རྫོགས་པ་ཆེན་པོ་རང་སྣང་གི་དབང་།
རྒྱ་གར་སྐད་དུ། དར་ས་ཡ་སིང་ཨ་ནུ་བུ་ནཱ་མ། བོད་སྐད་དུ། རྫོགས་པ་ཆེན་པོ་རང་སྣང་གི་དབང་ཞེས་བྱ་བ། བཅོམ་ལྡན་འདས་རྡོ་རྗེའི་སྙིང་པོའི་སྐུ་ལ་ཕྱག་འཚལ་ལོ། །དེ་ནས་དེའི་ཚེ། དུར་ཁྲོད་ཆེན་པོའི་གནས་སུ། འཁོར་བསམ་གྱིས་མི་ཁྱབ་པའི་ཚོགས་འདུས་ཏེ། གསང་བའི་བདག་པོས་འདི་སྐད་ཅེས་གསོལ་ཏོ། །ཀྱེ་ཀྱེ་བཅོམ་ལྡན་རྡོ་རྗེ་འཆང་། །བློ་འདས་རྫོགས་པ་ཆེན་པོའི་དབང་། །གང་གིས་འཐོབ་པར་འགྱུར་བ་ལགས། །འདུས་པའི་ཚོགས་ལ་བཀའ་སྩོལ་ཅིག །དེ་ནས་སྙིང་པོ་བྱང་ཆུབ་སྐུས། །ཉེ་བའི་འཁོར་ལ་བཀའ་སྩལ་པ། །ཀྱེ་མ་ཉོན་ཅིག་རྡོ་རྗེ་འཛིན། །ཡང་དག་ངེས་པའི་ལུང་འདི་ཡིས། །རྫོགས་པ་ཆེན་པོའི་གནས་ལུགས་སྟོན། །ཀྱེ་མ་ངོ་མཚར་བསྟན་པ་ཡིས། །རྫོགས་ཆེན་སྐུ་ཡང་འདིར་བསྟན་གྱིས། །འདིར་ནི་ངེས་པའི་རྒྱལ་པོ་ཐོབ། །ཁྱད་པར་དབང་རྫོགས་བྱེད་པ་ན། །ཤིན་ཏུ་དབེན་པའི་གནས་ཉིད་དུ། །དཀྱིལ་འཁོར་འདོམ་གང་ཚད་དུ་བྱ། །དྲི་སྣ་ལྔ་ཡིས་ཆག་ཆག་གདབ། །ཐིག་གདབ་ཚོན་ནི་དགྱེ་བར་བྱའོ། །ཕོ་བྲང་ཟླུམ་པོ་དག་ཏུ་བྱའོ། །དེ་ནས་ཕྱི་རིམ་འཁོར་ལོར་བསྐོར་བྱ་སྟེ། །མཐིང་ག་ལ་སོགས་རིམ་
ལྔ་བྱ། །ལྟེ་བ་ལ་ཡང་བུམ་པ་སྟེ། །བུམ་པའི་ཕྱོགས་བཞིར་བུམ་པ་བྲི། །ཟླུམ་པོ་དེ་ཡང་བུམ་པ་བྲི། །དེ་ཡི་ཕྱི་རིམ་དག་ཏུ་ཡང་། །འཁོར་ལོ་ལྔ་རིམ་དག་ཏུ་བྱ། །འཁོར་ལོ་དེ་ཡི་དབུས་སུ་ཡང་། །ཕྱོགས་སུ་བུམ་པ་རེ་རེ་བྲི། །དེ་ལྟར་དཀྱིལ་འཁོར་ཉིད་བྲིས་ཏེ། །སྟེང་དུ་རྫས་ཉིད་དགྲམ་པར་བྱ། །བུམ་པའི་སྟེང་དུ་བུམ་པ་རེ། །མགུལ་ཆིངས་རྒྱན་དང་བཅས་པའོ། །དེ་ནས་དཀྱིལ་འཁོར་ཉིད་ཕུབ་སྟེ། །དེ་ཡི་སྟེང་དུ་དར་གྱི་གདུགས། །སྣ་ཚོགས་མཛེས་པ་དག་གིས་འབུབ། །ངེས་པའི་རྒྱལ་པོ་ཐོབ་བྱའི་ཕྱིར། །མདའ་དང་མེ་ལོང་དར་སྣའོ། །དེ་ལྟར་རྫས་རྣམས་རྫོགས་བྱས་ལ། །དབང་བསྐུར་ལས་ཀྱང་རྫོགས་པར་བྱ། །དེ་ནས་ཆོས་ཉིད་སྟོང་པ་ཡི། །རྫོགས་ཆེན་བཞི་ཡི་དབང་རྫོགས་བྱ། །སྐུ་གསུང་ཐུགས་དང་མི་འབྱེད་པར། །ཡང་དག་གསང་བའི་དབང་རྫོགས་ནས། །རྫོགས་པ་ཉིད་ཀྱང་དབང་བསྐུར་ཕྱིར། །བུ་ཉིད་དད་དང་ལྡན་པ་དེས། །དྲི་སྣ་ལྔ་ཡིས་ལུས་བཀྲུས་ཏེ། །རྒྱན་དང་ཆ་ལུགས་མཛེས་བརྒྱན་ཏེ། །ཞུ་བའི་ཚིག་རྣམས་རྫོགས་པར་བྱ། །དེ་ནས་སློབ་དཔོན་གསང་བ་ཡིས། །རང་གི་རྒྱན་ཆ་མཛེས་གོན་ལ། །འགྱིང་བའི་སྟབས་ཀྱིས་གར་བྱས་ཏེ། །དམ་ཚིག་ཆུ་བོ་བྱིན་ནས་ནི། །ཡེ་ཤེས་དག་པའི་དབང་བསྐུར་བྱས། །འདི་ཡིས་ཐམས་ཅད་གྲོལ་བར་གསུངས། །ཡང་དག་གསང་བའི་རྡོ་རྗེ་རིགས་ལྡན་པས། །མཚན་མའི་སྐྱོན་བྲལ་ཡེ་ཤེས་ཆེན་པོར་སྦྱོར། །ཤར་ཉིད་ནས་ཀྱང་ཤར་མེད་ཡང་དག་རིག་པ་ཆེ། །ཆོས་ཀྱི་སྐུ་ལས་ཆོས་སྐུའི་སྙིང་པོ་ཡང་གསང་སྟེ། །བསྒྲུབ་མེད་བསྒྲུབ་པའི་དཀྱིལ་འཁོར་ཞལ་ཕྱེས་ཏེ། །བལྟ་མེད་ལྟ་བའི་འོད་སྣང་ཆོས་སྐུར་བསྟན། །ཆོས་མེད་ཆོས་ཀྱི་སྐུ་དང་མཉམ་པར་སྦྱོར། །ཐབས་ཀྱི་མཛད་པ་ཅི་ཡང་མཛད། །ཆོས་སྐུ་སྐྱེ་མེད་རྡོ་རྗེ་ཉིད་དུ་དབང་བསྐུར་རོ། །ཨོཾ་ལང་སྟ་ན་བཛྲ་ཤྭ་དྷ་ཡ། ཡང་དག་སྤྲོས་མེད་རིན་ཆེན་ཕུང་པོ་ལྟར། །རྫོགས་སངས་རྒྱས་དང་གཉིས་
མེད་ཡུལ་ལས་འདས། །འོད་གསལ་སྤྲོས་བྲལ་བློ་ཡི་ཡུལ་ལས་འདས། །ཆོས་མེད་བག་ཆགས་ཐམས་ཅད་སྲེག་བྱེད་པའི། །བྱང་ཆུབ་སྙིང་པོར་སྤྲུལ་པས་དབང་བསྐུར་རོ། །སྭ་ཧ་ཏྲ་ཐར་མང་། ཡང་དག་ཉིད་དུ་སྐུ་ལས་སྣང་མཐའ་ཡས། །རིག་པའི་སྐུ་ལ་མདུན་དང་རྒྱབ་མེད་དང་། །ཤེས་རབ་རང་བྱུང་སྐུ་ནི་ཐ་མི་དད། །སངས་རྒྱས་རྣམས་ཀྱི་འོད་འདིས་དབང་བསྐུར་རོ། །ཏྲ་ཐ་རཏྣ་ཨ་བྷི་ལཿ། །དྲི་མེད་རང་གསལ་དོན་ཉིད་གྲུབ་པ་སྟེ། །ཡང་གསང་ཐུགས་ཀྱི་ཉི་མའི་འོད་ཟེར་སྟོང་། །བྱང་ཆུབ་སེམས་ནི་བྱ་བ་ཡེ་ནས་རྫོགས། །རྣམ་དག་མེད་ཡང་ངང་དུ་དབང་བསྐུར་རོ། །ཨ་བུ་སྭོ་ཏྲི་ཡ་ཧཱུཾ། དེ་ལྟར་ཡང་དག་དབང་རྫོགས་ནས། །བསྒོམ་པའི་རིམ་པ་འདི་ལྟ་སྟེ། །ཤར་ཕྱོགས་ཆུ་ཡི་བུམ་པ་བླང་བྱས་ཏེ། །སྤྱི་བོའི་གཙུག་ཏུ་བསྐུར་བྱས་ལ། །འབྲས་བུ་གྲོལ་ལམ་དབང་ཐོབ་སྟེ། །རྫོགས་སངས་རྒྱས་དང་དབྱེར་མེད་མཉམ། །མཉམ་པ་འདི་ཡི་དབང་ཐོབ་སྟེ། །འདི་ལྟར་བསམ་རྫོགས་དབང་བསྐུར་བྱ། །བུམ་པ་ཉིད་ལ་ཧཱུཾ་བསམ་སྟེ། །ཧཱུཾ་ཉིད་འོད་དུ་ཞུ་བ་ལས། །བུམ་པ་ཉིད་ལ་ཁྲོ་སྐུར་བསྒོམ། །དེ་ཡིས་དབང་བསྐུར་ལས་རྫོགས་བསམ། །ལྷོ་ཕྱོགས་བུམ་པ་མགྲིན་པ་རུ། །ཨཱཿཉིད་འོད་འཕྲོས་ཐིག་ལེའི་སྐུ། །དེ་ལས་གོང་ལྟར་དབང་བསྐུར་བསམ། །ནུབ་ཀྱི་ལྟེ་བའི་གནས་སུ་བསྐུར། །ཡི་གེ་སྭཱ་ཉིད་འོད་ཞུ་བས། །སྐྱེ་བ་མེད་པའི་དབང་བསྐུར་བསམ། །བྱང་ཕྱོགས་གསང་བའི་གནས་སུའོ། །ཧཱ་ལས་འོད་འཕྲོས་དགའ་བདེའི་དབང་། །དུས་དེ་ཉིད་དུ་ཐོབ་པར་བསམ། །དབུས་ཀྱི་བུམ་པ་ཐུགས་ཀ་རུ། །ཨོཾ་ལས་འོད་འཕྲོས་ཞི་སྐུར་བསམ། །ཞི་བའི་སེམས་ལ་དབང་ཐོབ་བསམ། །དེ་ལྟར་ཏིང་འཛིན་རྫོགས་པར་བྱ། །ཨེ་མ་ཧོ། སྟོང་པ་ཉིད་ཀྱི་སྐུ་གསུམ་མ་སྤངས་རྫོགས། །རང་གསལ་ཡིད་འོང་འོད་འཕྲོས་ཆོས་སྐུའི་ངང་། །མཁའ་མཉམ་སྙིང་པོ་ཡེ་ཤེས་ཆོས་སྐུ་ཀུན་འབྱུང་ཀློང་། །སྐུ་གསུམ་མ་བསྐྱེད་ཆོས་ཉིད་དབྱིངས་སུ་རྫོགས། །རྒྱུ་མེད་རྐྱེན་བྲལ་རྡོ་རྗེ་སེམས་དཔའ་ཆེ། །རྡོ་རྗེ་ས་འཛིན་བློ་གྲོས་མཐའ་ཡས་ཤིང་། །རྡོ་རྗེ་སྐུ་འབར་ཡེ་ཤེས་
ལྷུན་རྫོགས་བརྗིད། །རྡོ་རྗེ་སེམས་དཔའ་ཡབ་ཡུམ་དཀྱིལ་འཁོར་ཆེ། །རྡོ་རྗེ་འབྱུང་པོ་རོ་ལངས་ཀུན་གྱི་བདག །རྡོ་རྗེ་མདའ་འཕེན་ཤེས་རབ་མཚོན་ཆ་སྟེ། །རྡོ་རྗེ་ཡངས་པ་དབྱིངས་ལ་གར་བསྒྱུར་ཞིང་། །རྡོ་རྗེའི་སྐུ་ཉིད་ཡངས་པ་ཆེ། །མཚན་མ་མེད་པ་རྡོ་རྗེའི་སྐུ། །བུམ་པ་རྡོ་རྗེ་ཐབས་སྟོབས་ཆེ། །སྐུ་དང་ཐུགས་ནི་རྡོ་རྗེའི་བདག །ཡང་དག་རྡོ་རྗེ་ཀུན་འབྱུང་ལམ། །ཡང་དག་ངེས་པའི་རྡོ་རྗེ་འདིས། །ཐམས་ཅད་དབང་གི་རྡོ་རྗེར་བསྟན། །དབང་ཉིད་ལས་ནི་རྡོ་རྗེ་འཕྲོ། །རྡོ་རྗེ་དབང་གི་རང་བཞིན་ལས། །རྡོ་རྗེ་གསང་བའི་རྒྱལ་མཚན་ལས། །གསང་སྔགས་རྡོ་རྗེའི་དབང་ཐོབ་སྟེ། །དེང་ནས་བཟུང་ནས་རྡོ་རྗེའི་སྐུ། །རྫོགས་སངས་རྒྱས་པ་རྡོ་རྗེའི་གསུང་། །དེང་ནས་བསྐལ་པ་སྟོང་དུ་ཡང་། །མི་འཇིག་བརྟན་པ་རྡོ་རྗེ་ཐོབ། །རང་རིག་བརྟན་པ་རྡོ་རྗེའི་སྐུ། །སྐུ་དང་ལྡན་པར་མ་གྱུར་པར། །སྐུ་གསུམ་བསྟན་པའི་དབང་ཐོབ་ནས། །འགྱུར་བ་མེད་པ་རྡོ་རྗེའི་ཐུགས། །འཁྲུལ་པ་སྤང་བས་ཡང་དག་ཐུགས། །ཆོས་ཀྱི་སྐུ་དང་ཡང་གསང་རྡོར། །མཁའ་གསང་གཙུག་གི་ནོར་བུ་སྟེ། །ཆོས་དང་ཆོས་ལས་རབ་འདས་པའི། །ཆོས་ཉིད་དབང་ཡང་དེར་ཐོབ་པོ། །ཞེས་རྫོགས་པ་རང་བྱུང་ཆེན་པོའི་རྒྱུད་ལས། རྫོགས་ཆེན་རང་གི་ལྟ་བ་བསྟན་པའི་ལེའུ་སྟེ་ཉི་ཤུ་གཉིས་པའོ། །རྫོགས་སོའོ།། །།