དགེ་ལུགས་པའི་ལུགས་ལ་ཐལ་རང་གི་ཁྱད་པ།
དགེ་ལུགས་པའི་ལུགས་ལ་ཐལ་རང་གི་ཁྱད་པར་ནི།
དཀའ་གནས་བརྒྱད་ཀྱི་ཟིན་བྲིས་ལས། དབུ་མ་བ་ལ། ཐལ་རང་གཉིས་ཀྱི་ཐ་སྙད་སྔ་མ་རྣམས་ཀྱིས་མཛད་པ་ལྟར་ཡང་རུང་ལ།ཡང་ན་རང་རྒྱུད་ཀྱི་རྟགས་ཁས་བླངས་བའི་སྒོ་ནས་དེ་ཁོ་ན་ཉིད་རྟོགས་པར་མཛད་པ་དང༌། གཞི་དེ་ཁས་མ་བླངས་བར་གཞན་གྲགས་ཀྱི་རྟགས་ཀྱི་སྒོ་ནས་དེ་ཁོ་ན་ཉིད་ཀྱི་རྟོགས་པ་བསྐྱེད་པའི་དབུ་མ་བ་གཉིས་སུ་དབྱེའོ། །རྟགས་དེ་གཉིས་ཀྱི་ཁྱད་པར་གཞན་གྱི་ཁས་བླངས་ལ་མ་ལྟོས་པར་རང་དབང་དུ་འཛིན་སྟངས་ཀྱི་དོན་ལ་མི་འཁྲུལ་བའི་ཚད་མས་བཞག་པའི་ཚུལ་གསུམ་དང་ལྡན་པ་ལ་རང་རྒྱུད་དང༌། དེ་ལྟར་མིན་པར་གཞན་གྱི་ཁས་བླངས་ལ་ལྟོས་ནས་ཚད་མས་ངེས་པའི་ཚུལ་གསུམ་དང་ལྡན་པ་ལ་གཞན་གྲགས་ཀྱི་གཏན་ཚིགས་ཞེས་བྱའོ། །ཞེས་གསུངས་ལ། རྗེའི་རང་ལུགས་ལ་ཐལ་རང་གཉིས་ལ་རང་བཞིན་གྱིས་གྲུབ་པར་ཁས་མི་ལེན་པ་དང་ལེན་པའི་སྒོ་ནས་ཁྱད་ཡོད་པར་བཞེད་དོ། །འོན་ཀྱང་བདག་གི་རྣམ་རྟོག་ལ་རང་རྒྱུད་པའི་རང་གཞུང་ལས་རང་བཞིན་གྱིས་མ་གྲུབ་པར་གསུངས་པ་ལས་རང་བཞིན་གྱིས་གྲུབ་པར་གང་དུ་ཡང་མ་གསུངས་ཏེ། དབུ་མ་རྒྱན་ལས། བདག་དང་གཞན་སྨྲའི་དངོས་འདི་དག །ཡང་དག་དུ་ན་གཅིག་པ་དང༌། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་པ་ལྟར་རང་རྒྱུད་པའི་གཞུང་ལུགས་དུ་མར་རང་བཞིན་གྱིས་མེད་པར་གསུངས་སོ། །ལེགས་སྦྱར་གྱི་སྐད་དུ་བདེན་གྲུབ་དང་རང་བཞིན་གྱིས་གྲུབ་པའི་སྐད་དོད་གཅིག་པ་ཡིན་ཏེ། དེ་གཉིས་ཀྱི་སྐད་དོད་ལ་བྷ་ཝ་ལས་གཞན་འཇོག་རྒྱུ་མེད་པའི་ཕྱིར་རོ། །བྷ་ཝ་ཡོད་པ་དང་དངོས་པོའི་སྐད་དོད་ལ་འཇུག་པའི་དབང་གིས་སྔོན་གྱི་ལོ་ཙཱ་བ་རྣམས་ཀྱི་བོད་སྐད་དུ་བསྒྱུར་ཚེ་རང་བཞིན་གྱིས་མེད་པ་ལ་མེད་པ་ཞེས་བསྒྱུར་བ་དང༌། བདེན་གྲུབ་ལ་ཡོད་པ་བསྒྱུར་བ་དང༌། བདེན་གྲུབ་ལ་དངོས་པོ་དང་བདེན་དངོས་སུ་བསྒྱུར་བ་མང་དུ་ཡོད་པར་སྣང་ངོ། །