རྗེ་བཙུན་མྱུར་མ་དཔལ་མོ་ལ་བསྟོད་ཅིང་གསོལ་བ་འདེབས་པ་བཻཌཱུརྱའི་གོ་ཆ།

༄༅། །རྗེ་བཙུན་མྱུར་མ་དཔལ་མོ་ལ་བསྟོད་ཅིང་གསོལ་བ་འདེབས་པ་བཻཌཱུརའི་གོ་ཆ་ཞེས་བྱ་བ་བཞུགས་སོ།། ན་མ་ཨཱཪྻ་ཏཱ་རཱ་ཡཻ། སྐྱེ་འགག་གནས་དམིགས་འགྲོ་འོང་བྲལ་བའི་མཁར། །སྙིང་རྗེའི་དཀྱིལ་འཁོར་ཡོངས་སུ་གང་བའི་གཟུགས། །དྲན་པས་བརྒྱད་གཉིས་འཇིགས་ལས་སྒྲོལ་མཛད་མ། །ཡིད་ཀྱི་དཔལ་དུ་འབྲལ་བ་མེད་པར་མཛོད། ༡ །ཁྱོད་ནི་འཕགས་བཞི་བསྐྱེད་ཡུམ་གཅིག་པུ་པ། །ཁྱོད་ནི་རྒྱལ་ཀུན་ཕྲིན་ལས་བསྡོམས་པའི་དཔྱིད། །ཁྱོད་ནི་འགྲོ་ཀུན་སེམས་ཀྱི་ཆོས་ཉིད་དེ། །ཁྱོད་ནི་སྲིད་ཞིའི་ཆུ་བོ་སྒྲོལ་བྱེད་ཡིན། ༢ །ཁྱོད་ནི་ཉེས་པ་སྲེག་ལ་བསྐལ་དུས་མེ། །ཁྱོད་ནི་སྡུག་བསྔལ་ཞི་བྱེད་གདུང་སེལ་ཆུ། །ཁྱོད་ནི་ཡང་དག་ལམ་སྟོན་མིག་བུ་སྟེ། །ཁྱོད་ནི་མ་འདྲིས་ཀུན་གྱི་མཛའ་བཤེས་ཡིན། ༣ །ཁྱོད་ནི་ལེགས་པར་འདོམས་མཛད་ཕ་ཡང་སྟེ། །ཁྱོད་ནི་ཉམ་ཐག་སྐྱོབ་པའི་མ་མ་དངོས། །ཁྱོད་ནི་སྐྱེ་དགུའི་ངལ་འཚོ་ཡོངས་འདུའི་ལྗོན། །ཁྱོད་ནི་འཇིགས་ལས་སྲུང་བའི་ཆུ་ལོན་ཡིན། ༤ །ཁྱོད་ནི་སྣང་ནས་སྣང་བར་བགྲོད་པའི་གཉེན། །ཁྱོད་ནི་མུན་ནས་མུན་པར་འཕྱན་པའི་མགོན། །ཁྱོད་ནི་ཆུ་སྲིན་རྒྱལ་མཚན་འཇིགས་པའི་བདུད། །ཁྱོད་ནི་ལྷ་བརྒྱའི་གཙུག་གི་ཅོད་པཎ་ཉིད། ༥ །ཁྱོད་ནི་གཞི་རྒྱུད་བདེ་བར་གཤེགས་པའི་ཁམས། །ཁྱོད་ནི་ལམ་རྒྱུད་ཟག་མེད་ཡེ་ཤེས་ཆེ། །ཁྱོད་ནི་འབྲས་རྒྱུད་ཟབ་གསལ་དབྱེར་མེད་ཕུལ། །ཁྱོད་ནི་འཁོར་འདས་ཀུན་གྱི་བྱེད་པོར་ངེས། ༦ །ཁྱོད་ནི་སྣང་སྟོང་སྒྱུ་མ་རྡོ་རྗེའི་སྐུ། །ཁྱོད་ནི་གྲགས་སྟོང་མཚན་མེད་རྡོ་རྗེའི་གསུང་། །ཁྱོད་ནི་རིག་སྟོང་སྨོན་མེད་རྡོ་རྗེའི་ཐུགས། །ཁྱོད་ནི་རྣམ་ཐར་གསུམ་ལྡན་རྡོ་རྗེའི་བདག ༧ །ཁྱོད་ནི་སྟོབས་བཅུའི་འབྲས་མང་རྐང་འཐུང་དབང་། །ཁྱོད་ནི་མི་འཇིགས་སྒྲ་ལྡན་གདོང་ལྔའི་རྒྱལ། །ཁྱོད་ནི་མ་འདྲིས་ཡོན་ཏན་མཁའ་ཡི་གཟུགས། །ཁྱོད་ནི་གཙང་རྟག་བདེ་བའི་ཕར་ཕྱིན་ཉིད། ༨ །ཁྱོད་ནི་དགེ་བཅུའི་རྩ་བ་བཙུགས་པའི་གཉེན། །ཁྱོད་ནི་ཕྱིན་བཅུའི་ཡལ་འདབ་སྐྱེད་པའི་གྲོགས། །ཁྱོད་ནི་དབང་བཅུའི་འབྲས་མང་སྦྱིན་པའི་དཔལ། །ཁྱོད་ནི་རིགས་ཁམས་དགེ་བའི་ས་བོན་ལགས། ༩། ཁྱོད་ནི་སྟོང་པའི་དབྱིངས་དང་གཉིས་སུ་མེད། །ཁྱོད་ནི་སྣང་བ་སྣ་ཚོགས་འཆར་བའི་སྒོ། །ཁྱོད་ནི་རྟེན་འབྱུང་ཟབ་མོའི་རང་གཤིས་ཏེ། །ཁྱོད་ནི་ཚུ་རོལ་བྱིས་པས་མཐོང་བར་དཀའ། ༡༠ །ཁྱོད་ནི་འཁོར་འདས་ཀུན་བྱེད་གཞིར་གྱུར་ཀྱང་། །ཁྱོད་ནི་རྒྱུ་རྐྱེན་སུས་ཀྱང་བསྐྱེད་པ་མེད། །ཁྱོད་ནི་རང་བྱུང་ཡེ་ཤེས་འདུས་མ་བྱས། །ཁྱོད་ནི་སྒྲ་རྟོག་མཚན་མའི་སྤྱོད་ཡུལ་མིན། ༡༡ །ཁྱོད་ནི་ཕྱོགས་བཅུའི་འདྲེན་པས་མགྲིན་གཅིག་བསྔགས། །ཁྱོད་ནི་རིག་འཛིན་གྲུབ་པ་ཡོངས་ཀྱིས་བརྟེན། །ཁྱོད་ནི་འཇིག་རྟེན་ཆེ་དགུ་ཀུན་གྱིས་མཆོད། །ཁྱོད་ནི་འབྱུང་པོའི་ཚོགས་ཀྱིས་བཏུད་ཅིང་བཀུར། ༡༢ །ཁྱོད་དང་མཉམ་པ་གཞར་ཡང་མ་མཆིས་ཤིང་། །ཁྱོད་མཚན་དྲན་པས་འཇིགས་དང་སྡུག་བསྔལ་སྒྲོལ། །ཁྱོད་ཞབས་བརྟེན་པས་འཕགས་མང་དོན་གཉིས་འབྱོར། །ཁྱོད་ཀྱི་ཡོན་ཏན་བྱིས་བློའི་སྤྱོད་ཡུལ་ཅི། ༡༣ །འཕགས་མ་ཁྱོད་ལ་བསྟོད་དང་སྨད་པ་ཡི། །རེ་དོགས་སྤྲོས་པའི་མཚན་རྟོག་མི་མངའ་ཡང་། །གསོལ་བ་འདེབས་ལ་ལྷག་པར་ཐུགས་རྗེ་འཇུག །བརྩེ་བས་དགོངས་ཤིག་མྱུར་མ་དཔལ་མོ་ཀྱཻ། ༡༤ །ལས་ཀྱིས་མནར་ལ་བརྩེ་བས་མི་དགོངས་ན། །ལས་ཟད་རྣམས་ལ་འཕགས་མས་ཅི་བྱར་ཡོད། །ཐུགས་དམ་ཞལ་བཞེས་དུས་ཀྱང་དེང་ལགས་པས། །གློག་ལྟར་མྱུར་བའི་ཐུགས་རྗེས་དེང་སྐྱོབས་ཤིག ༡༥ །མཐུན་རྐྱེན་འཁོར་ལོ་བཞི་ཡི་ཞིང་ས་ལ། །མོས་སོགས་རིགས་ཁམས་ཡོན་ཏན་མྱུ་གུའི་དཔལ། །འཁྲུངས་ལ་གེགས་བྱེད་སྒྲིབ་གསུམ་དྲི་མ་བཞི། །བཟོད་དཀའ་མེ་ཡི་འཇིགས་ལས་བསྐྱབ་ཏུ་གསོལ། ༡༦ །བདེན་གཉིས་ངོ་བོ་སྨོན་འཇུག་བྱང་ཆུབ་སེམས། །རྒྱལ་སྲས་ལམ་གྱི་སྙིང་པོར་འགལ་བྱེད་རྐྱེན། །ཐོག་མེད་གོམས་པའི་བློ་ངན་ལྡོག་དཀའ་བ། །རང་དོན་ཡིད་བྱེད་ཆུ་ཡི་འཇིགས་ལས་སྐྱོབས། ༡༧ །སྲིད་ཞིའི་ཕུན་ཚོགས་འགུགས་པའི་ཐབས་མཁས་ཕུལ། །སྦྱིན་པ་རྣམ་བཞིས་འགྲོ་ཀུན་དགའ་སྐྱེད་ཅིང་། །ཆོག་ཤེས་འབྱོར་པའི་བདེ་བར་སྐབས་བཙལ་བའི། །འཕགས་མིན་སེར་སྣའི་དུག་ཆེན་གཞིལ་དུ་གསོལ། ༡༨ །མངོན་མཐོ་གསེར་གྱི་པདྨ་གཞོན་ནུ་ལ། །ངེས་ལེགས་སྦྲང་རྩིའི་རྡུལ་དམར་ཆགས་པའི་རྟེན། །རྣམ་གསུམ་ཚུལ་ཁྲིམས་སྲོག་གི་པད་རྩལ་ལ། །གཟས་གྱུར་འཆལ་སྤྱོད་མཚོན་གྱི་འཇིགས་པ་སོལ། ༡༩ །དགེ་སྦྱོང་ཆོས་བཞི་ཐུབ་མཆོག་ཕ་ཡི་ནོར། །ཡོན་ཏན་དཔག་མེད་ལེགས་དགུ་འབྱུང་བའི་གཞི། །རྣམ་གསུམ་བཟོད་པའི་བང་མཛོད་འཕྲོག་རྩོམ་པའི། །ཞེ་སྡང་དམག་གི་གཡུལ་ངོ་ཟློག་ཏུ་གསོལ། ༢༠ །ཟག་བཅས་ཟག་མེད་ཡོན་ཏན་འབྱོར་དགུའི་དཔལ། །མཐའ་དག་དབང་དུ་སྡུད་པའི་སྒོ་གཅིག་པུ། །བརྩོན་འགྲུས་གསུམ་གྱི་ནོར་གྱི་མི་མཐུན་ཕྱོགས། །ལེ་ལོ་མུ་གེའི་འཇིགས་ལས་བསྐྱབ་ཏུ་གསོལ། ༢༡ །གཟུངས་སྤོབས་ཏིང་འཛིན་མངོན་ཤེས་རྫུ་འཕྲུལ་སོགས། །འཕགས་སྐྱེའི་ཡོན་ཏན་ནོར་མཆོག་འབྱུང་བའི་གཞི། །ཟག་མེད་ཞི་བའི་བསམ་གཏན་ཡུལ་འཁོར་ཆེ། །གཞོམ་བྱེད་རྣམ་གཡེང་དགྲ་ཡི་འཇིགས་ལས་སྐྱོབས། ༢༢ །ངེས་ལེགས་ཐར་པའི་སྲོག་རྩ་མ་རྨས་པ། །ཤེས་རབ་ཐབས་སྟོབས་སྨོན་ལམ་ཡེ་ཤེས་དང་། །འགལ་གྱུར་ཤེས་འཆལ་ཐབས་མིན་དམན་སྨོན་སོགས། །ཕྱི་ནང་དུས་མིན་འཆི་བའི་འཇིགས་ལས་སྐྱོབས། ༢༣ །ཚོགས་སྦྱོར་མཐོང་སྒོམ་མི་སློབ་ལམ་ལྔའི་སྐས། །རབ་འཛེགས་བྱང་ཕྱོགས་སོ་བདུན་བང་མཛོད་ཆེར། །དབང་འབྱོར་བསྡུ་བཞིའི་སྦྱིན་པའི་ཕྱག་ཡངས་ཀྱིས། །སྲིད་པའི་དབུལ་བ་གཅོད་པའི་དགེ་མཚན་བྱིན། ༢༤ །གནས་སྐབས་མི་མཐུན་བརྒྱད་གཉིས་འཇིགས་པ་ཞི། །༡ཚེ་༢ དབང་༣ བཀྲ་ཤིས་༤ གཟི་༥འཁོར་༦ལོངས་སྤྱོད་རྒྱས། །ཕ་རྗེ་གཙོ་སློབ་ལྟར་མོས་སྲིད་གསུམ་སྡུད། །བདུད་བཞིའི་གཡུལ་ལས་རྒྱལ་བའི་དཔལ་སྩོལ་ཅིག ༢༥ །མདོར་ན་སྐྱེ་ཀུན་འཕགས་མའི་གྲིབ་བསིལ་ལ། །ཉེར་བརྟེན་ཉེས་དང་སྡུག་བསྔལ་མིང་མི་གྲགས། །རླབས་ཆེན་རྒྱལ་བའི་སྲས་ཀྱི་སྤྱོད་པ་ཡིས། །དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག ༢༦ །བཀྲ་ཤིས་འཕགས་མའི་ཐུགས་རྗེའི་སྤྲིན་ཆེན་ལས། །བཀྲ་ཤིས་གྲུབ་གཉིས་འཛད་མེད་འཇོ་བའི་ཆར། །བཀྲ་ཤིས་སྲིད་པ་གསུམ་ན་རྟག་འཇོ་བས། །བཀྲ་ཤིས་ཕྱོགས་དུས་ཀུན་ན་བདེ་ལེགས་ཤོག ༢༧ །ཅེས་རྒྱལ་ཡུམ་འཕགས་མ་སྒྲོལ་མ་ལ་བསྟོད་ཅིང་གསོལ་བ་བཏབ་པའི་ཚིགས་སུ་བཅད་པ་འདིའང་། གཞན་གྱིས་བསྐུལ་བ་དང་རང་ཉིད་དད་པའི་རྒྱུ་ལ་སྙོམས་ལས་པ་འགྱུར་མེད་པདྨ་བསྟན་འཛིན་གྱིས་དཔལ་ཟེ་ཆེན་བསྟན་གཉིས་དར་རྒྱས་གླིང་གི་རང་ཤག་འཆི་མེད་འོད་སྣང་དུ་ཤར་མར་བྲིས་ཤིང་གསོལ་བཏབ་པ་སིདྡྷི་རསྟུ།