གཏེར་སྲུང 
་ནོར་བདག་ཡེ་ཤེས་གྲགས་ཀྱི་སྒྲུབ་པའི་སྙིང་པོ་སྦུར་ལེན།
མཁའ་འགྲོ་ནོར་ལྷའི་ཆ་ལག་ཏུ༔ གཏེར་སྲུང ་ནོར་བདག་ཡེ་ཤེས་གྲགས༔ སྒྲུབ་པའི་སྙིང་པོ་སྦུར་ལེན་བི་ཧ་ར་ཏིསྨ༔ མཁའ་འགྲོ་ནོར་ལྷའི་ཆ་ལག་ཏུ༔ གཏེར་སྲུང ་ནོར་བདག་ཡེ་ཤེས་གྲགས༔ བསྒྲུབ་པའི་སྙིང་པོ་སྦུར་ལེན་སྟོན༔ ཨོ་རྒྱན་ནོར་ལྷ་རྒྱ་མཚོར་འདུད༔ ས་མ་ཡཱ༔ དང་པོ་དབེན་ཅིང་ཉམས་དགའི་ཆར༔ རྩི་ཤིང་མེ་ཏོག་བཀྲ་བའི་དབུས༔ གངས་རི་རོལ་མཚོ་རྫ་སྤང་ལྷུན༔ བརྗིད་ཅིང་ཆགས་པའི་གནས་མཆོག་དེར༔ བསྟན་འགྲོའི་དབུལ་བ་སེལ་བའི་ཕྱིར༔ གཏེར་སྲུང ་མཆོད་སྒྲུབ་གནད་དུ་ཟུངས༔ མར་དཀར་སྦྲང་རྩི་སྦག་པའི་ཕྱེས༔ གཏོར་མ་ལྟོ་ལྡིར་གཏེར་བུམ་དབྱིབས༔ མཐའ་ལ་པད་སྤུང་རྩེ་མོ་རུ༔ ཉི་ཟླ་མེ་ཞགས་རླུང་རི་དང༔ ཕུན་ཚོགས་ནོར་བུའི་ཕྲ་ཚོམ་བཀོད༔ མཐེབ་རིལ་སུམ་རིམ་མཐའ་ལ་བསྐོར༔ རྣམ་ལྔའི་མཆོད་པས་ལེགས་པར་བརྒྱན༔ རྣལ་འབྱོར་བདེ་བའི་སྟན་ལ་འགོད༔ བྱིན་རླབས་བྱིན་ཆེན་དབབ་ནས་ནི༔ གཞུང་གི་ཆོ་ག་འདི་ལ་འཇུག༔ ཀྱེ༔ ཕྱོགས་ཕྱོགས་དེ་ནི་ཉི་མ་བྱང་གི་ཕྱོགས༔ ལྕང་ལོ་ཅན་གྱི་གནོད་སྦྱིན་ལྗོངས་ཀྱི་ཞིང༔ ཕུན་ཚོགས་རིན་ཆེན་བཀྲ་བའི་གཞལ་ཡས་ཁང༔ གནོད་སྦྱིན་དབང་པོ་གཞན་གྱིས་མི་ཐུབ་པའི༔ མཁའ་འགྲོ་ནོར་ལྷའི་བྲན་ཁོལ་གཏེར་གྱི་བདག༔ དགེ་བསྙེན་ཆེན་པོ་ནོར་བདག་ཡེ་ཤེས་གྲགས༔ ཞལ་གཅིག་ཕྱག་གཉིས་གསེར་སྦྱངས་བཙོ་མའི་མདོག༔ ཕྱག་གཡས་རིན་ཆེན་རྒྱལ་མཚན་མཁའ་ལ་བསྒྲེང༔ ཕྱག་གཡོན་དཀར་མོ་རྒྱང་གྲགས་འུ་རུ་རུ༔ སྐུ་ལ་ཟ་འོག་བེར་ཆེན་ལྷབ་མ་ལྷུབ༔ དབུ་ལ་རིན་ཆེན་པྲོག་ཞུ་ཟེངས་སེ་ཟེང༔ སྙན་ཆ་ནོར་བུའི་ཝ་མིག་ཁྲོ་ལོ་ལོ༔ ཞབས་གཉིས་ཕྱེད་སྐྱིལ་གདོང་ལྔའི་ཁྲི་ལ་བཞུགས༔ སྤྱན་གསུམ་སྡང་མིག་འགོང་འདྲེའི་ཡུལ་ལ་གཟིགས༔ འཁོར་དུ་ནོར་ལྷ་ཐེ་བྲང་སྟོང་སྡེ་དང༔ མངོན་ཤེས་གསལ་བའི་མི་མིན་དྲེགས་པས་བསྐོར༔ བདག་མདུན་ཐུགས་ཀའི་ས་བོན་ལས་འཕྲོས་པས༔ རང་བཞིན་གར་བཞུགས་གནས་ནས་ གཏེར་སྲུང ་ཆེ༔ ཡེ་ཤེས་གྲགས་ཚོགས་སྤྱན་འདྲེན་གཤེགས་སུ་གསོལ༔ ཨོཾ་ཛྙཱ་ན་ཀིརྟི་བཛྲ་ས་མ་ཡཱ་ཛ་ཛཿ ཛཿཧཱུྃ་བཾ་ཧོ༔ སྒྲུབ་རྫས་རྟེན་དང་གཉིས་མེད་ཏིཥྛ་ལྷན༔ མཆོག་ཐུན་ལས་བཞིའི་མངའ་བདག་དེ་ལ་འདུད༔ ཧཱུྃ་ཧོ༔ དགེ་བསྙེན་ཆེན་པོ་ནོར་བདག་ཡེ་ཤེས་གྲགས༔ འཇིག་རྟེན་ནོར་ལྷ་ཐེ་བྲང་སྟོང་སྡེའི་འཁོར༔ བརྔན་སྦྱིན་རྒྱན་གྱི་གཏོར་མ་སྨན་རཀ་དང༔ ཇ་ཆང་གསེར་གཡུའི་སྐྱེམས་ཀྱི་ཕུད་རྒོད་བྲན༔ འབྲུ་སྨན་དཀོར་ནོར་སྤྱན་གཟིགས་མཆོད་པ་འབུལ༔ སྒྲུབ་པའི་གཞལ་ཡས་ཁང་འདིར་བཞུགས་སུ་གསོལ༔ བཞུགས་ནས་མཐུ་ནུས་ཟད་མེད་གཏེར་དབང་སྩོལ༔ སྣང་མཐའ་སྤྱན་གཟིགས་པདྨ་ཐོད་ཕྲེང་རྩལ༔ རིག་འཛིན་ཡབ་སྲས་བརྒྱུད་པའི་བཀའ་དམ་བཞིན༔ མི་ཕྱུགས་ཟས་སྤེལ་ར་ལུག་གཡང་ཁུག་ལ༔ ཆེ་བཙན་གྲགས་པ་རྒྱལ་བློན་བཙུན་མོ་དང༔ འགྲོ་བ་ཕོ་མོའི་སྣང་སེམས་རབ་བསྒུལ་ནས༔ ཚེ་ཆོས་སྲིད་ནོར་རྒྱས་པའི་ཕྲིན་ལས་མཛོད༔ ཅེས་པའི་ གཏེར་སྲུང ་ཆེན་པོ་འདི༔ ལེགས་པར་སྒྲུབ་པའི་གང་ཟག་ལ༔ ལོངས་སྤྱོད་དབྱར་གྱི་ཆར་རྒྱུན་བཞིན༔ ཕུན་ཚོགས་འབྱུང་བར་མ་གྱུར་ན༔ ལྷ་དང་སྲུང་མའི་མཐུ་རྩལ་ཞན༔ རབ་ཏུ་གཅེས་པའི་སེམས་ཀྱིས་སྒྲུབས༔ སྤང་བླང་བྱས་ན་དངོས་གྲུབ་ཡལ༔ སྲུང་མ་རང་གི་གཤེད་དུ་འབབ༔ དེ་ཕྱིར་རབ་ཏུ་འཚོ་ཤེས་གྱིས༔ ས་མ་ཡཱ༔ རྒྱ་རྒྱ་རྒྱ༔ མནྟྲ་གུ་ཧྱ༔ གཏེར་ལ་དབང་བའི་རིག་འཛིན་གཞན་ཕན་བཟང་པོ་ལ༔ ཆོས་ཀྱི་བདག་པོར་བསྔགས་པའི་སློབ་བུ་དགེ་བཤེས་སྔ་བཟོད་དཀོན་མཆོག་གང་གིས་དབྱུག་ཐོས་རྔ་ལ་བསྣུན་ལྟར་ཡང་ཡང་བསྐུལ་ངོར༔ འགྲོ་དོན་དུས་ལ་བབས་ཚེ་ནགས་རི་སྤོས་ཀྱི་གླང་པོའི་རྫོངས་ནས་ཡར་ངོའི་ཆོ་འཕྲུལ་ཟླ་བར་ལེགས་བྲིས་དགེ་བས་བསྟན་འགྲོའི་དབུལ་སེལ་བདེ་གཤེགས་རིན་ཆེན་མིང་གི་རྒྱལ་སྲིད་ལ་དབང་འབྱོར་བར་ཤོག་ཅིག་གུ༔