ལེའུ་དྲུག་པ། རྣམ་ཤེས་དང་ཡེ་ཤེས་གཞི་ལམ་འབྲས་བུའི་འབྲེལ་བ་བསྟན་པའི་དུམ་བུ།

ད་ནི་དུམ་བུ་དྲུག་པ་གནས་སྐབས་བཞིའི་རྣམ་པར་ཤེས་པ་དང་ཡེ་ཤེས་འབྲེལ་བའི་ཚུལ་བཤད་པ་ལ་གསུམ་སྟེ། མདོར་བསྟན་པ་དང་། རྒྱས་པར་བཤད་པ་དང་། འཇུག་བསྡུ་བའོ། །དང་པོ་ནི། དེ་ནས་རྣམ་ཤེས་སོགས་འབྲེལ་བ། མདོར་བསྡུས་རགས་པ་བཤད་པར་བྱ། ཞེས་པ་ནི། རྣམ་པར་ཤེས་པའི་ཚོགས་བརྒྱད་པོ་དང་ཡེ་ཤེས་རྣམ་པ་ལྔ་དང་། ཕྱག་རྒྱ་བཞི་དང་སྐུ་བཞི་དང་བཅས་པ་རྣམས་ཀྱིས་མ་བསྡུས་པ་མེད་མོད་ཀྱི་འདིར་རགས་པའི་རིམ་པ་འཆད་དོ་ཞེས་སོ། །རྒྱས་པར་བཤད་པ་ལ་ལྔ་སྟེ་སྤྱིར་བསྟན་པ་དང་། གཉིད་འཐུག་པོའི་གནས་སྐབས་དང་། རྨི་ལམ་གྱི་གནས་སྐབས་དང་། ཆགས་པའི་གནས་སྐབས་དང་། ཐ་མལ་གྱི་གནས་སྐབས་རྒྱས་པར་བཤད་པའོ། །དང་པོ་ནི་ཚིག་ལྔ་སྟེ་ཐོག་མར་ལུས་བསྐྱེད་པའི་ཚུལ་ནི་གོང་དུ་བཤད་དོ། །གནས་དུས་གནས་སྐབས་བཞི་ཡིན་ཏེ། །གཉིད་དང་རྨི་ལམ་སྙོམས་འཇུག་དང་། །ཐ་མལ་དུས་དང་རྣམ་པ་བཞི། །མ་དག་སྐུ་བཞིའི་གནས་སྐབས་ཡིན། །ཞེས་འོག་ནས་འཆད་པར་འགྱུར་རོ་ཞེས་བསྟན་ཏོ། །འདི་མན་ཆད་རེ་རེ་ལ་ཡང་། མ་དག་པའི་གནས་སྐབས་ཀྱི་གཞི་དང་། ཡེ་ཤེས་གང་ཡིན་པ་དང་སྐུ་གང་ཡིན་པ་དང་དྲི་མ་ཇི་ལྟར་སྦྱོང་བའི་རིམ་པ་སྦྱོང་བྱེད་ཀྱི་ཐབས་ཀྱི་ཁྱད་པར་གང་ཡིན་པ་དང་བཅས་པ་རྒྱས་པར་སྟོན་ཏོ། །གཉིས་པ་གཉིད་འཐུག་པོའི་གནས་སྐབས་རྒྱས་པར་བཤད་པ་ནི། ཚིགས་སུ་བཅད་པ་ལྔ་སྟེ། དབྱེ་བ་རྣམས་པ་མང་བཤད་ཀྱང་། ཞེས་པ་ནི་རྒྱུད་འགྲེལ་རྣམས་ལས་གཞི་ལམ་འབྲས་བུའི་དབྱེ་བ་མང་དུ་གསུངས་ཀྱང་། དང་པོའི་སངས་རྒྱས་ལས། སད་དང་རྨི་ལམ་གཉིད་སྟུག་དང་། །བཞི་པ་དབང་པོ་གཉིས་སྐྱེས་བདེ། །ཡེ་ཤེས་ཐུགས་གསུང་སྐུ་ཡི་མིན། །གནས་བཞི་རྣམས་སུ་མི་གནས་ཏེ། །ཞེས་གསུངས་པའི་ཕྱིར། འདིར་ཐོག་མར་གཉིད་འཐུག་པོའི་གནས་སྐབས་ནི་རྣམ་པར་ཤེས་པ་ཚོགས་བརྒྱད་ཀྱི་ནང་ནས་ཀུན་གཞི་གཙོ་བོ་ཡིན་ཅིང་། གནས་ནི་སྙིང་ཁ་ཆོས་ཀྱི་འཁོར་ལོར་གནས་ལ། ངོ་བོ་ནི་རྣམ་པར་ཤེས་པའི་ཚོགས་དྲུག་མི་གསལ་བར་གཅིག་ཏུ་བསྡུས་པ་སྟེ། འདི་ནི་སེམས་ཅན་གྱི་གནས་སྐབས་སོ། །དེ་ཉིད་ཀྱི་འཁྲུལ་པ་དག་ན། འོད་གསལ་བའི་འབྲས་བུ་དངོས་སུ་བྱེད་པར་འགྱུར་ཏེ། ཡེ་ཤེས་རྣམས་ཀྱི་ནང་ནས་མེ་ལོང་ལྟ་བུའི་ཡེ་ཤེས་ཀྱང་ཡིན་ལ། ལ་ལ་ནས་ཆོས་སྐུ་སྤྲོས་བྲལ་གྱི་ངོ་བོ་ཉིད་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ཡིན་ནོ་ཞེས་ཀྱང་འདོད་པའི་ཕྱིར་གོང་མ་ལ་ཀྱང་གི་སྒྲ་སྨོས་པ་ཡིན་ནོ། །འདི་ལ་ཆགས་པའི་གནས་སྐབས་མེ་ལོང་ལྟ་བུའི་ཡེ་ཤེས་སུ་སྦྱོར་ན་འདི་ཆོས་ཀྱི་དབྱིངས་ཀྱི་ཡེ་ཤེས་སུ་འཐད་ཀྱི། ཆགས་པའི་གནས་སྐབས་ཡེ་ཤེས་ཐམས་ཅད་ཡོངས་སུ་རྫོགས་པར་བཤད་ན་ནི་མེ་ལོང་ལྟ་བུའི་ཡེ་ཤེས་གཉིད་ཀྱི་གནས་སྐབས་སུ་འཐད་དོ། །གཉིད་འཐུག་པོའི་གནས་སྐབས་ན་ཡེ་ཤེས་བསྒྲིབ་པའི་སྐྱོན་ཇི་ལྟ་བུ་ཡོད་ཞེ་ན། བག་ཆགས་བརྟེན་ཀྱང་མི་གསལ་ཞིང་། །འདུ་བྱེད་གཡོ་བའི་རྐྱེན་ཡོད་ཕྱིར། །མ་རིག་དྲི་མ་ཅན་ཞེས་བྱ། །ཞེས་སྨོས་པ་སྔར་ཀུན་གཞིའི་སྐབས་སུ་བཤད་པ་ཇི་ལྟ་བ་བཞིན་ནོ། འོ་ན་ཀུན་གཞིའི་རྣམ་པར་ཤེས་པ་དེ་ཉིད་སྤང་བྱར་འདུག་པས་གཉེན་པོ་ཇི་ལྟ་བུ་ཅིག་གིས་སྦྱང་ཞེ་ན། འདི་ཐེག་པ་གསུམ་སོ་སོའི་འབྲས་བུ་ཐོབ་པའི་གནས་སྐབས་དང་། སྦྱར་ནས་བཤད་པ། གང་ཟག་ཆོས་ལ་བདག་མེད་པ། གཅིག་དང་ཕྱེད་དང་གཉིས་དང་གཉིས། །རིམ་པས་གཉེན་པོའི་ཤེས་པ་སྟེ། དེ་སྦྱངས། །ཞེས་བྱ་བ་ནི་ཉན་ཐོས་ཀྱི་ཐེག་པའི་རྟེན་གྱི་གང་ཟག་ནི། ཕུང་པོ་ལྔ་ལ་བདག་ཏུ་འཛིན་པ་སེམས་ཅན་རྣམས་ཀྱི་ཕྱིན་ཅི་ལོག་གི་རྟོག་པ་བཞི་གཉེན་པོ་མི་རྟག་པ་སྟོང་པ་སྡུག་བསྔལ་བ་བདག་མེད་ལ་སོགས་པས་ཉོན་མོངས་པ་མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བ་རྣམས་ཉན་ཐོས་ཀྱི་ལམ་བསྒོམས་པས་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱེད་པས་ན། གཉེན་པོའི་རྒྱུན་ཐ་མ་དེ་ལ་ཡང་རྡོ་རྗེ་ལྟ་བུའི་མིང་གིས་འདོགས་ཤིང་། དེ་བས་ལྷག་པ་རང་སངས་རྒྱས་ཀྱི་ཆོས་ལ་བདག་མེད་པའི་ཆ་ཤས་མཐོང་བས་ཆོས་ཀྱི་བདག་གི་བཟུང་བའི་དོན་རང་བཞིན་མེད་པར་རྟོགས་ཀྱང་འཛིན་པའི་ལྷག་མ་ཀུན་གཞིའི་རྣམ་པར་ཤེས་པའི་ཆ་མ་སྤངས་པ་ཡོད་པས་བདག་མེད་ཕྱེད་དང་གཉིས་མཐོང་བ་སྟེ། དེ་ལྟ་བུའི་ལམ་བསྒོམ་པ་སྔོན་དུ་བྱས་ནས་འབྲས་བུ་རང་སངས་རྒྱས་མངོན་སུམ་དུ་བྱེད་པ་ན་ཡང་གཉེན་པོའི་ཐ་མ་རྡོ་རྗེ་ལྟ་བུའི་ཏིང་ངེ་འཛིན་གྱི་མིང་ཐོབ་པ་ཡིན་ནོ། །དེས་གཉིས་པས་ཆེས་རྨད་དུ་བྱུང་བ་བྱང་ཆུབ་སེམས་དཔས་བདག་མེད་པ་རྣམ་པ་གཉིས་མངོན་སུམ་དུ་བྱས་པས། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་རྣམ་པར་སྦྱངས་ནས་རྣམ་པ་ཐམས་ཅད་མཁྱེན་པ་ཉིད་མངོན་སུམ་དུ་བྱེད་པ་ན་ངེས་པར་ཏིང་ངེ་འཛིན་འདི་ཐོབ་པ་ཡིན་ཏེ། རྡོ་རྗེ་ལྟ་བུའི་ཏིང་ངེ་འཛིན། །རྟོག་པས་མི་ཤིགས་ཐོབ་ནས་ནི། །གནས་གཞན་གྱུར་པ་མཐར་ཐུག་པ། །སྒྲིབ་པ་ཀུན་གྱི་དྲི་མེད་དང་། །གང་ལ་གནས་ནས་སེམས་ཅན་དོན། །ཕན་ཕྱིར་རབ་ཏུ་བསྒྲུབ་བྱེད་པ། །རྣམ་པ་ཐམས་ཅད་མཁྱེན་པ་ཡི། །གོ་འཕང་བླ་ན་མེད་པ་འཐོབ། །ཞེས་མདོ་སྡེ་རྒྱན་ལས་གསུངས་པས་འདིར་ནི། ཐེག་གསུམ་སོ་སོའི། །རྒྱུན་མཐའ་རྡོ་རྗེ་ལྟ་བུ་ཡིས། །དྲི་བཅོམ་དག་པ་གསུམ་ཐོབ་གསུངས། །ཞེས་བྱ་བ་སྨོས་སོ། །འོ་ན་ཐེག་པ་གསུམ་ཀའི་འབྲས་བུ་མངོན་སུམ་དུ་བྱེད་པ་ན་རྡོ་རྗེ་ལྟ་བུའི་ཏིང་ངེ་འཛིན་ཡོད་པའི་ཕྱིར་ཀུན་གཞིའི་རྣམ་པར་ཤེས་པ་ཐམས་ཅད་ཀྱིས་སྤངས་སམ་ཞེ་ན་མ་ཡིན་ཏེ། ཐེག་བསྡུས་ལས་ཉན་ཐོས་དང་རང་སངས་རྒྱས་རྣམས་ནི་ཀུན་གཞིའི་རྣམ་པར་ཤེས་པ་མཐོང་བ་མེད་པར་ཡང་རང་གི་མྱ་ངན་ལས་འདས་པ་ཡོངས་སུ་བསྒྲུབ་པས་ཀུན་གཞིའི་རྣམ་པར་ཤེས་པ་དེ་དག་གི་གཞུང་དུ་མ་བསྟན་ཏོ། བྱང་ཆུབ་སེམས་དཔའ་རྣམས་ནི་ཤེས་བྱ་ཐམས་ཅད་ལ་མཐོང་བ་འཇུག་པ་ཡིན་པས་ཀུན་གཞིའི་རྣམ་པར་ཤེས་པ་ཤེས་བྱའི་གནས་ཀྱི་གཞིར་བསྟན་ཏོ་ཞེས་བྱ་བ་དང་ཡང་འཕགས་པ་ཀླུ་གྲུབ་ཀྱི་ཞལ་སྔ་ནས། སྲིད་པའི་ལམ་ལ་སྐྱོ་རྣམས་ལ། །ངལ་བསོའི་དོན་དུ་ཐེག་པ་ཆེར། །འབྱུང་བའི་ཡེ་ཤེས་གཉིས་པོ་ཡང་། །གསུངས་པ་ཡིན་ཏེ་དོན་དམ་མིན། །ཇི་སྲིད་སངས་རྒྱས་ཀྱིས་མ་བསྐུལ། །དེ་སྲིད་ཡེ་ཤེས་ལུས་དངོས་ཅན། །ཏིང་འཛིན་མྱོས་ནས་རྒྱལ་གྱུར་པས། །ཉན་ཐོས་དེ་དག་གནས་པར་འགྱུར། བསྐུལ་ན་སྣ་ཚོགས་གཟུགས་ཀྱི་ནི། །སེམས་ཅན་དོན་ལ་ཆགས་གྱུར་ཅིང་། །བསོད་ནམས་ཡེ་ཤེས་ཚོགས་བསགས་ནས། །བྱང་ཆུབ་དམ་པ་འཐོབ་པར་འགྱུར། །ཞེས་བྱ་བ་འདིའི་དོན་རྒྱུད་བླ་མ་དང་དཔལ་འཕྲེང་གི་མདོ་དང་། ལང་ཀར་གཤེགས་པ་དང་། པད་མ་དཀར་པོ་ལ་སོགས་པ་རྣམས་ནས་རྒྱ་ཆེར་གསུངས་སོ། །སྔགས་ཀྱི་ཐེག་པ་འདིར་ཀུན་གཞིའི་རྣམ་པར་ཤེས་པ་ཡེ་ཤེས་སུ་བསྒྱུར་བའི་ཐབས་ཇི་ལྟ་བུ་གསུངས་ཞེ་ན། དེ་ཕྱིར་གསལ་ལ་མི་རྟོག་པའི། །ཉིན་མཚན་གཉིས་ཀྱི་འོད་གསལ་བསྒོམ། །རྣམ་ཀུན་མཆོག་ལྡན་སྟོང་པ་ཉིད། ཕྱག་རྒྱ་ཆེ་ལ་རོལ་བར་བྱ། །ཞེས་སྨོས་ཏེ། འདི་ནི་སྤྱན་རས་གཟིགས་དབང་ཕྱུག་གིས་མཆོག་ཏུ་མི་འགྱུར་བ་གྲུབ་པའི་མདོར་བསྡུས་དང་། འཕགས་པ་ཀླུ་སྒྲུབ་གྱི་རིམ་པ་ལྔ་ལས་འོད་གསལ་བའི་རིམ་པ་དང་། གཞན་ཡང་མཁས་གྲུབ་རྣམས་ཀྱིས་ཕྱག་རྒྱ་ཆེན་པོ་བསྒོམ་པའི་རིམ་པར་རྒྱ་ཆེར་བསྟན་ཏོ། །རྣམ་ཀུན་མཆོག་ལྡན་ཞེས་བྱ་བའི་དོན་ནི། སྦྱིན་དང་ཚུལ་ཁྲིམས་བཟོད་ལ་སོགས། །རྣམ་པ་ཀུན་གྱི་མཆོག་ལྡན་པ། །སྟོང་པ་ཉིད་ནི་གཟུགས་སུ་བརྗོད། །ཤེས་རབ་ཡེ་ཤེས་རྣམ་གྲོལ་རྣམས། །གསལ་དང་འཕྲོ་དང་དག་ཕྱིར་དང་། །ཐ་དད་མེད་ཕྱིར་འོད་དང་ཟེར། །ཉི་མའི་དཀྱིལ་འཁོར་ཉིད་དང་མཚུངས། །དེས་ན་སངས་རྒྱས་མ་ཐོབ་པར། །མྱ་ངན་འདས་པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མར་ལྟ་བར་མི་ནུས་བཞིན། །ཞེས་རྒྱུད་བླ་མར་གསུངས་པའི་དོན་སྤྱན་རས་གཟིགས་ཀྱི་གསུངས་པ་ཡོད་མོད་ཀྱི་འདིར་མ་བྲིས་སོ། །ཕྱག་རྒྱ་ཆེན་པོའི་རིམ་པས་བསྟན་ཟིན་ཏོ། །གསུམ་པ་རྨི་ལམ་གྱི་གནས་སྐབས་རྒྱས་པར་བཤད་པ་ལ། དག་པ་དང་མ་དག་པའི་ངོ་བོ་དང་། རྨི་ལམ་གྱི་སྣང་བ་རྒྱས་པར་བཤད་པ་དང་། གནད་འཆིང་བ་འབྲས་བུ་དང་བཅས་པ་གསུམ་གྱིས་བསྟན་ཏེ། དང་པོ་ནི། གཉིས་པ་རྨི་ལམ་ཤེས་པ་ནི། །བག་ཆགས་ཉོན་མོངས་ཅན་གྱི་ཡིད། །སྲོག་རླུང་འདུ་བྱེད་བཅས་ཏེ་ལངས། །རྩ་གནས་བརྒྱུད་དེ་བཟུང་དང་འཛིན། །གཉིས་སྣང་འཁྲུལ་པར་བྱེད་པ་ཡིན། །ཞེས་སྨོས་ཏེ། འདི་ནི་ཀུན་གཞིའི་རྣམ་པར་ཤེས་པའི་སྟེང་ནས་དྲུག་པ་ཡིད་ཀྱི་རྣམ་པར་ཤེས་པ་བག་ཆགས་དང་བཅས་ནས་ཉོན་མོངས་པ་ཅན་གྱི་ཡིད་སྲོག་གི་རླུང་གིས་བསྐྱེད་ནས། ཡིད་ཀྱི་འདུ་བྱེད་ལངས་པ་ནི་རྨི་ལམ་གྱི་ངོ་བོ་ཡིན་ལ། རྩ་གནས་བརྒྱུད་ནས་བཟུང་འཛིན་གྱི་སྣང་བ་བསྐྱེད་པ་ནི་འོག་ནས་རྒྱས་པར་འཆད་པ་བཞིན་ནོ། །དེ་ལྟར་ཀུན་གཞི་ལ་གནས་པའི་ཡིད་དང་དྲུག་པ་ཡིད་ཀྱི་ཆ་ཤས་ཡིན་པས་འོག་ནས་སྟོན་པ་བཞིན་དུ་མཉམ་པ་ཉིད་དང་སོ་སོར་རྟོག་པའི་ཡེ་ཤེས་ཀྱི་རང་བཞིན་ཡང་ཡིན་ལ་སྐུ་བཞི་ལས་ལོངས་སྤྱོད་རྫོགས་པའི་སྐུ་སྟེ། དེའི་ཕྱིར། །དག་ན་ལོངས་སྤྱོད་རྫོགས་པ་སྟེ། །གསལ་ལ་མ་འདྲེས་སྟོང་པར་གནས། །ཞེས་སྨོས་པ་སྟེ། འདི་ལ་རྨི་ལམ་གྱི་གནས་སྐབས་ནི་ཡུལ་དང་དབང་པོ་དང་ཤེས་པ་ཐམས་ཅད་གསལ་ལ་མ་འདྲེས་པ་དང་། ཡིད་ལས་གཞན་དུ་རྡུལ་ཕྲ་རབ་འདུས་པའི་ཡུལ་ལ་སོགས་པ་ནི་མེད་པས་སྣང་བ་དང་སྟོང་པ་དབྱེར་མེད་པའི་རང་གི་ངོ་བོ་ཡིན་ནོ། །རྨི་ལམ་གྱི་སྣང་བ་རྒྱས་པར་བཤད་པ་ལ་ཚིགས་སུ་བཅད་པ་བདུན་སྟེ། འདི་དག་ཀྱང་བཅོམ་ལྡན་འདས་ཀྱིས་འཇམ་དཔལ་རྩ་བའི་རྒྱུད་ལས། རྒྱས་པར་གསུངས་པའི་ཚུལ་བསྡུས་པ་ཡིན་པས། རྨི་ལམ་དེར་མ་དག་པ་དང་འཁྲུལ་པའི་སྣང་བ་ཇི་ལྟར་འབྱུང་བར་འགྱུར་ཞེ་ན། ཐོག་མར་སྙིང་ཁར་ཀུན་གཞིའི་སྟེང་དུ་ཚོགས་དྲུག་པོ་ཐམས་ཅད་སྡུད་དོ། །དེ་ནས་ཡིད་སྲོག་གི་རླུང་དང་ལྷན་ཅིག་ལངས་ནས་ལུས་ཀྱི་སྟེང་གི་ཕྱོགས་སྤྱི་བོར་སོང་ན་ལྷའི་ཡུལ་རྣམས་ཀྱི་སྣང་བ་དང་། ནམ་མཁའ་ལ་ཕྱིན་པ་དང་། རི་མཐོན་པོ་ལ་སོགས་པ་ལ་གྱེན་དུ་འགྲོ་བ་དང་། མིག་གི་རྩ་ལ་སོང་བས་གཟུགས་ཀྱི་རྣམ་པ་ཤིན་ཏུ་གསལ་བར་མཐོང་བ་དང་། དེ་བཞིན་དུ་སྒྲ་དང་དྲི་དང་རོ་ལ་སོགས་པ་མ་འདྲེས་པར་འཆར་རོ། །གང་གི་ཚེ་ཡིད་སྲོག་གི་རླུང་དང་ལྷན་ཅིག་སྙིང་ཁའི་འོག་གི་ཕྱོགས་སུ་གསང་བ་ལ་སོགས་པར་འགྲོ་བས་དམྱལ་བ་དང་ཡི་དྭགས་དང་དུད་འགྲོ་ལ་སོགས་པའི་སྣང་བ་དང་། ཐུར་དུ་བྲག་རོང་དང་ནགས་འཐིབས་པོ་ལ་སོགས་པ་ལ་འགྲོ་བ་དང་། མུན་ཁུང་དང་དངོས་པོ་ཐམས་ཅད་མི་གསལ་བའི་རྣམ་པར་འཆར་བར་འགྱུར་རོ། །ལུས་ཀྱི་བར་གྱི་རྩ་རྣམས་སུ་ཡིད་སྲོག་གི་རླུང་དང་ལྷན་ཅིག་ཏུ་འགྲོ་བས། དེའི་ཚེ་གླིང་བཞི་ལ་སོགས་པ་ས་སྟེང་གི་སྣང་བ་འཆར་རོ། །དེ་ཡང་མདུན་གྱི་རྩ་གནས་ལ་སོང་བའི་ཚེ་ཤར་ཕྱོགས་ཀྱི་སྣང་བ་འབྱུང་ངོ་། །གཡས་ཀྱི་རྩ་ལ་སོང་ན་ལྷོའོ། །རྒྱབ་ཀྱི་རྩ་ལ་ནུབ་བོ། །གཡོན་གྱི་རྩ་ལ་སོང་ན་བྱང་ཕྱོགས་ཀྱི་སྣང་བ་འབྱུང་སྟེ། རྩ་གནས་ཡངས་པ་ལ་ཡུལ་ཡངས་པ་དང་། རྩ་གནས་དོག་པ་ལ་ཡུལ་ཤིན་ཏུ་དོག་པ་ལ་སོགས་པའི་སྣང་བ་འཆར་སྟེ། དེའི་ཕྱིར་སྲོག་གཡས་པར་རྒྱུ་བའི་འཆི་ལྟས་བྱུང་བའི་ཚེ་རྨི་ལམ་དུ་ཡང་ལྷོ་ཕྱོགས་སུ་ཡང་ནས་ཡང་དུ་ཕྱིན་པ་རྨི་བས་ལྷོར་འགྲོ་བ་འཆི་ལྟས་སུ་བཤད་པའི་དོན་ནི་དེ་ཡིན་པར་གོའོ། །རྨི་ལམ་དེར་དངོས་པོ་ཇི་ལྟ་བུ་སྣང་བའི་རྐྱེན་ཡང་། སྲོད་ལ་བད་ཀན་ཤས་ཆེ་སྟེ། །ནམ་ཕྱེད་དུས་སུ་མཁྲིས་པར་བརྗོད། །ཐོ་རངས་རླུང་གི་དུས་ཉིད་དེ། །དེ་ཚེ་ཁམས་ཀྱི་རང་བཞིན་གྱི། །རྨི་ལམ་ཡུལ་དུ་སྣང་བར་འགྱུར། །ཞེས་བྱ་བ་ལ་སོགས་པ་རྒྱུད་ནས་མང་དུ་གསུངས་པའི་ཕྱིར། །ཁམས་ཀྱི་རྐྱེན་གྱིས་ཡུལ་དེར་ཡང་། །ཞེས་འདིར་སྨོས་ནས་རླུང་གི་རྨི་ལམ་གྱི་སྡེ་ཚན་ནི་འདི་ཡིན་ཏེ། ས་ཕྱོགས་ནེའུ་སིང་ལ་སོགས་པ་རྫས་ཐམས་ཅད་སྔོན་པོ་དང་། གོས་སྔོན་པོ་དང་། ནག་པོ་དང་། བྱ་ནག་དང་། ནམ་མཁར་འཕུར་བ་དང་། རྟ་ཞོན་པ་དང་། ནོར་བུ་སྔོན་པོ་དང་རིག་པ་དྭངས་པ་དང་རྨི་ལམ་གྱི་དངོས་པོ་རྣམས་མི་བརྟན་ཞིང་འགྱུར་བ་ཡང་ཡུད་དུ་སྣང་བ་ལ་སོགས་པ་ཡིན་ནོ། །མཁྲིས་པའི་ཁམས་ཀྱི་རྨི་ལམ་གྱི་སྡེ་ཚན་ནི་མེ་འབར་བ་དང་། གོས་དམར་པོ་དང་སེར་པོ་དང་ས་གཞི་དམར་པོ་དང་། གསེར་དང་། བཙུན་པ་ལ་སོགས་པ་གོས་སེར་ཅན་སྣང་བ་དང་། སེམས་ཅན་དང་རྫས་ལ་སོགས་པ་ཐམས་ཅད་ཀྱང་སེར་པོ་ཤས་ཆེ་བ་དང་དལ་ཞིང་བརྟན་པ་དང་རིག་པ་ཡང་སྐྲག་པ་ལ་སོགས་པ་དང་འབྲེལ་བ་རྣམས་སྣང་བ་ཡིན་ནོ། །བད་ཀན་གྱི་ཁམས་ཀྱི་རྨི་ལམ་གྱི་སྡེ་ཚན་ནི། ཆུ་དང་། ཁ་བ་དང་། ས་ཕྱོགས་དཀར་པོ་དང་། གོས་དཀར་པོ་དང་བུད་མེད་དང་གླང་པོ་ཆེ་དང་དངུལ་དང་མུ་ཏིག་ལ་སོགས་པའི་ནོར་བུ་དཀར་པོ་དང་། རེག་པའི་བདེ་བ་དང་བརྟན་པ་ལ་སོགས་པ་དུ་མ་སྣང་སྟེ། །ཇི་ལྟར་ཁམས་ཀྱི་རིམ་པ་བཞིན་དུ་རྨི་ལམ་གྱི་སྣང་བ་དཔག་ཏུ་མེད་པ་འབྱུང་བར་བཤད་པས། ཇི་ལྟར་རྩ་རླུང་ཁམས་ཀྱི་རིམ། བག་ཆགས་ལ་བརྟེན་སྣང་བ་ནི། །རྒྱལ་བས་འཇམ་དཔལ་རྩ་རྒྱུད་གསུངས། །ཞེས་དོན་བསྡུས་པ་ཡིན་ནོ། །དེའི་ཕྱིར་རྣལ་འབྱོར་པས་བསྒོམ་པའི་གནད་བཅིང་བ་འབྲས་བུ་དང་བཅས་པ་བཤད་པ་ནི། ཚིགས་སུ་བཅད་པ་ཕྱེད་དང་བཞི་སྟེ། ད་ལྟར་རྩ་རླུང་བྱང་ཆུབ་ཀྱི་སེམས་ཉམས་སུ་ལེན་པ་ན། །གང་གང་རྩ་ཁམས་བག་ཆགས་རྣམས། །དག་དང་མ་དག་འདིས་ཤེས་ཤིང་། གཞན་ཡང་རྨི་ལམ་གྱི་སྣང་བ་འདི་དང་བར་མ་དོའི་ཤེས་པ་ཅུང་ཟད་མཚུངས་པའི་ཕྱིར་དང་བཅོམ་ལྡན་འདས་ཀྱིས་འཕོ་བའི་སྐབས་ན་རྣམ་པར་ཤེས་པ་འགྲོ་བའི་ལམ་སོ་སོར་གསུངས་པ་རྣམས་གང་དུ་འགྲོ་བ་ད་ལྟར་རྨི་ལམ་གྱིས་ཚོད་འཛིན་ཅིང་ཤེས་པའི་ཕྱིར། བར་དོ་ཕྱི་མ་འཕོ་བ་ཡིས། །སྣང་བའི་ཚོད་འཛིན་བྱེད་པ་ཡིན། །ཞེས་སྨོས་པ་ཡིན་ནོ། །རྨི་ལམ་དེ་ཐབས་མཁས་པའི་ཡན་ལག་གིས་ཡོན་ཏན་དུ་ཇི་ལྟར་བསྒྱུར་བར་བྱེད་ཅེ་ན། རང་གི་སེམས་ཀྱི་སྣང་བ་ཡིད་ཀྱི་ཡུལ་ཆོས་འདུས་བྱས་ལ་དབང་ཐོབ་བར་བྱ་དགོས་པས། དེ་ཕྱིར་ཡེ་ཤེས་ཕྱག་རྒྱ་བཅིང་བ་སྟེ། འདིར་ཡེ་ཤེས་ནི་ཀུན་བརྟགས་པའི་གཞལ་ཡས་ཀྱི་ཁང་པ་དང་ལྷ་དང་ལྷ་མོ་དང་སངས་རྒྱས་ཀྱི་ཞིང་དང་ཟད་པར་དང་། རྫུ་འཕྲུལ་གྱི་ཡུལ་ཀུན་བརྟགས་པ་དང་དབང་འབྱོར་པའི་གཟུགས་ཐམས་ཅད་རྨི་ལམ་བཟུང་བ་དང་སྦྱང་བ་དང་བསྒྱུར་བའི་ཁྱད་པར་གྱིས་བདེ་བླག་ཏུ་གྲུབ་པར་བྱ་སྟེ། སྒྱུ་ལུས་དང་ཟུང་འཇུག་གི་རིམ་པ་འཕགས་པ་ཀླུ་སྒྲུབ་ལ་སོགས་པ་རྣམས་ཀྱིས་གསུངས་པ་བཞིན་དུ་བསྒོམ་པར་བྱའོ། །དེ་ལྟར་རྨི་ལམ་གྱི་རྒྱུ་དང་རྐྱེན་དང་གནས་སྐབས་དང་མཐར་ཐུག་གི་འབྲས་བུ་རྒྱ་ཆེར་བཤད་པ་དུ་མ་ཡོད་མོད་ཀྱི་འདིར་ནི་རྒྱས་པར་མ་བསྟན་ནོ། །འོ་ན་རྨི་ལམ་ཐམས་ཅད་ནི་བག་ཆགས་གཉིས་འཁྲུལ་ཡིན་ནོ་ཞེས་འཇིག་རྟེན་ན་གྲགས་ན། རྨི་ལམ་ལ་མ་འཁྲུལ་པ་གཉེན་པོའི་ཆར་གྱུར་པ་ཡོད་དམ་ཞེ་ན། །འཁྲུལ་པ་རྨི་ལམ་འཁོར་བ་སྟེ། །མ་འཁྲུལ་རྨི་ལམ་གཉེན་པོ་ཡིན། །ཞེས་སྨོས་ཏེ། འདིར་འགྱོད་པ་དང་གཉིད་དང་རྟོག་དཔྱོད་ནི་དགེ་བ་དང་མི་དགེ་བ་དང་ངེས་པ་དང་མ་ངེས་པ་ཐམས་ཅད་དུ་འབྱུང་བས། མ་འཁྲུལ་བ་དང་འདྲེས་པའི་རྨི་ལམ་ཤིན་ཏུ་ཡང་ཡོད་དེ། བྱང་ཆུབ་སེམས་དཔའ་ས་དང་པོ་ནས་ས་བཅུ་པའི་བར་ལ་རྨི་ལམ་གྱི་ལྟས་ཀྱི་ཁྱད་པར་བརྒྱ་རྩ་བརྒྱད་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྡོ་རྗེ་རབ་འཇོམས་ལས་གསུངས་པས། དེ་ཕྱིར་རྒྱལ་སྲས་ས་བཅུ་ལ། རྨི་ལམ་བསྟན་པ་མདོ་ལས་གསུངས། །ཞེས་སྨོས་སོ། །འོ་ན་སྔར་རྨི་ལམ་ནི་རླུང་མཁྲིས་བད་ཀན་གྱི་ཆས་བསྐྱེད་ཅིང་དེ་དག་ནི་ཉོན་མོངས་པ་རྣམས་ཀྱིས་བསྐྱེད་ཅེས་གྲགས་ན། བྱང་ཆུབ་སེམས་དཔའ་ཉོན་མོངས་པ་ཐམས་ཅད་དང་བྲལ་བའི་ཟག་བཅས་ཀྱི་ཕུང་པོ་མེད་པ་དག་ལ་རྨི་ལམ་འབྱུང་བར་མི་རིགས་སོ་སྙམ་ན། འདི་ལ་ནི་རྟེན་གཞན་ཡོད་དེ་དེ་ཡང་གང་ཞེ་ན། །དེ་རྒྱུ་ཟག་མེད་ཁམས་བཟུང་ཕྱིར། །ཞེས་སྨོས་ཏེ། བྱང་ཆུབ་སེམས་དཔའ། ས་དང་པོ་ལ་གནས་ནས་ཁམས་གསུམ་གྱི་ཉོན་མོངས་པའི་ཟག་པ་དང་བཅས་པའི་ལུས་སྤངས་ཀྱང་ཟག་པ་མེད་པའི་ལས་ཀྱིས་བསྐྱེད་པའི་ཕུང་པོ་དང་ཁམས་དང་སྐྱེ་མཆེད་འཛིན་པས། ཕུང་པོ་དང་འབྲེལ་བའི་གནས་སྐབས་རྣམ་པ་བཞི་འཛིན་པས་ཟག་པ་མེད་པའི་རྨི་ལམ་ཀྱང་ཡོད་དོ། །ཚུལ་འདི་ནི། དེ་ནི་འཇིག་རྟེན་ཐམས་ཅད་ལས། །འདས་ཀྱང་འཇིག་རྟེན་ལས་མ་གཡོས། །ཇི་ལྟར་པད་མ་ཆུ་ནང་ན། །སྐྱེས་ཀྱང་ཆུ་ཡིས་གོས་པ་མེད། །དེ་བཞིན་འདི་ནི་འཇིག་རྟེན་དུ། །སྐྱེས་ཀྱང་འཇིག་རྟེན་ཆོས་མ་གོས། ཞེས་རྒྱུད་བླ་མ་ལས་གསུངས་པ་དང་། རྒྱས་པར་ནི་མཆོག་ཏུ་མི་འགྱུར་བ་གྲུབ་པ་ལས་གསུངས་སོ། །ཆོས་ཀྱི་ཕྱག་རྒྱའི་བྱེ་བྲག་ཡེ་ཤེས་ཀྱི་ཕྱག་རྒྱ་བཤད་ཟིན་ཏོ། །བཞི་པ་ཆགས་པའི་གནས་སྐབས་བཤད་པ་ལ། དག་མ་དག་གི་ངོ་བོ། འཁོར་བར་བསྐྱེད་པའི་ཚུལ། མྱ་ངན་ལས་འདས་པར་འགྲོ་བའི་གོ་རིམ། གནད་བཅིང་བ་དངོས་བཤད་པ་དང་བཞི་ལས། དང་པོ་ནི། ཚིགས་སུ་བཅད་པ་ཕྱེད་དང་བཞི་སྟེ། སེམས་ཅན་རྣམས་ཀྱི་སྙོམས་འཇུག་གི་ཆགས་པའི་དུས་ན་རྣམ་པར་ཤེས་པ་དེའི་ཚེ། ཇི་ལྟར་གནས་ཞེ་ན། དགའ་བ་བཞིའི་གོ་རིམ་ཇི་ལྟ་བ་བཞིན་དུ་རྣམ་པར་ཤེས་པ་ཡང་ལྡན་སྟེ། འདོད་སྲེད་ཀྱི་དང་པོ་ནི་སྤྱི་བོའི་འཁོར་ལོར་གནས་སོ། །གཉིས་པ་དགའ་བའི་ཚེ་ནི་མགྲིན་པར་རོ། །གསུམ་པ་མཆོག་ཏུ་དགའ་བའི་དུས་ན། ལྟེ་བར་རྣམ་པར་ཤེས་པ་འདུས་པ་ཡིས། མེ་དང་ཟླ་བ་གཉིས་འདྲེས་ཚེ། དུང་ཅན་ནང་དུ་ལྷན་སྐྱེས་མྱོང་བ་ནི་ལྷན་ཅིག་སྐྱེས་པའི་དགའ་བ་སྟེ། རང་གི་དབུ་མའི་མར་སྣར་གཏུམ་མོའི་མེ་དང་ཁམས་བྱང་ཆུབ་ཀྱི་སེམས་དཀར་ཆ་གཉིས་འདྲེས་པ་ལ་བརྗོད་ཀྱི། ཕྱི་རོལ་དུ་འདྲེས་པ་ནི་མ་ཡིན་ནོ། །ལྷན་ཅིག་སྐྱེས་པའི་དགའ་བ་དེ་ཡུན་དང་ངོ་བོ་ཇི་ལྟ་བུ་ཡིན་ཞེ་ན། དེ་ནི་སྐད་ཅིག་ཤེས་པ་སྟེ། །ཚོགས་བརྒྱད་མ་འགགས་སོ་སོར་གསལ། བདེ་ལ་མི་རྟོག་ཉོན་མོངས་མིན། །ཞེས་སྨོས་ཏེ། འདི་ནི་སྐད་ཅིག་མའི་ཤེས་པ་བདེ་གསལ་མི་རྟོག་པ་འདྲེས་པའི་རང་ངོ་ཉོན་མོངས་པའི་དྲི་མ་མེད་པ་ཡིན་ཀྱང་ལུས་ཅན་རྣམས་ཀྱིས་དེ་མི་ཤེས་ལ་དེ་འགགས་པའི་རྗེས་སུ་དགའ་བྲལ་གྱི་དགའ་བ་འཆར་སྟེ། ལྷན་ཅིག་སྐྱེས་པ་མ་བཏོགས་པའི་དགའ་བ་གསུམ་པོ་ནི་རྣམ་པར་རྟོག་པའི་ཆའོ། །ཧེ་བཛྭ་ལས། དགའ་བས་དགའ་བ་ཙམ་ཉིད་དེ། །མཆོག་ཏུ་དགའ་བ་དེ་བས་ལྷག །དགའ་བྲལ་དགའ་བས་ཆགས་བྲལ་ཡིན། ལྷག་མ་ལྷན་ཅིག་སྐྱེས་དགའ་ཉིད། །ཞེས་གསུངས་པས་དེ་ཕྱིར་ཡེ་ཤེས་སྐུ་ཞེས་བརྗོད་དེ་ཚོགས་བརྒྱད་ཀྱི་རང་ངོར་རྫོགས་པའི་ཕྱིར་རོ། །གང་གི་ཚེ་གཉེན་པོས་རྣམ་པར་སྦྱངས་ནས་སྒྲིབ་པ་ཐམས་ཅད་རྣམ་པར་དག་ན་ཐམས་ཅད་ལྷན་ཅིག་སྐྱེས་པའི་བདེ་བར་དེ་ཉིད་ཡིན་པའི་ཕྱིར་འགག་པ་མེད་པ་ནི་ཚོགས་དྲུག་གི་རང་ངོ་གསལ་བ་སྤྲུལ་པའི་སྐུའི་རང་བཞིན་དང་། འཛག་བྲལ་ནི་ཉོན་མོངས་པའི་ཟག་པ་ཐམས་ཅད་དང་བྲལ་བས་བདེ་བ་ཆེན་པོ་ལོངས་སྤྱོད་རྫོགས་པའི་སྐུ་དང་། སྟོང་པ་དང་ལྡན་པ་ནི་རང་བཞིན་ཀྱི་སྐུ་སྟེ། དེས་ན་གནས་སྐབས་ཐམས་ཅད་དུ་འགྲོ་བའི་བདག་ཉིད་ཀྱི་ལྷན་ཅིག་སྐྱེས་པ་བསྒོམ་པར་བྱ་བ་ཡིན་པས། །ཀུན་འགྲོ་ཀུན་བདག་གནད་དུ་བསྣུན། །ཞེས་བསྟན་པ་ཡིན་ནོ། །འཁོར་བར་བསྐྱེད་པར་བྱེད་པའི་ཚུལ་ལ་ཚིགས་བཅད་གཉིས་དང་རྐང་པ་གསུམ་སྟེ། གང་གིས་མ་རྟོགས་ཞེ་ན། མ་དག་འཁྲུལ་པའི་སེམས་ཅན་རྣམས་སོ། །གང་མ་རྟོགས་པ་ནི། སྐད་ཅིག་བདེ་ཆེན་མི་ཤེས་པས། །ཞེས་པ་སྟེ། སྔར་བསྟན་པ་དེ་ཉིད་མི་ཤེས་པའོ། །ཚུལ་ཇི་ལྟར་དུ་མི་ཤེས་པ་ནི། རང་ལ་གནས་པ་གཞན་དུ་བཟུང་། །བདེ་ཉམས་དུག་གསུམ་བསྐྱེད་བྱེད་ཅིང་། །མི་འདོད་བཞིན་དུ་འཁོར་བའི་རྒྱུ། །ཞེས་སྨོས་ཏེ། ལྷན་ཅིག་སྐྱེས་པའི་ཡེ་ཤེས་སོ་སོ་རང་གིས་རིག་པར་བྱ་བ་ཡིན་པ་ལ་གཞན་དུ་ཡུལ་ལ་ཀུན་ཏུ་རྟོག་པ་དང་། ཁམས་བྱང་ཆུབ་ཀྱི་སེམས་ཉམས་པར་གྱུར་པས་ཉོན་མོངས་པ་ཐམས་ཅད་བསྐྱེད་པའི་རྒྱུར་གྱུར་སྟེ། དུས་ཀྱི་འཁོར་ལོ་ལས། དེ་ལྟར་རྣམ་པ་བཞིའི་སེམས་དང་རྣམ་གསུམ་བཅོམ་ལྡན་འདས་ནི་སྲོག་ཆགས་རྣམས་ཀྱི་ཐིག་ལེའི་ནང་དུའོ། །མཉམ་པའི་འབྲས་བུ་བདེ་བ་སྟེར་བ་ཁྱབ་བྱེད་རྣལ་འབྱོར་དབང་ཕྱུག་གིས་ནི་ཐར་པའི་རྒྱུར་བསྲུང་བྱ། ཐིག་ལེ་ཤོར་ན་སུ་ཞིག་གྲོལ་ལས་རྣལ་འབྱོར་མཆོག་གི་བདེ་བ་བྲལ་ཞིང་སྐྱེ་བའི་ས་བོན་ནོ། །དེ་ཕྱིར་འཁོར་བའི་བདེ་བ་སྐད་ཅིག་མ་ནི་དཀའ་ཐུབ་པ་ཡིས་རྣམ་པ་ཀུན་ཏུ་སྤང་པར་བྱ། ཞེས་གསུངས་པ་ཡིན་ནོ། །ཉོན་མོངས་པའི་རྣམ་པར་རྟོག་པ་ཐམས་ཅད་ཀྱང་ཇི་ལྟར་སྐྱེ་ཞེ་ན། །དང་པོ་དགའ་ལྡན་འདོད་ཆགས་ཡིན། །བར་མ་མ་རྟོགས་གཏི་མུག་སྟེ། རྗེས་ལ་ཆགས་བྲལ་ཞེ་སྡང་སེམས། །བདེ་འདོད་རང་ཆགས་སེར་སྣ་དང་། །ཕྲག་དོག་ཀུན་བསྐྱེད་མི་དགེ་སྤྱོད། །དེ་ཡིས་ངན་འགྲོ་ཀུན་བསྐྱེད་བྱེད། ཞེས་བྱ་བ་སྨོས་ཏེ། འདི་ཡང་བྱང་ཆུབ་སེམས་དཔའི་འགྲེལ་པ་ལས་ཇི་ལྟར་གསུངས་པའི་རིམ་པ་འདིར་བཤད་པ་ཡིན་ཏེ། གཞུང་ཇི་ལྟ་བ་བཞིན་ནོ། །མྱ་ངན་ལས་འདས་པར་འགྲོ་བའི་གོ་རིམ་ནི་ཚིགས་བཅད་བཞི་སྟེ། སྔར་བསྟན་པའི་མ་རིག་པའི་ཚུལ་དེ་ལས་ཅུང་ཟད་བཟློག་པར་བྱས་ནས་རང་དང་གཞན་ལ་ཕན་པར་འདོད་པའི་སེམས་བསྐྱེད་དེ་སེར་སྣ་དང་ཕྲག་དོག་དང་ཆགས་པ་དང་ཁོང་ཁྲོ་བའི་སྐྱོན་རྣམས་དོར་བར་བྱས་ལ། ཟང་ཟིང་གི་སྦྱིན་པ་དང་རང་གི་རྒྱུད་བསྲུང་བའི་ཚུལ་ཁྲིམས་ལ་བརྟེན་ནས་བདེ་བ་འདོད་པས་འདོད་པའི་ཁམས་ཀྱི་ལྷ་དང་མིའི་གོ་འཕང་ཐོབ་ཅིང་། འདོད་སྲེད་བཅད་ནས་བསམ་གཏན་གྱི། །བདེ་ཚོལ་གཟུགས་དང་གཟུགས་མེད་ལེན། །ཞེས་པའི་ཚུལ་ནི་སྔར་སྐྱེ་བའི་ཉིང་འཚམས་སྦྱར་བའི་སྐབས་སུ་བཤད་པ་བཞིན་ནོ། །དེ་ཡང་སྔར་ལྟར་རོ་མྱོང་ན་ཞེས་བྱ་བའི་དོན་ནི། ཇི་ལྟར་བདོད་པའི་བདེ་བ་ལ་ཞེན་པ་བཞིན་དུ། བསམ་གཏན་གྱི་བདེ་བ་ལའང་འདོད་པས་ཆགས་ཤིང་རོ་མྱོང་བར་བྱེད་ན་ཆགས་པ་དང་ལྡན་པས་དེ་ལས་ཉོན་མོངས་པ་གཞན་སྐྱེ་བའི་ཕྱིར་དུག་གསུམ་གྱི་དབང་གིས་ཁམས་གསུམ་དུ་འཁོར་བར་འགྱུར་རོ། །དེ་ལྟར་ཁམས་གསུམ་གྱི་འཛག་པ་བཅད་ནས་ཁམས་གསུམ་པོ་སེམས་ལས་བྱུང་བར་ཤེས་ཤིང་ཉོན་མོངས་པ་སྤངས་ཀྱང་མྱ་ངན་ལས་འདས་པ་ཉིད་ལ་ཕྱོགས་གཅིག་ཏུ་སྲེད་ན་ཐེག་པ་དམན་པར་འགྱུར་བས། སེམས་སུ་ཤེས་ནས་ཁམས་གསུམ་གྱི། །ཆགས་སོགས་མཐོང་བསྒོམ་གྱིས་བཅོམ་ནས། །མྱ་ངན་འདས་སྲེད་དེ་ཐོབ་པ། །དེར་གནས་ཉན་རང་ཞེས་བརྗོད་དོ། །ཞེས་སྨོས་ཏེ། སྤངས་རྟོགས་ཀྱི་ཚུལ་ནི་སྔར་བཤད་པ་ཡིན་ནོ། །ཉན་རང་གི་ཞི་བ་ལ་མངོན་པར་དགའ་བ་ཡང་སྤངས་ནས་སྲིད་ཞི་མཉམ་ཉིད་ཀྱི་སྦྱོར་བས་མཐའ་གཉིས་ལས་ངེས་པར་འབྱུང་བ་ནི་བྱང་ཆུབ་སེམས་དཔའི་ལམ་སྟེ། །སྲིད་དང་ཞི་བ་གཉིས་ཀ་ལ། །སྲེད་སྤངས་འཛག་མེད་དབང་ཐོབ་པ། །རྡོ་རྗེ་ཐེག་པར་གསུངས་པ་ཡིན། །ཞེས་བསྟན་སྟེ། དེ་ལ་འཛག་པ་ཞེས་བྱའི་དོན་ཡང་། རྟེན་ལུས་ཀྱི་འཛག་སྒོ་བཞི་ནི་སྟེང་དང་འོག་དང་བ་སྤུའི་བུ་ག་དང་དབང་པོ་གཞན་ཡུལ་ལ་ཟག་པའོ། །སེམས་ཀྱི་ཟག་པ་བཞི་ནི། འདོད་པ་དང་། སྲིད་པ་དང་། མ་རིག་པ་དང་ལྟ་བའི་ཟག་པ་རྣམ་པ་བཞི་སྤངས་པས་འབྲས་བུ་མཐར་ཕྱིན་པར་འགྱུར་རོ། །གནད་བཅིང་བ་དངོས་ནི་ཚིག་རྐང་བདུན་ཏེ་དེ་ལ་དགའ་བ་བཞིའི་ངོ་བོ་ནི། ཧེ་བཛྭ་ལས། རེ་ཞིག་བཙུན་མོ་ཤེས་རབ་ཡིན། །སྐྱེས་བུ་ཐབས་སུ་བརྗོད་པར་བྱ། །ཀུན་རྫོབ་དོན་དམ་དབྱེ་བ་ཡིས། །ཕྱི་ནས་དེ་ཉིད་རྣམ་པ་གཉིས། །དེའི་ཁུ་བའམ་བདེ་བ་ཉིད། །སྐྱེས་བུ་ཇི་བཞིན་ཤེས་རབ་ལས། དེའི་ཁུ་བའམ་བདེ་བ་ཉིད། །དེ་ཉིད་ཕྱིར་ན་དགའ་བ་ནི། །བཞི་ཡིས་རབ་ཏུ་ཕྱེ་བ་ཉིད། །སྐྱེ་མེད་རིམ་པའི་ཕྱོགས་ལས་ནི། །དེ་ལྟར་ལྷན་ཅིག་སྐྱེ་རྣམ་བཞི། །ཞེས་གསུངས་པ་ཡིན་ནོ། །དགའ་བ་བཞིའི་གོ་རིམ་ནི། ཧེ་བཛྭ་ལས། དང་པོར་དགའ་བ་ཙམ་ཉིད་དེ། གཉིས་པའི་གྲངས་ལས་མཆོག་དགའ་ཉིད། གསུམ་པ་ལ་ནི་དགའ་བྲལ་བཤད། །བཞི་པ་ལྷན་ཅིག་སྐྱེས་པར་བརྗོད། །ཞེས་གསུངས་སོ། །དེའི་རྣམ་པར་དབྱེ་བ་ནི་དགའ་བ་བཞི་ལ་སྐུ་དང་གསུང་དང་ཐུགས་དང་ཡེ་ཤེས་ཀྱི་དབྱེ་བས་བཅུ་དྲུག་དུ་འགྱུར་ཏེ། །དུས་ཀྱི་འཁོར་ལོ་ལས་རྒྱས་པར་གསུངས་སོ། །འཛག་པའི་སྐྱོན་ནི་སྔར་བཤད་དོ། །བཅིང་བའི་ཐབས་ནི་དུས་ཀྱི་འཁོར་ལོ་ནས། དངུལ་ཆུའི་དགྲ་ནི་མེ་ཉིད་ཡིན་ལ་མེ་དང་རྣམ་པར་བྲལ་ན་ནམ་ཡང་དངུལ་ཆུ་འཆིང་བ་མིན། མ་བཅིངས་པ་ལས་གསེར་མི་བྱེད་ལ་གསེང་དང་བྲལ་བས་གསེར་འགྱུར་མཁན་ལ་ལོངས་སྤྱོད་མེད་པ་ཉིད། དེ་བཞིན་བུད་མེད་ལ་སྦྱོར་དམན་པས་རྣལ་འབྱོར་པའི་སེམས་ནི་རྟག་ཏུ་འཆིང་བར་མི་འགྱུར་རོ། །མ་བཅིངས་པ་ལས་ལུས་ནི་འབིགས་པ་མིན་ལ་འདིར་ནི་ལུས་ཕུག་པ་ཡིས་མཆོག་གི་བདེ་བ་སྟེར། ཞེས་གསུངས་པ་ཡིན་ནོ། །འདི་ལ་ཡང་དབབ་པ་དང་། བཟུང་བ་དང་བཟློག་པ་དང་ཐམས་ཅད་དུ་ཁྱབ་པ་ལ་སོགས་པའི་མན་ངག་གིས་བརྒྱན་པའོ། །ཕན་ཡོན་དང་རྣམ་པར་དག་པ་དང་རྒྱུ་འབྲས་ལུགས་འབྱུང་ལུགས་བཟློག་རྣམས་ནི་སྔར་ཐིག་ལེའི་སྐབས་སུ་བཤད་ཟིན་ཏོ། །དེས་ན་ངོ་བོ་དམ་ཚིག་གི་ནང་གི་ཕྱག་རྒྱ་ལས་སུ་རུང་བར་བྱ་བའི་ཕྱིར། དེ་ཕྱིར་ལས་ཀྱི་ཕྱག་རྒྱ་བཅིང་། །ཞེས་བསྟན་སྟེ། ཕན་ཡོན་དང་བཅས་པ་ནི། རྒྱལ་བའི་ལྷན་སྐྱེས་བདེ་བ་འཕེལ་བའི་དོན་གྱི་རྒྱུར་ནི་ཐོག་མར་ལས་ཀྱི་ཕྱག་རྒྱ་བརྟེན་པར་བྱ། དེ་ལས་ཉི་མའི་གཟུགས་ཅན་བདེ་བ་ལུས་ལ་རྐང་པ་གཙུག་ཏོར་དང་ནི་ཡན་ལག་ཐམས་ཅད་འགེངས། གློག་གི་དབྱུག་པ་དང་མཚུངས་འགྱུར་བ་མེད་པའི་བདེ་བ་བསྐྱེད་ཅིང་ཡན་ལག་མཚན་གྱིས་རབ་ཏུ་རྫོགས། རྣམ་གསུམ་བཅོམ་ལྡན་འདས་ཀྱི་སྐུར་ནི་རྡོ་རྗེ་སྣང་བར་བྱེད་ཅིང་དེ་ནས་ཆོས་ཀྱི་དབྱིངས་སུ་འགྱུར། ཕྱག་རྒྱ་བཞི་པོ་འདི་རྣམས་འགྱུར་མེད་བདེ་བའི་འབྲས་བུ་སྟེར་བ་རྣལ་འབྱོར་པ་ཡིས་བསྒོམ་པར་བྱ། ཞེས་དུས་ཀྱི་འཁོར་ལོ་ལས་གསུངས་པ་ལ་སོགས་པའི་རིམ་པ་རྣམས་འདིར་རྒྱས་པར་མ་བསྟན་ཏོ། །ལས་ཀྱི་ཕྱག་རྒྱའི་རིམ་པ་བཤད་ཟིན་ཏོ། །ལྔ་པ་ཐ་མལ་གྱི་གནས་སྐབས་རྒྱས་བཤད་ལ། ངོ་བོ་དང་། དག་པ། སྤང་གཉེན་འབྲས་བུ་དང་བཅས་པ་གསུམ་ལས། དང་པོ་ནི་ཚིགས་བཅད་ཕྱེད་དང་གསུམ་སྟེ། སད་པའི་གནས་སྐབས་ཀྱི་ཐ་མལ་གྱི་དུས་ཀྱི་ཤེས་པ་ནི། གང་ལས་བྱུང་ཞེ་ན། །ཀུན་གཞི་ཉོན་ཡིད་འདུ་བྱེད་ཀྱིས། །སྔར་བཤད་རྐྱེན་བཞི་ཉེར་སྦྱོར་བས། །ཞེས་སྨོས་པ་ནི། གོང་དུ་བཤད་པའི་རྒྱུའི་རྐྱེན་དང་བདག་པོ་དང་དེ་མ་ཐག་པ་དང་དམིགས་པའི་རྐྱེན་བཞིས་མིག་ལ་སོགས་པའི་རྣམ་ཤེས་དྲུག་པོ་རྣམས་དབང་པོ་དྲུག་དང་འབྲེལ་བར་བྱས་ཏེ་གཟུགས་ལ་སོགས་པའི་ཡུལ་དྲུག་པོ་རྣམས་ཕྱི་རོལ་དུ་སྣང་བ་རང་གི་སེམས་ཡིན་པར་མ་ཤེས་པས་བདེ་སྡུག་བཏང་སྙོམས་ཀྱི་ཚོར་བ་རྣམ་པ་གསུམ་པོ་ལ་བདེ་བ་ལ་ཆགས་པ་དང་། སྡུག་བསྔལ་ལ་ཞེ་སྡང་བ་དང་། བཏང་སྙོམས་མ་རྟོགས་པས་གཏི་མུག་བསྐྱེད་དེ། དེ་མ་ཐག་པའི་ཡིད་ཀྱིས་ཁྱེར་ནས་ཀུན་གཞིའི་སྟེང་དུ་བཞག་ཅིང་། ཡང་འདུ་བྱེད་པས་ཉོན་མོངས་པ་དང་འཁོར་བའི་སྡུག་བསྔལ་གྱི་འཁོར་ལོར་གྱུར་སྟེ། དེ་ཡང་ཐོག་མ་ཀ་དག་འཁྲུལ་མེད་ལ། །ངེས་པ་མེད་པའི་ལྷུན་གྲུབ་ལ། །འཁྲུལ་པའི་ཡེ་ཤེས་སྦག་སྦོག་དེ། །མ་རིག་པ་ནི་གསུམ་དག་པ། །ཤེས་པ་གསལ་གསལ་རིག་རིག་དེ། །ཡུད་ཙམ་ཕྱིར་འགྱུས་སྣང་ཆ་ལས། །ཡུལ་ལ་བདག་ཏུ་བཟུང་བའི་བློས། རྐྱེན་བཞིའི་དམིགས་པ་མ་དག་པས། །ཡུལ་དྲུག་སོ་སོའི་སྣང་བ་ཤར། །ཉོན་མོངས་དྲུག་གིས་བདག་ཏུ་བཅིངས། །དེར་རྟས་ཡུལ་ལ་བདག་བཟུང་པའོ། །དེ་ནས་རིམ་གྱིས་སྣོད་བཅུད་ཀྱི། །སྣང་བ་དུ་མའི་གཟུགས་འདུས་པའོ། །འདི་ཉིད་མི་ཤེས་བྱིས་པ་རྣམས། །ཟོ་ཆུན་བཞིན་དུ་རྒྱུད་མར་གནས། །སོ་སོའི་ལུས་དང་ཚད་ལེན་པའོ། །ཞེས་མཁས་པ་ཆེན་པོ་བྷི་མ་ལས་རྫོགས་པ་ཆེན་པོའི་རྒྱུད་ཀྱི་དོན་བསྡུས་པའི་སྐབས་སུ་གསུངས་སོ། །དེ་ལྟར་ཐ་མལ་གྱི་གནས་སྐབས་ཀྱི་ངོ་བོ་བཤད་ནས། ད་ནི་དག་པ་ནི། འདི་ཉིད་དག་པ་ཡེ་ཤེས་གསུམ། །ཡིད་ནི་མི་གཡོ་མཉམ་ཉིད་དེ། །ཀུན་རྟོགས་དག་པ་སོ་སོར་རྟོག །སྒོ་ལྔ་ཡུལ་རྣམས་བྱ་བ་གྲུབ། །ཞེས་སྨོས་ཏེ། འདི་ལྟར་གསུམ་པོ་འདི་དང་སྔར་བསྟན་པའི་མེ་ལོང་ལྟ་བུ་དང་ཆོས་ཀྱི་དབྱིངས་ལ་སོགས་པ་ཡེ་ཤེས་ལྔ་པོ་འདི་གནས་སྐབས་བཞིའི་འཁྲུལ་པ་དག་པ་ལས་འབྱུང་བ་ཇི་ལྟར་ཡིན་ཞེ་ན། གསང་བ་འདུས་པ་ལ་སོགས་པ་སྔགས་ཀྱི་གཞུང་རྣམས་སུ་གསུངས་ཤིང་། ཐེག་པ་ཆེན་པོ་བསྡུས་པ་ལས་ཀྱང་། ཕུང་པོ་ལྔའི་གནས་འགྱུར་གསུངས་ཏེ། ཡང་དབང་འབྱོར་བ་དུས་ཆོས་ཀྱི་སྐུ་ལ་དབང་འབྱོར་བ་ཐོབ་ཅེ་ན། མདོར་བསྡུས་ན་རྣམ་པ་ལྔས་འཐོབ་སྟེ། གཟུགས་ཀྱི་ཕུང་པོ་གྱུར་བའི་ཕྱིར། ཞིང་དང་ལུས་དང་མཚན་དང་དཔེ་བྱད་བཟང་པོ་དང་། དབྱངས་མཐའ་ཡས་པ་དང་། སྤྱི་གཙུག་ལྟར་མི་མཐོང་པ་ལ་དབང་འབྱོར་བ་དང་། ཚོར་བའི་ཕུང་པོ་གྱུར་བའི་ཕྱིར་ཁ་ན་མ་ཐོ་བ་མེད་ཅིང་ཚད་མེད་པ་རྒྱ་ཆེ་བའི་བདེ་བར་གནས་པ་ལ་དབང་འབྱོར་བའི་དང་། འདུ་ཤེས་ཀྱི་ཕུང་པོ་གྱུར་པའི་ཕྱིར་མིང་གི་ཚོགས་དང་ཚིག་གི་ཚོགས་དང་ཡི་གེའི་ཚོགས་ཐམས་ཅད་ཀྱིས་བསྟན་པ་ལ་དབང་འབྱོར་པ་དང་། འདུ་བྱེད་ཀྱི་ཕུང་པོ་གྱུར་པའི་ཕྱིར་སྤྲུལ་པ་དང་བསྒྱུར་བ་དང་འཁོར་བསྡུ་བ་དང་། དཀར་པོའི་ཆོས་བསྡུ་བ་ལ་དབང་འབྱོར་བ་དང་། རྣམ་པར་ཤེས་པའི་ཕུང་པོ་གནས་གྱུར་པའི་ཕྱིར་མེ་ལོང་ལྟ་བུ་དང་མཉམ་པ་ཉིད་དང་སོ་སོར་རྟོག་པ་དང་བྱ་བ་གྲུབ་པའི་ཡེ་ཤེས་ལ་དབང་འབྱོར་བས་དབང་འབྱོར་བ་ཐོབ་པའོ། །ཞེས་གསུངས་སོ། །དེ་ཡང་ཀུན་གཞི་གནས་གྱུར་པ་ནི་མི་ལོང་ལྟ་བུ་དང་། ཀུན་གཞི་ལ་གནས་པའི་ཡིད་གནས་གྱུར་པས་མཉམ་པ་ཉིད་དང་། དྲུག་པ་ཡིད་གནས་གྱུར་པས་སོ་སོར་རྟོག་པ་དང་། དངོས་པོ་ལ་འཇུག་པ་གནས་གྱུར་པས་བྱ་བ་གྲུབ་པ་དང་། ཡེ་ཤེས་དེ་དག་གི་རང་ངོ་ཤིན་ཏུ་རྣམ་པར་དག་པའི་རང་བཞིན་དུ་བཞུགས་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། འདི་རྣམས་ཀྱི་ངོ་བོ་ནི་མདོ་སྡེ་རྒྱན་ལས། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་ལ། །རྟག་ཏུ་དེ་ལ་མངོན་ཕྱོགས་མིན། །ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་ཕྱིར་དེ། །ཞེས་བྱ་བ། གཡོ་བ་མེད་པ་དང་ང་ཡི་བ་མེད་པ་དང་། རྒྱ་ཡོངས་སུ་མ་ཆད་པ་དང་དུས་རྟག་ཏུ་ལྡན་པ་དང་། ཤེས་བྱ་ཐམས་ཅད་ལ་མ་རྨོངས་ཀྱང་དེ་ལ་ཕྱོགས་པ་མ་ཡིན་པ་དང་། ཡེ་ཤེས་ཐམས་ཅད་ཀྱི་རྒྱུའི་མཚན་ཉིད་ཀྱི་ཕྱིར་ལོངས་སྤྱོད་རྫོགས་པའི་སངས་རྒྱས་ཀྱི་ཡང་དེ་རྒྱུའི་རྐྱེན་དུ་རྣམ་པར་བཞག་སྟེ། དེའི་ངེས་ཚིག་ཏུ། ཡེ་ཤེས་ཐམས་ཅད་ཀྱི་གཟུགས་བརྙན་དེ་ལས་འབྱུང་བའི་ཕྱིར། སངས་རྒྱས་ཀྱི་སྐུ་གསུམ་ལས་འདི་ནི་ཆོས་ཀྱི་སྐུ་ཡིན་ནོ། །དེ་ཡང་ཐེག་བསྡུས་ལས་སངས་རྒྱས་ཀྱི་ཆོས་རྣམ་པར་དག་པ་ནི་ཀུན་གཞིའི་རྣམ་པར་ཤེས་པ་གྱུར་ནས་ཆོས་ཀྱི་སྐུ་ཐོབ་པའི་ཕྱིར་རོ་ཞེས་པ་དང་། གསེར་འོད་ལས་ཀྱང་། ཀུན་གཞིའི་རྣམ་པར་ཤེས་པ་སྤངས་པས་ཆོས་ཀྱི་སྐུ་སྟོན་ཏོ། །དེ་ལ་གནས་པའི་ཡིད་དག་པས་ལོངས་སྤྱོད་རྫོགས་པའི་སྐུ་སྟོན་ཏོ། །དངོས་པོ་ལ་འཇུག་པའི་རྣམ་ཤེས་དག་པས་སྤྲུལ་པའི་སྐུ་སྟོན་ཏོ། །ཞེས་གསུངས་པ་དང་འཕགས་པ་སངས་རྒྱས་ཀྱི་སའི་འགྲེལ་པ་ལས་ཀྱང་བཤད་དོ། །དཔལ་མཁའ་འགྲོ་རྒྱ་མཚོའི་རྒྱུད་ལས་ཀྱང་། ཀུན་གཞི་མེ་ལོང་ཡེ་ཤེས་ཏེ། །དེ་ནི་ཆོས་ཀྱི་སྐུ་ཡིན་ནོ། །ཞེས་པ་ལ་སོགས་པ་རྒྱས་པར་གསུངས་སོ། །འདི་ལ་ཁ་ཅིག་ལོངས་སྤྱོད་རྫོགས་པའི་སངས་རྒྱས་སུ་འདོད་པ་ཡོད་དེ། དེ་ནི་སློབ་དཔོན་དབྱིག་གཉེན་གྱི་འགྲེལ་པ་ལས། ལོངས་སྤྱོད་རྫོགས་པའི་སངས་རྒྱས་ཀྱང་དེ་ཡིན་ལ། ཞེས་གསུངས་པའི་དགོངས་པ་མ་ལོན་པ་སྟེ། ཀྱང་གི་སྒྲ་སྦྱོར་བ་ནི་ལོངས་སྤྱོད་རྫོགས་པའི་སངས་རྒྱས་ཀྱི་རྒྱུའི་རྐྱེན་དུ་ཆོས་སྐུ་མེ་ལོང་ལྟ་བུ་སྦྱོར་བའི་ཚིག་སྟེ་རྣམ་པར་ཤེས་པའི་ཚོགས་བདུན་གྱི་རྒྱུའི་རྐྱེན་དུ་ཀུན་གཞི་སྦྱོར་བ་བཞིན་ནོ། །གལ་ཏེ་དེ་ལྟ་མ་ཡིན་ན། ལུང་རིག་ཀྱི་སྐྱོན་དུ་མ་ཡོད་མོད་ཀྱི་འཕྲོས་པ་ཆོག་གོ །བསྒོམ་པ་དག་པས་སེམས་ཅན་ལ། །མཉམ་པ་ཉིད་ཀྱི་ཡེ་ཤེས་འདོད། །མི་གནས་ཞི་བར་ཞུགས་པ་ཡང་། །མཉམ་ཉིད་ཡེ་ཤེས་ཡིན་པར་འདོད། །དུས་རྣམས་ཀུན་ཏུ་བྱམས་པ་དང་། །ཐུགས་རྗེ་ཆེན་པོ་དག་དང་ལྡན། སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ངེས་པར་སྟོན། །ཞེས་རྣམ་པར་མི་རྟོག་པའི་ཏིང་ངེ་འཛིན་བསྒོམ་པ་དག་པ་དང་། གང་གི་ཡང་ཕྱོགས་སུ་མ་ལྷུང་བ་དང་། སྲིད་ཞི་གཉིས་ལ་མི་གནས་པའི་ཞི་བ་དང་། ཐུགས་རྗེ་ཆེན་པོ་འཇུག་པ་དང་། སེམས་ཅན་ལ་མོས་པ་བཞིན་དུ་མཚན་དང་དཔེ་བྱད་སྟོན་པས་མཉམ་པ་ཉིད་ཀྱི་ཡེ་ཤེས་འདི་ནི་ཀུན་གཞི་ལ་གནས་པའི་ཡིད་གནས་གྱུར་པ་སྟེ། འདི་དང་དྲུག་པ་ཡིད་ཀྱི་ཆ་གཅིག་གནས་གྱུར་པ་ལོངས་སྤྱོད་རྫོགས་པའི་སྐུའོ། །སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །འཁོར་གྱི་དཀྱིལ་འཁོར་རྣམས་སུ་ཡང་། །འབྱོར་བ་ཐམས་ཅད་སྟོན་མཛད་ཅིང་། །ཐེ་ཚོམ་ཐམས་ཅད་གཅོད་པ་ཡི། །ཆོས་ཆེན་ཆར་ནི་རབ་ཏུ་འབེབས། །ཞེས་ཏིང་ངེ་འཛིན་དང་གཟུངས་རྣམས་ཀྱི་གཏེར་ལྟ་བུ་དང་གསུང་ཆོས་ཀྱི། དུང་འབྱུང་བའི་ཕྱིར་དྲུག་པ་ཡིད་ཀྱི་རྣམ་པར་ཤེས་པ་གནས་གྱུར་པ་ལོངས་སྤྱོད་རྫོགས་པའི་སྐུ་ཡིན་ཡང་དོན་དང་བཅས་པའི་འཛིན་པ་གནས་གྱུར་པས་ཞིང་ལ་སོགས་པ་སྟོན་པ་དང་། རྣམ་རྟོག་གཞན་དུ་གྱུར་པས་དུས་ཐམས་ཅད་དུ་ཡེ་ཤེས་དང་ལས་ལ་ཐོགས་པ་མེད་པ་འདི་གཉིས་ཀྱི་ཆ་རེ་སྤྲུལ་པའི་སྐུ་ཡིན་ནོ། །བྱ་བ་གྲུབ་པའི་ཡེ་ཤེས་ནི། །ཁམས་རྣམས་ཀུན་དུ་སྣ་ཚོགས་ཤིང་། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་གྱི་དོན་གྲུབ་པའོ། །སངས་རྒྱས་སྤྲུལ་པ་དེ་རྟག་ཏུ། །མཛད་པ་གྲུབ་པའི་བྱེ་བྲག་དང་། །གྲངས་དང་ཞིང་གིས་རྣམ་ཀུན་ཏུ། །བསམ་མི་ཁྱབ་པར་ཤེས་པར་བྱ། །ཞེས་འཇིག་རྟེན་གྱི་ཁམས་ཐམས་ཅད་དུ་སྣ་ཚོགས་པས་འཇུག་པས་སྒོ་ལྔ་དང་ཡིད་ཀྱི་ཆ་གཅིག་གམ་དངོས་པོ་ལ་འཇུག་པའི་རྣམ་པར་ཤེས་པ་གནས་གྱུར་པ་བྱ་བ་གྲུབ་པ་སྟེ་སྤྲུལ་པའི་སྐུ་ཡིན་ནོ། །དེ་ལྟར་ཡེ་ཤེས་བཞི་པོའི་དོན་ནི་ཡེ་ཤེས་ཐམས་ཅད་འཛིན་པ་དང་སེམས་མཉམ་པ་ཉིད་ཀྱི་ཕྱིར་དང་ཆོས་སྟོན་པ་དང་བྱ་བ་གྲུབ་པའི་ཕྱིར་ཏེ། འཛིན་པའི་ཕྱིར་དང་སེམས་མཉམ་ཕྱིར། །ཡང་དག་ཆོས་རབ་སྟོན་ཕྱིར་དང་། །བྱ་བ་གྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང་། ཞེས་བྱུང་ངོ་། །ལྔ་པ་ཆོས་ཀྱི་དབྱིངས་ཀྱི་ཡེ་ཤེས་ཇི་ལྟ་བུ་ཞེ་ན། རིགས་དང་དོན་ཐ་དད་པ་མེད་པ་དང་། འཁོར་འདས་ཐམས་ཅད་རྫོགས་པ་དང་། ཐོག་མ་དང་ཐ་མ་མེད་པ་དང་། གཅིག་པ་དང་ཐ་དད་པ་མ་ཡིན་པ་དང་། རྣམ་པ་དེ་དག་གིས་སྤྲོས་པའི་མཚན་མ་ཐམས་ཅད་དང་བྲལ་བའི་ངོ་བོ་ཡིན་པའི་ཕྱིར། ཐ་དད་རིགས་དོན་མེད་ཕྱིར་དང་། །རྫོགས་དང་ཐོག་མ་མེད་ཕྱིར་དང་། །སངས་རྒྱས་གཅིག་མིན་དྲི་མེད་གནས། །ཐ་དད་མིན་ཕྱིར་མང་པོའང་མིན། །ཞེས་བྱ་བས་བསྟན་པར་མངོན་ནོ། །ཕུང་པོ་ལྔ་ལ་ཡེ་ཤེས་སྦྱར་བ་ཡོད་མོད་ཀྱི་འོག་ནས་འཆད་དོ། །སྤང་གཉེན་འབྲས་བུ་དང་བཅས་པ་ནི། ཚིག་བཅད་གཉིས་དང་རྐང་པ་གཅིག་སྟེ། ཡིད་སྒོ་ལྔ་དང་བཅས་པས་ཡེ་ཤེས་ལ་སྒྲིབ་པ་ནི་ཉོན་མོངས་པ་མཐོང་སྤངས་བསྒོམ་སྤངས་རྣམས་སོ། །ཚོགས་བརྒྱད་ཀའི་སྒྲིབ་པ་ཉོན་མོངས་པ་དང་ཤེས་བྱའི་སྒྲིབ་པ་སྟེ། གཉེན་པོ་ནི་ཐེག་པ་ཆེན་པོའི་ཆོས་ལ་མོས་པ་རབ་ཏུ་བསྒོམ་པ་དང་། ཆོས་དང་གང་ཟག་ལ་བདག་མེད་པ་དང་། ནམ་མཁའི་མཛོད་ལ་སོགས་པའི་ཏིང་ངེ་འཛིན་དང་། ཐམས་ཅད་ལ་འཇུག་པའི་སྙིང་རྗེ་ཆེན་པོ་སྟེ་རྒྱུད་བླ་མ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་བསྐྱེད་མ་དང་བསམ་གཏན་གྱི། །བདེ་བ་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་གསུངས་པ་ཡིན་ནོ། །གོང་གི་ཡེ་ཤེས་ཀྱི་སྐབས་སུ་བཤད་པ་བཞིན། །དེས་སྦྱངས་སྤྲུལ་སྐུས་འགྲོ་དོན་མཛད། །ཡིད་དང་རྨི་ལམ་གཅིག་པའི་ཕྱིར། །ལོངས་སྐུར་བརྗོད་དེ་འབྲས་བུ་ཡིན། །རྒྱས་པར་ཆོས་རྣམས་ཐམས་ཅད་དུ། །གསུངས་ཕྱིར་འདིར་ནི་བསྡུས་པ་ཡིན། །ཞེས་སྨོས་པ་ཡིན་ནོ། །དེ་ཕྱིར་ཆོས་ཀྱི་ཕྱག་རྒྱ་བཅིང་བ་ནི་དཔའ་བོ་རྡོ་རྗེའི་ཞལ་ནས་གཟུགས་ལ་སོགས་པའི་དངོས་པོ་རྣམས་ལ་དང་པོར་དགའ་བའོ། །དེ་ལ་རྟོག་པ་ནི་མཆོག་དགའ་བའོ། །ཡིད་སྐྱོ་ན་དགའ་བྲལ་དུ་འགྱུར་རོ། །དེའི་ཕྱིར་གསལ་ལ་མི་རྟོག་པའི་ཤེས་པས་ལྷན་ཅིག་སྐྱེས་པ་བསྒོམ་སྟེ། གང་གང་ལ་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པར། །གནས་པ་མིག་གི་གཟུགས་དག་གམ། །གནས་པ་རྣ་བའི་སྒྲ་དག་གམ། །གནས་བ་སྣའི་དྲི་དག་གམ། གནས་པ་ལྕེའི་རོ་དག་གམ། །གནས་པ་ལུས་ཀྱི་རེག་དག་གམ། །གནས་པ་ཡིད་ཀྱི་ཆོས་རྣམས་ལ། །བདེ་ཆེན་ཤེས་ན་བསྒོམ་པའི་མཆོག །ཞེས་གསུངས་སོ། །འཇུག་བསྡུ་བ་ནི། ཚིགས་བཅད་གཅིག་སྟེ། དེ་ལྟར་གནས་སྐབས་རྣམ་པ་བཞིའི་འཁྲུལ་པ་དང་། མ་འཁྲུལ་པའི་ཡེ་ཤེས་ལམ་གྱི་རིམ་པ་དང་བཅས་པ་དང་། ཕྱག་རྒྱ་བཞི་དང་སྐུ་བཞི་སྟེ། གཞི་དང་ལམ་དང་འབྲས་བུའི་རྟེན་ཅིང་འབྲེལ་བར་འབྱུང་བ་བསྡུས་ཏེ་བསྟན་པ་ཡིན་ནོ།། །།