ཟབ་བདུན་རྩ་གསུམ་ཚེ་དཀར་དོན་དབང་མདོར་བསྡུས།
ཟབ་བདུན་རྩ་གསུམ་ཚེ་དཀར་དོན་དབང་མདོར་བསྡུས་བྱེད་ན། ཁྲུས། བགེགས་བསྐྲད། སྲུང་འཁོར། དབང་བཤད་རྣམས་དབང་རྒྱས་པའི་མཚམས་སྦྱོར་བདུད་རྩིའི་ཆུ་རྒྱུན་ལྟར་ལ། །འཆི་མེད་རྟག་པ་དམ་པའི་སྲོག་མཁར་དུ་དབུགས་དབྱུང་བར་མཛད་པའི་ཟབ་ཆོས། ཞེས་པའི་མཚམས། རྩ་གསུམ་ཚེ་དཔག་མེད་དཀར་པོ་རིགས་ལྔ་སྒྱུ་འཕྲུལ་དྲྭ་བའི་དཀྱིལ་འཁོར་དུ་སྐུ་གསུང་ཐུགས་ཀྱི་འཆི་མེད་ཚེའི་དོན་དབང་མདོར་བསྡུས་ཏེ་བགྱིད་པ་ལ། སློབ་དཔོན་གྱི་བྱ་བའི་རིམ་པ་སྔོན་དུ་གྲུབ། ཁྱེད་རང་སློབ་མ་རྣམས་ཀྱི་བགྱི་བར་འོས་པ་དབང་བསྐུར་ཞུ་བའི་ཡོན་དུ་མཎྜལ་ཕུལ་འཚལ་། དེ་ལྟར་མཎྜལ་ཕུལ་ནས་སློབ་དཔོན་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་ཐལ་མོ་མེ་ཏོག་དང་བཅས་ཏེ་གུས་པའི་ཡིད་རྩེ་གཅིག་པས་གསོལ་བ་འདེབས་པ་འདིའི་རྗེས་ཟློས་མི མཛོད། འགྲོ་བའི་མགོན་པོ་རྣམ་སྣང་ཚེ་དཔག་མེད༔ འཆི་མེད་རྡོ་རྗེ་ཚེ་ཡི་མཆོག་མངའ་བས༔ བདག་ཅག་སྐྱེ་འཆི་བགྲེས་རྒུད་མེད་པ་ཡི༔ ཚེ་དང་ཡེ་ཤེས་མྱུར་བར་སྩལ་དུ་གསོལ༔ ལན་གསུམ། སྨིན་བྱེད་ཟབ་མོའི་བཅུད་སེང་གེའི་འོ་མ་སོགས་ནས། བདག་ལ་སྩལ་དུ་གསོལ༔ བར་ཡན་ལག་བཅུ་པ་དང་སྡོམ་བཟུང་མཚམས་སྦྱོར་རྒྱས་པ་ལྟར། དབང་གི་གཞི་དགོད་པ་སོགས་ནས། ཨ་བེ་ཤ་
ཡ་ཨ་ཨཱ༔ བར་ཡེ་ཤེས་དབབ་ཆོག་རྒྱས་པ་ལྟར། སྤོག་ཆོག་མི་དགོས། རྫས་སྔགས་ཏིང་ངེ་འཛིན་སོགས་ནས། བཛྲ་ཡ་སྭཱ་ཧཱ༔ བར་རྒྱས་པ་ལྟར། བར་འདིར་སྤྲོ་ན། དེ་ལྟར་ཡེ་ཤེས་དབབ་ཅིང་ བརྟན་པར་བྱ་བ་སྔོན་དུ་སོང་ནས། ཚེ་འགུགས་ཤིང་བཅུད་བསྡུ་བའི་སླད་དུ་དམིགས་པ་འདི་བཞིན་མཛོད། བདག་མདུན་ཚེ་དཔག་མེད་རིགས་ལྔ་སྒྱུ་འཕྲུལ་དྲྭ་བ་ལྷ་མོ་མགྱོགས་མའི་ཚོགས་དང་བཅས་པ་ལས་སྤྲུལ་པ་དང་ཡང་སྤྲུལ་ཕྱག་བརྙན་ཕོ་ཉའི་ཚོགས་འོད་དང་འོད་ཟེར་དང་བཅས་པ་ཕྱོགས་བཅུའི་ཞིང་ཁམས་རབ་འབྱམས་རྣམས་སུ་འཕྲོས་པས་ཁྱེད་རང་རྣམས་ཀྱི་བླ་ཚེ་ཆད་ཉམས་ཡར་བ་དང་། འབྱུང་བ་ལྔའི་དྭངས་བཅུད། འཇིག་རྟེན་དང་འཇིག་རྟེན་ལས་འདས་པའི་ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་འོད་ཟེར་ཁ་དོག་ལྔ་ལྡན། རིགས་ལྔའི་ཕྱག་མཚན། སྙིང་པོ་འབྲུ་ལྔ་དང་བཅས་པའི་རྣམ་པར་བསྡུས་ཏེ། མདུན་གྱི་ཚེ་རྫས་རྣམས་ལ་ཐིམ་པས་འཆི་མེད་ཚེའི་བཅུད་ལེན་དུ་གྱུར། ཁྱེད་རང་རྣམས་ལ་ཐིམ་པས་བླ་ཚེ་ཆད་ཉམས་ཡར་བ་ཐམས་ཅད་སོར་ཆུད་ཅིང་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་ཐོབ་པའི་མོས་པ་མཛོད། དབུས་ཀྱི་ཕྱོགས་ནས་སོགས་ཚེ་འགུགས་བསྐུལ། མ་བྱས་ཀྱང་ཆད་སྐྱོན་མེད། སྤྱིར་དོན་དབང་འདི་ལ་ཚེ་འབྲང་མ་
གཏོགས་རྣམ་བུམ་མེད་པས་ཚེ་འགུགས་བསྐུལ་བའི་ཚིག་རིས་དང་ཅུང་མི་མཐུན་ཡང་། ཚེ་འབྲང་ལ་དམིགས་ཀྱང་འགལ་བ་མེད་དེ་གཏེར་རྙིང་རྣམས་སུའང་འདི་འདྲ་མང་དུ་འབྱུང་བས་སོ། །གང་ལྟར་ཡང་། དེ་ནས་དངོས་གཞི་ལུས་ངག་ཡིད་གསུམ་མི་ཤིགས་དྭང་མ་གསུམ་ལྡན་དུ་རྒྱས་གདབ་ཅིང་། སྐུ་གསུང་ཐུགས་རྡོ་རྗེའི་ཚེ་དང་ཡེ་ཤེས་ཀྱི་དབང་བསྐུར་བའི་སླད་དུ། ཐོག་མར་ཚེ་འབྲང་རྡོ་རྗེའི་སོགས་ནས། བཀྲ་ཤིས་ཤོག་བར་མཚམས་སྦྱོར་རྒྱས་པ་ལྟར། རྗེས་དམ་ཚིག་ཁས་བླང་སོགས་སྤྱི་ཁྱབ་ལྟར་མདོར་བསྡུས་བྱས་པས་གྲུབ་བོ། །ཤུ་བྷཾ།། །།