སངས་རྒྱས་གཉིས་པ་ཀུན་མཁྱེན་དབྱིག་གཉེན་གྱི་ཞབས་ལ་གུས་པས་ཕྱག་འཚལ།
སངས་རྒྱས་གཉིས་པ་ཀུན་མཁྱེན་དབྱིག་གཉེན་གྱི་ཞབས་ལ་གུས་པས་ཕྱག་འཚལ་ལོ། །
དེ་ལ་འདིར་མཛོད་གནས་བཞི་པའི་དཀའ་གནས་འགའ་འཆད་པར་བྱའོ། ། ༈ ལས་མདོར་བསྟན་པའི་སྐབས་ཀྱི་དོགས་གཅོད་ནི། མཛོད་རྩ་བ་ལས།འཇིག་རྟེན་ཐམས་ཅད་ལས་ལས་བྱུང༌། །ཞེས་པས་འཇིག་རྟེན་གྱི་བྱེད་པོ་གཞན་ཡོད་པ་བསལ་བ་ཡིན་ཏེ། མཆིམས་མཛོད་༣༣༨ལས། དབང་ཕྱུག་ལ་སོགས་པ་སུས་ཀྱང་བློ་སྔོན་དུ་བཏང་སྟེ་བྱས་པ་མ་ཡིན་གྱི་འོན་ཀྱང་སེམས་ཅན་རྣམས་ཀྱི་ལས་དགེ་མི་དགེ་སྣ་ཚོགས་ལས་སྣོད་བཅུད་ཀྱི་འཇིག་རྟེན་བདེ་སྡུག་དང་བཟང་ངན་ལ་སོགས་པ་སྣ་ཚོགས་སྐྱེས། ཞེས་གསུངས་པའི་ཕྱིར། འདོད་ན། ལྷ་ཚངས་པ་སོགས་འཇིག་རྟེན་གྱི་བྱེད་པ་པོ་མ་ཡིན་པར་ཐལ། འདོད་པའི་ཕྱིར། འདོད་མི་རིགས་ཏེ། དེ་དག་འཇིག་རྟེན་སྒྲུབ་པ་པོ་ཡིན་པའི་ཕྱིར།ཁྱབ་སྟེ། ཆོས་སྒྲུབ་པ་པོ་ཡིན་ན་ཆོས་བྱེད་པ་པོ་ཡིན་དགོས་པའི་ཕྱིར་ཟེར་ན་ཚིག་གི་ཞིབ་ཆ་ཙམ་བྱེད་དགོས་སོ། །སྤྱི་མཐུན་གྱི་ལས་ཀྱི་འབྲས་བུ་ལ་ལོངས་སྤྱོད་པ་ཡོད་ན་གཞན་གྱིས་བསགས་པའི་ལས་ལ་གཞན་གྱིས་མྱོང་བ་ཡོད་མེད་དང༌། ཡོད་ན་ལས་མ་བྱས་པ་དང་ཕྲད་པ་ཡོད་དགོས་ལ་དེ་མེད་པའི་ཕྱིར་ཟེར་བ་དང༌། སྤྱི་མཐུན་གྱི་ལས་བསགས་མཁན་དང༌། དེ་རྒྱུད་ལྡན་སུ་ཡིན་དང༌། དམ་བཅའ་བས་དེ་བསགས་མ་བསགས་གང་ཡིན་དང༌།སྤྱི་མཐུན་གྱི་ལས་ལས་ངན་སོང་དུ་འགྲོ་བ་ཡོད་ན་དེ་མི་དགེ་བ་ཡིན་མིན་དང༌། སྲོག་གཅོད་ཀྱི་ལས་ལྟ་བུ་གསར་དུ་བསགས་པའི་ཚེ་སྤྱི་མཐུན་གྱི་ལས་བསགས་པ་ཡིན་མིན་དང༌། མི་དགེ་བའི་ལས་ལ་སྤྱི་མཐུན་གྱི་ལས་ཡོད་མེད་དང༌། སྟོང་བསྐལ་གྱི་དུས་སུ་སྤྱི་མཐུན་གྱི་ལས་རྒྱུད་ལྡན་གྱི་གང་ཟག་གང་ཡིན་རྣམས་ལ་དཔྱད་པར་བྱའོ། །