གསུམ་པ་རྩོད་པ་སྤང་བ།

གསུམ་པ་རྩོད་པ་སྤང་བ་ནི།

གལ་ཏེ་སྡོམ་པ་ཆོས་ཅན། གཟུགས་མ་ཡིན་པར་ཐལ། གཟུགས་ཀྱི་མཚན་ཉིད་དང་མི་ལྡན་པའི་ཕྱིར་རོ། །དེའང་གཟུགས་ཀྱི་མཚན་ཉིད་ནི་མངོན་པ་ཀུན་ལས་བཏུས་ལས། གཟུགས་ཀྱི་ཕུང་པོའི་མཚན་ཉིད་ཅི་ཞེ་ན། རེག་པས་གཟུགས་སུ་ཡོད་པ་དང༌། ཡུལ་དཔྱད་པས་གཟུགས་སུ་ཡོད་པའོ་ཞེས་བཤད་པའི་མཚན་ཉིད་དེ་མེད་པར་ལུང་གིས་གྲུབ་པའི་ཕྱིར་རོ་ཞེ་ན། སྡོམ་པ་རྣམ་པར་རིག་བྱེད་མ་ཡིན་པའི་གཟུགས་དེ་ལ། རིག་བྱེད་ཀྱི་གཟུགས་ཀྱི་མཚན་ཉིད་དང་མི་ལྡན་ཡང༌། རིག་བྱེད་མ་ཡིན་པའི་གཟུགས་ཀྱི་མཚན་ཉིད་དང་ལྡན་པས། སྔར་གྱི་རྟགས་དེ་མ་གྲུབ་བོ། །མཚོ་ཊཱིཀ་ལས། སྡོམ་པ་ཆོས་ཅན། གཟུགས་མ་ཡིན་པར་ཐལ། གཟུགས་ཡིན་པར་ཚད་མས་མ་གྲུབ་པའི་ཕྱིར་རོ་ཞེ་ན། ཁྱབ་པ་མེད་དེ་གཞན་དུ་ན་གཟུགས་ཁམས་ཀྱི་ལྷའི་གཟུགས་ཆོས་ཅན། གཟུགས་མ་ཡིན་པར་ཐལ། གཟུགས་ཡིན་པར་ཚད་མས་མ་གྲུབ་པའི་ཕྱིར་རོ། །རྟགས་མ་གྲུབ་ན་ཤིན་ཏུ་ལྐོག་གྱུར་ཡིན་པ་དང་འགལ་ལོ། །ཞེས་གསུངས་སོ། །དེ་ལས། གཟུགས་ཡིན་པར་ཚད་མས་མ་གྲུབ་པའི་ཕྱིར་རོ་ཞེ་ན། ཁྱབ་པ་མེད་དེ། ཞེས་གསུངས་པ་ལ་ཞིབ་ཆ་ཅུང་ཟད་དགོས་སོ། །འོ་ན་སྡོམ་པ་ལ་རྣམ་པ་རིག་བྱེད་མ་ཡིན་པའི་གཟུགས་ཀྱིས་ཁྱབ་པར་ཐལ། རང་ལུགས་བཞག་པའི་སྒྲུབ་བྱེད་བཀོད་ཚུལ་དང༌།རྩོད་ལན་གྱི་སྐབས་འདིར་རིག་མིན་གྱི་གཟུགས་ཁོ་ན་ལ་བཤད་པའི་ཕྱིར་ཟེར་བ་དང༌། སྡོམ་པ་ཆུ་ལོན་ལྟ་བུར་གསུངས་པའི་རྒྱུ་མཚན་གྱིས་རྣམ་པར་རིག་བྱེད་མ་ཡིན་པའི་གཟུགས་ཡོད་པར་སྒྲུབ་ཚུལ་དང་སྡོམ་པ་རིག་མིན་གྱི་གཟུགས་ཡིན་པར་བཤད་པའི་ཕྱིར། རྟགས་གྲུབ་སྟེ། མཆིམས་མཛོད་༣༤༤ལས། གཞན་ཡང་མདོ་ལས་སྤོང་བ་ནི་འཆལ་བའི་ཚུལ་ཁྲིམས་ཀྱི་གེགས་བྱེད་པའི་ཕྱིར་ཆུ་ལོན་དུའང་གསུངས་ན་མེད་པ་ནི་ཆུ་ལོན་དུ་མི་རིགས་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན། འདོད་མི་ནུས་ཏེ། མཛོད་ལས། དང་པོའི་རྣམ་རིག་རྣམ་རིག་མིན། །ཞེས་དང༌།དེའི་ཐད་ཀྱི་མངོན་པའི་རྒྱན་༣༥༧ལས། ཡང་སོ་སོ་ཐར་བའི་སྡོམ་པ་ཐོབ་པའི་སྐད་ཅིག་མ་དང་པོའི་རྣམ་པར་རིག་བྱེད་དང་རྣམ་པར་རིག་བྱེད་མིན་པ་ནི་སོ་སོ་ཐར་པ་དང་སྡོམ་པ་དང་བྱ་བའི་ལས་ཀྱི་ལམ་ཞེས་ཀྱང་བྱ་སྟེ། ཞེས་དང༌། མཛོད་ལས། འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །ཞེས་དང༌། རྣམ་རིག་བྱེད་ནི་ཐམས་ཅད་ལ། །བྱེད་པ་དག་ལ་ད་ལྟར་ལྡན། །ཞེས་དང༌། དེའི་རང་འགྲེལ་ལས། སྡོམ་པ་དང་སྡོམ་པ་མིན་པ་དང་བར་མ་ལ་གནས་པ་ཐམས་ཅད་ཇི་སྲིད་དུ་རྣམ་པར་རིག་བྱེད་བྱེད་པ་དེ་སྲིད་དུ་ད་ལྟར་གྱི་དེ་དང་ལྡན་ནོ། །ཞེས་གསུངས་པའི་ཕྱིར་ཟེར་ན་སྤྱིར་རིག་བྱེད་དང་རིག་མིན་གྱི་གཟུགས་གཉིས་ཡོད་པར་འདོད་དགོས་པར་སྣང་ངོ། །ཡང་མཚོ་ཊཱིཀ་ལས། དགེ་སློང་གིས་སྤང་བྱ་སྤོང་བ་དེ་ཆོས་ཅན། གཟུགས་ཀྱིས་སྤང་བྱ་སྤོང་བར་ཐལ། སྤོང་བྱེད་ཀྱི་སྡོམ་པ་གཟུགས་ཡིན་པའི་ཕྱིར་རོ། །འདོད་ན། ང་དགེ་སློང་ཡིན་པས་ཉེས་སྤྱོད་འདི་མི་རུང་སྙམ་སྟེ་སེམས་ཀྱིས་སྤོང་བར་མྱོང་བས་གྲུབ་པས་བསལ་ལོ་ཞེ་ན། སུམ་བརྒྱ་པ་ལས། དགེ་ཚུལ་བརྟུལ་ཞུགས་ཆུ་ལོན་བརྩིགས་པ་དང༌། །ཞེས་ཕྱིའི་སྤང་བྱ་སྤོང་བ་ལ་ཆུ་རགས་བརྩིགས་པ་དང་འདྲ་བར་གསུངས་པས། གཟུགས་ཀྱིས་སྤང་བྱ་སྤོང་བར་འདོད་ཅིང༌། སེམས་ཀྱིས་སྤོང་བ་ནི་དེའི་གྲོགས་ཙམ་ཡིན་ནོ་གསུང་ངོ། །ཞེས་གསུངས་པའི་ཕྱིར། དེ་ལྟ་ན་དགྲ་བཅོམ་པའི་རྒྱུད་ཀྱི་ལྟུང་བ་དེ་གཟུགས་ཡིན་དགོས་ལ།དེ་ཡིན་ན་རིག་མིན་གྱི་གཟུགས་ཡོད་དགོས་ལ། རིག་མིན་གྱི་གཟུགས་ཡིན་ན་དགེ་མི་དགེ་གང་རུང་ཡིན་དགོས་པ་ལས་ལྟུང་བ་དགེ་བ་འཇོག་པའི་གནས་མེད་ལ། དེས་ན་མི་དགེ་བར་ཐལ་བར་འགྱུར་བ་སོགས་དཔྱད་བྱ་མང་ཡང་སྡིག་ལྟུང་གི་ཁྱད་པར་བཤད་སྐབས་སུ་སླར་དཔྱད་པར་བྱའོ། །ཡང་སྡོམ་པ་ལ་གཟུགས་ཀྱིས་མ་ཁྱབ་པར་ཐལ། མཛོད་ལས། ཤེས་བཞིན་དག་ནི་དྲན་དག་གཉིས། །ཡིད་དང་དབང་པོའི་སྡོམ་པ་ཡིན། །ཞེས་དང༌། མཆིམས་མཛོད་༣༥༨ལས།ཡང་སོ་སོར་ཐར་བ་ལས། ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཞེས་དང༌། བཤེས་ཕྲིན་རྣམ་བཤད་༢༢༢ལས། སོ་སོར་ཐར་བའི་སྡོམ་པ་ལ་མི་དགེ་བཅུ་ཆ་ཚང་སྤོང་བའི་སྡོམ་པ་དང༌། ཆ་ཤས་ཅི་རིགས་སྤོང་བ་རྣམས་ཡོད་པ་ལས། ཞེས་དང༌། ཚུལ་ཁྲིམས་ཀྱི་ཕུང་བོའི་མདོ་ལས། གང་ཡང་མིག་གི་དབང་པོའི་སྡོམ་པས་བསྡམས་ཏེ་གནས་སོ་ཞེས་གསུངས་པའི་ལུས་ངག་གི་སྡོམ་པ་མ་ཡིན་པ་ཡིད་དང་དབང་པོའི་སྡོམ་པ་དེ་དག་ཀྱང་རིག་བྱེད་མ་ཡིན་པ་ཡིན་ནམ་ཞེ་ན་མ་ཡིན་ཏེ། ལྟུང་བ་དང་དེའི་གཉེན་པོ་ཤེས་པའི་ཤེས་བཞིན་དང༌། སྤོང་བའི་སེམས་པ་མི་བརྗེད་པའི་དྲན་པ་དང་གཉིས་ཀ་ནི་ཡིད་ཀྱི་སྡོམ་པ་དང་དེ་གཉིས་ཀ་དབང་པོའི་སྡོམ་པའང་ཡིན་ཏེ། དེ་གཉིས་ཀྱིས་ཡིད་ཀྱི་ཉེས་སྤྱོད་ཀྱང་སྤོང་ལ་དབང་པོ་ཡུལ་ལ་ལོངས་སྤྱོད་པ་དག་ཀྱང་སྤོང་བའི་ཕྱིར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། སྡོམ་པ་ལ་གཟུགས་ཀྱིས་ཁྱབ་པའི་ཕྱིར། དེར་ཐལ། སོ་ཐར་བསམ་གཏན་ཟག་མེད་ཀྱི་སྡོམ་པ་ལ་གཟུགས་ཀྱིས་ཁྱབ་པའི་ཕྱིར་ཏེ། མཛོད་རང་འགྲེལ་ལས། སྤོང་བ་ནི་འཆལ་བའི་ཚུལ་ཁྲིམས་ཀྱི་གེགས་བྱེད་པའི་ཆུ་ལོན་དུ་གསུངས་ན། རིག་བྱེད་མ་ཡིན་པའི་གཟུགས་མེད་པར་ནི་ཆུ་ལོན་ཡིན་པར་འོས་པ་ཡང་མ་ཡིན་པས། རྣམ་པར་རིག་བྱེད་མ་ཡིན་པ་ནི་ཡོད་པ་ཁོ་ནའོ། །ཞེས་དང༌། མངོན་རྒྱན་༣༥༤ལས།སོ་ཐར་དང༌། བསམ་གཏན་དང༌། ཟག་མེད་ཀྱི་སྡོམ་པའི་ཐ་སྙད་བྱ་རུང༌། མཚན་ཉིད་རིམ་པ་ལྟར་འདོད་པའི་དགེ་བ་གཟུགས་ཅན་གང་ཞིག་ངེས་པ་ལྔ་དང་བྲལ་བ་དང༌། སེམས་ཀྱི་རྗེས་འབྲང་གི་གཟུགས་ཟག་བཅས་དང༌། སེམས་ཀྱི་རྗེས་འབྲང་གི་གཟུགས་ཟག་མེད་དོ། །ཞེས་དང༌། འོད་ལྡན་ལས། ཡིད་ཀྱི་ལ་ནི་སོ་སོར་ཐར་བའི་སྡོམ་པ་ཉིད་མེད་པའི་ཕྱིར། ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །