གཅོད་ཡུལ་བདུད་རྩི་ཀུན་ཁྱབ་ཀྱི་ངག་འདོ།
གཅོད་ཡུལ་བདུད་རྩི་ཀུན་ཁྱབ་ཀྱི་ངག་འདོན་བཞུགས་སོ། །
ཕཊཿ རང་ཉིད་ཀྱི་སྤྱི་བོར་དྲིན་ཅན་རྗེ། །སངས་རྒྱས་ཀྱི་ཁྱབ་བདག་བླ་མ་མཆོག །བྱིན་རླབས་ཀྱི་གཟི་བརྗིད་ལམ་སེ་ལམ། །གསོལ་འདེབས་ཀྱི་བུ་ལ་བྱིན་གྱིས་རློབས༔ ཕཊཿ རང་རིག་འདི་བླ་མའི་ཐུགས་ཀར་བསྟིམ། །ཆོས་དབྱིངས་སུ་གཟོད་ནས་རོ་གཅིག་པའི། །བླ་མ་ཡང་འོད་དུ་ལྟེམ་གྱི་ཞུ། །བདག་ལུས་དང་གཉིས་མེད་བདུད་རྩི་འཁྱིལ། ཕཊཿ ལུས་ཞུ་བས་བདུད་རྩིའི་རྒྱ་མཚོ་ལས། །འོད་རླངས་པ་ལྟ་བུའི་མཆོད་པའི་སྤྲིན། །ཞིང་ཀུན་ཁྱབ་རབ་འབྱམས་རྒྱལ་བ་མཆོད། །བྱིན་རླབས་དང་དངོས་གྲུབ་ཆར་
ཆེན་བབས། ཕཊཿ སྟོང་གསུམ་ཀུན་གང་ཞིང་འཁྱིལ་བ་ཡི། །ཅི་འདོད་བཞིན་ལྷུན་གྲུབ་བདུད་རྩི་འདི། །ཁམས་གསུམ་གྱི་སེམས་ཅན་ཐམས་ཅད་ལ། །ཕམ་རྒྱལ་དང་ཉེ་རིང་མེད་པར་སྦྱིན། ཕཊཿ། སྦྱིན་ཡུལ་དང་སྦྱིན་མཁན་སྦྱིན་བྱ་ཀུན། །རང་སེམས་ཀྱི་རྣམ་རོལ་སྒྱུ་འཕྲུལ་ལས། །ཨ་འཐས་ཀྱི་ཞེན་འཛིན་སྤྲོས་པས་དབེན། །གང་ཤར་ཀུན་ཆོས་སྐུར་ཁྲོ་ལོ་ལོ། །མཆོག་དམན་གྱི་མགྲོན་དང་དགྲ་གཉེན་དང་། །ཕན་བྱེད་ཀྱི་ལྷ་དང་གནོད་བྱེད་འདྲེ། །ཐ་སྙད་ཀྱི་མིང་འཛིན་རྣམ་རྟོག་གི། །བདེན་ཞེན་ཀུན་
གཏད་མེད་དུ་ཡ་ལ་ལ། །ཅིར་སྣང་ཀུན་རང་སེམས་ཐག་ཆོད་པས། །འདྲེར་འཛིན་གྱི་རྣམ་རྟོག་གང་དུ་སོང་། །འཇིགས་སྐྲག་གི་ཡུལ་སེམས་ཀྱི་དངོས་པོ་རྣམས། །རང་རིག་གི་ཀློང་གྲོལ་དུ་ཤིགས་སེ་ཤིག །སྣང་གྲགས་ཀུན་རྒྱལ་བའི་ཞིང་ཁམས་ཉིད། །ཚོགས་དྲུག་ཀུན་ཆོས་ཉིད་ཀྱི་རོལ་པ་ལ། །དགག་སྒྲུབ་ཀྱི་མཚན་མ་ཡེ་ནས་བྲལ། །བློ་འདས་ཀྱི་ཆོས་སྐུར་ཨེ་མ་ཧོ། ཕཊཿ བླ་མ་དགོངས་པ་འདུས་པའི་གཅོད་ཡུལ་ཆེན་མོའི་ངང་ནས། སྒྱུ་ལུས་མཆོག་སྦྱིན་བདུད་རྩི་ཀུན་ཁྱབ་ནམ་མཁའི་ཐིག་པ་ཅེས་བྱ་བའི་ཉམས་ལེན་རྒྱུན་ཁྱེར་ངག་འདོན་འདི་ཉིད་ནོར་བཟང་ཆོས་ཀྱི་དབང་པོས་བསྐུལ་ངོར། །རྒོད་ཕུག་བྱ་སྐྱིབས་ཀྱི་གནས་སུ་བྲིས་པ་མངྒ་ལཾ། །བཀྲ་ཤིས། གཅིག་ཞུད།