བཞི་བ་ལོག་ཤེས་བཤད་པའི་སྐབས་ཀྱི་མཐའ་དཔྱད་པ།
བཞི་བ་ལོག་ཤེས་བཤད་པའི་སྐབས་ཀྱི་མཐའ་དཔྱད་པ་ནི།
བསྡུས་གྲྭའི་སྤྱི་དོན་༣༧༣ལས། དེས་ན་རང་གི་འཛིན་སྟངས་ཀྱི་ཡུལ་མེད་པའི་རིག་པ་ལོག་ཤེས་ཀྱི་མཚན་ཉིད་དུ་མི་རུང་སྟེ། ཞེས་གསུངས་པ་མི་འཐད་པར་ཐལ། རང་གི་འཛིནསྟངས་ཀྱི་ཡུལ་མེད་པའི་རིག་པ་ཡིན་ན་ལོག་ཤེས་ཡིན་པའི་ཁྱབ་པས་ཕྱིར་ཏེ། དེ་མ་ཡིན་པ་ལ་དེར་འཛིན་གྱི་བློ་ཡིན་ན་ལོག་ཤེས་ཡིན་པའི་ཁྱབ་པས་ཕྱིར། དེར་ཐལ། དེ་མ་ཡིན་པ་ལ་དེར་འཛིན་གྱི་བློ་ཡིན་ན་ལོག་རྟོག་ཡིན་པའི་ཁྱབ་པས་ཕྱིར་ཏེ། དེ་དེའི་མཚན་ཉིད་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། མཚན་ཉིད་ནི་རིམ་པ་ལྟར་ཞེས་པ་ནས་དེ་མ་ཡིན་པ་ལ་དེར་འཛིན་གྱི་བློ་དང༌། ཞེས་གསུངས་པའི་ཕྱིར། འདོད་ན། མི་སྡུག་པའི་ཏིང་ངེ་འཛིན་རྟོག་བཅས་ཆོས་ཅན། ལོག་ཤེས་ཡིན་པར་ཐལ། དེ་མ་ཡིན་པ་ལ་དེར་འཛིན་གྱི་བློ་ཡིན་པའི་ཕྱིར། འདོད་མི་ནུས་ཏེ། བསྡུས་གྲྭའི་སྤྱི་དོན་༣༧༣ལས། མི་སྡུག་པའི་ཏིང་ངེ་འཛིན་རྟོག་བཅས་ཀྱི་འཛིན་སྟངས་ཀྱི་ཡུལ་མེད་པ་གང་ཞིགདེ་ལོག་ཤེས་མ་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན། དེ་ཆོས་ཅན། ལོག་ཤེས་ཡིན་པར་ཐལ། རང་གི་འཛིན་སྟངས་ལ་འཁྲུལ་བའི་རིག་པ་ཡིན་པའི་ཕྱིར་ཟེར་ན། རྟགས་མ་གྲུབ་སྟེ། རང་གི་འཛིན་སྟངས་ལ་འཁྲུལ་བ་ལ་མ་ཤེས་པའི་དབང་གིས་ཞེ་ཐག་པ་ནས་དེ་མ་ཡིནཔ་ལ་དེར་འཛིན་དགོས་པའི་ཕྱིར་ཏེ། བསྡུས་གྲྭའི་སྤྱི་དོན་༣༧༣ལས། ཟད་པར་ཆུའི་ཏིང་ངེ་འཛིན་རྟོག་བཅས་ཀྱིས་ས་གཞི་ཐམས་ཅད་ཆུས་གང་བ་མེད་པ་ལ་མེད་པར་མ་ཤེས་པའི་དབང་གིས་ཞེ་ཐག་པ་ནས་ཡོད་པར་འཁྲུལ་བ་མ་ཡིན་པས་དེའི་འཛིན་སྟངས་ཀྱི་ཡུལ་མེད་ཀྱང་འཛིན་སྟངས་ཀྱི་ཡུལ་ལ་འཁྲུལ་བ་མིན་ལ། ཞེས་གསུངས་པའི་ཕྱིར། འདོད་ན། དེ་མི་རིགས་པར་ཐལ། མ་ཤེས་པའི་དབང་གིས་འཁྲུལ་བ་ཞེས་པའི་མ་ཤེས་པ་དེ་རྒྱུད་ལྡན་གྱི་གང་ཟག་གིས་མ་ཤེས་པ་ལ་བྱེད་པ་མ་ཡིན་པ་གང་ཞིག བློ་ཁོ་རང་གིས་མ་ཤེས་པ་ལ་བྱེད་པ་མ་ཡིན་པའི་ཕྱིར། དང་པོ་མ་གྲུབ་ན། བདག་མེད་རྟོགས་ཟིན་པའི་གང་ཟག་གི་རྒྱུད་ཀྱི་བདག་འཛིན་ལྷན་སྐྱེས་ཆོས་ཅན། རང་གི་འཛིན་སྟངས་ཀྱི་ཡུལ་ལ་འཁྲུལ་བ་མ་ཡིན་པར་ཐལ། རང་རྒྱུད་ལྡན་གྱི་གང་ཟག་གིས་མ་ཤེས་པའི་དབང་གིས་དེ་མ་ཡིན་པ་ལ་དེར་འཛིན་པ་མ་ཡིན་པའི་ཕྱིར་མི་འཐད་དོ། །གོང་དུ་བློ་ཁོ་རང་གིས་མ་ཤེས་པ་ལ་བྱེད་ཟེར་ན། མི་སྡུག་པའི་ཏིང་ངེ་འཛིན་རྟོག་བཅས་ཆོས་ཅན། རང་གི་འཛིན་སྟངས་ལ་འཁྲུལ་བ་ཡིན་པར་ཐལ། བློ་ཁོ་རང་གིས་མ་ཤེས་པའི་དབང་གིས་དེ་མ་ཡིན་པ་ལ་དེར་འཛིན་གྱི་བློ་ཡིན་པའི་ཕྱིར་ཟེར་ན་དཔྱད། ཡང་མི་སྡུག་པའི་ཏིང་ངེ་འཛིན་རྟོག་བཅས་ཆོས་ཅན། ལོག་ཤེས་ཡིན་པར་ཐལ། དབུ་མ་ཐེག་མཆོག་ལས། མི་སྡུག་ལ་སོགས་ལོག་པའི་འདུ་ཤེས་ཀྱང༌། །དགོས་པའི་དབང་གིས་ཡང་དག་ཡིན་པར་འགྱུར། །ཞེས་དང༌། དེའི་ཟིན་བྲིས་༢༣ལས། ཆགས་ཡུལ་ཀེང་རུས་སུ་འདུ་ཤེས་པ་ལ་སོགས་མི་སྡུག་པའི་འཇུག་ཤེས་རྣམས་སྤྱིར་ལོག་པའི་འདུ་ཤེས་ཡིན་ཀྱང༌། དགོས་པ་གྲོལ་བའི་རྒྱུར་འགྲོ་བའི་ཕྱིར་ཡང་དག་པའི་འདུ་ཤེས་ཀྱི་མིང་གིས་བསྟན་ནོ། །ཞེས་གསུངས་པ་སོགས་ཀྱིས་དཔྱད། ཡང་གཏན་ཚིགས་དོན་བསྡུས་ལས། མཚན་ཉིད་ནི་རིམ་པ་ལྟར་ཞེས་པ་ནས་དེ་མ་ཡིན་པ་ལ་དེར་འཛིན་གྱི་བློ་དང༌། ཞེས་དེ་མ་ཡིན་པ་ལ་དེར་འཛིན་གྱི་བློ་ལོག་རྟོག་གི་མཚན་ཉིད་དུ་གསུངས་པས། གངས་རི་སྔོ་སྣང་གི་དབང་ཤེས་ཆོས་ཅན། ལོག་རྟོག་ཡིན་པར་ཐལ། དེ་མ་ཡིན་པ་ལ་དེར་འཛིན་གྱི་བློ་ཡིན་པའི་ཕྱིར། འདོད་ན། དེ་ཆོས་ཅན། རྟོག་པ་ཡིན་པར་ཐལ། ལོག་རྟོག་ཡིན་པའི་ཕྱིར། ཁྱབ་སྟེ། ལོག་རྟོག་ཅེས་པའི་ཚིག་ཟུར་གྱི་རྟོག་པ་དེ་རྟོག་བཅས་རྟོག་མེད་ཀྱི་རྟོག་པ་ལ་བྱེད་དགོས་པའི་ཕྱིར་ཏེ། དེའི་ཚིག་ཟུར་གྱི་རྟོག་པའི་དོན་ཡོད་པའི་ཕྱིར་ཟེར་ན། དེ་རྟོག་པ་ལ་བྱེད་དགོས་སམ་སོ་སོར་ལོག་པར་འཛིན་པ་ཙམ་ལ་བྱེ་དགོས་མིན་དཔྱད་དོ། །