འཕགས་པ་དྷཱི་ཏི་ཀ་དང་འཕགས་པ་ནག་པོ་པ།
༈ དེ་ནས་ཉེ་སྦས་ཀྱིས་འཕགས་པ་དྷཱི་ཏི་ཀ་ལ་བསྟན་པ་གཏད་པ་ནི། ཡུལ་འཕགས་རྒྱལ་དུ་བྲམ་ཟེ་ཕྱུག་པ་ནོར་མང་བ་ཞིག་ཡོད་ལ། དེ་ལ་བུ་དྷཱི་ཏི་ཀ་བྱ་བ་ཞིག་ཡོད་པ་དེ་ཆུང་ངུ་ནས་ཕ་ལ་རབ་ཏུ་བྱུང་བ་ཞུས་པས། ང་མ་ཤིའི་བར་དུ་རབ་ཏུ་མ་བྱུང་ལ་འཁོར་བྲམ་ཟེ་འདི་རྣམས་ཀྱང་ཁྱོད་ཀྱིས་སྐྱོངས་ཤིགཅེས་མ་གནང་བས། དེས་ཀྱང་ཕའི་ངག་ཉན་ཏེ། རང་གི་ཁྱིམ་དུ་ཚངས་སྤྱོད་ལ་གནས་པས་བྲམ་ཟེ་ལྔ་བརྒྱ་ལ་རིག་པ་དག་སྟོན་ཅིང་གནས། ནམ་ཞིག་ཕ་འདས་ཏེ་ཁྱིམ་གྱི་འབྱོར་བ་ཐམས་ཅད་བྲམ་ཟེ་དང་དགེ་སྦྱོང་དག་ལ་བཏང་སྟེ། ཉེ་སྦས་ཀྱི་དྲུང་དུ་རབ་ཏུ་བྱུང་ཞིང་བསྙེན་པར་རྫོགས་པས། ཉེ་སྦས་ཀྱིས་གདམས་པ་རྣམ་པ་བདུན་བསྟན་པས་ཞག་བདུན་ན་དྷཱི་ཏི་ཀ་དང་བྲམ་ཟེ་ལྔ་བརྒྱས་དགྲ་བཅོམ་པ་ཐོབ། དེ་ནས་གྲོང་ཁྱེར་དྲུག་ཏུ་འཁོར་རྣམ་པ་བཞི་ལ་གདམས་ངག་བསྟན་ནས་བདེ་བ་ལ་བཀོད་དོ། །བདེན་པ་མཐོང་བ་མང་དུ་བྱུང་། དགྲ་བཅོམ་པ་ཐོབ་པའང་སྟོང་ཙམ་བྱུང་ཞིང་། བྲམ་ཟེ་རྣམས་བ་གླང་ཁྲི་ཕྲག་ཙམ་བསགས་ནས་སྦྱིན་བསྲེག་གི་མཆོད་སྦྱིན་བྱ་བ་རྣམས་ལ་སྡིག་པའི་ཉེས་དམིགས་བརྗོད་ནས་ལོག་ལམ་དང་ཕྲལ་ཏེ་ཡང་དག་པའི་ལམ་ལ་བཀོད་དོ། །ཡུན་རིང་པོར་སངས་རྒྱས་ཀྱི་བསྟན་པ་བསྐྱངས་ནས་མཐར་འཕགས་པ་ནག་པོ་པ་ལ་བསྟན་པ་གཏད་ནས་འཕགས་རྒྱལ་དུ་ཡོངས་སུ་མྱ་ངན་ལས་འདས་སོ། ༈ །འཕགས་པ་ནག་པོ་པ་ནི་ཤར་ཕྱོགས་ལངྐའི་ཡུལ་ན་ཁྱིམ་བདག་ཕྱུག་པ་ལོངས་སྤྱོད་ཆེ་བ་རང་གི་བསོད་ནམས་ཀྱི་མཐུ་ལས་ཁྱིམ་དུ་ལྗོན་ཤིང་འཁྲུངས་པའི་འབྲས་བུ་རིན་པོ་ཆེའི་རང་བཞིན་ཅན་དུ་འབྱུང་བ་ཡོད་པ་ཞིག་ལ་བུ་མེད་པས་ཁྱབ་འཇུག་ནག་པོའི་གཟུགས་ཅན་ལ་ཡང་ཡང་མཆོད་པས། ནམ་ཞིག་ཁྱེའུ་ཞིག་བཙས་པའི་མིང་ནག་པོར་བཏགས་སོ། །དེ་ཆེར་སྐྱེས་ནས་ཚོང་པ་ལྔ་བརྒྱ་དང་བཅས་གྲུ་གཟིངས་བསྐྱོད་ནས་རྒྱ་མཚོར་ནོར་བུ་ལེན་དུ་
ཕྱིན་པས་སྲིན་མོའི་གླིང་དུ་ལམ་གོལ་བར་འཕགས་པ་དྷཱི་ཏི་ཀ་སྐྱབས་སུ་བོས་པས། འཕགས་པའི་རྫུ་འཕྲུལ་གྱིས་སྲིན་མོ་རྣམས་བསྐྲད་དེ་བདེ་བར་རང་གནས་སུ་བགྲོད་ནས། ཚོང་པ་དེ་རྣམས་ཀྱིས་ལོ་གསུམ་དུ་ཕྱོགས་བཞིའི་དགེ་འདུན་ལ་དུས་སྟོན་ཆེན་པོ་བྱས། མཐར་འཕགས་པ་དྷཱི་ཏི་ཀའི་དྲུང་དུ་རབ་ཏུ་བྱུང་ཞིང་བསྙེན་པར་རྫོགས་ནས་མི་རིང་བར་ཐམས་ཅད་ཀྱིས་དགྲ་བཅོམ་པའི་འབྲས་བུ་ཐོབ་བོ། །དེ་ནས་ཚོང་དཔོན་གྱི་རིགས་ལས་རབ་ཏུ་བྱུང་བ་འཕགས་པ་ནག་པོ་པས་བསྟན་པ་བསྐྱངས་ཏེ་འཁོར་རྣམ་པ་བཞི་ལ་གདམས་པ་བསྟན་པ། འབྲས་བུ་རྣམ་པ་བཞི་ཐོབ་པ་རྒྱུན་ཆད་མེད་པ་བྱུང་བར་གྲགས། མཐར་རྒྱལ་རིགས་ལས་རབ་ཏུ་བྱུང་བ་འཕགས་པ་ལེགས་མཐོང་ལ་བསྟན་པ་གཏད་དེ་བྱང་ཕྱོགས་ཀྱི་ཡུལ་ཀུ་ཤ་བ་ན་ཞེས་བྱ་བར་ཡོངས་སུ་མྱ་ངན་ལས་འདས་སོ། །