འཁོར་ལོ་རིན་པོ་ཆེ་སྐུ་ལྟར་བསྐུར་བ།
རྒྱ་གར་སྐད་དུ། ཀཱ་ཡ་ཙཀྲ་རཏྣ་ཨ་ཤ་ནཱ་མ། བོད་སྐད་དུ། འཁོར་ལོ་རིན་པོ་ཆེ་སྐུ་ལྟར་བསྐུར་བ་ཞེས་བྱ་བ། བཅོམ་ལྡན་འདས་རྣམ་པར་སྣང་མཛད་ལ་ཕྱག་འཚལ་ལོ། །དེ་ནས་འདུས་པའི་འཁོར་བསམ་གྱིས་མི་ཁྱབ་པས། བཅོམ་ལྡན་འདས་དེ་དག་ལ་འདི་སྐད་ཅེས་ཞུས་སོ། །ཀྱེ་ཀྱེ་བཅོམ་ལྡན་རྣམ་གྲོལ་བདག །འཁོར་བའི་སེམས་ཅན་འདི་དག་རྣམས། །འཁོར་བ་ཉིད་ལས་བསྒྲལ་བའི་ཕྱིར། །དཀྱིལ་འཁོར་ལྷ་ཚོགས་ཐམས་ཅད་ཀྱི། །སྐུ་ཡི་དབང་བསྐུར་ཅི་ལྟར་ལགས། །རྡོ་རྗེ་འཛིན་པས་བཀའ་སྩོལ་ཅིག །དེ་ནས་མོས་འཁོར་དེ་དག་ལ། །རྡོ་རྗེ་འཛིན་པས་བཀའ་སྩལ་པ། །ཨེ་མ་རྡོ་རྗེ་གསང་བདག་ཉོན། །ང་ཡིས་ལེགས་པར་བསྟན་པར་བྱ། །སྟོབས་དང་ལྡན་པའི་སེམས་
ཀྱིས་ཉོན། །སྐུ་ཡི་དབང་བསྐུར་བྱེད་ཚེ་ན། །ཤིན་ཏུ་དབེན་པའི་གནས་དག་ཏུ། །དཀྱིལ་འཁོར་འདོམ་གང་གྲུ་བཞི་ལ། །དྲི་སྣ་ལྔ་ཡི་ཆག་ཆག་གདབ། །ཐིག་གདབ་ཚོན་ཡང་དགྱེ་བར་བྱ། །དེ་ལྟར་བྱས་པའི་སྟེང་ཉིད་དུ། །དབུས་སུ་རིན་ཆེན་བུམ་པ་ཟླུམ། །ཁ་རྒྱན་མགུལ་ཆིངས་བཅིངས་པ་བཞག །ནས་ཀྱི་སྟེང་དུ་དེ་བཞག་སྟེ། །རིགས་ལྔའི་སྐུ་ཡང་དེ་བཞིན་བལྟས། །ཤར་ཉིད་དུ་ཡང་བུམ་པ་སྟེ། །རིགས་གསུམ་སྐུ་དང་གོས་དཀར་ཅན། །ལེགས་པར་ཕྱོགས་སུ་དགྲམ་པར་བྱ། །ལྷོ་ཉིད་དུ་ཡང་བུམ་པ་སྟེ། །རིག་གསེར་ཕྲེང་དང་ཚེ་དཔག་མེད། །ཕ་རོལ་ཕྱིན་དང་སྨན་གྱི་བླ། །ལྷོ་ཡི་ཕྱོགས་སུ་དེ་བཞིན་གཞག་པར་བྱ། །ནུབ་ཏུ་ཡང་ནི་བུམ་པ་སྟེ། །རིགས་ལྔ་ཁྲོ་སྐུ་རྣམ་པར་བཞག །བྱང་གི་ཕྱོགས་སུ་བུམ་པ་སྟེ། །སྒོ་བ་བཞི་ནི་ཕྱོགས་ཕྱོགས་བཞག །བྱང་ཤར་མཚམས་སུ་བུམ་པ་སྟེ། །རིགས་གསུམ་ཁྲོ་དང་རྣམ་འཇོམས་སོ། །ཤར་ལྷོ་མཚམས་སུ་བུམ་པ་སྟེ། །རྣམ་འཛིན་ཞལ་དང་སྟོབས་དྲུག་དང་། །གཤིན་རྗེ་ཞགས་པ་སྟོང་ཐོགས་ཀུན་བཟང་ངོ་། །ལྷོ་ནུབ་མཚམས་སུ་བུམ་པ་སྟེ། །རིགས་ལྔའི་ཡུམ་ནི་དེ་བཞིན་བཞག །ནུབ་བྱང་མཚམས་སུ་བུམ་པ་སྟེ། །ཀྲོ་ཏི་ཤྭ་རི་ལྔ་ཉིད་དོ། །ཕྱོགས་བཞི་མཚམས་དང་བརྒྱད་དུའོ། །དེ་ཡང་བཀྲ་ཤིས་ནས་ནི་རེ་རེའོ། །བུམ་པ་དེ་དག་རེ་རེའི་རྩར། །ཕུད་དང་བཅས་པའི་གཏོར་མ་རེ། །མཁས་པས་རབ་ཏུ་གཞག་པར་བྱ། །བྷནྡ་མཚན་ལྡན་དེ་བཞིན་ནོ། །དེ་ལྟར་རྫས་རྣམས་བཤམས་ནས་ནི། །དབང་བསྐུར་ཆོ་ག་རྫོགས་པར་བྱ། །དེ་ནས་འདི་སྐད་བརྗོད་བྱ་ཞིང་། །གསང་བ་གསུམ་དང་ལྡན་པའོ། །ཏིང་འཛིན་རྒྱལ་པོ་བསྒོམ་བྱ་ཞིང་། །ཚིག་དང་བཅས་པས་སྐུ་དེ་དག །རང་རང་གནས་སུ་བསྐུར་བར་བྱ། །ཧཱུཾ་ལྔ་ལྡན་རྡོ་རྗེ་འབར་བའི་དཀྱིལ་འཁོར་དུ། །རྡོ་རྗེ་འདུ་འབྲལ་མེད་པའི་སྐུར་གསལ་ལས། །གསང་བདག་
རྡོ་རྗེ་རིགས་ཀྱི་དབང་བསྐུར་ཞིང་། །རྡོ་རྗེ་འདུས་པའི་སྲས་སུ་དབང་བསྐུར་རོ། །དཀྱིལ་འཁོར་ལྔ་དང་སྐུ་དང་ཡེ་ཤེས་དང་། །དུས་དང་གནས་དང་ཚིག་དང་རྡོ་རྗེ་ཡི། །གསང་བ་བདེ་ལྡན་རྡོ་རྗེ་གར་གྱི་བདག །བདག་དང་གཞན་དང་སྐུ་ལྔ་མཐར་ཕྱིན་ནས། །མི་འགྱུར་གསང་མཆོག་དགྱེས་པའི་གད་མོ་ཆེ། །རིག་དང་སྟོང་དང་བྱ་དང་བྱེད་པའི་སྟོབས། །ཆོས་དང་གནས་དང་སེམས་དང་ཡིད་ལ་བསྐུལ། །ཨ་ལ་ལ་ཧོ་རྡོ་རྗེ་མོས་པ་རྩལ། །རིགས་དང་ས་དང་རྡོ་རྗེ་དྲག་པོ་རྩལ། །དཀྱིལ་འཁོར་མཆོག་སྟོན་རྡོ་རྗེ་བཞད་པ་རྩལ། །སྟོང་དང་དགྱེས་མཆོག་རྡོ་རྗེ་འོད་འབར་རྩལ། །ཆོས་ཉིད་རང་སྣང་རྡོ་རྗེ་གཏེར་དབང་རྩལ། །དཀྱིལ་འཁོར་ཡང་གསང་རྡོ་རྗེ་རབ་བསྔགས་རྩལ། །དམར་ལྡན་ཡིད་འཕྲོག་རྡོ་རྗེ་གསུང་ཐོབ་རྩལ། །དཀྱིལ་འཁོར་རྒྱས་མཛད་དཀྱིལ་འཁོར་རིག་འཛིན་རྩལ། །ཨེ་མ་ཧོ། ཧེ་ཧེ་ཏི་སྟ་རྡོ་རྗེ་གསང་མཆོག་ཁྱོད། །དབང་ལྡན་དབང་གི་རིགས་ལྡན་རིགས་མཆོག་སྟེ། །འབར་བ་འོད་འཕྲོ་འཁོར་ལོའི་གཞལ་ཡས་སུ། །བདེ་ལྡན་དབྱིངས་མཆོག་སྐུ་ལྔས་དབང་བསྐུར་རོ། །ཆོས་ཉིད་དབྱིངས་ལ་རིག་པའི་དབྱིངས་ཤར་བས། །མཐོང་བ་ཉིད་དང་ཡེ་ཤེས་ཐབས་ཀྱི་སྐུ། །ཙིཏྟ་རིན་ཆེན་འཁོར་ལོའི་གཞལ་ཡས་སུ། །བདེ་མཆོག་ཐུགས་ཀྱི་འཁོར་ལོའི་དབང་བསྐུར་རོ། །བདེ་ལྡན་དབྱིངས་ཤར་ཤེས་རབ་དབྱིངས་ཀྱི་ངང་། །གསལ་འཚེར་ལྷུན་སྡུག་རྡོ་རྗེ་རབ་གསང་འབར། །གསང་བའི་མཁའ་དབྱིངས་བྷ་གའི་གཞལ་ཡས་སུ། །ཆོས་ཉིད་སྤྲོས་བྲལ་བདེ་ཆེན་དབང་བསྐུར་རོ། །རྡོ་རྗེ་གསང་བ་བདེ་མཆོག་དབྱིངས་སུ་སྒྲོལ། །ཤེས་རབ་ཐབས་ལྡན་ཀ་དག་ཡངས་པའི་ངང་། །སེམས་དཔའི་དཀྱིལ་འཁོར་སེམས་པའི་རང་བཞིན་མཆོག །ཆོས་རྣམས་དམིགས་མེད་རྡོ་རྗེ་སེམས་དཔའི་སྐུ། །ནམ་མཁའི་མཐའ་ལས་ཆོས་དབྱིངས་རོ་གཅིག་ཏུ། །ལས་རྣམས་
མཐར་ཕྱིན་སྟོང་ཉིད་གདལ་བའི་སྐུ། །སེམས་དང་སྟོང་ཉིད་ཆོས་ཀྱི་སྐུ་ལ་དབང་། །མཚན་ལྡན་སྲིད་སྐྱེད་ལྟེ་བའི་གཞལ་ཡས་སུ། །རྡོ་རྗེ་ལས་གསང་ཐུགས་ཀྱི་དབང་བསྐུར་རོ། །གསལ་བ་རབ་བརྗིད་ཡེ་ཤེས་སེམས་དཔའི་ངང་། །ཤེས་རབ་འོད་འཕྲོ་ཉོན་མོངས་ཟིལ་གྱིས་གནོན། །རྡོ་རྗེ་མདའ་འཕེན་ཤེས་རབ་དབྱིངས་སུ་འཕེན། །དཀྱིལ་འཁོར་མཐའ་སྡུད་ཡེ་ཤེས་གསང་བའི་བདག །སངས་རྒྱས་ལྔར་ལྡན་ཐུགས་ཀྱི་ཅོད་པན་ཅན། །རིན་ཆེན་རྒྱུག་བྱེད་རྩ་བའི་གཞལ་ཡས་སུ། །མཉམ་ཉིད་འོད་འཕྲོ་ཆོས་སྐུའི་དབང་བསྐུར་རོ། །རྡོ་རྗེ་བདེ་ལྡན་ཐུགས་ཀྱི་གསང་མཆོག་སྐུ། །ཡང་དག་གསང་བ་ཐུགས་ཀྱི་དཀྱིལ་འཁོར་བདག །གསང་ལྡན་དབྱིངས་དང་ཡེ་ཤེས་འོད་འཕྲོ་ཞིང་། །ཕྱོགས་མེད་རང་སྣང་ཆོས་སྐུའི་དཀྱིལ་འཁོར་བདག །བདེ་ལྡན་ཆོས་དབྱིངས་གསང་བར་དབང་བསྐུར་རོ། །གསང་སྔགས་སྐུ་དང་ཡང་དག་མཐའ་འདས་དང་། །ས་རྣམས་མཐར་ཕྱིན་ཡེ་ཤེས་རྣམ་པར་དག །ཆོས་ཉིད་སྣང་སྟོང་ཀ་དག་ཉིད་དུ་སྣང་། །བྷནྡ་གསལ་འཕྲོ་འཁོར་ལོའི་གཞལ་ཡས་དབྱིངས། །རྟོག་མེད་བསམ་ཡས་སྙིང་པོ་ལྔ་ཡི་སྐུ། །རྡོ་རྗེ་ཐུགས་ཀྱི་སྲས་སུ་དབང་བསྐུར་རོ། །དེ་ལྟར་ཚིག་དོན་རྫོགས་བྱས་ནས། །སྔགས་དང་ཕྱག་རྒྱ་འདི་ལྟར་བསྟན། །མཁས་པ་ཏིང་འཛིན་ལྡན་པ་ཡིས། །དེ་ལྟར་ཏིང་འཛིན་ལྡན་པར་བསྐུར། །རྣམ་སྣང་མངོན་བྱང་ཕྱག་རྒྱ་ཡིས། །སྤྱི་གཙུག་གནས་སུ་རྣམ་པར་བཞག །ཨོཾ་ཨཱཿཧཱུཾ་སྭཱ་ཧཱ། བུཌྜྷ་ཙཀྲ་པ་ཙ་ཧཱུཾ་ཧཱུཾ། འོད་ཟེར་འཕྲོ་འདུ་ལྡན་པ་ཡི། །མངོན་བྱང་སྐུ་དང་དབྱེར་མེད་བསམ། །གཡས་ནི་རྡོ་རྗེ་རྩེ་གསུམ་ཚུལ། །གཡོན་ན་དྲིལ་བུ་དཀྲོལ་བའི་ཚུལ། །མགྲིན་པའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། བཛྲ་ཙཀྲ་པ་ཙ་ཧཱུཾ་ཧཱུཾ། ལག་གཉིས་མཉམ་པར་བཞག་པ་ཡིས། །ཐུགས་ཀའི་གནས་སུ་རྣམ་པར་བཞག །ཨོཾ་ཨཱཿ
ཧཱུཾ་སྭཱ་ཧཱ། རཏྣ་ཙཀྲ་པ་ཙ་ཨ་བྷི་ཥིཉྩ་ཛ་ཨ་ཨ་ཨ། ལག་གཉིས་མཉམ་པར་བཞག་པ་ཡིས། །ལྟེ་བའི་གནས་སུ་བཞག་ནས་ནི། །དེ་ལ་ཡང་ནི་འདི་སྐད་དོ། །ཨོཾ་ཨཱཿཧཱུཾ་སྭཱ་ཧཱ། པདྨ་སརྦ་ཀུ་ལ་ན་ཧ་ཧ་ཧཱུཾ་ཨ། ལག་གཉིས་མཉམ་པར་བཞག་པ་ཡིས། །དཔྲལ་བའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཀརྨ་དུཥྚན་གྷ་ར་ཨཉཱ་ཧཱུཾ་ཀྲ་བྷ་རྩ་མ་ཧྲི་ཧྲི་དྷྲི། གཡས་པ་རལ་གྲིའི་ཚུལ་བྱས་ལ། །གཡོན་པ་ཐུགས་ཀར་རྣམ་པར་བཞག །ཨོཾ་ཨཱཿཧཱུཾ་སྭཱ་ཧཱ། ལ་ཛུ་ཏ་སྔ་བཛྲ་སིད་ཏི་ཧ་ཧ་ཧ། ལག་གཉིས་མཁྲིག་མ་བསྣོལ་ནས་ནི། །སྣ་ཚོགས་རྡོ་རྗེའི་ཚུལ་དུ་བྱ། །སྙིང་ག་ཉིད་དུ་རྣམ་པར་བཞག །ཨོཾ་ཨཱཿཧཱུཾ་སྭཱ་ཧཱ། ཨོཾ་ནཱ་ག་ལམ་བཛྲ་ཀྲོ་དྷ་ཧཱུཾ་ཧཱུཾ་ཕཊ་ཕཊ། གཡས་པ་བརྐྱངས་ཏེ་ཐུགས་ཀ་རུ། །ཐལ་མོ་སྐྱབས་སྦྱིན་ཚུལ་དུ་བཟེད། །གཡོན་པ་བརྐྱངས་ཏེ་དེ་བཞིན་ནོ། །སྙིང་ག་དག་ཏུ་གཞག་པར་བྱ། །ལག་གཡས་གུར་གྱི་ཚུལ་བྱས་ལ། །སྤྱི་གཙུག་ཉིད་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། བཱེ་ཤེད་སྭཱ་ཧཱ་ཧཱུཾ། གཡས་པས་བརྡེག་པ་ལྟར་བྱས་ལ། །སྙིང་གའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཨོཾ་བཛྲ་དྷྲྀཀ །སྭཱ་རཏྣ་དྷྲྀཀ །པཱཾ་རཱ་ག་ར་ཏི། མཱཾ་མོ་ཧ་ར་ཏི། ཨཱཾ་ཨཱ་རོ་ལིཀ །བཛྲ་སཏྭ་ཧཱུཾ་ཧཱུཾ་སྭཱ་ཧཱ། རྡོ་རྗེ་ཁུ་ཚུར་བསྣོལ་བྱས་ལ། །སྙིང་གའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། པྲཛྙཱ་སརྦ་ཧཱུཾ་སྭཱ་ཧཱ། ཨ་བྷི་ཥིཉྩ་ཛ། རིན་ཆེན་སྒྲོམ་བུ་ལྟར་བྱས་ལ། །གསང་བའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། བཛྲ་ཨཱ་ཡུ་སྭཱ་ཧཱ། ཧཱུཾ་ཧཱུཾ་ཨ། ལག་གཉིས་པདྨ་ལྟར་བྱས་ལ། །སྙིང་གའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཨ་མྲི་ཏ་རུ་པ་ཧ་ལ་ཧཱུཾ། གཡོན་པ་སྡིགས་མཛུབ་ཕྱག་རྒྱ་ཡི། །ལག་པའི་མཐིལ་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཨ་ཀྲོ་རཏྣ་ཨ་བྷི་ཥིཉྩ་ཨཱ་ཨཱ། གཡས་པས་སེ་གོལ་ཕྱག་རྒྱ་ནི། །ལྟེ་བའི་གནས་སུ་གཞག་པར་བྱ། ཨོཾ་ཨཱཿཧཱུཾ་སྭཱ་ཧཱ། ཧ་ཡ་གྲཱི་བ་སརྦ་ཀུ་ལན་སི་ཏི་ཧཱུཾ། ལག་གཉིས་ཁྱུང་གཤོག་ལྟར་བྱས་ལ། །སྨིན་ཕྲག་ཉིད་དུ་གཞག་བྱས་ལ། །ཨོཾ་ཨཱཿཧཱུཾ་སྭཱ་ཧཱ།
བྷུ་བྷུ་ཀྲོ་ཏ་སརྦ་ཀྲ་ཙམ་ཨ་བྷི་ཥིཉྩ་ཧཱུཾ། ལག་གཉིས་བུམ་པ་ལྟར་བྱས་ལ། །དཔྲལ་བའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཀུཎྜ་ལི་ཨ་མྲྀ་ཏ་ཀརྨ་ཧཱུཾ། ལག་པ་སྲིན་ལག་མཐེབ་སྦྱར་ལ། །ལྕེ་ཡི་སྟེང་དུ་རྣམ་པར་བཞག །ཨོཾ་ཨཱཿཧཱུཾ་སྭཱ་ཧཱ། བཛྲ་ཀྲི་ལཱིཾ་སི་སྱ་ནྱ་བྷུ་མ་ཕཊ། གཡོན་པས་ལྕགས་ཀྱུའི་ཕྱག་རྒྱ་ཡིས། །སྙིང་གའི་གནས་སུ་བཟུང་བྱས་ལ། །ཨོཾ་ཨཱཿཧཱུཾ་སྭཱ་ཧཱ། ཛ་བ་རྒྱ་ཕཊ་ཕཊ་སྭཱ་ཧཱ། ལག་གཉིས་ཞགས་པའི་ཕྱག་རྒྱ་ཡིས། །མིག་གི་གཡས་སུ་རེག་བྱས་ལ། །ཨོཾ་ཨཱཿཧཱུཾ་སྭཱ་ཧཱ། བཛྲ་སིང་ཧ་ཕཱ་ལ་ཡཱ། བྷོ་ཏི་ཧོ་ཧོ་ཧོ། ལག་གཉིས་འཁྱུད་བརྒྱུད་སྒྲོག་བསྡམས་ལ། །དཔུང་པ་གཡོན་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཨོཾ་མང་དུ་ས་ཡ་ཧཱུཾ་ཨ་ཧོ། གཡས་གདེངས་གཡོན་བསྐུམ་ཁུ་ཚུར་གྱིས། །སྙིང་ག་ཉིད་དུ་བསྟན་བྱས་ལ། །ཨོཾ་ཨཱཿཧཱུཾ་སྭཱ་ཧཱ། གྷ་ན་བཛྲ་ཀ་པ་ཙ་ཧཱུཾ་ཧཱུཾ། ལག་གཉིས་དགྲ་སྟྭའི་ཕྱག་རྒྱ་ཡིས། །པུས་མོ་གཡོན་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཀ་ལ་ཧྲི་སྡི་ཀུ་ལ་ན་ཎྱེ་ཕཊ་ཕཊ་སྭཱ་ཧཱ། ལག་གཡས་མགོའི་ཕྱག་རྒྱ་ཡིས། །སྤྱི་བོའི་གཙུག་ཏུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། པད་མཱནྟ་ཀྲྀད་ཧཱུཾ་ཁ་ཡ་སྭཱ་ཧཱ། གཡས་པ་རྩེ་གསུམ་ཕྱག་རྒྱ་ཡིས། །ལག་གཉིས་བུམ་པ་ལྟར་བྱས་ལ། །སྤྱི་གཙུག་དག་ཏུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ་ཙན་བཛྲ་ན་ཡཱེ་ཡཱེ་ཧྱེ་ཧྱེ་ཕཊ་ཕཊ་སྭཱ་ཧཱ། ལག་གཉིས་གཞུ་འགེངས་ཚུལ་དུ་བྱ། །གཡོན་གྱི་མཛུབ་མོ་སྣ་རྩེར་བཞག །ཨོཾ་ཨཱཿཧཱུཾ་སྭཱ་ཧཱ། བཛྲ་ཀུན་རེ་སེར་སེར་ཧཱུཾ་སྭཱ་ཧཱ། ལག་གཡོན་ལྕགས་ཀྱུའི་ཕྱག་རྒྱ་ཡིས། །སྙིང་ག་ཉིད་དུ་བཟུང་བྱས་ལ། །ཨོཾ་ཨཱཿཧཱུཾ་སྭཱ་ཧཱ། བཛྲ་དུ་ཤན་ཀཱ་ཡ་བཛྲ་ཧཱུཾ་ཧཱུཾ། ལག་གཉིས་ཐོད་ཕྲེང་ཕྱག་རྒྱ་ཡིས། །སྤྱི་བོའི་གཙུག་ཏུ་གཞག་པར་བྱ། ཨོཾ་ཨཱཿཧཱུཾ་སྭཱ་ཧཱ། བཛྲ་མ་འཛུ་ཀ་ཊར་མ་སུ་དྷ་ཧཱུཾ་ཧཱུཾ། ལག་གཉིས་མཉམ་པར་བཞག་པ་ཡི། །མགྲིན་པའི་གནས་སུ་གཞག་པར་བྱ། ཨོཾ་ཨཱཿཧཱུཾ་སྭཱ་ཧཱ། སིལ་སི་ཧཱུཾ་ཨཱ། ལག་གཉིས་སེ་གོལ་བསྣོལ་མ་ཡི། །རྩིབ་ལོགས་གཡས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། མ་ནུ་པ་རི་ཤ་ཨཱ་བྷི་ཥིཉྩ་ཧཱུཾ་ཨོཾ། གཡས་པའི་མཐེབ་མས་གཡོན་མཛུབ་མནན། །
རྩིབ་ལོགས་གཡོན་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ཨ་ལ་ཧྲི་ཨ་བྷི་ཥིཉྩ་ཨཱ། གཡས་པ་རལ་གྲི་ལྟ་བུ་ཡི། །ལྕེ་ཡི་སྟེང་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། མཱུཾ་བྷྲུཾ་ཨ་བྷི་ཥིཉྩ་ཨོཾ་ཧཱུཾ། ལག་གཡོན་དག་གི་སོར་མོ་ནི། །མཐེབ་དང་མཛུབ་དང་མཐེའུ་ཆུང་སྤྲད། །ལྷག་མ་གཉིས་ནི་བསྒྲེང་བར་བྱ། །གཡས་པས་ཐལ་མོ་གདེངས་པ་ཡིས། །ལྟག་པའི་ཁུང་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། སྡི་མི་སརྦ་ཨ་བྷི་ཥིཉྩ་སྭཱ་ཧཱ། ལག་པ་རྩེ་གསུམ་བསྒྲེང་བ་ཡིས། །རྣ་ལྟག་གཉིས་སུ་བཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། བཛྲ་པུན་ཧ་ཨ་བྷི་ཥིཉྩ་སྭཱ་ཧཱ། ལག་པ་མཐེ་བོང་བསྒྲེང་བ་ཡིས། །རྣ་ལྟག་གཡོན་དུ་གཞག་པར་བྱ། ཨོཾ་ཨཱཿཧཱུཾ་སྭཱ་ཧཱ། མུ་ཐ་ཤི་ཨ་བྷི་ཥིཉྩ་ཨ། ལག་གཡོན་མཐེའུ་ཆུང་མཛུབ་བརྐྱངས་ཏེ། །ལྐོག་མའི་གནས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། མུཾ་ལཾ་ཧཾ་ཏིལ་རི་ཨ་བྷི་ཥིཉྩ་ཨཱ། ལག་གཉིས་པདྨ་ལྟར་བྱས་ཏེ། །ནུ་མ་གཡས་སུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། ས་ལམ་ཀྲོ་ཏི་ཨ་བྷི་ཥིཉྩ་ཨ། ལག་གཡོན་རྩིབས་བཞི་ལྟར་བྱས་ལ། །མཚོགས་མའི་སྟེང་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། བྷི་ཤིར་ཨ་བྷི་ཤི་ཏི་ན་ཤཱ་ཨཱ། ལག་གཉིས་སོར་མོ་བསྣོལ་བྱས་ཏེ། །སྤྱི་གཙུག་སྟེང་དུ་གཞག་པར་བྱ། །ཨོཾ་ཨཱཿཧཱུཾ་སྭཱ་ཧཱ། བྷི་ཤ་སྟན་ཏ་ཤ་ར་ཨ་བྷི་ཥིཉྩ་ཨཱ། སྐྱོབ་པ་མཐར་ཕྱིན་སྔགས་ལྡན་པའི། །བདེ་གཤེགས་དབུ་ཡི་དབང་བསྐུར་ནི། །བཀྲ་ཤིས་གདུགས་ལ་བརྟེན་བྱས་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། པི་བག་གྷ་ཡ་སི་ཨ་བྷི་ཥིཉྩ་ཨཱ། ལྟ་བྱེད་མ་འགགས་དོན་མཚོན་པའི། །བདེ་གཤེགས་སྤྱན་གྱི་དབང་བསྐུར་ནི། །བཀྲ་ཤིས་ཉ་ལ་བརྟེན་ནས་ནི། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། པྲ་ནི་པ་ཡ་བ་ཐུ་ག་བ་ཨ་བྷི་ཥིཉྩ་ཨཱ། སྨྲ་བྱེད་ཕ་རོལ་སྒྲོལ་ལ་མཁས། །སངས་རྒྱས་ལྗགས་ཀྱི་དབང་བསྐུར་ནི། །བཀྲ་ཤིས་པདྨ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། ཏི་ཀ་ཏ་ཡི་སི་ཨ་བྷི་ཥིཉྩ་ཨཱ། ཆོས་རྣམས་ལམ་བྱུང་ཆོས་དབྱིངས་
ཟླུམ། །སངས་རྒྱས་མགུར་གྱི་དབང་བསྐུར་ནི། །བཀྲ་ཤིས་བུམ་པ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། ཏིཥྚ་ཀཱ་ལ་ཤ་ཨ་བྷི་ཥིཉྩ་ཨཱ། མི་ནུབ་རྒྱལ་མཚན་ཆོས་སྐུའི་དོན། །སངས་རྒྱས་རྣམས་ཀྱི་སྐུ་ཡི་དབང་། །བཀྲ་ཤིས་རྒྱལ་མཚན་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། བྷི་ཤད་དྷི་ཨ་ཡ་ཨ་བྷི་ཥིཉྩ་ཨཱ། སྒྲ་དབྱངས་རྟོག་མེད་དོན་མཚོན་པའི། །སངས་རྒྱས་རྣམས་ཀྱི་གསུང་གི་དབང་། །བཀྲ་ཤིས་དུང་ལ་བརྟེན་ནས་ཀྱང་། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། པི་ཀྲ་ཡ་རྒྱ་ཨ་ཨ་བྷི་ཥིཉྩ་ཨཱ། གསལ་འོད་ལྡན་པ་དཔལ་བེའུའི་ཐུགས། །སངས་རྒྱས་རྣམས་ཀྱི་ཐུགས་ཀྱི་དབང་། །བཀྲ་ཤིས་དཔལ་བེའུ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། ཙིཏྟཱ་ཡ་ཨ་བྷི་ཥིཉྩ་ཨཱ། ཐོགས་མེད་མྱུར་མགྱོགས་འཁོར་ལོའི་ཞབས། །སངས་རྒྱས་རྣམས་ཀྱི་ཞབས་ཀྱི་དབང་། །བཀྲ་ཤིས་འཁོར་ལོ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུཾ་སྭཱ་ཧཱ། ཙཀྲ་པུ་ལ་བྷིན་ཀུ་ཨ་བྷི་ཥིཉྩ་ཨཱ། དབང་དང་ལྡན་པའི་དཀྱིལ་འཁོར་ནི། །དབང་མཆོག་རྫས་བྱིན་བྱས་ནས་ནི། །དཀྱིལ་འཁོར་ཐམས་ཅད་རྫོགས་བྱས་ཏེ། །དད་ལྡན་འཁོར་ལ་རྫོགས་བྱ་སྟེ། །བདེ་ལྡན་གསང་མཆོག་བདེ་བའི་དབྱིངས། །ཡང་གསང་ཐུགས་ཀྱི་རྡོ་རྗེ་མཆོག །སངས་རྒྱས་ཀུན་དང་མཉམ་སྦྱོར་བས། །མཁའ་ལ་དབྱིངས་ལྡན་ཐམས་ཅད་དུ། །བདག་གིས་དབང་མཆོག་བསྐུར་བ་བཞིན། །དེང་ནས་བཟུང་སྟེ་ཐོབ་པར་ཤོག །ཐོབ་ནས་འགྱུར་མེད་བརྟན་པར་ཤོག །ཡང་དག་གསང་བའི་དོན་ལྡན་དེས། །འཇིག་རྟེན་པ་ཡི་སྐུ་གསུང་ཐུགས། །དེང་ནས་བཟུང་སྟེ་མ་བཏང་ཞིག །ཨེ་མ་སངས་རྒྱས་ཀུན་གྱི་དངོས། །རྡོ་རྗེ་འཆང་ཆེན་མ་བཏང་བར། །ཐུགས་ཀྱི་དཀྱིལ་དུ་ལེགས་པར་ཟུང་། །ཨ་ལ་ལ་ཧོ་རྫོགས་སངས་རྒྱས། །བདག་གིས་དེང་ནས་བཟུང་ནས་ནི། །བསྐལ་པ་བརྒྱ་སྟོང་བར་དུ་ཡང་། །བདག་གི་སྟོང་པ་ཉིད་ཀྱི་སྐུ། །ནམ་དུ་ཡང་
ནི་མི་བཏང་ངོ་། །དེ་ལྟར་དབང་རྫོགས་བྱས་ནས་ནི། །ཕྱག་རྒྱ་སྔགས་དང་བཅས་པ་རྣམས། །སྐུ་ཡི་བར་དུ་བསྐུར་ནས་ནི། །གསང་སྔགས་ལྡན་པས་རྫོགས་པར་བྱ། །ཆེ་གསང་ཆེན་པོ་འདི་བཤད་པས། །ཐམས་ཅད་རྫོགས་སངས་རྒྱས་ཀྱི་སྐུ་ཉིད་ཐོབ། །དེ་ལྟར་གཉིས་མེད་ལམ་མཆོག་ནི། །སངས་རྒྱས་རྣམས་ཀྱི་ཡེ་ཤེས་ཐུགས། །འདི་ནི་ངེས་པའི་ཡུལ་ཡིན་པས། །ཐབས་དང་ལྡན་པའི་ཡུལ་ཡང་ཡིན། །ཡི་དམ་སེམས་ཀྱི་དཀྱིལ་འཁོར་ནས། །ཆོས་ཀྱི་སྐུ་དང་དབྱེར་མེད་པས། །གཉིས་སུ་མེད་པ་ཐོབ་བྱའི་ཕྱིར། །འདི་ནི་ངེས་པའི་རྒྱུད་ཆེན་གསང་། །བདེ་མཆོག་ངེས་པའི་རྒྱལ་པོས་བཤད། །གསང་བའི་གསང་མཆོག་ངེས་པའི་ལུང་། །དབང་དང་ལྡན་པའི་དབང་ཉིད་ནི། །རྫོགས་པའི་སངས་རྒྱས་རྣམས་ཀྱིས་གསུངས། །སངས་རྒྱས་རྣམས་ཀྱི་སྐུ་གསུང་ཐུགས། །རྡོ་རྗེ་གསང་བའི་ལས་འདིའོ། །ཆོས་ཉིད་གསང་བའི་ལེགས་པའི་ལམ་རྒྱན་ནི། །སྐུ་དང་རྡོ་རྗེ་ཡིད་བཞིན་ནོར་བུའི་ཀློང་། །རྡོ་རྗེ་སེམས་དཔའི་སྐུ་གསུང་ཐུགས། །མདོར་བསྡུས་དབང་ཆེན་ཉིད་ཀྱིས་བཤད། །ཅེས་རྫོགས་པ་རང་བྱུང་ཆེན་པོའི་རྒྱུད་ལས། འཁོར་ལོ་རིན་པོ་ཆེ་ལྟར་བཀོད་པའི་ལེའུ་སྟེ་ཉི་ཤུ་རྩ་གསུམ་པའོ། །རྫོགས་སོའོ།། །།