ཟས་ཟ་བའི་སྡེ་ལ།
ཟས་ཟ་བའི་སྡེ་ལ།
༤༨ ཟས་ཚུལ་མཐུན་མ་ཟོས་པ་སྤྱི་དང༌། ༤༩ བྱེ་བྲག་ཁམ་རན་པ་ལས་ཧ་ཅང་ཁམ་ཆུང་བ་ཟ་བ། ༥༠ ཧ་ཅང་ཁམ་ཆེ་བ་ཟ་བ། ༥༡ ཁམ་རན་པར་མ་ཟོས་པ། ༥༢ ཟས་མ་འོངས་གོང་ནས་ཁ་གདངས་པ། ༥༣ ཁ་ཁམ་གྱིས་བཀང་སྟེ་གཏམ་སྨྲ་བ། ༥༤ སྐྱུར་བ་ཙུག་ཙུག་གི་སྒྲ་དང་བཅས་ཏེ་ཟ་བ། ༥༥ མངར་བ་ཅག་ ཅག་དང་བཅས་ཏེ་ཟ་བ། ༥༦ གྲང་བ་ཧུ་ཧུ་དང་བཅས་ཏེ་ཟ་བ། ༥༧ ཚ་བ་ཕུ་ཕུ་དང་བཅས་ཏེ་ཟ་བ། ༥༨ ལྕེས་རེག་སྟེ་ལྟ་ཞིང་ཟ་བ། ༥༩ འབྲུ་རེ་རེ་ནས་ཟ་བ། ༦༠ ཟས་ལ་ཧ་ཅང་བསྔགས་པ་དང་སྐྱོན་གདགས་ཏེ་ཟ་བ། ༦༡ མཁུར་བ་གཡས་གཡོན་སྤོ་ཞིང་ཟ་བ། ༦༢ སྐན་སྒྲ་གཏོག་ཅིང་ཟ་བ། ༦༣ ཁམ་འཕྲོ་སོས་བཅད་དེ་ཟ་བ། ༦༤ ལག་པ་ལ་ཟས་ཆགས་པ་ལྕེས་བལྡག་པ། ༦༥ ཟས་སྣོད་ལ་ཟས་ཆགས་པ་སོར་མོ་དང་ལྕེས་བལྡག་པ། ༦༦ ལག་པར་ཟས་ཆགས་པ་ལྕེ་སྟེང་སོགས་སུ་སྤྲུག་པ། ༦༧ ལྷུང་བཟེད་ནང་གི་ཟས་སོགས་བསྐོར་ཏེ་གཡོ་བར་བྱེད་པའམ་ནང་དུ་ཟས་བླུགས་ཏེ་ལྕི་ཡང་ལག་སྲང་ལ་འཇལ་བ། ༦༨ ཟས་ལ་མཆོད་རྟེན་འདྲ་བ་བྱས་ཏེ་གཞོམ་པ་སྟེ་ཉེས་བྱས་ཀྱི་སྡེ་ཚན་ལྔ་བའོ། །