གཉིས་པ་རང་ལུགས་བཞག་པ།
གཉིས་པ་རང་ལུགས་བཞག་པ་ནི།
མཚོ་ཊཱིཀ་ལས། ཉན་ཐོས་བྱེ་བྲག་སྨྲ་བ་ནི་སྡོམ་པའི་ངོ་བོ་གཟུགས་ཡིན་པར་འདོད་དེ། མཛོད་ལས། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་དང༌། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །ཞེས་སོ། །དེའང་སྡོམ་པ་རྣམ་པར་རིག་བྱེད་མ་ཡིན་པའི་གཟུགས་བསྟན་དུ་མེད་ཅིང་ཐོགས་པ་མེད་པ་སྟེ། སྡོམ་ལྡན་གྱི་ལུས་ཀྱི་རྡུལ་ཕྲ་རབ་རྣམས་ཀྱི་བར་ན་ནགས་ལ་མེ་ལྕེ་ཞུགས་པ་ལྟར་སྡོམ་པ་དེ་ཡོད་པར་འདོད་དེ། མཛོད་འགྲེལ་ལས། ལུས་ལ་གསེབ་ཡོད་པའི་ཕྱིར། ཞེས་བཤད་དོ། །ཞེས་གསུངས་པའི་ཕྱིར་རོ། །