མཇུག་གི་དོན།
གསུམ་པ་མཇུག་གི་དོན་ལ་བཞི་སྟེ། བཟོད་པར་གསོལ་བ། བླང་བར་གདམས་པ། དགེ་བ་བསྔོ་བ། ཇི་ལྟར་བརྩམས་པའི་ཚུལ་ལོ། །དང་པོ་ནི། སྐར་རྩིས་ཀྱི་གྲུབ་པའི་མཐའ་ལས་བརྩམས་ཏེ་ཀུན་མཁྱེན་གྱི་གནས་སུ་བདེ་བླག་ཏུ་བགྲོད་པའི་ལམ་གསར་དུ་གཏོད་པར་བྱས་པ་འདི་ལ་མ་རྟོགས་ལོག་རྟོག་ཐེ་ཚོམ་གྱི་དབང་ལས་ནོངས་པར་གྱུར་པ་གང་མཆིས་པ་རྣམས་ནི། བྱིས་པ་མདོ་མེད་ཅི་གར་སྨྲ་བ་ལ་མས་མི་ཁྲོ་བར་བཟོད་པ་ཇི་བཞིན་དུ་མཁས་པ་རྣམས་ཀྱིས་ཐུགས་བརྩེ་བའི་སྒོ་ནས་བཟོད་པར་མཛད་རིགས་པ་ཉིད་དོ། །གལ་པོ་ལས། ཇི་ལྟར་གདུང་སེམས་ལྡན་པའི་མས། །བུ་ཉིད་མི་སླུའི་ཚིག་སྨྲ་ལྟར། །རྒྱལ་བས་འགྲོ་བ་མི་བསླུའི་ཕྱིར། །བློ་དམན་རྣམས་ལ་མན་ངག་བཤད། །ཅེས་པ་ལྟར་བརྩེ་བས་འགྲོ་བ་ཡལ་བར་མི་འདོར་བར་དམ་བཅས་པའི་ཕྱིར་རོ། །གཉིས་པ་ནི། ཆོས་རྣམས་ཀུན་གྱི་ཆོས་ཉིད་དོན་དམ་པ་གཤིས་ཀྱི་གནས་ལུགས་དེ་ཁོ་ན་ཉིད་ནི་བློའི་སྤྱོད་ཡུལ་ལས་འདས་པའི་ཕྱིར་རྩིས་དང་འབྲས་བུ་ལ་སོགས་པའི་སྤྲོས་པ་ཀུན་དང་བྲལ་བ་སྟེ། གལ་པོའི་བརྟག་པ་གསུམ་པ་ལས། ཀུན་རྫོབ་བློ་ཡི་སྤྱོད་ཡུལ་ཏེ། །དོན་དམ་བློ་ཡི་སྤྱོད་ཡུལ་མིན། །ཞེས་གསུངས་པས་སོ། །འོན་ཀྱང་། ལུས་ཅན་རྣམས་ཀྱི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ནི། །འབྲས་བུ་དེ་འདྲ་ཉིད་དུ་སྨིན། །ཞེས་གསུངས་པ་ལྟར་ཀུན་རྫོབ་རྟེན་འབྲེལ་གྱི་སྣང་ངོར་དགེ་སྡིག་གི་ལས་ཀྱིས་བདེ་བ་དང་སྡུག་བསྔལ་གྱི་འབྲས་བུ་མི་སླུ་བར་འབྱིན་ནུས་པར་མ་ཟད། གནས་སྐབས་ཀྱི་རྟེན་འབྲེལ་ཕྲ་མོ་དག་གིས་ཀྱང་ཕན་གནོད་འབྱུང་བ་ཉིད་དེ། རྔམ་གློག་ལས། རིག་བྱེད་དག་གི་ཡན་ལག་ལས། །དུས་རྣམས་ཤེས་པར་བྱ་བ་ནི། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚོད་བཟང་བ་ནི། །མཚན་མའི་རྟོག་པ་ཡིན་མོད་ཀྱང་། །བརྟགས་ན་དངོས་གྲུབ་མཚན་མ་འབྱུང་། །ཞེས་གསུངས་པའི་ཕྱིར་བདག་ལེགས་པར་འདོད་པ་རྣམས་ཀྱིས་ཐ་སྙད་ལ་བསྐུར་པ་འདེབས་པའི་ཆད་མཐའ་སྤངས་ཏེ་བླང་བར་འོས་པ་ཉིད་དོ། །འོན་
ཀྱང་བདེ་སྡུག་གི་གཙོ་བོའི་བྱེད་པ་པོ་གཟའ་སྐར་ལ་སོགས་པ་ཡིན་ནམ་སྙམ་དུ་མི་རྟོག་སྟེ། འགྲེལ་ཆེན་གྱི་ལུང་གོང་མའི་འཕྲོས་ལས། སྐད་ཅིག་གཅིག་ལ་སྐྱེས་རྣམས་ཀྱི། །སྐྱེས་རབས་ཐ་དད་ཐ་དད་འབྲས། །རང་རང་འབྲས་ལ་ཉེར་སྤྱོད་པས། །དེ་རྣམས་འབྲས་བུ་གཅིག་པ་མིན། །གཡུལ་དང་ནགས་བསྲེག་པ་དང་ནི། །ཉ་པས་རྒྱ་ནི་བཅིངས་པ་ལ། །གང་གི་ལུས་ཅན་མང་པོ་རྣམས། །ཅིག་ཅར་དུ་ནི་འཆི་བར་འགྱུར། །ལུས་ཅན་རྣམས་ཀྱི་བསོད་ནམས་ཀྱིས། །ཚེ་སྟོབས་བརྩོན་འགྲུས་རྫུ་འཕྲུལ་དང་། །སྐལ་བཟང་གཟུགས་ཉིད་སྡིག་པས་ནི། །ཚེ་དང་བརྩོན་འགྲུས་རྫུ་འཕྲུལ་ཉམས། །ཞེས་དང་། ཏོག་གཟུངས་ལས་ཀྱང་། དྲང་སྲོང་སྐར་མ་ལ་དགའ་བས། །ཇི་ལྟར་ཁྱོད་ནི་རྒྱལ་ལ་སྐྱེས། །མཚན་མཆོག་དག་ནི་རབ་ཏུ་གདའ། །ཞེས་སོགས་གསོལ་བའི་ལན་དུ་བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་རྟོག་པའི་སྤྱོད་ཡུལ་ཅན། །བྱིས་པ་གང་ལ་ཆགས་འདུག་པ། །དེ་ནི་བྱིས་པ་རྨོངས་པ་སྟེ། །སེམས་ལ་གནས་ཤིང་རིམས་ནད་བཅས། །ཁྱི་དང་སྦྲུལ་དང་རུས་སྦལ་དང་། །སྲོག་ཆགས་གཞན་ཡང་རྣམ་མང་པོ། །སྐར་མ་རྒྱལ་ལ་གང་སྐྱེས་པ། །དེ་དག་བདེ་བ་བརྟེན་མ་ཡིན། །ཞེས་སོགས་གསུངས་པས་སོ། །དེའི་ཕྱིར་ན་གནས་འདི་དག་ལ་ཧ་ཅང་མངོན་རྟགས་སུ་འཛིན་པའི་རྟག་མཐའ་ཡང་སྤང་བར་བྱའོ་ཞེས་གདམས་སོ། །གསུམ་པ་ནི། དེ་ལྟར་བསྟན་བཅོས་བརྩམས་པ་ལ་འབད་པའི་བསོད་ནམས་ཀྱི་ཆུ་གཏེར་ཆེན་པོ་བསྲུབས་པ་ལས་སྐྱེས་པའི་ལེགས་བཤད་ཉིན་མོར་བྱེད་པ་ལྟ་བུའི་བསྟན་བཅོས་འདི་ཉིད་འགྲོ་བ་མ་ལུས་པའི་དཔལ་དུ་ཤར་བ་ཙམ་གྱིས་ནི་མ་རིག་མུན་པའི་དཔུང་རྣམས་སྐད་ཅིག་གཅིག་གིས་མིང་མཐར་བྱེད་ཅིང་ཡེ་ཤེས་ཀྱི་སྣང་བ་བླ་ན་མེད་པ་དག་ཀུན་ནས་རྒྱས་པར་གྱུར་ཅིག་ཅེས་བསྔོས་པ་སྟེ། རྗོད་བྱེད་རིག་བྱེད་ཀྱི་གཏམ་དང་སྦྱར་བའི་གཟུགས་ཅན་གྱི་རྒྱན་དུ་བྱས་པའོ། །བཞི་པ་ནི། རྩིས་ཀྱི་མན་ངག་སོགས་ཏེ། དེ་ལྟར་བརྩམས་པའི་བསྟན་བཅོས་འདི་ཉིད་གང་གི་དྲིན་ལས་གང་ཟག་གང་གིས་དུས་གང་གི་ཚེ་གནས་གང་དུ་སྦྱར་བའི་ཚུལ་རྫོགས་
ཚིག་དང་བཅས་པ་བསྟན་པའི་རྣམ་བཤད་བརྗོད་ཟིན་ནས། ད་ནི་འགྲེལ་པ་ཉིད་ཀྱི་དོན་བསྡུ་བ་བརྗོད་པར་བྱ་སྟེ། དེ་ཡང་གཞུང་ཡིག་ཚོགས་ཆེས་པའི་དབང་གིས་ཐར་ཆགས་སུ་འབྲུ་གནོན་གྱི་བཤད་པ་ཞིབ་མོ་བགྱིས་ན་ཧ་ཅང་ཡང་ཡི་གེ་མང་པས་རྣམ་བཤད་འདི་ཉིད་བརྒྱུད་མར་འཕེལ་བའི་གེགས་སུ་འགྱུར་དུ་དོགས་ནས། དཀའ་བའི་གནས་རྣམས་ཅུང་ཟད་འབྱམས་ཀླས་པར་བཀྲལ། གོ་སླ་བ་རྣམས་བསྡུས་དོན་གྱིས་བཅིངས་ཏེ། དམར་ནག་སྤེལ་བ་ཁོ་ན་གཙོ་བོར་མ་བཏོན་པའི་ཚིག་ཉུང་དོན་རྒྱས་ཀྱི་རྣམ་བཤད་འདི་ཉིད་དགེ་བར་མཐར་ཕྱིན་ཏོ། །འདིར་སྨྲས་པ། རྒྱུད་འགྲེལ་གྲུབ་མཐའི་དགོངས་དོན་གསལ་བྱེད་པ། །སྐར་རྩིས་ཉིན་མོར་བྱེད་པའི་སྣང་བ་ཅན། །རྣམ་དཔྱོད་བརྩོན་པའི་གསེར་གྱི་ཤིང་རྟ་ཡིས། །གངས་ཅན་གོ་ལའི་མཁའ་ལ་དེང་འདིར་དྲངས་། །གང་གི་ཚིག་དོན་འོད་སྣང་བྱེ་བའི་ཟེར། །ལྷུངས་པས་ལེགས་བཤད་པདྨོ་གཡུར་ཟ་ལྡེམ། །དེ་ཡིས་སྐལ་བཟང་བུང་བའི་ཚོགས་སྐྱོང་ཞིང་། །ལྷན་ཅིག་ལོག་རྩིས་མུན་པ་ཅི་ཡང་བསལ། །གཞན་ལ་འགྲན་དང་གཞན་གཞུང་འཇིག་པ་དང་། །རང་གི་རྙེད་གྲགས་སྒྲུབ་ཕྱིར་འདི་མ་བརྩམས། །གསར་ངས་ཀྱིས་འཚེ་དེང་དུས་སྐྱེ་བོ་རྣམས། །རིག་པ་མཆོག་ལ་འཇུག་ཕྱིར་ངས་འདི་སྨྲས། །ཤེས་རློམ་གྲགས་འབར་ཤེས་རབ་རྩལ་མེད་ཀྱིས། །ཀུན་ཏུ་བསླད་པས་ཀུན་ཀྱང་གྲགས་ཕྱིར་འབྲེང་། །ལེགས་བཤད་ཉེས་བཤད་རིན་ཐང་མཉམ་པའི་དུས། །འདི་ན་ཚུལ་འདིར་འབད་པའི་ངལ་བས་ཅི། །འོན་ཀྱང་དམ་པའི་གསུང་གིས་བསྐུལ་བ་དང་། །ཁྱད་པར་མཚུངས་མེད་རྗེ་བཙུན་བླ་མའི་བཀའ། །རི་གཟར་རྦབ་བཞིན་གྱེན་དུ་མ་ལྡོག་པས། །གཉོས་ཀྱི་བན་ཆུང་དྷརྨ་ཤྲཱིས་སྦྱར། །སྦྱང་སྟོབས་བློ་གྲོས་ལམ་ལ་མ་འདྲིས་ཤིང་། །རང་བཞིན་གྱིས་གྲུབ་སྤོབས་པའི་ས་མཁན་བྲལ། །དད་བརྩོན་གོམ་སྟབས་འཁྱོར་བས་ཉེས་བཤད་ཀྱི། །ལམ་དུ་འཕྱན་རྣམས་མཁས་པས་བཟོད་པར་བཞེས། །འདིས་ཐོབ་རྣམ་དཀར་དགེ་བའི་ཕུང་པོ་དྲི་མེད་ཟླ་བ་གསར་པའི་གདོང་། །ཉེས་བརྒྱའི་མུན་པ་ཀུན་ནས་བཅིལ་ལ་མི་ལྡོག་འོད་དཀར་བྱེ་བ་ཅན། །ཅི་ཡང་སྤྲོ་བའི་ངོ་
མཚར་སྣང་བས་ཐུབ་བསྟན་ཀུན་དཱ་བཞད་པ་དང་། །འགྲོ་འདིའི་བློ་ངན་མཚན་མོའི་མུན་སྟུག་སེལ་བའི་གཉེན་དུ་མཛེས་གྱུར་ཅིག །རྩིས་ཀྱི་མན་ངག་ཉིན་བྱེད་སྣང་བའི་རྣམ་པར་འགྲེལ་པ་གསེར་གྱི་ཤིང་རྟ་ཞེས་བྱ་བ་འདི་ནི། ཕུལ་དུ་བྱུང་བའི་ཡོན་ཏན་དཔག་ཏུ་མེད་པས་སྤྲས་པའི་མི་དབང་ཆོས་རྒྱལ་ཆེན་པོ་ཧྱེ་ནུ་ཤྲཱི་ཀུན་དགའ་བསོད་ནམས་ལྷུན་གྲུབ་པའི་བཀའ་ལུང་རིམ་པར་སྩལ་བ་དང་། བོད་ཀྱི་ལྷ་བཙན་པོའི་གདུང་བརྒྱུད་དུ་འཁྲུངས་ཤིང་སྐར་ནག་གི་རྩིས་ཚུལ་རྒྱ་མཚོའི་དབུས་ན་བཞུགས་པ་ཞང་པོ་དྲུང་པ་ཡབ་སྲས་བསོད་ནམས་རབ་བརྟན། ཚེ་དབང་མི་འགྱུར་རབ་བརྟན། ཀྱིས་ཀྱང་ཕུག་ལུགས་ཀྱི་ཡི་གེ་འཐོར་བ་རྣམས་བསྡུས་པའི་གཞུང་ཆེ་བ་ཞིག་བརྩམ་ཅི་ཐུབ་གྱིས་ཞེས་རིང་མོ་ནས་བསྐུལ་བར་མཛད་པ་དང་། དེ་དག་གི་སྐུལ་མར་རང་གི་གཅུང་བློ་གྲོས་ཀྱི་ཁང་བཟང་ཡོན་ཏན་གྱི་ནོར་བུས་གང་བ་ཀུན་དགའ་ཚུལ་ཁྲིམས་རྒྱ་མཚོ་དང་། གསོ་རིག་རྒྱ་མཚོའི་མཐར་སོན་ཞིང་སྐར་ནག་གི་རྩིས་ཚུལ་ལའང་མ་རྨོངས་པ་རྒྱ་བཙུན་ངག་དབང་དཔལ་བཟང་གཉིས་ཀྱིས་ཀྱང་ནན་ཏན་ཆེན་པོས་བསྐུལ་ཞིང་། ཁྱད་པར་དུའང་མཁྱེན་རབ་དང་ཐུགས་རྗེ་ཚད་མེད་པའི་བདག་ཉིད་མཚན་བརྗོད་པར་དཀའ་བ་རྗེ་བཙུན་ཐམས་ཅད་མཁྱེན་པ་གཏེར་ཆེན་ཆོས་ཀྱི་རྒྱལ་པོའི་བཀའི་གསང་བས་འདི་ལྟར་མྱུར་དུ་འགྲུབ་པར་གྱིས་ཞེས་རྗེས་སུ་གནང་བ་དད་བརྒྱའི་གཙུག་གིས་གུས་པར་མཆོད་དེ། རྗེ་བཙུན་དམ་པ་དེ་ཉིད་རིགས་ཀྱི་ཅོད་པན་དུ་ཐོབ་ཅིང་། པཎ་ཆེན་རྒྱལ་བའི་སྲས་པོ་བསྟན་པའི་ཉི་མ་དང་། མཁས་དབང་ལྡུམ་པོ་བ་ཆེན་པོ་དོན་གྲུབ་དབང་རྒྱལ། རྒྱ་སྟོན་ནུབ་རི་བ་སོགས་དམ་པ་དུ་མའི་དྲིན་ལས་རྩིས་ལ་བློ་བྱང་བའི་གཉོས་བཙུན་དྷརྨ་ཤྲཱིས་གཞུང་བརྩམས་པའི་ཕྱི་ལོ་ལེའུ་བཞི་པ་ཡན་ཆད་གྲུབ་པར་བྱས་ཤིང་། དེ་མན་ཆད་རང་ལོ་སོ་གསུམ་པ་ཉེས་ཚོགས་ཟད་བྱེད་ཀྱི་ལོ་མཆུ་ཟླ་བའི་ཚེས་བཅོ་བརྒྱད་ལ་དབུ་གཙུགས་ཏེ་ནག་པས་ཉ་བའི་དུས་ཆེན་གྱི་ཉིན་ཨོ་རྒྱན་སྨིན་གྲོལ་གླིང་གི་ཆོས་གྲྭའི་གཙུག་ལག་ཁང་ཆེན་པོར་རྫོགས་པར་སྦྱར་བའི་ཡི་གེ་པ་ནི་གསུང་རབ་ཀྱི་བརྡ་དག་རྣམས་ལ་སྒྲིན་ཞིང་རིགས་པར་སྤྱོད་པའི་བློའི་ནོར་ཅན་དགེ་སློང་དགེ་བའི་
བཤེས་གཉེན་ཨོ་རྒྱན་དཔལ་འབྱོར་གྱིས་མཛད་པའོ། །ཕྱིས་མྱོས་ལྡན་ས་ཡོས་ཀྱི་ལོ་གཞུང་དང་མཉམ་དུ་རྩོམ་པ་པོ་རང་ཉིད་ཀྱིས་ཞུ་དག་ཅུང་ཟད་བགྱིས་སོ།། །།ༀ་སྭ་སྟི། དཔལ་ལྡན་རྒྱུད་རྒྱལ་རོལ་མཚོ་ལས་དྲངས་པའི། །སྐར་རྩིས་གྲུབ་མཐའ་རིན་ཆེན་མཐོང་མཐིང་ཀ། ནོར་བུའི་དོ་ཤལ་འཕྱངས་པའི་མིག་འཕྲུལ་ཅན། །དབྱངས་ཅན་གཉིས་པ་ངག་ལ་དབང་བའི་ལྷ། །༡ཆོས་དཔལ་རྒྱ་མཚོའི་མཁྱེན་རབ་ལས་འཁྲུངས་པའི། །ལེགས་བཤད་རྨད་བྱུང་ཉིན་བྱེད་སྣང་བའི་དཔྱིད། །གསེར་གྱི་ཤིང་རྟས་ཤར་རི་ནས་དྲངས་པའི། །སྔོན་མེད་ངོ་མཚར་སྒྲོན་མེ་འདི་ན་འཆར། །༢ཕྱི་ཚུལ་རྟེན་འབྱུང་རི་གླིང་བཀོད་པ་དང་། །ཉི་ཟླ་གཟའ་སྐར་རྟེན་གཡོའི་ཆོས་སོ་ཅོག །ཕུང་ཁམས་རྩ་རླུང་འབྱུང་བའི་སྐྱེ་སྡུད་ཀྱི། །སྣང་བ་ལས་གཞན་ཕྱི་རོལ་བྱེད་པོས་སྟོང་། །༣དེས་ན་སྐར་རྩིས་ཟབ་གནད་ཕྲ་ཞིབ་གཟུགས། །ལེགས་པར་མཐོང་བའི་བློ་གྲོས་མིག་ལྡན་ན། །ཇི་སྙེད་ཤེས་བྱ་གཟིགས་པའི་རྣམ་མཁྱེན་ཐུགས། །བདེ་བླག་རྙེད་པའི་གོ་སྐབས་སུ་ཡིས་ཁེགས། །༤ཕྱི་ནང་གཞན་གསུམ་མཚུངས་པའི་བདེན་འབྲས་ཀྱིས། །ལྐོག་གྱུར་ལེགས་ཉེས་གསལ་བའི་ངེས་པ་འདིས། །ཕུང་ཁམས་གདོད་ནས་དག་པ་ཕྱག་རྒྱའི་ལྷར། །ཡོངས་སུ་ཤེས་པའི་རྒྱུད་དོན་ངང་གིས་རྟོགས། །༥སྒྲིབ་གཉིས་ཆུ་འཛིན་གཡོ་བའི་འདུ་བྱེད་ཅན། །ཚོགས་གཉིས་རླུང་གིས་གཏོར་བའི་ལག་རྗེས་སུ། །མཁྱེན་གཉིས་མཁའ་ཉི་དྭངས་གསལ་མཉམ་བཞག་ངོར། །རྣམ་གཉིས་ཕན་གནོད་སྤྲོས་པ་མ་དམིགས་ཀྱང་། །༦རྟེན་འབྱུང་ཡན་ལག་ཕུང་པོ་མ་ཉམས་པ། །ཕུང་ལྔའི་ཤིང་རྟ་སྲིད་ལམ་བསྐྱོད་དེ་སྲིད། །ལེགས་ཉེས་དཔྱད་རིག་ཤེས་རབ་མིག་བྲལ་ན། །ལོག་ལམ་བས་མཐའི་གཡང་སར་ལྷུང་དུ་དོགས། །༧དེང་དུས་ཐ་སྙད་ལུང་སྟོན་བླ་མཁྱེན་པར། །མངོན་པའི་རློམ་འཆང་སྤར་སྨེའི་སྐོར་རྩིས་ཙམ། །ལེགས་པར་མ་ཕྱིན་བྱིས་པ་འབྲིད་མཐོང་ནས། །སྐྱོ་བའི་ཡིད་འདི་མྱ་ངན་ཁང་བུར་ཞུགས། །༨དེ་ཕྱིར་རྒྱུད་དོན་རབ་གསལ་གཞུང་འདི་དག །དབུལ་པོའི་ཁྱིམ་གྱི་གཏེར་བཞིན་ལྐོག་གྱུར་ཏུ། །ཡིབ་པར་འཕོངས་ནས་བསྟན་རྒྱུན་ལ་ཕན་ཕྱིར། །ལྷག་བསམ་འབད་རྩོལ་གྱིས་བརྐོས་པར་འདི་
བསྐྲུན། །༩འདིས་མཚོན་དུས་གསུམ་བསགས་པའི་རྣམ་དཀར་ལས། །ཟད་མེད་ནམ་མཁའི་མཛོད་ལ་དབང་བསྒྱུར་བའི། །སྟོང་ཉིད་སྙིང་རྗེ་ཟུང་འབྲེལ་བསྔོ་སྨོན་གྱི། །མཐུན་འགྱུར་སྲས་བཅས་རྒྱལ་བས་གྲོགས་མཛོད་ཀྱེ། །༡༠བདག་དང་འབྲེལ་ཐོགས་མ་གྱུར་སེམས་ཅན་ཀུན། །འགྱུར་མེད་བདེ་ཆེན་ལྷན་སྐྱེས་གཉུག་མའི་ཁམས། །གཞི་རྒྱུད་ཡེ་ཤེས་འབྲས་བུའི་སྐུར་སྨིན་པ། །དུས་ཀྱི་འཁོར་ལོའི་གོ་འཕང་མྱུར་ཐོབ་ཤོག །༡༡རྣམ་དཀར་བྱེད་པོས་སོ།། །།