ཚིགས་བཅད་ཀྱི་སྐོར་བཤད་པ།

ཚིགས་བཅད་ཀྱི་སྐོར་བཤད་པ།གཉིས་པ་ལ་ཚིགས་བཅད་བཤད། ལྷུག་པ་བཤད། སྤེལ་མ་བཤད་པ་དང་གསུམ། དང་པོ་ལ་སྡེབ་སྦྱོར་གྱི་སྒོ་ནས་གཉིས་སུ་ཕྱེ་བ། རིགས་ཀྱི་སྒོ་ནས་བཞིར་ཕྱེ་བ། སརྒྷ་ཆེན་པོའི་མཚན་ཉིད་བཤད་པ་དང་གསུམ། དང་པོ་ལ་དངོས་དང་། ཁ་འཕངས་པ། རིགས་པ་དེ་དགོས་པར་བསྟན་པ་དང་གསུམ། དང་པོ་ནི། སྙན་དངགས་ཀྱི་ཚིགས་བཅད་རྐང་པ་བཞི་པ་དེ་ཡང་ནི། ཡི་གེ་བགྲང་བ་བྲྀཏྟ་དང་། ཕྱི་མོ་བགྲང་བ་ཛཱ་ཏི་ཞེས་རྣམ་པ་གཉིས་ཡོད་དོ། །གཉིས་པ་ནི། སྡེབ་སྦྱོར་དེ་དག་གི་རྣམ་གཞག་ཇི་ལྟ་བུ་སྙམ་ན། བྲྀཏྟ་ཛཱ་ཏི་དེ་ཡི་སྤྲོས་པ་མཐའ་དག་ནི། རིན་ཆེན་འབྱུང་གནས་དང་། དམར་སེར་དང་། རྒྱལ་བའི་ལྷའི་གཞུང་རྣམས་སུ་མེད་པར་བསྟན་པ་ལྟར་རོ། །གསུམ་པ་ནི། སྡེབ་སྦྱོར་གྱི་རིག་པ་དེ་ནི་སྐབས་འདིར་མི་དགོས་པ་མིན་ཏེ། སྙན་དངགས་རྒྱ་མཚོ་ཆེན་པོ་ལྟར་ཟབ་ཅིང་བརླིང་བ་དག་ནི་བརྒལ་པར་འདོད་པ་རྣམས་ཀྱི་གྲུ་ལྟ་བུ་ཡིན་པས་སོ། །(༡༥ན)

གཉིས་པ་རིགས་ཀྱི་སྒོ་ནས་བཞིར་ཕྱེ་བ་ནི། གྲོལ་བ་ནི། ཤློ་ཀ་གཅིག་གིས་བརྗོད་བྱའི་དོན་གང་ཡིན་པ་དེ་རྫོགས་པར་སྟོན་ནུས་པ། རིགས་ནི་བསྔགས་བརྗོད་ཀྱི་ཡུལ་གཅིག་ལ་ཤློ་ཀ་དུ་མ་ཡོད་པ་བྱ་བའི་ཚིག་གཅིག་གིས་ཐམས་ཅད་གསལ་ནུས་པ། མཛོད་ནི། གཅོད་མཚམས་སྣ་ཚོགས་པའི་ངོས་ནས་ཤློ་ཀ་བྱ་ཚིག་སོགས་མང་ཉུང་ངེས་བཟུང་མེད་ཅིང་། བརྗོད་བྱ་དུ་མས་ཕྱུག་པ། འདུས་པ་ཞེས་བྱ་བ་ནི། བརྗོད་བྱའི་དོན་གཅིག་ལ། ཤློ་ཀ་དུ་མ་ཡོད་པ་ལ་བྱ་ཚིག་ཀྱང་དུ་མ་ཡོད་པ་སྟེ། དེ་འདྲ་བའི་ཚིགས་བཅད་རྒྱ་ཆེ་བ་ནི། སརྒྷས་བཅིངས་པའི་སྙན་དངགས་ཀྱི་ཆ་ཤས་ཏེ། དེའི་ནང་དུ་འདུས་པའི་རང་བཞིན་ཡིན་པའི་ཕྱིར་ན། དཔེར་བརྗོད་ལོགས་སུ་མ་བརྗོད་དོ། །སྔོན་གྱི་འགྲེལ་པ་རྣམས་སུ་འདི་བཞི་ལ་དཔེར་བརྗོད། རྟོགས་བརྗོད་རིན་པོ་ཆེ་སོགས་གཞུང་ཆེན་མོ་རྣམས་ནས་འདྲེན་པར་མཛད་འདུག་ནའང་། འདིར་ལས་དང་པོ་པ་རྣམས་ལ་ཕན་པའི་ཕྱིར་དུ་རང་བློས་ཅུང་ཟད་བསྐྲུན་ཚེ། གྲོལ་བ་ནི། རབ་དཀར་ཆུ་སྐྱེས་རྒྱས་པའི་ལྟེ་བ་ལ། །ཚངས་པའི་བུ་མོ་ཡིད་འཕྲོག་འཇོ་སྒེག་ཅན། །རྒྱུད་མང་སྒྲ་ལས་ངག་གི་དཔལ་སྟེར་བ། །དཔག་བསམ་འདོད་འཇོ་སྙིང་གི་དཔྱིད་དེར་འདུད། །ཅེས་པ་ལྟ་བུ། རིགས་ནི། འཇམ་མཉེན་རབ་དཀར་པདྨ་ཡི། །བརྟན་པ་ཅི་ཡང་འཕྲོག་བྱེད་པའི། །བཞིན་གྱི་ཟླ་བ་གསར་པ་འདི། །གཞན་ཡིད་འགུགས་པའི་ལྕགས་ཀྱུ་བཞིན། །འཇའ་ཚོན་འཁྱུག་འདྲའི་མིག་གི་དཀྱུས། །ཟུར་གྱིས་རིང་(༡༥བ)

པོར་བལྟ་བ་ཡིས། །རྣ་གོང་ཨུཏྤལ་ཕོན་པོ་ལ། །ཕྲག་དོག་བྱེད་པའི་ཆོམ་རྐུན་མ། །ཨུ་དུམ་ཝཱ་ར་འཛུམ་པའི་ཞལ། །ཚེམས་ཕྲེང་ཟེའུ་འབྲུ་རྒོད་པ་ཅན། །ཧ་རི་ཙན་དན་དྲི་བྲོ་བའི། །དགའ་མ་མཐོང་བས་འདོད་འཕེལ་གྱུར། །ཅེས་བརྗོད་བྱ་མཛེས་མའི་གདོང་གཅིག་པུ་ལ་བསྟོད་པ་ལ། འདོད་འཕེལ་གྱུར་ཅེས་པའི་བྱ་ཚིག་ཅིག་གིས་གསལ་བ་ལྟ་བུ། མཛོད་ནི། དྲི་མ་དང་བྲལ་རབ་ཏུ་དཀར། །འདོད་པའི་གདུང་བ་འཕྲོག་པར་བྱེད། །མཛེས་པའི་ཆ་ཤས་མ་ལུས་གང་། །ཟུར་མིག་བསིལ་ཟེར་སྤྲོས་པ་ཡིས། །སྙིང་གི་ཀུནྡ་ཅི་ཡང་འཛུམ། །ཁ་ཡི་དྲི་ཞིམ་ཟླ་ཤེལ་གྱིས། །རབ་དགའི་ཆུ་སྒྲོས་བརླན་པར་གྱུར། །ལང་ཚོ་རྒྱས་པའི་འདོད་པའི་ཉམས། །རི་དྭགས་མཚན་མ་རྣམ་པར་ངོམ། །ཡིད་འོང་མ་འདི་ལྷའི་བུ་མོ། །ཞེས་པ་ལྟ་བུ། འདུས་པ་ནི། ཡིད་འོང་རི་དྭགས་མིག་ཅན་གྱི། །འཇམ་ཞིང་མཉན་པའི་ལག་པ་ཡིས། །ཆུ་སྐྱེས་གསར་པའི་འདབ་མ་དག །སྐད་ཅིག་ཉིད་ལ་ཕམ་བྱེད་བཞིན། །སྙིམ་པའི་རྨད་བྱུང་རེག་བྱ་ཅན། །འདོད་པས་མྱོས་པའི་ཡིད་ཅན་གྱི། །ལུས་ལ་རེག་པའི་བདེ་བ་ཡིས། །སྔོན་མེད་སྙིང་གི་བདུད་རྩི་བྱས། །འཛམ་བུའི་གསེར་སྦྱངས་གདུ་བུ་ལ། །སྣ་ཚོགས་རིན་ཆེན་འཕྲས་མཛེས་པའི། །འདྲེན་བྱེད་ཡུལ་གྱི་དགའ་སྟོན་འདི། །འཇིག་རྟེན་བྱེད་པོས་བསྒྲུབ་པར་བྱས། །ཞེས་བརྗོད་བྱ་མཛེས་མའི་ལག་པ་གཅིག་བུ། བྱ་ཚིག བྱེད་བཞིན། བདུད་རྩིར་བྱས། བསྒྲུབ་པར་བྱས། ཞེས་པ་ལྟ་བུའོ། །འདི་སྐོར་ལ་དཔའ་བོ་གཙུག་ལག་པའི་མཆན་ལ་བརྗོད་བྱ་ཅི་ཡང་མི་(༡༦ན)

འདུག་པས་རྟོག་དཔྱོད་བྱེད་མ་དགོས་སོ། །གསུམ་པ་སརྒ་ཆེན་པོའི་མཚན་ཉིད་བཤད་པ་ལ། དམ་བཅའ་བ་དང་དངོས་གཉིས། དང་པོ་ནི། སརྒ་སྟེ་ལེའུ་གཉིས་ཡོད་པ་ཡན་ཆད་ཀྱིས་བཅིངས་པ་ནི་སྙན་དངགས་ཆེན་པོ་སྟེ། དེས་མཚོན། ཨརཤྭཱ་ས་དང་ཨངྐ་དང་ཨཱ་ཝ་དང་གཱི་ཏིས་བཅིངས་པའང་སྙན་ངག་ཆེན་པོར་འཆད་ཅིང་སྙན་ངག་ཆེན་པོ་འདིའི་མཚན་ཉིད་ནི་བརྗོད་པར་བྱའོ། །གཉིས་པ་ལ། སྒོ། སྲོག་རྩོམ་ཚུལ། རིང་དུ་གནས་ཚུལ། དམིགས་བསལ། མཁས་པས་བཞེད་ཚུལ་སོ་སོར་བཤད་པ་དང་དྲུག །དང་པོ་ནི། སྙན་ངག་ཆེན་པོ་ལ་སྔོན་དུ་ཤིས་པ་བརྗོད་པ། ཕྱག་བྱ་བ། དངོས་པོ་ངེས་པ་བསྟན་པ་གསུམ་པོ་གང་རུང་དེ་ཡི་སྒོ་ནས་འཇུག་གོ །དཔེར་ན། ཤིས་བརྗོད་ནི་གུར་ཀུམ་ཚོས་ཀྱི་ལེགས་བྲན་པའི། །མཚན་དཔེའི་ལང་ཚོ་རྒྱས་པ་ཅན། །འཇམ་མགོན་ཟུར་ཕུད་ལྔ་པ་ཡི། །བློ་གྲོས་མཆོག་དེས་ཤིས་པར་མཛོད། །ཅེས་པ་ལྟ་བུ། ཕྱག་ནི། རིན་ཆེན་རྒྱན་གྱི་གདུ་བུ་དག །སིལ་སིལ་ཁྲོལ་བ་ཙམ་གྱིས་ཀྱང་། །ཡིད་ལ་དགའ་བའི་དཔལ་སྟེར་བ། །དབྱངས་ཅན་ལྷ་དེར་སྙིང་ནས་འདུད། །ཅེས་པ་ལྟ་བུ། ངེས་བསྟན་ནི། བཅད་ལྷུག་སྤེལ་མའི་ལང་ཚོ་དར་ལ་བབ། སྡེ་བཞིའི་གཏམ་གྱི་སྲོག་ཅན་རིག་ལྡན་མ། །སྒྲ་དོན་གབ་ཚིག་ནོར་བའི་རྒྱན་གྱིས་སྤུད། །ཉམས་འགྱུར་སྙན་པའི་གླུ་དབྱངས་མགྲིན་པར་ལེན། །ཞེས་མེ་ལོང་ལ་སྦྱར་ན་བརྗོད་བྱ་ཀུན་བསྡུས་ནས་བསྟན་པ་ལྟ་བུ། (༡༦བ)

གཉིས་པ་ལ་མདོར་བསྟན། རྒྱས་བཤད་གཉིས། དང་པོ་ནི། སྔོན་བྱུང་བའི་སྐྱེས་རབས་རིག་བྱེད་སོགས་གཏམ་ལས་གྱུར་པའམ། ཡང་ན་དེའི་ཅིག་ཤོས་སྡེ་བཞི་ལ་བརྟེན་པའི་བརྗོད་བྱ་ལེགས་པ་གཞན་དག་ལ་བསྟེན་པ་གང་རུང་བྱའོ། །སྐབས་འདིར་འཇམ་ཁ། སྣར་ཐར་པ། རོང་པ་སོགས་མཁས་པ་མང་པོ་དང་། དཔལ་དཔའ་བོ་གཙུག་ལག་སོགས་རྨོངས་པ་མཁས་པའི་གོ་སར་འགྱེད་པ་མང་པོ་དག་གིས། གཏམ་རྒྱུད་དང་སྡེ་བཞི་སོགས་སྙན་ངག་གི་ལུས་སུ་འཆད་ཅིང་། ལ་ལ་དོན་གྱི་ལུས་དང་། ཚིག་གི་ལུས་ཞེས་འཁྱོག་པོར་འགྲེལ་པ་སོགས་ནི། ཆུ་ཤིང་ལ་སྙིང་པོར་འདོད་པ་ཁོ་ནར་སྣང་བས། དེས་ན་གོང་དུ་ལུས་དང་རྒྱན་ཡང་རབ་ཏུ་བསྟན། ཞེས་པས་སྲོག་ཤུགས་ལ་བསྟན་ཡོད་དེ། དཔེར་ན་སྲོག་ལྡན་གྱི་སྐྱེས་བུ་ལུས་མཛེས་པ་ལ་རྒྱན་གྱིས་སྤྲས་པ་བཞིན་དུ། སྡེ་བཞི་སོགས་ཀྱི་བརྗོད་བྱའི་སྲོག་དང་ལྡན་པའི་སྙན་ངག་གི་ལུས་བཅད་ལྷུག་སྤེལ་མ་ལ། དོན་རྒྱན་སྒྲ་རྒྱན་གབ་ཚིག་གི་རྒྱན་གྱིས་རྣམ་པར་སྤྲོས་སོ་ཞེས་ཁོ་བོའི་སློབ་དཔོན་གྱིས། གྲངས་ཅན་ལོ་ཙཱ་བ་འཇམ་དཔལ་རྡོ་རྗེའི་བཞེད་པ་ཡིན་ནོ་ཞེས་ངོམ་བཤད་དུ་མཛད་ལ། ཟུར་མཁར་བློ་གྲོས་རྒྱལ་པོས་ཀྱང་དེ་དང་མཐུན་པར་བཤད་དོ། །སྙན་ངག་ཆེན་པོའི་ལུས་ཀྱང་སྔར་བཤད་པའི་ལུས་ལས་ལོགས་སུ་མེད་ཅིང་། སྐབས་འདིར་སྲོག་བཤད་པ་ཡང་སྙན་ངག་ཐམས་ཅད་ལ་ཁྱབ་བོ། །གཉིས་པ་ནི་ཆོས་ནི་མངོན་མཐོ་ངེས་ལེགས་བསྒྲུབ་པའི་རྒྱུ། དོན་རིག་(༡༧ན)

བྱེད་མང་དུ་ཐོས་པ་དང་། ས་གཞི་རིན་པོ་ཆེ་སོགས་སོག་པ་དང་བསྲུང་བ། འདོད་པ་ནི་ལྷ་མིའི་ཡུལ་ལ་ལོངས་སྤྱོད་པ། ཐར་པ་ནི་གཏན་གྱི་བདེ་བ་བྱང་ཆུབ་སྒྲུབ་པས། སྡེ་བཞི་པོ་ནི་སྐྱེས་བུའི་དོན་གྱི་འབྲས་བུ་ཡིན་ལ། དེའི་དབང་དུ་གྱུར་པའི་ཚུལ་བརྗོད་པའི་སྔོན་གྱི་གཙུག་ལག་གི་བསྟན་བཅོས་དུ་མ་དང་། ཤེས་བྱ་ཀུན་ལ་མཁས་ཤིང་། འགྲོ་བ་རྣམས་ཀྱི་ཡིད་དུ་འོང་བའི་འདྲེན་པ་དམ་པ་རྣམས་ལ་བསྔགས་པ་བརྗོད་པ་རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་ལྟ་བུ། གྲོང་ཁྱེར་རྒྱ་མཚོས་རི་གསུམ་ལ་བསྔགས་པའི་དཔེར་བརྗོད་ནི། གནམ་སྔོན་ཞུན་མར་འཁྱིལ་འདྲའི་རྒྱ་མཚོ་ལས། །བརྒལ་ཏེ་གསེར་དངུལ་རི་ཡི་ཕྲེང་འདས་ཚེ། །རིན་ཆེན་རྡུལ་མང་བརྩེགས་པའི་གྲོང་ཁྱེར་དབུས། །བཻཌཱུར་སེར་པོའི་རྒྱ་ཕིབས་འོད་དུ་འཚེར། །ཞེས་པ་ལྟ་བུ་དུས་དང་ཉི་ཟླ་འཆར་བ་དང་། །སྐྱེད་ཚལ་ཆུ་ཡི་རོལ་རྩེད་རྣམས་ཀྱི་བསྔགས་པ་ནི། །འབྲས་ལྡན་སྟོན་གྱི་མཁའ་དབྱིངས་དྭངས་པ་ལ། །ཚ་ཟེར་འོད་གསལ་གཟི་ཡིས་ཆུ་སྐྱེས་ཚོགས། །འཛུམ་པའི་སྐྱེད་ཚལ་དབུས་སུ་འཁྱིལ་བའི་མཚོར། །འདོད་ལྡན་སྐྱེ་བོ་ཁྲུས་ཀྱི་རྩེད་འཇོར་རོལ། །ཞེས་པ་ལྟ་བུ། ཆང་འཐུང་བའི་དགའ་སྟོན་དང་། འཁྲིགས་པ་ལ་སྤྱོད་པའི་དགའ་སྟོན་དང་། སྐྱེས་པ་དང་བུད་མེད་ལ་བཏབ་ནས་མ་ཚོགས་པ་གསུམ་ནི། རྒྱན་གོས་རྣམ་བཀྲ་གྲོགས་དང་ལྷན་ཅིག་པར། །ཆང་གིས་མྱོས་ཤིང་སྨིན་ལེགས་ཆུ་སྐྱེས་ལ། །རྩེ་དགར་རོལ་ཚེ་འགའ་ཞིག་གཡོན་མ་དང་། །དུས་བཏབ་ལས་འདས་མི་ཟད་འདོད་པས་གདུངས། །ཞེས་པ་ལྟ་བུ། (༡༧བ)

བག་མ་གཏོང་ལེན་དང་། གཞོན་ནུ་སྐྱེ་བ་དང་འཕེལ་བ་གསུམ་ནི། ལུས་ཕྲ་མཆིལ་འབྲང་ལ་ཁུགས་དགྱེས་དགུ་ལ། སྤྱད་པས་ཀུནྡ་དར་བའི་དཔྱིད་ཀྱི་བུ། །བཙས་ནས་རིང་པོར་མ་ཐོགས་གཞོན་ནུ་དེ། །བསོད་ནམས་བཞིན་དུ་ལུས་སྟོབས་བསྐྱེད་ནས་འཕེལ། །ཞེས་པ་ལྟ་བུ། བྱ་བ་རྩོམ་པའི་གྲོས་དང་། ཕོ་ཉའི་འགྲོ་འོང་དང་། ཡུལ་ཐག་རིང་པོར་བགྲོད་པ་གསུམ་ནི། རྒྱལ་གསུང་རྒྱུད་མང་གྲོས་ཀྱིས་ཉོན་མོངས་རྫིངས། །བཤིག་ཚེ་སེམས་ཀྱི་ཕོ་ཉ་ཐར་པའི་སར། །བཏང་བས་གཏན་གྱི་བདེ་བའི་མཛའ་ན་མོ། །ཐག་རིང་ཡུལ་ནས་སྐར་མདའ་ལྟ་བུར་འོངས། །ཞེས་པ་ལྟ་བུ། གཡུལ་བཤམས་པ་དང་། འདྲེན་པ་སྟེ་རྒྱལ་པོའི་མངའ་ཐང་དར་བའི་ཚུལ་དག་ཀྱང་དཔེར་བརྗོད་ན། གནམ་ས་འགུལ་འདྲའི་སྤྲུལ་པའི་དཔའ་བོའི་དཔུང་། །འཇིགས་རུང་གཡུལ་གྱི་སྦྱོར་བས་དགྲ་སྡེའི་ཚོགས། །ཕྱེ་མར་འཐག་ཚེ་ས་དབང་རྒྱལ་པོ་ཡི། །སྡེ་བཞིའི་མངའ་ཐང་དབྱར་གྱི་མཚོ་ལྟར་འཕེལ། །ཞེས་པ་ལྟ་བུའོ། །དེ་རྣམས་ཀྱིས་ཀྱང་བསྟན་བཅོས་བརྒྱན་པར་གྱུར་ཅིང་། མདོར་བསྡུས་པ་མིན་པར་སྐབས་དང་འཚམ་པར་བརྩམ་མོ། གསུམ་པ་ནི། བརྩམ་བྱའི་སྙན་ངག་དེ་ཡང་སྒེག་པ་སོགས་ཉམས་དོད་པས་ཡིད་འགྱུར་ཞིང་ཚིག་སྦྱོར་ཕུན་སུམ་ཚོགས་པ་དག་གིས་གཏམས་པ། བློ་ཆུང་བ་རྣམས་ངལ་བ་སྤང་སླད། སརྒ་ཤིན་ཏུ་རྒྱ་ཆེ་བ་སྟེ་མང་བ་ཡང་མིན་ལ་ཉུང་སྐྱོན་དང་ཡང་བྲལ་བའི་མཉན་པར་འོས་པ་དེ་ཉིད། དབང་པོ་རྡོ་རྗེ་སོགས་བྲྀཏྟ་དང་། འཕགས་མ་སོགས་ཛཱ་ཏིས་ལེགས་པར་མཚམས་ཀྱང་སྦྱར་ལ། རྣམ་པ་ཀུན་ཏུ་སརྒ་དག་ལ། དཔེར་ན་ཚིག་རྐང་ཕལ་ཆེར་ཡི་གེ་ཉེར་གཅིག་(༡༨ན)

ཙམ་ཡོད་ན། དེ་དག་གི་མཐའ་རྫོགས་མཚམས་སུ་བཅོ་ལྔ་དགུ་བདུན་སོགས་སུ་འབེབས་ཤིང་། དངོས་གཞི་བདུན་བསྒྲིགས་ལྟ་བུ་ལ། དགུ་བཅུ་གཅིག་སོགས་ཡར་འཕེལ་ཞིང་། བཅད་མཐར་ལྷུག་པ་དང་། ལྷུག་མཐར་བཅད་པས་གཞུང་དཀྱུས་མ་ལས་ཐ་དད་པ་སྟེ། ཁྱད་ཆོས་དང་ལྡན་པས་འཇིག་རྟེན་ན་མཁས་པ་རྣམས་ཀྱི་ཁ་ལས་མཛེས་སོ། །བཞི་པ་ནི། དེ་ལྟ་བུའི་སྙན་ངག་དམ་པ་ཕུན་སུམ་ཚོགས་པའི་རྒྱན་དང་ལྡན་པ་དེ་ནི་བློ་ལྡན་རྣམས་ཀྱིས་ངོ་མཚར་དུ་འཛིན་པས་བསྐལ་པའི་བར་དུ་སྙན་པའི་གྲགས་པ་དང་བཅས་ཏེ་གནས་པར་འགྱུར་རོ། །ལྔ་པ་ནི་གང་ཞིག་གྲོང་ཁྱེར་ལ་བསྔགས་པ་ལྟ་བུའི་ཡན་ལག་འགས་དམན་ཡང་། གལ་ཏེ་སྦྱར་བའི་ཚིག་དོན་རྣམས་ཕུན་ཚོགས་ཀྱིས་ཚུལ་དེ་རིག་པའི་མཁས་པ་རྣམ་མགུ་བར་བྱེད་ནུས་ཤིང་། ལེའུ་གསུམ་ཡན་དང་ལྡན་ཕྱིན། འདིར་ནི་སྙན་ངག་ཆེན་པོ་མ་ཡིན་པའི་སྐྱོན་མེད་དེ། ཡོན་ཏན་དེ་རྣམས་ཚང་ཕྱིན། སྐྱེད་ཚལ་གྱི་བསྔགས་བརྗོད་ཙམ་སྲོག་ཏུ་བྱས་པས་ཀྱང་རུང་ངོ་། དཔའ་བོ་གཙུག་ལག་པས། རིག་པ་དེས་གཞན་མགུ་བར་བྱེད་ཅེས་འབྲུ་ཕྱིན་ཅི་ལོག་ཏུ་འབད་པས་རྒྱག་གོ །དྲུག་པ་ལ། བྷཱ་མ་ཧའི་བཞེད་པ་དང་། དབྱུག་པ་ཅན་གྱི་བཞེད་པ་གཉིས། དང་པོ་ནི་ཐོག་མ་རང་ཕྱོགས་ཀྱི་འདྲེན་པ་སྟེ། རྒྱལ་པོ་ལྟ་བུ་ལ་དཔའ་བ་སོགས་ཀྱི་ཡོན་ཏན་གྱི་བསྔགས་པ་ཉེ་བར་བཀོད་ནས། རྒྱལ་པོ་དེ་ཡིས་ནི་ཕ་རོལ་གྱི་དགྲ་སྡེ་ལ་གནོད་པ་སྟེ་ཚར་གཅོད་པར་བྱེད་དོ་ཞེས་བསྟོད་པའི་སྙན་ངག་གི་ལམ་འདི་(༡༨བ)
འཇིག་རྟེན་ན་རང་བཞིན་གྱིས་མཛེས་པ་ཡིན་ནོ། །གཉིས་པ་ནི། རིགས་མཐོ་བ་དང་། བརྩོན་འགྲུས་ཆེ་བ་དང་། ཐོས་པ་མང་བ་སོགས་ཡོན་ཏན་དུ་མས་ཕ་རོལ་གྱི་དགྲ་བོ་ལ་ཡང་བསྔགས་པར་བྱས་ཤིང་བསྟོད་ནས། དེ་ལས་ཀྱང་རྒྱལ་བར་ནུས་པའི་ཕྱིར་རང་ཅག་གི་འདྲེན་པ་འདི་ནི་ཞེས་བསྟོད་པས། ཕ་རོལ་གྱི་ཡོན་ཏན་ཕུན་སུམ་ཚོགས་པ་ལས་ཀྱང་ཕུན་སུམ་ཚོགས་པའི་ཁྱད་པར་དུ་འཕགས་པར་བརྗོད་པ་ལ་བདག་དགའ་བ་བསྐྱེད་ཀྱི། ལུགས་སྔ་མའང་མི་འདོད་པ་ནི་མིན་ནོ། །