ལས་སྤྱིར་བསྟན་པའི་སྐབས་ཀྱི་དོགས་གཅོད།

ལས་སྤྱིར་བསྟན་པའི་སྐབས་ཀྱི་དོགས་གཅོད་ནི།

ཡང་རྩ་བར། སེམས་པ་ཡིད་ཀྱི་ལས་ཡིན་ནོ། །ཞེས་པ་ལྟར་སེམས་པའི་ལས་ཡིན་ན་ཡིད་ཤེས་དང་མཚུངས་ལྡན་ཡིན་དགོས་པར་ཐལ། མཆིམས་མཛོད་༣༣༨ལས། ལས་དེ་ནི་སེམས་པའི་ལས་དང་སེམས་པ་དེས་བྱས་པ་བསམ་པའི་ལས་གཉིས་ལས་སེམས་པའི་ལས་ནི། ཡིད་ཤེས་དང་མཚུངས་ལྡན་ལུས་ངག་གི་ལས་མངོན་པར་འདུ་བྱེད་པའི་སེམས་བྱུང་ཡིན་པའི་ཕྱིར་ཡིད་ཀྱི་ལས་ཡིན་ནོ། །ཡིད་ནི་འདིར་སྐྱེ་མཆེད་ཀྱི་ཡིད་ཡིན་ནོ། །ཞེས་གསུངས་པའི་ཕྱིར། འདོད་ན། མིག་ཤེས་དགེ་བ་དང་མཚུངས་ལྡན་གྱི་སེམས་པ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། ལས་ལ་དེ་གཉིས་སུ་མ་ངེས་པར་འགྱུར་ལ་འདོད་མི་རིགས་ཏེ། ལས་ལ་དེ་གཉིས་ཕྱེ་བའི་རྒྱུ་མཚན་ཡོད་པའི་ཕྱིར་ཟེར་ན། མཆིམས་མཛོད་༣༣༨ལས། ཡིད་ནི་འདིར་སྐྱེ་མཆེད་ཀྱི་ཡིད་ཡིན་ནོ། །ཞེས་གསུངས་པ་ལྟར་ན་ཡིད་ཞེས་པ་གཙོ་སེམས་དྲུག་པོ་ཅི་རིགས་ལ་བྱེད་དམ་དཔྱད་པར་བྱ། མཆིམས་མཛོད་༣༣༨ལས། སེམས་པ་དེས་བསྐྱེད་པའི་ལས་ནི་ལུས་ཀྱི་ལས་དང་ངག་གི་ལས་ཏེ། དེ་དག་ནི་སེམས་པའི་ཀུན་ནས་བསླང་བའི་ཕྱིར་རོ། །ཞེས་པ་ལྟར་ན་བསམ་པའི་ལས་ལ་ལུས་ངག་གི་ལས་ལས་གཞན་པའི་ཡིད་ལས་ཡོད་མེད་དཔྱད་པར་བྱའོ། །