ཀ རྩ་བར་གྱུར་པ་རྒྱུད་སྡེའི་བརྒྱུད་ཚུལ།
གསུམ་པ་གང་ཟག་སྙན་ཁུང་གི་བརྒྱུད་པ་ལ་གསུམ་ལས། དང་པོ་དཔལ་མ་ཧཱ་ཡོ་གའི་བརྒྱུད་ཚུལ་ནི། དེ་ཡང་མ་ཧཱ་ཡོ་ག་ལའང་རྩ་བར་གྱུར་པ་རྒྱུད་སྡེ་དང་། ཟབ་པ་སྒྲུབ་སྡེ་གཉིས་སུ་ཡོད་པ་ལས། སྔ་མ་ཏནྟྲ་ཆེན་མོ་སྡེ་བཅོ་བརྒྱད་ནི། སྐུ་ཡི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། ཡོན་ཏན་གྱི་རྒྱུད་དཔལ་མཆོག་དང་པོ། ཕྲིན་ལས་ཀྱི་རྒྱུད་ཀརྨ་མ་ལེ་སྟེ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་རྩ་བར་གྱུར་བའི་རྒྱུད་སྡེ་ཆེན་མོ་ལྔ་དང་། ཧེ་རུ་ཀ་རོལ་བའི་རྒྱུད། རྟ་མཆོག་རོལ་བའི་རྒྱུད། སྙིང་རྗེ་རོལ་བའི་རྒྱུད། བདུད་རྩི་རོལ་བའི་རྒྱུད། ཕུར་བ་བཅུ་གཉིས་པ་འབྱུང་བའི་རྒྱུད་བཅས་སྒྲུབ་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ། རི་བོ་བརྩེགས་པ། ཡེ་ཤེས་རྔམས་གློག དམ་ཚིག་བཀོད་པ། ཏིང་འཛིན་རྩེ་གཅིག གླང་ཆེན་རབ་འབོག་གི་རྒྱུད་བཅས་སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ། དཀྱིལ་འཁོར་གྱི་ཡན་ལག་ཏུ་གྱུར་པ་རྣམ་སྣང་སྒྱུ་འཕྲུལ་དྲྭ་བ་དང་། དངོས་གྲུབ་སྒྲུབ་པའི་ཆ་རྐྱེན་ཆོ་གའི་ཡན་ལག་ཏུ་གྱུར་པ་འཕགས་པ་ཐབས་ཀྱི་ཞགས་པ་པད་མོ་ཕྲེང་བའི་དོན་བསྡུས་ཏེ་མ་ཚང་བ་ཁ་སྐོང་གི་རྒྱུད་ཕྱི་མ་གཉིས། ཐམས་ཅད་ཀྱི་བསྡུས་དོན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དཔལ་གསང་བའི་སྙིང་པོ་སྟེ་བཅོ་བརྒྱད་དུ་མཁས་པ་ཕལ་མོ་ཆེས་བཞེད་ཅིང་། དེ་དག་ནང་གསེས་སུ་དབྱེ་ན་རྩ་རྒྱུད་གསང་བ་སྙིང་པོ། རོལ་བ་མངོན་པར་བརྗོད་པ་ལྷ་མོ་སྒྱུ་འཕྲུལ། དཀྱིལ་འཁོར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་སྟོན་པ་སྒྱུ་འཕྲུལ་བཞི་བཅུ་པ། དབང་གཙོ་བོར་སྟོན་པ་སྒྱུ་འཕྲུལ་བླ་མ། ཡོན་ཏན་མཐར་ཕྱིན་པ་སྟོན་པ་སྒྱུ་འཕྲུལ་བརྒྱད་ཅུ་པ། སྡེ་སྣོད་ཡོངས་ལ་ཁྱབ་པར་སྟོན་པ་སྒྱུ་འཕྲུལ་དྲྭ་བ་ཆེན་པོ། དམ་ཚིག་གཙོ་བོར་སྟོན་པ་སྒྱུ་འཕྲུལ་ལེ་ལག་སྟེ་སྒྱུ་འཕྲུལ་སྡེ་བརྒྱད། གྲོལ་ལམ་སྟོན་པ་ཡེ་ཤེས་སྙིང་པོ། ཅིག་ཆར་སྟོན་པ་རྡོ་རྗེ་མེ་ལོང་། ཐབས་ལམ་རིམ་གྱིས་སྟོན་པ་རྡོ་རྗེ་ཐལ་པ། ཅིག་ཆར་སྟོན་པ་རྡོ་རྗེ་རྒྱ་མཚོ་སྟེ་བཤད་རྒྱུད་སྡེ་བཞི་ཞེས་གྲགས་ལ། དེ་ཡང་གསང་བའི་བདག་པོ་ལག་ན་རྡོ་རྗེས་རི་མ་ལ་ཡ་དྲག་ཤུལ་ཅན་གྱི་རྩེ་མོར་དམ་པའི་རིགས་ཅན་དྲྭ་མ་ལྔ་ལ་གསང་སྔགས་ཀྱི་ཆོས་འཁོར་བསྐོར་བའི་ཚེ། ས་ཧོ་རའི་རྒྱལ་པོ་ཛ་གསང་སྔགས་ཕྱི་རྒྱུད་ཀྱི་སྒྲུབ་པར་བཞུགས་པ་ལ་རྨི་ལྟས་ངོ་མཚར་བ་བདུན་བྱུང་སྟེ། ཇི་སྐད་དུ། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བགྲོ་བ་བྱེད་པ་དང་། །ཀུན་ཀྱིས་དམ་པར་བསྒྲགས་པ་དང་། །མཆོད་པ་ཆེན་པོ་བྱས་པ་དང་། །རིན་ཆེན་ཆར་དུ་བབ་པ་དང་། །སངས་རྒྱས་ས་ལ་ལུང་བསྟན་པའོ། །ཞེས་སོ། །དེ་ལ་རྒྱལ་པོ་ཛ་ནི་སྟོན་པས་མདོ་རྒྱུད་ཐམས་ཅད་ནས་ལུང་བསྟན་པའི་སྐྱེས་བུ་སྟེ། བདེ་མཆོག་སྡོམ་བྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་གྲངས་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛ་ཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོ་སྣང་བར་འགྱུར། །ཞེས་པ་དང་། དེ་དང་མཚུངས་པར་སྤྱི་མདོ་དགོངས་འདུས་ལས་ཀྱང་འབྱུང་ལ། རྒྱལ་པོ་ཛ་དེ་གང་ཡིན་ངོས་འཛིན་ཚུལ་སྣ་ཚོགས་སྣང་ཡང་སློབ་དཔོན་ཀུ་ཀུ་ར་ཛ་དང་དུས་མཚུངས་པས་ཨིནྡྲ་བྷུ་ཏི་བར་པ་ལ་བྱེད་དགོས་པ་འདྲ་ཞེས་སྔོན་གྱི་ལོ་རྒྱུས་སྨྲ་བ་སོགས་བཞེད། གང་ལྟར་རྒྱལ་པོ་དེ་ཉིད་རྒྱུད་སྡེ་འོག་མའི་རྣལ་འབྱོར་སྒོམ་ཞིང་བཞུགས་པའི་ཚེ་སྔར་གྱི་རྨི་ལྟས་དང་མཐུན་པར་རྒྱུད་སྡེའི་གླེགས་བམ་རྣམས་མི་ཡུལ་དུ་དངོས་སུ་བབ་པ་སྟེ། ཀྲི་ཡའི་རྒྱུད་རྣམས་ཝཱ་ར་ཎ་སིར་བབ། ཨུ་པ་ཡའི་རྒྱུད་རྣམས་རི་བོ་བྱ་རྐང་ཅན་དང་བསིལ་བའི་ཚལ་དུ་བབ། ཡོ་གའི་རྒྱུད་དུར་ཁྲོད་མེ་རི་འབར་བའི་རྩེར་བབ། མ་ཧཱ་ཡོ་གའི་རྒྱུད་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་དང་གསང་བའི་བདག་པོའི་སྐུ་ཁྲུ་གང་བ་གཅིག་བཅས་རྒྱལ་པོ་ཛ་ཉིད་ཀྱི་ཁང་སྟེང་དུ་བབ། ཨ་ནུ་ཡོ་གའི་རྒྱུད་རྣམས་ལངྐའི་གླིང་གི་རི་བོ་མ་ལ་ཡར་གླེགས་བམ་དང་བཅས་ཏེ་ཆར་བབ་པར་གྱུར་ཏོ། །དེ་ནས་གསོལ་བ་བཏབ་པས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ཤིང་དེ་དང་ཕྱག་ན་རྡོ་རྗེའི་སྐུ་ལ་བརྟེན་ནས་ཟླ་བ་བདུན་ལ་བསྒྲུབས་པས། རྡོ་རྗེ་སེམས་དཔའི་ཞལ་དངོས་སུ་མཐོང་ཞིང་ཡེ་ཤེས་ཀྱི་དབང་བསྐུར་བ་ཐོབ་པས་གླེགས་བམ་གྱི་དོན་མ་ལུས་པ་མཁྱེན་པར་གསུངས་ཏེ། ཉིད་ཀྱིས་མཛད་པའི་སྒྱུ་འཕྲུལ་ལམ་རྣམ་བཀོད་ལས། ཤར་ཕྱོགས་ཨིནྡྲའི་ལུང་པ་ནས། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྡྲ་བྷུ་ཏི་ངས། །གསང་བའི་བདག་པོས་མངོན་བསྟེན་པའི། །སྒྱུ་འཕྲུལ་དྲྭ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུལ་ནས་སྡིག་པ་མེད། །དེ་ནས་ས་ལ་རེག་པར་བྱས། །ཞེས་གསུངས། ལོ་རྒྱུས་འགའ་ཞིག་ཏུ་རྒྱལ་པོས་རྒྱུད་དོན་མ་ལུས་པ་མཁྱེན་པར་གྱུར་ཀྱང་ཕྱི་རབས་ཀྱི་གདུལ་བྱ་ལ་དགོངས་ནས་སློབ་དཔོན་ལ་མ་བསྟེན་པར་མི་རྟོགས་པའི་ཚུལ་གྱིས་སློབ་དཔོན་ཨུ་པ་རཱ་ཛ་ལ་བསྟེན་པས་བརྡ་དང་དོན་མ་མཇལ། དེ་ནས་ཟ་ཧོར་གྱི་ཡུལ་ན་མཁྱེན་པ་ཆེ་བར་གྲགས་པའི་སློབ་དཔོན་ཀུ་ཀུ་རཱ་ཛ་ལ་བསྟེན་པས་དེས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྡོར་སེམས་ལེའུ་རྟོགས་ཏེ་བསྒྲུབས་པས་རྡོ་རྗེ་སེམས་དཔས་ཞལ་བསྟན་ནས་རྒྱུད་དོན་ཡོངས་སུ་རྫོགས་པ་གསང་བདག་གིས་སྟོན་པ་འགྱུར་རོ་ཞེས་ལུང་བསྟན། དེ་ལྟར་སྒྲུབ་པ་མཛད་པས་གསང་བདག་དངོས་སུ་བྱོན་ཏེ་དོན་གྱི་བསྟན་པ་དང་ཐེག་པ་ཐམས་ཅད་རྫོགས་པའི་དབང་བསྐུར་ཞིང་ཚིག་གི་བརྒྱུད་པ་ལི་ཙ་བཱི་དྲི་མེད་གྲགས་པ་ལས་ཞུས་ཤིག་ཅེས་ལུང་བྱིན། སློབ་དཔོན་གྱིས་གསང་བདག་གི་བཀའ་ལྟར་རྒྱུད་སྡེ་ཆེན་པོ་བཅོ་བརྒྱད་དུ་ཕྱེས་ནས་རྒྱལ་པོ་ཛ་ལ་བསྟན་པར་མཛད་དོ་ཞེས་བྱུང་ངོ་། །རྒྱལ་པོ་འདིས་སྒྱུ་འཕྲུལ་ལམ་རྣམ་བཀོད་དང་། རིམ་པ་གཉིས་པ་ལ་སོགས་པ་མཛད་ཅིང་། གཞན་ཡང་བླ་མེད་ཀྱི་བསྟན་བཅོས་བདེ་མཆོག་རྩ་རྒྱུད་ཀྱི་འགྲེལ་པ་དང་། ཡེ་ཤེས་གྲུབ་པ། ལྷན་གཅིག་སྐྱེས་གྲུབ་སོགས་ཀྱང་མཛད། འཕགས་ཡུལ་གྱི་གྲུབ་ཆེན་རྣམས་ཀྱི་རྒྱུད་དང་གདམས་ངག་ཅི་རིགས་པ་ལས་ཕལ་ཆེར་རྒྱལ་པོའི་རིགས་ཀྱི་སློབ་དཔོན་འདི་ཉིད་ལས་བྱུང་བ་ཤས་ཆེ་སྟེ། གྲུབ་ཐོབ་བྱིས་པའི་ཞབས་སམ་ཛ་ལནྡྷ་རི་པ་ནས་ནག་པོ་པ་སློབ་ཚོགས་དང་བཅས་པ། དེ་བཞིན་ཏིལླི་པ་དང་ནཱ་རོ་པ་སློབ་ཚོགས་དང་བཅས་པ་ཐམས་ཅད་ཀྱང་བརྒྱུད་པའི་བཀའ་སྲོལ་འདི་ཉིད་ལས་བྱུང་བར་གྲགས་སོ། །
རྒྱལ་པོ་ཨིནྡྲ་བྷུ་ཏི་ཆེན་པོས་ཏནྟྲའི་རྒྱུད་སྡེ་རྣམས་སློབ་དཔོན་ཀུ་ཀུ་རཱ་ཛ་སྟེ་ཁྱིའི་རྒྱལ་པོ་ལ་བཤད་དེ། སློབ་དཔོན་འདི་ནི་ལོ་རྒྱུས་འགའ་ཞིག་ཏུ་ཀུ་ཏ་རཱ་ཛ་ཞེས་ཀྱང་འབྱུང་སྟེ་ཉིན་མོ་ཁྱིའི་རྣམ་པ་ཅན་གྱི་དཔའ་བོ་དང་རྣལ་འབྱོར་མ་སྟོང་ཕྲག་རེ་ལ་ཆོས་སྟོན་ཅིང་། མཚན་མོ་དེ་དག་དང་ལྷན་དུ་དུར་ཁྲོད་ཀྱི་གནས་སུ་གཤེགས་ནས་ཚོགས་ཀྱི་འཁོར་ལོ་ལ་སོགས་པ་དམ་ཚིག་གི་ཀུན་ཏུ་སྤྱོད་པ་ལ་གནས་ཤིང་། དེ་ལྟར་ལོ་བཅུ་གཉིས་སུ་སྤྱད་པས་མཐར་ཕྱག་རྒྱ་ཆེན་པོའི་དངོས་གྲུབ་བརྙེས་པ་ཡིན་ལ། ཡང་ཁ་ཅིག་གིས་སློབ་དཔོན་འདི་སྤྱོད་པར་གནས་པའི་ཚེ་ཨོ་རྒྱན་གྱི་ཡུལ་དུ་བྱོན་ནས་སླར་ཡང་རྒྱུད་སྡེ་ཆེན་པོ་བཅོ་བརྒྱད་ཀྱི་ནང་ནས་སངས་རྒྱས་མཉམ་སྦྱོར་ལ་སོགས་པའི་ནང་རྒྱུད་སྡེ་ལྔ་རྒྱ་ཆེར་བཤད་ཅིང་མཐར་ཟླ་གསང་ཐིག་ལེ་ལ་བརྟེན་ནས་མཆོག་གི་དངོས་གྲུབ་བརྙེས་པ་ཡིན་ནོ་ཞེས་ཀྱང་ཟེར། སློབ་དཔོན་འདི་ཉིད་ཀྱིས་མཉམ་སྦྱོར་ལ་རྩལ་དུ་བཏོན་ཞིང་། གསང་དོན་རྣམ་པར་དགོད་པ་དྲུག་དང་། དཀྱིལ་འཁོར་ཐམས་ཅད་ཀྱི་རྗེས་སུ་འཇུག་པའི་ཆོ་ག་ལྔ་པ་སོགས་བསྟན་བཅོས་དུ་མ་མཛད་དོ། །
སློབ་དཔོན་འདིས་ཤཱ་ཀྲ་པུ་ཏྲིའམ་ཨིནྡྲ་བྷུ་ཏི་ཆུང་བ་ལ་བཤད་པ་སྟེ། སློབ་དཔོན་འདི་ཉིད་ནི་ཕྱིས་སུ་གྲུབ་པ་བརྙེས་པའི་ཚེ་སློབ་དཔོན་ལྭ་བ་པར་གྲགས་པ་སྟེ། གསང་སྔགས་ཀྱི་སྒྲུབ་པ་ལ་བཞུགས་པའི་ཚེ་ཨོ་རྒྱན་ཡུལ་གྱི་མུ་སྟེགས་ཀྱི་མཁའ་འགྲོ་མ་རྣམས་ཀྱིས་མེ་ཏོག་གི་ཕྲེང་བ་གཏད་པ་ལག་ཏུ་བླངས་པས། ནང་པའི་མཁའ་འགྲོ་མ་རྣམས་ཀྱིས་བུ་ད་ནི་མ་ལེགས་ཀྱི་མུ་སྟེགས་ཀྱི་རྗེས་སུ་འཇུག་དགོས་པར་འགྱུར་རོ་ཟེར། དེར་སློབ་དཔོན་གྱིས་ཏིང་ངེ་འཛིན་བསྒོམས་ཤིང་བཞུགས་པས་ནམ་ཕྱེད་ཙམ་ན་མུ་སྟེགས་པའི་མཁའ་འགྲོ་རྣམས་ཀྱིས་རྡོ་ཆར་ཕབ་པ་བསྐྱེད་རིམ་གྱི་སྲུང་འཁོར་བསྒོམས་པས་མཚམས་ཚུན་ལ་མ་གནོད། ཡང་དུ་བསྐྱེད་རིམ་གྱི་ཕན་ཡོན་དེ་འདྲ་ན་རྫོགས་རིམ་གྱི་ནུས་པ་བསྟན་པར་བྱའོ་དགོངས་ནས་མཚན་མ་མེད་པའི་ཏིང་ངེ་འཛིན་ལ་གནས་པས་རྡོ་ཐམས་ཅད་ནམ་མཁའ་ལ་ཆགས་པ་དེང་སང་ཡང་སྒྲུབ་ཕུག་འདིའི་སྟེང་གི་ནམ་མཁའ་ལ་ཕ་ཝང་ཆེན་པོ་རྟེན་མེད་དུ་ཡོད་པ་དང་། བྲག་མེ་ལོང་ལྟར་འཇམ་པའི་ངོས་ལ་ཕ་ཝང་མང་པོ་ཆགས་པ་མངོན་སུམ་གྱི་སྤྱོད་ཡུལ་དུ་ཡོད་པར་གྲགས། ཡང་ལན་གཅིག་རྒྱལ་པོའི་ཕོ་བྲང་གི་སྒོ་དྲུང་དུ་ལོ་བཅུ་གཉིས་སུ་འོད་གསལ་ཐུན་གཅིག་གི་ངང་དུ་གཟིམས་པའི་ཚེ་སུ་ཞིག་སློབ་དཔོན་ལ་ཕྱག་མ་བྱས་པར་ཕྱིན་ན་བྱིན་པ་རེངས་འགྲོ་བ་བྱུང་བས་ཐམས་ཅད་ཀྱི་ཕྱག་བྱེད་དགོས་པ་བྱུང་། སྐབས་ཤིག་ཨོ་རྒྱན་གྱི་ཕྲ་མེན་ལྔ་བརྒྱས་བར་ཆད་བརྩམས་པར་འདོད་པ་ན་སློབ་དཔོན་གྱི་ཤུལ་དུ་ལྭ་བ་ཞིག་ལས་ཅི་ཡང་མི་འདུག ཀྱེ་མ་ནང་པའི་དགེ་སློང་འདིའི་སྒྱུ་མ་ལ་ལྟོས་རང་གི་ལུས་ལྭ་བར་བསྒྱུར་ནས་འདུག་ན་འདི་དུམ་བུར་བྱའོ་ཟེར་ནས་བགོས་ཏེ་ཟོས་སོ། །དེར་སློབ་དཔོན་གྱིས་ལུས་སྣང་བར་བྱས་ཏེ་དམོད་པ་བོར་བས་ཕྲ་མེན་ལྔ་བརྒྱ་པོ་ཐམས་ཅད་ལུག་མ་མོ་ལྔ་བརྒྱར་གྱུར། དེ་རྣམས་རྒྱལ་པོའི་དྲུང་དུ་ཕྱིན་ཏེ་དགེ་སློང་དུར་ཁྲོད་བདག་པོས་ངེད་ཅག་རྣམས་འདི་ལྟར་བྱས་པས་ལྷས་དགྲོལ་བའི་ཐབས་འཚལ་ལོ་ཞེས་ཟེར། རྒྱལ་པོས་སློབ་དཔོན་ལ་གསོལ་བས་སྐུ་གཅེར་བུར་བཞེངས་ཏེ་ཁྱོད་ཀྱི་སྔགས་འཆང་མ་རྣམས་ཀྱིས་དགེ་སློང་ལ་ནོར་ལྭ་བ་ཞིག་ཡོད་པ་ཟོས་པས་དེ་དག་ཁུག་ཅིག་གསུངས། དེེར་ཐམས་ཅད་བཀུག་པ་རེ་རེ་ལ་སྡིགས་མཛུབ་རེ་བསྟན་པས་མགོ་བརྙན་སྣ་ཚོགས་སུ་གྱུར་ནས་ལྭ་བའི་དུམ་བུ་སོ་སོར་བསྐྱུགས་པ་ཚེམ་བུ་བྱས་པས་ཅུང་ཟད་མ་འགྲིགས། ད་དུང་གསུམ་ཡོད་པ་ཁུག་ཅིག་གསུངས་པས། བཙུན་མོའི་འཁོར་གྱི་ནང་ན་གསུམ་ཡོད་པའང་བཀུག་ནས་སྔར་བཞིན་སྐྱུགས་སུ་བཅུག་པས་འགྲིགས་ནས་སྐུ་ལ་གསོལ་བས་རྗེ་བཙུན་ལྭ་བ་པར་གྲགས། དེ་བཞིན་སློབ་དཔོན་རོལ་བའི་རྡོ་རྗེ་ཐུན་མོང་གི་དངོས་གྲུབ་ཐོབ་པའི་སྐབས་ཤིག་ཨོ་རྒྱན་གྱི་ཡུལ་དུ་སློབ་དཔོན་འདི་དང་ལྷན་ཅིག་པར་བྱོན་པས་མུཎྜ་ཀ་ལར་རྫུ་འཕྲུལ་འགྲན་པའི་ལོ་རྒྱུས་སོགས་གྲུབ་པ་ཐོབ་པའི་རྟགས་སྐྱེ་བོ་རྣམས་ལ་བསྟན་པའི་ལོ་རྒྱུས་ཤིན་ཏུ་མང་། ཕྱིས་ཨོ་རྒྱན་གྱི་ཡུལ་དུ་རྒྱལ་པོ་དང་སློབ་དཔོན་གཉིས་ཆར་གྱིས་གདམས་པ་བསྟན་པས་ཐམས་ཅད་རིག་པ་འཛིན་པའི་ས་ལ་གཤེགས་པས་ཡུལ་སྟོང་བར་ཉེ་བར་གྱུར་སྐད་དོ། །
དེས་སེང་ཧ་རཱ་ཛ་ལ་བཤད་པས་འཁོར་ཚོམ་བུ་སྟོང་དང་བཅས་པ་རྡོ་རྗེ་འཆང་གི་སར་གཤེགས། དེས་ཨུ་པ་རཱ་ཛ་ལ་བཤད་དེ་འཁོར་ཚོམ་བུ་བརྒྱ་དང་། དེས་སྲས་མོ་གོ་མ་དེ་བཱི་ལ་བཤད་པས་འཁོར་ཚོམ་བུ་ལྔ་བཅུ་དང་བཅས་ཀུན་ཀྱང་ཟུང་འཇུག་རྡོ་རྗེ་འཆང་གི་སར་གཤེགས་པ་སྟེ། ལམ་རིམ་ལས། གསང་བའི་བདག་པོ་མངོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང་། །མི་ལས་སྐལ་ལྡན་འདུས་པ་ལ། །དབང་པོའི་ཇི་ལྟར་ལུང་བསྟན་དུས། །རྒྱལ་བུ་རིགས་ཅན་ལྟས་ཤར་བ། །འབྲེལ་བས་སྣང་བ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་བསྒྲུབས། །བསྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་ནས་འགྲུབ། །སྨོན་པའི་ལྷ་དང་དེ་རུ་མཇལ། །དེ་ནས་རྡོ་རྗེ་གདན་སྟེང་གི །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་རིན་ཆེན་དམ་པ་དེར། །བཀྲ་ཤིས་པ་ཡི་ལྷ་ཁང་དུ། །ཀུ་ཀུ་རཱ་ཛ་ཨིནྡྲ་བོ། །སིངྷ་ཨུ་པ་རཱ་ཛ་དང་། །སྲས་མོ་གོ་མ་དེ་བཱི་སོགས། །སྒྱུ་འཕྲུལ་དྲྭ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་གསུངས་སོ། །སྲས་མོ་གོ་མ་དེ་བཱིས་རྒྱལ་པོ་ཀུ་ཀུ་རཱ་ཛ་ལ་བཤད་དེ་འདི་ལ་ཀུ་ཀུ་རཱ་ཛ་ཕྱི་མ་ཞེས་གྲགས། དེས་སློབ་དཔོན་སྒེག་པ་རྡོ་རྗེ་དང་། རོ་ལངས་བདེ་བའི་དངོས་གྲུབ། དྲང་སྲོང་བྷཱ་ཥི་ཏ། ནཱ་ག་རྫུ་ན་བཞི་ལ་བཤད་ཅིང་། སློབ་དཔོན་སྒེག་པ་རྡོ་རྗེ་ནི། ཡུལ་ཥམ་ཥར་ཞེས་པར་སྐུ་འཁྲུངས་ཤིང་ཨོ་རྒྱན་གྱི་གནས་སུ་རབ་ཏུ་བྱུང་བའི་མཚན་ལ་དཔལ་ལྡན་བྱང་ཆུབ་མཆོག་གི་སྐལ་བ་དང་ལྡན་པ་ཞེས་གྲགས། སྡེ་སྣོད་གསུམ་ལ་སྦྱངས་ཤིང་ཐོགས་མེད་ལུགས་ཀྱི་གྲུབ་མཐའ་ལ་ལྷག་པར་དུ་མཁས། ཨོ་རྒྱན་ཡུལ་གྱི་གླིང་ཕྲན་མ་དྷིམ་ཞེས་བྱ་བར་འཇམ་དཔལ་སྒྲུབ་སྐབས་བྲིས་སྐུའི་ཞལ་ནས་འོད་ཟེར་བྱུང་སྟེ་གླིང་དེར་ཡུན་རིང་སྣང་བས་ཉི་མ་དང་འདྲ་བ་ཞེས་བྱ་བར་མཚན་གསོལ། ལྟ་བ་ལོག་པ་ཞིག་བཀྲོང་དུ་འོངས་པ་ན་གླང་པོ་ཆེ་དང་། རྟ་དང་། ཁྱེའུ་དང་། བུ་མོ་དང་། མ་ཧེ་དང་། རྨ་བྱ་སོགས་སྣ་ཚོགས་པའི་གཟུགས་སུ་སྣང་བར་མཛད་པས་སྣ་ཚོགས་གཟུགས་ཅན་ཞེས་མཚན་དུ་གྲགས། སྐུ་ཚེའི་སྨད་དུ་ཨོ་རྒྱན་གྱི་ཡུལ་དུ་འགྲོ་བའི་དོན་རྒྱ་ཆེན་མཛད་པ་དང་། ནཱ་ལེནྡྲར་ཡང་ལོ་བཅུར་བཞུགས་ནས་གསང་སྔགས་ཀྱི་བསྟན་པ་སྤེལ། སློབ་དཔོན་འདི་རྒྱུད་སྡེ་སྤྱི་དང་ཁྱད་པར་སྒྱུ་འཕྲུལ་དྲྭ་བ་ལ་མཁས་ཤིང་གྲུབ་པ་བརྙེས་པས། མཚན་ཡང་དག་པར་བརྗོད་པ་བླ་མེད་ལུགས་སུ་བཀྲལ་བའི་ཊཱི་ཀ་དང་། དགྱེས་པ་རྡོ་རྗེའི་རྫོགས་རིམ་ཐིག་ལེ་ཆེན་པོའི་རིམ་པ། འདུས་པ་ལ་རྒྱུད་ཀྱི་བཤད་པ་བླ་མའི་མན་ངག་གིས་བཤད་པ། ལྷན་སྐྱེས་སྒྲུབ་ཐབས་སོགས་རྒྱུད་གཞན་དང་། གསང་སྙིང་འགྲེལ་པ་རིན་ཆེན་སྤར་ཁབ་དང་། ཐུགས་ཐིག དམ་ཚིག་གསལ་བཀྲ། རིམ་པ་དྲུག་པ། ཕྲ་རྒྱས་སོགས་སྒྱུ་འཕྲུལ་སྐོར་གྱི་བསྟན་བཅོས་མང་དུ་མཛད་ནས་མཐར་རྡོ་རྗེའི་སྐུ་བརྙེས་སོ། །
སྒེག་པས་སངས་རྒྱས་གསང་བ་ལ་བཤད་པ་སྟེ་སློབ་དཔོན་འདི་ཉིད་ནི། རྒྱ་གར་ཡུལ་དབུས་སུ་སྐུ་འཁྲུངས་ཤིང་ནཱ་ལེནྡྲར་རབ་ཏུ་བྱུང་། སྐུ་ཚེའི་སྟོད་དུ་སློབ་དཔོན་སངས་རྒྱས་ཡེ་ཤེས་བླ་མར་བསྟེན། ཝཱ་ར་ཎཱ་སིའི་གནས་ཤིག་ཏུ་འཇམ་དཔལ་བསྒྲུབས་པས་བྲིས་སྐུ་བཞད་ཅིང་དངོས་གྲུབ་ཀྱི་རྫས་བ་དམར་གྱི་མར་ཁུ་ཡང་ཁོལ། མེ་ཏོག་རྙིང་པ་རྣམས་ཀྱང་ཁ་འབུས་པས་གྲུབ་པའི་རྟགས་སུ་མཁྱེན་ཞིང་། ཐོག་མར་མེ་ཏོག་འབུལ་ལམ་མར་ཁུ་གསོལ་སྙམ་པའི་ཐེ་ཚོམ་གྱི་ངང་དུ་ཅུང་ཟད་ལུས་པ་ན་གནོད་སྦྱིན་མོ་ཞིག་གིས་བར་ཆད་བརྩམས་ནས་སློབ་དཔོན་གྱི་འགྲམ་པར་ཐལ་ལྕགས་བསྣུན་པས་ཅུང་ཟད་བརྒྱལ། སངས་ཙ་ན་བྲིས་སྐུ་རྡུལ་གྱིས་གོས། མེ་ཏོག་རྙིང་། མར་ཁུ་ཡང་སར་བོ་བ་གཟིགས། འོན་ཀྱང་རྡུལ་ཕྱིས། མེ་ཏོག་དབུ་ལ་ཕུལ། མར་ཁུ་གང་ཡོད་གསོལ་བས་སྐུ་ལུས་ནད་ཐམས་ཅད་དང་བྲལ་ཏེ་སྟོབས་དང་གཟི་བརྗིད་ལྡན་པ། བློ་ཤིན་ཏུ་རྣོ་ཞིང་མངོན་པར་ཤེས་པ་ལ་དབང་འབྱོར་བ་བྱུང་། དེ་སྐབས་ཨོ་རྒྱན་ཡུལ་དུ་བྱོན་པས་སློབ་དཔོན་སྒེག་པ་རྡོ་རྗེ་དང་མཇལ། རྣལ་འབྱོར་རྒྱུད་དང་བླ་མེད་ནང་རྒྱུད་སྡེ་ལྔ་གསན་ཞིང་ཁྱད་པར་སྒྱུ་འཕྲུལ་ལ་མཁས། དུས་གཞན་ཞིག་ཏུ་སངས་རྒྱས་ཞི་བ་དང་མཉམ་དུ་རི་བོ་ཏ་ལར་འཕགས་པ་སྤྱན་རས་གཟིགས་མཇལ་བར་བྱོན་པས། རིའི་རྩ་བར་འཕགས་མ་སྒྲོལ་མས་ཀླུའི་ཚོགས་ལ་ཆོས་སྟོན་པ་དང་། སྐེད་པར་ཁྲོ་གཉེར་ཅན་མས་ལྷ་མ་ཡིན་དང་གནོད་སྦྱིན་གྱི་ཚོགས་ལ་ཆོས་སྟོན་པ་དང་། རྩེ་མོར་འཕགས་པ་མངོན་སུམ་དུ་བཞུགས་པ་ཡང་རང་རང་གི་སྣང་བ་དང་མཐུན་པར་མཇལ། དེར་སངས་རྒྱས་གསང་བས་ཞབས་ས་ལ་མི་རེག་པ་སོགས་ཀྱི་དངོས་གྲུབ་ཀྱང་བརྙེས། འཕགས་མ་སྒྲོལ་མས་རི་ཁ་བ་ཅན་གྱི་གངས་ཏི་སེར་སོང་ལ་སྒྲུབ་པ་གྱིས་ཞེས་ལུང་བསྟན། ཚུར་སླེབས་ནས་ཝཱ་རཱ་ཎཱ་སི་སོགས་སུ་ལོ་མང་པོར་ཆོས་བཤད། སླར་ཡང་འཕགས་པ་འཇམ་དཔལ་གྱིས་སྔར་སྒྲོལ་མས་ལུང་བསྟན་པ་ལྟར་བསྐུལ་བས། གངས་རི་ཏི་སེར་བྱོན་ནས་སྒྲུབ་པ་མཛད་པས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལན་གྲངས་དུ་མར་གཟིགས་ཤིང་འཇམ་དཔལ་དབྱངས་མི་དང་མི་ལབ་པ་བཞིན་དུ་གྱུར། འདི་དུས་བོད་ཀྱི་རྒྱལ་པོ་ལ་ཆོས་སྐྱེས་བསྐུར་བར་མཛད་པ་སོགས་བོད་ཡུལ་ལའང་བཀའ་དྲིན་དང་ཕྲིན་ལས་རྒྱ་ཆེ། སློབ་དཔོན་འདིས་གསང་བ་སྙིང་པོའི་འགྲེལ་པ་རྣམ་དབྱེ་འགྲེལ་དང་། རྡོ་རྗེ་ལས་རིམ་དང་། དཀྱིལ་འཁོར་ཆོས་དོན། དམ་པ་རྒྱན། དྲྭ་ཆེན་དྲྭ་ཆུང་། ལམ་རིམ་ཆེ་ཆུང་། ཞི་ཁྲོའི་མངོན་པར་རྟོགས་པའི་རིམ་པ་རྣམས་དང་། རྣལ་འབྱོར་རྒྱུད་ལའང་རྡོ་རྗེ་དབྱིངས་ཀྱི་སྒྲུབ་ཐབས་ཡོ་ག་ལ་འཇུག་པ་དང་། རྣམ་སྣང་མངོན་བྱང་གི་བསྡུས་འགྲེལ། བསམ་གཏན་ཕྱི་མའི་རྒྱས་འགྲེལ་སོགས་མཛད་ནས་མཐར་སྐུ་ལུས་མི་སྣང་བར་རིག་འཛིན་གྱི་སར་གཤེགས་སོ། །
རོ་ལངས་བདེ་བས་རྡོ་རྗེ་བཞད་པ་སྟེ་དགའ་རབ་རྡོ་རྗེ་ལ་བཤད། དེ་དང་དྲང་སྲོང་བྷཱ་ཥི་ཏ་གཉིས་ཀྱིས་ཟ་ཧོར་གྱི་རྒྱལ་པོ་པྲ་བྷ་ཧསྟི་ལ་བཤད་པ་སྟེ་སློབ་དཔོན་འདི་ཉིད་ནི། རྒྱ་གར་ནུབ་ཕྱོགས་ཀྱི་རྒྱལ་རིགས་སུ་སྐུ་འཁྲུངས། ཙི་ཏ་བ་རིའི་ཡུལ་གྱི་སློབ་དཔོན་ཞི་བ་འོད་དང་། མ་རུའི་ཡུལ་གྱི་འདུལ་འཛིན་ཆེན་མོ་བསོད་ནམས་གྲགས་པ་ལས་རབ་ཏུ་བྱུང་ཞིང་མཚན་ཤཱཀྱ་འོད་དུ་གྲགས། སྡེ་སྣོད་གསུམ་ཀ་ལ་མཁས་པར་སྦྱངས་ཤིང་སློབ་དཔོན་རྡོ་རྗེ་བཞད་པ་སོགས་སྔགས་ཀྱི་རྡོ་རྗེ་འཛིན་པ་ཆེས་མང་བར་བསྟེན་ནས་རྒྱུད་སྡེ་ཐམས་ཅད་ཐུགས་སུ་ཆུད་ཅིང་མཆོག་གི་དངོས་གྲུབ་བརྙེས་པར་གྲགས། སྔགས་སུ་ཞུགས་པའི་མཚན་ལ་གླང་པོའི་འོད་དེ་པྲ་བྷ་ཧསྟི་ཞེས་འབྱུང་། སློབ་དཔོན་འདིའི་སློབ་མ་ཤཱཀྱ་བཤེས་གཉེན་གྱིས་རྣལ་འབྱོར་གྱི་རྒྱུད་དེ་ཁོ་ན་ཉིད་བསྡུས་པའི་འགྲེལ་བ་ཀོ་ས་ལའི་རྒྱན་ཞེས་བྱ་བ་བརྩམས། སློབ་དཔོན་འདི་གཉིས་ཀ་ཁ་ཆེར་བྱོན་ནས་འགྲོ་དོན་རྒྱ་ཆེན་བྱུང་བ་དང་། སློབ་དཔོན་ཆེན་པོ་པདྨ་སམྦྷ་ཝས་ཀྱང་འདི་ལས་རིང་བརྒྱུད་ཀྱི་ཚུལ་དུ་གསན་པར་མཛད་ཅིང་། སློབ་དཔོན་ཆེན་པོ་ལ་རྒྱལ་པོ་ཛ་ཉིད་ལས་གསན་པའི་ཉེ་བརྒྱུད་ཀྱང་བཞུགས། སློབ་དཔོན་སངས་རྒྱས་གསང་བས་ཀྱང་འདི་ལས་གསན་པར་གྲགས་ཤིང་། སྒེག་པ་རྡོ་རྗེ་དང་སངས་རྒྱས་གསང་བ་གཉིས་ལས་སློབ་དཔོན་བཱི་མ་ལས་གསན་ནས་སྙིང་འགྲེལ་ཁོག་གཞུང་གསལ་སྒྲོན་ཡང་མཛད། སློབ་དཔོན་དགའ་རབ་རྡོ་རྗེ་དང་། པཎ་ཆེན་བཱི་མ་མི་ཏྲ། པདྨ་སམྦྷ་ཝ་བཅས་ཀྱི་རྣམ་ཐར་འོག་ཏུ་རྫོགས་པ་ཆེན་པོ་གསང་བ་སྙིང་ཐིག་གི་བརྒྱུད་ཚུལ་རྒྱས་པར་བཤད་པའི་སྐབས་སུ་འབྱུང་ཞིང་། གཞན་ཡང་ནཱ་གརྫུ་ནས་སློབ་དཔོན་ཧཱུྃ་ཀ་ར་དང་། དགའ་རབ་རྡོ་རྗེས་ཤྲཱི་སེང་ཧ་ལ་བཤད་པར་མཛད་པ་བཅས་འཕགས་ཡུལ་དུ་བརྒྱུད་པའི་ཆུ་འགོ་མི་འདྲ་བ་དུ་མ་བཞུགས་ཀྱང་བོད་དུ་གཉགས་གནུབས་ཟུར་གསུམ་ལ་བཀའ་བབ་ནས་ཆུ་བོ་གཅིག་འདྲེས་སུ་གྱུར་པའི་བཀའ་སྲོལ་ད་ལྟའི་བར་ཇི་ལྟར་བཞུགས་ཚུལ་འོག་ཏུ་གངས་རིའི་ལྗོངས་སུ་རྒྱལ་བསྟན་དར་ཚུལ་བཤད་པའི་ཚོམས་སུ་སྤྲོ་བར་འདོད་པས་འདིར་མ་སྨྲོས་སོ། །