གཉིས་པ་བསྔོ་བ་སྒོམ་ལམ་བཤད་པ།
གཉིས་པ་བསྔོ་བ་སྒོམ་ལམ་བཤད་པ་ལ།
རྩ་བར། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་པ་ནས། བསོད་ནམས་ཆེ་འབྱུང་བདག་ཉིད་དོ། །ཞེས་སོ། །དེ་ལ་བསྔོ་བ་སྒོམ་ལམ་བཤད་པ་ལ་སྤྱི་དོན་དང༌། མཐའ་རགས་ཙམ་དཔྱད་པ་དང་གཉིས། སྤྱིར་ཐེག་ཆེན་གྱི་བསྔོ་རྒྱུ། བསྔོ་ས། ཆེད་དུ་བྱ་བ། བློའི་རྣམ་པ། རང་བཞིན་ནམ་མཚན་ཉིད་བསྟན་པ། དབྱེ་པ་བཤད་པ་དང་དྲུག །དང་པོ་བསྔོ་རྒྱུ་ནི། འདུས་བྱས་ཀྱི་དགེ་བའི་རྩ་བ་ཐམས་ཅད་ཡིན་ཏེ། རྡོ་རྗེ་རྒྱལ་མཚན་གྱི་བསྔོ་བའི་ལེའུར། འགྲོ་ཀུན་དགེ་བ་ཇི་སྙེད་ཡོད་པ་དང༌། །བྱས་དང་བྱེད་འགྱུར་དེ་བཞིན་བྱེད་པ་དག །ཅེས་གསུངས་པ་ལྟར་རོ། །བསྔོ་བ་འགྲུབ་པའི་རྐྱེན་ནི། སྡོམ་པ་དང་ལྡན་པས་བདེན་པའི་སྟོབས་བརྗོད་པ་སྟེ། ལུང་ལས། ཚུལ་ཁྲིམས་ལྡན་པ་སྨོན་པས་འགྲུབ། །ཅེས་གསུངས་སོ། །