ས་སྐྱ་པའི་ལུགས་ལ།
ས་སྐྱ་པའི་ལུགས་ལ།
ཐལ་རང་གི་ཁྱད་པར་ཡང་འཇམ་མགོན་ས་སྐྱ་པཎྜི་ཏའི་མཁས་འཇུག་ལས། ཐ་སྙད་དུ་ནི་མི་བསླུ་བ། །འདོད་པ་དེ་ནི་ཚད་མའི་ལུགས། །རང་རྒྱུད་དེ་དང་ཆ་མཐུན་ལ། །ཐལ་འགྱུར་བ་དག་ཐ་སྙད་དུ། །བདེན་པ་མི་འདོད་མདོར་བསྡུས་པའོ། །ཞེས་གསུངས་སོ། །དེའི་སྒྲས་ཟིན་ལྟར་ན་རིགས་པ་དྲུག་ཅུ་པ་ལས། མྱ་ངན་འདས་པ་བདེན་གཅིག་པུར། །རྒྱལ་བ་རྣམས་ཀྱིས་རྣམས་གསུངས་པ། །དེའི་ཚེ་ལྷག་མ་ལོག་པ་ཞེས། །མཁས་པ་སུ་ཞིག་རྟོགས་མི་བྱེད། །ཅེས་དང༌། ཟླ་གྲགས་ཀྱི་དེའི་འགྲེལ་བ་ལས། བཅོམ་ལྡན་འདས་ཀྱིས་དགེ་སློང་དག་འདི་ལྟ་སྟེ། མི་སླུ་བའི་ཆོས་ཅན་མྱ་ངན་ལས་འདས་པ་འདི་ནི་བདེན་པའི་མཆོག་གཅིག་ཏུའོ། །ཞེས་དང༌། ཟླ་བའི་ཚིག་གསལ་ལས། དོན་ཡང་དེ་ཡིན་ལ་དམ་པ་ཡང་ཡིན་པས་ན་དོན་དམ་པའོ། །དེ་ཉིད་བདེན་པ་ཡིན་པས་དོན་དམ་བདེན་པའོ། །ཞེས་གསུངས་པ་སོགས་ཀྱི་ལུང་མང་དུ་ཡོད་པ་དང་མི་འགལ་བའི་ཚུལ་དཔྱད་དགོས་སོ། །