དྲུག་པ་རྐྱེན་གྱི་སྒོ་ནས་གཏན་ལ་དབབ་པ།

དྲུག་པ་རྐྱེན་གྱི་སྒོ་ནས་གཏན་ལ་དབབ་པ་ནི།

རྐྱེན་བཞི་སྟེ། རྒྱུའི་རྐྱེན་དང༌། དེ་མ་ཐག་པའི་རྐྱེན་དང༌། དམིགས་པའི་རྐྱེན་དང༌། བདག་པོའི་རྐྱེན་ནོ། །མཛོད་ལས། །རྐྱེན་ནི་བཞི་པོ་དག་ཏུ་གསུངས། །རྒྱུ་ཞེས་བྱ་བ་རྒྱུ་ལྔ་ཡིན། །སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །དམིགས་པ་ཆོས་རྣམས་ཐམས་ཅད་དོ། །བྱེད་རྒྱུ་ཞེས་བྱ་བདག་པོར་བཤད། །ཅེས་སོ། །འོ་ན་སོ་སོར་ཐར་པའི་སྡོམ་པ་འདི་རྐྱེན་བཞི་པོ་གང་ལས་སྐྱེ་ཞེ་ན། རྒྱུའི་རྐྱེན་དང་བདག་པོའི་རྐྱེན་གཉིས་ཙམ་ལས་སྐྱེ་སྟེ། མཛོད་ལས། གཞན་ནི་གཉིས་པོ་དག་ལས་སྐྱེ། །ཞེས་སོ། ། བདུན་པ་འབྲས་བུའི་སྒོ་ནས་གཏན་ལ་དབབ་པ་ནི། མཛོད་ལས། རྣམ་སྨིན་ལུང་དུ་མ་བསྟན་ཆོས། །སེམས་ཅན་བརྗོད་ལུང་བསྟན་ཕྱིས་འབྱུང༌། །རྒྱུ་མཐུན་རྒྱུ་དང་འདྲ་བའོ། །བྲལ་བ་བློ་ཡིས་ཟད་པའོ། །གང་གི་སྟོབས་ཀྱིས་གང་སྐྱེས་པའི། །འབྲས་དེ་སྐྱེས་བུ་བྱེད་ལས་སྐྱེས། །སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་སོ། །འོ་ན་སོ་སོར་ཐར་པའི་སྡོམ་པ་འདི་འབྲས་བུ་ལྔ་པོ་གང་ཡིན་ཞེ་ན་འབྲས་བུ་གསུམ་ཡིན་ལ་གཉིས་ནི་མ་ཡིན་ནོ། །དེ་ཡང་སོ་སོར་ཐར་པའི་སྡོམ་པ་ཆོས་ཅན། བདག་པོའི་འབྲས་བུ་ཡིན་ཏེ། བྱེད་རྒྱུ་ལས་སྐྱེས་པའི་ཕྱིར་རོ། །རྒྱུ་མཐུན་པའི་འབྲས་བུ་ཡིན་ཏེ། སྐལ་མཉམ་གྱི་རྒྱུ་ལས་སྐྱེས་པའི་ཕྱིར། སྐྱེས་བུ་བྱེད་པའི་འབྲས་བུ་ཡིན་ཏེ། ལྷན་ཅིག་འབྱུང་བའི་རྒྱུ་ལས་སྐྱེས་པའི་ཕྱིར་རོ། །སྡོམ་པ་ཆོས་ཅན། རྣམ་པར་སྨིན་པའི་འབྲས་བུ་ནི་མ་ཡིན་ཏེ། དགེ་བར་ལུང་དུ་བསྟན་པའི་ཕྱིར། སྡོམ་པ་ཆོས་ཅན། བྲལ་བའི་འབྲས་བུ་མ་ཡིན་ཏེ། འདུས་བྱས་ཡིན་པའི་ཕྱིར་རོ། །