སྒོམ་པ་ཉམསམྱོང་གིས་གཏན་ལ་འབེབས་པའི་ཚེ།
བསྒོམ་པ་ཉམས་མྱོང་གིས་གཏན་ལ་འབེབས་པའི་ཚེ་ནི། འཁོར་ལོ་གསུམ་པར་གསུངས་པའི་དབུ་མ་ཆེན་པོའི་ལུགས་འདི་ཉིད་མཆོག་ཏུ་ཟབ་ལ་རྒྱ་ཆེ་བ་ཡིན་ཏེ། དབྱིངས་རང་བཞིན་གྱིས་རྣམ་པར་དག་པ་དོན་དམ་པའི་བདེན་པ་རང་བྱུང་གི་ཡེ་ཤེས་དེ་ཉིད་ནི་ཆོས་ཐམས་ཅད་ཀྱི་ཐོག་མའི་གནས་ལུགས་ཡིན་པ་གང་
ཞིག་སོ་སོ་རང་གི་རིག་པས་ཉམས་སུ་མྱང་བྱར་ཡོད་པའི་ཡེ་ཤེས་ཡིན་པའི་ཕྱིར་ཏེ། སྒྲ་གཅན་ཟིན་གྱིས་ཡུམ་ལ་བསྟོད་པར། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་པ་དང་། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །ཅེས་གསུངས་པ་སོགས་བསམ་གྱིས་མི་ཁྱབ་པའི་ཡེ་ཤེས་མཚོན་པར་བྱས་ཤིང་། འདི་ཉིད་ཀྱི་རང་བཞིན་མཐོང་བས་དོན་དམ་བདེན་པ་མཐོང་བ་ཞེས་བྱ་ཡི། ཅི་ཡང་མེད་པའི་སྟོང་ཉིད་ཙམ་ལ་དོན་དམ་བདེན་པར་མི་རུང་ངོ་། །དེའི་ཕྱིར་ཆོས་ཉིད་ཡོངས་གྲུབ་ནི་གཉིས་སུ་མེད་པའི་དེ་བཞིན་ཉིད་ཀྱི་ཡེ་ཤེས་ཡིན་པའི་ཕྱིར་རྣམ་ཤེས་ཀྱི་ཆོས་ལས་ཡང་དག་པར་འདས་པ་སངས་རྒྱས་ཆོས་ཀྱི་སྐུ་དང་། ངོ་བོ་ཉིད་སྐུའི་སྒྲས་བསྟན་པ། གསང་སྔགས་སུ་གསུངས་པའི་རྒྱུད་གསུམ་གྱི་རྣམ་པར་བཞག་པ་དང་། ལྷ་དང་། སྔགས་དང་། རྡོ་རྗེའི་བདག་དང་། བདེ་བ་ཆེན་པོ་དང་། རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་དང་། གཉུག་མའི་ལུས་ངག་ཡིད་གསུམ་གྱི་རྟེན་མི་ཤིགས་པའི་ཐིག་ལེ་ཆེན་པོ་དག་གི་སྦྱང་གཞི་དང་སྦྱོང་བྱེད་དང་། སྦྱངས་འབྲས་སོགས་ཀྱི་རྣམ་པར་བཞག་པ་དང་། གཞི་ལམ་འབྲས་བུའི་རྣམ་བཞག་ཐུན་མོང་མ་ཡིན་པ་རྣམས་ཀྱང་སེམས་ཙམ་པར་གྲགས་པའི་གྲུབ་མཐའ་དང་འགལ་བའི་ཆོས་སུ་གནས་ཤིང་། རང་སྟོང་པ་ལྟར་འདོད་པའི་ལམ་དུ་མི་གནས་པར་འཁོར་ལོ་ཐ་མའི་དགོངས་པ་ས་བཅུའི་
དབང་ཕྱུག་ཆེན་པོ་རྣམས་ཀྱིས་བཀྲལ་པ་དང་སྔགས་ཀྱི་རྒྱུད་སྡེ་རྣམས་ཀྱིས་བསྟན་པ་གཅིག་ལ་གཅིག་ལྟོས་ཀྱིས་མི་འགལ་བར་གནས་པ་ནི་ཤེས་པར་བྱ་དགོས་ལ། དེ་ལྟར་ཉིད་ཕྱིར་བཀའ་ཐ་མའི་དགོངས་པ་འཇིག་རྟེན་པའི་སེམས་ཙམ་སྨྲ་བ་དང་རྣམ་པ་ཀུན་ཏུ་གཅིག་པ་མ་ཡིན་པར་ཐེག་པའི་རིམ་པར་འོག་མ་འོག་མའི་དགོས་པ་གོང་མ་གོང་མའི་ནང་དུ་རིམ་གྱིས་འདུ་ཞིང་མཐའ་གཅིག་ཏུ་གྲུབ་པ་ལས་འགལ་བ་མེད་ཀྱང་འོག་མ་ལས་གོང་མ་ཆེས་ཁྱད་པར་དུ་འཕགས་པ་བདེ་བར་གཤེགས་པའི་བསྟན་པ་རིན་པོ་ཆེའི་ཁྱད་པར་དུ་ངེས་པ་ཁོང་དུ་ཆུད་དགོས་ཏེ་དེ་ལྟར་མིན་ན་འཁོར་ལོ་དང་པོར་སྡུག་བསྔལ་བ་དང་། བདག་མེད་པ་དང་། མི་གཙང་བ་དང་། མི་རྟག་པ་ཞེས་བསྟན་ནས། བཀའ་བར་པར་ཐམས་ཅད་སྟོང་པ་ཉིད་དུ་གཏན་ལ་ཕབ་ནས་སླར་ཡང་བཀའ་ཐ་མར། བདེ་བ་དང་། གཙང་བ་དང་། རྟག་པ་དང་། བདག་དམ་པར་བསྟན་པའི་དོན་གྱི་དགོངས་པ་རྟོན་པ་གཞི་ལ་གདེང་དུ་གྱུར་པའི་བློ་གྲོས་ཀྱིས་བླང་མ་ཤེས་པར་སྒྲ་ཇི་བཞིན་པར་བཟུང་ན་གདུལ་བྱ་མགོ་རྨོངས་པར་འགྱུར་བ་དང་བསྟན་པ་འགལ་བར་དཔྱོད་པའི་རྣམ་པར་རྟོག་པ་ཅན་དུ་འགྱུར་ཏེ། འདི་ལ་དགོངས་ནས་རྒྱུད་བླ་མའི་འགྲེལ་པར། མདོར་བསྡུ་ན། གང་ཟག་བཞི་པོ་འདི་ནི་དེ་བཞིན་གཤེགས་པའི་སྙིང་པོ་མཐོང་བ་ལ་མིག་དང་མི་ལྡན་པར་བཞག་སྟེ། བཞི་གང་ཞེ་ན་འདི་ལྟ་སྟེ། སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། ཐེག་པ་ལ་གསར་དུ་ཞུགས་པའི་
བྱང་ཆུབ་སེམས་དཔའ་སྟེ། ཇི་སྐད་(དཔལ་ཕྲེང་གི་མདོར།)དུ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་འདི་ནི་འཇིག་ཚོགས་ལ་ལྟ་བར་ལྷུང་བ་རྣམས་དང་། ཕྱིན་ཅི་ལོག་ལ་མངོན་པར་དགའ་བ་རྣམས་དང་། སྟོང་པ་ཉིད་ལ་སེམས་རྣམ་པར་གཡེངས་པ་རྣམས་ཀྱི་སྤྱོད་ཡུལ་མ་ལགས་སོ་ཞེས་གསུངས་པ་བཞིན་ནོ། །ཞེས་པ་ལ་སོགས་པ་གསུངས་པ་བཞིན་གཞན་ཡང་ཚུལ་འདི་ཉིད་བཀའ་དང་བསྟན་བཅོས་ཐམས་ཅད་ནས་ཤིན་ཏུ་སྒྲུབ་ཏུ་ཡོད་ཀྱང་འདིར་དེ་ཙམ་ཞིག་ལས་མ་བཀོད་ལ་སྤྲོས་པས་ཆོག་གོ །