ཉམས་སུ་བླངས་པ་ལས་བྱུང་བའི་འབྲས་བུའི་རྒྱུད་ཀྱི་མངོན་པར་རྟོགས་པ།
དེ་ལྟར་ལམ་རིམ་པ་ཅན་དུ་བསླབ་བམ་ཅིག་ཅར་དུ་བསླབ་ཀྱང་རུང་། ནང་ལ་གཞོལ་བ་བཞིན་ནམ་ཕྱི་ལ་གཞོལ་བ་བཞིན་པས་གང་ལ་བསླབ་ཀྱང་རུང་སྟེ། འབྲས་བུ་འགྲུབ་པའི་འབྲས་བུའི་རྒྱུད་ཀྱི་མངོན་པར་རྟོགས་པ་ནི་གཉིས་ཏེ། གནས་སྐབས་ཀྱི་འབྲས་བུ་ས་བཅུ་གཉིས་འགྲུབ་པའི་ཚུལ་དང་། མཐར་ཐུག་གི་འབྲས་བུ་སངས་རྒྱས་ཀྱི་ས་འགྲུབ་པའི་ཚུལ་བསྟན་པའོ། །དེ་ལ་གནས་སྐབས་ཀྱི་འབྲས་བུ་སའི་རིམ་པ་ལ་གཉིས། སྤྱིར་ས་ཐོབ་པ་གནས་སྐབས་རྣམ་གྲངས་བཞིར་གཞག་པ་དང་། སའི་མངོན་པར་རྟོགས་པ་ཞིབ་ཏུ་བཤད་པའོ། །དང་པོ་ནི་མདོ་སྡེ་རྒྱན་ལས། ས་ཐོབ་པ་ནི་མོས་པ་དང་། །སྤྱོད་པ་དག་ལ་འཇུག་པ་དང་། །རྟོགས་པའི་ཕྱིར་དང་ས་རྣམས་ནི། །གྲུབ་པའི་སྒོ་ནས་རྣམ་པ་བཞི། །ཞེས་གསུངས་ཏེ། མོས་པས་ཐོབ་པ་ནི་མོས་པ་སྤྱོད་པའི་ས་སྟེ། ས་དང་པོ་ལ་མོས་པ་ཐོབ་པའོ། །སྤྱོད་པས་ཐོབ་པ་ནི་མོས་པས་སའི་ཚེ་ཆོས་སྤྱོད་བཅུ་ལ་འཇུག་པའོ། །རྟོགས་པས་ཐོབ་པ་ནི་ས་དང་པོ་ལ་ཆོས་ཀྱི་དབྱིངས་རྟོགས་ནས་ལམ་ཐམས་ཅད་ཐེག་པ་གཅིག་ཏུ་རྟོགས་པའོ། །གྲུབ་པས་ཐོབ་པ་ནི། ཕྱིར་མི་ལྡོག་པའི་ས་ལ་འཇུག་༼པ༷་ད༷ང་ཞུག༷ས་༽པའི་ཚེའོ། །འདིར་ས་དེ་དག་ལས་གང་ཡིན་ཞེ་ན། རྟོགས་པའི་ས་དང་། གྲུབ་པའི་སའོ། །འོ་ན་ས་དང་པོས་མ་གྲུབ་བམ་ཞེ་ན། ཅུང་ཟད་གྲུབ་སྟེ། མདོ་སྡེ་རྒྱན་ཉིད་ལས། ས་རྣམས་ཐམས་ཅད་མ་གྲུབ་དང་། །གྲུབ་པ་དག་ཏུ་ཤེས་པར་བྱ། །གྲུབ་པ་དག་ཀྱང་མ་གྲུབ་དང་། །གྲུབ་པ་དག་ཏུ་ཡང་འདོད་དོ། །ཞེས་གསུངས་ཏེ། མོས་སྤྱོད་ནི་མ་གྲུབ་པའོ། །ལྷག་མ་གཉིས་ནི་གྲུབ་པའོ། །གྲུབ་པ་ལ་ས་བདུན་པ་མན་ཆད་ནི་མ་གྲུབ་པའོ། །དེ་ཡན་ཆད་ནི་གྲུབ་པའོ། །དེ་ལ་འདིར་རྟོགས་པ་དང་གྲུབ་པའི་སའམ་མ་གྲུབ་པ་༼དང་གྲུབ༷་པ༷་༽ཞེས་བྱ་བ་ཉིད་དུའང་བསྡུར་བཏུབ་པས། ས་དང་པོ་ཡན་ཆད་ཀྱི་མངོན་པར་རྟོགས་པ་ཡིན་ནོ། །སྤྱི་དོན་གཉིས་པ་མངོན་པར་རྟོགས་པ་ཞིབ་ཏུ་བཤད་ན། ས་རེ་ལ་བཀའ་དང་བསྟན་བཅོས་དག་ལས་དུ་མ་བཤད་ཀྱང་འདིར་བླ་མའི་གསུང་གིས་ས་རེ་རེ་ལ་བསྡུས་པའི་དོན་བཞི་བཞི་སྟེ། ས་གྲུབ་པའི་རྒྱུ་གང་ཡིན་པ་དང་། རྟོགས་པའི་ཁྱད་པར་དང་། གྲུབ་པའི་རྟགས་དང་། མིང་གི་དོན་ནོ། །དང་པོ་ལ་གཉིས། བརྒྱུད་པའི་རྒྱུ་དང་། དངོས་ཀྱི་རྒྱུའོ། །དང་པོ་ནི་སྤྱོད་པ་དང་། ཉེ་རྒྱུ་སྟེ། དེ་ཡང་ཀུན་འདར་གྱི་སྤྱོད་པ་ལ་བརྟེན་ནས་དྲོད་ཆེན་པོ་མཐོང་ལམ་ཐོབ་སྟེ། དེ་ནས་ཀུན་བཟང་གི་སྤྱོད་པ་སྤྱད་པ་ཡིན་ཏེ། དེའང་མྱུར་དུ་འགྲུབ་པའི་དབང་དུ་བྱས་ན་ཀུན་བཟང་ཟླ་བ་གཅིག་ཏུ་སྤྱད་པས་ས་བརྒྱད་པ་མངོན་དུ་བྱས་ནས། དེ་ནས་ཕྱག་རྒྱ་ལ་བརྟེན་ནས་ནང་རྟེན་འབྲེལ་བསྒྲིགས་ནས་ཉེ་རྒྱུ་ཞག་བདུན་གྱིས་ས་ལྷག་མ་རྣམས་འགྲུབ་པར་འགྱུར་བ་ཡིན་ཏེ། དེའང་རྡོ་རྗེ་གུར་ལས། ཉི་མ་གཅིག་གིས་འགྲུབ་པར་འགྱུར། །ཞེས་བྱ་བ་ལ་སོགས་པ་གསུངས་ཏེ། སྔར་ཉེ་རྒྱུའི་སྐབས་སུ་བརྗོད་ཟིན་ཏོ། །འདི་ཕ་རོལ་ཏུ་ཕྱིན་པ་དང་ཡང་མཐུན་ཏེ། གསང་ཆེན་ཐབས་ལ་མཁས་པ་ལས་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་ནི་འདོད་ན་ཞག་བདུན་ནའང་བླ་ན་མེད་པའི་བྱང་ཆུབ་འགྲུབ་ལ། འདོད་ན་བསྐལ་པ་བརྒྱ་ནའང་འགྲུབ་བོ་ཞེས་བྱ་བ་ལ་སོགས་པ་གསུངས་སོ། །ཡང་དུས་རིང་དུ་སྡོད་པའི་དབང་དུ་བྱས་ན། ཀུན་འདར་གྱི་སྤྱོད་པའི་མཇུག་ཏུ་ཉེ་རྒྱུའི་ཆ་མཐུན་སྤྱད་ནས། དྲོད་ཆེན་པོ་ཐོབ་པས་ཀུན་བཟང་གི་སྤྱོད་པས་ཟླ་བའམ། ལོའམ། བསྐལ་པ་ལ་སོགས་པ་དུས་ཇི་སྲིད་འདོད་པར་སྤྱད་པས། ས་བཅུ་གཉིས་མངོན་དུ་བྱས་ཏེ། ཉེ་རྒྱུ་ཞག་བདུན་གྱིས་འབྲས་བུ་འགྲུབ་པའང་ཡོད་དོ། །གཉིས་པ་དངོས་ཀྱི་རྒྱུ་ནི་དཀྱིལ་འཁོར་བཞི་སྟེ། དེའང་གཉིས་ནི་༼ལུས༷་༽རྩ་དང་། རྩའི་ཡི་གེ་དང་། ཁམས་བདུད་རྩི་དང་། རླུང་རྣམས་དབུ་མའི་ནང་དུ་རིམ་གྱིས་ཐིམ་པས་ས་རྣམས་རིམ་གྱིས་རྟོགས་པ་ཡིན་ནོ། །དེ་ལ་རྩ་ནི་ཕྲ་མོ་བྱེ་བ་ཕྲག་ཕྱེད་དང་བཞི། དེ་ལས་བསྡུ་ན་ཡན་ལག་གི་རྩ་གཙོ་བོར་གྱུར་པ་སྟོང་ཕྲག་བདུན་ཅུ་རྩ་གཉིས། ཡི་གེ་དགོད་པའི་རྩ་གཙོ་བོར་གྱུར་པའི་དབང་དུ་བྱས་ན་བརྒྱ་ཉི་ཤུ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་སོ་བདུན་དག་པ་ལ་དགོངས་ནས་སྦས་པའི་རྩ་ལྔ་བསྣན་པས་སུམ་ཅུ་སོ་བདུན་ནམ། བྱང་ཆུབ་ཀྱི་སེམས་འབབ་པ་གཙོ་བོའི་དབང་དུ་བྱས་ན་རྩ་སུམ་ཅུ་སོ་གཉིས་སོ། །རྩ་ཡི་གེ་ནི་སུམ་ཅུ་སོ་གཉིས་པོ་དེ་ཉིད་དང་། གཞན་ཡང་ཡི་གེའི་དབྱིབས་སུ་གནས་པ་རྣམས་སོ། །བྱང་ཆུབ་ཀྱི་སེམས་ནི་མི་ཕྱེད་མ་ནི་སོ་དང་སེན་མོ་སྐྱེད་པའི་ཁམས་ཀྱི་དྭངས་མ་གནས་སོ་ཞེས་བྱ་བ་ལ་སོགས་པ་རྣམས་སོ། །རླུང་ནི་ལས་ཀྱི་རླུང་ཉི་ཁྲི་ཆིག་སྟོང་དྲུག་བརྒྱ་སྟེ། དེ་ཉིད་ལ་ཡུལ་ཉི་ཤུ་རྩ་བཞིའི་དབང་དུ་བྱས་ན་ཡུལ་རེ་རེ་ན་དགུ་བརྒྱ་པ་ཕྲག་རེ་རེ་གནས་ལ། ཡུལ་སུམ་ཅུ་སོ་གཉིས་ཀྱི་དབང་དུ་བྱས་ན་ཡུལ་རེ་ན་དྲུག་བརྒྱ་བདུན་ཅུ་རྩ་ལྔ་པ་རེ་གནས་པ་སྟེ། འདིར་ནི་སུམ་ཅུ་སོ་གཉིས་པ་གཙོར་བྱའོ། །དེ་ལྟ་བུའི་རྩ་རྣམས་ཀྱི་རླུང་དང་བྱང་ཆུབ་ཀྱི་སེམས་རྣམས་དབུ་མར་རིམ་གྱིས་ཐིམ་པ་ལས་ས་རྣམས་ཀྱི་རྟོགས་པ་སྐྱེའོ། །དེ་ལ་ཡུལ་དུ་དུ་ལས་ས་རེའི་རྟོགས་པ་སྐྱེ་སྙམ་ན། རྒྱུད་ཁ་ཅིག་ལས་གྲངས་ལ་ངེས་པ་མ་བཤད། ཁ་ཅིག་ལས་བཤད་པ་ལ་མང་ཉུང་མི་མཐུན་པ་སྣང་ཡང་བཤད་པའི་རྒྱུད་ཀྱི་རྗེས་སུ་འབྲངས་ན་ཐོག་མར་ས་གཉིས་དང་། ཐ་མར་ས་གཉིས་ནི་ཡུལ་བཞི་བཞིའི་ས་རེ་རེའི་རྟོགས་པ་སྐྱེ་ལ། བར་གྱི་ས་བརྒྱད་ལ་ནི་ས་རེ་རེ་ལ་ཡུལ་གཉིས་གཉིས་ཀྱི་རླུང་སེམས་ལ་སོགས་ཐིམ་པ་ལས་སྐྱེ་བར་བརྟག་པར་དྲུག་པ་ལས་གསལ་ལོ། །མཇུག་ཏུ་ས་བཅུ་གསུམ་པ་ནི་རླུང་སེམས་ཐམས་ཅད་ཀྱི་སྟོབས་བསྡམས་པས་སྙིང་གའི་ནང་དུ་དབུ་མ་ཉིད་ལ་བསྟེན་པའི་སྦས་པའི་རྩ་ལྔས་གཙོ་བྱས་ཏེ། སྤྱི་གཙུག་གི་དབུ་མར་ཐིམ་པ་ལས་བཅུ་གསུམ་པ་སངས་རྒྱས་ཀྱི་སའོ། །སྟོབས་བསྡམ་པ་ཅིའི་ཕྱིར་ཞེ་ན། རྩ་ལྔ་པོ་འདི་ན་རླུང་དང་བྱང་ཆུབ་ཀྱི་སེམས་གྲངས་སུ་བྱས་པས་སྔར་གྱི་རྣམ་པ་ཉིད་ལས་མེད་པའི་ཕྱིར་རོ་ཞེས་གསུངས་སོ། །དབུ་མའི་མདུད་པའི་གྲངས་ལ་སོགས་པ་ནི་འདིར་མི་གསུངས་སོ། །རྒྱུ་བསྟན་པའོ། །རྟོགས་པའི་ཁྱད་པར་ནི་ས་དང་པོ་ལ་ཆོས་ཀྱི་དབྱིངས་ཀུན་ཏུ་འགྲོ་བ་བདག་མེད་པ་ཚེས་གཅིག་པའི་ཟླ་བ་ལྟ་བུར་རྟོགས། གཉིས་པ་ནས་བརྩམས་ཏེ་བཅུ་གསུམ་པའི་བར་དུ་ཇེ་གསལ་ཇེ་གསལ་རྟོགས་ཏེ། ཚེས་གཉིས་ནས་བཅོ་ལྔའི་ཟླ་བ་བཞིན་ནོ། །རྟོགས་པའི་ཁྱད་པར་རོ། །གྲུབ་པའི་རྟགས་ལ་གཉིས་ཏེ། ས་དང་པོའི་རྟགས་དང་། ས་ལྷག་མ་རྣམས་དེས་བསྒྲེའོ། །དང་པོ་ནི་བཅུ་གསུམ༼གཉི༷ས་༽ཏེ། མདོ་སྡེ་ས་བཅུ་པ་ལས། ཇི་སྐད་དུ་སྐད་ཅིག་ཐང་ཅིག་ཡུད་ཙམ་གཅིག་ལ་ཏིང་ངེ་འཛིན་བརྒྱ་རབ་ཏུ་ཐོབ་པ་དང་། དེ་དག་ལ་སྙོམས་པར་འཇུག་པ་དང་། སངས་རྒྱས་བརྒྱ་མཐོང་བ་དང་། དེ་དག་གི་བྱིན་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང་། ཞིང་བརྒྱར་ཡང་འགྲོ་བ་དང་། འཇིག་རྟེན་གྱི་ཁམས་བརྒྱ་སྣང་བར་བྱེད་པ་དང་། སེམས་ཅན་བརྒྱ་ཡོངས་སུ་སྨིན་པར་བྱེད་པ་དང་། བསྐལ་པ་བརྒྱར་གནས་པར་བྱེད་པ་དང་། བསྐལ་པ་བརྒྱ་ལ་སྔོན་དང་ཕྱི་མའི་མཐར་འཇུག་པ་དང་། ཆོས་ཀྱི་སྒོ་བརྒྱ་རྣམ་པར་འབྱེད་པ་དང་། ལུས་བརྒྱ་ཀུན་ཏུ་སྟོན་པ་དང་། ལུས་རེ་རེ་ལ་ཡང་འཁོར་བྱང་ཆུབ་སེམས་དཔའ་བརྒྱ་བརྒྱ་དང་ལྡན་པར་ཀུན་ཏུ་སྟོན་པའོ་ཞེས་གསུངས་པ་ལྟ་བུ་སྟེ། དེ་རྣམས་བསྡུ་བའི་ཚིགས་སུ་བཅད་པ་ནི། སྙོམས་འཇུག་༡མཐོང་༢དང་བྱིན་རླབས་ཤེས༣། །གཡོ་༤འགྲོ་༥སྣང་༦མིན༼སྨི༷ན་༧༽བསྐལ་པར་གནས༨། །སྔོན་༩ཕྱི་ཆོས་སྒོ་༡༠ལུས་བརྒྱ་སྟོན༡༡། །གཅིག་༡༢ལ་བསྐོར་བའི་བརྩོན་འགྲུས་རྩོམ། །ཞེས་བྱ་བར་རྟོགས་པར་བྱའོ། །དེ་ལྟར་ན་ཡོན་ཏན་བཅུ་གསུམ་༼གཉི༷ས་༽པོ་དེ་དག་ཀྱང་བརྒྱ་ཕྲག་ནི་ས་དང་པོའིའོ། །གཉིས་པ་ས་ལྷག་མ་རྣམས་དེས་བསྒྲེ་བ་ནི་བཅུ་གཅིག་སྟེ་བཅུ་གསུམ་༼གཉི༷ས་༽པོ་དེ་ཉིད་ས་གཉིས་པ་ལ་ནི་བཅུ་གསུམ༼གཉི༷ས༽་པ་སྟོང་ཐོབ་བོ། །གསུམ་པ་ལ་ནི་འབུམ་ཐོབ་བོ། །བཞི་པ་ལ་ནི་བྱེ་བ་ཕྲག་བརྒྱ་ཐོབ་བོ། །ལྔ་པ་ལ་ནི་བྱེ་བ་སྟོང་ཐོབ་བོ། །དྲུག་པ་ལ་ནི་བྱེ་བ་འབུམ་ཐོབ་བོ། །བདུན་པ་ལ་ནི་བྱེ་བ་ཁྲག་ཁྲིག་ཕྲག་འབུམ་ཐོབ་པར་ཤེས་པར་བྱའོ། །དེ་ཡན་ཆད་ཡོན་ཏན་དེ་དག་ལ་གྲངས་ཀྱིས་ཡོངས་སུ་བགྲང་བར་མི་ནུས་པས། རྡུལ་ཕྲ་རབ་ཀྱིས་ཡོངས་སུ་བགྲང་ཏེ། བརྒྱད་པ་ལ་ནི་ཇི་སྐད་བཤད་པའི་ཡོན་ཏན་རྣམས་འཇིག་རྟེན་གྱི་ཁམས་འབུམ་གྱི་རྡུལ་ཕྲ་རབ་ཀྱི་རྡུལ་སྙེད་ཐོབ། དགུ་པ་ལ་ནི་ཡོན་ཏན་རྣམས་སྟོང་གསུམ་གྱི་འཇིག་རྟེན་གྱི་ཁམས་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཐོབ། བཅུ་པ་ནི་ཇི་སྐད་དུ་བསྟན་པའི་ཡོན་ཏན་རྣམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཕྲ་རབ་ཀྱི་རྡུལ་སྙེད་ཐོབ་པར་འགྱུར་རོ། །གཞན་ཡང་ས་བཅུ་པ་ལ་གནས་པ་འདིས་ཡོན་ཏན་གཞན་ཡང་རང་གི་ལུས་ཀྱི་བ་སྦུའི་བུ་ག་རེ་རེར་སངས་རྒྱས་བཅོམ་ལྡན་འདས་བགྲང་བ་ལས་འདས་པ་རེ་རེ་ཞིང་ཡང་བྱང་ཆུབ་སེམས་དཔའ་གཞལ་གྱིས་མི་ལང་བའི་འཁོར་མངའ་བ་དག་སྐད་ཅིག་རེ་རེ་ལ་རྣམ་པ་གཞན་དང་གཞན་དག་ཏུའང་སྟོན་པར་ནུས་ལ། དེ་ལས་གཞན་འགྲོ་བ་ལྔའི་འཁོར་བ་མི་ལ་སོགས་པའི་དབྱེ་བ་ཐ་དད་པ་རྣམས་མ་འདྲེས་པར་བ་སྤུའི་ཁུང་བུ་རེ་རེ་ནས་སྐད་ཅིག་རེ་རེ་སྟོན་པར་ནུས་ཤིང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། མིའི་རྒྱལ་པོ་དང་། ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་བརྒྱ་བྱིན་ལ་སོགས་པའི་གཟུགས་བཟུང་ནས་ལྷུན་གྱིས་གྲུབ་པར་ཆོས་སྟོན་པར་ནུས་སོ། །ས་བཅུ་གཅིག་པ་ལ་དེས་དཔེ་བྱ་བར་མི་བཟོད་པ་ཐོབ་པ་དང་། བཅུ་གཉིས་པ་ཡང་གོང་མ་ལས་ཆེས་ཆེ་བ་ཉིད་ཐོབ་པར་ཤེས་པར་བྱའོ། །དེ་ལ་སོགས་པའི་ཡོན་ཏན་གྱི་ཁྱད་པར་རྒྱས་པར་ནི་མདོ་སྡེ་ས་བཅུ་པ་ཉིད་དང་ཐུན་མོང་མ་ཡིན་པའི་མན་ངག་ལས་བཙལ་བར་བྱ་སྟེ་འདིར་རྒྱས་པར་ནི་མི་གསུང་ངོ་། །གྲུབ་པའི་རྟགས་རྣམས་སོ། །མིང་གི་དོན་གང་ཡིན་ཞེ་ན། དེ་ནི་གཉིས་ཏེ། ཐུན་མོང་མ་ཡིན་པའི་མིང་གི་སྒོ་ནས་མདོར་བསྟན་པ་དང་། ཐུན་མོང་མ་ཡིན་པ་ཉིད་ཐུན་མོང་བའི་མིང་ལ་སྦྱར་ཏེ་རྒྱས་པར་བཤད་པའོ། །དང་པོ་ནི་གཉིས། ཕྱིའི་ཡུལ་གྱི་རབ་ཏུ་དབྱེ་བ་དང་། དེ་ཉིད་ནང་གི་ཡུལ་དང་སྦྱར་ཏེ་བཤད་པའོ། །དང་པོ་ནི། རྩ་རྒྱུད་དང་པོའི་བདུན་པ་ལས། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་དང་ནི། །ཚནྡོ་ཉེ་བའི་ཚནྡོ་ཉིད། །དེ་བཞིན་འདུ་བ་ཉེ་འདུ་བ། །འཐུང་གཅོད་ཉེ་བའི་འཐུང་གཅོད་དང་། །དུར་ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། །ས་བཅུའི་དབང་ཕྱུག་མགོན་པོ་ཉིད། །ཅེས་གསུངས་སོ། །དེ་དག་གི་དོན་ནི་ཕྱི་རོལ་ན་གནས་ལ་སོགས་པ་བཅུ་གཉིས་ལས་ཕྱེ་བའི་ཡུལ་སུམ་ཅུ་སོ་གཉིས་ཡོད་དོ། །གཉིས་པ་དེ་ཉིད་ནང་ནའང་ཡོད་དེ། སྤྱི་བོ་པུལླཱི་ར་མཱ་ལ་ཡ་ལ་སོགས་པ་སུམ་ཅུ་སོ་གཉིས་པའོ། །དེ་ལ་ཕྱི་དང་ནང་གི་པུལླཱི་ར་མཱ་ལ་ཡ་ལ་སོགས་པ་ཡུལ་བཞི་ལ་ནི་གནས་ཞེས་གསུངས་ལ། ནང་དུ་ཡུལ་བཞིའི་རླུང་སེམས་དབུ་མར་ཐིམ་པ་ལས་ས་དང་པོའི་རྟོགས་པ་སྐྱེ་ལ། དེའི་རྟེན་འབྲེལ་གྱིས་ཕྱི་རོལ་གྱི་ཡུལ་བཞི་ན་གནས་པའི་དཔའ་བོ་དང་རྣལ་འབྱོར་མ་རྣམས་སྤྲུལ་པའི་སྐུ་ཡིན་ཡང་ས་དང་པོ་ཐོབ་པའི་ཚུལ་བཟུང་ནས་གནས་པ་རྣམས་དང་། ཡུལ་རྣམས་བདག་གི་དབང་དུ་འགྱུར་བའི་ཕྱིར་ས་དང་པོ་ལ་གནས་ཞེས་བརྡ་གདགས་སོ། །དེ་བཞིན་དུ་ས་གཉིས་པ་ལ་སོགས་པ་རྣམས་ཀྱང་རིམ་པ་བཞིན་དུ་ཉེ་བའི་གནས་དང་ཞིང་ལ་སོགས་པ་ལ་སྦྱར་ཏེ་རྒྱས་པར་རྟོགས་པར་བྱའོ། །འདི་རྣམས་ས་ནི་བཅུ་གཉིས་ཏེ། །ཞེས་བྱ་བ་ནི་གནས་ལ་སོགས་པ་བཅུ་གཉིས་པོ་འདི་རྣམས་ས་བཅུ་གཉིས་ཡིན་ནོ་ཞེས་བྱ་བ་ལ་སོགས་པའོ། །ས་བཅུའི་དབང་ཕྱུག་མགོན་པོ་ཉིད། །ཅེས་བྱ་བ་ནི་ས་བཅུ་པའི་དབང་ཕྱུག་གི་མགོན་པོ་བྱང་ཆུབ་སེམས་དཔའ་ཡིན་ནོ། །འདི་ནི་གཞན་གྱིས་བརྗོད་མི་བྱ། །ཞེས་བྱ་བ་འདིས་ནི་ས་བཅུ་གཉིས་བརྗོད་ཀྱི། གཞན་གྱིས་བརྗོད་པར་མི་བྱའོ། །གཉིས་པ་ཐུན་མོང་མ་ཡིན་པ་ཉིད་ཐུན་མོང་བའི་མིང་ལ་སྦྱར་ཏེ་རྒྱས་པར་བཤད་པ་ལ་གཉིས། ས་བཅུ་གཉིས་སོ་སོའི་མིང་དོན་དང་། ས་ཞེས་བྱ་བ་སྤྱིའི་མིང་དོན་ནོ། །དང་པོ་ནི་སཾ་པུ་ཊའི་བརྟག་པ་ལྔ་པའི་དང་པོ་ལས། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་ཅན། །ཚནྡོ་མངོན་དུ་གྱུར་པ་སྟེ། །ཉེ་བའི་ཚནྡོ་སྦྱང་དཀའ་བ། །འདུ་བ་རིང་དུ་སོང་བ་ཉིད། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཉིད། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད་དེ་བརྡ་སྐད་ཡིན་ནོ། །པུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་བསམ། །ཞེས་གསུངས་སོ། །དེ་ལ་གནས་ཞེས་བྱ་བ་ནི་ས་དང་པོའི་བརྡ་སྟེ། བརྡ་དེར་འདོགས་པའི་རྒྱུ་ནི་སྔར་མདོར་བསྟན་པའི་སྐབས་སུ་བརྗོད་ཟིན་ཏེ། བརྡ་འོག་མ་རྣམས་ཀྱང་ཤེས་པར་བྱའོ། །རབ་ཏུ་དགའ་བ་ཞེས་བྱ་བ་ནི་ཕ་རོལ་ཏུ་ཕྱིན་པ་དང་མཐུན་པར་སྦྱར་བ་སྟེ། དེ་དག་གི་མིང་གི་དོན་ནི། མགོན་པོ་བྱམས་པས་མདོ་སྡེ་རྒྱན་ལས། བྱང་ཆུབ་ལ་ནི་ཉེ་བ་དང་། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཐོས་པ་རྒྱས་པའི་སྒོ་ནས་ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པ། །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པ་༼པོ༷་༽བསྲེགས་པས་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང་། །ལོག་སྒྲུབ་ཀྱིས་སྐྱེ་བར་རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་འགྱུར་བའི་ཕྱིར། །མངོན་དུ་གྱུར་པའི་ས་ཞེས་བཤད། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །མཚན་བཅས་མཚན་མེད་ཀྱི་འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད། །སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་གསུངས་ཏེ། དེ་དག་གི་དོན་ནི་ས་དང་པོ་ལ་བདག་དང་གཞན་གྱི་དོན་བསྒྲུབ་ནུས་པའི་ཕྱིར་རབ་ཏུ་དགའ་བའོ། །གཉིས་པ་ལ་འཆལ་བའི་ཚུལ་ཁྲིམས་ཀྱི་དྲི་མ་ཐག་བསྲིངས་པས་དྲི་མ་མེད་པའོ། །གསུམ་པ་ལ་ཏིང་ངེ་འཛིན་གྱི་སྟོབས་ཀྱིས་༼ཆོ༷ས་༽ཚད་མེད་པ་ཡོངས་སུ་ཚོལ་བའི་ཕྱིར་གཞན་ལ་ཆོས་ཀྱི་སྣང་བའི་འོད་བྱེད་དོ། །བཞི་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ཤེས་རབ་ཀྱིས་ཉོན་མོངས་པ་དང་ཤེས་བྱའི་སྒྲིབ་པ་གཉིས་བསྲེགས་པས་འོད་འཕྲོ་བའོ། །ལྔ་པ་སེམས་ཅན་ཡོངས་སུ་སྨིན་པར་བྱེད་པའི་ཚེ་སེམས་ཅན་གྱི་ལོག་པར་བསྒྲུབས་པས་ཉོན་མི་མོངས་པར་རང་གི་སེམས་བསྲུང་བ་དེ་སྦྱང་དཀའ་བས་སྦྱང་དཀའ་བའོ། །དྲུག་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་འཁོར་བ་དང་མྱ་ངན་ལས་འདས་པ་ལ་མི་གནས་ཤིང་དེ་མངོན་དུ་གྱུར་པའོ། །བདུན་པ་ལ་བགྲོད་པ་གཅིག་པ་དང་འབྲེལ་ཞིང་རིང་དུ་སོང་བ་སྟེ་རྩོལ་བ་ལས་བྱུང་བའི་སྤྱོད་པའི་མཐར་འགྲོ་བའོ། །བརྒྱད་པ་ལ་མཚན་མ་དང་མཚན་མ་མེད་པ་གཉིས་ལ་རྩོལ་བའི་འདུ་ཤེས་གཉིས་ཀྱིས་མི་གཡོ་བའོ། །དགུ་པ་ལ་སོ་སོ་ཡང་དག་པར་རིག་པའི་བློ་གྲོས་བཟང་པོ་ལེགས་པར་ཐོབ་པའོ། །བཅུ་པ་ལ་སྤྲིན་བཞིན་དུ་ཏིང་ངེ་འཛིན་དང་གཟུངས་ཀྱི་སྒོ་གཉིས་ཀྱིས་ཐོབ་པའི་ཆོས་རྟེན་ལ་ཡོད་པ་ནམ་མཁའ་ལྟ་བུ་ལ་ཁྱབ་པའི་ཕྱིར་ཆོས་ཀྱི་སྤྲིན་ནོ། །འོ་ན་འདིར་ས་བཅུ་གཅིག་པ་དང་། བཅུ་གཉིས་པ་ཅིའི་ཕྱིར་མ་བཤད་ཅེ་ན། རྒྱུད་ལས། ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཅེས་གསུངས་པའི་ཕྱིར་ཕ་རོལ་ཏུ་ཕྱིན་པའི་ཐེག་པ་ལས་གྲགས་པ་དང་ལུང་སྒོ་བསྟུན་ནས། ས་བཅུ་དང་ཕ་རོལ་ཏུ་ཕྱིན་པ་བཅུ་གྲངས་དང་གོ་རིམ་ལ་སོགས་པ་མཐུན་པ་ཙམ་ལ་དགོངས་ནས་གསུངས་པ་ཡིན་ནོ། །གཞན་དུ་ན་ཐུན་མོང་མ་ཡིན་པའི་མིང་ལས། འདི་རྣམས་ས་ནི་བཅུ་གཉིས་ཏེ། །ཞེས་གསུངས་པ་དང་ཡང་འགལ་བར་འགྱུར་རོ། །ཀླ་ཀློའི་སྐད་ནི་བརྡའི་སྐད་དོ། །པུ་ལ་སོགས་པ་ཅི་གསུངས་པ་ནི་པུལླཱི་ར་མཱ་ལ་ཡ་ལ་སོགས་པའི་ཡུལ་ལོ། །ཡུལ་དེ་དག་གང་ན་གནས་ཤེ་ན། ཕྱི་དང་ནང་དུ་ཡང་དག་གནས། །ཞེས་གསུངས་ཏེ། ལུས་དང་ཕྱི་གཉིས་ཀ་ན་གནས་སོ། །དེ་དག་གི་ནང་རྟེན་འབྲེལ་གྱིས་གནས་ལ་སོགས་པར་འཇོག་པའི་རྒྱུ་ནི་སྔར་མདོར་བསྟན་པའི་སྐབས་སུ་བཤད་ཟིན་ཏོ། །འོ་ན་བཅུ་གཅིག་པ་དང་བཅུ་གཉིས་པའི་མིང་གང་ཡིན་ཞེ་ན། རྒྱུད་རྒྱས་པའི་ལུང་ཀུ་མུ་ཏིར་བྲིས་པ་དང་། ངེས་བརྗོད་བླ་མ་ལས་ཀྱང་གསུངས་ཏེ། འཐུང་གཅོད་དཔེ་མེད་དེ་བཞིན་དུ། །ཉེ་བའི་འཐུང་གཅོད་ཡེ་ཤེས་ཆེ། །ཞེས་གསུངས་པས། བཅུ་གཅིག་པ་ནི་སྔར་གྱི་ས་རྣམས་ཀྱིས་དཔེ་ཙམ་དུའང་བྱ་བར་དཀའ་བས་དཔེ་མེད་པའོ། །བཅུ་གཉིས་པ་ནི་དེ་ལྟ་བུ་དེ་ཆེས་ཆེ་བའི་ཡེ་ཤེས་སུ་གྱུར་པས་ཡེ་ཤེས་ཆེན་པོའོ། །འོ་ན་བཅུ་གསུམ་པ་མ་སྨོས་པ་ཅི་ཞེ་ན། གོང་མ་རྣམས་ནི་བྱང་ཆུབ་སེམས་དཔའི་ས་ཡིན་ལ། བཅུ་གསུམ་པ་ནི་སངས་རྒྱས་རྡོ་རྗེ་འཆང་གི་ས་ཉིད་ཡིན་པས་མ་སྨོས་ཏེ། ངེས་བརྗོད་བླ་མ་ལས། རྡོ་རྗེའི་ས་ནི་བཅུ་གསུམ་པ། །ཞེས་གསུངས་པས་སོ། །གཉིས་པ་ས་ཞེས་བྱ་བ་སྤྱིའི་མིང་དོན་ནི། ཅིའི་ཕྱིར་ས་ཞེས་བྱ་ཞེ་ན། གནས་ཞེས་བྱ་བའམ། ས་ཞེས་བྱ་སྟེ། མདོ་སྡེ་རྒྱན་ལས། དགེ་བ་བསྒྲུབ་པ་སྣ་ཚོགས་ལ། །དགའ་བས་རྟག་པ་ཐམས་ཅད་དུ། །གནས་ཕྱིར་བྱང་ཆུབ་སེམས་དཔའ་ཡི། །ས་རྣམས་གནས་པ་ཡིན་པར་འདོད། །ཅེས་པ་དང་། སའི་ངེས་ཚིག་ནི། འབྱུང་པོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱིར་ཕྱིར་གོང་དུ་བགྲོད་ལྡན་ཕྱིར། །དེ་དག་ཉིད་ནི་སར་འདོད་དོ། །ཞེས་ཏེ། འགྲོ་བ་དཔག་ཏུ་མེད་པ་འཇིགས་པ་མེད་པའི་རྟེན་དང་། ས་འོག་མ་ལ་བརྟེན་ནས་ཕྱིར་ཞིང་གོང་དུ་འགྲོ་བའི་རྟེན་བྱེད་པས་ས་སྟེ། མདོར་ན་ས་དང་འདྲ་བ་རྟེན་བྱེད་པའི་ཕྱིར་རོ། །འདི་དག་ཀྱང་རྩ་རྒྱུད་དང་པོའི་བདུན་པ་དང་། སཾ་པུ་ཊའི་རབ་ཏུ་བྱེད་པ་ལྔ་པའི་དང་པོ་ནས་བསྟན་ཅིང་། དེའི་གྲོགས་རྣམས་ལེའུ་གཞན་ནས་ཀྱང་ཅི་རིགས་པར་འབྱུང་ངོ་། །གནས་སྐབས་ཀྱི་འབྲས་བུ་བྱང་ཆུབ་སེམས་དཔའི་ས་བཅུ་གཉིས་བསྟན་ཟིན་ཏོ། །