བརྒྱད་པ་ངོ་བོའི་སྒོ་ནས་གཏན་ལ་དབབ་པ།
བརྒྱད་པ་ངོ་བོའི་སྒོ་ནས་གཏན་ལ་དབབ་པ་ནི།
འོ་ན་སོ་སོར་ཐར་བའི་སྡོམ་པའི་ངོ་བོ་གང་ཞེ་ན། འདི་ལ་གྲུབ་མཐའི་ལུགས་གསུམ་ཡོད་དོ། །དེ་དག་གཏན་ལ་དབབ་པ་ལ་བཞི་ལས།དང་པོ་གཞན་ལུགས་དགག་པ་ནི། མདོ་སྡེ་པ་སྡོམ་པའི་ངོ་བོ་སྤོང་བའི་སེམས་པ་དགེ་བ་ཡིན་པར་འདོད་ཅིང༌། སེམས་ཙམ་པ་སྡོམ་པའི་ངོ་བོ་སྤོང་བའི་སེམས་པ་དགེ་བ་ས་བོན་དང་བཅས་པ་ཡིན་པར་འདོད་དོ། །འོ་ན་དགྲ་བཅོམ་ཐོབ་པའི་དགེ་སློང་ཁྱད་པར་ཅན་འགོག་པ་ལ་སྙོམས་པར་ཞུགས་པ་ཉིད་ན་ཆོས་ཅན། སྡོམ་པ་མེད་པར་ཐལ། སྤོང་ངོ་སྙམ་པའི་སེམས་པ་མེད་པའི་ཕྱིར་རོ། ། གཞན་ཡང་དགེ་སློང་གཉིད་འཐུག་པོ་ལོག་པ་ཉིད་ན་ཆོས་ཅན། སྡོམ་པ་མེད་པར་ཐལ། སྤོང་བའི་སེམས་པ་མེད་པའི་ཕྱིར། འདོད་ན། སྡོམ་པ་ལས་དངོས་སུ་འདས་པའི་ལྟུང་བྱེད་སྐྱེ་མི་སྲིད་དུ་ཐལ། སྡོམ་པ་མེད་པའི་ཕྱིར་རོ། །དེའང་འདོད་ན། ལུང་ལས། དགེ་འདུན་གྱི་གནས་མལ་མ་བསྡུས་སམ་སྡུད་དུ་མ་བཅུག་པར་གཙུག་ལག་ཁང་དུ་ཞུགས་ཏེ་གཉིད་ལོག་གམ་སྙོམས་པར་ཞུགས་ནས་ཕན་ཕུན་དུ་གྱུར་ན་ལྟུང་བྱེད་དོ། །ཞེས་བཅོམ་ལྡན་འདས་ཀྱིས་གསུངས་པ་དང་འགལ་ལོ། །གལ་ཏེ་སེམས་ཙམ་པ་ན་རེ། དགེ་སློང་འགོག་པ་ལ་སྙོམས་པར་ཞུགས་པའམ་གཉིད་འཐུག་པོ་ལོག་པ་ན་སྤོང་བའི་སེམས་པ་མེད་ཀྱང༌། སྤོང་བའི་སེམས་པའི་ས་བོན་ཡོད་པས་སྡོམ་པ་མེད་པར་མི་འགྱུར་རོ་ཞེ་ན། སྡོམ་པ་སྔར་མེད་གསར་དུ་སྐྱེ་བའི་སྔ་ལོགས་ཉིད་ན་སྡོམ་པ་ལེན་པ་པོ་དེ་ལ་ཆོས་ཅན། སྡོམ་པ་ཡོད་པར་ཐལ། སྤོང་བའི་སེམས་པའི་ས་བོན་ཡོད་ཅིང་གཏོང་རྒྱུས་མ་བཏང་པའི་ཕྱིར་རོ། །