གཉིས་པ་དུས་ཀྱི་ཀུན་སློང་།
གཉིས་པ་དུས་ཀྱི་ཀུན་སློང་ནི།
སྡོམ་པ་སྐྱེ་བ་དང་དུས་མཉམ་པའི་བསམ་པའི་ཆོས་ཡིན་ལ། དེའི་ཚེ་སྡོམ་པ་ནོད་པ་པོའི་བསམ་པ་ཇི་ལྟ་བུར་གྱུར་ཀྱང་སྡོམ་པ་སྐྱེ་སྟེ། སྡོམ་པ་སྐྱེ་བ་ལ་མངོན་དུ་གྱུར་པའི་དུས་སྐབས་ཡིན་པའི་ཕྱིར་རོ། །ཊཱི་ཀ་ལས། དེ་ལ་ནི་སྐྱེ་བའི་ཕྱིར་གང་གིས་ཀྱང་གེགས་བྱ་བར་མི་ནུས་པས། ཞེས་སོ། །འོ་ན་དུས་ཀྱི་ཀུན་སློང་མེད་པ་ལ་སྡོམ་པ་སྐྱེ་འམ་མི་སྐྱེ་བརྟག སྐྱེ་ན་ནི་མཛོད་འགྲེལ་ལས། དེ་མེད་ན་ཤི་བ་བཞིན་དུ་དེ་ཡོད་པར་མི་འགྱུར་རོ་ཞེས་གསུངས་པ་དང་འགལ་ལོ། །མི་སྐྱེ་ན་ཡང་མཛོད་འགྲེལ་ལས། སེམས་མེད་པའི་སྡོམ་པ་སྐྱེ་བ་ཞེས་གསུངས་པ་དང༌། དེའི་འགྲེལ་བཤད་གང་བ་སྤེལ་ལས། སེམས་མེད་པའི་སྡོམ་པ་སྐྱེ་བ་ཞེས་བྱ་བ་ལ་སོགས་པ་ལ་བསྙེན་པར་རྫོགས་པར་བྱེད་པའི་དུས་སུ་དགེ་འདུན་ལ་གསོལ་བ་བཏབ་ནས་ལེན་པ་པོ་འགོག་པ་ལ་སྙོམས་པར་ཞུགས་པ་ན་ལས་བརྗོད་པའི་དུས་སུ་སྡོམ་པ་སྐྱེ་ཞེས་བཤད་པ་དང་འགལ་ལོ་ཞེ་ན། སྔ་མ་ནི་མདོ་སྡེ་པ་དང་མཐུན་ཏེ། མདོ་སྡེ་པ་རྣམས་ནི་འགོག་པ་ལ་སྙོམས་པར་ཞུགས་པ་ན་ཡང་ཡིད་ཤེས་ཕྲ་བ་རྒྱུད་ལ་ཡོད་པར་འདོད་ཅེས་ལས་གྲུབ་པ་ནས་བཤད་དོ། །ཕྱི་མ་ནི་བྱེ་བྲག་སྨྲ་བའི་སྤྱི་གཞུང་ལྟར་ན་སེམས་རྣམ་ཤེས་ཚོགས་དྲུག་ལས་ཁས་མི་ལེན་ཅིང༌། འགོག་པ་ལ་སྙོམས་པར་ཞུགས་པ་ན་རྣམ་ཤེས་ཚོགས་དྲུག་བཀག་པའི་ཕྱིར་ན་སེམས་མེད་པའི་སྙོམས་འཇུག་ཅེས་ཟེར་ཏེ། དེའི་ཚེ་ན་སེམས་མེད་པ་ལ་སྡོམ་པ་སྐྱེ་བར་འདོད་པའོ། །