སྔགས་ཕྱོགས་ལ་སྤྲོ་བ་བསྐྱེད་ཚུལ།

དང་པོ་ལ། འཇིག་རྟེན་གཏམ་དཔེ་ལ། མི་མ་ཟད་ཀྱིས་བསམ་པ་ཡ་ཟད་འཆང་ཟེར་དོན་བཞིན། རང་དང་རང་འདྲ་བའི་བློ་དམན་འགའ་རེ་མཆིས་སྲིད་པས་དེ་དག་ལ་སྤྲོ་བའི་བརྩོན་འགྲུས་བསྐྱེད་པ་ལ་ཕན་དུ་རེ་བའི་ལྷག་བསམ་གྱིས་དེའི་ཚུལ་ཙོང་ཁ་པ་ཡབ་སྲས་ཀྱིས་གཙོས་དམ་པའི་མན་ངག་གིས་བརྒྱན་ཏེ་ཅུང་ཙམ་བྲི་བ་ལ། འོ་སྐོལ་རྣམས་སྔོན་བསགས་བཟང་པོས་མཚམས་སྦྱར་ཏེ་ཐེག་མཆོག་འཁོར་ལོ་བཞི་ལྡན་གྱི་དལ་བ་མཚན་ཉིད་པ་འཛམ་བུ་གླིང་པའི་མི་ཁམས་མངལ་སྐྱེས་མཚན་ཉིད་དྲུག་ལྡན་གསང་སྔགས་སྤྱོད་པའི་སྣོད་རུང་སྤྱི་དང་བྱེ་བྲག་གི་སྡུག་བསྔལ་ལས་ཐར་འདོད་ལྷག་པར་དགའ་འོས་པ་ཞིག་ཐོབ་ཡོད་པའི་དུས་འདིར་རང་གིས་རང་མ་བསླུས་པར། གང་ཟག་གཅིག་འཚང་རྒྱ་བའི་ཐབས་དམ་པ་མདོ་སྔགས་ཟུང་འབྲེལ་གྱི་བསྟན་པ་དྲི་མ་མེད་པ་འདི་ཉིད་དང༌། ལྷག་པར་ལམ་མཆོག་འདི་ལ་ཐོས་བསམ་སྒོམ་པས། རབ་ལམ་གྱི་བཙན་ས་ཟིན་པ་ཞིག་དང༌། མ་མཐར་བག་ཆགས་རེ་ཡན་ཆད་ཨེ་ཐེབས་བལྟ་དགོས། སྔགས་ལམ་ཡང་ཡལ་བར་མི་འདོར་བར་བག་ཆགས་རེ་ཡན་ཆད་ཨེ་ཐེབས་ལྟ་བ་ལ་ནན་ཏན་བྱས་ན། འཇམ་པའི་དབྱངས་ཀྱི་གདན་ས་ཁྱད་པར་ཅན་འདིར་དེ་དག་བྱ་དཀའ་བ་རང་མ་ཡིན་ཏེ། ཞབས་དྲུང་གོང་མ་རྣམས་ཀྱི་བཀའ་དྲིན་དང་ཐུགས་རྗེ་བླ་མེད་ལ་བརྟེན་ནས། དགོན་སྡེ་གཞན་དང་མི་འདྲ་བར་བདེ་གསང་འཇིགས་གསུམ་གྱི་སྒྲུབ་མཆོད་ཆོས་ཐོག་ཀྱང་ཆ་ཚང་ཞིག་བཙུགས་ཡོད་པའི་སྟེང་། བྱིས་པའི་སྐབས་ནས་ཆོ་ག་ཆ་ཚང་ངག་ལ་བྱང་བར་མ་ཟད། དཔལ་རྡོ་རྗེ་འཇིགས་བྱེད་སོགས་ཀྱི་བསྐྱེད་རྫོགས་ཀྱི་ཁྲིད། ཐིག་རྡུལ་ཚོན་འདེབས་ལུགས་སོགས་སྔགས་ཕྱོགས་ཀྱི་དེ་ཉིད་བཅུའི་ཕྱག་ལེན་མི་དམན་པ་ཞིག་མཆིས་པས་དེ་དག་བྱ་སླ་བ་ཡིན། དེ་ལྟར་བྱས་ན་དལ་བ་དོན་ལྡན་ནམ་དལ་བའི་རྟེན་ལ་སྙིང་པོ་ལེན་པ་ཟེར་ཆོག་པ་འདྲ། གལ་དེ་དེ་ལྟར་མི་བྱེད་པ་ཡིན་ན། དལ་རྟེན་ཆུད་ཟོས་སུ་གཏོང་བ་ཡིན། དེ་ལྟར་ཡིན་པ་དང༌། སྔགས་ལའང་སློབ་པ་དོན་ཆེ་བ་ནི། གངས་ཅན་མཁས་གྲུབ་ཡོངས་ཀྱི་གཙུག་རྒྱན། འཕགས་པ་རིགས་གསུམ་མགོན་པོའི་སྤྱི་གཟུགས། ཡབ་རྗེ་རྒྱལ་བ་གཉིས་པ་ཙོང་ཁ་པས། ཐུགས་བརྩེ་བ་ཆེན་པོའི་སྒོ་ནས་ཉམས་རྟོགས་ཅི་བྱུང་རང་རེ་ཐར་འདོད་རྣམས་ལ་དབྱངས་སུ་གྱེར་ནས་མགུར་བཞེས་པའི་ཞལ་གདམས་ཁྱད་པར་ཅན་སྐལ་བཟང་རྣ་བའི་བཅུད་ལེན་དུ་གྱུར་པ་རྗེའི་ཉམས་མགུར་ལས། དེ་ལྟར་རྒྱུ་དང་འབྲས་བུའི་ཐེག་ཆེན་གྱི། །ལམ་མཆོག་གཉིས་ཀར་དགོས་པའི་ཐུན་མོང་ལམ། །ཇི་བཞིན་བསྐྱེད་ནས་མཁས་པའི་དེད་དཔོན་གྱི། །མགོན་ལ་བརྟེན་ནས་རྒྱུད་སྡེ་རྒྱ་མཚོ་ཆེར། །ཞུགས་ནས་ཡོངས་རྫོགས་མན་ངག་བརྟེན་པ་དེས། །དལ་འབྱོར་ཐོབ་པ་དོན་དང་ལྡན་པར་བྱས། །རྣལ་འབྱོར་ངས་ཀྱང་ཉམས་ལེན་དེ་ལྟར་བགྱིས། །ཐར་འདོད་ཁྱེད་ཀྱང་དེ་བཞིན་བསྐྱང་འཚལ་ལོ། །ཞེས་དང༌། ཡོན་ཏན་གཞིར་གྱུར་མ་ལས་ཀྱང༌། ཐུན་མོང་ལམ་སྦྱངས་སྣོད་དུ་གྱུར་པ་ན། །ཐེག་པ་ཀུན་གྱི་མཆོག་གྱུར་རྡོ་རྗེའི་ཐེག །སྐལ་བཟང་སྐྱེ་བོའི་འཇུག་ངོགས་དམ་པ་དེར། །བདེ་བླག་ཉིད་དུ་འཇུག་པར་བྱིན་གྱིས་རློབས། །ཞེས་གང་གསུངས་པ་ལྟར་དང༌། དེའི་སྲས་ཀྱི་ཐུ་བོ་རྒྱབ་ཚབ་ཐམས་ཅད་མཁྱེན་པས་ཀྱང༌། རྣམ་བཤད་སྙིང་པོའི་རྒྱན་དུ། ཕར་ཕྱིན་ཐེག་པའི་ལམ་གྱིས་བསྐལ་པ་གྲངས་མེད་པ་གསུམ་གྱི་བར་དུ་བགྲོད་ནས་དེའི་རྗེས་སུ་སྔགས་ཀྱི་ལམ་གྱི་སྣོན་པ་བཏབ་ནས་གཟུགས་སྐུ་འགྲུབ་པའི་ཚུལ་ནི་གཞན་དུ་ཤེས་པར་བྱའོ། །ཞེས་གསུངས་པ་དང༌། དེ་བཞིན་མཁས་གྲུབ་ཐམས་ཅད་མཁྱེན་པས། རྒྱུད་སྡེ་སྤྱི་རྣམ་དུ། ཕ་རོལ་ཏུ་ཕྱིན་པ་རྐྱང་པའི་ལམ་གྱིས་ས་བཅུ་པའི་བར་དུ་བགྲོད་ནུས་ཀྱང་མཐར་འཚང་རྒྱ་བར་སྔགས་བླ་མེད་ཀྱི་ལམ་དུ་ཞུགས་པ་ལ་ངེས་པར་ལྟོས་དགོས་ཀྱི། དེར་མ་ཞུགས་པར་འཚང་རྒྱ་བ་མི་སྲིད་དོ། །ཞེས་གསུངས་པའི་ཕྱིར། རང་ཅག་ལ་དེ་དག་ལས་ལྷག་པའི་གདམས་ངག་མཁན་པོ་གཞན་ནི་མེད། མ་ཟད་གསང་བདེ་འཇིགས་གསུམ་ཀུན་རིག་དང་བཅས་པའི་སྨོན་ལམ་རེ་རེའི་ནང་མདོ་སྔགས་ཟུང་འབྲེལ་ལ་བསླབ་པའི་ཐུགས་སྨོན་གནང་ཡོད་པ་དག་ལ་ཞིབ་ཏུ་གཞིགས་དང་ཤེས་ཐུབ་བོ། །གཞན་ཡང་རྗེ་བདག་ཉིད་ཆེན་པོ་དེ་ཉིད་ཀྱིས། རྫོགས་པའི་སངས་རྒྱས་ཀྱི་སར་བགྲོད་པ་ལ་རྒྱུ་ཕ་རོལ་ཏུ་ཕྱིན་པའི་ཐེག་པ་དང༌། འབྲས་བུ་རྡོ་རྗེའི་ཐེག་པ་གཉིས་ཡོད་པ་ལས་ཀྱང༌ཁྱད་པར་དུ་འཕགས་པ་ནི་གསང་སྔགས་ཉིད་ཡིན་པ་ཉི་ཟླ་ལྟ་བུར་ཀུན་ལ་གྲགས་པའི་ཚིག་དེ་བདེན་པར་འདོད་བཞིན་དུ། ཐོས་བསམ་སྒོམ་གསུམ་ཀྱིས་གསང་སྔགས་ཅི་འདྲ་ཡིན་པ་མི་འཚོལ་བར། ད་དུང་མཁས་པ་ཡིན་ཁུལ་བྱེད་པ་ནི་བླུན་པོའི་མཐར་ཐུག་ཏུ་གསུངས་ཡོད་པར་མ་ཟད། མཁས་པའི་ཁུར་འཛིན་པ་ཞིག་གིས་བསྐལ་པ་མང་པོར་འཕྲད་པར་དཀའ་བའི་མྱུར་ལམ་གོང་ན་མེད་པ་གསང་སྔགས་འདི་ཡལ་བར་འདོར་བ་ལ་ནི། ཀྱེ་མ་ཞེས་སྨད་དེ་ཆེས་ཤིན་ཏུ་མཚར་བའི་གནས་སུ་གསུངས་པ་དང༌། དེས་ན། རང་རེ་རྣམས་ཀྱིས་འདི་ལྟར་ཤེས་པའི་ཕྱིར་དུ་རྗེ་རང་ཉིད་ཀྱིས་ཀྱང་ཤིན་ཏུ་དཀོན་པའི་རྡོ་རྗེ་ཐེག་པ་འདི་ལ་ཚུལ་བཞིན་ཞུགས་ནས་འབད་པ་མང་པོས་རིང་དུ་སྦྱངས་པར་གསུངས་ཏེ། རྟོགས་བརྗོད་མདུན་ལེགས་མ་ལས། འདི་ན་རྫོགས་སངས་རྒྱས་སུ་བགྲོད་པ་ལ། །ཟབ་མོ་རྡོ་རྗེ་ཐེག་དང་ཕར་ཕྱིན་ཐེག །རྣམ་པ་གཉིས་ཡོད་གསང་སྔགས་ཕར་ཕྱིན་ལས། །ཤིན་ཏུ་ཁྱད་པར་འཕགས་པ་ཡིན་ནོ་ཞེས། །ཉི་མ་ཟླ་བ་ལྟ་བུར་ཀུན་ཏུ་གྲགས། །ཚིག་དེ་བདེན་པའི་ཚིག་ཏུ་འདོད་བཞིན་དུ། །ཟབ་མོའི་ཐེག་དེ་ཇི་ལྟ་བུ་ཞིག་ཅེས། །འཚོལ་བར་མི་བྱེད་མཁས་པའི་ཁུར་འཛིན་པ། །དེ་འདྲ་དེ་ཡང་ཤེས་རབ་ཅན་ཡིན་ན། །དེ་ལས་གཞན་པའི་དབང་པོ་རྟུལ་པོ་གང༌། །ཤིན་ཏུ་ཕྲད་དཀའ་གོང་ན་མེད་པའི་ལམ། །འདི་འདྲ་ཡལ་བར་འདོར་བ་ཀྱེ་མའོ་མཚར། །དེ་ཉིད་ཕྱིར་ན་རྒྱལ་བའི་ཐེག་པ་མཆོག །སངས་རྒྱས་ལས་ཀྱང་དཀོན་པའི་རྡོ་རྗེའི་ཐེག །དངོས་གྲུབ་གཉིས་ཀྱི་གཏེར་གྱུར་ཟབ་མོ་དེར། །ཞུགས་ནས་འབད་པ་མང་པོས་རིང་དུ་སྦྱངས། །ཚུལ་འདི་བསམས་ཤིང་མདུན་མ་ལེགས་ནས་གདའ། །བཀའ་དྲིན་ཆེ་འོ་རྗེ་བཙུན་མཁྱེན་པའི་གཏེར། །ཞེས་གསུངས་སོ། །དེས་ན། ལམ་ཐུན་མོང་བ་ལ་ཐོས་བསམ་སྒོམ་གསུམ་ཅུང་ཟད་རེ་ཡན་ཆད་ཀྱིས་བློ་སྦྱངས་ཤིང༌། གསང་སྔགས་ལ་དད་པའི་སྒོ་ནས་ཆོ་ག་ཚིག་རིས་ལྟར་ཤར་སྒོམ་རེ་བྱས་ཏེ་ཆོ་ག་དག་པོ་རེ་བཏོན་པ་དང༌། རྗེ་བླ་མའི་གསང་བདེ་འཇིགས་གསུམ་ཀུན་རིག་དང་བཅས་པའི་སྨོན་ལམ་འདི་རང་རེ་རྣམས་ཀྱི་རྒྱུད་ལ་འབྲེལ་བ་ཆེན་པོ་ཆགས་ཡོད་པ་དང༌། དེ་དག་རེ་རེའི་ནང་དུ་མདོ་སྔགས་ཀྱི་ལམ་ཡོངས་སུ་རྫོགས་པ་མ་ཚང་བ་མེད་པར་འདུས་པས། རང་གི་བློ་ནུས་དང་བསྟུན་ཏེ་དེ་དག་གི་ནང་དུ་གསུངས་པའི་ཐུན་མོང་དང་ཐུན་མོང་མ་ཡིན་པའི་ལམ་རིམ་ཆ་ཚང་ངམ་རེ་རེ་ཙམ་ཤེས་པར་བྱས་པའམ། ཐུན་རེ་ལའང་གཤར་སྦྱང་ཚུན་ཆད་ཀྱིས་ཉམས་སུ་བླངས་པ་སོགས། མདོར་ན། ལམ་མཆོག་མྱུར་ལམ་འདི་ལ་བག་ཆགས་བཟང་པོ་རེ་ཡན་ཆད་ཨེ་ཐེབས་བལྟས་ན་ཕྱི་མར་དོན་ཆེན་པོ་དང་ལྡན་པ་ལས་གཞན་དུ་དོན་མེད་དུ་འགྱུར་བ་ག་ལ་ཡིན། འོན་ཀྱང་དེང་སང་སྙིགས་དུས་སུ་སོང་གཤིས། ཕྲན་བདག་འདྲ་འགའ་རེས་གསང་སྔགས་ཉམས་ལེན་ཆ་ཚང་ཞིག་དང༌། ཚད་ལྡན་ཞིག་བྱེད་མི་ཐུབ་པ་ལ་བསམས་ཏེ། བག་ཆགས་དང༌དད་པ་གཞག་ཡུལ་ཙམ་དུའང་མི་བྱེད་པར། དོར་བྱ་དང་དགོས་མེད་ལྟ་བུར་བཟུང་ཡང༌། དེ་ལྟར་ན་སྙིགས་དུས་འདིར་ཐ་མལ་བ་དེ་འདྲ་ལ་དགེ་ཚུལ་སློང་གི་སྡོམ་པ་ཡང་ཉམས་ལེན་ཆ་ཚང་བ་ཞིག་དང་ཚད་ལྡན་བྱེད་པ་ཤིན་ཏུ་དཀའ་བས། དེ་དག་ཀྱང་དགོས་མེད་དང་དོར་བྱར་བཟུང་ན་ཅི་ཞིག་ཏུ་འགྱུར། བསྟན་པ་རྨང་ནས་བཤིག་པར་མི་འགྱུར་རམ། དེར་མ་ཟད་དེ་འདྲ་ལ་རྒྱལ་བའི་བཀའ་དང་རྗེ་ཐམས་ཅད་མཁྱེན་པ་ཡབ་སྲས་ཀྱི་གསུང་འབུམ་རྣམས་ཀྱང་མང་ཆེ་བ་དགོས་མེད་དང་དོར་བྱར་འགྱུར་བས་ཆོས་སྤོང་གི་ལས་ངན་ཆེས་ཤིན་ཏུ་ལྕི་བ་དང་ལྡན་པར་ཤེས་པར་གྱིས་ཤིག གོང་ལྟར་བཟུང་བ་དེ་ནི་ཆེས་མི་འོས་ཏེ། པཎ་ཆེན་བློ་བཟང་ཆོས་རྒྱན་གྱིས། དེ་ནས་རྡོ་རྗེ་འཛིན་པའི་དེད་དཔོན་གྱི། །དྲིན་ལས་རྒྱུད་སྡེ་རྒྱ་མཚོའི་འཇིངས་བརྒལ་ཏེ། །དངོས་གྲུབ་རྩ་བ་དམ་ཚིག་སྡོམ་པ་རྣམས། །སྲོག་ལས་གཅེས་པར་འཛིན་པར་བྱིན་གྱིས་རློབས། །ཞེས་གང་གསུངས་པ་དང༌། རྗེ་བཙུན་གྲགས་པ་རྒྱལ་མཚན་གྱིས། ལེགས་པར་སྨིན་ལས་དམ་ཚིག་བསྲུངས་བྱས་ན། །རིམ་གཉིས་ཟབ་མོའི་མན་ངག་མ་བསྟེན་ཀྱང༌། །སྐྱེ་བ་བཅུ་དྲུག་དག་ན་འགྲུབ་བོ་ཞེས། །འགྲོ་བའི་རྩ་ལག་ཕན་པ་མཛད་པས་གསུངས། །ཞེས་དང༌། ཞབས་དྲུང་གཉིས་པས། དེ་ཡང་ཕར་ཕྱིན་ཐེག་པ་ཡི། །གྲངས་མེད་གསུམ་གྱི་ཚོགས་བསགས་དང༌། །སྒྲིབ་སྦྱངས་བྱས་མཐར་སྔགས་ལམ་ལ། །ཞུགས་ནས་སངས་རྒྱས་ཐོབ་པར་གསུངས། །ཞེས་གསུངས་པ་དང༌། ཞབས་དྲུང་དྲུག་པས། ཕ་རོལ་ཕྱིན་པའི་རྒྱ་ཆེན་གསེར་གཞི་ལ། །ངོ་མཚར་རྡོ་རྗེ་ཐེག་པའི་ཐབས་མཁས་ཀྱིས། གོམ་པ་གཅིག་གིས་ཡོངས་སུ་བགྲོད་བྱས་ན། །ཚེ་ཐུང་གཅིག་ལ་ཟུང་འཇུག་གནས་དེར་སླེབས། །ཞེས་གསུངས་པ་དང༌། ལྕང་སྐྱ་རོལ་པའི་རྡོ་རྗེས། བགྲང་ཡས་བསྐལ་པར་གང་གི་མཚན་ཙམ་ཡང༌། །ཐོས་པར་དཀའ་བའི་རྡོ་རྗེའི་ཐེག་པ་ལ། །ཐོས་བསམ་སྒོམ་པའི་སྦྱོར་བ་ཅི་ནུས་ཀྱིས། །བག་ཆགས་འཐུག་པོ་འཇོག་པ་གནད་དུ་ཆེ། །ཞེས་གསུངས་པ་དང༌། ཨ་ལག་ཤ་ངག་དབང་བསྟན་དར་གྱིས། སྒོས་སུ་ངག་ལ་བག་ཆགས་མ་ཐེབས་ན། །སངས་རྒྱས་ལས་ཀྱང་དཀོན་པའི་རྡོ་རྗེའི་ཐེག །ཅེས་སོགས་བསྔགས་པ་བརྗོད་པའི་དགོས་པ་ཡང༌། །སྟོར་ཉེན་ཆེ་འོ་སྙིང་གི་གྲོགས་པོ་དག །ཅེས་གསུངས་པ་དང༌། རྡོ་སྦིས་དགེ་བཤེས་ཤེས་རབ་རྒྱ་མཚོས། ཐུབ་བསྟན་ཡང་སྙིང་གསང་ཆེན་ལམ་བཟང་རང་ཡིན་ཡང༌། །ཇི་བཞིན་ཉམས་སུ་ལེན་པའི་ཁ་ཐབས་རང་མི་འདུག །འོན་ཀྱང་དད་པས་ཆོ་ག་དག་པོ་རེ་བཏོན་ཏེ། །སྨོན་ལམ་དག་པས་མཚམས་སྦྱོར་ནན་ཏན་ཞིག་བྱེད་ཡ། །ཞེས་དང༌། རྗེ་བདག་ཉིད་ཆེན་པོ་ཡབ་སྲས་ཀྱི་བདེ་གསང་འཇིགས་གསུམ་གྱི་སྨོན་ལམ་རེ་རེའི་ནང་ཐུན་མོང་དང་ཐུན་མོང་མ་ཡིན་པའི་ལམ་རིམ་ཆ་ཚང་བ་ཤེས་པར་བྱས་ནས་རང་རང་གི་བློ་ནུས་དང་བསྟུན་པའི་བག་ཆགས་ཅི་ཐེབས་བྱ། དེ་དག་གི་ནང་དུ་མདོ་སྔགས་ཀྱི་ལམ་ཡོངས་སུ་རྫོགས་པ་མ་ཚང་བ་མེད་པར་འདུས་པས། ཐུན་རེ་ལའང་གཤར་སྦྱང་ཚུན་ཆད་ཀྱིས་དེ་ལྟར་ཉམས་སུ་བླངས་ན། རྗེ་བླ་མས། དེ་ལྟར་རྒྱུ་དང་འབྲས་བུའི་ཐེག་ཆེན་གྱི། །ཞེས་སོགས་གསུངས་པ་དང་མཐུན་པར་དལ་འབྱོར་དོན་ལྡན་དུ་འགྱུར་ཞེས་གསུངས་སོ། །གཞན་ཡང༌། ཡི་དམ་གྱི་ལྷ་དང་སྔགས་ཕྱོགས་ཀྱི་གདམས་ངག་ལ་ལོག་ལྟ་མི་བྱེད་པར་ཡིད་ཆེས་དང༌། སྙིགས་དུས་ཀྱི་ཚེ་ཐུང་གཅིག་ལ་སངས་རྒྱས་ཀྱི་གོ་འཕང་སྟེར་ནུས་པའི་མྱུར་ལམ་འདི་དང་འཕྲད་པ་ད་རེས་སྐལ་བ་བཟང་སྙམ་དུ་ཞེ་འདོད་ཤུགས་དྲག་པོས་ཆོས་ཐོག་སོ་སོར་ཕེབས་པ། ཆོ་ག་དག་པོ་རེ་འདོན་པ། གཟུངས་སྔགས་བགྲང་བ། ཐིག་རྡུལ་ཚོན་གདབ་པ་ཡན་ཆད་ལ་ཕྱག་ལེན་རེ་ཐེབས་པར་མཛད་པ་དང༌། སྨོན་ལམ་བཟང་པོས་མཚམས་སྦྱོར་རྣམ་པར་དག་པ་དེ་ཙམ་རེ་བྱས་ནའང་ཤིན་ཏུ་སྐལ་བ་བཟང་བ་དང༌། གཅེས་པའི་ཉམས་ལེན་དང༌། ཚོགས་བསོག་སྒྲིབ་སྦྱོང་གི་གནད་ཚང་བར་མཁས་པ་མང་པོས་གསུངས་པས། སྡོམ་པ་གསུམ་དང་རིམ་པ་གཉིས་གདན་ཐོག་གཅིག་ལ་ཉམས་ལེན་བྱེད་ཆོག་པ་རྡོ་རྗེ་འཆང་ནས་རིམ་པར་བརྒྱུད་པ་ཇོ་བོ་རྗེ་ཡབ་སྲས་དང༌། རྒྱལ་བ་གཉིས་པ་ཡབ་སྲས་ཀྱི་ལུགས་བཟང་ཆུ་རྒྱུན་རིང་མོ་ཞིག་རིམ་གྱིས་རང་རེ་རྣམས་ཀྱི་འཐུང་སྐལ་བབས་ཡོད་པ་འདི་རང་ནུས་ཀྱི་སྙིམ་པས་བཅུས་ཏེ་བཏུང་ན་དགོས་དོན་ཆེན་པོ་དང་ལྡན་པ་ཡིན་ཏེ། ཐུའུ་བཀྭན་ཆོས་ཀྱི་ཉི་མའི་བསླབ་བྱ་མུ་ཏིག་ཕྲེང་བ་ལས། རྫོགས་སངས་རྒྱས་ཞེས་བྱ་བའི་སྒྲ་བོ་ཆེ། །བགྲངས་རིང་བསྐལ་པར་ལྟོས་མིན་སྙིགས་དུས་ཀྱི། །ཚེ་ཐུང་གཅིག་ལ་མངོན་དུ་བྱེད་པའི་ཐབས། །གསང་སྔགས་མྱུར་ལམ་འདིར་འཕྲད་སྐལ་བ་བཟང༌། །ཞེས་དང༌། ཡང་དེ་ཉིད་ཀྱིས། ལྷ་ཡི་བྱིན་རླབས་དངོས་གྲུབ་ནི། །ཡིད་ཆེས་དད་པར་རག་ལས་པས། །བླ་མ་ལྷ་དང་གདམས་ངག་ལ། །ལོག་ལྟ་ཐེ་ཚོམ་སྤོང་བ་གཅེས། །དཀྱིལ་འཁོར་མཐོང་བ་ཙམ་གྱིས་ཀྱང༌།། བསྐལ་མང་སྡིག་སྒྲིབ་འདག་གསུངས་ན། །རིམ་གཉིས་བསྒོམས་ན་ལྟ་ཅི་སྨོས། །དེ་ཕྱིར་བརྩོན་པས་འབད་པ་གཅེས། །ཇི་སྐད་གདམས་པའི་ཚུལ་འདི་བཞིན། །མདོ་སྔགས་ལམ་གྱི་ཉམས་ལེན་ལ། །མི་ཚེ་ཧྲིལ་གྱིས་འབད་ནུས་ན། །དེ་ལས་སྐལ་བ་བཟང་བ་སུ། ཞེས་གསུངས་པ་དང༌། ཡང་དེ་ཉིད་ཀྱིས། རང་གི་ཉམས་ལེན་གྱི་གཙོ་བོ་ཆོས་ཆུང་རྣམ་གྲངས་མང་པོ་བསགས་པ་ལས། རྒྱུད་སྡེ་ཚད་ལྡན་ལས་བཤད་པའི་ཡི་དམ་ལྷ་ཁྱད་པར་ཅན་གང་མོས་ཤིག་གི་རྣལ་འབྱོར་ལ་གཙོ་བོར་དྲིལ་ན་བོགས་ཆེ་ཞིང༌། དེ་ཡང་གསང་བདེ་འཇིགས་གསུམ་ཡ་མ་བྲལ་བར་ཉམས་སུ་ལེན་ཐུབ་ན་གནད་ཤིན་ཏུ་ཆེ་མོད། གལ་སྲིད་གསུམ་ག་མ་ཐུབ་ན་དུས་ཀྱི་མཐར་བྱིན་རླབས་དང་དངོས་གྲུབ་ཤིན་ཏུ་མྱུར་བར་བསྔགས་པའི་དཔལ་འཁོར་ལོ་སྡོམ་པ་ཡབ་ཡུམ་གྱི་ལམ་ལ་སྒྲུབ་པ་སྙིང་པོར་བྱེད་རྒྱུ་ཞིག་བྱུང་ན་སྐལ་བ་ཤིན་ཏུ་བཟང་བས་དེ་བཞིན་མཛོད། ཅེས་གསུངས་སོ། །ཀུན་མཁྱེན་འཇམ་དབྱངས་བཞད་པས། ངེས་པར་སྙིགས་དུས་ཚེ་གཅིག་རྫོགས་སངས་རྒྱས། །སྟེར་བྱེད་རིམ་གཉིས་གོ་རིམ་གྲངས་ངེས་ལ། །ཆོག་སྤྱིར་མ་འཇོག་ཡིད་ངོར་འཕྲོད་ངེས་ལ། །བསྒོམ་པའི་རྣལ་འབྱོར་ཨ་ཧོ་སྐལ་བ་བཟང༌། །ཞེས་དང༌། ཡང༌། མདོ་དང་རྒྱུད་སྡེ་རང་རང་གཞུང་བཞིན་དུ། །ཚ་གྲང་ལྟར་མིན་ཟུང་འབྲེལ་སྤྱོད་པ་གཅེས། །དེ་ལྟར་སྡོམ་པ་གསུམ་དང་རིམ་པ་གཉིས། །གདན་གཅིག་སྟེང་ནས་ཉམས་སུ་ལེན་པའི་ཚུལ། །རྡོ་རྗེ་འཆང་ནས་ཇོ་བོ་ཡབ་སྲས་དང༌། །རྒྱལ་བ་གཉིས་པའི་ལུགས་ལ་དད་པ་དང༌། །ཐུབ་བསྟན་ཡོངས་སུ་རྫོགས་པ་འཛིན་འདོད་ཅིང༌། །བློ་གྲོས་ཆེན་པོ་ཅན་རྣམས་དཔྱོད་པར་འཚལ། །ཞེས་གསུངས་སོ། །སྙིགས་དུས་སུ་ཆོས་མགོ་མི་ཐོན་པས་ལྷག་པའི་ལྷ་དང་ཆོས་སྐྱོང་ལ་གསོལ་འདེབས་ཕྱག་མཆོད་འཕྲིན་བཅོལ་སོགས་ཞིང་གི་མཐུ་ལ་བརྟེན་པ་མ་གཏོགས་རང་ཚུགས་མི་ཐུབ་པ་དང༌། ཐུན་མོང་ལམ་ལ་བག་ཆགས་རེ་ཡན་ཆད་སྔོན་དུ་སོང་ནས་གཞུང་དོན་ལྟ་བའི་ཤེས་རབ་དང་ལྡན་ཏེ་སྔགས་ལ་སློབ་དགོས་པར་གསུངས་ཏེ། གུང་ཐང་བསྟན་པའི་སྒྲོན་མེས། སྙིགས་དུས་བློ་དང་བསོད་ནམས་དམན་པའི་ཕྱིར། །ལྷག་པའི་ལྷ་དང་ཡི་དམ་ཆོས་སྐྱོང་ལ། །རྩེ་གཅིག་གསོལ་འདེབས་ཕྱག་མཆོད་མཎྜལ་སོགས། །ཚོགས་བསགས་སྒྲིབ་སྦྱོང་འབད་པ་དྲག་པོ་ཡིས། །ཞིང་གི་མཐུ་ལ་རྒྱབ་བརྟེན་གྱིས་ཤིག་ཨང༌། །ཐུན་མོང་ལམ་སྦྱངས་སྔོན་དུ་མ་སོང་ཞིང༌། །གཞུང་དོན་ལྟ་བའི་བློ་མིག་མ་ཕྱེ་བར། །ཆོ་གའི་ངག་འདོན་བྱང་བ་ཙམ་ཞིག་གིས། །གསང་སྔགས་འཆང་བའི་གྲལ་དུ་མི་ཚུད་པས། །བསྟན་ལ་རིམ་པ་བཞིན་དུ་སློབས་ཤིག་ཨང༌། །ཞེས་གསུངས་པ་དང༌། གསང་སྔགས་ཞེས་པ་རིམ་གྲོ་སྒྲུབ་པའི་ཆ་རྐྱེན་ཙམ་ལས་བྱང་གྲོལ་བགྲོད་པ་ལ་མཁོ་བར་མི་འཛིན་པ་ནི། ཆོས་ཀྱིས་ངན་སོང་བསྒྲུབས་པ་ཡིན་ཏེ། སྔོན་དབུལ་པོ་ཞིག་གིས་གཞན་གྱི་སོལ་བ་འཚོང་བ་ལ་བལྟས་ནས་ཙནྡན་སྦྲུལ་གྱི་སྙིང་པོ་ཞིག་ཡོད་པ་སོལ་བར་བཟོས་ཏེ་བཙོངས་པ་ལྟར། གསང་སྔགས་དེ་ཡང་འཕྲལ་གྱི་རྐྱེན་སེལ་ལམ། །ཚེ་དང་ནོར་སྒྲུབ་དབང་སྡུད་མངོན་སྤྱོད་སོགས། །ཚེ་འདིའི་ལག་ཆ་ཁོ་ནར་འཁྱེར་བ་ནི། །ས་མཆོག་ཙནྡན་སོལ་བར་བྱས་འདྲ་བས། །ཆོས་ཀྱིས་ངན་སོང་བསྒྲུབས་པ་མ་བྱེད་ཨང༌། །ཞེས་གསུངས་པའི་ཕྱིར། དུས་རབས་ཉེར་གཅིག་པ་འདིར་སེར་སྐྱ་མང་ཚོགས་ཤེས་ཡོན་ཡར་རྒྱས་ཀྱི་རྣམ་པར་ཕྱིན་པ་དེར་ཕྱོགས་གཅིག་ནས་ལེགས་ཆ་ཞིག་མཆིས་ཀྱང་གཅིག་ནས་སྐྱོན་ཆ་ཞིག་ཀྱང་མཆིས། གང་ཡིན་ཞེ་ན། མདོ་སྔགས་ཀྱི་ལམ་གྱི་གནད་ཐམས་ཅད་ལ་གོ་བ་རགས་པས་དམ་བཅའ་ཙམ་མ་གཏོགས་ངེས་པ་གཏིང་ཚུགས་པ་ཞིག་མེད་པ་རང་རེ་འདྲ་བ་དག་གིས་སྔོན་ལ་མ་གྲགས་པའི་ཁུངས་མེད་ཀྱི་འཆལ་གཏམ་འདྲ་ཆགས་པ་མང་པོ་ཞིག་སྒྲོགས་བཞིན་ཡོད། དེ་ནི་ཤེས་རབ་ཅན་དག་གི་རྣ་བར་མི་སྙན་ཡང༌། བསོད་ནམས་ཆུང་ཆུང་ཤེས་རབ་འཆལ་བ་བདག་ལྟ་བུ་དག་གི་རྣ་བར་ཤིན་ཏུ་འགྲོ་བས་རང་རེ་ལེགས་སུ་འདོད་པ་རྣམས་ཀྱིས་རི་བོང་ཅལ་གྱི་རྗེས་སུ་འགྲོ་བ་ལྟ་བུས་དེ་དག་གི་རྗེས་སུ་འགྲོ་མི་རིགས་སོ། །དེ་དག་ལ་ཉན་འཇོག་བྱེད་མི་རིགས་ཏེ། རྗེ་བཙུན་འཇམ་པའི་དབྱངས་ཀྱིས་ཉིན་རེ་བཞིན་དུ་ལེགས་བཤད་བདུད་རྩིའི་རྒྱུན་དུས་གསུམ་རྒྱལ་བའི་ཐུགས་ཀྱི་བཅུད་བསྡུས་པ་ཟམ་མི་ཆད་དུ་གདམས་པས་རྒྱལ་བའི་དགོངས་པ་མཐའ་དག་མངོན་དུ་གྱུར་པ་བློ་བཟང་གྲགས་པའི་ཞལ་ནས་ཀྱང་མ་ཐོན་པའི་གསར་བཤད་དེ་ནི། དཔེར་ན། ཕྲ་མེན་མའམ་མིར་བརྫུས་པའི་འདྲེ་མོ་ཞིག་གིས་སོ་ནམ་བྱེད་ཁུལ་ལྟ་བུ་རང་རྒྱུད་ལ་དགེ་བའི་ལོ་ཏོག་སྐྲུན་པ་ལ་ཕན་པ་ལས་ཀྱང་གནོད་པ་ཚབས་ཆེ་བས་དེ་འདྲ་ལ་ཉན་འཇོག་གཏན་ནས་མི་བྱེད་པར། རྗེ་རིན་པོ་ཆེའི་མདོ་སྔགས་ཀྱི་ལེགས་བཤད་རྣམས་ལ་རིག་པ་ཤིན་ཏུ་བསྒྲིམས་ཏེ་ཉན་འཇོག་དགོས་པ་གནད་དུ་ཆེ་བ་ཡིན་ཏེ། གུང་ཐང་བསྟན་པའི་སྒྲོན་མེས། དམ་བཅའ་ཙམ་གྱིས་མཁས་རློམ་སྐྱེ་བོ་ཡིས། །སྔོན་མེད་ལེགས་བཤད་སྐད་ཀྱི་འཆལ་གཏམ་ཡང༌། །བསོད་ཆུང་ཤེས་འཆལ་རྣམས་ཀྱི་རྣར་འགྲོ་བས། །རི་བོང་ཅལ་གྱི་རྗེས་སུ་མ་རྒྱུགས་ཨང༌། །འཇམ་པའི་དབྱངས་ཀྱིས་ཉིན་བཞིན་གདམས་པ་ཡིས། །རྒྱལ་བའི་དགོངས་པ་མཐའ་དག་མངོན་གྱུར་པའི། །བློ་བཟང་རྒྱལ་བ་ཡིས་ཀྱང་མ་ཐོན་པའི། །གསར་བཤད་ཕྲ་མེན་མ་ཡིས་སོ་ནམ་དེས། །ཕན་ལས་གནོད་པ་ཆེ་བས་སྒྲིམས་ཤིག་ཨང༌། །ཞེས་དང་། ༸གོང་ས་མཆོག་གིས་ཀྱང༌། སྤྱི་ལོ་ ༢༠༠༧ ལོའི་བཀའ་སློབ་ཅིག་ཏུ། གསང་སྔགས་ཀྱི་བསྟན་པར་ཉམས་ལེན་ཆ་ཚང་བ་ཞིག་ཡོད་ན་ཡག་པོ་རེད། འོན་ཀྱང་སྔོན་འགྲོ་ཆ་ཚང་བ་མེད་པར་གསང་སྔགས་ཀྱི་ལམ་དུ་ཞུགས་པ་ནི། སྤྱི་ཡོངས་ཆ་ནས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་ཐད་འཐུས་ཤོར་ཆེན་པོ་ཡིན། ཞེས་གསུངས། དེས་ནི་གསང་སྔགས་སྤུས་དག་ཏུ་འགྲོ་བའི་ཐབས་ཇུས་ལ་འབད་དགོས་པར་གསུངས་པ་མ་གཏོགས་གསང་སྔགས་མེད་པར་བཟོ་དགོས་པར་གསུངས་པ་ག་ལ་ཡིན། ཁོང་ནས་སྔགས་ཕྱོགས་ཀྱི་བཀའ་ལུང་དབང་གསུམ་གནང་མུས་སུ་བཞུགས་པས་དེ་འདྲར་གསུང་པ་མི་སྲིད་དོ་སྙམ།། །།