རལ་གྲི།
རལ་གྲི་འདི་ལྷའི་ཕྱག་མཚན་དང་། ཆོས་སྲུང་གི་བླ་རྡོ་བཅའ་ཐབས་སུ་དགོས་པར་བཤད་ལ། རྒྱུ་ནི་རྣོ་ཁབ་ལེན། ལྕགས། ཡང་ན། ཤིང་ལས་བྱས་པའི་ཚད་སོར་བཞི་དང་། བརྒྱད། བཅུ་གཉིས། ཁྲུ་གང་བ་དྲང་ཞིང་རྣོ་བ། གས་ཆག་མེད་པ་དགོས་པར། གཤེད་དམར་དང་། གཤེད་ནག རྡོར་སེམས་སྒྱུ་འཕྲུལ་མེ་ལོང་སོགས་སུ་བཤད་དོ། །
རལ་གྲི་གྲུབ་པའི་རྟགས་ལ། གཤིན་རྗེ་གཤེད་ནག་ལས། གྲུབ་ན་རལ་གྲི་རབ་ཏུ་འབར། །འོད་ཟེར་ལྔ་ཡི་གློག་ཆེན་འཁྲུག །གྲུབ་པ་དེ་ནི་བཟུང་གྱུར་བས། མི་རྣམས་ཁམས་གསུམ་ལས་རྒྱལ་འགྱུར། །ཞེས་སོ། །ཡང་ཐུན་མོང་བའི་དངོས་གྲུབ་བརྒྱད་ཀྱི་ནང་གསེས་རལ་གྲིའི་དངོས་གྲུབ་ནི། ཕྱི་ནང་གཉིས་ཀས་བསྒྲུབ་རུང་བ་ཞིག་སྟེ། རོ་ལངས་བསྒྲུབས་ནས། གྲུབ་ན་ཐོག་མར་རོ་ལ་ཁ་རླངས་བྱུང་། དེ་ནས་འགུལ། དེ་ནས་རོ་ལངས་གར་བྱེད་ཅིང་། ལྕེ་ཡུག་ཡུག་པ་ལན་གསུམ་རྐྱོང་བས། དེ་དང་བོར་ཆོད་ན་རབ། བར་དུ་ཆོད་ན་འབྲིང་། ཐ་མར་ཆོད་ན་ཐ་མ་ཡིན་པས། དེའི་ལྕེ་རལ་གྲིར་གྱུར་ཏེ། རི་རབ་གྱི་རྩེ་མོ་སོགས་སུ་སྐད་ཅིག་ལ་བགྲོད་ཐུབ་པའི་ཁྱད་ཆོས་ལྡན་པ་ཞིག་དང་། རོ་གསེར་དུ་འགྱུར་ལ། མ་ཆོད་ན་སེམས་ཅན་མང་བོ་རོ་ལངས་ཀྱི་ཁ་ཟས་སུ་འགྲོ་བ་ཡིན། ཞིབ་ཏུ་སྦ་བཞེད་ལས། བསམ་ཡས་བཞེངས་པ་ཨོ་ཏན་ཏ་པུ་རིར་དཔེ་བླངས་པ་ལས་འཕྲོས་ཏེ། སྔོན་རྣལ་འབྱོར་བ་ཞིག་གིས་རོ་ལངས་སྒྲུབ་ཏེ་རལ་གྲིའི་དངོས་གྲུབ་བརྙེས་པའི་ཚུལ་འཁོད་པས་དེར་གཟིགས་པར་བྱའོ། །