མངོན་སུམ་གྱི་ངོ་བོ་ལ་ལོག་རྟོག་སེལ་ཚུལ།

ལོག་རྟོག་སེལ་བྱེད་ཀྱི་གཞུང་ངོས་བཟུང་བ།

༈ མངོན་སུམ་རྟོག་དང་བྲལ་བར་ནི། །ཞེས་སོགས་རྐང་པ་གཉིས་པོ་འདི་གང་ལས་འཕྲོས་ན། གཞལ་བྱ་གཉིས་ཕྱིར་ཚད་མ་གཉིས། །ཞེས་པ་ནས། དྲན་མིན་མ་ཡིན་འཁྲུལ་ཕྱིར་རོ། །ཞེས་པའི་བར་གྱིས་ཚད་མའི་གྲངས་དང་སྤྱོད་ཡུལ་ལ་ལོག་རྟོག་བསལ་བའི་སྒོ་ནས་ཚད་མའི་གྲངས་ངེས་དང་། གཞལ་བྱའི་གྲངས་ངེས་བསྟན་ནས། མངོན་སུམ་རང་གི་ངོ་བོ་ལ་ལོག་རྟོག་བསལ་བའི་སྒོ་ནས། མངོན་སུམ་རང་གི་ངོ་བོ་འཆད་པར་བྱེད་པ་ལ། མངོན་སུམ་རྟོག་དང་བྲལ་བར་ནི། །ཞེས་སོགས་བྱུང་བ་ཡིན་ཏེ། དེ་སྐད་དུ་ཡང་ལྷའི་འགྲེལ་པ་ལས། ལོག་པར་རྟོག་པ་བཞིའི་ནང་ནས་གྲངས་ལ་ལོག་པར་རྟོག་པ་བསལ་ནས། རང་གི་ངོ་བོ་ལ་ལོག་པར་རྟོག་པ་བསལ་བར་བྱེད་པ་ལ། མངོན་སུམ་རྟོག་དང་བྲལ་བར་ནི། །ཞེས་བྱ་བ་ལ་སོགས་པ་སྨོས་སོ། །ཞེས་གསུངས་པའི་ཕྱིར། འོ་ན། མངོན་སུམ་རང་གི་ངོ་བོ་ལ་ལོག་རྟོག་སེལ་ན། ལོག་རྟོག་དེ་གང་། དེ་སེལ་བྱེད་ཀྱི་གཞུང་ཇི་ལྟ་བུ་ཞེ་ན། སྤྱིར་མངོན་སུམ་ལ་ལོག་པར་རྟོག་པའི་ལོག་རྟོག་དེ་ལ། སྒྲས་བརྗོད་རིགས་ཀྱི་སྒོ་ནས་དབྱེ་ན། ལོག་རྟོག་དངོས་དང་། ལོག་རྟོག་གི་རིགས་གནས་གཉིས། དང་པོ་ནི། མངོན་སུམ་ཡང་ཡིན། མངོན་སུམ་མ་ཡིན་པ་ཡང་ཡིན་པའི་གཞི་མཐུན་འཛིན་པའི་རྟོག་པ་དེ། མངོན་སུམ་ལ་ལོག་པར་རྟོག་པའི་ལོག་རྟོག་དངོས་ཡིན་ལ། མངོན་སུམ་ལ་ལོག་པར་རྟོག་པའི་ལོག་རྟོག་གི་རིགས་གནས་དེ་ལ་དབྱེ་ན། དབང་མངོན་རྟོག་པར་འདོད་པའི་ལོག་རྟོག །ཡིད་མངོན་མེད་པར་འདོད་པའི་ལོག་རྟོག །རང་རིག་མེད་པར་འདོད་པའི་ལོག་རྟོག །རྣལ་འབྱོར་མངོན་སུམ་མེད་པར་འདོད་པའི་ལོག་རྟོག་དང་བཞིར་ཡོད་དོ། །འོ་ན། ལོག་རྟོག་དེ་རྣམས་གང་ཟག་གང་དང་གང་གི་རྒྱུད་ལ་ཡོད་ཅེ་ན། དེ་ཡང་བྱེ་བྲག་པ། རིགས་པ་ཅན་པ། རིག་བྱེད་པ། སྤྱོད་པ་པ། གྲངས་ཅན་པ་རྣམས་ཀྱི་རྒྱུད་ལ་དབང་མངོན་རྟོག་པར་འདོད་པའི་ལོག་རྟོག་ཡོད་དེ། དེ་རྣམས་ཀྱིས་གཟུགས་འཛིན་དབང་མངོན། གཟུགས་སྤྱི་རྟག་དངོས་གཟུང་དོན་དུ་བྱས་པའི་རྟོག་པར་འདོད་པའི་ཕྱིར། ཕྱི་རོལ་པ་ཐམས་ཅད་ཀྱི་རྒྱུད་ལ་ཡིད་མངོན་མེད་པར་འདོད་པའི་ལོག་རྟོག་ཡོད་དེ། དེ་ཐམས་ཅད་ཀྱིས་ཡིད་མངོན་མེད་པར་འདོད་པའི་ཕྱིར། ཕྱི་རོལ་པ་ཐམས་ཅད་དང་། བྱེ་བྲག་སྨྲ་བ་དང་། ཐལ་འགྱུར་བ་རྣམས་ཀྱི་རྒྱུད་ལ་རང་རིག་མེད་པར་འདོད་པའི་ལོག་རྟོག་ཡོད་དེ། དེ་རྣམས་ཀྱིས་རང་རིག་མེད་པར་འདོད་པའི་ཕྱིར། རྒྱང་འཕེན་གྱི་རྒྱུད་ལ་རྣལ་འབྱོར་མངོན་སུམ་མེད་པར་འདོད་པའི་ལོག་རྟོག་ཡོད་དེ། དེས་རྣལ་འབྱོར་མངོན་སུམ་མེད་པར་འདོད་པའི་ཕྱིར། འོ་ན། ལོག་རྟོག་དེ་རྣམས་སེལ་བྱེད་ཀྱི་གཞུང་གང་ཞེ་ན། དེ་ཡང་གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་དམ་བཅའ་ཙམ་ཞིག་འཆད་པར་བྱེད་པ་ལ། ཚད་མ་མདོ་ལས། མིང་དང་རིགས་སོགས་སྦྱོར་བ་ཡི། །རྟོག་པ་དང་བྲལ་མངོན་སུམ་མོ། །ཞེས་པ་འདི་བྱུང་། འདིའི་དོན་བཤད་པའི་སྒོ་ནས། གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རིགས་པ་རྒྱས་པར་འཆད་པ་ལ། མངོན་སུམ་རྟོག་དང་བྲལ་བར་ནི། །ཞེས་པ་ནས། བརྟེན་ནས་མིག་བློ་སྐྱེ་བར་འགྱུར། །ཞེས་པའི་བར་བྱུང་། དབང་ཤེས་ཀྱི་ཐ་སྙད་འཆད་པར་བྱེད་པ་ལ། ཚད་མ་མདོ་ལས། ཐུན་མོང་མ་ཡིན་རྒྱུ་ཡི་ཕྱིར། །དེ་ཡི་ཐ་སྙད་དབང་པོས་བྱས། །ཞེས་པ་འདི་བྱུང་། འདིའི་དོན་བཤད་པའི་སྒོ་ནས་ཐ་སྙད་ལ་མི་འཐད་པའི་རྩོད་པ་སྤོང་བར་བྱེད་པ་ལ། གལ་ཏེ་མངོན་སུམ་ཤེས་བསྐྱེད་ལ། །ཞེས་པ་ནས། ལོག་པའི་ཕྱིར་ནི་ལྡོག་པར་འགྱུར། །ཞེས་པའི་བར་བྱུང་། གཟུགས་འཛིན་དབང་ཤེས་རྟོག་བྲལ་ཡིན་པའི་ལུང་གི་ཤེས་བྱེད་འགོད་པར་བྱེད་པ་ལ། ཚད་མ་མདོ་ལས། དེ་དོན་དུ་མས་བསྐྱེད་པའི་ཕྱིར། །རང་དོན་སྤྱི་ཡི་སྤྱོད་ཡུལ་ཅན། །ཞེས་པ་འདི་བྱུང་། འདིའི་དོན་བཤད་པའི་སྒོ་ནས། གཟུགས་འཛིན་དབང་ཤེས་རྟོག་བྲལ་ཡིན་པ་ལ་འགལ་སྤོང་འཆད་པར་བྱེད་པ་ལ། བསགས་པ་དག་ནི་ཚོགས་པ་ཡིན། །ཞེས་པ་ནས། བཀོད་པ་འཛིན་པ་མི་རུང་ཕྱིར། །ཞེས་པའི་བར་བྱུང་། གཟུགས་འཛིན་དབང་ཤེས་རྟོག་བྲལ་ཡིན་པ་ལ་རིགས་པའི་ཤེས་བྱེད་འགོད་པར་བྱེད་པ་ལ། ཚད་མ་མདོ་ལས། དུ་མའི་ངོ་བོ་མཚན་གཞི་ནི། །དབང་པོ་ལ་རྟོག་སྲིད་པ་ཡིན། །ཞེས་པ་འདི་བྱུང་། དེའི་དོན་བཤད་པའི་སྒོ་ནས་གཟུགས་འཛིན་དབང་ཤེས་རྟོག་བྲལ་དུ་སྒྲུབ་པར་བྱེད་པ་ལ། ཆོས་ཅན་ཐམས་ཅད་ལས་ལྡོག་པ། །ཞེས་པ་ནས། བྱེད་པ་ཡིན་ཞེས་བརྗོད་ཟིན་ཏོ། །ཞེས་པའི་བར་བྱུང་། འོ་ན། དབང་མངོན་ལ་ལོག་རྟོག་སེལ་བའི་སྐབས་འདིར། ཇི་ལྟ་ཇི་ལྟར་དོན་བསམ་པ། །ཞེས་ཕྱི་དོན་མེད་པར་སྟོན་པའི་གཞུང་གསུངས་པའི་རྒྱུ་མཚན་གང་ཞེ་ན། དེ་ལྟར་གསུངས་པའི་རྒྱུ་མཚན་ཡོད་དེ། དབང་མངོན་ལ་ལོག་པར་རྟོག་པའི་ལོག་རྟོག་གི་རིགས་དེ་ལ། མདོ་སེམས་ཐུན་མོང་བའི་དབང་དུ་བྱས་པ་དང་། སེམས་ཙམ་པའི་ཐུན་མོང་མ་ཡིན་པའི་དབང་དུ་བྱས་པ་གཉིས། དང་པོ་ནི། དབང་མངོན་རྟོག་པར་འདོད་པའི་ལོག་རྟོག་ལྟ་བུ་ཡིན། གཉིས་པ་ནི། སེམས་ཙམ་པས་གཟུགས་ཕྱི་རོལ་དོན་དུ་མི་འདོད་ཅིང་། གཟུགས་འཛིན་དབང་ཤེས་ལ་གཟུགས་ཕྱི་རོལ་དོན་དུ་སྣང་བ་དེ་སྣང་བ་ལྟར་དུ་གྲུབ་པར་འཛིན་པའི་རྟོག་པ་དེ། གཟུགས་འཛིན་དབང་ཤེས་ལ་ལོག་པར་རྟོག་པའི་ལོག་རྟོག་གི་རིགས་ཡིན་པའི་དབང་དུ་བྱས་ནས། དེ་འདྲའི་གཞུང་གསུངས་པའི་ཕྱིར།

དབང་ཤེས་རྟོག་བྲལ་དུ་སྒྲུབ་པའི་རིགས་པ་རྒྱས་པར་འཆད་ཚུལ།

༈ གཟུགས་འཛིན་དབང་ཤེས་རྟོག་བྲལ་དུ་སྒྲུབ་བྱེད་ཀྱི་རིགས་པ་རྒྱས་པར་འཆད་པ་ལ། གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རིགས་པ་སྤྱིར་བཤད་པ་དང་། བྱེ་བྲག་ཏུ་གཟུགས་འཛིན་དབང་ཤེས་དོན་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་བཤད་པ་དང་། མིང་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་བཤད་པ་དང་། དེ་རྟོག་པ་ཡིན་པ་ལ་གནོད་བྱེད་བསྟན་པ་དང་བཞི། དང་པོ་འཆད་པར་བྱེད་པ་ལ། མངོན་སུམ་རྟོག་དང་བྲལ་བར་ནི། །ཞེས་པ་ནས། འདིས་ནི་མྱོང་སོགས་བཤད་པ་ཡིན། །ཞེས་པའི་བར་བྱུང་། གཉིས་པ་འཆད་པར་བྱེད་པ་ལ། ཁྱད་པར་དང་ནི་ཁྱད་པར་གཞི། །ཞེས་པ་ནས། ལྡོག་པ་ཉིད་ལ་སྒྲ་སྦྱོར་ཕྱིར། །ཞེས་པའི་བར་བྱུང་། གསུམ་པ་འཆད་པར་བྱེད་པ་ལ། བརྡ་དྲན་པ་ཡི་རྒྱུ་ཅན་གྱི། །ཞེས་པ་ནས། འཇུག་འགྱུར་ཕྱི་རོལ་མཐོང་མི་འགྱུར། །ཞེས་པའི་བར་བྱུང་། བཞི་པ་འཆད་པར་བྱེད་པ་ལ། གཟུགས་ལ་གཟུགས་ཞེས་མཐོང་བ་ན། །ཞེས་པ་ནས། བརྟེན་ནས་མིག་བློ་སྐྱེ་བར་འགྱུར། །ཞེས་པའི་བར་བྱུང་། འོ་ན། གཟུགས་འཛིན་དབང་ཤེས་རྟོག་བྲལ་དུ་གང་གིས་གྲུབ་ཅེ་ན། དེ་རྟོག་བྲལ་དུ་མངོན་སུམ་གྱིས་གྲུབ་ཅིང་། དེའི་ནང་ནས་ཀྱང་ཁོ་རང་ཉམས་སུ་མྱོང་བའི་རང་རིག་མངོན་སུམ་གྱིས་གྲུབ་བོ། །ཞེས་འཆད་པར་བྱེད་པ་ལ། མངོན་སུམ་རྟོག་དང་བྲལ། ཞེས་པ་ནས། འགྲུབ་པར་འགྱུར། །ཞེས་པའི་བར་བྱུང་། དེ་ལྟར་བྱས་པ་ལ་ཁོ་ན་རེ། གཟུགས་འཛིན་དབང་ཤེས་རྟོག་བྲལ་དུ་མངོན་སུམ་གྱིས་གྲུབ་པ་མི་འཐད་དེ། རྟོག་པ་མངོན་སུམ་ལ་མི་སྣང་བའི་ཕྱིར་ཞེ་ན། མི་འཐད་དེ། དོན་སྦྱོར་རྟོག་པ་དང་། མིང་སྦྱོར་རྟོག་པ་གཉིས་རང་ཉམས་སུ་མྱོང་བའི་རང་རིག་གི་མྱོང་བྱ་ཡིན་པའི་རྒྱུ་མཚན་གྱིས་རང་ཉམས་སུ་མྱོང་བའི་རང་རིག་ལ་སྣང་བའི་ཕྱིར། ཞེས་འཆད་པར་བྱེད་པ་ལ། ཀུན་གྱི་རྣམ་རྟོག་མིང་རྟེན་ཅན། །ཞེས་སོགས་བྱུང་། བྱས་པ་ལ་ཁོ་ན་རེ། གཟུགས་འཛིན་དབང་ཤེས་རྟོག་པ་ཡིན་པར་ཐལ། དེ་གཟུགས་འདིའོ་སྙམ་པའི་རྟོག་པ་ཡིན་པའི་ཕྱིར་ཞེ་ན། གཟུགས་འཛིན་དབང་ཤེས་དེ་འདིའོ་སྙམ་པའི་རྟོག་པ་མ་ཡིན་ཏེ། རྟོག་པ་ཕྱི་རོལ་ཡུལ་ལ་འཇུག་པ་བསྡུས་ཤིང་། ནང་དུ་ཏིང་འཛིན་ལ་མཉམ་པར་བཞག་པའི་གང་ཟག་དེའི་རྒྱུད་ལ་གཟུགས་འཛིན་དབང་ཤེས་ཡོད་པའི་ཕྱིར། ཞེས་འཆད་པར་བྱེད་པ་ལ། ཐམས་ཅད་ལས་ནི་སེམས་བསྡུས་ནས། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་ཁོ་ན་རེ། དེ་འདྲ་བའི་གང་ཟག་གི་རྒྱུད་ཀྱི་གཟུགས་འཛིན་དབང་ཤེས་དེ་ཀ་རྟོག་པ་ཡིན་ནོ། །ཟེར་ན། དེའི་རྒྱུད་ཀྱི་གཟུགས་འཛིན་དབང་ཤེས་རྟོག་པ་ཡིན་པ་མི་འཐད་པར་ཐལ། དེ་རྟོག་པ་ཡིན་ན། དེ་འདྲ་བའི་གང་ཟག་གིས་མཉམ་བཞག་ལས་ལངས་ནས་རྗེས་ཐོབ་ཀྱི་གནས་སྐབས་སུ་དེ་རྟོག་པར་རིགས་པ་ལས། དེ་མི་རིགས་པའི་ཕྱིར། ཞེས་འཆད་པར་བྱེད་པ་ལ། སླར་ཡང་ཅུང་ཟད་རྣམས་རྟོག་ན། །ཞེས་སོགས་རྐང་པ་གཉིས་བྱུང་། ཡང་ཁོ་ན་རེ། གཟུགས་འཛིན་དབང་ཤེས་རྟོག་པ་ཡིན་ཏེ། དེ་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་ཡིན་པའི་ཕྱིར་ཞེ་ན། གཟུགས་འཛིན་དབང་ཤེས་དེ་གཟུགས་སྤྱི་རྟག་དངོས་དེ་གཟུང་དོན་དུ་བྱེད་པའི་རྟོག་པ་མ་ཡིན་ཏེ། དེ་གཟུགས་དང་རྫས་གཅིག་པའི་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་ཡང་མིན། དེ་གཟུགས་དང་རྫས་ཐ་དད་པའི་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་ཡང་མ་ཡིན་པའི་ཕྱིར། དེ་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་མིན་ཀྱང་། དེའི་གཟུང་དོན་མེད་མི་དགོས་ཏེ། དེ་གཟུང་དོན་དུ་བྱེད་པའི་རྟོག་པ་ཡིན་ན། གཟུགས་དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་དགོས་པ་ལས། དེ་མི་འཐད་པའི་ཕྱིར། དེ་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་ཡིན་ན། དེ་དང་གཟུགས་འཛིན་རྟོག་པ་གཉིས་རང་ཡུལ་ལ་འཇུག་ཚུལ་མཚུངས་དགོས་པ་ལས། དེ་གཉིས་དེ་ལྟར་མཚུངས་པ་ལ་སྒྲུབ་བྱེད་ཡང་དག་ཡང་མེད། དེ་ལྟར་མཚུངས་པ་ལ་གནོད་བྱེད་ཡང་དག་ཡོད་པའི་ཕྱིར། ཞེས་རིགས་པ་བདུན་ཡོད་པའི་ནང་ནས། རིགས་པ་དང་པོ་ནི། དེ་ཡང་གཟུགས་འཛིན་དབང་ཤེས་དེ་གཟུགས་དང་རྫས་གཅིག་པའི་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་མ་ཡིན་པར་ཐལ། དེ་ལྟར་ཡིན་ན། རྒྱུ་དུས་ཀྱི་གཟུགས་དེ་ཐ་སྙད་ཀྱི་དུས་སུ་ཡོད་དགོས་པ་ལས། དེ་དེའི་དུས་སུ་མེད་པའི་ཕྱིར། ཞེས་འཆད་པར་བྱེད་པ་ལ། གཅིག་ཏུ་མཐོང་བའི་ཁྱད་པར་ནི། ཞེས་སོགས་བྱུང་། གཉིས་པ་ནི། གཟུགས་འཛིན་དབང་ཤེས་དེ། གཟུགས་དང་རྫས་ཐ་དད་པའི་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་མ་ཡིན་ཏེ། གཟུགས་དང་རྫས་ཐ་དད་པའི་གཟུགས་སྤྱི་རྟག་དངོས་མེད་པའི་ཕྱིར། ཞེས་འཆད་པར་བྱེད་པ་ལ། དེ་ལས་སྤྱི་གཞན་ཐ་དད་པ། །ཞེས་སོགས་རྐང་པ་གཉིས་བྱུང་། གསུམ་པ་ནི། གཟུགས་འཛིན་དབང་ཤེས་དེ། གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་མིན་ཀྱང་། དེའི་གཟུང་དོན་མེད་མི་དགོས་ཏེ། དེ་གཟུགས་གཟུང་དོན་དུ་བྱས་པ་ལ་བརྟེན་ནས་སྐྱེས་པའི་ཕྱིར། ཞེས་འཆད་པར་བྱེད་པ་ལ། དེ་ཕྱིར་དབང་པོ་ལས་སྐྱེས་བློ། །ཞེས་སོགས་རྐང་པ་གཉིས་བྱུང་། བཞི་པ་ནི། གཟུགས་འཛིན་དབང་ཤེས་དེ་གཟུགས་སྤྱི་རྟག་དངོས་གཟུང་དོན་དུ་བྱེད་པའི་རྟོག་པ་ཡིན་ན། གཟུགས་དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་དགོས་པའི་ཕྱིར། དེ་ལྟར་ཡིན་ན། གཟུགས་དོན་དམ་པར་གཟུགས་འཛིན་རྟོག་པའི་ཡུལ་ཡིན་དགོས། དེ་ཡིན་ན། གཟུགས་དེ་དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་དགོས་པའི་ཕྱིར། ཞེས་འཆད་པར་བྱེད་པ་ལ། ཁྱད་པར་རྣམས་ལ་སྒྲ་དག་ནི། །ཞེས་སོགས་རྐང་པ་དྲུག་བྱུང་། ལྔ་པ་ནི། གཟུགས་འཛིན་དབང་ཤེས་དེ་གཟུགས་སྤྱི་རྟག་དངོས་གཟུང་དོན་དུ་བྱེད་པའི་ཤེས་པ་ཡིན་ན། དེ་དང་གཟུགས་འཛིན་གྱི་རྟོག་པ་གཉིས་རང་ཡུལ་ལ་འཇུག་ཚུལ་མཚུངས་དགོས་སོ། །ཞེས་འཆད་པར་བྱེད་པ་ལ། དེ་ཉིད་ཅེས་ནི་འབྲེལ་བ་ལ། །ཞེས་སོགས་བྱུང་། དེ་གཉིས་རང་ཡུལ་ལ་འཇུག་ཚུལ་མཚུངས་པ་ལ་སྒྲུབ་བྱེད་ཡང་དག་མེད་དོ། །ཞེས་འཆད་པར་བྱེད་པ་ལ། མིག་ལ་དོན་སྣང་བ་ན་ཡང་། །ཞེས་སོགས་བྱུང་། དེ་གཉིས་རང་ཡུལ་ལ་འཇུག་ཚུལ་མཚུངས་པ་ལ་གནོད་བྱེད་སྟོན་པར་བྱེད་པ་ལ། དབང་པོའི་བྱ་བ་མེད་པ་ལ། །ཞེས་སོགས་རྐང་པ་བཞི་བྱུང་། འོ་ན། སྐབས་འདིར། གཟུགས་འཛིན་དབང་ཤེས་རྟོག་བྲལ་དུ་སྒྲུབ་བྱེད་ཀྱི་རིགས་པ་རྒྱས་པར་དངོས་སུ་བསྟན་ནས། དེ་མ་འཁྲུལ་བར་སྒྲུབ་བྱེད་ཀྱི་རིགས་པ་རྒྱས་པར་དངོས་སུ་མི་སྟོན་པའི་རྒྱུ་མཚན་གང་ཞེ་ན། དེའི་རྒྱུ་མཚན་ཡོད་དེ། འདིའི་ཕྱོགས་སྔ་སྨྲ་བ་པོ་རྣམས་ཀྱིས་གཟུགས་འཛིན་དབང་ཤེས་རྟོག་པར་ཁས་ལེན་ཀྱང་། མ་འཁྲུལ་པར་ཁས་ལེན་པའི་ཕྱིར། འོ་ན། སྐབས་འདིར་དབང་ཤེས་རྟོག་བྲལ་དུ་སྒྲུབ་བྱེད་ཀྱི་རིགས་པ་བསྟན་ནས། ཡིད་མངོན་ལ་སོགས་རྟོག་བྲལ་དུ་སྒྲུབ་བྱེད་ཀྱི་རིགས་པ་མི་སྟོན་པའི་རྒྱུ་མཚན་གང་ཞེ་ན། རྒྱུ་མཚན་ཡོད་དེ། འདིའི་ཕྱོགས་སྔ་སྨྲ་བ་པོ་རྣམས་ཀྱིས། དབང་ཤེས་རྟོག་པར་འདོད་ཅིང་། ཡིད་མངོན་ལ་སོགས་པ་རྣམས་རྟོག་པར་མི་འདོད་པའི་ཕྱིར། འོ་ན། གཟུགས་འཛིན་དབང་ཤེས་རྟོག་བྲལ་དུ་བསྟན་པ་ལ་དགོས་པ་གང་ཡོད་ཅེ་ན། དགོས་པ་ཡོད་དེ། ཐར་པ་དང་ཐམས་ཅད་མཁྱེན་པ་ཐོབ་པར་བྱེད་པ་ལ་གང་ཟག་གི་བདག་འཛིན་སྤང་དགོས། དེ་སྤོང་བ་ལ་གང་ཟག་གི་བདག་ཁེགས་དགོས། དེ་ཁེགས་པ་ལ་རྟོག་པ་དང་། རྟོག་མེད་ཀྱི་ཤེས་པའི་རྣམ་དབྱེ་ཤེས་དགོས། དེ་ལྟར་དུ་ཤེས་པ་ལ། གཟུགས་འཛིན་དབང་ཤེས་རྟོག་བྲལ་དུ་ཤེས་པའམ། དེ་རྟོག་པར་འདོད་པའི་ལོག་རྟོག་སེལ་དགོས་པའི་ཕྱིར། འོ་ན། མངོན་སུམ་གྱི་ངོ་བོ་ལ་ལོག་རྟོག་བསལ་བ་ལ་དགོས་པ་གང་ཡོད་ཅེ་ན། དགོས་པ་ཡོད་དེ། ཐར་པ་དང་ཐམས་ཅད་མཁྱེན་པ་ཐོབ་པར་བྱེད་པ་ལ། ལམ་ཐབས་ཤེས་གཉིས་ཀྱི་རྣམ་གཞག་ཤེས་དགོས། དེ་ཤེས་པ་ལ་བདེན་པ་གཉིས་ཀྱི་རྣམ་གཞག་ཤེས་དགོས། དེ་ལ་གཞལ་བྱ་མངོན་གྱུར་དང་ལྐོག་གྱུར་གྱི་རྣམ་གཞག་ཤེས་དགོས། དེ་ཤེས་པ་ལ་གཞལ་བྱ་མངོན་གྱུར་རྟོག་བྱེད་ཀྱི་ཚད་མ་རྒྱུད་ལ་སྐྱེ་དགོས། དེ་སྐྱེ་བ་ལ་མངོན་སུམ་གྱི་ངོ་བོ་ལ་ལོག་རྟོག་སེལ་དགོས་པའི་ཕྱིར། ངག་དོན་ནི། རྟོག་པ་དང་རྟོག་མེད་ཀྱི་རྣམ་དབྱེ་ལ་མཁས་པའི་སློབ་དཔོན་ཕྱོགས་གླང་ལ་གཟུགས་འཛིན་དབང་མངོན་རྟོག་བྲལ་དུ་སྒྲུབ་པའི་རྟགས་ཡང་དག་འགོད་མི་དགོས་ཏེ། དེས་གཟུགས་འཛིན་དབང་ཤེས་རྟོག་བྲལ་དུ་མངོན་སུམ་གྱིས་གྲུབ་པའི་ཕྱིར། དེ་འདྲའི་རྣམ་དབྱེ་ལ་རྨོངས་པའི་རིགས་པ་ཅན་པའི་ངོར་གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རྟགས་ཡང་དག་འགོད་དགོས་ཏེ། རིགས་པ་ཅན་པ་དེས་གཟུགས་འཛིན་དབང་ཤེས་རྟོག་བྲལ་དུ་རྟགས་ཡང་དག་ལ་བརྟེན་ནས་རྟོགས་དགོས་པའི་ཕྱིར། །

དབང་ཤེས་རྟོག་བྲལ་དུ་སྒྲུབ་པའི་རིགས་པ་ལ་མཐའ་དཔྱད་པ།

༈ མཐའ་དཔྱད་པ་ལ། ཁ་ཅིག་ན་རེ། རིགས་པ་ཅན་པའི་ངོར་གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རྟགས་ཡང་དག་ཡོད་པར་ཐལ། དེའི་ངོར་དེ་སྒྲུབ་ཀྱི་རྟགས་ཡང་དག་འགོད་དགོས་པའི་ཕྱིར་ན་མ་ཁྱབ། འདོད་ན། གྲངས་ཅན་གྱི་ངོར་སྒྲ་མི་རྟག་པར་སྒྲུབ་པའི་རྟགས་ཡང་དག་ཡོད་པར་ཐལ་ལོ་ཟེར་ན། ཁོ་རང་ལ། རིགས་པ་ཅན་པའི་ངོར་གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རྟགས་ཡང་དག་འགོད་དགོས་པར་ཐལ། གྲངས་ཅན་གྱི་ངོར་སྒྲ་མི་རྟག་པར་སྒྲུབ་པའི་རྟགས་ཡང་དག་འགོད་དགོས་པའི་ཕྱིར། དེའི་ངོར། དེ་སྒྲུབ་ཀྱི་རིགས་པ་ཡང་དག་འགོད་དགོས་པའི་ཕྱིར། ཁ་ཅིག་ན་རེ། རིགས་པ་ཅན་པའི་ངོར། གཟུགས་འཛིན་དབང་མངོན་རྟོག་བྲལ་དུ་སྒྲུབ་པའི་རྟགས་ཡང་དག་འགོད་དགོས་ཟེར་ན། གཟུགས་འཛིན་དབང་མངོན་རྟོག་བྲལ་དུ་སྒྲུབ་པའི་རྟགས་ཡང་དག་ཡོད་པར་ཐལ། དམ་བཅའ་འཐད་པའི་ཕྱིར། འདོད་མི་ནུས་ཏེ། གཟུགས་འཛིན་དབང་མངོན་ཚད་མས་ངེས་པའི་གང་ཟག་ཡིན་ན། དེ་རྟོག་བྲལ་དུ་ཚད་མས་ངེས་པའི་གང་ཟག་ཡིན་དགོས་པའི་ཕྱིར་ཏེ། དེ་ཚད་མས་ངེས་པའི་གང་ཟག་ཡིན་ན། དེ་མངོན་སུམ་དུ་ཚད་མས་ངེས་པའི་གང་ཟག་ཡིན་དགོས་པའི་ཕྱིར། རྟོག་བྲལ་མངོན་སུམ་གྱི་མཚན་ཉིད་ཀྱི་ཟུར་གཅིག་ཡིན་པའི་ཕྱིར། རིགས་གཏེར་གྱི་རྗེས་འབྲང་ཁ་ཅིག་ན་རེ། རིགས་གཏེར་ལས། ཕྱི་ནས་མཚན་ཉིད་འཇོག་པ་འཁྲུལ། །ཞེས་པའི་དོན་ནི། མངོན་སུམ་དང་མངོན་སུམ་གྱི་ཚད་མ་གཉིས་མཚན་ཉིད་གཅིག་གིས་མཚོན་ནུས་ཏེ། རྟོག་པ་དང་བྲལ་ཞིང་མ་འཁྲུལ་པའི་རིག་པ་དེ། དེ་གཉིས་ཀའི་མཚན་ཉིད་ཡིན་པའི་ཕྱིར་ཟེར་ན། མངོན་སུམ་ཚད་མས་ངེས་པའི་གང་ཟག་ཡིན་ན། མངོན་སུམ་གྱི་ཚད་མ་ཚད་མས་ངེས་པའི་གང་ཟག་ཡིན་དགོས་པར་ཐལ། དེ་གཉིས་མཚན་ཉིད་གཅིག་གིས་མཚོན་ནུས་པའི་ཕྱིར། འདོད་ན། མངོན་སུམ་ཚད་མས་ངེས་པའི་གང་ཟག་ཡིན་ན། དེ་ཚད་མར་ཚད་མས་ངེས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། མངོན་སུམ་ཚད་མས་ངེས་པའི་གང་ཟག་ཡིན་ན། མངོན་སུམ་མི་རྟག་པར་ཚད་མས་ངེས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་མི་ནུས་ཏེ། མངོན་སུམ་མི་རྟག་པར་སྒྲུབ་པའི་རྟགས་ཡང་དག་ཡོད་པའི་ཕྱིར། གཞན་ཡང་། ཆོས་དེ་ལ་མངོན་སུམ་ཡིན་ན། ཆོས་དེ་ལ་མངོན་སུམ་གྱི་ཚད་མ་ཡིན་དགོས་པར་ཐལ། མངོན་སུམ་དང་གཅིག་ཤོས་གཉིས་མཚན་ཉིད་གཅིག་གིས་མཚོན་ནུས་པའི་ཕྱིར། རྟགས་ཁས། འདོད་ན། སྒྲ་རྟག་པར་སྒྲོ་འདོགས་པའི་གང་ཟག་ཡིན་ན། སྒྲ་མི་རྟག་པར་མངོན་སུམ་གྱིས་རྟོག་པའི་གང་ཟག་མ་ཡིན་དགོས་པར་ཐལ། ཕུང་པོ་གང་ཟག་གི་བདག་ཏུ་སྒྲོ་འདོགས་པའི་གང་ཟག་ཡིན་ན། ཕུང་པོ་གང་ཟག་གི་བདག་མེད་དུ་མངོན་སུམ་གྱིས་རྟོགས་པའི་གང་ཟག་མ་ཡིན་དགོས་པའི་ཕྱིར། འདོད་ན། གྲངས་ཅན་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། སྒྲ་རྟག་པར་ཁས་ལེན་གྱི་གང་ཟག་ཡིན་པའི་ཕྱིར། འདོད་མི་ནུས་ཏེ། གྲངས་ཅན་གྱི་རྒྱུད་ཀྱི་སྒྲ་འཛིན་དབང་མངོན་དེ། སྒྲ་མི་རྟག་པ་ལ་མངོན་སུམ་གྱི་ཚད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དེ་ལ་མངོན་སུམ་ཡིན་པའི་ཕྱིར། ཁྱབ་པ་ཁས། གཞན་ཡང་། གྲངས་ཅན་དེ་ཕྲ་བའི་མི་རྟག་པ་མངོན་སུམ་གྱི་ཚད་མས་ངེས་པའི་གང་ཟག་ཡིན་པར་ཐལ། དེ་སྒྲ་མི་རྟག་པ་མངོན་སུམ་གྱིས་ངེས་པའི་གང་ཟག་གང་ཞིག །སྒྲ་མི་རྟག་པ་ཕྲ་བའི་མི་རྟག་པ་ཡིན་པའི་ཕྱིར། འདོད་ན། གྲངས་ཅན་དེ་ཁྱབ་པ་འདུ་བྱེད་ཀྱི་སྡུག་བསྔལ་གྱི་ཉེས་པ་ཕྲ་མོ་མངོན་སུམ་གྱི་ཚད་མས་ངེས་པའི་གང་ཟག་ཏུ་ཐལ། འདོད་པའི་ཕྱིར། འདོད་མི་ནུས་ཏེ། མདོ་ལས། བྱིས་པ་ལག་མཐིལ་ལྟ་བུ་ཡི། །འདུ་བྱེད་སྡུག་བསྔལ་སྤུ་མི་རིག། །ཅེས་གསུངས་པའི་ཕྱིར། ཁ་ཅིག་ན་རེ། རྟོག་པ་དང་བྲལ་ཞིང་རང་ཡུལ་ལ་མ་འཁྲུལ་པའི་རིག་པ་དེ་མངོན་སུམ་གྱི་མཚན་ཉིད་ཟེར་བ་དང་། རྟོག་པ་མ་ཡིན་ན། རྟོག་བྲལ་ཡིན་པས་ཁྱབ་ཟེར་བ་ནང་འགལ་ཏེ། འོ་ན། ཚུར་མཐོང་གི་རྒྱུད་ཀྱི་ཚད་མ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་གྲུབ་སྟེ། རྟོག་པ་མ་ཡིན་པའི་ཕྱིར། ཁྱབ་པ་ཁས། གཉིས་པ་གྲུབ་སྟེ། རང་གི་འཇུག་ཡུལ་ལ་མ་འཁྲུལ་པའི་རིག་པ་ཡིན་པའི་ཕྱིར་ཏེ། ཚད་མ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། རྣམ་མཁྱེན་རྟོགས་པའི་མངོན་སུམ་གྱི་ཚད་མ་ཡིན་པར་ཐལ། དེ་རྟོགས་པའི་ཚད་མ་གང་ཞིག །མངོན་སུམ་ཡིན་པའི་ཕྱིར། རྩ་བར་འདོད་མི་ནུས་ཏེ། ཁྱོད་ཡིན་པར་གྱུར་པའི་རྟོག་པ་ཡོད་པའི་ཕྱིར། གཞན་ཡང་། དེ་ཆོས་ཅན། རྟོག་བྲལ་གྱི་ཚད་མར་ཐལ། རྟོག་བྲལ་གང་ཞིག །ཚད་མ་ཡིན་པའི་ཕྱིར། འདོད་ན། རྟོག་མེད་ཀྱི་ཚད་མར་ཐལ། འདོད་པའི་ཕྱིར། འདོད་ན། མངོན་སུམ་ཚད་མར་ཐལ། འདོད་པའི་ཕྱིར། གཞན་ཡང་། ཐེག་ཆེན་གྱི་སྒོམ་ལམ་ཆོས་ཅན། རྟོག་པ་དང་བྲལ་བར་ཐལ། རྟོག་པ་མ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། རྟོག་པའི་ཟག་པ་དང་བྲལ་བར་ཐལ། འདོད་པའི་ཕྱིར། འདོད་ན། རྟོག་པའི་དེ་དང་བྲལ་བའི་སྒོམ་ལམ་ཡིན་པར་ཐལ། འདོད་པ་གང་ཞིག །སྒོམ་ལམ་ཡིན་པའི་ཕྱིར། འདོད་ན། དེ་ཆོས་ཅན། ཟག་མེད་ཀྱི་སྒོམ་ལམ་དུ་ཐལ། འདོད་པའི་ཕྱིར། འདོད་ན། རྣལ་འབྱོར་མངོན་སུམ་དུ་ཐལ། འདོད་པའི་ཕྱིར། འདོད་མི་ནུས་ཏེ། ཁྱོད་ཡིན་པར་གྱུར་པའི་རྟོག་པ་ཡོད་པའི་ཕྱིར། གཞན་ཡང་། སོ་སྐྱེ་ཆོས་ཅན། རྟོག་པ་དང་བྲལ་བ་ཡིན་པར་ཐལ། རྟོག་པ་མ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེ་དང་ལྡན་པ་ཡིན་པའི་ཕྱིར་ཏེ། དེ་རྒྱུད་ལྡན་གྱི་གང་ཟག་ཡིན་པའི་ཕྱིར། ཁ་ཅིག་ན་རེ། རྟོག་པ་དང་བྲལ་ཞིང་རང་གི་སྣང་ཡུལ་གྱི་གཙོ་བོ་ལ་མ་འཁྲུལ་པའི་རིག་པ་དེ། མདོ་སེམས་གཉིས་ཀས་མངོན་སུམ་གྱི་མཚན་ཉིད་དུ་ཁས་ལེན་པ་ཡིན་ནོ་ཟེར་ན། སེམས་ཙམ་པའི་ལུགས་གཞིར་བཞག་ནས་ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་གི་སྣང་ཡུལ་ལ་མ་འཁྲུལ་པའི་རིག་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལ་འཁྲུལ་པའི་རིག་པ་ཡིན་པའི་ཕྱིར་ཏེ། འཁྲུལ་ཤེས་ཡིན་པའི་ཕྱིར། ཁྱབ་པ་ཁས། དེ་ལྟར་བྱས་པ་ལ་ཁོ་ན་རེ། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་ཆོས་ཅན། རང་གི་སྣང་ཡུལ་གྱི་གཙོ་བོ་ལ་མ་འཁྲུལ་པའི་རིག་པ་ཡིན་པར་ཐལ། གཟུགས་ལ་མ་འཁྲུལ་པའི་རིག་པ་གང་ཞིག །གཟུགས་དེ་ཁྱོད་ཀྱི་སྣང་ཡུལ་གྱི་གཙོ་བོ་ཡིན་པའི་ཕྱིར་ན་མ་ཁྱབ་སྟེ། འོ་ན་དེ་ཆོས་ཅན། རང་གི་སྣང་ཡུལ་ལ་མ་འཁྲུལ་པའི་རིག་པ་ཡིན་པར་ཐལ། གཟུགས་ལ་དེ་གང་ཞིག །གཟུགས་ཁྱོད་ཀྱི་སྣང་ཡུལ་ཡིན་པའི་ཕྱིར། ཁྱབ་པ་ཁས། བྱས་པ་ལ་ཁོ་ན་རེ། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་གྱི་སྣང་ཡུལ་ཡིན་ན། དེའི་སྣང་ཡུལ་གྱི་གཙོ་བོ་ཡིན་དགོས་པར་ཐལ། དེ་རང་གི་སྣང་ཡུལ་གྱི་གཙོ་བོ་ལ་མ་འཁྲུལ་པའི་རིག་པ་ཡིན་ལ། རང་གི་སྣང་ཡུལ་ལ་མ་འཁྲུལ་པའི་རིག་པ་མ་ཡིན་པའི་ཁྱད་པར་མི་འཐད་པའི་ཕྱིར་ན་མ་ཁྱབ། འདོད་ན། གཟུགས་ཕྱི་རོལ་གྱི་དོན་ཡིན་པ་ཆོས་ཅན། དེར་ཐལ། དེའི་ཕྱིར། ཁོ་ན་རེ། རང་གི་འཇུག་ཡུལ་གྱི་གཙོ་བོ་ལ་མ་འཁྲུལ་པའི་རིག་པ་དེ་མངོན་སུམ་གྱི་མཚན་ཉིད་ཟེར་ན། སྒྲ་མི་རྟག་པ་རྟོགས་པའི་རྗེས་དཔག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། སྒྲ་མི་རྟག་པ་ལ་མ་འཁྲུལ་པའི་རིག་པ་གང་ཞིག །སྒྲ་མི་རྟག་པ་ཁྱོད་ཀྱི་འཇུག་ཡུལ་གྱི་གཙོ་བོ་ཡིན་པའི་ཕྱིར། འདོད་མི་ནུས་ཏེ། འཁྲུལ་ཤེས་ཡིན་པའི་ཕྱིར། རྟགས་གྲུབ་སྟེ། ཇི་བཞིན་མངོན་ཞེན་མིན་པའི་ཕྱིར། །ཞེས་སོགས་གསུངས་པའི་ཕྱིར། བྱས་པ་ལ་ཁོ་ན་རེ། རང་གི་འཇུག་ཡུལ་ལ་མ་འཁྲུལ་པའི་རིག་པ་ཡིན་ན། མ་འཁྲུལ་པའི་རིག་པ་ཡིན་དགོས་པར་ཐལ། རང་གི་འཇུག་ཡུལ་རྟོགས་པའི་མ་འཁྲུལ་པའི་རིག་པ་ཡིན་ན། མ་འཁྲུལ་པའི་རིག་པ་ཡིན་དགོས་པའི་ཕྱིར། རང་གི་འཇུག་ཡུལ་རྟོགས་པའི་ཚད་མ་ཡིན་ན། ཚད་མ་ཡིན་དགོས་པའི་ཕྱིར་ན་མ་ཁྱབ་སྟེ། འོ་ན། སྒྲ་མི་རྟག་པ་རྟོགས་པའི་རྗེས་དཔག་ཆོས་ཅན། ཁྱོད་ལ་སྣང་བ་སྣང་བ་ལྟར་དུ་གྲུབ་པར་ཐལ། ཁྱོད་མ་འཁྲུལ་པའི་རིག་པ་ཡིན་པའི་ཕྱིར། འདོད་ན། ཁྱོད་ལ་སྣང་ན་ཡོད་པས་ཁྱབ་པར་ཐལ་ལོ། །འདོད་ན། སྒྲ་མི་རྟག་པའི་དོན་སྤྱི་སྒྲ་མི་རྟག་པ་དང་གཅིག་ཡིན་པ་དེ་ཆོས་ཅན། དེར་ཐལ། དེའི་ཕྱིར། རང་རེས། རྟོག་པ་དང་བྲལ་ཞིང་མ་འཁྲུལ་པའི་རིག་པ་མངོན་སུམ་གྱི་མཚན་ཉིད་ཡིན། བྱས་པ་ལ། ཁ་ཅིག་ན་རེ། རྟོག་པ་དང་བྲལ་བའི་མ་འཁྲུལ་བའི་རིག་པ་དེ་ཡང་མངོན་སུམ་གྱི་མཚན་ཉིད་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཟླ་བ་གཉིས་སྣང་གི་དབང་ཤེས་ཁྱོད་ཡིན་ན། ཟླ་བ་གཉིས་སྣང་གི་དབང་ཤེས་མངོན་སུམ་ཡིན་དགོས་པར་ཐལ། ཁྱོད་མངོན་སུམ་གྱི་མཚན་ཉིད་ཡིན་པའི་ཕྱིར། འདོད་ན། གཟུགས་འཛིན་དབང་མངོན་ཆོས་ཅན། ཟླ་བ་གཉིས་སྣང་གི་དབང་ཤེས་ལ་སྦྱར་ནས་ཐལ་ཕྱིར། འཁོར་གསུམ། རྟགས་མ་གྲུབ་བྱས་པ་ལ། དེ་ཆོས་ཅན། ཟླ་བ་གཉིས་སྣང་གི་དབང་ཤེས་རྟོག་པ་དང་བྲལ་ཞིང་། མ་འཁྲུལ་པའི་རིག་པར་ཐལ། དེ་རྟོག་པ་དང་བྲལ་བ་གང་ཞིག །ཁྱོད་མ་འཁྲུལ་པའི་རིག་པ་ཡིན་པའི་ཕྱིར་ན་མ་ཁྱབ། གཞན་ཡང་། གཟུགས་འཛིན་དབང་ཤེས་མངོན་སུམ་དུ་སྒྲུབ་པའི་རྟགས་ཡང་དག་ཡོད་པར་ཐལ། རྟོག་པ་དང་བྲལ་ཞིང་མ་འཁྲུལ་པའི་རིག་པ་དེ་མངོན་སུམ་གྱི་མཚན་ཉིད་དང་། གཟུགས་འཛིན་དབང་ཤེས་མངོན་སུམ་གྱི་མཚན་གཞི་ཡིན་པའི་ཕྱིར་ན་མ་ཁྱབ། རྩ་བར་འདོད་ན། གཟུགས་འཛིན་དབང་ཤེས་མངོན་སུམ་དུ་རྟོགས་པའི་རྗེས་དཔག་ཡོད་པར་ཐལ། འདོད་པའི་ཕྱིར། འདོད་ན། གཟུགས་འཛིན་དབང་ཤེས་གསལ་བར་བརྗོད་པའི་ངག་ཡོད་པར་ཐལ། འདོད་པའི་ཕྱིར། གཞན་ཡང་། ཁོ་རང་ལ་མངོན་སུམ་གྱི་ཚད་མས་དངོས་སུ་རྟོགས་པར་བྱ་བ་དེ། བུམ་པ་མངོན་གྱུར་དུ་སྒྲུབ་པའི་རྟགས་ཡང་དག་ཡིན་པར་ཐལ། དེ་མངོན་གྱུར་གྱི་མཚན་ཉིད་དང་། བུམ་པ་མངོན་གྱུར་གྱི་མཚན་གཞི་ཡིན་པའི་ཕྱིར། ཁྱབ་པ་ཁས། འདོད་ན། བུམ་པ་མངོན་གྱུར་དུ་རྟོགས་པའི་རྗེས་དཔག་ཡོད་པར་ཐལ། འདོད་པའི་ཕྱིར། འདོད་ན། བུམ་པ་མངོན་གྱུར་དུ་བརྗོད་པའི་ངག་ཡོད་པར་ཐལ། འདོད་པའི་ཕྱིར། གཞན་ཡང་། རྟོག་པ་དང་བྲལ་ཞིང་མ་འཁྲུལ་པའི་རིག་པ་ཆོས་ཅན། བུམ་པ་མངོན་སུམ་ཚད་མས་ངེས་པའི་གང་ཟག་ཡིན་ན། བུམ་པ་ཁྱོད་དུ་ཚད་མས་ངེས་པའི་གང་ཟག་ཡིན་དགོས་པར་ཐལ། ཁྱོད་མངོན་སུམ་གྱི་མཚན་ཉིད་ཡིན་པའི་ཕྱིར་ཟེར་ན། དོན་ལ་བྱེད་ན་འདིར་མ་ཁྱབ། ཚིག་ལ་བྱེད་ན་འདོད་བྱས་པ་ལ། སངས་འཕགས་ཆོས་ཅན། བུམ་པ་རྟོག་པ་དང་ཞེས་སོགས་དེར་ཐལ། བུམ་པ་མངོན་སུམ་ཚད་མས་ངེས་པའི་གང་ཟག་ཡིན་པའི་ཕྱིར་ན་མ་ཁྱབ། འོ་ན། ཁོ་རང་ལ། སངས་འཕགས་ཆོས་ཅན། བུམ་པ་མངོན་སུམ་ཚད་མས་ངེས་པའི་གང་ཟག་མ་ཡིན་པར་ཐལ། བུམ་པ་མངོན་སུམ་མ་ཡིན་པར་ཚད་མས་ངེས་པའི་གང་ཟག་ཡིན་པའི་ཕྱིར། མ་ཁྱབ་ན། དེ་ཆོས་ཅན། བུམ་པ་མངོན་སུམ་དང་མངོན་སུམ་མ་ཡིན་པ་གཉིས་ཀར་ཚད་མས་ངེས་པའི་གང་ཟག་ཡིན་པར་ཐལ། བུམ་པ་མངོན་སུམ་ཚད་མས་ངེས་པའི་གང་ཟག་གང་ཞིག །དེ་དེ་མ་ཡིན་པར་ཚད་མས་ངེས་པའི་གང་ཟག་ཡིན་པའི་ཕྱིར། འདོད་ན། དེ་གཉིས་ཀར་ཚད་མས་ངེས་པའི་གང་ཟག་གཅིག་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་གཉིས་དངོས་འགལ་ཡིན་པའི་ཕྱིར། ཁ་ཅིག །ལྷས་སྦྱིན་ལ་དམིགས་པའི་འདོད་ཆགས་ཀྱི་དངོས་གཉེན་བར་ཆད་མེད་ལམ་ཆོས་ཅན། མ་འཁྲུལ་པའི་རིག་པ་ཡིན་པར་ཐལ། མངོན་སུམ་ཡིན་པའི་ཕྱིར། ཁྱབ་པ་ཁས་ཟེར། འདོད་ན། དེ་ཆོས་ཅན། ཁྱོད་ལ་སྣང་བ་སྣང་བ་ལྟར་དུ་གྲུབ་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ལྷས་སྦྱིན་ཡིད་འོང་ཡིན་པར་ཐལ། ཁྱོད་ལ་ལྷས་སྦྱིན་ཡིད་འོང་དུ་སྣང་བ་གང་ཞིག །ཁྱོད་ལ་སྣང་བ་སྣང་བ་ལྟར་དུ་གྲུབ་པའི་ཕྱིར། དང་པོ་གྲུབ་སྟེ། ལྷས་སྦྱིན་ལ་དམིགས་པའི་འདོད་ཆགས་དེ་ལ་ལྷས་སྦྱིན་ཡིད་འོང་དུ་སྣང་བ་གང་ཞིག །ཁྱོད་དང་ལྷས་སྦྱིན་ལ་དམིགས་པའི་འདོད་ཆགས་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པའི་ཕྱིར་ཏེ། ཁྱོད་དེའི་དངོས་གཉེན་བར་ཆད་མེད་ལམ་ཡིན་པའི་ཕྱིར་ན་མ་ཁྱབ། འོ་ན། གང་ཟག་གི་བདག་འཛིན་གྱི་དངོས་གཉེན་བར་ཆད་མེད་ལམ་ཆོས་ཅན། ཁྱོད་དང་གང་ཟག་གི་བདག་འཛིན་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པར་ཐལ། ཁྱོད་དེའི་དངོས་གཉེན་བར་ཆད་མེད་ལམ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། ཁྱོད་གང་ཟག་གི་བདག་མེད་ཀྱི་རྣམ་པ་ཅན་གྱི་བློ་ཡིན་པར་ཐལ། གང་ཟག་གི་བདག་འཛིན་གང་ཟག་གི་བདག་གི་རྣམ་པ་ཅན་གྱི་བློ་གང་ཞིག །ཁྱོད་དང་གང་ཟག་གི་བདག་འཛིན་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པའི་ཕྱིར། འདོད་ན། གང་ཟག་གི་བདག་མེད་ཀྱི་རྣམ་པ་ཤར་བའི་བློ་ཡིན་པར་ཐལ། འདོད་པའི་ཕྱིར། འདོད་ན། གང་ཟག་གི་བདག་མེད་ཁྱོད་ཀྱི་སྣང་ཡུལ་ཡིན་པར་ཐལ། འདོད་པའི་ཕྱིར། ཁ་ཅིག་ན་རེ། ཆུ་ཀླུང་རྣག་ཁྲག་ཏུ་སྣང་བའི་ཡི་དྭགས་ཀྱི་མིག་ཤེས་ཆོས་ཅན། མ་འཁྲུལ་པའི་རིག་པ་ཡིན་པར་ཐལ། མངོན་སུམ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ལ་སྣང་བ་སྣང་བ་ལྟར་གྲུབ་པར་ཐལ། འདོད་པའི་ཕྱིར། འདོད་ན། ཆུ་ཀླུང་རྣག་ཁྲག་ཡིན་པར་ཐལ། འདོད་པ་གང་ཞིག །ཁྱོད་ལ་ཆུ་ཀླུང་དེར་སྣང་བའི་ཕྱིར། ཕྱི་མ་གྲུབ་སྟེ། དེ་དེར་སྣང་བའི་མིག་ཤེས་ཡིན་པའི་ཕྱིར། དེ་དེར་སྣང་བའི་ཡི་དྭགས་ཀྱི་མིག་ཤེས་མངོན་སུམ་ཡིན་པའི་ཕྱིར་ན་མ་ཁྱབ། འོ་ན། དེ་དེར་སྣང་བའི་ཡི་དྭགས་ཀྱི་རང་རིག་ཆོས་ཅན། དེ་དེར་སྣང་བའི་རང་རིག་ཏུ་ཐལ། དེ་དེར་སྣང་བའི་ཡི་དྭགས་ཀྱི་རང་རིག་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། ཁ་ནང་ཁོ་ན་ལ་ཕྱོགས་པའི་ཤེས་པ་ཡིན་པའི་ཕྱིར། བྱས་པ་ལ་ཁོ་ན་རེ། ཆུ་ཀླུང་རྣག་ཁྲག་ཏུ་སྣང་བའི་མིག་ཤེས་མེད་པར་ཐལ། དེ་དེར་སྣང་བའི་ཡི་དྭགས་ཀྱི་མིག་ཤེས་ལ། དེ་དེར་མི་སྣང་བའི་ཕྱིར་ན་མ་ཁྱབ། འདོད་མི་ནུས་ཏེ། དེ་དེར་སྣང་བའི་ཡི་དྭགས་ཀྱི་རྒྱུད་ཀྱི་དེ་དེར་སྣང་བའི་མིག་ཤེས་དེ་དེ་ཡིན་པའི་ཕྱིར། ཁ་ཅིག་ན་རེ། འཁྲུལ་རྒྱུ་བཞི་པོ་གང་རུང་གིས་མ་བསྐྱེད་པའི་རིག་པ། མ་འཁྲུལ་པའི་ཤེས་པའི་མཚན་ཉིད་ཟེར་ན། དེ་མི་འཐད་པར་ཐལ། དེ་བཞི་པོ་གང་རུང་གིས་བསྐྱེད་པ་མེད་པའི་ཕྱིར་ཏེ། དེ་གང་རུང་རྟག་པ་ཡིན་པའི་ཕྱིར། ཁ་ཅིག་ན་རེ། རང་གི་འཕྲལ་གྱི་འཁྲུལ་རྒྱུས་འཁྲུལ་པར་མི་བསྐྱེད་པའི་རིག་པ་དེ། མ་འཁྲུལ་པའི་ཤེས་པའི་

མཚན་ཉིད་ཟེར་ན། གང་ཟག་གི་བདག་འཛིན་ལྷན་སྐྱེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། བློ་ལྷན་སྐྱེས་ཡིན་པའི་ཕྱིར། འདོད་མི་ནུས་ཏེ། འཁྲུལ་ཤེས་ཡིན་པའི་ཕྱིར། ཁ་ཅིག་ན་རེ། རང་གི་འཁྲུལ་རྒྱུ་བཞི་པོ་གང་རུང་གིས་ཀྱང་འཁྲུལ་ཤེས་སུ་མ་བསྐྱེད་པའི་རིག་པ་དེ། མ་འཁྲུལ་པའི་ཤེས་པའི་མཚན་ཉིད་ཟེར་ན། ཚུར་མཐོང་གི་རྒྱུད་ཀྱི་ཤེས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། འཁྲུལ་ཤེས་མ་ཡིན་པའི་ཕྱིར། རྩ་བར་འདོད་མི་ནུས་ཏེ། མངོན་སུམ་མ་ཡིན་པའི་ཕྱིར། ཁ་ཅིག་ན་རེ། རང་གི་སྣང་ཡུལ་ལ་མ་འཁྲུལ་པའི་རིག་པ་དེ། མ་འཁྲུལ་བའི་ཤེས་པའི་མཚན་ཉིད་ཟེར་ན། རྗེས་དཔག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། རང་གི་སྣང་ཡུལ་དུ་གྱུར་པའི་སྤྱི་མཚན་ལ་མ་འཁྲུལ་བའི་རིག་པ་ཡིན་པའི་ཕྱིར་ཏེ། སྤྱི་མཚན་ལ་མ་འཁྲུལ་པའི་རིག་པ་གང་ཞིག །སྤྱི་མཚན་ཁྱོད་ཀྱི་སྣང་ཡུལ་གྱི་གཙོ་བོ་ཡིན་པའི་ཕྱིར། དང་པོ་གྲུབ་སྟེ། རང་གི་འཇུག་ཡུལ་ལ་མ་འཁྲུལ་པའི་རིག་པ་གང་ཞིག །སྤྱི་མཚན་ཁྱོད་ཀྱི་འཇུག་ཡུལ་གྱི་གཙོ་བོ་ཡིན་པའི་ཕྱིར། རྩ་བར་འདོད་མི་ནུས་ཏེ། འཁྲུལ་ཤེས་ཡིན་པའི་ཕྱིར། བྱས་པ་ལ་ཁོ་ན་རེ། རྗེས་དཔག་ཆོས་ཅན། རང་གི་སྣང་ཡུལ་ལ་མ་འཁྲུལ་པའི་རིག་པ་མ་ཡིན་པར་ཐལ། དེ་ལ་འཁྲུལ་ཤེས་ཡིན་པའི་ཕྱིར་ཏེ། འཁྲུལ་ཤེས་ཡིན་པའི་ཕྱིར། ཁྱབ་སྟེ། རང་གི་སྣང་ཡུལ་ལ་འཁྲུལ་པའི་རིག་པ་དེ། འཁྲུལ་ཤེས་ཀྱི་མཚན་ཉིད་ཡིན་པའི་ཕྱིར་ཏེ། དེའི་མཚན་ཉིད་ཡོད་པའི་ཕྱིར་ན་མ་ཁྱབ། དེའི་མཚན་ཉིད་ཡོད་དེ། རང་གི་སྣང་ཡུལ་ལ་འཁྲུལ་བའི་རིགས་སུ་གནས་པའི་རིག་པ་དེ་དེའི་མཚན་ཉིད་ཡིན་པའི་ཕྱིར། བྱས་པ་ལ་ཁོ་ན་རེ། རྗེས་དཔག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། རང་གི་སྣང་ཡུལ་ལ་མ་འཁྲུལ་བའི་རིགས་སུ་གནས་པ་ཡིན་པའི་ཕྱིར་ཏེ། རང་གི་སྣང་ཡུལ་ལ་མ་འཁྲུལ་བ་ཡིན་པའི་ཕྱིར། ཁྱབ་སྟེ། རང་གི་སྣང་ཡུལ་ལ་འཁྲུལ་ཤེས་ཡིན་ན། རང་གི་སྣང་ཡུལ་ལ་འཁྲུལ་བའི་རིགས་སུ་གནས་པ་ཡིན་དགོས་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་ཡིན་ན་འཁྲུལ་ཤེས་ཡིན་དགོས། འཁྲུལ་ཤེས་ཡིན་ན། རང་གི་སྣང་ཡུལ་ལ་འཁྲུལ་བའི་རིགས་སུ་གནས་པ་ཡིན་དགོས་པའི་ཕྱིར། ཁ་ཅིག་ན་རེ། རང་ལ་སྣང་བ་སྣང་བ་ལྟར་དུ་གྲུབ་པའི་རིག་པ་དེ། མ་འཁྲུལ་བའི་ཤེས་པའི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། རྗེས་དཔག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། རང་གི་གཞལ་བྱ་གཞལ་བ་ལྟར་གྲུབ་པའི་རིག་པ་གང་ཞིག །ཁྱོད་ལ་སྣང་ཡུལ་ཡོད་པའི་ཕྱིར་ན་མ་ཁྱབ། འདོད་མི་ནུས་ཏེ། འཁྲུལ་ཤེས་ཡིན་པའི་ཕྱིར་ཟེར་ན། ཁོ་རང་ལ། རྗེས་དཔག་གི་གཞལ་བྱ་སྣང་བ་ལྟར་དུ་གྲུབ་པར་ཐལ། རྗེས་དཔག་ལ་སྣང་བ་སྣང་བ་ལྟར་དུ་གྲུབ་པ་གང་ཞིག །རྗེས་དཔག་ལ་སྣང་ན་རྗེས་དཔག་གི་གཞལ་བྱ་ཡིན་དགོས། དེའི་གཞལ་བྱ་ཡིན་ན། དེ་ལ་སྣང་བས་ཁྱབ་པའི་ཕྱིར། འདོད་ན། ཚད་མའི་གཞལ་བྱ་སྣང་བ་ལྟར་དུ་གྲུབ་པར་ཐལ། འདོད་པའི་ཕྱིར། འདོད་ན། གཞལ་བྱ་སྣང་བ་ལྟར་དུ་གྲུབ་པར་ཐལ། འདོད་པའི་ཕྱིར། འདོད་ན། ཤེས་བྱ་སྣང་བ་ལྟར་དུ་གྲུབ་པར་ཐལ་ལོ། །འདོད་ན། གཞི་གྲུབ་ན། སྣང་བ་ལྟར་དུ་གྲུབ་དགོས་པར་ཐལ། འདོད་པའི་ཕྱིར། འདོད་ན། མེ་ལོང་ནང་གི་བྱད་བཞིན་གྱི་གཟུགས་བརྙན་ཆོས་ཅན། དེར་ཐལ། དེའི་ཕྱིར། ཁ་ཅིག་ན་རེ། རྣམ་མཁྱེན་ཆོས་ཅན། རང་ལ་སྣང་བ་ཞེས་སོགས་ཀྱི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རྣམ་མཁྱེན་གྱི་སྣང་ཡུལ་སྣང་བ་ལྟར་དུ་གྲུབ་པར་ཐལ། འདོད་པའི་ཕྱིར། འདོད་ན། རྣམ་མཁྱེན་གྱི་སྣང་ཡུལ་ཡིན་ན། སྣང་བ་ལྟར་དུ་གྲུབ་པས་ཁྱབ་པར་ཐལ། འདོད་པའི་ཕྱིར་ན་མ་ཁྱབ། འདོད་ན། མེ་ལོང་ནང་གི་བྱད་བཞིན་གྱི་གཟུགས་བརྙན་ཆོས་ཅན། དེར་ཐལ། དེའི་ཕྱིར། ཁ་ཅིག །རང་གི་འཁྲུལ་རྒྱུ་བཞི་པོ་གང་གིས་ཀྱང་འཁྲུལ་པར་མ་བསྐྱེད་ཅིང་། རང་གི་སྣང་ཡུལ་དུ་གྱུར་པའི་རང་མཚན་ལ་མ་འཁྲུལ་པའི་རིག་པ་དེ། མ་འཁྲུལ་བའི་ཤེས་པའི་མཚན་ཉིད་ཟེར་ན། ཚུར་མཐོང་གི་རྒྱུད་ཀྱི་ཚད་མ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་གྲུབ་སྟེ། ཚད་མ་ཡིན་པའི་ཕྱིར། གཉིས་པ་གྲུབ་སྟེ། རང་མཚན་ལ་མ་འཁྲུལ་བའི་རིག་པ་གང་ཞིག །རང་མཚན་ཁྱོད་ཀྱི་སྣང་ཡུལ་ཡིན་པའི་ཕྱིར། དང་པོ་གྲུབ་སྟེ། རང་གི་འཇུག་ཡུལ་ལ་མ་འཁྲུལ་བའི་རིག་པ་གང་ཞིག །རང་མཚན་ཁྱོད་ཀྱི་འཇུག་ཡུལ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། རྣམ་མཁྱེན་རྟོགས་པའི་མ་འཁྲུལ་བའི་ཤེས་པར་ཐལ། རྣམ་མཁྱེན་རྟོགས་པའི་ཚད་མ་གང་ཞིག། མ་འཁྲུལ་བའི་ཤེས་པ་ཡིན་པའི་ཕྱིར། ཁ་ཅིག །མིག་རབ་རིབ་ཀྱིས་བསླད་པ་ལ་བརྟེན་ནས་བྱུང་བའི་རིག་པ་ཡིན་ན། འཁྲུལ་ཤེས་ཡིན་པས་ཁྱབ་ཟེར་ན། མིག་རབ་རིབ་ཀྱིས་བསླད་པ་ལས་བྱུང་བའི་གཟུགས་འཛིན་མིག་ཤེས་ཆོས་ཅན། དེར་ཐལ། དེའི་ཕྱིར། འདོད་ན། ལོག་ཤེས་སུ་ཐལ། འདོད་པ་གང་ཞིག །རྟོག་མེད་ཀྱི་ཤེས་པ་ཡིན་པའི་ཕྱིར། འདོད་མི་ནུས་ཏེ། ཁྱོད་ཀྱི་ཞེན་ཡུལ་ཡོད་པའི་ཕྱིར་ཏེ། གཟུགས་དེ་ཁྱོད་ཀྱི་ཞེན་ཡུལ་ཡིན་པའི་ཕྱིར་རོ། །

༈ གཞུང་འདི་གྲུབ་མཐའ་སྨྲ་བ་གང་གི་དབང་དུ་བྱས་པ་ལ། ཁ་ཅིག་ན་རེ། གཞུང་འདི་མདོ་སེམས་ཐུན་མོང་བའི་རང་གཞུང་རྣམ་དག་ཡིན་ནོ་ཟེར་ན། དེ་མ་ཡིན་པར་ཐལ། གཞུང་འདིས་རྟོག་པ་དང་བྲལ་ཞིང་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་དུ་བསྟན་པ་གང་ཞིག །སེམས་ཙམ་པས་དེ་དེའི་མཚན་ཉིད་དུ་ཁས་མི་ལེན་པའི་ཕྱིར། དང་པོ་གྲུབ་སྟེ། དེ་དེ་ལྟར་དུ་སྟོན་པའི་བསྟན་བཅོས་རྣམ་འགྲེལ་གྱི་གཞུང་ཚིག་ཅིག་ཡོད་པའི་ཕྱིར། གཞན་ཡང་། གཞུང་འདི་དེ་མ་ཡིན་པར་ཐལ། འདིས་གཟུང་དོན་ཅན་གྱི་དབང་ཤེས་བསྟན་པ་གང་ཞིག །སེམས་ཙམ་པས་དེ་ཁས་མི་ལེན་པའི་ཕྱིར། དང་པོ་གྲུབ་སྟེ། མངོན་སུམ་རྟོག་དང་བྲལ་བ་ནི། ཞེས་པ་ནས། བྱེད་པ་ཡིན་ཞེས་བརྗོད་ཟིན་ཏོ། །ཞེས་པའི་བར་གྱིས་གཟུང་དོན་ཅན་གྱི་དབང་མངོན་བསྟན་པའི་ཕྱིར་ཏེ། དེའི་བར་གྱི་གཞུང་དེ་གཟུང་དོན་ཅན་གྱི་དབང་མངོན་འཆད་བྱེད་ཀྱི་གཞུང་ཡིན་པའི་ཕྱིར་ཏེ། སྔར་མྱོང་བ་ནི་འཛིན་པ་ན། །ཞེས་པ་ནས། བཞག་དང་བཟུང་ཞེས་བརྗོད་པ་ཡིན། །ཞེས་པའི་བར་འདི་གཟུང་དོན་ཅན་གྱི་ཡིད་མངོན་འཆད་བྱེད་ཀྱི་གཞུང་ཡིན་པའི་ཕྱིར། བྱས་པ་ལ་ཁོ་ན་རེ། མངོན་སུམ་རྟོག་དང་བྲལ་བར་ནི། །ཞེས་པ་ནས། བྱེད་པ་ཡིན་ཞེས་བརྗོད་ཟིན་ཏོ། །ཞེས་པའི་བར་གྱིས་གཟུང་དོན་ཅན་གྱི་དབང་མངོན་འཆད་པ་དེ་མི་འཐད་པར་ཐལ། གལ་ཏེ་མངོན་སུམ་ཤེས་སྐྱེད་ལ། །ཞེས་པ་ནས། གཟུང་དོན་ཅན་གྱི་དབང་མངོན་འཆད་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་ནས་དབང་ཤེས་ཀྱི་ཐ་སྙད་ལ་མི་འཐད་པའི་རྩོད་སྤོང་འཆད་པའི་ཕྱིར་རོ། །

རང་ལུགས་ཀྱི་མངོན་སུམ་གྱི་མཚན་ཉིད་སོགས་བཤད་པ།

༈ རང་ལུགས་བཞག་པ་ལ། མངོན་སུམ་ལ། མཚན་ཉིད། དབྱེ་བ། གྲངས་ངེས། གོ་རིམས། ཞར་ལ་རྟོག་བྲལ་མ་འཁྲུལ་བའི་དོན་བཤད་པ་དང་ལྔ། དང་པོ་ལ། ཚད་མ་མདོ་ལས་བསྟན་ཚུལ། རྣམ་འགྲེལ་ལས་བསྟན་ཚུལ། རྣམ་ངེས་ལས་བསྟན་ཚུལ། རིགས་ཐིག་ལས་བསྟན་ཚུལ་དང་བཞི། དང་པོ་ནི། དེ་ཉིད་ལས། རྟོག་པ་དང་བྲལ་ཞིང་མ་འཁྲུལ་པའི་རིག་པ། མངོན་སུམ་གྱི་མཚན་ཉིད་དུ་བསྟན་པ་ཡིན་ཏེ། དེ་ཉིད་ལས། མིང་དང་རིགས་སོགས་སྦྱོར་བ་ཡི། །རྟོག་པ་དང་བྲལ་མངོན་སུམ་མོ། །ཞེས་པས་མངོན་སུམ་གྱི་མཚན་ཉིད་ཀྱི་ཟུར་དུ་རྟོག་བྲལ་སྨོས་དགོས་པ་དེ་དངོས་སུ་བསྟན། མདོ་རང་འགྲེལ་ལས། ཤེས་པ་གང་ལ་རྟོག་པ་མེད་པ་དེ་ནི་མངོན་སུམ་མོ། །ཞེས་པས་དེའི་ཟུར་གྱི་རིག་པ་དེ་དངོས་སུ་བསྟན་ཅིང་། མངོན་སུམ་ལྟར་སྣང་རབ་རིབ་བཅས། །ཞེས་པས་མངོན་སུམ་གྱི་མཚན་ཉིད་ཀྱི་ཟུར་དུ་མ་འཁྲུལ་བ་སྨོས་དགོས་པ་དེ། དོན་གྱིས་བསྟན་པ་ཡིན་ཏེ། འདིར་ནི་བཞི་པ་དམིགས་བསལ་ཏེ། །ཞེས་སོགས་གསུངས་པའི་ཕྱིར། འོ་ན། རབ་རིབ་བཅས། ཞེས་སྨོས་པ་ལ་དགོས་པ་གང་ཡོད་ཅེ་ན། དེ་ལྟར་སྨོས་པ་ལ་དགོས་པ་ཡོད་དེ། རྟོག་མེད་ལོག་ཤེས་ཐམས་ཅད་མངོན་སུམ་ལྟར་སྣང་ཡིན་ནོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། བྱས་པ་ལ་ཁོ་ན་རེ། དེས་དེ་ལྟར་བསྟན་པ་མི་འཐད་པར་ཐལ། དེས་རབ་རིབ་ཅན་གྱི་དབང་ཤེས་ཁོ་ན་མངོན་སུམ་ལྟར་སྣང་དུ་བསྟན་པའི་ཕྱིར་ཟེར་ན། དེ་ཁོ་ན་བསྟན་པ་མི་འཐད་པར་ཐལ། དེས་རྟོག་མེད་ལོག་ཤེས་ཐམས་ཅད་མངོན་སུམ་ལྟར་སྣང་དུ་བསྟན་པའི་ཕྱིར། ཞེས་འཆད་པར་བྱེད་པ་ལ། དེ་ནི་ཉེར་གནས་ལས་སྐྱེད་བརྗོད། །ཅེས་གསུངས། འོ་ན། རབ་རིབ་བཅས་ཞེས་སྨོས་པ་ལ་དགོས་པ་ཅི་ཡོད་ཅེ་ན། དེ་ལ་དགོས་པ་ཡོད་དེ། རབ་རིབ་ཅན་གྱི་དབང་ཤེས་མངོན་སུམ་ལྟར་སྣང་དུ་བསྟན་པ་ལ་བརྟེན་ནས་རྟོག་མེད་ལོག་ཤེས་ཐམས་ཅད་མངོན་སུམ་ལྟར་སྣང་དུ་མཚོན་ནུས་པའི་ཕྱིར། ཞེས་འཆད་པར་བྱེད་པ་ལ། དེ་ལ་རབ་རིབ་འབའ་ཞིག་ནི། །ཞེས་སོགས་རྐང་པ་གཉིས་བྱུང་། གཉིས་པ་རྣམ་འགྲེལ་ལས་བསྟན་ཚུལ་ནི། དེ་ཉིད་ལས། རྟོག་པ་དང་བྲལ་ཞིང་མ་འཁྲུལ་བའི་རིག་པ། མངོན་སུམ་གྱི་མཚན་ཉིད་དུ་དོན་གྱིས་བསྟན་པ་ཡིན་ཏེ། མངོན་སུམ་རྟོག་དང་བྲལ་བར་ནི། །ཞེས་པས་མངོན་སུམ་གྱི་མཚན་ཉིད་ཀྱི་ཟུར་དུ་རྟོག་བྲལ་སྨོས་དགོས་པ་དེ་དངོས་སུ་བསྟན་ཅིང་། འདིར་ནི་བཞི་པ་དམིགས་བསལ་ཏེ། །ཞེས་པས་མངོན་སུམ་གྱི་མཚན་ཉིད་ཀྱི་ཟུར་དུ་མ་འཁྲུལ་བ་སྨོས་དགོས་པ་དེ་དོན་གྱིས་བསྟན་པའི་ཕྱིར། གསུམ་པ་ནི། དེ་ཉིད་ལས། མངོན་སུམ་རྟོག་བྲལ་མ་འཁྲུལ་བ། རབ་རིབ་དང་མྱུར་དུ་བསྐོར་བ་དང་གྲུར་ཞུགས་པ་ལ་སོགས་པའི་འཁྲུལ་པས་འཁྲུལ་པར་མི་སྐྱེད་ཅིང་། རྣམ་པར་རྟོག་པ་མེད་པའི་ཤེས་པ་གང་ཡིན་པ་དེ་ནི་མངོན་སུམ་མོ། །ཞེས་གསུངས་ལ་དེ་ཡང་མངོན་སུམ་ཞེས་པས་མཚོན་བྱ་དངོས་སུ་བསྟན། རྟོག་བྲལ་ཞེས་པས་མཚན་ཉིད་ཀྱི་ཟུར་དུ་རྟོག་བྲལ་སྨོས་དགོས་པ་དེ་དངོས་སུ་བསྟན། རབ་རིབ་དང་སོགས་ཀྱིས་དེའི་མཚན་ཉིད་ཀྱི་ཟུར་དུ་མ་འཁྲུལ་བ་སྨོས་དགོས་པ་དེ་དངོས་སུ་བསྟན། རྣམ་པར་རྟོག་པ་མེད་པའི་ཤེས་པ་ཞེས་པས། དེའི་མཚན་ཉིད་ཀྱི་ཟུར་དུ་རིག་པ་སྨོས་དགོས་པ་དེ་དངོས་སུ་བསྟན་པས། རྣམ་ངེས་སུ་རྟོག་པ་དང་བྲལ་ཞིང་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་དུ་དངོས་སུ་བསྟན་པ་ཡིན་པའི་ཕྱིར། འོ་ན། རབ་རིབ་དང་མྱུར་དུ་བསྐོར་བ་ཞེས་བཤད་ན་འཁྲུལ་རྒྱུ་བཞི་པོ་དེ་གང་ཞེ་ན། དེ་ལ་འཁྲུལ་རྒྱུ་རྟེན་ལ་ཡོད་པ། ཡུལ་ལ་ཡོད་པ། གནས་ལ་ཡོད་པ། དེ་མ་ཐག་རྐྱེན་ལ་ཡོད་པ་དང་བཞི། དང་པོ་ནི། མིག་རབ་རིབ་ཀྱིས་བསླད་པ་ལ་བརྟེན་ནས་སྐྲ་ཤད་འཛག་སྣང་གི་དབང་ཤེས་ལྟ་བུ། གཉིས་པ་ནི། འགལ་མེ་མྱུར་དུ་བསྐོར་བ་ལས་འཁོར་ལོ་སྣང་བའི་དབང་ཤེས་ལྟ་བུ། གསུམ་པ་ནི། གྲུར་ཞུགས་པ་ལས་ལྗོན་ཤིང་འགྲོ་བར་སྣང་བའི་དབང་ཤེས་ལྟ་བུ། བཞི་པ་ནི། ཡིད་ཞེ་སྡང་གིས་དཀྲུགས་པ་ལས་ས་གཞི་ཁ་དོག་དམར་པོར་སྣང་བའི་དབང་ཤེས་ལྟ་བུ་ལ་བྱེད་པ་ཡིན་ནོ། །བཞི་པ་ནི། རིགས་ཐིགས་ལས། རྟོག་པ་དང་བྲལ་ཞིང་མ་འཁྲུལ་བའི་རིག་པ་དེའི་མཚན་ཉིད་དུ་དངོས་སུ་བསྟན་པ་ཡིན་པའི་ཕྱིར་ཏེ། དེ་ཉིད་ལས། མངོན་སུམ་ནི་རྟོག་པ་དང་བྲལ་ཞིང་མ་འཁྲུལ་བའི་རིག་པའོ། །ཞེས་པས་རྟོག་པ་དང་བྲལ་ཞིང་མ་འཁྲུལ་བའི་རིག་པ་དེའི་མཚན་ཉིད་དུ་དངོས་སུ་བསྟན་པའི་ཕྱིར། འོ་ན། རྟོག་པ་དང་བྲལ་ཞིང་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་ཡིན་ན། དེ་མདོ་སེམས་ཐུན་མོང་བའི་དབང་དུ་བྱས་པ་ཡིན་ནམ། དེ་གཉིས་ཀྱི་ནང་ནས་མདོ་སྡེ་པ་ཁོ་ནའི་དབང་དུ་བྱས་པ་ཡིན་ཞེ་ན། འདི་སློབ་དཔོན་དུལ་བ་ལྷའི་བཞེད་པ་ལ། མདོ་སེམས་ཐུན་མོང་བའི་དབང་དུ་བྱས་པ་ཡིན་ཏེ། རྟོག་པ་དང་བྲལ་ཞིང་མ་འཁྲུལ་བའི་རིག་པ་ཞེས་པའི་མ་འཁྲུལ་བའི་རིག་པའི་དོན་དེ་མི་བསླུ་བའི་རིག་པ་ལ་བྱེད་པ་སེམས་ཙམ་པས་ཀྱང་མངོན་སུམ་གྱི་ཚད་མ་ཡིན་ན། མི་བསླུ་བའི་རིག་པ་ཡིན་པས་ཁྱབ་པ་ཁས་ལེན་པའི་ཕྱིར་ཟེར། འོ་ན། མ་འཁྲུལ་བའི་རིག་པ་ཞེས་པའི་དོན་མི་བསླུ་བའི་རིག་པ་ལ་བྱེད་པ་མི་འཐད་པར་ཐལ། ཇི་བཞིན་མངོན་ཞེན་མིན་པའི་ཕྱིར། །ཞེས་སོགས་ཀྱིས་རྗེས་དཔག་འཁྲུལ་ཤེས་སུ་བསྟན་པའི་ཕྱིར། །

༈ རང་ལུགས་ནི། རྟོག་པ་དང་བྲལ་ཞིང་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་ཡིན་པ་དེ། མདོ་སེམས་གཉིས་ཀྱི་ནང་ནས་མདོ་སྡེ་པ་ཁོ་ནའི་དབང་དུ་བྱས་པ་ཡིན་ཏེ། སེམས་ཙམ་པས་ཚུར་མཐོང་གི་རྒྱུད་ཀྱི་དབང་ཤེས་ཡིན་ན། འཁྲུལ་ཤེས་ཡིན་པས་ཁྱབ་པ་ཁས་ལེན་པའི་ཕྱིར། འོ་ན། སེམས་ཙམ་པས་འདོད་པའི་མངོན་སུམ་གྱི་མཚན་ཉིད་ཅིག་སྡེ་བདུན་གང་ནས་ཀྱང་མ་བཤད་པར་འགྱུར་རོ་ཞེ་ན་སྐྱོན་མེད་དེ། རྣམ་ངེས་ལས། གཞན་ནི་བག་ཆགས་བརྟན་པའི་ཕྱིར། །འཁོར་བ་ཇི་སྲིད་མི་འབྲལ་བར། །ཞེས་དང་། ཐ་སྙད་མི་བསླུ་བ་ལ་བརྟེན་ནས་འདིར་ཚད་མ་ཡིན་ལ། ཞེས་རྟོག་པ་དང་བྲལ་ཞིང་བག་ཆགས་བརྟན་བྱུང་གི་རིག་པ་དེ་སེམས་ཙམ་པས་མངོན་སུམ་གྱི་མཚན་ཉིད་དུ་འདོད་པར་བསྟན་པའི་ཕྱིར། དེ་སྐད་དུ་ཡང་རྗེ་བཙུན་ས་པཎ་གྱིས། བག་ཆགས་བརྟན་དང་མི་བརྟན་ལས། །བདེན་དང་རྫུན་པའི་རྣམ་གཞག་བྱེད། །ཅེས་གསུངས་པའི་ཕྱིར། དེས་ན་སེམས་ཙམ་པས་ཟླ་བ་གཉིས་སྣང་གི་དབང་ཤེས་ལྟ་བུ་དེ་བག་ཆགས་བརྟན་བྱུང་གི་རིག་པ་མ་ཡིན་པར་ཁས་ལེན་པ་ཡིན་ཏེ། དེས་ཟླ་བ་གཉིས་སྣང་གི་དབང་ཤེས་ཀྱི་བག་ཆགས་དེ་བག་ཆགས་མི་བརྟན་པར་ཁས་ལེན་པའི་ཕྱིར། དེས་དེ་འདྲའི་དབང་ཤེས་རྒྱུན་མི་བརྟན་པའི་དབང་ཤེས་སུ་ཁས་ལེན་པའི་ཕྱིར། སེམས་ཙམ་པས་གཟུགས་འཛིན་དབང་ཤེས་ལྟ་བུ་དེ། བག་ཆགས་བརྟན་བྱུང་གི་རིག་པར་ཁས་ལེན་པ་ཡིན་ཏེ། དེས་གཟུགས་མཐོང་བ་གོམས་པའི་བག་ཆགས་དེ་བག་ཆགས་བརྟན་པར་ཁས་ལེན་པའི་ཕྱིར། དེས་གཟུགས་འཛིན་དབང་ཤེས་དེ་རྒྱུན་བརྟན་པའི་དབང་ཤེས་སུ་ཁས་ལེན་པའི་ཕྱིར། འོ་ན། རྟོག་པ་དང་བྲལ་ཞིང་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་ཡིན་ན། མངོན་སུམ་གྱི་མཚན་ཉིད་གྱི་ཟུར་དུ་རྟོག་བྲལ་དང་མ་འཁྲུལ་བའི་རིག་པ་གཉིས་ཀ་སྨོས་པ་ལ་དགོས་པ་གང་ཡོད་ཅེ་ན། དེ་ཡང་མངོན་སུམ་གྱི་མཚན་ཉིད་ཀྱི་ཟུར་དུ་མ་འཁྲུལ་བའི་རིག་པ་སྨོས་པ་དེ་ནི་གཙོ་བོར་མངོན་སུམ་གྱི་རིགས་མི་མཐུན་སེལ་བའི་དབང་དུ་བྱས་པ་ཡིན་ཏེ། དེ་ལྟར་སྨོས་པ་དེ་ནི་གཙོ་བོར་རྗེས་དཔག་མ་འཁྲུལ་བའི་རིག་པ་ཡིན་པ་བཅད་པའི་ཕྱིར་དུ་སྨོས་པ་ཡིན་པའི་ཕྱིར། དེའི་མཚན་ཉིད་ཀྱི་ཟུར་དུ་རྟོག་བྲལ་སྨོས་པ་ནི། མངོན་སུམ་ལ་གཙོ་བོར་ལོག་རྟོག་སེལ་བའི་དབང་དུ་བྱས་པ་ཡིན་ཏེ། དེ་ལྟར་སྨོས་པ་དེ་ནི་རིགས་པ་ཅན་པ་ལ་སོགས་པས་ཟླ་བ་གཉིས་སྣང་གི་དབང་ཤེས་དེ་རྟོག་མེད་ཀྱི་ཤེས་པ་ཡིན་པས་མངོན་སུམ་ཡིན་ནམ་སྙམ་པའི་ལོག་རྟོག་ཡོད་པས། ལོག་རྟོག་དེ་གཙོ་བོར་སེལ་བའི་ཕྱིར་དུ་སྨོས་པའི་ཕྱིར་ཏེ། མངོན་སུམ་གྱི་མཚན་ཉིད་ཀྱི་ཟུར་དུ་རྟོག་བྲལ་སྨོས་པ་དང་མ་འཁྲུལ་པའི་རིག་པ་སྨོས་པ་གཉིས་ཀས་མངོན་སུམ་གྱི་རིགས་མི་མཐུན་དང་ལོག་རྟོག་སེལ་བ་ཡིན་ནོ། །གཉིས་པ། མངོན་སུམ་ལ་དབྱེ་ན། དབང་མངོན། ཡིད་མངོན། རང་རིག་མངོན་སུམ། རྣལ་འབྱོར་མངོན་སུམ་དང་བཞི་ཡོད་དེ། རྗེ་བཙུན་ས་པཎ་གྱིས། མངོན་སུམ་བཞི་པོ་མདོ་སྡེའི་ལུགས། །བྱེ་བྲག་སྨྲ་གསུམ་རྣམ་རིག་གཉིས། །ཞེས་གསུངས་པའི་ཕྱིར། གསུམ་པ་གྲངས་ངེས་ནི། མངོན་སུམ་དེ་ལ་དེ་བཞིར་གྲངས་ངེས་པ་ཡིན་ཏེ། དེ་ལ་དེ་བཞིར་དབྱེར་ཡོད། དེ་ལས་མང་མི་དགོས་ཤིང་དེ་བཞི་ལས་ཉུང་ན་མི་འདུ་བའི་ཕྱིར། བཞི་པ་གོ་རིམ་ནི། དབང་མངོན་སོགས་གསུམ་དང་པོར་བསྟན། དེའི་རྗེས་སུ་རྣལ་འབྱོར་མངོན་སུམ་སྟོན་པའི་གོ་རིམ་ནི། དམན་མཆོག་གི་རིམ་པའི་དབང་དུ་བྱས་པ་ཡིན་ཏེ། དང་པོ་གསུམ་རྒྱུད་ལྡན་གྱི་སོ་སྐྱེ་དང་། འཕགས་པ་གཉིས་ཀ་ཡོད་པས་དམན་པ་དེ་དང་པོར་བསྟན། རྣལ་འབྱོར་མངོན་སུམ་དེ་འཕགས་པ་ཁོ་ནའི་རྒྱུད་ལ་ཡོད་པས་མཆོག་དེ་རྗེས་སུ་བསྟན་པ་ཡིན་པའི་ཕྱིར། དང་པོ་གསུམ་པོ་དེ་ཡང་དང་པོར་དབང་མངོན་དང་ཡིད་མངོན་བསྟན། དེའི་རྗེས་སུ་རང་རིག་མངོན་སུམ་སྟོན་པའི་གོ་རིམ་དེ། མྱོང་བྱ་མྱོང་བྱེད་ཀྱི་གོ་རིམ་གྱི་དབང་དུ་བྱས་པ་ཡིན་ཏེ། དབང་ཡིད་གཉིས་རང་ཉམས་སུ་མྱོང་བའི་རང་གི་མྱོང་བྱ་ཡིན་པའི་རྒྱུ་མཚན་གྱིས་དང་པོར་བསྟན། དེ་ཉམས་སུ་མྱོང་བའི་རང་རིག་དེ་དེ་གཉིས་མྱོང་བྱེད་ཀྱི་ཤེས་པ་ཡིན་པས་རྗེས་སུ་བསྟན་པ་ཡིན་པའི་ཕྱིར། དང་པོ་དེ་གཉིས་ཀྱང་དབང་མངོན་དང་པོར་བསྟན། དེའི་རྗེས་སུ་ཡིད་མངོན་སྟོན་པའི་གོ་རིམ་ནི། རྒྱུ་འབྲས་དོན་གྱི་རིམ་པའི་དབང་དུ་བྱས་པ་ཡིན་ཏེ། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་དེ་དེའི་རྒྱུད་ཀྱི་གཟུགས་འཛིན་ཡིད་མངོན་གྱི་རྒྱུ་ཡིན་པའི་ཕྱིར། ཞར་ལ་རྟོག་བྲལ་མ་འཁྲུལ་པའི་དོན་བཤད་པ་ནི། སྒྲ་དོན་འདྲེས་རུང་དུ་འཛིན་པའི་རིགས་སུ་གནས་པའི་ཞེན་རིག་དེ་རྟོག་པའི་མཚན་ཉིད། དེ་དང་བྲལ་བ་རྟོག་བྲལ་གྱི་མཚན་ཉིད་ཡིན་ནོ། །སྒྲ་སྤྱི་དང་དོན་སྤྱིའི་ཁྱད་པར་གང་ཞེ་ན། དེ་ཡང་བུམ་པའི་བརྡ་ལ་མ་བྱང་པའི་བྱིས་པ་ཆུང་ངུའི་རྒྱུད་ཀྱི་བུམ་པ་ཞེས་པའི་ངག་ལ་བརྟེན་ནས་སྐྱེས་པའི་བུམ་འཛིན་རྟོག་པ་ལ་བུམ་པར་སྣང་བ་དེ་སྒྲ་སྤྱི་རྐྱང་པ་ཡིན་ཏེ། དེ་འདྲའི་རྟོག་པ་དེ་ལ་བུམ་པ་ལྟོ་ལྡིར་བར་མི་སྣང་བའི་ཕྱིར། དེའི་བརྡ་ལ་བྱང་པའི་བྱིས་པ་ཆུང་ངུའི་རྒྱུད་ཀྱི་བུམ་འཛིན་དབང་མངོན་ལ་བརྟེན་ནས་སྐྱེས་པའི་བུམ་པར་སྣང་བ་དེ་དོན་སྤྱི་ཡིན་ཏེ། དེ་འདྲའི་བུམ་འཛིན་རྟོག་པ་ལ་བུམ་པ་ལྟོ་ལྡིར་བར་སྣང་བའི་ཕྱིར། བུམ་པའི་བརྡ་ལ་བྱང་པའི་བརྡ་བྱང་རྒན་པོའི་རྒྱུད་ཀྱི་བུམ་འཛིན་མིག་ཤེས་ལ་བརྟེན་ནས་སྐྱེས་པའི་བུམ་འཛིན་རྟོག་པ་ལ་བུམ་པར་སྣང་བ་དེ་སྒྲ་སྤྱི་དང་དོན་སྤྱི་གཉིས་ཀ་ཡིན། མངོན་སུམ་དང་རྗེས་དཔག་གང་རུང་གང་ཞིག །རང་ཉིད་འཁྲུལ་རྒྱུ་བཞི་པོ་གང་རུང་གིས་འཁྲུལ་པར་མ་སྐྱེད་ཅིང་། རང་གི་སྣང་ཡུལ་དུ་གྱུར་པའི་རང་མཚན་ལ་མ་འཁྲུལ་བའི་རིག་པ་དེ། མ་འཁྲུལ་བའི་ཤེས་པའི་མཚན་ཉིད་ཡིན་ནོ། །

༈ རྩོད་པ་སྤོང་བ་ལ། ཁ་ཅིག་ན་རེ། རྟོག་པ་དང་བྲལ་ཞིང་མ་འཁྲུལ་པའི་རིག་པ་དེ། མདོ་སེམས་གཉིས་ཀྱི་ནང་ནས་མདོ་སྡེ་པ་ཁོ་ནས་མངོན་སུམ་གྱི་མཚན་ཉིད་དུ་ཁས་ལེན་པ་མ་ཡིན་པར་ཐལ། སེམས་ཙམ་རྣམ་བདེན་པས་ཀྱང་དེ་འདྲའི་རིག་པ་མངོན་སུམ་གྱི་མཚན་ཉིད་དུ་ཁས་ལེན་པའི་ཕྱིར་ཏེ། དེས་མངོན་སུམ་ལ་རྟོག་བྲལ་གྱིས་ཁྱབ་པ་ཡང་ཁས་ལེན། དེས་དེ་ལ་མ་འཁྲུལ་བའི་ཁྱབ་པ་ཡང་ཁས་ལེན་པའི་ཕྱིར་ན་མ་ཁྱབ་བོ། །འོ་ན། མདོ་སེམས་གཉིས་ཀས་རྟོག་པ་དང་བྲལ་ཞིང་རང་གི་སྣང་ཡུལ་གྱི་གཙོ་བོ་ལ་མ་འཁྲུལ་བའི་རིག་པ་དེ། མངོན་སུམ་གྱི་མཚན་ཉིད་དུ་ཁས་ལེན་པར་ཐལ། སེམས་ཙམ་རྣམ་བདེན་པ་དང་མདོ་སྡེ་པ་གཉིས་ཀས་རྟོག་པ་དང་བྲལ་ཞིང་མ་འཁྲུལ་པའི་རིག་པ་དེ་དེའི་མཚན་ཉིད་དུ་ཁས་ལེན་པའི་ཕྱིར། རྟགས་ཁས། འདོད་ན། མདོ་སེམས་གཉིས་མངོན་སུམ་གྱི་མཚན་ཉིད་ལ་མཐུན་པར་ཐལ། འདོད་པའི་ཕྱིར། འདོད་ན། དེ་གཉིས་དབང་མངོན་གྱི་མཚན་ཉིད་ལ་མཐུན་པར་ཐལ་ལོ། །འདོད་ན། དེ་གཉིས་ཚུར་མཐོང་གི་རྒྱུད་ཀྱི་དབང་མངོན་གྱི་མཚན་ཉིད་ལ་མཐུན་པར་ཐལ་ལོ། །འདོད་ན། དེ་གཉིས་དེའི་མཚན་གཞི་ལ་མཐུན་པར་ཐལ་ལོ། །འདོད་པའི་ཕྱིར། འདོད་མི་ནུས་ཏེ། སེམས་ཙམ་པས་དེའི་རྒྱུད་ཀྱི་དབང་མངོན་འཁྲུལ་ཤེས་སུ་ཁས་ལེན་པའི་ཕྱིར། མདོ་སྡེ་པས་དེ་མ་འཁྲུལ་པའི་ཤེས་པར་ཁས་ལེན་པའི་ཕྱིར། བྱས་པ་ལ་ཁོ་ན་རེ། མདོ་སེམས་གཉིས་མི་རྟག་པའི་མཚན་ཉིད་ལ་མཐུན་པར་ཐལ། དེ་གཉིས་ཀས་སྐད་ཅིག་མ་མི་རྟག་པའི་མཚན་ཉིད་དུ་ཁས་ལེན་པའི་ཕྱིར། འདོད་ན། དེ་གཉིས་དེའི་མཚན་གཞི་ལ་མཐུན་པར་ཐལ། འདོད་པའི་ཕྱིར། ཁྱབ་པ་ཁས། འདོད་ན། དེ་གཉིས་མི་རྟག་པའི་མཚན་ཉིད་མཚན་གཞི་མཐའ་དག་མཐུན་པར་ཐལ། འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། མདོ་སྡེ་པས་ཕྱི་དོན་མི་རྟག་པའི་མཚན་གཞིར་ཁས་ལེན། སེམས་ཙམ་པས་དེ་མ་ཡིན་པར་ཁས་ལེན་པའི་ཕྱིར། ཁོ་ན་རེ། བུམ་པའི་དོན་སྤྱི་དངོས་པོ་མ་ཡིན་པར་རྟོགས་པའི་རྗེས་དཔག་དེ། རང་གི་སྣང་ཡུལ་གྱི་གཙོ་བོ་ལ་མ་འཁྲུལ་པའི་རིག་པ་ཡིན་པར་ཐལ། དེ་རང་གི་སྣང་ཡུལ་གྱི་གཙོ་བོར་གྱུར་པའི་སྤྱི་མཚན་ལ་མ་འཁྲུལ་པའི་རིག་པ་ཡིན་པའི་ཕྱིར། དེ་བུམ་པའི་དོན་སྤྱི་དངོས་པོ་མ་ཡིན་པར་གྲུབ་པ་དེ་ལ་མ་འཁྲུལ་བའི་རིག་པ་གང་ཞིག །བུམ་པའི་དོན་སྤྱི་དངོས་པོ་མ་ཡིན་པར་གྲུབ་པ་དེ། དེའི་སྣང་ཡུལ་གྱི་གཙོ་བོ་ཡིན་པའི་ཕྱིར། ཕྱི་མ་གྲུབ་སྟེ། དེ་དེའི་སྣང་ཡུལ་གང་ཞིག །དེ་དེའི་ཡུལ་གྱི་གཙོ་བོ་ཡིན་པའི་ཕྱིར་ན་མ་ཁྱབ། རྩ་བར་འདོད་ན། དེ་རང་གི་སྣང་ཡུལ་ལ་མ་འཁྲུལ་པའི་དེར་ཐལ། འདོད་པའི་ཕྱིར། འདོད་ན། བུམ་འཛིན་རྟོག་པ་དེ་རང་གི་སྣང་ཡུལ་ལ་དེར་ཐལ། འདོད་པའི་ཕྱིར། ཁ་ཅིག་ན་རེ། སེམས་ཙམ་པ་དེས་ཟླ་བ་གཉིས་སྣང་གི་དབང་ཤེས་དེ། བག་ཆགས་བརྟན་བྱུང་གི་རིག་པར་ཁས་ལེན་པར་ཐལ། དེས་ཟླ་བ་གཉིས་སྣང་གི་དབང་ཤེས་ཉམས་སུ་མྱོང་བའི་རང་རིག་དེ། བག་ཆགས་བརྟན་བྱུང་གི་རིག་པར་ཁས་ལེན་པ་གང་ཞིག །དེས་དེའི་རྒྱུར་གྱུར་པའི་བག་ཆགས་དང་། དེ་ཉམས་སུ་མྱོང་བའི་རང་རིག་གི་རྒྱུར་གྱུར་པའི་བག་ཆགས་གཉིས་ཡིན་ཁྱབ་མཉམ་དུ་ཁས་ལེན་པའི་ཕྱིར་ན་མ་ཁྱབ། རྟགས་གྲུབ་སྟེ། སེམས་ཙམ་པ་དེས་དེ་གཉིས་ཀྱི་རྒྱུ་གཉིས་ཡིན་ཁྱབ་མཉམ་དུ་ཁས་ལེན་པའི་ཕྱིར། །

མིང་སྦྱོར་དང་དོན་སྦྱོར་རྟོག་པའི་ངོ་བོ་བཤད་པ།

༈ ཁྱད་པར་དང་ནི་ཁྱད་པར་གཞི། །ཞེས་སོགས་རྐང་པ་ཕྱེད་དང་ལྔའི་སྐབས་སུ། སྦྱོར་བ་ནི། ལྷས་སྦྱིན་གྱི་རྒྱུད་ཀྱི་ཆོས་བཞི་བསྡོམས་ནས་འཛིན་པའི་རྟོག་པ་ཆོས་ཅན། རང་གི་རྒྱུར་གྱུར་པའི་ཆོས་བཞི་སོ་སོར་འཛིན་པའི་བློ་སྔོན་དུ་སོང་བ་ཡིན་ཏེ། ཆོས་བཞི་བསྡོམས་ནས་འཛིན་པའི་ཞེན་རིག་དོན་མཐུན་ཡིན་པའི་ཕྱིར། དཔེར་ན། སྐྱེས་བུ་དབྱུག་པ་ཅན་དུ་འཛིན་པའི་ཞེན་རིག་དོན་མཐུན་སྐྱེ་བ་ལ། སྐྱེས་བུ་དང་དབྱུག་པ་གཉིས་སོ་སོར་རྟོགས་པའི་བློ་སྔོན་དུ་འགྲོ་དགོས་པའི་དཔེ་འདི་བཞིན་ནོ། །ཆོས་བཞི་པོ་དེ་གང་ཞེ་ན། ཁྱད་གཞི། ཁྱད་ཆོས། དེ་གཉིས་ཀྱི་འབྲེལ་པ། དེ་གཉིས་ཀྱི་ཐ་སྙད་རྣམས་ལ་བྱེད་པ་ཡིན་ནོ། །

༈ མཐའ་དཔྱད་པ་ལ། ཁ་ཅིག་ན་རེ། སྒྲ་དོན་འདྲེས་རུང་དུ་འཛིན་པའི་ཞེན་རིག་རྟོག་པའི་མཚན་ཉིད། མིང་དོན་བསྲེས་ནས་འཛིན་པའི་ཞེན་རིག་མིང་སྦྱོར་རྟོག་པའི་མཚན་ཉིད། ཁྱད་གཞི་ལ་ཁྱད་ཆོས་སྦྱར་ནས་འཛིན་པའི་ཞེན་རིག་དེ། དོན་སྦྱོར་རྟོག་པའི་མཚན་ཉིད་ཡིན་ནོ་ཟེར་ན། དེ་ལ་རྗེས་དཔག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། དེ་མ་འདྲེས་པར་འཛིན་པའི་ཞེན་རིག་ཡིན་པའི་ཕྱིར། རྟགས་གྲུབ་སྟེ། དེ་མ་འདྲེས་པ་དེ་རྗེས་དཔག་གི་གཞལ་བྱ་ཡིན་པའི་ཕྱིར། གཞན་ཡང་། མིང་སྦྱོར་རྟོག་པ་ཡིན་ན། མིང་དང་དོན་གཉིས་འཛིན་པའི་རྟོག་པ་ཡིན་དགོས་པར་ཐལ། དེ་ཡིན་ན། མིང་དོན་བསྲེས་ནས་འཛིན་པའི་ཞེན་རིག་ཡིན་དགོས་པའི་ཕྱིར་ཏེ། མཚན་ཉིད་གཉིས་པ་འཐད་པའི་ཕྱིར། འདོད་ན། དེ་ཡིན་ན། མིང་འཛིན་རྟོག་པ་ཡིན་དགོས་པར་ཐལ། འདོད་པའི་ཕྱིར། འདོད་ན། བུམ་འཛིན་རྟོག་པ་ཆོས་ཅན། དེར་ཐལ། དེའི་ཕྱིར། གཞན་ཡང་། དོན་སྦྱོར་རྟོག་པ་ཡིན་ན། ཁྱད་གཞི་ཁྱད་ཆོས་གཉིས་ཀ་འཛིན་པའི་རྟོག་པ་ཡིན་དགོས་པར་ཐལ། དེ་ཡིན་ན། ཁྱད་གཞི་དང་ཁྱད་ཆོས་སྦྱར་ནས་འཛིན་པའི་རྟོག་པ་ཡིན་དགོས་པའི་ཕྱིར་ཏེ། མཚན་ཉིད་གསུམ་པ་འཐད་པའི་ཕྱིར། འདོད་ན། དེ་ཡིན་ན། ཁྱད་གཞི་འཛིན་པའི་རྟོག་པ་ཡིན་དགོས་པར་ཐལ། འདོད་པའི་ཕྱིར། འདོད་མི་ནུས་ཏེ། ཁྱད་ཆོས་འཛིན་པའི་དོན་སྦྱོར་རྟོག་པ་ཡིན་པའི་ཕྱིར། །

༈ རང་ལུགས་ནི། རྟོག་པའི་མཚན་ཉིད་གོང་དུ་བསྟན་ནས། ཁྱད་གཞི་ལ་ཁྱད་ཆོས་སྦྱར་ནས་འཛིན་པའི་རིགས་སུ་གནས་པའི་ཞེན་རིག་དེ་དོན་སྦྱོར་རྟོག་པའི་མཚན་ཉིད་ཡིན། མཚན་གཞི་ནི། སྐྱེས་བུ་དབྱུག་པ་ཅན་འཛིན་པའི་རྟོག་པ་ལྟ་བུའོ། །མིང་དོན་བསྲེས་ནས་འཛིན་པའི་རིགས་སུ་གནས་པའི་ཞེན་རིག་དེ། མིང་སྦྱོར་རྟོག་པའི་མཚན་ཉིད། མཚན་གཞི་བུམ་པའི་བརྡ་ལ་བྱང་པའི་སྐྱེས་བུའི་རྟོག་པ་ལྟ་བུའོ། །

༈ དེ་ཕྱིར་མིག་དང་གཟུགས་དག་ལ། །ཞེས་སོགས་རྐང་པ་གཉིས་གང་ལས་འཕྲོས་ན། གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རིགས་པ་བཤད་པ་ལ་ཡང་། གཟུགས་འཛིན་དབང་ཤེས་རྟོག་བྲལ་དུ་སྒྲུབ་པའི་རིགས་པ་སྤྱིར་བཤད་པ་དང་། བྱེ་བྲག་ཏུ་དེ་དོན་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་བཤད་པ་དང་། དེ་མིང་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་བཤད་པ་དང་། དེ་རྟོག་པ་ཡིན་པ་ལ་གནོད་བྱེད་བསྟན་པ་དང་བཞི་ཡོད་པ་ལས། གཟུགས་འཛིན་དབང་ཤེས་དོན་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་དེ། ཁྱད་པར་དང་ནི་ཁྱད་པར་གཞི། །ཞེས་པ་ནས། ལྡོག་པ་ཉིད་ལ་སྒྲ་སྦྱོར་ཕྱིར། །ཞེས་པའི་བར་གྱིས་བཤད་ནས། གཟུགས་འཛིན་དབང་ཤེས་མིང་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་དེ་འཆད་པར་བྱེད་པ་ལ། བརྡ་དྲན་པ་ཡི་རྒྱུ་ཅན་གྱི། །ཞེས་པ་ནས། འཇུག་འགྱུར་ཕྱི་རོལ་མཐོང་མི་འགྱུར། །ཞེས་པའི་བར་བྱུང་། དེ་ཡང་གཟུགས་འཛིན་དབང་ཤེས་དེ་མིང་སྦྱོར་རྟོག་པ་མ་ཡིན་ཏེ། དེ་སྒྲ་དོན་འདྲེས་རུང་དུ་འཛིན་པའི་རིགས་སུ་གནས་པའི་ཞེན་རིག་གིས་སྟོང་པའི་ཕྱིར། དེ་གཟུགས་ལ་བརྡ་སྦྱོར་བའི་རྟོག་པ་མ་ཡིན་པའི་ཕྱིར་དང་། དེ་ཕྱི་རོལ་དོན་གྱི་གཟུགས་མངོན་སུམ་དུ་རྟོགས་པའི་ཤེས་པ་ཡིན་པའི་ཕྱིར། ཞེས་པའི་རིགས་པ་གསུམ་ཡོད་པ་ལས། དང་པོ་དེ་འཆད་པར་བྱེད་པ་ལ། བརྡ་དྲན་པ་ཡི་ཞེས་སོགས་རྐང་པ་གཉིས་བྱུང་། གཉིས་པ་འཆད་པར་བྱེད་པ་ལ། གཞན་ལ་འཇུག་སེམས་ཅན་གྱི་ཡང་། །ཞེས་སོགས་རྐང་པ་བཞི་བྱུང་། རིགས་པ་གསུམ་པ་འཆད་པར་བྱེད་པ་ལ། གང་ལ་སྒྲ་ནི་ངེས་འགོད་པ། །ཞེས་སོགས་རྐང་པ་བཞི་བྱུང་། གཟུགས་འཛིན་དབང་ཤེས་མིང་སྦྱོར་རྟོག་པ་ཡིན་པ་ལ་གནོད་བྱེད་སྟོན་པ་ལ། རྒྱས་པར་བཤད་པ་དང་། དོན་བསྡུ་བ་གཉིས། དང་པོ་ལ། གཟུགས་འཛིན་དབང་ཤེས་མྱོང་བྱེད་ཀྱི་ཤེས་པ་མེད་པར་ཐལ་བ་དང་། འདས་པའི་དུས་ཀྱི་དོན་རིག་པའི་མངོན་སུམ་མེད་པར་ཐལ་བ་དང་། རང་མཚན་མངོན་སུམ་གྱིས་རྟོགས་པའི་ཚད་མ་མེད་པར་ཐལ་བ་དང་། གཟུགས་འཛིན་དབང་ཤེས་ཀྱིས་གཟུགས་འཛིན་པ་གཟུགས་ཀྱི་བརྡ་དྲན་པ་ལ་ལྟོས་པར་ཐལ་བའི་རིགས་པ་བཞི་ཡོད་པ་ལས། དང་པོ་ནི། འོ་ན། གཟུགས་འཛིན་དབང་ཤེས་མྱོང་བྱེད་ཀྱི་ཤེས་པ་མེད་པར་ཐལ། རྟོག་མེད་ཀྱི་ཤེས་པ་མེད་པའི་ཕྱིར། ཤེས་པ་ཡིན་ན་རྟོག་པ་ཡིན་དགོས་པའི་ཕྱིར། རྟགས་ཁས་བླངས། ཞེས་འཆད་པར་བྱེད་པ་ལ། གཟུགས་ལ་གཟུགས་ཞེས་མཐོང་བ་ནི། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་ཁོ་ན་རེ། གཟུགས་འཛིན་དབང་ཤེས་མྱོང་བྱེད་ཀྱི་ཤེས་པ་ཡོད་དེ། གཟུགས་འཛིན་དབང་ཤེས་དེ་ཀ་ཁོ་རང་མྱོང་བྱེད་ཀྱི་ཤེས་པ་ཡིན་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། དེ་ཉིད་ཀྱིས་མྱོང་ཡིན་ན་ནི། །ཞེས་པ་འདི་བྱུང་། དེ་འགོག་པར་བྱེད་པ་ལ། རྟོག་གཉིས་ཅིག་ཅར་མཐོང་བ་མེད། །ཅེས་པ་འདི་བྱུང་། གཟུགས་འཛིན་དབང་ཤེས་ཁོ་ཁོ་རང་མྱོང་བྱེད་ཀྱི་ཤེས་པ་ཡིན་པ་བཀག་པ་ལ་དགོས་པ་གང་ཡོད་ཅེ་ན། དེ་ལྟར་བཀག་པ་ལ་དགོས་པ་ཡོད་དེ། གཟུགས་འཛིན་དབང་ཤེས་ལ་མྱོང་བྱེད་དོན་གཞན་ཡོད་པ་བཀག་པར་བྱ་བའི་ཆེད་ཡིན་པའི་ཕྱིར། ཞེས་འཆད་པར་བྱེད་པ་ལ། དེས་ནི་དུས་མཚུངས་རྣམ་པར་ཤེས། །ཞེས་པ་རྐང་པ་གཉིས་བྱུང་། གལ་ཏེ་ཁོ་ན་རེ། གཟུགས་འཛིན་དབང་ཤེས་མྱོང་བྱེད་ཀྱི་ཤེས་པ་མེད་དོ་ཞེ་ན། འོ་ན། གཟུགས་འཛིན་དབང་ཤེས་དྲན་པའི་ཤེས་པ་མེད་པར་ཐལ། གཟུགས་འཛིན་དབང་ཤེས་མྱོང་བྱེད་ཀྱི་ཤེས་པ་མེད་པའི་ཕྱིར། རྟགས་ཁས། ཞེས་འཆད་པར་བྱེད་པ་ལ། འདས་པ་ལ་ནི་དྲན་པར་འགྱུར། །ཞེས་སོགས་རྐང་པ་གཉིས་བྱུང་། གཞན་ཡང་། ལྷས་སྦྱིན་གྱིས་མཆོད་སྦྱིན་གྱི་བློ་རྟོགས་པ་དང་། ལྷས་སྦྱིན་གྱི་རྒྱུད་ཀྱི་བློ་རྟོགས་པའི་ཚུལ་གཅིག་མེད་པར་ཐལ། ལྷས་སྦྱིན་གྱི་རྒྱུད་ལ་ལྷས་སྦྱིན་གྱི་བློ་མྱོང་བྱེད་ཀྱི་ཤེས་པ་མེད་པའི་ཕྱིར། རྟགས་ཁས། ཞེས་འཆད་པར་བྱེད་པ་ལ། རང་བློའི་བློ་དང་གཞན་གྱི་བློ། །ཞེས་སོགས་རྐང་པ་གཉིས་བྱུང་། རིགས་པ་གཉིས་པ་འཆད་པར་བྱེད་པ་ལ། དོན་རིག་འདས་པ་དཔེ་དག་དང་། །ཞེས་སོགས་རྐང་པ་བཞི་བྱུང་། དེའི་རྩོད་སྤོང་འཆད་པར་བྱེད་པ་ལ། གལ་ཏེ་དེ་ཡི་ངོ་བོར་ནི། །ཞེས་སོགས་རྐང་པ་བཞི་བྱུང་། དེ་ལྟར་ན་མངོན་སུམ་ཡིན་ན། རྟོག་མེད་ཀྱི་ཤེས་པ་ཡིན་པས་ཁྱབ་པའི་གྲུབ་དོན་དེ་འཆད་པར་བྱེད་པ་ལ། ཇི་ལྟར་རང་གི་ཡུལ་ཅན་གྱི། །ཞེས་སོགས་རྐང་པ་བཞི་བྱུང་། རིགས་པ་གསུམ་པ་ནི། འོ་ན། གཟུགས་མངོན་སུམ་གྱིས་རྟོགས་པའི་ཚད་མ་མེད་པར་ཐལ། རྟོག་མེད་ཀྱི་ཤེས་པ་མེད་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་རྟོག་པ་དེ་གཟུགས་མངོན་སུམ་གྱིས་རྟོགས་པའི་ཤེས་པ་ཡིན་ནོ་ཟེར་ན། དེ་དེ་འདྲའི་ཤེས་པ་མ་ཡིན་པར་ཐལ། གཟུགས་ཞེས་པའི་ངག་དེ། གཟུགས་དོན་དམ་པར་བརྗོད་པའི་ངག་མ་ཡིན་པ་གང་ཞིག །དེ་གཉིས་རང་ཡུལ་ལ་འཇུག་ཚུལ་མཚུངས་པའི་ཕྱིར། ཞེས་འཆད་པར་བྱེད་པ་ལ། སྤྱི་བརྗོད་ངང་ཚུལ་ཅན་སྒྲ་དང་། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་ཁོ་ན་རེ། གཟུགས་འཛིན་རྟོག་པ་དེ་གཟུགས་མངོན་སུམ་དུ་རྟོགས་པའི་ཤེས་པ་ཡིན་ནོ་ཟེར་ན། དེ་མ་ཡིན་ཏེ། གཟུགས་ཞེས་པའི་ངག་དེ་གཟུགས་དོན་སྤྱིའི་ཚུལ་གྱིས་བརྗོད་པའི་ངག་ཡིན་པ་གང་ཞིག །དེ་གཉིས་རང་ཡུལ་ལ་འཇུག་ཚུལ་མཚུངས་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་དབང་ཤེས་སྐད་ཅིག་དང་པོ་དེ་གཟུགས་མངོན་སུམ་དུ་རྟོགས་པའི་རྟོག་མེད་ཀྱི་ཤེས་པ་ཡིན། གཉིས་པ་ཕན་ཆད་རྟོག་པ་ཡིན་པའི་ཕྱིར། ཞེས་པའི་འདོད་པ་བརྗོད་པར་བྱེད་པ་ལ། གལ་ཏེ་རྟོག་མེད་འགའ་ཞིག་ཀྱང་། །ཞེས་པ་འདི་བྱུང་། དེ་ལ་གཟུགས་འཛིན་དབང་མངོན་སྐད་ཅིག་དང་པོ་གཟུགས་མངོན་སུམ་དུ་རྟོགས་པའི་རྟོག་མེད་ཀྱི་ཤེས་པ་ཡིན་ལ། དེ་གཉིས་པ་ཕན་ཆད་རྟོག་པར་འཆད་པ་མི་འཐད་པར་ཐལ། གཟུགས་འཛིན་དབང་མངོན་སྐད་ཅིག་དང་པོ་དང་གཉིས་པ་ལ་སོགས་པ་རྣམས། རང་གི་རྐྱེན་གསུམ་ལས་སྐྱེས་པ་རྣམས་མཚུངས་པའི་ཕྱིར། ཞེས་འཆད་པར་བྱེད་པ་ལ། ཡོད་ན་དེ་དང་མཚུངས་རྒྱུ་ཅན། །ཞེས་སོགས་རྐང་པ་གསུམ་བྱུང་། རིགས་པ་བཞི་པ་ནི། འོ་ན། གཟུགས་འཛིན་དབང་མངོན་དེ་གཟུགས་གཟུང་དོན་དུ་བྱས་པ་ལས་མི་སྐྱེ་བར་གཟུགས་ཀྱི་བརྡ་དྲན་པ་ལ་བརྟེན་ནས་སྐྱེ་བ་ཡིན་པར་ཐལ། གཟུགས་འཛིན་དབང་ཤེས་གཟུགས་ཀྱི་མིང་སྦྱོར་རྟོག་པ་ཡིན་པའི་ཕྱིར། རྟགས་ཁས། ཞེས་འཆད་པར་བྱེད་པ་ལ། ཕྱི་རོལ་དོན་ལ་ལྟོས་མེད་པར། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་ཁོ་ན་རེ། གཟུགས་འཛིན་དབང་ཤེས་དེ་རྟོག་པ་ཡིན་ཏེ། གཟུགས་དེས་དང་པོར་གཟུགས་དྲན་པའི་དྲན་ཤེས་ལ་ཕན་བཏགས། དེ་ལ་ལྟོས་ནས་གཟུགས་འཛིན་དབང་ཤེས་ལ་ཕན་འདོགས་པ་ཡིན་པའི་ཕྱིར། ཞེས་པའི་འདོད་བརྗོད་པར་བྱེད་པ་ལ། གལ་ཏེ་གཟུགས་ནི་བརྡ་དྲན་ལ། །ཞེས་སོགས་རྐང་པ་གསུམ་བྱུང་། འོ་ན། གཟུགས་དྲན་པའི་དྲན་ཤེས་དེ། གཟུགས་འཛིན་དབང་ཤེས་ཀྱི་རྒྱུ་ཡིན་པར་ཐལ། གཟུགས་དེས་གཟུགས་དྲན་པའི་དྲན་ཤེས་ལ་ཕན་བཏགས། དེ་ལ་ལྟོས་ནས་གཟུགས་འཛིན་དབང་ཤེས་ལ་ཕན་འདོགས་པ་ཡིན་པའི་ཕྱིར། དཔེར་ན། སྔོན་པོ་མི་རྟག་པ་དེས་བྱས་རྟགས་ཀྱིས་སྔོན་པོ་མི་རྟག་པར་སྒྲུབ་པའི་རྟགས་འཛིན་སེམས་ཀྱི་རྒྱུ་བྱེད། དེ་སྐོར་གྱི་རྟགས་འཛིན་སེམས་ཀྱིས་དེ་སྐོར་ཀྱི་རྟགས་ཅན་རྗེས་དཔག་གི་རྒྱུ་བྱེད་པའི་དཔེ་འདི་བཞིན་ཡིན་ནོ། །ཞེས་འཆད་པར་བྱེད་པ་ལ། རྟགས་བཞིན་དྲན་པ་ཉིད་ལ་འགྱུར། །ཞེས་པ་འདི་བྱུང་། གཞན་ཡང་། གཟུགས་ཀྱིས་གཟུགས་དྲན་པའི་དྲན་ཤེས་ལ་ཕན་བཏགས། དེ་ལ་ལྟོས་ནས་གཟུགས་འཛིན་དབང་ཤེས་ལ་ཕན་འདོགས་པ་མ་ཡིན་པར་ཐལ། གཟུགས་འཛིན་དབང་ཤེས་དེ། གཟུགས་ལ་དངོས་སུ་འབྲེལ་བའི་སྒོ་ནས། གཟུགས་ལས་དངོས་སུ་སྐྱེས་པ་ཡིན་པའི་ཕྱིར། ཞེས་འཆད་པར་བྱེད་པ་ལ། དེ་ནི་དེ་འབྲེལ་སྐྱེ་བའི་ཕྱིར། །ཞེས་སོགས་རྐང་པ་གཉིས་བྱུང་། གཞན་ཡང་། གཟུགས་འཛིན་དབང་ཤེས་ཀྱི་རྐྱེན་གསུམ་མ་ཚང་བའི་སྐབས་སུ་གཟུགས་འཛིན་དབང་ཤེས་སྐྱེ་བ་ཡོད་པར་ཐལ། དེའི་སྐབས་སུ་གཟུགས་དྲན་པའི་དྲན་ཤེས་སྐྱེ་བ་ཡོད་པ་གང་ཞིག །དེ་འདྲ་བའི་དྲན་ཤེས་དེ་གཟུགས་འཛིན་དབང་ཤེས་ཀྱི་རྒྱུ་ཡིན་པའི་ཕྱིར། རྟགས་ཕྱི་མ་ཁས། ཞེས་འཆད་པར་བྱེད་པ་ལ། དེ་ལས་དུས་གཞན་དུ་ཡང་འགྱུར། །ཞེས་པ་འདི་བྱུང་། གཞན་ཡང་། གཟུགས་འཛིན་དབང་ཤེས་ཀྱི་རྐྱེན་གསུམ་ཚང་བའི་གནས་སྐབས་སུ་ཡང་གཟུགས་འཛིན་དབང་ཤེས་མི་སྐྱེ་བ་ཡིན་པར་ཐལ། དེའི་གནས་སྐབས་སུ་ཡིད་གཞན་ལ་གཡེང་ནས་གཟུགས་མི་དྲན་པ་ཡོད་པ་གང་ཞིག །གཟུགས་དྲན་པའི་དྲན་ཤེས་དེ་གཟུགས་འཛིན་དབང་ཤེས་ཀྱི་རྒྱུ་ཡིན་པའི་ཕྱིར། ཕྱི་མ་ཁས། ཞེས་འཆད་པར་བྱེད་པ་ལ། ལ་ལར་རྣམ་གཡེང་སྲིད་ཕྱིར་རོ། །ཞེས་པ་འདི་བྱུང་། གལ་ཏེ་ཁོ་ན་རེ། གཟུགས་གཟུགས་དྲན་པའི་དྲན་ཤེས་དང་གཟུགས་འཛིན་དབང་ཤེས་གཉིས་ཀའི་དངོས་རྒྱུ་ཡིན་ཏེ། གཟུགས་དེས་དང་པོར་དེ་འདྲ་བའི་དྲན་ཤེས་དངོས་སུ་བསྐྱེད། དེའི་རྗེས་སུ་གཟུགས་འཛིན་དབང་ཤེས་དངོས་སུ་བསྐྱེད་པ་ཡིན་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་རིམ་གྱིས་གཉིས་རྒྱུ་ཡིན། །ཞེས་པ་འདི་བྱུང་། འོ་ན། གཟུགས་དེས་དེ་གཉིས་གཅིག་ཆར་དུ་བསྐྱེད་པར་ཐལ། དེ་དེ་གཉིས་ཀའི་དངོས་རྒྱུ་ཡིན་པའི་ཕྱིར། ཞེས་འཆད་པར་བྱེད་པ་ལ། ཐ་དད་མེད་ཕྱིར་སྔར་ཉིད་འགྱུར། །ཞེས་པ་འདི་བྱུང་། གལ་ཏེ་ཁོ་ན་རེ། གཟུགས་འཛིན་དབང་ཤེས་དེ་གཟུགས་དྲན་པའི་དྲན་ཤེས་དང་། གཟུགས་གཉིས་ཀྱི་ནང་ནས། གཟུགས་ཁོ་ན་གཟུང་དོན་དུ་བྱས་པ་ལ་བརྟེན་ནས་སྐྱེས་པ་ཡིན་ནོ། །ཞེས་འདོད་པ་རྗོད་པར་བྱེད་པ་ལ། དབང་པོའི་བློ་རྒྱུ་གཞན་ཡིན་ན། །ཞེས་གསུངས་། འོ་ན། གཟུགས་འཛིན་དབང་ཤེས་གཟུགས་ཀྱི་མིང་སྦྱོར་རྟོག་པར་སྒྲུབ་པའི་ཕྱིར་དུ་གཟུགས་དྲན་པའི་དྲན་ཤེས་དེ། གཟུགས་འཛིན་དབང་ཤེས་ཀྱི་རྒྱུར་བྱེད་པ་དོན་མེད་དུ་འགྱུར་བ་ཡིན་པར་ཐལ། གཟུགས་འཛིན་དབང་ཤེས་དེ་དེ་དང་གཟུགས་གཉིས་ཀྱི་ནང་ནས་གཟུགས་ཁོ་ན་གཟུང་དོན་དུ་བྱས་པ་ལ་བརྟེན་ནས་སྐྱེས་པའི་ཕྱིར། ཞེས་འཆད་པར་བྱེད་པ་ལ། དེ་ལ་དྲན་པ་དོན་མེད་འགྱུར། །ཞེས་པ་འདི་བྱུང་། འདིའི་ཁྱབ་སྒྲུབ་འཆད་པར་བྱེད་པ་ལ། བརྡ་དྲན་ཇི་ལྟར་བརྡར་བཏགས་པ། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་ཁོ་ན་རེ། གཟུགས་འཛིན་དབང་ཤེས་དེ་རྟོག་པ་ཡིན་ཏེ། དེ་གཟུགས་སྤྱི་རྟག་དངོས་གཟུང་དོན་དུ་བྱེད་པའི་ཤེས་པ་ཡིན་པའི་ཕྱིར། ཞེས་འདོད་པ་རྗོད་པར་བྱེད་པ་ལ། སྤྱི་ཙམ་འཛིན་པ་ཡིན་ན་ནི། །ཞེས་པ་འདི་བྱུང་། འོ་ན། གཟུགས་འཛིན་དབང་ཤེས་དེས། གཟུགས་གཟུང་དོན་དུ་བྱེད་པ་མ་ཡིན་པར་ཐལ། དེ་གཟུགས་སྤྱི་རྟག་དངོས་ཙམ་གཟུང་དོན་དུ་བྱེད་པའི་ཤེས་པ་ཡིན་པའི་ཕྱིར། རྟགས་ཁས། ཞེས་འཆད་པར་བྱེད་པ་ལ། ཁྱད་པར་ལ་ལྟོས་མི་རུང་ངོ་། །ཞེས་སོགས་གསུངས་སོ། །དེ་ཐམས་ཅད་ཀྱི་དོན་བསྡུ་འཆད་པར་བྱེད་པ་ལ། དེ་ཕྱིར་མིག་དང་གཟུགས་དག་ལ། །ཞེས་སོགས་རྐང་པ་གཉིས་བྱུང་། །

༈ འདིའི་སྐབས་སུ་རང་རེས། གཟུགས་འཛིན་དབང་ཤེས་དེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་དང་། རང་གི་དམིགས་རྐྱེན་དུ་གྱུར་པའི་གཟུགས་ལས་སྐྱེས་པར་ཁས་བླངས་པ་ལ། ཁོ་ན་རེ། འོ་ན། གཟུགས་འཛིན་དབང་ཤེས་དེ་ལ། མིག་ཤེས་ཞེས་བརྗོད་ནས། གཟུགས་ཤེས་ཞེས་མ་བརྗོད་པ་མི་འཐད་པར་ཐལ། གཟུགས་འཛིན་དབང་ཤེས་དེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་དང་། རང་གི་དམིགས་རྐྱེན་དུ་གྱུར་པའི་གཟུགས་ལས་སྐྱེས་པར་མཚུངས་པའི་ཕྱིར། ཞེས་པའི་འདོད་བརྗོད་པར་བྱེད་པ་ལ། གལ་ཏེ་མངོན་སུམ་ཤེས་བསྐྱེད་ལ། །ཞེས་སོགས་རྐང་པ་བཞི་བྱུང་། དེའི་ལན་ནི་གཟུགས་འཛིན་དབང་ཤེས་ཆོས་ཅན། གཟུགས་འཛིན་དབང་ཤེས་ཞེས་པའི་བརྡ་སྦྱར་བར་འོས་པ་ཡིན་ཏེ། གཟུགས་འཛིན་དབང་ཤེས་ཞེས་པའི་ངག་ལས་ཐུན་མོང་མ་ཡིན་པར་གོ་ནུས་ཡིན་པའི་ཕྱིར། ཞེས་འཆད་པར་བྱེད་པ་ལ། གོ་བར་བྱེད་པ་ཉིད་མཐོང་ནས། །ཞེས་སོགས་རྐང་པ་གཉིས་བྱུང་། འདིའི་རྟགས་སྒྲུབ་པ་ནི། གཟུགས་འཛིན་དབང་ཤེས་ཞེས་བརྡ་སྦྱར་འོས་པ་གང་ཞིག །གཟུགས་འཛིན་དབང་ཤེས་ཞེས་པའི་ངག་ལས་ཐུན་མོང་མ་ཡིན་པར་གོ་ནུས། དེའི་ཁྱབ་བྱེད་ཡིན་པའི་ཕྱིར་ཏེ། དེ་ཁྱོད་ཀྱི་ཁྱབ་བྱ་ཡིན་པའི་ཕྱིར། ཞེས་འཆད་པར་བྱེད་པ་ལ། དབང་པོའི་ཐ་སྙད་ལ་དེ་ཡོད། །ཅེས་སོགས་རྐང་པ་གཉིས་བྱུང་། དེ་འདྲའི་ངག་ལས་ཐུན་མོང་མ་ཡིན་པར་གོ་ནུས་དེ་གཟུགས་འཛིན་དབང་ཤེས་ལ་གཟུགས་འཛིན་དབང་ཤེས་ཞེས་པའི་བརྡ་སྦྱར་འོས་པར་སྒྲུབ་པའི་རྟགས་ཡང་དག་ཡིན་ན། དེ་དེ་སྒྲུབ་ཀྱི་འབྲས་རང་མ་དམིགས་པའི་རྟགས་ཡང་དག་གསུམ་གྱི་ནང་ནས་གང་ཡིན་ཞེ་ན། དེ་དེ་སྒྲུབ་ཀྱི་རང་བཞིན་གྱི་རྟགས་ཡང་དག་ཡིན། ཞེས་འཆད་པར་བྱེད་པ་ལ། དེ་ཕྱིར་ཐ་སྙད་འདི་ལ་ནི། །ཞེས་སོགས་རྐང་པ་གཉིས་བྱུང་། དེ་ལྟར་ན། གཟུགས་འཛིན་དབང་ཤེས་ཆོས་ཅན། ཁྱོད་ལ་གཟུགས་ཤེས་ཞེས་པའི་བརྡ་སྦྱར་འོས་པ་མ་ཡིན་ཏེ། གཟུགས་ཤེས་ཞེས་པའི་ངག་ལ་བརྟེན་ནས་ཐུན་མོང་མ་ཡིན་པར་གོ་ནུས་མ་ཡིན་པའི་ཕྱིར། ཞེས་འཆད་པར་བྱེད་པ་ལ། ཁྱབ་པར་བྱེད་པའི་རང་བཞིན་ནི། །ཞེས་སོགས་རྐང་པ་གཉིས་བྱུང་། འཕྲོས་དོན་ལ་ཁ་ཅིག་ན་རེ། གཟུགས་འཛིན་དབང་ཤེས་དེ་མིག་ཤེས་ཡིན་པར་ཐལ། དེ་ལ་མིག་ཤེས་ཞེས་བརྗོད་རིགས་པའི་ཕྱིར། རྟགས་ཁས། འདོད་ན། གཟུགས་འཛིན་དབང་ཤེས་ཡིན་ན། མིག་ཤེས་ཡིན་དགོས་པར་ཐལ། འདོད་པའི་ཕྱིར། འདོད་ན། གཟུགས་འཛིན་པའི་དབང་ཤེས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། གཟུགས་དམིགས་རྐྱེན་དུ་བྱས་པ་ལ་བརྟེན་ནས་སྐྱེས་པའི་དབང་ཤེས་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། གཟུགས་ཁྱོད་ཀྱི་དམིགས་རྐྱེན་གང་ཞིག །དབང་ཤེས་ཡིན་པའི་ཕྱིར། འདོད་ན། སངས་འཕགས་ཀྱི་རྒྱུད་ཀྱི་གཟུགས་འཛིན་དབང་ཤེས་དེ་ཡང་མིག་ཤེས་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། མིག་ཤེས་མ་ཡིན་པར་ཐལ། སངས་འཕགས་ཀྱི་རྒྱུད་ཀྱི་དབང་ཤེས་ཁྱོད་ཡིན་པའི་ཕྱིར། གཞན་ཡང་ཁོ་ན་རེ། གཟུགས་འཛིན་པའི་དབང་ཤེས་གཟུགས་འཛིན་དབང་ཤེས་སུ་ཐལ། གཟུགས་འཛིན་པའི་རྟོག་པ་དེ་དེ་འཛིན་པའི་རྟོག་པ་ཡིན་པའི་ཕྱིར་ཏེ། གཟུགས་བརྗོད་པའི་ངག་དེ་གཟུགས་ཀྱི་དངོས་མིང་ཡིན་པའི་ཕྱིར་ཏེ། གཟུགས་ཞེས་པའི་ངག་དེ་དེའི་དངོས་མིང་ཡིན་པའི་ཕྱིར་ན་མ་ཁྱབ་སྟེ། འོ་ན། གཟུགས་བརྗོད་པའི་ངག་ཆོས་ཅན། གཟུགས་ཀྱི་དངོས་མིང་མ་ཡིན་པར་ཐལ། བསྟན་བཅོས་རྣམ་འགྲེལ་ཁྱོད་ཡིན་པའི་ཕྱིར། མ་གྲུབ་ན། བསྟན་བཅོས་རྣམ་འགྲེལ་ཆོས་ཅན། དེར་ཐལ། དེ་བརྗོད་པའི་བསྟན་བཅོས་ཡིན་པའི་ཕྱིར། གཞན་ཡང་། གཟུགས་བརྗོད་པའི་རྗོད་བྱེད་ཀྱི་སྒྲ་དེ། གཟུགས་ཀྱི་དངོས་མིང་ཡིན་པར་ཐལ། གཟུགས་བརྗོད་པའི་ངག་དེ་དེ་ཡིན་པའི་ཕྱིར། འདོད་ན། དེ་བརྗོད་པའི་བསྟན་བཅོས་དེ་ཡང་དེའི་དངོས་མིང་དུ་ཐལ། འདོད་པའི་ཕྱིར། འདོད་ན། དེ་བརྗོད་པའི་བསྟན་བཅོས་རྣམ་འགྲེལ་དེ་ཡང་། དེའི་དངོས་མིང་དུ་ཐལ་ལོ། །གཞན་ཡང་། སངས་འཕགས་ཀྱི་རྒྱུད་ཀྱི་གཟུགས་འཛིན་པའི་དབང་ཤེས་དེ། གཟུགས་འཛིན་དབང་ཤེས་སུ་ཐལ། གཟུགས་འཛིན་པའི་དབང་ཤེས་དེ་དེ་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། གཟུགས་འཛིན་དབང་ཤེས་མ་ཡིན་པར་ཐལ། སངས་འཕགས་ཀྱི་རྒྱུད་ཀྱི་དབང་ཤེས་དང་ཡིན་ཁྱབ་མཉམ་ཡིན་པའི་ཕྱིར། གཞན་ཡང་། དེ་ཕྱིར་མིག་དང་གཟུགས་དག་ལ། །ཞེས་སོགས་གསུངས་པ་མི་འཐད་པར་ཐལ། གཟུགས་འཛིན་དབང་ཤེས་དེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་ལས་མ་སྐྱེས་པའི་ཕྱིར། མ་གྲུབ་ན། དེ་ཆོས་ཅན། མིག་ཤེས་ཡིན་པར་ཐལ། མ་གྲུབ་པ་དེའི་ཕྱིར། བྱས་པ་ལ་ཁོ་ན་རེ། གོང་དུ་མ་ཁྱབ་སྟེ། གཟུགས་འཛིན་མིག་ཤེས་དེ། རང་གི་ཐུན་མོང་མ་ཡིན་པའི་ཞེས་སོགས་ལས་སྐྱེས་པ་དེ་ལུང་དེའི་དོན་ཡིན་པའི་ཕྱིར་ཟེར་ན། འོ་ན། བརྡ་དྲན་པ་ཡི་རྒྱུ་ཅན་གྱི། །ཞེས་པ་ནས། ཁྱད་པར་ལ་ལྟོས་མི་རུང་ངོ་། །ཞེས་པའི་བར་གྱིས་གཟུགས་འཛིན་དབང་ཤེས་མིང་སྦྱོར་རྟོག་བྲལ་དུ་སྒྲུབ་བྱེད་ཀྱི་རིགས་པ་དང་། དེ་མིང་སྦྱོར་རྟོག་པ་ཡིན་པ་ལ་གནོད་བྱེད་བསྟན་ནས། དེ་ཕྱིར་མིག་དང་གཟུགས་དག་ལ། །ཞེས་སོགས་དེ་རྣམས་ཀྱི་དོན་བསྡུ་འཆད་པ་དེ་མི་འཐད་པར་ཐལ། གཟུགས་འཛིན་དབང་ཤེས་དེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་ལ་བརྟེན་ནས་སྐྱེས་པ་མ་ཡིན་པའི་ཕྱིར། །

དབང་མངོན་གྱི་རྣམ་གཞག་ལ་དཔྱད་པ།

༈ མཐའ་དཔྱད་པ་ལ། ཁ་ཅིག་ན་རེ། རང་གི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལ་བརྟེན་ནས་སྐྱེས་པའི་རིག་པ་དེ། དབང་ཤེས་ཀྱི་མཚན་ཉིད་ཟེར་ན། གཟུགས་འཛིན་དབང་ཤེས་ཉམས་སུ་མྱོང་བའི་རང་རིག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། དེའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པའི་ཕྱིར་ཏེ། དེའི་བདག་རྐྱེན་དང་། གཟུགས་འཛིན་དབང་ཤེས་ཀྱི་བདག་རྐྱེན་ཡིན་ཁྱབ་མཉམ་ཡིན་པའི་ཕྱིར། འདོད་མི་ནུས་ཏེ། རང་རིག་ཡིན་པའི་ཕྱིར། གཞན་ཡང་། ལྷའི་མིག་གི་མངོན་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། རང་གི་བདག་རྐྱེན་དུ་གྱུར་པའི་ལྷའི་མིག་དབང་གཟུགས་ཅན་པ་ལས་སྐྱེས་པའི་ཤེས་པ་ཡིན་པའི་ཕྱིར། ལྷའི་མིག་གི་མངོན་པར་ཤེས་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ཡིད་ཀྱི་ཤེས་པ་ཡིན་པའི་ཕྱིར་ཏེ། མངོན་པར་ཤེས་པ་ཡིན་པའི་ཕྱིར། བྱས་པ་ལ་ཁོ་ན་རེ། ལྷའི་མིག་གི་མངོན་པར་ཤེས་པ་ཆོས་ཅན། དབང་ཤེས་ཡིན་པར་ཐལ། མིག་ཤེས་ཡིན་པའི་ཕྱིར། མིག་གི་མངོན་པར་ཤེས་པ་ཡིན་པའི་ཕྱིར་ན་མ་ཁྱབ། འོ་ན། གཟུགས་འཛིན་དབང་པོའི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཆོས་ཅན། ལུས་ཀྱི་ཤེས་པ་ཡིན་པར་ཐལ། ལུས་ཀྱི་ཚོར་བ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ལུས་ཚོར་ཡིན་པའི་ཕྱིར། ཕྱིའི་ཚོར་བ་ཡིན་པའི་ཕྱིར་ཏེ། དབང་ཤེས་སུ་གྱུར་པའི་ཚོར་བ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ལུས་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། མིག་ཤེས་ཡིན་པའི་ཕྱིར། ཁ་ཅིག་ན་རེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལས་སྐྱེ་རུང་གི་རིག་པ་དེ། དབང་ཤེས་ཀྱི་མཚན་ཉིད། དེའི་མཚན་ཉིད་ཀྱི་ཟུར་དུ་རུང་བ་སྨོས་པ་ལ་དགོས་པ་ཡོད་དེ། གཟུགས་མེད་ཁམས་ནས་ཤི་འཕོས་མ་ཐག་འདོད་པའི་བར་སྲིད་དུ་སྐྱེ་བ་བླངས་མ་ཐག་པའི་གང་ཟག་གི་རྒྱུད་ཀྱི་གཟུགས་འཛིན་དབང་ཤེས་དེ་སྡུད་པར་བྱ་བའི་ཆེད་ཡིན་པའི་ཕྱིར་ཟེར་ན། དེའི་རྒྱུད་ཀྱི་གཟུགས་འཛིན་དབང་ཤེས་ཆོས་ཅན། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པའི་འབྲས་བུར་རུང་བར་ཐལ། དེ་ལས་སྐྱེ་བར་རུང་བའི་ཕྱིར་ཏེ། དབང་ཤེས་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་དེ་ཁྱོད་ཀྱི་རྒྱུར་རུང་བར་ཐལ། ཁྱོད་དེའི་འབྲས་བུར་རུང་བའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པར་ཐལ་ལོ། །གཞན་ཡང་། དེ་ཆོས་ཅན། རང་གི་ཞེས་སོགས་ལས་སྐྱེ་རུང་བ་མ་ཡིན་པར་ཐལ། དེ་ལས་མི་སྐྱེ་བར་རུང་བ་ཡིན་པའི་ཕྱིར། དེ་ལས་མ་སྐྱེས་པའི་ཕྱིར། རྟགས་ཁས། བྱས་པ་ལ་ཁོ་ན་རེ། སེམས་ཅན་གྱི་རྒྱུད་ལ་རྣམ་མཁྱེན་སྐྱེ་རུང་མ་ཡིན་པར་ཐལ། དེའི་རྒྱུད་ལ་དེ་མི་སྐྱེ་བར་རུང་བ་ཡིན་པའི་ཕྱིར། ཁྱབ་པ་ཁས། ཟེར་ན། མི་འགྲིག་གོ །རྟགས་གྲུབ་སྟེ། དེའི་རྒྱུད་ལ་རྣམ་མཁྱེན་མ་སྐྱེས་པའི་ཕྱིར། རྩ་བར་འདོད་མི་ནུས་ཏེ། དེ་སངས་རྒྱ་རུང་ཡིན་པའི་ཕྱིར། ཁོ་རང་ལ། གཟུགས་མེད་ནས་ཤི་འཕོས་མ་ཐག་འདོད་པའི་བར་སྲིད་དུ་སྐྱེས་མ་ཐག་པའི་གང་ཟག་གི་རྒྱུད་ཀྱི་གཟུགས་འཛིན་དབང་ཤེས་ཆོས་ཅན། ཁྱོད་ཀྱི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པར་ཐལ། ཁྱོད་ལ་རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པའི་ངོས་ནས་དབང་ཤེས་ཞེས་པའི་བརྡ་སྦྱར་འོས་པ་ཡིན་པའི་ཕྱིར་ཏེ། དབང་ཤེས་ཡིན་པའི་ཕྱིར། ཁྱབ་སྟེ། ཚད་མ་མདོ་ལས། ཐུན་མོང་མ་ཡིན་རྒྱུ་ཡིན་ཕྱིར། །དེ་ཡི་ཐ་སྙད་དབང་པོས་བྱས། །ཞེས་གསུངས་པའི་ཕྱིར། གཞན་ཡང་། དབང་ཤེས་ཡིན་ན། རང་གི་ཐུན་མོང་མ་ཡིན་པའི་ཞེས་སོགས་ལས་བྱུང་བའི་ཁྱབ་པར་ཐལ། ནས་མྱུག་ཡིན་ན། རང་གི་ཐུན་མོང་མ་ཡིན་པའི་ཞེས་སོགས་ས་བོན་ལས་བྱུང་བས་ཁྱབ་པ་གང་ཞིག །དེ་གཉིས་དཔེ་དོན་དུ་སྦྱར་ནས། མདོ་རང་འགྲེལ་ལས་བཤད་པའི་ཕྱིར་ཏེ། དཔེར་ན། རྔའི་སྒྲ་དང་ནས་ཀྱི་མྱུ་གུ་ཞེས་པ་བཞིན་ནོ། །ཞེས་གསུངས་པའི་ཕྱིར། ཁ་ཅིག་ན་རེ། དབང་པོའི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་དེ། ལུས་ཀྱི་ཚོར་བའི་མཚན་ཉིད། ཡིད་ཀྱི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་དེ། སེམས་ཚོར་གྱི་མཚན་ཉིད་ཟེར་ན། གཟུགས་འཛིན་དབང་པོའི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཆོས་ཅན། མཚན་ཉིད་དང་པོ་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། ཕྱིའི་ཚོར་བ་ཡིན་པའི་ཕྱིར་ཏེ། དབང་ཤེས་སུ་གྱུར་པའི་ཚོར་བ་ཡིན་པའི་ཕྱིར། འདོད་ན། དབང་པོའི་རྣམ་པར་ཤེས་པ་དང་མཚུངས་ལྡན་དུ་གྱུར་པའི་ཚོར་བ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། དབང་པོའི་རྣམ་པར་ཤེས་པ་རྒྱུད་ལྡན་གྱི་གང་ཟག་ཡིན་ན། ཁྱོད་རྒྱུད་ལྡན་གྱི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། ལོང་བ་ཆོས་ཅན། དེར་ཐལ། དེའི་ཕྱིར། མཚན་ཉིད་གཉིས་པ་ལ། གཟུགས་འཛིན་ཡིད་མངོན་གྱི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། ནང་གི་ཚོར་བ་ཡིན་པའི་ཕྱིར། ཡིད་ཀྱི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཡིད་ཀྱི་རྣམ་པར་ཤེས་པ་དང་མཚུངས་ལྡན་དུ་གྱུར་པའི་ཚོར་བ་ཡིན་པར་ཐལ། འདོད་པའི་ཕྱིར། འདོད་ན། ཡིད་ཀྱི་རྣམ་པར་ཤེས་པ་རྒྱུད་ལྡན་གྱི་གང་ཟག་ཡིན་ན། ཁྱོད་རྒྱུད་ལྡན་གྱི་དེ་ཡིན་དགོས་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་ཡིད་ཀྱི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཆོས་ཅན། མཚན་ཉིད་གཉིས་པ་དེར་ཐལ། རང་གི་གཙོ་བོ་ཡིད་ཀྱི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། གཟུགས་འཛིན་ཡིད་ཀྱི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཡིན་པ་གང་ཞིག །གཟུགས་འཛིན་ཡིད་ཀྱི་རྣམ་པར་ཤེས་པ་དེ་ཁྱོད་འཁོར་དུ་བྱེད་པའི་གཙོ་སེམས་ཡིན་པའི་ཕྱིར། ཁ་ཅིག་ན་རེ། རང་གི་ཞེས་སོགས་དབང་པོ་གཟུགས་ཅན་པ་ལས་སྐྱེས་པའི་གསལ་སྣང་ཅན་གྱི་རིག་པ་དེ། དབང་མངོན་གྱི་མཚན་ཉིད་ཟེར་ན། ཟླ་བ་གཉིས་སྣང་གི་དབང་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་གྲུབ་སྟེ། འཁྲུལ་རྒྱུ་རྟེན་ལ་ཡོད་པའི་དབང་ཤེས་ཡིན་པའི་ཕྱིར། ཕྱི་མ་གྲུབ་སྟེ། རྟོག་མེད་ཀྱི་རྣམ་པར་ཤེས་པ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། མ་འཁྲུལ་པའི་ཤེས་པ་ཡིན་པར་ཐལ། དབང་མངོན་ཡིན་པའི་ཕྱིར། ཁ་ཅིག་ན་རེ། རང་གི་ཞེས་སོགས་དབང་པོ་གཟུགས་ཅན་པ་ལས་སྐྱེས་པའི་རྟོག་བྲལ་མ་འཁྲུལ་པའི་རིག་པ་དེ། དབང་མངོན་གྱི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། གཟུགས་མེད་ནས་ཤི་འཕོས་མ་ཐག་འདོད་པའི་བར་སྲིད་དུ་སྐྱེས་མ་ཐག་པའི་གང་ཟག་གི་རྒྱུད་ཀྱི་དྲི་འཛིན་དབང་མངོན་ཆོས་ཅན། རང་གི་ཞེས་སོགས་ལ་བརྟེན་ནས་སྐྱེས་པར་ཐལ། དབང་མངོན་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེའི་རྒྱུད་ལ་དྲི་འཛིན་དབང་མངོན་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྒྱུད་ལ་དེ་ཡོད་པར་ཐལ། ཁྱོད་དྲི་ཟའི་སྐྱེས་བུ་ཡིན་པའི་ཕྱིར་ཏེ། ཁྱོད་བར་སྲིད་པ་ཡིན་པའི་ཕྱིར། ཁྱབ་སྟེ། མཛོད་ལས། མི་ལྡོག་དེ་ནི་དྲི་ཟའོ། །ཞེས་གསུངས་པའི་ཕྱིར། རྩ་བར་འདོད་བྱས་པ་ལ། དེའི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པར་ཐལ། འདོད་པའི་ཕྱིར། འདོད་ན། དེ་འདྲ་བ་དེ་འདོད་ཁམས་ན་ཡོད་པར་ཐལ། འདོད་པའི་ཕྱིར། འདོད་ན། རྒྱུ་འབྲས་དུས་མཉམ་པ་ཡོད་པར་ཐལ། འདོད་པ་གང་ཞིག །དེ་འདྲ་བའི་དབང་མངོན་ཁོ་རང་ཡང་འདོད་ཁམས་ན་ཡོད་པའི་ཕྱིར་ན་མ་ཁྱབ། གཞན་ཡང་། གཟུགས་མེད་ནས་ཤི་འཕོས་མ་ཐག་ཞེས་སོགས་ཀྱི་རྒྱུད་ལ་དྲི་འཛིན་དབང་མངོན་ཡོད་པར་ཐལ། དེའི་རྒྱུད་ལ་སྒོ་ལྔའི་དབང་ཤེས་ཡོད་པའི་ཕྱིར་ཟེར་ན། རང་ལུགས་ནི་འདོད་པ་ཁོ་ན་ཡིན། མ་གྲུབ་ན། དེ་ཆོས་ཅན། ཁྱོད་ཀྱི་རྒྱུད་ལ་དེ་ཡོད་པར་ཐལ། ཁྱོད་དབང་པོ་ཀུན་ཚང་བའི་གང་ཟག་ཡིན་པའི་ཕྱིར་ཏེ། ཁྱོད་བར་སྲིད་པ་ཡིན་པའི་ཕྱིར། ཁྱབ་སྟེ། མཛོད་ལས། དབང་པོ་ཀུན་ཚང་ཐོགས་མེད་རྒྱུ། །ཞེས་གསུངས་པའི་ཕྱིར། འདི་ལ་སྐྱོན་འཕེན་པ་ཁ་ཅིག །དམུས་ལོང་དུ་སྐྱེ་འགྱུར་གྱི་བར་སྲིད་པ་ཆོས་ཅན། ཁྱོད་ཀྱི་རྒྱུད་ལ་སྒོ་ལྔའི་དབང་ཤེས་ཡོད་པར་ཐལ། ཁྱོད་དབང་པོ་ཀུན་ཚང་བའི་གང་ཟག་ཡིན་པའི་ཕྱིར་ཏེ། ཁྱོད་བར་སྲིད་པ་ཡིན་པའི་ཕྱིར། ཁྱབ་པ་རིམ་གྱིས་ཁས་ཟེར་ན། འདོད་བྱས་པ་ལ། དེའི་རྒྱུད་ལ་མིག་ཤེས་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་དམུས་ལོང་གི་ཤ་ཚུགས་ཇི་ལྟ་བ་བཞིན་འཛིན་པའི་གང་ཟག་ཡིན་པའི་ཕྱིར་ཏེ། མཛོད་ལས། སྔོན་དུས་སྲིད་འབྱུང་ཤ་ཚུགས་ཅན། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་འདྲའི་བར་སྲིད་པ་དེ་དམུས་ལོང་གི་ཤ་ཚུགས་ཙམ་འཛིན་པ་དེ་ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། དམུས་ལོང་དུ་སྐྱེ་འགྱུར་གྱི་བར་སྲིད་པའི་རྒྱུད་ལ་མིག་ཤེས་ཡོད་པར་ཐལ། གཟུགས་མེད་ནས་ཤི་འཕོས་མ་ཐག་ཚ་དམྱལ་གྱི་བར་སྲིད་དུ་ཞེས་སོགས་གང་ཟག་གི་རྒྱུད་ལ་ལུས་ཚོར་སྡུག་བསྔལ་ཡོད་པའི་ཕྱིར། དེས་ལུས་ཚོར་སྡུག་བསྔལ་མྱོང་བའི་ཕྱིར། བར་སྲིད་དེ་ལས་ཤི་འཕོས་ནས་ཚ་དམྱལ་དུ་སྐྱེས་མ་ཐག་པའི་གང་ཟག་དེས་ལུས་ཚོར་སྡུག་བསྔལ་མྱོང་བ་གང་ཞིག །རྣམ་སྨིན་གྱི་ལུས་དེ་གཉིས་འཕེན་བྱེད་ཀྱི་ལས་གཅིག་གིས་འཕངས་པའི་ཕྱིར། མཛོད་ལས། དེ་ནི་འཕེན་པ་གཅིག་པའི་ཕྱིར། །ཞེས་གསུངས་པའི་ཕྱིར། གཞན་ཡང་། ཁོ་རང་ལ། རྒྱུ་འབྲས་དུས་མཉམ་པ་ཡོད་པར་ཐལ། གཟུགས་མེད་ནས་ཤི་འཕོས་མ་ཐག་འདོད་པའི་ཞེས་སོགས་ཀྱི་གང་ཟག་གི་རྒྱུད་ཀྱི་གཟུགས་འཛིན་དབང་མངོན་དེ་ཡང་འདོད་ཁམས་ན་ཡོད། དེའི་དམིགས་རྐྱེན་དུ་གྱུར་པའི་གཟུགས་དེ་ཡང་འདོད་ཁམས་ན་ཡོད་པའི་ཕྱིར། ཁྱབ་པ་ཁས། ཕྱི་མ་གྲུབ་སྟེ། དེའི་དམིགས་རྐྱེན་དུ་གྱུར་པའི་གཟུགས་ཡོད། དེ་གཟུགས་མེད་ན་མེད་པའི་ཕྱིར། དང་པོ་མ་གྲུབ་ན། དེ་ཆོས་ཅན། ཁྱོད་ཀྱི་དམིགས་རྐྱེན་དུ་གྱུར་པའི་དེ་ཡོད་པར་ཐལ། ཁྱོད་གཟུགས་འཛིན་དབང་ཤེས་ཡིན་པའི་ཕྱིར། བྱས་པ་ལ་ཁོ་ན་རེ། མིག་ཤེས་ཡིན་ན། རང་གི་ཞེས་སོགས་མིག་དབང་གཟུགས་ཅན་པ་ལས་བྱུང་བས་ཁྱབ་པར་ཐལ། དབང་ཤེས་ཡིན་ན། རང་གི་ཞེས་སོགས་དབང་པོ་གཟུགས་ཅན་པ་ལས་བྱུང་བས་ཁྱབ་པའི་ཕྱིར། རྟགས་ཁས། འདོད་མི་ནུས་ཏེ། མིག་དབང་གཟུགས་ཅན་པ་དང་། མིག་གི་རྣམ་པར་ཤེས་པ་གཉིས་གཅིག་ཆར་དུ་ཐོབ་པའི་གང་ཟག་ཡོད་པའི་ཕྱིར། མཛོད་ལས། མིག་དང་རྣམ་ཤེས་ཁམས་དང་ཡིད། །ལྷན་ཅིག་ཏུ་ཡང་ཐོབ་པ་ཡོད། །ཅེས་གསུངས་པའི་ཕྱིར་ན་མ་ཁྱབ་སྟེ། ལུང་དེ་ནི་མཛོད་ཀྱི་ལུགས་ཡིན་ཏེ། སྐབས་འདིར་ཁས་མི་ལེན་པའི་ཕྱིར། དེ་ལྟར་མ་ཡིན་ན། ཁོ་རང་ལ། རྟེན་བཅས་ཀྱི་མིག་དབང་གཟུགས་ཅན་པ་དང་། མིག་གི་རྣམ་པར་ཤེས་པ་གཉིས་གཅིག་ཆར་དུ་ཐོབ་པའི་གང་ཟག་ཡོད་པར་ཐལ། མིག་དབང་གཟུགས་ཅན་པ་དང་མིག་གི་རྣམ་པར་ཤེས་པ་གཉིས་གཅིག་ཆར་དུ་ཐོབ་པའི་གང་ཟག་ཡོད་པའི་ཕྱིར། འདོད་ན། གཟུགས་མེད་ནས་ཤི་འཕོས་མ་ཐག་ཅེས་སོགས་ཀྱི་གང་ཟག་དེ་དེ་གཉིས་གཅིག་ཆར་དུ་ཐོབ་པའི་གང་ཟག་ཡིན་པར་ཐལ། འདོད་པའི་ཕྱིར། འདོད་ན། དེའི་རྒྱུད་ལ་རྟེན་བཅས་ཀྱི་མིག་དབང་གཟུགས་ཅན་པ་ཡོད་པར་ཐལ། འདོད་པའི་ཕྱིར། འདོད་ན། དེའི་རྒྱུད་ཀྱི་མིག་ཤེས་དེའི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པར་ཐལ། འདོད་པའི་ཕྱིར། སྔར་གྱི་དེ་ལ་ཁ་ཅིག་ན་རེ། གཟུགས་ཁམས་པའི་བར་སྲིད་པ་ཆོས་ཅན། དྲི་ཟའི་སྐྱེས་བུ་ཡིན་པར་ཐལ། བར་སྲིད་པ་ཡིན་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། ཁྱོད་ཀྱི་རྒྱུད་ལ་དྲི་འཛིན་དབང་མངོན་ཡོད་པར་ཐལ། འདོད་པའི་ཕྱིར། འདོད་ན། གཟུགས་ཁམས་ན་དྲི་དང་རོ་ལ་སོགས་པ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། མཛོད་ལས། གཟུགས་ཀྱི་ཁམས་ན་བཅུ་བཞིའོ། །དྲི་དང་རོ་དང་སྣ་དང་ནི། །ལྕེ་ཡི་རྣམ་ཤེས་ཁམས་མ་གཏོགས། །ཞེས་གསུངས་པའི་ཕྱིར་ན་མ་ཁྱབ་སྟེ། བསམ་གཏན་གཉིས་པ་ཡན་ཆད་ཀྱིས་སས་བསྡུས་ཀྱི་སྐྱེ་བོའི་རྒྱུད་ལ་ལྕེའི་རྣམ་པར་ཤེས་པ་དང་སྣའི་རྣམ་ཤེས་ལ་སོགས་པ་མེད་པ་ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། གཟུགས་ཁམས་ན་ལྕེའི་རྣམ་པར་ཤེས་པ་ཡོད་པར་ཐལ། ལོངས་སྐུའི་རྒྱུད་ལ་དེ་ཡོད་པའི་ཕྱིར། དེའི་རྒྱུད་ཀྱི་ལྕེའི་རྣམ་པར་ཤེས་པ་དེ་ལ་རོ་སྣང་བའི་ཕྱིར། མངོན་རྟོག་རྒྱན་ལས། རོ་མི་ཞིམ་པ་རོ་མཆོག་སྣང་། ཞེས་གསུངས་པའི་ཕྱིར། བྱས་པ་ལ་ཁོ་ན་རེ། ལོངས་སྐུའི་རྒྱུད་ཀྱི་ལྕེའི་རྣམ་པར་ཤེས་པ་དེ་འོག་མིན་ན་ཡོད་པར་ཐལ། དེའི་རྒྱུད་ལ་དེ་ཡོད་པའི་ཕྱིར། འདོད་མི་ནུས་ཏེ། དེ་བསམ་གཏན་དང་པོ་ན་ཡོད་པའི་ཕྱིར་ཏེ། དེ་བསམ་གཏན་དང་པོའི་སས་བསྡུས་ཡིན་པའི་ཕྱིར། རྟགས་གྲུབ་སྟེ། བསམ་གཏན་གཉིས་པ་ཡན་ཆད་ཀྱི་གང་ཟག་གི་རྒྱུད་ཀྱི་དབང་ཤེས་ཡིན་པའི་ཕྱིར། ཁྱབ་སྟེ། མཛོད་ལས། གཉིས་པ་སོགས་ན་ལུས་མིག་དང་། །སྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་གཙོ་ཆེ་བ་རྣམས་ལ་དགོངས་པ་ཡིན་པའི་ཕྱིར། ཁ་ཅིག་ན་རེ། རྣམ་མཁྱེན་སྐད་ཅིག་དང་པོ་ལ་གནས་པའི་སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་ཆོས་ཅན། རང་གི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལས་སྐྱེས་པར་ཐལ། དབང་མངོན་ཡིན་པའི་ཕྱིར། འདོད་ན། ཁྱོད་ཀྱི་དེར་གྱུར་པའི་དབང་པོ་གཟུགས་ཅན་པ་ཡོད་པར་ཐལ། འདོད་པའི་ཕྱིར། འདོད་ན། བྱང་སེམས་རྒྱུན་མཐའ་བའི་རྒྱུད་ཀྱི་རྟེན་བཅས་ཀྱི་དབང་པོ་གཟུགས་ཅན་པ་ཡོད་པར་ཐལ། འདོད་པའི་ཕྱིར་ན་མ་ཁྱབ་སྟེ། འོ་ན་ཁོ་རང་ལ། དེ་འདྲའི་སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་གྱི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པར་ཐལ། དེའི་རྒྱུད་ཀྱི་གཟུགས་འཛིན་དབང་མངོན་དེས། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལ་བརྟེན་ནས་གཟུགས་མཐོང་བ་ཡིན་པའི་ཕྱིར། དེས་གཟུགས་མཐོང་བ་གང་ཞིག །དེས་དེ་འདྲའི་དབང་པོ་གཟུགས་ཅན་པ་ལ་མ་བརྟེན་པར་གཟུགས་མི་མཐོང་བའི་ཕྱིར། གཞན་ཡང་། དབང་མངོན་ཡིན་ན། དེ་འདྲའི་དབང་པོ་གཟུགས་ཅན་པ་ལས་བྱུང་བའི་ཁྱབ་པར་ཐལ། དེ་ཡིན་ན། དབང་ཤེས་ཞེས་པའི་སྒྲ་བཤད་དུ་ཡོད་པའི་དབང་ཤེས་ཡིན་དགོས་པའི་ཕྱིར་ཏེ། ཡིད་མངོན་ཡིན་ན། ཡིད་ཤེས་ཞེས་པའི་སྒྲ་བཤད་དུ་ཡོད་པའི་ཡིད་ཤེས་ཡིན་དགོས་པའི་ཕྱིར། ཁ་ཅིག་ན་རེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལ་བརྟེན་ནས་སྐྱེས་པའི་རིག་པ་དེ། གཟུགས་འཛིན་དབང་ཤེས་ཀྱི་མཚན་ཉིད་ཟེར་ན། ཟླ་བ་གཉིས་སྣང་གི་དབང་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། མིག་ཤེས་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ཞེན་ཡུལ་དུ་གྱུར་པའི་གཟུགས་ཡོད་པར་ཐལ། འདོད་པའི་ཕྱིར། བྱས་པ་ཁོ་ན་རེ། ཟླ་བ་གཉིས་སྣང་གི་དབང་ཤེས་ཆོས་ཅན། གཟུགས་འཛིན་དབང་ཤེས་སུ་ཐལ། གཟུགས་འཛིན་མིག་ཤེས་ཡིན་པའི་ཕྱིར། མིག་ཤེས་ཡིན་པའི་ཕྱིར། ཁྱབ་སྟེ། ཉན་ཤེས་ཡིན་ན། སྒྲ་འཛིན་ཉན་ཤེས་ཡིན་པས་ཁྱབ་པའི་ཕྱིར། རྟགས་གྲུབ་སྟེ། སྒྲ་ལ་སྒྲའི་སྐྱེ་མཆེད་ཀྱིས་ཁྱབ་པའི་ཕྱིར་ན་འདིར་མ་ཁྱབ། རང་རེས་གཟུགས་འཛིན་དབང་མངོན་ཡིན་ན། གཟུགས་འཛིན་པའི་དབང་མངོན་ཡིན་པས་ཁྱབ་བྱས་པ་ལ་ཁོ་ན་རེ། བུམ་འཛིན་དབང་མངོན་ཆོས་ཅན། དེར་ཐལ། དེའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་འཛིན་དབང་མངོན་གཟུགས་འཛིན་དེར་ཐལ། ཁྱོད་གཟུགས་ཀྱི་སྐྱེ་མཆེད་ཡིན་པའི་ཕྱིར། འདོད་ན། གཟུགས་དེ་བུམ་འཛིན་དབང་མངོན་གྱི་གཟུང་བྱ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ཀ་འཛིན་དབང་མངོན་གྱི་གཟུང་བྱ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། ཀ་འཛིན་དབང་མངོན་དེ་གཟུགས་འཛིན་དབང་མངོན་ཡིན་པའི་ཕྱིར། བུམ་འཛིན་དབང་མངོན་དེ་གཟུགས་འཛིན་དབང་མངོན་ཡིན་པར་ཐལ། བུམ་པའི་གཟུགས་འཛིན་པའི་དབང་མངོན་དེ་དེ་ཡིན་པའི་ཕྱིར་ཏེ། བུམ་པའི་གཟུགས་བརྗོད་པའི་ངག་དེ་གཟུགས་བརྗོད་པའི་ངག་ཡིན་པའི་ཕྱིར་ཏེ། དེ་བུམ་པ་ལ་ལྟོས་ཏེ་ཆོས་བརྗོད་ཀྱི་སྒྲ་དང་། གཟུགས་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་པའི་ཕྱིར། བྱས་པ་ལ་ཁོ་ན་རེ། བུམ་འཛིན་རྟོག་པ་དེ་གཟུགས་འཛིན་རྟོག་པར་ཐལ། བུམ་པའི་གཟུགས་འཛིན་པའི་རྟོག་པ་གཟུགས་འཛིན་པའི་རྟོག་པ་ཡིན་པའི་ཕྱིར། ཁྱབ་པ་ཁས་ཟེར་ན་མི་འགྲིག་གོ །རྟགས་གྲུབ་སྟེ། བུམ་པའི་གཟུགས་ཞེས་པའི་ངག་དེ་གཟུགས་བརྗོད་པའི་ངག་ཡིན་པའི་ཕྱིར། འདོད་མི་ནུས་ཏེ། བུམ་པ་གཟུགས་ཀྱི་མཚན་གཞི་ཡིན་པའི་ཕྱིར་ཟེར་ན། ཁོ་རང་ལ། བུམ་འཛིན་རྟོག་པ་དེ་གཟུགས་འཛིན་རྟོག་པར་ཐལ། བུམ་འཛིན་དབང་མངོན་དེ་གཟུགས་འཛིན་དབང་མངོན་ཡིན་པའི་ཕྱིར། ཁྱབ་པ་ཁས། འདོད་ན། བུམ་པ་འཛིན་པའི་རྟོག་པ་དེ་གཟུགས་འཛིན་པའི་རྟོག་པར་ཐལ། འདོད་པའི་ཕྱིར། འདོད་མི་ནུས་ཏེ། བུམ་པ་གཟུགས་ཀྱི་མཚན་གཞི་ཡིན་པའི་ཕྱིར། ཁ་ཅིག་ན་རེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་ལ་བརྟེན་ནས་བྱུང་བའི་རྟོག་བྲལ་མ་འཁྲུལ་པའི་རིག་པ་དེ་གཟུགས་འཛིན་དབང་མངོན་གྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་རྣ་བའི་ཞེས་སོགས་ལས་བྱུང་བའི་རྟོག་བྲལ་མ་འཁྲུལ་པའི་རིག་པ། སྒྲ་འཛིན་དབང་མངོན་གྱི་མཚན་ཉིད་ཟེར་ན། དང་པོ་དེ་ལ་སངས་འཕགས་ཀྱི་རྒྱུད་ཀྱི་སྒྲ་འཛིན་ཉན་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། གཟུགས་རྟོགས་པའི་དབང་མངོན་ཡིན་པའི་ཕྱིར། འདོད་ན། མིག་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཉན་ཤེས་ཡིན་པའི་ཕྱིར། གཉིས་པ་ལ་སྦྲུལ་གྱི་མིག་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། སྒྲ་མཐོང་བའི་དབང་མངོན་ཡིན་པའི་ཕྱིར། མ་གྲུབ་ན། དེ་དེར་ཐལ། དེས་སྒྲ་མཐོང་བའི་ཕྱིར། དུས་འཁོར་ཊཱིཀ་ཆེན་ལས། སྒྲ་མིག་གིས་གཟུང་བར་བྱེད་པ་གང་ཡིན་པ་དེ་ནི་སྦྲུལ་ཉིད་དོ། །ཞེས་གསུངས་པའི་ཕྱིར། རྩ་བར་འདོད་ན། དེ་ཆོས་ཅན། ཉན་ཤེས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། མིག་ཤེས་ཡིན་པའི་ཕྱིར། ཁ་ཅིག །རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་ལས་བྱུང་བའི་རྟོག་བྲལ་མ་འཁྲུལ་པའི་རིག་པ་དེ་གཟུགས་འཛིན་དབང་མངོན་གྱི་མཚན་ཉིད། རང་གི་ཞེས་སོགས་ཀྱི་དེ་འདྲ་བའི་གསར་དུ་མི་བསླུ་བའི་རིག་པ་དེ་གཟུགས་འཛིན་དབང་མངོན་གྱི་ཚད་མའི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག། མཚན་ཉིད་གཉིས་པ་ལ་གཟུགས་རུང་ཚད་མས་ངེས་ནས་གཟུགས་ཚད་མས་མ་ངེས་པའི་གང་ཟག་གི་རྒྱུད་ཀྱི་གཟུགས་འཛིན་དབང་མངོན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། མིག་ཤེས་ཚད་མ་ཡིན་པའི་ཕྱིར། འདོད་ན། དེ་ཆོས་ཅན། གཟུགས་ཡུལ་དུ་བྱེད་པའི་ཚད་མ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་སྣང་ལ་མ་ངེས་ཀྱི་བློ་ཡིན་པའི་ཕྱིར་ཏེ། གཟུགས་ལ་དེ་འདྲའི་བློ་ཡིན་པའི་ཕྱིར་ན་མ་ཁྱབ། གཞན་ཡང་། གཟུགས་རུང་ཚད་མས་ངེས་པའི་ཞེས་སོགས་ཀྱི་གང་ཟག་གི་རྒྱུད་ལ་གཟུགས་འཛིན་དབང་མངོན་ཚད་མ་ཡོད་པར་ཐལ། དེའི་རྒྱུད་ཀྱི་གཟུགས་རུང་འཛིན་པའི་དབང་མངོན་དེ་གཟུགས་འཛིན་པའི་དབང་མངོན་ཚད་མ་ཡིན་པའི་ཕྱིར། འདོད་ན། དེའི་རྒྱུད་ཀྱི་གཟུགས་འཛིན་དབང་མངོན་ཚད་མ་དེ་ཁོ་ཁོ་རང་དུ་ཐལ། ཁོ་ཡོད་པའི་ཕྱིར་ན་མ་ཁྱབ། འདོད་ན། དེ་ཆོས་ཅན། རང་གི་འཇུག་ཡུལ་གྱི་གཙོ་བོ་ལ་མི་བསླུ་བའི་རིག་པ་ཡིན་པར་ཐལ། འདོད་པའི་ཕྱིར། འདོད་ན། གཟུགས་ལ་མི་བསླུ་བའི་རིག་པ་ཡིན་པར་ཐལ། འདོད་པ་གང་ཞིག །གཟུགས་ཁྱོད་ཀྱི་འཇུག་ཡུལ་གྱི་གཙོ་བོ་ཡིན་པའི་ཕྱིར། ཁ་ཅིག་ན་རེ། དབང་ཤེས་ལ་གཟུགས་འཛིན་དབང་ཤེས་ནས་རེག་བྱ་འཛིན་པའི་དབང་མངོན་གྱི་བར་ལྔར་གྲངས་ངེས་པ་ཡིན་ནོ་ཟེར་ན། དེ་མི་འཐད་པར་ཐལ། དེ་ལྔ་པོ་གང་རུང་ཡིན་ན་གཟུང་དོན་ཅན་གྱི་དབང་ཤེས་ཡིན་དགོས། དབང་ཤེས་ལ་གཟུང་དོན་ཅན་གྱི་དབང་ཤེས་ཀྱིས་མ་ཁྱབ་པའི་ཕྱིར་ཏེ། ཟླ་བ་གཉིས་སྣང་གི་དབང་ཤེས་ཀྱི་གཟུང་དོན་མེད་པའི་ཕྱིར། བྱས་པ་ལ་ཁོ་ན་རེ། དབང་ཤེས་དེ་ལ་དེ་ལྔར་གྲངས་ངེས་པ་ཡིན་ཏེ། དེ་ལ་སྒོ་ལྔའི་དབང་ཤེས་སུ་གྲངས་ངེས་པའི་ཕྱིར་ན་མ་ཁྱབ། རྟགས་གྲུབ་སྟེ། དབང་པོ་གཟུགས་ཅན་པ་དེ་ལ། མིག་གི་དབང་པོ་གཟུགས་ཅན་པ་ནས། ལུས་ཀྱི་དེའི་བར་ལྔར་གྲངས་ངེས་པའི་ཕྱིར། ཁ་ཅིག་ན་རེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་སྐྱེད་བྱེད་དེ། གཟུགས་འཛིན་དབང་མངོན་གྱི་གཟུང་དོན་གྱི་མཚན་ཉིད་ཟེར་ན། སེམས་ཙམ་པས་མཚོན་བྱ་དེ་ཁས་ལེན་པར་ཐལ། མཚན་ཉིད་དེ་ཁས་ལེན་པ་གང་ཞིག །དེ་དེའི་མཚན་ཉིད་ཡིན་པའི་ཕྱིར། དང་པོ་གྲུབ་སྟེ། དེས་གཟུགས་འཛིན་དབང་མངོན་ལ་གཟུགས་ཀྱི་རྣམ་པ་ཤར་བར་ཁས་ལེན་པའི་ཕྱིར། རྩ་བར་འདོད་ན། དེས་ཕྱི་དོན་ཁས་ལེན་པར་ཐལ་ལོ། །བྱས་པ་ལ་ཁོ་ན་རེ། དེས་གཟུགས་འཛིན་དབང་མངོན་གྱི་གཟུང་དོན་ཁས་ལེན་པར་ཐལ། དེས་སངས་འཕགས་ཀྱི་རྒྱུད་ཀྱི་དེའི་གཟུང་དོན་ཁས་ལེན་པའི་ཕྱིར། ཁ་ཅིག་འདིར་མ་ཁྱབ་ཟེར། རྟགས་གྲུབ་སྟེ། དེའི་རྒྱུད་ཀྱི་གཟུགས་འཛིན་དབང་མངོན་གྱི་དངོས་རྒྱུར་གྱུར་པའི་གཟུང་དོན་ཁས་ལེན་པའི་ཕྱིར་ཏེ། དེས་སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་གྱི་དངོས་རྒྱུར་གྱུར་པའི་གཟུགས་དེ། དེའི་དངོས་རྒྱུ་ཡང་ཡིན། དེའི་ཡུལ་ཡང་ཡིན་པའི་གཞི་མཐུན་དུ་ཁས་ལེན་པའི་ཕྱིར་ན་མ་ཁྱབ་སྟེ། འོ་ན། སེམས་ཙམ་པས་སངས་རྒྱས་ཀྱི་ས་ན་གཟུང་དོན་ཅན་གྱི་ཤེས་པ་ཡོད་པར་ཁས་ལེན་པར་ཐལ། དེས་དེའི་རྒྱུད་ཀྱི་གཟུགས་འཛིན་དབང་མངོན་གཟུང་དོན་ཅན་གྱི་དེར་ཁས་ལེན་པའི་ཕྱིར། རྟགས་ཁས། འདོད་ན། དེས་གཟུང་དོན་ཅན་གྱི་དབང་མངོན་ཁས་ལེན་པར་ཐལ། འདོད་པའི་ཕྱིར། འདོད་ན། དེས་ཕྱི་དོན་ཁས་ལེན་པར་ཐལ་ལོ། །གཞན་ཡང་། སེམས་ཙམ་པས་སངས་རྒྱས་ཀྱི་སར་གཟུང་འཛིན་རྫས་གཞན་ཁས་ལེན་པར་ཐལ། དེས་སངས་རྒྱས་ཀྱི་སར་གཟུང་དོན་ཅན་གྱི་དབང་མངོན་ཁས་ལེན་པའི་ཕྱིར། འདོད་ན། དེས་སངས་རྒྱས་ཀྱི་སར་གཟུང་འཛིན་རྫས་གཞན་དུ་འཛིན་པའི་རྟོག་པ་སྤངས་པའི་མཁྱེན་པ་ཁས་མི་ལེན་པར་ཐལ། འདོད་པའི་ཕྱིར། འདོད་མི་ནུས་ཏེ། དེས་རྣམ་མཁྱེན་ཡིན་ན། དེ་འདྲའི་རྟོག་པ་སྤངས་པའི་མཁྱེན་པ་ཡིན་པས་ཁྱབ་པ་ཁས་ལེན་པའི་ཕྱིར། བྱས་པ་ལ་ཁོ་ན་རེ། སེམས་ཙམ་པས་སངས་རྒྱས་ཀྱི་སར་གཟུང་འཛིན་རྫས་གཞན་ཁས་ལེན་པར་ཐལ། དེས་སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་དང་། དེའི་དངོས་རྒྱུར་གྱུར་པའི་གཟུགས་གཉིས་གཟུང་འཛིན་རྫས་གཞན་དུ་ཁས་ལེན་པའི་ཕྱིར་ཏེ། དེས་དེ་གཉིས་གཟུང་འཛིན་དུ་ཡང་ཁས་ལེན། དེས་དེ་གཉིས་རྫས་གཞན་དུ་ཡང་ཁས་ལེན་པའི་ཕྱིར་ན་མ་ཁྱབ། ཁ་ཅིག་ན་རེ། སྔར་གྱི་དེ་གཟུགས་འཛིན་དབང་མངོན་གྱི་དམིགས་རྐྱེན་གྱི་མཚན་ཉིད། གཟུགས་འཛིན་དབང་མངོན་གཟུང་དོན་འཛིན་ནུས་སུ་གཙོ་བོར་དངོས་སུ་སྐྱེད་བྱེད་དེ། དེའི་ཐུན་མོང་མ་ཡིན་པའི་བདག་རྐྱེན་གྱི་མཚན་ཉིད། དེ་མྱོང་བ་གསལ་རིག་ཏུ་གཙོ་བོར་དངོས་སུ་སྐྱེད་བྱེད་དེ། དེའི་དེ་མ་ཐག་རྐྱེན་གྱི་མཚན་ཉིད་ཟེར་ན། གཟུགས་འཛིན་དབང་མངོན་གྱི་སྔ་ལོགས་དེ་མ་ཐག་ཏུ་བྱུང་བའི་གཟུགས་ཡིད་ལ་བྱེད་པའི་ཤེས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། གཟུགས་འཛིན་དབང་མངོན་གཟུགས་ཀྱི་རྣམ་ཤར་དུ་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར། དེ་དེའི་རྣམ་པ་ཤར་བའི་རིག་པར་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར་ཏེ། དེ་དེའི་རྣམ་པ་ཤར་བའི་གཟུགས་འཛིན་དབང་མངོན་དུ་དངོས་སུ་སྐྱེད་བྱེད་ཡིན་པའི་ཕྱིར། རྩ་བར་འདོད་ན། དེ་འདྲ་བའི་དེ་ཆོས་ཅན། གཟུགས་ཡིན་པར་ཐལ་ལོ། །གཞན་ཡང་། དེ་ཆོས་ཅན། ནང་གི་གཟུགས་ཅན་དྭངས་བ་ཡིན་པར་ཐལ། མཚན་ཉིད་གཉིས་པ་དེའི་ཕྱིར། གཞན་ཡང་། གཟུགས་ཆོས་ཅན། མཚོན་བྱ་གསུམ་པ་དེར་ཐལ། མཚན་ཉིད་དེའི་ཕྱིར། གཟུགས་འཛིན་དབང་མངོན་གསལ་ཞིང་རིག་པར་གཙོ་བོར་སྐྱེད་བྱེད་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཤེས་པ་ཡིན་པར་ཐལ། འདོད་པའི་ཕྱིར། ཁ་ཅིག་ན་རེ། གཟུགས་འཛིན་དབང་མངོན་རང་ཡུལ་དུ་གྱུར་པའི་དངོས་པོའི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད། གཟུགས་འཛིན་དབང་མངོན་གྱི་དམིགས་རྐྱེན་གྱི་མཚན་ཉིད། གཟུགས་ཀྱི་སྟེང་གི་མི་རྟག་པ་དེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་མ་ཡིན་ལ། གཟུགས་འཛིན་དབང་མངོན་རང་ཡུལ་དུ་གྱུར་པའི་དངོས་པོའི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་ཟེར་ན། བེམ་པོ་ཡིན་ན། གཟུགས་ཀྱི་སྟེང་གི་མི་རྟག་པ་དེ་གཟུགས་འཛིན་དབང་མངོན་རང་ཉིད་ཀྱི་རྣམ་ལྡན་དུ་དངོས་སུ་སྐྱེད་བྱེད་མ་ཡིན་དགོས་པར་ཐལ། གཟུགས་ཀྱི་སྟེང་གི་མི་རྟག་པ་དེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་མ་ཡིན་པའི་ཕྱིར། འདོད་ན། ལྡན་མིན་འདུ་བྱེད་ཡིན་ན། གཟུགས་དེ་གཟུགས་འཛིན་དབང་མངོན་རང་ཉིད་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་མ་ཡིན་དགོས་པར་ཐལ། འདོད་པའི་ཕྱིར། འདོད་ན། གཟུགས་འཛིན་དབང་མངོན་གྱི་ཡུལ་དུ་གྱུར་པའི་དངོས་པོ་ཆོས་ཅན། དེར་ཐལ། དེའི་ཕྱིར། འདོད་ན། གཟུགས་ཆོས་ཅན། གཟུགས་འཛིན་དབང་མངོན་རང་ཡུལ་དུ་གྱུར་པའི་དངོས་པོའི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པར་ཐལ། གཟུགས་འཛིན་དབང་མངོན་གྱི་དམིགས་རྐྱེན་ཡིན་པའི་ཕྱིར། བྱས་པ་ལ་ཁོ་ན་རེ། གཟུགས་ཀྱི་སྟེང་གི་མི་རྟག་པ་དེ། གཟུགས་འཛིན་དབང་མངོན་བེམ་པོའི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པར་ཐལ། དེ་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར། འདོད་མི་ནུས་ཏེ། གཟུགས་ཀྱི་སྟེང་གི་མི་རྟག་པ་དེ། གཟུགས་འཛིན་དབང་མངོན་ལྡན་མིན་འདུ་བྱེད་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར་ན་མ་ཁྱབ་སྟེ། འོ་ན། ཁོ་རང་ལ་གཟུགས་ཀྱི་སྟེང་གི་མི་རྟག་པ་དེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པར་ཐལ། གཟུགས་འཛིན་དབང་མངོན་གྱི་དངོས་རྒྱུ་དེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར། གཟུགས་འཛིན་རྟོག་པའི་དངོས་རྒྱུ་དེ། གཟུགས་འཛིན་རྟོག་པ་གཟུགས་ཀྱི་རྣམ་ལྡན་དུ་སྐྱེད་པའི་དེ་ཡིན་པའི་ཕྱིར་ཏེ། ནམ་མཁའ་འཛིན་པའི་རྟོག་པའི་དངོས་རྒྱུ་དེ་ནམ་མཁའ་འཛིན་པའི་རྟོག་པ་ནམ་མཁའི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར། ནམ་མཁའ་འཛིན་པའི་རྟོག་པ་ནམ་མཁའི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་གཅིག་ཡོད་པའི་ཕྱིར། ཁ་ཅིག་ན་རེ། གཟུགས་འཛིན་དབང་མངོན་གྱི་དངོས་རྒྱུའི་བྱེ་བྲག་གང་ཞིག །གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་དེ། །དེའི་དམིགས་རྐྱེན་གྱི་མཚན་ཉིད་ཟེར་ན། གཟུགས་འཛིན་དབང་མངོན་གྱི་དངོས་རྒྱུ་དེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པར་ཐལ། དེའི་དམིགས་རྐྱེན་གྱི་མཚན་ཉིད་ཀྱི་ཟུར་དུ་དེའི་དངོས་རྒྱུའི་བྱེ་བྲག་ཅེས་སྨོས་པ་ལ་དགོས་པ་ཡོད་པའི་ཕྱིར། འདོད་ན། གཟུགས་འཛིན་དབང་མངོན་གྱི་དེ་མ་ཐག་རྐྱེན་དེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། གཟུགས་འཛིན་དབང་མངོན་གྱི་དམིགས་རྐྱེན་དུ་ཐལ། མཚན་ཉིད་དེའི་ཕྱིར། ཁྱབ་པ་ཁས། དང་པོ་མ་གྲུབ་ན། གཟུགས་འཛིན་དབང་མངོན་ཆོས་ཅན། ཁྱོད་ཀྱི་དེ་མ་ཐག་རྐྱེན་དེ། ཁྱོད་ཀྱི་དངོས་རྒྱུའི་བྱེ་བྲག་ཏུ་ཐལ། ཁྱོད་ཤེས་པ་ཡིན་པའི་ཕྱིར། ཁ་ཅིག་ན་རེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཀྱི་ཕྱིའི་སྐྱེ་མཆེད་དེ་དེའི་དམིགས་རྐྱེན་གྱི་མཚན་ཉིད་ཟེར་ན། གཟུགས་འཛིན་དབང་མངོན་གྱི་དེ་མ་ཐག་ཏུ་གྱུར་པའི་ཚོར་བ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་དང་པོ་སྒྲུབ་ཟིན། གཉིས་པ་གྲུབ་སྟེ། ཆོས་ཀྱི་སྐྱེ་མཆེད་ཡིན་པའི་ཕྱིར་ཏེ། ཚོར་བའི་ཕུང་པོ་ཡིན་པའི་ཕྱིར། ཁྱབ་སྟེ། མཛོད་ལས། དེ་གསུམ་རྣམ་རིག་བྱེད་མིན་དང་། །འདུས་མ་བྱས་རྣམས་བཅས་པ་ནི། །ཆོས་ཀྱི་སྐྱེ་མཆེད་ཁམས་ཞེས་བྱ། །ཞེས་གསུངས་པའི་ཕྱིར། གཞན་ཡང་། དེ་ཆོས་ཅན། ཕྱིའི་སྐྱེ་མཆེད་ཡིན་པར་ཐལ། གཟུགས་སོགས་ཕྱིའི་སྐྱེ་མཆེད་དྲུག་པོ་གང་རུང་ཡིན་པའི་ཕྱིར། དེ་གང་རུང་དང་མིག་སོགས་ནང་གི་སྐྱེ་མཆེད་དྲུག་པོ་གང་རུང་གང་ཞིག །ཕྱི་མ་དེ་གང་རུང་མ་ཡིན་པའི་ཕྱིར། དང་པོ་གྲུབ་སྟེ། གཞི་གྲུབ་པའི་ཕྱིར། ཁ་ཅིག་ན་རེ། གཟུགས་འཛིན་དབང་མངོན་གཟུགས་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཀྱི་ཕྱི་རོལ་གྱི་དོན་དེ། གཟུགས་འཛིན་དབང་མངོན་གྱི་དམིགས་རྐྱེན་གྱི་མཚན་ཉིད་ཟེར་ན། གཟུགས་ཀྱི་སྟེང་གི་མི་རྟག་པ་ཆོས་ཅན། ཕྱི་རོལ་གྱི་དོན་ཡིན་པར་ཐལ། དེའི་དམིགས་རྐྱེན་ཡིན་པའི་ཕྱིར་ཏེ། སྒྲའི་སྟེང་གི་མི་རྟག་པ་དེ་སྒྲ་འཛིན་དབང་མངོན་གྱི་དམིགས་རྐྱེན་ཡིན་པའི་ཕྱིར་ཏེ། སྒྲ་འཛིན་དབང་མངོན་དེ་སྒྲ་མི་རྟག་པ་གཟུང་དོན་དུ་བྱས་པ་ལ་བརྟེན་ནས་སྐྱེས་པ་ཡིན་པའི་ཕྱིར། རྣམ་ངེས་ཊཱིཀ་ཆེན་ལས། སྒྲ་འཛིན་དབང་མངོན་སྒྲ་མི་རྟག་པ་གཟུང་དོན་དུ་བྱས་པ་ལས་སྐྱེས་ཤིང་། ཞེས་གསུངས་པའི་ཕྱིར། བྱས་པ་ལ་ཁོ་ན་རེ། སྔོན་པོའི་སྟེང་གི་མི་རྟག་པ་དེ། སྔོན་འཛིན་དབང་མངོན་གྱི་དམིགས་རྐྱེན་ཡིན་པར་ཐལ། སྒྲའི་སྟེང་གི་མི་རྟག་པ་དེའི་ཕྱིར། འདོད་ན། དེ་དེའི་གཟུང་དོན་དུ་ཐལ། འདོད་པའི་ཕྱིར། འདོད་ན། དེའི་གཟུང་དོན་དུ་གྱུར་པའི་ལྡན་མིན་འདུ་བྱེད་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། མཐོང་ཕྱིར་འདུ་བྱེད་ལས་ཀྱང་མིན། །ཞེས་གསུངས་པའི་ཕྱིར་ན་མ་ཁྱབ། སྔོན་འཛིན་དབང་མངོན་གྱི་གཟུང་དོན་དུ་གྱུར་པའི་སྔོན་པོའི་མིང་སོགས་ལྡན་མིན་འདུ་བྱེད་མེད་པ་ལུང་དེའི་དོན་ཡིན་པའི་ཕྱིར། གཞན་ཡང་། གཟུགས་ཀྱི་སྟེང་གི་མི་རྟག་པ་དེ་གཟུགས་འཛིན་དབང་མངོན་གྱི་དམིགས་རྐྱེན་མ་ཡིན་པར་ཐལ། དེའི་དམིགས་རྐྱེན་ཡིན་ན། གཟུགས་ཀྱི་སྐྱེ་མཆེད་ཡིན་དགོས་པའི་ཕྱིར། དབང་པོའི་སེམས་ནི་ངེས་ཕྱིར་རོ། །ཞེས་གསུངས་པའི་ཕྱིར་ན་མ་ཁྱབ་སྟེ། གཟུགས་འཛིན་དབང་མངོན་དེ་གཟུགས་དང་། གཟུགས་འཛིན་དབང་མངོན་གཉིས་ཀྱི་ནང་ནས། གཟུགས་ཁོ་ནའི་ཡུལ་ཅན་ཡིན་པ་དེ་ལུང་དེའི་དོན་ཡིན་པའི་ཕྱིར། ཁ་ཅིག་ན་རེ། གཟུགས་ཀྱི་སྟེང་གི་མི་རྟག་པ་དེ་རང་འཛིན་དབང་མངོན་གྱི་དམིགས་རྐྱེན་ཡིན་པར་ཐལ། དེ་གཟུགས་འཛིན་དབང་མངོན་གྱི་དེ་ཡིན་པའི་ཕྱིར། འདོད་ན། མི་རྟག་པ་ཡང་དེ་ཡིན་པར་ཐལ་ལོ་ཟེར་ན་མ་ཁྱབ། འདོད་ན། ཤེས་པ་དེ་ཡིན་པར་ཐལ་ལོ། །ཁ་ཅིག་ན་རེ། གཟུགས་འཛིན་དབང་མངོན་རང་གི་རྫས་རྒྱུན་དུ་གཙོ་བོར་དངོས་སུ་སྐྱེད་བྱེད་ཀྱི་རིག་པ་དེ། དེའི་ཉེར་ལེན་གྱི་མཚན་ཉིད་ཟེར་ན། གཟུགས་འཛིན་དབང་མངོན་གྱི་ཉེར་ལེན་དུ་གྱུར་པའི་གཟུགས་ཀྱི་བག་ཆགས་ཆོས་ཅན། རིག་པ་ཡིན་པར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། དེ་ཡོད་པའི་ཕྱིར། གཟུགས་འཛིན་རྟོག་པའི་ཉེར་ལེན་དུ་གྱུར་པའི་གཟུགས་ཀྱི་བག་ཆགས་ཡོད་པའི་ཕྱིར་ཏེ། དུས་ཅན་མཐོང་གོམས་ཀྱིས་སྤྲུལ་ཡིན། །ཞེས་དང་། དེའི་ཐད་ཀྱི་ཊཱིཀྐ་ལས། ཐོག་མ་མེད་པའི་དུས་ཅན་གྱི་ཤིང་རང་མཚན་མཐོང་བ་གོམས་པའི་རྟོག་པའི་བག་ཆགས་ཀྱིས་ཉེར་ལེན་བྱས་ནས་སྤྲུལ་པ་ཡིན་པའི་ཕྱིར། ཞེས་གསུངས་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་རྟོག་པའི་ཉེར་ལེན་དུ་གྱུར་པའི་གཟུགས་ཀྱི་བག་ཆགས་མེད་པར་ཐལ། དེའི་ཉེར་ལེན་ཡིན་ན་ཤེས་པ་ཡིན་དགོས་པའི་ཕྱིར། རྣམ་ཤེས་མིན་པའི་རྣམ་ཤེས་ཀྱི། །ཞེས་གསུངས་པའི་ཕྱིར་ན་མ་ཁྱབ་སྟེ། དེའི་ཉེར་ལེན་དུ་གྱུར་པའི་བེམ་པོ་མེད་པ་དེ་ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། གཟུགས་འཛིན་རྟོག་པའི་ཉེར་ལེན་དུ་གྱུར་པའི་ལྡན་མིན་འདུ་བྱེད་ཡོད་པར་ཐལ། ཤེས་པའི་ཉེར་ལེན་དུ་གྱུར་པའི་ལྡན་མིན་འདུ་བྱེད་ཡོད་པའི་ཕྱིར་ཏེ། དེའི་ཐུན་མོང་མ་ཡིན་པའི་བདག་རྐྱེན་ཡོད། དེར་གྱུར་པའི་ཤེས་པ་ཡང་མེད། དེར་གྱུར་པའི་བེམ་པོ་ཡང་མེད་པའི་ཕྱིར། དང་པོ་མ་གྲུབ་ན། དེའི་དེར་གྱུར་པའི་ཡིད་དབང་ཡོད་པར་ཐལ། མ་གྲུབ་པ་དེའི་ཕྱིར། ཤེས་པ་ཆོས་ཅན། ཡིད་ཀྱི་ཤེས་པ་ཡིན་པར་ཐལ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་ཡིད་དབང་ལ་བརྟེན་ནས་སྐྱེས་པའི་རིག་པ་ཡིན་པའི་ཕྱིར། གཞན་ཡང་། སྔར་གྱི་མཚན་ཉིད་དེ་མི་འཐད་པར་ཐལ། གཟུགས་འཛིན་དབང་མངོན་གྱི་རྒྱུར་གྱུར་པའི་ཉེར་ལེན་ཡོད་པའི་ཕྱིར། ཁ་ཅིག་ན་རེ། དམིགས་རྐྱེན་ཅན་གྱི་ཤེས་པ་དང་གཟུང་དོན་ཅན་གྱི་ཤེས་པ་གཉིས་དོན་གཅིག་ཟེར་ན། དེ་ལ་མཁས་པའི་དབང་པོ་ཁ་ཅིག་གི་གསུང་ལས། ཟླ་བ་གཉིས་སྣང་གི་དབང་ཤེས་ཆོས་ཅན། གཟུང་དོན་ཅན་གྱི་དེར་ཐལ། དམིགས་རྐྱེན་ཅན་གྱི་ཤེས་པ་ཡིན་པའི་ཕྱིར། རྟགས་གྲུབ་སྟེ། དེའི་དམིགས་རྐྱེན་ཡོད་པའི་ཕྱིར། ཟླ་གཅིག་དེ་དེའི་དམིགས་རྐྱེན་ཡིན་པའི་ཕྱིར། དེ་དེའི་དམིགས་རྐྱེན་དུ་མདོ་སྡེ་པས་བཞེད་པའི་ཕྱིར་ཏེ། དེ་དང་མདོ་སྡེ་སྤྱོད་པ་གཉིས་ཀས་དེ་དེའི་དམིགས་རྐྱེན་གྱི་མཚན་གཞིར་བཞེད་པའི་ཕྱིར། དྲང་ངེས་རྣམ་འབྱེད་ལས། ཟླ་བ་གཉིས་སུ་སྣང་བའི་ཤེས་པ་ཡང་ཟླ་བ་གཅིག་ལ་དམིགས་པ་ལས་སྐྱེ་དགོས་ཤིང་། ཕྱི་རོལ་གྱི་དམིགས་པ་མེད་པར་མི་སྐྱེའོ། །ཞེས་གསུངས་པའི་ཕྱིར། གཞན་ཡང་། ཟླ་གཅིག་དེ་ཟླ་བ་གཉིས་སྣང་གི་དབང་ཤེས་ཀྱི་དམིགས་རྐྱེན་ཡིན་པར་ཐལ། བར་སྣང་གི་ཁ་དོག་དེ་སྐྲ་ཤད་འཛག་སྣང་གི་དབང་ཤེས་ཀྱི་དམིགས་རྐྱེན་ཡིན་པའི་ཕྱིར། སྤྱི་དོན་རིགས་རྒྱན་ལས། བར་སྣང་གི་ཁ་དོག་ཉིད་ཁོའི་དམིགས་རྐྱེན་ཡིན་པར་སེམས་སོ། །ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། དེའི་གཟུང་དོན་མེད་པའི་ཕྱིར། སྐྲ་སྣང་དོན་མེད་ཅན་ཡིན་ནོ། །ཞེས་གསུངས་པའི་ཕྱིར། ཁ་ཅིག་ན་རེ། གཟུགས་འཛིན་དབང་མངོན་གྱི་བདག་རྐྱེན་དང་དེའི་དེ་མ་ཐག་རྐྱེན་གཉིས་འགལ་ལོ་ཟེར་ན། དེ་གཉིས་མི་འགལ་ཏེ། དེའི་དེ་མ་ཐག་རྐྱེན་ཡིན་ན། དེའི་བདག་རྐྱེན་ཡིན་དགོས་པའི་ཕྱིར། དེའི་དེ་མ་ཐག་རྐྱེན་ཡིན་ན། གཟུགས་འཛིན་དབང་མངོན་རང་དབང་དུ་གཙོ་བོར་དངོས་སུ་སྐྱེད་བྱེད་ཡིན་དགོས་པའི་ཕྱིར། ཁོ་ན་རེ། དབང་ཤེས་ཡིན་ན། ལུས་ཤེས་ཡིན་པས་ཁྱབ་ཟེར་ན། འོ་ན། དབང་ཤེས་ཡིན་ན། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་ལུས་དབང་གཟུགས་ཅན་པ་ལས་བྱུང་བས་ཁྱབ་པར་ཐལ། དམ་བཅའ་འཐད་པའི་ཕྱིར། འདོད་ན། གཟུགས་འཛིན་མིག་ཤེས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་ལས་བྱུང་བའི་ཕྱིར། བྱས་པ་ལ་ཁོ་ན་རེ། དབང་ཤེས་ཡིན་ན། ལུས་ཤེས་ཡིན་དགོས་པར་ཐལ། དབང་པོ་གཟུགས་ཅན་པ་ཡིན་ན། ལུས་དབང་གཟུགས་ཅན་པ་ཡིན་དགོས་པའི་ཕྱིར་ཏེ། དབང་པོ་གཟུགས་ཅན་པ་ཡིན་ན། རང་ཉིད་ལ་གནས་པའི་རྟེན་གྱི་གང་ཟག་དེའི་ལུས་ཀྱི་ཆ་ཤས་ཡིན་དགོས་པའི་ཕྱིར་ན་མ་ཁྱབ། གཞན་ཡང་། ཁོ་ན་རེ། དབང་ཤེས་ཡིན་ན། ལུས་ཤེས་ཡིན་དགོས་པར་ཐལ། གཟུགས་འཛིན་མིག་གི་རྣམ་པར་ཤེས་པ་དེ་ལུས་ཤེས་ཡིན་པའི་ཕྱིར། དེའི་འཁོར་དུ་གྱུར་པའི་ཚོར་བ་དེ་ལུས་ཚོར་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་ཕྱིའི་ཚོར་བ་ཡིན་པའི་ཕྱིར། གོང་དུ་མ་ཁྱབ་བྱས་པ་ལ་ཁོ་ན་རེ། གཟུགས་འཛིན་མིག་གི་རྣམ་པར་ཤེས་པའི་འཁོར་དུ་གྱུར་པའི་ཚོར་བ་ཆོས་ཅན། ཁྱོད་འཁོར་དུ་སྡུད་པར་བྱེད་པའི་ལུས་ཤེས་ཡོད་པར་ཐལ། ཁྱོད་ལུས་ཚོར་ཡིན་པའི་ཕྱིར་ན་མ་ཁྱབ། འདོད་ན། གཟུགས་འཛིན་མིག་གི་རྣམ་པར་ཤེས་པ་དེ་ལུས་ཤེས་ཡིན་པར་ཐལ། འདོད་པའི་ཕྱིར། ཁོ་རང་ལ། མིག་ཤེས་དེ་དབང་ཤེས་སུ་ཐལ། མིག་ཤེས་ནས་ལུས་ཤེས་ཀྱི་བར་ལྔར་ཕྱེས་པའི་མིག་ཤེས་དེ་ལུས་ཤེས་ཡིན་པའི་ཕྱིར། དེ་ལ་མ་ཁྱབ་ན་གསལ་བ་དེར་ཐལ། དབང་ཤེས་ལ་མིག་ཤེས་ནས་ལུས་ཤེས་ཀྱི་བར་ལྔར་ཕྱེས་པའི་མིག་ཤེས་དེ་ལུས་ཤེས་ཡིན་པའི་ཕྱིར། མ་གྲུབ་ན། དེ་ཆོས་ཅན། ལུས་ཤེས་ཡིན་པར་ཐལ། དབང་ཤེས་ཡིན་པའི་ཕྱིར། ཁྱབ་པ་ཁས། གཞན་ཡང་། གཟུགས་དེ་ཚུར་མཐོང་གི་རྒྱུད་ཀྱི་ལུས་ཤེས་ཀྱི་གཞལ་བྱ་ཡིན་པར་ཐལ། དེའི་རྒྱུད་ཀྱི་གཟུགས་འཛིན་མིག་ཤེས་དེ་ལུས་ཤེས་ཡིན་པའི་ཕྱིར། འདོད་མི་ནུས་ཏེ། གཟུགས་དེ་དེའི་རྒྱུད་ཀྱི་མིག་ཤེས་ཀྱི་གཞལ་བྱ་ཡིན་པའི་ཕྱིར། ཁྱབ་སྟེ། དེའི་རྒྱུད་ཀྱི་ལུས་ཤེས་ཀྱི་གཞལ་བྱ་ཡིན་ན། དེའི་རྒྱུད་ཀྱི་མིག་ཤེས་ཀྱི་གཞལ་བྱ་མ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། དབང་ཤེས་ཡིན་ན། ལུས་ཤེས་ཡིན་དགོས་པར་ཐལ། ཤེས་པ་ལ། ལུས་ཤེས་དང་ཡིད་ཤེས་གཉིས་སུ་གྲངས་ངེས་པའི་ཕྱིར་ཏེ། ཚོར་བ་ལ་ལུས་ཚོར་དང་སེམས་ཚོར་གཉིས་སུ་གྲངས་ངེས་པའི་ཕྱིར་ན་མ་ཁྱབ། རྟགས་གྲུབ་སྟེ། ཚོར་བ་བདེ་བ་ལ་ལུས་ཚོར་བདེ་བ་དང་། སེམས་ཚོར་བདེ་བ་གཉིས་སུ་གྲངས་ངེས། ཚོར་བ་སྡུག་བསྔལ་ལ། ལུས་ཚོར་སྡུག་བསྔལ་དང་སེམས་ཚོར་སྡུག་བསྔལ་གཉིས་སུ་གྲངས་ངེས་པའི་ཕྱིར། ཁ་ཅིག་ན་རེ། རང་གི་དམིགས་རྐྱེན་དུ་གྱུར་པའི་གཟུགས་ལ་བརྟེན་ནས་སྐྱེས་པའི་དབང་ཤེས་ཡིན་ན། གཟུགས་འཛིན་དབང་ཤེས་ཡིན་པའི་ཁྱབ་ཟེར་ན། གཟུགས་འཛིན་པའི་དབང་ཤེས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། གཟུགས་དེ་དེའི་དམིགས་རྐྱེན་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། ཁྱོད་ཁྱོད་རང་འཛིན་པའི་དབང་ཤེས་ཀྱི་དམིགས་རྐྱེན་ཡིན་པར་ཐལ། ཁྱོད་ཁྱོད་རང་རྟོགས་པའི་དབང་ཤེས་ཀྱི་དེ་ཡིན་པའི་ཕྱིར་ཏེ། ཁྱོད་གཟུགས་ཀྱི་སྐྱེ་མཆེད་ཡིན་པའི་ཕྱིར། རྩ་བར་འདོད་ན། གཟུགས་འཛིན་པའི་ཡིད་མངོན་དེ། གཟུགས་འཛིན་ཡིད་མངོན་ཡིན་པར་ཐལ། འདོད་པའི་ཕྱིར། འདོད་ན། གཟུགས་འཛིན་པའི་ཡིད་མངོན་གྱི་རིགས་རྒྱུན་མེད་པར་ཐལ། འདོད་པ་གང་ཞིག །གཟུགས་འཛིན་ཡིད་མངོན་གྱི་རིགས་རྒྱུན་མེད་པའི་ཕྱིར། རྟགས་ཕྱི་མ་གྲུབ་མཐའ་ལ་ཁས། འདོད་ན། མིག་གི་མངོན་ཤེས་ཀྱི་རིགས་རྒྱུན་མེད་པར་ཐལ། འདོད་པ་གང་ཞིག །མིག་གི་མངོན་ཤེས་དེ་གཟུགས་འཛིན་པའི་ཡིད་མངོན་ཡིན་པའི་ཕྱིར། བྱས་པ་ལ་ཁོ་ན་རེ། གོང་དུ་མ་ཁྱབ་སྟེ། འོ་ན། གཟུགས་འཛིན་པའི་ཡིད་མངོན་གྱི་དམིགས་རྐྱེན་དུ་གྱུར་པའི་གཟུགས་ཡོད་པར་ཐལ། གཟུགས་འཛིན་པའི་དབང་མངོན་གྱི་དམིགས་རྐྱེན་དུ་གྱུར་པའི་གཟུགས་ཡོད་པའི་ཕྱིར། ཁྱབ་པ་ཁས། ཟེར་ན། མི་འགྲིག་གོ །འདོད་ན། གཟུགས་འཛིན་པའི་ཡིད་མངོན་གྱི་དམིགས་རྐྱེན་དུ་གྱུར་པའི་གཟུགས་མེད་པར་ཐལ། སངས་འཕགས་ཀྱི་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ། གཟུགས་འཛིན་ཡིད་མངོན་ཡིན་པའི་ཕྱིར། །

༈ རང་ལུགས་ལ། དབང་ཤེས་ལ་མཚན་ཉིད། དབྱེ་བ་གཉིས། དང་པོ་ནི། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལ་བརྟེན་ནས་བྱུང་བའི་རིག་པ་དེ། དབང་ཤེས་ཀྱི་མཚན་ཉིད། དེ་ལ་དབྱེ་ན། མིག་ཤེས་ནས་ལུས་ཤེས་ཀྱི་བར་ལྔ་ཡོད། ཡང་དེ་ལ་དབྱེ་ན། འཁྲུལ་ཤེས་སུ་གྱུར་པའི་དབང་ཤེས་དང་། དབང་མངོན་གཉིས་ཡོད། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལ་བརྟེན་ནས་བྱུང་བའི་གསལ་སྣང་ཅན་གྱི་འཁྲུལ་པའི་རིག་པ་དེ། འཁྲུལ་ཤེས་སུ་གྱུར་པའི་དབང་ཤེས་ཀྱི་མཚན་ཉིད། དཔེར་ན། ཟླ་བ་གཉིས་སྣང་གི་དབང་ཤེས་ལྟ་བུའོ། །རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ལ་བརྟེན་ནས་བྱུང་བའི་རྟོག་བྲལ་མ་འཁྲུལ་པའི་རིག་པ་དེ། དབང་མངོན་གྱི་མཚན་ཉིད། དེ་ལ་དབྱེ་ན། གཟུགས་འཛིན་དབང་མངོན་ནས་རེག་བྱ་འཛིན་པའི་དབང་མངོན་གྱི་བར་ལྔ་ཡོད། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་མིག་དབང་གཟུགས་ཅན་པ་ལ་བརྟེན་ནས་བྱུང་བའི་རྟོག་བྲལ་མ་འཁྲུལ་པའི་རིག་པ་དེ། གཟུགས་འཛིན་དབང་མངོན་གྱི་མཚན་ཉིད་ཡིན་ཅིང་། དེས་གཞན་རྣམས་ལ་རིགས་འདྲེའོ། །

རང་ལུགས་ཀྱི་དབང་མངོན་གྱི་དོན་དང་དེའི་རྐྱེན་གསུམ་བཤད་པ།

༈ རྐྱེན་གསུམ་བཤད་པ་ལ། སེམས་ཙམ་པའི་ལུགས་ཅུང་ཟད་བཤད་པ་དང་། མདོ་སྡེ་པའི་ལུགས་བརྗོད་པ་གཉིས། དང་པོ་ནི། གཟུགས་འཛིན་དབང་མངོན་གྱི་དམིགས་རྐྱེན་དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། དེའི་སྣང་བའི་དམིགས་རྐྱེན་དང་། ནུས་པ་འཇོག་པའི་དམིགས་རྐྱེན་གཉིས་སུ་ཡོད་ལ། གཟུགས་དེ་དང་པོའི་མཚན་གཞི་ཡིན། གཟུགས་ལ་དེ་ལྟར་བརྗོད་པའི་རྒྱུ་མཚན་ཡོད་དེ། གཟུགས་འཛིན་དབང་མངོན་དེ་གཟུགས་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་རྒྱུ་མཚན་གྱིས། དེ་ལྟར་བརྗོད་པའི་ཕྱིར། དེ་སྐད་དུ་ཡང་དམིགས་པ་བརྟགས་པ་ལས། གཅིག་ཆར་མི་འཁྲུལ་ཕྱིར་ན་རྐྱེན། །ཞེས་གསུངས་པའི་ཕྱིར། གཟུགས་འཛིན་དབང་མངོན་གྱི་དམིགས་རྐྱེན་དང་། དེའི་ནུས་པ་འཇོག་པའི་དམིགས་རྐྱེན་དོན་གཅིག །དེའི་ནུས་པ་འཇོག་པའི་དམིགས་རྐྱེན་དང་། ལྡན་མིན་འདུ་བྱེད་ཀྱི་གཞི་མཐུན་ཡོད་དེ། གཟུགས་འཛིན་དབང་མངོན་གྱི་དེ་མ་ཐག་རྐྱེན་གྱི་སྟེང་གི་གཟུགས་འཛིན་དབང་མངོན་སྐྱེད་པའི་ནུས་པ་དེ་དེ་འདྲའི་གཞི་མཐུན་ཡིན་པའི་ཕྱིར། དེ་སྐད་དུ་ཡང་དམིགས་པ་བརྟགས་པ་ལས། ཡང་ན། ནུས་པ་འཇོག་ཕྱིར་རིམ་གྱིས་ཡིན། །ཞེས་གསུངས་པའི་ཕྱིར། དེ་ལྟར་ཡིན་ཀྱང་གཟུགས་འཛིན་དབང་མངོན་གྱི་གཟུང་དོན་ནི་མེད་དོ། །

༈ གཉིས་པ་མདོ་སྡེ་པའི་ལུགས་བཤད་པ་ནི། གཟུགས་འཛིན་དབང་མངོན་གྱི་རྐྱེན་གསུམ་པོ་གང་རུང་གང་ཞིག །གཟུགས་འཛིན་དབང་མངོན་རང་ཉིད་ཀྱི་རྣམ་ལྡན་དུ་དངོས་སུ་སྐྱེད་བྱེད་དེ་གཟུགས་འཛིན་དབང་མངོན་གྱི་དམིགས་རྐྱེན་གྱི་མཚན་ཉིད། མཚན་གཞི་ནི་གཟུགས་ལྟ་བུའོ། །དེའི་དེ་གསུམ་གང་རུང་གང་ཞིག །དེ་རང་དབང་དུ་གཙོ་བོར་དངོས་སུ་སྐྱེད་བྱེད་ཀྱི་ནང་གི་གཟུགས་ཅན་དྭངས་བ་དེ། དེའི་ཐུན་མོང་མ་ཡིན་པའི་བདག་རྐྱེན་གྱི་མཚན་ཉིད། མཚན་གཞི་ནི། རྟེན་བཅས་ཀྱི་མིག་དབང་གཟུགས་ཅན་ལྟ་བུ། དེའི་དེ་གསུམ་གང་རུང་གང་ཞིག །དེ་རང་དབང་དུ་གཙོ་བོར་དངོས་སུ་སྐྱེད་བྱེད་ཀྱི་རིག་པ་དེ། དེའི་ཐུན་མོང་བའི་བདག་རྐྱེན་གྱི་མཚན་ཉིད། དེ་གང་རུང་གང་ཞིག །དེ་མྱོང་བ་གསལ་རིག་ཏུ་གཙོ་བོར་དངོས་སུ་སྐྱེད་བྱེད་ཀྱི་རིག་པ་དེ། དེའི་དེ་མ་ཐག་རྐྱེན་གྱི་མཚན་ཉིད་དང་། དེ་རང་གི་རྫས་རྒྱུན་དུ་གཙོ་བོར་དངོས་སུ་སྐྱེད་བྱེད་ཀྱི་རིག་པ་དེ། དེའི་དངོས་ཀྱི་ཉེར་ལེན་དུ་གྱུར་པའི་ཤེས་པའི་མཚན་ཉིད། དེའི་ཐུན་མོང་བའི་བདག་རྐྱེན། དེའི་དེ་མ་ཐག་རྐྱེན། དེའི་དངོས་ཀྱི་ཉེར་ལེན་དུ་གྱུར་པའི་ཤེས་པ་རྣམས་དོན་གཅིག །མཚན་གཞི་ནི། རང་གི་སྔ་ལོགས་དེ་མ་ཐག་ཏུ་བྱུང་བའི་གཟུགས་ཡིད་ལ་བྱེད་པའི་ཤེས་པ་ལྟ་བུའོ། །ངག་དོན་ནི། གཟུགས་འཛིན་དབང་ཤེས་དེ་རང་གི་དམིགས་རྐྱེན་དུ་གྱུར་པའི་གཟུགས་དང་། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་རྟེན་བཅས་ཀྱི་མིག་དབང་གཟུགས་ཅན་པ་ལ་བརྟེན་ནས་བྱུང་བའི་རྟོག་བྲལ་གྱི་རིག་པ་ཡིན་ཏེ། དེ་ཡིན་པའམ། གཟུགས་འཛིན་དབང་ཤེས་མིང་སྦྱོར་རྟོག་པ་ཡིན་པ་གང་རུང་གང་ཞིག །དེ་མིང་སྦྱོར་རྟོག་པ་ཡིན་པ་ལ་གནོད་བྱེད་གོང་དུ་བསྟན་ཟིན་པའི་ཕྱིར། །

༈ རྩོད་པ་སྤང་བ་ལ། ཁ་ཅིག་ན་རེ། གཟུགས་མེད་ནས་ཤི་འཕོས་ནས་འདོད་པའི་བར་སྲིད་དུ་སྐྱེས་མ་ཐག་པའི་གང་ཟག་གི་རྒྱུད་ཀྱི་དྲི་འཛིན་དབང་མངོན་ཆོས་ཅན། རང་གི་ཐུན་མོང་མ་ཡིན་པའི་ཞེས་སོགས་མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། དེའི་རྒྱུད་ལ་དྲི་འཛིན་དབང་མངོན་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྒྱུད་ལ་དེར་ཐལ། ཁྱོད་ཀྱི་རྒྱུད་ལ་སྒོ་ལྔའི་དབང་ཤེས་ཡོད་པའི་ཕྱིར། ཁྱོད་དབང་པོ་ཀུན་ཚང་བའི་གང་ཟག་ཡིན་པའི་ཕྱིར། ཁ་ཅིག །འདིར་མ་ཁྱབ་ཟེར། རྟགས་གྲུབ་སྟེ། བར་སྲིད་པ་ཡིན་པའི་ཕྱིར། རྩ་བར་འདོད་ན། གཟུགས་མེད་ན་དབང་པོ་གཟུགས་ཅན་པ་ཡོད་པར་ཐལ། འདོད་པའི་ཕྱིར་ན་མ་ཁྱབ་སྟེ། འོ་ན། ཁོ་རང་ལ། གཟུགས་མེད་ནས་ཞེས་སོགས་ཀྱི་གང་ཟག་གི་རྒྱུད་ཀྱི་དྲི་འཛིན་དབང་མངོན་དེའི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོ་གཟུགས་ཅན་པ་ཡོད་པར་ཐལ། དེའི་དེར་གྱུར་པའི་བེམ་པོ་ཡོད་པའི་ཕྱིར་ཏེ། དེའི་དེར་གྱུར་པའི་ལྡན་མིན་འདུ་བྱེད་ཀྱང་མེད། དེར་གྱུར་པའི་ཤེས་པ་ཡང་མེད་པའི་ཕྱིར། །

༈ ཁ་ཅིག་ན་རེ། གཟུགས་འཛིན་དབང་ཤེས་ཀྱི་སྔ་ལོགས་དེ་མ་ཐག་ཏུ་བྱུང་བའི་གཟུགས་ཡིད་ལ་བྱེད་པའི་ཤེས་པ་ཆོས་ཅན། གཟུགས་འཛིན་དབང་མངོན་རང་དབང་དུ་སྐྱེད་བྱེད་མ་ཡིན་པར་ཐལ། ཁྱོད་ཀྱིས་གཟུགས་འཛིན་དབང་མངོན་གྱི་གཟུང་དོན་གྲོགས་སུ་ཡོད་པ་ལ་ལྟོས་ནས་གཟུགས་འཛིན་དབང་མངོན་བསྐྱེད་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། གཟུགས་འཛིན་པའི་ཡིད་མངོན་གྱི་དེ་མ་ཐག་རྐྱེན་དུ་གྱུར་པའི་གཟུགས་འཛིན་དབང་མངོན་དེས། གཟུགས་འཛིན་ཡིད་མངོན་གྱི་གཟུང་དོན་གྲོགས་སུ་ཡོད་པ་ལ་ལྟོས་ནས། གཟུགས་འཛིན་ཡིད་མངོན་བསྐྱེད་པ་ཡིན་པའི་ཕྱིར། རང་དོན་རྗེས་འགྲོའི་དོན་ལྟོས་ཅན། །ཞེས་གསུངས་པའི་ཕྱིར། དབང་མངོན་གྱི་དམིགས་རྐྱེན་དུ་གྱུར་པའི་བེམ་པོ་ཡོད་པར་ཐལ། གཟུགས་འཛིན་དབང་མངོན་གྱི་དེར་གྱུར་པའི་བེམ་པོ་ཡོད་པའི་ཕྱིར། རྟགས་ཁས་ཟེར། འདོད་ན། དེའི་དེར་གྱུར་པའི་གཟུགས་སོགས་དོན་ལྔ་གང་རུང་ཡོད་པར་ཐལ། འདོད་པའི་ཕྱིར་ན་མ་ཁྱབ། འདོད་ན། དེར་གྱུར་པའི་གཟུགས་ཀྱི་སྐྱེ་མཆེད་ཡོད་པར་ཐལ་ལོ། །འདོད་ན། དེ་མིག་ཤེས་ཡིན་པར་ཐལ་ལོ། །དབང་མངོན་གྱི་དམིགས་རྐྱེན་དུ་གྱུར་པའི་བེམ་པོ་ཡོད་པར་ཐལ། ཕྱི་དོན་དེ་དབང་མངོན་གྱི་དམིགས་རྐྱེན་ཡིན་པའི་ཕྱིར། ཕྱི་དོན་དེ་ཕྱི་དོན་འཛིན་པའི་དབང་མངོན་གྱི་དམིགས་རྐྱེན་གང་ཞིག །དབང་མངོན་ཡིན་ན། ཕྱི་དོན་འཛིན་པའི་དབང་མངོན་ཡིན་དགོས་པའི་ཕྱིར། ཕྱི་མ་གྲུབ་སྟེ། དབང་མངོན་ཡིན་ན། རང་ཡུལ་དུ་གྱུར་པའི་ཕྱི་དོན་འཛིན་པའི་དབང་མངོན་ཡིན་དགོས་པའི་ཕྱིར། ཁ་ཅིག་ན་རེ། གཟུགས་ཆོས་ཅན། ཁྱོད་ཁྱོད་རྟོགས་པའི་དབང་མངོན་གྱི་དམིགས་རྐྱེན་ཡིན་པར་ཐལ། ཁྱོད་ཁྱོད་རང་འཛིན་པའི་དབང་མངོན་གྱི་དམིགས་རྐྱེན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཁྱོད་རང་རྟོགས་པའི་མངོན་སུམ་གྱི་དམིགས་རྐྱེན་དུ་ཐལ། འདོད་པའི་ཕྱིར་ན་མ་ཁྱབ། འདོད་ན། གཟུགས་རྟོགས་པའི་མངོན་སུམ་དེ། དམིགས་རྐྱེན་ཅན་གྱི་ཤེས་པ་ཡིན་པར་ཐལ། གཟུགས་དེ་དེའི་དམིགས་རྐྱེན་ཡིན་པའི་ཕྱིར། འདོད་ན། དེ་ཆོས་ཅན། དེ་མ་ཡིན་པར་ཐར། སངས་འཕགས་ཀྱི་རྒྱུད་ཀྱི་རང་རིག་ཁྱོད་ཡིན་པའི་ཕྱིར། གཞན་ཡང་། ཁོ་ན་རེ། གཟུགས་དེ་གཟུགས་མི་རྟག་པར་འཛིན་པའི་དབང་མངོན་གྱི་དམིགས་རྐྱེན་ཡིན་པར་ཐལ། གཟུགས་དེ་གཟུགས་འཛིན་དབང་མངོན་གྱི་དམིགས་རྐྱེན་ཡིན་པའི་ཕྱིར། འདོད་ན། དེ་དེ་མི་རྟག་པ་ཡིན་པར་རྟོགས་པའི་དབང་མངོན་གྱི་དམིགས་རྐྱེན་དུ་ཐལ། འདོད་པའི་ཕྱིར་ན་མ་ཁྱབ། འདོད་ན། གཟུགས་དེ་སངས་འཕགས་ཀྱི་རྒྱུད་ཀྱི་གཟུགས་མི་རྟག་པར་རྟོགས་པའི་དབང་མངོན་གྱི་དམིགས་རྐྱེན་དུ་ཐལ། འདོད་པ་གང་ཞིག །སོ་སྐྱེའི་རྒྱུད་ལ་དེ་འདྲའི་དབང་མངོན་མེད་པའི་ཕྱིར། འདོད་ན། དེ་དེའི་རྒྱུད་ཀྱི་དབང་མངོན་གྱི་དམིགས་རྐྱེན་ཡིན་པར་ཐལ། འདོད་པའི་ཕྱིར། ཁ་ཅིག་ན་རེ། སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་གྱི་དེ་མ་ཐག་རྐྱེན་ཆོས་ཅན། སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་གྱི་དམིགས་རྐྱེན་ཡིན་པར་ཐལ། དེའི་རྐྱེན་གསུམ་གང་རུང་གང་ཞིག །དེ་རང་ཉིད་ཀྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར། ཁྱབ་པ་ཁས། ཟེར་ན། མ་ཁྱབ། རྟགས་གཉིས་པ་གྲུབ་སྟེ། དེ་རང་ཉིད་ཀྱི་རྣམ་པ་ཤར་བའི་རིག་པར་གཙོ་བོར་དངོས་སུ་སྐྱེད་བྱེད་ཡིན་པའི་ཕྱིར་ཏེ། དེ་རང་ཉིད་ཀྱི་རྣམ་པ་ཤར་བའི་རིག་པ་གང་ཞིག །དེ་རིག་པར་དངོས་སུ་སྐྱེད་བྱེད་ཡིན་པའི་ཕྱིར་ཟེར་ན། ཁོ་རང་ལ། གཟུགས་འཛིན་དབང་མངོན་གྱི་དེ་མ་ཐག་རྐྱེན་དེ་གཟུགས་འཛིན་དབང་མངོན་གྱིས་དངོས་སུ་རྟོགས་པར་ཐལ། གཟུགས་འཛིན་དབང་མངོན་ལ་དེའི་རྣམ་པ་ཤར་བའི་ཕྱིར། སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་ལ་དེའི་རྣམ་པ་ཤར་བའི་ཕྱིར། ཁྱབ་པ་ཁས། བྱས་པ་ལ་ཁོ་ན་རེ། འོ་ན། སངས་འཕགས་ཀྱི་རྒྱུད་ཀྱི་གཟུགས་འཛིན་དབང་མངོན་གྱི་དེ་མ་ཐག་རྐྱེན་གྱི་མཚན་ཉིད་གང་ཞེ་ན། དེའི་དེ་མ་ཐག་རྐྱེན་དང་དེའི་དམིགས་རྐྱེན་གང་རུང་ཡང་ཡིན། ཤེས་པ་ཡང་ཡིན་པའི་གཞི་མཐུན་པར་གྱུར་པའི་འདུས་བྱས་དེ་དེའི་མཚན་ཉིད། དེ་གང་རུང་ཡང་ཡིན། ཤེས་པ་མ་ཡིན་པ་ཡང་ཡིན་པའི་གཞི་མཐུན་པར་གྱུར་པའི་འདུས་བྱས་དེ་དེའི་དམིགས་རྐྱེན་གྱི་མཚན་ཉིད་ཡིན། དེའི་དམིགས་རྐྱེན་དང་དེའི་ཐུན་མོང་མ་ཡིན་པའི་བདག་རྐྱེན་གང་རུང་ཡང་ཡིན། དབང་པོ་གཟུགས་ཅན་པ་ཡང་ཡིན་པའི་གཞི་མཐུན་པར་གྱུར་པའི་འདུས་བྱས་དེ་དེའི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དབང་པོའི་མཚན་ཉིད། འོ་ན། གཟུགས་འཛིན་དབང་ཤེས་ཀྱི་རྐྱེན་གསུམ་གྱིས་གཟུགས་འཛིན་དབང་ཤེས་བསྐྱེད་པའི་ཚུལ་གང་ཞེ་ན། དེའི་ཚུལ་ཡོད་དེ། ནང་གི་རྟེན་གྱི་དབང་པོ་གཟུགས་ཅན་པ་དང་ཕྱིའི་གཟུགས་ཀྱི་སྐྱེ་མཆེད་གཉིས་འཕྲད་པ་ལ་བརྟེན་ནས་ཡིད་ཀྱི་རྣམ་པར་ཤེས་པ་ནང་དུ་བསྡུས། རྟེན་བཅས་ཀྱི་མིག་དབང་གཟུགས་ཅན་པ་དང་འཕྲད་པ་ལ་བརྟེན་ནས་དེ་འདྲ་བའི་མིག་དབང་གཟུགས་ཅན་པ་དེས་ཐུན་མོང་མ་ཡིན་པའི་བདག་རྐྱེན་བྱས་ནས། དེའི་རྣམ་པར་ཤེས་པ་དེའི་རིགས་རྒྱུན་དུ་གྱུར་པའི་རིག་པ་ཞིག་དབང་ཤེས་སུ་གྱུར་པ་ཡིན་ནོ། །

༈ ཇི་ལྟ་ཇི་ལྟར་དོན་བསམ་པ། །ཞེས་སོགས་འདི་གང་ལས་འཕྲོས་ན། མངོན་སུམ་རྟོག་དང་བྲལ་བ་ནི། །ཞེས་པ་ནས། བརྟེན་ནས་མིག་བློ་སྐྱེ་བར་འགྱུར། །ཞེས་པའི་བར་དེར། གཟུགས་འཛིན་དབང་ཤེས་རྟོག་པ་ཡིན་པ་ལ་གནོད་བྱེད་བསྟན་ནས་དེ་རྟོག་བྲལ་དུ་སྒྲུབ་པ་ལ། ཁོ་ན་རེ། གཟུགས་འཛིན་དབང་ཤེས་རྟོག་བྲལ་ཡིན་པ་དེ་མི་འཐད་པར་ཐལ། ཆོས་མངོན་པའི་མདོ་ལས། རྣམ་པར་ཤེས་པའི་ཚོགས་ལྔ་ནི། བསགས་པ་ལ་དམིགས་པ་ཅན་ནོ། །ཞེས་དང་། སློབ་དཔོན་དབྱིག་གཉེན་གྱིས། གང་ལ་སྐྱེད་བྱེད་ཀྱི་རང་གི་མཚན་ཉིད་ལ་སོ་སོར་རང་གི་མཚན་ཉིད་ཀྱི་ཡུལ་ཅན་ཡིན་ལ་རྫས་ཀྱི་མཚན་ཉིད་ཀྱི་ཡུལ་ཅན་མ་ཡིན་ནོ། །ཞེས་པ་འདི་གཉིས་ཀྱིས། གཟུགས་འཛིན་དབང་ཤེས་སྤྱི་དོན་གཞན་འཛིན་པའི་བློར་བསྟན་པ་གང་ཞིག །སྤྱི་དོན་གཞན་འཛིན་པའི་བློ་ཡིན་ན། རྟོག་པ་ཡིན་དགོས་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། བསགས་པ་དང་ནི་ཚོགས་པ་ཡིས། །ཞེས་སོགས་རྐང་པ་བཞི་བྱུང་། འདིའི་ལན་ལ་མངོན་པའི་མདོ་དང་འགལ་བ་སྤང་པ། སློབ་དཔོན་དབྱིག་གཉེན་གྱི་ལུང་དང་འགལ་བ་སྤང་པ་གཉིས། དང་པོ་ནི། མངོན་པའི་མདོ་དང་འགལ་བའི་སྐྱོན་མེད་དེ། རྡུལ་དུ་མ་བསགས་པའི་བསགས་རྡུལ་ཁྱད་པར་ཅན་དེ། རང་འབྲས་དབང་ཤེས་ཀྱི་གཟུང་དོན་དུ་བསྟན་པ་ཙམ་ཡིན་གྱི། གཟུགས་འཛིན་དབང་ཤེས་སྤྱི་དོན་གཞན་འཛིན་པའི་བློར་བསྟན་པ་མ་ཡིན་པའི་ཕྱིར། ཞེས་འཆད་པར་བྱེད་པ་ལ། དོན་གཞན་དང་ནི་དངོས་འབྲེལ་ཕྱིར། །ཞེས་སོགས་རྐང་པ་བཞི་བྱུང་། གཉིས་པ་ནི། སློབ་དཔོན་དབྱིག་གཉེན་གྱི་ལུང་དང་འགལ་བའི་སྐྱོན་མེད་དེ། ལུང་དེས་ནི། ཟླ་མེད་ཀྱི་རྡུལ་ཕྲན་རེ་རེ་བས་རང་འབྲས་དབང་ཤེས་བསྐྱེད་མི་ནུས་པས། རྡུལ་དུ་མ་བསགས་པའི་དུམ་བུ་དེ་རང་འབྲས་དབང་ཤེས་ཀྱི་གཟུང་དོན་དུ་བསྟན་པ་ཙམ་ཡིན་གྱི། གཟུགས་འཛིན་དབང་ཤེས་སྤྱི་དོན་གཞན་འཛིན་པའི་བློར་བསྟན་པ་མ་ཡིན་པའི་ཕྱིར། ཞེས་འཆད་པར་བྱེད་པ་ལ། རྡུལ་ཕྲན་གཞན་དག་མེད་པར་ནི། །ཞེས་སོགས་རྐང་པ་བཞི་བྱུང་། རང་རེས། གཟུགས་འཛིན་དབང་ཤེས་རྟོག་བྲལ་དུ་ཁས་བླངས་པ་ལ། གྲངས་ཅན་པ། རིགས་པ་ཅན་པ། བྱེ་བྲག་པ་རྣམས་ན་རེ། གཟུགས་འཛིན་དབང་ཤེས་རྟོག་པ་ཡིན་ཏེ། གཟུགས་འཛིན་དབང་ཤེས་དེ་རྡུལ་དུ་མ་རིམ་གྱིས་བཟུང་བ་ལ་གཅིག་ཆར་དུ་འཛིན་པར་སྒྲོ་འདོགས་པའི་བློ་ཡིན་པའི་ཕྱིར། དེ་ཡང་ཡིན་ཏེ། དེ་ལ་གཟུགས་རྡུལ་དུ་མ་གཅིག་ཆར་དུ་སྣང་བ་གང་ཞིག །དེས་གཟུགས་རྡུལ་དུ་མ་གཅིག་ཆར་དུ་མི་འཛིན་པའི་ཕྱིར་ཏེ། བློ་གཅིག་གིས་དོན་དུ་མ་གཅིག་ཆར་དུ་འཛིན་པ་མེད་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་སྐྱེ་མཆེད་གཅིག་ཡིན་ཡང་། །ཞེས་སོགས་རྐང་པ་གཉིས་བྱུང་། དེ་འགོག་པར་བྱེད་པ་ལ། ཏིལ་སོགས་ཐ་དད་ལ་ཇི་ལྟར། །ཞེས་སོགས་རྐང་པ་གཉིས་བྱུང་། དེ་ལྟར་བྱས་པ་ལ་ཁོ་ན་རེ། ཏིལ་དུ་མ་དེ་ཏིལ་འཛིན་གྱི་བློ་མ་འཁྲུལ་བས་འཛིན་པ་མགྱོགས་པའི་ཚུལ་གྱིས་བཟུང་བ་ན་གཅིག་ཆར་དུ་འཛིན་པ་འཁྲུལ་བ་ཙམ་ཡིན་ནོ་ཟེར་ན། དེ་འགོག་པ་ལ། དགག་པ་བྱས་ཟིན་དྲན་པའི་སྒོ་ནས་འགོག་པ་དང་། རིགས་པ་གཞན་གྱི་སྒོ་ནས་འགོག་པ་གཉིས་ལས། དང་པོ་འཆད་པར་བྱེད་པ་ལ། འདི་ལ་མགྱོགས་པར་བཤད་ཟིན་ཏོ། །ཞེས་གསུངས། གཉིས་པ་ལ། བློ་མ་འཁྲུལ་བས་འཛིན་པ་མགྱོགས་པའི་ཚུལ་གྱིས་བཟུང་བ་གཅིག་ཆར་དུ་འཛིན་པར་འཁྲུལ་ན། ཏིལ་དུ་མ་ནམ་མཁའ་ནས་རིམ་བཞིན་འབབ་པར་འཛིན་པའི་བློ་དེ་ལ་ཏིལ་དུ་མ་རིམ་བཞིན་དུ་མི་སྣང་བར་ཐལ་བ་དང་། བློ་ལ་རང་ཡུལ་རིམ་བཞིན་དུ་འཛིན་པའི་བློ་དང་རང་ཡུལ་གཅིག་ཆར་དུ་འཛིན་པའི་བློའི་དབྱེ་བ་མི་འཐད་པར་ཐལ་བ་དང་། བློ་ཐམས་ཅད་རང་ཡུལ་ལ་གཅིག་ཆར་དུ་འཛིན་པ་འཁྲུལ་བར་ཐལ་བའི་རིགས་པ་གསུམ་ཡོད་པའི་རིགས་པ་དང་པོ་འཆད་པར་བྱེད་པ་ལ། རིམ་བཞིན་བབས་པ་དེ་ཉིད་ལ། །ཞེས་སོགས་རྐང་པ་གཉིས་བྱུང་། རིགས་པ་གཉིས་པ་འཆད་པར་བྱེད་པ་ལ། བློ་རྣམས་དག་ནི་ཐམས་ཅད་ཀྱང་། །ཞེས་སོགས་རྐང་པ་བཞི་བྱུང་། རིགས་པ་གསུམ་པ་འཆད་པར་བྱེད་པ་ལ། དེ་ཕྱིར་དོན་ཀུན་འཛིན་པ་ལ། །ཞེས་སོགས་རྐང་པ་གཉིས་བྱུང་། དེར་ཡང་མ་ཟད་ཕྱེ་མ་ལེབ་ཀྱི་གཤོག་སྟེང་གི་སྔོ་སེར་དཀར་དམར་སྣ་ཚོགས་པ་དེ་ཆོས་ཅན། བློ་མ་འཁྲུལ་བས་གཅིག་ཆར་འཛིན་པ་མ་ཡིན་པར་ཐལ། དོན་དུ་མ་ཡིན་པའི་ཕྱིར། ཁྱབ་པ་ཁས། ཞེས་འཆད་པར་བྱེད་པ་ལ། ཕྱེ་མ་ལེབ་ཁྲ་ལ་སོགས་གཟུགས། །ཞེས་སོགས་རྐང་པ་གཉིས་བྱུང་། དེ་ལྟར་བྱས་པ་ལ་ཁོ་ན་རེ། ཕྱེ་མ་ལེབ་ཀྱི་གཤོག་སྟེང་གི་སྔོ་སེར་དཀར་དམར་སྣ་ཚོགས་པ་དེ་ཡན་ལག་ཆ་མེད་གཅིག་གི་རང་བཞིན་ཡིན་པས་སྐྱོན་མེད། ཅེས་པའི་འདོད་པ་རྗོད་པར་བྱེད་པ་ལ། གལ་ཏེ་སྣ་ཚོགས་དེ་གཅིག་ན། །ཞེས་པ་འདི་བྱུང་། དེ་འགོག་པ་ལ། དམ་བཅའ་སྨད་པ་དང་། གནོད་བྱེད་བསྟན་པ་གཉིས། དང་པོ་འཆད་པར་བྱེད་པ་ལ། དེ་བས་ཆེས་འདི་ངོ་མཚར་ཆེ། །ཞེས་པ་འདི་བྱུང་། གཉིས་པ་གནོད་བྱེད་ནི། ཕྱེ་མ་ལེབ་ཀྱི་གཤོག་སྟེང་གི་སྔོ་སེར་དཀར་དམར་སྣ་ཚོགས་པ་དེ་ཆོས་ཅན། ཡན་ལག་ཆ་མེད་གཅིག་གི་རང་བཞིན་མ་ཡིན་ཏེ། རྫས་སྣ་ཚོགས་པ་ཡིན་པའི་ཕྱིར། དཔེར་ན། རིགས་ཐ་དད་པའི་ནོར་བུའི་གཟུགས་དེ་བཞིན་ནོ། །ཞེས་དཔེ་དང་བཅས་ཏེ་འཆད་པར་བྱེད་པ་ལ། སྣ་ཚོགས་གཅིག་པའི་རང་བཞིན་མིན། །ཞེས་སོགས་རྐང་པ་གཉིས་བྱུང་། དེ་ལྟར་བྱས་པ་ལ་ཁོ་ན་རེ། དཔེ་དོན་དེ་གཉིས་མི་མཚུངས་ཏེ། རིགས་ཐ་དད་པའི་ནོར་བུའི་སྟེང་གི་སྔོན་པོ་ལ་སོགས་པ་བློས་སོ་སོར་དབྱེར་རུང་། ཕྱེ་མ་ལེབ་ཀྱི་གཤོག་སྟེང་གི་སྔོ་སེར་ལ་སོགས་པ་བློས་སོ་སོར་དབྱེ་མི་རུང་བའི་ཕྱིར་ཞེ་ན། དེ་མི་མཚུངས་པ་མི་འཐད་དེ། རིགས་ཐ་དད་པའི་ནོར་བུའི་སྟེང་གི་སྔོན་པོ་ལ་སོགས་པ་བློས་སོ་སོར་དབྱེ་རུང་མོད། སྣམ་བུ་ཁྲ་བོ་ལ་སོགས་པའི་སྟེང་གི་སྔོན་པོ་ལ་སོགས་པ་བློས་སོ་སོར་དབྱེ་རུང་བ་རྣམས་སོ་སོར་མཚུངས་པའི་ཕྱིར། ཞེས་འཆད་པར་བྱེད་པ་ལ། སྔོ་སོགས་རྣམ་པར་དབྱེ་བ་ནི། །ཞེས་སོགས་རྐང་པ་གཉིས་བྱུང་། གལ་ཏེ་ཁོ་ན་རེ། སྣམ་བུའི་ཁྲ་བོ་དེ་བཅོས་པའི་ཁྲ་བོ་ཡིན་པས་བློ་ལ་རིམ་བཞིན་དུ་སྣང་། ཕྱེ་མ་ལེབ་ཀྱི་གཤོག་སྟེང་གི་ཁྲ་བོ་དེ་བཅོས་མིན་གྱི་ཁྲ་བོ་ཡིན་པས་དེ་ལྟར་མི་སྣང་བ་ཡིན་ནོ། །ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་དེ་ལ་ཡན་ལག་གཟུགས། །ཞེས་སོགས་རྐང་པ་གཉིས་བྱུང་། དེ་འགོག་པ་ལ། གལ་ཏེ་སྔོ་སོགས་སྤངས་པ་ཡི། །ཞེས་སོགས་རྐང་པ་གཉིས་བྱུང་། འོ་ན། བཅོས་མའི་ཁྲ་བོ་དང་བཅོས་མིན་གྱི་ཁྲ་བོ་གཉིས་བློ་མ་འཁྲུལ་བ་ལ་གཅིག་ཆར་དུ་སྣང་། བློ་འཁྲུལ་བ་ལ་རིམ་བཞིན་དུ་སྣང་བར་མཚུངས་པར་གྱུར་པས། ཁྱོད་ཀྱི་ཁྱད་པར་ཕྱེ་བ་དེ་མི་འཐད་དོ། །ཞེས་འཆད་པར་བྱེད་པ་ལ། དུས་དང་དོན་གྱི་རྣམ་པ་ནི། །ཞེས་སོགས་རྐང་པ་བཞི་བྱུང་། འོ་ན། ཕྱེ་མ་ལེབ་ཀྱི་གཤོག་སྟེང་གི་སྔོ་སེར་དཀར་དམར་སྣ་ཚོགས་པ་དེ་རྫས་སྣ་ཚོགས་ཡིན་པའི་རྒྱུ་མཚན་གང་ཞེ་ན། དེ་ཆོས་ཅན། རྫས་སྣ་ཚོགས་པ་ཡིན་ཏེ། བློ་མ་འཁྲུལ་བ་ལ་རྫས་སྣ་ཚོགས་སུ་སྣང་བའི་ཕྱིར། ཁྱབ་སྟེ། བློ་མ་འཁྲུལ་བས་རྫས་ཐ་དད་དུ་དམིགས་པ་ཡིན་ན། རྫས་ཐ་དད་ཡིན་དགོས་པའི་ཕྱིར་ཏེ། བློ་མ་འཁྲུལ་བས་རྫས་ཐ་དད་དུ་དམིགས་པ་དེ་རྫས་ཐ་དད་ཀྱི་འཇོག་བྱེད་ཡིན་པའི་ཕྱིར། ཞེས་འཆད་པར་བྱེད་པ་ལ། བློ་རྣམས་སྣ་ཚོགས་ངོ་བོའི་ཕྱིར། །ཞེས་སོགས་རྐང་པ་གཉིས་བྱུང་། གལ་ཏེ་ཁོ་ན་རེ། བློ་མ་འཁྲུལ་བས་རྫས་ཐ་དད་དུ་དམིགས་པ་དེ་རྫས་ཐ་དད་ཀྱི་རྒྱུ་མ་ཡིན་ནོ། །ཞེས་འདོད་པ་རྗོད་པ་ལ། གལ་ཏེ་དེ་རྒྱུ་མིན་ཞེ་ན། །ཞེས་གསུངས། རྫས་ཐ་དད་ཀྱི་རྣམ་གཞག་མི་འཐད་པར་ཐལ། བློ་མ་འཁྲུལ་བས་རྫས་ཐ་དད་དུ་དམིགས་པ་དེ། རྫས་ཐ་དད་ཀྱི་འཇོག་བྱེད་མ་ཡིན་པའི་ཕྱིར། ཞེས་འཆད་པར་བྱེད་པ་ལ། ཐ་དད་བཞག་འདི་གང་གིས་འགྲུབ། །ཅེས་གསུངས། ཡང་ཁོ་ན་རེ། རི་མོ་ཁྲ་བོ་དེ་ལ་ཡན་ལག་དོན་གཞན་གྱི་ཁྲ་བོ་ཡོད་པས། དེ་བློ་མ་འཁྲུལ་བ་ལ་རྫས་སྣ་ཚོགས་སུ་སྣང་བ་ཡིན་ཞེ་ན། དེ་ཡང་མི་འཐད་དེ། དེ་ལྟར་ཁས་ལེན་པ་དང་། བྱེ་བྲག་པས་རང་ལུགས་ལ། རྡུལ་རིགས་མི་མཐུན་གྱི་རྩ་བའི་ཡན་ལག་གི་རྫས་མེད་པར་ཁས་ལེན་པ་གཉིས་ནང་འགལ་བའི་ཕྱིར། ཞེས་འཆད་པར་བྱེད་པ་ལ། རིགས་མི་མཐུན་རྣམས་རྩོམ་མེད་ཕྱིར། །ཞེས་རྐང་པ་གཉིས་བྱུང་། ཡང་ཁོ་ན་རེ། རི་མོ་ཁྲ་བོའི་རྡུལ་རིགས་མི་མཐུན་དུ་འཕྲད་པའི་ལྡན་པ་དེ་བློ་མ་འཁྲུལ་བ་ལ་སྣ་ཚོགས་སུ་སྣང་བ་ཡིན་ནོ། །ཟེར་ན། དེ་ཡང་མི་འཐད་དེ། དེ་ལྟར་ཁས་ལེན་པ་དང་། བྱེ་བྲག་པས། ཡོན་ཏན་ལ་ཡོན་ཏན་གཉིས་པ་མི་བརྟེན་པར་ཁས་ལེན་པ་གཉིས་ནང་འགལ་ཡིན་པའི་ཕྱིར། ཞེས་འཆད་པར་བྱེད་པ་ལ། གཟུགས་མེད་ཕྱིར་ལྡན་སྣ་ཚོགས་མིན། །ཞེས་གསུངས། ཡང་ཁོ་ན་རེ། རི་མོ་ཁྲ་བོའི་ཐ་དད་ཀྱི་སྟེང་གི་རྡུལ་རིགས་མི་མཐུན་དུ་འཕྲད་པའི་ལྡན་པ་དེ། ཡན་ལག་དོན་གཞན་གྱི་ཁྲ་བོ་དང་འདྲ་བས་ན་དེ་ལ་ཡན་ལག་དོན་གཞན་གྱི་ཁྲ་བོའི་མིག་གིས་བཏགས་པ་ཡིན་ནོ། །ཞེ་ན། དེ་ཡང་མི་འཐད་དེ། འདྲ་ཡུལ་གྱི་ཡན་ལག་དོན་གཞན་གྱི་ཁྲ་བོ་མེད་པའི་ཕྱིར། ཞེས་འཆད་པར་བྱེད་པ་ལ། ཉེ་བར་བཏགས་ལ་བརྟེན་པའང་མིན། །ཞེས་གསུངས། ཡང་ཁོ་ན་རེ། རི་མོ་ཁྲ་བོའི་རྡུལ་རེ་རེ་བ་དེ། བློ་མ་འཁྲུལ་བ་ལ་རྫས་སྣ་ཚོགས་སུ་སྣང་བ་ཡིན་ནོ། །ཟེར་ན། དེ་འགོག་པར་བྱེད་པ་ལ། རེ་རེ་སྣ་ཚོགས་མིན་ཕྱིར་རོ། །ཞེས་གསུངས། ཡང་ཁོ་ན་རེ། རྡུལ་དུ་མ་འཛིན་པའི་དབང་ཤེས་དེས་རྡུལ་དུ་མ་རིམ་གྱིས་བཟུང་བ་ལ། དེའི་རྗེས་སུ་སྐྱེས་པའི་རྟོག་པ་དེས་རྡུལ་དུ་མ་གཅིག་ཆར་དུ་བསྲེས་ནས་འཛིན་པ་ཡིན་ནོ། །ཞེ་ན། དེ་ཡང་མི་འཐད་དེ། དེ་ལྟར་ཁས་ལེན་པ་དང་བློ་གཅིག་གིས་དོན་དུ་མ་གཅིག་ཆར་དུ་འཛིན་པ་མེད་པར་ཁས་བླངས་པ་གཉིས་ནང་འགལ་ལོ། །ཞེས་འཆད་པར་བྱེད་པ་ལ། རིམ་བཞིན་དུ་ནི་བཟུང་བ་ལ། །ཞེས་སོགས་རྐང་པ་གསུམ་བྱུང་། དེ་ལྟར་ན་བློ་གཅིག་གིས་དོན་དུ་མ་གཅིག་ཆར་དུ་འཛིན་པ་ཡང་ཡོད་ཅིང་། དེས་ན་དབང་ཤེས་རྟོག་བྲལ་དུ་འགྲུབ་བོ། །ཞེས་དོན་བསྡུ་འཆད་པར་བྱེད་པ་ལ། དེ་ཕྱིར་གཅིག་དོན་དུ་མ་ཅན། །ཞེས་སོགས་རྐང་པ་བཞི་བྱུང་། །