དཔལ་ཀྱེ་རྡོ་རྗེའི་མར་མེའི་རྩེ་མོ་ལྟ་བུའི་གདམས་པ།
མཚོ་སྐྱེས་རྡོ་རྗེས་མཛད།
རྒྱ་གར་སྐད་དུ། ཤྲཱི་ཧེ་བཛྲ་པྲཱ་དཱི་པ་ཤཱུ་ལོ་པ་མ་བཱ་བཱ་ད་ཀ་ནཱ་མ། བོད་སྐད་དུ། དཔལ་གྱི་རྡོ་རྗེའི་མར་མེའི་རྩེ་མོ་ལྟ་བུའི་
གདམས་པ་ཞེས་བྱ་བ། དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །ཤེས་རབ་སྙིང་པོའི་རྩེར་གྱུར་པ། །བདག་མེད་མ་ལ་ཕྱག་འཚལ་ནས། །བདག་མེད་རྡོ་རྗེའི་ཞལ་སྔ་ནས། །དབང་དང་གདམས་ངག་འབྲེལ་པ་ཡི། །མར་མེའི་རྩེ་མོ་ལྟ་བུ་ཡི། །ཀྱེ་ཡི་རྡོ་རྗེའི་མན་ངག་བཤད། །རྣལ་འབྱོར་བ་གང་ཞིག་དཔལ་ཀྱེ་རྡོ་རྗེའི་དབང་དང་ལྡན་ཞིང༌། དམ་ཚིག་དང་ལྡན་ཏེ་རྡོ་རྗེ་འཆང་ཆེན་པོ་བསྒྲུབ་པར་འདོད་པས། །དང་པོ་གནས་ལ་སོགས་པ་ཁྱད་ཅན་བཙལ་ཏེ། །ཁམས་དང་ལུས་ཀྱི་འབྱུང་བས་ཆ་བསྙམ་མོ། །དེ་ལྟར་ཁམས་ཤིན་ཏུ་བདེ་བ་དང༌། སྟན་བདེ་བའི་སྟེང་དུ་ལུས་ཁོང་གློད་དེ་བདེ་བར་ཉལ་ལོ། །དེ་ནི་བསམ་གཏན་གྱི་ཚོགས་སྣ་ཚོགས་པས་ཚོགས་ཀྱི་ལམ་གྱི་བདག་ཉིད་དོ། །དེ་ནས་ཐོ་རངས་སྐྱ་རེངས་དང་པོ་ཤར་བ་དང་ལེགས་པར་ལངས་ཏེ། སྐྱོན་མེད་པའི་གོས་ལེགས་པར་གྱོན་ནས་ཁམས་དང་འབྱུང་བའི་དྲོད་སྦྱར་ཏེ། ཁྲུས་དང་གཉིད་སད་པའི་ཆོ་ག་བྱའོ། །དེ་ནས་སྟན་ནང་ཚངས་ཅན་གྱི་སྟེང་དུ་ལེགས་པར་འདུག་སྟེ། ལུས་ལེགས་པར་ཆ་བསྙམ་མོ། །སེམས་ཀྱང་ཆ་བསྙམ་སྟེ། དེ་ཡན་ཆད་ཀྱིས་ནི་བསམ་གཏན་ལ་སྦྱོར་བས་ན་སྦྱོར་བའི་ལམ་གྱི་བདག་ཉིད་དོ། །དེ་ནས་བདག་ཉིད་དཔལ་ཀྱེ་རྡོ་རྗེ་ཞལ་གཅིག་ཕྱག་གཉིས་པ་གཡས་པ་ན་རྡོ་རྗེ་རྩེ་ལྔ་པ། གཡོན་པ་ན་ཀ་པཱ་ལ་བསྣམས་པ་བསམ་མོ། །དེ་ནས་རང་གི་སྙིང་གར་ཉི་མ་དང་ཟླ་བའི་སྟེང་དུ་ཧཱུཾ་སྔོན་པོ་བསམས་ཏེ་དེ་ལས་འོད་ཟེར་ཕྱི་རུ་འཕྲོས་ཏེ། ཕྱི་རོལ་སྣོད་ཀྱི་འཇིག་རྟེན་ཐམས་ཅད་དང༌། ནང་བཅུད་ཀྱི་འཇིག་རྟེན་སྐྱེ་འགྲོ་མོ་རིགས་ཐམས་ཅད་ཀྱི་རྟོག་པ་བསྲེགས་ཏེ་སླར་འདུས་པས་ཡུམ་བདག་མེད་མ་ཤེས་རབ་ཀྱི་ཆ་སྣོད་ཀྱི་འཇིག་རྟེན་གྱི་རང་བཞིན་དུ་བསམ་མོ། །དེ་བཞིན་དུ་སྐྱེ་འགྲོ་ཕོ་རིགས་ཐམས་ཅད་བསྲེགས་ཏེ་སླར་འདུས་པས་རང་ཉིད་དཔལ་ཧེ་རུ་ཀ་བཅུད་ཀྱི་འཇིག་རྟེན་གྱི་རང་བཞིན་དུ་བསམས་ཏེ་གཞན་སྦྱོང་ངོ༌། །དེ་ནས་ཡུམ་གྱི་སྙིང་གར་ཟླ་བ་དང་ཉི་མའི་བར་དུ་ཨོཾ་བསམས་ཏེ། འོད་དེས་ཡུམ་ཉིད་འོད་དུ་ཞུ་སྟེ། ཡབ་ཀྱི་ཐུགས་ཀར་ཐིམ་པར་བསམ་མོ། །དོན་དེ་ཉིད་སྔར་མ་མཐོང་བ་མཐོང་བའི་ལམ་གྱི་བདག་ཉིད་དོ། །དེ་ནས་ཡབ་ཀྱི་སྙིང་གར་ཉི་ཟླའི་བར་དུ་ཧཱུཾ་གི་འོད་ཀྱིས་ཡབ་ཉིད་འོད་དུ་ཞུ་སྟེ་སྟེང་དུ་ཉི་མ་རང་བསམས་སྟེ་ཐབས་སོ། །ཡུམ་
ནི་འོག་ཏུ་ཟླ་བ་སྟེ་ཤེས་རབ་བོ། །ཉི་ཟླའི་བར་དུ་ས་བོན་གྱི་ཡི་གེ་ཧཱུཾ་ལས་ཡན་ལག་གི་ཡི་གེ་ཀཱ་ལི་བརྒྱད་ཅུ་མགོ་ཐུར་དུ་བལྟས་པར་བསམ་མོ། །དེ་བཞིན་དུ་ཉིད་ལག་གི་ཡི་གེ་ཨཱ་ལི་སུམ་ཅུ་རྩ་གཉིས་མགོ་གྱེན་དུ་བལྟས་པར་བསམ་མོ། །ཡི་གེ་ཧཱུྃ་ནི་ཐབས་ཤེས་རབ་གཉིས་མེད་དུ་བསམ་མོ། །ཉི་མ་དང་ཟླ་བ་ནི་སྲན་མ་ཙམ་མོ། །ཧཱུྃ་ནི་ཡུངས་ཀར་གྱི་འབྲུ་ཙམ་མོ། །ཨཱ་ལི་ཀཱ་ལི་ནི་སྐྲའི་རྩེ་མོ་ཙམ་མོ། །དེ་ལྟར་ཐིག་ལེ་བསྒོམས་པ་ནི་སྒོམ་པའི་ལམ་གྱི་བདག་ཉིད་དོ། །དེ་ནས་ཧཱུྃ་དེ་ལས་འོད་ཟེར་བྱུང་སྟེ། ཀཱ་ལི་འོད་དུ་ཞུ་སྟེ་ཨཱ་ལི་ལ་ཐིམ་པས་ཨཱ་ལི་ཡང་ཞུ་སྟེ་ཟླ་བ་ལ་ཐིམ་པར་བསམ་མོ། །དེ་བཞིན་དུ་ཉི་མ་ཡང་ཟླ་བ་ལ་ཐིམ་པར་བསམ། །ཟླ་བ་ཞབས་ཀྱུ་ལ་ཐིམ་པར་བསམ་མོ། །ཧཱུཾ་ཡང་རིམ་གྱིས་སྤངས་ཏེ་རིམ་གྱིས་བསྒོམས་པ་ནི་ཕྲ་མོའི་རྣལ་འབྱོར་རོ། །དེ་ནས་དཀར་ལ་འཚེར་བའི་བདུད་རྩིའི་ཐིག་ལེ་སྐྲའི་རྩེ་མོ་ཙམ་ལ་སེམས་གཏད་དོ། །དེ་ནས་ནཱ་ད་སྐྲ་རིངས་རྡུལ་ཕྲ་རབ་ཙམ་ལ། དེ་ནས་སེམས་ཙམ་ལ་སེམས་གཏད་དོ། །དངོས་པོ་སྤོང་བའི་མཐར་ཕྱིན་པས་མཐར་ཕྱིན་པའི་ལམ་གྱི་བདག་ཉིད་དོ། །དེ་ནས་སེམས་འོད་གསལ་བར་བསྒོམ་སྟེ། དེ་ཡང་སྣོད་བཅུད་ནི་ཡབ་དང་ཡུམ་གྱི་བདག་ཉིད་དོ། །ཡབ་ཡུམ་ནི་ཐིག་ལེའི་བདག་ཉིད། ཐིག་ལེ་འང་ཕྲ་མོའི་བདག་ཉིད། ཕྲ་མོའང་སེམས་ཀྱི་བདག་ཉིད། སེམས་ཀྱང་གདོད་མ་ནས་སྟོང་པའི་རང་བཞིན་ཅན་ཐོག་མ་དང་ཐ་མ་ལ་སོགས་པ་མཐའ་ཐམས་ཅད་དང་བྲལ་བ་བསྒོམས་པ་ནི་རྡོ་རྗེ་འཆང་ཆེན་པོ་སྟེ། ལམ་ལྔའི་འབྲས་བུའི་བདག་ཉིད་དོ། །གོང་གི་རིམ་པ་དེ་དག་ཀྱང་རྣལ་འབྱོར་བའི་མོས་པའི་བྱེ་བྲག་གིས་ལོ་འམ་ཟླ་བར་བཞག་ལ་སེམས་བརྟན་པར་བྱ་སྟེ། དེ་ནས་ཡབ་ཡུམ་ལ་བསླབས་ཏེ་རིམ་གྱིས་བསྒོམ་པའང་ཡོད་དོ། །གཞན་ཡང་ཐུན་གཅིག་ལ་རིམ་པ་གཉིས་རྫོགས་པར་བསྒོམ་པ་འང་ཡོད་ཁ་ཅིག་ནི་གོང་མ་ལ་ཅིག་ཅར་འཇུག་པའང་ཡོད་པས་ཅི་རིགས་པར་སེམས་ངོས་བཟུང་ཞིང་མན་ངག་སྦྱིན་ནོ། །སྐྱོན་ནི་བྱིང་རྒོད་གཉིས་སོ། །དེ་ལ་བྱིང་བ་བསལ་བའི་ཐབས་ནི་སེམས་གཟེངས་བསྟོད་དེ་སངས་རྒྱས་ཀྱི་མཁྱེན་པའི་ཡེ་ཤེས་དྲན་པར་བྱས་ཏེ་དེ་ནས་ཡང་བསྒོམ་མོ། །གཉིད་ལ་ནི་གདོང་པ་ལ་ཆུ་གཏོར་བ་འམ་བསྒོས་
པར་བྱས་ཏེ་བསལ་ལ་ཡང་བསྒོམ་མོ། །རྒོད་ན་འཁོར་བའི་སྡུག་བསྔལ་གྱི་ཡུལ་དེ་ཉིད་ལ་སྐྱོ་བ་བསྐྱོད་དེ་ཡང་བསྒོམ་མོ། །དེས་ཀྱང་མ་ཞིན་ཡུལ་དེ་ཉིད་དམིགས་པ་བསྒྱུར་ཏེ་སེམས་དེ་ཉིད་ལ་གཏད་དེ་བསྒོམ་མོ། །ཐུན་ནི་བཞི་སྟེ་སེམས་ཉམ་ཆུང་ཙམ་ན་ནི་ཐུན་ཚོད་དབྱུ་གུས་གཟུང་ལ་ཐུན་ཐུང་བར་བསྒོམ་མཚམས་རིང་བར་བསྒོམ། སེམས་ཅུང་ཟད་བརྟས་ནས་ཆུ་ཚོད་ཀྱིས་ཐུན་ཚོད་གཟུང་ངོ༌། །དེ་བཞིན་དུ་སེམས་ཅུང་ཟད་བརྟས་ནས་ཉམས་རྙེད་པ་དང༌། སེམས་སྟོབས་དང་ལྡན་པའི་ཐུན་ཚོད་ནི་འཕོ་བ་དང༌། ཐུན་དང༌། ཉིན་ཞག་དང༌། ལོ་ཟླས་ཐུན་མཚམས་གཟུང་སྟེ། རིང་བར་བསྒོམ་ཞིང་ཐུན་མཚམས་ཐུང་བར་བསྒོམ་མོ། །རྟགས་ནི་དང་པོ་ཁམས་མི་རྟོག་པ་འབྱུང་ངོ༌། །དེ་ནས་རང་གི་ལུས་ལ་ནད་རྙིང་པ་འབྱང་ཞིང་གསར་པ་མི་སྐྱེད་པ་དང༌། ལུས་ཀྱི་ཉེས་པ་ལས་ངང་གིས་ལྡོག །དགེ་བ་ལ་ཐབས་ཀྱིས་འཇུག་སྟེ། ལུས་ཀྱི་རྟགས་འདར་བ་ལ་སོགས་པ་འབྱུང་ངོ༌། །རྣལ་འབྱོར་ཕྱི་ལ་མཆོག་ཏུ་གཞོལ་བས་ནི་ཐུན་བཞི་ཀའི་སྔོན་དུ་མཆོད་པ་དང་བསྟོད་པ་དང༌། གཏོར་མའི་མཆོད་པ་བྱས་ཏེ་བསྒོམ་མོ། །བླ་མ་བརྒྱུད་པ་ལས་རྙེད་པའི། །དབང་དང་གདམས་ངག་འབྲེལ་བཅས་པའི། །མར་མེའི་རྩེ་མོའི་གདམས་ངག་བརྩམས། །དེ་ཡིས་དགེ་བ་གང་ཐོབ་པས། །འགྲོ་བ་སེམས་ཅན་ཐམས་ཅད་ཀྱིས། །སྟོང་པའི་འོད་གསལ་ཐོབ་པར་ཤོག །དཔལ་ཀྱེ་རྡོ་རྗེའི་མར་མེའི་རྩེ་མོ་ལྟ་བུའི་གདམས་ངག་སློབ་དཔོན་མཚོ་སྐྱེས་རྡོ་རྗེས་མཛད་པ་རྫོགས་སོ། །རྒྱ་གར་གྱི་མཁན་པོ་ག་ཡ་དྷ་ར་དང༌། བླ་མ་ཤཱ་ཀྱ་ཡེ་ཤེས་ཀྱིས་བསྒྱུར་ཅིང་ཞུས་པའོ།། །།