བདེན་སྟོབས།
བདག་མདུན་གཉིས་ཀྱི་མདུན་དུ་བྲུབ་ཁུང་མི་དམིགས་པ་ལས༔ ཡི་གེ་ཀཾ་ནག་པོ་ཡོངས་སུ་གྱུར་པ་ལས༔ ཟངས་ལྕགས་ཁྲོ་ཆུ་ལས་གྲུབ་པའི་མུན་ཁང་ལག་པ་བརྐྱང་བསྐུམ་ཡང་མི་མཐོང་བའི་དགུ་རིམ༔ དེའི་ནང་དུ་ལྕགས་སྲེག་གི་ཁང་སྒྲོམ་མེ་འབར་བ་ཟུར་གསུམ་རྔམ་ལ་འཐུག་པ༔ ནག་ལ་འཇིགས་པ༔ ཚ་ལ་རྩུབ་པ༔ གཤིན་རྗེའི་བསད་ཁང་༔ བདུད་ཀྱི་ཤན་ཁང་༔ དམྱལ་བའི་བཙོན་ཁང་༔ ཞེ་སྡང་གི་མེ་འབར་བ༔ འདོད་ཆགས་ཀྱི་ཆུ་འབྲུབ་པ༔ ང་རྒྱལ་གྱི་བྲག་ཉིལ་བ༔ ཕྲག་དོག་གི་རླུང་ནག་འཚུབ་པ༔ གཏི་མུག་གི་མུན་པ་འཐིབས་པ༔ ཁ་རུབ་ལ་གཏིང་ཟབ་པ༔ རྒྱ་ཆེ་བ་རྒྱ་ཁྱོན་དཔག་ཚད་ཙམ་པ༔ སྟེང་ན་ཐོག་དང་མཚོན་ཆའི་ཆར་འབེབས་པ༔ འོག་ན་ནད་དང་དུག་གི་རླངས་པ་འཐུལ་བ༔ དེའི་ནང་དུ་ཐོད་པ་ལས་ཀྱི་གཤིན་རྗེ་ཕོ་མོའི་ངོ་བོ༔ དམྱལ་བའི་ལྕགས་སྲེག་འབར་བའི་ཟངས་ཀྱི་གའུ་ཁ་སྦྱོར་བ༔ སྔོ་དམར་གྱི་རྒྱ་ཆིངས་ནི་དམྱལ་སྲུང་ལས་ཀྱི་གཤིན་རྗེ་ནག་པོའི་ཞགས་པས་དམ་དུ་བསྡམས་པ༔ དེའི་ནང་དུ་གནམ་ལྕགས་ཀྱི་སྡིག་པ་མགོ་དགུ་པ་མེ་ཡི་ཚྭ་ཚྭ་འཕྲོ་བའི་ཁ་ནང་དུ་དགྲ་བོ་བྱད་མའི་རྣམ་
པར་ཤེས་པ་ཚྭ་ཁམ་ནག་གཅིག་ཏུ་གྱུར༔ བདག་མདུན་གྱི་ཐུགས་ཀ་ནས་ཕོ་ཉ་ལས་མཁན་དཔག་ཏུ་མེད་པ་འཕྲོས་པས༔ བསྟན་པའི་སྤྱི་དགྲ༔ བླ་མའི་སྐུ་དགྲ༔ རྣལ་འབྱོར་པའི་སྒོས་དགྲ༔ བྱད་མ་ལྷ་སྲུང་དང་བཅས་པ༔ བསམ་པ་ངན་པ་འཆང་བ༔ སྦྱོར་བ་རྩུབ་མོ་བྱེད་ཅིང་ཤོམ་པ༔ ཁྱད་པར་དུ་དམིགས་ཡུལ་གང་ཡིན་པ་དེའི་སྤྲུལ་པའི་ལས་མཁན་རྣམས་ཀྱིས་ནམ་མཁའི་ཁམས་ནས་བྱིའུ་ཁྲས་དེད་པ་ལྟ་བུ༔ བར་སྣང་ཁམས་ནས་སྦྱར་མ་རླུང་གིས་བསྡུས་པ་ལྟ་བུ༔ ས་གཞི་ཁམས་ནས་གཅེར་བུ་ལྷགས་པས་བདས་པ་བཞིན་དུ་རང་དབང་མེད་པར་གཟུགས་ཀྱི་ལིང་ག་མིང་བྱང་བུ་གར་ཚོགས་འདི་ཉིད་ལ་ཤ་རུལ་ལ་སྦྲང་མ་འདུས་པ་བཞིན་དུ་འདུས༔ རྡོ་ཚན་ལ་ཁ་བ་བབ་པ་བཞིན་དུ་ཐིམ་པས༔ དགྲ་བོ་བྱད་མ་དེ་ཉིད་ལུས་སྐམ་ལ་རིད་པ༔ སྔོ་ལ་ཧམ་པ༔ སྐྱ་ལ་བརླམ་པ༔ མྱ་ངན་གྱི་ཕྱག་རྒྱ་ཅན༔ ཁ་ངུ་བ༔ མིག་ཤི་མིག༔ རྐང་ལག་ལྕགས་སུ་བཅུག་པ༔ བུ་ག་དགུ་ནས་ཁྲག་འཛག་པ་མགོན་སྐྱབས་ཀྱི་ལྷ་དང་བྲལ་༔ གཅེར་བུ་འདར་ཕྲི་ལི་ལི་བྱེད་པ༔ རྐང་ལག་འཁོབ་པ་སྐྲ་གཟིངས་བ་སྙིང་ཁ་ན་ཁྲག་གི་སྦལ་པ་བྱིའུ་ལེབ་མའི་
མགོ་ཙམ་གྱི་སྟེང་དུ་ཧཱུྃ་ལྗང་གུས་མཚན་པར་གྱུར༔ ༈ ན་མོ༔ དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ༔ རིག་འཛིན་རྒྱ་མཚོའི་ཚོགས་དང་བཅས་པའི་བཀའ་བདེན་པ་དང་༔ བསླུ་བ་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང་༔ ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་༔ དམ་པ་ཆོས་སྐྱོང་བའི་སྲུང་མ་རྣམས་ཀྱི་བཀའ་བདེན་པ་དང་༔་ཁྱད་པར་དུ་ལས་ཀྱི་གཤིན་རྗེ་ཁྲོ་ཆུ་དུག་གདོང་གི་༔ སྐུ་ཡི་སྤྲུལ་པ་འཆི་བདག་ནག་པོ༔ གསུང་གི་སྤྲུལ་པ་ཚེ་བདག་ནག་པོ༔ ཐུགས་ཀྱི་སྤྲུལ་པ་སྲོག་བདག་ནག་པོ༔ ཡོན་ཏན་སྤྲུལ་པ་བེ་བྷ་སྭ་ཏ༔ ཕྲིན་ལས་ཀྱི་སྤྲུལ་པ་ཟ་བ་ལྗང་ནག༔ གཉིས་མེད་སྤྲུལ་པ་ཡ་མ་རཱ་ཙ༔ ལ་སོགས་པ་ལྷ་ཚོགས་འཁོར་དང་བཅས་པའི་བདེན་པ་དང་༔ བདེན་པ་ཆེན་པོས་མཐུས སྤྱིར་ཞིང་བཅུ་ཚང་བ་བསྟན་པའི་སྤྱི་དགྲ༔ དོ་བསྔོ་ཞིང་འགྲས་ཚོལ་བ་རྣལ་འབྱོར་པ་བདག་གི་སྒོས་དགྲ༔ ཁྱད་པར་དུ་བདག་ཅག་དཔོན་སློབ་ཡོན་མཆོད་བསྲུང་བྱ་འདི་རྣམས་ལ༔ དང་པོ་ནད་ཀྱི་སྣ་འདྲེན་པ༔ བར་དུ་ནད་ཀྱི་ཚང་བཅའ་བ༔
ཐ་མ་ནད་ལ་མི་ཕན་པར་བྱེད་པ༔ ཚེ་ལ་བརྐུ་བ༔ སྲོག་ལ་འཇབ་པ༔ བརླ་ལ་ཁྱེར་བ༔ ཡིད་ལ་རློམ་པ༔ གོད་ཁ་དང་ཆོ་འཕྲུལ་གཏོང་བའི་གདོན་བགེགས་འབྱུང་པོ་གླད་དང་གཏོར་མས་བརྔན་ཀྱང་མི་ཐུབ༔ དམ་པའི་ཆོས་བཤད་ཀྱང་མི་ཉན༔ བདེན་པའི་སྟོབས་བརྗོད་ཀྱང་མི་བརྩི་བ བཀའ་དང་དམ་ལ་མི་གནས་པ༔ འགྱུ་ལོག་འཕར་སྡང་མགོ་གཡོག་མགོ་སྐོར་བྱེད་པའི་དགྲ་བགེགས་ལོག་འདྲེན་གང་ཡིན་པའི་བླ་སྲོག་རྣམ་པར་ཤེས་པ་ས་འོག་ས་སྟེང་ས་བླ་སྲིད་པ་གསུམ་གར་གནས་ཀྱང་སྐད་ཅིག་རང་དབང་མེད་པར་གཟུགས་ལིང་ག་འདི་ལ་ཁུག་ཅིག བཛྲ་ཨཾ་ཀུ་ཤ་ཛ༔ བཛྲ་པཱ་ཤ་ཧཱུྃ༔ བཛྲ་སྤྲོ་ཊ་བཾ༔ བཛྲ་གྷནྡྷེ་ཧོ༔