ་མང་པོས་འདུན་པ་གཅིག་པའི་དགེ་བ་སྒྲུབ་ན་ཐམས་ཅད་ལ་བྱེད་པོ་ནང་བཞིན་དགེ་བ་ཐོབ་པ་དང་དགེ་བ་སྟོབས་ཆེན་གྱི་ལས་བསགས་ཐུབ་པ་ཡིན་ཏེ། ས་བཟང་མ་ཏི་པཎ་ཆེན་ནམ་ལོ་ཙཱ་བ་བློ་གྲོས་རྒྱལ་མཚན་གྱི་བླང་དོར་རབ་གསལ་ལས། གནས་སྐབས་ཀྱི་ཀུན་སྤྱོད་ཟབ་མོ་བསྟེན་ཚུལ་ནི། ཆེན་པོའི་གོ་འཕང་ཐོབ་ཚེ་དགེ་བ་དང༌། །མི་དགེ་གང་ལ་འཇུག་ཀྱང་སྟོབས་ཆེ་བས། །རྣམ་དག་དགེ་བ་རྒྱ་ཆེར་སྤེལ་བ་དང༌། །སྡིག་པར་འགྱུར་བའི་ལས་རྣམས་སྤང་འཚལ་ལོ། །དེ་ཡང༌། ཆོས་མངོན་པ་ལས། སྐྱེ་བོ་མང་པོས་ཀྱང་སྟོབས་དང་ལྡན་པའི་ལས་སུ་རིག་པར་བྱའོ། །ཞེས་པ་དང༌། འོག་མ་ལས། དམག་ལ་སོགས་པ་མང་པོ་ཚོགས་པས་གྲོས་བཏབས་ནས་གཅིག་གིས་ཕ་རོལ་པོ་གསོད་པར་བྱེད་ན་གསོད་པའི་དོན་ལ་གྲོས་བྱས་རུང་མ་བྱས་རུང་སྦྱོར་བ་གཅིག་ཅིང་མཐུན་པའི་ཕྱིར། །འདུན་པ་ལོག་པ་མ་གཏོགས་པ་ཐམས་ཅད་བྱེད་པ་པོ་བཞིན་དངོས་གཞི་མ་ཡིན་པའི་སྲོག་གཅོད་ཀྱིས་སྡིག་པ་དང་ལྡན་ནོ། །ཞེས་གསུངས་པ་ལྟར། དགེ་མི་དགེ་གང་བྱེད་ཀྱང་མང་པོ་འདུན་པ་གཅིག་པ་སྟེ་སྟོབས་ཆེ་བར་གསུངས་པས་བཀའ་འབངས་སུ་གཏོགས་པ་མང་པོ་རྣམས་བསྟན་པ་སྤྱིའི་རིམ་གྲོ་ལ་སོགས་པ་ལས་བརྩམས་ཏེ་སྐུ་གཟུགས་བཞེངས་པ་ལ་སོགས་པ་དང་གསུང་རབ་ཀློག་པ་དང་ཉེའུ་འདོན་པ་ལ་སོགས་པའི་དགེ་བ་རྣམ་དག་རྣམས་ལ་རིམ་གྱིས་བསྐུལ་བ་དང༌། དམག་དང་ལིངས་དང་སྲོག་བཅད་པའི་མཆོད་སྦྱིན་ལ་སོགས་པ་སྡིག་པར་འགྱུར་བའི་ལས་ལ་བཟློག་པ་ལའང་འབད་པར་བྱའོ། །ཞེས་གསུངས་པ་ཡིད་ལ་ངེས་ནས་མང་པོ་མཉམ་དུ་དགེ་བ་སྒྲུབ་པར་བྱ་དགོས། དེ་ལྟར་ས་བཟང་མ་ཏིས་མཛད་པའི་བློ་སྦྱོང་དོན་བདུན་མའི་འགྲེལ་པ་རབ་གསལ་སྣང་བ་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་པ་ལྟར་རང་ཡང་བྱེད་གཞན་ཡང་བྱེད་དུ་འཇུག་པ་ལ་རྗེས་སུ་ཡི་རངས་པའི་མི་དགེ་བ་དང་དགེ་བ་ལ་ཡང་དེ་བཞིན་དུ་སྦྱར་བ་ནི་སྐྱེ་བོ་མང་པོས་ཀྱང་སྟོབས་དང་ལྡན་པའི་ལས་ལ་སོགས་པའོ། །ཞེས་དང༌། ཚོགས་ཆོས་བདེན་བཞི་གསལ་བ་ལས། མི་དགེ་བའི་ལས་ལམ་བཅུ་པོ་དེ་བདག་ཉིད་ཀྱིས་སྤྱད་པ་ལས་ལས་ཀྱི་ལམ་རྫོགས་པར་འགྱུར་བར་མ་ཟད་བསམ་སྦྱོར་མཚུངས་ན་དམག་གི་འདུ་བའི་ནང་དུ། མི་གཅིག་གིས་སྲོག་གཅོད་ཀྱི་ལས་བྱས་པ་ན། དེར་འདུས་པ་ཐམས་ཅད་ལ་ལས་ལམ་རྫོགས་པར་འགྱུར་ཏེ། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་འབྱུང་བའི་ངེས་པ་ལས་ཏེ། མ་བྱིན་པར་ལེན་པའི་ཆེད་དུ། ཇག་ཆོམས་སོགས་ལ་འདུས་པ་རྣམས་ལའང་མཚུངས་ལ། ལོག་གཡེམ་མ་གཏོགས་ལས་ཀྱི་ལམ་དེ་རྣམས་གཞན་བགྱིད་དུ་རྩལ་བ་ལས་ཀྱང་ལས་ལམ་རྫོགས་པར་འགྱུར་ཞིང༌། གཞན་གྱིས་བགྱིས་པ་ལ་རྗེས་སུ་ཡི་རང་བ་ལས་ཀྱང་ཆ་མཐུན་གྱི་ལས་ཀྱིས་གོས་པར་འགྱུར་ཏེ། ཇི་ལྟར་དགེ་བ་གཞན་གྱིས་སྤྱད་པ་ལ་རྗེས་སུ་ཡི་རང་བསྒོམས་པས་དགེ་རྩ་མཉམ་དུ་ཐོབ་པ་ལྟ་བུའོ། །ཞེས་དང༌། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱ་ཆེར་འགྲེལ་པ་འཕགས་མཆོག་རྣམས་ཀྱི་གསང་བའི་མཛོད་ལས། དེས་ན་ས་བཅུའི་དབང་ཕྱུག་གིས་ཆོས་སྟོན་པ་དེ་ཉིད་སངས་རྒྱས་ཀྱི་ཆོས་ཀྱི་འཁོར་ལོ་བསྐོར་བའང་ཡིན་ལ། སངས་རྒྱས་ཀྱི་ཞལ་སྔ་ནས་ཆོས་སྟོན་པ་ཀུན་ལའང༌། བྱང་ཆུབ་སེམས་དཔའ་དེའི་འཕྲིན་ལས་འཇུག་སྟེ། དོན་གཅིག་ལ་བློ་གྲོས་དང་འདུན་པ་གཅིག་ཏུ་བསྒྲིལ་པའི་དམག་ལ་སོགས་པའི་བྱ་བ་བཞིན་ནོ། །ཞེས་གསུངས་ལ། ས་བཟང་གི་དྲིས་ལན་བླང་དོར་རབ་གསལ་སྣང་བ་ཡི་འགྲེལ་བཤད་རྣམ་དག་ལུང་དང་མཐུན་པ་ལས། སངས་རྒྱས་སྐུ་གསུམ་བརྙེས་པའི་བྱིན་རླབས་དང༌། །ཆོས་ཉིད་མི་འགྱུར་བདེན་པའི་བྱིན་རླབས་དང༌། །དགེ་འདུན་རྣམས་དབྱེན་གྱིས་མི་ཕྱེད་པ་ཐུགས་མཐུན་པའི་བྱིན་རླབས་ཀྱིས། །དགེ་བ་དེ་དག་བསྔོས་ཤིང་སྨོན་ལམ་བཏབ་པ་བཞིན་དུ་འགྲུབ་པར་ཤོག །ཅེས་པས་བདེན་པའི་སྟོབས་ཀྱང་བརྗོད་པར་བྱའོ། །ཞེས་དང༌། འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་ལས། ཆོས་ཉིད་མི་འགྱུར་བདེན་པའི་བྱིན་བརླབས་དང༌། །དགེ་འདུན་མི་ཕྱེད་འདུས་པའི་བྱིན་བརླབས་ཀྱིས། །ཇི་ལྟར་བསྔོ་བ་སྨོན་ལམ་འགྲུབ་པར་ཤོག །ཞེས་གསུངས་པ་ལྟར་ཡིད་ལ་ངེས་པར་བྱས་ནས་མང་པོས་འདུན་པ་གཅིག་གིས་དགེ་སྦྱོར་ལ་བརྩོན་པར་བྱའོ། །ཞེས་མཆན་བུ་དང་བཅས་པ་དམ་པ་ཁོང་ཉིད་ནས་བཞག་པ་རང་སོར་ཡིན་ནོ། །དེ་ལྟར་སྤྱིར་ཚོགས་གསོག་སྒྲིབ་སྦྱོང་དང་ཁ་ཏོན་དགེ་སྦྱོར་སོགས་གལ་ཆེ་བར་མ་ཟད། ཚོགས་པའི་ནུས་པ་ཆུ་བོའི་གཞུང་དང་འདྲ། །ཞེས་པ་ལྟར། ཚོམས་སྒྲུབ་ཀྱི་དགེ་བ་རྣམས་སྟོབས་ཆེ་བ་ལ་སོགས། དགོས་པ་ཁྱད་པར་ཅན་དུ་མ་གཟིགས་ནས། ལོ་རེ་བཞིན་ཆག་མེད་དུ་སྔོན་འགྲོའི་བསགས་སྦྱང་གི་ལེགས་སྲོལ་ཕན་པ་རླབས་པོ་ཆེ་བཙུགས་པ་ཡིན་ནོ། །

འཆོས་པ་མེད་ན་ཆོས་སུ་མི་འདོགས་པས། །

དད་དང་ཤེས་རབ་གཅིག་གྲོགས་གཅིག་སོང་བས། །

ཚོགས་གསོག་སྒྲིབ་པ་སྦྱོང་བའི་ཐབས་ཚུལ་གྱི། །

གདམས་པའི་སྙིང་གཏམ་གདུལ་བྱའི་ཁམས་སུ་སྦྲན། །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཆོས་ཐང་དགོན་དུ་ཞབས་སོར་བཀོད་ནས་རིས་མེད་སློབ་གླིང་གི་འགྲོ་ཕྱོགས་ལམ་སྟོན་དང་སྔོན་འགྲོ་བསགས་སྦྱང་གི་སྲོལ་བཙུགས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་གཅིག་པའོ། །