གནམ་ཆོས་ལས་གནས་བརྒྱད་བསྐང་བ་བསམ་པ་མྱུར་འགྲུབ།

གནམ་ཆོས་ལས་གནས་བརྒྱད་བསྐང་བ་བསམ་པ་མྱུར་འགྲུབ་བཞུགས་ལགས་སོ།། ཧཱུྃ། འཇིག་རྟེན་འདས་དང་མ་འདས་མཚམས། །རྒྱ་མཚོ་ཆེན་པོ་དྭངས་བའི་ནང་། །འཇམ་།དཔལ་ཐུགས་ལས་སྤྲུལ་པའི་སྐུ། །དགེ་བསྙེན་ཆེན་པོའི་ཡང་རྗེ་སྟེ། །ནཱ་ག་རཀཱའི་ཐུགས་དམ་བསྐང་། །དེ་ཉིད་ཞི་བ་ནོར་ལྷའི་ཚུལ། །མི་མགོན་དཀར་པོའི་ཐུགས་དམ་བསྐང་། །དེ་ཡི་བཀའ་འཁོར་ཀླུ་ཆེན་བརྒྱད། །བཙུན་མོ་སྲས་བཅས་ཐུགས་དམ་བསྐང་། །གནས་ཆེན་དེ་ཝི་ཀོ་ཊ་ན། །གནས་བཅས་གཏེར་གྱི་སྲུང་མ་མཆོག །དགེ་བསྙེན་སྨྱོ་ཁའི་ཐུགས་དམ་བསྐང་། །གནས་བརྒྱད་མཚན་བརྒྱད་ལྡན་པ་ཡི། །བསྟན་སྲུང་ཆེན་པོའི་ཐུགས་དམ་བསྐང་། །དེ་ཡི་བཀའ་བློན་ཀླུ་བདུད་ནི། །འབོ་རང་ནག་པོའི་ཐུགས་དམ་བསྐང་། །རྒྱ་གར་གྲོང་ཁྱེར་སྒྲ་སྒྲོགས་དང་། །སོགས་གི་ཆུ་ལ་གནས་བཅས་པ་ཡི། །རྡོ་རྗེ་རྒྱལ་པོའི་ཐུགས་དམ་བསྐང་། །ཀླུ་མོ་ན་ར་སིང་ཧ་དང་། །ཀླུ་ཆེན་མིང་སྲིང་ཐུགས་དམ་བསྐང་། །བར་བློན་ཆེན་པོ་དྲག་རྩལ་ཅན། །དགེ་བསྙེན་ཆེན་པོའི་ཐུགས་དམ་བསྐང་། །སྐུ་མདོག་ནག་པོ་འཇིགས་པའི་གཟུགས། །གཡས་པས་

སྦྲུལ་ཞགས་གཡོན་ནད་རྐྱལ། །ཆིབས་སུ་སྦལ་པ་གྲོ་མོ་ཆིབས། །བསྐང་ངོ་ཁྱེད་ཀྱི་ཐུགས་དམ་བསྐང་། །སྤྲུལ་པ་མི་ནག་རྟ་རུ་ནག །གཡས་པས་མདུང་དར་ནག་པོ་ཕྱར། །ནག་ཕྱོགས་ལྷ་འདྲེ་དབང་དུ་སྡུས། ། གཡོན་པས་རུ ་མཚོན་དཀར་པོ་ཕྱར། །དཀར་ཕྱོགས་ལྷ་འདྲེ་བྲན་དུ་ཁོལ། །བསྐང་ངོ་མཆོད་དོ་ཐུགས་དམ་བསྐང་། །ཡང་ཅིག་སྤྲུལ་པ་འགྱེད་ཙམ་ན། །བརྗེ་སེར་པོ་གསེར་ཞུ་ཅན། །གཡས་པས་མདུང་དར་ནག་པོ་ཕྱར། ། གཡོན་པས་རུ ་མཚོན་ནག་པོ་འཛིན། །རི་བོང་ནག་པོ་དིལ་འོབ་ཙམ། །ཆིབས་ནས་དགྲ་ལ་ཡེ་འདྲོགས་གཏོང་། །བསྐང་ངོ་ཁྱེད་ཀྱི་ཐུགས་དམ་བསྐང་། །དགེ་བསྙེན་སྤྲུལ་པ་འགྱེད་ཙམ་ན། །སྐུ་ལ་ཆོས་གོས་ངུར་སྨྲིག་གསོལ། །དབུ་ལ་པད་ཞྭ་སེར་པོ་གྱོན་། །ཕྱག་གཡས་མདུང་དར་དཀར་པོ་ཕྱར། །གཡོན་པས་སྦྲུལ་ནག་ཞགས་པ་འཛིན། །ཆིབས་སུ་རྟ་ནག་རྟིང་དཀར་ཆིབས། །བསྐང་ངོ་ཁྱེད་ཀྱི་ཐུགས་དམ་བསྐང་། །གཉན་གྱི་སྤྲུལ་པ་འགྱེད་ཙམ་ན། །མི་དཀར་ཉ་ཡི་མགོ་བོ་ཅན། །ཆིབས་སུ་ཉ་ཆེན་དཀར་པོ་བཅིབས། །ཆུ་བོ་ཆུ་མདོ་ཀུན་ཏུ་རྒྱུགས། །ཕྱག་གཡས་ཉ་ཡི་རྒྱལ་མཚན་

དང་། །གཡོན་པས་ཉི་མགོ་དབྱུག་ཏོ་འཛིན། །བསྐང་ངོ་ཁྱེད་ཀྱི་ཐུགས་དམ་བསྐང་། །གནོད་སྦྱིན་སྤྲུལ་པ་འགྱེད་པའི་ཚེ། །ཚོང་དཔོན་སྐྱེས་བུའི་ཆ་བྱད་ཅན། །སྐུ་ལ་ཕྲུག་སྔོན་ན་བཟའ་གསོལ། །དབུ་ལ་རས་དཀར་ཐོད་ཅན་བཅིང་། །གསེར་གཡུ་བྱུ་རུའི་རྣ་བརྒྱན་མཛེས། །ཕྱག་ན་ནོར་བུ་ནེའུ་ལེ་བསྣམས། །ཆིབས་སུ་སྔོན་པོ་ཆུ་རིས་བཅིབས། །བསྐང་ངོ་ཁྱེད་ཀྱི་ཐུགས་དམ་བསྐང་། །ཀླུ་བཙན་སྤྲུལ་པ་འགྱེད་ཙམ་ན། །མི་དམར་རྟ་དམར་དམག་ཆས་ཅན། །སྦྲུལ་མགོ་དྲུག་གི་གདེངས་ཀ་ལ། །སྦྲུལ་གྱི་མཇུག་མས་སྐེད་ལ་དཀྲིས། །འབྲུག་སྒྲ་ལྡིར་ཞིང་གློག་འོད་འཁྱུག །གནམ་ལྕགས་ཐོག་སེར་དྲག་ཏུ་འབེབས། །བསྐང་ངོ་ཁྱེད་ཀྱི་ཐུགས་དམ་བསྐང་། །ཡུམ་གཅིག་ཀླུ་མོ་གསེར་གྱི་མདོག །ཕྱག་གཡས་ནོར་བུའི་བེ་ཅོན་བསྣམས། །གཡོན་པས་གསེར་གྱི་པདྨ་འཛིན། །སྐུ་སྨད་མཚོ་ཡི་ནང་ན་ནུབ། །མཚོ་སྨན་མཛེས་སྡུག་འཁོར་གྱིས་བསྐོར། །སྙན་པའི་གླུ་ལེན་བྲོ་ཡང་འཁྲབས། །བསྐང་ངོ་ཁྱེད་ཀྱི་ཐུགས་དམ་བསྐང་། །སློབ་དཔོན་མི་དཔོན་ཁྱེའུ་གཟུགས། །ཐོད་པ་དཀར་པོ་འོད་ཟེར་འཕྲོ། །ཚེས་

བརྒྱད་ཟླ་བའི་གཟུགས་ཀྱི་མཛེས། །ཕྱག་གཉིས་ཐུགས་ཀར་ཕྱག་མཚན་ནི། །སྦལ་པ་སྦྲུལ་གྱི་མཇུག་ཅན་འཛིན། །བསྐང་ངོ་ཁྱེད་ཀྱི་ཐུགས་དམ་བསྐང་། །འཁོར་གྱི་རྒྱལ་རིགས་རྗེའུ་རིགས། །དམངས་རིགས་གདོལ་པ་བྲམ་ཟེ་སོགས། །ཀུན་གྱི་ཐུགས་དམ་བསྐང་གྱུར་ཅིག །བདག་ཅག་དཔོན་སློབ་ཡོན་མཆོད་རྣམས། །ཚེ་རབས་ལྔ་བརྒྱ་ཚུན་ཆད་ནས། །ཀླུ་གཉན་ཐུགས་དང་ཅི་འགལ་བ། །དེ་དག་ཐམས་ཅད་མཐོལ་ལོ་བཤགས། །ཕ་མྱེས་སྔ་རབས་མན་ཆད་ནས། །བུ་ཚ་ཕྱི་རབས་ཡན་ཆད་ཀྱིས། །ཁྱེད་ཅག་ཐུགས་དང་འགལ་བའི་ལས། །གང་མཆིས་ཐམས་ཅད་མཐོལ་ལོ་བཤགས། །བདག་ཅག་དཔོན་སློབ་ཡོན་མཆོད་ལ། །ཀླུ་དང་ས་བདག་ལས་གྱུར་པའི། །ནད་ཀུན་སྐད་ཅིག་ཉིད་ལ་སོལ། །བཅོལ་བའི་ཕྲིན་ལས་འགྲུབ་པར་མཛོད། །ཨོཾ་ས་མ་ཡཱ༔ ཨཱས་མ་ཡཱ༔ ཧཱུྃ་ས་མ་ཡཱ༔ ཨོཾ་སརྦ་ནཱ་ག་ནཱ་གི་ཨོཾ་བཛྲ་ས་མ་ཡཱ་སོགས། ཞེས་དགེ་བསྙེན་བསྐང་གསོལ་གཉིས་རཱ་ག་ཨ་སྱས་སྦྱར་བ་ལྟར། བླ་མ་མཐར་ཕྱིན་ཞེས་བྱས་བྲིས། སརྦ་མངྒ་ལཾ།། །།