ས་དང་པོ་རབ་ཏུ་དགའ་བ།

དང་པོ་ལ། ཁྱད་གཞི་སའི་ངོ་བོ་མདོར་བསྟན་པ། ཁྱད་ཆོས་སའི་ཡོན་ཏན་རྒྱས་པར་བཤད་པ། སའི་ཡོན་ཏན་བརྗོད་པའི་སྒོ་ནས་མཇུག་བསྡུ་བདང་གསུམ།

དང་པོ་ནི། རྩ་བར། རྒྱལ་བའི་སྲས་པོ་འདི་ཡི་སེམས་གང་འགྲོ་བ་རྣམས། །རྣམ་པར་གྲོལ་བར་བྱ་ཕྱིར་སྙིང་རྗེའི་དབང་གྱུར་ཅིང༌། །ཀུན་ཏུ་བཟང་པོའི་སྨོན་ལམ་རབ་བསྔོས་དགའ་བ་ལ། །རབ་ཏུ་གནས་པ་དེ་ནི་དང་པོ་ཞེས་བྱའོ། །ཞེས་ས་དང་པོ་ལ་གནས་པའི་རྒྱ༷ལ་བ༷འི་སྲ༷ས་པོ༷་འགྲོ་བ་ཐམས་ཅད་རང་བཞིན་མེད་པར་མཐོང་བས་རང་བཞིན་མེད་པའི་འགྲོ་བ་རྣམས་སྙིང་རྗེའི་དམིགས་ཡུལ་དུ་བཟུང་བ་ཅན་འདི༷་ཡི༷་མཉམ་པར་བཞག་པའི་སེ༷མས་ག༷ང་ཡིན་པ་དེ་ནི་འགྲོ༷་བ༷་རྣ༷མས་རྣ༷མ་པ༷ར་གྲོ༷ལ་བ༷ར་བྱ༷་བའི་ཕྱི༷ར་དུ་སྙི༷ང་རྗེ༷་ཆེན་པོའི་གཞན་དབ༷ང་དུ་གྱུ༷ར་ཅི༷ང༌། བྱང་སེམས་ཀུ༷ན་ཏུ༷་བཟ༷ང་པོ༷འི་སྨོ༷ན་ལ༷མ་གྱི་སྟོབས་ལ་བརྟེན་པས་ར༷བ་ཏུ་བསྔོ༷ས་པའི་ས་དང་པོ་རབ་ཏུ་དག༷འ་བ༷་ཞེས་པའི་མིང་ཅན་གྱི་གཉིས་སུ་སྣང་བ་མེད་པའི་ཡེ་ཤེས་དང༌། རང་གི་འབྲས་བུ་ཡོན་ཏན་གྱི་གྲངས་ལ་སོགས་པའི་མཚོན་བྱར་གྱུར་པ་དེ་ལ༷་ར༷བ་ཏུ༷་གན༷ས་པ༷་ཡི་སེམས་དཔའི་རྒྱུད་ཀྱི་དོན་དམ་པའི་སེམས་དེ༷་ནི༷། འཇིག་རྟེན་ལས་འདས་པའི་སེམས་ད༷ང་པོ༷་ཞེ༷ས་བྱ༷འོ༷། །

རྒྱན་ལས། བྱང་ཆུབ་ལ་ནི་ཉེ་བ་དང༌། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །ཞེས་སོ། །ས་དང་པོ་ལ་གནས་པའི་རྒྱལ་བའི་སྲས་པོས་སྟོང་ཉིད་ལ་མཉམ་པར་བཞག་པའི་སེམས་གང་ཡིན་པ་དེ་ཆོས་ཅན། སྙིང་རྗེ་ཆེན་པོའི་གཞན་དབང་དུ་གྱུར་ཅིང་ཀུན་ཏུ་བཟང་པོའི་སྨོན་ལམ་གྱིས་རབ་ཏུ་བསྔོས་པ་ཡིན་ཏེ། ཁྱོད་ནི་འགྲོ་བ་རྣམས་སྡུག་བསྔལ་ལས་རྣམ་པར་གྲོལ་བ་ཐོབ་པའི་ཕྱིར་དུ་སྡུག་བསྔལ་ལས་སྐྱོབ་འདོད་ཀྱི་སྙིང་རྗེའི་དབང་དུ་གྱུར་ཏེ་སྙིང་རྗེའི་སྒོ་ནས་ཀུན་ཏུ་བཟང་པོའི་སྨོན་ལམ་གྱིས་རྫོགས་བྱང་གི་རྒྱུར་བསྔོས་པའི་ཡེ་ཤེས་ཡིན་པའི་ཕྱིར་རོ། །བྱང་སེམས་ཀྱི་སའི་མཚན་ཉིད། རང་ལ་བརྟེན་པའི་ཡོན་ཏན་དུ་མའི་རྟེན་དུ་གྱུར་བའི་བྱང་སེམས་ཀྱི་ཡེ་ཤེས་དེ་ཡིན་ནོ། །བྱང་སེམས་ཀྱི་དོན་དམ་པའི་སའི་མཚན་ཉིད་ཡོད་དེ། སྙིང་རྗེ་ཆེན་པོ་སོགས་ཐབས་ཁྱད་པར་ཅན་གྱིས་ཟིན་པའི་བྱང་སེམས་འཕགས་པའི་རྒྱུད་ཀྱི་སྟོང་ཉིད་མངོན་སུམ་དུ་རྟོགས་པའི་ཟག་མེད་ཡེ་ཤེས་དེ་ཡིན་པའི་ཕྱིར། དབྱེ་ན་དོན་དམ་པའི་ས་རབ་ཏུ་དགའ་བ་སོགས་བཅུ་ཡོད་དོ། །

སྐབས་འདིའི་ས་ནི་དོན་དམ་པའི་སའམ་དོན་དམ་སེམས་བསྐྱེད་ཀྱི་དབང་དུ་བྱས་པའི་སའི་ངོ་བོའི་ཁྱད་པར་ཟག་མེད་དང༌། གྲོགས་ཀྱི་ཁྱད་པར་སྙིང་རྗེ་དང་སེམས་བསྐྱེད་ཀྱིས་ཟིན་པའི་ཁྱད་པར་དང༌། སའི་སྒྲ་དོན་ཡོན་ཏན་གྱི་རྟེན་བྱེད་པའི་ཁྱད་པར་དང་གསུམ་གྱི་སྒོ་ནས་བཞག་སྟེ། རང་འགྲེལ་ལས། བྱང་ཆུབ་སེམས་དཔའ་རྣམས་ཀྱི་ཟག་པ་མེད་པའི་ཡེ་ཤེས་སྙིང་རྗེ་ལ་སོགས་པས་ཡོངས་སུ་ཟིན་པ་ཉིད་ཆར་རྣམ་པར་ཕྱེ་བ་ན་ས་ཞེས་བྱ་བའི་མིང་འཐོབ་སྟེ། ཡོནཏན་གྱི་རྟེན་དུ་གྱུར་པའི་ཕྱིར་རོ། །ཞེས་གསུངས་པའི་ཕྱིར་རོ། །

ས་བཅུ་སོ་སོ་ལ་ཡོན་ཏན་གྱི་གྲངས་དང༌། མཐུ་ནུས་དང༌། ཕར་ཕྱིན་ལྷག་ཚུལ་དང༌། རྣམ་སྨིན་གྱི་སྐྱེ་བ་ལེན་ཚུལ་དང་ཁྱད་པར་བཞི་ཡོད་དེ། རང་འགྲེལ་ལས། དེ་ཡང་གོང་ནས་གོང་དུ་ཡོན་ཏན་གྱི་གྲངས་དང༌། མཐུ་ཕུལ་དུ་བྱུང་བ་ཐོབ་པ་དང༌། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ཀླགས་པ་དང༌། རྣམ་པར་སྨིན་པ་འཕེལ་བའི་བྱེ་བྲག་གིས་ས་རབ་ཏུ་དགའ་བ་ལ་སོགས་པའི་རྣམ་པར་དབྱེ་བས་དབྱེ་བ་རྣམ་པ་བཅུར་གཞག་གི། འདི་ལ་རང་གི་ངོ་བོའི་ཁྱད་པར་གྱིས་བྱས་པའི་དབྱེ་བ་ནི་ཡོད་པ་མ་ཡིན་ནོ། །ཇི་སྐད་དུ། ཇི་ལྟར་བར་སྣང་བྱ་རྗེས་མཁས་རྣམས་ཀྱིས། །བརྗོད་པར་ནུས་མ་ཡིན་ཞིང་མི་མཐོང་བ། །དེ་ལྟར་རྒྱལ་བའི་སྲས་ཀྱི་ས་ཀུན་ཀྱང༌། །བརྗོད་མི་ནུས་ན་མཉན་པར་ག་ལ་ནུས། །ཞེས་གསུངས་སོ། །དེ་ལ་བྱང་ཆུབ་སེམས་དཔའི་ས་རབ་ཏུ་དགའ་བ་ནི། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་དང་པོ་ཡིན་ལ་མཐར་ཆོས་ཀྱི་སྤྲིན་ནི་སེམས་བསྐྱེད་པ་བཅུ་པའོ། །ཞེས་གསུངས་པས་སོ། །ས་བཅུ་ལ་ཆོས་ཉིད་མངོན་སུམ་དུ་རྟོགས་པ་ཁྱད་པར་མེད་ཀྱང་རྟོགས་ཚུལ་ལ་ཁྱད་པར་ཡོད་དེ། ཆོས་དབྱིངས་བསྟོད་པ་ལས། ཇི་ལྟར་ཚེས་པའི་ཟླ་བ་ལ། །སྐད་ཅིག་སྐད་ཅིག་འཕེལ་བར་མཐོང༌། །དེ་བཞིན་ས་ལ་ཞུགས་རྣམས་ཀྱིས། །རིམ་གྱི་རིམ་གྱིས་འཕེལ་བར་མཐོང༌། །ཇི་ལྟར་ཡར་ངོའི་བཅོ་ལྔ་ན། །ཟླ་བའི་དཀྱིལ་འཁོར་རྫོགས་པར་གསལ། །དེ་བཞིན་ས་ཡི་མཐར་ཐུག་ན། །ཆོསཀྱི་སྐུ་ཡང་རྫོགས་པར་གསལ། །ཞེས་གསུངས་པས་སོ། །

སྐབས་འདིའི་ས་ནི་དོན་དམ་སེམས་ཀྱི་དབང་དུ་བྱས་ནས་བཞག་པ་ཡིན་ཏེ། རང་འགྲེལ་ལས། ཇི་ལྟར་ཉན་ཐོས་ཀྱི་ཐེག་པར་ཞུགས་པ་དང༌། འབྲས་བུའི་ལམ་ལ་གནས་པའི་དབྱེ་བས་ཉན་ཐོས་ཀྱི་ས་བརྒྱད་རྣམ་པར་འཇོག་པ་དེ་བཞིན་དུ། ཐེག་པ་ཆེན་པོར་ཡང་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ས་བཅུ་ཡིན་ནོ། །ཡང་ཇི་ལྟར་ཉན་ཐོས་ངེས་པར་འབྱེད་པའི་ཆ་དང་མཐུན་པའི་གནས་སྐབས་སྐྱེད་པ་ནི། འབྲས་བུ་དང་པོ་ལ་ཞུགས་པའི་གནས་སྐབས་ཡིན་པར་མི་འདོད་པ་དེ་བཞིན་དུ། འབྱུང་བར་འགྱུར་བའི་བྱང་ཆུབ་སེམས་དཔའ་ཡང་ཡིན་ཏེ། དཀོན་མཆོག་སྤྲིན་གྱི་མདོ་ལས། མོས་པ་ཆེན་པོའི་ཡང་ཆེན་པོས་སྤྱོད་པའི་ཆོས་ཉིད་ཀྱི་ས་དང་པོ་དེ་མ་ཐག་ཏུ་ཐོབ་པར་གནས་པ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་མ་བསྐྱེད་པའི་སའོ་ཞེས་ཇི་སྐད་གསུངས་པ་ལྟ་བུའོ། །མོས་པས་སྤྱོད་པའི་སྐད་ཅིག་དེ་ལ་གནས་པ་ཡང༌། རིགས་ཀྱི་བུ་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ནི་མིའི་མདོག་ལས་ནི་འདས་ལ། ལྷའི་མདོག་ནི་མ་ཐོབ་པ་ཡིན་ཏེ། དེ་བཞིན་དུ་བྱང་ཆུབ་སེམས་དཔའ་ཡང་འཇིག་རྟེན་པ་དང་ཉན་ཐོས་དང་རང་སངས་རྒྱས་ཀྱི་ས་ཐམས་ཅད་ལས་ནི་ཤིན་ཏུ་འདས་ལ། དོན་དམ་པའི་བྱང་ཆུབ་སེམས་དཔའི་ས་ནི་མ་ཐོབ་པ་ཡིན་ནོ་ཞེས་དེ་ཉིད་ལས་རྣམ་པར་བཤད་དོ། །ཡང་གང་གི་ཚེ་འདི་རབ་ཏུ་དགའ་བ་ཞེས་བྱ་བའི་ས་དང་པོ་ལ་ཞུགས་པར་གྱུར་པ། ཞེས་གསུངས་པས་སོ། །སའི་སྐད་དོད་བྷུ་མི་ཞེས་པ་རྟེན་དང་གནས་ལ་འཇུག་པས་ན་སྐབས་འདིར་ཡོན་ཏན་དཔག་མེད་ཀྱི་རྟེན་ནམ་གནས་ཞེས་བརྗོད་དོ། །སྐབས་འདིར་ཟག་བཅས་ཟག་མེད་ཀྱི་ཁྱད་པར་ཡོད་དེ། བདེན་འཛིན་གྱི་མ་རིག་པ་དང༌། དེའི་བག་ཆགས་གང་རུང་གིས་བསླད་པ་ནི་ཟག་བཅས་དང༌། དེས་མ་བསླད་པ་ནི་ཟག་མེད་ཡིན་པའི་ཕྱིར་ཏེ། ཚིག་གསལ་ལས། མ་རིག་པའི་རབ་རིབ་དང་བྲལ་བ་དག་གི་ཡེ་ཤེས་ཟག་པ་མེད་པའི་ཡུལ་གྱི་རང་བཞིན་ལ་ལྟོས་ནས་ནི་མ་ཡིན་ནོ། །ཞེས་དང༌། རང་འགྲེལ་ལས། མ་རིག་པའི་རབ་རིབ་གྱིསགནོད་པ་བྱས་པ། ཞེས་གསུངས་པས་སོ། །

གཉིས་པ་ཁྱད་ཆོས་སའི་ཡོན་ཏན་རྒྱས་པར་བཤད་པ་ལ།

རང་རྒྱུད་མཛེས་པར་བྱེད་པའིཡོན་ཏན། གཞན་རྒྱུད་ཟིལ་གྱིས་གནོན་པའི་ཡོན་ཏན། ས་དང་པོར་ལྷག་པའི་ཡོན་ཏན་གཞན་བསྟན་པ་དང་གསུམ། དང་པོ་ལ། ཡོན་ཏན་སོ་སོར་ཕྱེ་སྟེ་བཤད་པ་དང༌། ཡོན་ཏན་མདོར་བསྡུས་ཏེ་བསྟན་པ་དང་གཉིས། དང་པོ་ལ། དོན་ལྡན་གྱི་མཚན་ཐོབ་པའི་ཡོན་ཏན་དང༌། རིགསསུ་སྐྱེ་བ་སོགས་བཞིའི་ཡོན་ཏན་དང༌། ས་གོང་མ་གནོན་པ་སོགས་གསུམ་གྱི་ཡོན་ཏན་དང་གསུམ།

དང་པོ་ནི། རྩ་བར། དེ་ནས་བཟུང་སྟེ་དེ་ནི་ཐོབ་པར་གྱུར་བ་ཡིས། །བྱང་ཆུབ་སེམས་དཔའ་ཞེས་བྱའི་སྒྲ་ཉིད་ཀྱིས་བསྙད་དོ། །ཞེས་ས་དང་པོ་ལ་ཞུགས་པ་དེ༷་ན༷ས་བཟུ༷ང་སྟེ༷་བྱང་ཆུབ་སེམས་དཔའ་དེ༷་ནི༷་དོན་དམ་པའི་སེམས་དེ་ཐོ༷བ་པ༷ར་གྱུ༷ར་པ༷་དེ་ཡི༷ས་སོ་སྐྱེས་ས་ལས་འདས་པའི་དོན་དམ་པའི་བྱ༷ང་ཆུ༷བ་སེ༷མས་དཔ༷འ་ཞེ༷ས་བྱ༷འི་གསལ་བའི་སྒྲ༷་ཉི༷ད་ཀྱི༷ས་བསྙ༷ད་དམ་བརྗོད་དོ༷། །དེ་དང་མི་མཐུན་པའི་སོ་སྐྱེས་བྱང་སེམས་ལ་སོགས་པ་རྣམ་པ་གཞན་གྱིས་བརྗོད་པ་མ་ཡིན་ཏེ། དེའི་ཚེ་དེ་འཕགས་པ་ཡིན་པའི་ཕྱིར་རོ། །ཞེས་རང་འགྲེལ་ལས་སོ། །རྒྱུད་བླ་མ་ལས། མ་དག་མ་དག་དག་པ་དང༌། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང༌། །དེ་བཞིན་གཤེགས་པ་ཞེས་བརྗོད་དོ། །ཞེས་གསུངས་པའི་སྒྲས་ཟིན་དང༌། སྐབས་འདིའི་འཇུག་པ་རྩ་འགྲེལ་དུ་ཚིག་ཟིན་ལ་བྱང་ཆུབ་སེམས་དཔའ་ཞེས་པ་བྱང་འཕགས་ལ་སྦྱར་ནས་བཤད་པས་ཅུང་ཟད་དཔྱད་པའི་གནས་ཡོད་མོད་ཀྱང༌། དོན་དམ་སེམས་བསྐྱེད་རྒྱུད་ལ་སྐྱེས་པའི་བྱང་སེམས་སམ་བྱང་འཕགས་ཀྱི་དབང་དུ་བྱས་པ་ཡིན་པ་ལས་བྱང་སེམས་ལ་སོ་སྐྱེ་ཡོད་དེ། དཀོན་བརྩེགས་ལས། ཐེག་ཆེན་གྱི་ས་དེ་ལས་ས་བཅུ་གཉིས་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མ་བསྐྱེད་པའི་ས་དང༌། རབ་ཏུ་དགའ་བ་དང༌། ཞེས་པ་ནས། ཆོས་ཀྱི་སྤྲིན་དང༌། སངས་རྒྱས་ཀྱི་ས་ཀུན་འོད་དེ་ས་བཅུ་གཉིས་པོ་དེ་དག་གོ། །དེ་ལ་སེམས་མ་བསྐྱེད་པའི་ས་གང་ཞེ་ན། བྱང་ཆུབ་སེམས་དཔའ་བདེན་པ་མངོན་སུམ་དུ་མ་མཐོང་པའི་བྱིས་པའི་སྤྱོད་པ་མོས་སྤྱོད་ཀྱི་ས་དང༌། ཞེས་པ་ནས། རང་གི་ཕྱི་ལོག་དེ་མ་ཐག་ཏུ་ས་དང་པོ་འཐོབ་པར་འགྱུར་བའི་ས་ལ་གནས་པ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་མ་བསྐྱེད་པའི་སའོ། །

ཞེས་དང༌། མདོ་དེ་ལས། རིགས་ཀྱི་བུ་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ནི་མིའི་ཁ་དོག་ཅན་ལས་ནི་འདས་ལ། ལྷའི་ཁ་དོག་ནི་མ་ཐོབ་པ་ཡིན་ཏེ། དེ་བཞིན་དུ་བྱང་ཆུབ་སེམས་དཔའ་ཡང་འཇིག་རྟེན་པ་དང་ཉན་ཐོས་དང་རང་སངས་རྒྱས་ཀྱི་ས་ཐམས་ཅད་ལས་འདས་པ་ཡིན་ཏེ། དོན་དམ་པའི་བྱང་ཆུབ་སེམས་དཔའི་ས་ནི་མ་ཐོབ་པ་ཡིན་ནོ། །ཞེས་དང༌། བསླབ་བཏུས་ལས། སོ་སོ་སྐྱེ་བོ་ལ་ཡང་བྱང་ཆུབ་ཀྱི་སེམས་སྐྱེ་སྟེ། འདི་ནི་ཚིག་ཙམ་མ་ཡིན་ནོ་ཞེས་བྱ་བར་ཇི་ལྟར་ཤེས་ཤེ་ན། མདོ་སྡེ་དུ་མ་མཐོང་བ་ལས་ཏེ། ཞེས་དང༌། བསླབ་བཏུས་ལས།

དཀོན་མཆོག་གི་ཟ་མ་ཏོག་གི་མདོ་ལས་ཀྱང་སོ་སོ་སྐྱེ་བོ་ལ་བྱང་ཆུབ་སེམས་དཔའ་ཞེས་བྱ་བ་ཤེས་ཏེ། ཞེས་གསུངས་པའི་ཕྱིར་རོ། །གཞན་ཡང་ངེས་མ་ངེས་ལ་འཇུག་པའི་ཕྱག་རྒྱའི་མདོ་ལས་ཕྱུགས་ཀྱི་ཤིང་རྟ་ལྟ་བུའི་བྱང་སེམས་རང་ལམ་ལས་ཕྱིར་ལྡོག་པར་བཤད་པ་དང༌། ནམ་སྙིང་གི་མདོ་ལས་རྩ་ལྟུང་བྱུང་བའི་བྱང་སེམས་ཡོད་པར་བཤད་པ་རྣམས་ཀྱིས་བྱང་སེམས་ལ་སོསྐྱེས་ཡོད་པར་གྲུབ་པ་ཡིན་ནོ། །

གཉིས་པ་རིགས་སུ་སྐྱེས་པ་སོགས་བཞིའི་ཡོན་ཏན་བཤད་པ་ནི།

རྩ་བར། འདི་ནི་དེ་བཞིན་གཤེགས་པ་རྣམས་ཀྱི་རིགས་སུའང་སྐྱེས་པ་སྟེ། །འདི་ཡི་ཀུན་ཏུ་སྦྱོར་བ་གསུམ་པོ་ཐམས་ཅད་སྤངས་པར་གྱུར། །བྱང་ཆུབ་སེམས་དཔའ་དེ་ནི་དགའ་བ་མཆོག་ཏུ་གྱུར་འཆང་ཞིང༌། །

འཇིག་རྟེན་ཁམས་བརྒྱ་ཀུན་ནས་གཡོ་བར་ནུས་པར་གྱུར་པའང་ཡིན། །ཞེས་གཞན་ཡང་ས་དང་པོ་ལ་གནས་པའི་བྱང་ཆུབ་སེམས་དཔའ་འདི༷་ནི༷་སོ་སྐྱེས་ས་དང་ཉན་རང་གི་ས་ཐམས་ཅད་ལས་འདས་ཟིན་པ་དང༌། སངས་རྒྱས་ཀྱི་སར་ངེས་པར་འགྲོ་བའི་ལམ་རྒྱུད་ལ་སྐྱེས་པའི་ཕྱིར་ན་དེ༷་བཞི༷ན་གཤེ༷གས་པ༷་རྣ༷མས་ཀྱི༷་རི༷གས་སུ༷འ༷ང་སྐྱེ༷ས་པ༷་ཡིན་ཏེ༷། ལམ་གཞན་དུ་མི་འགྲོ་བར་རང་ལམ་དུ་རིགས་ངེས་པ་ཡིན་པའི་ཕྱིར། དེར་ཐལ། སྟོང་ཉིད་མངོན་སུམ་དུ་རྟོགས་པའི་སྟོབས་ཀྱིས་ཐེག་ཆེན་དུ་ཞུམ་པའི་བསམ་པ་སྤངས་པ་དང༌། སངས་རྒྱས་ངེས་པར་ཐོབ་པར་ཤེས་ནས་ལམ་རྒྱུན་མི་ཆད་དུ་སྒྲུབ་པའི་ཕྱིར། ཡང་ས་དང་པོ་བ་འདི༷་ཡི༷་ནི་གང་ཟག་རང་བཞིན་གྱིས་མ་གྲུབ་པའི་གང་ཟག་གི་བདག་མེད་མངོན་སུམ་དུ་མཐོང་བས་གང་ཟག་བདེན་གྲུབ་ཏུ་དཔྱད་ནས་འཛིན་པ་དང་གང་ཟག་རང་རྐྱ་ཐུབ་པ་སོགས་སུ་འཛིན་པའི་འཇིག་ལྟ་ཀུན་བཏགས་དང༌། ཐར་བ་ལ་ཐེ་ཚོམ་པའི་ཕྲ་རྒྱས་ཀྱི་ཐེ་ཚོམ་དང༌། ལམ་མིན་ལམ་དུ་འཛིན་པའི་ཚུལ་ཁྲིམས་བརྟུལ་ཞུགས་མཆོག་འཛིན་དང་ཀུ༷ན་ཏུ༷་སྦྱོ༷ར་བ༷་གསུ༷མ་པོ༷་ཐ༷མས་ཅ༷ད་སྤ༷ངས་པ༷ར་གྱུ༷ར་པ་ཡིན་ཏེ། དེ་ཚེ་དེ་གསུམ་གྱི་ས་བོན་འགགས་པས་སླར་མི་སྐྱེ་བའི་ཕྱིར། གསུམ་པོ་ལས་གཞན་སྤངས་པར་མ་བཤད་པ་ཅི་ཡིན་སྙམ་ན། མཛོད་ལས། འགྲོ་མི་འདོད་དང་ལམ་ནོར་དང༌། །ལམ་ལ་ཐེ་ཚོམ་དེ་སྙེད་ཅིག། ཐར་བར་བགྲོད་ལ་གེགས་བྱེད་པ། །དེ་ཡི་ཕྱིར་ན་གསུམ་བསྟན་ནོ། །ཞེས་གསུངས་སོ། །ཡང་ས་དང་པོ་བའི་བྱ༷ང་ཆུ༷བ་སེ༷མས་དཔ༷འ་སངས་རྒྱས་ཀྱི་རིགས་ངེས་པ་ལ་ཞུགས་པས། ས་དང་པོའི་ཡོན་ཏན་གྱི་འབྲས་བུ་ཐོབ་པ་དང༌། མཐོང་སྤང་གི་རྐྱེན་དང་བྲལ་བའི་རྒྱུ་ལས་ཐུན་མོང་མ་ཡིན་པའི་དགའ་བ་སྐྱེས་པས་ན་རབ་ཏུ་དགའ་བ་མངའ་བའི་ཕྱིར་རྒྱལ་སྲས་དེ༷་ནི༷་དག༷འ་བ༷་མཆོ༷ག་ཏུ༷་འགྱུ༷ར་བ་འཆ༷ང་བ་ཡིན་ཞི༷ང་རབ་ཏུ་དགའ་བ་ཁྱད་པར་དུ་འཕགས་པ་ཡོད་པའི་ཕྱིར་ན་ས་འདི་ལ་རབ་ཏུ་དགའ་བ་ཞེས་བརྗོད་པའི་ཕྱིར་རོ། །ས་དང་པོ་ལ་གནས་པའི་བྱང་སེམས་ནི་ནུས་མཐུ་ཁྱད་པར་དང་ལྡན་པ་ཡིན་ཏེ། འཇི༷ག་རྟེ༷ན་གྱི་ཁ༷མས་མི་གཅིག་པ་བརྒྱ༷་ཀུ༷ན་ན༷ས་གཡོ༷་བ༷ར་བྱེད་ནུ༷ས་པ༷ར་གྱུ༷ར་པ༷འ༷ང་ཡི༷ན་པའི་ཕྱིར་རོ། །མདོར་ན་ས་དང་པོ་བ་ཆོས་ཅན། ཡོན་ཏན་ཁྱད་པར་ཅན་དང་ལྡན་ཏེ། དོན་དམ་པའི་བྱང་སེམས་ཀྱི་མཚན་ཐོབ་པའི་ཡོན་ཏན་དེ་བཞིན་གཤེགས་པའི་རིགས་སུ་སྐྱེས་པའི་ཡོན་ཏན་དང༌། མཐོང་སྤང་ཀུན་སྦྱོར་གསུམ་སྤང་བའི་ཡོན་ཏན་དང༌། དགའ་བ་མཆོག་དང་ལྡན་པའི་ཡོན་ཏན་དང༌། འཇིག་རྟེན་པའིཁམས་བརྒྱ་གཡོ་བར་བྱེད་ནུས་པའི་ཡོན་ཏན་དང་ལྡན་པའི་ཕྱིར་རོ། །

གསུམ་པ་ས་གོང་མ་གནོན་པ་སོགས་གསུམ་གྱི་ཡོན་ཏན་བཤད་པ་ནི།

རྩ་བར། ས་ནས་སར་གནོན་བྱེད་ཅིང་གོང་མར་རབ་ཏུ་འགྲོ་བར་འགྱུར། །དེ་ཚེ་འདི་ཡི་ངན་འགྲོའི་ལམ་རྣམས་མཐའ་དག་འགགས་པར་གྱུར། །དེ་ཚེ་འདི་ཡི་སོ་སོའི་སྐྱེ་བོའི་ས་རྣམས་ཐམས་ཅད་ཟད། །

ཅེས་བྱང་སེམས་ས་དང་པོ་པས་ནི་ས༷་དང་པོ་ན༷ས་ས༷་གཉིས་པར་གནོ༷ན་པར་བྱེ༷ད་པ་ལ་སྤྲོ་བ་ཆེ་བར་གྱུར་ཅི༷ང་ས་གོ༷ང་མ༷ར་ར༷བ་ཏུ༷་འགྲོ༷་བ༷ར་འགྱུ༷ར་བ་དང༌། ས་དང་པོ་ཐོབ་པ་དེ༷་ཡི་ཚེ༷་བྱང་སེམས་འདི༷་ཡི༷་ངན༷་འགྲོ༷འི་ལས་ཉོན་སྐྱེ་བའི་ལ༷མ་རྣ༷མས་མཐ༷འ་ད༷ག་འག༷གས་པ༷ར་གྱུ༷ར་བ་ཡིན་ཏེ། ངན་འགྲོར་སྐྱེ་བའི་ལས་དང་ཉོན་མོངས་པའི་ས་བོན་སྤངས་བའི་ཕྱིར་ཏེ། ཀུན་བཏུས་ལས་ཀྱང་ངན་སོང་བའི་ཕུང་པོ་ཁམས་སོགས་མཐོང་སྤང་དུ་བཤད་པའི་ཕྱིར་རོ། །ཡང་ས་དང་པོ་ཐོབ་པ་དེ༷འི་ཚེ༷་བྱང་སེམས་འདི༷་ཡི༷་སོ༷་སོ༷་སྐྱེ༷་བོ༷འི་ས༷་རྣ༷མས་གནས་སྐབས་ཐ༷མས་ཅ༷ད་དུ་ཟ༷ད་པ་ཡིན་ཏེ། བྱང་སེམས་འཕགས་པ་ཡིན་པའི་ཕྱིར་རོ། །དེས་ན་བྱང་སེམས་ས་དང་པོ་ལ་ཡོན་ཏན་ཁྱད་པར་ཅན་གསུམ་དང་ལྡན་ཏེ། ས་གོང་མ་གནོན་པར་འགྱུར་བའི་ཡོན་ཏན། ངན་འགྲོའི་ལམ་མཐའ་དག་འགག་པའི་ཡོན་ཏན། སོ་སྐྱེས་གནས་སྐབས་སྤངས་པའི་ཡོན་ཏན་གསུམ་དང་ལྡན་པའིཕྱིར་རོ། །

གཉིས་པ་ཡོན་ཏན་མདོར་བསྡུས་ཏེ་བསྟན་པ་ནི།

རྩ་བར། འདི་ནི་འཕགས་པ་བརྒྱད་པ་ཇི་ལྟ་དེ་ལྟར་ཉེ་བར་བསྟན། །ཞེས་མདོར་བསྡུས་ན་བྱང་སེམས་ས་དང་བོ་པ་འདི༷་ནི༷་དགྲ་བཅོམ་འབྲས་གནས་དང་དགྲ་བཅོམ་ཞུགས་པ་ནས་མས་ནས་བགྲང་བའི་འཕ༷གས་པ༷་བརྒྱ༷ད་པ༷་རྒྱུན་ཞུགས་ཞུགས་པ་ཇི༷་ལྟ༷་བ་དེ༷་ལྟ༷ར་ཡིན་པར་ཉེ༷་བ༷ར་བསྟ༷ན་པ་དེ་ཡིན་ཏེ། རང་འགྲེལ་ལས། མདོར་ན་ཇི་ལྟར་འཕགས་པ་རྒྱུན་དུ་ཞུགས་པ་ལ་རང་དང་རྗེས་སུ་མཐུན་པའི་འཕགས་པའི་ཆོས་རྟོགས་པ་ལས་སྐྱོན་དང་བྲལ་ཞིང༌། ཡོན་ཏན་འབྱུང་བར་གྱུར་པ་དེ་བཞིན་དུ་བྱང་ཆུབ་སེམས་དཔའ་འདི་ལ་ཡང་ས་རྟོགས་པ་ལས་རང་དང་འཚམ་པའི་ཡོན་ཏན་འབྱུང་བ་དང༌། སྐྱོན་ཟད་པར་རྒྱུན་དུ་ཞུགས་པའི་དཔེའི་སྒོ་ནས་ཡོངས་སུ་གསལ་བར་བྱས་པ་ཡིན་ནོ། །ཞེསགསུངས་པའི་ཕྱིར་རོ། །

གཉིས་པ་གཞན་རྒྱུད་ཟིལ་གྱིས་གནོན་པའི་ཡོན་ཏན་ལ།

ས་འདིར་ཉན་རང་རྣམས་རིགས་ཀྱི་སྒོ་ནས་ཟིལ་གྱིས་གནོན་པ་དང༌། ས་བདུན་པར་ཉན་རང་རྣམས་བློ་སྟོབས་ཀྱིས་ཟིལ་གྱིས་གནོན་པ་དང༌། དེའི་གྲུབ་དོན་འཕྲོས་དང་བཅས་པ་དང་གསུམ། དང་པོ་ནི། རྩ་བར། རྫོགས་པའི་བྱང་ཆུབ་སེམས་ལྟ་དང་པོ་ལ་གནས་ཀྱང༌། །ཐུབ་དབང་གསུང་སྐྱེས་དང་བཅས་རང་སངས་རྒྱས་རྣམས་ནི། །བསོད་ནམས་དག་གི་དབང་གིས་ཕམ་བྱས་རྣམ་པར་འཕེལ། །

ཞེས་ས་གཉིས་པ་སོགས་སུ་གནས་པ་མ་ཟད་རྫོ༷གས་པ༷འི་བྱ༷ང་ཆུ༷བ་ཀྱི་སེ༷མས་ཀྱི་ལྟ༷་བ་རྫོགས་པའི་བྱང་ཆུབ་ཀྱི་སེམས་ས་ད༷ང་པོ༷་རབ་ཏུ་དགའ་བ་ལ༷་གན༷ས་པ་དེས་ཀྱ༷ང༌། ཐུ༷བ་པའི་དབ༷ང་པོའི་གསུ༷ང་ལས་སྐྱེ༷ས་པའི་ཉན་ཐོས་ད༷ང་བཅ༷ས་པའི་ར༷ང་ས༷ངས་རྒྱ༷ས་རྣ༷མས་ནི༷་བྱང་ཆུབ་ཀྱི་སེམས་དང་སྙིང་རྗེ་ལ་སོགས་པ་བསོ༷ད་ན༷མས་ད༷ག་གི༷་དབ༷ང་གི༷ས་ཕ༷མ་པར་བྱ༷ས་པའམཟིལ་གྱིས་མནན་ནས་ཉན་རང་དེ་དག་ལས་བསོད་ནམས་རྣ༷མ་པ༷ར་འཕེ༷ལ་བར་འགྱུར་ཏེ། ཇི་སྐད་དུ་འཕགས་པ་བྱམས་པའི་རྣམ་པར་ཐར་པ་ལས། རིགས་ཀྱི་བུ་འདི་ལྟ་སྟེ། དཔེར་ན་རྒྱལ་པོའི་བུ་སྐྱེས་ནས་རིང་པོར་མ་ལོན་པ་རྒྱལ་པོའི་མཚན་དང་ལྡན་པ་ནི་བློན་པོའི་ཚོགས་རྒན་པོ་གཙོ་བོར་གྱུར་པ་ཐམས་ཅད་ཀྱང་རིགས་ཀྱི་བདག་ཉིད་ཆེ་བའི་དབང་གིས་ཟིལ་གྱིས་གནོན་ཏོ། །དེ་བཞིན་དུ་བྱང་ཆུབ་སེམས་དཔའ་ལས་དང་པོ་པ་བྱང་ཆུབ་ཏུ་སེམས་བསྐྱེད་ནས་རིང་པོ་མ་ལོན་པ། དེ་བཞིན་གཤེགས་པ་ཆོས་ཀྱི་རྒྱལ་པོའི་རིགས་སུ་སྐྱེས་པས་ཀྱང་བྱང་ཆུབ་ཀྱི་སེམས་དང༌། སྙིང་རྗེའི་དབང་གིས་ཉན་ཐོས་དང་རང་སངས་རྒྱས་ཡུན་རིང་དུ་ཚངས་པར་སྤྱད་པ་རྣམས་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ། དཔེར་ན་ནམ་མཁའ་ལྡིང་གི་དབང་པོ་ཆེན་པོའི་ཕྲུ་གུ་སྐྱེས་ནས་རིང་པོ་མ་ལོན་པའི་གཤོག་པའི་རླུང་གི་ཤུགས་དང༌། མིག་ཡོངས་སུ་དག་པའི་ཡོན་ཏན་གང་ཡིན་པ་དེ་ནི་དེ་ལས་གཞན་པའི་བྱའི་ཚོགས་མ་ལུས་པ་རྒས་པར་གྱུར་པ་ཐམས་ཅད་ལ་ཡོད་པ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་དང་པོ་བསྐྱེད་པ། དེ་བཞིན་གཤེགས་པ་ནམ་མཁའ་ལྡིང་གི་དབང་པོ་ཆེན་པོའི་རིགས་ཀྱི་རྒྱུད་དུ་ཡང་དག་པར་བྱུང་བ་ནམ་མཁའ་ལྡིང་གི་དབང་པོ་ཆེན་པོའི་ཕྲུ་གུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་གཤོག་པའི་སྟོབས་ཀྱིས་ཕ་རོལ་གནོན་པ་དང༌། ལྷག་པའི་བསམ་པ་ཡོངས་སུ་དག་པའི་མིག་གི་ཡོན་ཏན་གང་ཡིན་པ་དེ་ནི་བསྐལ་པ་བརྒྱ་སྟོང་དུ་ངེས་པར་འབྱུང་བའི་ཉན་ཐོས་དང༌། རང་སངས་རྒྱས་ཐམས་ཅད་ལ་ཡོད་པ་མ་ཡིན་ནོ། །ཞེས་གསུངས་པའི་ཕྱིར་རོ། །འགྲེལ་བཤད་ལས། བྱང་ཆུབ་ཏུ་སེམས་བསྐྱེད་ནས་རིང་པོ་མ་ལོན་པ་ཞེས་བྱ་བ་འདིས་ནི་བརྡ་ལས་བྱུང་བའི་སེམས་བསྐྱེད་པ་དེ་བསྟན་པ་ཡིན་ནོ། །དེ་ཉིད་ཀྱི་ཕྱིར་ན་བྱང་ཆུབ་སེམས་དཔའ་ལས་དང་པོ་པ་ཞེས་སྨོས་སོ། །ཞེས་འགྲེལ་བཤད་མཁན་པོས་སྐབས་འདིའི་བྱམས་པའི་རྣམ་ཐར་ཀྱི་མདོ་ལས་བྱང་སེམས་གསུངས་པ་ལས་དང་པོ་པའི་བྱང་སེམས་ཡིན་པར་བཤད་དོ། །སྐབས་འདིར་འབའ་མདའི་འཇུག་ཊཱིཀ་རབ་གསལ་སྣང་རྒྱན་ལས། ཡོན་ཏན་དང་ནུས་སྟོབས་ཀྱི་སྒོ་ནས་ནི་སོ་སྐྱེའི་རྒྱུད་ཀྱི་སེམས་བསྐྱེད་ཀྱིས་ཟིན་པའི་སྟོང་ཉིད་རྟོགས་པའི་ཤེས་རབ་ཀྱིས་ཀྱང་ཉན་རང་གི་ལམ་ཐམས་ཅད་ཟིལ་གྱིས་གནོན་ནུས་ཀྱང་འདིར་ས་དྲུག་པ་མན་ཆད་དུ་ཤེས་རབ་ཀྱི་སྒོ་ནས་དང་དོན་དམ་སེམས་བསྐྱེད་ཀྱི་སྒོ་ནས་ཟིལ་གྱིས་གནོན་ནུས་མི་ནུས་ནི་ཡོན་ཏན་དང་ནུས་པ་ཆེ་ཆུང་སོགས་ཀྱིས་མ་ཡིན་པར་སྐད་ཅིག་རེ་ལ་སྟོང་ཉིད་ལ་འཇུག་ལྡང་ཐུབ་མི་ཐུབ་ཀྱིསྒོ་ནས་བཞག་པ་ཡིན་པའི་ཕྱིར་རོ། །ཞེས་གསུངས་སོ། །

གཉིས་པ་ས་བདུན་པར་ཉན་རང་བློའི་སྟོབས་ཀྱིས་ཟིལ་གྱིས་གནོན་པ་ནི།

རྩ་བར། དེ་ནི་རིང་དུ་སོང་བར་བློ་ཡང་ལྷག་པར་འགྱུར། །ཞེས་དོན་དམ་པའི་བྱང་ཆུབ་སེམས་དཔའ་དེ༷་ནི༷་ས་བདུན་པ་རི༷ང་དུ༷་སོ༷ང་བ༷ར་ཐོབ་པ་ན་ཉན་རང་བློ་སྟོབས་ཀྱིས་ཟིལ་གྱིས་གནོན་ཏེ། དེ་ཚེ་སྐད་ཅིག་ཤིན་ཏུ་ཐུང་བ་ལ་འཇུག་ལྡང་ནུས་པའི་སྟོང་ཉིད་རྟོགས་པའི་བློ༷་ཡ༷ང་ཉན་རང་ལས་ལྷ༷ག་པ༷ར་འགྱུ༷ར་བའི་ཕྱིར་ཏེ། ས་བཅུ་པའི་མདོ་ལས། ཀྱེ་རྒྱལ་བའི་སྲས་དག་འདི་ལྟ་སྟེ། དཔེར་ན་རྒྱལ་པོའི་རིགས་སུ་སྐྱེས་པའི་རྒྱལ་བོའི་བུ་རྒྱལ་བོའི་མཚན་དང་ལྡན་པ་ནི། སྐྱེས་པ་ཙམ་གྱིས་རྒྱལ་པོའི་བྱིན་གྱིས་བློན་པོའི་ཚོགས་ཐམས་ཅད་ཟིལ་གྱིས་གནོན་གྱི། རང་གི་བློའི་སྟོབས་ཀྱིས་རྣམ་པར་དཔྱད་པས་ནི་མ་ཡིན་ནོ། །ནམ་དེ་ནར་སོན་པར་གྱུར་པ་དེའི་ཚེ་རང་གི་བློའི་སྟོབས་བསྐྱེད་པས། བློན་པོའི་བྱ་བ་ཐམས་ཅད་ལས་ནི་ཤིན་ཏུ་འདས་པ་ཡིན་ནོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་ཡང༌། སེམས་བསྐྱེད་མ་ཐག་ཏུ་ལྷག་པའི་བསམ་པའི་ཆེ་བ་ཉིད་ཀྱིས། ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་གྱི། རང་གི་བློའི་སྟོབས་ཀྱིས་རྣམ་པར་དཔྱད་པས་ནི་མ་ཡིན་ནོ། །བྱང་ཆུབ་སེམས་དཔའ་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི། རང་གི་ཡུལ་ཤེས་པའི་ཆེ་བ་ལ་གནས་པས། ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ། །ཞེས་གསུངས་པའི་ཕྱིར་རོ། །སྐབས་འདིར་རང་འགྲེལ་ལས། དེའི་ཕྱིར་དེ་ལྟར་ན་རིང་དུ་སོང་བ་ཁོ་ན་ནས་བཟུང་ནས་ནི་བྱང་ཆུབ་སེམས་དཔས་རང་གི་བློའི་སྟོབས་བསྐྱེད་པས་ཀྱང་ཉན་ཐོས་དང་རང་སངས་རྒྱས་དག་ཟིལ་གྱིས་གནོན་པར་འགྱུར་གྱི། ས་འོག་མ་རྣམས་སུ་ནི་མ་ཡིན་ནོ་ཞེས་བྱ་བར་ཤེསཔར་བྱའོ། །ཞེས་གསུངས་སོ། །

རང་འགྲེལ་ལས། བྱང་ཆུབ་སེམས་དཔའ་ས་ལྔ་པར་བསམ་གཏན་གྱི་ཕར་ཕྱིན་ཡོངས་སུ་དག་པ་ཐོབ་པས་ས་དྲུག་པར་མཉམ་པར་བཞག་པར་སེམས་ལ་གནས་ཤིང་རྟེན་ཅིང་འབྲེལ་བར་འབྱུང་བ་ཟབ་མོའི་དེ་ཁོ་ན་ཉིད་མཐོང་བའི་བྱང་ཆུབ་སེམས་དཔའ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་ཐོབ་པར་འགྱུར་གྱི་སྔ་རོལ་ཏུ་ནི་མ་ཡིན་ཏེ། ཤེས་རབ་ལྷག་པར་གྱུར་བ་མེད་པའི་ཕྱིར་ཏེ། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་ཕུལ་དུ་བྱུང་བ་དང་ལྡན་པས་ནི་འགོག་པ་ཐོབ་པར་མི་ནུས་སོ། །ཞེས་ས་དྲུག་པ་མ་ཐོབ་པའི་སྔ་རོལ་དུ་འགོག་སྙོམས་མ་ཐོབ་པ་ལྟ་བུར་བཤད་ལ། དེ་ལྟར་ན་མཐོང་ལམ་རྩེ་སྦྱོར་གྱི་སྐབས་སུ་མངོན་རྟོགས་རྒྱན་ལས།

འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོངས་ནས། །འདོད་པར་གཏོགས་པའི་རྣམ་པར་ཤེས། །མཉམ་བཞག་མིན་པའི་མཚམས་བཟུང་སྟེ། །ཐོད་རྒལ་དུ་ནི་སྙོམས་འཇུག་པ། །ཞེས་སོགས་ཀྱིས་མཐོང་ལམ་དུ་སྙོམས་འཇུག་དགུ་ཡོད་པར་མ་ཟད་ཐོད་རྒལ་དུ་སྙོམས་པར་འཇུག་པར་བཤད་པའི་ཕྱིར་ཟེར་ན་དཔྱད་པར་བྱའོ། །གཞན་ཡང་ཉན་ཐོས་ཕྱིར་མི་འོང་ལུས་མངོན་བྱེད་དང༌། དགྲ་བཅོམ་རྒྱན་བཅས་ཡོད་པས་དེ་དག་ལ་འགོག་སྙོམས་ཐོབ་དགོས་པ་ཡིན་མིན་དཔྱད་པར་བྱའོ། །སྐབས་འདིའི་འགོག་སྙོམས་ནི། ཡུལ་ཆོས་ཉིད་ཀྱི་སྟེང་དུ་ཚོར་འདུ་རགས་པ་བཀག་པའི་ཆོས་དབྱིངས་ལ་མཉམ་པར་བཞག་པའི་ཕྲ་མོའི་ཡེ་ཤེས་ཞིག་ལ་འདོད་དོ། །རྩ་བར། རིང་དུ་སོང་འདིར་འདི་ནི་སྐད་ཅིག་དང༌། །སྐད་ཅིག་ལ་ནི་འགོག་པར་འཇུག་འགྱུར་ཞིང༌། །ཞེས་གསུངས་པ་ལྟར་ས་དྲུག་པ་པས་དུས་ཤིན་ཏུ་ཐུང་བའི་སྐད་ཅིག་མ་གཅིག་ལ་ཏིང་ངེ་འཛིན་བྱེ་བ་འབུམ་ལ་སྙོམས་པར་འཇུག་པའི་ནང་གི་ཏིང་ངེ་འཛིན་གཅིག་ལ་སྙོམས་པར་འཇུག་པའི་ཡུན་ལ་ཁྲག་ཁྲིག་ཏུ་བགོས་པའི་ཆ་གཅིག་གི་ཡུན་ལ་ས་བདུན་པ་པས་ཐབས་ཤེས་གང་ལ་ཡང་སྙོམས་པར་འཇུག་ལྡང་ནུས་པའོ། །ས་དྲུག་པ་མན་ཆད་དུ་སྙོམས་པར་འཇུག་ལྡང་ནུས་པའི་སྐད་ཅིག་ཐུང་ཤོས་ལ་ཉན་རང་གིས་སྙོམས་པར་འཇུག་ལྡང་མི་ནུས་ན་ས་དྲུག་པ་མན་གྱིས་ཉན་རང་བློས་ཟིལ་གྱིས་གནོན་པར་འགྱུར་ལ། ནུས་ན་ས་དང་པོ་པས་སྐད་ཅིག་མ་གཅིག་ལ་ཏིང་ངེ་འཛིན་བརྒྱ་ལས་ཏིང་ངེ་འཛིན་སྟོང་ཕྲག་ལ་སྙོམས་པར་འཇུག་མི་ནུས་ལ། ཉན་རང་གིས་ནུས་ན་དཔྱད་གཞི་ཆེ་བར་ཡོད་དོ། །སངས་རྒྱས་ཕལ་བོ་ཆེའི་མདོ་ལས། དེ་ལ་མི་ལ་ལ་ཞིག་ལྕགས་ཀྱི་ཤིང་རྟའི་འཁོར་ལོ་རྩིབས་སྟོང་ཡོད་པ་མཁའ་ལྡིང་གི་ཤུགས་ལས་དྲང་པའི་རྟ་མགྱོགས་པས། ཞེས་པ་ནས། སྦྲུལ་གདུག་པས་ཤིང་རྟ་འཁོར་བའི་སྐད་ཅིག་དེ་ལ་དགེ་སློང་ཀུན་དགའ་བོས་ཆོས་རྣམ་པ་བཅུ་བཤད་དེ། དོན་ཡང་གོ་བར་བྱེད། སྐད་ཅིག་གང་གིས་ཀུན་དགའ་བོས་ཆོས་རྣམ་པ་གཅིག་བཤད་པའི་སྐད་ཅིག་དེ་ལ་དགེ་སློང་ཤཱ་རིའི་བུས་ཆོས་རྣམ་པ་སྟོང་བཤད་དེ། དོན་ཡང་གོ་བར་བྱེད། སྐད་ཅིག་གང་གིས་ཤཱ་ར་དྭ་ཏིའི་བུས་ཆོས་རྣམ་པ་གཅིག་བཤད་པའི་སྐད་ཅིག་དེ་ལ་དགེ་སློང་མོའུ་འགལ་བུས་འཇིག་རྟེན་གྱི་ཁམས་སྟོང་ཕྲག་བརྒྱད་ཁྲི་ཤིན་ཏུ་འདའ། ཞེས་གསུངས་པ་ལྟར་ན་ཉན་ཐོས་ལ་ས་དྲུག་པ་ལྟརསྙོམས་པར་འཇུག་ལྡང་བྱེད་ཐུབ་པ་ཡོད་མེད་དཔྱད་རྒྱུ་ཡོད་དོ། །

གསུམ་པ་དེའི་གྲུབ་དོན་འཕྲོས་དང་བཅས་པ་བཤད་པ་ལ།

ས་བཅུ་པའི་མདོ་ལ་བརྟེན་ནས་ཉན་རང་ལ་སྟོང་ཉིད་རྟོགས་པ་ཡོད་པར་བསྟན་པ་དང༌། དེ་ཡོད་པར་སྒྲུབ་པའི་མདོ་བསྟནབཅོས་ཀྱི་ཁུངས་བསྟན་པ་དང༌། དེ་ལ་རྩོད་པ་སྤོང་པ་དང་གསུམ་ལས། དང་པོ་ལ། རང་འགྲེལལས། ལུང་འདི་ལས་ནི་ཉན་ཐོས་དང་རང་སངས་རྒྱས་རྣམས་ལ་ཡང་ཆོས་ཐམས་ཅད་རང་བཞིནམེད་པར་ཤེས་པ་ཡང་ཡོད་དོ་ཞེས་བྱ་བར་གསལ་བར་ངེས་ཏེ། ཞེས་གསུངས་སོ། །ཉན་རང་གིས་ཆོས་ཀྱི་བདག་མེད་མ་རྟོགས་ན་སྐྱོན་གསུམ་མམ་རིགས་པ་གསུམ་ལས། དང་པོ་ནི། དགྲ་བཅོམ་པས་ཕུང་ཁམས་སྐྱེ་མཆེད་རྣམས་རང་བཞིན་མེད་པར་ཤེས་ཏེ་བསྒོམ་པའི་སྟོབས་ཀྱིས་ཁམས་གསུམ་ལ་ཆགས་པ་བྲལ་བ་མ་ཡིན་པར་ཐལ། དེ་དག་གི་ཕུང་པོ་སོགས་རང་བཞིན་མེདཔར་མ་རྟོགས་པའི་ཕྱིར། རྟགས་ཁས། འདོད་ན། ཉན་རང་དགྲ་བཅོམ་དེ་ཕྱི་བའི་དྲང་སྲོང་ལྟརཁམས་གསུམ་ལ་ཆགས་པ་དང་བྲལ་ཡང་འཁོར་བའི་རྩ་བའི་གཉེན་པོ་མེད་པར་ཐལ། དེའི་ཕུང་པོ་དང་བདག་རང་བཞིན་མེད་པར་མ་རྟོགས་པའི་ཕྱིར། ཁྱབ་སྟེ། བདེན་འཛིན་གྱི་དངོས་གཉེན་ལ་རང་བཞིན་མེད་པར་རྟོགས་པའི་ཡེ་ཤེས་ལས་མེད་པ་གང་ཞིག ཕུང་པོ་བདེན་འཛིནའཁོར་བའི་རྩ་བ་ཡིན་པའི་ཕྱིར་ཏེ། རང་འགྲེལ་ལས། དེ་ལྟར་མ་ཡིན་ན་༡དངོས་པོ་རང་བཞིན་མེད་པར་ཡོངས་སུ་ཤེས་པ་དང་བྲལ་བའི་ཕྱིར། འཇིག་རྟེན་པའི་འདོད་ཆགས་དང་བྲལ་བ་ལྟར་དེ་དག་ཀྱང་སེམས་དང་པོ་བསྐྱེད་པའི་བྱང་ཆུབ་སེམས་དཔས་ཀྱང་རང་གི་བློས་རྣམ་པར་དཔྱདཔས་ཀྱང་ཟིལ་གྱིས་གནོན་པར་འགྱུར་ལ། ཞེས་གསུངས་སོ། །

གཉིས་པ་ནི། ཉན་རང་དགྲ་བཅོམ་ཆོས་ཅན། ཁམས་གསུམ་གྱི་ཕྲ་རྒྱས་ཐམས་ཅད་མ་སྤངས་པར་ཐལ། སྟོང་ཉིད་མངོན་སུམ་དུ་རྟོགས་པའི་ཡེ་ཤེས་ལ་གོམས་པ་མེད་པའི་ཕྱིར།

དཔེར་ན་ཕྱི་རོལ་བའི་དྲང་སྲོང་བཞིན། ཁྱབ་སྟེ། བདེན་པར་མེད་པའི་སྟོང་ཉིད་མ་རྟོགས་ན་བདེན་འཛིན་སྤོང་མི་ནུས། དེ་མ་སྤངས་ན་བདེན་འཛིན་ཉོན་མོངས་ཐམས་ཅད་ཀྱི་རྩ་བ་ཡིན་པས་ཕྲ་རྒྱས་གཅིག་ཀྱང་སྤོང་མི་ནུས་པའི་ཕྱིརཏེ། རང་འགྲེལ་ལས། ༢ཕྱི་རོལ་པ་བཞིན་དུ་འདི་དག་གིས་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤངས་པར་ཡང་མི་འགྱུར་རོ། །ཞེས་གསུངས་པའི་ཕྱིར་རོ། །

གསུམ་པ་ནི། ཉན་རང་དགྲ་བཅོམ་ཆོས་ཅན། གང་ཟག་གི་བདག་མེད་མཚན་ཉིད་ཚང་བ་མ་རྟོགས་པར་ཐལ། ཉན་རང་དགྲ་བཅོམ་པས་གཟུགས་ལ་སོགས་པའི་ཕུང་པོ་ལ་བདེན་པར་དམིགས་པའི་བློ་ཕྱིན་ཅི་ལོག་བདེན་འཛིན་གྱི་ཞེན་ཡུལ་བདེན་གྲུབ་སུན་ཕྱུང་བ་མེད་པའི་ཕྱིར། རྟགས་ཁས། ཁྱབ་སྟེ། གང་ཟག་ནི་ཕུང་པོ་ལས་ཡན་གར་བ་མེད་པས་ཕུང་པོ་དང་ངོ་བོ་གཅིག་ཡིན་ལ། དེས་ན་གང་ཟག་དང་གང་ཟག་གི་གདགས་གཞི་ཕུང་པོ་ལ་ནི་བདེན་འཛིན་གྱི་ཞེན་ཡུལ་སུན་མ་ཕྱུང་བའི་ཕྱིར་ཏེ། རང་འགྲེལ་ལས། ༣གཟུགས་ལ་སོགས་པའི་རང་གི་ངོ་བོ་ལ་དམིགས་པས་ཕྱིན་ཅི་ལོག་ཏུ་གྱུར་པའི་ཕྱིར་གང་ཟག་གི་བདག་མེད་པར་རྟོགས་པར་ཡང་མི་འགྱུར་ཏེ། བདག་ཏུ་གདགས་པའི་རྒྱུ་ཕུང་པོ་ལ་དམིགས་པའི་ཕྱིར་རོ། །ཞེས་གསུངས་པའིཕྱིར་རོ། །

གཉིས་པ་ནི། སྒྲུབ་བྱེད་ཀྱི་ལུང་དགུ་ནི། འཇུག་པ་རང་འགྲེལ་དུ་བཀོད་པའི་ལུང་ལྔ་དང༌། དེ་ལས་གཞན་ཚིག་གསལ་དུ་བཀོད་པའི་ལུང་བཞི་སྟེ་དགུ་བོ་འདི་ལྟ་སྟེ། དང་པོ་ནི་རིན་ཆེན་ཕྲེང་བ་ལས། ཇི་སྲིད་ཕུང་པོ་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །

འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུ་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །དེ་ནི་རང་གཞན་གཉིས་ཀ་དང༌། །དུས་གསུམ་ཉིད་དུ་མ་མཐོང་ཕྱིར། །

ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང༌། །ཞེས་དང༌། གཉིས་པ་ཡང་དེ་ལས། ཇི་ལྟར་མིག་ནི་འཁྲུལ་བ་ཡིས། །ཞེས་པ་ནས། གནས་མེད་ལེན་མེད་མྱ་ངན་འདའ། །

ཞེས་པའི་བར་རཽ། །གསུམ་པ་ཡང་དེ་ལས། ཐེག་པ་ཆེ་ལས་སྐྱེ་མེད་བསྟན། །གཞན་གྱི་ཟད་པསྟོང་བ་ཉིད། །ཟད་དང་མི་སྐྱེ་དོན་དུ་ནི། །གཅིག་པ་དེ་ཕྱིར་བཟོད་པར་གྱིས། །ཞེས་པའོ། །

བཞི་བ་ནི། ཉན་ཐོས་ལ་བསྟན་པའི་མདོ་ལས། གཟུགས་ནི་དབུ་བ་བརྡོས་པ་འདྲ། །ཚོར་བ་ཆུ་ཡི་ཆུ་བུར་འདྲ། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་པ་ཤེས་པ་སྒྱུ་མ་ལྟར། །ཉི་མའི་གཉེན་གྱིས་བཀའ་བསྩལ་ཏོ། །ཞེས་པའོ། །ལྔ་བ་ནི་རྩ་བ་ཤེས་རབ་ལས། བཅོམ་ལྡན་དངོས་དང་དངོས་མེད་པ། །མཁྱེན་པས་ཀ་ཏྱ་ཡ་ན་ཡི། །གདམས་ངག་ལས་ནི་ཡོད་པ་དང༌། །མེད་པ་གཉིས་ཀའང་དགག་པ་མཛད། །ཅེས་པའོ། །ཀ་ཏྱ་ཡ་ན་ལ་གདམས་པའི་མདོ་ནི་ལུང་ཕྲན་ཚེགས་ལས། ཀ་ཏྱ་ན་གང་གི་ཕྱིར་འཇིག་རྟེན་འདི་ནི་ཕལ་ཆེར་ཡོད་པ་ཉིད་དང་མེད་པ་ཉིད་ལ་མངོན་པར་ཞེན་ཏེ། དེས་ན་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང༌། སྡུག་བསྔལ་བ་དང་ཡིད་མི་བདེ་བ་དང༌། འཁྲུག་པ་དག་ལས་ཡོངས་སུ་གྲོལ་བར་མི་འགྱུར། འགྲོ་བ་ལྔའི་འཁོར་བ་ལས་གྲོལ་བར་མི་འགྱུར།

འཆི་བའི་སྡུག་བསྔལ་ལས་གྲོལ་བར་མི་འགྱུར། ཞེས་པའོ། །དྲུག་པ་ནི་ཡུམ་ལས། གཟུགས་ལ་སྤྱོད་ན་མཚན་མ་ལ་སྤྱོད་ཀྱི་ཤེར་ཕྱིན་ལ་སྤྱོད་པ་མ་ཡིན་ནོ། །ཞེས་དང༌། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེར་ཕྱིན་ལ་བསླབ་པར་བྱའོ། །ཞེས་སོགས་སོ། །བདུན་པ་ནི། སྡུད་པ་ལས། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང༌། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཕ་རོལ་ཚུར་རོལ་འགྲོ་ངོགས་མི་མཐོང་བཞིན། །ཞེས་པའོ། །བརྒྱད་པ་ནི་ལྷག་བསམ་བསྟན་པའི་མདོ་ལས། དཔེར་ན་མི་ལ་ལ་ཞིག་གིས་སྒྱུ་མ་མཁན་གྱི་རོལ་མོ་བྱུང་བའི་ཚེ། སྒྱུ་མ་མཁན་གྱིས་སྤྲུལ་བའི་བུད་མེད་མཐོང་ནས། འདོད་ཆགས་ཀྱི་སེམས་བསྐྱེད་དེ། དེ་འདོད་ཆགས་ཀྱིས་སེམས་བཀྲིས་ནས་འཁོར་གྱིས་འཇིགས་ཤིང་བག་ཚ་སྟེ། སྟན་ལས་ལངས་ནས་སོང་སྟེ་དེར་སོངནས་ཀྱང་བུད་མེད་དེ་ཉིད་ལ་མི་སྡུག་པར་ཡིད་ལ་བྱེད་ཅིང༌། མི་རྟག་པ་དང་སྡུག་བསྔལ་བ་དང༌།

སྟོང་བ་དང་བདག་མེད་པར་ཡིད་ལ་བྱེད་ན། རིགས་ཀྱི་བུ་དེ་ཇི་སྙམ་དུ་སེམས། མི་དེ་ཡང་དག་པར་ཞུགས་པ་ཡིན་ནམ་འོན་ཏེ་ལོག་པར་ཞུགས་པ་ཡིན། གསོལ་བ། བཅོམ་ལྡན་འདས་གང་བུད་མེད་མ་མཆིས་པ་ལ་མི་སྡུག་པར་ཡིད་ལ་བྱེད་ཅིང༌། མི་རྟག་པ་དང་སྡུག་བསྔལ་བ་དང་སྟོང་བ་དང༌། བདག་མེད་པར་ཡིད་ལ་བགྱིད་པའི་མི་དེའི་མངོན་པར་བརྩོན་པ་དེ་ནི་ལོག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ན་དགེ་སློང་དང་དགེ་སློང་མ་དང༌། དགེ་བསྙེན་དང་དགེ་བསྙེན་མ་ཁ་ཅིག་མ་སྐྱེས་ཤིང་མ་བྱུང་བའི་ཆོས་རྣམས་ལ་མི་སྡུག་པར་ཡིད་ལ་བྱེད་ཅིང༌། མི་རྟག་པ་དང་སྡུག་བསྔལ་བ་དང་སྟོང་བ་དང་བདག་མེད་པར་ཡིད་ལ་བྱེད་པ་གང་ཡིན་པ་དེ་དག་ཀྱང་དེ་དང་འདྲ་བར་བལྟ་བར་བྱའོ། །ང་ནི་མི་བླུན་པོ་དེ་དག་ལ་ལམ་སྒོམ་པ་ཡིན་ནོ་ཞེས་མི་སྨྲ་སྟེ་དེ་དག་ནི་ལོག་པར་ཞུགས་པ་ཞེས་བྱའོ། །ཞེས་པའོ། །

དགུ་བ་ནི་བསམ་གཏན་དཔེ་མཁྱུད་ཀྱི་མདོ་ལས། འཇམ་དཔལ་འཕགས་པའི་བདེན་པ་ཡང་དག་པ་ཇི་ལྟ་བ་བཞིན་དུ་མ་མཐོང་བའི་སེམས་ཅན་ཕྱིན་ཅི་ལོག་བཞིས་སེམས་ཕྱིན་ཅི་ལོག་ཏུ་གྱུར་པ་རྣམས་འཁོར་བ་ཡང་དག་པ་མ་ཡིན་པ་འདི་ལས་འདའ་བར་མི་འགྱུར་རོ། །ཞེས་གསུངས་པ་དེའོ། །གཞན་ཡང་འཇིག་རྟེན་ལས་འདས་པར་བསྟོད་པ་ལས། མཚན་མ་མེད་པར་མ་རྟོགས་པར། །ཁྱོད་ཀྱིས་ཐར་བ་མེད་པར་གསུངས། །དེ་ཕྱིར་ཁྱོད་ཀྱིས་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་པས་ཆོས་ཀྱི་བདག་མེད་མ་རྟོགས་ན་ཐར་བ་མི་ཐོབ་པར་བསྟན་མ་བསྟན་དཔྱད་པར་བྱའོ། །གོང་དུ་བཀོད་པའི་རིན་ཕྲེང་གི་ལུང་དེས་ཉན་རང་གིས་ཆོས་ཀྱི་བདག་མེད་རྟོགས་དགོས་པར་བཤད་པ་ཡིན་ཏེ། རང་འགྲེལ་ལས། ཇི་སྐད་དུ་རིན་པོ་ཆེའི་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །ཞེས་པ་ནས། རྒྱུ་མེད་པ་ཡི་མེ་བཞིན་དུ། །

གནས་མེད་ལེན་མེད་མྱ་ངན་འདའ། །ཞེས་གསུངས་སོ། །ཅི་སྟེ་བྱང་ཆུབ་སེམས་དཔའ་རྣམས་ཁོ་ནས་དེ་ལྟར་རང་བཞིན་མེད་པར་མཐོང་བ་ཡིན་ནོ་ཞེ་ན། དེ་ཡང་ཡོད་པ་མ་ཡིན་ཏེ། ཉན་ཐོས་དང་རང་སངས་རྒྱས་རྣམས་ཀྱི་དབང་དུ་བྱས་ནས་དེ་སྐད་དུ་གསུངས་པའི་ཕྱིར་རོ། །འདི་ཇི་ལྟར་ཤེས་ཤེ་ན། བརྗོད་པར་བྱ་སྟེ། མཇུག་ཐོགས་ཁོ་ནར་བྱང་ཆུབ་སེམས་དཔའ་རྣམས་ཀྱི་དབང་དུ་མཛད་ནས། དེ་ལྟར་བྱང་ཆུབ་སེམས་དཔས་ཀྱང༌། །མཐོང་ནས་བྱང་ཆུབ་ངེས་པར་འདོད། །འོན་ཀྱང་དེ་ནི་སྙིང་རྗེ་ཡིས། །བྱང་ཆུབ་བར་དུ་སྲིད་མཚམས་སྦྱོར། །ཞེས་བྱ་བ་ལསོགས་པ་གསུངས་པའི་ཕྱིར་རོ། །ཞེས་གསུངས་པས་སོ། །

གསུམ་པ་ནི། དེ་ལ་རྩོད་པ་སྤོང་ཚུལ་བཤད་པ་ལ། རྩོད་པ་དང༌། ལན་གཉིས། དང་པོ་ནི། སློབ་དཔོན་སངས་རྒྱས་བསྐྱངས་ཀྱི་རྩ་ཤེས་རབ་བྱེད་བདུན་པའི་འགྲེལ་བར་ཐེག་དམནགྱི་མདོ་ལས་ཆོས་ཐམས་ཅད་བདག་མེད་པར་གསུངས་པའི་དོན་ནི་ཆོས་ཐམས་ཅད་རང་བཞིན་གྱིས་མེད་པར་བཤད་པ་ལ། ལེགས་ལྡན་ན་རེ། འོ་ན་ཐེག་ཆེན་གྱི་མདོ་སྡེ་བསྟན་པ་དོན་མེདཔར་ཐལ། ཐེག་དམན་གྱི་སྡེ་སྣོད་ལས་ཆོས་ཀྱི་བདག་མེད་བསྟན་པའི་ཕྱིར། ཞེས་པའོ། །

གཉིས་པ་ལན་ནི། རང་འགྲེལ་ལས། གང་ཞིག་གལ་ཏེ་ཉན་ཐོས་ཀྱི་ཐེག་པ་ལས་ཆོས་ལ་བདག་མེད་པར་བསྟན་ན་དེའི་ཚེ་ཐེག་པ་ཆེན་པོ་བསྟན་པ་དོན་མེད་པར་འགྱུར་རོ་སྙམ་དུ་སེམས་པ། ཞེས་གསུངས་དེའི་དོན་ནི། དཔལ་ལྡན་ཟླ་བ་ན་རེ། ཐེག་དམན་ལས་ཆོས་ཀྱི་བདག་མེད་བསྟན་ཀྱང་ཐེག་ཆེན་གྱི་སྡེ་སྣོད་བསྟན་པ་དོན་མེད་དུ་མི་འགྱུར་བར་ཐལ། ཐེག་དམན་གྱི་མདོ་ལས་སྟོང་ཉིད་བསྟན་ཀྱང་སྤྱིར་ཐེག་ཆེན་བསྟན་པ་དོན་མེད་དུ་མི་འགྱུར་བ་གང་ཞིག ཐེག་དམན་གྱི་ཆོས་ཀྱི་བདག་མེད་བསྟན་ཀྱང་ཐེག་ཆེན་གྱི་མདོར་ཆོས་ཀྱི་བདག་མེད་བསྟན་པ་ཡང་དོན་མེད་དུ་མི་འགྱུར་བའི་ཕྱིར། དང་པོ་གྲུབ་སྟེ། ཐེག་ཆེན་གྱི་མདོ་རྣམས་ཀྱིས་ཆོས་ཀྱི་བདག་མེད་ཙམ་བསྟན་པ་མ་ཡིན་པར་ཐེག་དམན་གྱི་མདོ་ལས་མ་བསྟན་པའི་སྤྱོད་པ་ཕར་ཕྱིན་དྲུག་དང༌། བསྔོ་བ་སྨོན་ལམ་བསྟན་ལ། ཐེག་དམན་གྱི་མདོ་ལས་དེ་དག་མ་བཤད་པའི་ཕྱིར་ཏེ། རང་འགྲེལ་ལས། དེའི་ལུགས་དེ་ཡང་འདི་ལྟར་རིགས་པ་དང་ལུང་དང་འགལ་བར་རྟོགས་སོ། །ཐེག་པ་ཆེན་པོ་བསྟན་པས་ནི་ཆོས་ལ་བདག་མེད་པ་ཙམ་འབའ་ཞིག་སྟོན་པར་བྱེད་པ་མ་ཡིན་གྱི། །འོ་ན་ཅི་ཞེ་ན། བྱང་ཆུབ་སེམས་དཔའ་རྣམས་ཀྱི་ས་དང་ཕ་རོལ་ཏུ་ཕྱིན་པ་དང༌། སྨོན་ལམ་དང་སྙིང་རྗེ་ཆེན་པོ་ལ་སོགས་པ་དང་ཡོངས་སུ་བསྔོ་བ་དང་ཚོགས་གཉིས་དང་བསམ་གྱིས་མི་ཁྱབ་པའི་ཆོས་ཉིད་ཀྱང་ཡིན་ནོ། །ཇི་སྐད་དུ་རིན་ཆེན་ཕྲེང་བ་ལས། བྱང་ཆུབ་སེམས་དཔའི་སྨོན་ལམ་དང༌། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔའ་ག་ལ་འགྱུར། །བྱང་ཆུབ་སྤྱ ོད་ལ་གནས་པའི་དོན། །མདོ་སྡེ་ལས་ནི་བཀའ་མ་བསྩལ། །ཐེག་པ་ཆེ་ལས་བཀའ་བསྩལ་པ། །དེ་ཕྱིར་མཁས་པ་རྣམས་ཀྱིས་གཟུང༌། །ཞེས་གསུངས་པའི་ཕྱིར་རོ། །

གཉིས་པ་གྲུབ་སྟེ། རང་འགྲེལ་ལས། ཆོས་ཀྱི་བདག་མེད་པ་གསལ་བར་བྱ་བའི་ཕྱིར་ཐེག་པ་ཆེན་པོ་བསྟན་པ་ཡང་རིགས་པ་ཉིད་དེ། རྒྱས་པར་བསྟན་པ་བརྗོད་པར་འདོད་པའི་ཕྱིར་རོ། །

ཉན་ཐོས་ཀྱི་ཐེག་པ་ལས་ནི་ཆོས་ཀྱི་བདག་མེད་པ་མདོར་མཚོན་པ་ཙམ་ཞིག་ཏུ་ཟད་དོ། །ཇི་སྐད་དུ་སློབ་དཔོན་གྱི་ཞལ་སྔ་ནས་ཀྱིས། ༼འཇིག་རྟེན་ལས་འདས་པར་བསྟོད་པ་ལས། ༽མཚན་མ་མེད་པར་མ་རྟོགས་པར། །ཁྱེད་ཀྱིས་ཐར་བ་མེད་པར་གསུངས། །དེ་ཕྱིར་ཁྱོད་ཀྱི་ཐེག་ཆེན་ལས། །

དེ་ནི་ཚང་བར་བསྟན་པ་ལགས། །ཞེས་གསུངས་པའི་ཕྱིར་རོ། །སྐབས་འདིར་འཇུག་ཊཱིཀ་རབ་གསལ་སྣང་བའི་རྒྱན་ལས། དེས་ན་འཁོར་ལོ་དང་པོར་མངོན་པ་ནས་བཤད་པའི་མི་རྟག་སོགས་བཅུ་དྲུག་མངོན་སུམ་དུ་རྟོགས་པ་མཐོང་ལམ་དང༌། དེའི་རྒྱུད་སྒོམ་པར་བྱེད་པའི་ཡེ་ཤེས་སྒོམ་ལམ་དང༌། དེ་གཉིས་ཀྱིས་ཉོན་མོངས་སྤངས་ནས་དགྲ་བཅོམ་པ་ཐོབ་པར་སྟོན་པའི་མདོ་རྣམས་ནི་སྐབས་འདིར་དྲང་དོན་དུ་འགྲེལ་བའི་ལུགས་ཡིན་ཏེ། དེ་འདྲའི་ལམ་དེ་མཐོང་སྒོམ་མ་ཡིན་ལ། དེས་མཐོང་སྒོམ་གྱི་སྤང་བྱ་གང་ཡང་སྤོང་མི་ནུས་ཀྱང་དེ་འདྲའི་ལམ་གྱིས་གདུལ་དགོས་པའི་གདུལ་བྱའི་ངོར་བསྟན་པ་ཙམ་གྱི་སྒྲ་ཇི་བཞིན་པ་མ་ཡིན་པའི་དྲང་དོན་ཡིན་པའི་ཕྱིར། ཞེས་དང༌། དེ་ལས། མངོན་པ་གཉིས་ནས་བཤད་པའི་དགྲ་བཅོམ་པ་དགྲ་བཅོམ་པ་ཡིན་པར་ཐལ། དེ་ནས་བཤད་པའི་འཕགས་པ་འཕགས་པ་ཡིན་པའི་ཕྱིར། དེར་ཐལ། དེ་ནས་བཤད་པའི་འཕགས་ལམ་འཕགས་ལམ་ཡིན་པའི་ཕྱིར་ཏེ། དེ་ནས་བཤད་པའི་ལམ་ལམ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་ནས་བཤད་པའི་ངེས་འབྱུང་གི་བསམ་པ་ངེས་འབྱུང་གི་བསམ་པ་ཡིན་པའི་ཕྱིར། ཁྱབ་སྟེ། དེ་ནས་བཤད་པའི་ངེས་འབྱུང་གི་བསམ་པ་ངེས་འབྱུང་གི་བསམ་པ་ཡིན་ན་ངེས་འབྱུང་གི་བསམ་པས་ཟིན་པའི་མངོན་པ་ནས་བཤད་པའི་དགེ་བློ་རྣམས་ལམ་ཡིན་དགོས་པའི་ཕྱིར་ཏེ། ལམ་ཡིན་མིན་གྱི་ཁྱད་པར་ངེས་འབྱུང་གི་བསམ་པས་ཟིན་མ་ཟིན་ལ་བྱེད་པའི་ཕྱིར། མ་ཁྱབ་མཚམས་ཕྱི་མའི་རྟགས་གྲུབ་སྟེ། མངོན་པ་ནས་བཤད་པའི་སོ་ཐར་གྱི་སྡོམ་པ་སོ་ཐར་གྱི་སྡོམ་པ་ཡིན་པའི་ཕྱིར། ཁྱབ་སྟེ། སོ་ཐར་གྱི་སྡོམ་པ་ཡིན་ན་ངེས་འབྱུངགི་བསམ་པ་ལས་སྐྱེས་པའི་ཁྱབ་པའི་ཕྱིར་རོ། །ཞེས་གསུངས་པ་ལྟར་ཁས་ལེན་ནུས་མིན་དཔྱདཔར་ཞུའོ། །

གཞན་ཡང་སྤྱོད་འཇུག་ལས། བསྟན་རྩ་དགེ་སློང་ཉིད་ཡིན་ན། །དགེ་སློང་ཉིད་ཀྱང་དཀའ་བར་གནས། །སེམས་ནི་དམིགས་དང་བཅས་པ་ཡིས། །མྱ་ངན་འདས་པའང་དཀའ་བར་གནས། །ཉོན་མོངས་སྤངས་པས་གྲོལ་ན་དེའི། །དེ་མ་ཐག་ཏུ་དེར་འགྱུར་རོ། །ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །རེ་ཞིག་ཉེར་ལེན་སྲེད་པ་ནི། །མེད་ཅེས་ངེས་པ་ཉིད་ཅེ་ན། །སྲེད་འདི་ཉོན་མོངས་ཅན་མིན་ཡང༌། །ཀུན་རྨོངས་བཞིན་དུ་ཅི་སྟེ་མེད། །ཚོར་བའི་རྐྱེན་གྱིས་སྲེད་པ་ཡིན། །ཚོར་བ་དེ་དག་ལ་ཡང་ཡོད། །དམིགས་པ་དང་ནི་བཅས་པའི་སེམས། །འགའ་ཞིག་ལ་ནི་གནས་པར་འགྱུར། །སྟོང་པ་ཉིད་དང་བྲལ་བའི་སེམས། །འགག་པ་སླར་ཡང་སྐྱེ་འགྱུར་ཏེ། །འདུ་ཤེས་མེད་པའི་སྙོམས་འཇུག་བཞིན། །དེས་ན་སྟོང་ཉིད་བསྒོམ་པར་བྱ། །ཞེས་གསུངས་པའི་ལུང་གི་དགོངས་པ་སྤྱོད་འཇུག་ས་འགྲེལ་སོགས་ལ་བརྟེན་ནས་ཟླ་བ་ལྟར་འཆད་དགོས་པ་ཡིན་མིན་དཔྱད་པར་བྱའོ། །ཉན་རང་གི་ཐར་བ་ཐོབ་པ་ལ་ཆོས་ཀྱི་བདག་མེད་རྟོགས་མི་དགོས་པར་སྒྲས་ཟིན་ལ་མདོ་ལས་གསུངས་པ་ཡོད་དེ། རྒྱན་སྡུག་པོ་བཀོད་པའི་མདོ་ལས། ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང༌། །

ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོགས་གྱུར། །བདག་མེད་གཉིས་ལ་མཁས་པ་རྣམས། །རྒྱལ་བའི་སྲས་རྣམས་སྒོམ་པར་བྱེད། །ཅེས་དང༌། དམ་ཆོས་པད་དཀར་ལས། འོད་སྲུང་ཆེན་པོས། ཆོས་འདི་ཐམས་ཅད་ཟག་མེད་ཞི་བ་སྟེ། །འགག་པ་དང་ནི་སྐྱེ་བ་རྣམ་པར་སྤངས། །འདི་ན་ཆོས་རྣམས་གང་ཡང་མ་མཆིས་ཞེས། །དེ་ལྟར་བསམ་ན་དད་པར་མ་གྱུར་ཏོ། །ཞེས་དང༌། ལང་གཤེགས་ལས། གཞན་ཡང་བློ་གྲོས་ཆེན་པོ། ཉན་ཐོས་དང་རང་སངས་རྒྱས་ཐམས་ཅད་ནི་ཤེས་བྱའི་སྒྲིབ་པ་དང༌། ལས་ཀྱི་བག་ཆགས་མ་སྤངས་པའི་ཕྱིར་ཆོས་ལ་བདག་མེད་པ་མ་བསྒོམས་ཤིང༌། བསམ་གྱིས་མི་ཁྱབ་པར་འགྱུར་བའི་འཆི་འཕོ་བ་མ་ཐོབ་པས། ཉན་ཐོས་རྣམས་ལ་ཐེག་པ་གསུམ་དུ་བསྟན་ཏེ། ཐེག་པ་གཅིག་ཏུ་མ་ཡིན་ནོ། །ཞེས་དང༌། མངོན་རྟོགས་རྒྱན་ལས། དེ་ནི་མཚན་མར་དམིགས་སྒོ་ནས། །ཐབས་མ་ཡིན་པས་རིང་བ་དང༌། །

ཞེས་དང༌། ཉོན་མོངས་ཤེས་བྱ་ལམ་གསུམ་གྱི། །ཉམས་ཕྱིར་སློབ་མ་བསེ་རུ་དང༌། །རྒྱལ་སྲས་རྣམས་ཀྱི་དག་པ་སྟེ། །སངས་རྒྱས་རྣམ་ཀུན་ཤིན་ཏུ་བ། །ཞེས་གསུངས་སོ། །འོན་ཀྱང་དཔལ་ལྡན་ཟླ་བས་མདོ་འདི་དག་གི་དགོངས་པ་ཇི་ལྟར་འཆད་པར་དཔྱད་པར་བྱའོ། །བདག་མེད་གཉིས་ཀྱི་རྟོགས་རིམ་ནི། མདོ་ཏིང་འཛིན་རྒྱལ་པོ་ལས། ཇི་ལྟར་ཁྱོད་ཀྱི་བདག་གི་འདུ་ཤེས་ནི། །ཤེས་པ་དེ་བཞིན་ཀུན་ལ་བློས་སྦྱར་བྱ། །ཆོས་རྣམས་ཐམས་ཅད་དེ་ཡི་ངོ་བོ་ཉིད། །ཡོངས་སུ་དག་པ་རྣམ་མཁའ་ལྟ་བུ་ཡིན། །གཅིག་གིས་ཀྱང་ནི་ཐམས་ཅད་ཤེས། །གཅིག་གིས་ཀྱང་ནི་ཐམས་ཅད་མཐོང༌། །ཞེས་གསུངས་སོ། །ཚིག་རྐང་ཕྱི་མ་གཉིས་དང༌། དབུ་མ་བཞི་བརྒྱ་བ་ལས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང༌། །ཞེས་གསུངས་པས་ཆོས་གཅིག་གི་དེ་བཞིན་ཉིད་མཐོང་ན་ཆོས་ཀུན་གྱི་དེ་བཞིན་ཉིད་མཐོང་དགོས་པ་ཡིན་ནམ་དཔྱད་པར་ཞུ། མཁས་པ་གཞན་གྱིས་ཆོས་གཅིག་རང་བཞིན་གྱིསམེད་པར་རྟོགས་ན་གཞན་ལ་བློ་ཁ་ཕྱོགས་པ་ཙམ་གྱིས་རྟོགས་པ་དང༌། དེ་མངོན་སུམ་དུ་མཐོང་ན་ཆོས་ཀུན་རང་བཞིན་གྱིས་མེད་པ་མངོན་སུམ་དུ་རྟོགས་པར་བཞེད་དོ། །སྟོང་ཉིད་རྟོགས་པ་ལ་འབད་དགོས་ཏེ། འཕགས་པ་ལྷས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཟ་བར་ཡང་མི་འགྱུར། །ཐེ་ཚོམ་ཟ་བ་ཙམ་ཞིག་གིས། །སྲིད་པ་ཧྲུལ་པོར་བྱེད་པར་འགྱུར། །ཞེསགསུངས་པས་སོ། །

གསུམ་པ་ས་དང་པོར་ལྷག་པའི་ཡོན་ཏན་གཞན་བསྟན་པ་ལ། ས་དང་པོ་ལ་གནས་པའི་སྦྱིན་པ་བཤད་པ། རྟེན་དམན་པ་རྣམས་ཀྱི་སྦྱིན་པ་བཤད་པ། བྱང་ཆུབ་སེམས་དཔའ་རྣམས་ཀྱི་སྦྱིན་པ་བཤད་པ། སྦྱིན་པའི་ཕར་ཕྱིན་གྱི་དབྱེ་བ་བསྟན་པའོ། །དང་པོ་ནི། རྩ་བར།

དེ་ཚེ་དེ་ལ་རྫོགས་སངས་བྱང་ཆུབ་རྒྱུར། །དང་པོ་སྦྱིན་པ་ཉིད་ནི་ལྷག་པར་འགྱུར། །ཞེས་ས་དང་པོ་རབ་ཏུ་དགའ་བ་ཐོབ་པ་དེ༷འི་ཚེ༷་བྱང་ཆུབ་སེམས་དཔའ་དེ༷་ལ༷་ཕྱིན་བཅུའི་ནང་ནས་རྫོ༷གས་པའི་ས༷ངས་རྒྱས་བྱ༷ང་ཆུ༷བ་ཀྱི་རྒྱུ༷་ད༷ང་པོ༷་སྦྱི༷ན་པའི་ཕ་རོལ་ཏུ་ཕྱིན་པ༷་དེ་ཉི༷ད་ཁོ་ན་ནི༷་ཆེས་ལྷ༷ག་པ་ཡོད་པ༷ར་འགྱུ༷ར་ཏེ། རང་འགྲེལ་ལས། བྱང་ཆུབ་སེམས་དཔའ་ས་རབ་ཏུ་དགའ་བ་ཐོབ་པ་དེ་ལ།

སྦྱིན་པ་དང་ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་དང་ཤེས་རབ་དང༌།

ཐབས་དང་སྨོན་ལམ་དང༌། སྟོབས་དང་ཡེ་ཤེས་ཞེས་བྱ་བ་བཅུ་པོ་དག་ལས་སྦྱིན་པའི་ཕ་རོལ་ཏུ་ཕྱིན་པ་ཁོ་ནས་ཆེས་ལྷག་པར་ཡོད་པར་འགྱུར་ཏེ། དེ་ལས་གཞན་རྣམས་མེད་པ་ནི་མ་ཡིན་ནོ། །

སྦྱིན་པ་དེ་ཡང་རྣམ་པ་ཐམས་ཅད་མཁྱེན་པ་ཉིད་ཀྱི་རྒྱུ་དང་པོ་ཡིན་ནོ། །ཞེས་གསུངས་པས་སོ། །

རྩ་བར། རང་ཤ་སྟེར་ལའང་གུས་པར་བྱས་པ་ཡི། །སྣང་དུ་མི་རུང་དཔོག་པའི་རྒྱུར་ཡང་གྱུར། །

ཞེས་ས་དང་པོ་པ་དེས་ཕྱིའི་ཡོ་བྱད་སྟེར་བ་ལ་གུས་པར་བྱས་པ་མ་ཟད་སློང་བ་པོ་ལ་ར༷ང་གི་ཤ༷་སྟེ༷ར་བ་ལ༷འ༷ང་གུ༷ས་པ༷ར་བྱ༷ས་པ༷་ཡི༷་སྒོ་ནས་དེའི་རྒྱུད་ཀྱི་དེ་འདྲའི་སྦྱིན་པ་དེ་ནི་ས་དང་པོ་པའི་རྒྱུད་ལ་གང་ཟག་གཞན་ཕལ་ཆེར་ལ་སྣ༷ང་དུ༷་མི༷་རུ༷ང་བའི་དོན་དམ་པའི་ས་ཐོབ་པ་སོགས་ཡོན་ཏན་ཁྱད་པར་ཅན་ཡོད་པར་དཔོ༷ག་པ༷འི་རྒྱུ༷ར་གྱུར་པའམ་དཔོག་བྱེད་ཀྱི་གཏན་ཚིགས་སུ་ཡ༷ང་འགྱུ༷ར་བ་ཡིན་པ། དཔེར་ན་དུ་བའི་རྟགས་ཀྱིས་མེ་དཔོག་པ་སོགས་བཞིན་ཡིན་ཏེ། རང་འགྲེལ་ལས། དེའི་ཚེ་བྱང་ཆུབ་སེམས་དཔའ་དེའི་ཡོན་ཏན་སྣང་རུང་མ་ཡིན་པས་རྟོགས་པ་ལ་སོགས་པ་གང་དག་ཡིན་པ་དེ་དག་ཀྱང་ཕྱི་དང་ནང་གི་བདག་ཉིད་ཀྱི་དངོས་པོ་གཏོང་བའི་ཁྱད་པར་གྱི་རྗེས་སུ་དཔག་པ་ཉིད་ལས་གསལ་བར་དཔོག་པར་བྱེད་པ་ཡིན་ཏེ། དུ་བ་ལ་སོགས་པལས་མེ་ལ་སོགས་པ་དག་བཞིན་ནོ། །ཞེས་གསུངས་པའི་ཕྱིར་རོ། །

གཉིས་པ་རྟེན་དམན་པ་རྣམས་ཀྱི་སྦྱིན་པ་བཤད་པ་ལ།

སྦྱིན་པས་འཁོར་བའི་བདེ་བ་འཐོབ་པ་དང༌། སྦྱིན་པས་དམན་པའི་མྱང་འདས་ཀྱི་བདེ་བ་ཐོབ་པར་བསྟན་པ་དང་གཉིས།

དང་པོ་ནི། རྩ་བར། སྐྱེ་བོ་འདི་ཀུན་བདེ་བ་མངོན་འདོད་ཅིང༌། །མི་རྣམས་བདེ་བའང་ལོངས་སྤྱོད་མེད་མིན་ལ། །ལོངས་སྤྱ ོད་ཀྱང་ནི་སྦྱིན་ལས་འབྱུང་མཁྱེན་ནས། །ཐུབ་པས་དང་པོར་སྦྱིན་པའི་གཏམ་མཛད་དོ། །ཞེས་དང་པོ་ནི་འཇིག་རྟེན་གྱི་སྐྱེ༷་བོ༷་མ་ལུས་པ་འདི༷་ཀུ༵ན། བཀྲེས་སྐོམ་དང་ནད་དང་ཚ་གྲང་སོགས་ཀྱི་སྡུག་བསྔལ་ཕྱིར་བཅོས་པའི་བདེ༷་བ༷་ཐོབ་པར་མངོ༷ན་པར་འདོ༷ད་པ་ཡིན་ཅི༷ང༌། མི༷་ལ་སོགས་པ་རྣ༷མས་ཀྱི་བདེ༷་བ༷་དེའ༷ང་འདོད་པའི་ཡུལ་གྱི་ལོ༷ངས་སྤྱོ༷ད་བཟའ་བཏུང་དང༌། ནད་གསོ་བའི་སྨན་དང་གོས་དང་གནས་ཁང་སོགས་ལ་སྤྱད་པ་མེ༷ད་པར་སྐྱེ་བ་མི༷ན་ལ༷། བདེ་བའི་རྒྱུ་ལོ༷ངས་སྤྱོ༷ད་དེ་རྣམས་ཀྱ༷ང་ནི༷་ཚེ་རབས་སྔ་མར་སྦྱི༷ན་པ་ལ༷ས་བྱུང་བའི་བསོད་ནམས་བསགས་པ་ལས་བདེ་བ་འབྱུ༷ང་བར་མཁྱེ༷ན་ན༷ས། འགྲོ་བ་མ་ལུས་པའི་བསམ་པ་མཁྱེན་པའི་ཤཱཀྱ་ཐུ༷བ་པ༷ས་ད༷ང་པོ༷ར་རམ་ཐོག་མར་སྦྱིན་པའི་ངོ་བོ་དང་ཕན་ཡོན་ལ་སོགས་པའི་སྦྱི༷ན་པ༷འི་གཏ༷མ་ཉིད་མཛ༷ད་པ་ཡིན་ཏེ། སྦྱིན་པའི་འབྲས་བུ་ལོངས་སྤྱོད་ནི་མི་ལ་སོགས་པའི་བདེ་བའི་རྒྱུ་དང༌། ལམ་སྒྲུབ་པའི་ལས་དང་པོ་བ་རྣམས་ཀྱི་ཆོས་སྒྲུབ་པའི་ཆ་རྐྱེན་ཡིན་པ་དང༌། ཚུལ་ཁྲིམས་དང་བཟོད་པ་སོགས་ལས་སྦྱིན་པ་དེ་ལ་འཇུག་པར་ཡང་སླ་བའི་ཕྱིར་དང་པོར་བཤད་དོ༷། །རྩ་བར། སྙིང་རྗེ་དམན་ཞིང་ཤིན་ཏུ་རྩུབ་སེམས་ཅན། །རང་དོན་ལྷུར་ལེན་ཉིད་དུ་གྱུར་པ་གང༌། །དེ་དག་གི་ཡང་འདོད་པའི་ལོངས་སྤྱོད་རྣམས། །སྡུག་བསྔལ་ཉེར་ཞིའི་རྒྱུར་གྱུར་སྦྱིན་ལས་བྱུང༌། །ཞེས་སྦྱིན་པ་གཏོང་བ་པོ་ཚུལ་དང་མཐུན་པ་ཞིག་དགོས་སམ་སྙམ་ན་དེ་མི་དགོས་ཏེ། སྙི༷ང་རྗེ༷་དམ༷ན་ཞི༷ང་ཤི༷ན་ཏུ༷་རྩུ༷བ་པའི་སེ༷མས་དང་ལྡན་པ་ཅ༷ན། ར༷ང་གི་དོ༷ན་མངོན་པར་མཐོ་བའི་བདེ་བ་ཙམ་ལྷུ༷ར་ལེ༷ན་ཉི༷ད་དུ༷་གྱུ༷ར་བ༷་ག༷ང་ཡིན་པ་དེ༷་ད༷ག་གི༷་ཡ༷ང་སྦྱིན་པ་སྦྱིན་པའི་རྒྱུ་ལས་བྱུང་བར་འདོ༷ད་པ༷འི་ལོ༷ངས་སྤྱོ༷ད་ཕུན་སུམ་ཚོགས་པ་རྣ༷མས་ནི། རང་གི་བཀྲེས་སྐོམ་སོགས་ཀྱི་སྡུ༷ག་བསྔ༷ལ་ཉེ༷་བར་ཞི༷འི་རྒྱུ༷ར་གྱུ༷ར་པའི་སྦྱི༷ན་པ་ལ༷ས་འབྱུ༷ང་བ་ཡིན་པའི་ཕྱིར་ཏེ། རང་འགྲེལ་ལས། གང་དག་ཚོང་པ་བཞིན་དུ་ནོར་ཆེས་ཉུང་ངུ་བཏང་བ་ལས་འབྲས་བུ་ནོར་གྱི་ཕུང་པོ་ཆེས་ཡངས་པ་འདོད་པ་དོན་དུ་གཉེར་པ་པས་ཀྱང་ལྷག་པར་དོན་དུ་གཉེར་བར་གྱུར་ཅིང་སྦྱིན་པར་འདོད་པར་གུས་ཀྱི། ཞེས་པ་ནས། ལོངས་སྤྱོད་ཕུལ་དུ་བྱུང་བ་ཕུན་སུམ་ཚོགས་པའི་སྒོ་ནས་ལུས་ཀྱི་སྡུག་བསྔལ་ཡིད་དུ་མི་འོང་བ་བཀྲེས་པ་དང་སྐོམ་པ་ལ་སོགས་པ་འཇོམས་པརབྱེད་པས་སྡུག་བསྔལ་ཉེ་བར་ཞི་བའི་རྒྱུར་འགྱུར་རོ། །ཞེས་གསུངས་པས་སོ། །

གཉིས་པ་སྦྱིན་པས་དམན་པའི་མྱང་འདས་ཀྱི་བདེ་བ་ཐོབ་པར་བསྟན་པ་ནི།

རྩ་བར། འདི་ཡང་སྦྱིན་པའི་སྐབས་ཀྱིས་ནམ་ཞིག་ཚེ། །འཕགས་པའི་སྐྱེ་བོ་དང་ཕྲད་མྱུར་དུ་འཐོབ། །དེ་ནས་སྲིད་རྒྱུན་ཡང་དག་བཅད་བྱས་ཏེ། །དེ་ཡི་རྒྱུ་ཅན་ཞི་བར་འགྲོ་བར་འགྱུར། །ཞེས་སྦྱིན་པའི་རྟེན་དམན་པ་ཐེག་དམན་རིགས་ཅན་གྱི་སྦྱིན་པས་མྱང་འདས་ཀྱི་བདེ་བ་ཐོབ་པར་བྱེད་དེ། རྟེན་དམན་པས་སྦྱིན་པ་གཏོང་བ་འདི༷་ཡ༷ང་སྦྱི༷ན་པ་གཏོང་བར་གྱུར་པ༷འི་སྐ༷བས་ཀྱི༷་དུས་ན༷མ་ཞི༷ག་གི་ཚེ༷་ན་འཕ༷གས་པ༷འི་སྐྱེ༷་བོ༷་ད༷ང་འཕྲ༷ད་པ་མྱུ༷ར་དུ༷་འཐོ༷བ་པར་བྱེད་ཅིང༌། དེ༷་ན༷ས་དམ་པ་འཕགས་པ་དེས་ཆོས་བསྟན་པ་ལས་འཁོར་བ་ལ་ཡོན་ཏན་མེད་པར་སྐྱོན་ཅན་ཁོ་ནར་རིག་ནས་ལམ་ཉམས་སུ་བླངས་ཏེ་འཕགས་ལམ་ཟག་མེད་མངོན་དུ་བྱས་པས་མ་རིག་པ་སྤངས་ཏེ། སྲི༷ད་པ་འཁོར་བའི་རྒྱུ༷ན་ཐོག་མེད་ནས་སྐྱེ་འཆི་གཅིག་ནས་གཅིག་ཏུ་བརྒྱུད་པ་དེ་ཡ༷ང་ད༷ག་པར་བཅ༷ད་པར་བྱ༷ས་ཏེ༷། སྔོན་ལམ་དུ་ཞུགས་པའི་ཚེ་དམ་པ་དང་འཕྲད་པ་དེ༷་ཡི༷་རྒྱུ༷་ཅ༷ན་ཉན་ཐོས་སམ་རང་རྒྱལ་གྱི་ཞི༷་བ༷་མྱང་འདས་སུ་འགྲོ༷་བ༷ར་འགྱུ༷ར་བ་ཡིན་ནོ། །དེ་ཡན་དུ་བྱང་སེམས་མ་ཡིན་པའི་སྦྱིན་པ་དང་སྦྱིན་འབྲས་བཤད་ཟིན་ཏེ། རང་འགྲེལ་ལས། དེ་ལྟ་ན་རེ་ཞིག་བྱང་ཆུབ་སེམས་དཔའ་མ་ཡིན་པ་རྣམས་ཀྱི་སྦྱིན་པ་འཁོར་བ་དང་མྱ་ངན་ལས་འདས་པའི་བདེ་བ་ཐོབ་པའི་རྒྱུཡིན་ནོ། །ཞེས་གསུངས་པའི་ཕྱིར་རོ། །

གསུམ་པ་བྱང་ཆུབ་སེམས་དཔའ་རྣམས་ཀྱི་སྦྱིན་པ་བཤད་པ་ལ།

བྱང་སེམས་ཀྱི་སྦྱིན་པའི་ཕན་ཡོན་ཐུན་མོང་མ་ཡིན་པ་བསྟན་པ། རྟེན་གཉིས་ཀ་ལ་སྦྱིན་པའི་གཏམ་གཙོ་བོར་བསྟན་པ། བྱང་སེམས་ཀྱི་སྦྱིན་པའི་ཚེ་དགའ་བ་ཅི་འདྲ་བ་ཐོབ་པ་བསྟན་པ། བྱང་སེམས་ཀྱིས་ལུས་སྦྱིན་པ་ལ་སྡུག་བསྔལ་ཡོད་མེད་བསྟན་པ་དང་བཞི་ལས། དང་པོ་ནི། རྩ་བར། འགྲོ་ལ་ཕན་པར་དམ་བཅས་ཡིད་ཅན་རྣམས། །སྦྱིན་པས་རིང་པོར་མི་ཐོགས་དགའ་བ་ཐོབ། །ཅེས་འགྲོ༷་བ་ཐམས་ཅད་ལ༷་ཕུགས་སུ་ཕ༷ན་པ་དང་འཕྲལ་དུ་བདེ་བ་སྒྲུབ་པ༷ར་ད༷མ་བཅ༷ས་པའི་ཡི༷ད་ཅ༷ན་གྱི་བྱང་སེམས་རྣ༷མས་ནི་ཆོས་ཅན། སྦྱིན་པ་གཏོང་བ་ལ་རྒྱུན་མི་ཆད་པར་གུས་པའི་རྒྱུ་མཚན་ཡོད་དེ། བྱང་སེམས་མ་ཡིན་པ་རྣམས་ནི་སྦྱིན་པས་སློང་བ་པོ་ཚིམ་པར་བྱས་པའི་མཇུག་ཐོགས་དེ་མ་ཐག་ཏུ་སྦྱིན་པའི་འབྲས་བུའི་བདེ་བ་ལ་ངེས་པར་ལོངས་སྤྱོད་པ་མིན་ལ། དེ་མིན་པས་དེ་རྣམས་ཀྱི་སྦྱིན་པ་སྦྱིན་པའི་འབྲས་བུ་མངོན་སུམ་དུ་མི་མཐོང་བས་སྦྱིན་པ་ལ་མི་འཇུག་པ་ཡང་སྲིད་པ་གང་ཞིག དེ་འདྲའི་བྱང་སེམས་རྣམས་ཀྱིས་ནི་སྦྱི༷ན་པ་བྱིན་པ༷ས་རི༷ང་པོ༷ར་མི༷་ཐོ༷གས་པར་སློང་བ་པོ་ཚིམ་པར་བྱས་པའི་མཇུག་ཐོག་དེ་ཉིད་དུ། སྦྱིན་པའི་འབྲས་བུ་ནི་དག༷འ་བ༷་མཆོག་ཏུ་གྱུར་པ་ཐོ༷བ་པ་ཡིན་པའི་ཕྱིར་ཏེ། རང་འགྲེལ་ལས། བྱང་ཆུབ་སེམས་དཔའ་མ་ཡིན་པ་རྣམས་ནི་སྦྱིན་པ་དང་དུས་མཉམ་དུ་ཇི་སྐད་བཤད་པའི་སྦྱིན་པའི་འབྲས་བུ་ངེས་པར་ལོངས་སྤྱོད་པ་མ་ཡིན་ཏེ། ཞེས་པ་ནས། བྱང་ཆུབ་སེམས་དཔའ་རྣམས་ནི། ཞེས་པ་ནས། དེཉིད་དུ་སྦྱིན་པའི་འབྲས་བུ་ཉེ་བར་ལོངས་སྤྱོད་དོ། །ཞེས་གསུངས་པའི་ཕྱིར་རོ། །

གཉིས་པ་རྟེན་གཉིས་ཀ་ལ་སྦྱིན་པའི་གཏམ་གཙོ་བོར་བསྟན་པ་ནི།

རྩ་བར། གང་ཕྱིར་བརྩེ་བདག་བརྩེ་བདག་མ་ཡིན་པ། །དེ་ཕྱིར་སྦྱིན་པའི་གཏམ་ཉིད་གཙོ་བོ་ཡིན། །ག༷ང་གི་ཕྱི༷ར་ན་གོང་དུ་བཤད་པ་ལྟར་བརྩེ༷་བའི་བད༷ག་ཉིད་བྱང་སེམས་དང༌། བརྩེ༷་བའི་བད༷ག་ཉིད་བྱང་སེམས་མ༷་ཡི༷ན་པ༷་གཉིས་ཀའི་མངོན་མཐོ་དང་ངེས་ལེགས་ཀྱི་བདེ་བ་ཐམས་ཅད་སྦྱིན་པས་འདྲེན་པར་བྱེད་པ་དེ༷འི་ཕྱི༷ར་སྦྱིན་པའི་རྟེན་གཉིས་ཀ་ལ་སྦྱི༷ན་པ༷འི་གཏ༷མ་ཉི༷ད་གཙོ༷་བོ༷་གལ་ཆེ་བ་ཡི༷ན་ཏེ། རང་འགྲེལ་ལས། ཐམས་ཅད་ཀྱི་མངོན་པར་མཐོ་བ་དང་ངེས་པར་ལེགས་པའི་རྒྱུ་སྦྱིན་པ་ཡིན་པ། ཞེས་གསུངས་པས་སོ། །སྦྱིན་པ་གལ་ཆེ་བ་ཡིན་ཏེ། བཤེས་སྤྲིངས་ལས། ལོངས་སྤྱོད་གཡོ་བ་སྙིང་བོ་མེད་མཁྱེན་ནས། །དགེ་སྦྱོང་བྲམ་ཟེ་བཀྲེན་དང་བཤེས་རྣམས་ལ། །

སྦྱིན་པ་ཚུལ་བཞིན་བསྩལ་བགྱི་ཕ་རོལ་ཏུ། །སྦྱིན་ལས་གཞན་པའི་གཉེན་མཆོག་མམཆིས་སོ། །ཞེས་གསུངས་པས་སོ། །

གསུམ་པ་བྱང་སེམས་ཀྱི་སྦྱིན་པའི་ཚེ་དགའ་བ་ཇི་འདྲ་ཐོབ་པར་བསྟན་པ་ནི། རྩ་བར།

ཇི་ལྟར་བྱིན་ཅིག་ཅེས་སྒྲ་ཐོས་བསམས་ལས། །རྒྱལ་སྲས་བདེ་འབྱུང་དེ་ལྟར་ཐུབ་རྣམས་ལ། །

ཞི་བར་ཞུགས་པས་བདེ་བ་བྱེད་མིན་ན། །ཐམས་ཅད་བཏང་བས་ལྟ་ཞིག་སྨོས་ཅི་དགོས། །

ཞེས་བྱང་སེམས་རྣམས་སྦྱིན་པ་ལ་གུས་པར་བྱེད་པའི་རྒྱུ་ནི་སློང་བ་པོ་རྣམས་ལོངས་སྤྱོད་ཀྱིས་ཚིམས་པ་ལས་བྱུང་བའི་དགའ་བ་ཁྱད་པར་ཅན་ཐོབ་ལ། ཇི༷་ལྟ༷ར་ཐོབ་ན་སློང་བ་པོས་བདག་ལ་ཟས་གོས་སོགས་བྱི༷ན་ཅི༷ག་ཅེ༷ས་ཟེར་བའི་སྒྲ༷་ཐོ༷ས་པའི་དོན་བས༷མ་པ་ན། སློང་བ་པོ་འདི་ནི་བདག་ལ་ལོངས་སྤྱོད་སློང་བ་ཞིག་གོ་སྙམ་པ་ལ༷ས། རྒྱ༷ལ་སྲ༷ས་དེ་ལ་ཡིད་ལ་བདེ༷་བ་ཡང་ནས་ཡང་དུ་འབྱུ༷ང་བའི་བདེ་བ་དེ༷་ལྟ༷ར་ཐུ༷བ་པ་དགྲ་བཅོམ་པ་རྣ༷མས་ལ༷་ཞི༷་བ༷ར་ཞུགས་སམ་མྱང་འདས་ཀྱི་དབྱིངས་སུ་སྙོམས་པར་ཞུ༷གས་པ༷ས་བདེ༷་བ༷་བསྐྱེད་པར་བྱེ༷ད་དམ་བྱིན་པ་མི༷ན་ན༷། ཕྱི་ནང་གི་དངོས་པོ་ཐ༷མས་ཅ༷ད་བཏ༷ང་བ༷ས་སློང་བ་པོ་ཚིམས་པར་བྱེད་པ་དེས་ཞི་བདེ་ལས་ལྷགཔའི་བདེ་བ་ཁྱད་པར་ཅན་བསྐྱེད་པ་ལྟ༷་ཞི༷ག་སྨོ༷ས་ཅི༷་དགོ༷ས་ཏེ་མི་དགོས་པའོ། །

བཞི་པ་བྱང་སེམས་ཀྱིས་ལུས་སྦྱིན་པ་ལ་སྡུག་བསྔལ་ཡོད་མེད་བསྟན་པ་ནི།

འཇུག་པ་རང་འགྲེལ་ལས། ཡང་ཅི་གང་ལས་དེ་སྐད་བརྗོད་པ་ཕྱི་དང་ནང་གི་དངོས་པོ་གཏོང་བའི་བྱང་ཆུབ་སེམས་དཔའ་རྣམས་ལ་ལུས་ཀྱི་སྡུག་བསྔལ་ཡང་མི་འབྱུང་ངམ་ཞེ་ན། བཤད་པ། བདག་ཉིད་ཆེན་པོ་རྣམས་ལ་ནི་སེམས་མེད་པ་རྣམས་བཅད་པ་ལྟར་ལུས་ཀྱི་སྡུག་བསྔལ་འབྱུང་བ་མི་སྲིད་པ་ཉིད་དེ། འཕགས་པ་ནམ་མཁའ་མཛོད་ཀྱི་ཏིང་ངེ་འཛིན་ལས། འདི་ལྟ་སྟེ། དཔེར་ན་ཤིང་སཱ་ལ་ཆེན་པོའི་ཚལ་ཞིག་ཡོད་ལ། དེར་འགའ་ཞིག་འོངས་ནས་སཱ་ལ་གཅིག་བཅད་པ་ན། དེར་ཤིང་སཱ་ལ་ལྷག་མ་དེ་རྣམས་འདི་སྙམ་དུ་འདི་ནི་བཅད་པའོ། །བདག་ཅག་ནི་མ་བཅད་པའོ་སྙམ་དུ་མི་སེམས་ཤིང༌། དེ་དག་ལ་རྗེས་སུ་ཆགས་པ་དང་ཁོང་ཁྲོ་བ་མེད་དོ། །རྟོག་པ་དང༌། རྣམ་པར་རྟོག་པ་མེད་དོ། །བྱང་ཆུབ་སེམས་དཔའི་བཟོད་པ་དེ་ལྟ་བུ་གང་ཡིན་པ་དེ་ནི་བཟོད་པ་ཡོངས་སུ་དག་པ་མཆོག་ནམ་མཁའ་དང་མཉམ་པ་ཡིན་ནོ་ཞེས་ཇི་སྐད་གསུངས་པ་ལྟ་བུའོ། །

རིན་པོ་ཆེའི་ཕྲེང་བ་ལས་ཀྱང༌། དེ་ལ་ལུས་ཀྱི་སྡུག་བསྔལ་མེད། །ཡིད་ཀྱི་སྡུག་བསྔལ་ག་ལ་ཡོད། །དེ་ནི་སྙིང་རྗེས་འཇིག་རྟེན་སྡུག །དེ་ཉིད་ཀྱིས་ནི་ཡུན་རིང་གནས། །ཞེས་གསུངས་སོ། །

ཡང་ཆགས་པ་མེད་པའི་གནས་སྐབས་མ་ཐོབ་པ་གང་ཞིག་ལ་ལུས་གནས་པ་དང་འགལ་བའི་ཡུལ་ཡང་དག་པར་བབས་པས་ལུས་ཀྱི་སྡུག་བསྔལ་གདོན་མི་ཟ་བར་འབྱུང་བ་དེའི་ཚེ་དེ་ཡང་སེམས་ཅན་གྱི་དོན་བྱ་བ་དག་ལ་ཆེས་ལྷག་པར་འཇུག་པའི་རྒྱུ་ཉིད་དུ་གནས་པ་ཡིན་ནོ་ཞེས་བཤད་པ་ནི། རྩ་བར། ལུས་བཅད་སྟེར་ཞིང་བདག་གི་སྡུག་བསྔལ་གྱིས། །གཞན་དག་རྣམས་ཀྱི་དམྱལ་བ་ལ་སོགས་པའི། །སྡུག་བསྔལ་རང་རིག་ཉིད་དུ་མཐོང་ནས་དེ། །དེ་གཅད་བྱ་ཕྱིར་མྱུར་དུ་བརྩོན་འགྲུས་རྩོམ། །ཞེས་བྱང་སེམས་རང་གི་ལུས་གཅོད་པའི་སྡུག་བསྔལ་ལས་སྟོང་འགྱུར་ལས་ཀྱང་ཆེས་ལྷག་པའི་གཞན་གྱི་སྡུག་བསྔལ་བསྲན་དུ་མེད་པ་དག་ལ་བསམ་པ་ན། སློང་བ་པོ་ལ་རང་གི་ལུ༷ས་ནི་བཅ༷ད་ནས་སྟེ༷ར་ཞི༷ང་སྦྱིན་པའི་སྡུག་བསྔལ་གྱིས་ཏེ་སྡུག་བསྔལ་ལ་རྩིས་མེད་པར་བྱས་ནས། བད༷ག་གི༷་ལུས་བྱིན་པ་སྡུ༷ག་ཉམས་སུ་མྱོང་བའི་བསྔ༷ལ་གྱི༷ས་སེམས་ཅན་གཞ༷ན་ད༷ག་རྣ༷མས་ཀྱི༷་དམྱ༷ལ་བ༷་ལ༷་སོ༷གས་པ༷འི་སྡུ༷ག་བསྔ༷ལ་ར༷ང་མྱོང་གིས་མངོན་སུམ་དུ་རི༷ག་པ་ཉི༷ད་དུ༷་མཐོ༷ང་བ་དེ་རྒྱུ་མཚན་དུ་བྱས་ན༷ས་ནི༷། གཞན་གྱི་སྡུག་བསྔལ་དེ༷་གཅ༷ད་པར་བྱ༷་བའི་ཕྱི༷ར་དུ་ཆེས་མྱུ༷ར་དུ༷་བརྩོ༷ན་འགྲུ༷ས་རྩོ༷མ་པ་ཡིན་ཏེ། རང་འགྲེལ་ལས། རང་གི་ལུས་གཅོད་པའི་སྡུག་བསྔལ་བས་སྟོང་འགྱུར་བས་ཀྱང་ཆེས་ལྷག་པར་འཕེལ་བའི་སྡུག་བསྔལ་བ་སྲན་དུ་མེད་པ་དང་ལྡན་པ་དག་ལ་རང་གི་སྡུག་བསྔལ་མྱོང་བ་ཉིད་དུ་ལྟ་བ་ན་རང་གི་ལུས་གཅོད་པའིསྡུག་བསྔལ་ལ། རྩིས་མེད་པར་བྱས་ནས། ཞེས་སོགས་གསུངས་པའི་ཕྱིར་རོ། །

བཞི་པ་སྦྱིན་པའི་ཕར་ཕྱིན་གྱི་དབྱེ་བ་བསྟན་པ་ནི།

རྩ་བར། སྦྱིན་པ་སྦྱིན་བྱ་ལེན་པོ་གཏོང་པོས་སྟོང༌། །འཇིག་རྟེན་འདས་པའི་ཕ་རོལ་ཕྱིན་ཞེས་བྱ། །གསུམ་པོ་དག་ལ་ཆགས་སྐྱེས་གྱུར་པས་དེ། །འཇིག་རྟེན་པ་ཡི་ཕ་རོལ་ཕྱིན་ཞེས་བསྟན། །ཞེས་སྦྱིན་པའི་ཕར་ཕྱིན་ལ་དབྱེ་ན་གཉིས་སུ་ཡོད་དེ། ༡གཏོང་སེམས་སྦྱི༷ན་པ༷་དང་སྦྱི༷ན་པར་བྱ༷་བ་ལུས་ལོངས་སྤྱོད་སོགས་དང་ལེ༷ན་པ་པོ༷་གསུམ་པོ་གཏོ༷ང་བ་པོ༷ས་བདེན་གྲུབ་ཀྱིས་སྟོ༷ང་པར་མངོན་སུམ་དུ་རྟོགས་པའི་ཟག་མེད་ཡེ་ཤེས་ཀྱིས་ཟིན་པ་སྦྱིན་པ་དེ་ནི་འཇི༷ག་རྟེ༷ན་ལས་འད༷ས་པ༷འི་ཕ༷་རོ༷ལ་ཏུ་ཕྱི༷ན་པ་ཞེ༷ས་བྱ༷འོ། །༢འཁོར་གསུམ་བདེན་མེད་མ་རྟོགས་པའི་སྦྱིན་པའི་འཁོར་གསུ༷མ་པོ༷་ད༷ག་ལ༷་བདེན་པར་ཆ༷གས་པ་སྐྱེ༷ས་པར་གྱུ༷ར་པ༷ས་བཅིངས་པའི་སྦྱིན་པ་དེ༷་འཇི༷ག་རྟེ༷ན་པ༷་ཡི༷་སྦྱིན་པའི་ཕ༷་རོ༷ལ་ཏུ་ཕྱི༷ན་པ་ཡིན་ཞེ༷ས་མདོ་ལས་བསྟ༷ན་པའི་ཕྱིར་རོ། །དེ་ལ་སྦྱིན་པའི་ཕ་རོལ་ཏུ་ཕྱིན་པའི་སྒྲ་བཤད་དུ་ཡོད་དེ། དབུལ་བ་འདོར་བར་བྱེད་པས་ན་སྦྱིན་པ་དང༌། འཁོར་བ་ཕྲ་རགས་ཀྱི་རྒྱ་མཚོའི་ཕར་འགྲམ་ཡིན་པས་ཕ་རོལ་དང༌། འཁོར་བའི་ཕ་རོལ་དེར་ཕྱིན་པའམ་ཕྱིན་ཟིན་ཡིན་པས་ཕྱིན་པ་ཞེས་བཤད་པའི་ཕྱིར་ཏེ། མདོ་སྡེ་རྒྱན་ལས། དབུལ་བ་འདོར་བྱེད་བསིལ་བྱེད་ཕྱིར། །

ཞེས་དང༌། རང་འགྲེལ་ལས། ཕ་རོལ་ཞེས་བྱ་བ་ནི་གང་འཁོར་བའི་རྒྱ་མཚོའི་ཕར་འགྲམ་དང་ངོགས་ཏེ། ཉོན་མོངས་པ་དང་ཤེས་བྱའི་སྒྲིབ་པ་མ་ལུས་པ་སྤངས་པའི་རང་བཞིན་མངའ་བའིསངས་རྒྱས་ཉིད་དོ། །ཕ་རོལ་དུ་སོན་པ་ནི་ཕ་རོལ་ཏུ་ཕྱིན་པའོ་ཞེས་བྱ་སྟེ། ཞེས་གསུངས་སོ། །

གསུམ་པ་སའི་ཡོན་ཏན་བཤད་པའི་སྒོ་ནས་མཇུག་བསྡུ་བ་ནི།

རྩ་བར། དེ་ལྟར་རྒྱལ་བའི་སྲས་ཀྱི་ཡིད་ལ་རབ་གནས་ཤིང༌། །དམ་པའི་རྟེན་ལ་འོད་ཆགས་མཛེས་པ་རྙེད་གྱུར་པའི། །

དགའ་བ་འདི་ནི་ནོར་བུ་ཆུ་ཤེལ་ཇི་བཞིན་དུ། །མུན་པ་སྟུག་པོ་ཐམས་ཅད་རྣམ་པར་བསལ་ནས་རྒྱལ། །ཞེས་ས་རབ་ཏུ་དགའ་བ་ནི་སྔར་བཤད་པ་དེ༷་ལྟ༷ར་ས་མཐོན་པོའི་ཡོན་ཏན་ཐོབ་པའི་ས་དང་པོའི་རྒྱ༷ལ་བ༷འི་སྲ༷ས་ཀྱི༷་ཡི༷ད་ལ༷་ར༷བ་ཏུ་གན༷ས་ཤི༷ང༌། དཔེར་ན་ཟླ་བའི་རང་གི་རྟེན་གྱི་ནམ་མཁའ་དེ་འོད་དཀར་པོས་མཛེས་པར་བྱེད་པ་བཞིན་དུ་དོན་དམ་པའི་ས་རབ་ཏུ་དགའ་བས་ནི་རང་གང་ལ་གནས་པའི་ད༷མ་པ༷འི་རྟེ༷ན་གྱི་ཡིད་ཤེས་དེ་ལ༷་དེ་ཉིད་རྟོགས་པའི་ཡེ་ཤེས་ཀྱི་འོ༷ད་རབ་ཏུ་ཆ༷གས་པའི་མཛེ༷ས་པ༷་རྙེ༷ད་པར་གྱུ༷ར་ཅེས་རབ་ཏུ་མཛེས་པར་བྱས་པའི་སྒོ་ནས་གནས་པ༷འི་ས་དང་པོ་རབ་ཏུ་དག༷འ་བ༷་འདི༷་ནི༷་ནོ༷ར་བུ༷་ཆུ༷་ཤེ༷ལ་ཟླ་བའི་དཀྱིལ་འཁོར་གྱིས་མུན་པ་བསལབ་ཇི༷་ལྟ་བ་བཞི༷ན་དུ༷་དོན་དམ་པའི་ས་རབ་ཏུ་དགའ་བས་རང་གི་མི་མཐུན་ཕྱོགས་མཐོང་སྤང་གི་མུ༷ན་པ༷་སྟུ༷ག་པོ༷་ཐ༷མས་ཅ༷ད་རྣ༷མ་པ༷ར་བས༷ལ་ན༷ས་རབ་ཏུ་རྒྱ༷ལ་ནས་ས་དང་པོའི་རྒྱལ་སྲས་ཀྱི་ཡིད་ལ་གནས་པ་ཡིན་ནོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱན་རིན་ཆེནསྒྲོན་མེ་ཞེས་བྱ་བ་ལ༷ས་དོན་དམ་པའི་སེ༷མས་བསྐྱེ༷ད་པ༷་ད༷ང་པོ༷འི་རྣམ་པར་བཤད་པའོ༷།། །།