དཔལ་ལྡན་ལྷ་མོ་དུད་པའི་སོལ་བ་མའི་མཆོད་ཚོགས་བརྒྱ་རྩ་རྩང་རྫོགས་ཀྱི་འདོན་འགྲིག་བལྟས་ཆོག་ཏུ་བཀོད་པ།
དཔལ་ལྡན་ལྷ་མོ་དུད་པའི་སོལ་བ་མའི་མཆོད་ཚོགས་བརྒྱ་རྩ་རྩང་རྫོགས་ཀྱི་འདོན་འགྲིག་བལྟས་ཆོག་ཏུ་བཀོད་པ་བཞུགས་སོ།།
ན་མོ་གུ་རུ་ཧེ་བཛྲ་ཡེ། བླ་མ་དགྱེས་མཛད་ཧེ་རུ་ཀ །ལྷ་མོར་བཅས་ལ་གུས་བཏུད་ནས། །རྒྱལ་བའི་བསྟན་པ་རྒྱས་པ་དང་། །འགྲོ་བའི་རིམས་ནད་རྒྱུན་ཆད་ཕྱིར། །ལྷ་མོ་བརྒྱ་རྩའི་རིམ་པ་བྲི། །ལྷ་ཡི་ཚོགས་ཀྱིས་བཀའ་གནང་ཞིང་། །བྱིན་གྱིས་རླབས་པར་མཛད་དུ་གསོལ། །དེ་ལ་ཡམས་ནད་རིམས་ནད་ལ་སོགས་པའི་བར་ཆད་ཞི་བའི་ཆེད་དུའམ། དགྲ་བགེགས་བསྒྲལ་བའི་དོན་དུ་འདི་བྱ་སྟེ། རབ་ལྷ་མོའི་དཀྱིལ་འཁོར་རྒྱས་པར་བྲིས་པའི་སྟེང་དུ་གཏོར་སྣོད་དུ་གཏོར་མ་བཤམས། འབྲིང་དཔེའུ་རིས་ལྟར་དཀྱིལ་འཁོར་འབྲིང་པོ་བརྩེགས་པའི་ནང་དུ་ལིང་ག་བཞག །དེའི་སྟེང་དུ་གཏོར་སྣོད་དུ་གཏོར་མ་བཤམས། བསྡུས་པ་ནི་གཏོར་སྣོད་དུ་འདག་ས་ལ། དཔེའུ་རིས་ལྟར་བྲིས་པའི་དབུས་སུ་བྲུབ་ཁུང་དུ་ལིང་ག་བཅུག་
པའམ། ཡང་ན་ཐོད་མཁར་གྲུ་གསུམ་པ་འདག་ས་ལ་བྱས་ནང་དུ་ལིངྒ་གཞུག་ཀྱང་ཆོག །གཏོར་མ་དབུས་སུ་ཆེ་བ་གཅིག་ལོགས་གསུམ་དུ་གསུམ་རེ། དེ་རྒྱབ་བཞི། དེ་རྒྱབ་བརྒྱད། ཡང་དེ་རྒྱབ་བརྒྱད། དེ་རྒྱབ་བཞི། དེ་རྒྱབ་མཐེབ་སྒྱུ་མང་དུ་བཞག་པས་རྒྱས་པ། འབྲིང་པོ་གཏོར་མ་ཆེ་བ་གཅིག་ལ་ཆུང་བ་གསུམ། དེ་རྒྱབ་བརྒྱད། དེ་རྒྱབ་མཐེབ་སྐྱུ། །བསྡུ་ན་གཙོ་འཁོར་དགུ་པ་རང་བྱེད། དེ་རྣམས་གང་ཡང་གཙོ་མོ་ལ། དྲེལ། ཆུ་སྲིན། བྱ་ནག །ར་ལུག །སྤྱང་ཀུ། ཤར་དུ་སྤྲེལ། བྱ་ཁྱི། རྟ་བོང་བུ། ལུག །གྲི་གུག །བྱང་དུ་སྟག །ཝ། སྤྱང་ཁུ། འཕར་བ། དྲེལ། ཆུ་སྲིན། གྲི་གུག །ནུབ་ཏུ་གཡག །ལུག །ར། ·སྤེལ། བྱ་ནག །ཁྲ། གྲི་གུག །ལྷོར་ཐོད་ཁྲག །ཁྱི། ཕོ་
རོག །མགོ་སྙིང་། དྲེད། བོང་བུ་ནག་པོ། བྱང་ཤར་སྙིང་། བོང་བུ། ར། སྤྲེལ། སྤྱང་ཁུ། ཤར་ལྷོར་ལིང་ག །སྙིང་། ཁྱི་ནག་ཁྲག་གི་ཞལ་བུ། རྒྱུ་སྐར་གྱི་བཤོས་བུའོ། །ལྷོ་ནུབ་ཏུ་ཏིང་ལོ། སྙིང་། ལུག་པ། ཞོལ་གཡག །སེང་གེ་སྔོན་པོ། ནུབ་བྱང་དུ་སྙིང་། ཁྲ། བོང་བུ། བྱ་ནག་རྐང་གསུམ། རལ་གྲི། ཁྱི་ནག །ལག་པ། རྩེ་ལ་ལྷ་མོའི་སྐུ་དང་དར་གདུགས་བཙུགས། དབུ་རྩང་ཕྱག་ཆུང་བཙུགས། གཏོར་ཆེན་གྱི་ཕྱི་རོལ་དུ་རྩང་བརྒྱ་རྩ་བརྒྱད་ཅི་འབྱོར་བཙུགས་སོ། །བརྒྱ་རྩ་གཞུང་མ་ཐམས་ཅད་ལ། ནག་མོ་དགུ་སྒྲུབ་རྐྱང་པ་ལ་མེད་པས། དེ་ལྟར་བྱས་ཀྱང་ཁུངས་བཙུན། བླ་མ་འགའ་ཞིག་གི་ཕྱག་ལེན་ལ་སྙིང་འཕྲོག་མ་གསུམ་བཞག་ནས་གཙོ་འཁོར་བཅུ་གཅིག་བྱས་ཀྱང་ཆོག །གཡས་སྤྲུལ་མའི་མངོན་རྟོགས། རྗེ་དབང་ཕྱུག་རྡོ་རྗེས་མཛད་པ་སྣང་ཡང་འདིར་བརྒྱ་རྩ་ལ་སྦྱར་བ་མ་མཐོང་ཞིང་། དེ་སོགས་ལས་ལ་ཆས་དུས་ཁོ་ནའི་སྤྲུལ་པར་སྣང་བས་མངོན་རྟོགས་མི་དགོས་པར་གོའོ། །དེ་ཡང་བདག་གིས་རྨི་ལམ་དུ་དག་པའི་སྣང་བར་རྗེ་བཙུན་མར་པ་ལོ་ཙཱ་དང་མཇལ་བས། ལྷ་མོ་དུད་སོལ་མའི་གཏོར་དབང་ཤིན་ཏུ་གསལ་བ་གནང་དུས་གཏོར་མ་ལྷར་བསྐྱེད་དུས་སུ། ནག་མོ་དགུ་སྒྲུབ་དང་གསང་སྒྲུབ་གཉིས་ཀྱི་མངོན་རྟོགས་གབ་སྤྱད་པ་འདི་འདྲ་ཞིག་གསུངས་བྱུང་བས། དེ་ཕྱིན་ཆད་བརྒྱ་རྩ་གར་བཅས་པར་མངོན་རྟོགས་དེ་ལྟར་བསྒོམས་པས། ནད་པ་སོས་པ་དང་། ནད་རིམས་ཆད་པ་སོགས་ཕན་ཐོགས་ཆེ་ཞིང་བཀྲ་ཤིས་པར་བྱུང་བ་
འདི་ནི་མངོན་རྟོགས་རྒྱས་པ་འདི་དེའི་ལུགས་སུ་བྱས་པའོ། །རང་ཉིད་ཀྱི་རྡོ་རྗེ་རྡོ་རྗེ་གདན་བཞི་ཕྱག་རྡོར་རྟ་མགྲིན་གང་རུང་གི་བདག་བསྐྱེད་སྔོན་དུ་སོང་ནས། བསང་སྦྱངས། སྭ་བྷ་ཝས་སྦྱངས། སྟོང་པའི་ངང་ལས་སྐད་ཅིག་གིས་རྡོ་རྗེའི་མཁར་སྟོང་གསུམ་པ་རྒྱ་ཆེ་བ། ཕྱི་མེ་དཔུང་འབར་བ། ནང་ན་རླུང་ནག་འཚུབ་མའི་དལ། དེའི་དབུས་སུ་ཧཱུཾ་དཀར་པོ་འོད་ཟེར་ལྔ་འཕྲོ་བ་དེ་འོད་དུ་ཞུ་བ་ལས་གཞལ་ཡས་ཀྱི་ཁང་པ་གྲུ་བཞི་པ་རྟ་བབས་བཞི་དང་ལྡན་པ། ཀ་བ་བརྒྱད་པ། ཕྱི་བསེའི་ཁང་པ་ལྟར་དམར་ལྷག་གེ་འདུག་པ། ནང་རིན་པོ་ཆེ་སྣ་ལྔ་ལས་གྲུབ་པ། ཤར་དཀར་ལྷོ་སེར་ནུབ་དམར་བྱང་ལྗང་སྟེང་མཐིང་ཀ་ཡོད་པ། དེའི་ནང་དུ་ཐོད་པའི་སྐུ་མཁར་སྟོང་གསུམ་དང་མཉམ་པ། ནང་ཐོད་པ་རློན་པ། བར་ར་རིལ་ཕྱི་སྐམ་པོའི་ནང་དུ་རཀྟའི་རྒྱ་མཚོ་ཤར་ནས་ནུབ་ཏུ་འཕྱོ་བ་ནུབ་ནས་ཤར་དུ་འཕྱོ་བ། ལྷོ་ནས་བྱང་དུ་འཕྱོ་བ་བྱང་ནས་ལྷོ་རུ་འཕྱོ་བ། ཞིང་ཆེན་གྱི་གདན་འཕྱོ་བ། དེ་ཡི་སྟེང་དུ་མི་རོ་ཆེ་བ་རྣམས་ཀྱིས་ཀ་བ་བྱས་པ། ཆུང་བ་རྣམས་ཀྱིས་དྲལ་དྲབ་བྱས་པ། ཞིང་ཆེན་གྱི་གཡང་གཞིའི་ཐོག་བཀབ་པ། འོག་ཁྲག་གི་རྒྱ་མཚོ་སྟེང་འོག་ཞིང་ཆེན་གྱི་དྲལ་དྲབ་བྱས་པ།
ཁྲག་གི་རྒྱ་མཚོ་དེའི་སྟེང་དུ་རིན་པོ་ཆེའི་ས་གཞི་གྲུ་གསུམ་མཐིང་ནག་འབར་བ་རྩེ་མོ་ལྷོར་བསྟན་པའི་ཟུར་གསུམ་དུ། བློ་མཐིང་ནག་རེ་རེ། དེའི་དབུས་སུ་ཧཱུྃ་ལས་སྐད་ཅིག་གིས་དཔལ་ལྡན་ལྷ་མོར་གསལ་བའི་ཐུགས་ཀའི་ཨོཾ་ཡིག་གི་སྟེང་དུ་རཾ་དམར་པོ་ལས་མེ་འབར་ནས་དུད་པའི་སོལ་བ་མ་སྐུ་མེ་ལྟར་འབར་བར་གྱུར་ཏེ། ཐལ་བ་ལྟར་འདུག་པའི་སྟེང་དུ། ཨོ་ཡིག་གི་སྟེང་དུ་པཾ་ལས་བུམ་པ་དཀར་པོའི་ཁ་ནས་བདུད་རྩིའི་ཆུ་རྒྱུན་ལྷུད་ལྷུད་བབ་པ། ཨོ་ལ་ཕོག་པས་ཟླ་བ་ཀུན་དྷ་ལྟར་དཀར་ཞིང་འོད་དང་ལྡན་པར་གྱུར་ཏེ། ཨོཾ་མ་ཧཱ་ཀཱ་ལི་དེ་ཝི་ཀཱ་ལི་བྷི་ཀྲིན་ཏ། ཀཱ་ལ་ར་ཀྲི་ནི་ཙཎྜ་རུ་པི་ནི་ཧཱུྃ་ཕཊ༔ ཅེས་ལན་གསུམ་བརྗོད་ལ། དཔལ་ལྡན་ལྷ་མོ་སྐུ་མདོག་ཆར་སྤྲིན་དང་། དུད་སྤྲིན་ལྟར་མནག་པ། ཞལ་གཅིག་ཕྱག་བཞི་མ། སྤྱན་གསུམ་མཆེ་བ་བཞི་གཙིགས་པ། མི་རོརེངས་བ་ཁར་བཅུག་པ། དབུ་སྐྲ་དམར་སེར་གྱེན་དུ་འཁྱིལ་བ། ཕྱག་གཡས་དང་པོས་རལ་གྲི། གཉིས་པ་ན་ཐོད་པ་ཁྲག་གིས་བཀང་བ་བསྣམས་པ། གཡོན་དང་པོའི་ཤཏྟིའི་མཚོན་ཆ། གཉིས་པ་ན་ཏྲི་ཤུ་ལའི་མགུལ་ན་དར་དཔྱངས་ཕྱིར་བ། སྦྲུལ་ཆེན་བརྒྱད་ཀྱི་སྐ་རགས་བྱས་པ། མི་མགོ་
སྐམ་པོ་ལྔས་དབུ་ལ་བརྒྱན་པ། རློན་པ་ཁྲག་འཛག་པ་ལྔ་བཅུས་དོ་ཤལ་བྱས་པ། སྙན་གཡས་ན་དུག་སྦྲུལ། གཡོན་ན་སེང་གེས་བརྒྱན་པ། དར་གྱི་ཅོད་པན་འཕུར་བ། ཁྲག་གི་ཐིག་ལེ་ཞག་གི་ཟོ་རིས་བྱས་པ། ཐལ་ཆེན་གྱི་ཚོམ་བུ་བཀོད་པ། ཤིན་ཏུ་སྒེག་པ། རླུང་གི་བོང་བུ་དམར་གྲྭའི་སྟེང་དུ་ཞབས་གཉིས་ལྕགས་སྒྲོག་གིས་བརྒྱན་ཅིང་བཙན་སྐྱིལ་དུ་བཞུགས་པ། བརྒྱ་རྩའི་ལུགས་གཞན་སོགས་འདིར་མ་མོ་རྐང་ཐང་བརྒྱད་བསྐྱེད་ནས་ཟུར་གསུམ་དུ་བློ་ལ་སྙིང་འཕྲོག་མ་གསུམ་བསྐྱེད་པར་སྣང་ངོ། །ཟུར་གསུམ་དུ་བློ་ལས་མཁའ་འགྲོ་ནག་མོ་གཡས་མི་སྙིང་གཙོ་མོའི་ཞལ་དུ་སྟོབ་ཅིང་། གཡོན་ཐོད་ཁྲག་འཛིན་པ། རླུང་གི་བོང་བུ་གྲྭ་དམར་ལ་ཞོན་པ་གསུམ་ཐོད་མཁར་ཕྱིའི་བློ་བཞི་ལས་རིགས་བཞི་ལྷ་མོ་དཀར་མོ་དང་སེར་མོ་དང་དམར་མོ་དང་ལྗང་མོ་བཞི། ཕྱག་གཡས་་་་་ཕྱག་གཡས་ན་རིམ་བཞིན་དུ་རྡོ་རྗེ་རིན་པོ་ཆེ་དང་པདྨ་དང་རལ་གྲིས་ཡུ་བ་བྱས། མཆན། ན་གྲི་གུག་དང་གཡོན་ཐོད་ཁྲག་བསྣམས་པ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ་བོང་བུ་ཆིབས་པ་བཞི། དེའི་ཤར་དུ་དུར་ཁྲོད་བདག་མོ་དཀར་མོ། བྱང་དུ་དངོས་གྲུབ་ཞལ་མ་སེར་མོ། །
ནུབ་ཏུ་གཏུམ་མོ་གཟི་བརྗིད་དམར་མོ། ལྷོར་ཡི་དྭགས་ཁ་ནག་མོ། བྱང་ཤར་དུ་དམ་ཚིག་སྲུང་མ་གཡས་ཀྱི་ལུས་ཕྱེད་སེར་བ། གཡོན་གྱི་ལུས་ཕྱེད་དཀར་བ། ཤར་ལྷོར་ཁྲག་དགའ་མོ་གཡས་དཀར་གཡོན་ནག །ལྷོ་ནུབ་ཏུ་ཀཱི་ལི་སྒྲ་སྒྲོག་མ་གཡས་ནག་གཡོན་དམར་བ། ནུབ་བྱང་མཚམས་སུ་སྦྱོར་འཛིན་མ་གཡས་དམར་གཡོན་སེར་བ། དེ་རྣམས་རོའི་གདན་གྱི་སྟེང་ན། ཞབས་གཡོན་བརྐྱང་གཡས་ཅུང་ཟད་བསྐུམ་པ། ཞལ་མཆེ་བ་གཙིགས་པ་སྤྱན་རྩ་དམར་བ། ཕྱོགས་བཞིའི་དབུ་སྐྲ་དམར་སེར་གྱེན་དུ་འབར་བ། མཚམས་བཞི་དབུ་སྐྲ་སིལ་བུ་ཐུར་དུ་གྲོལ་བ། ཕྱོགས་བཞིའི་གཡས་གྲི་གུག་གཡོན་བྷནྡྷ་ཁྲག་གིས་བཀང་བ་བསྣམས་པ། མཚམས་བཞིའི་གཡས་གྲི་གུག་གཡོན་མི་སྙིང་འཛིན་པ། དེ་རྣམས་ཀྱི་ལུས་ཐལ་ཆེན་གྱིས་བྱུག་པ། ཁྲག་ཞག་གི་ཟོ་རིས་བྱས་པ། མི་མགོ་སྐམ་པོ་ལྔས་དབུ་ལ་བརྒྱན་པ། རློན་པ་ལྔ་བཅུས་དོ་ཤལ་བྱས་པ། དེ་རྣམས་རུས་པའི་རྒྱན་དྲུག་དང་ལྡན་པའོ། །དེ་རྒྱབ་ཤར་དུ་སེང་གདོང་མ།་དཀར་མོ། ལྷོར་སྟག་གདོང་མ་དམར་མོ། ནུབ་ཏུ་སྤྱང་གདོང་མ།་་སྔོན་མོ། བྱང་དུ་ཕག་གདོང་མ།་་མཐིང་ག
ཤར་ལྷོར་ལྟུང་ཁའི་གདོང་ཅན། མུན་མདོག ལྷོ་ནུབ་དུ་དུར་བྱའི་གདོང་ཅན།་་ཁྲག་མདོག ནུབ་བྱང་དུ་བྱ་རོག་གི་གདོང་ཅན་དུད་ཁ། བྱང་ཤར་དུ་བྱ་རྒོད་ཀྱི་གདོང་ཅན།་་མུན་ནག ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། ཕྱག་གཡས་གྲི་གུག་དང་གཡོན་ཐོད་ཁྲག་འཛིན་པ། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། དྲེལ་ནག་རྐང་གསུམ་ལ་ཆིབས་པའོ། །ཤར་སྒོར་དུར་བྱ་ཀཾ་ཀའི་གདོང་ཅན་དྲེལ་ལ་ཞོན་པ། ལྷོ་སྒོར་དུར་བྱ་ཀཾ་ཀའི་མགོ་ཅན་སྟག་ལ་ཞོན་པ། ནུབ་སྒོར་དུར་བྱ་ཀཾ་ཀའི་གདོང་ཅན་སྤྱང་ཀི་ལ་ཞོན་པ། བྱང་སྒོར་དུར་བྱ་ཀཾ་ཀའི་གདོང་ཅན་སྤྲེལ་བུ་ལ་ཞོན་པ། ཕྱག་ན་མདའ་གཞུ་དང་སྤུ་གྲི་དང་བྷནྡྷ་ནད་རྐྱལ་དགྲ་སྟ་བསྣམས་པ། ཞིང་ཆེན་གྱི་སྐེད་མི་དཀྲིས་པ་ཐོད་ཕྲེང་གི་རེ་ལྡེ་སེར་པོའི་བརྒྱན་པའོ། གཞན་ཡང་སྤྲུལ་པའི་ལས་མཁན་ནག་མོ་འབུམ་སྡེ་དང་། དཀར་མོ་དང་སེར་མོ་དང་དམར་མོ་དང་ལྗང་མོ་བྱེ་བ་འབུམ་སྡེའི་ཚོགས་དང་། ཤ་ཟ་དང་ནམ་གྲུ་དང་སྲིན་མོ་དང་གནོད་སྦྱིན་མོ་དང་། རི་རབ་དང་རྒྱ་མཚོའི་སྟེང་དང་བར་སྣང་ལ་གནས་པའམ། དམོད་པའི་མཚོན་ཆ་ཅན་རྣམས་དང་། ཡེ་
ཤེས་དང་ལས་དང་འཇིག་རྟེན་གྱི་མཁའ་འགྲོ་རྣམས་དང་ལས་ཀྱི་རེ་མ་ཏི་དྲེའུ་རྐང་གསུམ་ཅན་མ་དང་། ཆུ་སྲིན་གྱི་གདོང་ཅན་མ། བ་ལམ་དྲིལ་སྣ་མ་དང་། ཁྲི་སྨན་ས་ལེ་མ་དང་། མ་ཧེའུ་མགོ་ཅན་མ་དང་། བརྟན་མ་དང་ཡ་མ་སྐྱོང་མའི་ཚོགས་རྣམས་དང་། སྲིད་པའི་མ་མོ་སྟོང་དང་། ལས་ཀྱི་སྲིན་མོ་སྟོང་ཕྲག་དྲུག་ཅུ་རྩ་བཞི་ལ་སོགས་པ་འཇིག་རྟེན་གྱི་ཁམས་ཐམས་ཅད་གང་བའི་འཁོར་དེ་ཐམས་ཅད་ཀྱང་། ཞལ་གཅིག་ཕྱག་གཉིས་སྤྱན་གསུམ་པ་མཆེ་བ་ཅུང་ཟད་གཙིགས་པ། ཞིང་ཆེན་དང་རེ་ལྡེ་རྒྱན་དྲུག་གིས་སྤྲས་པ་ལག་ན་མཚོན་ཆ་སྣ་ཚོགས་ཐོགས་པ། གཅེར་བུ་ཤན་པའི་ཚུལ་ཅན་བསྟན་པའི་དགྲ་བོ་གྲིར་གསོད་པ་དང་། ཡམས་ནད་དང་། སྨྱོ་འབོག་དང་འདུ་བ་རྣམ་བཞིའི་ནད་ཁོང་ནས་སློང་བར་བྱེད་པའི་རང་བཞིན་ཅན་ནོ། །གཙོ་བོའི་ཐུགས་ཀར་ཧཱུཾ་མཐིང་ནག །འཁོར་རྣམས་ཀྱི་ཐུགས་ཀར་བྷྱོནག་པོ་རེ་རེ་གྱུར། གཙོ་བོའི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱདམར་པོ། ཐུགས་ཀར་ཉི་མ་ལ་ཧཱུཾ་སྔོན་པོ་ཧཱུྃ་ལས་འོད་ཟེར་འཕྲོས་པས་རི་རབ་ལྷུན་པོའི་བྱང་ཤར་མཚམས་ནས། བསྐྱེད་པ་དང་འདྲ་བའི་ཡེ་ཤེས་ཀྱི་ལྷ་མོ་
སྤྱན་དྲངས། དཔལ་ལྡན་ལྷ་མོ་དབྱིངས་ནས་རྟག་བཞུགས་ཀྱང་། །སྐུ་གསུང་ཐུགས་ཀྱི་རྣམ་འཕྲུལ་བསམ་མི་ཁྱབ། །སྣ་ཚོགས་འཇིགས་པའི་གཟུགས་སྐུར་སྤྲུལ་མཛད་མ། །མ་གཅིག་སྲིད་གསུམ་དབང་བསྒྱུར་གཤེགས་སུ་གསོལ། །ཉི་མའི་དཀྱིལ་འཁོར་བརྩེགས་པའི་གཞལ་ཡས་ནས། །བཞི་བརྒྱ་རྩ་བཞིའི་ནད་རྣམས་ཚར་གཅོད་མ། །བདུད་རྩི་སྨན་གྱི་རྗེས་སུ་འཛིན་མཛད་མ། །ཕྲིན་ལས་རྣམ་བཞི་མཛད་ཕྱིར་གཤེགས་སུ་གསོལ། །ཐོད་པའི་སྐུ་མཁར་རླུང་ནག་འཁྱིལ་པ་ནས། །དགྲ་སྡང་སྟེང་ནས་ཕྱེད་སྐྱིལ་རོལ་པར་བཞུགས། །རྔམ་བྱེད་ཞལ་དུ་དགྲ་བགེགས་དངོས་སུ་གསོལ། །དྲག་པོའི་ལས་ལ་མྱུར་དུ་གནས་འདིར་གཤེགས། །སྐྱེ་འགག་གནས་གསུམ་བྲལ་བར་མཁྱེན་ན་ཡང་། །སྐུ་མཆོག་རི་རབ་ཆེ་བར་འཁྲིལ་མཛད་མ། །ཉི་ཟླ་ལྟེ་བའི་ཐད་ནས་སྤྲུལ་མཛད་མ། །སྲིད་གསུམ་བྷ་གར་འདུད་མཛད་གཤེགས་སུ་གསོལ། །ཤིན་ཏུ་རྒྱས་པར་སྤྲོ་ན་དྷ་ཤ་གྲི་བའི་གདུང་གླུ་འདིར་བཙུད་དོ། །ཞེས་པ་ཙམ་མམ་རྒྱས་པར་སྤྲོ་ན། བྷྱོཿ སྣང་བ་ཆོས་སྐུའི་གཞལ་ཡས་ནས། །བཀའ་བརྒྱུད་བླ་མ་གཤེགས་སུ་གསོལ། །ཆོས་ཀྱི་
དབྱིངས་ཀྱི་གཞལ་ཡས་ནས། །ཡི་དམ་ལྷ་ཚོགས་གཤེགས་སུ་གསོལ། །ཐོད་མཁར་འཕྲུལ་གྱི་གཞལ་ཡས་ནས། །མ་མོ་མཁའ་འགྲོ་གཤེགས་སུ་གསོལ། །བཀའ་དང་དམ་ཚིག་གཞལ་ཡས་ནས། །ཆོས་སྐྱོང་སྲུང་མ་གཤེགས་སུ་གསོལ། ། བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའི་གཏིང་དཀྱིལ་དབུས། །རིན་ཆེན་སྣ་ལྔའི་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ན། །གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་པའི་གཟུགས། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡོང་ནག་མོ་འབུམ་སྡེའི་ཚོགས། །གནས་འདི་ཉིད་དུ་གཤེགས་སུ་གསོལ། །ད་ལྟ་སྙིགས་མ་ལྔ་ཡི་དུས། །དམ་བཅས་བཞུགས་པར་མི་འོས་ཀྱང་། །སྔོན་ཚེ་བྱང་ཆུབ་ཤིང་གི་དྲུང་། །ཐུབ་པ་ཆེན་པོའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །སངས་རྒྱས་བསྟན་པ་སྲུང་བ་དང་། །འགྲོ་ཀུན་བདེ་ལ་འགོད་པའི་ཕྱིར། །དཔལ་ལྡན་ལྷ་མོ་གཤེགས་སུ་གསོལ། །གསང་སྔགས་སྲུང་མ་དམ་ཚིག་ཅན། །འཁོར་བཅས་གཤེགས་ཤིང་བཞུགས་སུ་
གསོལ། །གཞན་ཡང་གཤིན་རྗེའི་ཕོ་བྲང་དང་། །ལྷ་ཁང་དུར་ཁྲོད་རི་སུལ་ནས། །ཆོས་སྐྱོང་སྲུང་མ་འཁོར་བཅས་ལ། །མཆོད་པ་འབུལ་བ་བཞེས་སླད་དུ། །ད་ལྟ་ཉིད་དུ་བྱོན་ནས་ཀྱང་། །གཉིས་མེད་བརྟན་པར་བཞུགས་སུ་གསོལ། །ཞེས་བརྗོད་པས་ཡེ་ཤེས་པ་འཁོར་དང་བཅས་པ་སྤྲིན་གྱི་ཕུང་པོ་འདུ་བའམ་བུང་བ་ཚང་ན་འདུ་བ་ལྟར་ཐིབ་ཐིབ་བྱོན་པར་བསམ་ལ་ངག་ཏུ། ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨོ་ཏྲི་ཤ་ཡ་ཛཿཧཱུྃ་བཾ་ཧོ༔ ས་མ་ཡ་ཧཱུཾ། ས་མ་ཡ་ཧོ༔ ཞེས་ཕྱག་རྒྱ་བཞི་དང་ལྡན་པས་ཡེ་ཤེས་ཀྱི་ལྷ་མོ་འཁོར་དང་བཅས་པ་འགུགས་ཤིང་གཉིས་སུ་མེད་པར་བསྟིམ་ལ་གསལ་གདབ་བོ་མཆན། བྷྱོཿ རླུང་དམར་དྲག་པོའི་ཤུགས་ལྡན་བོང་བུའི་སྟེང་། །དུར་ཁྲོད་ཆས་ལྡན་ཞབས་གཉིས་ལྕགས་སྒྲོག་མཛེས། །ཞལ་གདངས་མཆེ་གཙིགས་ཀཱི་ལི་ཀཱི་ལ་སྒྲོག །དཔལ་ལྡན་འདོད་ཁམས་དབང་ཕྱུག་གདན་ལ་བཞུགས། །བྷྱོ༔ ཐོད་པའི་སྐུ་མཁར་པདྨའི་གཞལ་ཡས་ནས། །རིམས་ནད་ཀུན་ལ་དབང་བསྒྱུར་ལས་མཁན་མ། །དུར་ཁྲོད་བདག་མོ་དབང་ཕྱུག་དྲེལ་ཞོན་མ། །རྣལ་འབྱོར་ཆེན་མོ་གནས་འདིར་བརྟན་པར་བཞུགས་སུ་གསོལ། །པདྨ་ཀ་མ་ལྕེ་ཧཱུཾ། བྷྱོ༔
ཡང་ཐོག་དྲུག་བརྩེགས་འཕྲུལ་གྱི་ལྡིང་ཁང་ནས། །མ་གཅིག་དཔལ་ལྡན་ལྷ་མོ་དུད་སོལ་མ། །སྐུ་ནི་མི་འགྱུར་རི་རབ་ལྷུན་པོ་འདྲ། །ཚངས་པའི་འབྲུག་སྒྲ་ནམ་མཁའི་དབྱིངས་སུ་སྒྲོག །ཐུགས་ཀྱི་དཔལ་བེའུ་ཡེ་ཤེས་ལྔ་དང་ལྡན། །མགུལ་གྱི་བུམ་པ་རྨ་བྱའི་མགྲིན་པ་འདྲ། །ལྗགས་ནི་པདྨ་ལེ་བརྒན་གྲི་སོ་འདྲ། །ཕན་འདོད་མྱུར་དུ་སྒྲུབ་པའི་མཁའ་འགྲོ་མ། །དཔལ་ལྡན་དབང་ཕྱུག་མ་ལ་ཕྱག་འཚལ་བསྟོད། །ཨོཾ་ཤྲཱི་མ་ཧཱ་ཀཱ་ལ་ཡེ་ན་མ། བཀའ་བསྒོ་བ་ནི། དཔལ་ལྡན་ལྷ་མོ་དུད་པའི་སོལ་བ་མ། ཁྱོད་ཀྱི་བདག་ལ་སྐུ་མངོན་སུམ་དུ་སྟོན་ཅིག །སྐུ་དངོས་སུ་མི་སྟོན་ན་ཡང་སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པའི་སྤྱན་སྔར། ཇི་ལྟར་ཁས་བླངས་དམ་བཅས་པ་བཞིན་དུ། སངས་རྒྱས་ཀྱི་བསྟན་པ་གཉན་པོ་བསྲུང་བ་དང་།། བླ་མ་དམ་པ་རྣམས་ཀྱི་ཕྲིན་ལས་སྒྲུབས་ཤིག །སྔགས་འཆང་སྒྲུབ་པ་པོ་བདག་གི་དགྲ་བགེགས་ཐམས་ཅད་མྱུར་དུ་སྒྲོལ་ཅིག །ཚེ་དང་དཔལ་བསྐྱེད་ཅིག །བདག་ཅག་ཡོན་མཆོད་ལ་གནོད་པར་བྱེད་པའི་ནད་གདོན་ཡམས་ནད་རིམས་ནད་ཐམས་ཅད་ཞི་བར་མཛོད་ཅིག །གཞན་ཡང་བདག་གིས་
ཡིད་ལ་གང་འདོད་པ་ཐམས་ཅད་ཁྱོད་ཀྱིས་འགྲུབ་པར་གྱིས་ཤིག །དེ་ལྟར་བསྒོ་བ་བཞིན་དུ་མི་བྱེད་ན་ཁྱོད་དམ་ཚིག་ཆེན་པོས་རབ་ཏུ་གཟིར་བར་བྱའོ། །ཨོཾ་ཧཱུཾ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨེ་ཨ་ར་ལི་ཧཱུྃ་ཛཿ ཞེས་གཟིར་བའི་སྔགས་བརྗོད་ཅིང་བསྡིག་པའོ། །གུར་གུམ་གྱི་ཆུ་སྦྲེང་ཞིང་། འདི་ནི་ཁྱོད་ཀྱི་དམ་ཚིག་ཆུ། །དམ་ལ་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ༀ་ཧ་ན་ཧ་ན་བཛྲ་ས་མ་ཡ་མ་ཏི་ཀྲ་མ་ནི་ཧཱུྃ་ཕཊ༔ ལྷ་མོ་ཁྱོད་དམ་ལས་འདས་ནས་བསྒོ་བ་བཞིན་དུ་མ་བྱས་ན། གཟིར་བ་ཆེན་པོ་བྱེད་པ་དང་། དམ་ཚིག་ཆུ་འདི་ཡང་དུག་ཧ་ལ་ཆེན་པོར་གྱུར་ཏེ། མཐོང་བས་ཁྲག་ཏུ་སྐྱག་པ་དང་། རྡོ་རྗེ་ཟ་བྱེད་ཆེན་པོའི་སྙིང་རལ་ཏེ། དུས་མ་ཡིན་པར་འཆི་བ་དང་། གནོད་སྦྱིན་གྱིས་གསོད་པར་འགྱུར་བ་དང་། ཁྲོ་བོ་ཟ་བྱེད་ཆེན་པོ་དང་། འཇིགས་བྱེད་ཆེན་པོ་གྱུར་ཏེ། མེ་དབལ་རྡོ་རྗེ་འབར་བས་ལུས་ཚིག་ནས་ཐལ་བར་བྱས་ཏེ། སོ་སོ་རང་རང་གི་མནའ་བོར་བ་བཞིན་དུ། དམྱལ་བར་འབོད་འགྲོགས་སུ་སྐྱེ་བར་འགྱུར་རོ། །དེ་བས་རྡོ་རྗེ་འཆང་གི་དམ་ཚིག་ལ་
མ་འདའ་ཞིག །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཧ་ན་ཧ་ན་བཛྲ་ཀྲོ་ཏ་ས་མ་ཡ་མ་ཏི་ཀྲ་མ་ནན་ཧཱུྃ་ཕཊ༔ ཨོཾ་སཾ་ཤོ་དྷ་ནི་ཧཱུཾ་ཕཊ༔ སྭ་བྷཱ་ཝ་སོགས། ཨོཾ་ཨཱཿཧཱུྃ་ཧ་ཧོ་ཧི༔ ཧཱུྃ། ཨུ་དུམ་ཨུཏྤལ་ལ་སོགས་པདྨ་དང་། །དབང་པོ་རྣམས་ལ་མཛེས་པའི་མེ་ཏོག་འདི། །དཔལ་ལྡན་ལྷ་མོའི་དབུ་ལ་འབུལ་ལགས་ན། །བདག་གིས་བསམ་པའི་དོན་ཀུན་འགྲུབ་གྱུར་ཅིག །ཨོ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨོཾ་བཛྲ་པུངྒེ་པཱུ་ཙ་མེ་གྷ་སྤ་ར་ཎ་ས་མ་ཡེ་ཧཱུྃ་ཕཊ༔ ཚིལ་གྱིས་དུད་པ་མང་པོ་སྦྱར་བའི་དྲི། །གུ་གུལ་སྦྱར་བའི་སྤོས་དང་ཨ་ག་རུ། །བདག་གིས་གུས་པའི་ཡིད་ཀྱི་འབུལ་ལགས་ན། །དཔལ་ལྡན་ལྷ་མོའི་ཤངས་མཆོག་ཚིམ་གྱུར་ཅིག །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨོ་བཛྲ་དྷ་པེ་པཱུ་ཙ་མེ་གྷ་སྤ་ར་ཎ་ས་མ་ཡེ་ཧཱུྃ་ཕཊ་ཉི་ཟླ་ལྟར་གསལ་རིན་ཆེན་འོད་འབར་དང་། །ཞུན་མར་སྟོང་གསུམ་ཀུན་ནས་གསལ་བྱེད་འདི། །དཔལ་ལྡན་ལྷ་མོའི་སྤྱན་ལ་འབུལ་ལོགས་ན། །བདག་གིས་སྒྲིབ་གཉིས་མུན་པ་སེལ་གྱུར་ཅིག །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨོཾ་བཛྲ་ཨཱ་ལོ་ཀེ་པཱུ་ཙ་མེ་གྷ་སྨྲ་ར་ཎ་ས་མ་ཡེ་ཧཱུྃ་
ཕཊ༔ ལེགས་པར་སྦྱར་བའི་དྲི་དང་བདུད་རྩི་ལྔ། །དུ་རུ་ཀ་དང་མཆོད་པར་འོས་པ་གཞན། །དཔལ་ལྡན་ལྷ་མོའི་ཐུགས་ལ་མཆོད་པ་འབུལ། །བདག་གིས་འདོད་པའི་དོན་ཀུན་འགྲུབ་གྱུར་ཅིག །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨོཾ་བཛྲ་གནྡྷེ་པཱུ་ཙ་མེ་གྷ་སྨྲ་ར་ཎ་ས་མ་ཡེ་ཧཱུྃ་ཕཊ༔ དགྲ་བགེགས་བསྒྲལ་བའི་ཤ་དང་རྟ་ཡི་ཤ། །བྱ་དང་ཁྱི་ཡི་ཤ་དང་བ་ལང་ཤ། །འབྲུ་སྣ་ཚོགས་པའི་འབྲས་ཆན་བཤོས་འདི་དག །དཔལ་ལྡན་ལྷ་མོའི་ཞལ་དུ་འབུལ་ལགས་ན། །བདག་གིས་འདོད་པའི་དོན་ཀུན་འགྲུབ་གྱུར་ཅིག །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨོཾ་བཛྲ་ནེ་ཝི་ཏྱཱ་པཱུ་ཙ་མེ་གྷ་སྤ་ར་ཎ་ས་མ་ཡེ་ཧཱུྃ་ཕཊ༔ རྔ་ཆེན་འབྲུག་གི་སྒྲ་ལྟར་ཆེར་སྒྲོག་ཅིང་། །མི་རྐང་གླིང་བུ་ཀུན་ནས་སྙན་པ་ཡི། །ཅང་ཏེའུ་ཆོས་ཀུན་སེམས་སུ་སྟོན་པའི་སྒྲ། །དཔལ་ལྡན་ལྷ་མོའི་སྙན་ལ་མཆོད་པར་འབུལ། །བདག་གིས་འདོད་པའི་དོན་ཀུན་འགྲུབ་གྱུར་ཅིག་་ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨོཾ་བཛྲ་ཤཔྟ་པཱུ་ཙ་མེ་གྷ་སྤ་ར་ཎ་ས་མ་ཡེ་ཧཱུྃ་ཕཊ༔ ཀྱེ། མ་གཅིག་དཔལ་ལྡན་ལྷ་མོ་ལ། །གཟུགས་ཀྱི་མཆོད་པ་
འབུལ་བ་ནི། །མེ་ཏོག་ཆུ་སྐྱེས་ཐང་སྐྱེས་དང་། །བཟང་ཤིང་འབྲས་བུ་ཕུན་སུམ་ཚོགས། །བལྟ་བར་བྱེད་པའི་མཆོད་པ་རྣམས། །མ་གཅིག་སྤྱན་ལ་མཆོད་པ་འབུལ། །ཐུགས་མཆོག་དམ་པ་མཉེས་གྱུར་ཅིག །ཀྱེ། མ་གཅིག་དཔལ་ལྡན་ལྷ་མོ་ལ། །སྒྲ་ཡི་མཆོད་པ་འབུལ་བ་ནི། །པི་ཝང་གླིང་བུ་མཁར་རྔ་དང་། །ཆ་ལང་ཅང་ཏེའུ་མི་རྐང་དུང་། །དྲིལ་བུ་སྒྲ་དབྱངས་ཕུན་སུམ་ཚོགས། །མ་གཅིག་སྙན་ལ་མཆོད་པ་འབུལ། །ཐུགས་མཆོག་དམ་པ་མཉེས་གྱུར་ཅིག །ཀྱེ། མ་གཅིག་དཔལ་ལྡན་ལྷ་མོ་ལ། །དྲི་ཡི་མཆོད་པ་འབུལ་བ་ནི། །ཨ་ག་རུ་དང་དུ་རུ་ཀ །ཙནྡན་དཀར་དམར་དྲི་ཞིམ་སྤོས། །གུ་གུལ་ཚིལ་ཆེན་ལ་སོགས་པའི། །མ་གཅིག་ཤངས་ལ་མཆོད་པ་འབུལ། །ཐུགས་མཆོག་དམ་པ་མཉེས་གྱུར་ཅིག །ཀྱེ། མ་གཅིག་དཔལ་ལྡན་ལྷ་མོ་ལ། །རོ་ཡི་མཆོད་པ་འབུལ་བ་ནི། །བསད་པའི་ཤ་དང་མྱོས་པའི་ཆང་། །བཙོས་པའི་ཞག་དང་ཁུ་བ་ཁྲག །བསྲེགས་པའི་གསུར་དང་རློན་པའི་ཤ །གློ་སྙིང་ནང་ཁྲོལ་མཁར་མར་བཅས། །མ་གཅིག་ལྗགས་ལ་མཆོད་པ་འབུལ། །ཐུགས་མཆོག་དམ་པ་མཉེས་གྱུར་ཅིག །
ཀྱེ། མ་གཅིག་དཔལ་ལྡན་ལྷ་མོ་ལ། །རེག་བྱའི་མཆོད་པ་འབུལ་བ་ནི། །དགྱེས་པའི་ན་བཟའ་སྣ་ཚོགས་དང་། །སྡིག་ཅན་དགྲ་ཡི་གཡང་གཞི་དང་། །དཔལ་ལྡན་སྐུ་ཡི་རེག་བྱ་འདི། །མ་གཅིག་སྐུ་ལ་མཆོད་པ་འབུལ། །ཐུགས་མཆོག་དམ་པ་མཉེས་གྱུར་ཅིག །དམ་རྫས་རཀྟ་ཆང་སྦྱར་ལ་མཆོག་ཐུན་མོང་གི་རྫས་བསྲེས་ལ་བྱིན་གྱིས་རླབས་ལ་སྦྲེང་ཞིང་།་ཧཱུཾ། རང་བྱུང་དམ་རྫས་བདུད་རྩི་ལྔ། །གདོད་ནས་དག་པའི་བདུད་རྩི་མཆོག །རྩ་བ་བརྒྱད་ལ་ལོ་མ་སྟོང་། །དམར་ཆེན་མཚོ་དང་མཱི་སའི་དྲི། །ག་པུར་ཤེལ་གྱི་མཆོག་སྤོས་འདི། །སངས་རྒྱས་སྟོང་གི་ཐུགས་དམ་སྟེ། །རྣལ་འབྱོར་ཡོངས་ཀྱི་དམ་ཚིག་གོ །དམ་ཚིག་སྦྱིན་པ་ཆེན་པོ་སྟེ། །སྦྱིན་ནོ་བསྟབ་བོ་གསོལ་ལོ་བསྐུལ། །དམ་རྫས་བདུད་རྩི་མཆོད་པ་ཡིས། །དུད་སོལ་ལྷ་མོ་མཐུ་མོ་ཆེ། །དུས་ལ་རུབ་ཅིང་དམ་ལ་འཕྲེང་། །དབང་ཕྱུག་ཆེན་པོ་ཀུན་གྱིས་སྲིང་། །རྣལ་འབྱོར་སྤྱི་ཡི་སྲུང་མ་སྟེ། །མཚན་བཟང་ནག་མོ་རེ་མ་ཏི། །མ་ཚོགས་སྟོང་གི་ཚོགས་བཅས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེའི་བརྩེར་དགོངས་དབང་དང་དངོས་གྲུབ་
སྩོལ། །པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ཨོཾ་སཾ་ཤོ་དྷ་ནི་ཧཱུཾ་ཕཊ༔ སྭ་བྷཱ་ཝ་སོགས། གཏོར་མའི་ནང་དུ་ཧ་སེར་པོ་གསེར་གྱི་མདོག་ལྟ་བུ་དེ་ཞུ་བ་ལས་གཏོར་མའི་ཁ་དོག་ངན་པ་ཐམས་ཅད་བཅོམ་ནས་ཁ་དོག་ཕུན་སུམ་ཚོགས་པ། དེའི་སྟེང་དུ་ཧོ་དཀར་པོ་དུང་གི་མདོག་ལྟ་བུ་དེ་ཞུ་བས་དྲི་ངན་པ་ཐམས་ཅད་བཅོམ་ནས་དྲི་ཕུན་སུམ་ཚོགས་པ། དེའི་སྟེང་དུ་སྔོན་པོ་བཻཌཱུརྱའི་མདོག་ལྟ་བུ་དེ་ཞུ་ནས་རོ་ངན་པ་ཐམས་ཅད་བཅོམ་ནས་རོ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧ་ཧོ་ཧྲི༔ ལན་གསུམ་བརྗོད། ཁ་དོག་དྲི་རོ་ངན་པ་ཐམས་ཅད་བཅོམ་ནས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བདུད་རྩིའི་རྒྱ་མཚོ་འདོད་པའི་ཡོན་ཏན་ལྔ་དང་ལྡན་ཞིང་། མཾ་ས་རཀྟ་ཙིཏྟ་ལ་སོགས་པས་བརྒྱན་པའི་བྷ་ལིང་བསམ་གྱིས་མི་ཁྱབ་པར་གྱུར། དེ་ནས་གཏོར་མ་དེ་སྣོད་གཅིག་ཏུ་བཏེག་པའམ། ཡང་ན་ཐལ་མོ་སྦྱར་ལ་ཡིད་ཀྱིས་བཏེག་ལ་ཞལ་དུ་སྟོབ་པའི་ཚུལ་གྱིས། མ་ཁྱེད་ལ་མཆོད་པ་འབུལ་བ་ནི། །ཕྱི་ནང་གསང་བའི་མཆོད་པ་དང་། །ཚོགས་ཀྱི་འཁོར་ལོ་རྒྱ་ཆེན་དང་། །དམ་ཉམས་བསྒྲལ་བའི་དོན་སྙིང་མཁལ་མར་བཅས། །ཤ་ཁྲག་དམར་གྱི་གཏོར་མ་འདི་བཞེས་ལ། །རྣལ་འབྱོར་བཅོལ་
བའི་ཕྲིན་ལས་འགྲུབ་པར་མཛོད། །ཨོཾ་ཧཱུཾ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་མཾ་ས་ལ་ཁཱ་ཧི། །ཨོཾ་མ་ཧཱ་གོ་རོ་ཙ་ན་ལ་ཁཱ་ཧི། ཨོཾ་མ་ཧཱ་བ་སུ་ཏ་ལ་ཁཱ་ཧི། ༀ་ཨི་དཾ་བྷ་ལི་ཏ་གྷི་ཧ་ན་ཤྲཱི་ཧ་ན་པ་ཡ་ཧཱུྃ་ཕཊ༔ ཅེས་ཅི་རིགས་པ་བརྗོད་ལ་ཡིད་ཀྱིས་ལྷ་མོ་དུད་སོལ་མ་འཁོར་དང་བཅས་པས་གཏོར་མ་དེ་ཧབ་དི་རི་རི་གསོལ་བར་བསམས་ལ། བྷྱོཿ ཏིལ་དམར་གྱིས་བསྐུས་ལེན་བུ་གཅིག་འཕྱང་རོ་མྱོའི་རྣ་ཆ་ཆ་ལུགས་མ་ལུས་འཆང་། །རྒྱན་དུ་རྐང་སྒྲོག་ལྕགས་ལས་བྱས་པ་གཅིག་གིས་རང་གིས་རྐང་པ་མཛེས་པར་བྱས་པ་སྟེ། །གཅེར་བུ་བོང་བུ་ཞོན་ནས་འགྲོ་བ་འདི་ན་རྒྱུ་བ་དེ་ནི་ལྷ་མོ་ཁྱོད་ཡིན་ཏེ། །བདག་ཉིད་མཛེས་པར་ཤེས་ཀྱིས་གཞན་ལྟ་ཁྱོད་ཀྱིས་སྤྱོད་པའི་མཚོ་ཆེན་དོན་དག་སུ་ཡིས་ཤེས། །འཁོར་བ་འཇིགས་པའི་ཚེ་ན་མི་ལུས་དག་ལ་ཁྲག་དང་ཞག་འཛག་དུད་པ་འཐུལ་བ་ན། །ལྷ་མོ་མི་བཟད་མཆེ་གཙིགས་ཁྱོད་ཀྱིས་ཞལ་དུ་འགྲོ་ཀུན་སྐད་ཅིག་ཙམ་ལ་ཞུགས་པར་གྱུར། །ནག་མོ་མི་ཐོད་ཐོགས་པ་ཁྱོད་ནི་རྣལ་འབྱོར་སྒྲུབ་པོའི་སྤྱོད་ཡུལ་ཅན་དེ་དུར་ཁྲོད་དགྱེས། །ཁྱོད་ནི་གཡོ་ཅན་མནན་ཅིང་ནད་དང་འཆི་
བའི་འཇིགས་པ་སེལ་ལ་མི་བཟད་སྒྲ་ཡང་སྒྲོག །ཁྱོད་ནི་དཔའ་བོ་དག་གིས་མགོ་བོའི་ཅོད་པན་ལེགས་སྤྲས་གཡུལ་དུ་མཚོན་གྱིས་བཅད་པ་ཡིས། །ཕྲེང་བ་ཐོག་ཅིང་གར་བྱེད་ལག་པ་མཉེན་བརྐྱང་རྐུབ་ཚོས་ཆེ་ལ་ཀླུ་དབང་གཤིབས་པ་ཡི། །སྐེ་རགས་བཅིང་ཞིང་ལག་ན་མདུང་དང་རལ་གྲི་ཐོད་པ་ཁྲག་གི་ཆང་གིས་མྱོས་གྱུར་པས། །མིག་རྩ་དམར་པོར་གྱུར་ཅིང་མཚན་མོ་དུར་ཁྲོད་འགྲོ་བ་འབྱུང་པོ་ཕལ་ཆེར་རྣམས་ཀྱིས་མཐོང་། །ཀོ་རློན་ཆེན་པོ་དྲལ་ཏེ་བརྒྱང་བའི་གོས་ཀྱིས་ཕྱེད་གཡོགས་སྨད་ནི་རེ་ལྡེ་སེར་པོའི་ཤམ་བུ་ཅན། །མི་ཡི་རྒྱུ་མ་གསར་བའི་སྦྱབ་ཀྱིས་ཞལ་གྱི་ཟླ་བ་བརྒྱན་ཅིང་དྲིལ་བུ་འགྲམ་པར་འཁྲོལ། །ལུས་ནི་སྣུམ་གྱིས་གསར་བུ་བྱུག་ཅིང་ཁྲག་དང་ཞག་མང་འཛག་པའི་ཐིག་ལེ་ཚོམ་བུར་བྲིས། །མི་ཡི་ཤ་ལ་སོ་ཡིས་ཆེམ་ཆེམ་གཅོད་ཅིང་ཐོད་པ་ཅན་གྱིས་བདག་ལ་སྐྱོང་གྱུར་ཅིག །དྲག་པོ་དྲག་མོ་མི་བཟད་མི་ཤ་ཁ་ན་ཐོགས་པ་སྔོན་ཆད་མ་བྱུང་ཁྱོད་མཐོང་ན། །མ་མོ་རྣམས་ཀྱང་སྐག་ཅིང་འདར་ལ་རྔམ་པ་འདོན་ཅིང་མིག་རྩ་རིག་རིག་ཁྱོད་ལ་འདུད། །ནག་མོ་བཟང་མོ་ལུས་མདོག་ནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་ཀྱང་། །ཉིན་
གཅིག་བཞིན་དུ་ཞབས་ལ་བསྟོད་པར་བྱེད་ཅིང་གཤིན་རྗེ་ཉིད་ཀྱང་འདར་ཞིང་རྟག་ཏུ་འདུད་པར་བྱེད། །མི་རྣམས་དང་ནི་འགྲོ་བ་མ་ལུས་པ་རྣམས་གཞུ་བཏུལ་བས་ནི་རྣ་བ་ཡ་གཅིག་ལ། །བྲང་གི་འགྲོ་བའི་གདེངས་ཀ་སྟོང་དང་ལྡན་པ་གཅིག་གིས་ཁྱབ་ནས་ཁྱོད་ལ་རྒྱན་དུ་བྱས། །ཡ་གཅིག་ལ་ནི་སེང་གེ་མཚུངས་མེད་འཚང་ཞིང་རྒྱ་མཚོས་བསྐོར་བའི་ས་གཞི་གནོན། །སྟེང་ན་རྒྱུ་བའི་ཉི་མའི་འོད་ཟེར་སྟོང་ལྡན་དེ་ནི་ལྟེ་བའི་ཕྱོགས་སུ་བཞག ། བྷྱོཿ རྒྱ་མཚོའི་ཀློང་ནས་མེ་འབར་ཁྱོད། །མཚོ་རྣམས་སྐེམ་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་དུ་བཞུགས། །རྫོང་དང་བཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་ཀྱི་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པ་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་བསྲུང་བ་ཡི། །དཔལ་ལྡན་ལྷ་མོ་ཁྱོད་ལ་བསྟོད། །ནད་དོ་ཅོག་གི་བདག་མོ་ལྷ་མོ་ཆེན་མོ་ལ་བསྟོད་པ་རྐང་པ་བརྒྱད་པ་བྲམ་ཟེ་མཆོག་སྲེད་ཀྱིས་མཛད་པའོ། །རྒྱས་པར་སྤྲོ་ན་མེ་ལྕེ་འབར་བའི་ནང་ནས་
བསྡུས་པའི་བསྟོད་པ་ཐམས་ཅད་འདིར་བྱའོ། ། བྷྱོཿ ལྷ་མོ་ནག་མོ་མཐུ་མོ་ཆེ། །འཕགས་མ་ཁྱེད་ལ་ཕྱག་འཚལ་ལོ། །འཇིག་རྟེན་འདི་ན་མཐུ་རྩལ་ཆེ། །བདག་གིས་ཁྱོད་ལ་བསྟོད་ལག་ན། །བཀྲ་ཤིས་མཆོག་སྒྲུབ་སེམས་བདེར་གནས། །ཡིད་མྱུར་རྫུ་འཕྲུལ་མཐུ་སྟོབས་ལྡན། །མ་མོར་བྱེད་ཅིང་འཇིག་རྟེན་སྐྱོང་། །དཔལ་བརྟན་རྟགས་སྤྱོད་རྫུ་འཕྲུལ་ཆེ། །འཐབས་མོ་གཡུལ་ལས་ཤིན་ཏུ་རྒྱལ། །གཤིན་རྗེའི་སྲིང་མོ་ཡིན་པར་སྟོན། །གོས་སུ་ཞིང་ཆེན་རེ་ལྡེ་གསོལ། །སྤྱན་རྩ་དམར་ལ་སྡང་མིག་ཅན། །སྤྱན་རྩ་མཐོང་ན་ཀུན་ཡང་བསྔང་། །དད་པས་འཇིག་པ་རྣམས་སྡུད་ཅིང་། །དྲང་སྲོང་བདེན་པའི་ཚིག་གིས་ནི། །ལྷ་མོ་ཁྱོད་ལ་བདག་གིས་བསྟོད། །རྨ་བྱའི་སྒྲོས་ནི་རྒྱལ་མཚན་བྱས། །རྟག་ཏུ་འཇིག་རྟེན་སྡུད་པར་བྱེད། །སེངྒེ་སྟག་དང་སྤྱང་ཀི་དང་། །ཕག་གདོང་འུག་པ་བྱ་རོག་དང་། །རྟག་ཏུ་ཀུན་ནས་སྐོར་བར་བྱེད། །རྡོ་རྗེ་དྲིལ་ཆེན་ཁྲོལ་བར་བྱེད། །ཁྱེད་ལ་བསྟོད་དེ་ཕྱག་འཚལ་བསྟོད། །ཅེས་འཁོར་དང་བཅས་པའི་བསྟོད་པའོ། །བསྙེན་པ་བྱ་བ་ནི། ལྷ་མོའི་ཐུགས་ཀའི་ཧཱུྃ་ཡིག་གིས་ཟླ་ཚེས། དེ་ཟླ་བའི་དཀྱིལ་འཁོར་དུ་གྱུར་པའི་འོད་ཟེར་ཤངས་བུག་གཡས་ནས་འཕྲོས་པས།
ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་ཐམས་ཅད་ཀྱི་བདུད་རྩིའི་བཅུད་བསྡུས་ནས། ལྷ་མོའི་སྤྱི་བོའི་གཙུག་ཏུ་བོ་ལས་བྱུང་བའི་བུམ་པ་དཀར་པོའི་ནང་དུ་ཞུགས། བུམ་པའི་ཁ་ནས་བདུད་རྩི་དཀར་པོ་འོ་མའི་རྒྱུན་ལྟ་བུ་ངང་ལྷུད་ལྷུད་བབས་པས། ལྷ་མོའི་སྐུ་ལུས་བདུད་རྩིས་ངང་ལྟེམ་གྱིས་གང་བ་མ་ཤོང་ལྷུད་པའི་ཚུལ་དུ་ཞབས་ནས་བདུད་རྩིའི་རྒྱུན་ཆུ་བོ་ལྟར་བབ། རང་དང་ཡོན་བདག་དང་ནོད་པའི་སྤྱི་བོ་ཚངས་བུག་དང་ཁ་ནས་ཞུགས་ལུས་ཐམས་ཅད་ངང་ལྟེམ་གྱིས་གང་། ནད་རླུང་མཁྲིས་བད་ཀན་རིམས་ནད་ཡམས་ནད་ཐམས་ཅད་དང་། དམ་ཚིག་གི་ཆག་ཉམས་ཀྱིས་མ་མོ་མཁའ་འགྲོ་འཁྲུག་པའི་ཁ་རླངས་གདུག་རྩུབ་ཐམས་ཅད་བ་སྤུའི་ཁུང་བུ་ནས་རླངས་པ་སྔོ་དམར་གྱི་ཚུལ་དུ་བུད་ནས་ནམ་མཁའ་ལ་འཇའ་ཡལ་བ་ལྟར་རམ་མེ་ལོང་ཧས་བཏབ་པ་ཡལ་བ་ལྟར་སོང་བར་བསམས་ལ། ཉི་ཟླའི་མན་ངག་དམ་པ་ནས་ཞི་དམིགས་སོ། །དྲག་དམིགས་གཞན་དུ་ཤེས་སོ། །ཨོཾ་ས་མ་ཡ། ས་མ་ཡ། ཧཱུཾ་ས་མ་ཡ། ཨོཾ་ཧཱུཾ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨོཾ་བཛྲ་སཏཱ་ས་མ་ཡ། སོགས་ཡིག་བརྒྱ་བཟླས། དེ་ལྟ་བུ་ཚར་གང་འོས་དང་། ལྷ་མོའི་སྙིང་པོ་བརྒྱ་རྩ་ཡན་ཆད་བཟླས་སོ། །དེ་ནས་གསོལ་ཀ་བཅོལ་གཏམ་བྱ་བ་ནི། གཏོར་མ་དེ་གསོ་བྲན་གཅིག་བྱས་ལ། ཨོཾ་སཾ་ཤོ་དྷ་ནི་ཧཱུཾ་ཕཊ༔ སྭ་བྷ་ཝ་སོགས། ཨོཾ་ཨཱཿཧཱུྃ་ཧ་ཧོ་ཧྲཱིཿ ཁ་དོག་དྲི་རོ་ངན་པ་ཐམས་ཅད་བསལ་ཏེ་བདུད་
རྩིར་གྱུར། བྷྱོཿ བསྐལ་པ་མེ་ལྟར་འབར་བའི་ཀློང་དཀྱིལ་ནས། །རླུང་ནག་འཚུབ་ཆེན་རབ་ཏུ་འབར་བའི་དབུས། །འཕྲུལ་གྱི་གཞལ་ཡས་ཐོད་པའི་སྐུ་མཁར་ནས། །འདོད་ཁམས་དབང་ཕྱུག་ལྷ་མོ་དུད་སོལ་མ། །ནག་མོ་ཆེན་མོ་རྔམ་པའི་མཆེ་བ་ཅན། །གཅེར་བུ་རལ་པའི་གསེབ་ནས་མེ་སྟག་འཕྲོ། །ལྷ་མོ་སྐུ་མདོག་ནག་མོར་བཞུགས་པ་ནི། །དོན་དམ་དབྱིངས་ལས་བསྐྱོད་པ་མེད་པའི་རྟགས། །དབུ་སྐྲ་ཁམ་སེར་སྦྲུལ་གྱིས་བཅིང་པ་ནི། །ཞེ་སྡང་གདུག་པའི་བདུད་དཔུང་འཇོམས་པའི་རྟགས། །རིལ་པ་གཡས་ནས་གཡོན་དུ་འཁྱིལ་བ་ནི། །ཡུམ་གྱིས་མཁའ་ལ་སྤྲུལ་པ་འགྱེད་པའི་རྟགས། །རལ་པ་སྤྱི་གཙུག་གཅིག་ཏུ་འཁྱིལ་བ་ནི། །སྐྱེ་མེད་དོན་དམ་གཅིག་ཏུ་དགོངས་པའི་རྟགས། །རྨ་བྱའི་རྒྱལ་མཚན་གཙུག་ཏུ་ཕྱར་བ་ནི། །ཉོན་མོངས་དུག་གསུམ་རྩད་ནས་གཅོད་པའི་རྟགས། །ཐོད་སྐམ་ལྔ་ཡིས་དབུ་ལ་བརྒྱན་པ་ནི། །ཐུགས་རྗེ་སྤྲུལ་སྐུས་འགྲོ་དོན་མཛད་པའི་རྟགས། །སྙན་གཡས་སྦྲུལ་ནག་གདེངས་ཀ་འཕྱོ་བ་ནི། །ཞེ་སྡང་མ་སྤང་གནས་སུ་དག་པའི་རྟགས། །སྙན་གཡོན་སེངྒེ་རལ་དམར་འཕྱོ་བ་ནི། །གསུང་གི་ང་རོས་ཁམས་
གསུམ་གཡོ་བའི་རྟགས། །སྙན་ཆ་གསེར་གྱི་དྲིལ་བུ་འཁྲོལ་བ་ནི། །སངས་རྒྱས་ཀུན་གྱིས་གཏད་གཉེར་མཛད་པའི་རྟགས། །རྣ་ལྟག་མེ་ཏོག་དར་ནག་འཕྱར་བ་ནི། །ལྷ་རྣམས་གཡུལ་ལས་རྒྱལ་བར་མཛད་པའི་རྟགས། །སྤྱན་རྩ་དམར་ལ་སྤྱན་གསུམ་བགྲད་པ་ནི། །སྒྲུབ་པ་པོ་ལ་བུ་བཞིན་གཟིགས་པའི་རྟགས། །ཤངས་ནས་ཞག་མ་པ། །གནོད་བྱེད་གདུག་པ་ཅན་རྣམས་ཉུལ་བའི་རྟགས། །ཞལ་དུ་མི་རོ་ཧྲིང་པ་བཅུག་པ་ནི། །དམ་ཉམས་དགྲ་བོ་ཞལ་དུ་གསོལ་བའི་རྟགས། །རྣོ་གདུག་མཆེ་བ་ཟུར་གསུམ་གཙིགས་པ་ནི། །དགྲ་བགེགས་ཤ་ལ་ཆེམ་ཆེམ་གསོལ་བའི་རྟགས། །ཕྱག་གཡས་གཅོད་པའི་རལ་གྲི་ཕྱར་བ་ནི། །དམ་ཉམས་དགྲ་བོའི་སྲོག་རྩ་གཅོད་པའི་རྟགས། །འོག་མས་ཐོད་ཁྲག་དམར་བསྐྱིལ་གསོལ་བ་ནི། །སྲིད་གསུམ་ཤ་ཁྲག་ཞལ་དུ་སྟོབ་པའི་རྟགས། །ཕྱག་གཡོན་ཤཀྟིའི་མཚོན་ཆ་འཛིན་པ་ནི། །ལྷ་མ་ཡིན་གྱིས་དམག་དཔུང་སྒྲོལ་བའི་རྟགས། །འོག་མས་ཏྲི་ཤུལ་དར་དཔྱང་ཕྱུར་བ་ནི། །བདུད་དཔུང་རྣམས་ཀྱིས་རྒྱལ་མཚན་བསྙེལ་བའི་རྟགས། །རུས་པའི་རྒྱན་ཆ་ལྔ་ཡིས་མཛེས་པ་
ནི། །བདེ་གཤེགས་རིགས་ལྔ་རྣམ་པར་དག་པའི་རྟགས། །ཐལ་ཆེན་ཚོམ་བུས་སྐུ་ལ་བྱུག་པ་ནི། །སྟོང་ཉིད་ཆོས་སྐུའི་དོན་དང་ལྡན་པའི་རྟགས། །ཁྲག་གི་ཐིག་ལེས་སྐུ་ལ་བརྒྱན་པ་ནི། །ཐུགས་རྗེའི་དོན་དམ་བཅུད་ལ་རྔམས་པའི་རྟགས། །གླང་ཆེན་ཀོ་རློན་སྟོད་དུ་གསོལ་བ་ནི། །ཐེག་པ་མཆོག་གི་དོན་དང་ལྡན་པའི་རྟགས། །སྨད་ནི་བ་གླང་ཀོ་རློན་གསོལ་བ་ནི། །གཏི་མུག་མུན་པའི་ཚོགས་རྣམས་འཇོམས་པའི་རྟགས། །རེ་ལྡེ་སེར་པོའི་དབུ་ལ་ཤམ་བུ་བཏགས་པ་ནི། །འཇིག་རྟེན་འདི་ན་ཆེ་བཙན་ལྡན་པའི་རྟགས། །ཀླུ་ཆེན་བརྒྱད་ཀྱིས་སྐ་རགས་བྱས་པ་ནི། །ཀླུ་རིགས་ཐམས་ཅད་དབང་དུ་སྡུས་པའི་རྟགས། །ཐོད་རློན་ལྔ་བཅུས་དོ་ཤལ་བྱས་པ་ནི། །ལྷ་མིན་ཚོགས་རྣམས་སྐྲག་པར་བྱེད་པའི་ཕོརྟགས་། །ལྟེ་བའི་ཐད་ནས་ཉི་མ་འཆར་བ་ནི། །ཉོན་མོངས་མ་རིག་མུན་པ་སེལ་བའི་རྟགས། །ལྕགས་སྒྲོག་འབར་བས་ཞབས་ལ་འཁྲིལ་བ་ནི། །འདོད་ཁམས་འདུལ་བའི་དབང་དང་ལྡན་པའི་རྟགས། །བོང་བུ་གྲྭ་པ་ཆིབས་སུ་བཅིབས་པ་ནི། །གཏི་མུག་དོན་དམ་ཆོས་ཉིད་བསྲེ་བའི་རྟགས། །ཕྱི་སྟེང་མིག་གིས་ཕྱོགས་བཅུར་གཟིགས་པ་ནི།
གནོད་བྱེད་གང་ན་འདུག་ཀྱང་འགུགས་པའི་རྟགས། །ཞིང་ཆེན་ལྤགས་པས་སྒ་སྟན་བྱས་པ་ནི། །ཆོས་ཉིད་ཡང་དག་དོན་དང་ལྡན་པའི་རྟགས། །ཞིང་ཆུང་ལྤགས་པས་སྒ་ཤལ་བྱས་པ་ནི། །སངས་རྒྱས་བསྟན་པའི་གནོད་པ་བཟློག་པའི་རྟགས། །སྲིན་པོའི་ཐོད་པས་སྒྲ་རུ་བྱས་པ་ནི། །བདུད་དང་སྲིན་པོ་ཟིལ་གྱིས་གནོན་པའི་རྟགས། །སྦྲུལ་ནག་སྟོང་གིས་གོང་སྨད་བྱས་པ་ནི། །ཉམས་པ་ཅན་གྱི་མཛེ་ནད་གཏོང་བའི་རྟགས། །སྲིན་མོའི་ཐོད་པ་གོང་ལ་བཏགས་པ་ནི། །མ་མོ་སྲིན་མོ་ལས་ལ་འགྱེད་པའི་རྟགས། །ནད་ཀྱི་རྐྱལ་པ་སྨད་ལ་བཅིངས་པ་ནི། །དགྲ་བོའི་ཡུལ་དུ་ནད་རིམས་གཏོང་བའི་རྟགས། །མེ་དཔུང་འབར་བའི་དབུས་ན་བཞུགས་པ་ནི། །ཡེ་ཤེས་ཆེན་པོས་རྣམ་རྟོག་བསྲེག་པའི་རྟགས། །རླུང་ནག་འཚུབ་མ་ཕྱོགས་བཅུར་འཁྱིལ་བ་ནི། །ལྷ་སྲིན་སྡེ་བརྒྱད་དམ་ལ་འདུས་པའི་རྟགས། །ནག་མོ་འབུམ་ཕྲག་བྲན་དུ་གཞོལ་བ་ནི། །དགྲ་བགེགས་གང་ཡིན་ཆམ་ལ་འབེབ་པའི་རྟགས། ། བྷྱོཿ འཇིགས་གཟུགས་ཁྲག་འཐུང་ལྷ་མོ་དུད་སོལ་མ། །ནག་མོ་འབུམ་སྡེའི་ཚོགས་དང་བཅས་པ་ལ། །ཏཱཾ་ས་རཀྟ་
ཙིཏྟས་བརྒྱན་པ་ཡི། །དམར་གྱི་གཏོར་མས་ཁྱེད་ཀྱི་ཐུགས་དམ་བསྐང་། །བྷ་ལི་མཆོད་པར་བཞེས་ཤིག་དམ་ཚིག་ཅན། །།གསོལ་ཅིག་བཞེས་ཤིག་ཆོས་སྐྱོང་སྲུང་མའི་ཚོགས། །འཁོར་གྱི་ཚོགས་རྣམས་ཕོ་ཉར་ད་ཐོངས་ཤིག །བསྟན་པ་བཤིགས་པའི་དགྲ་བགེགས་རྡུལ་དུ་རློགས། །མ་གཅིག་སྐུ་ལས་མེ་འབར་རྒྱ་མཚོ་སྐེམ། །ཕྱག་ནི་འཇིགས་པའི་མཚོན་ཆས་རི་རབ་བསྙིལ། །དབུ་སྐྲ་རལ་པ་འཐིབས་པས་སྟོང་གསུམ་འགེང་། །ཞལ་དུ་མི་ཤ་རློན་པ་རྟག་ཏུ་གསོལ། །ལྗགས་ལ་ཁྲག་གི་རྒྱ་མཚོ་རྟག་ཏུ་འཁྱིལ། །གསུང་ནི་འབྲུག་ལྕོགི་སྒྲ་ལྟར་ཕྱོགས་བཅུར་སྒྲོག །བདག་གིས་ཁྱེད་ལ་བསྟོད་པ་འབུལ་ལགས་ན། །བསྟན་པ་སྲུང་བའི་ལས་འདི་མྱུར་དུ་སྒྲུབས། །ལྷ་མོའི་རྟགས་བསྟོད་བྲམ་ཟེ་མཆོག་སྲེད་ཀྱིས་མཛད་པའོ། །བྷྱོ༔ དུར་ཁྲོད་རབ་འཇིགས་འབར་བའི་དཀྱིལ་འཁོར་ནས། །ཀེང་རུས་གསར་རྙིང་ཚོགས་ནི་རི་ལྟར་སྤུང་། །བྷནྡྷ་མང་པོའི་ཚོགས་ནི་རྫ་ལྟར་ལྷགས། །ཙིཏྟ་མང་པོའི་ཚོགས་ནི་འབྲུ་ལྟར་བསྐྱིལ། །རཀྟ་མང་པོའི་ཚོགས་ནི་མཚོ་ལྟར་འཁྱིལ། །ཞིང་ཆེན་གསར་རྙིང་ཚོགས་ནི་སྤྲིན་ལྟར་གཏིབས། །མཁའ་འགྲོ་མང་པོའི་ཚོགས་ནི་སྐར་
ལྟར་འཁྲུགས། །བདུད་དང་གཤིན་རྗེའི་ཚོགས་ནི་བྲན་དུ་ཁོལ། །མ་སྲིང་བྱམས་པའི་ཚོགས་ནི་གཤེགས་སུ་གསོལ། །དམར་ཆེན་ཁྲག་ལ་རོལ་ཏེ་མཆོད་པར་བཞེས། །རུས་ཆེན་རྐང་ལ་རོལ་ཏེ་མཆོད་པར་བཞེས། །སྣུམ་ཆེན་ཚིལ་ལ་རོལ་ཏེ་མཆོད་པར་བཞེས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨོཾ་རུ་རུ་རོ་རུ་བྷི་ཏི་ཏ་བྷ་ཏོ་སི་ཀ་མ་ལ་རཀ་སིདྡྷི་ཧཱུྃ་བྷྱོ་ཨོ་ཨེ་ཨ་ར་ལི་ཧཱུྃ་ཛཿཛཿ ཧོ༔ གསན་ཅིང་དགོངས་སུ་གསོལ་ལོ། །ལྷོ་ཕྱོགས་གཤིན་རྗེ་གནས་པའི་དུར་ཁྲོད་ནས། །ཙིཏྟ་རིན་ཆེན་བ། གུར་ཕུབ་གཞལ་ཡས་ཁང་། །སྣང་གསལ་ཉི་ཟླ་འབར་བའི་གདན་སྟེང་ན། །ཐོད་མཁར་མེ་རླུང་འཚུབ་པའི་གཞལ་ཡས་ཁང་། །གྲུ་གསུམ་མཐིང་ནག་འབར་བའི་གདན་སྟེང་ན། །ཤྲཱི་མ་ཧཱ་ཀཱ་ལི། ཁྲག་འཐུང་གི་རྒྱལ་མོ་དུད་པའི་སོལ་བ་མ། འཁོར་ཤན་པ་མ་གསུམ། རིགས་བཞིའི་མཁའ་འགྲོ། མ་མོ་བརྒྱད། ཕྲ་མེན་མ་བརྒྱད། ཉམས་པའི་ཤ་ཁྲག་ལ་ཟ་བར་བྱེད་པའི་སྒོ་མ་བཞི། ལས་བྱེད་ཀྱི་མཁའ་འགྲོ་མ་ནག་མོ་བྱེ་བ་འབུམ་སྡེ། དཀར་མོ་འབུམ་སྡེ། །སེར་མོ་འབུམ་སྡེ། དམར་མོ་འབུམ་སྡེ། ལྗང་མོ་
འབུམ་སྡེ། ཤ་ཟ་དང་། ནམ་གྲུའི་རིགས་དང་། སྲིན་མོ་དང་གནོད་སྦྱིན་དཔག་ཏུ་མེད་པ་དང་། རི་རབ་ཀྱི་ངོས་དང་རྒྱ་མཚོའི་གཏིང་དང་བར་སྣང་གི་ཁམས་ལ་གནས་པའི་དམོད་པའི་མཚོན་ཆ་ཅན་རྣམས་དང་། མ་བདུན་དཔོན་གཡོག་མ་བདུན་སྲིང་བཞི། དུས་བཞིའི་ཞགས་ཐོགས། གཤིན་རྗེའི་ཞགས་ཐོགས། དཔལ་ལྡན་དམར་སེར། དཔལ་ལྡན་དུང་མགྲིན། སྤྲུལ་པ་དམར་སྐྱ་རྣམ་པར་འཕྱང་མ། ཚོགས་ཀྱི་ཕྱག་ཚང་། ཚོགས་ཀྱི་ཉུ་ལེ། ལྷག་ཕུད་ཉུལ་བྱེད་གཏུམ་མོ་ཛ་ཏི་ལ་སོགས་པ་དམོད་པའི་མཚོན་ཆ་ཅན་རྣམས་དང་། ཡེ་ཤེས་དང་འཇིག་རྟེན་ལས་ཀྱི་མཁའ་འགྲོའི་ཚོགས་དང་། ལས་ཀྱི་རེ་མ་ཏི་དྲེའུ་རྐང་གསུམ་ཅན་དང་། ཆུ་སྲིན་གྱི་གདོང་ཅན་མ་དང་། བ་ལམ་དྲིལ་སྣ་མ་དང་ཁྲི་སྨན་སི་ལེ་མ་དང་། མ་ཧེའུ་མགོ་ཅན་མ་དང་། བརྟན་མ་བཅུ་གཉིས། ཡ་མ་བཅུ་གཉིས། སྐྱོང་མ་བཅུ་གཉིས་དང་། སྲིད་པའི་མ་མོ་སྟོང་དང་། ལས་ཀྱི་སྲིན་མོ་སྟོང་ཕྲག་དྲུག་ཅུ་རྩ་བཞི་ལ་སོགས་པ། དཔལ་ལྡན་ལྷ་མོ་དཔོན་གཡོག་འཁོར་དང་བཅས་པ། བསྟན་པ་སྤྱིའི་བཀའ་སྲུང་། ཆོས་འཁོར་ཡོངས་ཀྱི་སྲུང་མ། དམ་ཉམས་གྱི་སྲོག་
གཅོད། རིག་འཛིན་གྱི་སྲོག་ཤིང་། རྣལ་འབྱོར་གྱི་དགྲ་བླ། དུག་གསུམ་གྱི་སྨན་པ། གཙུག་ལག་ཁང་དང་དཀྱིལ་འཁོར་གྱི་སྲུང་མ། སངས་རྒྱས་ཀྱི་བསྟན་འཛིན། སྐུ་གསུང་ཐུགས་ཀྱི་སྤྲུལ་པ། ཡང་སྤྲུལ་འཁོར་དང་བཅས་པ་ཁྱེད་རྣམས་ལ། བདག་ཅག་རྣལ་འབྱོར་པ་རྣམས་ཀྱི་མཆོད་པ་འབུལ་བ་ནི། མ་ཧཱ་མཱ་ས། མ་ཧཱ་རཀྟ། མ་ཧཱ་གོ་རོ་ཙ་ན། མ་ཧཱ་བ་སུ་ཏ། མ་ཧཱ་པཉྩ་ཨ་མྲྀ་ཏ་ལ་སོགས་པ་མཆོད་པའི་ཚོགས་ཡོ་བྱད་བསམ་གྱིས་མི་ཁྱབ་པ་འདི། དཔལ་ལྡན་ལྷ་མོ་འཁོར་དང་བཅས་པ་རྣམས་ལ། གསོལ་ལོ། །མཆོད་དོ། །འབུལ་ལོ། །མ་ཧཱ་མཾ་ས་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། ཨི་དཾ་བྷ་ལིཾ་ཏ་ཁཱ་ཧི། །ཨི་དཾ་བྷ་ལིཾ་ཏ་ཧཱུྃ་ཧ་ན། ཤྲཱི་ཧ་ན་ས་མ་ཡ་ཧཱུྃ་ཕཊ༔ མཉེས་རབ་ཀྱི་ཕུད། དགྱེས་རབ་ཀྱི་མཆོད་པ་དམ་པ་མཛོད། རྣལ་འབྱོར་པ་བདག་གིས་དཔུང་འཁོར་དང་བཅས་པ་འདི་བསྟན་གྱི་གཉེར་གཏད་གྱིས། མཉེས་པའི་བསྟེན་རྫས་འདི་རྣམས་ལ་བཞུགས་ལ། ཇི་སྲིད་བསྟན་པ་འདི་གནས་ཀྱི་བར་དུ། སངས་རྒྱས་ཀྱི་བསྟན་པ་གཉན་པོ་འདི་སྲུངས་ཤིག །དཀོན་
མཆོག་གི་ཆེ་བ་ཕྱུངས་ཤིག །དཔལ་ལྡན་བླ་མ་དམ་པའི་ཕྲིན་ལས་སྒྲུབས་ཤིག །སེམས་ཅན་གྱི་བདེ་སྐྱིད་སྤེལ་ཅིག །ཁྱད་པར་དུ་སྔགས་འཆང་རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱིས་བདུད་དང་བར་དུ་གཅོད་པ་ཐམས་ཅད་ཞི་བར་མཛོད་ཅིག །ཚེ་དང་བསོད་ནམས་དཔལ་དང་འབྱོར་པ་ཐམས་ཅད་ཟླ་བ་ཡར་གྱི་ངོ་ལྟར་རྒྱས་པར་མཛད་དུ་གསོལ། ལྷ་དང་མི་ལ་སོགས་པ་ཐམས་ཅད་དབང་དུ་བསྡུ་བར་མཛད་དུ་གསོལ། བདག་ཅག་རྣམས་ཀྱིས་ནད་ཀྱི་རིགས་སུ་གྱུར་པ། རླུང་ལས་གྱུར་པ། མཁྲིས་པ་ལས་གྱུར་པ། བད་ཀན་ལས་གྱུར་པ། འདུས་པ་ལས་གྱུར་པ་ནད་ཀྱི་རིགས་བཞི་བརྒྱ་རྩ་བཞི་ཞི་བར་མཛད་དུ་གསོལ། གདོན་གྱི་རིགས་སུ་གྱུར་པ། ལྷའི་གདོན་དང་། ཀླུའི་གདོན་དང་། གནོད་སྦྱིན་གདོན་དང་། རྒྱལ་པོའི་གདོན་ལ་སོགས་པ། གདོན་རིགས་བརྒྱད་ཁྲི་བཞི་སྟོང་གི་གནོད་པ་ཐམས་ཅད་ཞི་ཞིང་བཟློག་པར་མཛད་དུ་གསོལ། ཆག་ཆེ་བ། ཉམ་ང་བ། རྨི་ལམ་ངན་པ། ལྟས་ངན་པ་བཀྲ་མི་ཤིས་པ་ཐམས་ཅད་ཞི་ཞིང་བཟློག་པའི་ཕྲིན་ལས་མཛོད་ཅིག །གྲོགས་གྱིས། མཐུན་རྐྱེན་
སྒྲུབས། སྔོན་ནས་སུས། ཕྱི་ནས་སྐྱོལ། བསམ་པ་ཐམས་ཅད་སྒྲུབས་ཤིག །གཞན་ཡང་དངོས་གྲུབ་ཏུ་གསོལ་བ་ནི། སྐུའི་ཞལ་མངོན་སུམ་དུ་མཐོང་བར་བསྟན་དུ་གསོལ། གསུང་གི་སྒྲ་ཐོས་པར་མཛད་དུ་གསོལ། ཐུགས་མཉམ་པ་ཉིད་མི་རྟོག་པའི་ཡེ་ཤེས་འཆར་ཞིང་། ལུས་དང་གྲིབ་མའི་ཚུལ་དུ་འགྲོགས་པར་མཛད་དུ་གསོལ། ཕྲིན་ལས་ཀྱི་སྒོ་ནས་དགྲ་བགེགས་གདུག་པ་ཅན་ཐམས་ཅད་ཚར་གཅོད་པར་མཛད་དུ་གསོལ། བདག་གིས་བྱིན་པའི་ཟས་ཟོ། ཕུལ་བའི་ཕུད་འཐུང་། མངག་པའི་ལས་གྱིས། རྦད་པའི་འདྲེ་སོད། བསྒྲུབ་པའི་རྟགས་ཐོན། བཅོལ་བའི་ཕྲིན་ལས་མཛོད། སངས་རྒྱས་ཀྱི་བསྟན་པ་གཉན་པོ་སྲུངས། བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་དང་ཕྲིན་ལས་ལ་བར་དུ་གཅོད་པ་ཐམས་ཅད་ཉེ་བར་ཞི་བར་མཛད་དུ་གསོལ། དཔལ་ལྡན་ལྷ་མོ་འཁོར་དང་བཅས་པ་ཐམས་ཅད་ཀྱིས་སྔོན་དཔལ་ཧེ་རུ་ཀའི་སྤྱན་སྔར་ཁས་བླངས་དམ་བཅས་པ་བཞིན་དུ་སངས་རྒྱས་ཀྱི་བསྟན་པ་ལ་གནོད་ཅིང་། ཟབ་མོའི་ཆོས་ལ་འཚེ་བ། དགེ་འདུན་གྱི་དཀོར་ལ་རློམ་ཞིང་། བདག་ཅག་སྒྲུབ་པ་པོ་ལ་བར་
དུ་གཅོད་པར་བྱེད་པའི་དགྲ་བོ་འདི་བཞེས་ལ་མཚོན་ཆ་སྣ་ཚོགས་ཀྱི་ཆར་ཕོབ་ཅིག །བཞི་བརྒྱ་རྩ་བཞིའི་ནད་ཁོང་ནས་སློངས་ཤིག །སྔོན་རྒྱུག་བདུད་དང་སྤྱོད་ཅིག །དཔྲལ་བའི་མིག་ཕུད་ཅིག །ཁོག་པའི་སྙིང་ཕྱུང་ཞིག །ལོ་ཟླ་དུས་ལས་མ་འདའ་བར་མྱུར་དུ་སྒྲོལ་ཅིག །གནོད་པར་བྱེད་པའི་བགེགས་དང་ལོག་པར་འདྲེན་པ་ཐམས་ཅད་དྲག་པོའི་ལས་ཀྱིས་ཐལ་བ་རྡུལ་དུ་རློགས་ཤིག །ཁྱད་པར་བདག་ལ་སྡང་བའི་དགྲ་བོ་འཁོར་དང་བཅས་པ་མྱུར་དུ་སྒྲོལ་བའི་ཕྲིན་ལས་མཛོད་ཅིག །དེ་ལྟར་དཔལ་ལྡན་ལྷ་མོ་འཁོར་དང་བཅས་པ་ཁྱེད་རྣམས་ལ་མཆོད་པ་དང་བསྟོད་པ་བྱས་པའི་སྒོ་ནས་དེ་ཁོ་ན་བཞིན་དུ་འགྲུབ་པར་མཛོད་ཅིག །ཅེས་གསོལ་བ་བཏབ་པས་དེ་ལྟར་བགྱིའོ། །ཞེས་འཁོར་དང་བཅས་པས་ཁས་བླངས་པར་བསམ། དེ་ནས་བསྐང་བ་ནི་ལོགས་སུ་མི་དགོས་གཏོར་མདོས་ཉིད་ལ་བསྐང་འབྲས་བཙུགས་ཡོད་པས་དེ་གསོ་བྲན་བྱས་ལ། ཨོཾ་སཾ་ཤོ་དྷ་ནི་ཧཱུཾ་ཕཊ། སྭ་བྷ་ཝས་སྦྱངས། ཨོཾ་ཨཱཿཧཱུྃ་ཧ་ཧོ་ཧྲཱིཿ བསྐང་རྗེས་ཀྱི་ཁ་དོག་དྲི་རོ་ངན་པ་ཐམས་ཅད་བསལ་ཏེ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། མཁའ་ལྡིང་ཤེལ་སྒོང་རྩ་ར་ཤ་ཁྲག་དང་། །ཚིལ་ཆེན་གསུར་དང་སྣང་
གསལ་རྐང་དུང་དང་། །བོང་བུ་རེ་ལྡེ་གླང་ཆེན་བྱ་ནག་སྙིང་། །ཚོགས་དང་གཏོར་མས་མཁའ་འགྲོའི་ཐུགས་དམ་བསྐང་། །ལྷ་མོ་དུད་སོལ་སྐུ་མདོག་ཆར་སྤྲིན་མདོག །ཐོད་ཁྲག་རལ་གྲི་མདུང་དང་ཏྲི་ཤུ་ལ། །བསྟན་པའི་བར་ཆད་བསྒྲལ་ཕྱིར་ཕྱག་ན་བསྣམས། །བསྟན་སྲུང་ཞལ་བཞེས་ལྷ་མོའི་ཐུགས་དམ་བསྐང་། །ལན་བུ་གཡོན་འཁྱིལ་ཐོད་སྤྲུལ་དར་ནག་བརྒྱན། །ཐོད་ཕྲེང་ཀོ་རློན་རེ་ལྡེ་སྦྲུལ་གྱིས་བརྒྱན། །ཀེང་རུས་ལུས་ཅན་ཁྲག་དང་ཞག་གིས་བརྒྱན། །དུར་ཁྲོད་བརྒྱན་ལྡན་ལྷ་མོའི་ཐུགས་དམ་བསྐང་། །མི་རོ་ཁར་བཅུག་མཆེ་གཙིགས་སྤྱན་རྩ་དམར། །ཞབས་ནི་ལྕགས་སྒྲོག་གིས་བརྒྱན་བོང་བུ་བཅིབས། །སྐད་ནི་དུང་དང་འབྲུག་གི་སྒྲ་ལྟར་སྒྲོག་།དམ་ཅན་སྐྱོང་མཛད་ལྷ་མོའི་ཐུགས་དམ་བསྐང་། །རྟག་གཏོར་རྒྱུན་གཏོར་བདུད་རྩི་མདའ་དར་དང་། །བྱ་ནག་སྙིང་དང་གསུར་ཆེན་རཀྟ་དང་། །ཞུ་ཆེན་མར་མེ་བོང་བུ་གཟུངས་སྔགས་དང་། །མི་རྐང་གླིང་བུ་ཤ་ཁྲག་གཏོར་མ་ཡི། །ལྷ་མོ་འཁོར་དང་བཅས་པའི་ཐུགས་དམ་བསྐང་། །བདུད་མོ་བཞི་དང་ཕྲ་མེན་སྒོ་མ་བཞི། །དུར་ཁྲོད་བདག་མོ་མ་མོ་མཁའ་
འགྲོ་བརྒྱད། །མཐུན་རྫས་ཚོགས་དང་གཏོར་མས་ཐུགས་དམ་བསྐང་། །ཐུགས་དམ་མ་གཡེལ་བུ་བཞིན་བརྩེར་དགོངས་ལ། །བསྟན་པ་སྲུངས་ལ་བར་ཆད་རྐྱེན་ངན་ཟློག ། དམ་ཚིག་ཉམས་ཆག་འགལ་འཁྲུལ་ཅི་མཆིས་པ། །མཐོལ་བཤགས་བཟོད་གསོལ་ཚངས་པའི་དངོས་གྲུབ་སྩོལ། །དུད་སོལ་ལྷ་མོའི་བསྐང་བ་ཀརྨ་པཀཱིས་མཛད་པའོ། །སྐབས་འདིར་རྒྱས་པར་སྤྲོ་ན་མ་མོའི་འཁྲུགས་བསྐང་ལྷ་མོའི་མདངས་བསྐོང་སོགས་བྱའོ། །ལྷ་མོའི་ཁྲག་བཟློག་འདི་ནི་ངེས་པར་སྦྱར་རོ། བྷྱོཿ དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱིས། །བསྟན་པ་སྲུང་བར་མངའ་གསོལ་བའི། །ཆོས་སྐྱོང་སྲུང་མ་དུད་སོལ་མ། །ཁྱོད་ཀྱི་ཐུགས་དམ་གཉན་པོ་ནི། །རིག་འཛིན་རྣལ་འབྱོར་བདག་གིས་བསྐང་། །དམ་ཅན་སྲུང་མ་འདིར་བྱོན་ཟཅིག །རྣལ་འབྱོར་དགྲ་བླ་འདིར་བྱོན་ཅིག །འབོད་པའི་དམ་རྫས་ཡིན་པའི་ཕྱིར། །གཡབ་དར་ནག་པོ་ཐུགས་དམ་བསྐང་། །བསྒྲུབ་པའི་དམ་རྫས་ཡིན་པའི་ཕྱིར། །རྟག་གཏོར་ཆེན་པོའི་ཐུགས་དམ་བསྐང་། །མ་དང་མི་འབྲལ་འགྲོག་པའི་ཕྱིར། །རྒྱུན་གཏོར་ནར་མས་ཐུགས་དམ་བསྐང་། །དམ་ཚིག་གཉན་པོ་བསྲེ་བའི་ཕྱིར། །བདུད་རྩི་སྨན་
གྱི་ཐུགས་དམ་བསྐང་། །རྟེན་པའི་དམ་རྫས་ཡིན་པའི་ཕྱིར། །དགྲ་བགེགས་ཤ་དང་ནལ་བུའི་ཤ། །ཚྭ་སའི་བྱེ་བྲག་དཔག་མེད་ཀྱིས། །བསྐང་ངོ་ཁྱེད་ཀྱི་ཐུགས་དམ་བསྐང་། །དགྱེས་པའི་དམ་རྫས་ཡིན་པའི་ཕྱིར། །ར་ནག་ཁྲག་དང་བྱ་ནག་ཁྲག །དགྲ་བགེགས་ཤ་ཁྲག་ལ་སོགས་པའི། །རཀྟའི་རྒྱ་མཚོའི་ཐུགས་དམ་བསྐང་། །དགྲ་བགེགས་གསུར་ལ་སྣོམ་པའི་ཕྱིར། །ཚིལ་ཆེན་དུད་པས་ཐུགས་དམ་བསྐང་། །ཆུ་དང་ཐང་སྐྱེས་མེ་ཏོག་དང་། །ཙནྡན་ཨ་ག་རུ་ཡི་སྤོས། །དྲི་བཟང་སྦྱར་བའི་ཡོན་ཆབ་ཀྱིས། །བསྐང་ངོ་ཁྱེད་ཀྱི་ཐུགས་དམ་བསྐང་། །གྲོ་ནས་འབྲས་ཀྱི་བཤོས་གཙང་དང་། །འབྲུ་རྩི་ཞུན་ཆེན་སྣང་གསལ་གྱི། །ཕྱི་ཡི་མཆོད་པ་རྣམ་ལྔ་ཡིས། །བསྐང་ངོ་ཁྱེད་ཀྱི་ཐུགས་དམ་བསྐང་། །གཟུགས་སྡུག་སྒྲ་སྙན་དྲི་ཞིམ་པ། །རོ་མངར་རེག་བྱ་འཇམ་པ་ཡིས། །འདོད་པའི་ཡོན་ཏན་རྣམ་ལྔ་ཡིས། །བསྐང་ངོ་ཁྱེད་ཀྱི་ཐུགས་དམ་བསྐང་། །མི་རྟ་གླང་སོགས་ཤ་ལྔ་དང་། །བྱང་སེམས་རཀྟ་གཞུངས་པ་དང་། །བདུད་རྩི་ལྔ་ལ་སོགས་པ་ཡི། །གསང་བའི་མཆོད་པས་ཐུགས་དམ་བསྐང་། བཟའ་
བའི་དམ་ཚིག་གསོ་བའི་ཕྱིར། །བཤོས་གཙང་དམར་གྱིས་བརྒྱན་པ་དང་། །ཤ་ཆང་ཁུར་བ་སྒོག་ཙོང་སོགས། །ཚོགས་ཀྱི་མཆོད་པས་ཐུགས་དམ་བསྐང་། །ཕྱི་ཡི་རྟེན་རྫས་ཡིན་པའི་ཕྱིར། །བོང་བུ་གྲྭ་དམར་ལུག་ནག་དང་། །དར་ནག་བ་དན་མདའ་དར་གྱིས། །བསྐང་ངོ་ཁྱེད་ཀྱི་ཐུགས་དམ་བསྐང་། །ནང་གི་རྟེན་རྫས་ཡིན་པའི་ཕྱིར། །རྨ་བྱ་ནོར་བུ་རྒྱལ་མཚན་དང་། །ནལ་བུའི་རྒྱལ་མཚན་བྷནྡྷ་ཡིས། །བསྐང་ངོ་ཁྱེད་ཀྱི་ཐུགས་དམ་བསྐང་། །གསང་བའི་རྟེན་རྫས་ཡིན་པའི་ཕྱིར། །ཨ་མྲྀ་ཏ་དང་མྱོས་བྱེད་བཅུད། །གྲི་སྙིང་དགྲ་བགེགས་ནལ་བུའི་སྙིང་། །ཙིཏྟ་སྙིང་གི་ཐུགས་དམ་བསྐང་། །སྐུ་ཡི་རྟེན་རྫས་ཡིན་པའི་ཕྱིར། །བླུག་སྐུ་བཏག་སྐུ་བྲིས་སྐུ་དང་། །དར་སྐུ་སྐུ་འབག་ལ་སོགས་ཀྱི། །བསྐང་ངོ་ཁྱེད་ཀྱི་ཐུགས་དམ་བསྐང་། །གསུང་གི་རྟེན་རྫས་ཡིན་པའི་ཕྱིར། །རྔ་དང་ཟོམ་རྔ་རྔ་ཆེན་དང་། །མཁར་རྔ་དུང་དང་ཆ་ལང་དང་། །གདུང་བའི་དབྱངས་ཀྱིས་ཐུགས་དམ་བསྐང་། །དམ་ཚིག་གཉན་པོ་བསྐང་བའི་ཕྱིར། །དམ་ཚིག་དྲིལ་བུས་ཐུགས་དམ་བསྐང་། །ཕྲིན་ལས་གཉན་པོ་བསྐུལ་བའི་ཕྱིར། །ཅང་ཏེའུ་སྒྲ་ཡིས་
ཐུགས་དམ་བསྐང་། །འཇིག་རྟེན་དབང་དུ་སྡུད་པའི་ཕྱིར། །གསང་བ་རྗེལ་ཆུང་ཐུགས་དམ་བསྐང་། །ཐུགས་དམ་གནད་ནས་བསྐུལ་བའི་ཕྱིར། །ཕྱག་རྒྱ་ལྔ་དང་ཏིང་འཛིན་དང་། །སྙིང་པོ་འཛབ་ཀྱིས་བཟླས་པ་ཡིས། །བསྐང་ངོ་ཁྱེད་ཀྱི་ཐུགས་དམ་བསྐང་། །བྷྱོ༔ གཞན་ཡང་ཐུགས་དམ་བསྐང་བ་ནི། །ཤ་ཁྲག་དམར་གྱི་གཏོར་མ་ཡིས། །འགུགས་བྱེད་མ་དང་གསོད་བྱེད་མ། །ལས་མཁན་རྣམས་ཀྱི་ཐུགས་དམ་བསྐང་། །ཕྲིན་ལས་རྣམ་བཞི་འགྲུབ་བྱེད་པའི། །མཁའ་འགྲོ་བཞི་ཡི་ཐུགས་དམ་བསྐང་། །དགྲ་བགེགས་མ་ལུས་སྒྲོལ་བྱེད་པའི། །གདོང་ཅན་རྣམས་ཀྱི་ཐུགས་དམ་བསྐང་། །ཉམས་པའི་ཤ་ཁྲག་ཟ་བྱེད་པའི། །སྒོ་མ་བཞི་ཡི་ཐུགས་དམ་བསྐང་། །དྲག་པོའི་ལས་ལ་དགྱེས་པའི་ཕྱིར། །ནག་མོ་འབུམ་གྱི་ཐུགས་དམ་བསྐང་། །གཞན་ཡང་སྤྲུལ་པའི་ཕོ་ཉ་ནི། །དཀར་མོ་སེར་མོ་དམར་མོ་དང་། །ལྗང་ནག་ལ་སོགས་འབུམ་སྡེའི་ཚོགས། །བསྐང་ངོ་ཁྱེད་ཀྱི་ཐུགས་དམ་བསྐང་། །བདུད་ཀྱི་དམག་དཔུང་བཟློག་པའི་ཕྱིར། །ཡང་སྤྲུལ་བྱེ་བའི་ཐུགས་དམ་བསྐང་། །མཉེས་པའི་རྟེན་དང་མ་ཉམས་
ཕུད། །ཚོགས་དང་གཏོར་མ་རྒྱ་ཆེན་འདིས། །འདོད་ཁམས་མ་མོ་ཀུན་གྱི་གཙོ། །འཁོར་བཅས་ཐུགས་དམ་བསྐང་གྱུར་ཅིག །དེ་ལྟར་ལྷ་མོ་འཁོར་བཅས་ཀྱི། །ཐུགས་དམ་བསྐང་བའི་བྱིན་རླབས་ཀྱིས། །རིག་འཛིན་རྣལ་འབྱོར་བདག་ཅག་གིས། །མཁའ་འགྲོའི་ཉམས་ཆག་བྱུང་བ་བསྐང་། །འཇིག་རྟེན་མཁའ་འགྲོའི་གནོད་པ་ཟློག །མ་མོའི་དལ་ཡམས་བྱུང་བ་ཟློག །གཤིན་རྗེའི་ཁྲམ་ལ་བཏབ་པ་ཟློག །བདུད་ཀྱི་ཞགས་པ་ནག་པོ་ཆོད། །བནྡྷེའི་བྱད་ཁ་སླར་ལ་སྒྱུར། །སྡེ་བརྒྱད་གནོད་པ་ཐམས་ཅད་ཟློག །གཞན་གྱི་རྦད་འདྲེ་ཕུར་ཁ་སྒྱུར། །རྨིས་ལྟས་མཚན་མ་ངན་པ་སྒྱུར། །ལོ་སྐག་ཟླ་སྐག་ཐམས་ཅད་སྒྱུར། །སྡང་བའི་དགྲ་དང་གནོད་པའི་བགེགས། །བདུད་དང་བར་དུ་གཅོད་པའི་ཚོགས། །ཐམས་ཅད་ཐལ་བ་རྡུལ་དུ་རློགས། །བདག་ཅག་རྣལ་འབྱོར་འཁོར་བཅས་ཀྱི། །དམ་ཚིག་ཉམས་པ་བསྐང་གྱུར་ཅིག །མཆོག་དང་ཐུན་མོང་ལ་སོགས་པའི། །དངོས་གྲུབ་མ་ལུས་བསྩལ་དུ་གསོལ། །ཚེ་དང་དབང་ཕྱུག་སྤེལ་དུ་གསོལ། །དཔལ་དང་གྲགས་པ་བསྒྲུབ་ཏུ་གསོལ། །འཁོར་དང་བསྟན་པ་བསྲུང་དུ་གསོལ། །ལེགས་དང་
སྤྱོད་ལ་ཉེས་དང་བསྣོལ། །མཐུ་སྟོབས་བསྐྱེད་ལ་དཔུང་གཉེན་མཛོད། །ལུས་དང་གྲིབ་མ་བཞིན་དུ་འགྲོགས། །ཉིན་དང་མཚན་དུ་བྱ་ར་མཛོད། །བསམ་པ་སྒྲུབ་ལ་རེ་བ་སྐོངས། །གཞན་ཡང་ཡིད་ལ་གང་འདོད་པ། །དེ་ནི་ཁྱེད་ཀྱིས་འགྲུབ་པར་མཛོད། །དེ་ནས་བཤགས་པ་བྱ་བ་ནི། ཧཱུཾ་བྷྱོ༔ འགྲོ་བའི་དོན་དུ་སྐུ་མཆོག་འཇིགས་པ་ཆ་ལ། །མ་ལུས་ཁྱབ་དང་རྒྱུ་ནི་གསལ་མཛད་པའི། །ང་རྒྱལ་དྲེགས་པ་ཅན་རྣམས་འཇོམས་མཛད་མ། །ཡོན་ཏན་རྫོགས་པའི་སྐུ་ལ་ཕྱག་འཚལ་བསྟོད། །འདའ་ཀ་རྡོ་རྗེ་དམ་ཚིག་གཏན་གྱི་གཉེར། །སྲུང་མར་དམ་བཅས་སྐུ་ཡི་དམ་ཚིག་ལ། །སྐུ་ཡི་སྤྱོད་པ་ཚུལ་བཞིན་མ་རྟོགས་ཏེ། །ཁམས་གསུམ་ཁྱབ་པའི་སྐུ་ལ་བཟོད་པར་གསོལ། །རྣལ་འབྱོར་གདུང་འཚོབ་བདག་ཅག་འདིར་འདུས་རྣམས། །སྤྱི་དང་ཁྱད་པར་དམ་ཚིག་མི་གཏོང་ཡང་། །ཀློང་དུ་མ་གྱུར་གོམས་ཤེས་རྩལ་ཆུང་བས། །མ་གཅིག་ལྷ་མོའི་སྐུ་ལ་བཟོད་པར་གསོལ་།ཐུགས་རྗེས་ངེས་པར་གཟིགས་པའི་ལྷ་མོ་ལ། །དམ་རྫས་གཙང་མའི་མཆོད་པ་བཤམ་པ་སྟེ། །འཕངས་སེམས་དབང་གིས་མཆོད་པ་རྒྱུན་ཆུང་བ། །རྫོང་མོ་བཀའ་
བཟློག་སྐུ་ལ་བཟོད་པར་གསོལ། །མ་གཅིག་སྐུ་མདོག་ཕྱག་མཚན་ཕྱག་རྒྱ་ལ། །དོན་དང་མཐུན་པར་ཚུལ་བཞིན་མ་བྲིས་ཏེ། །འཕགས་པའི་ཐུགས་རྗེ་གཡེལ་བར་གྱུར་པ་རྣམས་། །བདུད་ལས་རྒྱལ་བའི་སྐུ་ལ་བཟོད་པར་གསོལ། །བུ་ཡི་ཚུལ་གྱིས་བསྲུང་རྒྱུའི་དམ་ཚིག་ལ། །ལེ་ལོ་གཉིད་དབང་གཡེང་བའི་གཏམ་ལ་སོགས། །ཐུགས་དང་འགལ་བར་གྱུར་པ་ཅི་མཆིས་པ། །ཐུགས་རྗེ་ཆེན་པོའི་ཚངས་པར་བསྩལ་དུ་གསོལ། བྷྱོཿ ཐོད་པ་དགུ་བརྩེགས་སྲིད་པའི་གཞལ་ཡས་ནས། །དཔལ་ལྡན་ལྷ་མོ་གསན་ཅིང་དགོངས་སུ་གསོལ། །རང་ལ་རིག་པ་ཡེ་ཤེས་རྒྱུ་ལྡན་ཡང་། །།འཕྲལ་བྱུང་གཡུལ་བཟློག་ཤིན་ཏུ་དབང་ཆེ་ཡང་། །ལོག་རྟོག་མཚན་མ་གཉིས་ཀྱི་དབང་གྱུར་ནས། །ཏིང་འཛིན་ཡི་དམ་རྩེ་གཅིག་མ་གསལ་ཞིང་། །དཔལ་ལྡན་ལྷ་མོའི་སྐུ་ལ་འདས་གྱུར་པ། །བཟོད་པར་གསོལ་ལོ་ཚངས་པའི་དངོས་གྲུབ་སྩོལ། །འབད་པ་རྩལ་ཆུང་བཟླས་བརྗོད་བསྙེན་པ་ཆག །མན་ངག་གཞུང་དང་འགལ་བ་བཟོད་པར་གསོལ། །འཆད་པ་མང་བས་གསང་བའི་ཚིག་མ་ཐུབ། །ཟབ་མོའི་དོན་ལ་འགལ་བ་བཟོད་པར་གསོལ། །ཐལ་མོ་
རྔ་གླིང་དུས་སུ་མ་ཚོགས་ཏེ། །བརྡ་ཡི་མཆོད་པ་ཆག་པ་བཟོད་པར་གསོལ། །བདུད་ཡུམ་ཡེ་ནས་མནག་པའི་ཚུལ་སྟོན་ཡང་། །བློ་གསལ་དོན་མ་རྟོགས་པ་བཟོད་པར་གསོལ། །འབྱོར་པ་ཡེ་ནས་ལྷ་མོའི་ཆོས་སྤྱད་ཡང་། །འབྱོར་པའི་མཆོད་པ་ཆག་པ་བཟོད་པར་གསོལ། །བོང་བུ་ཡེ་ནས་ལྷ་མོའི་ཆིབས་ཡིན་པས། །མ་བསྟེན་བརྡེག་པར་གྱུར་པ་བཟོད་པར་གསོལ། །གཤིན་རྗེ་ཡེ་ནས་ལྷ་མོའི་ཁྱོ་ཡིན་པས། །ངན་སེམས་གཤེ་སེམས་སྐྱེས་པ་བཟོད་པར་གསོལ། །རླུང་ནག་ཡེ་ནས་ལྷ་མོའི་སྤྲུལ་ཡིན་ཡང་། །ངན་པའི་སེམས་ཀྱིས་སྨད་པ་བཟོད་པར་གསོལ། །ལེ་ལོའི་སྙོམས་ལས་གྱུར་པ་བཟོད་པར་གསོལ། །མཆོད་པ་ལོ་ཟླར་འདས་པ་བཟོད་པར་གསོལ། །ཞག་དང་ཞག་དུས་ཆག་པ་བཟོད་པར་གསོལ། །ཉ་སྟོང་དུས་དྲུག་ཆག་པ་བཟོད་པར་གསོལ། །སྔོན་ནས་རང་གི་བག་ཆགས་མ་བཟང་པོས། །དམ་རྫ་ས་བརྟུལ་ཞུགས་ཆུང་བ་བཟོད་པར་གསོལ། །སྔོན་ལས་སེར་སྣའི་དབང་དུ་གྱུར་ལགས་ན། །ཚོགས་ལ་གཡོ་སྒྱུ་ཞུགས་པ་བཟོད་པར་གསོལ། །སྔོན་ནས་ཤིན་ཏུ་གསང་དབང་མ་ཐོབ་པས། །འདོད་
ཆགས་ཆོས་ལ་སྤྱོད་པ་བཟོད་པར་གསོལ། །བརྟུལ་ཞུགས་ལྟ་བ་ཟབ་མོ་མ་རྟོགས་པས། །རྣམ་སྨིན་མཐོང་ནས་མ་བསྒྲལ་བཟོད་པར་གསོལ། །ཏིང་འཛིན་ལྟ་བ་ཀློང་དུ་མ་གྱུར་ནས། །ཕུད་དང་ལྷག་མ་མ་ཕྱིར་བཟོད་པར་གསོལ། །ཞེ་སྡང་དབང་ལས་ང་རྒྱལ་འདྲེས་གྱུར་པས། །རྡོ་རྗེ་ནང་དམེ་བྱས་པ་བཟོད་པར་གསོལ། །ང་རྒྱལ་དབང་ལས་ཕྲག་དོག་འདྲེས་གྱུར་པས། །སློབ་དཔོན་སྐུ་ལ་བསྡོས་པ་བཟོད་པར་གསོལ། །སྔོན་ནས་རང་སེམས་ལྟ་བ་སྤང་སྔས་པས། །རྣལ་འབྱོར་ཉེ་ཕྱོགས་བྱས་པ་བཟོད་པར་གསོལ། །ལྟ་སྤྱོད་ཟབ་མོའི་མན་ངག་མ་རྟོགས་པས། །བློ་ཡི་ཁུ་འཁྲིག་བྱས་པ་བཟོད་པར་གསོལ། །ལྟ་བ་དྲོད་ཀྱི་མན་ངག་མ་རྟོགས་པས། །ཉམས་ཀྱི་དྲོད་མ་སྐྱེས་པ་བཟོད་པར་གསོལ། །ཨོཾ་ཡེ་ཤེས་ལྷ་དང་ལྷ་མོ་མི་ཕམ་བདག །དང་པོ་སྒྲུབ་དང་བསྒྲུབ་ཏུ་བྱས་ནས་ནི། །མཐུན་པའི་དམ་རྫས་གཞུང་བཞིན་མ་འཚོགས་པས། །དཔལ་ལྡན་ལྷ་མོའི་ཐུགས་དང་འགལ་གྱུར་ཏེ། །བཀའ་ཡི་ཆད་པའི་གནས་སུ་གྱུར་ནས་སུ། །དམ་ཉམས་ཁྲིམས་རལ་ཞིག་ཏུ་གྱུར་ལགས་ན། །ཡེ་ཤེས་ཐུགས་རྗེ་ཅན་ལ་བཟོད་པར་
གསོལ། །ཐུགས་དང་འགལ་བར་གྱུར་པ་བཟོད་པར་གསོལ། །དམ་ཚིག་ཉམས་པར་གྱུར་པ་བསྐང་གྱུར་ཅིག །ཅེས་ཡིག་བརྒྱ་བཟླས་སོ། །དེ་ནས་མདུན་དུ་བྲུབ་ཁུང་ངམ་ལྕགས་སྡེར་རམ་ཐོད་པའི་ནང་དུ་ལིངྒ་ཆེ་བ་གཅིག་གམ། ཡང་ན་བརྒྱ་རྩ་བརྒྱད་བཤམས་ལ། རང་ཡང་ལྷ་མོར་བསྒོམ། བདག་མདུན་གཉིས་ཀའི་ཆིབས་པ་བོང་བུ་ཡང་སྟག་ཞིག་ཏུ་གྱུར་ནས་དགྲ་བགེགས་ཀྱི་ཤ་ཁྲག་ལ་རྔམ་པར་བསྒོམ། ཆང་ཕུད་གཏོར་ཞིང་འདི་སྐད་དོ། ། བྷྱོཿ བླ་མ་དཀོན་མཆོག་གཟུ་དང་དཔང་། །ཡི་དམ་ལྷ་ཚོགས་གཟུ་དང་དཔང་། །དཔའ་བོ་མཁའ་འགྲོ་གཟུ་དང་དཔང་། །ཆོས་སྐྱོང་སྲུང་མ་གཟུ་དང་དཔང་། །དཔལ་ལྡན་ལྷ་མོ་གཟུ་དང་དཔང་། །ཕྱོགས་སྐྱོང་དཔལ་མགོན་གཟུ་དང་དཔང་། །སྟོང་གསུམ་གཞི་བདག་གཟུ་དང་དཔང་། །གནས་པོ་དགེ་བསྙེན་གཟུ་དང་དཔང་། །ཁྱེད་རྣམས་གཟུ་དང་དཔང་མཛོད་ཅིག །རྣལ་འབྱོར་བདག་གི་སྡོང་གྲོགས་མཛོད། །ཉེས་པ་བསྒྲག་པ་ནི། བསྟན་དགྲ་དམ་ཉམས་སྡིག་ཅན་འདིས། །དུས་གསུམ་སངས་རྒྱས་བསྟན་པ་བཤིག་།དཀོན་མཆོག་གསུམ་གྱི་དབུ་འཕང་སྨད། །རྡོ་རྗེ་སློབ་དཔོན་སྐུ་ལ་བསྡོས། །མི་དགེ་བཅུ་པོ་དང་དུ་བླངས། །དགེ་བ་བཅུ་པོ་ཁྱད་དུ་
བསད། །རྣལ་འབྱོར་བདག་ལ་ལྷ་མེད་ཟེར། །ཆོས་སྐྱོང་ཁྱོད་ལ་མཐུ་མེད་ཟེར། །མཐུ་ནི་བུ་ལོན་བཞིན་དུ་བསྙག །སྲོག་ནི་འབེན་ངོ་བཞིན་དུ་བཙུགས། །འདི་ནི་བསྒྲལ་བའི་ཞིང་ཡིན་པས། །མྱུར་དུ་བསྒྲོལ་བའི་ཕྲིན་ལས་མཛོད། །དུས་ལ་བབ་བོ་ས་མཱ་ཡ། །བྲུབ་ཁུང་བསྐྱེད་པ་ནི། སྐད་ཅིག་གིས་བྲུབ་ཁུང་ལྕགས་ཀྱི་ཁང་པ་གྲུ་གསུམ་པ། བདུད་ཀྱི་བཙོན་ར། གཤིན་རྗེའི་བཤས་ཁང་། ནད་དུག་མཚོན་གསུམ་གྱིས་ཆར་མུན་འཁྲིགས་པའི་ནང་དུ། ཧྲི་དང་ཁྲི་ལས་དགྲ་བགེགས་སྐེམ་པ་རིད་པ་སྔོ་བ་ཧཾ་པ་མྱ་ངན་གྱི་ཕྱག་རྒྱ་ཅན། བུ་ག་དགུ་ནས་ཁྲག་འཛག་པ་མགོན་སྐྱབས་ཀྱི་ལྷ་དང་བྲལ་བ་ཞིག་ཏུ་གྱུར། ན་མོ་རྒྱལ་བ་རྡོ་རྗེ་འཆང་། བིར་ཝ་པ། ནག་པོ་སྤྱོད་པ། ཏེ་ལོ་པ། ནཱ་རོ་མར་པ་ཇོག་པ་ལ་སོགས་པ། དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། ཀྱེ་རྡོ་རྗེ་རྡོ་རྗེ་གདན་བཞི་གསང་བའི་བདག་པོ། དཔལ་རྟ་མགྲིན་ལ་སོགས་པའི་ཡི་དམ་ལྷ་ཚོགས་རྣམས་ཀྱི་བཀའ་བདེན་པ་དང་། འོད་སྲུང་ཤཱཀྱ་ཐུབ་པ་བྱམས་པ་ལ་སོགས་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བདེན་པ་དང་། ལུང་དང་རྟོགས་པའི་དམ་
པའི་ཆོས་རྣམས་ཀྱི་བདེན་པ་དང་། འཕགས་པ་ཕྱིར་མི་ལྡོག་པའི་དགེ་འདུན་རྣམས་ཀྱི་བདེན་པ་དང་། ཁྲག་འཐུང་གི་རྒྱལ་མོ་དུད་པའི་སོལ་བ་མ་འཁོར་དང་བཅས་པའི་བདེན་པའི་མཐུས། སྤྱིར་སངས་རྒྱས་བསྟན་པའི་སྤྱི་དགྲ། བླ་མ་དམ་པའི་སྐུ་དགྲ། ཁྱད་པར་དུ་ཡང་རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ། སྡང་བར་བྱེད་པའི་དགྲ། གནོད་པར་བྱེད་པའི་བགེགས། བསམ་ངན་འཆང་བའི་བྱད་མ། །ཡིད་ལ་དམིགས་པའི་ཡུལ་འདི་ཉིད་ཀྱི་བླ་སྲོག་རྣམ་པར་ཤེས་པ་རང་དབང་མེད་པར་གཟུགས་ལིང་ག་མིང་བྱང་བུ་འདི་ལ་ད་ལྟ་ཉིད་དུ་ཁུག་ཅིག །ཛཧཱུཾ་བཾ་ཧོ་ཞེས་ལན་གསུམ་བྱ། བདག་མདུན་གྱི་ཐུགས་ཀའི་ས་བོན་གྱི་འོད་ཟེར་ལས་བྱུང་བའི་སྤྲུལ་པ་ཡང་སྤྲུལ་གྱི་ཚོགས་དཔག་ཏུ་མེད་པ་སྤྲུལ་ནས། སྟེང་འོག་ཕྱོགས་མཚམས་ཐམས་ཅད་ཀྱི་དགྲ་བགེགས་ཐམས་ཅད་བཀུག་ནས་ལིངྒ་ལ་ཐིམ་པར་བསམ་ཞིང་། ཧཱུྃ། མཁའ་ལ་དབང་བསྒྱུར་ཡིད་བཞིན་སྤྲུལ་པའི་སྐུ། །དེ་ཡི་སྤྲུལ་པ་ཡང་སྤྲུལ་ཕོ་ཉ་ནི། །ཤར་གྱི་ཕྱོགས་ནས་བསྐུལ་བ་ནི། །ཤེལ་གྱི་སེང་གེ་རལ་པ་ཅན། །ཤེལ་གྱི་ལུས་ལ་ཉི་མའི་མིག །སྤུ་ནི་ལྕགས་ཀྱུ་སྲབ་པ་འདྲ། །བང་ནི་
པ་ནི་གློག་བས་མགྱོགས། །སྐད་ནི་འབྲུག་བས་ཤིན་ཏུ་ཆེ། །དབུགས་ནི་རླུང་གིས་བསྐྱོད་དུ་མེད། །མཆེ་བ་གངས་རི་བལྟམས་པ་འདྲ། །མིག་ནི་ཉི་མའི་ཟེར་བས་རྣོ།། རྔམས་པའི་ཚད་ནི་གཤིན་རྗེ་འདྲ། །གཅིག་ལས་བྱེ་བ་འབུམ་དུ་སྤྲུལ། །འདི་ཡང་དཔལ་ལྡན་ཕོ་ཉ་སྟེ། །གང་ལ་བྱ་བའི་དགྲ་བོ་རྣམས། །རང་དབང་མེད་པར་ཁྱེར་ལ་ཤོག །ལྷོ་ཡི་ཕྱོགས་ནས་བསྐུལ་བ་ནི། །གསེར་གྱི་སྟག་མོ་མགོ་ལྔ་མ། །གསེར་གྱི་ལུས་ལ་ཉི་མའི་མིག །སྤུ་ནི་ལྕགས་ཀྱུ་སྲབ་པ་འདྲ། །མཇུག་མ་ཚ་ཚ་བཏབ་པ་འདྲ། །མཆེ་བ་ལྕགས་ཀྱུ་བཀུག་པ་འདྲ།། །སྐད་ནི་བར་སྣང་འབྲུག་བས་ཆེ། །བང་ནི་ངེས་པའི་གློག་བས་མགྱོགས། །མིག་ནི་ཉི་མའི་ཟེར་བས་རྣོ། རྔམས་པའི་ཚད་ནི་གཤིན་རྗེ་འདྲ། །གཅིག་ལས་བྱེ་བ་འབུམ་དུ་སྤྲུལ། །འདི་ཡང་དཔལ་ལྡན་ཕོ་ཉ་སྟེ། །གང་ལ་བྱ་བའི་དགྲ་བོ་རྣམས། །རང་དབང་མེད་པར་ཁྱེར་ལ་ཤོག །ནུབ་ཀྱི་ཕྱོགས་ནས་བསྐུལ་བ་ནི། །ཨུར་མོ་ལྕགས་འབྲུག་སྔོན་མོ་ནི། །ཡན་ལག་ཐམས་ཅད་སྦྲུལ་གྱིས་བརྒྱན། །ཀླུ་ཆེན་བརྒྱད་ཀྱི་གདན་ལ་བཞུགས། །ཟེ་བ་དམར་ལྗང་མེ་ལྟར་འབར། །སྤྱན་ནི་སྐར་
ཆེན་ཤར་བ་འདྲ། །མཆེ་བ་ཟླ་བ་ཤར་བ་འདྲ། །བཞད་པའི་ཞལ་ནས་ཐོག་སེར་གཏོང་། །རྔམས་པའི་ཚད་ནི་གཤིན་རྗེ་འདྲ། །གཅིག་ལས་བྱེ་བ་འབུམ་དུ་སྤྲུལ། །འདི་ཡང་དཔལ་ལྡན་ཕོ་ཉ་སྟེ། །གང་ལ་བྱ་བའི་དགྲ་བོ་རྣམས། །རང་དབང་མེད་པར་ཁྱེར་ལ་ཤོག །བྱང་གི་ཕྱོགས་ནས་བསྐུལ་བ་ནི། །ལྕགས་ཀྱི་ཁྱི་ནག་རྐང་གསུམ་སོགས། །སྐུ་ནི་ལྕགས་སྡོང་རིལ་བ་འདྲ། །སྤྱན་ནི་ཉི་མ་ཤར་བ་འདྲ། །སྤུ་ནི་ལྕགས་ཀྱུ་སྲབ་པ་འདྲ། །མཇུག་མ་ཚ་ཚ་བརྡབ་པ་འདྲ། །ཞལ་ནི་ཁྲོ་བོ་བཞད་པ་འདྲ་། །མཆེ་བ་གནམ་ལྕགས་གཙིགས་པ་འདྲ། །སྐད་ནི་བར་སྣང་འབྲུག་བས་ཆེ། །བང་ནི་གློག་བས་མྱུར་དུ་མགྱོགས། །རྔམས་པའི་ཚད་ནི་གཤིན་རྗེ་འདྲ། །གཅིག་ལས་བྱེ་བ་འབུམ་དུ་སྤྲུལ། །འདི་ཡང་དཔལ་ལྡན་ཕོ་ཉ་སྟེ། །གང་ལ་བྱ་བའི་དགྲ་བོ་རྣམས། །རང་དབང་མེད་པར་ཁྱེར་ལ་ཤོག །ༀ་ཧཱུྃ་ཤྲཱི་ཡ་དེ་ཝི་མ་མ་དུན་ཤག་ཏྲི་ཛ་མཱ་ར་ཡ་ནི་དྷཀི་རཀྵ་དུན་ཐུན་དགྲ་བོ་སྲོག་སྙིང་ལ་ཁུག་དྲག་ཐུན་བྷྱོ་ཛཿ ལྷ་དང་དབྱེ་བའི་ཕྱག་རྒྱས་བྱ་རོག་འུག་པའི་སྒྲོས་གཡབ། གུ་གུལ་བདུག་ཅིང་། བྷྱོ། ལས་ཀྱི་མཁའ་འགྲོ་ཕྲ་
མེན་མ། །རླུང་ལྷའི་བུ་ལ་སྲིན་པོའི་ཚ། །སྐུ་མདོག་དུད་ཀ་ཆེན་པོ་ལ། །འཇིགས་པའི་ཁྲོ་གཉེར་མང་པོའི་བརྒྱན། །ཕྱག་གཡས་བྱ་རོག་དང་རུ་བསྣམས། །དམ་ཉམས་སྤྱན་གྱིས་གཟིགས་པར་བྱེད། །གཡོན་པས་འུག་པའི་དང་རུ་བསྣམས། །ཉམས་པའི་མགོ་ལུས་ཕྲལ་བར་བྱེད། །ཁྱོད་ཀྱི་སྤྱི་བོའི་གཙུག་རུམ་ནས། །ཤེལ་གྱི་བྱ་ཁྱུང་གཡུ་མིག་ཅན། །དགྲ་བོའི་འགོ་བའི་ལྷ་ལྔ་ཕྲོལ། །ཁྱོད་ཀྱི་རྒྱབ་ཀྱི་སོག་པ་ནས། །སྟག་དང་སྤྱང་ཀུ་རྔམ་ཞིང་རྒྱུག །དགྲ་བོ་བླ་དང་ཕྲལ་བར་བྱེད། །ཁྱོད་ཀྱི་མདུན་གྱི་ལྷ་སྣ་ནས། །སེང་གེ་དཀར་མོ་འགྱིང་ཞིང་འཕྱོ། །དམ་ཉམས་སྲོག་གི་ལྷ་དང་ཕྲོལ། །ཁྱོད་ཀྱིས་མི་འབྱེད་གང་ཡང་མེད། །དམ་ཉམས་དགྲ་བགེགས་ལྷ་དང་ཕྱེས། །གནོད་པར་བྱེདཔའི་བདུད་དང་སྤྱོད། །ཨ་བེ་ཤ་ཡ། ཨ་བེ་ཤ་ཡ། ཧ་ས་ར་ན། ཧ་ད་ན་ཧཱུྃ་ཕཊ༔ ཏྲི་ཛ་མ་ཧེ་ག་ཡ་ཛ་ཞེས་ལྷ་དང་དབྱེ། ཧཱུཾ་བྷྱོཿ རྡོ་རྗེ་ཕུར་པ་ཀཱི་ལ་ཡ། །སྟོད་ནི་ཁྲོ་ཆེན་གསང་བའི་བདག །རྐེད་པ་ཁྲག་འཐུང་དུད་སོལ་མ། །རྩེ་མོ་ལས་ཀྱི་རེ་མ་ཏི། །ཀུན་ཀྱང་སྐུ་སྟོད་ཁྲོ་མོའི་གཟུགས། །རྐེད་པ་ཆུ་སྲིན་སྦྲུལ་གྱིས་བརྒྱན། །སྐུ་
སྨད་ཟུར་གསུམ་དབལ་དང་ལྡན། །དམ་ཉམས་གནོད་བྱེད་དགྲ་བགེགས་འདིས། །མིག་འབྲས་གཉིས་ལ་ཀཱི་ལ་ཡ། །མིག་གི་དབང་པོ་ཉམས་པར་གྱིས། སྨྲ་བྱེད་ལྕེ་ལ་ཀཱི་ལ་ཡ། །དིག་ཅིང་ལྷུག་པའི་ཕྲིན་ལས་མཛོད། །ཡན་ལག་བཞི་ལ་ཀཱི་ལ་ཡ། །ཞ་ཞིང་རེང་བའི་ལས་མཛོད་ཅིག །སྲོག་རྩ་སྙིང་ལ་ཀཱི་ལ་ཡ། །མྱུར་དུ་གླུ་བསད་པའི་དུས་ལ་བབ། །ཨོ་ཙནྡྲ་མ་ཧཱ་རོ་ཥ་ཤ་ཧཱུྃ་ཕཊ༔ རུ་རུ་བེ་ཏིཥྛ་བ་ཏོ་སི། རུ་རུ་རོ་རུ་བེ་ཏིཥྛ་བ་ཏོ་སི། ཙ་པ་ལ་ཨ་ཤུག་མེ། རེ་མ་ཏི་བཛྲ་ཀཱི་ལ་ཡ་ཧཱུྃ། མཱ་ར་ཡ་ཕཊ༔ དེ་ནས་ཐུན་གྱིས་ལས་མཁན་རྦད་པ་ནི། བྷྱོཿ དུར་ཁྲོད་བདག་མོ་རེ་མ་ཏི། །བཞུགས་ནི་དུར་ཁྲོད་གནས་ན་བཞུགས། །བསྐོར་ནི་འཛམ་གླིང་ཁྱབ་པར་སྐོར། །འཛམ་བུ་གླིང་གི་མ་གཅིག་མ། །དུར་ཁྲོད་གནས་ནས་སྐུ་བསྐྱོད་ལ། །བདག་ལ་སྡང་བའི་དགྲ་བོ་ལ། །སྣ་ཚོགས་ནད་ཀྱི་རྐྱལ་པ་རྡོབས། །ཁྲམ་བམ་ནག་པོ་ཀླད་ལ་བསྐོར། །བདག་གིས་གདུང་བས་བོས་པའི་ཚེ། །དེ་ཚེ་ཐུན་གྱི་ཆར་ཕོབ་ལ། །ཐུན་ཁྲག་རིམ་དུ་བསྒྱུར་དུ་གསོལ། །རིམས་ནད་སྡང་བའི་དགྲ་ལ་དབབ་ཏུ་གསོལ། །དུས་ལ་བབ་ཀྱིས་
དེ་ཚུར་སྤྱོན། །བྷྱོ༔ ནམ་གྱི་སྲོད་ལ་བབ་ཙམ་ན། །ཐུན་གྱི་མ་མོ་ཆེན་མོ་ནི། །ཆིབས་སུ་བོང་བུ་ཁ་ཀར་ཆིབས། །ཕྱག་ན་མདུང་དར་སྣ་ཚོགས་བསྣམས། །གཡོན་ན་ཐུན་གྱི་ཁྲག་སྐྱོ་མ། །དེ་ལ་གསང་བའི་མཚན་གསོལ་བ། །ལྷ་མོ་བ་ལམ་ཀྲི་སྣ་མ། །བདག་གིས་གདུང་བས་བོས་པའི་ཚེ། །དེ་ཚེ་ཐུན་གྱི་ཆར་ཕོབ་ལ། །ཁྲག་ཐུན་རིམ་དུ་བསྒྱུར་དུ་གསོལ། །རིམས་ནད་དགྲ་ལ་དབབ་ཏུ་གསོལ། །དུས་ལ་བབ་ཀྱིས་ད་ཚུར་བྱོན། །བྷྱོཿ ནམ་གྱི་གུང་ལ་བབ་ཙམ་ན། །ཐུན་གྱི་མ་མོ་འབྲིང་བ་ནི། །ཆིབས་སུ་ཕུང་བྱ་རོག་མོ་ཆིབས། །སྐུ་ལ་མཛེས་བྱེད་རེ་ལྡེ་གསོལ། །ཁྲག་ཞག་འདྲེས་པའི་ཐིག་ལེའི་བརྒྱན། །ཕྱག་གཡས་གྲི་གུག་ནག་པོ་བསྣམས། །གཡོན་ན་ཐུན་གྱི་ཁྲག་སྐྱོ་མ། །དེ་ལ་གསང་བའི་མཚན་གསོལ་བ། །བདུད་མོ་ཁྲི་སྨན་སི་ལེ་མ། །བདག་གིས་གདུང་བས་བོས་པའི་ཚེ། །དེ་ཚེ་ཐུན་གྱི་ཆར་ཕོབ་ལ། །ཁྲག་ཐུན་རིམ་དུ་བསྒྱུར་དུ་གསོལ། །རིམས་ནད་སྡང་བའི་དགྲ་ལ་དབབ་ཏུ་གསོལ། །དུས་ལ་བབ་ཀྱིས་ད་ཚུར་བྱོན། ། བྷྱོཿ ནམ་གྱི་ཐོ་རངས་དུས་ཚོད་ནི། །ཐུན་གྱི་མ་མོ་ཐ་ཆུང་ནི། །ཆིབས་
སུ་སྟག་མོ་གྲུས་མ་ཆིབས། །ཕྱག་གཡས་མདུང་དར་སེར་པོ་བསྣམས། །གཡོན་ན་ཐུན་།དེ་ལ་གསང་བའི་མཚན་གསོལ་བ། །བདུད་མོ་སྟག་སྨན་སོར་ལྡེམ་མ། །བདག་གིས་གདུང་བས་བོས་པའི་ཚེ། །དེ་ཚེ་ཐུན་གྱི་ཆར་ཕོབ་ལ། །ཐུན་ཁྲག་རིམ་དུ་བསྒྱུར་དུ་གསོལ། །རིམས་ནད་སྡང་བའི་དགྲ་ལ་དབབ་ཏུ་གསོལ། །དུས་ལ་བབ་ཀྱིས་ད་ཚུར་བྱོན། ཨོ་བཛྲ་ཛཱ་ཀི་ནི་དྷེ་བྷི། མ་ཧཱ་ཀཱ་ལི་ཀཱ་ལ་ཡ་ས་མ་ཡ། བཛྲ་ཀྲོ་ཏི་ཀརྨ་རཀྵ་ཧཱུྃ། ཞེས་བསྐུལ་ལ་ཐུན་བརྡེག་པ་ནི། བྷྱོཿ རཀྟའི་རྒྱ་མཚོ་རྦ་ཀློང་འཁྲུགས། །མ་མོ་ཡོངས་རྫོགས་གྱད་ཀྱི་སྐུ། །ནད་རིམས་དལ་ཁ་ཆར་བཞིན་ཕོབ། །དགྲ་བགེགས་ལྔ་ཕུང་རྡུལ་དུ་རློགས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ མ་ཧཱ་ཤ་ཏྭ་ཨ་མུ་ཀཾ་ཨུད་ཡོན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ སྔགས་དེ་ཐུན་ཐམས་ཅད་ལ་སྦྱར་རོ། །བྷྱོ༔ རྩང་མདའ་དྲག་པོ་སྐར་ལྟར་འཁྲུགས། །གདུག་པ་འདུལ་བྱེད་རྩལ་གྱི་སྐུ། །རྩང་གི་མདའ་འཕེན་སེར་ལྟར་འབེབས། །དགྲ་བགེགས་ལྔ་ཕུང་རྡུལ་དུ་རློགས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཏུཾ་ཨ་མུ་
ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ བྷྱོ༔ ཡུངས་ནག་ཀེ་ཚེ་ཤང་ཚེ་དང་། །ཡུངས་ཀར་རྒྱལ་པོ་ཤ་རི་རཾ། །ཁྲོ་རྒྱལ་ཡོངས་རྫོགས་གྱད་ཀྱི་སྐུ། །དྲག་སྔགས་ཐོག་སེར་དྲག་པོ་ཡིས། །དགྲ་བགེགས་ལྔ་ཕུང་རྡུལ་དུ་རློགས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཧཱུྃ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ བྷྱོཿ འབྱུང་བའི་དུག་ཐུན་རླུང་ལྟར་འཚུབ། །གདུག་པའི་དུག་སྣ་ཡོངས་རྫོགས་པ། །ལྔ་ཕུང་འཇིགས་བྱེད་དུག་རླང་གིས། །དགྲ་བགེགས་ལྔ་ཕུང་རྡུལ་དུ་རློགས། །ཨོཾ་ཧཱུཾ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ མ་ཧཱ་ཤ་ཏུཾ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ བྷྱོཿ སྟོབས་ཆེན་འདུལ་བ་མདའ་ཡི་རྒྱུན། །དྲེགས་པ་འཇོམས་བྱེད་རྩལ་གྱི་སྐུ། །མི་བཟད་ཐོག་ཆེན་ཆར་འབེབས་ཀྱིས། །དགྲ་བགེགས་ལྔ་ཕུང་རྡུལ་དུ་རློགས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཧཱུྃ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ བྷྱོ༔ སྟོབས་ཆེན་བརྡུང་བ་རྡོ་རྗེའི་བརྡུང་། །དྲེགས་པ་འཇོམས་བྱེད་གཏུམ་པོའི་སྐུ། །དྲག་པོའི་གནམ་ལྕགས་ཐོག་སེར་གྱིས། །
དགྲ་བགེགས་ལྔ་ཕུང་རྡུལ་དུ་རློགས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཏྭ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ ཡོད་ན་ཟངས་ཁབ་མེད་ན་རྡོ་རྗེ་འབར་བས་བཤང་ལམ་ནས་སྤྱི་བོ་ཡི་མེ་འབར་བས་དགྲ་བགེགས་བསྲེག་པར་བསམས་ལ། བྷྱོཿ མཚོན་ཆེན་རྡོ་རྗེ་འབར་བའི་ཁབ། །ལུས་ནི་དུམ་བུར་གཏོར་བར་བྱ། །དབང་པོ་རྩད་ནས་བཤིག་པར་བྱ། །རྡུལ་ཕྲན་བཞིན་དུ་གཏོར་བར་བྱ། །སྐད་ཅིག་སྲོག་དང་བྲལ་བར་གྱིས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཏྭ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ། ཧཱུྃ། ང་ནི་དཔལ་ཆེན་དབང་ཕྱུག་མ། །ང་ནི་དཀྱིལ་འཁོར་ཀུན་གྱི་གཙོ། །ང་ནི་ཆོས་སྐྱོང་ཀུན་གྱི་རྗེ། །ང་ནི་དགྲ་བགེགས་ཀུན་གྱི་གཤེད། །ཕྱག་ན་སྡིག་པའི་རལ་གྲི་བསྣམས། །བཏབ་ན་ལྷ་ཡང་རླག་པར་བྱེད། །དགྲ་དང་བགེགས་ལ་སྨོས་ཅི་དགོས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་པ། བྷྱོཿ མ་ཧཱ་ཤ་ཏྭ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ ཧཱུྃ། ང་ནི་དཔལ་ཆེན་དབང་ཕྱུག་མ། །ང་ནི་དཀྱིལ་འཁོར་ཀུན་གྱི་གཙོ། །ང་ནི་ཆོས་སྐྱོང་ཀུན་གྱི་
རྗེ། །ང་ནི་དགྲ་བགེགས་ཀུན་གྱི་གཤེད། །ཕྱག་ན་ཁཊཾ་རྩེ་གསུམ་བསྣམས། །ཕྱུར་བས་ཁམས་གསུམ་དབང་དུ་སྡུས། །རྩེ་ལ་ལྕགས་ཀྱི་སྤྱང་མོ་འཕྲོ། །བཏབ་ན་ལྷ་ཡང་། རླག་པར་བྱེད། །དགྲ་དང་བགེགས་ལ་སྨོས་ཅི་དགོས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཧཱུྃ་ཨ་མུ་ཀཾཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ ཧཱུྃ། ང་ནི་དཔལ་ཆེན་དབང་ཕྱུག་མ། །ང་ནི་དཀྱིལ་འཁོར་ཀུན་གྱི་གཙོ། །ང་ནི་ཆོས་སྐྱོང་ཀུན་གྱི་རྗེ། །ང་ནི་དགྲ་བགེགས་ཀུན་གྱི་གཤེད། །ཕྱག་ན་ཏྲེ་ཤུ་འབར་བ་བསྣམས། །དྲིལ་བས་སྲིད་གསུམ་ཟིལ་གྱིས་གནོན། །བཏབ་ན་ལྷ་ཡང་རླག་པར་བྱེད། །དགྲ་དང་བགེགས་ལ་སྨོས་ཅི་དགོས། ཨོ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཏྲུཾ་ཨ་མུ་ཀཾ་ཨུད་མན་ཏན།། མཱ་ར་ཡ་མཱ་ར་ཡ་ཧཱུྃ་ཕཊ༔ ཧཱུྃ། བརྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་འདི། །རྡོ་རྗེ་མེ་དབལ་སྙིང་བསྲེགས་ནས། །ལུས་ངག་རྡུལ་ཕྲན་བཞིན་ཏུ་རློགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷའམ་འོན་ཏེ་བརླག་པར་འགྱུར། །རྡུལ་ཕྲན་བཞིན་
དུ་གཏོར་བར་བྱ། །སྐད་ཅིག་སྲོག་དང་བྲལ་བར་གྱིས། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་ཤ་ཏྭ་ཨ་མུ་ཀཾ་ཨུད་མན་ཏན། མཱ་ར་ཡ་མཱ་ར་ཡ་ཧཱུྃ་ཕཊ༔ ལིང་རོ་ཁྲག་དང་ཆང་གིས་བྲན་ལ། གཏོར་སྐྱོགས་སུ་བཏེག་ལ། ཧཱུྃ། དགྲ་བགེགས་བསྒྲལ་བའི་ཤ་ཁྲག་འདི། །བསྟན་སྲུང་དུད་སོལ་ལྷ་མོའི་ཞལ་དུ་བསྟབ། །སྲོག་གཅོད་ཤན་པ་མ་གསུམ་ཞལ་དུ་བསྟབ། །རིགས་ཀྱི་ལྷ་མོ་བཞི་ཡི་ཞལ་དུ་བསྟབ། །དུར་ཁྲོད་མ་མོ་བརྒྱད་ཀྱི་ཞལ་དུ་བསྟབ། །ཕྱོགས་མཚམས་ཕྲ་མེན་བརྒྱད་ཀྱི་ཞལ་དུ་བསྟབ། །ཕྲིན་ལས་སྒོ་མ་བཞི་ཡི་ཞལ་དུ་བསྟབ། །སྐུ་སྤྲུལ་དཀར་མོ་འབུམ་སྡེའི་ཞལ་དུ་བསྟབ། །གསུང་སྤྲུལ་དམར་མོ་འབུམ་སྡེའི་ཞལ་དུ་བསྟབ། །ཐུགས་སྤྲུལ་ནག་མོ་འབུམ་སྡེའི་ཞལ་དུ་བསྟབ། །ཡོན་ཏན་སེར་མོ་འབུམ་སྡེའི་ཞལ་དུ་བསྟབ། །ཕྲིན་ལས་ལྗང་མོ་འབུམ་སྡེའི་ཞལ་དུ་བསྟབ། །ཡེ་ཤེས་མ་མོ་རྣམས་ཀྱི་ཞལ་དུ་བསྟབ། །ལས་ཀྱི་མ་མོ་རྣམས་ཀྱི་ཞལ་དུ་བསྟབ། །འཇིག་རྟེན་མ་མོ་རྣམས་ཀྱི་ཞལ་དུ་བསྟབ། །ལས་མཁན་རེ་མ་ཏི་ཡི་ཞལ་དུ་བསྟབ། །མ་མོ་བ་ལམ་དྲིལ་སྣའི་ཞལ་དུ་བསྟབ། །རྡོ་
རྗེ་ཁྲི་སྨན་སི་ལེའི་ཞལ་དུ་བསྟབ། །བརྟན་སྐྱོང་ཡ་མ་བཅུ་གཉིས་ཞལ་དུ་བསྟབ། །སྲིད་པའི་མ་མོ་སྟོང་གི་ཞལ་དུ་བསྟབ། །སྲིན་མོ་སྟོང་ཕྲག་དྲུག་ཅུའི་ཞལ་དུ་བསྟབ། །མ་མོ་བྱེ་བ་འབུམ་སྡེའི་ཞལ་དུ་བསྟབ་བོ་ཁ་རཾ་ཁཱ་ཧི། བཞེས་ཤིག་རོལ་ཅིག་དགྱེས་པར་མཛོད། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ མ་ཧཱ་མཾ་ས་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་བ་སུ་ཏ་ལ་ཁཱ་ཧི། ཨི་དཾ་བྷ་ལཾ་ཁཱ་ཧི། གྲིནྣ་གྲིནྡཱ་པ་ཡ་ཧཱུྃ་ཕཊ༔ སངས་རྒྱས་ཀྱི་བསྟན་པ་བཤིག་ཅིང་། དཀོན་མཆོག་གི་དབུ་འཕང་སྨད་པ། བླ་མ་དམ་པའི་སྐུ་ལ་བསྡོ་བ། བདག་ཅག་དཔོན་སློབ་འཁོར་དང་བཅས་པ་རྣམས་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། བདུད་དང་བར་དུ་གཅོད་པ་ཐམས་ཅད་དཔལ་ལྡན་ལྷ་མོ་འཁོར་དང་བཅས་པ་རྣམས་ཀྱི་ཞལ་དུ་མཱ་ར་ཡ་ཁ་ཁ་ཁཱ་ཧི། དམ་ཉམས་དགྲ་བགེགས་ཀྱི་མཾ་ས་ལ་ཁཱ་ཧི་། གོ་རོ་ཙ་ན་ལ་ཁཱ་ཧི། ཙིཏྟ་ལ་ཁཱ་ཧི། རཀྟ་ལ་ཁཱ་ཧི། བ་སུ་ཏ་ལ་ཁཱ་ཧི། ཨོཾ་རུ་རུ་བྷེ་ཏི་ཏ་བྷ་ཏོ་སི་ཀ་མ་ལ་རཀཱ་སིང་ཧཱུྃ་བྷྱོ༔ དགྲ་བགེགས་ཐམས་ཅད་མཱ་ར་ཡ་ཧཱུྃ་བྷྱོ་
ཕཊ་སྭཱ་ཧཱ། ཞེས་ལིང་རོ་གཏོར་མར་འབུལ། གཏོར་ཆུང་ཟུར་གསུམ་པ་རེ། ཤ་དུམ་རེ་ལིངྒ་སྡོང་བུ་ཅན་རེ་རྒྱས་པར་གནོད་བྱེད་ཀྱི་མིང་བཅུག་རཀྟ་དང་ཆང་ཆུ་བསྲེས་པའི་གཏོར་ཆུ་བླུག །དེ་འདྲ་ཚན་པ་བདུན་ནམ་བཅུ་རེ་བཤམས་ལ་བྱིན་རླབས་དུས་གཅིག་ལ་བྱ། རྐྱེན་བཟློག་ལ་ལིངྒ་མེད་ཀྱང་ཆོག །གོང་དུ་ལིངྒ་ཆེ་བ་གཅིག་བསྒྲལ་ནས་དེའི་དུམ་བུ་རེ་བཞག་པར་བཤད་ཀྱང་ཆོག །གཏོར་མ་རེ་ལ་དཔལ་འབར་རེ་བཙུགས། འགྲུབ་ན་བཟོང་། གཏོར་མ་ཤ་ཆུ་བསོག་ས་གཏོར་ཆེན་མདུན་དུ་སྒྱེད་པུ་བཙུགས་ལ་དེའི་ཁར་ལྕགས་འགུ་གཙང་མ་བཞག་པར་བཤད་ཀྱང་། ཕྱག་ལེན་ལ་གཏོར་ཆེན་ནང་དུ་བླུག་སྲོལ་ཡོད་པར་སྣང་། མཆོད་གཡོག་པ་ཡང་ནག་མོ་གྲི་གུག་ཐོད་ཁྲག་ཅན་དུ་བསྐྱེད། ལིངྒ་མི་བྱེད་ན་གནོད་བྱེད་ཀྱི་མིང་གཏོར་ཆུང་ནང་དུ་བཅུག་ཀྱང་རུང་གསུངས། ཨོཾ་སཾ་ཤོ་དྷ་ནི་ཧཱུྃ་ཕཊ༔ སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་གཏོར་མའི་ནང་དུ་ཧ་ཧོ་ཧྭགསུམ་གསལ་བར་གྱུར། ཧ་སེར་པོས་གཏོར་མའི་ཁ་དོག་ངན་པ་བཅོམ་པས་ཁ་དོག་ཕུན་སུམ་ཚོགས་པ་གསེར་གྱི་མདོག་ལྟ་བུ། ཧོ་དཀར་པོས་དྲི་ངན་པ་ཐམས་ཅད་བཅོམ་ནས་ཕུན་སུམ་ཚོགས་པ། ཧྲུསྔོན་པོས་རོ་ངན་པ་ཐམས་ཅད་བཅོམ་ནས་རོ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧ་ཧོ་བྷིསྭཱ་ཧཱ། སྔགས་དེས་ལན་གསུམ་བྱིན་བརླབས། དེ་ནས་མཆོད་གཡོག་
པས་ལག་པ་གཡས་པས་གཏོར་མ་གཡོན་པས་ལིངྒ་དང་གཏོར་ཆུང་བཟུང་ནས་ལག་པ་བསྣོལ་ཏེ་ནམ་མཁའ་ལ་བཏེག་ནས་ལྷ་མོའི་གསོལ་བར་བསམས་ཤིང་། ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི། ལན་གསུམ། མ་གཅིག་དཔལ་ལྡན་ལྷ་མོ། གསོད་བྱེད་མ་མོ་གསུམ། རིགས་བཞི་ལྷ་མོ། དུར་ཁྲོད་བདག་མོ། དངོས་གྲུབ་ཞལ་མ། གཏུམ་མོ་གཟི་བརྗིད་མ། ཡི་དྭགས་ཁ་མ། དམ་ཚིག་སྲུང་མ། ཁྲག་དགའ་མ། ཀཱི་ལི་སྒྲ་སྒྲོག་མ། སྦྱོར་འཛིན་མ། ཕྲ་མེན་མ་བརྒྱད། སྒོ་མ་བཞི། མ་མོ་བྱེ་བ་འབུམ་སྡེ། ལས་ཀྱི་རེ་མ་ཏི། བ་ལམ་དྲིལ་སྣ། ཁྲི་སྨན་སི་ལེ། སྲིད་པའི་མ་མོ་སྟོང་། དམན་མོ་སྟོང་དྲུག་ཅུ་རྩ་བཞི། བརྟན་སྐྱོང་ཡ་མ་བཅུ་གཉིས་ལ་སོགས་པ། སྲིད་པའི་མ་མོ་མཁའ་འགྲོ་ཐམས་ཅད་ཀྱི་ཞལ་དུ་མ་ཧཱ་མཾ་ས་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་བ་སུ་ཏ་ལ་ཁཱ་ཧི། ཨི་དཾ་བྷ་ལི་ཏ་གྲི་ཧྭ་གྲི་ཧྥ་པ་ཡ་ཧཱུྃ་ཕཊ༔ དཔལ་ལྡན་ལྷ་མོ་དུད་སོལ་མ་འཁོར་དང་བཅས་པ་ཁྱེད་རྣམས་ཀྱིས་མཆོད་སྦྱིན་གྱི་གཏོར་མ་ཁ་དོག་དམ་པ། དྲི་དམ་པ་རོ་དམ་པ་དང་ལྡན་པ་འདི་
གསོལ་ལ། བདག་ཅག་རྣལ་འབྱོར་པ་འཁོར་དང་བཅས་པའི། ནད་ཀྱི་རིགས་སུ་གྱུར་པ། རླུང་ལས་གྱུར་པ། མཁྲིས་པ་ལས་གྱུར་པ། །བད་ཀན་ལས་གྱུར་པ། འདུས་པ་ལས་གྱུར་པའི་ནད་བཞི་བརྒྱ་རྩ་བཞི་པོ་ཐམས་ཅད་ཞི་ཞིང་བཟློག་པར་མཛོད་ཅིག །གདོན་གྱི་རིགས་སུ་གྱུར་པ། ལྷའི་གདོན་དང་། ཀླུའི་གདོན་དང་། །གནོད་སྦྱིན་གྱི་གདོན་དང་། ལྷ་མ་ཡིན་གྱི་གདོན་དང་། རྒྱལ་པོའི་གདོན་ལ་སོགས་གདོན་བརྒྱད་ཁྲི་བཞི་སྟོང་གི་གནོད་པ་ཐམས་ཅད་ཞི་ཞིང་བཟློག་པར་མཛད་དུ་གསོལ། ཆག་ཆེ་བ། ཉམ་ང་བ། རྨི་ལམ་ངན་པ། མཚན་མ་ངན་པ། ལྟས་ངན་པ། བཀྲ་མི་ཤིས་པའི་ཕྱོགས་ངན་པ་ཐམས་ཅད་བློ་སྦྱོ་ཟློག་ཟློག །གཞན་ཡང་རྣལ་འབྱོར་པ་བདག་གི་མཐུ་དཔུང་གྱིས། གྲོགས་ཀྱིས་སྔོན་ནས་སུས། ཕྱི་ནས་སྐྱོལ། བསམ་པ་སྒྲུབ་ཏུ་བཅུག །བསམ་པ་མཐར་ཕྱིན་དུ་ཆུག །བྱས་པས་དུད་སོལ་མ་འཁོར་དང་བཅས་པས་དེ་ག་ལྟར་བགྱིའོ་ཟེར་ནས་གསོལ་བར་བསམ། བྷྱོཿ དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱི། །བསྟན་པ་སྲུང་བར་མངའ་གསོལ་བའི། །དུད་སོལ་ལྷ་མོ་འཁོར་
བཅས་བསྟོད། །ཨོཾ་རུ་རུ་རོ་རུ་བ་ཏོ་སི་ཀ་མ་ལ་རཀཱ་སི་ཧཱུྃ་བྷྱོ༔ དགྲ་བགེགས་མཱ་ར་ཡ་ཧཱུྃ་ཕཊ༔ ཅེས་གཏོར་མར་བླུགས། དེ་ནས་རང་གིས་མཆོད་གཡོག་པའི་ལག་པ་གཉིས་ཁུ་ཚུར་བཅིངས་ཏེ། མཛུབ་མོ་གཉིས་སྦེང་སྟེ་ཁ་འགྲམ་གཡས་སུ་བཞག་ལ། ཨོཾ་བྷེ་བྷ་ཏ་ལི་བྷ་ཏ་ལི་ཚ། སྔགས་འདི་ལན་བདུན་བརྗོད་པས་ཡི་དམ་གྱི་ཞལ་ཆབ་ཏུ་བསམ་ལ་ཆང་ཕུད་བྲན། བྷྱོཿ དུར་ཁྲོད་བདག་མོ་དངོས་གྲུབ་ཞལ་། །གཏུམ་མོ་འཇིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མོ། །ཀཱི་ལའི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་སུ། །ཚོགས་དང་ཕོ་ཉར་བཅས་པ་རུ། །གཙིགས་བྱེད་གཏུམ་མོ་དུད་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་ནས་གནས་པར་མཛད་དུ་གསོལ། །བདག་གིས་སེམས་ལ་ཅི་འདོད་པ། དེ་ནི་ཁྱོད་ཀྱིས་འགྲུབ་པར་མཛོད། །བདག་གིས་ལས་ནི་ཅི་བྱེད་ཀྱང་། །དེ་ལ་ཀུན་གྱི་གྲོགས་གྱིས་ཤིག །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ གྲི་ཧྥ་གྱི་རྩྭ་པ་ཡ་སརྦ་དུཊཾ་བག་བཀ་ཕྲ་ཕྲུམ་ཕྲ་སཾ་ཕཊ་སྭ་ཧཱ། ཞེས་བརྗོད་ལ་སེ་གོལ་གསུམ་གདབ། སླར་གཏོར་མ་བཤམ་ཚེ་དེ་ཝི་ཀཱ་ལི་བགྲང་། མི་མང་པོ་ཡོད་ན་ཚན་གཅིག་གིས་དེ་ཝི་ཀཱ་ལི་བགྲང་། ཚན་གཅིག་གིས་བསྟོད་
རིང་གྱེར། ཚན་གཅིག་གིས་བརྒྱ་རྩ་བརྗོད། ཉུང་ན་བདུན་ནམ་བཅུའི་མཚམས་སུ་བསྟོད་རིང་རེ་བྱའོ། །ཨོཾ་དཔལ་ལྡན་ལྷ་མོ་མི་ཕམ་སྲིད་གསུམ་བདག །ཅེས་པ་ནས། བསྟན་པ་སྲུང་བའི་ལས་འདི་མྱུར་དུ་མཛོད། །ཨོཾ་རུ་རུ་རོ་རུ་བྷེ་ཏི་ཏ་བ་ཏོ་སི་ཀ་མ་ལ་རཀཱ་སི་ཧཱུྃ་བྷྱོཿ དགྲ་བགེགས་མཱ་ར་ཡ་ཕཊ༔ འདིར་རྒྱས་པར་འདོད་ན་ལྷ་མོའི་མདོས་ནས་རྩང་གྱེར་སབ། ཁྲམ་ཤིང་གི་འཕྱོང་ནད་རྐྱལ་བྱང་བུ་རྣམས་ཀྱི་འཕྱོང་ཚོན་དྲུག་འཕྱོང་དེ་ཚོ་སབ་འདོད་ན་དེ་རྣམས་མདོས་ནང་དུ་བཙུགས། ནད་སྤྲིན་བསྡུ་བ་ཤོ་རྡེལ་གཏོར་བ་ཡང་སྦྱར། ནད་པ་ཡོད་ན་ནད་སྤྲིན་བསྡུ་བའི་འཕྱོང་ཡང་སྦྱར་རོ། །དེ་ལྟར་བརྒྱ་རྩ་བརྒྱད་མ་ཚང་བར་དུ་བྱའོ། །ཞག་མང་དུ་བྱེད་ན་ཚན་པ་ཚན་པ་བྱའོ། །ཐུན་མཚམས་སུ་གཏོར་ཆུང་ལ་བཀུག་གཞུག་བྱས་ལ་བསྟོད་བསྐུལ་ཐུང་བ་འདི་རྣམས་གང་རུང་རེས་འབུལ། བྷྱོཿ དཔལ་ལྡན་ལྷ་མོ་འདོད་ཁམས་དབང་ཕྱུག་མ། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །ཤ་ཁྲག་དམར་གྱི་གཏོར་མ་འདི་བཞེས་ཤིག །འཛམ་བུ་དེ་བའི་ཞལ་ཟས་འདི་བཞེས་ཤིག །སྨན་རཀ་ཕུད་ཀྱི་གཏོར་མ་འདི་བཞེས་ཤིག །སྔར་བཅོལ་ལས་ཀྱི་གཏང་རག་གཉེན་པོ་བཞེས། །ད་བཅོལ་ལས་ཀྱི་ཞུ་དོན་གཉེན་པོ་འབུལ། །འཁོར་རྣམས་སྲུང་ཞིང་རྐྱེན་རྣམས་བཟློག་
པ་དང་། །བདུད་དང་བར་དུ་གཅོད་པ་རྣམས་མང་པོ། །སྡང་བའི་དགྲ་དང་གནོད་པའི་བགེགས་ལ་སོགས། །ཐམས་ཅད་རྡུལ་ཕྲན་བཞིན་དུ་བརླག་པར་མཛོད། །ཤ་ཁྲག་དམར་གྱི་གཏོར་མ་འདི་བཞེས་ལ། །བདག་གི་བཅོལ་བའི་ཕྲིན་ལས་འགྲུབ་པར་མཛོད། །ཅེས་སམ། བྷྱོ། གཡུ་མཚོ་མེར་བའི་འགྲམས་ཤེད་ནས། །རླུང་འཚུབ་དམར་ནག་འཁྱིལ་བའི་དབུས། །སྲིན་པོའི་བོང་བུ་གྲྭ་དམར་ནི། །ཞིང་ཆེན་རུས་པའི་མཐུར་དུ་བྱས། །སྲིན་པོའི་ཡ་ཁལ་སྔ་རུ་བྱས། །མ་ཁལ་དག་གིས་ཕྱི་རུ་བྱས། །ཞིང་ཆེན་སྒ་སྟན་ཞིང་ཆུང་གིས། །སྒྲ་གཡོགས་སྦྲུལ་ནག་གོང་སྨོད་བྱས། །རུ་ཊ་ཕྲུ་གུའི་སྒྲ་ལོག་ཅན། །དེ་སྟེང་ལྷ་མོ་དུད་སོལ་མ། །ཞལ་གཅིག་ཕྱག་གཉིས་སྤྱན་གསུམ་འཁྲོལ། །ཞབས་གཉིས་བཙན་འཁྱིལ་བརྐྱང་བསྐུམ་བཞུགས། །རལ་པའི་ཐོར་གཙུག་གཡོན་དུ་འཁྱིལ། །ལས་སུ་ཁམས་གསུམ་དབང་དུ་སྡུད། །སྙན་གཡས་སྦྲུལ་ནག་གདེངས་ཀ་འཕྱོ། །སྙན་གཡོན་སེང་གེ་རལ་དམར་འཕྱོ། །སྙན་གཉིས་གསེར་གྱི་དྲིལ་བུ་འཁྲོལ། །ཐོད་སྐམ་ལྔ་ཡིས་དབུ་ལ་བརྒྱན། །གཙུག་ན་རྨ་བྱའི་རྒྱལ་མཚན་བཙུགས། །ཐལ་ཆེན་ཚོམ་
བུས་སྐུ་ལུས་བྱུགས། །ཁྲག་ཞག་ཐིག་ལེས་ཟོ་རིས་རྒྱན། །རྣ་ལྟག་མེ་ཏོག་ཆུན་པོའི་བརྒྱན། །སྐུ་སྟོད་གླང་ཆེན་ཞིང་ལྤགས་གསོལ། །སྐུ་སྨད་རེ་ལྡེ་སེར་པོ་དང་། །སྟག་གཟིག་ལྤགས་པའི་ཤམ་ཐབས་གསོལ། །རིན་ཆེན་རུས་རྒྱན་སྦྲུལ་གྱིས་བརྒྱན། །མཆེ་བ་ཟུར་གསུམ་ཅུང་ཟད་གཙིགས། །ཁྲོ་གཉེར་ཐོད་ཕྲེང་སེ་རལ་ཅན། །ཕྱག་གཡས་རལ་གྲི་མེ་འོད་འབར། །འོག་མ་ཐོད་རློན་དམར་བཀང་ཕྱིར། །ཕྱག་གཡོན་ཤཀྟི་རྨ་བྱ་ཅན། །འོག་མ་ཏྲི་ཤུལ་རྩེ་གསུམ་ཐོགས། །དཔྲལ་བའི་དཀྱིལ་ན་ཟླ་གསལ་ཞིང་། །ལྟེ་བའི་ཁུང་ནས་ཉི་འཆར་མ། །དབང་གི་ལྕགས་སྒྲོག་ཞབས་ལ་འཁྲིལ། །བོང་བུའི་སྟེང་ན་ཕྱོགས་བཅུར་གཟིགས། །མེ་དཔུང་ནང་ན་འགྱིང་བག་བཞུགས། །ཤིན་ཏུ་སྒེག་པའི་ཆ་ལུགས་ཅན། །སྲིད་པའི་མ་མོ་ཁྲི་ཕྲག་དང་། །ལས་ཀྱི་མ་མོ་ཁྲི་ཕྲག་ནི། །དྲུག་ཅུ་རྩ་བཞིས་རབ་ཏུ་བསྐོར། །དཔལ་ལྡན་ལྷ་མོ་ཁྱོད་ལ་བསྟོད། །འཁོར་བཅས་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །དཔལ་ལྡན་ལྷ་མོ་དུད་སོལ་མ་ལ་སྲིན་པོའི་རྒྱལ་པོ་ལང་ཀ་མགྲིན་བཅུའི་དོན་གྱི་སྒོ་ནས་བསྟོད་པ་མེ་ལྕེ་
འབར་བའི་རྒྱུད་ནས་གསུངས་སོ། །སུམ་རྡུང་ཆེ་ཆུང་གཉིས་གསུམ། བྷྱོཿ བྱང་ཤར་ཐོད་པ་འཕྲུལ་གྱི་གཞལ་ཡས་ནས། །ལྷ་མོ་ནག་མོ་མཐུ་དང་རྫུ་འཕྲུལ་ཅན། །དབང་ཕྱུག་སྲིད་པོ་གསུམ་གྱི་བདག་མོ་སྟེ། །ཁྱོད་ནི་ཁམས་གསུམ་ཀུན་གྱིས་མཆོད་ཅིང་བཀུར། །ཚངས་པའི་རྒྱལ་པོའི་རྨ་བྱའི་རྒྱལ་མཚན་ཕུལ། །ཁྱབ་འཇུག་ཆེན་པོའི་ཉི་ཟླ་རྒྱུན་དུ་ཕུལ། །རྣམ་ཐོས་སྲས་ཀྱིས་སེང་གེའི་རྣ་རྒྱན་ཕུལ། །ནམ་མཁའི་ལྷ་བྲན་གསེར་གྱི་དྲིལ་བུ་ཕུལ། །ཀླུ་ཡི་རྒྱལ་པོས་སྦྲུལ་གྱི་གདེངས་ཀ་ཕུལ། །ལྷ་དབང་བརྒྱ་བྱིན་གླང་ཆེན་ཀོ་རློན་ཕུལ། །ལྷ་མ་ཡིན་གྱིས་དར་ནག་ཅོད་པན་ཕུལ། །མ་མོ་རྣམས་ཀྱིས་རེ་ལྡེའི་ཤམ་བུ་ཕུལ། །ཤ་ཟ་རྣམས་ཀྱིས་ཁྲག་གི་ཐིག་ལེ་ཕུལ། །མཁའ་འགྲོ་རྣམས་ཀྱིས་རུས་པའི་རྒྱན་ཆ་ཕུལ། །གཤིན་རྗེའི་རྒྱལ་པོས་ཐོད་པའི་རྒྱན་ཕྲེང་ཕུལ། །སྲིན་པོ་རྣམས་ཀྱིས་ལྕགས་སྒྲོག་སྔོན་པོ་ཕུལ། །འཁོར་ལོས་སྒྱུར་རྒྱལ་ལྷ་ཡི་རྒྱལ་སྲིད་ཕུལ། །རྣལ་འབྱོར་བདག་གིས་རྒྱན་གྱིས་གཏོར་མ་ཕུལ། །དེ་ལྟར་རྒྱུན་གྱི་རྣམ་པ་དུ་མ་ཡིས། །དཔལ་ལྡན་ལྷ་མོ་ཁྱོད་ལ་བསྟོད་འབུལ་ན། །རྣལ་འབྱོར་བདག་ཅག་འཁོར་དང་བཅས་པ་ཡིས། །ཚེ་དང་
བསོད་ནམས་ལ་སོགས་རྒྱས་པ་དང་། །མཆོག་དང་ཐུན་མོང་དངོས་གྲུབ་མ་ལུས་སྩོལ། །བདག་ལ་རྟག་ཏུ་སྡང་བའི་སེམས་ལྡན་པ། །དམ་ཉམས་དགྲ་བོའི་སྲོག་རྩ་མྱུར་དུ་ཆོད། །ལྷ་མོའི་རྒྱན་བསྟོད། དེ་ལྟར་ཐུན་དྲུག་གམ་བཞིའམ་གསུམ་ལ་གཏོར་མ་འབུལ་ལོ། །རྨིས་ལྟས་སུ་མ་དང་སྲིང་མོ་དང་བུད་མེད་ཆས་བཟང་བ་སོགས་ཀྱིས་རིན་པོ་ཆེ་དང་དཀར་གསུམ་དང་སྨན་བྱིན་པ་དང་། ནམ་ལངས་ཉི་ཟླ་ཤར་བ་མེ་ཏོག་ཐུ་བ་དར་ཕྱར་དུང་འབུད་རྔ་བརྡུང་བ་སོགས་བྱུང་ན་བཟང་བས། དངོས་གྲུབ་བླངས་པ་ནི། ལག་པ་གཉིས་སོར་མོ་བཅུ་རྩེ་བསྡུས་ནས་ཁོག་པ་ཟླུམ་པོ་བདུད་རྩི་བུམ་པའི་ཕྱག་རྒྱ་བྱས་ལ། བྷྱོ། འགྱུར་མེད་མ་་སོགས། ཨོཾ་བཛྲ་དྷཀི་ནི་དེ་ཝི་མ་ཧཱ་ཀཱ་ལི་རེ་མ་ཏི། ཀཱ་ཡ་ཝཱཀ་ཙིཏྟ་སི་ཏི་ས་མ་ཡ། ཕ་ལ་ཨ་བེ་ཤ་ཡ་ཨཱ༔ ཞེས་ཅུང་ཟད་བཟླས་སོ། །ཡང་མ་སྲིང་ངོ་ཚ་བསྣོལ་བ་དང་། བུད་མེད་དུ་བ་ཁྲོ་བ་ཡུལ་གཞན་དུ་འགྲོ་ཟེར་བ་ངོ་ནག་མཆི་རིས་དོད་པ་སོགས་ངན་པའི་ལྟས་བྱུང་ན། གཏོར་མ་གཙང་སྦྲ་བྱས་ལ་ཕུལ། བསྐང་བཤགས་མང་དུ་བྱའོ། །རང་གི་ལག་པ་གཡས་མཛུབ་མོ་སྲིན་ལག་གཉིས་མཐིལ་དུ་བཀུག་ནས། མཐེ་བོང་གུང་མོ་ཐེའུ་ཆུང་གསུམ་བསྒྲེངས་ནས་ཕྱིར་ལ། ཧཱུྃ། དཔལ་ལྡན་ང་ལ་བར་ཆོད་པ། །གང་ཡིན་མགོ་ལུས་གཏུབ་པར་བྱའོ། །ཧཱུཾ་ཕཊ་མ་ཧཱ་དེ་ཝི་ཀཱ་ལི་སརྦ་དུ། ཏ་ཀ་
ཧ་ན་ད་ཧ་རུ་ལུ་བྷནྡྲ་པ་ཙ་ས་ར་ན་ཧཱུྃ་ཕཊ༔ ཅེས་པ་ཅུང་ཟད་རེ་བཟླས་པས་མཚན་མ་ངན་པ་བཟློག་པར་བྱའོ། །དེ་ནས་གཏོར་མདོས་ཞལ་ཕྱིར་བསྒྱུར་ལ། བྷྱོཿ ད་ནི་གཏོར་མདོས་ཞལ་བསྒྱུར་རོ། །དཔལ་ལྡན་ལྷ་མོ་འཁོར་དང་བཅས། །སྡང་བའི་དགྲ་ལ་ཞལ་བསྒྱུར་རོ། །ལྷ་དམག་བྱེ་བའི་ཚོགས་དང་བཅས། །སྡང་བའི་དགྲ་ལ་ཞལ་བསྒྱུར་རོ། །མ་མོ་བྱེ་བའི་ཚོགས་དང་བཅས། །སྡང་བའི་དགྲ་ལ་ཞལ་བསྒྱུར་རོ། །ལྷ་སྲིན་སྡེ་བརྒྱད་ཚོགས་དང་བཅས། །སྡང་བའི་དགྲ་ལ་ཞལ་བསྒྱུར་རོ། །སྣང་སྲིད་ལྷ་འདྲེའི་དམག་དང་བཅས། །སྡང་བའི་དགྲ་ལ་ཞལ་བསྒྱུར་རོ། །ཆིབས་ཁ་དགྲ་བོའི་ཡུལ་དུ་བསྒྱུར། །དམག་སྣ་དགྲ་བོའི་ཡུལ་དུ་དྲོངས། །དམག་དཔུང་དགྲ་བོའི་གོ་ཁར་ཆོས། །སྦྲ་ནག་དགྲ་བོའི་གོ་ཁར་ཕུབ། །རུ་དར་དགྲ་བོའི་ཁྱིམ་དུ་ཚུགས། །མདུང་དར་དགྲ་བོའི་སྙིང་ལ་རྒྱོབས། །མཚོན་ཆས་དགྲ་བོའི་ལུས་སྲོག་ཕྲོལ། །མཚོན་གྲུག་དགྲ་བོའི་མགུལ་དུ་ཐོགས། །ཁྲམ་བམ་སྡང་བའི་དགྲ་ལ་རྒྱོབས། །ནད་རྐྱལ་དགྲ་བོའི་སྟེང་དུ་བྱོས། །དུག་ཟོར་དགྲ་བོའི་སྟེང་དུ་འཕོངས། །ཟས་སུ་དགྲ་བོའི་ཤ་ལ་ཟོ། །སྐོམ་དུ་དགྲ་བོའི་ཁྲག་ལ་འཐུང་།
སྔོན་གྱི་ཐུགས་དམ་མ་གཡེལ་བར། །བཅོལ་བའི་ཕྲིན་ལས་འགྲུབ་པར་མཛོད། །ཅེས་བརྗོད། དེ་ནས་གཏོར་མདོས་ཀྱི་ཕྱི་རིམ་དུ་གཏོར་རྫོང་རྒྱུའི་གཏོར་ཆུང་ཟུར་གསུམ་ཁྲག་གིས་བྱུག་པ་མང་པོ་བཤམ་ལ་བཀུག་གཞུག་བྱོས་ལ། བདུད་རྩིར་བྱིན་གྱིས་བརླབས་ནས། གཙོ་འཁོར་རིམ་པ་ལྟར་འབུལ་ལོ། བྷྱོཿ སྔོན་ཚེ་དཔག་བསམ་བྱང་ཆུབ་ཤིང་གི་དྲུང་། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉེན་པོ་བསྲུང་བར་དམ་བཅས་པའི། །ཁྲག་འཐུང་དུད་སོལ་སྐུ་ལ་ཕྱག་འཚལ་བསྟོད། །ཁྱོད་ཀྱིས་ཡོན་ཏན་སྟོབས་དང་གཟི་བརྗིད་ལས། །མ་མོ་མཁའ་འགྲོ་བྱེ་བས་བསྐོར་བའི་དབུས། །གཏུམ་ཞིང་འགྱིང་བག་རྔམ་པའི་ཚུལ་གྱིས་བཞུགས། །སྲིད་གསུམ་ཟིལ་གྱིས་གནོན་ལ་ཕྱག་འཚལ་བསྟོད། །དོན་དམ་མི་གཡོ་སྐུ་མདོག་ཤིན་ཏུ་མནག །ཀླུ་རྣམས་འདུལ་ཕྱིར་དབུ་སྐྱ་སྦྲུལ་གྱིས་བཅིངས། །རིགས་ལྔ་རྣམ་དག་ཐོད་སྐམ་ལྔ་ཡིས་བརྒྱན། །ཐུགས་རྗེས་འགྲོ་དོན་མཛད་ལ་ཕྱག་འཚལ་བསྟོད། །ཡང་དག་དོན་རྟོགས་ཐལ་ཆེན་ཚོམ་བུས་བརྒྱན། །དུག་གསུམ་སྤང་ཕྱིར་རྨ་བྱའི་རྒྱལ་མཚན་བཙུགས། །དགྲ་བགེགས་བསྒྲལ་ཕྱིར་ཁྲག་ཞག་ཐིག་ལེས་བྲིས། །མཐུ་སྟོབས་རྫུ་
འཕྲུལ་ལྡན་ལ་ཕྱག་འཚལ་བསྟོད། །ཞེ་སྡང་དག་ཕྱིར་སྙན་གཡས་སྦྲུལ་ནག་འཕྱོ། །ཁམས་གསུམ་སྒྲ་སྒྲོགས་སྙན་གཡོན་སེང་གེས་བརྒྱན། །སྙན་པ་སྒྲོག་ཕྱིར་གསེར་གྱི་དྲིལ་བུ་འཆང་། །ཁམས་གསུམ་སྐད་ཅིག་ཁྱབ་ལ་ཕྱག་འཚལ་བསྟོད། །དགྲ་བགེགས་འདུལ་ཕྱིར་སྤྱན་གསུམ་ཕྱོགས་བཅུར་གཟིགས། །ཤ་ཆེན་གསོལ་ཕྱིར་མི་རོ་ཞལ་དུ་བཅུག་བདུད་བཞི་འཇོམས་ཕྱིར་རྣོ་གདུག་མཆེ་བ་གཙིགས། །མ་རུངས་རྡུལ་དུ་བརླག་ལ་ཕྱག་འཚལ་བསྟོད། །ཆོས་ཉིད་དོན་ལྡན་ཞིང་ཆེན་ལྤགས་པ་གསོལ། །ཐེག་མཆོག་གསུམ་ལྡན་གླང་ཆེན་ཀོ་རློན་གསོལ། །སྟོང་གསུམ་དྲག་ལྡན་རེ་ལྡེའི་ཤམ་བུས་དཀྲིས། །སྨོན་ལམ་རྣམ་དག་ལྡན་ལ་ཕྱག་འཚལ་བསྟོད། །དགྲ་སྲོག་གཅོད་པའི་ཕྱག་གཡས་རལ་གྲི་ཕྱར། །བདུད་ཁྲག་གསོལ་ཕྱིར་འོག་མས་ཐོད་ཁྲག་འཛིན། །སྲིད་གསུམ་བསྒྲལ་ཕྱིར་གཡོན་པས་ཤཀྟི་བསྣམས། །གཡུལ་ངོ་བཟློག་ཕྱིར་འོག་མས་ཏྲི་ཤུ་འཛིན། །ཆོས་ཉིད། དོན་རྟོགས་རུས་པའི་རྒྱན་གྱིས་སྤྲས། །ལྷ་མིན་འདུལ་མཛད་ཐོད་རློན་དོ་ཤལ་བྱས། །རྫུ་འཕྲུལ་སྟོན་ཕྱིར་ལྕགས་སྒྲོག་སྔོན་པོས་བརྒྱན། །བདུད་དཔུང་བསྲེག་པར་མཛད་ལ་
ཕྱག་འཚལ་བསྟོད། །སྲིན་པོ་འདུལ་ཕྱིར་སྤྲུལ་པའི་བོང་བུ་ཆིབས། །སྟོང་གསུམ་ཁྱབ་ཕྱིར་འཚུབ་མའི་ནང་ན་བཞུགས། །དུར་ཁྲོད་གནས་ཕྱིར་ཤ་ཟ་མང་པོས་བསྐོར་། །སྣང་སྲིད་དབང་སྡུད་གསུང་ནི་འབྲུག་ལྟར་སྒྲོག །རྣམ་རྟོག་བསྲེག་མཛད་མེ་དཔུང་ནང་ན་བཞུགས། །སྟོབས་ཆེན་དམ་ཚིག་ཅན་ལ་ཕྱག་འཚལ་བསྟོད། །བྷྱོ༔ ཁྱོད་ཀྱི་གཡས་ནས་སྤྲུལ་པའི་ཕོ་ཉ་ནི། །དམར་མོ་སྤྱན་གསུམ་ལྕགས་ཀྱི་རལ་པ་ཅན། །ཕྱག་གཡས་ལྕགས་ཀྱུས་དགྲ་བགེགས་སྙིང་ནས་འདྲེན། །དམ་ཉམས་འཆིངས་བྱེད་ཞགས་པ་གཡོན་ན་ཐོགས། །སྟོང་གསུམ་རྒྱུ་ཕྱིར་ཆིབས་སུ་བོང་བུ་ཆིབས། །དྲག་མོ་འགུག་བྱེད་གསུམ་ལ་ཕྱག་འཚལ་བསྟོད། །ཁྱོད་ཀྱི་གཡོན་ནས་སྤྲུལ་པའི་ལས་མཁན་ནི། །ནག་མོ་སྤྱན་གསུམ་ཁྲག་གི་རལ་པ་ཅན། །མ་རུངས་གསོད་བྱེད་ཕྱག་གཡས་རལ་གྲི་ཕྱར། །གཙོ་ལ་སྟོབ་ཀྱིས་ཙིཏྟ་གཡོན་ན་ཐོགས། །སྟོང་གསུམ་རྒྱུ་ཕྱིར་བོང་བུ་ཆིབས་སུ་ཆིབས། །དགྲ་བགེགས་གསོད་བྱེད་གསུམ་ལ་ཕྱག་འཚལ་བསྟོད། །ཁྱོད་ཀྱི་མདུན་ནས་སྤྲུལ་པའི་ལས་མཁན་ནི། །གཅེར་བུ་སྤྱན་གསུམ་དུང་གི་མཆེ་བ་ཅན། །གནོད་བྱེད་སུན་འབྱིན་
ཕྱག་གཡས་དགྲ་སྙིང་ཐོགས། །གདུག་པ་སྐྲག་མཛད་གཡོན་ན་ཐོད་ཁྲག་ཐོགས། །མཁའ་ལ་རྒྱུ་ཕྱིར་རླུང་གི་བོང་བུ་ཆིབས། །དམར་མོ་ཙ་མུན་ཏི་ལ་ཕྱག་འཚལ་བསྟོད། །ཁྱོད་ཀྱི་རྒྱབ་ནས་ལས་བྱེད་ཕོ་ཉ་ནི། །དམར་ནག་ཕུར་པའི་ལྷ་མོ་རེ་མ་ཏི། །སྤྱན་གསུམ་མཆེ་གཙིགས་གཏུམ་དྲག་དྲེའུ་ཞོན། །ཕྱག་གཡས་རལ་གྲིས་དམ་ཉམས་སྲོག་རྩ་གཅོད། །གཡོན་པས་ལྕགས་ཕུར་དགྲ་བོའི་སྙིང་ལ་འདེབས། །ནག་མོ་ཐུན་ཁྲག་འདེབས་ལ་ཕྱག་འཚལ་བསྟོད། །།བྷྱོཿ གྲུ་གསུམ་འབར་བའི་གཡས་ཟུར་ནས། །གསོད་བྱེད་སྐུ་ཡི་ཤན་པ་མོ། །ནག་མོ་གཅེར་བུ་རལ་པ་ཅན། །ཕྱག་ན་དགྲ་སྙིང་ཐོད་ཁྲག་བསྣམས། །ཆིབས་སུ་རླུང་གི་བོང་བུ་ཆིབས། །སྐུ་ཡི་ལས་མཁན་མ་ལ་ཕྱག་འཚལ་བསྟོད། །བྷྱོཿ གྲུ་གསུམ་འབར་བའི་གཡོན་ཟུར་ནས། །གསོད་བྱེད་གསུང་གི་ཤན་པ་མོ། །ནག་མོ་གཅེར་བུ་རལ་པ་ཅན། །ཕྱག་ན་དགྲ་སྙིང་ཐོད་ཁྲག་བསྣམས། །ཆིབས་སུ་རླུང་གི་བོང་བུ་ཆིབས་། །གསུང་གི་ལས་མཁན་མ་ལ་ཕྱག་འཚལ་བསྟོད། བྷྱོཿ གྲུ་གསུམ་འབར་བའི་མདུན་ཟུར་ནས། །གསོད་བྱེད་ཐུགས་ཀྱི་ཤན་པ་མོ། །ནག་མོ་གཅེར་བུ་རལ་པ་
ཅན། །ཕྱག་ན་དགྲ་སྙིང་ཐོད་ཁྲག་བསྣམས། །ཆིབས་སུ་རླུང་གི་བོང་བུ་ཆིབས། །ཐུགས་ཀྱི་ལས་མཁན་མ་ལ་ཕྱག་འཚལ་བསྟོད། །སྐུ་ལས༴ ཡོན་ཏན༴ གསུང་ལས༴ ཕྲིན་ལས་སྤྲུལ་པའི་མཁའ་འགྲོའི་ཕོ་ཉ་ནི། །སྐུ་མདོག །དཀར་མོ། སེར་མོ། དམར་མོ། ལྗང་མོ། ཆིབས་སུ་བོང་བུ་ཆིབས། ཕྱག་གཡས་གྲི་གུག་གཡོན་པས་བྷན་བསྣམས། །ཕྲིན་ལས་འགྲུབ་མཛད་བཞི་ལ་ཕྱག་འཚལ་བསྟོད། །ཕྲིན་ལས་མཁའ་འགྲོ་བཞི་འདི་འགྲེས་སོ། བྷྱོཿ མ་གཅིག་དཔལ་ལྡན་ལྷ་མོ་ནི། །ཤར་གྱི་ཕྱོགས་ཀྱི་ཕོ་ཉ་ནི། །སྐུ་མདོག་དཀར་མོ་དུང་གི་མདོག །གཅེར་བུ་སྤྱན་གསུམ་མཆེ་བ་གཙིགས། །ཕྱག་གཉིས་འབར་བའི་གྲི་ཐོད་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས། །དུར་ཁྲོད་བདག་མོ་ཁྱོད་ལ་ཕྱག་འཚལ་བསྟོད། །བྷྱོ༔ མ་གཅིག་དཔལ་ལྡན་ལྷ་མོ་ནི། །བྱུང་གི་ཕྱོགས་ཀྱི་ཕོ་ཉ་ནི། །སྐུ་མདོག་སེར་མོ་གསེར་གྱི་མདོག །གཅེར་བུ་སྤྱན་གསུམ་མཆེ་བ་གཙིགས། །ཕྱག་གཉིས་འབར་བའི་གྲི་ཐོད་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །
བརྐྱང་བསྐུམ་བམ་གྱི་གདན་ལ་བཞུགས། །དུར་ཁྲོད་ཞལ་མ་ཁྱོད་ཕྱག་འཚལ་བསྟོད། །བྷྱོ༔ མ་གཅིག་དཔལ་ལྡན་ལྷ་མོ་ནི། །ནུབ་ཀྱི་ཕྱོགས་ཀྱི་ཕོ་ཉ་ནི། །སྐུ་མདོག་དམར་མོ་བྱུ་རུའི་མདོག་།གཅེར་བུ་སྤྱན་གསུམ་མཆེ་བ་གཙིགས། །ཕྱག་གཉིས་འབར་བའི་གྲི་ཐོད་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས། །གཏུམ་མོ་གཟི་བརྗིད་ཁྱོད་ལ་ཕྱག་འཚལ་བསྟོད། །བྷྱོ་མ་གཅིག་དཔལ་ལྡན་ལྷ་མོ་ནི། །ལྷོ་ཡི་ཕྱོགས་ཀྱི་ཕོ་ཉ་ནི། །སྐུ་མདོག་ནག་མོ་མུན་པའི་མདོག །གཅེར་བུ་སྤྱན་གསུམ་མཆེ་བ་གཙིགས། །ཕྱག་གཉིས་འབར་བའི་གྲི་ཐོད་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས། །མ་མོ་ཡི་དྭགས་ཁ་ལ་ཕྱག་འཚལ་བསྟོད། །བྷྱོ༔ མ་གཅིག་དཔལ་ལྡན་ལྷ་མོ་ནི། །བྱང་ཤར་མཚམས་ཀྱི་ཕོ་ཉ་ནི། །གཡས་སེར་གཡོན་དཀར་ཕྱེད་གཟུགས་འཛིན། །གཅེར་བུ་སྤྱན་གསུམ་མཆེ་བ་གཙིགས། །ཞལ་གཅིག་ཕྱག་གཉིས་གྲི་གུག་ཙིཏྟ་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས། །དམ་
ཚིག་སྲུང་མ་ཁྱོད་ལ་ཕྱག་འཚལ་བསྟོད། །བྷྱོ་མ་བ་གཅིག་དཔལ་ལྡན་ལྷ་མོ་ནི། །ཤར་ལྷོ་མཚམས་ནས་བསྐུལ་བ་ནི། །གཡས་སེར་གཡོན་ནག་ཕྱེད་གཟུགས་འཛིན། །གཅེར་བུ་སྤྱན་གསུམ་མཆེ་བ་གཙིགས། །ཞལ་གཅིག་ཕྱག་གཉིས་གྲི་གུག་ཙིཏྟ་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས། །མ་མོ་ཁྲག་དགའ་མ་ལ་ཕྱག་འཚལ་བསྟོད། །བྷྱོ། མ་གཅིག་དཔལ་ལྡན་ལྷ་མོ་ནི། །ལྷོ་ནུབ་མཚམས་ཀྱི་ཕོ་ཉ་ནི། །གཡས་ནག་གཡོན་དམར་ཕྱེད་གཟུགས་འཛིན། །གཅེར་བུ་སྤྱན་གསུམ་མཆེ་བ་གཙིགས། །ཞལ་གཅིག་ཕྱག་གཉིས་གྲི་གུག་ཙིཏྟ་བསྣམས། །ཁྲག་ཞག་དུར་ཁྲོད་ཆས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས་། །ཀཱ་ལི་སྒྲ་སྒྲོག་མ་ལ་ཕྱག་འཚལ་བསྟོད། ། བྷྱོཿ མ་གཅིག་དཔལ་ལྡན་ལྷ་མོ་ནི། །ནུབ་བྱང་མཚམས་ཀྱི་ཕོ་ཉ་ནི། །གཡས་དམར་གཡོན་སེར་ཕྱེད་གཟུགས་འཛིན། །གཅེར་བུ་སྤྱན་གསུམ་མཆེ་བ་གཙིགས། །ཞལ་གཅིག་ཕྱག་གཉིས་གྲི་གུག་ཙིཏྟ་བསྣམས། །ཁྲག་ཞག་དུར་ཁྲོད་ཆེས་ཀྱིས་བརྒྱན། །བརྐྱང་བསྐུམ་བམ་གྱི་གདན་ལ་བཞུགས། །
མ་མོ་སྦྱོང་འཛིན་མ་ལ་ཕྱག་འཚལ་བསྟོད། །ཁྲག་འཐུང་ནག་མོའི་སྤྱན་སྔར་ཁས་བླངས་པའི། །ཤར་ནས་ལས་མཁན་སྤྲུལ་པའི་ཕོ་ཉ་ནི། །དཀར་མོ་ཞལ་གཅིག་ཕྱག་གཉིས་སེང་གེའི་གདོང་། །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །དྲེལ་ནག་རྐང་གསུམ་ཆིབས་ནས་ཕྱོགས་བཅུར་རྒྱུག །འགྱིང་ཞིང་དགྲ་བགེགས་རོལ་ལ་ཕྱག་འཚལ་བསྟོད། །ལྷོ་ནས་དམར་ནག་ཞལ་གཅིག་སྟག་གི་གདོང་། །དུར་ཁྲོད་ཆས་རྒྱན་གྲི་དང་ཐོད་པ་འཛིན། །དྲེལ་ནག་རྐང་གསུམ་ཆིབས་ནས་གནོད་བྱེད་ཀྱི། །ཁྲོ་ཞིང་ཤ་ཁྲག་རོལ་ལ་ཕྱག་འཚལ་བསྟོད། །ནུབ་ནས་སྔོ་ནག་ཞལ་གཅིག་སྤྱང་ཀིའི་གདོང་། །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །དྲེལ་ནག་རྐང་གསུམ་ཆིབས་ནས་བགེགས་རྣམས་འཇོམས། །རྒྱུག་ཅིང་དགྲ་བགེགས་རོལ་ལ་ཕྱག་འཚལ་བསྟོད། །བྱང་ནས་མཐིང་ནག་ཞལ་གཅིག་ཕག་གི་གདོང་། །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །དྲེལ་ནག་རྐང་གསུམ་ཆིབས་ནས་འབྱུང་པོའི་ཤ། །འདུར་ཞིང་ཞལ་དུ་སྟོབ་ལ་ཕྱག་འཚལ་བསྟོད། །བྱང་ཤར་མཚམས་ནས་སྨུག་ནག་བྱ་རྒོད་མགོ །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །
དྲེལ་ནག་ཞོན་ནས་དགྲ་བགེགས་ཤ་ཁྲག་རྣམས། །རྔམ་ཞིང་རྔམ་ཞིང་རོལ་ལ་ཕྱག་འཚལ་བསྟོད། །ཤར་ལྷོ་མཚམས་ནས་མུན་མཐོང་ལྟུང་ཀའི་གདོང་། །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །དྲེལ་ནག་ཞོན་ནས་བདུད་ཁྲག་མ་ལུས་པ། །མཆོང་ཞིང་མཆོང་ཞིང་གསོལ་ལ་ཕྱག་འཚལ་བསྟོད། །ལྷོ་ནུབ་མཚམས་ནས་ཁྲག་མདོག་དུར་བྱའི་མགོ །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །དྲེལ་ནག་ཞོན་ཅིང་ཉམས་པའི་སྲོག་དང་ཕྲལ། །རྒོད་ཅིང་རྒོད་ཅིང་འཇོམས་ལ་ཕྱག་འཚལ་བསྟོད། །ནུབ་བྱང་མཚམས་ནས་དུད་མདོག་བྱ་རོག་གདོང་། །དུར་ཁྲོད་ཆས་བརྒྱད་གྲི་དང་ཐོད་པ་འཛིན། །དྲེལ་ནག་ཞོན་ནས་དགྲ་བགེགས་སྙིང་ནས་འདྲེན། །ལྡིང་ཞིང་ལྡིང་ཞིང་རོལ་ལ་ཕྱག་འཚལ་བསྟོད། །ལས་མཁན་ཕོ་ཉ་ནག་མོ་ཀང་ཀའི་གདོང་། །ཀུན་ཀྱང་མདའ་གཞུ་སྤུ་གྲི་བྷན་དང་། །སྦྲུལ་ནག་བྷནྡྲ་རྒྱུ་ཞགས་ནད་རྐྱལ་བསྣམས། །མ་རུངས་འཆིང་། བྱེད་རྣམས་ལ་ཕྱག་འཚལ་བསྟོད། །ཞིང་ཆེན་སྟོད་གཡོགས་རེ་ལྡེའི་ཤམ་བུ་དཀྲིས། །ཐོད་རློན་དོ་ཤལ་ཆིབས་སུ་སྟག་སྤྱང་དང་། །སྤྲེའུ་དྲེལ་ནག་ཞོན་ནས་ཕོ་ཉར་འགྱེད། །
དགྲ་བས་ེགས་སྒྲོལ་མཛད་བཞི་ལ་ཕྱག་འཚལ་བསྟོད། །གཞན་ཡང་ལས་མཁན་ནག་མོ་འབུམ་སྡེ་དང་། །མ་མོ་མཁའ་འགྲོ་བྱེ་བས་བསྐོར་བའི་ཚོགས། །ནག་མོ་གཅེར་བུ་འཇིགས་ཤིང་སྐུ་བཤལ་བ། །ཞལ་གཅིག་ཕྱག་གཉིས་གྲི་དང་ཐོད་པ་འཛིན། །སྟོང་གསུམ་མ་ལུས་སྤྲིན་གྱི་ཚོགས་ལྟར་གཏིབས། །སྲིད་གསུམ་གཡོ་བར་མཛད་ལ་ཕྱག་འཚལ་བསྟོད། །དེ་ལྟར་ཁྱོད་ལ་བསྟོད་ཅིང་ཞུ་བ་ནི། །སྔོན་ཚེ་ཐུགས་དམ་གཉན་པོ་བརྩེར་དགོངས་ལ། །བདག་ཅག་རྣལ་འབྱོར་དམ་ཚིག་ལྡན་པ་དང་། །བསྟན་ལ་རབ་དད་དཀར་པོའི་ཕྱོགས་རྣམས་ལ། །བདུད་རྩི་རྒྱུན་ཕབ་ནད་རྣམས་ཞི་བ་དང་། །ལོངས་སྤྱོད་ཚེ་འབྲུ་ལ་སོགས་འཕེལ་བར་མཛོད། །མ་རུངས་སེམས་འཛིན་ནག་པོའི་ཕྱོགས་རྣམས་ལ། །དུག་གི་རླུང་བུས་ནད་ཀྱི་གཟིར་ཞིང་སློང་། །ཁོང་ཁྲག་སྐྱུག་ཅིང་ཆོ་ངེས་གནམ་དུ་འདེབས། །སྨྱོ་འབོག་ཐོངས་ལ་བདུན་རྒྱུད་རྩེད་ནས་ཆོད། །བདུད་དང་དགྲ་བགེགས་འབྱུང་པོ་རྡུལ་དུ་རློགས། །བསྟན་པ་སྲུང་བའི་ལས་འདི་མྱུར་དུ་བསྒྲུབ། །དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་སོགས་བིར་
ཝ་པས་མཛད་པའི་འདོད་གསོལ་དེ་ཀུན་ལ་སྦྱོར། ཅེས་གསོད་བྱེད་མ་གསུམ་དང་མ་མོ་བརྒྱད་ཀྱི་བསྟོད་པ་འདི་སློབ་དཔོན་ཆེན་པོ་བིར་ཝ་པས་མཛད་པའི་ཁ་བསྐང་གི་ཚུལ་དུ་ཨ་རཱ་གས་ཐུན་མཚམས་གཅིག་ལ་བྲིས་པའོ། ། བྷྱོཿ མ་གཅིག་དཔལ་ལྡན་ལྷ་མོ་ནི། །སྐུ་སྤྲུལ་མ་མོ་དཀར་མོ་འབུམ། །གསུང་སྤྲུལ་མ་མོ་དམར་མོ་འབུམ། །ཐུགས་སྤྲུལ་མ་མོ་ནག་མོ་འབུམ། ཡོན་ཏན་སྤྲུལ་པ་སེར་མོ་འབུམ། །ཕྲིན་ལས་སྤྲུལ་པ་ལྗང་མོ་འབུམ། །ཕྲིན་ལས་རྣམ་བཞི་ཐོགས་མེད་བསྒྲུབ། །ཡེ་ཤེས་མ་མོའི་ཚོགས་ལ་ཕྱག་འཚལ་བསྟོད། བྷྱོཿ གཞན་ཡང་དུར་ཁྲོད་གནས་བརྒྱད་ན། །མཁའ་འགྲོ་ཤ་ཟ་ནམ་གྲུའི་རིགས། །སྲིན་མོ་མ་མོ་གནོད་སྦྱིན་མོ། །མ་བདུན་སྲིང་བཞི་འབར་མ་དགུ། །དུས་བཞིའི་ཞགས་ཐོགས་མཚོན་ཆ་ཅན། །གཏུམ་མོ་ཛ་ཏི་ལ་སོགས་པ། །ཀུན་ཀྱང་རྒོད་ཅིང་རོ་ལ་ཟ། །ལས་ཀྱི་མ་མོའི་ཚོགས་ལ་བསྟོད། །བྷྱོ༔ རི་རབ་ཁོང་དང་རྒྱ་མཚོའི་སྟེང་། །བར་སྣང་གནས་པའི་མཚོན་ཆ་ཅན། །བདུད་དང་གཤིན་རྗེའི་ཞགས་ཐོགས་མ། །དམར་སེར་དུང་མགྲིན་དམར་སྐྱ་མ། །རྣམ་པར་འཕྱང་མ་ཕྱག་ཚང་མ། །ཚོགས་ཁང་ལྷག་ཕུད་ཉུལ་བྱེད་མ། །ལག་ན་མཚོན་ཐོགས་
བཤུགས་གླུ་ལེན། །དུར་ཁྲོད་བརྒྱད་པོ་ཉུལ་ལ་བསྟོད། །བྷྱོ༔ མ་མོ་བ་ལམ་དྲིལ་སྣ་མ། །མ་མོ་ཁྲི་སྨན་སི་ལེ་མ། །མ་མོ་སྟག་སྨན་སོར་ལྡེམ་མ། །སྲིང་ལྕམ་བརྟན་མ་བཅུ་གཉིས་པོ། །སྲིད་པའི་མ་མོ་སྟོང་ཕྲག་གཅིག །སྲིན་མོ་སྟོང་ཕྲག་དྲུག་ཅུ་བཞི། །འཁོར་དང་ཡང་སྤྲུལ་བསམ་མི་ཁྱབ། །འཇིག་རྟེན་མ་མོའི་ཚོགས་ལ་བསྟོད། །རྒྱས་པར་སྤྲོ་ན་ལྷ་མོའི་བསྐུལ་ཤེས་ཚད་འདིར་སྦྱར། དེ་ལྟར་ཁྱོད་ལ་བསྟོད་ཅིང་ཞུ་བ་ནི་ཞེས་སོགས་བྱ། ཡང་འཁོར་གྱི་བསྟོད་པ་ནི། རྒྱུད་ཀྱི་རྗེས་སུ་འབྲང་ནས་ཨ་རཱ་གས་སྦྱར་བའོ། །དེ་ལྟར་གཏོར་རྫོང་ཐམས་ཅད་ཚར་ནས། འདི་ལྟར་བསྐུལ་བའི་ལྷ་མོ་འཁོར་བཅས་གོ་གྱོན་མཚོན་ཐོགས་པར་བསམས་ལ། ཧཱུྃ། དཔལ་ལྡན་ལྷ་མོ་དམག་ལ་ཆོས། །སྲིད་པའི་རྒྱལ་མོ་དམག་ལ་ཆོས། །སྐུ་མདོག་མཐིང་ནག་འབར་བ་ལ། །ན་བཟའ་རེ་ལྡེ་ནག་པོ་གསོལ། །མི་ལྤགས་གཡང་གཞི་རློན་པ་གྱོན། །གླང་ཆེན་ཀོ་བས་སྐུ་སྟོད་གཡོགས། །ཞེ་སྡང་སྦྲུལ་གྱི་སྐ་རགས་བཅིངས། །ཐོད་སྐམ་ལྔ་ཡིས་དབུ་ལ་བརྒྱན། །ཐོད་རློན་ལྔ་བཅུས་དོ་ཤལ་བྱས། །ཆིབས་སུ་བོང་བུ་དམར་གྲྭ་ཆིབས། །རྫུ་འཕྲུལ་བོང་བུ་རླུང་བས་མགྱོགས། །ཕྱག་ན་རལ་གྲི་ནད་རྐྱལ་ཐོགས། །མ་མོ་བྱེ་བའི་
དམག་དང་བཅས། །དགྲ་བོའི་སྟེང་དུ་དམག་དཔུང་ཆོས། །དེ་ཡི་ཁ་ཁྲིད་གཡོག་མོ་ནི། །རེ་མ་ཏི་ནི་སྐུ་མདོག་མཐིང་ནག་ལ། །ཞལ་གཅིག་ཕྱག་བཞི་འཇིགས་པའི་གཟུགས། །གཡས་གཡོན་གཉིས་ཀྱི་དང་པོ་ན། །ཁ་ཊཾ་དང་ནི་མེ་ལོང་འཛིན། །གཡས་གཡོན་གཉིས་ཀྱི་འོག་མ་ན། །ལྕགས་ཀྱི་ཕུར་བུ་སྦྲུལ་ཞགས་འཛིན། །དྨོརེ་ལྡེའི་ཤམ་ཐབས་སྐུ་ལ་གསོལ། །ཆིབས་སུ་དྲེལ་རྟ་རྐང་གསུམ་ཆིབས། །དྲེལ་ནག་རྐང་གསུམ་རླུང་བས་མགྱོགས། །དཔལ་ལྡན་ལྷ་མོ་ཐོག་དང་འདྲ། །ནག་མོ་འབུམ་སྡེ་དམག་ལ་ཆོས། །དགྲ་བོའི་སྟེང་དུ་དམག་ལ་ཆོས། བྷྱོཿ ཤར་གྱི་ཕྱོགས་སུ་དམག་འདྲེན་ན། །དམག་དཔོན་རྡོ་རྗེ་མཁའ་འགྲོས་གྱིས། །དམག་སྣ་དཔལ་ལྡན་ལྷ་མོས་དྲོངས། །དམག་སྟེང་ཡུལ་འཁོར་སྲུང་གིས་སྐྱོངས། །དམག་འདི་དགྲ་བོའི་ཡུལ་དུ་བྷྱོ། །བྷྱོ༔ ལྷོ་ཡི་ཕྱོགས་སུ་དམག་འདྲེན་ན། །དམག་དཔོན་རིན་ཆེན་མཁའ་འགྲོས་གྱིས། །དམག་སྣ་རེ་མ་ཏི་ཡིས་དྲོངས། །དམག་སྟེང་འཕགས་སྐྱེས་པོ་ཡིས་སྐྱོངས། །དམག་འདི་དགྲ་བོའི་ཡུལ་དུ་དྲོངས། བྷྱོཿ ནུབ་ཀྱི་ཕྱོགས་སུ་དམག་འདྲེན་ན། །དམག་དཔོན་
པདྨ་མཁའ་འགྲོས་གྱིས། །དམག་སྣ་སྲིད་པའི་རྒྱལ་མོས་དྲོངས། །དམག་སྟེང་སྤྱན་མི་བཟང་གིས་སྐྱོངས། །དམག་འདི་དགྲ་བོའི་ཡུལ་དུ་དྲོངས། ། བྷྱོཿ བྱང་གི་ཕྱོགས་སུ་དམག་འདྲེན་ན། །དམག་དཔོན་ལས་ཀྱི་མཁའ་འགྲོས་གྱིས། །དམག་སྣ་མ་མོ་ཡོངས་ཀྱིས་དྲོངས། །དམག་སྟེང་རྣམ་ཐོས་སྲས་ཀྱིས་སྐྱོངས། །དམག་འདི་དགྲ་བོའི་ཡུལ་དུ་བྷྱོ། །རིགས་བཞི་མཁའ་འགྲོ་དམག་ལ་ཆོས། །རྒྱལ་ཆེན་བཞི་ཡང་དམག་ལ་ཆོས། །མ་མོ་ཐམས་ཅད་དམག་ལ་ཆོས། །དགྲ་བགེགས་འདུལ་བའི་ཕྲིན་ལས་མཛོད། །སངས་རྒྱས་བསྟན་པ་རིན་ཆེན་དང་། །དམ་ཚིག་ཅན་གྱི་བྱ་ར་གྱིས། །སྡིག་ཅན་འདུལ་བའི་ཕྲིན་ལས་མཛོད། །དམ་ཉམས་དགྲ་ལ་ཁྲམ་ཁ་ཐོབ། །དམ་ཉམས་ཡུལ་དུ་དམག་ལ་ཆོས། །ཐུལ་ཅིག་སྡང་དགྲ་གནོད་པའི་བགེགས། །བཟློག་ཅིག་ལྷ་འདྲེའི་དམག་སྣ་དགྲ་ལ་ཟློག །དེ་ནས་གསེར་སྐྱེམས་གང་ཡང་རུང་བ་ལྟར་བྱའོ། །དེ་ནས་ཕྱོགས་བཞི་ནས་རྩང་རེ་ཤབ་ཅིང་། ཀྱེ། རི་རབ་གླིང་བཞིའི་ཤར་ཕྱོགས་ནས། །དར་དཀར་གུར་ཕུབ་ཀྱི་ལི་ལི། །དུང་གི་ཚུགས་ཤིང་ཧྲབས་སེ་ཧྲབ། །དར་དཀར་ཆོན་ཐག་སེངས་སེ་སེང་། །དར་དཀར་
ཡོལ་བ་ལྷུབས་སེ་ལྷུབ། །དེ་འདྲ་གུར་གྱི་ནང་ཤེད་ནས། །བུད་མེད་དཀར་མོ་ཤེལ་གྱི་ལེན་ཕྲན་ཅན། །ཕྱག་ན་དུང་གི་ལྡེའུ་མིག་བསྣམས། །གླིང་བཞི་ཤར་གྱི་སྒོ་དབྱེ་འཚལ། །མདོས་བདག་ཆེན་མོས་མདོས་བཞེས་ལ། །གླུད་བདག་ཆེན་མོས་གླུད་ལོངས་ཤིག །ཕྱིན་ཆད་འཁོར་འདིར་གནོད་པ་མ་བྱེད་ཅིག །ཀྱེ། རི་རབ་གླིང་བཞིའི་ལྷོ་ཕྱོགས་ནས། །མུ་མེན་གུར་ཕུབ་ཀྱི་ལི་ལི། །གཡུ་ཡི་ཚུགས་ཤིང་ཧྲབས་སེ་ཧྲབ། །དར་སྔོན་ཆོན་ཐག་སེངས་སེ་སེང་། །དར་སྔོན་ཡོལ་བ་ལྷུབས་སེ་ལྷུབ། །དེ་འདྲ་གུར་གྱི་ནང་ཤེད་ནས། །བུད་མེད་སྔོན་མོ་གཡུ་ཡི་ལེན་ཕྲན་ཅན། །གླིང་བཞི་ལྷོ་ཡི་སྒོ་དབྱེ་འཚལ། །མདོས་བདག་ཆེན་མོས་མདོས་བཞེས་ལ། །གླུད་བདག་ཆེན་མོས་གླུད་ལོངས་ཤིག །ཕྱིན་ཆད་འཁོར་འདིར་གནོད་པ་མ་བྱེད་ཅིག །ཀྱེ། རི་རབ་གླིང་བཞིའི་ནུབ་ཕྱོགས་ནས། །དར་དམར་གུར་ཕུབ་ཀྱི་ལི་ལི། །བྱུ་རུའི་ཚུགས་ཤིང་ཧྲབས་སེ་ཧྲབ། །དར་དམར་ཆོན་ཐག་སེངས་སེ་སེང་། །དར་དམར་ཡོལ་བ་ལྷུབས་སེ་ལྷུབ། །དེ་འདྲ་གུར་གྱི་ནང་ཤེད་ནས། །བུད་མེད་དམར་མོ་ཟངས་ཀྱི་ལེན་ཕྲན་ཅན། །ཕྱག་ན་
ཟངས་ཀྱི་ལྡེ་མིག་བསྣམས། །གླིང་བཞི་ནུབ་ཀྱི་སྒོ་དབྱེ་འཚལ། །མདོས་བདག་ཆེན་མོས་མདོས་བཞེས་ལ། །གླུད་བདག་ཆེན་མོས་གླུད་ལོངས་ཤིག །ཕྱིན་ཆད་འཁོར་འདིར་གནོད་པ་མ་བྱེད་ཅིག །ཀྱེ། རི་རབ་གླིང་བཞིའི་བྱང་ཕྱོགས་ནས། །དར་ནག་གུར་ཕུབ་ཀྱི་ལི་ལི། །ལྕགས་ཀྱི་ཚུགས་ཤིང་ཧྲབས་སེ་ཧྲབ། །དར་ནག་ཆོན་ཐག་སེངས་སེ་སེང་། །དར་ནག་ཡོལ་བ་ལྷུབས་སེ་ལྷུབ། །དེ་འདྲ་གུར་གྱི་ནང་ཤེད་ནས། །བུད་མེད་ནག་མོ་ལྕགས་ཀྱི་ལེན་ཕྲན་ཅན། །ཕྱག་ན་ལྕགས་ཀྱི་ལྡེ་མིག་བསྣམས། །གླིང་བཞི་བྱང་གི་སྒོ་དབྱེ་འཚལ། །མདོས་བདག་ཆེན་མོས་མདོས་བཞེས་ལ། །གླུད་བདག་ཆེན་མོས་གླུད་ལོངས་ཤིག །ཕྱིན་ཆད་འཁོར་འདིར་གནོད་པ་མ་བྱེད་ཅིག །ཀྱེ། རི་རབ་ཆེན་པོའི་རྩེ་མོ་ནས། །དར་ཆེན་གུར་ཕུབ་ཀྱི་ལི་ལི། །གསེར་གྱི་ཚུགས་ཤིང་ཧྲབས་སེ་ཧྲབ། །དར་སེར་ཆོན་ཐག་སེངས་སེ་སེང་། །དར་སེར་ཡོལ་བ་ལྷུབས་སེ་ལྷུབ། །དེ་འདྲ་གུར་གྱི་ནང་ཤེད་ནས། །བུད་མེད་སེར་མོ་ལྕགས་ཀྱི་ལེན་ཕྲན་ཅན། །ཕྱག་ན་གསེར་གྱི་ལྡེའུ་མིག་བསྣམས། །གླིང་བཞི་དབུས་ཀྱི་སྒོ་དབྱེ་འཚལ། །མདོས་བདག་ཆེན་
མོས་མདོས་བཞེས་ལ། །།གླུད་བདག་ཆེན་མོས་གླད་ལོངས་ཤིག །ཕྱིན་ཆད་འཁོར་འདིར་གནོད་པ་མ་བྱེད་ཅིག །དེ་ནས་ལྷ་མོ་འཁོར་བཅས་མདུན་གྱིས་ནམ་མཁའ་ལ་བཏེག་སྟེ། ཨོཾ་བཛྲ་ལ་སྱ་རཱ་ག་ཡ་མི། སླར་གཏོར་ཆེན་དེ་གསོ་བྲན་བྱས་ལ་སྔར་ལྟར་བསྔོ། ཨོ་དཔལ་ལྡན་ལྷ་མོ་སོགས། བསྟོད་རིང་ཚར་གཅིག་གིས་བསྟོད། བྷྱོ། ད་ནི་གཏོར་མདོས་བསྐྱོད་རེ་རན། །ད་ནི་སྐུ་བསྐྱོད་བསྐྱོད་རེ་རན། །ལྷ་མོ་ནག་མོ་སྐུ་བསྐྱོད་འཚལ། །དགྲ་བོའི་ཡུལ་དུ་སྐུ་སྐྱོད་ཅིག །ཆིབས་ཁ་དགྲ་བོའི་ཡུལ་དུ་སྒྱུར། །ཕོ་བྲང་དགྲ་བོའི་ཡུལ་དུ་ཐོབ། །སྡང་བའི་དགྲ་ལ་ཞལ་ཁ་སྟོན། །བཀའ་ཆད་སྡང་བའི་དགྲ་ལ་ཆོད། །ཐུན་ཟོར་སྡང་བའི་དགྲ་ལ་རྒྱོབས། །ཐུགས་ཀྱི་མནག་པ་དགྲ་ལ་གྱིས། །མ་མོ་འཁོར་བཅས་དམག་ལ་ཆོས། །དམག་དཔུང་བསྐྱེད་ལ་རུ་མཚོན་ཕྱིར། །དམག་ཚོགས་སྡང་བའི་དགྲ་ལ་ཡ། །སྡང་བའི་དགྲ་ལ་མདོས་ཟོར་ཡ། །གནོད་པའི་བགེགས་ལ་མདོས་ཟོར་ཡ། །བར་ཆད་བགེགས་ལ་མདོས་ཟོར་ཡ། །ཆག་ཆེན་ཉམ་ང་བཟློག་ཕྱིར་ཆོས། །བན་བྱད་བོན་བྱད་བཟློག་ཕྱིར་ཆོས། །རྒྱ་འདྲེ་སྟོང་འདྲེ་བཟློག་ཕྱིར་ཆོས། །མ་
མོའི་ནད་ཡམས་བཟློག་ཕྱིར་ཆོས། །སྡེ་བརྒྱུད་ཆད་པ་བཟློག་ཕྱིར་ཆོས། །འབྱུང་པོའི་བར་ཆད་བཟློག་ཕྱིར་ཆོས། །ལྟས་ངན་མཚན་ངན་བཟློག་ཕྱིར་ཆོས། །དུས་མིན་འཆི་བ་བཟློག་ཕྱིར་ཆོས། །དུས་ཀྱི་འཆི་བ་བཟློག་ཕྱིར་ཆོས། །དགྲ་བོའི་མི་ནོར་ཆམ་ལ་ཕོབ། །དགྲ་བོའི་ཡུལ་ཁམས་བརླག་པར་གྱིས། །ཞེས་ཟ་ལམ་དགྲ་ལ་བསྟན་ནས་སྤྲུལ་པའི་དམག་དཔུང་མ་མོའི་དལ་ཡམས་དང་བཅས་པ་དགྲ་བོའི་ཡུལ་དུ་སྤྲིན་ནག་རླུང་གིས་དེད་པ་ལྟར་སོང་བར་བསམ་ཞིང་། གཏོར་མའི་ལམ་བསྟན་ནི་རི་ན་གཏོར་མ་ཕྱོགས་བཞིར་བཏེག་པའམ་ཁྱིམ་ནས་རང་གིས་གྱེར་ན་ཡང་ཆོག་སྟེ། བྷྱོཿ གཏོར་མའི་ལམ་བསྟན་གང་ན་བསྟན། །གཏོར་མའི་ལམ་བསྟན་ཤར་ན་བསྟན། །ཤར་ན་རྒྱལ་པོ་ཡུལ་འཁོར་སྲུང་། །སྐུ་བཟུར་དེ་ནི་སྤྱན་གཡོལ་ལ། །གཏོར་མ་དུར་ཁྲོད་གནས་སུ་སྐྱོལ། །ཡང་ན་སྡང་བའི་དགྲ་ལ་སྐྱོལ། །དགྲ་བོའི་བདུན་རྒྱུད་རྩད་ནས་ཆོད། །ཡང་ན་གནོད་པའི་བགེགས་ལ་སྐྱོལ། །བགེགས་དཔུང་ཐལ་བ་རྡུལ་དུ་རློགས། །དམར་གྱི་གཏོར་མ་འདི་བཞེས་ལ། །བྷྱོ༔ གཏོར་མའི་ལམ་བསྟན་གང་ན་བསྟན། །གཏོར་མའི་ལམ་བསྟན་ལྷོ་ན་བསྟན། །ལྷོ་ན་རྒྱལ་པོ་འཕགས་སྐྱེས་པོ། །སྐུ་བཟུར་དེ་ནི་སྤྱན་གཡོལ་
ལ། །གཏོར་མ་དུར་ཁྲོད་གནས་སུ་སྐྱོལ། །ཡང་ན་སྡང་བའི་དགྲ་ལ་སྐྱེལ། །དགྲ་བོའི་བདུན་རྒྱུད་རྩད་ནས་ཆོད། །ཡང་ན་གནོད་པའི་བགེགས་ལ་སྐྱོལ། །བགེགས་དཔུང་ཐལ་བ་རྡུལ་དུ་རློགས། །དམར་གྱི་གཏོར་མ་འདི་བཞེས་ལ། །བྷྱོ༔ གཏོར་མའི་ལམ་བསྟན་གང་ན་བསྟན། །གཏོར་མའི་ལམ་བསྟན་ནུབ་ན་བསྟན། །ནུབ་ན་རྒྱལ་པོ་སྤྱན་མི་བཟང་། །སྐུ་བཟུར་དེ་ནི་སྤྱན་གཡོལ་ལ། །གཏོར་མ་དུར་ཁྲོད་གནས་སུ་སྐྱོལ། །ཡང་ན་སྡང་བའི་དགྲ་ལ་སྐྱོལ། །དགྲ་བོའི་བདུན་རྒྱུད་རྩད་ནས་ཆོད། །ཡང་ན་གནོད་པའི་བགེགས་ལ་སྐྱོལ། །བགེགས་དཔུང་ཐལ་བ་རྡུལ་དུ་རློགས། །དམར་གྱི་གཏོར་མ་འདི་བཞེས་ལ། བྷྱོཿ གཏོར་མའི་ལམ་བསྟན་གང་ན་བསྟན། །གཏོར་མའི་ལམ་བསྟན་བྱང་ནི་བསྟན། །བྱང་ན་རྒྱལ་པོ་རྣམ་ཐོས་སྲས། །སྐུ་བཟུར་དེ་ནི་སྤྱན་གཡོལ་ལ། །གཏོར་མ་དུར་ཁྲོད་གནས་སུ་སྐྱོལ། །ཡང་ན་སྡང་བའི་དགྲ་ལ་སྐྱོལ། །དགྲ་བོའི་བདུན་རྒྱུད་རྩད་ནས་ཆོད། །ཡང་ན་གནོད་པའི་བགེགས་ལ་སྐྱོལ། །བགེགས་དཔུང་ཐལ་བ་རྡུལ་དུ་རློགས། །དམར་གྱི་གཏོར་མ་འདི་བཞེས་ལ། །ཞེས་བརྗོད་ལ་ཕྱི་རོལ་དུ་
ཁྱེར་རོ། །དེ་ནས་གཏོར་མ་དེ་དུག་གི་སྡོང་པོ་དང་། མེ་ཡི་ཕུང་པོ། ཆེན་པོར་བསམ་ལ་དཔལ་འབར་བཙུགས་ལ། གཟའ་དང་གདོང་མ་ཐུག་པར་དམིགས་བྱའི་ཕྱོགས་སུ་སྐྱོལ་བས། དགྲ་བོའི་མི་ནོར་ཁང་ཁྱིམ་དང་བཅས་པ་ནག་ཚོམ་ཤིང་སོང་བར་བསམ་མོ། །ཟོར་འཕེན་ན་རང་གཞུང་ལྟར་རམ་གཞན་ཕྱག་བཞི་པའི་ཕྱོགས་བཅུ་ཟོར་ལས་སོགས་བྱས་ཀྱང་རུང་ངོ། །ཕྱི་རོལ་དུ་ཕྱིན་ནས་གསེར་སྐྱེམས་ཡང་བྱའོ། །བྷྱོ༔ མ་གཡེལ་མ་གཡེལ་དམ་ཅན་ཚོགས། །བོས་པའི་ཚེ་ན་སྙན་མ་སྲ། །བསྟེན་པའི་ཚེ་ན་རྒྱང་མ་རིང་། །བསྒྲུབ་པའི་ཚེ་ན་གོང་མ་གཡེལ། །རྦད་པའི་ཚེ་ན་མཐུ་མ་ཆུང་། །ཤ་ཁྲག་ཟན་དུ་བོར་ནས་ལྷ་མོ་ཁྱོད་བསྒྲུབ་བོ། །ལུས་སྲོག་འབེན་དུ་བཙུགས་ནས་ལྷ་མོ་ཁྱོད་བསྒྲུབ་བོ། །དམ་རྫས་རྟེན་དུ་བཙུགས་ནས་ལྷ་མོ་ཁྱོད་བསྒྲུབ་བོ། །ཕུག་པ་ཞ་ལྟར་གྱོན་ནས་ལྷ་མོ་ཁྱོད་བསྒྲུབ་བོ། །རྣལ་འབྱོར་བདག་ནི་ཅུང་ཤོད་གསུམ་བཞིན་རུལ། །དམ་ཉམས་དགྲ་ནི་གང་གི་སེང་བཞིན་རྒྱུག །ས་སྟེང་འདི་ན་བདག་ལ་མགོན་མེད་པས། །མ་གཅིག་དམ་ཅན་ཐུགས་རྗེས་མི་དགོངས་སམ། །འཁོར་གྱི་ཚོགས་ལ་བཀའ་ཉན་མི་མཛད་དམ། །དམ་ཉམས་དགྲ་ལ་ཕྲིན་ལས་མི་མཛད་དམ། །ལྷ་མོ་མི་ཕམ་ཡི་དམ་སྲོག་གི་ལྷ། །རྣལ་འབྱོར་བདག་
གིས་དགྲ་བླ་མོ། །ནག་མོ་ཆེན་མོ་ཆར་སྤྲིན་མདོག །དཔལ་ལྡན་ལྷ་མོ་ཐུགས་དམ་ཅན། །རྡོ་རྗེ་ལྕམ་གཅིག་ལས་མཁན་མ། །སྲོག་གཅོད་ནད་གཏོང་བོང་ཞོན་མ། །རྣལ་འབྱོར་བདག་གི་སྡོང་གྲོགས་མཛོད། །དམ་ཉམས་ཀུན་གྱི་རྒྱུན་གཅོད་མ། །དམ་ཚིག་ཅན་གྱི་ཚེ་འཛིན་མ། །ལེགས་ཉེས་ཀུན་གྱི་སྟངས་གཅོད་མ། །འཁོར་རྣམས་ཕོ་ཉར་ད་ཐོངས་ལ། །བསྟན་པ་འཇིགས་པའི་དམ་ཉམས་འདི། །བདུན་རྒྱུད་རྩད་ནས་ཆོད་ལ་ཤོག །ལོ་དང་ཟླ་བར་མ་བཞག་པར། །ཞག་དང་ཟ་མ་ཉིད་དུ་སྒྲོལ། །བརྒྱན་གྱི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་ཙམ་མམ་སྤྲོ་ན། བྷྱོཿ སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །བདག་གི་དེང་ནས་ཇི་སྲིད་འཁོར་བའི་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་ཀུན། །ཞི་བར་བྱ་ཕྱིར་ཚེ་དང་ལོངས་སྤྱོད་འཕེལ། །ནག་པོའི་ཕྱོགས་རྣམས་འགུགས་ཤིང་དབང་དུ་སྡུད། །སྨྱོ་འབོག་བསད་པ་ལ་སོགས་ལས་འདི་དག །བསྟན་པ་སྲུང་བའི་ལས་འདི་བསྒྲུབ་པར་བགྱི། །འདི་ལ་འགལ་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་
བའི་རྡོ་རྗེའི་མགོ་འགེམ་ཤོག །དེ་སྐད་རྒྱལ་བའི་སྤྱན་སྔར་དམ་བཅས་པའི། །དམ་བཅས་བཞིན་དུ་ལས་རྣམས་འགྲུབ་པར་མཛོད། །རྣལ་འབྱོར་བདག་དང་བདག་གི་འཁོར་རྣམས་ལ། །མ་ཁྱོད་ཀྱི་ཞལ་ནས་བདུད་རྩི་ཆར་ཕོབ་ལ། །ནད་སོགས་སྡུག་བསྔལ་ཚོགས་རྣམས་ཞི་བར་མཛོད། །ཚེ་དབང་ལོངས་སྤྱོད་ཐམས་ཅད་རྒྱས་པར་མཛོད། །ཟང་ཟིང་ལོ་ཏོག་འབྲུ་ཡི་ཕུང་པོ་དང་། རིན་ཆེན་རྐང་འགྲོའི་ཕྱུགས་རྣམས་འཕེལ་བར་མཛོད། །གཞན་ཡང་ཁྱོད་ལ་ཕྲིན་ལས་བཅོལ་བ་ནི། །བླ་མ་སྨད་ཅིང་དཀོན་མཆོག་དབུ་འཕང་སྨད། །བདག་གི་དགེ་བའི་བར་ཆད་བྱེད་པའི་དགྲ། །གནོད་པར་བྱེད་པའི་ལས་ངན་འཁོར་བཅས་ལ། །མ་ཁྱོད་ཀྱི་ཁ་ནས་དུག་གི་རླུང་བུས་ལ། །འདུ་བ་རྣམ་བཞི་ནད་རྣམས་སོ་ཁོང་ནས་སློང་། །ལྤགས་གཞི་ས་ལ་ལྷུང་ནས་བརྡེབ་ཏུ་ཆུག །དོན་སྙིང་རྣམ་ལྔ་ཁོང་ཁྲག་སྐྱུག་ཏུ་ཆུག །ལས་ངན་འཁོར་བཅས་བྲང་ཆེན་རྡུང་དུ་ཆུག །སྨྲེ་ངག་ཆོ་ངེས་གཏམ་དུ་འབོད་དུ་ཆུག །འཆི་བའི་དུག་མདས་སྨྱོ་འབོག་བསད་པར་མཛོད། །གཅན་གཟན་མཁའ་ལྡིང་ལ་སོགས་ལྟས་ངན་ཕོབ། །བསྟན་པ་སྲུང་བའི་ལས་འདི་མྱུར་དུ་མཛོད། །མ་
བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་དང་། བྷྱོཿ རྡོ་རྗེ་གར་གྱི་བཀའ་བཟློག་མ། །ཤར་ཕྱོགས་གདོན་གྱི་སྐག་བསྒྱུར་ལ། །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །རིན་ཆེན་གར་གྱི་བཀའ་བཟློག་མ། །ལྷོ་ཕྱོགས་གདོན་གྱི་སྐག་བསྒྱུར་ལ། །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །པདྨ་གར་གྱི་བཀའ་བཟློག་མ། །ནུབ་ཕྱོགས་གདོན་གྱི་སྐག་བསྒྱུར་ལ། །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །ལས་ཀྱི་གར་གྱི་བཀའ་བཟློག་མ། །བྱང་ཕྱོགས་གདོན་གྱི་སྐག་བསྒྱུར་ལ། །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ས་ངན་དགྲ་ལ་སྒྱུར། །གཞན་གྱིས་ཕུར་ཁ་འདེབས་པ་ཟློག །ཚེ་ཟོར་ཡུངས་ཟོར་འཕེན་པ་ཟློག །གཤིན་རྗེའི་འཁོར་ལོ་བསྐོར་བ་ཟློག །བདུད་ཀྱི་ཁྲམ་ལ་བཏབ་པ་ཟློག །མ་མོས་ཐུན་ཟོར་འཕེན་པ་ཟློག །ཀླུ་ཡིས་བྱེད་དུ་བཅུག་པ་ཟློག །ཕོ་ཉས་བླ་སྲོག་ཕྲོག་པ་ཟློག །ཐེའུ་རང་ཚེ་ལ་བརྐུ་བ་ཟློག །མུ་སྟེགས་བར་ཆད་
བྱེད་པ་ཟློག །ཞང་ཞུང་ཛོ་དམར་འཕེན་པ་ཟློག །བོན་པོས་སྔགས་ལོག་བསྒྲུབ་པ་ཟློག །སུམ་པས་གླང་ཟོར་འཕེན་པ་ཟློག །སྐྱེས་པས་མདའ་ཟོར་འཕེན་པ་ཟློག །བུད་མེད་དམོད་ཟོར་འཕེན་པ་ཟློག །ལྟས་ངན་བརྒྱད་ཅུ་རྩ་གཅིག་ཟློག །ཡེ་འདྲོགས་སུམ་བརྒྱ་དྲུག་ཅུ་ཟློག །བགེགས་རིགས་སྟོང་ཕྲག་བརྒྱད་ཅུ་ཟློག །བྱིས་པའི་གདོན་ཆེན་བཅོ་ལྔ་ཟློག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །ཞེས་བརྗོད་ཅིང་གཏོར་ཆེན་འབུལ་ལོ། །ཡང་གཏོར་མ་མེ་དཔུང་ཆེན་པོར་དམིགས་ནས་ནད་པ་གདོན་ཆེན་གྱི་སྟེང་དུ་རྫོགས་པའི་ཕྱག་ལེན་ཡོད་ཀྱང་། ཤིན་ཏུ་གཉན་པས་རང་ལ་ཉམས་གྲིབ་ཆེན་པོ་འོང་བར་འདུག་ཅེས་བདག་གི་བླ་མ་ཝོལ་ཝ་པས་གསུངས་སོ། །དེ་ནས་རྟ་བྲོ་ཕྱག་བཞི་པ་ལྟར་རིམ་གང་རུང་བྱའོ། །ནང་དུ་བསླེབས་ནས་ལྷ་མོ་ལ་མཆོད་བསྟོད་བསྡུས་པ་དང་། མ་འབྱོར་པ་དང་ཉམས་པ་དང་། །ཞེས་སོགས་ནས། དེ་ཀུན་ལྷ་མོས་བཟོད་པར་གསོལ། །ཅེས་ཡི་གེ་བརྒྱ་པ་བཟླས། ཨོཾ་བཛྲ་ལ་སྱ་རཱ་ག་ཡ་མི་ཧཱུྃ། ཞེས་ལྷ་མོ་དམ་ཚིག་པ་ཡེ་ཤེས་དབྱེར་མེད་པར་རྟེན་རྫས་བྲིས་སྐུ་ལ་བསྟིམ་པའམ། ཨོ། ཁྱེད་ཀྱིས་སེམས་ཅན་དོན་ཀུན་མཛོད། །ཞེས་སོགས་ནས། བཛྲ་མུཿ ཞེས་སེ་གོལ་ལན་གསུམ་གཏོགས་ལ། སྒྲུབ་པ་པོ་ཁྱོད་
ཀྱིས་ཇི་ལྟར་བསྒོ་བ་བཞིན་བྱའོ། །ཞེས་གསུངས་ནས་འཁོར་དང་བཅས་པ་ཤོག་དེར་གྱི་གཤེགས་པར་བསམ། བཀྲ་ཤིས་བསྔོ་བ་སྨོན་ལམ་བྱ། ནད་རིགས་བཞི་བརྒྱ་རྩ་བཞི་ཞི་བ་དང་། །ཞེས་སོགས་བརྗོད། དེ་ལྟར་བྱས་པའི་འབྲས་བུ་ནི། དངོས་གྲུབ་འབྱུང་རྒྱུད་ལས། དེ་ལྟར་བསྟོད་པ་བྱེད་པའི་རྣལ་འབྱོར་པས་ཆོས་ཀྱི་སྲོག་ཤིང་ཆོས་ཀྱི་རྒྱལ་མཚན་བསྒྲེང་། །ཆོས་ཀྱི་དུང་འབུད་ཆོས་ཀྱི་སྒྲོན་མེ་སྦར། །དགེ་ལ་མོས་ཤིང་དད་པས་ལྷ་མོ་ལ། །བོས་ཤིང་བསྟོད་པ་མཆོག་གི་དུས་དྲུག་ཏུ། །ཡང་ན་མཚན་མ་རེ་ལ་བརྟག་པར་ནི། །གང་གིས་བསྟོད་པ་རྔ་གླིང་དབྱངས་དང་བཅས། །བསྟོད་པ་ཙམ་གྱིས་ལྷ་མོས་རྟག་ཏུ་བསྲུང་། །མཉེས་ནས་བསྟོད་པ་པོ་ལ་གྲིབ་བཞིན་འབྲངས། །བསམ་པ་དགོས་པ་ཐམས་ཅད་ཡིད་བཞིན་འགྲུབ། །ཅེས་དང་། མེ་ལྕེ་འབར་བའི་རྒྱུད་ལས། །འདི་ཡི་དོན་བསྒོམས་རྩེ་གཅིག་ཡིད་ཀྱིས་བཟླས་སོ། །འདིས་ནི་མི་ནུབ་རྒྱལ་མཚན་དམ་པ་ཐོབ། །འདིས་ནི་ཆོས་ཀྱི་དབང་ཕྱུག་གོ་འཕང་ཐོབ། །འདིས་ནི་ཡིད་བཞིན་རིན་ཆེན་འབར་བ་ཐོབ། །འདིས་ནི་ཅི་འདོད་ཐོག་མེད་དངོས་གྲུབ་ཐོབ། །ཅེས་དང་། ལྷ་མོ་ནག་མོའི་གཟུངས་ལས། འདི་བཏོན་པས་གདོན་ཐམས་ཅད་དང་། ནད་ཐམས་ཅད་དང་། རིམས་ཐམས་ཅད་དང་། འབྱུང་པོ་ཐམས་ཅད་དང་། མི་མ་ཡིན་པ་ཐམས་ཅད་དང་། ཉེས་པར་བསྒོམ་པ་ཐམས་ཅད་དང་། ཉེས་པར་ལྟ་བ་དང་། ཉེས་པར་བོར་བ་རྣམས་ཀྱི་སྟེང་དུ་ནི། གཞན་འཕྲུལ་དབང་བྱེད་ལ་ཐུག་པ་
མན་ཆད་བཅིང་ངོ། །ཐད་ཀར་ཁོ་ར་འཁོར་ཡུག་ལ་ཐུག་པ་ཚུན་ཆད་བཅིང་ངོ། །འོག་ཏུ་མནར་མེད་པ་དམྱལ་བ་ལ་ཐུག་པ་ཡན་ཆད་བཅིང་ངོ། །ཞེས་གསུངས་སོ། །འདིར་ལྷ་མོའི་རྒྱུད་དངོས་གྲུབ་འབྱུང་བའི་རྒྱུད་རྗེས་སུ་འབྲངས་ནས་བརྒྱ་རྩ་ལ་བསྟེན་ནས་དགྲ་བགེགས་སྒྲོལ་བའི་ཐབས་དང་། མེ་ལྕེ་འབར་བའི་དགོངས་པ་བརྒྱ་རྩ་ལ་བརྟེན་ནས་དགྲ་བོ་ཁྲག་ནད་ཀྱིས་བསད་པ་སོགས་ནི་རྒྱུད་གཞུང་རྣམས་སུ་གབ་ནས་སྣང་བས་འདིར་ཡང་མ་སྤྲོས་སོ། །འདི་ནི་དངོས་གྲུབ་འབྱུང་རྒྱུད་ཀྱི་ལུགས་བརྒྱ་རྩ་ཞེས་ཀྱང་བྱ། ལྷ་མོའི་རྩང་རྫོགས་ཞེས་ཀྱང་བྱ། ཉམས་ཆག་བསྐང་བ་དང་། རིམས་ནད་ཡམས་ནད་གཅོད་པ་དང་། མ་མོའི་འཁྲུགས་པ་བསྐང་བའི་ཐབས། རྒྱས་པར་བསྒྲིགས་ཆགས་སུ་བཀོད་པ་ཡིན་ནོ། །འདི་བྲིས་ཉེས་པ་གང་མཆིས་ལྷ་མོ་འཁོར་དང་བཅས་ལ་བཤགས། །དགེ་བས་འགྲོ་བའི་ནད་ཡམས་རྒྱུན་ཆད་ནས། །དུས་གསུམ་རྒྱལ་བའི་ཡུམ་ཆེན་འགྲུབ་ཕྱིར་བསྔོ། །འདི་ཉིད་ཐོག་མར་དབུ་བཙུགས་བྲིས་པའི་ཚེ། །ཆས་བཟང་བུད་མེད་མང་པོ་འདུ་བ་དང་། །བུད་མེད་དཀར་མོ་བཞད་ཅིང་འོང་བ་སོགས། །ལྷ་མོ་དགྱེས་པའི་རྨིས་ལྟས་ཅུང་ཟད་མཐོང་། །དེ་ཕྱིར་བཀྲ་ཤིས་གཞན་དོན་འབྱུང་ངམ་སྙམ། །ཞེས་པ་འདི་ནི་ལྷ་མོ་བསྒྲུབ་པ་ལ་ཤིས་པ་དཔྱིད་ཟླ་ར་བ་ལ་བྲིས་པའོ། །དགེ་སློང་ཀརྨ་ཨ་རཱ་གས་གསུངས། །འདི་འགྲོ་བ་རིམས་ནད་ཀྱི་འཚེ་བ་ཞི་བའི་ཕྱིར། །ངས་སེམས་བསྐྱེད་བཟང་པོའི་ཀུན་ནས་བསླང་སྟེ་བྲིས་པ་དགེ་ལེགས་འཕེལ། མངྒ་ལཾ།། །།