དཔལ་ལྡན་ལྷ་མོ་འཁོར་དང་བཅས་པའི་གསོལ་ཁ་བདུད་རྩི་སྨན་གྱི་ཆུ་རྒྱུན་ནད་རིམས་རྒྱུན་གཅོད།
དཔལ་ལྡན་ལྷ་མོ་འཁོར་དང་བཅས་པའི་གསོལ་ཁ་བདུད་རྩི་སྨན་གྱི་ཆུ་རྒྱུན་ནད་རིམས་རྒྱུན་གཅོད་ཅེས་བྱ་བ་བཞུགས་སོ།
སྲིད་པའི་རྒྱལ་མོ་སྲིད་པ་གསུམ་གྱི་བདག །སྲིད་ཞི་འཁོར་འདས་ཀུན་གྱི་དབང་བསྒྱུར་ཞིང་། །སྲིད་གསུམ་ལྷ་ཀླུ་མི་ཡི་ཕྱག་བྱས་མ། །སྲིད་གསུམ་འདྲེན་བྲལ་ལྷ་མོའི་སྐུ་ལ་འདུད། །ལྷ་མོ་འཁོར་བཅས་གསོལ་མཆོད་བྲི་བ་ལ། །དགོངས་པ་ཁྲོལ་ཞིང་བཀའ་གནོང་བྱིན་གྱིས་རློབས། །དེ་ཡང་ལྷ་མོའི་རྒྱུད་སྙིང་ལས། མི་མངོན་ནམ་མཁའི་དབྱིངས་རུམ་ནས། །དཔལ་ལྡན་ལྷ་མོ་རེ་མ་ཏི། །སྐུ་ལུས་གཅིག་ལ་སྤྲུལ་པ་སྟོང་། །སྤྲུལ་པ་རེ་ལ་ཕྱག་བརྙན་འབུམ། །སྐུ་ཡང་མི་གཅིག་སོ་སོར་སྟོན། །སྔགས་ཀྱང་མི་གཅིག་སོ་སོར་བཟླས། །ཇི་ལྟར་བྱས་ཀྱང་ངོ་བོ་གཅིག །ཇི་ལྟར་བྱས་ཀྱང་ཕྲིན་ལས་བསྒྲུབས། །ཞེས་གསུངས་པ་ལྟར་ལྷ་མོ་དཔོན་གཡོག་ཐམས་ཅད་ཀྱི་
གསོལ་ཀ་ཕྱོགས་གཅིག་ཏུ་བྱ་བ་ནི། ཀ་ཊོ་ར་སོགས་སྣོད་གཙང་མའི་ནང་དུ། ལྷ་མོའི་གཏོར་མ་ཟུར་གསུམ་ནག་པོ་རྩེ་ལ་མེ་རི་དང་རལ་གྲི་ཐོད་ཁྲག་གིས་མར་བརྒྱན་བྱ། དེའི་ལོག་གསུམ་གཏོར་ཆུང་ཟུར་གསུམ་གསུམ་བཞག །དེ་མཐར་ཟུར་གསུམ་བརྒྱད་ཀྱིས་བསྐོར། དེ་མཐར་གཏོར་ཆུང་ཟུར་གསུམ་བཅུའི་བསྐོར། དེ་རྣམས་ཀྱི་རྩེ་ལ་དཀར་བརྒྱན་བྱ། ཤ་དུམ་མཐེབ་སྐྱུའི་བསྐོར། སྨན་རཀ་མཆོད་པ་རྣམ་ལྔ་བཤམས། ལྷ་མོས་གཞུང་ནས་བདག་བསྐྱེད་ཕྱག་རྡོར་བསྒོམ་པར་གསུངས། འོན་ཀྱང་རྟ་མགྲིན་གུ་དྲག་གང་རེད་བསྒོམ་ཆོག །དེ་ནས་གཏོར་མ་ལ་འགུག་གཞུག་བསྡུས་པ་དང་། མཆོད་རྫས་རྣམས་བྷྱོ་བྷི་ཤོ་སོགས་ཀྱིས་བྱིན་གྱིས་བརླབས་ལ། མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་
མཚོའི་དབུས། །ཐོད་པ་སྐམ་རློན་གཞལ་ཡས་སུ། །ཨོ་ལས་དུད་སོལ་ལྷ་མོ་ནག །ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤརྟི་རྩེ་གསུམ་འཛིན། །དུད་ཁྲོད་ཆས་བརྒྱད་མི་རོ་གསོལ། །བ་གླང་པགས་པ་རེ་ལྡེ་བགོས། །སྦྲུལ་རྒྱན་ཞབས་གཉིས་ལྕགས་སྒྲོག་གསོལ། །བོང་བུ་གྲྭ་དམར་ཆིབས་པའོ། །ཐུགས་ཀར་འོད་དབུས་སྔགས་ཕྲེང་གསལ། །ཧཱུྃ་ལས་ཧཱུྃ་བྱུང་བྷ་གར་ཐིམ། །ཧཱུྃ་ལ་སྱ་རཱ་ག་ཡ་མི་སྟེ། །གཞན་ཡང་ལྷ་མོ་དཔོན་གཡོག་རྣམས། །ཆུ་ལ་ཆུ་ཟླ་ཤར་བ་བཞིན། །སྐད་ཅིག་དྲན་རྫོགས་ཉིད་དུ་གསལ། ། བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའི་མཐིང་དཀྱིལ་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནི། །གྲུ་གསུམ་འབར་བའི་གཞལ་ཡས་ནང་། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་པའི་གཟུགས། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡང་ནག་མོ་འབུམ་དང་བཅས། །གནས་འདི་ཉིད་དུ་གཤེགས་སུ་གསོལ། ། བྷྱོཿ མུ་ལེ་མཚོ་དང་ཡོངས་འདུའི་ཤིང་། །དུར་ཁྲོད་བརྒྱད་སོགས་བཞུགས་གནས་
ནས། །ལྷ་མོ་འཁོར་བཅས་སྤྱན་འདྲེན་ནོ། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨེ་ཨ་ར་ལི་ཧཱུྃ་ཧཱུྃ་ཛཿ བྷྱོ༔ རླུང་དམར་དྲག་པོའི་ཤུགས་ལྡན་བོང་བུའི་སྟེང་། །དུར་ཁྲོད་ཆས་ལྡན་ཞབས་གཉིས་ལྕགས་སྒྲོག་གསོལ། །ཞལ་གདངས་མཆེ་གཙིགས་ཀཱི་ལི་ཀཱི་ལ་སྒྲོག །དཔལ་ལྡན་འདོད་ཁམས་དབང་ཕྱུག་བརྟན་པར་བཞུགས། །ས་མ་ཡ་སྟི། དཔལ་ལྡན་ལྷ་མོ་ཁྱོད་ཀྱིས་བདག་ལ་སྐུ་མྱུར་དུ་སྟོན་ཅིག །གལ་ཏེ་སྐུ་མི་སྟོན་ནའང་བདག་གི་ཡིད་ལ་ཅི་བསམ་པ་དེ་འགྲུབ་པར་གྱིས་ཤིག །ས་མ་ཡ་ཧ་ན་ཧ་ན་མ་ཏི་ཀྲ་མ་ནི་ཧཱུཾ་ཕཊ། དཔལ་ལྡན་ལྷ་མོ་འཁོར་བཅས་ལ། །ཁྲག་ཆེན་འབར་བའི་ཨནྡྷཾ་དང་། །ཞག་ཆེན་མཁྲིས་པའི་ཞབས་བསིལ་དང་། །དབང་པོ་ལྔ་ཡི་མེ་ཏོག་དང་། །ཤ་ཆེན་གསུར་དང་ཞུན་ཆེན་མེ། །སྣ་ཚོགས་དྲི་ཡི་བྱུག་པ་དང་། །ཤ་ཆེན་ལྔ་ཡི་ཞལ་ཟས་དང་། །ཐོད་ཆེན་རྔ་དང་རྐང་ཆེན་དུང་། །དགྱེས་པའི་ཚུལ་གྱིས་བཞེས་སུ་གསོལ། །དེ་བི་ཀཱ་ལི་ས་པཱ་རི་ཝཱ་ར་ཨབྷཾ་སོགས་ནས་ཤབྟ་པྲ་ཏིཙྪ་སྭཱ་ཧཱ། ཨོཾ་སྭ་བྷ་ཝ་སོགས། སྟོང་པའི་ངང་ལས་བྷནྡྷའི་སྣོད་སྟོང་གསུམ་དང་མཉམ་པའི་ནང་དུ་གཏོར་མ་
ཁ་དོག་དྲི་རོ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧ་ཧོ་ཧཱུྃ༔ གསུམ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ས་པཱ་རི་ཝཱ་ར་ཨི་དཾ་བྷ་ལི་ཏ་ཁཱ་ཧི། །མ་ཧཱ་ཡཱཾ་ས་ཁཱ་ཧི། །མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་ཀཾ་ནི་རི་ཏི་ཁཱ་ཧི། མ་ཧཱ་ཨ་མྲྀ་ཏ་ལ་ཁཱ་ཧི། བྷྱོ་ཏྲག་རཀཱ་དེ་ཝ་ཧཱུྃ། བློ་རེ་མ་ཏི་ཧཱུྃ་ཕཊ༔ ས་པཱ་རི་ཝཱ་ར་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། ཨོ་ཨེ་ཀ་ཙ་ཏི་བྷྱོ་ཧྲི༔ ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བློ་རག་མོ་བློ་སྦྱོ་རྦད་རྦད༔ ས་པཱ་རི་ཝཱ་ར་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། ཨོ་བྷྱོ་ཏྲི་ཤ་ཧཱུཾ་བྷྱོ་རགོ་བྷྱོས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བྷྱོ་ར་ལི་ཕྲ་མ་ཡེ་ཛས་པཱ་རི་ཝཱ་ར་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། ཨོཾ་པྲ་ཏི་ཧ་ལི་བྷ་ཏི་ཡེ་སྭཱ་ཧཱ༔ ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བྷྱོ་སིདྷ་མུ་ཁ་བྷྱོས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བྷྱོ་ས་ལེ་ས་ནི་ཨ་ནོ་མ་རཀྟ་བྱོས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བྷྱོ་ཙཎྜ་བྷི་ར་བྷྱོ་ཛས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོ་བྷྱོ་རུ་ཏྲ་ཀ་ལི་ཛས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་པྲི་ཏ་མུ་ཁ་བྷྱོས་པཱ་རི་
ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་མ་མ་ཧཱུྃ་ཧཱུྃ༔ བློ་ས་ཡ་སི་བྷྱོས་པཱ་རི་ཝཱ་ར་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། དཔལ་ལྡན་ལྷ་མོ་དུད་པའི་སོལ་བ་མ། སྙིང་འཕྲོག་མ་གསུམ། རིགས་བཞིའི་ལྷ་མོ། དུར་ཁྲོད་ཀྱི་བདག་མོ་བརྒྱད། ཕྲ་མེན་མ་བརྒྱད། སྒོ་མ་བཞི། འཁོར་ནག་མོ་འབུམ་སྡེ་རྣམས་དང་། གཞན་ཡང་རང་བྱུང་མ། ཨེ་ཀ་ཙ་ཏི། དམག་ཟོར་མ། ཁྲི་སྨན་སི་ལེ། དུར་ཁྲོད་བདག་མོ། སྟག་སོར་ལྡེམ། དངོས་གྲུབ་ཞལ་མ། བ་ལམ་གཏུམ་མོ་འཇིགས་བྱེད། སྤྱང་ཞོན་མ། ཡི་དྭགས་ཁ། རྡོ་རྗེ་གཡུ་སྒྲོན་མ། དབང་ཕྱུག་ཉེར་བརྒྱད། ལྷ་མོ་ཁོ་ལེ་མ་ལ་སོགས་པ་སྲིད་པའི་མ་མོ་མཁའ་འགྲོ་ཐམས་ཅད་ཀྱི་ཞལ་དུ་དམ་རྫས་བདུད་རྩི་གཏོར་མ་རྒྱ་ཆེན་པོ་འདི་འབུལ་ལོ། །ཡོངས་སུ་བཞེས་ལ། སྤྱིར་སངས་རྒྱས་ཀྱི་བསྟན་པ་སྲུང་། དཀོན་མཆོག་གི་ཆེ་བ་ཕྱུངས། དཔལ་ལྡན་བླ་མའི་ཕྲིན་ལས་སྒྲུབས། སེམས་ཅན་གྱི་བདེ་སྐྱིད་སྤེལ་ཁྱད་པར་དུ་བདག་ཅག་དཔོན་སློབ་འཁོར་དང་བཅས་པའི་བདུད་དང་བར་ཆད་ཐམས་ཅད་ཞི་བ་དང་། ཚེ་དང་བསོད་ནམས་རྒྱས་པ་དང་། རླུང་མཁྲིས་བད་ཀན་
འདུས་པ་ལས་གྱུར་པའི་ནད་རིགས་ཐམས་ཅད་ཞི་བ་དང་། ཆག་ཆེན་ཉམ་ང་བཀྲ་མི་ཤིས་པ་ཐམས་ཅད་བཟློག་པ་དང་། ཡམས་ནད་རིམས་ནད་མི་ནད་ཕྱུགས་ནད་ཐམས་ཅད་རྒྱུན་ཆད་པའི་ཕྲིན་ལས་དུས་རྟག་ཏུ་མཛོད་ཅིག །ལྷ་མོ་རྣམས་ཀྱིས་དེ་ལྟར་བགྱིའོ་གསུངས་པར་བསམ། བྷྱོ། དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱིས། །བསྟན་པ་སྲུང་བར་ཁས་བླངས་པའི། །དུད་སོལ་ལྷ་མོ་ཁྱོད་ལ་བསྟོད། ། བྷྱོ། ལྷ་ལ་དབང་བསྒྱུར་ལྷ་མོ་དཔལ་འབར་མ། །དབང་ཕྱུག་སྲས་མོ་དཀར་མོ་དུང་སྐྱོང་མ། །སུམ་ཅུ་རྩ་གསུམ་གནས་ཀྱི་གཙོ་མོ་མཛད། །ལྷ་མོ་དཔལ་འབར་མ་ལ་བདག་བསྟོད་དོ། ། བྷྱོ། ཀླུ་ལ་དབང་བསྒྱུར་ཀླུ་མོ་དཔལ་འབར་མ། །གཙུག་ན་རིན་ཆེན་བུ་མོ་ཡིད་འོང་མ། །རོལ་པའི་མཚོ་བདུན་གནས་ཀྱི་གཙོ་མོ་མཛད། །ཀླུ་མོ་དཔལ་འབར་མ་ལ་བདག་བསྟོད་དོ། ། བྷྱོ། གནོད་སྦྱིན་དབང་བསྒྱུར་གནོད་སྦྱིན་དཔལ་འབར་མ། །གང་བ་བཟང་པོས་བུ་མོ་ཤིང་གྲིབ་ཅན། །ནགས་ཚལ་དྲྭ་བ་ཅན་གྱི་གཙོ་མོ་མཛད། །གནོད་སྦྱིན་དཔལ་འབར་མ་ལ་བདག་བསྟོད་དོ། ། བྷྱོ། བདུད་ལ་དབང་བསྒྱུར་བདུད་མོ་དཔལ་
འབར་མ། །རེ་ལྡེ་མགོ་ཉག་བུ་མོ་རེ་མ་ཏི། །བདུད་མཁར་རྩེ་དགུ་གནས་ཀྱི་གཙོ་མོ་མཛད། །བདུད་མོ་དཔལ་འབར་མ་ལ་བདག་བསྟོད་དོ། །དམ་རྫས་བརྒྱན་པའི་གཏོར་མ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ལ། །ཟླ་བའི་དཀྱིལ་འཁོར་དག་ལ་ཐིམ་པར་མཛོད། །བདུད་རྩི་རླངས་པ་དཀར་པོའི་ཕྱོགས་རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་རྩད་གཅོད་མ། །བདུད་རྩི་སྨན་གྱི་རྒྱལ་མོ་དམ་ལ་འདུས། །ཕྱོགས་བཅུའི་འཇིག་རྟེན་དུག་གི་བཅུད་བསྡུས་ནས། །ཉི་མའི་དཀྱིལ་འཁོར་དག་ལ་ཐིམ་པར་མཛོད། །དུག་གི་རླངས་པ་ནག་པོའི་ཕྱོགས་རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་སློང་བྱེད་མ། །དེ་ཕྱིར་ནད་ཀྱི་བདག་མོ་དམ་ལ་འདུས། །གང་ཞིག་ཁྱོད་ལ་དད་ན་མ་བས་བྱམས། །དེ་ཕྱིར་མ་གཅིག་ནད་བདག་སྨན་གྱི་གཙོ། །ལྷ་མོ་ཁྱོད་ལ། བདག་གིས་རྟག་ཏུ་བསྟོད། ། བྷྱོ། སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །བདག་གི་དེང་ནས་ཇི་སྲིད་འཁོར་བའི་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་ཀུན། །
ཞི་བར་བྱ་ཕྱིར་ཚེ་དང་ལོངས་སྤྱོད་འཕེལ། །ནག་པོའི་ཕྱོགས་རྣམས་འགུག་ཅིང་དབང་དུ་སྡུད། །སྨྱོ་འབོགས་བསད་པ་ལ་སོགས་ལས་འདི་དག །བསྟན་པ་སྲུང་ཞིང་བདག་གིས་བསྒྲུབ་པར་བགྱི། །དེ་ལ་འགལ་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་བའི་རྡོ་རྗེའི་མགོ་འགེམ་ཤོག །དེ་སྐད་རྒྱལ་བའི་སྤྱན་སྔར་དམ་བཅས་པའི། །དམ་བཅས་བཞིན་དུ་ལས་རྣམས་འགྲུབ་པར་མཛོད། །རྣལ་འབྱོར་བདག་དང་བདག་གི་འཁོར་རྣམས་ལ། །ཞལ་ནས་བདུད་རྩི་ཆར་གྱི་རྒྱུན་ཕོབ་ལ། །ནད་སོགས་སྡུག་བསྔལ་མི་མཐུན་ཞི་བར་མཛོད། །ཚེ་དང་བསོད་ནམས་ལོངས་སྤྱོད་རྒྱས་པར་མཛོད། །ཟང་ཟིང་ལོ་ཏོག་འབྲུ་ཡི་ཕུང་པོ་དང་། །རིན་ཆེན་རྐང་འགྲོའི་ཕྱུགས་རྣམས་འཕེལ་བར་མཛོད། ། བྷྱོཿ ཆོས་སྐུ་སྐྱེ་མེད་ངང་ཉིད་ལས། །འགྲོ་བའི་དོན་དུ་སྐུ་སྤྲུལ་ནས། །འཇིག་རྟེན་འདས་ཀྱང་འཁོར་བའི་ཚུལ། །མ་དང་སྲིང་ལྟར་བསྒྲུབ་ལ་བརྩོན། །ལྷ་མོ་འཁོར་དང་བཅས་ལ་བསྟོད། །དམ་རྫས་མཆོད་གཏོར་ཐུགས་དམ་བསྐང་། །ཐུགས་དང་འགལ་བ་མཐོལ་ཞིང་བཤགས། །བདག་ཅག་དཔོན་སློབ་འཁོར་བཅས་ཀྱི། །ཡམས་ནད་
རིམས་ནད་ཞི་བ་དང་། །འབྲུ་དང་རྐང་འགྲོ་འཕེལ་བར་མཛོད། །འདོད་དགུ་ཐམས་ཅད་དབང་དུ་བསྡུས། །གནོད་ཅིང་འཚེ་བའི་དགྲ་བགེགས་སྒྲོལ། །མ་གཡེལ་མྱུར་དུ་ལས་མཛོད་ཅིག །ༀ་ཧཱུྃ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ནད་སརྔ་ཤཱནྟི་ཀུ་རུ་ཡེ་སྭཱ་ཧཱ། སྤྲོ་ན་གནམ་ཆོས་ལྷ་མོའི་སྔགས་བཟླས་རུང་། །སྔགས་དེ་ཅི་ནུས་བཟླ་བར་བྱེད་པའི་ཚེ། །ལྷ་མོའི་ཐུགས་ཀར་ཉི་མའི་དཀྱིལ་འཁོར་སྟེང་། །ཧཱུྃ་མཐིང་དེ་ལ་སྔགས་ཕྲེང་གཡོན་དུ་འཁོར། །ཧཱུྃ་གི་ཐིག་ལེ་ཉི་མའི་དཀྱིལ་འཁོར་གྱུར། །དེ་ལས་འོད་འཕྲོས་བདག་དང་བསྲུང་བྱ་ཡི། །ནད་ཀུན་སིབ་སིབ་བསྡུས་ནས་ཉི་མར་བསྟིམ། །ཧཱུྃ་གི་ཟླ་ཚེས་ཟླ་བའི་དཀྱིལ་འཁོར་གྱུར། །དེ་ལས་འོད་འཕྲོས་འཇིག་རྟེན་ཁམས་རྣམས་ཀྱི། །བདུད་རྩི་བཅུད་བསྡུས་ལྷ་མོའི་སྤྱི་བོ་རུ། །བུམ་པ་དཀར་པོའི་ནང་ཞུགས་བདུད་རྩི་གྱུར། །ལྷ་མོའི་ཞལ་ཞུགས་སྐུ་ལུས་ངང་ལྟེམས་གང་། །ལྷ་མོའི་སྐུ་མདོག་སྟོན་ཀའི་ཟླ་ལྟར་གྱུར། །བདུད་རྩིའི་ཟེག་མ་འཁོར་ཀུན་ཞལ་དུ་ཞུགས། །ལུས་གང་ཐམས་ཅད་དཀར་པོ་ཤ་སྟག་གྱུར། །གཙོ་མོའི་བདུད་རྩི་མ་ཤོང་སྐྱུག་པའི་ཚུལ། །འོ་མའི་མདོག་འདྲ་བདེ་བའི་རེག་བྱ་ཅན། །ཆར་བབ་བཞིན་ནམ་ཆུ་བོའི་གཞུང་བཞིན་བབས། །རང་དང་བསྲུང་བྱ་ཀུན་གྱི་ཚངས་བུག་གང་། །ཁ་ནས་ཞུགས་ཏེ་ལུས་ཀུན་ངང་ལྟེམ་གང་། །མ་མོའི་གདུག་རྩུབ་མཁའ་འགྲོའི་ཁ་རླངས་དང་། །ནད་རིམས་ཐམས་
ཅད་རླངས་པ་སྔོ་དམར་གྱི། །ཚུལ་དུ་དབང་པོའི་སྒོ་དང་བ་སྤུ་ཡི། །བུ་ག་ནས་ཐོན་ནམ་མཁར་འཇའ་ལྟར་ཡལ། །ལྷ་མོ་གཙོ་འཁོར་སེམས་ཀྱི་སྣང་བ་རྣམས། །རང་ལས་གཞན་དུ་མ་གྲུབ་སེམས་ཉིད་འདི། །ཡེ་ནས་འཕགས་བཞི་བསྐྱེད་མཛད་ཡུམ་ཆེན་མོ། །དོན་དམ་ལྟ་བའི་ངང་ལ་མཉམ་པར་བཞག །བུད་མེད་རྒྱན་ལྡན་དཀར་གསུམ་སྟེར་བ་དང་། །ཁྲུས་བྱེད་ཉི་མ་ཤར་ཕྱོགས་ལྟས་བཟང་འབྱུང་། །དེ་ནས་མངའ་གསོལ་ནི། ཧཱུྃ་བྷྱོཿ དཔལ་ལྡན་དུད་སོལ་ལྷ་མོ་ལ། །འདས་པའི་སངས་རྒྱས་ཡིན་པའི་ཕྱིར། །མར་མེ་མཛད་ཀྱིས་མངའ་གསོལ་བས། །དམ་ཆོས་མི་ནུབ་སྒྲོན་མེ་སྦར། །དཔལ་ལྡན་དུད་སོལ་ལྷ་མོ་ལ། །ད་ལྟའི་སངས་རྒྱས་ཡིན་པའི་ཕྱིར། །ཤཱཀྱ་ཐུབ་པས་མངའ་གསོལ་བ། །བསྟན་པ་སྲུང་བའི་ལས་རྣམས་བཅོལ། །དཔལ་ལྡན་དུད་སོལ་ལྷ་མོ་ལ། །མ་བྱོན་སངས་རྒྱས་ཡིན་པའི་ཕྱིར། །བྱམས་པ་མགོན་པོས་མངའ་གསོལ་བ། །ཐུགས་ཉིད་མི་གཡོ་བྱམས་པའི་ངང་། །དཔལ་ལྡན་དུད་སོལ་ལྷ་མོ་ལ། །དུས་གསུམ་སངས་རྒྱས་མངའ་གསོལ་བ། །མི་བསྐྱོད་པ་ཡི་དབུ་ལ་བརྒྱན། །དཔལ་ལྡན་དུད་སོལ་ལྷ་མོ་ལ། །རྒྱལ་བ་རིགས་ལྔས་མངའ་གསོལ་བ། །ཐོད་སྐམ་ལྔ་ཡིས་དབུ་ལ་བརྒྱན། །དཔལ་ལྡན་དུད་
སོལ་ལྷ་མོ་ལ། །རིགས་གསུམ་མགོན་པོས་མངའ་གསོལ་བ། །སྤྱན་གསུམ་དམར་ལ་སྡང་མིག་བསྒྲད། །དཔལ་ལྡན་དུད་སོལ་ལྷ་མོ་ལ། །ལྷ་ཆེན་རྣམས་ཀྱིས་མངའ་གསོལ་བ། །དབུ་སྐྲ་དམར་སེར་གྱེན་ལ་འབར། །དཔལ་ལྡན་དུད་སོལ་ལྷ་མོ་ལ། །ཀླུ་ཆེན་རྣམས་ཀྱིས་མངའ་གསོལ་བ། །སྦྲུལ་ཆེན་བརྒྱད་ཀྱི་སྐུ་ལ་བརྒྱན། །དཔལ་ལྡན་དུད་སོལ་ལྷ་མོ་ལ། །གཟའ་ཆེན་བརྒྱད་ཀྱིས་མངའ་གསོལ་བ། །སྨིན་མ་ཁམ་སེར་གྱེན་ལ་འབར། །དཔལ་ལྡན་དུད་སོལ་ལྷ་མོ་ལ། །དྲང་སྲོང་རྣམས་ཀྱིས་མངའ་གསོལ་བ། །སྐུ་མདོག་སྔོ་ལ་ཀེང་རུས་གཟུགས། །དཔལ་ལྡན་དུད་སོལ་ལྷ་མོ་ལ། །དཔའ་བོ་རྣམས་ཀྱིས་མངའ་གསོལ་བ། །ཕྱག་གཡས་དང་པོས་རལ་གྲི་ཕྱུར་།དཔལ་ལྡན་དུད་སོལ་ལྷ་མོ་ལ། །དཔའ་མོ་རྣམས་ཀྱིས་མངའ་གསོལ་བ། །ཕྱག་གཡོན་འོག་མས་ཐོད་ཁྲག་བསྣམས། །དཔལ་ལྡན་དུད་སོལ་ལྷ་མོ་ལ། །ལྷ་མིན་རྣམས་ཀྱིས་མངའ་གསོལ་བ། །ཕྱག་གཡོན་དང་པོས་མདུང་དར་ཕྱར། །དཔལ་ལྡན་དུད་སོལ་ལྷ་མོ་ལ། །མི་རྣམས་ཀུན་གྱིས་མངའ་གསོལ་བ། །ཕྱག་གཡོན་འོག་མས་རྩེ་
གསུམ་བསྣམས། །དཔལ་ལྡན་དུད་སོལ་ལྷ་མོ་ལ། །མགོན་པོ་རྣམས་ཀྱིས་མངའ་གསོལ་བ། །གསུས་ཁྱིམ་ཆེ་ལ་ཐུར་དུ་འཕྱང་། །དཔལ་ལྡན་དུད་སོལ་ལྷ་མོ་ལ། །ནོར་ལྷ་རྣམས་ཀྱིས་མངའ་གསོལ་བ། །རིན་ཆེན་འབར་བས་དབུ་ལ་བརྒྱན། །དཔལ་ལྡན་དུད་སོལ་ལྷ་མོ་ལ། །དུར་ཁྲོད་ཤ་ཟ་རྣམས་ཀྱིས་མངའ་གསོལ་བ། །མི་མགོ་རློན་པས་དོ་ཤལ་བྱས། །དཔལ་ལྡན་དུད་སོལ་ལྷ་མོ་ལ། །གཤིན་རྗེ་རྣམས་ཀྱིས་མངའ་གསོལ་བ། །གླང་ཆེན་ཀོ་རློན་སྐུ་ལ་གསོལ། །དཔལ་ལྡན་དུད་སོལ་ལྷ་མོ་ལ། །དམན་མོ་རྣམས་ཀྱིས་མངའ་གསོལ་བ། །ཐལ་ཆེན་ཚོམ་བུ་ལུས་ལ་བྱུགས། །དཔལ་ལྡན་དུད་སོལ་ལྷ་མོ་ལ། །མ་མོ་རྣམས་ཀྱིས་མངའ་གསོལ་བ། །ཁྲག་ཞག་ཐིག་ལེའི་སྐུ་ལ་བརྒྱན། །དཔལ་ལྡན་དུད་སོལ་ལྷ་མོ་ལ། །།མཁའ་འགྲོ་རྣམས་ཀྱིས་མངའ་གསོལ་བ། །བམ་ཆེན་རོ་ཡི་གདན་ལ་བཞུགས། དཔལ་ལྡན་དུད་སོལ་ལྷ་མོ་ལ། །སྲིན་པོ་རྣམས་ཀྱིས་མངའ་གསོལ་བ། །ཞབས་གཉིས་ལྕགས་སྒྲོག་འབར་བས་བརྒྱན། །དཔལ་ལྡན་དུད་སོལ་ལྷ་མོ་ལ། །སྲིན་མོ་རྣམས་ཀྱིས་མངའ་གསོལ་བ། །རྫུ་འཕྲུལ་བོང་
བུ་དམར་གྲྭ་ཆིབས། །དཔལ་ལྡན་དུད་སོལ་ལྷ་མོ་ལ། །མཁའ་འགྲོ་རྣམས་ཀྱིས་མངའ་གསོལ་བ། །སྐུ་ལ་དུར་ཁྲོད་ཆས་བརྒྱད་གསོལ། །དཔལ་ལྡན་དུད་སོལ་ལྷ་མོ་ལ། །མེ་ལྷ་རྣམས་ཀྱིས་མངའ་གསོལ་བ། །སྐུ་ལ་བསྐལ་པའི་མེ་ཆེན་འབར། །དཔལ་ལྡན་དུད་སོལ་ལྷ་མོ་ལ། །རླུང་ལྷ་རྣམས་ཀྱིས་མངའ་གསོལ་བ། །རླུང་ནག་འཚུབ་མའི་ནང་དུ་བཞུགས། །དཔལ་ལྡན་དུད་སོལ་ལྷ་མོ་ལ། །ས་བདག་རྣམས་ཀྱིས་མངའ་གསོལ་བ། །རིན་ཆེན་འབར་བའི་མཁར་ན་བཞུགས། །དཔལ་ལྡན་དུད་སོལ་ལྷ་མོ་ལ། །རྣལ་འབྱོར་བདག་གིས་མངའ་གསོལ་ལོ། །དགྲ་ལ་རྦད་ན་ལས་ལ་མྱུར། །བཅོལ་བའི་ཕྲིན་ལས་བསྒྲུབ་པར་མཛོད། །འཁོར་གྱི་ལྷ་མོ་རྣམས་ཀྱི་གསོལ་མཆོད་ནི། བྷྱོཿ རང་བྱུང་རྒྱལ་མོ་རེ་མ་ཏི། །ཞལ་གཅིག་ཕྱག་བཞི་དང་པོ་གཉིས། །ཁཊཾ་ཞགས་པ་འོག་མ་གཉིས། །མེ་ལོང་ཕུར་པ་འཛིན་པ་སྟེ། །མདོག་ནག་བོང་དང་གླང་ལྤགས་གསོལ། །ཆིབས་སུ་དྲེའུ་སྔོ་ནག་བཅིབ། །རང་བྱུང་རྒྱལ་མོ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་
ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། ། བྷྱོཿ དཔལ་ལྡན་ལྷ་མོ་རེ་མ་ཏི། །སྐུ་མདོག་ནག་མོ་ཞལ་གཅིག་པ། །ཕྱག་གཉིས་ཁྲམ་ཤིང་ནད་རྐྱལ་འཛིན། །རེ་ལྡེས་བརྒྱན་ཅིང་བོང་དམར་ཞོན། །ཤན་པ་ནག་མོ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོཿ སྔགས་སྲུང་ཨེ་ཀ་ཙ་ཏི་སྔོ། །ཞལ་གཅིག་པ་ཕྱག་གཉིས་གཡས་ཞིང་དབྱུག །གཡོན་པས་ལྕགས་སྤྱང་མགོ་དགུ་འཛིན། །ཆིབས་སུ་བོང་བུ་སྨུག་ནག་ཆིབས། །གཟིག་གི་ཤམ་ཐབས་སྨད་ལ་དཀྲིས། །གཅེར་བུ་སྤྱན་ཚེམས་ནུ་མ་གཅིག །ཨེ་ཀ་ཙ་ཏི་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས།
གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། ། བྷྱོ། དཔལ་ལྡན་ལྷ་མོ་དམག་ཟོར་མ། །སྐུ་མདོག་ནག་མོ་གཡས་བེ་ཅོན། །གཡོན་པས་ཕྱག་ན་བྷནྡྲ་འཛིན། །སྐུ་ལ་རེ་ལྡེའི་ཤམ་ཐབས་གསོལ། །དྲེའུ་རྐྱང་སེར་ཆིབས་སུ་ཆིབས་།དམག་ཟོར་རྒྱལ་མོ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ ལྷ་མོ་ཁྲི་སྨན་སི་ལེ་མ། །ཞལ་ཅིག་ཕྱག་གཉིས་གཡས་བ་དན། །གཡོན་པས་ཕྱག་ན་བྷན་འཛིན། །དབུ་སྐྲ་ཐོར་ལྕོག་ཐུར་བཤལ་ལ། །གཅེར་བུ་གཡང་གཞི་སྐུ་ལ་གསོལ། །ཆིབས་སུ་ཆུ་བྱ་རོག་མོ་། །ཁྲི་སྨན་སི་ལེ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །
ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ མ་མོ་དུར་ཁྲོད་བདག་མོ་ནི། །སྐུ་མདོག་ནག་མོ་ཞལ་གཅིག་པ། །ཕྱག་གཉིས་གཡས་པ་གྲི་གུག་སྟེ། །གཡོན་པ་ཐོད་ཁྲག་སྐུ་སྟོད་ནི། །རེ་ལྡེ་ཤམ་ཐབས་གཡུ་ཡི་ག །ཕྲག་ལྷ་བཀལ་བ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ མ་མོ་སྟག་སྨན་སོར་ལྡེམ་སེར། །ཞལ་གཅིག་ཕྱག་གཉིས་གྲི་གུག་ཐོད། །གཡང་གཞི་ཞིང་ཤམ་སྟག་ལ་ཆིབས། །སྟག་སྨན་སོར་ལྡེམ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔
དངོས་གྲུབ་ཞལ་མ་སྐུ་མདོག་སེར། །གཡས་པས་ལྕགས་ཀྱུ་གཡོན་ཞགས་པ། །གཅེར་བུ་མི་ལྤགས་གཡང་གཞི་གསོལ། །གསེར་གྱི་གའུ་ཕྲག་ལ་བཀལ། །དངོས་གྲུབ་ཞལ་མ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། ། བྷྱོཿ མ་མོ་བ་ལམ་དྲིལ་སྣ་ནག །ཞལ་ལོ་གཅིག་ཕྱག་གཉིས་ཞགས་པ་ཁྲག །ཆིབས་སུ་དྲེལ་ནག་རྐང་གསུམ་ཆིབས། །བ་ལམ་དྲིལ་སྣ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ མ་མོ་གཏུམ་བྱེད་འཇིགས་བྱེད་སྨུག །ཞལ་གཅིག་ཕྱག་གཉིས་གཡས་པ་ཡིས། །ཁཊཾ་གཡོན་པས་དུང་དམར་འཛིན། །དངུལ་ག་ཕྲག་
བཀལ་ཞིང་ཆེན་དང་། །ཐོད་སྐམ་དོ་ཤལ་དབུ་ལ་བརྒྱན། །གཏུམ་མོ་འཇིགས་བྱེད་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོཿ དཔལ་ལྡན་ལྷ་མོ་སྤྱང་ཞོན་མ། །སྐུ་མདོག་སྨུག་པོ་གཡས་ཁཊཾ། །གཡོན་པས་ཐོད་ཁྲག་སྤྱང་ཀི་ནི། །མགོ་བོ་དགུ་པ་ཆིབས་སུ་ཆིབས། །ལྷ་མོ་སྤྱང་ཞོན་འཁོར་དང་བཅས། །འདིར་གཤེགས་བརྒྱན་པའི་མཆོད་གཏོར་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། ། བྷྱོཿ མ་གཅིག་ལྷ་མོ་ཡི་དྭགས་ཁ། །སྐུ་མདོག་ནག་མོ་གཡས་བྷནྡྷ། །གཡོན་པས་ནད་ཀྱི་རྐྱལ་པ་འཛིན། །རྡོ་ཡི་གའུ་ཕྲག་ལ་བཀལ། །འཁོར་དང་བཅས་པ་མ་ལུས་ཀུན། །འདིར་གཤེགས་བརྒྱན་པའི་མཆོད་གཏོར་
བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ དབང་ཕྱུག་སྲིན་མོ་གཡག་གདོང་མ། །སྐུ་མདོག་སྨུག་མོ་ཞལ་གཅིག་མ། །ཕྱག་གཉིས་གཡས་པས་རྡོ་རྗེ་སྟེ། །གཡོན་གྱི་ཕྱག་ན་བྷནྡྷ་འཛིན། །དེ་ལ་དབང་ཕྱུག་ཉེར་བརྒྱད་ཀྱི། །ཀུན་གྱིས་བསྐོར་བ་མ་ལུས་ཀུན། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ དཔལ་ལྡན་ལྷ་མོ་ཁོ་ལེ་མ། །ཞལ་གཅིག་ཕྱག་གཉིས་གཡས་པ་ཡིས། །ཁཊཾ་གཡོན་པས་རླུང་ཞགས་འཛིན། །ཞབས་གཉིས་བསད་དེ་མེ་ཏོག་སྟེང་། །འཁོར་དུ་སྣང་སྲིད་མ་མོས་བསྐོར། །ལྷ་མོ་ཁོ་ལེ་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་
གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །བྷྱོ༔ ལྷ་མོ་རྡོ་རྗེ་གཡུ་སྒྲོན་མ། །སྐུ་མདོག་དཀར་གསལ་ཞལ་གཅིག་པ། །ཕྱག་གཉིས་མེ་ལོང་མདའ་དར་འཛིན། །ཤ་བ་ཡུ་མོ་ཆིབས་སུ་ཆིབས། །འཁོར་དུ་བརྟན་མ་བཅུ་གཉིས་ནི། །བུད་མེད་མཛེས་མའི་གཟུགས་ཅན་ལ། །རིན་ཆེན་རྒྱལ་མཚན་ཕྱག་མཚན་ཐོགས། །མཐུན་པའི་ཆིབས་པ་སྣ་ཚོགས་ཆིབས། །གཡུ་སྒྲོན་བརྟན་མ་བཅུ་གཉིས་ནི། །འདིར་གཤེགས་བརྒྱན་པའི་གཏོར་མ་བཞེས། །གསོལ་ལོ་མཆོད་དོ་མཉེས་གྱུར་ཅིག །ཁྱེད་ཀྱི་ཐུགས་དམ་བསྐངས་གྱུར་ནས། །ཐུགས་དང་འགལ་བ་མཐོལ་ཞིང་བཤགས། །ནད་རིམས་ཡམས་ནད་མི་མཐུན་སོགས། །ཐམས་ཅད་ལྷ་མོས་བཟློག་ཏུ་གསོལ། །སྤྲོ་ན། རྡོ་རྗེ་བརྟན་མ་གཡུ་སྒྲོན་མ། །སྐུ་མདོག་ཀུནྡ་ལྟར་དཀར་ཞིང་། །བཅུ་དྲུག་ལོན་པའི་ལང་ཚོ་ཅན། །ཁྱད་པར་འཕགས་པའི་ལྷ་མོ་ནི། །ཞི་ཞིང་འཛུམ་པའི་ངང་ཚུལ་ཅན། །སྤྱན་གཉིས་སྒྲུབ་པ་པོ་ལ་གཟིགས། །གཡུ་ཡི་སྨིན་མ་
དུང་གི་ཚེམས། །ཕྱག་གཡས་མདའ་དར་ནམ་མཁར་ཕྱར། །གཡོན་པས་དངུལ་དཀར་མེ་ལོང་འཛིན། །སྨན་ཤ་ཡུ་མོ་ཆིབས་སུ་ཆིབས། །ལྷ་རྫ་ས་ན་བཟའ་དགུ་བརྩེགས་གསོལ། །རིན་ཆེན་རྒྱན་རྣམས་ཀུན་གྱིས་བརྒྱན། །ཁྱོད་ཀྱི་ན་བཟའི་སུལ་རྣམས་ལས། །རིན་ཆེན་སྣ་ཚོགས་ཆར་དུ་འབེབས། །བསྒྲུབ་མཆོག་འདོད་པའི་རེ་བ་བཀང་། །མཁའ་འགྲོ་དཀར་མོས་ཚོགས་ཀྱིས་བསྐོར། །ལྷབ་ལྷུབ་ན་བཟའི་རྒྱན་རྣམས་ལྡན། །སིལ་སྙན་མང་པོས་སྒྲ་དང་བཅས། །བྲན་གཡོག་མང་པོས་འཁོར་གྱིས་བསྐོར། །འདིར་བྱོན་གཙང་མའི་ཕུད་ལ་རོལ། །དམ་རྫས་གཏོར་མ་འདི་བཞེས་ལ། །ལོངས་སྤྱོད་འདོད་དགུའི་དངོས་གྲུབ་སྩོལ། །སྔོན་ཚེ་པདྨའི་བཀའ་བཞིན་དུ། བཅོལ་བའི་ཕྲིན་ལས་སྒྲུབ་པར་མཛོད། །རིགས་བཞི་སྨན་བཙུན་མཆེད་བཞི་ནི། །སྔོ་སེར་དམར་དང་ལྗང་བའི་མདོག །དྲེལ་རྟ་རྐྱང་དང་འབྲོང་ལ་ཆིབས། །རང་རང་རིགས་ཀྱི་ཕྱག་མཚན་འཛིན། །རིགས་བཞི་མཁའ་འགྲོའི་ཚོགས་ཀྱིས་བསྐོར། །ལྷབ་ལྷུབ་ན་བཟའི་རྒྱན་རྣམས་ལྡན། །སིལ་སྙན་མང་པོས་སྒྲ་དང་བཅས། །བྲན་གཡོག་མང་པོས་
འཁོར་གྱིས་བསྐོར། །འདིར་བྱོན་གཙང་མའི་ཕུད་ལ་རོལ། །དམ་རྫས་གཏོར་མ་འདི་བཞེས་ལ། །ཕྲིན་ལས་རྣམ་བཞིའི་དངོས་གྲུབ་སྩོལ། །སྔོན་ཚེ་པདྨའི་བཀའ་བཞིན་དུ་། །བཅོལ་བའི་ཕྲིན་ལས་བསྒྲུབ་པར་མཛོད། །རྡོ་རྗེ་བརྟན་མ་བཅུ་གཉིས་ནི། །སྐུ་མདོག་ཕྱག་མཚན་སྣ་ཚོགས་ལྡན། །སོ་སོར་ཞོན་པ་སྣ་ཚོགས་ཆིབས། །རིགས་དང་མཐུན་པའི་འཁོར་གྱིས་བསྐོར། །ཕྱི་འཁོར་སྨན་མོ་འབུམ་ཕྲག་དང་། །མ་ལུས་འཁོར་དང་ཡང་འཁོར་བཅས། །ལྷབ་ལྷུབ་ན་བཟའི་རྒྱན་རྣམས་ལྡན། །སིལ་སྙན་མང་པོས་སྒྲ་དང་བཅས། །བྲན་གཡོག་མང་པོས་འཁོར་གྱིས་བསྐོར། །འདིར་བྱོན་གཙང་མའི་ཕུད་ལ་རོལ། །དམ་རྫས་གཏོར་མ་འདི་བཞེས་ལ། །སོ་སོའི་དངོས་གྲུབ་ཐམས་ཅད་སྩོལ། །སྔོན་ཚེ་པདྨའི་བཀའ་བཞིན་དུ། །བཅོལ་བའི་ཕྲིན་ལས་བསྒྲུབ་པར་མཛོད། །རྡོ་རྗེ་གཡུ་སྒྲོན་མ་ལ་སོགས། །དཔལ་ལྡན་ལྷ་མོ་འཁོར་བཅས་ལ། །སྔ་མ་ལས་བཅོལ་ཞུ་སྐྱེམས་འབུལ། །ད་ལྟ་ལས་ཀྱི་གཉེར་ཟས་འདི། །དགྱེས་པ་ཆེན་པོས་བཞེས་སུ་གསོལ། །རྡོ་རྗེ་འཆང་དབང་ཧེ་རུ་ཀ །སྟོན་པ་གསང་བདག་རྟ་མགྲིན་དང་། །མཁའ་འགྲོ་
སེང་གདོང་པདྨ་འབྱུང་། །བཞད་པ་རྡོ་རྗེ་ཀརྨ་པ། །སངས་རྒྱས་དབོན་པོ་གར་གྱི་བདག །སུམ་ལྡན་རྡོ་རྗེ་འཛིན་པ་ཡི། །བཀའ་དང་དམ་ལས་མ་འདའ་བར། །མ་ལྟར་བསྟེན་ན་དབང་མ་ཆེ། །སྲིང་ལྟར་བསྟེན་ན་སྙིང་མ་རིང་། །མཛའ་ལྟར་བསྟེན་ན་གཞུང་མ་ངན། །བྲན་ལྟར་བསྟེན་ན་ཞེ་མ་སྡང་། །དཀོན་མཆོག་གསུམ་གྱི་དབུ་འཕང་བསྟོད། །བདག་གིས་བརྒྱུད་པའི་བསྟན་པ་བསྲུང་། །བླ་མ་རྣམས་ཀྱི་སྐུ་ཚེ་བསྲིང་། །ལུང་སྟོན་ཆོས་སྲིད་འཛིན་པ་ཡི། །དགེ་འདུན་སྡེ་རྣམས་སྐྱོང་བར་མཛོད། །མི་མཐུན་རྐྱེན་རྣམས་ཞི་བ་དང་། །ཚེ་དང་བསོད་ནམས་རྒྱས་པར་མཛོད། །སྣང་སྲིད་ཐམས་ཅད་དབང་དུ་བསྡུས། །བསྟན་དང་བདག་ཅག་སློབ་དཔོན་ལ། །སྡང་བའི་དགྲ་བོ་ཐམས་ཅད་ཐུལ། །བྱིན་པའི་ཟས་འདི་ཁྱོད་ཀྱིས་གསོལ། །བཅོལ་བའི་ལས་རྣམས་ཐམས་ཅད་སྒྲུབས། །ཇི་ལྟར་གདམས་པའི་ངག་ལ་ཉོན། །བདག་གིས་དགོས་པའི་དོན་རྣམས་སྒྲུབས། །མ་རུངས་གདུག་པའི་དགྲ་འདི་སོད། །གནོད་པར་བྱེད་པའི་བགེགས་རྣམས་ཐུལ། །བར་ཆད་རྐྱེན་རྣམས་ཐམས་ཅད་ཟློག །གདོད་སའི་གནས་མལ་ཁྱེད་
ཀྱིས་སྲུངས། །ཉེ་བར་མཁོ་བའི་ཡོ་བྱད་སྤེལ། །རྒྱུད་པ་འཛིན་པའི་ལས་རྣམས་བསྒྲུབས། །འདི་ནས་བྱང་ཆུབ་མ་ཐོབ་བར། །རྟག་ཏུ་མི་འབྲལ་འགྲོགས་ནས་ཀྱང་། །ཇི་ལྟར་འདོད་པའི་ལས་རྣམས་བསྒྲུབས། །འབད་པ་མེད་པར་འགྲུབ་པར་མཛོད། །དེ་ནས་འདོད་གསོལ་ཕྲིན་ལས་བཅོལ་བ་འདི་རྒྱས་པར་ན་ལྷ་མོ་ཐམས་ཅད་ལ་སྦྱར། བསྡུ་ན་གཅིག་གིས་ཆོག །འདན་པ་རྣ་འཇུ་སར་པ་ཏ། །ཧུར་ཐུམ་ནད་རྣམས་ཞི་བར་མཛོད། །རྒྱུ་ཟེར་འབྲས་ཟེར་གདུག་པ་ཅན། །མི་མཐུན་ནད་རྣམས་བཟློག་ཏུ་གསོལ། །མིག་སེར་གྲེ་འབྱར་གཟེར་ཐུམ་སོགས་། །མདའ་བརྒྱབས་ནད་ཀུན་ཞི་བར་མཛོད། །དཀར་ཁྲ་མ་མོས་བདུད་ཀྱི་གླང་། །མགོ་བསྐོར་བྱེད་པའི་ནད་ཀུན་ཟློག །གཟེར་ཐུམ་མིག་བརྒྱ་ཧུར་ཐུམ་སོགས། །སྡང་བའི་ནད་ཀུན་ཞི་བར་མཛོད། །གདུག་པ་དམར་བཤལ་གྲེ་ཐམ་སོགས། །།སྐད་ཅིག་ནད་ཀུན་ཞི་བར་མཛོད། །ལང་བ་ཐོར་པ་ཉ་གས་སོགས། །ཤིན་ཏུ་མི་ཀུན་གདུག་པའི་ནད་ཀུན་ཟློག །མདོར་ན་རིམས་ཀྱི་རིགས་གྱུར་པ། །འཐོར་ནད་འཁྱམ་ནད་ངན་པ་ཟློག །ཅེས་སྦྱར། དེ་ནས་བཤགས་པ་བྱ་བ་ནི། སླར་ཡང་གཏོར་མ་གསོ་བྲན་བྱས་ལ། ཀརྨ་པཀིས་སྦྱར་
བའི་བསྐང་ཐུང་འདོན་པའོ།། ཨོཾ་སཾ་ཤོ་དྷ་ནི་ཧཱུཾ་ཕཊ༔ སྭ་བྷ་ཝས་སྦྱངས། ཨོཾ་ཨཱཿཧཱུྃ་ཧ་ཧོ་ཧྲཱིཿ བསྐང་རྫས་ཀྱི་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། བྷྱོ༔ མཁའ་ལྡིང་ཤེལ་སྒོང་རྩ་ར་ཤ་ཁྲག་དང་། །ཚིལ་ཆེན་གསུར་དང་སྣང་གསལ་རྐང་དུང་དང་། །བོང་བུ་རེ་ལྡེ་གླང་ཆེན་བྱ་ནག་སྙིང་། །ཚོགས་དང་གཏོར་མས་མཁའ་འགྲོའི་ཐུགས་དམ་བསྐང་། །ལྷ་མོ་དུད་སོལ་སྐུ་མདོག་ཆར་སྤྲིན་མདོག །ཐོད་ཁྲག་རལ་གྲི་མདུང་དང་ཏྲི་ཤུ་ལ། །བསྟན་པའི་བར་ཆད་བསྒྲལ་ཕྱིར་ཕྱག་ན་བསྣམས། །བསྟན་སྲུང་ཚོ་ཞལ་བཞེས་ལྷ་མོའི་ཐུགས་དམ་བསྐང་། །ལན་བུ་གཡོན་འཁྱིལ་ཐོད་སྦྲུལ་དར་ནག་བརྒྱན། །ཐོད་ཕྲེང་ཀོ་རློན་རེ་ལྡེ་སྤྲུལ་གྱི་བརྒྱན། །ཀེང་རུས་ལུས་ཅན་ཁྲག་དང་ཞག་གི་བརྒྱན། །དུར་ཁྲོད་བརྒྱན་ལྡན་ལྷ་མོའི་ཐུགས་དམ་བསྐང་། །མི་རོ་ཁར་བཅུག་མཆེ་གཙིགས་སྤྱན་རྩ་དམར། །ཞབས་ནི་ལྕགས་སྒྲོག་གིས་བརྒྱན་བོང་བུ་བཅིབ། །སྐད་ནི་དུང་དང་འབྲུག་གི་སྒྲ་ལྟར་སྒྲོག །དམ་ཅན་སྐྱོང་མཛད་ལྷ་མོའི་ཐུགས་དམ་བསྐང་། །རྟག་གཏོར་རྒྱུན་གཏོར་བདུད་རྩི་མདའ་དར་དང་། །བྱ་ནག་སྙིང་དང་གསུར་ཆེན་རཀྟ་
དང་། །ཞུ་ཆེན་མར་མེ་བོང་བུ་གཟུངས་སྔགས་དང་། །མི་རྐང་གླིང་བུ་ཤ་ཁྲག་གཏོར་མ་ཡི། །ལྷ་མོ་འཁོར་དང་བཅས་པའི་ཐུགས་དམ་བསྐང་། །བདུད་མོ་བཞི་དང་ཕྲ་མེན་སྒོ་མ་བཞི། །དུར་ཁྲོད་བདག་མོ་མ་མོ་མཁའ་འགྲོ་བརྒྱད། །མཐུན་རྫས་ཚོགས་དང་གཏོར་མས་ཐུགས་དམ་བསྐང་། །ཐུགས་དམ་མ་གཡེལ་བུ་བཞིན་བརྩེར་དགོངས་ལ། །བསྟན་པ་སྲུང་ལ་བར་ཆད་རྐྱེན་ངན་ཟློག །དམ་ཚིག་ཉམས་ཆག་འགལ་འཁྲུལ་ཅི་མཆིས་པ། །མཐོལ་བཤགས་བཟོད་གསོལ་ཚངས་པའི་དངོས་གྲུབ་སྩོལ། །ཀརྨ་པཀིས་མཛད་པའོ། །ཞེས་མ་མོས་རྒྱུན་གཏོར་བསྐང་བ་བྱས་ཤིང་། དེ་ནས་མ་མོའི་འཁྲུགས་བསྐོང་སོགས་འདོན། དེ་ནས་མ་མོའི་སྤྱི་བསྐང་ནི། བྷྱོཿ བྱང་ཤར་ཆོས་དབྱིངས་ཕོ་བྲང་དམ་པ་ནས། །རྒྱལ་བའི་བསྐྱེད་ཡུམ་ལྷ་མོ་དུད་སོལ་མ། །ཡམས་ནད་ཞི་མཛད་བཀྲ་ཤིས་ཤཱ་ཝ་རི། །བདུད་རྩི་སྨན་གྱི་རྒྱལ་མོའི་ཐུགས་དམ་བསྐང་། །དབང་ཕྱུག་སྲས་མོ་དཀར་མོ་དུང་སྐྱོང་མ། །མགོན་པོའི་ལྕམ་གཅིག་དཔལ་ལྡན་རང་བྱུང་མ། །སྲིད་པའི་རྒྱལ་མོ་སྲིད་པ་གསུམ་གྱི་བདག །ས་བརྒྱད་སེམས་མ་ཆེན་མོའི་ཐུགས་དམ་བསྐང་། །གསང་སྔགས་སྲུང་མ་སྔགས་སྲུང་
རལ་གཅིག་མ། །དཔག་བསམ་ཤིང་གི་བདག་མོ་འོད་ཟེར་ཅན། །ཨོ་རྒྱན་གནས་ཀྱི་གཙོ་མོ་ཕག་ཞལ་ཅན། །དཀྱིལ་འཁོར་ཀུན་གྱི་གཙོ་མོའི་ཐུགས་དམ་བསྐང་། །མི་མངོན་དབྱིངས་ནས་ངོ་བོ་གཅིག་ཡིན་ཏེ། །ངོ་བོ་གཅིག་ལ་སྤྲུལ་པ་སྟོང་ཕྲག་འགྱེད། །སྤྲུལ་པ་རེ་ལ་ཕྱག་བརྙན་འབུམ་ཕྲག་རེ། །ཁམས་གསུམ་ཀུན་ཁྱབ་ལྷ་མོའི་ཐུགས་དམ་བསྐང་། །ངོ་བོ་གཅིག་ལ་རྣམ་པ་དཔོན་གཡོག་ཚུལ། །བདུད་ཀྱི་བུ་མོ་ནག་མོ་རེ་མ་ཏི། །སྤྲུལ་པ་རེ་ཏི་མཆེད་བཞི་འཁོར་ཚོགས་འབུམ། །མ་གཅིག་ལྷ་མོ་དཔོན་གཡོག་ཐུགས་དམ་བསྐང་། །ལྷ་ཀླུ་གནོད་སྦྱིན་དྲི་ཟ་ནམ་མཁའ་ལྡིང་། །མིའམ་ཅི་དང་གྲུལ་བུམ་བྲམ་ཟེ་མི། ཀུན་གྱི་བསྟོད་ཅིང་ཕྱག་བྱས་མངའ་གསོལ་བ། །སྲིད་གསུམ་འདྲེན་བྲལ་ལྷ་མོས་ཐུགས་དམ་བསྐང་། །དབྱིངས་ཀྱི་ཁྲོ་རྒྱལ་རྣམ་པར་སྣང་མཛད་སྟེ། །འགྲོ་བའི་དོན་དུ་ས་བརྒྱད་སེམས་མར་སྤྲུལ། །འཇིགས་པའི་སྐུར་སྟོན་གདུག་པ་ཀུན་འདུལ་མ། །རབ་འཇིགས་ཁྲག་འཐུང་རྒྱལ་མོའི་ཐུགས་དམ་བསྐང་། །མིང་བརྒྱ་མཚན་སྟོང་རྣམ་འཕྲུལ་བསམ་མི་ཁྱབ། །རྫུ་འཕྲུལ་དཔག་མེད་མཐུ་རྩལ་ཐོག་པ་མེད། །
དམ་ཚིག་རྗེས་གཅོད་རྣལ་འབྱོར་དྲོད་ཚད་ཉུལ། །དམ་ཅན་ལྷ་མོ་དཔོན་གཡོག་ཐུགས་དམ་བསྐང་། །དཀར་སེར་དམར་ལྗང་ཞི་དང་ཞི་མ་ཁྲོ། །སྣ་ཚོགས་སྐུ་དང་དེ་བཞིན་སྣ་ཚོགས་བདག །སྣ་ཚོགས་ཕྲིན་ལས་དངོས་གྲུབ་ཀུན་འབྱུང་བའི། །ཡིད་བཞིན་ནོར་མཆོག་ལྷ་མོའི་ཐུགས་དམ་བསྐང་། །ཕྱི་ཡི་གནས་ཡུལ་ནང་གི་རྩ་རླུང་ཁམས། །གསང་བ་རང་གི་སེམས་དང་དབྱེར་མེད་ཅིང་། །འཁོར་འདས་ཀུན་ལ་ཁྱབ་ཅིང་དབང་བསྒྱུར་བའི། །ཀུན་ཁྱབ་ཀུན་བཟང་ལྷ་མོའི་ཐུགས་དམ་བསྐང་། །འདོད་པའི་ཁམས་ནས་འདོད་ཆགས་ལས་གྱུར་པའི། །སྣང་སྲིད་ལྷ་མོ་མཁའ་འགྲོ་ཅི་མཆིས་པ། །ཐམས་ཅད་ཁྱེད་ཀྱི་འཁོར་གཡོག་ཕོ་ཉ་སྟེ། །མོ་རྒྱུད་མ་མོ་ཡོངས་ཀྱི་ཐུགས་དམ་བསྐང་། །བདག་ཅག་ས་དཔོན་སློབ་འཁོར་དང་བཅས་པ་ཡི། །ཉམས་ཆག་འགལ་འཁྲུལ་རྟོག་སྒྲིབ་ཅི་མཆིས་པ། །ལྷ་མོ་དཔོན་གཡོག་འཁོར་དང་བཅས་ལ་བཤགས། །མི་སྒྲིབ་ཚངས་པའི་དངོས་གྲུབ་བསྩལ་དུ་གསོལ། །ཡམས་ནད་རིམས་ནད་ཞི་བའི་ཕྲིན་ལས་མཛོད། །ཅེས་ཨ་རཱ་གས་སོ།། ༈ གལ་ཏེ་ཐུན་མཚམས་གཏོར་མ་འབུལ་འདོད་ན། །འགུག་གཞུག་བྱའམ་མ་བྱས་ནའང་རུང་། །ངོ་བོ་གནོད་
བྱེད་དགྲ་བགེགས་ཤ་ཁྲག་ལ། །རྣམ་པ་ཡེ་ཤེས་བདུད་རྩིའི་རྒྱ་མཚོ་དམིགས། ཨོ་ཨཱཿཧཱུྃ་ཧ་ཧོ་ཧི༔ མ་ཧཱ་ཀཱ་ལི་ཧཱུྃ་བྷྱོ་ཧཱུཾ། ཨོཾ་བཛྲ་སཏཱ་ས་མ་ཡ། སོགས་ཡིག་བརྒྱ་དང་། རྒྱས་པར་འདོད་ན་བསྟོད་རིང་འདོན། བྷྱོཿ དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དྭགས་ཁ། དམ་ཚིག་སྲུང་མ་ཁྲག་དགའ་མ། །ཀཱི་ལའི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་སུ། །ཚོགས་དང་ཕོ་ཉར་བཅས་པ་རུ། །གཅིགས་བྱེད་གཏུམ་མོ་དུད་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་སུ་གནས་པར་མཛད་དུ་གསོལ། །བདག་གིས་སེམས་ལ་ཅི་འདོད་པ། །དེ་ནི་ཁྱོད་ཀྱི་བསྒྲུབ་པར་གྱིས། །ༀ་ཧཱུྃ་ཤྲི་ཡ་དེ་ཝི་ཀཱ་ལི་མཐར། །ཨོ་གི་ཧྥ་གྷི་གྷ་སརྦ་དུཏྟཾ་བྷཀྵ་བྷཀ་ཕྲེ་ཕྲ་ཕྱི་ཕྲ་ཕཊ་སྭཱ་ཧཱ། ཞེས་ཐུན་གཏོར་གཏོར་ཆེན་དྲུང་ངམ་ཕྱི་རོལ་འབུལ། གཏོར་མགྲོན་དུས་བྲིས་སྐུ་ཡོད་ན་དེ་ལ་ཐིམ་པར་བསམ། མེད་ན་ལྷ་མོས་ཞལ་ནས་རྣལ་འབྱོར་པ་ཁྱོད་ཀྱི་དོན་ཐམས་ཅད་བདེ་བར་འགྲུབ་བོ་ཞེས་གསུངས་ནས་རང་༔གནས་སུ་གཤེགས་པར་བསམ། ༈ རྒྱུ་དུས་ཚེས་གཅིག་གི་ཐོ་རངས་དང་། རྒྱུན་དུ་ཉིན་གུང་མཚན་གུང་གང་རུང་འོང་། ཉི་ཤུ་བཞི་དང་ཉི་ཤུ་དྲུག་ཏུ་མཆོད་པ་བྱ་བར་གསེར་འོད་ནས་གསུངས་སོ། །འདི་ཡན་གསོ་བྲན་བྱ་ཞིང་བརྒྱ་
རྩ་འམ། ཡང་ན་ལོ་གྲངས་ལྔ་བདུན་གང་གྲུབ་འདོན། །དེ་ནས་ཕུལ་དུས་གཏོར་མ་བརྡེག་བཅུག་ལ། བཀའ་སྲུང་དཀོར་བདག་ལྷ་མོ་རྣམས། །རྟེན་མཆོད་བསྲུང་ཕྱིར་བརྟན་པར་བཞུགས། །དེ་མིན་ལྷ་མོ་དཔོན་དང་གཡོག །སྣང་སྲིད་མ་མོ་མཁའ་འགྲོའི་ཚོགས། །རིམས་ནད་ཡམས་ནད་ཐམས་ཅད་ནི། །བྱུང་ཡང་མ་མོ་རྣམས་ལས་བྱུང་། །བསྟིམ་ཡང་མ་མོ་རྣམས་ལ་བསྟིམ། །ནད་རྐྱལ་ནད་ཀྱི་ཁ་དམ་ཆིངས། །མཚོན་གྱི་གྲུ་གུ་མྱུར་དུ་ཟློག །ནད་སྤྲིན་སྔོ་དམར་འཁྲིགས་པ་བསྡུས། །རང་ནད་རང་གིས་ཕྱུང་ལ་གཤེགས། །རང་དུག་རང་གིས་སོལ་ལ་གཤེགས། །རང་མཚོན་རང་གིས་ཁྱེར་ལ་གཤེགས། །བསམ་པ་ངན་པ་བྱས་པ་སོལ། །ལག་རྒྱང་ངན་པ་བཅིངས་པ་ཁྲོལ། །ཁྲམ་ལ་བཏབ་ན་ཁྲམ་ཁ་ཕྱེས། །རྩིས་ལ་བབ་ན་རྩིས་ལས་ཕྱུངས། །ཤོ་ལ་བབ་ན་གཞན་ལ་སྤོས། །མ་ལྟར་བྱམས་སེམས་ལྡན་པ་དང་། །སྲིང་ལྟར་གདུང་བའི་སེམས་དང་བཅས། །སོ་སོ་རང་རང་གནས་སུ་གཤེགས། །མུ་ལེ་མཐིང་མཚོའི་ནང་དུ་གཤེགས། །ཡོངས་འདུས་ཤིང་གི་རྩ་བར་གཤེགས། །ཨོ་རྒྱན་མཁའ་འགྲོའི་གནས་སུ་གཤེགས། །དུར་ཁྲོད་ཆེན་པོ་བརྒྱད་དུ་
གཤེགས། །བྱང་ཤར་ཆོས་དབྱིངས་གནས་སུ་གཤེགས། །།ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀ་ས་པཱ་རི་ཝཱ་ར་གཙྪ་བཛྲ་མུཿ གཏོར་མ་བྱང་ཤར་ལྷ་མོ་གནས་ཕྱོགས་ཕུལ། །ལྷ་མོ་འཁོར་བཅས་དེ་ཕྱོགས་གཤེགས་པར་བསམ། །སྐུ་གཟུགས་རྟེན་རྫས་ཡོད་ན་དེ་ལ་བསྟིམ། །ཀྱེ་ཧོ། སློབ་དཔོན་པདྨའི་ལུང་བསྟན་ལ། །དུས་ངན་སྙིགས་མ་ལྔ་ལ་ཐུག་པའི་ཚེ། །མི་རྣམས་མི་དགེ་ལོག་སྤྱོད་སྣ་ཚོགས་བྱེད། །དེ་ཡི་རྐྱེན་གྱིས་མ་མོ་མཁའ་འགྲོ་འཁྲུགས། །ཁ་རླངས་ནད་སྤྲིན་སྔོ་དམར་བཏང་བ་ཡི། །མུ་གེས་དུས་འཁྲུགས་ཡམས་ནད་འབྱུང་བར་གསུངས། །དེ་ལ་ཕན་ཐབས་གནམ་ཆོས་ལྷ་མོའི་སྐོར། །མདོས་ཆོག་ལ་སོགས་གསུངས་པ་འཛོམ་པར་དཀའ། །དེ་ཕྱིར་གསོལ་མཆོད་འདི་ནི་ཕན་ཡོན་ཆེ། །དེ་དོན་དངོས་གྲུབ་འབྱུང་བའི་རྒྱུད་ནས་ཀྱང་། །ལྷ་མོས་སྙིང་པོ་བཟླས་པ་ན། །ཡམས་ནད་རིམས་ནད་གདོན་གྱི་རིགས། །འབྱུང་པོས་གནོད་པ་ཀུན་ལས་སྐྱོབས། །དཔག་ཚད་ཚུན་ཆད་བསྲུང་བར་འགྱུར། །ཅེས་དང་། མི་ནད་གང་ཡིན་ཁྱོད་ཀྱི་ཤེས། །དེ་ལ་འཇིགས་པ་མེད་པར་འགྱུར། །ཞེས་དང་། བཞི་བརྒྱ་རྩ་བཞིའི་ནད་རྣམས་རྩད་གཅོད་མ། །ཁྱོད་ནི་བདུད་རྩི་སྨན་གྱི་རྒྱལ་མོ་ཡིན། །ཞེས་དང་། མེ་ལྕེ་འབར་བའི་རྒྱུད་ལས། ནད་ཁ་ཆོད་ལ་རིམས་ཁ་བསྒྱུར། །ཁྲམ་ཁ་ཕྱེས་ལ་ཤོ་རྡེལ་སྤོས། །ནད་གདོན་བར་ཆད་བསྒྱུར་དུ་གསོལ། །ཞེས་གསུངས་སོ། །ནད་པ་སྲིའུ་གསོ་བ་དང་། །མི་ནད་དང་། ཕྱུགས་ནད་
དང་། ཡམས་ནད་སྣ་ཚོགས་བསྲུང་བ་དང་། བཅད་པའི་ཆོ་ག་དམ་པ་ཡིན་ནོ།། ༈ ཀྱི་ཧོ། ཨེ་མ་ཧོ། དེ་ཡང་མོ་རྩིས་མཐོང་བ་མཁན་རྣམས་ཀྱིས། །ལྷ་མོས་གསོལ་ཀ་དགོས་ཞེས་ལུང་བསྟན་ཀྱང་། །ཅི་བཞིན་མི་ཤེས་གཟུ་ལུམ་འོ་ཆོད་བྱེད། །དེ་ཕྱིར་འདི་ཉིད་མེད་ཐབས་མེད་པའི་ཕྱིར། །གསར་རྙིང་ལྷ་མོས་གསོལ་མཆོད་གཞུང་རྣམས་ལས། །སྔགས་འཆང་རཱ་ག་ཨ་སྱས་བསྡུས་ཏེ་བསྒྲིགས། །ལྷ་མོའི་རིགས་ཀུན་གཙོ་མོ་མ་ཚང་མེད། །དེ་ཕྱིར་འདི་ཉིད་རིན་ཆེན་གསེར་བས་འཕང་། །འདི་བྲིས་འགལ་འཁྲུལ་ཉེས་པ་ཅི་མཆིས་པ། །དཔལ་ལྡན་ལྷ་མོ་དཔོན་གཡོག་དྲུང་དུ་བཤགས། །འདི་ཕྱི་སྒྲིབ་པར་མ་གྱུར་དངོས་གྲུབ་སྩོལ། །འདི་བྲིས་དགེ་བས་འགྲོ་བའི་ནད་རྣམས་ཞི། །ནད་མེད་བདེ་བའི་ལང་ཚོ་ལོངས་སྤྱོད་ནས། །ལྷ་མོ་ལུས་དང་གྲིབ་མ་བཞིན་འགྲོགས་ནས། །ཕྲིན་ལས་རྣམ་བཞི་ལྷུན་གྱིས་འགྲུབ་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།