དང་པོ་ཉེར་སྤྱོད་བདུན་གྱི་མཆོད་པ་ནི།མཆོད་ཡོན་ཕལ་ཆེར་མཆོད་ཡོན་བླ་རེ།
དང་པོ་ཉེར་སྤྱོད་བདུན་གྱི་མཆོད་པ་ནི།མཆོད་ཡོན་ཕལ་ཆེར་མཆོད་ཡོན་བླ་རེ་དང༌། །
མཆོད་ཡོན་བཀོད་པའི་འོད་ཟེར་རབ་རྒྱས་ཤིང༌། །མཆོད་ཡོན་སྣ་ཚོགས་ཀུན་དུ་བཀྲམ་བྱས་ནས། །བདག་ཉིད་ཆེན་པོ་དཔལ་ལྡན་བླ་མ་མཆོད། །ཨོཾ་གུ་རུ་བུདྷ་བོ་དྷི་སྭཏྭ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲཱི་ཧཱུྃ། དེ་བཞིན་དུ་མཆོད་ཡོན་གྱི་གནས་སུ། ཞབས་བསིལ། མེ་ཏོག བདུག་སྤོས། སྣང་གསལ།དྲིམཆོག ཞལ་ཟས། སིལ་སྙན་སོགས་བརྗོད། ཨརྒྷཾ་གྱི་ཚབ་ཏུ། པཱདྱཾ། པུཥྤེ། དྷུ་པེ། ཨཱ་ལོ་ཀེ གནྡྷེ། ནཻཝི་ཏྱ། ཤབྟ་རྣམས་བཅུག་ནས་ཐོག་མཐའི་སྔགས་གོང་བཞིན། རིན་པོ་ཆེའི་གསེར་དངུལ་སོགས་ཀྱི་སྣོད་གྲངས་མེད་པའི་ནང་དུ་ལྷའི་བདུད་རྩི་ཡན་ལག་བརྒྱད་ལྡན་གྱི་ཆུ་གཙང་གི་མཆོད་ཡོན་ཕལ་ཆེ་བ་ནི་ནམ་མཁའི་ཁམས་ཐམས་ཅད་དུ་མཆོད་ཡོན་གྱི་བླ་རེ་ལྟ་བུ་དང༌། དེ་བཞིན་དུ་མཆོད་ཡོན་གྱི་གདུགས་དང་རྒྱལ་མཚན་བ་དན་སོགས་མཆོད་རྫས་སྣ་ཚོགས་ཀྱིས་རྣམ་པའི་བཀོད་པ་དང༌། ཡང་ཕལ་ཆེ་བ་མཆོད་ཡོན་ལས་གྲུབ་པའི་བར་སྣང་གི་ཁམས་ཐམས་ཅད་དུ་ཁང་བཟང་དང༌། སྐྱེད་མོས་ཚལ་དང་བཀྲ་ཤིས་རྟགས་བརྒྱད་རིན་ཆེན་སྣ་བདུན་དང་རྫས་བརྒྱད་རིན་པོ་ཆེ་སྣ་ཚོགས་ཉི་ཟླ་ལ་སོགས་པའི་བཀོད་པའི་འོད་ཟེར་རབ་ཏུ་རྒྱས་པར་བྱས་ཤིང༌། ཕལ་ཆེ་བ་མཆོད་ཡོན་ལས་གྲུབ་པའི་སངས་རྒྱས་ཀྱི་ཞིང་ལྟ་བུ་གསེར་གྱི་ས་གཞི་ལྗོན་ཤིང་ཆུ་མཚོ་ཆུ་བྱ་སོགས་མཆོད་རྫས་སྣ་ཚོགས་ཀྱིས་ཕྱོགས་ཀུན་ཏུ་གང་ཞིང་རིན་པོ་ཆེའི་བྱེ་མ་གྲམ་བུར་བདལ་བ་ཙནྡན་གྱི་དྲི་བསུང་ལྡང་ཞིང་མེ་ཏོག་གི་ཆར་འབེབས་པ་སོགས་ལྷ་མིའི་ལོངས་སྤྱོད་དཔག་ཏུ་མེད་པའི་བཀོད་པའི་རྣམ་པར་བཀྲམ་པར་བྱས་ནས། ལུང་རྟོགས་ཀྱི་ཡོན་ཏན་དང་ལྡན་པའི་བདག་ཉིད་ཆེན་པོ་ཁྱབབདག་རྡོ་རྗེ་འཆང་དཔལ་ལྡན་བླ་མ་དམ་པ་ལ་མཆོད་ཅེས་པའོ། །ཨོཾ་ནི་ཨ་ཨོ་མ་གསུམ་འདུས་པས་སྐུ་གསུང་ཐུགས་གསུམ་གྱི་བདག་ཉིད་དང་གུ་རུ་ནི་བླ་མ་སྟེ་རང་ལ་སངས་རྒྱས་ཀུན་ལས་ཀྱང་ཆོས་བསྟན་པའི་ཡོན་ཏན་གྱི་ཁུར་དུ་ལྕི་བའི་བླ་མ་དང༌། བུདྷ་ནི་སྒྲིབ་གཉིས་མཐའ་དག་ལསསངས་བ་དང་ཐུགས་རྣམ་པ་ཐམས་ཅད་མཁྱེན་པའི་བློ་གྲོས་པདྨའི་འདབ་མ་ལྟར་རྒྱས་པའི་སངས་རྒྱས་དང་བོ་དྷི་ནི་སྤངས་བ་བྱང་ཆུབ་དང་རྟོགས་པ་བྱང་ཆུབ་སྟེ་འཕགས་པ་ཐོགས་མེད་ཀྱི་ས་སྡེ་ལས། བྱང་ཆུབ་ནི་རྣམ་པ་གཉིས་ཏེ་སྤངས་བ་དང་རྟོགས་པའོ། །ཞེས་གསུངས་པ་ལྟར་རོ། ། སྭ་ཏྭ་ནི་གཞན་དོན་ཁུར་དུ་ཁྱེར་བའི་སྙིང་སྟོབས་དང་ལྡན་པའམ་བླ་མེད་བྱང་ཆུབ་སྒྲུབ་པ་ལ་དཔའ་བས་སེམས་དཔའ་དང༌། ས་པ་རི་ཝཱ་ར་ནི་འཁོར་དང་བཅས་པ། བཛྲ་ནི་རྡོ་རྗེ། ཨརྒྷཾ་ནི་མཆོད་ཡོན་དེཉིད་གཙོ་བོ་ཞལ་དུ་འབུལ་བ་དང༌། པྲ་ཏཱིཙྪ་སོ་སོ་དང༌། པུ་ཛ་ནི་མཆོད་པ། མེ་གྷ་ནི་སྤྲིན།ས་མུདྲ་ནི་རྒྱ་མཚོ། སྥ་ར་ཎ་ནི་སྤྲོ་བ། ས་མ་ཡ་ནི་མི་འདའ་བའི་དམ་ཚིག ཤྲཱི་ནི་དཔལ་སྟེ་བདེ་སྟོང་ཟུངའཇུག་གི་བདག་ཉིད། ཧཱུཾ་ནི་ཐུགས་ཡེ་ཤེས་ལྔའི་རང་བཞིན་གྱི་སྒོ་ནས་བཞེས་པའི་དོན་ནོ། །དེ་བཞིན་དུ་མཆོད་ཡོན་གྱི་གནས་སུ་ཞབས་བསིལ་ལ་གྲུབ་པའི་ནམ་མཁའི་བླ་རེ་སྣ་ཚོགས་སོགས་གོང་ལྟར་འགྲེས། ཞབས་བསིལ་ནི་ཞབས་རྐང་ལ་འབུལ་བ་དང༌། མེ་ཏོག་དབུ་ལ་འབུལ་བ་དང༌།ཨ་ཀར་སོགས་དྲི་བཟང་གི་བདུག་སྤོས་ནི་ཤངས་ལ་འབུལ་བ་དང༌། ཉི་ཟླའི་ནོར་བུའི་འོད་སོགསསྣང་གསལ་སྤྱན་ལ་འབུལ་བ་དང༌། སྐུ་ལ་ཕྱུག་པའི་དྲི་བཟང་སྟེ་དྲི་ཆབ་ནི་ཐུགས་སྙིང་ག་ལ་འབུལབ་དང༌། བཟའ་བཏུང་སོགས་ཞལ་ཟས་རོ་བརྒྱ་ལྡན་པ་ལྗགས་ལ་འབུལ་བ་དང༌།པི་ཝཱང་གླིང་བུསིལ་སྙན་སོགས་སྙན་ཅིང་འཇེབས་པ་རོལ་མོའི་རིགས་སྙན་ལ་འབུལ་བ་མཆོད་ཡུལ་གྱི་ཐུགས་ལ་བདེ་སྟོང་ཟག་མེད་ཀྱི་ཡེ་ཤེས་ཁྱད་པར་ཅན་རེ་རེ་སྐྱེས་པས་མྱེས་ཤིང་ཚིམ་པར་མོས་པའོ།། ཨརྒྷཾ་གྱི་ཚབ་ཏུ། པཱདྱཾནི་ཞབས་བསིལ། པུཥྤེ་མེ་ཏོག དྷུ་པེ་བདུག་སྤོས། ཨཱ་ལོ་ཀེ་སྣང་གསལ། གནྡེདྲི་ཆབ། ནཻཝི་ཏྱ་ཞལ་ཟས། ཤབྟ་སིལ་སྙན་རྣམས་བཅུག་ནས་ཐོག་མཐའི་སྔགས་གོང་བཞིན་མཆོད།འདི་དག་ཡང་དཀོན་མཆོག་ཏ་ལ་ལའི་མདོ་ལས་བྱུང་བ་རྣམས་ཐམས་ཅད་མཁྱེན་པ་ཏཱ་ར་ནཱ་ཐས་བླ་མཆོད་དུ་བཀོད་པ་ཡིན་ཏེ། དཀོན་མཆོག་ཏ་ལ་ལའི་མདོ་ལས། མེ་ཏོག་ཕལ་ཆེར་མེ་ཏོག་བླརེ་དང༌། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་དེ་དག་རྒྱལ་བ་མཆོད། །ཅེས་གསུངས་སོ། །