གནམ་ཆོས་ཐུགས་ཀྱི་གཏེར་ཁ་ནས་བསྒྲིགས་པའི་གཏོར་འབུལ་རིམས་ནད་ཟློག་བྱེད།
གནམ་ཆོས་ཐུགས་ཀྱི་གཏེར་ཁ་ནས་བསྒྲིགས་པའི་གཏོར་འབུལ་རིམས་ནད་ཟློག་བྱེད་ཅེས་བྱ་བ་བཞུགས་སོ།།
ན་མོ་ཤྲཱི་དེ་ཝི་ཀཱ་ལི་ཡེ༔ ཨོ་རྒྱན་ཆེན་པོའི་མ་འོངས་ལུང་བསྟན་ལས༔ དུས་ངན་མི་རྣམས་མི་དགེ་སྣ་ཚོགས་སྤྱོད༔ དེ་ཡི་སྐྱོན་གྱིས་མ་མོ་མཁའ་འགྲོ་འཁྲུགས༔ ཁ་རླངས་མཁའ་ལ་ནད་སྤྲིན་སྔོ་དམར་འཁྲིགས༔ དལ་ཡམས་རིམས་ནད་སྣ་ཚོགས་ཆར་ལྟར་འབེབས༔ དེ་དུས་མ་འོངས་འགྲོ་ལ་ཕན་པའི་ཕྱིར༔ གནམ་ཆོས་ཐུགས་ཀྱི་གཏེར་ཁའི་གཞུང་ཉིད་ནས༔ ནད་རིམས་ཟློག་བྱེད་ལྷ་མོའི་མདོས་ཆོག་གསུངས༔ འོན་ཀྱང་མདོས་ཆས་ལ་སོགས་འཛོམ་དཀའ་ཞིང་༔ གློ་བུར་བཅའི་འདོན་ལ་སོགས་མི་སྐབས་དུས༔ རིམས་ནད་ཡོང་དོགས་བསྲུང་བར་བྱ་བའམ༔ གློ་བུར་བྱུང་ན་གསོ་དང་བཅོས་པའི་ཐབས༔ ཅི་འབྱོར་དམར་གཏོར་གཙང་མ་མདུན་དུ་བཤམས༔ གཙོ་བོ་ཆེ་བ་གཅིག་ལ་ཆུང་བ་བཅུ་བཞིས་བསྐོར༔ རྩ་བའི་ཡི་
དམ་གནས་འགྱུར་བྱ་བའམ༔ དྲན་རྫོགས་རྟ་མགྲིན་གུར་དྲག་ཕྱག་རྡོར་སོགས༔ ཁྲོ་བོ་གང་རུང་དྲན་རྫོགས་བདག་སྐྱེད་བསྒོམ༔ ན་མོ༔ དཀོན་མཆོག་གསུམ་དང་རྩ་བ་གསུམ༔ དཔལ་ལྡན་ལྷ་མོ་དཔོན་གཡོག་གི༔ མཐུ་དང་བདེན་པ་ཆེན་པོ་ཡིས༔ བདག་ཅག་དཔོན་སློབ་འཁོར་དང་བཅས༔ དམིགས་ཡུལ་བསྲུང་བྱ་ཐམས་ཅད་ལ༔ གནོད་ཅིང་འཚེ་བར་བྱེད་པ་ཡི༔ གདོན་བགེགས་ནད་འདྲེ་གཅོང་སྲི་ཀུན༔ དམར་གྱི་གཏོར་མ་འདི་ལ་ཁུག༔ ཛཿཧཱུྃ་བཾ་ཧོ༔དབྱེར་མེད་གྱུར༔ ཨོཾ་གྱིས་སྟོང་པ་ཉིད་དུ་སྦྱངས༔ ཨཱཡིས་ཐོད་སྣོད་རྒྱ་ཆེ་བར༔ ཧཱུྃ་གིས་གཏོར་མ་བདུད་རྩི་མཚོ༔
ཧྲཱིཿཡིས་ཟག་མེད་བདེ་སྐྱིད་པ༔ ཁ་དོག་དྲི་རོ་ཕུན་ཚོགས་པ་ཧ་ཧོ་ཧིཡིས་བྱིན་གྱིས་བརླབས༔ མདུན་གྱི་བར་སྣང་འདི་ཉིད་ལ༔ དཔལ་ལྡན་ལྷ་མོ་དཔོན་གཡོག་རྣམས༔ ཆུ་ལ་ཆུ་བུར་ཤར་བ་བཞིན་སྐད་ཅིག་དྲན་རྫོགས་ཉིད་དུ་གསལ༔ བྷྱོཿ མུ་ལེ་མཚོ་དང་ཡོངས་འདུའི་ཤིང་༔ དུར་ཁྲོད་བརྒྱད་སོགས་བཞུགས་གནས་ནས༔ ལྷ་མོ་འཁོར་བཅས་སྤྱན་འདྲེན་ནོ༔ སྡང་དགྲའི་སྟེང་དུ་དགྱེས་པར་བཞུགས༔ ཨོཾ་ཤྲཱི་དེ་ཝི་ཀཱ་ལི་ས་པཱ་རི་ཝཱ་ར་ཤྲཱི་ཛཛཿཧཱུྃ་བཾ་ཧོ༔ དངོས་འབྱོར་ཡིད་ཀྱིས་སྤྲུལ་པ་ཡིས། །མེ་ཏོག་བདུག་སྤོས་མར་མེ་དྲི། །བཤོས་བུ་གཟུགས་སྒྲ་དྲི་རོ་དང་། །རེག་བྱ་སྨན་གཏོར་རཀྟའི་ཚོགས། །ལྷ་མོ་འཁོར་དང་བཅས་ལ་འབུལ། །འཁོར་བཅས་མཉེས་ཤིང་ཚིམ་གྱུར་ཅིག༔ ༀ་ཤྲཱི་དེ་ཝི་ཀཱ་ལི་ས་པ་རི་ཝཱ་ར་ཨ་མྲྀ་ཏ་བ་ལིཾ་ཏ་རཀྟ་ཁ་ཁཱ་ཧི་ཁཱ་ཧི༔ ཨརྒྷཾ་་སོགས། བྱོ༔ ཆོས་སྐུ་སྐྱེ་མེད་ངང་ཉིད་ལས༔ འགྲོ་བའི་དོན་དུ་སྐུ་སྤྲུལ་ནས༔ འཇིག་རྟེན་འདས་ཀྱང་འཁོར་བའི་ཚུལ༔ མ་དང་སྲིང་ལྟར་བསྒྲུབ་ལ་བརྩེ༔ ལྷ་མོ་འཁོར་དང་བཅས་ལ་བསྟོད༔ དམ་རྫས་མཆོད་གཏོར་ཐུགས་དམ་བསྐང་༔ ཐུགས་དང་འགལ་བ་མཐོལ་ཞིང་
བཤགས༔ བདག་ཅག་དཔོན་སློབ་འཁོར་བཅས་ཀྱི༔ ཡམས་ནད་རིམས་ནད་ཞི་བ་དང་༔ འབྲུ་དང་རྐང་འགྲོ་འཕེལ་རྒྱས་མཛོད། །འདོད་དགུ་ཐམས་ཅད་དབང་དུ་སྡུས༔ གནོད་ཅིང་འཚེ་བའི་དགྲ་བགེགས་སྒྲོལ༔ མ་གཡེལ་མྱུར་དུ་ལས་མཛོད་ཅིག༔ བཅོལ་བའི་ཕྲིན་ལས་འགྲུབ་པར་མཛོད༔ དཔལ་ལྡན་ལྷ་མོ་དུད་སོལ་མ༔ ཞལ་གཅིག་ཕྱག་བཞི་རབ་ཏུ་འཇིགས༔ སྐུ་མདོག་ནག་མོ་མི་ལྤགས་གསོལ༔ རེ་ལྡེའི་ཤམ་ཐབས་སྨད་དུ་དཀྲིས༔ རལ་པ་ཕྱེད་ཡར་ཐོར་ཅོག་བྱས༔ ཕྱེ་མར་ཐུར་བཤལ་དང་པོ་གཉིས༔ ཁ་ཊཾ་སྦྲུལ་ཞགས་འོག་མ་གཉིས༔ རལ་གྲི་ཐོད་ཁྲག་འཛིན་པ་སྟེ༔ གསེར་མདོག་མཛེས་པའི་ཞབས་ལ་བརྒྱན༔ བོང་བུ་དམར་གྲྭ་འཕོངས་མིག་ཞོན༔ སྔ་རུ་ཕྱི་རུ་གཉིས་པོ་ནི༔ སྲིན་ཐོད་སྐམ་པོ་དགྲ་ཐོད་རློན༔ ཁྲག་མཚོ་འབོག་ཅིང་རླུང་ནག་འཚུབ༔ དུད་སོལ་ལྷ་མོ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཧཱུྃ༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ཞིང་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོཾ་ཤྲཱི་
དེ་ཝི་ཀཱ་ལི་བྷྱོཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ རང་བྱུང་རྒྱལ་མོ་རེ་མ་ཏི༔ ཞལ་གཅིག་ཕྱག་བཞི་དང་པོ་གཉིས༔ ཁ་ཊཾ་ཞགས་པ་འོག་མ་གཉིས༔ མེ་ལོང་ཕུར་པ་འཛིན་པ་སྟེ༔ མདོག་ནག་བེར་དང་གླང་ལྤགས་གྱོན༔ ཆིབས་སུ་དྲེའུ་སྔོ་ནག་ཆིབས༔ རང་བྱུང་རྒྱལ་མོ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཕྱོཏྲག་རཀྟ་དེ་ཝི་ཧཱུྃ༔ ས་པཱ་རི་ཝ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དཔལ་ལྡན་ལྷ་མོ་རེ་མ་ཏི༔ སྐུ་མདོག་ནག་མོ་ཞལ་གཅིག་པ༔ ཕྱག་གཉིས་ཁྲམ་ཤིང་ནད་རྐྱལ་འཛིན༔ རེ་ལྡེའི་བརྒྱན་ཅིང་བོང་དམར་ཆིབས༔ ཤན་པ་ནག་མོ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོ་བྷྱོ་རེ་མ་ཏི་ཧཱུྃ་ཕཊ༔ ས་པཱ་རི་ཝ་ར་ཨི་དཾ་བ་ལི་ཏ་ཁ་ཁ་ཁཱ་ཧི༔
སྔགས་སྲུང་ཨེ་ཀ་ཙ་ཏི་སྔོ༔ ཞལ་གཅིག་ཕྱག་གཉིས་གཡས་ཞིང་དབྱུག༔ གཡོན་པས་ལྕགས་སྤྱང་མགོ་དགུ་འཛིན༔ ཆིབས་སུ་བོང་བུ་སྨུག་གྲྭ་ཆིབས༔ གཟིག་གི་ཤམ་ཐབས་སྨད་ལ་དཀྲིས༔ གཅེར་བུ་སྤྱན་ཚེམས་ནུ་མ་གཅིག༔ ཨེ་ཀ་ཙ་ཏི་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག་ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོཾ་ཨེ་ཀ་ཙ་ཏི་བྷྱོ་ཧྲི༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དཔལ་ལྡན་ལྷ་མོ་དམག་ཟོར་མ༔ སྐུ་མདོག་ནག་མོ་གཡས་བེ་ཅོན༔ གཡོན་པས་ལག་ན་བྷན་འཛིན༔ སྐུ་སྨད་རེ་ལྡེའི་ཤམ་ཐབས་གསོལ༔ དྲེའུ་རྐྱང་སེར་ཆིབས་སུ་ཆིབས༔ དམར་ཟོར་རྒྱལ་མོ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨཱཿ བྷྱོ་རིག་མོ་བྷྱོ་བྷྱོ་རྦད༔ ས་པཱ་རི་ཝ་ར་ཨི་དཾ་
བ་ལིཾ་ཏ་ཁ་ཁ་ཁཱ་ཧི༔ མ་མོ་ཁྲི་སྨན་སི་ལེ་མ༔ ཞལ་གཅིག་ཕྱག་གཉིས་གཡས་བེ་ཅོན༔ གཡོན་པས་ཕྱག་ན་བྷནྡ་འཛིན༔ དབུ་སྐྲ་ཐོར་ཅོག་ཐུར་བཤལ་བ༔ གཅེར་བུ་གཡང་གཞི་སྐུ་ལ་གསོལ༔ ཆིབས་སུ་ཆུ་བྱ་རོག་མོ་ཆིབས༔ ཁྲི་སྨན་སི་ལེ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོཾ་བློ་བྷྱོ་ཏྲི་ཤ་རགོ་བློ་བྷྱོཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ མ་མོ་དུར་ཁྲོད་བདག་མོ་ནི༔ སྐུ་མདོག་སེར་སྐྱ་ཞལ་གཅིག་པ༔ ཕྱག་གཉིས་གཡས་པས་གྲི་གུག་སྟེ༔ གཡོན་པས་ཐོད་ཁྲག་སྐུ་ལ་བརྟེན༔ རེ་ལྡེའི་ཤམ་ཐབས་གཡུ་ཡི་གྲྭ་ཕྲག་ལ་བཀལ་བ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོ་བྷྱོ་བྷྱོ་ར་ལི་པྲ་མ་ཡ་ཛཿ ས་པཱ་རི་ཝཱ་ར་ཨི་དཾ་
བ་ལིཾ་ཏ་ཁ་ཁ་ཁཱ་ཧི༔ མ་མོ་སྟག་སྨན་སོར་ལྡེམ་སེར༔ ཞལ་གཅིག་ཕྱག་གཉིས་གྲི་གུག་ཐོད༔ གཡང་གཞི་གཟིག་ཤམ་སྟག་ལ་ཆིབས༔ སྟག་སྨན་སོར་ལྡེམ་་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོཾ་པྲ་ཏྲི་ཧ་ལི་བ་ཏ་ཡེ་སྭཱ་ཧཱ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དངོས་གྲུབ་ཞལ་མ་སྐུ་མདོག་སེར༔ གཡས་པས་ཁ་ཊཾ་གཡོན་ཞགས་པ༔ གཅེར་བུ་མི་ལྤགས་གཡང་གཞི་གསོལ༔ གསེར་གྱི་གྲྭའུ་ཕྲག་ལ་བཀལ༔ དངོས་གྲུབ་ཞལ་མ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས་ཐམས་ཅད་ལྷ་མོས་བཟློག་ཏུ་གསོལ༔ ཨོཾ་སིདྡྷི་མུ་ཁ་བྷྱོཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ མ་མོ་བ་ལམ་དྲིལ་སྣ་ནག༔ ཞལ་གཅིག་ཕྱག་གཉིས་ཞགས་པ་ཁྲག༔ ཆིབས་སུ་དྲེལ་
ནག་རྐང་གསུམ་ཆིབས༔ བ་ལམ་དྲིལ་སྣ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོ་བྷྱོ་ས་ལི་ནི་ཨ་ནེ་མ་རཀྵ་བྷྱོ་བྷྱོཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ མ་མོ་གཏུམ་མོ་འཇིགས་བྱེད་སྨུག༔ ཞལ་གཅིག་ཕྱག་གཉིས་གཡས་པ་ཡི༔ ཁ་ཊཾ་གཡོན་པས་མདུང་འཛིན་ཅིང་༔ དངུལ་གྲྭ་ཕྲག་བཀལ་ཞིང་ཆེན་དང་༔ ཐོད་སྐམ་དོ་ཤལ་སྐུ་ལ་བརྒྱན༔ གཏུམ་མོ་འཇིགས་བྱེད་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོཾ་བྷྱོ་ཙནི་བྷེ་ར་བྷུ་ཛཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དཔལ་ལྡན་ལྷ་མོ་སྤྱང་ཞོན་མ༔ སྐུ་མདོག་སྨུག་མོ་གཡས་ཁ་ཊཱི༔ གཡོན་པས་ཐོད་ཁྲག་སྤྱང་ཀི་ནི༔ མགོ་བོ་དགུ་པ་ཆིབས་སུ་ཆིབས༔ ལྷ་མོ་སྤྱང་ཞོན་འཁོར་དང་
བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོ་བྷྱོ་རུ་ཊ་ཀཱ་ལི་ཛཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ མ་གཅིག་ལྷ་མོ་ཡི་དྭགས་ཁ༔ སྐུ་མདོག་ནག་མོ་གཡས་བྷ་ར༔ གཡོན་པས་ནད་ཀྱི་རྐྱལ་པ་འཛིན༔ རྡོ་རྗེའི་གྲྭའུ་ཕྲག་ལོ་བཀལ༔ འཁོར་དང་བཅས་པ་མ་ལུས་ཀུན༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས་ཐམས་ཅད་ལྷ་མོས་བཟློག་ཏུ་གསོལ༔ ཨོ་པྲ་ཏ་མུ་ཁ་བྷྱོཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ ལྷ་མོ་རྡོ་རྗེ་གཡུ་སྒྲོན་མ༔ སྐུ་མདོག་དཀར་གསལ་ཞལ་གཅིག་པ༔ ཕྱག་གཉིས་མདའ་དར་མེ་ལོང་འཛིན༔ ཤ་བ་ཡུ་མོ་ཆིབས་སུ་ཆིབས༔ འཁོར་དུ་བརྟན་མ་བཅུ་གཉིས་རྣམས༔ བུད་མེད་མཛེས་མའི་གཟུགས་ཅན་ལ༔ རིན་ཆེན་རྒྱན་སྤྲས་སྣ་ཚོགས་ཐོགས༔ མཐུན་པའི་
ཆིབས་པ་སྣ་ཚོགས་ཆིབས༔ གཡུ་སྒྲོན་བརྟན་མ་བཅུ་གཉིས་ནི༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ ཨོཾ་མ་མ་ཧཱུྃ་ཧཱུྃ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དབང་ཕྱུག་སྲིན་མོ་གཡག་གདོང་ནི༔ སྐུ་མདོག་སྨུག་མོ་ཞལ་གཅིག་མ༔ ཕྱག་གཉིས་གཡས་པས་རྡོ་རྗེ་སྟེ༔ གཡོན་གྱི་ཕྱག་ན་བྷན་འཛིན༔ དེ་ལ་དབང་ཕྱུག་ཉེར་བརྒྱད་ཀྱི༔ ཀུན་༼གྱི་བསྐོར་བ་མ་ལུས་ཀུན༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཟཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ བྷྱོ་ས་ཡ་སི༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དཔལ་ལྡན་ལྷ་མོ་ཁོ་ལེ་དམར༔ ཞལ་གཅིག་ཕྱག་གཉིས་གཡས་པ་ཡིས༔ ཁ་ཊཾ་གཡོན་པས་རླུང་ཞགས་འཛིན༔ ཞབས་གཉིས་བསྒྲད་དེ་མེ་ཏོག་སྟེང་༔ འཁོར་དུ་སྣང་སྲིད་མ་མོས་བསྐོར༔ ལྷ་མོ་ཁོ་ལེ་འཁོར་དང་
བཅས༔ འདིར་གཤེགས་བརྒྱན་པའི་གཏོར་མ་བཞེས༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས༔ ཐམས་ཅད་ལྷ་མོས་བཟློག་ཏུ་གསོལ༔ བྷྱོ་མ་མ་མ་བྷྱོཿ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ དུད་སོལ་མ་དང་རང་བྱུང་མ༔ ཨེ་ཀ་ཙ་ཏི་བ་ལམ་མ༔ ལྷ་མོ་ཁོ་ལེ་ལ་སོགས་པ༔ ལྷ་མོའི་རིགས་གྱུར་མ་ལུས་རྣམས༔ ཁྱེད་ལ་མཆོད་པ་འབུལ་བ་ནི༔ མེ་ཏོག་བདུག་སྤོས་མར་མེ་དྲི༔ འདོད་ཡོན་སྣ་ཚོགས་མཆོད་པ་འབུལ༔ ཁྱེད་ཀྱི་ཐུགས་དམ་བསྐང་གྱུར་ཅིག༔ ཐུགས་དང་འགལ་བ་མཐོལ་ལོ་བཤགས༔ ནད་རིམས་ཡམས་ནད་མི་མཐུན་སོགས་ཐམས་ཅད་ལྷ་མོས་བཟློག་ཏུ་གསོལ༔ འདན་པ་རྣ་འཇུ་སརྦ་ཏ༔ ཧུར་ཐུམ་ནད་རྣམས་ཞི་བར་མཛོད༔ རྒྱུ་གཟེར་འབྲས་གཟེར་གདུག་པ་ཅན༔ མི་མཐུན་ནད་རྣམས་བཟློག་ཏུ་གསོལ༔ མིག་སེར་གྲེ་འབྱར་གཟེར་ཐུམ་སོགས༔ མདའ་རྒྱབ་ནད་ཀུན་ཞི་བར་མཛོད༔ དཀར་ཁྲ་མ་རྨོང་བདུད་ཀྱི་གླང་༔ མགོ་བསྐོར་བྱེད་པའི་ནད་ཀུན་ཟློག༔ འབྲུམ་པ་བེ་གའི་ནད་རྣམས་
ཟློག༔ གཟེར་ཐུམ་མིག་རྒྱུང་ཧུར་ཐུམ་སོགས༔ སྡང་བའི་ནད་ཀུན་ཞི་བར་མཛོད༔ གདུག་པ་དམར་བཤལ་གྲེ་ཐམ་སོགས༔ སྐད་ཅིག་ནད་ཀུན་ཞི་བར་མཛོད༔ ལོང་བ་ཐོར་པ་ཉ་གས་སོགས༔ ཤིན་ཏུ་མི་སྡུག་ནད་ཀུན་ཟློག༔ མདོར་ན་རིམས་ཀྱི་རིགས་གྱུར་དང་༔ འཐོར་ནད་འཁྱམས་ནད་ནད་ངན་ཟློག༔ བྷྱོ་དེ་ཝི་ཀཱ་ལི་ནི་མུ་ཁྲང་ནན་ནས་ནི༔ ཡི་ཀ་ཡི༔ ཕུ་ཏ་བྷ༔ རཀྵ་བྷྱོཿ མ་ཁྲོ་དྲང་༔ ཧཱུྃ་ཧཱུྃ་བློ་ཟློག༔ བདག་ཉིད་ཡི་དམ་ཐུགས་ཀ་ནས༔ འོད་ཟེར་དཀར་པོ་འཕྲོས་པ་ཡིས༔ མདུན་བསྐྱེད་ལྷ་མོ་འཁོར་བཅས་སྐུལ༔ ལྷ་མོ་རྣམས་ཀྱི་ཐུགས་ཀ་ནས༔ འོད་ཟེར་དཀར་པོ་སྟོན་ཟླའི་མདོག༔ བསིལ་ལ་བདེ་བའི་རེག་བྱ་ཅན༔ འཕྲོས་ནས་བསྲུང་བྱ་ཀུན་ལ་ཕོག༔ ནད་རིམས་ཡམས་ནད་གནོད་པ་ཀུན༔ བ་མོར་ཉི་ཟེར་ཕོག་ལྟར་དག༔ དལ་ཡམས་ནད་སྤྲིན་ཐམས་ཅད་ནི༔ མུན་པར་ཉི་མ་ཤར་བཞིན་གསལ༔ དུད་སོལ་མ་ཡི་རིམས་བཅོས་སྔགས༔ ༀ་ཤྲཱི་དེ་ཝི་ཀཱ་ལི་བློ༔ ཀཱ་ལི་ཀཱ་ལི་ནེ༔ ཛཱ་ར་ཤཱནཾ་ཀུ་རུ་ཡེ་སྭཱ་ཧཱ༔ རང་བྱུང་མའི་འགོས་ནད་ཀུན་སྲུང་སྔགས༔ བྷྱོ་ཏྲག་རཀྟ་དྷེ་ཝི་ཛཱ་ར་ཨ་མར་ཏི་ཤཱནྟཾ་རཀྵ་ཨེ་ཀ་ཙ་ཏིས་རིམས་བཟློག་
སྔགས༔ བྷྱོ་ཨེ་ཀ་ཙ་ཏི་བྷྱོཿ ཛཱ་ར་ཤཱནྟིཾ་ཀུ་རུ་སྭཱ་ཧཱ༔ བ་ལམ་དྲིལ་སྣའི་རིམས་གཅོད་སྔགས༔ དེ་ཉིད་སྙིང་ནས་འོད་དཀར་འཕྲོས༔ རིམས་ནད་ཐམས་ཅད་བཅད་པར་བསམ༔ ཨོཾ་ས་ལི་ས་ནི་ཨ་ནེ་མ་རཀྵ་བྷྱོཿ ཛཱ་ར་ཤཱནཾ་ཀུ་རུ་སྭཱ་ཧཱ། སྤྱང་ཞོན་མའི་ནད་གཅོད་སྔགས༔ ཨོ་བྷྱོ་རུ་ཊ་ཀཱ་ལི༔ མ་ནུ་བ་སུ་ཛཱ་ར་རཀྟ་ཤཱནྟིཾ་ཀུ་རུ་སྭཱ་ཧཱ༔ ལྷ་མོ་ཁོ་ལེའི་རིམས་བཅོས་སྔགས་དམིགས་ནི༔ བློ་མ་མ་ཛ་ར་ཤཱནྟི་ཀུ་རུ་སྭཱ་ཧཱ༔ མདུན་གྱི་ལྷ་མོ་ཁོ་ལེ་ཡི༔ ཕྱག་ནི་གཡས་པའི་ཁ་ཊཾ་ལས༔ འོད་ཟེར་དཀར་དམར་མཐིང་གསུམ་འཕྲོས༔ གང་ཕོག་ནད་ཀྱིས་མི་ཚུགས་བསམ༔ དེ་ལྟར་སྲུང་དང་བཅད་པའི་སྔགས༔ འདོན་གལ་གང་ཆེ་རིགས་པས་བརྟག༔ མང་ཉུང་ཅི་འགྲུབ་སྐབས་དང་བསྟུན༔ དེ་ནས་གཏོར་མ་བཀྱག་བཅུག་ལ༔ བཀའ་སྲུང་དཀོར་བདག་ལྷ་མོ་རྣམས༔ རྟེན་མཆོད་སྲུང་ཕྱིར་བརྟན་པར་བཞུགས༔ དེ་མིན་ལྷ་མོ་དཔོན་དང་གཡོག༔ སྣང་སྲིད་མ་མོ་མཁའ་འགྲོའི་ཚོགས༔ རིམས་ནད་དལ་ཡམས་ཐམས་ཅད་ནི༔ བྱུང་ཡང་མ་མོ་རྣམས་ལས་བྱུང་༔ བསྟིམ་ཡང་མ་མོ་རྣམས་ལ་བསྟིམ༔ ནད་རྐྱལ་རྣམས་ཀྱི་ཁ་ད་ཆིངས༔ མཚོན་གྱི་གྲུ་གུ་མྱུར་དུ་ཟློག༔ ནད་སྤྲིན་སྔོ་དམར་བཀྲལ་པ་བསྡུས༔ རང་ནད་རང་གིས་
ཕྱུངས་ལ་གཤེགས༔ རང་དུག་རང་གིས་ཕྱུངས་ལ་གཤེགས༔ རང་མཚོན་རང་གིས་ཁྱེར་ལ་གཤེགས༔ བསམ་པ་ངན་པ་བྱས་པ་སོལ༔ ལག་རྒྱ་ངན་པས་བཅིངས་པ་ཁྲོལ་ཁྲམ་ལ་བཏབ་ན་ཁྲམ་ཤིང་ཕྱེས༔ རྩིས་ལ་བབ་ན་རྩིས་ལས་དབྱུང་༔ ཤྭ་ལ་བབ་ན་གཞན་ལ་སྤོས༔ མ་ལྟར་བྱམས་པའི་སེམས་ལྡན་ཞིང་༔ སྲིང་ལྟར་གདུང་བའི་བརྩེ་སེམས་བཅས༔ སོ་སོ་རང་རང་གནས་སུ་གཤེགས༔ མུ་ལེ་མཐིང་མཚོའི་གནས་སུ་གཤེགས༔ ཡོངས་འདུས་ཤིང་གི་རྩ་བར་གཤེགས༔ ཨོ་རྒྱན་མཁའ་འགྲོའི་ཡུལ་དུ་གཤེགས༔ དུར་ཁྲོད་ཆེན་པོ་བརྒྱད་དུ་གཤེགས༔ བྱང་ཤར་ཆོས་དབྱིངས་གནས་སུ་གཤེགས༔ ཨོཾ་ཤྲཱི་དེ་ཝི་ཀཱ་ལི་ས་པཱ་རི་ཝཱ་ར་གཙྪགཙྪ༔ བཛྲ་མུཿ ཞེས་བརྗོད་བྱང་ཤར་ཕྱོགས་སུ་འབུལ༔ འདི་ལྟར་སྒྲིག་ཏུ་རུང་ངམ་ཞེས༔ ཡི་དམ་ལྷ་ལ་གསོལ་བཏབ་པས༔ དཔལ་ལྡན་ལྷ་མོ་དཔོན་གཡོག་དང་མི་དང་མི་ལ་གཏམ་པ་ལྟར༔ བྱས་པའི་གནམ་ཆོས་ལྷ་མོའི་བསྐོར༔ བྱིན་རླབས་ཆེ་ཞིང་བཀའ་གཉན་པས༔ རི་དྭགས་ལ་སོགས་སྡིག་ཅན་དང་༔ དམ་མེད་རྣམས་ལ་སྤེལ་མི་བྱ༔ འདི་ཉིད་དེ་ལྟར་སྒྲིགས་རུང་སྟེ༔ ཅུང་ཙམ་ཕན་ཐོགས་འབྱུང་ངོ་གསུངས༔ དེ་ཕྱིར་རིམས་ནད་ལ་འཇིགས་པའི༔ རང་གཞན་ཡ་ང་སྐྱེ་དུས་བྲིས༔ འདི་ནི་ཚར་རེ་རྒྱུན་ཁྱེར་
རམ༔ ནམ་དགོས་ཚར་རེ་བཏོན་ཀྱང་རུང་༔ ཡང་ན་གལ་ཆེན་དགོས་བྱུང་ན༔ དམར་གཏོར་གཙོ་བོ་ལྷ་གྲངས་སམ༔ ཡང་ན་ཆེ་བཟང་གཅིག་ལ་ནི༔ གསོ་བྲན་བྱ་ཞིང་བརྒྱ་ཚར་བསོག༔ དཔོན་སློབ་མང་ན་ཉིན་རྫོགས་སོ༔ གཅིག་གིས་འདོན་ན་ཞག་ལ་རུང་༔ དེ་ཚེ་གོང་གི་བསྙེན་པར་འབད༔ དེ་ནས་དུས་ལ་བབ་ཚེ་ཕུལ༔ ཞེས་པ་རཱ་ག་ཨ་སྱས་བསྒྲིགས༔ འདི་བྲིས་ཉེས་འགལ་གང་མཆིས་པ༔ ལྷ་མོ་འཁོར་དང་བཅས་ལ་བཤགས༔ དགེ་བས་འདི་ལ་འབྲེལ་ཐོགས་ཀུན༔ ཡམས་ནད་འཚེ་བ་ཀུན་ལས་ཐར༔ བཀྲ་ཤིས་ཕུན་སུམ་ཚོགས་པར་ཤོག༔ མངྒ་ལཾ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།