བསྟན་པ་དར་རྒྱས་ལ་གསུངས་པ།
༧༽ ཀ་ཡི་གསོན་དང་བསྟན་པ་དར་རྒྱས་ལགས། །ཁ་ཞེ་གཅིག་དྲིལ་བསླབ་བྱ་འདི་ལ་ཉོན། །ག་ལེར་སྡོད་ཤོམ་བློ་རྒྱ་མ་བསྐྱེད་ལ། །ང་བཞིན་ཕྱི་མའི་དོན་ལ་འབད་ན་ལགས། །ཅ་ཏིའི་རྩེ་མོའི་བྱིའུ་ཁྲས་དེད་ལྟར། །ཆ་མེད་ཡུལ་དུ་འཁྱམས་པའི་ཚེ་འདིས་ཆེད། །ཇ་ཆང་ཤ་སོགས་བཟའ་བཏུང་ལོངས་སྤྱོད་དང་། །ཉ་ཟླའི་མདངས་འཛིན་འོ་ཞོ་མར་ཐུད་སོགས། །ཏ་ཐཱ་ག་ཏའི་བསྟན་འཛིན་དགེ་འདུན་སྟེར། །ཐ་མལ་སྐྱེས་བུས་དད་པས་ཕུལ་མོད་ཀྱང་། །ད་ལྟའི་ལྟ་སྣང་མཛེས་ཙམ་ཕན་པར་དཀའ། །ན་རག་གནས་སུ་མི་བགྲོད་ཐུགས་བསྐྱེད་གལ། །པ་སཾ་སྟོབས་ཆེན་བསགས་པའི་དགུང་ཞག་དང་། །ཕ་རོལ་གཞན་གྱིས་བསྔགས་རེའི་རྣམ་དཀར་ལས། །བ་ལང་ལྟར་རྨོངས་ཉེ་རུའི་ཁ་ལན་ཆོས། །མ་དག་བསམ་སྤྱོད་དེ་འདྲ་དམན་པའི་ལས། །ཙ་ཏུར་མུ་ཁའི་ཁེངས་དྲེགས་འཕྲོག་བྱེད་པ། །ཚ་གྲང་དམྱལ་བ་ཡི་དྭགས་དུད་འགྲོ་གསུམ། །ཛ་ལའི་རྒྱུན་ལྟར་བར་མེད་སྡུག་བསྔལ་སྤྱོད། །ཝ་ལེར་རང་རིག་རྟོགས་དམས་དེ་ལྟར་མིན། །ཞྭ་བཞིན་མཆོག་གསུམ་སྤྱི་བོས་རྟགས་བཀུར་དང་། །ཟ་ཐང་ལོངས་སྤྱོད་མཆོག་སྦྱིན་ལ་གཏོང་བ། །འ་འོལ་ཙམ་མིན་འགྲོ་ལ་བྱམས་བརྩེ་ལྡན། །ཡ་མཚན་ཐེག་ཆེན་ལམ་དུ་གདོན་མི་ཟ། །རཱ་མེད་གཉིས་འཐུང་ཆོས་བརྒྱད་གསེར་རྒྱན་ཅན། །ལ་ལ་ཕྱོགས་ཞེན་ནགས་ཚ་ལ་དགའ་ཡང་། །ཤ་ཚའི་རིགས་ཀྱི་མྱུ་གུ་གཅེས་སྤྲས་བཞིན། །ས་ལམ་བགྲོད་པའི་ཐབས་ཀྱིས་ཟིན་དཀའ་ན། །ཧ་ཅང་རང་ཕྱོགས་ཕྱར་འདོད་ཡ་རེ་ཆ། །ཨཱ་དོན་རང་སྐྱོན་ལྟོས་དང་དོན་གཉིས་འགྲུབ། །ཨ་ཏིའི་རྣལ་འབྱོར་ཁྱོད་ཀྱིས་འདིད་དོན་རྣམས། །མཁྱེན་པར་མཛོད་དང་ཀུན་ལ་ཕན་ཞེས་སྨྲས། ཞེས་པའང་རིག་འཛིན་ཀུན་བཟང་གཞན་ཕན་གྱིས་སོ། །ཨེ་མ་ཧོ། དཔལ་ཡོན་ཏན་ཀུན་གྱི་འབྱུང་གནས་ཆེ། །ཕ་དུས་གསུམ་ཀུན་མཁྱེན་འཇིགས་མེད་གླིང་། །བདག་གསོལ་འདེབས་བུ་སློབས་བྱིན་གྱིས་རློབས། །མཆོག་ཐུན་མོང་གི་དངོས་གྲུབ་ཆར་ལྟར་ཕེབས། །ཁྱོད་གསོན་དང་ཆུ་སྐྱེས་དྲི་མེད་ལགས། །རྟེན་དལ་འབྱོར་ཐོབ་པ་མང་ལགས་ཀྱང་། །ཆོས་རྣམ་དག་བསྒྲུབ་པ་ཤིན་ཏུ་ཉུང་། །དོན་དེ་ཕྱིར་སྐྱོན་བྲལ་རྩོས་བསྒྲུབ་འཚལ། །ཚེ་མི་དྲག་མཐོང་ཐོས་མང་ལགས་ཀྱང་། །ནམ་འཆི་དུས་མི་འགོད་ལ་ལ་ཙམ། །དོན་དེ་ཕྱིར་འཆི་ཙེ་གདིང་ཐོབ་གལ། །ལས་རྒྱུ་འབྲས་ཆོས་བཤད་མང་ཐོས་ཀྱང་། །དོན་བླང་འདོར་མི་འཛོལ་ལ་ལ་ཙམ། །དོན་དེ་ཕྱིར་དགེ་བསྒྲུབ་སྡིག་སྤང་རིམ། །སྲིད་འཁོར་བའི་ཉེས་སྐྱོན་མང་ཐོས་ཀྱང་། །ལམ་ཐར་པ་དོན་གཉེར་ལ་ལ་ཙམ། །དོན་དེ་ཕྱིར་ཐར་དང་རྣམ་མཁྱེན་སྒྲུབ། །ལམ་ཐེག་ཆེན་ཁུགས་རློམ་མང་ལགས་ཀྱང་། །དོན་གཞན་ཕན་བསྒྲུབ་པ་ཤིན་ཏུ་ཉུང་། །དོན་དེ་ཕྱིར་དམ་སྲུང་སྒོམ་བཟླ་འབུངས། །གཞན་ཕན་ནན་གྱིས་སྒྲུབ། །ཆོས་སྨིན་གྲོལ་ཐོབ་པ་མང་ལགས་ཀྱང་། །གནད་དམ་ཚིགས་བསྲུང་བ་ཤིན་ཏུ་ཉུང་། །དོན་དེ་ཕྱིར་དམ་སྲུང་སྒོམ་བཟླས་འབུངས། །ལུས་དབེན་པར་སྦས་རློམ་མང་ལགས་ཀྱང་། །སེམས་དབེན་པར་གནས་པ་ཤིན་ཏུ་ཉུང་། །དོན་དེ་ཕྱིར་ཡེངས་མེད་ཏིང་འཛིན་གནད། །སྒོམ་བྱེད་ལོའི་གཟུགས་བརྙན་མང་ལགས་ཀྱང་། །སེམས་ལུང་མ་བསྟན་ལས་སད་པ་ཉུང་། །དོན་དེ་ཕྱིར་ལྟ་སྒོམ་གཡོག་དང་ཕྲོལ། །ཉམས་དམིགས་པའི་དྲན་འཛིན་བརྟན་ལགས་ཀྱང་། །གནད་དྲན་མེད་ངོ་བོ་མཐོང་བ་ཉུང་། །ལར་ལྟ་བ་ལ་ཡིན་པ་མེད་པ་གཅེས། །དེ་ཇི་ལྟར་ན་ཡིན་བློའི་འཛིན་པ་བྲལ། །དོན་སྒོམ་པ་ལ་མིན་པ་མེད་པ་ཞེས། །ཆོས་སྣ་ཚོགས་ཀུན་སྒོམ་དུ་ཤར་བ་གཅེས། །ཚུལ་སྤྱོད་པ་ལ་བཅོས་བསླད་མེད་པ་ཞེས། །དོན་རྗེས་ཤེས་ཀྱི་དྲན་པས་ཡོངས་ཁྱབ་གནད། །ཚུལ་དེ་བཞིན་གྱིས་ཐོས་དང་བསམ་པ་དང་། །སྒོམ་པ་ཡི་མཐར་ཏུ་ཕྱིན་པར་མཛོད། །ཚིག་དེ་སྐད་ཅེས་རྡོ་བླས་སྨྲས་པ་དགེ། སྦྲུལ་ཟླ་༩ཚེས་༡༧ལའོ། །