སྐབས་ཉི་ཤུ་རྩ་གསུམ་པས་རྩིས་འབྲས་ངོ་ལོན་དང་བཅས་པ་བཤད་པ།

ད་ནི་སྐབས་ཉི་ཤུ་རྩ་གསུམ་པས་རྩིས་འབྲས་ངོ་ལོན་དང་བཅས་པ་བཤད་པ་ལ་སྦྱོར་དངོས་གཉིས་ལས། དང་པོ་ལའང་གཉིས་ཏེ། མཆོད་བརྗོད་དང་། དམ་བཅའོ། །དང་པོ་ནི། ཤེས་བྱ་ཇི་ལྟ་བ་གཤིས་ཀྱི་གནས་ལུགས་སྟོང་པ་ཉིད་དང་། ཇི་སྙེད་པ་སྣང་བ་སྣ་ཚོགས་པའི་ངོ་བོ་རྒྱུ་དང་འབྲས་བུའི་ཆོས་ཀུན་མ་འདྲེས་པར་སོ་སོར་མཁྱེན་པའི་ཡེ་ཤེས་མངའ་བས། ཕྱི་ནང་གི་སྣང་བ་བདེ་སྡུག་ལ་སོགས་པའི་འབྲས་བུ་འབྱིན་ནུས་ཀྱི་རྒྱུ་རྐྱེན་རྟེན་ཅིང་འབྲེལ་བར་འབྱུང་བའི་བླང་དོར་མ་ལུས་པ་ཀུན་སྟོན་པར་མཛད་པ་པོ་རྗེ་བཙུན་བླ་མའི་ཞབས་ལ་མགོ་བོས་འདུད་དོ། །གཉིས་པ་ནི། བཏུད་ནས་ཅི་བྱ་ཞེ་ན། ད་ནི་རྩིས་ཀྱི་འབྲས་བུ་བསྟན་ཞེས་ཁས་བླང་ངོ་། །གཉིས་པ་ལའང་བསྟན་བཤད་གཉིས་ལས། དང་པོ་ནི། ཚེས་དབྱངས་གཟའ་དང་སྐར་མ་དང་། །ཞེས་སོགས་ཚིགས་སུ་བཅད་པ་གསུམ་གྱིས་མདོར་བསྟན་པའི་སྒོ་ནས་མཉན་པར་བསྐུལ་བའོ། །གཉིས་པ་ལ་རབ་བྱེད་བཅུ་དགུ་ལས། དང་པོ་ཚེས་ཀྱི་བླང་དོར་སྟོན་པའི་རབ་བྱེད་ནི། ཐོག་མར་ཚེས་ཀྱི་སོགས་ཏེ། འདི་ལ་གསུམ། སྤྱིར་བསྟན་པ། སོ་སོར་བཤད་པ། ཚེས་འབྲས་ཐོར་བུ་བཤད་པའོ། །དང་པོ་ནི། འཇམ་དཔལ་རྩ་བའི་ཞེས་སོགས་སོ། །དེར་མ་ཟད་གཞན་ཡང་མདོ་རྒྱུད་རྣམས་སུ། ཡར་ངོ་དང་མར་ངོའི་ཚེས་བརྒྱད་དང་བཅུ་བཞི་དང་བཅོ་ལྔ་དང་ཚེས་བཅུ་ལ་སོགས་པ་དུས་བཟང་པོ་རྣམས་ལ་དགེ་བའི་བྱ་བ་རྣམས་བཟང་བར་གསུངས་པ་དང་། ཁྱད་པར་རྒྱུད་འདིར་དགའ་བཟང་རྒྱལ་སྟོང་རྫོགས་པ་རྣམས་མཁའ་རླུང་མེ་ཆུ་སའི་ཁམས་ཡིན་པས་ཁམས་སོ་སོ་དང་མཐུན་པའི་ལས་བཞི་སོགས་བྱ་ཞིང་། ཟླ་བའི་ཕྱོགས་གཉིས་བསྐྱེད་སྡུད་ཀྱི་རིམ་པས་ཡར་ངོ་ལ་སྐྱེ་ཞིང་འཕེལ་བའི་ལས་དང་། མར་ངོ་ལ་འགོག་ཅིང་འགྲིབ་པའི་ལས་རྣམས་བྱ་བ་བཟང་བའང་དོན་ལ་ཐོབ་གསུང་ངོ་། །གཉིས་པ་ནི། ཚེས་གཅིག་དོན་གཉེར་ས་ཁ་དབྱེ། །ཞེས་པ་ནས། མི་རྟའི་ལུས་ཀུན་ཁྱབ་པར་གནས། །ཞེས་པའི་བར་གྱིས་ཚེས་སོ་སོའི་བཟང་ངན་གྱི་བླང་དོར་མི་རྟའི་བླ་གནས་དང་བཅས་པ་བཏུས་པའོ། །དེ་ལྟར་རྩ་བ་འདིར་བཀོད་པའི་བླ་གནས་རྩི་ལུགས་འདི་ནི་རིན་ཆེན་ཕྲེང་བའི་ལུགས་ཡིན་གྱི། ཁུངས་གང་ལ་བརྟེན་མ་ཤེས་སོ། །དེ་ལྟ་མོད་ཀྱི། རྒྱུད་འགྲེལ་ལས་གསུངས་པ་ནི་འདི་ཡིན་ཏེ། རྒྱུད་ལས། མཐེ་བོའི་ཚིགས་ནས་གཙུག་ཏོར་དག་ཏུ་འགྲོ་སྟེ་ཚེས་ཀྱི་དབང་གིས་ཉ་ཡི་མཐར་ཡང་རང་གི་སེམས། །སླར་ཡང་གཙུག་ཏོར་ནས་ནི་ནག་པོའི་ཕྱོགས་སུ་འདི་ནི་རྐང་པའི་སོར་མོ་རྣམས་སུ་འགྲོ་བར་འགྱུར། །ཞེས་གསུངས་པས་སོར་ཚིགས་སོགས་གནས་སུམ་ཅུ་རྩ་གཉིས་པོ་རྣམས་སུ་ཁམས་རྣམས་ཡི་གེའི་རྣམ་པར་གནས་པ་ལ་ཚེས་ཀྱི་དབང་གིས་ནུས་པ་འཕོ་ལ། དེ་ཡང་ཡར་ངོ་སྔོན་འགྲོའི་དབང་དུ་བྱས་ན་རོ་རྐྱང་གི་རྩའི་གནས་ཚུལ་གྱི་དབང་ལས་སྐྱེས་པའི་གཡོན་དང་བུད་མེད་ཀྱི་གཡས་ཕྱོགས་ནས་འགོ་བརྩམས་ཏེ། ཚེས་གཅིག་རྐང་པའི་སོར་ཚིགས་དང་པོ་ལ་ཡི་གེ་ཨཿགཉིས་པར་ཨི། གསུམ་པར་རྀ། བཞི་པར་ལོང་བུར་ཨུ། ལྔ་པར་པུས་མོར་ལྀ། དྲུག་པར་དཔྱི་མཚམས་ཨ། བདུན་པར་ལག་སོར་དང་པོར་ཨེ། བརྒྱད་པར་གཉིས་པར་ཨར། དགུ་ལ་གསུམ་པར་ཨོ། བཅུ་པར་མཁྲིག་མའི་མཚམས་སུ་ཨ་ལཱ། བཅུ་གཅིག་པ་ལ་གྲུ་མོར་ཧ། བཅུ་གཉིས་དཔུང་འགོར་ཡ། བཅུ་གསུམ་མགྲིན་པར་ར། བཅུ་བཞི་མཚོག་མར་ཝ། བཅོ་ལྔ་པར་དཔྲལ་བར་ལ། བཅོ་ལྔ་དང་བཅུ་དྲུག་གི་མཚམས་སུ་སྤྱི་བོར་ཨཾ། སླར་ཡང་བཅུ་དྲུག་ལྟག་པར་ལཱ། བཅུ་བདུན་པ་གཉའ་བར་ཝཱ། བཅོ་བརྒྱད་སྙིང་གར་རཱ། བཅུ་དགུ་དཔུང་ཚིགས་སུ་ཡཱ། ཉི་ཤུ་གྲུ་མོར་ཧཱ། ཉེར་གཅིག་མཁྲིགས་མར་ཨཱལ། ཉེར་གཉིས་སོར་ཚིགས་གསུམ་པར་ཨཽ། ཉེར་གསུམ་གཉིས་པར་ཨཱར། ཉེར་བཞི་དང་པོར་ཨཻ། ཉེར་ལྔ་དཔྱི་རུས་མཚམས་སུ་ཨཱ། ཉེར་དྲུག་ལ་པུས་མོར་ལཱྀ། ཉེར་བདུན་ལོང་བུར་ཨཱུ། ཉེར་བརྒྱད་སོར་ཚིགས་གསུམ་པར་རཱྀ། ཉེར་དགུ་གཉིས་པར་ཨཱྀ། གནམ་གང་དང་པོར་ཨཱ། གནམ་སྟོང་དང་ཚེས་གཅིག་གི་མཚམས་སུ་རྐང་མཐིལ་དུ་ཨཱཿའི་གཟུགས་ཅན་ཏེ། འདི་དང་གོང་གི་སྤྱི་བོར་ཨཾ་གྱི་ཚེ་ལུས་ཀུན་ཁྱབ་པས་ཤིན་ཏུ་གཉན་གསུང་ངོ་། །གཞན་ཡང་ཧེ་རུ་ཀ་གལ་པོའི་བརྟག་པ་བཞི་པར། ཡང་ནི་ཁུ་བ་གཡོན་སྐོར་དང་། །གཡས་སྐོར་གྱི་ནི་བྱེ་བྲག་གིས། །གནས་ནི་བཅུ་དྲུག་ལེགས་པ་ཡི། །རིམ་པས་སམ་ནི་ཀྲནྟི་བཤད། །མཐེ་བོང་ཉི་མ་དང་པོ་ལ། །མི་ཕྱེད་མ་ནི་ཡི་གེ་ཨ། །བྱིན་པ་ལ་ནི་གཉིས་པ་སྟེ། །ཕྲ་མོའི་ཚུལ་ནི་ཨཱ་རིང་པོ། །བརླ་ནི་གསུམ་པ་ཙེས་མ་ཨི། །གསང་བར་བཞི་པ་གཡོན་མར་ཨཱི། །ལྟེ་བ་ལྔ་པ་ཐུང་མ་ཨུ། །སྙིང་གར་དྲུག་པ་རུས་སྦལ་ཨཱུ། །ནུ་མར་བདུན་པ་སྒོམ་པ་རྀ། །མགྲིན་པར་བརྒྱད་པ་དབང་མ་རཱྀ། །ལག་མཐིལ་དགུ་པ་ཉེས་མ་ལྀ། །ཁུར་ཚོས་བཅུ་པ་མཇུག་མ་ལཱྀ། །མིག་ན་བཅུ་གཅིག་མོ་མ་ཨེ། །སྣ་རྩར་བཅུ་གཉིས་མཚན་མོ་ཨཻ། །དཔྲལ་བར་བཅུ་གསུམ་བསིལ་མ་ཨོ། །སྤྱི་བོར་བཅུ་བཞི་གཟི་བརྗིད་ཨཽ། །གཡས་དང་གཡོན་གྱི་དབུས་ན་ནི། །ཡོངས་སུ་གང་བའི་ཨཾ་དང་ཨཿདགའ་བྱེད་མ་དང་ཀུན་སྤངས་ཡིན། །གཡས་སུ་ཨཿདང་ཨཾ་གཉིས་ལ། །རོ་བཅུད་མ་དང་ཚང་མ་དང་། །ཚེས་གྲངས་བཅུ་དྲུག་དག་ལའོ། །བཅུ་བདུན་མགོ་གཡས་མདོག་སྔོན་ཨཽ། །བཅོ་བརྒྱད་སྣ་གཡས་སྤྱི་མ་ཨོ། །བཅུ་དགུ་མིག་གཡས་སྒྱུར་སྦྱིན་ཨཻ། །ཉི་ཤུ་འགྲམ་གཡས་སྦྱོར་བྲལ་ཨེ། །ཉེར་གཅིག་གཡས་མཆུ་ལྕེ་མ་ལཱྀ། །ཉེར་གཉིས་ཀེ་ལ་གྲུབ་མ་ལྀ། །ཉེར་གསུམ་ལག་གཡས་འཚེད་མ་རཱྀ། །ཉེར་བཞི་ནུ་གཡས་ཡིད་གཟུགས་རྀ། །ཉེར་ལྔ་སྙིང་གཡས་སུམ་བསྐོར་ཨཱུ། །ཉེར་དྲུག་ལྟེ་གཡས་འདོད་མ་ཨུ། །ཉེར་བདུན་བརླ་གཡས་གཏུམ་བདག་ཨཱི། །ཉེར་བརྒྱད་ཆོས་འབྱུང་ཁ་མ་ཨི། །ཉེར་དགུ་བྱིན་པར་འཇིགས་མ་ཨཱ། །སུམ་ཅུ་རྐང་གཡས་བདུད་འཇོམས་ཨ། །ཟླ་གཅིག་གཡོན་དང་གཡས་སུ་འགྲིམ། །ཞེས་གསུངས་སོ། །དེ་བཞིན་དུ་སྡོམ་འབྱུང་དང་མཁའ་འགྲོ་རྒྱ་མཚོ་ལས་ཀྱང་དབྱངས་བཅུ་དྲུག་དང་སྦྱར་ཏེ་གསུངས་པ་དང་། སྲིད་པའི་གཏེར་ཁྱིམ་ལས་དུས་ཚོད་དང་སྦྱར་ཏེ་གསུངས་པ་སོགས་མང་སྟེ་འདིར་མ་སྤྲོས་སོ། །གསུམ་པ་ལ་གཉིས་ཏེ། སྐྲ་ཚེས་དང་། ལམ་རྩིས་སོ། །དང་པོ་ནི། བྱང་སེམས་སྐྲ་འཁྲུའི་སོགས་སོ། །གཉིས་པ་ནི། ཇོ་བོས་མཛད་པར་སོགས་སོ། །དེ་ལྟར་ན་ཚེས་ཀྱི་འབྲས་བུ་སོགས་ཏེ་རབ་བྱེད་དང་པོའི་འགྲེལ་པའོ། །གཉིས་པ་དབྱངས་འཆར་ལ་བརྟེན་ནས་བླང་དོར་སྟོན་པའི་རབ་བྱེད་ནི། དེ་ནས་དབྱངས་འཆར་སོགས་ཏེ། འདི་ལ་གཉིས། རྒྱུད་འགྲེལ་ལས་གསུངས་པའི་དང་། ཞར་བྱུང་ལྷ་ཆེན་གྱི་བཞེད་པ་བཀོད་པའོ། །དང་པོ་ལ་ལྔ་སྟེ། ཚེས་ལ་དབྱངས་འཆར་ཚུལ། དེ་ན་ཚོད་ལྔ་དང་སྦྱར་བ། དགའ་བ་སོགས་ལྔ་དང་སྦྱར་བ། དབྱངས་ཚེས་གཟའ་སྐར་རྣམས་ཕྲད་པའི་བླང་དོར། མ་བརྗོད་པ་གཞན་དུ་ཁ་འཕང་བའོ། །དང་པོ་ནི། ཟླ་བ་སོ་སོའི་དཀར་པོའི་ཚེས་གཅིག་ནས་བཅོ་ལྔའི་བར་རིམ་པ་བཞིན་དུ། ཨ་ཨི་སོགས་རང་བྱུང་གི་ཡི་གེ་ལྔ། ཨ་ཨེ་སོགས་ཡོན་ཏན་གྱི་ཡི་གེ་ལྔ། ཧ་སོགས་ཡ་ནའི་ཡི་གེ་ལྔ་སྟེ་ཐུང་ངུ་བཅོ་ལྔ་པོ་འཆར་རོ། །ཡང་ཚེས་བཅུ་དྲུག་ནས་བཟུང་སྟེ་གནམ་སྟོང་གི་བར་ནག་ཕྱོགས་ལ་རིམ་བཞིན་དབྱངས་རིང་པོ་བཅུ་དྲུག་པོ་གོ་རིམ། ལཱ་ཝཱ་རཱ་སོགས་ལྡོག་པའི་ཚུལ་གྱིས་འཆར་རོ། །གཉིས་པ་ནི། འཆར་བའི་དབྱངས་ནས་སོགས་ཏེ། དཔེར་ན་དཀར་པོའི་ཚེས་གཅིག་ལ་ལྟོས་ཏེ་དབྱངས་ཨ་ཡིག་བྱིས་པ་དང་། ཨི་གཞོན་ནུ། རྀ་ལང་ཚོ། ཨུ་རྒན་པོ། ལྀ་ནུབ་པའོ། །དེ་བཞིན་དུ་ཚེས་གཉིས་ལ་ཨི་བྱིས་པ་ཡིན་པ་སོགས་འགྲེའོ། །གསུམ་པ་ནི། དེ་བསྟུན་དགའ་བཟང་སོགས་ཏེ། དབྱངས་ཐུང་རིང་ལུགས་འབྱུང་ལྡོག་གི་འཆར་བའི་ཚེས་རེ་ལ་དགའ་སོགས་ལྔ་ཡོན་ཏན་གསུམ་གྱི་དབྱེ་བས་ཕྱོགས་གཉིས་ལ་ལན་གསུམ་རེ་འཁོར་ཏེ་འཆར་རོ། །བཞི་པ་ལ་གཉིས་ཏེ། ཚེས་སྐར་གཟའ་གསུམ་འཛོམ་པས་དབྱངས་དེ་དང་དེའི་མིང་ཡིག་ཐོག་མ་ཅན་ལ་ངན་པ་དང་། གང་ངན་པའི་འབྲས་བུའོ། །དང་པོ་ནི། དེ་ལྟར་སོགས་ཏེ། དགའ་བ་མིག་དམར་སྨིན་དྲུག་གསུམ། །ཞེས་བྱ་བ་ལ་སོགས་པའོ། །གཉིས་པ་ནི། ཐོག་མའི་མིང་ཡིག་སོགས་སོ། །ལྔ་པ་ནི། གཞན་ཡང་རགས་པའི་སོགས་ཏེ། ཕྲ་བ་ཚེས་ལ་འཆར་ཚུལ་བཤད་པ་དེ་ལས་གཞན་རགས་པ་ནི། རྒྱུད་ལས། ཕྱོགས་དང་ཟླ་བ་བགྲོད་པ་དག་དང་ལོ་དང་དྲུག་ཅུའི་ལོ་རྣམས་ལའང་འདིར་ནི་འཆར་བར་འགྱུར། །ཞེས་གསུངས་པ་ལྟར་ཕྱོགས་ལ་འཆར་བ་ནི། ནག་པ་ནས་བརྩམས་ཏེ་ཟླ་བ་གཉིས་གཉིས་ལ་ཉིན་ཞག་དྲུག་ཅུ་རེ་སྟེ། དེ་དག་ལ་ཉིན་ཞག་བཅུ་གཉིས་རེ་ལ་ཨ་སོགས་དབྱངས་ལྔ་པོ་རྣམས་ལས་རེ་རེ་འཆར་བས་ལོ་རེ་ལ་དུས་དྲུག་ཏུ་བྱས་པའི་དུས་རེ་ལ་དབྱངས་ལྔ་རྫོགས་པར་འགྱུར་རོ། །ཟླ་བ་ལ་འཆར་བ་ནི། ཞག་བདུན་ཅུ་རྩ་གཉིས་རེ་ལ་ཟླ་བར་བྱས་པའི་ཟླ་རེ་ལ་དབྱངས་རེ་རེ་འཆར་བས་ལོ་གཅིག་ལ་དབྱངས་ལྔ་ཚར་གཅིག་འཆར་རོ། །བགྲོད་པ་ལ་འཆར་བ་ནི། ཟླ་བ་དྲུག་དྲུག་ལ་དབྱངས་རེ་འཆར་བས་ལོ་ཕྱེད་དང་། གསུམ་ལ་དབྱངས་ལྔ་ཚར་རེ་རྫོགས་པས་ལོ་དྲུག་ཅུ་ལ་དབྱངས་ཚར་ཉི་ཤུ་རྩ་བཞི་འཁོར་རོ། །ལོ་ལ་འཆར་བ་ནི། ལོ་རེ་ལ་དབྱངས་རེ་འཆར་བས་ལོ་ལྔ་ལ་དབྱངས་ལྔ་ཚར་རེ་དང་། ལོ་བཅུ་གཉིས་ཀྱི་དྲུག་ཅུ་སྐོར་ལ་རྫོགས་སོ། །ལོ་དྲུག་ཅུ་ལ་འཆར་བ་ནི། ལོ་བཅུ་གཉིས་རེ་ལ་དབྱངས་རེ་རེ་ཤར་ཏེ་ལོ་དྲུག་ཅུ་ལ་དབྱངས་ལྔ་ཚར་གཅིག་རྫོགས་པར་འགྱུར་རོ། །དེ་ལྟར་ན་དེ་དག་གི་དབྱངས་དང་པོ་འཆར་བ་ལ་དགའ་བ་སོགས་དང་བྱིས་པ་སོགས་སྔར་ཚེས་ལ་འཆར་བའི་སྐབས་སུ་བཤད་པ་ལྟར་སྦྱར་རོ། །དེ་ལྟར་དབྱངས་འཆར་བ་དང་མཐུན་པར་གསལ་བྱེད་འཆར་ཚུལ་ཡང་ཤེས་པར་བྱ་སྟེ། ཀར་སེང་བུ་མོ་སྲང་སྡིག་གཞུ་སྟེ་ལྷོ་བགྲོད་ཀྱི་ཁྱིམ་ཟླ་དྲུག་ལ། ཀཙ། ཊ། པ། ཏ། ས་པ་ྉྤ་ཥ་ཤ་ྈྐ་་རྣམས་ཀྱི་སྡེ་པ་དྲུག་པོ་རེ་རེ་ལའང་ལྔ་ལྔ་ཡོད་ལ། སྡེ་པ་རེ་རེ་ཞིང་ལྔ་པ་ནས་བགྲངས་པའི་ཡི་གེ་རེ་རེ་ལ་དབྱངས། ཨ་ཨི་རྀ་ཨུ་ལྀ་ཨཾ་སྟེ་དྲུག་དྲུག་སྦྱར་བས་སུམ་ཅུ་རེར་འབྱུང་བས་ཟླ་རེ་སྤྱོད་ལ། དེ་བཞིན་དུ་ཆུ་བུམ་ཉ་ལུག་གླང་འཁྲིག་སྟེ་བྱང་བགྲོད་དྲུག་ལ། སྶ། ཏྟ། པྤ། ཊྚ། ཙྩ། ཀྐ་སྟེ་སྡེ་པ་གོ་ལྡོག་ཉིས་བརྩེགས་དྲུག་པོ་རེ་རེ་ལའང་ཡི་གེ་ལྔ་ལྔ་ཡོད་པ་རེ་རེ་ཞིང་དང་པོ་ནས་བགྲངས་པའི་ཡི་གེ་རེ་རེ་ལ་དབྱངས། ཨཱཿལཱྀ་ཨཱུ་རཱྀ་ཨཱི་ཨཱ་རྣམས་སྦྱར་བའི་སུམ་ཅུ་པ་དྲུག་གིས་ཟླ་བ་རེ་རེ་སྤྱོད་པ་ཡིན་ཏེ། འདིར་ལྷོ་བགྲོད་ལ་དབྱངས་གསལ་ཐམས་ཅད་སྤྲོ་རིམ་དང་། བྱང་བགྲོད་ལ་སྡུད་རིམ་དུ་སྦྱར་བའོ། །གཞན་ཡང་ཞག་རེ་ལ་ཡུད་ཙམ་སུམ་ཅུར་བྱས་ཤིང་། ཡུད་ཙམ་རེ་ལ་དབྱངས་གསལ་དེ་དག་འཆར་བ་སོགས་ཀྱང་གསུངས་ཏེ་མ་སྤྲོས་སོ། །གཉིས་པ་ལྷ་ཆེན་གྱི་བཞེད་པ་ལ་གཉིས་ཏེ། དབྱངས་གསལ་ཚེས་ལ་འཆར་ཚུལ་དང་། ཕྱོགས་ལ་འཆར་ཚུལ་འབྲས་བུ་དང་བཅས་པའོ། །དང་པོ་ལ་གསུམ་སྟེ། དབྱངས་འཆར་ཚུལ་གོང་དུ་བསྟན་པ་ལ་ཁ་འཕངས་ནས་བླང་དོར་བཤད་པ། གསལ་བྱེད་འཆར་ཚུལ། གནས་སྐབས་ལྔ་སོགས་དང་སྦྱར་བའོ། །དང་པོ་ནི། དེང་སང་མཁས་པའི་ཞེས་སོགས་སོ། །གཉིས་པ་ནི། གསལ་བྱེད་ང་ཉ་སོགས་སོ། །གསུམ་པ་ནི། བྱིས་པ་སོགས་ཀྱི་གནས་སྐབས་ལྔ་དང་། འབྱུང་ལྔ་དང་། དེའི་ཡོན་ཏན་ལྔ་རྣམས་ཀྱང་ཕྱོགས་གཉིས་ལ་ལན་གསུམ་སྐོར་དུ་འཆར་ཞིང་། རང་ས་ནས་སོགས་བདུན་པར་ནུབ་པ་ཡང་སྔར་དང་འདྲའོ། །སྦས་པ་གསལ་བྱེད་ལས། ལྔ་ཚན་དང་པོ་ཛནྨ་སྟེ། །གཉིས་པ་ཧ་ནི་ཞེས་བྱའོ། །ལྔ་ཚན་གསུམ་པ་ཨནྟ་ཀ། རིམ་པ་བཞིན་དུ་བཤད་པ་ཡིན། །དེ་ཡི་འབྲས་བུ་མིང་གིས་གསལ། །ཞེས་པའང་སྦྱར་ཞིང་འབྲས་བུ་ནི། ཛནྨ་སྐྱེ་བ། ཧ་ནི་གནས་པ། ཨནྟ་ཀ་འཇིག་པའམ་མཐར་བྱེད་ཅེས་པའི་མིང་གིས་ཤེས་སོ། །གཉིས་པ་ཕྱོགས་ལ་འཆར་ཚུལ་གྱི་བླང་དོར་ནི། ཨ་ཨི་ཨུ་ཨེ་ཨོ་ཡིག་རྣམས། །ཞེས་སོགས་སོ། །དེ་ལྟར་ན་ཚེས་ལ་དབྱངས་འཆར་སོགས་ཏེ་རབ་བྱེད་གཉིས་པའི་འགྲེལ་པའོ། །གསུམ་པ་རེས་གཟའ་ལ་བརྟེན་པའི་བླང་དོར་སྟོན་པའི་རབ་བྱེད་ནི། དེ་ནས་རེས་གཟའ་སོགས་ཏེ། འདི་ལ་གསུམ། སྤྱིར་བསྟན་པ། སོ་སོར་བཤད་པ། གཟའ་འབྲས་ཐོར་བུ་བསྟན་པའོ། །དང་པོ་ལ་གསུམ་སྟེ། འཇམ་དཔལ་རྩ་རྒྱུད་ལས་གསུངས་པ། རྒྱུད་འགྲེལ་ལས་གསུངས་པ། ཁམས་ཀྱི་དབྱེ་བས་ལས་གང་འགྲུབ་པའོ། །དང་པོ་ནི། འཇམ་དཔལ་རྩ་བའི་སོགས་ཏེ། དེ་ལས། འགྲོ་དང་སྦྱིན་སྲེག་གྲུབ་པ་ལ། །ཚེས་གྲངས་གཟའ་ནི་དམ་པར་ལྡན། །ཕུར་བུ་པ་སངས་ཟླ་བ་དང་། །གཟའ་ལྷག་མཆོག་ནི་ལས་ཀུན་ལ། །གཟའ་མཆོག་འདི་དག་རྟག་ཏུ་ནི། །བཞི་པོ་ཚེས་དང་ལྡན་པ་ནི། །ས་སྟེང་འཇིག་རྟེན་ཀུན་ཏུ་ནི། །འགྲོ་བའི་ལས་ནི་འགྲུབ་པར་བྱེད། །ཅེས་དང་། རབ་གནས་རྒྱུད་ལས་ཀྱང་། ཕུར་བུ་ལྷག་པ་པ་སངས་དང་། །ཟླ་བའི་གཟའ་སོགས་ཤེས་བྱ་སྟེ། །འདི་རྣམས་གཟའ་ལྡན་ལས་བྱས་ན། །རབ་ཏུ་གནས་པ་མཆོག་ཏུ་དགེ། ཞེས་ཀྱང་གསུངས་སོ། །གཉིས་པ་ནི། དུས་ཀྱི་འཁོར་ལོ་སོགས་ཏེ། དེ་ལས། དྲག་པོ་རྣམས་ཀྱིས་ཞི་བ་མིན་པ་བྱེད་ཅིང་མཆོག་ཏུ་བདེ་བྱེད་ཞི་བའི་རང་བཞིན་གཟའ་གང་དག །ཅེས་གསུངས་པས་སོ། །གསུམ་པ་ནི། གཞན་ཡང་གཡས་ནས་རྒྱུ་བའི་རླུང་ཞེས་སོགས་སོ། །གཉིས་པ་ནི། དེ་ནས་སོ་སོའི་འབྲས་བུ་བཤད། །ཅེས་པ་ནས། ལྟད་མོ་ཚོང་བྱ་ནོར་སྒྲུབ་སྤང་། །ཞེས་པའི་བར་གྱིས་གཟའ་སོ་སོའི་རིགས་གཟུགས་བླ་གཟའ་ཁམས་ཁ་དོག་བླང་དོར་གྱི་འབྲས་བུ། ཕྱོགས་དང་ཉིན་མཚན་དང་། ཁྱིམ་ལ་སོགས་པའི་སྟོབས་ཏེ། ཕྱི་ནང་གི་རྒྱུད་དང་ནག་རྩིས་གོང་མའི་འབྲས་བཤད་རྣམས་ལས་བཏུས་ཏེ་བཀོད་དོ། །གསུམ་པ་འབྲས་བཤད་ཐོར་བུ་ལ་གསུམ་སྟེ། དངོས་དང་། དབྱངས་འཆར་ལས་བཤད་པའི་ལམ་གྱི་འཁོར་ལོ། ནག་རྩིས་པའི་དར་གུད་སོགས་ཀྱི་འབྲས་བུའོ། །དང་པོ་ནི། ཉི་མ་མིག་དམར་ཞེས་སོགས་སོ། །གཉིས་པ་ནི། གཞན་ཡང་ཤར་ནས་སོགས་སོ། །གསུམ་པ་ནི། གཟའ་རྣམས་སོ་སོའི་ཚེས་ལུགས་སོགས་སོ། །འདི་ལ་མཁས་པ་དག །སྟག །གཟའ་རྣམས་འགྲོས་བཞི་གང་ལ་སྟོབས་ཆེ་བར་གསུངས་པ་དེ་དར་བ་དང་། དེའི་རིམ་པས་འགྲོས་ལྷག་མ་གསུམ་ལ་ཞུད་གུད་གྱོད་པ་སྦྱར་བར་བཞེད་དོ། །གང་ལྟར་ནའང་། ཞི་དྲག་གང་ལའང་དར་བ་བཟང་བ་ནི། དཔེར་ན་དྲག་ལས་ལ། རྗེ་བླ་མའི་གཏེར་བྱོན་འཇོམས་བྱེད་ལས། མིག་དམར་ལ་སོགས་དྲག་པོའི་གཟའ༔དར་ཚེ་ལས་སྦྱོར་བསྒྲུབ་པར་བྱ༔ཞེས་གསུངས་པ་ལྟ་བུའོ། །དེ་བཞིན་དུ་ཁྲོམ་རྩིས་ཀྱི་ལེའུ་བཅུ་དྲུག་པར་གཟའ་ཉི་མ་དང་མིག་དམར་དང་སྤེན་པ་དར་བ་ལ་དམག་ལས་བྱའོ། །ཟླ་བ་དང་པ་སངས་དར་བ་ལ་བག་མ་བླང་ངོ་། །ཕུར་བུ་དང་ལྷག་པ་དར་བ་ལ་ལྟད་མོ་དང་སྟོན་མོ་བྱའོ། །ཞེས་སོ། །དར་བ་ལའང་བྱར་མི་བཏུབ་པའི་སྤང་བྱ་དམིགས་བསལ་ནི། ཉི་མ་གནམ་སྒོ་དར་ཡང་ཤིད་མི་བྱ། །ཟླ་བ་ཀླུ་སྒོ་དར་ཡང་ཧོམ་མི་སྤར། །དམག་དཔོན་གྲི་གཟའ་དར་ཡང་གྲི་མི་འདུལ། །ལྷག་པ་རབ་ཆད་དར་ཡང་དུར་མི་གདབ། །ཕུར་བུ་ཤིང་གཟའ་དར་ཡང་ཟོར་མི་འཕེན། །པ་སངས་ལྕགས་གཟའ་དར་ཡང་ཕྱུགས་མི་སྐྱེལ། །སྤེན་པ་ས་གཟའ་དར་ཡང་ནོར་མི་གཏོང་། །ཞེས་ནག་རྩིས་ཀྱི་གཞུང་ཁ་ཅིག་ལས་བཤད་དོ། །དེ་ལྟར་ན་རེས་གཟའི་འབྲས་བུ་སོགས་ཏེ་རབ་བྱེད་གསུམ་པའི་འགྲེལ་པའོ། །བཞི་པ་སྐར་མའི་བླང་དོར་སྟོན་པའི་རབ་བྱེད་ནི། དེ་ནས་རྒྱུ་སྐར་ཞེས་སོགས་ཏེ། འདི་ལ་གསུམ་སྟེ། སྤྱིར་བསྟན་པ། སོ་སོར་བཤད་པ། གཟའ་སྐར་གྱི་དོན་བསྡུའོ། །དང་པོ་ལ་བཞི་སྟེ། འཇམ་དཔལ་རྩ་རྒྱུད་ལས་གསུངས་པ། མདོ་སྟག་སྣ་ལས་གསུངས་པ། ལས་མཐུན་ཕྱོགས་སྡེབས་ཀྱི་འབྲས་བུ། ལམ་གྱི་ཕྱོགས་སོ། །དང་པོ་ནི། འཇམ་དཔལ་རྩ་བའི་སོགས་ཏེ། རྒྱུད་དེ་ལས། ཐ་སྐར་སྣར་མ་ཉིད་དང་ནི། །རྒྱལ་དང་ཁྲུམས་ནི་སྟོད་སྨད་གཉིས། །ནམ་གྲུ་དང་ནི་ལྷ་མཚམས་དག །བཟླས་པའི་དུས་སུ་རབ་ཏུ་བསྔགས། །འདི་དག་ལ་ནི་སྔགས་རྣམས་འགྲུབ། །གྲུབ་པའི་དོན་ཡང་སྟེར་བར་བྱེད། །སྐར་མ་དག་ནི་འདི་དག་ལ། །དཀྱིལ་འཁོར་ཉིད་ཀྱང་འབྲི་བར་བྱ། །ཞེས་གསུངས་པས་སོ། །གཉིས་པ་ནི། སྟག་སྣའི་རྟོགས་བརྗོད་ཅེས་བྱ་བ་ལ་སོགས་པ་སྟེ། མདོ་དེ་ལས། གཞན་ཡང་རྒྱུ་སྐར་རྣམས་ཀྱི་མིང་གི་ལེའུ་བཤད་པར་བྱ་སྟེ། ཀྱཻ། པདྨའི་སྙིང་པོ་འདི་ལྟ་སྟེ། རྒྱུ་སྐར་བཞི་པོ་འདི་དག་ནི་བདེ་བར་བྱེད་པ་སྟེ། སྨད་གསུམ་དང་སྣར་མའོ། །ཞེས་སོགས་གསུངས་པས་སོ། །གསུམ་པ་ལས་མཐུན་ཕྱོགས་སྡེབས་ཀྱི་འབྲས་བུ་ལ་གཉིས་ཏེ། མི་བརྟན་འགྱུར་བ་སོགས་ཀྱི་འབྲས་བུ་དང་། ཁྲོམ་རྩིས་ལས་གསུངས་པའི་འབྲས་བུའོ། །དང་པོ་ནི། ད་ནི་ལས་མཐུན་ཕྱོགས་སྡེབས་ཀྱི། །ཞེས་སོགས་འདི་ནི་མན་ངག་སྣང་བ་ལས་གསུངས་པ་བཞིན་རིན་ཆེན་ཕྲེང་བར་ཡང་འགོད་པར་མཛད་ལ། འོན་ཀྱང་དེ་གཉིས་ལ་ཚིག་རེ་གཉིས་ཀྱི་ཁྱད་པར་སྣང་བས་གང་དག་དཔྱད་པར་བྱའོ། །གཉིས་པ་ནི། ཁྲོམ་རྩིས་ལེའུ་བརྒྱད་ཅུ་པར་ཞེས་སོགས་ཏེ། འདི་ཡང་རིན་ཆེན་ཕྲེང་བ་ལྟར་བྲིས་ལ། འོན་ཀྱང་ཁོ་བོས་མཐོང་བའི་ཁྲོམ་རྩིས་ལེའུ་བརྒྱད་ཅུ་པ་དུས་ཕྱིས་ཁྱུང་པོས་འགྱུར་བཅོས་བྱས་པ་དེའི་ལེའུ་བཅུ་བདུན་པར། ཆུ་སྟོད་ཁྲུམས་སྨད་ལག་མེ་བཞི། །ཞེས་དང་། མེ་བཞི་ནམ་གྲུ་ཆུ་སྨད་མགོ། ཞེས་པའི་རྐང་པ་གཉིས་པོ་འདི་དང་འདིའི་དོད་ཐུབ་ཀྱང་མེད་ཅིང་། བུ་སྐྱེས་ཞེས་པ་ལ་ཤིད་བྱས་ལོ་ནི་མི་འགོར་འཆི་ཞེས་དང་། ནབས་སོ་དབྱུག་གུ་ས་རི་ཞེས་པའི་ས་རིའི་ཚབ་ཏུ་ལྷ་མཚམས་ཞེས་པ་འབྱུང་སྟེ་དཔེ་ཁུངས་མ་བརྙེད་ན་དཔྱད་དོ། །བཞི་པ་ལམ་ཞུགས་ཕྱོགས་གང་དུ་སྤང་བྱ་ནི། གཞན་ཡང་ལམ་ཞུགས་སོགས་སོ། །གཉིས་པ་སོ་སོར་བཤད་པ་ནི། དེ་ནས་སོ་སོའི་འབྲས་བུ་བཤད། །ཅེས་པ་ནས། བསླུས་བྱེད་གཙང་རྨེ་ཆུང་བར་འགྱུར། །ཞེས་པའི་བར་རོ། །སྐར་འབྲས་འདི་དག་ནི་མདོ་སྟག་སྣ་ལས། རྒྱུ་སྐར་སོ་སོའི་སྐར་མའི་གྲངས་དང་། དབྱིབས་དང་། ཡུད་ཙམ་གྱི་ཚད་དང་། ཁ་ཟས་དང་། ལྷ་དང་། རུས་དང་། ལས་བྱ་བའི་བླང་དོར་དང་། འཆར་བའི་འབྲས་བུ་དང་། ཁྱེའུ་སྐྱེས་པའི་འབྲས་བུ་རྣམས་བཏུས་པའི་སྟེང་དུ་རིན་ཆེན་ཕྲེང་བ་སོགས་འབྲས་རྩིས་ཁུངས་མ་གཞན་ནས་ཁ་བསྐངས་ཏེ་བྲིས་ལ། དེར་མ་ཟད་ཉི་སྙིང་སོགས་མདོ་རྒྱུད་དང་རྒྱ་དཀར་ནག་གི་འབྲས་རྩིས་ཀྱི་གཞུང་ཁུངས་མ་མང་དུ་མཐོང་ཡང་ཐམས་ཅད་བསྡུ་བར་མ་ནུས་སོ། །གཞན་ཡང་རྒྱུ་སྐར་ཉེར་བརྒྱད་ཀྱི་ཞེས་སོགས་ནི་འབྱུང་རྩིས་པ་ལ་གྲགས་པའི་འབྲས་བཤད་དོ། །གསུམ་པ་གཟའ་སྐར་གྱི་འབྲས་བུའི་དོན་བསྡུ་བ་ནི། མདོར་ན་གཟའ་དང་སྐར་མ་གཉིས། །ཞེས་བྱ་བ་ལ་སོགས་པའོ། །དེ་ལྟར་ན་སྐར་མའི་འབྲས་བུ་སོགས་ཏེ་རབ་བྱེད་བཞི་པའི་འགྲེལ་པའོ། །ལྔ་པ་འཕྲོད་ལ་བརྟེན་པའི་བླང་དོར་གྱི་རབ་བྱེད་ནི། གཟའ་སྐར་འཕྲད་པའི་ཞེས་སོགས་ཏེ། འདི་ལ་གཉིས་ཏེ། སྐར་རྩིས་པར་གྲགས་པའི་འཕྲོད་དང་། ནག་རྩིས་པ་ལ་གྲགས་པའི་འཕྲོད་དོ། །དང་པོ་ལ་གཉིས། ཐུན་མོང་པ་དྲང་སྲོང་གི་ལུགས་དང་། ཐུན་མོང་མ་ཡིན་པ་རྒྱུད་འགྲེལ་གྱི་ལུགས་སོ། །དང་པོ་ལ་གཉིས་ཏེ། གཟའ་སྐར་གྱི་འབྱུང་བ་རྩིས་པའི་འཕྲོད་དང་། ཀུན་དགའ་དུས་དབྱིག་སོགས་ཀྱི་འཕྲོད་དོ། །དང་པོ་ནི། ས་གཉིས་འཕྲད་པ་དངོས་གྲུབ་སྦྱོར། །ཞེས་བྱ་བ་ལ་སོགས་པའོ། །འདིར་མཁས་པ་དག །ཤེས། དྲང་སྲོང་གི་ལུགས་ཀྱི་གཟའ་སྐར་འབྱུང་བ་རྩིས་པའི་འཕྲོད་སྦྱོར་འདི་ལ་ཡིད་བརྟན་མི་སྣང་སྟེ། འདིར་བཤད་པའི་གཟའ་སྐར་གྱི་ཁམས་དང་མཐུན་པ་རེ་རེ་ཙམ་ལས་མི་སྣང་བའི་ཕྱིར་རོ། །ཞེས་གསུངས་སོ། །གཉིས་པ་ཀུན་དགའ་དུས་དབྱིག་ཏུ་གྲགས་པའི་འཕྲོད་སྦྱོར་གྱི་འབྲས་བུ་ནི། དེ་ནས་ཀུན་དགའ་ལ་སོགས་པ་ཞེས་སོགས་ཏེ། འཕྲོད་སྦྱོར་འདི་དག་ནི་དྲང་སྲོང་བདུན་གྱིས་བྱས་པས་ཕྱི་རོལ་པའི་རྩིས་ཡིན་ལ། ཁ་ཅིག །འཕྲོད་འདི་རྣམ་དག་མ་ཡིན་ཏེ། རྒྱུད་འགྲེལ་ལས་གསུངས་པ་དང་འགལ་བའི་ཕྱིར་རོ། །ཇི་ལྟར་ན། རྒྱུད་འགྲེལ་ལས་གསུངས་པའི་རྒྱལ་ཕུར་འགྲུབ་སྦྱོར་ལ། འདིར་མདུང་ལ་ནད་ཀྱི་འཇིགས་པ་འབྱུང་། ཞེས་དང་། ཟླ་བ་གྲོ་ཞུན་གྱི་འགྲུབ་སྦྱོར་ལ། མདའ་ལ་སྣ་དང་ཡན་ལག་ཉམས། །ཞེས་དང་། པ་སངས་སྣར་མའི་འཆི་སྦྱོར་ལ། གྲོགས་ཀྱིས་གྲོགས་དང་འཕྲད་པར་བྱེད། །ཅེས་འབྱུང་བས་སོ་ཟེར་རོ། །དེའི་ལན་ལ་ཁ་ཅིག་ན་རེ། དེ་ལྟར་ན་རབ་གནས་ཀྱི་རྒྱུད་ལས་གསུངས་པའི་གཟའ་ཚེས་ཀྱི་འཕྲོད་སྦྱོར་འདི་རྣམས་ཀྱང་རྣམ་དག་མ་ཡིན་ཏེ། རྒྱུད་དེ་ལས། བཅུ་དང་བཅུ་གཅིག་ལ་ཟླ་བ། །ཞེས་བཟང་བར་བཤད་ལ། དུས་འཁོར་དུ་ཚེས་བཅུ་གཅིག་ལ་ཟླ་བ་བྱུང་ན་སྲེག་ཚེས་སུ་གསུངས་པའི་ཕྱིར་རོ་ཞེས་ཟེར་རོ། །གཉིས་པ་ཐུན་མོང་མ་ཡིན་པ་རྒྱུད་འགྲེལ་ལས་གསུངས་པའི་འཕྲོད་སྦྱོར་གསུམ་ནི། ཐུན་མོང་མ་ཡིན་སོགས་ཏེ། འདི་ལ་གསུམ། གཟའ་སྐར་འཕྲད་པའི་འཕྲོད་འགྲུབ་སྦྱོར་དང་། འཆི་སྦྱོར། གཟའ་ཚེས་འཕྲད་པའི་འཕྲོད་སྲེག་ཚེས་སོ། །དང་པོ་ནི། འགྲུབ་སྦྱོར་བདུན་པོ་ཤར་བ་ན། །ཞེས་སོགས་སོ། །གཉིས་པ་ནི། འཆི་སྦྱོར་བདུན་པོ་གང་འཛོམ་དང་། །ཞེས་སོགས་སོ། །གསུམ་པ་ནི། སྲེག་ཚེས་བཅུ་བཞི་གང་ཤར་ཡང་། །ཞེས་བྱ་བ་ལ་སོགས་པའོ། །གཉིས་པ་ནག་རྩིས་པ་ལ་གྲགས་པའི་འཕྲོད་སྦྱོར་ནི། གཞན་ཡང་སྲེག་སྦྱོར་ཞེས་པ་ནས། ཉི་མར་ཤིས་དང་བག་མ་འཛེམ། །ཞེས་པའི་བར་རོ། །འདིར་མཁས་དབང་ལྡུམ་པོ་པའི་གསུང་ལས། བདུད་ཉི། བདུད་རྒྱལ། འཇིག་ཉི། མི་འཕྲོད་པའི་ཉི་མ། མི་མཐུན་པའི་ཉི་མ་རྣམས་ནི་ནག་རྩིས་ལས་བཤད་ལ། སྲེག་སྦྱོར་བཤད་པ་མ་མཐོང་གསུང་ངོ་། །དེ་ལྟར་ན་འཕྲོད་ཀྱི་འབྲས་བུ་སོགས་ཏེ་རབ་བྱེད་ལྔ་པའི་འགྲེལ་པའོ། །དྲུག་པ་སྦྱོར་བའི་བླང་དོར་གྱི་རབ་བྱེད་ནི། དེ་ནས་སྦྱོར་བ་སོགས་ཏེ། འདི་ལ་གསུམ། སོ་སོར་བྲང་སྤྲད་དེ་བཤད་པ། བཟང་ངན་ཕྱོགས་བསྡེབས་ནས་ངོས་བཟུང་བ། ངན་པ་སྤང་བའི་ཆུ་ཚོད་ཀྱི་གྲངས་སོ། །དང་པོ་ནི། རྣམ་སེལ་ལམ་སེལ་མ་གཏོགས་ངན། །ཞེས་སོགས་སོ། །གཉིས་པ་ནི། སྤྱིར་ན་སྦྱོར་བ་ཉེར་བདུན་ལ། །ཞེས་སོགས་སོ། །གསུམ་པ་ནི། ཐོག་མའི་ཆུ་ཚོད་སྤང་བྱ་ལ། །ཞེས་སོགས་ཏེ། འགྲེལ་ཆེན་ལས། འདིར་ཤིན་ཏུ་ལྟུང་བ་དང་། ཡོངས་འཇོམས་དང་། ཁོན་འཛིན་སྤངས་པའི་སྦྱོར་བ་ཐམས་ཅད་ནི་དགེ་བའི་བྱ་བ་ལ་ཤིས་པ་སྟེ། དེ་བཞིན་དུ་སེལ་བ་ལ་ཆུ་ཚོད་གསུམ་སྤང་བར་བྱའོ། །ཟུག་རྔུ་ལའང་ལྔ་སྤང་བར་བྱའོ། །སྐྲངས་པ་དང་ཤིན་ཏུ་སྐྲངས་པ་ལ་དྲུག་གོ། ཀུན་འཇོམས་དང་རྡོ་རྗེ་ལ་དགུའོ་ཞེས་པ་ནི་སྦྱོར་བ་མ་དག་པ་སྤོང་བའི་ངེས་པའོ། །ཞེས་གསུངས་པས་སོ། །དེ་ལྟར་ན་སྦྱོར་བ་ཉི་ཤུ་རྩ་བདུན་སོགས་ཏེ་རབ་བྱེད་དྲུག་པའི་འགྲེལ་པའོ། །བདུན་པ་བྱེད་པའི་བླང་དོར་སྟོན་པའི་རབ་བྱེད་ནི། དེ་ནས་སོགས་ཏེ། འདི་ལ་འཕོ་བྱེད་བདུན་གྱི་འབྲས་བུ་དང་། རྟག་བྱེད་བཞིའི་འབྲས་བུ་གཉིས་ལས། དང་པོ་ནི། གདབ་པར་སྨན་སྦྱོར་རྒྱས་པའི་ལས། །ཞེས་སོགས་རྐང་པས་དམན་པའི་ཚིགས་སུ་བཅད་པ་བདུན་ནོ། །གཉིས་པ་ནི། རྟག་བྱེད་བཞི་ཡི་འབྲས་བུ་ནི། །ཞེས་སོགས་རྐང་པ་གཉིས་དང་བཅས་པའི་ཚིགས་སུ་བཅད་པ་གཉིས་སོ། །དེ་ལྟར་ན། དེ་ཡི་བྱེད་པ་སོགས་ཏེ་རབ་བྱེད་བདུན་པའི་འགྲེལ་པའོ། །བརྒྱད་པ་རྟེན་འབྲེལ་ཡན་ལག་བཅུ་གཉིས་ཀྱི་བླང་དོར་སྟོན་པའི་རབ་བྱེད་ནི། རྟེན་འབྲེལ་སོགས་ཏེ། འདི་ལ་རྒྱུད་འགྲེལ་ལས་གསུངས་པའི་འབྲས་བུ་དང་། རྒྱུད་གཞན་ལས་གསུངས་པའི་འབྲས་བུའོ། །དང་པོ་ནི། མ་རིག་རྣམ་ཤེས་སྐྱེ་མཆེད་དང་། །ཞེས་སོགས་ཏེ། རྒྱུད་ལས། དེ་ལ་མ་རིག་པ་ལ་སོགས་པ་མི་མཉམ་པ་ཡང་བྱ་བ་ཀུན་ལ་དགེ་བར་འགྱུར་བ་སྟེ། །གང་ཞིག་འདུ་བྱེད་ལ་སོགས་མཉམ་པ་རྟག་ཏུ་དབང་དང་བགྲོད་པ་བག་མ་རྣམས་ལ་དགེ་བ་མིན། །ཞེས་དང་། འགྲེལ་ཆེན་ལས། གང་ཞིག་འདུ་བྱེད་ལ་སོགས་པ་མཉམ་པ་ནི་ཞི་བའི་བྱ་བ་ལ་མི་དགེ་བ་སྟེ། ཞེས་དང་། མཉམ་པ་ནི་དྲག་པོའི་ལས་ལ་ཤིས་པར་འགྱུར་རོ། །ཞེས་སོ། །གཉིས་པ་ནི། དེ་ནས་སོ་སོའི་འབྲས་བུ་བཤད། །ཅེས་པ་ནས། ཤར་དང་ནུབ་ཏུ་དོན་གཉེར་སྤང་། །ཞེས་པའི་བར་ཏེ། མཁའ་འགྲོ་རྒྱ་མཚོ་ལ་སོགས་པར། རྟེན་འབྲེལ་འཆར་ཚུལ་དང་། དེ་ལ་བརྟེན་ནས་སྐྱེ་བ་དང་། ལས་དང་། ཕྱོགས་དང་། རྐུན་པོ་དང་། ནད་པ་རྣམས་བརྟག་པ་དང་། གཞན་ཡང་མིག་འགུལ། རྣ་བ་ངུ་བ། མགྲིན་པ་དང་། རྐན་སྤྱི་རྐང་ལག་སོགས་ལུས་ཀྱི་ཆ་ཤས་འགུལ་བ་དང་། འཕྲིག་པ་དང་། སྐྱི་གཡའ་བ་ལ་སོགས་པའི་ལྟས་ལ་བརྟེན་པའི་རྟེན་འབྲེལ་གྱི་མཚན་ལྟས་མང་དུ་བཤད་པ་རྣམས་ལས། གཞུང་འདིར་ནི་ལས་དང་ཕྱོགས་ཀྱི་བླང་དོར་ཙམ་ཞིག་བཀོད་དོ། །དེ་ལྟ་ན་རྟེན་འབྲེལ་ཡན་ལག་སོགས་ཏེ་རབ་བྱེད་བརྒྱད་པའི་འགྲེལ་པའོ། །དགུ་པ་ཉི་མ་བཅུ་གཉིས་ཀྱི་བླང་དོར་སྟོན་པའི་རབ་བྱེད་ནི། དེ་ནས་ཉི་མ་སོགས་ཏེ། འདི་ལ་གཉིས། སོ་སོའི་འབྲས་བཤད་དང་། བདུན་ཟུར་ཕྱོགས་སྡེབས་ཀྱི་འབྲས་བུའོ། །དང་པོ་ནི། སྟག་ལ་གཡང་བློན་རབ་གནས་མཁར། །ཞེས་པ་ནས། བག་མ་ནད་བོང་ཁ་འབྱེད་ངན། །ཞེས་པའི་བར་རོ། །ཁྲོམ་རྩིས་ཀྱི་འཕྲོད་བྱེད་ཉི་མའི་ལེའུ་ལས། སྟག་གི་ཉི་མ་ལ་རབ་གནས་བྱ། ཡོས་ཉི་ལ་གླང་ལུག་གི་ལས། འབྲུག་ལ་ལྟད་མོ་དང་། སྦྲུལ་ལ་དམགརྟ་ལ་རྒྱལ་སར་འདོན་པ། ལུག་ལ་སྟོན་མོ། སྤྲེའུ་ལ་དར་འཕྱར་བ། བྱ་ཉི་ལ་ཇག །ཁྱི་ཉི་ལ་ཧོམ་སྤོར་བ། ཕག་ཉི་ལ་ཁྱེའུ་དགའ་སྟོན་རྣམས་ཀྱང་བཟང་བར་བཤད་དོ། །གཉིས་པ་ནི། སྟག་སྤྲེ་གཉིས་ལ་སོགས་ཏེ་འདི་ཡང་ཁྲོམ་རྩིས་ལས་འབྱུང་ངོ་། །དེ་ལྟར་ན་ཉི་མ་བཅུ་གཉིས་སོགས་ཏེ་རབ་བྱེད་དགུ་པའི་འགྲེལ་པའོ། །བཅུ་པ་ས་བདག་ལ་སོགས་པའི་བླང་དོར་སྟོན་པའི་རབ་བྱེད་ནི། དེ་ནས་སོགས་ཏེ། འདི་ལ་གཉིས། ས་བདག་ཐེབས་བཟློག་གི་འབྲས་བུ་དང་། གནམ་སྒོའི་འབྲས་བུའོ། །དང་པོ་ལ། སོ་སོར་བཤད་པ་དང་། དོན་བསྡུ་བ་གཉིས་ལས། དང་པོ་ནི། ངམས་ཤིང་དགེ་བཤེས་ཆེ་འདོན་གྱི། །ཞེས་པ་ནས། ཀླུ་བཟློག་དུས་སུ་དེ་རྣམས་འཛེམས། །ཞེས་པའི་བར་ཏེ། རྒྱ་ནག་གི་གཞུང་ཁུངས་མ་རྣམས་དང་རིན་ཆེན་ཕྲེང་བ་སོགས་ལས་བཏུས་སོ། །གཉིས་པ་ནི། སྤྱིར་ན་ཉིན་ཚེས་ཞེས་སོགས་སོ། །གཉིས་པ་ནི། དེ་ནས་གནམ་སྒོའི་འབྲས་བུ་ནི་ཞེས་སོགས་ཏེ། འདི་ནི་ཁྲོམ་རྩིས་ཀྱི་ཚེས་གྲངས་ངན་རླུང་གི་ལེའུ་ལས་འབྱུང་ངོ་། །དེ་ལྟར་ན་ས་བདག་ཐེབས་བཟློག་སོགས་ཏེ་རབ་བྱེད་བཅུ་པའི་འགྲེལ་པའོ། །བཅུ་གཅིག་པ་འབྲས་རྩིས་སྣ་ཚོགས་སྟོན་པའི་རབ་བྱེད་ནི། དེ་ནས་ཉེ་བར་སོགས་ཏེ། འདི་ལ་གསུམ། ལོ་བཤད་ལ་དགོས་པའི་འབྲས་རྩིས། ཟླ་བཤད་ལ་དགོས་པའི་འབྲས་རྩིས། ཐོར་བུ་འགའ་ཞིག་བཤད་པའོ། །དང་པོ་ལ་དྲུག་སྟེ། གནམ་ལོའི། ལོ་བདག་གིལོ་སྐར་གྱི། བྱེད་ལོའི། རྒྱལ་བློན་གྱི། སྨེ་བ་དབུས་ཞུགས་ཀྱི་འབྲས་བུའོ། །དང་པོ་ལ་གཉིས་ཏེ། དུས་བསྟན་ལས་བཤད་པའི་ལོ་དྲུག་ཅུའི་འབྲས་བུ་དང་། ལོ་འབྲས་གཞན་མ་བརྗོད་པར་བསྟན་པའོ། །དང་པོ་ནི། བྷ་ར་ཧ་མིས་བྱས་པ་ཡི། །ཞེས་པ་ནས། ཕྱུགས་ཉེས་སྤྱི་ལ་ངན་པར་བཤད། །ཅེས་པའི་བར་རོ། །གཉིས་པ་ནི། གཞན་ཡང་དྲང་སྲོང་ཕུར་བུས་བྱས་པའི་ལོ་དྲུག་ཅུའི་འབྲས་རྩིས་གུར་སྟོན་དཔལ་མཛེས་ཀྱིས་བསྒྱུར་བ་དང་། རྒྱ་ནག་གི་སྟག་སྣ་ཆེ་བ་མདོ་སྡེ་གསང་བར་གྲགས་པ་དང་། རྒྱ་ནག་སྟག་ཆུང་སོགས་ལོ་འབྲས་མང་དུ་མཐོང་མོད་ཀྱི། ཡི་གེ་མངས་ཀྱི་དོགས་ནས་ཐམས་ཅད་གཞུང་འདིར་མ་བརྗོད་ཅིང་འགྲེལ་པས་ཀྱང་འགྲོལ་བའི་འབད་པ་མ་བྱས་ལ། སྤྲོ་ན་དེ་དག་ཏུ་བལྟ་བར་བྱའོ། །གཉིས་པ་ལོ་བདག་གི་འབྲས་བུ་ནི། གྲུབ་མཐའི་ལོ་བདག་གཟའ་འབྲས་ནི། །ཞེས་སོགས་ཏེ་དུས་བསྟན་ལས་བཏུས་པའོ། །གསུམ་པ་ནི། དེ་ནས་ལོ་སྐར་འབྲས་བུ་ནི། །ཞེས་སོགས་ཏེ། འདི་ཡང་དུས་བསྟན་ལས་སོ། །བཞི་པ་ནི། དེ་ནས་བྱེད་པ་ལོ་བདག་ནི། །ཞེས་བྱ་བ་ལ་སོགས་པ་སྟེ། འདི་ནི་སྔོན་གྱི་དུས་འཁོར་བ་ཆེན་པོ་དག་གི་གཞུང་ལས་འབྱུང་ངོ་། །ལྔ་པ་ནི། དེ་ནས་རྒྱལ་བློན་འབྲས་བུ་ནི། །ཞེས་སོགས་སོ། །དྲུག་པ་ནི། སྨེ་བ་དབུས་ཞུགས་འབྲས་བུ་ནི། །ཞེས་སོགས་སོ། །གཉིས་པ་ཟླ་བཤད་ལ་དགོས་པའི་འབྲས་རྩིས་ལ་བཞི་སྟེ། ཁྱིམ་སླེབ་ཀྱི་གཟའ་འབྲས། བུམ་སྟོང་གི་འབྲས་བུ། རྀ་ཥིའི་འབྲས་བུ། དེ་ཝ་ཨུ་མའི་བཞེངས་བཞུགས་ཀྱི་འབྲས་བུའོ། །དང་པོ་ནི། གཞན་ཡང་ཁྱིམ་སླེབ་གཟའ་འབྲས་ནི། །ཞེས་སོགས་སོ། །གཉིས་པ་ནི། དེ་ནས་གཞན་ཡང་བརྗོད་པར་བྱ། །ཞེས་སོགས་ཏེ། དེ་གཉིས་ཀ་གཡུལ་རྒྱལ་བ་ལ་གྲགས་སོ། །གསུམ་པ་ནི། རྀ་ཥི་འཆར་བའི་ཞེས་སོགས་ཏེ་མདོ་ཙམ་མོ། །བཞི་པ་ནི། དེ་ནས་དབང་ཕྱུག་མཇལ་འཕྲད་ཀྱི་ཞེས་སོགས་ཏེ། དེ་ཡང་དབྱངས་འཆར་གྱི་མན་ངག་གོ། གསུམ་པ་ཐོར་བུའི་འབྲས་རྩིས་ནི། ད་ནི་ཐོར་བུ་སོགས་ཏེ། འདི་ལ་གསུམ། རབ་གནས་བྱ་བའི་རྩིས། སྒྲུབ་མཆོད་བྱ་བའི་རྩིས། ལས་བཞི་བྱ་བའི་འབྲས་རྩིས་སོ། །དང་པོ་ནི། རབ་གནས་ཞེས་སོགས་ཏེ་རིག་པ་མཆོག་གི་རྒྱུད་ཀྱི་ཚིག་སྣ་ཅུང་ཟད་བསྡུས་ཏེ་བཀོད་པའོ། །གཉིས་པ་ནི། དཀྱིལ་འཁོར་སྒྲུབ་མཆོད་བྱ་བའི་དུས་ཞེས་སོགས་སོ། །ཁྱད་པར་སྒྱུ་འཕྲུལ་རྒྱས་པ་ལས་ཞེས་སོགས་ཀྱིས་ཚེས་བརྒྱད་དང་སྐར་མ་རྒྱལ་ལ་མཆོག་ཏུ་གསུངས་ཤིང་། ཧེ་རུ་ཀ་གལ་པོའི་རབ་གནས་ཀྱི་བརྟག་པར་ཡང་། དང་པོར་སྐར་མ་རྒྱལ་ཞུགས་ལ། །ཞེས་དང་། གཞན་ཡང་རྗེ་བླ་མའི་གཏེར་བྱོན་འཇོམས་བྱེད་ལས། ཚེས་གཅིག་བརྒྱད་དང་བཅོ་ལྔ་སོགས༔ཟླ་བ་སྐྱེ་དུས་གཟའ་ཕུར་བུ༔དར་ཚེ་སྒྲུབ་པ་མཆོག་ཏུ་ཤིས༔ཞེས་ཡར་ངོའི་ཚེས་གཅིག་སོགས་དང་གཟའ་ཕུར་བུ་དར་བ་ལ་བཟང་བར་གསུངས་སོ། །གསུམ་པ་ནི། གཞན་ཡང་ལས་བཞིའི་འབྲས་བུ་ཞེས་སོགས་སོ། །དེ་ལྟར་ན་ལོ་ཟླ་ཞག་སོགས་མ་ཕྱེ་བའི་སོགས་ཏེ་རབ་བྱེད་བཅུ་གཅིག་པའི་འགྲེལ་པའོ། །བཅུ་གཉིས་པ་གཟའ་ལྔ་གཙོ་བོར་གྱུར་པའི་གཟའ་རྣམས་ཀྱི་བླང་དོར་སྟོན་པའི་རབ་བྱེད་ནི། དེ་ནས་གཟའ་ལྔའི་སོགས་ཏེ། འདི་ལ་བརྒྱད་དེ། ནུབ་པའི་དུས་སྦྱོར་ལ་གཟའ་ཤར་བའི་འཕྲོད། སྐྱེས་སྐར་དང་གཟའ་འཕྲད་པའི་འཕྲོད། གདེངས་ཅན་གྱི་འཁོར་ལོ། གཟའ་འཕྲད་པ་དང་ཕྱིར་བཟློག་ལ་སོགས་པའི་འབྲས་བུ། སྐྱེས་ཁྱིམ་ཞིང་བདག་གི་འབྲས་བུ། ཕན་ཚུན་རྩོད་པའི་ཚུལ། སྟོབས་ཀྱི་ཁྱད་པར། སྟོབས་བཞིའི་འཁོར་ལོ་བཤད་པའོ། །དང་པོ་ནི། ཏཏྐཱ་ལ་ཡི་དུས་སྦྱོར་རམ། །དེ་ལས་གཡས་སྐོར་ཞེས་སོགས་ཏེ། འགྲེལ་ཆེན་ལས། འཆར་བའི་དུས་སྦྱོར་དང་། འཆར་བ་ལས་བདུན་པའི་དུས་སྦྱོར་ལ་གལ་ཏེ་དུས་མེ་ཡོད་ན་ཞེས་སོགས་གསུངས་པའི་དོན་ནོ། །གཉིས་པ་ནི། བརྩི་བྱའི་སྐྱེས་བུ་དེ་གཉིས་ཀྱི་ཞེས་སོགས་ཏེ། འདིར་མཁས་མཆོག་ཁ་ཅིག །སྟག་ཚང་། ཊཱི་ཀ་བྱེད་པ་དག་གིས་འཕྲོད་ཀྱི་དགུ་ཚན་གཅིག་ཉིད་ལ་སྦྱར་མོད་ཀྱི། དེ་ལྟ་ན་དགུ་ཚན་འོག་མ་གཉིས་བཀོད་པ་དོན་མེད་དུ་འགྱུར་བས་དགུ་ཚན་གཉིས་ཀའི་གཉིས་པ་གསུམ་པ་སོགས་ལ་བརྩི་བར་བྱའོ། །ཞེས་གསུངས་སོ། །གསུམ་པ་གདེངས་ཀའི་འཁོར་ལོ་ལ་གསུམ་ལས། འཁྱོག་པོ་བཞི་པའི་སྦྲུལ་ནི། རྩ་གསུམ་ལྡན་པའི་གདེངས་ཅན་ནི། །འཁྱོག་པོ་བཞི་པ་བཀོད་བྱས་ལ། །ཞེས་སོགས་ཏེ། འདིར་རྒྱུད་འགྲེལ་ལས། ནད་པ་དང་རྩོད་པའི་བརྟག་པ་ལས་མ་གསུངས་ཀྱང་། ཁྱོ་ཤུག་དཔོན་གཡོག་འདུ་བ་སོགས་ནི་དབྱངས་འཆར་དང་བསྟུན་པའོ། །འཁྱོག་གསུམ་པ་ནི། རྩ་གསུམ་ལྡན་པ་འཁྱོག་གསུམ་པའི། །ཞེས་སོགས་དང་། འཁྱོག་གཉིས་པ་ནི། ཡང་ན་འཁྱོག་གཉིས་རྩ་གསུམ་པའི། །ཞེས་སོགས་ཏེ། འགྲེལ་ཆེན་ལས། ཟླ་བ་གནས་ན་གང་ཐོག་མར་གཡུལ་གྱི་སར་ཞུགས་པ་དེ་རྣམ་པར་རྒྱལ་བར་འགྱུར་རོ། །རྩའི་ཕྱི་རོལ་གྱི་རྒྱུ་སྐར་གསུམ་པོ་རྣམས་ལ་ཟླ་བ་གནས་ན་གང་ཕྱི་ནས་ཞུགས་པ་དེ་རྣམ་པར་རྒྱལ་བར་འགྱུར་རོ། །ཞེས་སོ། །འདི་གཉིས་ཟླ་བ་སོགས་ཏེ། འཁྱོག་པོ་གསུམ་པ་དང་གཉིས་པའི་གདེངས་ཅན་འཁོར་ལོ་གཉིས་པོ་འདི་གཟའ་ལྔའི་འབྲས་བུ་མིན་ཀྱང་རྒྱུད་ལས་འཁྱོག་བཞི་པ་དང་མཉམ་པོར་གསུངས་པ་བཞིན་འདིར་ཡང་མཉམ་དུ་བྲིས་ཤིང་། གདེངས་ཀའི་འཁོར་ལོ་གསུམ་པོ་དེ་ལ་རྒྱུ་སྐར་བཀོད་ཚུལ་ནི་གཞུང་བཀླགས་པས་འགྲུབ་ཅིང་དཔེའུ་རིས་ཀྱང་བཀོད་ཡོད་པས་རྟོགས་སླ་བའི་ཕྱིར་མ་སྤྲོས་སོ། །བཞི་པ་གཟའ་འཕྲད་པ་ལ་སོགས་པའི་འབྲས་བུ་བརྗོད་པར་བྱ་བ་ལས། སངས་ཕུར་གཉིས་ཉི་མ་ལ་ནུབ་པའི་འབྲས་བུ་ནི། པ་སངས་དང་ནི་ཞེས་སོགས་ཏེ། དེར་མ་ཟད་མཆོག་དགར། པ་སངས་དང་ཕུར་བུ་ཉི་མ་ལ་ནུབ་ན་རྒྱུ་འགྲུལ་དང་ལྟད་མོ་ལ་སོགས་གང་ཡང་མི་བྱའོ་ཞེས་གསུངས་སོ། །ཡང་མདོ་སྡེ་མིག་བཅུ་གཉིས་པར་གསུངས་པའི་གཟའ་འཕྲད་པ་ལ་སོགས་པའི་འབྲས་བུ་བཏུས་པ་ནི། ཟླ་བའི་ཟུར་དང་ཕུར་བུ་འཕྲད། །ཅེས་བྱ་བ་ལ་སོགས་པའོ། །དེ་ལས་གཞན་ཡང་ཕྱིར་ལྡོག་ཅེས་སོགས་ཏེ། ཁྱིམ་གཅིག་ཏུ་བསྡད་པ་དང་། ཕྱིར་ལྡོག་པའི་འབྲས་བུ་ནི། མིག་དམར་ཁྱིམ་གཅིག་བསྡད་པ་ནི། །ཞེས་སོགས་སོ། །ཡང་གཟའ་ཚོགས་པའི་འབྲས་བུ་ནི། པ་སངས་ཕུར་བུ་ཁྱིམ་གཅིག་ཏུ། །ཚོགས་ན་ཞེས་བྱ་བ་ལ་སོགས་པའོ། །ལྔ་པ་སྐྱེས་ཁྱིམ་ཞིང་ལས་ཀྱི་འབྲས་བུ་ནི། གཞན་ཡང་མིག་དམར་སེང་གེའི་ཁྱིམ། །ཞེས་སོགས་བཀླགས་པས་གྲུབ་ལ། འདིར་མཇུག་རིང་གི་ཞིང་ཀརྐ་ཊར་བྱས་པ་ནི་ཁོ་ཟླ་བའི་རིགས་ཅན་ཡིན་པས་ཟླ་བའི་ཞིང་ལ་སྤེན་པ་ཞུགས་ན་རྩོད་པ་རྟོགས་པའི་ཆེད་དེ་མཇུག་རིང་གི་སྒོས་ཀྱི་ཞིང་ཡིན་པའི་གསལ་ཁ་མ་གསུངས་སོ། །དྲུག་པ་རྩོད་ཚུལ་ནི། མིག་དམར་དང་ནི་གཟའ་ལྷག་གཉིས། །ཞེས་སོགས་སོ། །བདུན་པ་སྟོབས་ཀྱི་ཁྱད་པར་ལས། བགྲོད་པ་གང་ལ་སྟོབས་ཆེ་བ་ནི། བྱང་བགྲོད་ཉི་མ་ཞེས་སོགས་སོ། །འགྲོས་བཞི་གང་ལ་སྟོབས་ཆེ་བ་ནི། ལྷག་པ་ཕུར་བུ་མྱུར་འགྲོས་ལ་ཞེས་སོགས་སོ། །ཉིན་མཚན་གང་ལ་སྟོབས་ཆེ་བ་ནི། ཉི་ཕུར་སངས་གསུམ་ཞེས་སོགས་སོ། །ཕྱོགས་གང་ལ་སྟོབས་ཆེ་བ་ནི། ཕུར་སངས་དཀར་པོའི་ཕྱོགས་ལ་ཞེས་སོགས་སོ། །ཁྱིམ་གང་ལ་སྟོབས་ཆེ་བ་ནི། ཟླ་སངས་གླང་སོགས་ཞེས་སོགས་སོ། །དེ་ལྟར་སོགས་ཏེ་འདི་དག་གི་འབྲས་བུ་གཞན་ཡང་མཐོང་མོད་ཀྱི་ཡི་གེས་འཇིགས་སོ། །བརྒྱད་པ་སྟོབས་བཞིའི་འཁོར་ལོ་ནི། གཞན་ཡང་སྟོབས་བཞིའི་སོགས་ཀྱི་འཁོར་ལོ་འགོད་པ། གཟའ་རྣམས་གང་དུ་ཞེས་སོགས་ཀྱིས་འབྲས་བུ་བསྟན་པ་སྟེ། དབང་ཕྱུག་གི་གཞུང་ལས། སྐར་མ་དགེ་དང་མི་དགེ་བ། །མ་ལུས་པ་ནི་རྟོགས་པར་བྱེད། །ཐུར་མ་བདུན་པའི་འཁོར་ལོ་སྟེ། །ངེས་པའི་འབྲས་བུ་སྟོན་པ་ཡིན། །ཤར་ནས་ནུབ་ཏུ་རི་མོ་བདུན། །ལྷོ་ནས་བྱང་དུའང་དེ་བཞིན་ཏེ། །ཐད་ཀར་གདོང་ཚུགས་འབྱུང་བས་ན། །ཤ་ལ་ཀ་ཞེས་གྲགས་པ་ཡིན། །སུམ་ཅུ་དྲུག་གི་རི་མིག་ཅན། །སྨིན་དྲུག་ནས་ནི་བྲ་ཉེའི་བར། །ཤར་ནས་བརྩམས་པའི་སྦྱོར་བ་ཡི། །ཉི་ཤུ་རྩ་བརྒྱད་རིམ་བཞིན་བྲི། །ཆེ་ཞེས་དེ་ལ་སྡིག་པའི་གཟའ། །ལྷན་ཅིག་གནས་ཏེ་འཁྱུད་པ་ནི། །དེ་ཡི་ཐད་ཀའི་སྐར་མ་ལས། །མ་རུངས་གདོང་ནི་ཟུག་པར་ངེས། །འཁྱུད་པའི་མདུན་མ་སོལ་བ་སྟེ། །རྒྱབ་ཏུ་དུ་བ་བཙུན་མོ་ཀྱེ། །དེ་ཡི་ནུས་པ་དེ་ཙམ་སྟེ། །སྔོན་དུ་ཤེས་བྱ་ལྷ་སྲས་མོ། །སོལ་བ་འཁྱུད་པ་དུ་བ་གདོང་། །སྟོབས་བཞིའི་འཁོར་ལོ་ཞེས་བྱའོ། །ཞེས་འབྱུང་ངོ་། །དེ་ལྟར་ན་གཟའ་ལྔའི་སོགས་ཏེ་རབ་བྱེད་བཅུ་གཉིས་པའི་འགྲེལ་པའོ། །བཅུ་གསུམ་པ་དུས་སྦྱོར་གྱི་བླང་དོར་སྟོན་པའི་རབ་བྱེད་ནི། དེ་ནས་དུས་སྦྱོར་སོགས་ཏེ། འདི་ལ་གཉིས། འཆར་བའི་དུས་སྦྱོར་གྱི་འབྲས་བུ་དང་། དྲིས་དབྱངས་ཀྱི་འབྲས་བུའོ། །དང་པོ་ལ་གཉིས་ཏེ། རྒྱུད་ལས་གསུངས་པ་དང་། དབྱངས་འཆར་བ་ལ་གྲགས་པའི་འབྲས་བུའོ། །དང་པོ་ལ། བརྟན་གཡོའི་དུས་སྦྱོར་བརྟག་པ་དང་། དྲི་ཚིག་ལ་བརྟག་པའོ། །དང་པོ་ནི། ལུག་དང་ཀརྐ་སོགས་ཀྱིས་བརྟན་གཡོ་བར་མ་གསུམ་ངོས་བཟུང་བ་སྟེ། རྡོ་རྗེ་མཁའ་འགྲོའི་ཉེར་བདུན་པ་ལས་ཀྱང་། ལུག་དང་སྲང་དང་ཀརྐ་ཊ། །ཆུ་སྲིན་དག་ནི་གཡོ་བར་བརྗོད། །སྡིག་པ་བུམ་པ་སེང་གེ་དང་། ཁྱུ་མཆོག་དག་ནི་བརྟན་པ་སྟེ། །ཉ་དང་གཉིས་སྦྱོར་གཞུ་དང་ནི། །བུ་མོ་རྣམས་ནི་འདྲེས་མའོ། །ཞེས་གསུངས་པ་ལྟར་རོ། །བརྟན་པ་བཞི་ལ་སོགས་ཀྱིས་དེ་དག་གི་འབྲས་བུ་བསྟན་ཏེ། འགྲེལ་ཆེན་ལས། འདིར་འདྲི་བའི་དུས་སུ་གཡོ་བ་རྣམས་ཀྱིས་བྱ་བ་མྱུར་དུ་འགྲུབ་བོ། །བརྟན་པ་རྣམས་ཀྱིས་བརྟན་པའོ། །གཉིས་ཀྱི་རང་བཞིན་རྣམས་ཀྱིས་བྱ་བ་འབྲིང་པོའོ། །ཞེས་གསུངས་པས་སོ། །གཉིས་པ་ནི། ལུག་སོགས་དུས་སྦྱོར་བཅུ་གཉིས་པོ་ཞེས་བྱ་བ་ལ་སོགས་པ་སྟེ། དེ་ཡང་འདིར་དུས་སྦྱོར་མཁན་པོ་ལ་ཕོ་ཉས་འདྲི་བའམ་ལས་གང་གི་འགོ་རྩོམ་པ་དེའི་ཚེ། འཆར་བའི་དུས་སྦྱོར་རེ་རེ་ལའང་ཆུ་ཚོད་ལྔར་བྱས་པའི་རེ་རེ་བཞིན་འབྱུང་བ་ལྔ་དང་དེ་ལ་ཤར་བའི་བདག་པོའི་གཟའ་ལྔ་སྦྱར་ཏེ་གཞུང་བཞིན་ལུང་སྟོན་ནོ། །འདི་ནི་འགྲེལ་ཆེན་ལས། སྣ་བུག་གཡས་གཡོན་གྱི་རླུང་རྒྱུ་བ་ལ་བརྟག་པར་གསུངས་ཀྱང་། རླུང་སྦྱོར་མི་ཤེས་པ་རྣམས་ལ་མི་མཁོ་བར་བསམས་ནས་འདིར་ཁྱིམ་དང་སྦྱར་ལ། གལ་ཏེ་སྣའི་རླུང་ལ་བརྟག་པར་འདོད་ན་འདྲི་དུས་སྣའི་ཞེས་སོགས་ཏེ། ལུག་སོགས་དྲུག་ལ་སྣ་བུག་གཡོན་དང་། གླང་སོགས་དྲུག་ལ་གཡས་ནས་རྒྱུ་བ་ཡིན་ཏེ། འགྲེལ་ཆེན་ལས། དེ་བཞིན་དུ་ཟླ་བ་དྲུག་ལ་ཟླ་བ་དབང་ལྡན་དུ་འགྱུར་ཏེ་བྱང་དུ་ལུག་དང་འཁྲིག་པ་དང་སེང་གེ་དང་སྲང་དང་གཞུ་དང་བུམ་པའི་ཁྱིམ་ལ་གཡོན་གྱི་རྩའི་ཟླ་བ་ཁུ་བའི་ཁམས་བདག་པོའོ། །ལྷོ་རུ་གླང་དང་ཀརྐ་ཊ་དང་བུ་མོ་དང་སྡིག་པ་དང་ཆུ་སྲིན་དང་ཉའི་ཁྱིམ་དུ་ཉི་མ་རྡུལ་གྱི་ཁམས་བདག་པོར་འགྱུར་རོ། །ཞེས་གསུངས་པས་སོ། །གཞན་ཡང་གདན་བཞི་དང་རྡོ་རྗེ་མཁའ་འགྲོ་སོགས་སུ་དུས་སྦྱོར་གྱི་འབྲས་བུ་མང་དུ་གསུངས་ཀྱང་ཡི་གེས་འཇིགས་ཏེ་མ་སྤྲོས་སོ། །གཉིས་པ་དབྱངས་འཆར་བ་ལ་གྲགས་པ་ནི། གཞན་ཡང་སོགས་ཏེ། རྐྱང་འབྲས་དང་དུམ་དྲུག་གི་བྱེད་ལས་སོ། །དང་པོ་ནི། ལུག་གི་དུས་སྦྱོར་ཤར་མ་ཐག །ཅེས་སོགས་ཆག་འགྱུར་ཚིགས་བཅད་དུ་བསྡེབས་པའོ། །གཉིས་པ་ནི། དུམ་དྲུག་དུས་སྦྱོར་བྱེད་ལས་བཤད་ཅེས་བྱ་བ་ལ་སོགས་པའོ། །དེ་ལ་སོགས་པའི་སྤྲོས་པ་ཞེས་སོགས་ཏེ། དབང་ཕྱུག་གིས་རྒྱས་པར་བཤད་མོད་ཀྱང་འདིར་མ་སྤྲོས་སོ། །གཉིས་པ་ནི། གཞན་ཡང་དྲིས་པའི་དབྱངས་གྲངས་ལས་ཞེས་སོགས་ཏེ། འདྲི་བྱེད་ཕོ་ཉས་བརྗོད་པའི་དབྱངས་ཏེ་སྤྱིར་བཏང་ལ་ཚེག་བར་བགྲང་ཞིང་། དམིགས་བསལ་དུ་ངའི་མགོ་ཞེས་པ་ལྟ་བུའི་དྲུག་སྒྲ་རྣམས་ཀྱི་གྱི་གི་ལྟ་བུ་དྲུག་སྒྲ་གཞན་དང་དོན་སོ་སོར་སྟོན་པ་ལ་ཁྱད་མེད་པས་ཐ་དད་དུ་བགྲངས་ལ་གཡས་གཡོན་གྱི་དཀྱིལ་འཁོར་བཅུས་བསྒྱུར། དུས་སྦྱོར་བཅུ་གཉིས་བསྲེ། དུས་སྦྱོར་འཆར་བའི་ཆུ་ཚོད་ལྔས་བསྒྱུར། མཚན་མ་མཁན་པོ་མ་གཏོགས་པའི་དྲུང་གི་སྐྱེ་བོའི་གྲངས་བསྣན་གཟའ་བདུན་གྱིས་དོར་ལྷག་ལ་འབྲས་བུ་བརྟག་པའོ། །དེ་ལྟར་དུས་སྦྱོར་འབྲས་བུ་སོགས་ཏེ་རབ་བྱེད་བཅུ་གསུམ་པའི་འགྲེལ་པའོ། །བཅུ་བཞི་པ་དུས་ལྷ་འཆར་བའི་རབ་བྱེད་ནི། དེ་ནས་དུས་ལྷ་སོགས་ཏེ། འདི་ལ་བཞི་སྟེ། རྣལ་འབྱོར་མ་བརྒྱད་འཆར་བའི་རྩིས། བིཥྚི་འཆར་བའི་རྩིས། དྲག་པོ་འཆར་བའི་རྩིས། ཐུན་ཕྱེད་སྒྲ་གཅན་འཆར་བའི་རྩིས་སོ། །དང་པོ་ལ་གཉིས་ཏེ། རྒྱུད་འགྲེལ་ལས་གསུངས་པའི་དང་། དབང་ཕྱུག་གི་བཞེད་པ་བཀོད་པའོ། །དང་པོ་ནི། རྣལ་འབྱོར་མ་བརྒྱད་འཆར་ཚུལ་ནི། །ཞེས་བྱ་བ་ལ་སོགས་པ་སྟེ་གོ་སླའོ། །འདི་ནི་རྒྱུད་ལས། ཚངས་མ་དྲག་མོ་གཞོན་ནུ་མ་དང་ལག་འགྲོའི་བདག་མོ་ཞེས་སོགས་གསུངས་པའི་དོན་ནོ། །གཉིས་པ་ནི། དབང་ཕྱུག་གིས་ནི་ཤར་ནས་བཟུང་། །ཞེས་སོགས་ཏེ་བཀླགས་པས་གྲུབ་བོ། །འདིར་བརྩི་བྱའི་མིང་ཡིག་ཤར་ན་ཡོད་ཚེ་ཕྱོགས་གཉིས་ཀྱི་ཚེས་གཅིག་ལ་རང་ཕྱོགས་ནས་ནུབ་ཏུ་འགྲོ་བ་དགེ་བ་སོགས་ཀྱང་སྦྱར་དགོས་ཏེ། གཞུང་དེ་ལས། མིང་གི་ཡི་གེ་དབྱངས་ལ་སོགས། །གཅིག་དང་དགུ་ལ་རང་ཕྱོགས་དགེ། ཞེས་སོགས་འབྱུང་བས་སོ། །གཉིས་པ་ལའང་གཉིས་ཏེ། རྒྱུད་འགྲེལ་གྱི་དགོངས་པ་དང་། དབྱངས་འཆར་བའི་འདོད་པའོ། །དང་པོ་ནི། དེ་ནས་བིཥྚི་འཆར་ཚུལ་བཤད་ཅེས་སོགས་ཏེ། རྒྱུད་ལས། བིཥྚི་རྣམས་ནི་དཀར་པོའི་ཕྱོགས་ལ་ཞེས་སོགས་ཀྱི་དོན་ནོ། །མཁས་པ་ཁ་ཅིག །བིཥྚི་ཚེས་ལ་རྒྱུ་བའི་སྒྲ་གཅན་ཡིན་ལ་ནག་རྩིས་པའི་གཞུང་དུ་ས་བདག་ཟིན་ཕུང་ནག་པོ་རྒྱུ་བ་ཞེས་པ་ཡིན་ཟེར་བ་ནི་བྱུང་རྒྱལ་དུ་སྨྲས་པར་ཟད་ཀྱིས། ངེས་པའི་བློ་རྩེ་གཏད་སོ་ཡོད་པ་མ་མཐོང་ངོ་། །གཉིས་པ་ནི། གཞན་ཡང་གཡུལ་ལས་རྣམ་རྒྱལ་ལས་ཞེས་སོགས་ཀྱིས་ཚེས་གང་ལ་ཕྱོགས་སོ་སོ་ནས་མིང་ཐ་དད་པས་འཆར་ཚུལ་ལོངས་སྤྱོད་དང་བཅས་པ་བཤད་དོ། །གསུམ་པ་ནི། དྲག་པོ་འཆར་བའི་ངེས་པ་ནི་ཞེས་བྱ་བ་ལ་སོགས་པས་ཕྱོགས་བརྒྱད་ནས་ཁྱིམ་ཕྱེད་དང་གཉིས་གཉིས་ཀྱི་བར་ལ་འཆར་ཏེ། རྒྱུད་ལས། དྲག་པོ་ཤར་ནས་གཞན་ཕྱེད་དུ་འགྲོ་ཞེས་སོགས་ཀྱི་དོན་ནོ། །ཐང་སྟོན་གྱིས། འདི་ལ་རྒྱུད་གཞན་དུ་ས་བདག་ལྟོ་འཕྱེ་ཞེས་ཀྱང་ཟེར་ཞེས་སྨྲ་བ་མི་འཐད་པར་མཁས་པ་སྔ་མ་རྣམས་ཀྱིས་བཀག་ཟིན་པས་དེ་དག་ལ་ཡིད་འདུན་པར་བྱའོ། །བོད་སྔ་མ་དག་དྲག་པོ་སྒྲ་གཅན་ལ་འདོད་པའང་གྱི་ན་སྟེ། དེ་ལྟར་ན་སྒྲ་གཅན་གྱིས་ལོ་གཅིག་ལ་སྐར་ཁྱིམ་འཁོར་བ་དང་། གཡོན་སྐོར་གྱི་ཁྱིམ་ལ་སྤྱོད་དགོས་པ་སོགས་གནོད་བྱེད་ཆར་ལྟར་འབབ་པར་འགྱུར་རོ། །གཞན་ཡང་དྲག་པོ་འཆར་བའི་སོགས་ཏེ། འགྲེལ་ཆེན་ལས། ཟླ་བའི་དྲག་པོ་དང་། ཕྱོགས་ཀྱི་དྲག་པོ་དང་། ཉིན་ཞག་གི་དྲག་པོ་དང་། དུས་ཀྱི་དྲག་པོ་དང་རྣམ་པ་དྲུག་ནི་དོན་མེད་པ་སྟེ། དེས་ན་མ་གསུངས་སོ། །ཞེས་གསུངས་པས་གཡུལ་རྒྱལ་དུ་དྲག་པོ་འཆར་ཚུལ་གྱི་རྩིས་མང་དུ་བཤད་ཀྱང་འདིར་མ་བརྗོད་དོ། །བཞི་པ་ལའང་གཉིས་ཏེ། རྒྱུད་འགྲེལ་གྱི་དགོངས་པ་དང་། དབྱངས་འཆར་བའི་འདོད་པའོ། །དང་པོ་ནི། དེ་ནས་ཐུན་ཕྱེད་སྒྲ་གཅན་ནི། །ཞེས་སོགས་ཏེ། ཉིན་མོ་ཐུན་ཕྱེད་པ་བརྒྱད་དང་མཚན་མོ་བརྒྱད་དུ་བྱས་ནས་ཐུན་རེ་ལ་རྒྱུ་བའི་ཕྱོགས་ནི། ཐུན་དང་པོ་ལ་ཐོག་མའི་འགོ་རེས་གཟའ་གང་སྤྱོད་པའི་ཕྱོགས་ནས་གཡོན་འཁོར་དུ་བསྐོར་བ་རྣམ་པ་ཐམས་ཅད་པའོ། །འོན་ཀྱང་སྤེན་པའི་རེས་ལ་མཚན་མོ་མཇུག་རིང་གི་ཐོབ་སྐལ་རྩི་བ་ནི། ནང་ལེའི་འགྲེལ་ཆེན་ལས། འདིར་ཕྱི་རོལ་དུ་རེས་གཟའ་བདུན་དང་བརྒྱད་པ་ནི་རིགས་ལྡན་གྱི་ལོངས་སྤྱོད་དོ། །བརྒྱད་པོ་དེ་དག་ནི་ལུས་ཀྱི་སྙིང་གའི་པདྨའི་འདབ་མ་བརྒྱད་པོ་རྣམས་ལ་འགྱུར་ཏེ། ཤར་གྱི་འདབ་མ་ལ་ཉི་མའོ། །མེར་ཟླ་བའོ། །ལྷོར་བཀྲ་ཤིས་སོ། །བདེན་བྲལ་དུ་གཟའ་ལྷག་གོ། ཆུར་ཕུར་བུའོ། །རླུང་དུ་པ་སངས་སོ། །ལུས་ངན་དུ་སྤེན་པའོ། །དབང་ལྡན་དུ་རིགས་ལྡན་གྱི་ལོངས་སྤྱོད་ལ་མཇུག་རིང་སྟེ། ལོངས་སྤྱོད་ཕྱེད་གཞན་ནི་སྒྲ་གཅན་ནོ། །ཞེས་གསུངས་པའི་ཤུགས་ཀྱིས་བསྟན་པར་གོང་མ་དག་བཞེད་དོ། །འདི་དང་སྟོབས་མཚུངས་ཞེས་སོགས་ནི་དུས་ལྷ་གཞན་ལས་འདི་ཉིད་སྟོབས་ཆེ་བར་བསྟན་པ་སྟེ། རྒྱུད་ལས། དཔལ་ལྡན་རྩ་བའི་སྒྲ་གཅན་དོར་ནས་རླུང་དག་ལས་ཀྱང་འདིར་ནི་རྣམ་པར་རྒྱལ་བར་འགྱུར། །ཞེས་རྩ་བའི་སྒྲ་གཅན་གྱི་ནུས་པ་ལ་མ་བརྟགས་པར་འདི་ཁོ་ན་དང་བསྟུན་པས་ཀྱང་རྒྱལ་བར་གསུངས་པས་སོ། །གཉིས་པ་ནི། གཞན་ཡང་དབང་ཕྱུག་འདི་སྐད་ལོ་ཞེས་བྱ་བ་ལ་སོགས་པ་སྟེ། ཟླ་སྟོད་ཉིན་གཡས་སྐོར་དང་མཚན་མོ་གཡོན་སྐོར། ཟླ་སྨད་དེ་ལས་ལྡོག་པ་སོགས་གཞུང་ཉིད་ཀྱིས་ཆེས་གསལ་ལོ། །དེ་ལྟར་ན་རང་རང་དུས་རྒྱུ་བའི་ཞེས་སོགས་ཏེ་རབ་བྱེད་བཅུ་བཞི་པའི་འགྲེལ་པའོ། །བཅོ་ལྔ་པ་འཐབ་མོའི་སྟོབས་ཀྱི་བླང་དོར་སྟོན་པའི་རབ་བྱེད་ནི། དེ་ནས་གཡུལ་རྒྱལ་ཞེས་སོགས་ཏེ། དམག་དཔོན་གྱི་མིང་ལ་བརྟག་པ། སའི་སྟོབས་ལ་བརྟག་པ། རྫོང་གི་འཁོར་ལོའོ། །དང་པོ་ལ་གསུམ་སྟེ། མིང་དབྱངས་ཀྱི་གྲངས་ལ་བརྟག་པ། རིང་ཐུང་ལ་བརྟག་པ། དབུགས་འབྱིན་འཇུག་ལ་བརྟག་པ། སྔ་ཕྱིའི་བརྗོད་པ་ལ་བརྟག་པའོ། །དང་པོ་ནི། ཐོག་མར་མིང་ལ་སོགས་སོ། །གཉིས་པ་ནི། གལ་ཏེ་གྲངས་ཙམ་ཞེས་སོགས་སོ། །གསུམ་པ་ནི། དབུགས་ནི་ནང་དུ་ཞེས་སོ། །བཞི་པ་ནི། ཕོ་ཉས་བརྗོད་པའི་ཞེས་སོགས་སོ། །དེ་དག་ཀྱང་འགྲེལ་ཆེན་ལས། དབྱངས་དམན་འཐབ་མོ་པ་ནི་མཉམ་པའི་གཡུལ་མཚན་མའི་ཞེས་སོགས་གསུངས་པའི་དོན་ནོ། །གཡུལ་རྒྱལ་ལས་ཀྱང་། རྒྱན་གྱི་འཁོར་ལོ་དང་། གཟའི་རིགས་དང་། ཁ་དོག་དང་། དབྱངས་ལ་བརྟག་པ་སོགས་མང་དུ་འབྱུང་ཡང་རྒྱུད་འགྲེལ་ལས་བཀག་པའི་ཕྱིར་གཞུང་འདིར་མ་བཀོད་དོ། །གཉིས་པ་སའི་སྟོབས་བརྟག་པ་ལ་སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས་ལས། དང་པོ་ནི། དེ་ནས་ས་སྟོབས་བརྟག་པ་ནི་ཞེས་སོགས་སོ། །གཉིས་པ་ལ་བཞི་སྟེ། གཟའ་དང་དུས་ལྷ་ལ་བརྟེན་པ། སྐྱེས་སྐར་ལ་བརྟེན་པ། དབྱངས་གསལ་ལ་བརྟེན་པ། རྩ་བའི་སྒྲ་གཅན་གྱི་དུས་བསྟན་པའོ། །དང་པོ་ནི། ཉི་དམར་མཇུག་རིང་སྤེན་པ་སྟེ་ཞེས་སོགས་ཏེ། རྒྱུད་ལས། ཉི་མ་མིག་དམར་མཇུག་རིང་སྤེན་པ་གཡས་སམ་རྒྱབ་ཏུ་ཞེས་སོགས་གསུངས་པའི་དོན་ནོ། །གཉིས་པ་ནི། གཞན་ཡང་རང་གི་ཞེས་སོགས་སོ། །གསུམ་པ་ནི། མིང་ཡིག་འཆར་ཞིང་ཞེས་སོགས་སོ། །བཞི་པ་ལ་བསྟན་བཤད་བསྡུ་གསུམ་ལས། དང་པོ་ནི། ཁྱད་པར་རྩ་བའི་སོགས་སོ། །གཉིས་པ་ནི། རྒྱུ་སྐར་ཉི་ཤུ་རྩ་བདུན་ལ། །ཞེས་སོགས་ཏེ། ལེགས་པར་བརྟགས་ཏེ། རང་ཉིད་ལྟོ་བ་ལ་གནས་ནས་བལྟ་བ་ལ་གདོང་ཕྱོགས་ཏེ་ཟོར་གཏོར་འཕེན་པ་དང་གཡུལ་སྤྲོད་པ་སོགས་བྱས་ན་དུས་མེ་གཡས་དང་གདོང་གཡོན་དུ་སོང་བས་རང་ཉིད་རྣམ་པར་རྒྱལ་བར་འགྱུར་ཏེ། རྒྱུད་ལས། དུས་ནི་འཐབ་མོའི་ས་ལ་མི་བདག་རྣམས་ཀྱི་གཡས་དང་གལ་ཏེ་གཡོན་མིན་དག་ལ་མུན་ཅན་གྱུར། །གཡུལ་དུ་ལྷ་ཡི་མགོན་པོ་དག་ནི་འཕྲོག་བྱེད་དྲག་པོ་དང་བཅས་མི་རྣམས་ཀྱིས་ཀྱང་འཇོམས་པར་འགྱུར། །ཞེས་གསུངས་པས་སོ། །དེ་ཡང་མཚན་མོ་ནི་གདོང་མཇུག་བརྩིས་པའི་མིག་སྐར་དང་ཉིན་མོ་ནི་ཉི་དག་གི་སྐར་མ་ངེས་པར་བྱས་ནས་སྐར་ཁོངས་བཙལ་བས་ཤེས་ལ། དེང་སང་བྱ་སླ་བའི་ཆེད་དུ་རྩ་བར་བཀོད་པའི་འཁོར་ལོ་ལ་བརྟག་པར་མཛད་པས། དེའི་ཁ་བྱང་ནི། དུས་ཚོད་སྟེང་དུ་ཉི་སྐར་བཞག །གདོང་མཇུག་བརྩིས་པའི་སྐར་མ་ཡང་། །གང་ཡོད་སྟེང་དུ་བཞག་བྱས་པས། །མདེའུའི་རྩེ་ཐད་ཐེབས་ཕྱོགས་ཡིན། །ཞེས་བྱའོ། །སའི་སྡོད་སྟོབས་ཀྱིས་དེ་ལྟར་མ་བདེ་བའི་ཚེ་དེང་སང་གི་རྩིས་པ་ཁ་ཅིག་ཐེབས་ལོག་སོགས་ཏེ། བལྟ་བ་ལ་རྒྱབ་བསྟན་ཏེ་ལྟོ་བ་ལ་ཕྱོགས་པས་མདའི་སྟོང་ལ་ཁ་བསྟན་ནས་ལས་བརྩམས་ཀྱང་སྐྱོན་མེད་ཟེར་བ་ནི་མི་རིགས་ཏེ། རྒྱུད་ལས་བལྟ་བའི་སོགས་ཏེ། དྲངས་མ་ཐག་པའི་དུས་ནི་འཐབ་མོའི་སོགས་ཀྱི་ལུང་དེ་དང་འགལ་བའི་ཕྱིར་རོ། །གལ་ཏེ་གདོང་མཇུག་གང་རིགས་ལ་ཁ་བལྟས་སོགས་ཏེ་གཉིས་ཀ་ལ་མི་དགེའོ། །དེ་ལྟར་བརྟགས་ནས་སོགས་ནི་བརྩིས་པའི་ཕན་ཡོན་ནོ། །གསུམ་པ་ནི། བིཥྚི་དྲག་པོ་སོགས་ཏེ། རྒྱུད་ལས། རྣལ་འབྱོར་མ་དང་བིཥྚི་དྲག་པོ་གཟའ་ཚོགས་དང་བཅས་དབྱངས་ནི་འཆར་བ་དག་དང་བཅས་གྱུར་པ། །དེ་རྣམས་ཐམས་ཅད་སྤངས་ནས་རྒྱལ་རིགས་རྣམས་ཀྱིས་སྲིད་གསུམ་རྣམ་རྒྱལ་གཅིག་པུ་གཟུང་བར་བྱ་བ་སྟེ། །གང་གི་ཉི་མ་ཟླ་བ་ཟ་ཞིང་སྐབས་གསུམ་པ་དག་འཇིགས་བྱེད་དྲག་པོའི་གཟུགས་ཅན་མིག་སྨན་མདོག །ཅེས་གསུངས་པས་སོ། །གསུམ་པ་རྫོང་གི་འཁོར་ལོ་ལ་གཉིས་ཏེ། བྱིས་པ་སྐྱོང་གི་རྫོང་གི་འཁོར་ལོ་དང་། སྦྲང་རྩི་སྐྱོང་གི་རྫོང་གི་འཁོར་ལོའོ། །དང་པོ་ནི། གཞན་ཡང་རྫོང་གི་འཁོར་ལོ་ནི་གྲུ་བཞི་ར་བ་སོགས་ཀྱིས་ཙཀྲ་འགོད་ཚུལ། དམག་དཔོན་སྐྱེས་མིང་སོགས་ཀྱིས་རྩི་ཚུལ་དང་འབྲས་བུ་བསྟན་པའོ། །གཉིས་པ་ནི། གཞན་ཡང་རིམ་པ་གསུམ་ལྡན་གྱིས་ཞེས་སོགས་ཀྱིས་ཙཀྲ་འགོད་ཚུལ། རཱ་ཧུ་གང་དུ་གནས་པ་བརྟག་ཅེས་སོགས་ཀྱིས་རྩི་ཚུལ་དང་འབྲས་བུ་བསྟན་ནོ། །དེ་སོགས་སྤྲོས་པ་སོགས་ཏེ། ས་སྟོབས་དང་རྫོང་ལ་མཁོ་བའི་བུམ་པའི་འཁོར་ལོ་སོགས་དབྱངས་འཆར་ལས་འབྱུང་མོད་ཀྱི་འདིར་ནི་མདོ་ཙམ་མོ། །དེ་ལྟར་ན་གཡུལ་རྩིས་སྟོབས་ཀྱིས་སོགས་ཏེ་རབ་བྱེད་བཅོ་ལྔ་པའི་འགྲེལ་པའོ། །བཅུ་དྲུག་པ་ཉི་ཟླ་གཟའ་འཛིན་གྱི་འབྲས་བུ་སྟོན་པའི་རབ་བྱེད་ནི། དེ་ནས་ཉི་ཟླ་སོགས་ཏེ། འདི་ལ་ལྔ། འཇམ་དཔལ་རྩ་རྒྱུད་ཀྱི་ལུགས། མདོ་སྟག་སྣའི་ལུགས། མིག་བཅུ་གཉིས་པའི་ལུགས། རྒན་རྩིས་པའི་ལུགས་ལ་དཔྱད་པ། མ་བརྗོད་པ་ཁ་འཕངས་པའོ། །དང་པོ་ནི། འཇམ་དཔལ་རྩ་བའི་རྒྱུད་ལས་ནི། །ཞེས་བྱ་བ་ལ་སོགས་པའོ། །གཉིས་པ་ནི། སྟག་སྣའི་རྟོགས་བརྗོད་མདོ་དེ་ལས་ཞེས་བྱ་བ་ལ་སོགས་པའོ། །གསུམ་པ་ནི། མདོ་སྡེ་མིག་ནི་བཅུ་གཉིས་པར། །ཞེས་བྱ་བ་ལ་སོགས་པའོ། །བཞི་པ་ནི། སྔ་རབས་རྒན་པོའི་བཞེད་པ་ལ། །ཞེས་སོགས་ཏེ། དང་པོའི་ཞག་ལ་ཆར་བབས་ན། །ཞེས་སོགས་ཀྱི་བརྟག་པ་དེ་དྲང་སྲོང་གི་ལུགས་ཡིན་པས་འཇམ་དཔལ་རྩ་རྒྱུད་ཀྱི་ལུགས་སུ་འདོད་པ་དགག་པའོ། །ལྔ་པ་ནི། གཞན་ཡང་དུས་བསྟན་ཞེས་བྱ་བ་ལ་སོགས་པའོ། །དེ་ལྟར་ན་གཟའ་འཛིན་སོགས་ཏེ་རབ་བྱེད་བཅུ་དྲུག་པའི་འགྲེལ་པའོ། །བཅུ་བདུན་པ་ལྟས་སྣ་ཚོགས་པའི་འབྲས་བུ་སྟོན་པའི་རབ་བྱེད་ལ་གཉིས་ཏེ། ས་གཡོ་བའི་ལྟས་དང་། གློ་བུར་གྱི་ལྟས་སོ། །དང་པོ་ལའང་གསུམ་སྟེ། འཇམ་དཔལ་རྩ་རྒྱུད། མདོ་སྟག་སྣ། མིག་བཅུ་གཉིས་པའི་ལུགས་སོ། །དང་པོ་ནི། དེ་ནས་ས་གཡོས་འབྲས་བུ་བཤད། །ཅེས་བྱ་བ་ལ་སོགས་པའོ། །གཉིས་པ་ནི། སྟག་སྣའི་མདོ་ལས་བཤད་ཚུལ་ནི། །ཞེས་བྱ་བ་ལ་སོགས་པའོ། །གསུམ་པ་ནི། མིག་བཅུ་གཉིས་པའི་མདོ་སྡེ་ལས་ཞེས་བྱ་བ་ལ་སོགས་པའོ། །གཞན་ཡང་དུས་བསྟན་དང་། རྒྱ་ནག་སྟག་སྣ་གཉིས་ཀྱི་ལེའུ་བཅུ་དྲུག་པ་སོགས་ས་གཡོས་ཀྱི་འབྲས་བུ་སྟོན་པའི་གཞུང་མང་དུ་མཐོང་སྟེ་འབྲི་བར་མ་ནུས་སོ། །གཉིས་པ་གློ་བུར་གྱི་ལྟས་ནི། གཞན་ཡང་གློ་བུར་ལྟས་བཤད་བྱ། །ཞེས་བྱ་བ་ལ་སོགས་པ་སྟེ། འདིར་རྡོ་རྗེ་དང་། འཆི་ལྟས་དང་། དུད་པ་དང་། གནམ་ལྕགས་སོགས་མཐོང་བ་ངན་པར་གསུངས་པ་དེ་ནི་རྒྱུད་ཉིད་ཀྱི་གླེང་གཞིར་གཟའི་བྱེ་བྲག་ཏུ་གསུངས་པས་མི་དགེ་བའི་རྟགས་སུ་སྐར་ཡན་གྱི་རྣམ་པར་འཆར་བ་ཡིན་ཞེས་གསུང་ཞིང་། ལྷ་དང་ལྷ་མིན་འཐབ་པ་འཇིག་རྟེན་ནས་མཐོང་བར་གསུངས་པ་ཡང་། མཁས་པའི་དབང་པོ་དག །དྲུག་ཅུ་སྐོར་དགུ་པའི་ཆུ་སྦྲུལ་ཟླ་བ་དགུ་པའི་ཚེས་བརྒྱད་ཀྱི་མཚན་མོ་གཟའ་སྐར་ཐམས་ཅད་སྐར་མདའི་ཚུལ་དུ་ནམ་མཁའ་ལ་འཁྲུག་པ་བྱུང་སྟེ། ལྷ་དང་ལྷ་མིན་འཐབ་པ་ན་ལྷ་འཕམ་དུ་ཉེ་སྟེ་རྒྱལ་ཆེན་རིགས་བཞི་པ་ཐམས་ཅད་གཡུལ་དུ་འཇུག་པ་ཡིན་པ་འདྲ་ཞེས་གསུངས་ལ། རྒྱ་ནག་གི་གཞུང་ཐེམས་ཡིག་བརྒྱད་ཅུ་པར་ནི། སྐར་མདའ་མང་པོ་འཁྲུག་ན་བོད་ལ་ཐན་པ་ཆེན་པོ་འོང་། ཞེས་གསུངས་སོ། །གཞན་རྣམས་ནི་གོ་སླའོ། །རྒྱས་པར་འཇམ་དཔལ་རྩ་རྒྱུད་དང་། །ཞེས་སོགས་ཏེ། འཇམ་དཔལ་རྩ་རྒྱུད་དང་མིག་བཅུ་གཉིས་པའི་མདོ་སྡེ་སོགས་མདོ་རྒྱུད་ཚད་ལྡན་རྣམས་དང་། མདོ་སྡེ་གསང་བ་དང་ཐེམས་ཡིག་སོགས་རྒྱ་རྩིས་པའི་གཞུང་ལྷད་མེད་རྣམས་ནས་ཀྱང་ལྟས་ཀྱི་བྱེ་བྲག་མང་དུ་གསུངས་ཀྱང་ཡི་གེ་མང་གི་དོགས་ནས་འདིར་མ་བྲིས་ཤིང་། གཞན་ཡང་གརྒའི་ལྟས་དང་དུས་བསྟན་སོགས་ཕྱི་རོལ་པའི་ལྟས་ཀྱི་གཙུག་ལག་ཀྱང་མང་དུ་མཐོང་སྟེ། འགྲེལ་ཆེན་གྱི་འཐབ་མོ་པའི་སྟོབས་གསུངས་པའི་སྐབས་ལས། གཟའ་སྐར་ལ་སོགས་པའི་འབྲས་བུའི་ཟོལ་གྱིས་དྲང་སྲོང་རྣམས་ཀྱིས་རྫུན་གྱི་བཀོད་པ་བྱས་པའོ། །ཞེས་སོགས་ཕྱི་རོལ་པའི་དྲང་སྲོང་རྣམས་ཀྱིས་བྱས་པའི་རྩིས་རྣམས་ལ་ངེས་པ་མེད་པར་ཡང་ཡང་གསུངས་པའི་ཕྱིར་འདིར་མ་བཀོད་དོ། །དེ་ལྟར་ན་ས་གཡོས་དང་གློ་བུར་ལྟས་སོགས་ཏེ་རབ་བྱེད་བཅུ་བདུན་པའི་འགྲེལ་པའོ། །བཅོ་བརྒྱད་པ་བྱིས་པ་འཇུག་པའི་རྩིས་ཕྲན་སྟོན་པའི་རབ་བྱེད་ནི། དེ་ནས་བྱིས་པ་ཞེས་སོགས་ཏེ། འདི་ལ་དྲུག །ཟོང་དཀོན་མོད་བརྟག་པ། རྐུན་མ་ངོས་འཛིན་པ། དོན་འགྲུབ་མི་འགྲུབ་བརྟག་པ། སེ་བ་ཙཀྲ། མིག་སྔོན་ལ་གང་འགྲིབ་བརྟག་པ། ཁྱོ་ཤུག་སྔོན་ལ་གང་འཆི་བརྟག་པའོ། །དང་པོ། ཁྱིམ་འཕོའི་དུས་ཀྱི་སོགས་ཀྱིས་རི་མོའི་བསྒྱུར་བགོད་དང་། ལྷག་མས་སོགས་ཀྱིས་འབྲས་བུ་སྟོན་ནོ། །འདིའི་དཔེར་བརྗོད་ནི། མཆོག་དགའ་ལས། ཉི་མ་ཚེས་གཅིག་ལ་ལུག་གི་ཁྱིམ་དུ་འཕོ་བའི་ཚེ་སྐར་མ་ཐ་སྐར་དང་། རེས་གཟའ་ཟླ་བ་ཡོད་པ་ལྟ་བུ་ལ་གསེར་དཀོན་མོད་འབྲི་ན། རྒྱུ་སྐར་དབྱུག་གུ་དང་པོ་ཡིན་པས་གཅིག་དང་། ཚེས་གཅིག་བསྲེས་པས་གཉིས་འོང་། གཟའ་ཟླ་བ་གཉིས་པ་ཡིན་པས་དེ་གཉིས་ཀྱིས་བསྒྱུར་བས་བཞིར་འགྱུར། དེ་ལ་གསེར་གྱི་མིང་ཡིག་དང་པོའི་གསལ་བྱེད་ལ་ག་ཡོད་པས། དེ་ཡན་ལ་གསལ་བྱེད་གསུམ་ཡོད་པ་དེ་བསྲེས་པས་བདུན་དུ་འགྱུར། དེ་ལ་གསུམ་གྱིས་བགོ་བ་ལྟ་བུ་ཡིན་པར་ཤེས་པར་བྱ། ཞེས་གསུངས་པས་སོ། །གཉིས་པ་ནི། གཞན་ཡང་རྐུན་མ་ངོས་འཛིན་ནི། །སོགས་ཀྱིས་རི་མོའི་བསྒྱུར་བགོད་དང་། གཅིག་སོགས་རྒན་ནས་སོགས་ཀྱིས་འབྲས་བུའོ། །དེ་ཡང་བོད་སྐད་ལ་དབྱངས་ལ་སྤྱིར་ཚེག་བར་འདྲེན་མོད་ཀྱི། འོན་ཀྱང་ལག་པའི་པདྨའི་ཟེའུ་འབྲུ་ཞེས་པ་ལྟ་བུའི་ཚེག་བར་གཅིག་ལའང་འདོན་ཐེངས་གཉིས་བྱེད་དགོས་པ་རྣམས་དབྱངས་གཉིས་སུ་བགྲང་ཞིང་། གསལ་བྱེད་ལ་ནི་སྔོན་འཇུག་མིང་གཞི་རྗེས་འཇུག་ཡ་བཏགས་སོགས་འདོགས་དང་བཅས་པ་སོ་སོར་བགྲང་དགོས་པ་ཡིན་ཏེ། དཔེར་ན། དོན་གྲུབ་དང་། བཀྲ་ཤིས་དར་ཟེར་བ་གཉིས་ཀྱི་མིང་ཡོད་ཅིང་། རྒན་གཞོན་ཡང་རིམ་པ་ལྟར་ཡིན་པའི་མི་གཉིས་པོ་གང་རུང་ཞིག་གིས་བརྐུས་ནས་སུ་ཡིན་མ་ཤེས་ན། དོན་གྲུབ་ལ་དབྱངས་ཨོ་དང་ཨུ། གསལ་བྱེད་ད་ན་ག་ར་བ་སྟེ་ལྔ་ཡོད་ལ། བཀྲ་ཤིས་དར་ལ་དབྱངས་ཨ་དང་ཨི་དང་ཨ། གསལ་བྱེད་བ་ཀ་ར་ཤ་ས་ད་ར་ཏེ་བདུན་ཡོད་པས་དེ་གཉིས་ཀྱི་དབྱངས་བསྡོམས་པས་ལྔ་དང་། གསལ་བྱེད་བསྡོམས་པས་བཅུ་གཉིས་འོང་ལ། བཅུ་གཉིས་པོ་གཉིས་ཀྱིས་བསྒྱུར་ལ་དབྱངས་ལྔས་ཕྲི། སྐྱེས་བུའི་གྲངས་གཉིས་གཉིས་ཀྱིས་བགོས་པས་ལྷག་མར་གཅིག་འོང་བས་དེ་ལ་བརྟགས་པ་ན་གྲངས་ཀྱི་རིམ་པས་རྒན་པ་དོན་གྲུབ་དང་འགྲིག་པས་དེས་བརྐུས་པར་ལུང་སྟོན་པ་བཞིན་ནོ། །ཡང་དེ་བས་ཀྱང་ཆེས་ངེས་པའི་བརྟག་པ་ནི། དེས་ཀྱང་གཅེར་འཕོག་མ་ཤེས་ན། །ཞེས་སོགས་ཏེ། མིང་དུ་ཡོད་པའི་དབྱངས་ཨ་ལ་གཅིག །ཨི་ལ་གཉིས། ཨུ་ལ་གསུམ། ཨེ་ལ་བཞི། ཨོ་ལ་ལྔ་བགྲང་ཞིང་། གསལ་བྱེད་ཀ་ལ་གཅིག །ཁ་ལ་གཉིས་སོགས་རིམ་པས་བགྲང་ཞིང་རེ་རེ་བྲིས་ལ་ཆོ་ག་སྔར་ལྟར་བྱས་པས་རྐུན་པོ་གང་ཡིན་ཐེ་ཚོམ་མེད་པར་ཤེས་ལ། དེ་ཡང་བརྟག་བྱའི་མིང་དུ་ཡོད། དེའི་ནང་དུ་རྐུ་མཁན་དེ་ཉིད་ཡོད་པ་ནི་ངེས་པར་དགོས་སོ། །གསུམ་པ་ནི། དེ་ནས་དོན་ཆ་བརྟག་པ་ནི། །ཞེས་སོགས་ཀྱིས་རི་མོའི་བསྒྱུར་བགོད་དང་། ལྷག་མ་ལ་སོགས་ཀྱིས་འབྲས་བུའོ། །འདིར་གསལ་བྱེད་བགྲང་ཚུལ་བཤད་མ་ཐག་པ་བཞིན་ཏེ། དཔེར་ན་གཙང་དུ་འགྲོ། དོན་འགྲུབ་བམ་ཞེས་པ་ལྟ་བུ་ལ། ག་ཡན་ལ་གསུམ། ཙ་ཡན་ལ་བཅུ་བདུན། ང་ཡན་ལ་བཞི། ད་ཡན་ལ་བཅུ་གཅིག་སྟེ་དེ་རྣམས་བསྲེས་པས་སོ་ལྔ་འོང་། དེ་ལ་གསུམ་གྱིས་བགོས་པས་ལྷག་གཉིས་ལུས་པས་དོན་ཆ་འབྲིང་པོར་ལུང་སྟོན་དགོས་པ་བཞིན་ནོ། །བཞི་པ་ནི། གཞན་ཡང་སེ་བ་ཙཀྲ་བཤད། །ཅེས་སོགས་ཀྱིས་གཟུགས་བྲི་ཞིང་སྐྱེས་མིང་གི་སྐར་མ་འགོད་ཚུལ་དང་། བརྩི་ཡུལ་སྐྱེས་མིང་སོགས་ཀྱིས་བླང་དོར་གྱི་འབྲས་བུ་སྟོན་ནོ། །ལྔ་པ་ནི། དེ་ནས་གཞན་ཡང་སྐྱེས་བུ་ཡིས། །ཞེས་སོགས་ཏེ། གསལ་བྱེད་ཀྱི་སྡེ་པ་རེའི་ཡི་གེ་དང་པོ་དང་གསུམ་པ་མི་མཉམ་པ་དང་། གཉིས་པ་དང་བཞི་པ་མཉམ་པར་བརྩི་སྟེ་གོ་སླའོ། །དྲུག་པ་ནི། དེ་ལས་གཞན་ཡང་སྐྱེས་བུ་ཡི། །ཞེས་སོགས་ཀྱིས་རི་མོའི་ལས་དང་། གཅིག་དང་ཐིག་ལེ་སོགས་ཀྱིས་འབྲས་བུ་སྟོན་ནོ། །འདིར་གསལ་བྱེད་བགྲང་བའི་ཚེ་བརྩེགས་མ་གཞན་རྣམས་བགྲང་ལ་ཡ་བཏགས་དང་ར་བཏགས་རྣམས་མ་བགྲངས་ན་བདེན་པར་སྣང་སྟེ། དོན་གྱིས་མི་ཐོབ་ཀྱང་མྱོང་རྩིས་སོ། །ཡང་དེའི་བརྟག་ཚུལ་ལུགས་གཅིག་ལ། གཞན་ཡང་དེ་ཡི་ཆོ་ག་བཤད་ཅེས་སོགས་ཀྱིས་རེའུ་མིག་འགོད་ཚུལ། དེ་རྗེས་ཁྱོ་ཤུག་མིང་ཡིག་རྣམས། །ཞེས་སོགས་ཀྱིས་རི་མོའི་བསྒྱུར་བགོད་བྱ་ཚུལ་སྟེ། དེ་ཡང་ཁྱོ་ཤུག་གི་མིང་གི་དབྱངས་གསལ་གྱི་གྲངས་རྣམས་བརྒྱད་ཀྱིས་བསྒྱུར་བ་དང་ཀ་སྡེ་རྣམས་ལྔས་བསྒྱུར་བ་སོགས་སྟེང་མའི་སྡེ་ཚན་གར་གཏོགས་ཀྱི་འོག་གི་གྲངས་སོ་སོར་བསྒྱུར་དགོས་ཤིང་། བོད་ཡིག་ལ་ཅ་ཆ་ཇ་ཞ་ཟ་འ་རྣམས་གསལ་བྱེད་ཀྱི་སྡེ་ཚན་གང་དུ་གཏོགས་ཤེ་ན། དང་པོ་གསུམ་ནི་ཙ་ཚ་ཛ་གསུམ་དང་སྦྱར་ཞིང་། ཕྱི་མ་གསུམ་ནི་རིམ་པར་ཤ་ས་ཡ་གསུམ་དང་སྦྱོར་རོ། །ལྷག་མར་མཁའ་གཟུགས་སོགས་ཀྱིས་འབྲས་བུ་སྟོན་ནོ། །ཕྱོགས་གང་ལ་འཆི་ཞེ་ན། གཞན་ཡང་མིང་ཡིག་དང་པོ་ལ་ཞེས་སོགས་ཏེ་བཀླགས་པས་གྲུབ་བོ། །དེ་ཡང་གོང་དུ་མིང་ཡིག་བགྲང་ཚུལ་གྱི་དཔེར་བརྗོད་རྣམས་བོད་དང་བསྟུན་པ་སྟེ། ཡུལ་གཞན་དང་གཞན་དུ་དེ་དང་དེའི་སྐད་ཀྱི་དབྱངས་གསལ་དང་བསྟུན་དགོས་སོ། །དེ་ལྟར་ན་འདི་དག་ལྷ་ཆེན་སོགས་ཏེ་རབ་བྱེད་བཅོ་བརྒྱད་པའི་འགྲེལ་པའོ། །བཅུ་དགུ་པ་ངོ་ལོན་གྱི་ཆོ་ག་བཤད་པའི་རབ་བྱེད་ལ་བསྟན་བཤད་བསྡུ་གསུམ་ལས། དང་པོ་ནི། འབྲས་བུ་རྣམས་བཤད་པའི་རྗེས་དེ་ནས་ངོ་ལོན་ཆོ་ག་བཤད་ཅེས་ཁས་བླང་ངོ་། །གཉིས་པ་ལ་གསུམ་སྟེ། སྤྱིའི་ངོ་ལོན་གྱི་ཆོ་ག །བྱེ་བྲག་སོ་སོའི་ངོ་ལོན་གྱི་ཆོ་ག །ནད་པའི་མཁྱུད་སྤྱད་དོ། །དང་པོ་ནི། འཁོར་ལོ་མུ་ཁྱུད་བཅུ་གཅིག་བསྐོར། །ཞེས་སོགས་ཚིགས་སུ་བཅད་པ་གསུམ་གྱིས་འཁོར་ལོ་བྲི་ཚུལ། རྡོ་རྗེ་ཤུགས་ཀྱི་སོགས་རྐང་པ་ལྔས་རབ་གནས་བྱས་ཏེ་གདགས་ཚུལ། གཟའ་སྐར་དུས་སྦྱོར་སོགས་ཀྱིས་འཁོར་ལོའི་ཕན་ཡོན་ནོ། །འཁོར་ལོའི་བྱ་བ་དེ་ཙམ་མི་ནུས་ན། བསྡུ་ན་རྣམ་བཅུ་དབང་ལྡན་གྱི་ཞེས་སོགས་ཏེ་དེ་ཙམ་གྱིས་སྐབས་དོན་འགྲུབ་བོ། །གཉིས་པ་བྱེ་བྲག་སོ་སོའི་ངོ་ལོན་གྱི་ཆོ་ག་ལ་གཉིས་ཏེ། ཐུན་མོང་མ་ཡིན་པའི་ཆོ་ག་དང་། ཐུན་མོང་པ་གཞུང་གཞན་གྱི་ལུགས་སོ། །དང་པོ་ནི། གཞན་ཡང་གཟའ་ཡུམ་ལ་སོགས་པ། །ཞེས་པ་ནས། གཏོར་མ་སྦྱིན་པས་དགེ་བར་འགྱུར། །ཞེས་པའི་བར་གཞུང་བཀླགས་པས་གྲུབ་བོ། །དེ་ལྟ་ནའང་གཟུངས་སྔགས་རྣམས་དང་སོ་སོའི་གཏོར་མ་སྦྱིན་པའི་ཆོ་ག་སོགས་སྐབས་འདི་ཉིད་དུ་བྲིས་ན་མཁོ་མོད་ཀྱི། འོན་ཀྱང་ཡི་གེ་ཉུང་ངུ་ཞིག་གིས་ནི་སྐབས་དོན་མི་འགྲུབ་ལ། ཅུང་ཟད་ཕྱེ་སྟེ་བཤད་ན་ནི་ཧ་ཅང་ཡང་མང་བར་འགྱུར་གྱིས་དོགས་ནས་སྤྲོས་པ་བསྐྱུངས་སོ། །འདི་ཡན་ཆད་ཀྱི་ངོ་ལོན་གྱི་ཆོ་ག་འདི་ཕུག་ལུགས་པ་སྤྱི་ལ་མ་གྲགས་ཀྱང་། མཁས་དབང་ལྡུམ་པོ་བའི་ཞལ་ནས་འདི་ནི་ཁོ་བོ་ལ་གྲུབ་ཆེན་ཀུན་དགའ་རྣམ་རྒྱལ་པས་སྩལ་བའི་གདམས་པའོ་ཞེས་གཅེས་པར་མཛད་ལ། བདག་གིས་མན་ངག་སྣང་བའི་ལུགས་རྒྱ་སྟོན་ནུབ་རི་བ་ལ་ཡང་ཐོས་སོ། །གཉིས་པ་ནི། ཞར་བྱུང་གཞུང་གཞན་ལས་བྱུང་བའི། །ཞེས་པ་ནས། གཟའ་ཡུམ་ཚེ་གཟུངས་གདོན་པར་བྱ། །ཞེས་པའི་བར་ཆོས་རྗེ་བསོད་ནམས་ཚེ་འཛིན་གྱི་ཕྱག་དཔེ་ངོ་མ་ལས་བྱུང་བ་ལྟར་གཞུང་འདིར་བཀོད་པའོ། །དེ་ཡང་གཟའ་སྐར་ས་བདག་གི་བཅོས་ཐབས་འདི་དག་གི་ཁུངས་ནི་ཐེམས་ཡིག་བརྒྱད་ཅུ་པ་སོགས་རྒྱ་ནག་གི་གཞུང་ཁུངས་མ་རྣམས་ལས་བཏུས་ལ། དབྱངས་འཆར་བའི་ལུགས་ཀྱང་འགའ་རེ་སྣང་ངོ་། །ཁྱད་པར་དྲག་གཟའི་གནོད་པ་བཞི་བཅོས་ཐབས་འདི་ཉིད་སེང་གེ་གོ་ཆས་མཛད་པའི་མན་ངག་ཐར་ལོའི་འགྱུར་ལས་ཕྱུང་བ་སྟེ་རྒྱས་པར་གཞུང་དེ་ཉིད་དུ་བལྟའོ། །གཞན་ཡང་དྲང་སྲོང་གརྒའི་ལྟས་ཀྱི་གཙུག་ལག་གི་ལེའུ་བཅོ་ལྔ་པར་ལྟས་ལས་གནོད་པར་གྱུར་པའི་ངོ་ལོན་གྱི་ཆོ་ག་དང་། ལྷ་ཆེན་གྱི་གཞུང་ཡིག་ཕྲན་དང་བཅས་པ་ལས་ཀྱང་མང་དུ་འབྱུང་སྟེ་ཡི་གེས་འཇིགས་པས་འདིར་མ་བྲིས་སོ། །གསུམ་པ་ནད་པའི་མཁྱུད་སྤྱད་ནི། དེ་ནས་མདོ་སྡེ་སྟག་སྣ་ལས། །ཞེས་པ་ནས། ཚུལ་ཁྲིམས་སྦྱར་བས་མཐོ་རིས་འགྲོ། །ཞེས་པའི་བར་མདོ་སྡེ་སྟག་སྣར་གསུངས་པ་ཉིད་ཚིགས་བཅད་དུ་སྡེབས་པའོ། །གཞན་ཡང་རྒྱ་ནག་རྩིས་གཞུང་སོགས་ཏེ། ནད་པ་རྣམས་ཀྱི་དོན་དུ་རྒྱ་རྩིས་པའི་ལུགས་ཀྱི་གཟའ་སྐར་ཚེས་གྲངས་སོགས་ཀྱི་མཁྱུད་སྤྱད་དང་། དྲང་སྲོང་གིས་བྱས་པའི་སྐར་མའི་མཁྱུད་སྤྱད་སོགས་ཅི་རིགས་པའང་བྱའོ། །གསུམ་པ་བསྡུ་བ་ནི། མདོར་ན་མང་དུ་སྨོས་པས་ཅི་ཞིག་བྱ་སྟེ། འདི་ལྟར་དགེ་བའི་རྩ་བ་ཅི་བགྱིས་ཀྱང་མཐར་ཐུག་རྫོགས་པའི་སངས་རྒྱས་ཀྱི་འབྲས་བུ་གྱ་ནོམ་པ་ཡང་སྨིན་པར་འགྱུར་ན། གནས་སྐབས་ཀྱི་བདེ་འབྲས་རྣམས་འབྱུང་བ་ལྟ་སྨོས་ཀྱང་ཅི་དགོས། ཁྱད་པར་དུ་དེའི་ཡང་ཡན་ལག་ཏུ་གྱུར་པ་འགལ་རྐྱེན་ཕྲ་མོ་ཙམ་སེལ་བར་མི་ནུས་པ་ཅི་ཞིག་ཡོད་དེ་ཅི་ཡང་མེད་དོ། །འོན་ཀྱང་སྔར་སྨོས་པ་ལྟར་གང་ལ་གང་བསྔགས་པའི་གཉེན་པོའི་ཆོ་ག་མཆོད་སྦྱིན་ལ་སོགས་པ་དེ་དག་གཙོ་བོར་བྱ་བ་ཉིད་གཅེས་ཏེ། རྟེན་འབྲེལ་གྱི་ནུས་པ་ཐ་དད་པ་ནི་བསམ་གྱིས་མི་ཁྱབ་པའི་ཕྱིར་རོ། །གཞན་ཡང་རྒྱལ་བའི་གསུང་རབ་སོགས་ཏེ། ཧེ་རུ་ཀ་གལ་པོའི་བརྟག་པ་དྲུག་པར་སྒྲུབ་པའི་སྔོན་དུ་བྱ་བའི་འཕྲིན་ལས་གསུངས་པའི་སྐབས་སུ། འབྱུང་པོ་རྣམས་ལ་གཏོར་མ་གཏང་། །གསང་བའི་དོན་གྱི་ལས་རྣམས་བྱ། །ཐུབ་པའི་བཀའ་རྣམས་བསྒྲག་པ་དང་། །བདེ་གཤེགས་སྐུ་གདུང་གདབ་པ་དང་། །སྲོག་ཆགས་ཚེ་ཡང་བསྐྱབ་བར་བྱ། །ལམ་འཕྲང་དག་ཀྱང་ལེགས་པར་འཆོས། །སངས་རྒྱས་སྐུ་གསུང་རྣམ་པར་དག །དོན་དམ་སྒྲུབ་དང་བསྟན་པའི་ཆོས། །ཉན་རང་བྱང་ཆུབ་སེམས་དཔའ་རྣམས། །མཆོད་པས་མཉེས་པར་བྱ་བ་དང་། །ཞེས་སོགས་གསུངས་པ་ལྟར་རིམ་གྲོའི་དགེ་བ་ལ་འབད་པར་བྱས་ན། སྔོན་གྱི་ལས་སྟུག་པོ་སྨིན་པའི་རྒྱུ་ཚོགས་གྲངས་ཚང་བ་ནི་རྐྱེན་གྱིས་སེལ་མི་ནུས་པའི་ཕྱིར་མ་གཏོགས་ལ། དེ་ལས་གཞན་དུ་གཟའ་དང་སྐར་མ་སྦྱོར་བྱེད་དང་དུས་ལྷ་འབྱུང་པོའི་གནོད་གདུག་རྣམས་མ་ལུས་པ་ཞི་ཞིང་བཟློག་པར་འགྱུར་བ་ཉིད་དེ། འགྲེལ་ཆེན་ལས། གཟའ་ཚེས་རྒྱུ་སྐར་སྦྱོར་བ་དང་། །བྱེད་པ་ཉིད་དང་དུས་སྦྱོར་དང་། །གདུག་པའི་གཟའ་སྐར་འདི་དག་ནི། །བསོད་ནམས་བྱེད་པ་རྣམས་ལ་དགེ། ཞེས་སོ། །དེ་ལྟར་ངེས་པར་ཡང་། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ལ། །ཞེས་གསུངས་པ་ལྟར་ཆོས་ཀུན་རྟེན་ཅིང་འབྲེལ་བར་འབྱུང་བའི་རང་བཞིན་ཅན་དུ་གྲུབ་པའི་ཕྱིར་དང་། རྟེན་འབྲེལ་དེ་ཡང་རང་སེམས་ཀྱི་རྣམ་པར་རྟོག་པས་བཏགས་པ་ཙམ་ལས་གཞན་གང་ནའང་ཡོད་པ་མ་ཡིན་པའི་ཕྱིར་ཏེ། ལང་གཤེགས་ལས། རང་བཞིན་མེད་ཅིང་རྣམ་རིག་མེད། །དངོས་པོ་མེད་ཅིང་རྟེན་གཞི་མེད། །འདི་དག་རོ་བཞིན་བྱིས་པ་ནི། །ལོག་པའི་ཤེས་པ་ཅན་གྱིས་བཏགས། །ཇི་ལྟར་ལོག་པས་སྐྲ་ཤད་འཛིངས། །སྐྱེ་བོ་རབ་རིབ་ཅན་གྱིས་མཐོང་། །དེ་བཞིན་དངོས་པོར་རྣམ་རྟོག་འདི། །ལོག་པར་བྱིས་པ་རྣམས་བཏགས་པ། །སྲིད་པ་གསུམ་ནི་བཏགས་པ་ཙམ། །ཞེས་གསུངས་པས་སོ། །དེ་ལྟ་བས་ན་ཐམས་ཅད་མཁྱེན་པ་བཅོམ་ལྡན་འདས་རྫོགས་པའི་སངས་རྒྱས་སྲས་དང་བཅས་པ་རྣམས་ཀྱིས་འགྲོ་བ་སོ་སོའི་རྣམ་པར་རྟོག་པ་དེ་སྦྱོང་བའི་གཉེན་པོར་དྲང་ངེས་ལས་བརྩམས་པའི་ཆོས་ཀྱི་རྣམ་གྲངས་མཐའ་ཡས་པའི་སྒོ་ནས་ཕན་གདགས་པར་མཛད་དོ། །དེ་ཡང་དབུ་མ་རིན་ཆེན་སྒྲོན་མ་ལས། རྒྱུ་འབྲས་བསླུ་བ་མེད་པ་ཡི། །ལས་རྣམས་རྨི་ལམ་ལྟ་བུ་ཞེས། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་པ་ལྟར་རྒྱལ་བ་སྲས་དང་བཅས་པའི་བཀའ་ལས་ཇི་སྐད་གསུངས་པ་བཞིན་དུ་དོན་དམ་པ་གཤིས་ཀྱི་གནས་ལུགས་ལ་རྒྱུ་འབྲས་ཀྱི་བླང་དོར་ལ་སོགས་པའི་སྤྲོས་པས་མ་གོས་ཀྱང་། ཀུན་རྫོབ་རྟེན་ཅིང་འབྲེལ་འབྱུང་ཙམ་དུ་རྒྱུ་དང་འབྲས་བུའི་ཆོས་རྣམས་བསླུ་བ་མེད་པར་ངེས་པས། དེ་དག་གི་བླང་དོར་བྱིས་པ་རྣམས་ཀྱིས་རྟོགས་པའི་ཕྱིར་ན་བཀོད་པ་སྟེ་རབ་བྱེད་བཅུ་དགུ་པའི་འགྲེལ་པའོ། །རྩིས་ཀྱི་མན་ངག་ཉིན་བྱེད་སྣང་བ་ལས། རྩིས་འབྲས་ངོ་ལོན་དང་བཅས་པ་ནང་ཚེགས་རབ་བྱེད་བཅུ་དགུར་ཕྱེ་ནས་བཤད་པའི་སྐབས་ཏེ་ཉེར་གསུམ་པའི་འགྲེལ་པའོ། །ཞེས་སྐབས་བསྡུས་སོ།། །།