བསད་པ་དོན་བསྡུས་རྒྱུན་ཁྱེར་ཉམས་ལེན།
བསད་པ་དོན་བསྡུས་རྒྱུན་ཁྱེར་ཉམས་ལེན་ནི༔ བྱད་མ་མགོ་མཇུག་ལོག་ནས་ཡོད་པ་ཡི༔ རྩ་དབུ་མ་རྐྱང་མ་རོ་མ་གསུམ་རྩ་སྦུབ་ཏོག་གི་ཡོད་པ་ལ༔ རང་གཤིན་རྗེའི་གཤེད་པོར་གསལ་བའི་ལྕགས་ཕུར་དེ་ལས་གཤིན་རྗེ་སྟོད་ཞལ་གསུམ་ཕྱག་དྲུག་རང་འདྲ་བ་ལ་སྨད་ལྕགས་ཕུར་ཟུར་གསུམ་དུ་གྱུར་ནས༔ རྩ་སྦུབ་གསུམ་དུ་བཏབ་པས་ལུས་ལ་གཟིར་དཀྱིལ་མོ་དབང་ཆེན་གསེར་གྱི་ས་གཞི་ལ་ཐུག་པར་བཏབ་སྟེ་ཕུར་པའི་དབལ་ཁར་གནམ་ལྕགས་ཀྱི་འཁོར་ལོ་རྩིབས་བརྒྱད་པ་དྲག་ཏུ་འཁོར་བས་བསྒྲུབ་བྱའི་ལུས་ངག་ཡིད་གསུམ་དམྱལ་དམྱལ་བཏང་སྟེ༔ ཤ་ཁྲག་དམར་སྤུངས་སྤུངས་སོང་བ་རྣམས་ཀྱང་གཤིན་རྗེའི་དམག་ཚོགས་སུ་གྱུར༔ ཁོ་རང་གི་དུག་གསུམ་ངོ་བོ་ལས་གྲུབ་པའི་ལས་ཀྱི་གཤིན་རྗེ་ཨ་ཝ་གླང་མགོ་དང་སྟག་མགོ་དང་འུག་པའི་མགོ་ལ་སོགས་ཕོ་ཉ་དཔག་ཏུ་མེད་པས་མཚོན་ཆ་ཐོགས་ཏེ༔ ཤ་རུས་ལ་རྒྱབ་བརྡུང་༔ ནད་དང་མཚོན་ཆ་སྣ་ཚོགས་ཀྱི་ཆར་དུ་ཕབ༔ ཤ་ཟོས་ཁྲག་འཐུང་རུས་པ་མུར་ནས་གཏན་དུ་བརླག་པར་གྱུར་ཅིང་རང་གཤེད་རང་ལ་ཕབ་པར་གྱུར༔་རང་གི་ཕྱོགས་མཚམས་ཐམས་ཅད་ལྕགས་སྲེག་གི་ས་གཞི་འབར་བས་བྱད་མ་ལྷ་སྲུང་དང་
བཅས་པ་ཐམས་ཅད་བྱ་སྒོ་མེ་ལ་བསྲེགས་པ་བཞིན་དུ་གཞོབ་ཐུལ་གྱིས་མེད་པར་གྱུར༔ ཕུར་པ་ལིངྒ་ལ་བཏབ་པའམ༔ དགྲ་ཕྱོགས་སུ་གཟིར་རོ༔ བསད་སྔགས་བསྙེན་པར་ཛ་ཛ་ནན༔ བཏགས་ལ་བརྒྱ་རྩ་བཟླ༔ གཏོར་མ་བསྐུལ་དང་བཅས་པ་དགྲ་ཕྱོགས་སུ་འཕང་ངོ་༔ བསད་པ་དོན་བསྡུས་རྒྱུན་ཁྱེར་ཡིན༔ ཆོས་ཀྱི་རྒྱལ་མཚན་དགེ་ལེགས་དཔལ་བཟང་པོ་ནས་བརྒྱུད་པའོ༔ ཁ་ཐཾ་རྒྱ་རྒྱ་རྒྱ༔ གསང་རྒྱ༔ མངྒ་ལཾ།། ཨཾ༔ ན་མོ་ཡ་མཱནྟ་ཀ་ཡེ། ཁ་ལ་རྒྱས་འདེབས་ལ་སོགས་པའི། །མནན་པའི་རིགས་ནི་གང་བྱེད་ཀྱང་། །ས་བདག་ཐེ་སེ་སྤྲེལ་ཁོག་ནི། །ཚེས་གྲངས་བཅུ་གཉིས་དག་ལ་རྒྱུ། །དེ་ཉིན་ས་ནི་མཐུ་བའི་ཚད། །དུ་བསྐོས་གྲངས་ཀྱི་མི་འཆི་གསུངས། །དེ་ཕྱིར་ཀུན་ལ་འཛེམ་པར་བྱ། །སྡེ་བརྒྱད་ལྡོག་དུས་མི་བྱ་ཞིང་། །ཐེབས་དུས་བྱ་ཞིང་ཀླུ་ཐེབས་གནད། །ལྟོ་འཕྱེའི་འཁོར་ཐིག་བཤད་མོད་ཀྱང་། །གསར་རྙིང་མི་མཐུན་ཐེ་ཚོམ་བཞག །ཐེ་ཚོམ་མེད་པའི་དག་རྩིས་ནི། །དཔྱིད་གསུམ་བྱུང་དུ་ཁ་བལྟས་བརྐོ། །དབྱར་གསུམ་ཤར་དུ་ཁ་བལྟས་བརྐོ། །སྟོན་གསུམ་ལྷོར་ལྟ་དགུན་གསུམ་ནུབ། །སྐག་ལེ་ལྔ་ནི་རྒྱག་ཚེ་ཡིན། །གྲུ་གང་
མཐོ་གང་ཚད་ཡིན་ནོ། །དེ་བས་ཐུང་ན་ནུས་པ་མེད། དེ་བས་རིང་ན་གདོང་ཉེས་ཡོད། །དབྱིབས་ནི་གྲུ་གསུམ་ཉིད་དུ་བྱ། །ཟླ་བའི་ངོས་འཛིན་རིགས་བཞི་སྟེ། །རྒྱལ་གྱི་ཉ་ལ་སྟག་ཟླར་བརྩི། །དེ་ལ་འཁྲུལ་བ་མེད་པ་ཡིན། །སྟག་ཟླ་དཔྱིད་ཟླ་ར་བ་སྟེ། །དཔྱིད་དབྱར་སྟོན་དགུན་རིམ་པ་ལྟར། །ར་འབྲིང་ཐ་ཆུང་བཅུ་གཉིས་སོ། །ཟླ་ལྷག་བུང་ན་གང་ལྷག་པ། ས་རིས་དང་བསྟུན་བརྩི་ཞིབ་བྱ། །སྔགས་འཆང་རཱ་ག་ཨ་སྱས་བྲིས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།