གསེར་གཞོང་གནས་ཀྱི་ངོ་སྤྲོད་མདོར་བསྡུས། ཡི་དམ་རྡོ་རྗེ།
༄༅། གསེར་གཞོང་གནས་ཀྱི་ངོ་སྤྲོད་མདོར་བསྡུས་ནི། དེ་ཡང་ས་དབྱིབས་རིན་ཆེན་གསེར་གྱི་གཞོང་པ་མར་ཁུས་གཏམས་པ་འདྲ་བ་དང་། བྱིན་ལྡན་དབེན་པའི་གནས་རི་ཡིན་ཕྱིར་འགོལ་བའི་གསེར་གཞོང་ཁུག་ཅེས་ས་མིང་དུ་གྲགས་པའི་གནས་འདི་རུ། ཇི་སྐད་དུ། གངས་ལྗོངས་ས་གཞི་རྟ་རྨིག་གང་ཙམ་ཡང་། །ཞབས་ཀྱིས་མ་བཅགས་མེད་པའི་བྱིན་རླབས་མཛད།། གསུངས་པ་ལྟར་རྒྱལ་དབང་ཨོ་རྒྱན་ཆེན་པོས་ཞབས་ཀྱིས་བཅགས་ཤིང་བྱིན་གྱིས་བརླབས་པ་དང་། ལོ་ཆེན་བཻ་རོ་ཙ་ན། རྒྱལ་མོ་གཡུ་སྒྲ་སྙིང་པོ། ཀརྨ་པ་བཞི་པ་རོལ་པའི་རྡོ་རྗེ་དང་བཅུ་པ་ཆོས་དབྱིངས་རྡོ་རྗེ་སོགས་སྔོན་བྱོན་རིག་འཛིན་གྲུབ་ཐོབ་རྣམས་ཀྱིས་བྱིན་རླབས་ཀྱི་ཉི་འོད་བསྐྱིལ་བ་དང་། ཁྱད་པར་དུ་ཟུར་ཆེན་ཆོས་དབྱིངས་རང་གྲོལ་གྱི་རོལ་གར་། གསང་ཆེན་རྒྱུད་སྡེའི་མངའ་བདག་མཁན་ཆེན་པདྨ་བཛྲ་གནས་འདིར་ཕེབས་ནས་སྒྲུབ་པ་མཛད་པར་མ་ཟད། སྒྱུ་འཕྲུལ་ཁྲོ་བོའི་སྒྲུབ་ཐབས་ཀྱི་སྙིང་པོའི་དོན་བསྡུས་གནས་འདིར་མཛད་ཚུལ་ཆོ་ག་དེའི་མཛད་བྱང་དུ། སྒྱུ་འཕྲུལ་དྲྭ་བ་ཧེ་རུ་ཀའི་སྒྲུབ་ཐབས་གཏེར་ཆེན་ཆོས་ཀྱི་རྒྱལ་པོའི་གསུང་ལས་བསྙེན་པའི་ལས་བྱང་ཉུང་ངུར་བསྡུས་ཏེ་རང་དང་སྐལ་མཉམ་རྣམས་ལ་ཕན་པའི་བློས་རིག་འཛིན་གྱི་བཙུན་པ་པདྨ་བཛྲས་གཡི་སྟོད་དབེན་པའི་ནགས་ཚལ་དྲྭ་བ་ཅན་དུ་བྲིས་པ་གསང་ཆེན་སྙིང་པོའི་བསྟན་པ་ཕྱོགས་དུས་ཀུན་དུ་རྒྱས་པའི་རྒྱུར་གྱུར་ཅིག ཅེས་གསུངས། གཞན་ཡང་མཁན་ཆེན་པདྨ་བཛྲ་གྱིས་ཕྱག་འཁར་ས་ལ་བཙུགས་པ་ལྗོན་ཤིང་དུ་གྱུར་པ་ད་ལྟ་ཡང་མཇལ་དུ་ཡོད། རབ་གནས་མེ་གླང་（1997）ལོར་མཁན་ཆེན་པདྨ་བཛྲ་གྱི་རྣམ་སྤྲུལ་ཁྱབ་བདག་བླ་མ་རིན་པོ་ཆེ་རྫོགས་ཆེན་པདྨ་སྐལ་བཟང་གནས་འདིར་ཆེད་དུ་ཕེབས་ནས་ཕྱག་འཁར་ལྗོན་ཤིང་ལ་དར་ཁ་བསྒྲོན་ཅིང་ཐུགས་སྨོན་ཟབ་རྒྱས་གནང་བར་མཛད། ཁྱད་པར་ཅོག་སྤྲུལ་འཇིགས་མེད་ངེས་གསང་སྙིང་པོའི་མ་འོངས་ལུང་བསྟན་དུ། དབྱིངས་བརྡ་སྦྱོར་མཁའ་འགྲོའི་བརྡ་སྐད་ཀྱིས༔ དུས་སྙིགས་མ་ཡི་བསྐལ་པའི་གསང་གཏམ་ཤར༔ ལོ་ཐ་ངན་དང་མུ་གེ་དགྲ་འཁྲུགས་འོང་༔ འབྱུང་ངེས་པ་ནི་པདྨའི་ལུང་བསྟན་ཡིན༔ འདི་བཟློག་ཐབས་བདུད་འདུལ་མཆོད་རྟེན་དང༔ རྣམ་རྒྱལ་དང་རྡོ་རྗེ་གཞོན་ནུའི་ལྷ༔ རྩེགས་གསུམ་བཞི་དང་ལྔ་དྲུག་ཡོད་པ་རེ༔ སྨད་དར་མདོ་དང་ལི་ཐང་ཉག་རོང་དང་༔ རོང་ཚ་ཤོད་དང་གཡུ་ཁོག་རྒྱལ་རོང་དང་༔ ཤར་འཛམ་ཐང་དང་རྨ་ཆེན་ཆུ་མདོ་བརྒྱད༔ ཞལ་མདོ་སྨད་ལ་གཟིགས་ཏེ་བཞེངས་ན་ལེགས༔ ཞེས་སོགས་གསུངས་པ་ལྟར། ལྔ་བདོ་སྙིགས་མའི་རྒུད་པ་མཐའ་དག་དབྱིངས་སུ་བཟློག་པ་དང་། རྒྱལ་ཁམས་སྤྱིའི་བདེ་སྐྱིད་སོགས་དགོས་དབང་དུ་མ་ལ་དམིགས་ནས་ཆེ་ཡོལ་རིག་འཛིན་ཆེན་པོ་དཔའ་བོ་ལས་རབས་རྩལ་གྱི་རྣམ་འཕྲུལ་མཆོག་སྤྲུལ་འཇིགས་མེད་རྡོ་རྗེས་རྟེན་རྙིང་བྱིན་ལྡན་དུ་མ་སོགས་ནང་གཟུངས་ཚད་དང་ལྡན་པའི་བདུད་འདུལ་མཆོད་རྟེན་ཆེན་མོ་གསར་བཞེངས་མཛད་པ་དང་། གཞན་ཡང་མ་ཎི་དུང་མཁར། རྒྱལ་བའི་བཀའ་འགྱུར་ཆེན་པོ། ཞི་ཁྲོ་དམ་པ་རིགས་བརྒྱའི་ལྷ་ཚོགས་སོགས་རྡོ་ལ་བརྐོས་ནས་སྐྱེ་དགུ་རྣམས་ཀྱི་བསོད་ནམས་ཀྱི་བགོ་སྐལ་དུ་འཇོག་པར་མཛད་དོ།། དེ་ཡང་རྟེན་མཆོག་འདི་དག་ལ་རྒྱུ་དང་ཚེགས་ཀྱིས་འབྲེལ་བའི་ཕན་ཡོན་ནི། འཇམ་དཔལ་རྩ་རྒྱུད་ལས། སྐུ་གཟུགས་རྣམ་པ་མང་པོ་དེ་སྤྲུལ་ནས། །འགྲོ་བ་དགེ་ལ་སྦྱོར་བའི་དོན་བྱེད་དོ།། ཅེས་དང་། གསལ་རྒྱལ་གྱིས་ཞུས་པའི་མདོ་ལས། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །སྐུ་གཟུགས་རྣམས་ལ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེང་རྒྱལ་སྲིད་ངེས་པར་འཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱང་ནས། །ཐ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པའི་སངས་རྒྱས་གོ་འཕང་འཐོབ།། ཅེས་དང་། འཕགས་པ་རྨད་དུ་བྱུང་བའི་མདོ་ལས། ཀུན་དགའ་བོ། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུའམ། རིགས་ཀྱི་བུ་མོ་དད་པ་ཅན་གང་ལ་ལ་ཞིག་གིས་རིན་པོ་སྣ་བདུན་གྱི་རང་བཞིན་དུ་བྱས་ཏེ། རྒྱུན་དུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་བས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་ལས་འདས་པའི་མཆོད་རྟེན་སྐྱུ་རུ་རའི་འབྲས་ཙམ་བྱས་ལ། ཁབ་ཙམ་གྱི་སྲོག་ཤིང་བཙུགས། རྒྱ་ཤུག་གི་ལོ་མ་ཙམ་གྱི་གདུགས་གསོལ་ནས། ནས་འབྲུ་ཙམ་གྱི་སྐུ་གཟུགས་བྱས་ལ། ཡུངས་འབྲུ་ཙམ་གྱི་རིང་བསྲེལ་བཅུག་ན་དེ་ནི་དེ་བས་བསོད་ནམས་ཆེའོ།། ཞེས་སོགས་གསུངས། རྟེན་གསུམ་འདི་དག་ལ་གང་གིས་སེམས་རབ་ཏུ་དད་པས་ཅི་འབྱོར་བའི་ཡོ་བྱད་ཀྱིས་མཆོད་པ་འབུལ་བ་དང་ཕྱག་འཚལ་ཞིང་བསྐོར་བ་བྱས་པའི་ཕན་ཡོན་ཡང་། མཆོད་རྟེན་བསྐོར་བའི་ཕན་ཡོན་ལས། མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་འཇིམ་གོང་གཅིག་བོར་བ། །ཛམྦུའི་ཆུ་ཀླུང་གསེར་གྱི་ཕོ་བྲང་འབུམ། །དེ་ནི་དེ་དང་མཚུངས་པ་ཡོད་མ་ཡིན། །མཁས་པ་གང་ཞིག་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མེ་ཏོག་སིལ་མ་སྤུངས། །ཛམྦུའི་ཆུ་ཀླུང་གསེར་སྣོད་འབུམ་བཞག་པ། །དེ་ནི་དེ་དང་མཚུངས་པ་ཡོད་མ་ཡིན། །མཁས་པ་གང་ཞིག་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མེ་ཏོག་ཕྲེང་བ་ཐོགས། །ཛམྦུའི་ཆུ་ཀླུང་གསེར་ཁལ་བྱེ་བ་གཉིས། །དེ་ནི་དེ་དང་མཚུངས་པ་ཡོད་མ་ཡིན། །ཞེས་དང་། དམ་ཆོས་པདྨ་དཀར་པོར། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལན་གཅིག་ལུས་ཀྱང་བཏུད་པ་དང་། །གང་གིས་རིང་བསྲེལ་གཉིས་པ་དེ་དག་ལ། །གཡེང་པའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་ཐོབ། ཞེས་དང་། མདོ་ལས། ད་ལྟ་ང་ལ་མཆོད་པ་དང་། །མ་འོངས་རིང་བསྲེལ་མཆོད་པ་གཉིས། །བསོད་ནམས་མཉམ་ཞིང་རྣམ་སྨིན་མཉམ། །འདི་གཉིས་ཐ་དད་ཅུང་ཟད་མེད།། ཅེས་དང་། དཀོན་མཆོག་བརྩེགས་པ་ལས། གང་ལ་ལ་ཞིག་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ད་ལྟ་བཞུགས་པ་ལ་མཆོད་པར་བྱེད་པ་དེའི་ཕན་ཡོན་རྣམས་ནི་མཚུངས། མཉམ་ཞིང་འདྲའོ་ཞེས་ང་འཆད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་ནི་ཆོས་ཀྱི་སྐུས་རབ་ཏུ་ཕྱེ་བ་ཡིན་གྱི། གཟུགས་ཀྱི་སྐུས་རབ་ཏུ་ཕྱེ་བ་མ་ཡིན་པའི་ཕྱིར་རོ།། ཞེས་སོགས་ཕན་ཡོན་དང་བསོད་ནམས་ཚད་ལས་འདས་པ་ཡིན་པས་ཀུན་གྱིས་ཕྱག་མཆོད་བཀུར་སྟི་བགྱིད་པར་རིགས་སོ།།
ཅེས་པ་འདི་ཡང་ཆུ་ཡོས་ཐ་སྐར་ཟླ་བའི་དཀར་ཕྱོགས་དགའ་བ་དང་པོའི་ཉིན་གཡུ་ཁོག་ཡི་དམ་རྡོ་རྗེས་བྲིས་པ་དགེའོ།།