དྲི་བ་ཉེར་གཉིས་པ་ནི།རང་བཞིན་གནས་རིགས་དང་རྒྱས་འགྱུར་གྱི་མཚན་ཉིད་དང་དེ་གཉིས་རྟེན་དང་བརྟེན་པ་དང་འདུས་བྱས་འདུས་མ་བྱས་གང་ཡིན་ཞེས་པའི་ལན།
དྲི་བ་ཉེར་གཉིས་པ་ནི།རང་བཞིན་གནས་རིགས་དང་རྒྱས་འགྱུར་གྱི་མཚན་ཉིད་དང་དེ་གཉིས་རྟེན་དང་བརྟེན་པ་དང་འདུས་བྱས་འདུས་མ་བྱས་གང་ཡིན་ཞེས་པའི་ལན།
རང་བཞིན་གནས་རིགས་དང་རྒྱས་འགྱུར་གྱི་མཚན་ཉིད་དང་དེ་གཉིས་རྟེན་དང་བརྟེན་པ་དང་འདུས་བྱས་འདུས་མ་བྱས་གང་ཡིན་ཞེས་པའོ། །དེའི་ལན་ནི། རིགས་དེ་གཉིས་ཀྱི་མཚན་ཉིད་ནི། ཉ་ཊཱིཀ་ལས། མཚན་ཉིད་ནི། གང་ལ་བརྟེན་ནས་ཐར་ལམ་ལ་འབད་ན་ཐར་བ་ཐོབ་བྱེད་ཀྱི་འདུས་མ་བྱས་ཀྱི་དགེ་བ་ཞེས་པའོ། །འདུས་མ་བྱས་ཀྱི་དགེ་བ་གང་ཞིག ངོ་བོ་ཉིད་སྐུའི་རྒྱུར་འགྱུར་བ་ཞེས་པ་ལམ་གྱི་སྐབས་ཀྱི་རང་བཞིན་དུ་གནས་པའི་རིགས་ཀྱི་མཚན་ཉིད་དོ། །དེ་ལ་བརྟེན་ནས་རྐྱེན་གྱིས་བསྐྱེད་པའི་བྱང་ཆུབ་ཀྱི་རྒྱུར་གྱུར་བའི་དགེ་བ་འདུས་བྱས་ཐམས་ཅད་རྒྱས་པའི་རིགས་ཏེ། མཚན་ཉིད་ནི། བྱང་ཆུབ་ཀྱི་རྒྱུར་གྱུར་བའི་དགེ་བ་འདུས་བྱས་སོ། །ཐེག་གསུམ་སོ་སོར་ཡང་སྦྱར་ཏེ། རྫོགས་པའི་བྱང་ཆུབ་ཀྱི་རྒྱུར་གྱུར་བའི་དགེ་བ་འདུས་བྱས་ནི། ཐེག་ཆེན་གྱི་རྒྱས་རིགས་ཀྱིའོ། །ཞེས་དང༌། རྒྱུད་བླ་མ་ལས། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང༌། །ཡང་དག་བླང་བ་མཆོག་ཉིད་དོ། །ཞེས་གསུངས་སོ། །རང་བཞིན་གནས་རིགས་རྟེན་དང༌། རྒྱས་འགྱུར་གྱི་རིགས་བརྟེན་པ་ཡིན་ཏེ། མདོ་སྡེ་རྒྱན་ལས། རང་བཞིན་དང་ནི་རྒྱས་པ་དང༌། །དེ་ནི་རྟེན་དང་བརྟེན་པ་དང༌། །ཡོད་མེད་ཉིད་དང་ཡོན་ཏན་ནི། །སྒྲོལ་བའི་དོན་དུ་ཤེས་པར་བྱ། །ཞེས་གསུངས་སོ། །རང་བཞིན་གནས་རིགས་འདུས་མ་བྱས་དང༌། རྒྱས་འགྱུར་གྱི་རིགས་འདུས་བྱས་ཡིན་པ་ནི།དབུ་མའི་མན་ངག་ཁྱད་འཕགས་ལས། རང་བཞིན་རིགས་ལ་སད་དང་མ་སད་མེད། །དེ་ཡོད་རྒྱུ་མཚན་རྒྱས་འགྱུར་སྐྱེ་བ་ལས། །དེ་ཡང་སད་ཅེས་རྣམ་བཞག་བྱས་པ་ཙམ། །འདི་འཕེལ་དེ་ཡང་འཕེལ་བའི་ཐ་སྙད་བཏགས། །ཞེས་དང༌། རི་ཆོས་ལས། རིགས་ལ་ཡོད་པ་དོན་དམ་རང་བཞིན་གྱི་རིགས་དང༌། མེད་པ་ཀུན་རྫོབ་རྒྱས་པའི་རིགས་ཀྱི་ཁྱད་པར་དང༌། ཞེས་དང༌། དེ་ལྟར་བདེན་གཉིས་ཀྱི་བདག་ཉིད་གཤིས་ཀྱི་གནས་ལུགས་ལ་ཡོད་པ་དང་མེད་པའི་རིགས་རྣམ་པ་གཉིས་གཞིར་གྱུར་པ་ལས། ཞེས་དང༌། རྒྱུད་བླ་དོལ་ཊཱིཀ་ལས། ཐོག་མ་མེད་པའི་དུས་ནས་སེམས་ཀྱི་རང་བཞིན་དུ་ཉེ་བར་གནས་པའི་ཆོས་ཀྱི་དབྱིངས་རྣམ་པར་དག་པ་རང་བཞིན་གྱི་རིགས་དང་དེ་ལ་དམིགས་ཏེ་ཐོས་པ་ལ་སོགས་པ་བྱས་པས་འབད་རྩོལ་གྱིས་གསར་དུ་ཡང་དག་པར་བླངས་པ་ལས་བྱུང་བའི་དགེ་བ་ཐར་བའི་ཆ་དང་མཐུན་པའི་མཆོག་ཏུ་གྱུར་པ་རྒྱས་འགྱུར་གྱི་རིགས་ཉིད་དོ། །ཞེས་གསུངས་པ་དང༌། སྔར་རིགས་དེ་གཉིས་ཀྱི་མཚན་ཉིད་བཤད་པས་གྲུབ་པའོ། །འོན་ཀྱང་མདོ་ལུགས་མ་ལས། དེས་ན་ཆོས་དབྱིངས་ཉིད་སྔོན་རྒྱུའི་གནས་སྐབས་ན་རིགས་རྣམ་པ་གཉིས་དང༌། ཕྱིས་འབྲས་བུའི་གནས་སྐབས་ན་སྐུ་རྣམ་པ་གསུམ་དུ་གསུངས་པའི་ཕྱིར་རང་བཞིན་དང་རྒྱས་པའི་རིགས་ཀྱི་དོན་ནི་དེ་ཡིན་ནོ། །ཞེས་དང༌། ཆོས་ཀྱི་དབྱིངས་ཉིད་ལམ་གྱི་དུས་སུ་ཐེག་ཆེན་གྱི་རིགས་དང༌། བྱང་ཆུབ་སེམས་དཔའི་རིགས་སུ་བསྟན་ལ། དེ་ཉིད་ཐེག་པ་གསུམ་གྱི་རིགས་ཐ་དད་པ་རྣམས་ཀྱི་ནང་ནས་རིགས་མཆོག་ཉིད་དུ་བསྟན་ཞིང༌། མཆོག་དེ་ཉིད་ཀྱི་ངོ་བོ་རང་བཞིན་དང་རྒྱས་པའི་རིགས་སུ་བསྟན་ཏེ། ཞེས་གསུངས་པའི་དགོངས་པ་ལ་དཔྱད་རྒྱུ་ཅུང་ཟད་སྣང་ངོ༌། །