སྡེ་བ་བཅོ་བརྒྱད་དུ་གྱེས་པ།
༈ དུས་དེར་དགྲ་བཅོམ་པ་ཆོས་ཀྱི་ཚོང་དཔོན་གྱིས་རྩོད་པ་ཅན་གྱི་དགེ་འདུན་གྱི་ཚོགས་བོར་ནས་བྱང་ཕྱོགས་ཀྱི་རྒྱུད་དུ་སོང་སྟེ། སྒྲ་རིག་པའི་སློབ་དཔོན་མཐའ་དག་བསྟེན་ནས་རིག་པ་བསླབས་ཤིང་ཤེས་ཀྱང་ད་དུང་མ་ཚིམ་སྟེ་ཡི་དམ་གྱི་ལྷ་བསྒྲུབས་པས་ཞལ་བསྟན་ནས་ཨ་ཨི་ཨུ་ཞེས་གསུངས་པ་ཙམ་གྱིས་སྒྲའི་གནས་ཐམས་ཅད་ཤེས་སོ། །འདི་ནི་ཕྱི་པ་རྣམས་དབང་ཕྱུག་ཡིན་ཟེར་ཡང་། སྤྱན་རས་གཟིགས་ཀྱི་སྤྲུལ་པར་འཇམ་དཔལ་རྩ་རྒྱུད་ལས་ལུང་བསྟན་ཏེ། བྲམ་ཟེའི་ཁྱེའུ་པཱ་ཎཱི་ནི། །ངེས་པར་ཉན་ཐོས་བྱང་ཆུབ་ཏུ། །ང་ཡིས་ལུང་བསྟན་བྱས་པ་ཡིན། །འཇིག་རྟེན་དབང་ཕྱུག་བདག་ཉིད་ཆེ། །དེ་ཡང་དེ་ཡི་སྔགས་
ཀྱིས་འགྲུབ། །ཅེས་གསུངས་སོ། །དེས་ནི་པཱ་ཎི་བྱ་ཀ་ར་ཎ་ཞེས་བྱ་བའི་སྒྲ་སྦྱོར་བའི་མདོ་ཤོ་ལོ་ཀ་སྟོང་དང་། བྱེ་བྲག་ཕྱེད་པའི་མདོ་ཤོ་ལོ་ཀ་སྟོང་སྟེ་ཉིས་སྟོང་ཡོད་པ་ཞིག་མཛད་དོ། །འདི་ནི་སྒྲའི་སྦྱོར་བ་མཐའ་དག་གི་རྩ་བ་ལྟ་བུ་ཡིན་ཏེ། དེ་ཡན་ཆད་དུ་སྒྲའི་སྦྱོར་བ་རྣམས་ཡི་གེར་འཁོད་པའི་བསྟན་བཅོས་ཀྱང་མེད་ཅིང་ཕྱོགས་གཅིག་ཏུ་བསྒྲིགས་པའི་རིམ་པའང་མེད་པས་སྔོན་གྱི་སྒྲ་མཁན་རྣམས་ནི་སྒྲ་སྦྱོར་རེ་རེ་གཉིས་གཉིས་ནས་བརྩམས་ཏེ་ཐོར་བུ་མཐའ་དག་བསགས་པས་མང་པོ་ཁོ་ན་ཤེས་པར་འགྱུར་བ་ཡིན་པར་གྲགས་སོ། །ཨིནྡྲ་བྱཱ་ཀ་ར་ཎ་བོད་ལ་སྔ་བ་ཡིན་པར་གྲགས་ཀྱང་ལྷ་ཡུལ་དུ་བྱུང་བ་སྔ་བ་ཡིན་པ་སྲིད་ཀྱང་འཕགས་ཡུལ་དུ་བྱུང་བ་སྔ་བ་མ་ཡིན་ནོ། །བོད་དུ་བསྒྱུར་བའི་ཙནྡྲ་བྱཱ་ཀ་ར་ཎ་པཱ་ཎི་པ་དང་མཐུན་ལ། ཀ་ལཱ་པ་བྱཱ་ཀ་ར་ཎི་ཨིནྡྲའི་ལུགས་དང་མཐུན་ནོ། །ཞེས་མཁས་པ་རྣམས་གསུངས་ལ། ཁྱད་པར་པཱ་ཎི་བྱཱ་ཀ་ར་ཎ་ནི་ལྷག་པར་དོན་རྒྱས་པའི་ཕྱིར། དེ་ཆ་ལག་དང་བཅས་པ་རྫོགས་པར་ཤེས་པ་ནི་ཤིན་ཏུ་དཀོན་པར་གྲགས་སོ། །དེ་ནས་བྱང་ཕྱོགས་མཐའ་འཁོབ་ཀྱི་ཡུལ་དུ་རྒྱལ་པོ་མེས་བྱིན་ཞེས་བྱ་བ་བྱུང་། དེས་དགྲ་བཅོམ་པ་ཆོས་ཀྱི་ཚོང་དཔོན་ལ་སོགས་པ་འཕགས་པ་སུམ་སྟོང་ཙམ་ལོ་སུམ་ཅུ་ལྷག་ཙམ་དུ་མཆོད། ཡུལ་དབུས་སུ་འཕགས་པ་གཏོང་བ་ཆེན་པོས་བསྟན་པ་སྤེལ། གྲོང་ཁྱེར་མེ་ཏོག་ཏུ་རྒྱལ་པོ་དགའ་བོའི་བུ་པདྨ་ཆེན་པོ་ཞེས་བྱ་བས་དགེ་འདུན་མཆོད། དུས་དེར་གནས་བརྟན་ཀླུའི་རྗེས་སུ་ཞུགས་པ་དགེ་སློང་ཡིད་བརྟན་བྱུང་ནས་གཞི་ལྔ་ཡོངས་སུ་བསྒྲགས་པས་རྩོད་པ་རྒྱ་ཆེར་འཕེལ་ནས། སྡེ་པ་བཞི་ཡང་རིམ་གྱིས་བཅོ་བརྒྱད་དུ་གྱེས་པའི་འགོ་བརྩམས། རྒྱལ་པོ་པདྨ་ཆེན་པོ་ལས་དུས་མཉམ་པ་ལས་ཅུང་ཟད་ཕྱི་བ་ཙམ་ན། ཡུལ་ཨོ་དྲི་བི་ཤར་རྒྱལ་པོ་ཟླ་བ་བསྲུང་ཞེས་བྱ་བ་བྱུང་། དེའི་ཁྱིམ་དུ་འཕགས་པ་༼མ་ཡིག་ཏུ་མི་གསལ་༽དགེ་སློང་གི་གཟུགས་ཀྱིས་བྱོན་ཏེ། ཐེག་པ་ཆེན་པོའི་ཆོས་ཅི་རིགས་པ་བསྟན་ཅིང་གླེགས་བམ་ཞིག་ཀྱང་བཞག་གོ་ཞེས་འབྱུང་ལ། དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ཡིན་པར་གྲགས། འདི་ནི་སྟོན་པ་མྱ་ངན་ལས་འདས་པའི་འོག་ཏུ་ཐེག་ཆེན་མི་ཡུལ་དུ་བྱུང་བའི་ཐོག་མ་ཡིན་ནོ། །དེའི་རྗེས་སུ་ཁ་ཆེའི་
ཡུལ་དུ་རྒྱལ་པོ་སེང་གེ་ཞེས་བྱ་བ་གཅིག་བྱུང་མོད་རབ་ཏུ་བྱུང་ནས་དགྲ་བཅོམ་པ་ཐོབ། དེ་ཛ་ལན་དྷ་རའི་ཡུལ་གྱི་རྒྱལ་པོ་ཀ་ཎི་ཀས་ཐོས་ཏེ་ལྷག་པར་དད་ནས་འཕགས་པ་སེང་གེ་ལེགས་མཐོང་ལ་ཆོས་ཉན། ཕྱོགས་བཞིའི་དགེ་འདུན་ལ་ཡང་དུས་སྟོན་གྱི་མཆོད་པ་མང་དུ་བཙུགས། དེའི་དགེ་སློང་ཡང་དག་རྒྱལ་བ་ཅན་གྱིས་ཀྱང་ཆོས་མང་དུ་བསྟན། དེ་ཙམ་ན་སྡེ་པ་བཅོ་བརྒྱད་དུ་གྱེས་ཟིན་ནས་སོ་སོ་ཐ་དད་པར་རྩོད་པ་མེད་པར་གནས་སོ། །དེའི་ཚེ་ཤར་ཕྱོགས་ནས་འཕགས་པ་རྩིབས་ལོག་ཅེས་བྱ་བ་དགྲ་བཅོམ་པ་མང་དུ་ཐོས་པའི་མཐར་ཕྱིན་པ་ཅིག་བྱུང་། དེས་གསེར་ཕྲེང་ཅན་གྱི་རྟོགས་བརྗོད་ཅེས་བྱ་བ་རྒྱལ་པོ་ཀྲི་ཀྲིའི་རྨི་ལམ་ལུང་བསྟན་པའི་མདོ་ལ་སོགས་པ་མདོ་ཤིན་ཏུ་དཀོན་པ་དག་འདོན་པར་བྱེད་དོ། །དེ་རྒྱལ་པོ་ཀ་ཎི་ཀས་ཐོས་ཏེ་ཁ་ཆེའི་ཡུལ་རྣ་རྒྱན་ནགས་ཀྱི་གཙུག་ལག་ཁང་ཞེས་བྱ་བར། དགེ་སློང་མཐའ་དག་བསྡུས་ནས་བཀའ་བསྡུ་གསུམ་པ་བྱས་ཞེས་ཁ་ཆེ་རྣམས་འདོད། གཞན་དག་ནི་ཛ་ལནྡྷ་རའི་དགོན་པ་ཀུ་བ་ནའི་གཙུག་ལག་ཁང་དུ་བསྡུས་པར་འདོད་པ་ལས་མཁས་པ་ཕལ་ཆེར་ཕྱི་མ་འཐད་པར་མཛད། གང་ལྟར་ཡང་དགྲ་བཅོམ་པ་ལྔ་བརྒྱ་དང་། སྡེ་སྣོད་འཛིན་པ་བཙུན་པ་ཆེན་པོ་ལྔ་སྟོང་ཞིག་གིས་བསྡུས་སོ་ཞེས་གྲགས་ལ། དེའང་དོན་དུ་ནི་བསྟན་པའི་ཆེ་བ་དབྱུང་བའི་ཕྱིར་དགྲ་བཅོམ་པ་ལྔ་བརྒྱ་ཞེས་སྨོས་པར་ཟད་ཀྱི། ཡང་དག་པ་ན་དགྲ་བཅོམ་པ་ཉུང་ངུ་ཞིག་དང་། འབྲས་བུ་ཐོབ་པ་རྒྱུན་ཞུགས་ཡན་ཆད་བསྡུས་པས་ལྔ་བརྒྱར་ལོངས་པ་ཙམ་མོ། །དེའི་ཕྱིར་བསྡུ་བ་གསུམ་པའི་དུས་འདི་ཙམ་ན་དགྲ་བཅོམ་པ་ཉུང་ངོ་། །དེ་ལ་རྒྱལ་པོ་དགའ་བའི་ཚེའི་སྨད་དང་། རྒྱལ་པོ་པདྨ་ཆེན་པོའི་ཚེ་རིལ་པོ་དང་། རྒྱལ་པོ་ཀ་ཎི་ཀའི་ཚེའི་སྟོད་ཡན་ཏེ། རྒྱལ་པོ་བཞིའི་རིང་ལ་དགེ་འདུན་རྣམས་རྩོད་པར་གྱུར་ཅིང་། རྩོད་པ་དྲག་པོ་ལོ་དྲུག་ཅུ་རྩ་གསུམ་ཙམ་བྱུང་། སྔ་ཕྱིར་རྩོད་པ་ཅི་རིགས་ཡོད་པ་དང་བཅས་ན་ལོ་བརྒྱར་ཉེ་བ་ཙམ་བྱུང་བར་གྲགས། བསྡུ་བ་གསུམ་པའི་དོན་ནི་སྡེ་པ་བཅོ་བརྒྱད་པོ་ཐམས་ཅད་བསྟན་པ་རྣམ་དག་ཏུ་བསྒྲུབས་ཤིང་འདུལ་བ་ཡི་གེར་བཀོད་ལ། མདོ་སྡེ་དང་མངོན་པ་ཡི་གེར་མ་འཁོད་པ་རྣམས་ཀྱང་ཡི་གེར་བཀོད་ཅིང་། སྔར་འཁོད་པ་རྣམས་ལའང་དག་ཐེར་བྱས་སོ། །