ཧོར་བླ་གཞན་ཕན་བཟང་པོ་ལ་བརྟགས་ལུང་གནང་བ།
༄༅། ཧོར་བླ་གཞན་ཕན་བཟང་པོ་ལ་བརྟགས་ལུང་གནང་བ་བཞུགས། སྐུ་གསུམ་རྒྱལ་བའི་ཐུགས་རྗེ་གཅིག་བསྡུས་པ། །སྐྱེ་རྒུ་ཡོངས་ཀྱི་སྐྱབས་གཅིག་འགྲོ་བའི་མགོན། །ཁམས་གསུམ་ཆོས་ཀྱི་རྒྱལ་པོ་རྫོགས་ཆེན་པ། །མི་འབྲལ་སྙིང་གི་པདྨོར་རྟག་ཏུ་མཆོད། །དོན་དམ་དབྱིངས་སུ་འཁོར་འདས་རོ་མཉམ་ཀྱང། །ཀུན་རྫོབ་སྣང་ཆར་བཟང་ངན་རྟེན་འབྲེལ་གཟུགས། །སོ་སོ་མ་ཡིན་ཐ་མི་དད་པའི་གཤིས། །མ་བཅོས་ལུང་ཚིག་ཕྲེང་བ་འདི་རུ་སྤེལ། །བཅོས་མིན་དད་པས་གསོན་དང་སྐལ་ལྡན་ཀྱེ། །བདག་འདྲ་སོ་སྐྱེས་འཆིང་བ་དམ་ལྡན་ལ། །དུས་གསུམ་མཁྱེན་པའི་མངོན་ཤེས་ཡོད་མི་སྲིད། །འོན་ཀྱང་ཨོ་རྒྱན་རྗེ་དང་འཕགས་མ་སོགས། །ལྷ་དང་བླ་མར་གསོལ་བ་བཏབ་འབྲས་ལས། །ཐོལ་བྱུང་ཉམས་ཀྱི་སྣང་བར་གང་ཤར་བ། །ཐོགས་མེད་བླ་བརྡོལ་ཚུལ་དུ་འདི་རུ་སྨྲ། །སྐྱེ་མང་མཆོག་གསུམ་བླ་མས་རྗེས་བཟུང་མཐུས། །དལ་བའི་རྟེན་བཟང་དགེ་བཅུའི་ལོ་འབྲས་སྨིན། །རྣམ་དག་ཁྲིམས་ཀྱི་གཞི་ལ་གནས་བཅས་ནས། །ལྷག་པའི་ལྷ་མཆོག་རྗེ་བཙུན་འཕགས་མ་དང་། །འཇིག་རྟེན་དབང་ཕྱུག་ཡབ་ཡུམ་བསྙེན་པའི་གྲངས། །རང་མོས་གང་ཡོད་དུང་ཕྱུར་སྒྲུབ་པའི་གནས། །བྲག་དམར་རྒོད་པོ་རྫོང་དང་ཉེ་བའི་ཞོལ། །ཟླ་གམ་ཁ་སྦྱོར་དབང་གི་ཡི་གེ་བཀྲ། །ཤར་གྱི་ཕྱོགས་སུ་བལྟ་བའི་ཕུག་པ་རུ། །གཉིས་མིན་གཅིག་པུར་སྒྲུབ་པའི་དམ་བཅའ་ཡི། །འགོག་མིན་རི་མོ་ཙིཏྟར་རྒྱས་ཐོབ་དང། །རང་གཞན་དོན་གཉིས་དཔལ་ལ་སྤྱོད་པ་ཡོངས། །དེ་ལྟ་ནའང་འདོད་པའི་དབང་ཕྱུག་ནི། །གཉེན་དང་ཉེ་བ་སྙིང་བརྩེའི་གྲོགས་པོ་སོགས། །ཐོགས་བཅས་བདུད་དང་ཉོན་མོངས་དུག་ལྔ་ཡི། །བསླུ་བྱེད་བདུད་ནི་རྫོགས་སངས་རྒྱས་ཀྱི་བར། །ཅི་ཡང་བརྫུ་ལ་རྟག་ཏུ་དོགས་ཟོན་དགོས། །ཉེར་བདུན་བགྲང་བྱར་ཡུལ་ལྔའི་བདུད་ཅིག་ལྡང་། །དེ་སེལ་བྱེད་པོ་ཨོ་རྒྱན་ཆེན་པོ་ལ། །གསོལ་འདེབས་བསམ་པ་ལྷུན་གྲུབ་འབུམ་ཕྲག་དང་། །ཁྱད་པར་དབེན་པའི་གནས་སུ་རང་ཉིད་ཀྱི། །སྣ་ཐག་གཞན་ལ་མ་ཤོར་སྒྲུབ་གལ་ཆེ། །སོ་བདུན་རྒྱལ་བསེན་ཡུལ་འདྲེའི་འཚེ་བ་འོང་། །ཡང་ཟབ་ཕུར་བའི་སྒྲུབ་པ་ཚད་ལྡན་དང་། །ཨོ་རྒྱན་ཆེན་པོའི་སྐུ་སྤར་འབུམ་ཕྲག་གྲངས། །ཚེ་ཐར་སྲོག་བསླུ་རྒྱལ་གདོན་འབྱུང་པོ་ལ། །བརྔན་སྦྱིན་ཆོ་ག་རིམ་གྲོས་ངེས་པར་སེལ། །རྩ་བའི་བསྲུང་མ་དཔལ་ལྡན་དུད་སོལ་མ། །དམ་ཅན་སྐྱེས་བུའི་གསོལ་མཆོད་གཡེལ་མེད་ཀྱིས། །འདོད་དགུའི་རེ་བ་མི་མངོན་དབྱིངས་ནས་སྒྲུབ། །ཚེ་ཡི་ཚད་ནི་འཕེལ་འགྲིབ་ཆེར་འོང་བས། །འདི་ཞེས་གཅིག་ཏུ་ཁ་ཚོན་གཅོད་དཀའ་ཡང་། །ལོ་ལྟར་སྲོག་བསླུ་བཅུའམ་བདུན་གྱི་གྲངས། །ཆད་མེད་རྒྱུན་དུ་བསང་གསུར་ཆུ་སྦྱིན་དང་། །དཀར་ནག་ཁྲ་གསུམ་འབར་མའི་གླུད་ལ་འབུངས། །ཡར་མར་ཚེས་བཅུར་དཔའ་བོ་མཁའ་འགྲོ་ལ། །ཅི་ཡོད་འབྱོར་བས་ཚོགས་དང་བསྐངས་བ་རེམ། །ཁྱད་པར་ལུས་ཀྱི་མཆོད་སྦྱིན་གནད་དུ་སྣུན། །དེ་ལྟར་རིམ་གྲོའི་དཔུང་ཚོགས་ཤུགས་ཆེ་ན། །བཅུ་ཕྲག་ལྔ་དང་ཟུང་དུ་འཚོ་ཡང་སྲིད། །སྤྲེའུས་བདེ་སྡུག་ཆོ་ལོ་སྣ་ཚོགས་རྩེ། །མཁའ་ལྡིང་སྒྱུ་མའི་རང་མཚང་འགའ་ཡང་སྟོན། །ནོར་སྐྱོང་དུག་གི་མཆེ་བས་རྐང་ལ་གཟན། །འཁོར་ལོའི་སྣ་ཅན་འགའ་ཡིས་གུས་ཚུལ་སྟོན། །བྱི་བས་བསོགས་པའི་ཟས་ལ་ཐོབ་ཤ་བྱེད། །གླང་རྒོད་དམར་པོས་རྭ་རྩེ་རང་ལ་སྟོན། །སྟག་ཞོན་དཔའ་བོས་མི་མཐུན་ཡུལ་འགའ་འཇོམས། །སྔར་བརྟེན་རང་གི་བླ་མ་སྙིང་ལ་ཆོངས། །ཧཱུྃ་ནག་མེ་འབར་བྲིས་སྐུ་ལུས་དྲོད་དང་། །འབྲལ་མེད་དེ་བཞིན་གསོལ་འདེབས་བླ་སྒྲུབ་འབོད། །ཚེ་དང་སྒྲུབ་པའི་དམ་བཅའ་བྱེད་ནུས་ན། །ལུས་སེམས་བྲལ་ཚེ་པདྨ་འོད་དུ་འགྲོ། །རྒྱལ་དང་རྒྱལ་བའི་སྲས་ཀྱི་ཐུ་བོར་འགྱུར། །བྱིང་འཐིབ་དྲན་པ་མི་གསལ་རྐྱེན་འགའ་འབྱུང་། །གསལ་བའི་སྒྲོན་མེ་ཤེས་རབ་ལྷ་མོ་བརྟེན། །རེ་འགའ་རི་ལ་སྡོད་པའི་སྐབས་འགའ་རུ། །ཉམས་དང་རྨི་ལམ་སྔར་མེད་འགའ་ཡང་གསལ། །རང་མཐོང་དྲེག་པའི་ང་རྒྱལ་ཁོང་ནས་སོད། །དམན་ཚུལ་དམ་པའི་ཕྱག་སྲོལ་འཆུག་མེད་རེམ། །དོན་གཉིས་ལྷུན་གྱིས་གྲུབ་པའི་ལྟས་བཟང་ཤར། །མོས་གུས་ཅན་གྱི་ས་ར་ཧི་ཏ་ལ། །དགེ་སྦྱོང་རྒན་པོས་གང་ཤར་ཐོལ་བྱུང་སྨྲས། །ཚིག་འདིས་བསླུ་སྙམ་ཐེ་ཚོམ་ཅུང་ཟད་མེད། །མཆོག་གསུམ་ཐུགས་རྗེས་གེགས་ཞི་དོན་གྲུབ་ཤོག །