ཧོར་བླའི་ཞབས་བརྟན་གསོལ་འདེབས་འཁོར་གདོང་མགོན་དབང་གིས་མཛད་པ།

༄༅། ཨོཾ་སྭ་སྟི། རྒྱལ་བ་ཀུན་འདུས་མ་ཧཱ་གུ་རུ་ཡི། །ཕྲིན་ལས་ཡོངས་ཤར་འགྲོ་ངོར་གཟུགས་སྐུའི་ཚུལ། །གྲུབ་པའི་དབང་ཕྱུག་གཞན་ཕན་བཟང་པོ་ཡི། །བསྟན་སྲུང་དམ་ཅན་ཚོགས་ཀྱིས་ཉེར་དགོངས་ནས། །བར་ཆད་ཀུན་སེལ་སྐུ་ཚེ་བསྐལ་བརྒྱའི་བར། །བརྟན་ནས་བཤད་སྒྲུབ་བསྟན་པ་མཐར་རྒྱས་ཤོག །ཅེས་སློབ་བུ་དད་ལྡན་ལུང་རྟོགས་བསྟན་འཛིན་གྱིས་བསྐུལ་བས་བདག་གསང་འཛིན་དཔའ་བོ་མགོན་པོ་དབང་རྒྱལ་གྱིས་ཐུབ་བསྟན་ཨེ་ཝཾ་གསང་སྔགས་འཁོར་ལོ་གདོང་གི་ཕོ་བྲང་ཡང་དབེན་པདྨའི་དགའ་ཚལ་ནས་ཕུལ་བ་དགེའོ༔