བཀའ་སྲུང་དྲང་སྲོང་ཆེན་པོ་རཱ་ཧུ་ལའི་མངའ་གསོལ།
༄༅། །བཀའ་སྲུང་དྲང་སྲོང་ཆེན་པོ་རཱ་ཧུ་ལའི་མངའ་གསོལ་ནི། །ཀ་དག་སྤྲོས་བྲལ་ཆོས་སྐུ་བརྗོད་འདས་ཀྱང་། །ཁ་དོག་མ་འགག་རྩལ་ལས་སྲིད་ཞིའི་མདངས། །ག་དར་ཤེལ་གོང་ངོས་སུ་གཟུགས་འཕོས་བཞིན། །ང་བདག་གཟུང་འཛིན་སྐྱོན་བྲལ་གཟའ་མཆོག་ཤར། །ཅ་ཅོའི་ཚིག་གིས་འབོད་དུ་མི་འཚལ་ཡང་། །ཆ་ལུགས་མཁའ་ལ་སྣང་བའི་འཇའ་ཚོན་བཞིན། །ཇ་ཆང་སྐྱེམས་ཕུད་འདོད་ཡོན་བདུད་རྩིའི་མཚོ། །ཉ་ཟླ་ཚ་ཟེར་བསྲེས་ལྟར་དགྱེས་པར་བཞེས། །ཏ་ཐཱ་ག་ཏའི་བསྟན་སྲུང་གཙོ་བོ་ཁྱོད། །ཐ་མལ་འབྱུང་པོ་མ་ཡིན་ཡེ་ཤེས་པ། །ད་ལྟ་དྲེགས་པའི་གཙོ་བོར་མངའ་གསོལ་ལོ། །ནཱ་ག་ལ་སོགས་སྡེ་བརྒྱད་དབང་དུ་སྡུད། །པ་ཝ་སངས་སོགས་གཟའ་བརྒྱད་ཁྱོད་ཀྱི་འཁོར། །ཕ་ཉིད་སྲིན་རྒྱལ་མ་ཡང་ཀླུ་མོ་སྟེ། །བ་དན་དཀར་པོས་མཁའ་དབྱིངས་སྤུད་པ་ལྟར། །མ་ལུས་དྲེགས་པའི་བླ་རུ་མངའ་གསོལ་ལོ། །ཙ་མ་ར་ལྟར་ཁེངས་ལྡན་དགྲ་སྡེའི་དཔུང་། །ཚ་གྲང་དབལ་གྱིས་གཞོམ་བྱེད་རཱ་ཧུ་ལ། །ཛ་ཡའི་བསྟན་སྲུང་མཆོག་ཏུ་མངའ་གསོལ་ལོ། །ཝ་སྤྲེལ་སྟག་ལྟར་རྔམ་པའི་དགྲ་སྡེ་སྒྲོལ། །ཞྭ་མོའི་ཏོག་ལྟར་མཐོ་བའི་བསྟན་སྲུང་ཁྱོད། །ཟ་བྱེད་དྲེགས་ཚོགས་ཡོངས་ཀྱི་གཙུག་ན་དཔའ། །འ་འོལ་ཙམ་མིན་སྙིང་ནས་ཁྱོད་བསྟེན་ཞིང་། ཡ་མཚན་ལྷག་པའི་ལྷ་རུ་མངའ་གསོལ་ལོ། །རཱ་ཛ་སྣང་སྲིད་དྲེགས་པའི་རྗེ་བོ་ཁྱོད། །ལ་ལ་ཙམ་མིན་འགྲོ་བའི་སྲོག་དབུགས་བདག །ཤ་ཟ་འབོད་སྒྲོག་པདྨའི་བཀའ་བཞིན་དུ། །ས་བཅུའི་སེམས་དཔའ་མཆོག་ཏུ་མངའ་གསོལ་ལོ། །ཧ་ལའི་རྒྱུད་ལྡན་དགྲ་སྡེ་ཡོངས་གཞོམ་ནས། །ཨ་ཏིའི་ཀློང་དུ་བྱང་ཆུབ་ལྡོག་མེད་མཛོད། །མངའ་གསོལ་བྱས་སོ་བསྟན་དང་འགྲོ་བའི་དོན། །ལྷུན་གྱིས་གྲུབ་ནས་སྐུ་གསུམ་རྒྱལ་བ་ཡི། །གོ་འཕང་མཆོག་ལ་འགོད་པའི་ཕྲིན་ལས་མཛོད། །ཅེས་དྲང་སྲོང་ཆེན་པོ་གཟའ་མཆོག་རཱ་ཧུ་ལའི་མངའ་གསོལ་རྡོ་རྗེའི་ཕྲེང་བ་འདི་ཉིད་པདྨ་ནོར་བུས་བསྐུལ་ངོར་རྡོ་བླས་སྨྲས་བཞིན་འཇིགས་མེད་བསོད་ནམས་མཆོག་ལྡན་གྱིས་ཡི་གེར་བྲིས་པ་ཡོངས་སུ་དགེ་བར་གྱུར་ཅིག །ན་མོ་ཤྲི་མ་ཧཱ་ཀ་ལ་ཡེ། དཔལ་མགོན་ཚོགས་ཀྱི་བདག་པོ་ལ་གཏོར་མ་འབུལ་བར་འདོད་ན། ཕུད་གཏོར་རྒྱས་བསྡུས་ཅི་རིགས་བཤམས་ནས་ཆབ་ཀྱིས་སྦྱངས་ཤིང་། རཾ་ཡཾ་ཁཾ། ལན་གསུམ། ༀ་ཨཱཿཧཱུྃ། ལན་གསུམ་གྱིས་གཏོར་མ་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོར་བྱིན་གྱིས་བརླབས་ནས་འདི་བཞིན་བརྗོད། །གདོད་ནས་འཁོར་འདས་དབྱེར་མེད་ཀྱང་། །ལྷུན་གྲུབ་རྩལ་ལས་སྲིད་དང་ཞིའི། །སྒྱུ་འཕྲུལ་རོལ་པ་མཐའ་ཡས་པའི། །མངོན་རྟོགས་རྣམ་འགྱུར་བསམ་ལས་འདས། །དེ་ཕྱིར་རྒྱལ་ཀུན་བསྟན་སྲུང་མཆོག །རྒྱལ་བའི་བཀའ་སྡོད་ཚུལ་འཛིན་པའི། །ཚོགས་བདག་མ་ཧཱ་ཀ་ལ་ཆེ། །ཡབ་ཡམ་གཙོ་འཁོར་སྤྲུལ་པར་བཅས། །འདིར་གཤེགས་དགྱེས་པའི་གདན་བཞུགས་ལ། །ཕྱི་ནང་གསང་བ་ཡང་གསང་གི། །མཆོད་རྫས་བསྐང་རྫས་སྒྲུབས་རྫས་སོགས། །དངོས་འབྱོར་ཡིད་ཀྱིས་རྣམ་སྤྲུལ་པས། །གསོལ་ལོ་མཆོད་དོ་མངའ་གསོལ་ལོ། །ཚོགས་བདག་ཡབ་ཡུམ་གསོལ་ཞིང་མཆོད། །སྐུ་གསུང་ཐུགས་མགོན་གསོལ་ཞིང་མཆོད། །ཕྱོགས་བཅུའི་སྡེ་བརྒྱད་མགོན་པོ་སོགས། །གཙོ་འཁོར་ཡོངས་རྫོགས་གསོལ་ཞིང་མཆོད། །དཔལ་མགོན་བདུན་ཅུ་གསོལ་ཞིང་མཆོད། །དགྲ་ལྷ་བཅུ་གསུམ་གསོལ་ཞིང་མཆོད། །ཕོ་ཉ་ཡང་འཁོར་གསོལ་ཞིང་མཆོད། །གསོལ་ཞིང་མཆོད་པའི་མཐུ་སྟོབས་ཀྱིས། །དམ་ཚིག་ཉམས་ཆག་བསྐང་བ་དང་། །ཞི་རྒྱས་དབང་དྲག་ལ་སོགས་པའི། །རབ་འབྱམས་ཕྲིན་ལས་གང་བཅོལ་ཀུན། །ཐོགས་མེད་འགྲུབ་པའི་སྡོང་གྲོགས་དང་། །འཕྲལ་ཕུག་དགའ་བདེའི་དཔལ་ཡོན་གྱིས། །གཡེལ་མེད་སྐྱོང་བའི་བཀྲ་ཤིས་ཤོག །འདི་ནི་དད་དམ་ནོར་འཆང་བ། །ཀུན་བཟང་འཆི་མེད་ཀྱིས་བསྐུལ་ངོར། །རྡོ་བླས་སྤེལ་བའི་དགེ་བ་ཡིས། །ལུགས་ཟུང་དཔལ་ཡོན་ཕུན་ཚོགས་ཤོག །དགེའོ།། །།