རྫོགས་ཆེན་ལྟ་མགུར་གྱི་འགྲེལ་བ།
༄༅། །མི་ཕམ་འཇམ་པའི་དབྱངས་ཀྱི་རྫོགས་ཆེན་ལྟ་བའི་ཉམས་མགུར་སྒྲ་སྙན་གྱི་རོལ་མོའི་འགྲེལ་བ་ཟབ་དོན་སྣང་བའི་སྤྲིན་ཕུང་བཞུགས་སོ། །
༄༅། །ན་མོ་གུ་རུ་པདྨ་ཀ་ར་ཡེ། རིགས་ཀུན་ཁྱབ་བདག་རང་བྱུང་མཚོ་སྐྱེས་རྗེ། །པདྨ་འབྱུང་གནས་གྲགས་པའི་མགོན་དེ་དང་། །གཉིས་སུ་མ་དམིགས་དྲི་མེད་རིག་པའི་གཏེར། །འདྲེན་མཆོག་ལེགས་པའི་བློ་གྲོས་སྙིང་དབུས་རོལ། །རང་གནས་ཡེ་ཤེས་དགོངས་པའི་གསང་མཛོད་ལས། །རང་བྱུང་རྩོལ་བྲལ་སྙིང་པོ་
ལྟ་བའི་མགུར། །འདི་ཡི་ཚིག་དོན་ཅུང་ཟད་འགྲེལ་པ་ལ། །བླ་མ་ལྷག་པའི་ལྷ་ཡིས་གནང་བ་རྩོལ། །དེ་ལའང་རྗེ་བཙུན་འཇམ་པའི་རྡོ་རྗེ་ངུར་སྨྲིག་གར་གྱི་རྣམ་པར་རོལ་པ་འཇམ་པའི་དབྱངས་མི་ཕམ་རྣམ་པར་རྒྱལ་བའི་ཐུགས་ཡེ་ཤེས་ཀྱི་དགོངས་པའི་གསང་མཛོད་ལས་རང་བྱུང་རྡོ་རྗེའི་ཚིག་ཏུ་རང་ཤར་བ་རྫོགས་ཆེན་
གྱི་ལྟ་མགུར་ཟབ་མོ་འདི་ཡི་དོན་ཅུང་ཟད་འཆད་པར་བྱེད་པ་ལ། ཐོག་མཐའ་བར་དུ་དགེ་བ་གསུམ་ལས། དང་པོ་ལ། མཚན་བསྟན་པ། མཆོད་པར་བརྗོད་པ། དམ་བཅའ་བ་དང་གསུམ་ལས། དང་པོ་ནི། འོད་གསལ་རྫོགས་པ་ཆེན་པོའི་ཀ་དག་ཁྲེགས་ཆོད་ཀྱི་ལྟ་བའི་གནད་གསང་ཐུན་མོང་མ་ཡིན་པ་གབ་སྦས་མེད་པར་རྗེན་པར་སྟོན་པའི་
ཉམས་མགུར་ཟབ་མོ་སྐལ་ལྡན་གྱི་ཡིད་གསང་ལམ་དུ་འགུགས་བྱེད་གྲགས་སྟོང་སྐྱེ་བ་མེད་པའི་སྒྲ་སྙན་གྱི་རོལ་མོ་ཞེས་བྱ་བ་བཞུགས་སོ། །ཞེས་དཔེ་དོན་ཟུང་འབྲེལ་གྱི་སྒོ་ནས་མཚན་བཏགས་པའོ། །གཉིས་པ་ནི། སེམས་ཉིད་སྐྱེ་བ་མེད་པ་འོད་གསལ་ཆོས་ཀྱི་སྐུ་སྤྲོས་པའི་མཐའ་ཐམས་ཅད་དང་བྲལ་བའི་གནས་
ལུགས་དོན་གྱི་ཀུན་བཟང་ཇི་བཞིན་རྗེན་པ་རུ་ངོ་འཕྲོད་པར་བྱེད་པའི་མཚན་ལྡན་གྱི་བླ་མ་དམ་པ་བཀའ་དྲིན་འཁོར་མཐའ་མེད་པ་དེ་ཉིད་མི་ཕྱེད་སྙིང་གི་དབུས་སུ་འབྲལ་བ་མེད་པར་རྟག་པར་བཞུགས་ཤིག །ཅེས་གུས་པས་མཆོད་པར་བརྗོད་པའོ། །གསུམ་པའི། རིག་སྟོང་ཟུང་འཇུག་རང་བྱུང་རྫོགས་པ་ཆེན་པོའི་གནད་གསང་རྩོལ་བྲལ་ཆོས་ཉིད་ཀྱི་གནས་ཚུལ་དེ་གཞནནས་བཙལ་མ་དགོས་པར་ཡེ་ནས་རང་གི་རྒྱུད་ལ་རང་ཆས་ཀྱི་ཚུལ་དུ་བཞུགས་པ་ལ་བསམས་ནས། ཤིན་ཏུ་ངོ་མཚར་ཞིང་དགའ་བའི་དབང་གིས་ལྷུན་མཉམ་ཁྱབ་བརྡལ་གྱི་དགོངས་པ་ཇི་ལྟར་ཐུགས་ལ་འཁྲུངས་པ་དེའི་དོན་བཅས་བཅོས་མེད་པར་ཐོལ་བྱུང་གི་ཚིག་གསུམ་རེ་སྨྲའོ་ཞེས་གསུངས་ཏེ། དེ་ལ་ཚིག་གསུམ་རེ་ཞེས་པ་ཉུང་ངུ་འགའ་ཞིག་བརྗོད་པའི་དོན་ཡིན་གྱི་གྲངས་གསུམ་དུ་ངེས་པ་བགྲང་མི་དགོས་ཏེ། པད་
མ་ལ་འདབ་བརྒྱད་ཟེར་བ་བཞིན་ནོ། །གཉིས་པ་བར་དུ་དགེ་བ་གཞུང་གི་དོན་ལ། སྔོན་འགྲོ་སེམས་ཀྱི་ཁང་བུ་བཤིགས་པའི་མན་ངག་གི་གཏན་ལ་ཕབས་ཚུལ། དངོས་གཞི་རང་བྱུང་གི་རིག་པ་སྒྲིབ་མེད་མངོན་སུམ་དུ་མཐོང་ཚུལ། དེ་ཡི་ལམ་གཞན་དང་མཐུན་པ་དང་མི་མཐུན་པའི་ཚུལ་བཤད་པ། དེ་ལྟར་མཐོང་བས་བློ་བདེ་བའི་ཉི་མ་ཁོང་ནས་འཆར་ཚུལ་དང་བཞིའོ། །དང་པོ་ལ། མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་ནི། དཔལ་མདའ་བསྣན་ཞབས་ཀྱིས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བ་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་པ་ལྟར་རིག་ཤེས་དྲི་མ་མེད་པའི་སེམས་ཉིད་ཆོས་ཐམས་ཅད་ཀྱི་གནས་ལུགས་
འོད་གསལ་རྫོགས་པ་ཆེན་པོ་ནི་འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་གཞིར་གྱུར་ཅིང་ཡིན་ལུགས་ཚུལ་བཞིན་དུ་ཤེས་ན་ལམ་དང་འབྲས་བུའི་ཡོན་ཏན་ཐམས་ཅད་རྩོལ་མེད་དུ་འབྱུང་བས་དཔེ་ཡིད་བཞིན་ནོར་བུ་དང་འདྲ་བ་དེ་ཡེ་ནས་རང་དང་ལྷན་ཅིག་སྐྱེས་པའི་ཚུལ་དུ་སྐད་ཅིག་ཙམ་ཡང་འབྲལ་མེད་དུ་འགྲོགས་པའི་དོན་ལ་སྟོར་བྲལ་མེད་ཀྱང་གནས་སྐབས་འཁྲུལ་རྟོག་སྣ་ཚོགས་པའི་གཟེབ་ཏུ་ཆུད་དེ་ཡུལ་རིང་པོ་འཁོར་བ་ཐོག་མེད་ནས་ད་ལྟའི་བར་དུ་ཡིན་ལུགས་ཇི་བཞིན་ངོ་མ་ཤེས་པས་སྟོར་བྲལ་དུ་སོང་བའི་ལྟ་བ་འཚོལ་མཁན་གྱི་སེམས་ལྡན་ཟག་མེད་མྱ་ངན་ལས་འདས་པའི་ཆོས་ཀྱིས་དབུལ་ཞིང་ཕོངས་ཏེ་འཇིགས་རུང་སྲིད་པའི་གནས་སུ་འཁྱམས་པ་ངས་ཅི་ཞིག་ལྟར་ཏེ་སྟབས་ལེགས་སྟེས་དབང་གིས་རང་བྱུང་ལྷན་སྐྱེས་ཀྱི་ཆོས་སྐུའི་རང་ཞལ་བརྗོད་དུ་མེད་པའི་
དོན། སྔར་མཇལ་མ་མྱོང་བ་དེ་ད་ལྟ་དཔལ་ལྡན་བླ་མའི་དྲིན་དང་རང་གི་དཔྱད་སྟོབས་ཀྱིས་མཇལ་ལ་ཁད་དུ་སྣང་ཞེས་གསུངས་སོ། །གཉིས་པ་རྒྱས་པར་བཤད་པ་ལ། དང་པོའི་སྐབས་སུ་ལ་ཟླ་གཙོ་བོར་བྱས་ཏེ་རང་སེམས་མཐའ་བྲལ་ཙམ་ལ་ཡིད་ཀྱིས་ཐག་བཅད་ཚུལ། རེས་འགའ་ཤན་འབྱེད་ཀྱི་རིག་པ་རྩལ་སྣ་ཚོགས་སུ་འཆར་བ་འདི་ཕན་གནོད་ཆེ་སྙམ་དུ་བསམ་ཚུལ། དེ་ལས་ཅུང་གོམས་པ་ན་ལ་ཤན་གཉིས་ཀྱི་རྙེད་དོན་མི་འགལ་བའི་འཁྲིད་ཚུལ་ལོ། །དང་པོ་ནི། རྣམ་རྟོག་བཟང་ངན་གང་ཤར་ཐམས་ཅད་ལ་ཤར་དུས་ཉིད་དུ་དང་པོ་གང་ནས་བྱུང་བར་གང་ན་གནས། ཐ་མར་འགྲོ་དང་། དབྱིབས་ཁ་དོག་སོགས་ཡོད་མེད་བརྟགས་ཏེ་ཐུགས་འཕྲད་ཁྲེགས་ཆོད་ཀྱི་ཚུལ་དུ་ཤེས་རབ་རིག་པའི་རལ་གྲི་མཚོན་རྣོན་པོ་དང་འདྲ་བ་དེ་ཉིད་ཐད་ཀ་
ཐོལ་བྱུང་གི་སེམས་དང་སེམས་བྱུང་འགྱུ་དྲན་གྱི་སྣ་ཚོགས་པ་དེ་ལ་གཅིག་ཅར་དུ་བཏབ་པས། དེའི་ཚེ་ན་བྱུང་ས་བྱུང་མཁན་གནས་ས་གནས་མཁན་དབྱིབས་དང་ཁ་དོག་སོགས་གང་ཡང་མ་རྙེད་ཅིང་དེ་ཡིན་འདི་ཡིན་གྱི་ངོས་བཟུང་དང་བྲལ་བ་ཙམ་ཞིག་འདུག་པ་དེ་ཡི་ངོ་བོ་རྒྱུན་དུ་མ་བརྗེད་པར་བསྐྱང་རྒྱུ་དེ་རྫོགས་ཆེན་ཀ་དག་གི་ལྟ་བ་ཡང་དག་པ་ཨེ་ཡིན་སྙམ་མོ་ཞེས་གསུངས་སོ། །དེའི་ཤུགས་ལ་མཐའ་བྲལ་གོ་ཡུལ་ཙམ་ལ་བློ་ཐེ་ཚོམ་དང་བཅས་ཏེ་ཞུགས་པ་ལས་དང་པོ་པའི་དུས་སུ་དགེ་སྡིག་གི་ཕན་གནོད་མེད་དོ་སྙམ་དུ་ལྟ་བ་ཁར་ཁྱེར་དང་རྒྱུ་འབྲས་ཁྱད་བསད་ཀྱིས་ལྟ་བའི་ཕྱོགས་སུ་སྤྱོད་པ་ཤོར་བའི་ཐུགས་འཕྲད་ཅུང་ཟད་ཡོད་པས་གཟབ་དགོས་ཞེས་པའི་གདམས་པའང་གནང་སྙམ་སྟེ། ཡིད་བཞིན་རིན་པོ་ཆེའི་མཛོད་ལས། འདི་དག་ཐམས་ཅད་དོན་ལ་མེད་ན་ཡང་། །གཟུང་
འཛིན་དབང་གིས་རྟེན་འབྲེལ་སྣ་ཚོགས་སྣང་། །ཇི་སྲིད་གཟུང་འཛིན་དབྱིངས་སུ་མ་ནུབ་བར། །རྒྱུ་འབྲས་ལས་ཡོད་དེ་ཡིས་སྤྲུལ་པ་སྟེ། །སེམས་ཀྱི་ལས་ཡོད་སེམས་ཀྱིས་ལས་ཀུན་བྱེད། །སེམས་ལ་སྣང་ཞིང་སེམས་ཀྱིས་བརྟག་པས་ན། །འཁྲུལ་པའི་སེམས་འདུལ་སླད་དུ་འབད་པར་མཛོད། །ཅེས་གསུངས་པ་ལྟར། གཟུང་འཛིན་ཀུན་རྟོག་གི་འཇུག་པ་ཐམས་ཅད་དབྱིངས་སུ་མ་ནུབ་བར་དགེ་སྡིག་རྒྱུ་འབྲས་ཐམས་ཅད་བསླ་མེད་དུ་ཡོད་པས་ཆོས་ཐམས་ཅད་གང་ལ་ཡང་མ་ཞེན་པར་གང་དུ་ཡང་མི་འགོག་པའི་ཐབས་ཤེས་ཟུང་འཇུག་གི་ལས་ལ་འབད་པ་ཅི་ནས་གལ་ཆེའོ། །གཉིས་པནི། ཕྱི་གཟུང་བའི་ཡུལ་དངནང་འཛིན་པས་བསྡུས་པའི་ཆོས་སྣ་ཚོགས་སུ་སྣང་བ་འདི་ཐམས་ཅད་སེམས་ལས་བྱུང་ཞིང་སེམས་ཉིད་ཡེ་ནས་སངས་རྒྱས་པའི་རིག་པ་སྐུ་
གསུམ་གྱི་བདག་ཉིད་ཅན་དུ་བཞུགས་པས་གཟུང་འཛིན་ཐམས་ཅད་རིག་པའི་རང་རྩལ་ལས་མ་འདས་པ་དང་། ཁམས་གསུམ་བདེ་སྡུག་མཐོ་དམན་སྐྱེ་འཆི་འཕོ་འགྱུར་དུ་སྣང་བ་འདི་ཐམས་ཅད་ཀྱང་རིག་པའི་རྒྱ་མཚོ་ལྟ་བུ་ཙམ་ལས་ཤར་བའི་ཆུའི་རྦ་རླབས་ལྟ་བུ་ཡིན་པས་སྣང་སྲིད་འཁོར་འདས་ཐམས་ཅད་དོན་ལ་བཟང་ངན་མེད་པར་ཡེ་ནས་ལྷུན་མཉམ་ཁྱབ་བརྡལ་གྱི་ཀློང་ནས་ནམ་ཡང་གཡོ་བ་མེད་ནའང་། དེ་འོན་ཀྱང་མཆོག་དམན་མེད་པའི་འགྲོ་བ་སེམས་ཅན་ཐམས་ཅད་ཀྱི་སེམས་ལ་ཏིལ་ལ་ཏིལ་མར་བཞིན་ཁྱབ་པའི་གཤིས་འཁྲུལ་བ་མེད་པའི་རིག་པ་ཟང་ཀ་མ་འདིས་དེ་སྔ་ཡན་ཆད་ཁོ་བོ་ཅག་འགྲོ་བ་རིགས་དྲུག་གི་སེམས་ཅན་ཐམས་ཅད་འཁོར་བའི་སྡུག་བསྔལ་ལས་མ་སྐྱོབ་པར་སྲིད་པ་མེ་འོབ་ལྟ་བུའི་ནང་དུ་ལུས་ཤིང་ཡིན་ལུགས་ངོ་མ་ཤེས་པའི་འཁྲུལ་སེམས་སྐད་ཅིག་
ཀྱང་མི་སྡོད་པར་གཡོ་བ་མི་དྲན་དགུ་དྲན་སེམས་འདིས་ཕན་གནོད་བྱེད་པ་འདིཁོ་ན་རང་ཆོས་ཉིད་ཟད་པའི་སར་མ་ཕྱིན་གྱི་བར་དུ་ཐུན་མོང་གི་ཆོས་སྤྱོད་དང་བསྐྱེད་རྫོགས་ཀྱི་བཟླས་བསྒོམས་སོགས་མཚན་བཅས་ཀྱི་སྤྱོད་པའི་བརྩིས་སུ་བྱས་པའི་སྒོ་ནས་བདག་འཁོར་བ་ལས་སྐྱོབ་པར་རེའོ་ཞེས་གསུངས་ཏེ། འདིནི་རྩོལ་མེད་རང་བཞག་གི་དགོངས་པས་ཡིད་མ་ཚིམ་པར་རྒྱ་འབྲས་ལ་ཆེད་དུ་བརྩིས་སུ་བྱས་པས་སྤྱོད་པའི་ཕྱོགས་སུ་ལྟ་བཤོརནས་ལྟ་བ་མ་མཐོང་བས་སྤྱོད་པ་ལམ་དུ་ཁྱེར་མ་ནུས་པ་ལྟ་སྤྱོད་ཐ་དད་དུ་སོང་སྟེ་རྣམ་རྟོག་ངན་པ་ལ་སྐྱོན་དུ་བལྟས་ནས་ལྟ་བ་དོར་ཞིང་མཚན་བཅས་ཀྱི་ལམ་རྐྱང་པས་གྲོལ་མི་ནུས་པ་ཡང་གདམས་ཏེ། གནས་ལུགས་རིན་པོ་ཆེའི་མཛོད་ལས་མ་བྱས་ལྷུན་གྱིས་གྲུབ་པའི་རིག་པ་ལ། །མི་རྩོལ་རང་བཞག་ཡངས་པའི་
གདངས་ཤར་བས། །དགེ་སྡིག་རྒྱུ་འབྲས་འདས་པའི་བྱང་ཆུབ་སེམས། །མི་འགྱུར་ཆོས་ཉིད་ངང་དུ་བསྡོམ་པ་ཡིན། །ཅེས་དང་། རྒྱུ་འབྲས་བྱིས་པ་དྲངས་པའི་ཆོས་རྣམས་ཀུན། །མས་འཛེགས་སྐལ་དམན་ལམ་དུ་ཐག་བཅད་དེ། །རང་ངོའི་དགོངས་པ་ཆོས་ལས་འདས་པའི་དོན། །བྱར་མེད་ནམ་མཁའི་ཁམས་སུ་བཅིང་བར་བྱ། །བྱ་བས་བསླུས་ཏེ་འཁོར་བའི་འཁྲུལ་སྣང་ལྟོས། །རྩོལ་བས་བསླད་དེ་སྡུག་བསྔལ་འཁྲུལ་འཁོར་སེམས། །དགེ་སྡིག་ཆོས་ཀྱི་བདེ་སྡུག་རྒྱུན་མི་ཆད། །ལས་བསགས་འཁོར་བ་མཐོ་དམན་ཉིད་དུ་འཁྱམས། །སྲིད་པའི་མཐོ་ལས་ཐར་པའི་སྐབས་མེད་དོ། །གང་ལ་དགེ་དང་མི་དགེ་རྒྱུན་ཆད་དེ། །ཆོས་ཉིད་ངང་ལས་འབྲལ་བ་ཉིད་མེད་ན། །དེ་ནི་གསང་ཆེན་ངེས་པའི་རྣལ་འབྱོར་ཏེ། །འབད་རྩོལ་མེད་པར་གདོད་མའི་ས་ལ་ཕྱིན། །ཞེས་དང་། ཕྱོགས་
རིས་མེད་པར་དོན་གྱི་སྙིང་པོ་ལ། །ལྟ་བ་དབང་དང་དཀྱིལ་འཁོར་བཟླས་བརྗོད་མེད། །ས་ལམ་དམ་ཚིག་སྦྱང་བགྲོད་མི་དམིགས་པས། །གཞི་བྲལ་ཡངས་པ་ཆེན་པོར་ཕྱལ་སངས་ཏེ། །ཆོས་ཉིད་བྱང་ཆུབ་སེམས་སུ་འུབ་ཆུབ་བོ། །ཞེས་དང་། རྡོ་རྗེ་གད་མོ་བཅུ་གཉིས་ལས། སྙིང་པོ་ལྟ་བ་རང་བྱུང་གི་ཡེ་ཤེས་ལ་ལྟོས་དང་། དགེ་སྡིག་དང་ལྟ་སྒོམ་ལས་འདས་པ་ངོ་མཚར་གཞི་མ་བསྐྱོད་པས་ལུས་ངག་གི་བྱ་བ་ཅི་བྱས་ཀྱང་ཕན་གནོད་དང་བྲལ་བ་ཧ་ཧ། ཞེས་གསུངས་པ་ལྟར། རང་ངོ་རིག་པ་གཅེར་མཐོང་གི་དོན་ལ་ངེས་པ་ཅུང་ཟད་སྐྱེས་པའི་དུས་སུ་དེ་གའི་རྒྱུན་རྩེ་གཅིག་ཏུ་སྐྱོང་བ་ལས་བློ་མང་ཚབ་ཚུབ་མི་བྱེད་པ་གོམས་པར་བརྟན་པ་གལ་ཆེའོ། །གསུམ་པ་ནི་ཤེས་རབ་དྲི་མ་མེད་པ་དེ་ཡིས་གཞལ་ལུགས་རྣམ་པ་གཅིག་ཏུ་ན་རྣམ་རྟོག་བཟང་ངན་ཇི་
ལྟར་ཤར་ཡང་ཤར་དུས་ཉིད་ནས་འཁྲུལ་མེད་རང་བྱུང་གི་རིག་པ་འདི་དང་འབྲལ་མ་མྱོང་བ་གདོད་ནས་ལྷན་ཅིག་ཏུ་འགྲོགས་པ་འདི་ཁོ་ནའི་དྲིན་གྱིས་ནི་འཁོར་བ་ལས་གྲོལ་བར་ངེས་ཏེ། རྒྱུད་མུ་ཏིག་ཕྲེང་བ་ལས། དེ་ཕྱིར་གཞི་གནས་རིག་པ་ལ། །རང་ཤར་ཡིན་ཕྱིར་སྣང་བ་རྫོགས། །རང་བྱུང་ཡིན་ཕྱིར་གཞི་ཉིད་རྫོགས། །རང་སྣང་ཡིན་ཕྱིར་ཡུལ་ཡང་རྫོགས། །རང་གྲོལ་ཡིན་ཕྱིར་འཁྲུལ་གཞིརྫོགས། །རང་དག་ཡིན་ཕྱིར་ལམ་ཀུན་རྫོགས། །རང་རིག་ཡིན་ཕྱིར་ཤེས་རབ་རྫོགས། །རང་ཁྱབ་ཡིན་ཕྱིར་ཤེས་བྱ་རྫོགས། །ཅེས་དང་། རང་གནས་ཡིན་ཕྱིར་རྒྱུད་ལུང་རྫོགས། །རང་རྫོགས་ཡིན་ཕྱིར་དུས་གཅིག་རྫོགས། །རང་ཤེས་ཡིན་ཕྱིར་གདམས་ངག་རྫོགས། །རང་བཞག་ཡིན་ཕྱིར་བསམ་གཏན་རྫོགས། །ཅེས་དང་། གསེར་གྱི་སྙིང་པོ་ལས། ཅེར་གྲོལ་ཆེན་པོའི་ལྟ་སྟངས་
ཀྱིས། །སངས་རྒྱས་སེམས་ཅན་གཉིས་ཀ་གྲོལ། །ཞེས་གསུངས་པ་ལྟར་འཁོར་འདས་ལམ་གསུམ་གྱི་ཆོས་ཐམས་ཅད་རིག་པ་སྐད་ཅིག་མ་ལ་རྫོགས་པས་གྲོལ་འཁྲུལ་གྱི་སྒོ་ཐམས་ཅད་ཟུང་དུ་འཇུག་གི། །དེ་ཡང་གཤིས་འཁྲུལ་མེད་རང་བྱུང་གི་རིག་པ་འདི་ལྟར་མིན་པར་རྩལ་སྣང་ལ་བདག་ཏུ་བཟུང་སྟེ་ཆགས་སྡང་སོགས་མེ་ལྟར་འབར་བའི་གཤིས་ངན་རང་གི་ཡིན་ལུགས་ལས་གཞན་དུ་གཟུང་འཛིན་སྣ་ཚོགས་སུ་འཁྲུལ་པའི་སེམས་ཀྱི་འཕྲོ་འདུ་འདི་ཉིད་ངེད་ཅག་ལ་སྣང་བ་ལྟར་ཚུགས་ཐུབ་པ་སྟེ། ཁོ་རང་གི་གཤིས་དེ་ལྟར་དུ་བདེན་པ་ཞིག་ཡིན་ན་དུས་གསུམ་གྱི་རྒྱལ་བས་ཀྱང་འདུལ་ཐབས་མི་འདུག་སྟེ། དཔལ་མགོན་འཕགས་པ་ཀླུ་སྒྲུབ་ཀྱིས། གལ་ཏེ་རང་བཞིན་གྱིས་ཡོད་ན། །དེ་ནི་ཡོད་ཉིད་མི་འགྱུར་རོ། །རང་བཞིན་གཞན་དུ་འགྱུར་བ་ནི། །
ནམ་ཡང་འཐད་པར་མི་འགྱུར་རོ། །ཞེས་གསུངས་པ་ལྟར། ཁོ་རང་གི་ཡིན་ལུགས་དེ་སུས་ཀྱང་བཅོས་པར་མི་ནུས་པ་ཡིན་ན་ཡང་དེ་ལྟར་མིན་པར། རིན་ཆེན་སྤུངས་པའི་རྒྱུད་ལས། འདི་ལྟར་སྣང་ཚད་ཐོས་ཚད་ཀུན། །ཀུན་བཟང་ང་ཡི་རོལ་པར་བཤད། །རོལ་པའི་འཆར་བྱེད་མ་འགག་པས། །ང་ཡི་ཡོན་ཏན་ཉིད་དུ་འབྱུང་། །ཡོན་ཏན་སྣང་བྱེད་འདི་ཙམ་པས། །ཟད་པར་མི་འགྱུར་ཟད་པ་མེད། །དེ་ལྟར་སྐུ་གསུམ་ཕྱག་རྒྱའི་ཞིང་། །ཞེས་གསུངས་པ་ལྟར། གཟུང་འཛིན་གྱི་འགྱུར་བ་སྣ་ཚོགས་པ་འདི་ཐམས་ཅད་འགྱུར་མེད་རང་བྱུང་གིས་རིག་པའི་རྣམ་འགྱུར་ཙམ་ཞིག་ཡིན་པསན་བཟང་ངན་གང་ཤར་ཡང་ཕན་གནོད་མེད་པར་རྟོག་ཚོགས་འོད་གསལ་གྱི་དབྱིངས་སུ་དྭངས་ཏེ་གྲོལ་འདུག་པ་འདི་གཞན་སུས་ཀྱང་གྲོལ་དུ་མ་བཅུག་པར་རང་ཉིད་ཀྱིས་རང་ཉིད་ལ་གྲོལ་བ་སྟེར་བས་
ན་དེ་ལས། གཏི་མུག་ཞེ་སྡང་འདོད་ཆགས་ཀྱི། །ཞེན་པ་དྲག་པོ་ནམ་སྐྱེསན། །ང་ཡི་རིག་པ་རྟོག་མེད་ཡིན། །འདི་ཉིད་རང་གིས་རང་པ་གྲོལ་ལ། །ཞེས་དང་། སེམས་སྡེ་ལས། གྲོལ་བ་རང་བྱུང་གཞན་ལས་མིན། །ཞེས་དང་། རྒྱུད་མུ་ཏིག་ཕྲེང་བ་ལས། འགགས་པ་མེད་པའི་རིག་པ་ལ། །འཁྲུལ་རྒྱུ་མེད་པས་ལྡོག་པ་མེད། །ཡེ་གྲོལ་ཡིན་པས་གཏནནས་འཕགས། །རང་གྲོལ་ཡིན་པས་ཡུལ་རྐྱེན་མེད། །ཅེར་གྲོལ་ཡིན་པས་སྣང་བ་དག །མཐའ་བྲལ་ཡིན་པས་མུ་བཞི་འགགས། །གཅིག་གྲོལ་ཡིན་པས་དུ་མ་སྟོང་། །ཞེས་དང་། ཡེ་ནས་གྲོལ་བའི་སེམས་ཉིདནི། །ཕྱི་ནང་གྲོལ་རྐྱེན་ག་ལ་སྲིད། །ཅེས་དང་། ཁྱུང་ཆེན་ལས། ཆོས་ཀུན་སྤྲོས་དང་བྲལ་ཞིང་རྙོག་མེད་པས། །བྱས་མེད་རང་སར་གྲོལ་བའི་གནད་འདི་ཆེ། །རྒྱུ་འགགས་རྐྱེན་ལ་འབྲས་བུ་ཟད་པའི་
གནས། །རྐྱེན་ལ་མ་བརྟེན་གཅིག་ཤོས་ཀློང་ཉིད་དོ། །སྤྲོས་བྲལ་སྒོམ་དག་ལྟ་རྒྱུ་མེད་པའི་དོན། །ཞེས་དང་། རིན་སྤུངས་པ་ལས། ཇི་ལྟར་བྱས་ཀྱང་སྐྱེས་མེད་ཀྱི་ཀློང་དུ། འགགས་མེད་གྲོལ་བ་ཞེས་དང་། སྙིང་པོའི་རིག་པ་སྟོང་པ་ཀུན་གྲོལ་གྱི་སྣང་བ་ལ་ལྟོས་དང་། རང་གི་གཉེན་པོ་རང་ཆེ་བ་ངོ་མཚར། ཉོན་མོངས་པ་རྣམས་རང་གིས་གྲོལ་བ་ཧ་ཧ། ཞེས་གསུངས་པ་ལྟར། གཉེན་པོ་གཞན་ནས་བཙལ་མི་དགོས་པར་རང་བབས་སུ་བཞག་པས་རང་གྲོལ་རྒྱུ་འདུག་གོ། །ཞེས་གསུངས་པས་གསལ་སྟོང་གུད་བཅད་ཀྱི་ཉམས་ལས་གྲོལ་ཏེ་དངོས་གཞི་རིག་སྟོང་ཟུང་འཇུག་ལ་ཤན་འབྱེད་ཀྱི་ལྟ་བ་ལ་ཡིད་ཆེས་ཀྱི་སྒོ་དང་པོ་རྙེད་ཚུལ་གསུངས་པའོ། །གཉིས་པ་དངོས་གཞི་རང་བྱུང་གི་རིག་པ་སྒྲིབ་མེད་མངོན་སུམ་དུ་གཟིགས་ཚུལ་ལ། ངོ་བོ་སྐྱེ་བ་མེད་པ་ཀ་དག་ལྟ་བའི་དོན་ལ་
ངེས་པ་སྐྱེས་ཚུལ། རང་བཞིན་མེད་པའི་ལྷུན་གྲུབ་བསྒོམ་པའི་གདེང་ལ་ཡིད་ཆེས་ཐོན་ཚུལ། ཟུང་འཇུག་ཡིད་དཔྱོད་དང་བྲལ་བའི་སྤྱོད་པ་ཟབ་མོ་ལ་ཁྲིགས་སུ་བྱུང་ཚུལ། རྩོལ་བྲལ་རྫོགས་ཆེན་གྱི་ལྟ་བ་སྟོན་པའི་གཞུང་ལམ་ཚད་མ་ལ་ཞུགས་ཚུལ། ཞུགས་ནས་རིག་སྟོང་ཟུང་འཇུག་གི་དགོངས་པ་འཁྲུལ་མེད་དུ་རྟོགས་ཚུལ་དང་ལྔའོ། །དང་པོ་ནི། ཡོད་མེད་ཡིན་མིན་ལ་སོགས་སྤྲོས་པའི་མཚན་མ་ཅིར་ཡང་མ་གྲུབ་པའི་ད་ལྟའི་ཐད་ཀར་ཐ་མལ་གྱི་སེམས་ཉིད་འདི་ཀ་ངོ་བོ་ངོས་བཟུང་ངམིགས་གཏང་ཐམས་ཅད་དང་བྲལ་ནའང་། རྣམ་པ་འགག་པ་མེད་པ་འཁོར་འདས་བདེ་སྡུག་བཟང་ངན་སྣ་ཚོགས་པ་ཅིར་ཡང་འཆར་དུ་རུང་བ་ཡི་སྣང་རིག་ཟང་ཐལ་རྗེན་པ་མངོན་སུམ་རང་ཐོག་ཏུ་ཉམས་སུ་མྱོང་བའི་ངོར། དཔེ་ཕྱི་ནང་གང་དུའང་བཟུང་བས་ཟིན་
མེད་ཀྱི་ཆུནང་གི་ཟླ་གཟུགས་ལྟ་བུའི་སེམས་ཉིད་བརྗོད་དུ་མེད་པ་འདིཀ་ཙམ་ཞིག་ལ་གོ་རྒྱུ་ལེགས་པར་འདུག་གོ། །ཞེས་གོ་བ་ཐམས་ཅད་ཀྱི་ནང་ནས་མཆོག་ཏུ་དགར་བ་སྟེ་འདི་ལྟར་ཕྱི་སྣ་ཚོགས་སྣང་བའི་ཡུལ། སྣོད་བཅུད་ཐམས་ཅད་སྣང་ལ་བདེན་པས་སྟོང་པ་སྒྱུ་མའི་དཔེས་བརྒྱད་དུ་ཡེ་ནས་གྲོལ་ལ། དེའང་སྒྲ་མ་མཐའ་བྲལ་གཞི་མེད་སྣང་བ་ཙམ་ལས་ཡོད་མ་མྱོང་། མེད་མ་མྱོང་། བདེན་མ་མྱོང་། བརྫུན་མ་མྱོང་། གཞི་མེད་ཕྱལ་བ་ཡེ་སངས་སུ་གནས་པས་བླང་དོར་དམིགས་ཆོས་སུ་མ་གྲུབ། ནང་རང་སེམས་ཀྱི་ཆོས་སུ་སྣང་ནའང་སྐྱེ་འགགས་གནས་པའི་ཡུལ་དུ་མ་གྲུབ་པས་ངོ་བོ་ངོས་བཟུང་གི་མཐའ་ལས་འདས་ཏེ་སེམས་འདི་ལ་བལྟ་བྱ་ལྟ་བྱེད་ཀྱི་ཆོས་རྡུལ་ཙམ་ཡང་མེད་པས་རང་བཞིན་གྱི་རིག་པ་ནམ་མཁའ་ལྟ་བུ་ལ་སྤོང་བླང་གཉེན་པོའི་གཟེབ་ཀྱིས་འཆིང་མི་དགོས་
པར་འཁོར་འདས་དམིགས་མེད་ཆེན་པོར་ཡེ་སངས་རྒྱས་ཏེ། ཀློང་དྲུག་པ་ལས། སྟོང་པ་ཡུལ་གྱི་སྤྲོས་པ་མེད། །གསལ་བ་ཡོད་མེད་མཐའ་ལས་འདས། །མཚོན་ཚིག་དུ་མའི་མཐའ་དང་བྲལ། །སྔགས་ལས་མ་སྐྱེས་ཡེ་རྫོགས་ཉིད། །རྒྱུ་དང་རྐྱེན་རྣམས་ཡོངས་སུ་བྲལ། །ལྟ་བསྒོམ་དྲི་མ་། ཀུན་དང་བྲལ། །མཐའ་མེད་དབུས་སུ་དམིགས་པ་མེད། །ཞེས་དང་། ཆོས་འདི་བསམ་པས་མི་སྣང་སྟེ། །གང་མེད་གང་དུ་འཛིན་པ་མེད། །ཞེས་དང་། རང་ཤར་ལས། དེ་བཞིན་སྐྱེ་མེད་རང་གསལ་ཉིད། །དེ་ལ་གཉེན་པོས་གཞིག་ཏུ་མེད། །དེ་ལ་ཕྱོགས་དང་རིས་སུ་མེད། །ང་དང་བདག་ཏུ་འཛིན་པ་ཉྩམེད། །བཟང་དང་ངན་པའི་རྣམ་རྟོག་མེད། །ཡིན་དང་མིན་པའི་མཐའ་ལས་འདས། །སྒྲ་དང་བྱ་དང་ཚིག་དང་བྲལ། །ཞེས་དང་། དཔལ་རང་བྱུང་ཞབས་
ཀྱིས། ཐམས་ཅད་བདེན་མིན་བརྫུན་མིན་ཏེ། །ཆུ་ཟླ་བཞིན་དུ་མཁས་རྣམས་འདོད། །ཞེས་དང་། ཆོས་རྒྱལ་སྲོང་བཙན་སྒམ་པོས། ལྟ་བ་མིང་དུ་བཏགས་པ་དེ། །བལྟ་རྒྱུ་བྱུངན་ལྟ་བ་མིན། །བལྟ་རྒྱུ་མེད་པའི་དོན་ལ་ལྟོས། །ཆོས་ཉིད་བརྗོད་མེད་ལམ་དུ་ཁྱེར། །ཞེས་གསུངས་པ་ལྟར་བལྟ་བྱ་ལྟ་བྱེད་ཐམས་ཅད་དང་བྲལ་བ་དེ་ལྟ་བ་ཐམས་ཅད་ཀྱི་མཆོག་ཏུ་གསུངས་སོ། །གཉིས་པ་ནི། ཡི་གེ་མེད་པ་ལས། ཐམས་ཅད་འབྱུང་གཞི་འཁྲུལ་སྣང་ང་ཡི་སེམས། །ཐམས་ཅད་གནས་པ་འཁྲུལ་སྣང་ང་ཡི་ཐུགས། །ཐམས་ཅད་སྣང་བ་འཁྲུལ་སྣང་ང་ཡི་སྐུ། །ཐམས་ཅད་གྲགས་པ་འཁྲུལ་སྣང་ང་ཡི་གསུང་། །མཐོང་བ་མ་འགགས་ང་ཡི་གཟུགས་ལྟར་སྣང་། །ཐོས་པ་མ་འགགས་ང་ཡི་སྒྲ་ལྟར་གྲགས། །སྣོམ་བྱེད་མ་འགགས་ང་ཡི་དྲི་ལྟར་ཚོར། །མྱོང་བྱེད་མ་འགགས་ང་ཡི་རོ་ལྟར་
གདའ། །ཚོར་བྱེད་མ་འགགས་ང་ཡི་ཡིད་ལྟར་མགྱོགས། །གསང་བའི་ཉོན་མོངས་ང་ཡི་ཆོ་འཕྲུལ་ཏེ། །ཞེས་དང་། ཐལ་འགྱུར་ལས། སྣང་བ་འཁྲུལ་པའི་རང་བཞིན་འདི། །ཡེ་ཤེས་ཡིན་པར་སྔར་མ་མཐོང་། །རྟོག་བཅས་འཁྲུལ་པ་གཞི་མེད་པས། །ཞེས་གསུངས་པ་ལྟར། འཁྲུལ་རྟོག་སྣ་ཚོགས་སུ་འཆར་བའི་འགྱུ་དྲན་གྱི་སེམས་དེ་ཡི་ངོ་བོ་ཡོད་མེད་བཙལ་བས། གང་དུ་ཡང་རྙེད་པ་མེད་པས་འཁྲུལ་སེམས་ཐ་མལ་པ་ཁོ་རང་བཅས་བཅོས་སྤོང་བླང་མ་དགོས་པར་འཁྲུལ་མེད་གཤིས་ལུགས་ཀྱི་བབས་སུ་རང་བཞིན་ཤུགས་ཀྱིས་ཤར་བ་དེ། འཁོར་བའི་ཉེས་སྐྱོན་ཐམས་ཅད་ཀྱི་དྲི་མ་མེད་པའི་རིག་ཁམས་ཡིད་བཞིན་ནོར་བུ་ཁོ་ཡིན་པར་འདུག་པས་འཁྲུལ་པ་ཀ་ནས་དག་པའི་བློ་བྲལ་རང་བྱུང་གི་ཡེ་ཤེས་གཞན་ནས་བཙལ་མ་དགོས་པར་རང་སེམས་
དང་འདུ་འབྲལ་མེད་པར་བཞུགས་པ་དེའི་སྟོབས་ཀྱིས་ཤར་གྲོལ་དུས་མཉམ་གྱི་བསྒོམ་པ་ཟབ་མོ་བྱུང་བས་མ་ཡེངས་མི་བསྒོམ་པའི་ངང་དུ་ལྷག་པར་བཞག་པ་དེས། འཁོར་བ་ལས་སྐྱོབ་པར་རེའོ་ཞེས་ཡེངས་བསྒོམ་དང་བྲལ་བ་དེ་བསྒོམ་པ་མཆོག་ཏུ་བསྟན་ཏེ། ཀློང་དྲུག་པ་ལས། བྱིང་རྒོད་མེད་པའི་སེམས་ཉིད་ལ། །བཏང་སྙོམས་ཆེན་པོས་བསྒོམ་པ་ནི། །ཚོགས་དྲུག་ལྷུག་པའི་སྒོམ་པ་ཞེས། །ཀུན་ཏུ་བཟང་པོ་ང་ཡིས་བསྟན། །ཡ་ང་མེད་པའི་སེམས་ཉིད་ལ། །རེ་དྭགས་བྲལ་བའི་སྣང་བ་ནི། །ཡེ་བཞག་གདེང་ལྡན་དགོངས་པ་ཞེས། །ཀུན་ཏུ་བཟང་པོ་ང་ཡིས་བསྟན། །ཞེས་དང་། རིན་སྤུངས་ལས། མི་གནས་བསམ་གཏན་དགོངས་པ་ནི། །སྒོམ་པ་མེད་པར་ཡེ་འདུག་པས། །འདི་ཡང་གང་གིས་སྔར་མ་རིག །ཅེས་དང་། ཆོས་རྒྱལ་གྱིས། སྒོམ་པ་ཞེས་མིང་ཏུ་བཏགས་པ་
དེ། །བསྒོམ་རྒྱུ་བྱུང་ན་བསྒོམ་པ་མིན། །བསྒོམ་རྒྱུ་མེད་པའི་དོན་དེ་བསྒོམ། །སེམས་ཡེངས་རྒྱུ་མེད་པ་ལམ་དུ་འཁྱེར། །ཞེས་དང་། རྡོ་གྲུབ་བསྟན་པའི་ཉི་མས། མ་བཅོས་པའི་ཆོས་ཉིད། མ་འཁྲུལ་པའི་གནས་ལུགས། མི་རྟོག་པའི་ཡེ་ཤེས། མ་ཡེངས་པའི་དྲན་པ། མ་མཐོང་བའི་མཐོང་བ། མི་བསྒོམ་པའི་བསྒོམ་པ། ཡུལ་དང་ཡུལ་ཅན་ཐམས་ཅད་དབྱེར་མེད་ཆུ་ལ་ཆུ་བཞག་པ་ལྟར་འདུག་གོ། །ཞེས་གསུངས་པ་ལྟར་རོ། །དེ་ཡང་ཡིན་ལུགས་ངོ་མ་ཤེས་པའི་འཁྲུལ་བ་རྒྱ་འབྱམས་སུ་སོང་བ་འདི་བསྒོམ་དུ་འདོད་པ་མིན་གྱི་འདིའི་རང་བཞིན་ཤེས་པའི་རིག་ཆ་དེའི་ངོར་གང་ཤར་ཐམས་ཅད་མ་བཟོ་མ་བཟོས་པའི་དོན་ཡིན་ཏེ། དེ་ལས་གཞན་དུ་ཀུན་མཁྱེན་ཆེན་པོས། དེང་སང་ཨ་ཏིར་རློམ་པའི་ཀློང་ཆེན་དགུ །འགྱུ་འཕྲོའི་རྟོག་ཚོགས་བྱང་ཆུབ་སེམས་
ཡིན་ལོ། །ཞེས་གསུངས་པ་ལྟར་འགྱུར་བས་བླ་མའི་མན་ངག་ལ་བརྟེན་ནས་ཤན་ཕྱེད་པ་གལ་ཆེའོ། །གསུམ་པ་ནི། རྒྱུད་མུ་ཏིག་ཕྲེང་བ་ལས། ཀུན་གཞི་ལུས་ཀྱི་མེ་ལོང་ལས། །སྟོང་རིག་གསལ་བའི་བཞིན་བསྟན་པས། །གཞན་འབྱུང་འཁྲུལ་བ་གཞི་ལ་བསྐྱལ། །ཞེས་དང་། དབང་པོ་ལྔ་ཉིད་ཅེར་བཞག་པས། །འཛིན་པའི་ཡུལ་ལྔ་རང་སར་གྲོལ། །ཉོན་མོངས་ལྔ་ཉིད་རང་ཡིན་པས། །ཁམས་གསུམ་ཉིདནི་གཞི་ལས་བསྐྱལ། །ཞེས་དང་། རིན་ཆེན་སྤུངས་པའི་རྒྱུད་ལས། རྟོག་བཅས་འཁྲུལ་པ་གཞི་མེད་པས། །ཀུན་གཞི་ཆོས་སྐུར་ཆེན་པོར་རྟོགས། །འཁྲུལ་བའི་རང་རྟོག་རྒྱུན་ཆད་དོ། །དེ་ལྟར་འཁྲུལ་མེད་སྣང་བ་འདི། །ཡེ་ནས་གྲོལ་བའི་གནད་ལས་ཤར། །ཞེས་གསུངས་པ་ལྟར། འཁྲུལ་བྲལ་རང་བྱུང་ཟག་མེད་ཀྱི་རིག་པའི་གདངས་མ་འགགས་པ་བཞིན་རས་ཀྱི་
གཟུགས་སུ་བཀོད་པ་དེ། རྩལ་སྣ་ཚོགས་སུ་འཆར་བའི་ཀུན་གཞི་དྭངས་པ་ཡི་གསལ་ཆ་མེ་ལོང་གི་གཟུགས་སུ་བཀོད་པ་དེ་ཡི་ངོས་ནས་རང་བཞིན་ལྷན་སྐྱེས་སུ་བློས་བཟུང་བས་ཟིན་པ་མེད་པའི་ཚུལ་གྱི་ཡོད་ཡོད་ཞིག་འདྲ་སྟེ། འོན་ཀྱང་ཡིན་ལུགས་ཤར་ཐོག་ཏུ་ཀློད་མ་ཤེས་པར་རང་བཞིན་ལ་བཟོ་བཅོས་པའི་སྨྱོན་པ་ང་དང་ང་འདྲས་ནི་ཚོགས་བརྒྱད་ཀྱི་འགྱུ་བ་ཆེད་དུ་འགགས་ཏེ་རིག་པ་ཞེས་བཟང་པོ་ཞིག་སྒྲུབ་ཏུ་ཡོད་པར་རློམ་པས་སྒྲིབ་སྟེ་འདི་ལྟ་བུའི་བྱ་རྩོལ་སྤོང་བླང་དང་བྲལ་བའི་མ་བཅོས་ཤུགས་འབྱུང་གི་སྤྱོད་པ་ཟབ་མོ་ལ་རྟོག་སྤྱོད་མ་ཞུགས་པའམ་ལམ་དུ་ཁྱེར་མ་ནུས་པས་ནོངས་སོ་ཞེས། སེམས་རིག་ལ་འདམ་ཁ་མེད་པར་གང་ཤར་བཟོ་མེད་དུ་སྐྱོང་བ་དེ་སྤྱོད་པའི་མཆོག་ཏུ་གདམས་ཏེ། ཆོས་རྒྱལ་གྱིས། སྤྱོད་པ་ཞེས་མིང་དུ་བཏགས་པ་དེ། །སྤྱོད་རྒྱུ་
བྱུང་ན་སྤྱོད་པ་མིན། །སྤྱོད་རྒྱུ་མེད་པའི་དོན་ལ་སྤྱོད། །མ་བཅོས་ཤུགས་འབྱུང་ལམ་དུ་ཁྱེར། །ཅེས་དང་། དཔལ་མཁའ་སྤྱོད་དབང་པོས། དུས་ད་ལྟའི་སྣང་རིག་གསལ་ཙམ་འདི། །ཆོས་ཀུན་རྫོབ་བདེན་པའི་རང་ངོ་ཡིན། །འདི་མ་བཅོས་རང་གི་གནད་ཤེས་ན། །དོན་དམ་པའི་བདེན་པའང་དེ་ཁོ་ན། །ཞེས་དང་། རིན་སྤུངས་ལས། སྟོང་པ་ཆེན་པོ་ཀུན་འབྱུང་གི་ཡེ་ཤེས་ལ་ལྟོས་དང་། དྲན་བསམ་གྱི་སྤྱོད་པ་སྣ་ཚོགས་ཅི་བྱས་ཀྱང་རོལ་པ་ཤར་ཏེ་ངོ་མཚར་ཞེས་གསུངས་པ་ལྟར། རྒྱ་ཡན་ལྷུན་རྫོགས་ཀུན་བཟང་དོན་གྱི་སྤྱོད་པ་ཟབ་མོ་བསྟན་ཏོ། །བཞི་པནི། ཆོས་སྐུ་ཀུན་ཏུ་བཟང་པོ་ནས་
བརྒྱུད་གསུམ 
་རིག་འཛིན་བླ་མ་ཡི་དགོངས་པ་ཇི་ལྟ་བ་བཞིན་སྙན་ནས་སྙན་དུ་བརྒྱུད་པའི་ཞལ་ཆེམས་མཐར་ཐུག་པ། འོད་གསལ་རྡོ་རྗེ་སྙིང་པོ་ཡི་དགོངས་དོན་གབ་སྦས་མེད་པར་ཐད་ཀར་
དྲང་ཐད་དུ་བསྟན་པའི་ཀུན་མཁྱེན་རོང་ཀློང་རྣམ་གཉིས་སོགས་སྔ་འགྱུར་རིག་འཛིན་བརྒྱུད་པའི་ཞལ་ལུང་དྲི་མ་མེད་པ་རྣམས་དང་། ཁྱད་པར་པཎ་ཆེན་བི་མ་མི་ཏྲ་བསམ་བཞིན་མི་ཡི་བཤེས་གཉེན་དུ་སྣང་བ་རིགས་བདག་མཚུངས་པ་མེད་པ་ཀུན་མཁྱེན་རྡོ་རྗེ་གཟི་བརྗིད་སོགས་ཀྱི་དགོངས་པའི་བྱིན་རླབས་སྙིང་ལ་འཕོས་པའི་མཐུས་རང་བཞིན་ལྷན་སྐྱེས། ཡེ་ཤེས་རང་སར་གནས་པར་གོ་བའི་བྱ་ཞིག་བཏང་བ་ལ་བརྟེན་ནས་ད་ལྟའི་ཚོགས་བརྒྱད་ཀྱི་འགྱུ་བ་གང་ཕར་བསལ་བའི་ཤུལ་ལམ་ཐག་རིང་པོ་གཞན་ཞིག་ནས། རང་བྱུང་ཆོས་སྐུའི་ཡེ་ཤེས་དེ་འཚོལ་དགོས་སྙམ་པ་ཡི་དཀའ་ལས་དེ་བཤོལ་བའམ་སྤངས་ནས། ཐ་མལ་གྱི་ཤེས་པ་རྗེན་པ་འདི་ཉིད་རང་བྱུང་ལྷན་ཅིག་སྐྱེས་པ་ཡི་གཉིས་སུ་མེད་པའི་ཡེ་ཤེས་ཡིན་པར་མངོན་སུམ་དུ་མཐོང་བའི་
དོན་འདི་ལ་རེའོ་ཞེས། དུག་ལྔ་ལ་སོགས་པའི་རྟོག་ཚོགས་ཅིཤར་ཐམས་ཅད་ཀུན་བཟང་ཆོས་སྐུའི་ཡོ་ལང་དུ་འདུག་པས་རང་ས་ནས་རང་བཞིན་ཁོང་གྲོལ་གྱི་ཚུལ་དུ་རྣམ་པར་དག་པས་འཆིང་གྲོལ་ལ་རེ་དྭགས་མི་དགོས་པས་སྤང་ཐོབ་མེད་པས་འབྲས་བུ་ཡེ་ནས་རང་ལ་གནས་པར་བསྟན་ཏེ། རྗེ་སྒམ་པོ་པས། མཚན་མར་འཛིན་པའི་རྣམ་རྟོག་འདི། །ཆོས་སྐུ་ཡིན་པར་ཙིར་གྱིས་ཟུངས། །ཞེས་དང་། ཁྲོ་ཕུ་ལོ་ཆེན་བྱམས་པ་དཔལ་གྱིས། སྙིང་ནས་ཆོས་གཅིག་གོ་གྱུར་ན། །སྡུག་བསྔལ་ཐམས་ཅད་བདེ་བ་ཡིན། །འཁོར་བ་ཐམས་ཅད་མྱང་འདས་ཡིན། །རྟོག་པ་ཐམས་ཅད་ཆོས་སྐུ་ཡིན། །ཉོན་མོངས་ཐམས་ཅད་ཡེ་ཤེས་ཡིན། །གཟུང་འཛིན་ཐམས་ཅད་གཉིས་མེད་ཡིན། །ལྟ་བ་ཐམས་ཅད་རྟོག་པ་ཡིན། །སྤང་བླང་མེད་པའི་ནམ་མཁའ་ལ། །རྨི་ལམ་ལྟ་བུའི་རྒྱུ་འབྲས་
ཅི། །ཞེས་དང་། ཀུན་མཁྱེན་ཆོས་རྗེས། བྱང་ཆུབ་སེམས་ནི་རྟག་ཏུ་ལྷུན་གྲུབ་པས། །སྐུ་གསུམ་མ་བཙལ་མ་ཆས་རང་ལ་ཡོད། །རྒྱུ་འབྲས་དགེ་སྡིག་འབད་རྩོལ་མི་དགོས་པས། །རང་བཞིག་བྱར་མེད་རྣལ་འབྱོར་ཞེས་བྱ་སྟེ། །བླང་དོར་བྱ་རྩོལ་མེད་པར་ལྷན་གྲུབ་ཀློང་། །ཞེས་གསུངས་པ་ལྟར་རོ། །ལྔ་པནི། ད་ལྟ་རང་རེ་རྙིང་མ་པར་གྲགས་པ་ཡི་རྟོགས་ལྡན་རྒན་པོ་འགའ་ཞིག་གིས། ཀུན་བཟང་ཆོས་སྐུའི་དོན་སྒོམ་པ་ཡིནནོ་ཞེས། མཚན་ལྡན་གྱི་བླ་མའི་མན་ངག་ལ་ལྟོས་མ་དགོས་པར་དཔེ་ཐོག་གོ་ཡུལ་ཙམ་གྱིས་ཡིད་ཚིམས་ཏེ་སྒོམ་དམིགས་གཏད་ཅན་གྱི་འཛིན་རྒྱུ་ཞིག་ཡོད་ལ་རེ་བས། ཁ་གནམ་དུ་གདངས་མིག་བར་སྣང་དུ་བགྲད། ལུས་འདུག་ཚུགས་མ་ཤོར་བས། ཅི་ཡང་ཡོད་པ་མིན་པའི་སྟོང་པ་ཧ་རེ་བ་དང་། ཡང་ན་མེད་པ་མིན་པའི་འགྱུ་བ་
གསལ་རིག་གི་ཆ་དང་། ཡང་ན་ཡོད་མིན་མེད་མིན་ཏེ་གཉིས་མིན་གྱི་ངོ་བོ་ཅན་གཞི་གྲུབ་ཅིག་ལ་སེམས་གཏད་དེ་རྩོལ་མེད་ཨ་ཏིའི་དགོངས་དོན་ཟབ་མོ་ནི་ཡིན་པར་རློམས་ནས་རྟོགས་ལྡན་དུ་སེམས་ཀྱང་། ཡོད་མེད་ཡིན་མིན་ལ་སོགས་པ་སྤྲོས་པའི་མཐའ་བཞི་རང་བཞིན་ངང་གིས་སངས་བའི་བྱར་མེད་ཀ་དག་གི་རྫོགས་པ་ཆེན་པོ་ཇི་བཞིན་མངོན་དུ་གྱུར་པ་རིག་པ་རང་བྱུང་གི་ངོར་ལ་ནི། ཅི་ཡང་མེད་པས་དངོས་མེད་ཕྱང་ཆད་དང་། རང་གི་ངོ་བོ་མི་སྟོང་པའི་གསལ་རིག་བདེན་གྲུབ་ཅན་དང་། ཡོད་མེད་གཉིས་ཀ་མིན་པའི་འགལ་འདུ་ཅན་གྱི་གཞི་ཕུང་པོ་གསུམ་པའི་བདེན་གྲུབ་ཚུགས་ཐུབ་ཅན་ཞིག་ཡོད་པའི་སྐད་ཆ་མི་འདུག་ཞེས། མི་ཕམ་པ་རང་གིས་གཤིས་ལུགས་ཆོས་སྐུའི་རང་ཞལ་འཁྲུལ་མེད་མངོན་སུམ་དུ་མཇལ་བའི་ཚེ་དམིགས་གཏད་ཅན་དེ་འདྲ་མ་མཐོང་ཞེས་པའི་
དོན་ཏེ། ཀུན་མཁྱེན་ཀློང་ཆེན་པས། སྣང་སྲིད་འཁོར་འདས་ཆོས་སོ་ཅོག་རྣམས་ལ། །རང་བཞིན་མེད་པས་ཡོད་པའི་ཆོས་ལས་འདས། །སྣང་ཚུལ་མ་འགགས་མེད་པའི་ཆོས་ལས་འདས། །ཡོད་མིན་མེད་པས་གཉིས་ཀའི་ཆོས་ལས་འདས། །གཉིས་ཞེས་མེད་པའི་གཉིས་མིན་ཆོས་ལས་འདས། །ཡིན་མིན་མེད་པས་དོན་གྱི་སྙིང་པོ་ལ། །འདི་ཞེས་མི་མཚོན་བསམ་བརྗོད་ཀུན་ལས་འདས། །ཞེས་དང་། ཇི་བཞིན་སྤྲོས་དང་བྲལ་ལས་མ་གཡོས་པས། །དེ་ལ་མཐའ་དབུས་མེད་པས་སེམས་དང་བྲལ། །ཞེས་དང་། ཡངས་པ་ཕྱམ་ཕུལ་མཚོན་བརྗོད་བྲལ་བའི་ཀློང་། །ཆོས་དང་ཆོས་མིན་ཡེ་སྟོང་ཡོད་མ་མྱོང་། །བསམ་བྲལ་བརྗོད་དུ་མེད་པའི་རང་བཞིནནི། །བློའངས་རྫོགས་པ་ཆེན་པོར་ལ་ཟླ་འོ། །ཞེས་གསུངས་པ་ལྟར་ཡིན་ལ། དེས་ན་ཡང་དག་
པའི་མཚན་ལྡན་གྱི་བླ་མ་དམ་པ་ཞིག་ལ་བརྟེན་ནས་སྤྲོས་པའི་མཐའ་ཐམས་ཅད་དང་བྲལ་བའི་གནས་ལུགས་ཟང་ཐལ་གྱི་ཤེས་རིག་རྗེན་པ་བཟོ་བཅོས་དང་བྲལ་བའི་གནས་གསང་ཟབ་མོ་ཇི་བཞིན་མ་རྟོགས་པའམ་མ་ཕིགས་ན། རང་གར་བླུན་སྒོམ་དང་ཕོ་ཚོད་ཀྱི་རང་བཟོས་འདིནི་ཡིན་ལ། འདི་ནི་མིན་ནོ་སྙམ་པའི་འཕྲོ་གནས་འདམ་ཁ་དང་། གསལ་སྟོང་གུད་བཅད་ཀྱི་དམིགས་གཏད་ཅན་སོགས་ཀྱི་སྒོམ་འདིའི་ཅི་འགྱུར་ཆ་མེད་དོ་ཞེས། འདི་ལྟ་བུའི་རྩོལ་རྟོག་ཡིད་དཔྱོད་ཀྱི་སྒོམ་པ་འདི་ནི་རྩོལ་མེད་ཆོས་ཉིད་ཀྱི་དོན་ལས་ཕར་ཕར་རིང་སྟེ། མཐར་ཅི་ཤེས་འདི་ཤེས་དང་། ཅི་ཕན་འདི་ཕན་མ་བྱུང་བས་རང་ཡིད་རང་ལ་ཆད་དེ། བསྒོམ་ན་བསྒོམ་སྙིང་མི་འདོད། སྐྱུར་ན་བློས་མི་ཐོང་ཞིང་། ཅི་བྱེད་འདི་བྱེད་མེད་པས། མཐར་རྫོགས་ཆེན་མ་འགྲུབ་སྲོག་རླུང་འགྲུབ་ནས་མི་མིན་རོ་
མིན་དུ་གྱུར་ཏེ་སྨྱོ་འབོགས་སུ་སོང་བའམ་ཆགས་སྡང་སོགས་སྣ་གཅིག་ཀྱང་མགོ་མི་ནོན་པར་རང་རྒྱུད་ཐ་མལ་དུ་ལུས་ཏེ་མི་ཚེ་སྟོང་ཚད་ལ་འགྲོ་ཉེན་ཆེ་བས། ཕྱི་རབས་སྒོམ་སྒྲུབ་ཚོས་དང་པོ་ཉིད་ནས་ཡང་དག་པ་ཐེ་ཚོམ་མེད་པའི་མཚན་ལྡན་གྱི་བླ་མ་དམ་པ་ཞིག་མཉེས་པ་གསུམ་གྱིས་མཉེས་ཏེ། ཐ་མལ་མི་རུ་སྐད་ཅིག་ཙམ་ཡང་མི་བལྟ་ཞིང་སངས་རྒྱས་དངོས་མཐོང་གིས་མཛད་ཆོས་སུ་མཐོང་བའི་མོས་གུས་དང་། བསགས་སྦྱང་ཁྱད་པར་ཅན་གནད་དུ་སོང་བའི་སྒོ་ནས་དགོངས་བརྒྱད་ཀྱི་བྱིན་རླབས་འཕོས་ཏེ་རང་གནས་སྙིང་པོའི་དོན་མངོན་སུམ་རང་ཐོག་ཏུ་ངོ་འཕྲོད་ནས་བློ་སྣ་ཚབ་ཚུབ་མི་དགོས་པར་རང་མལ་ན་རང་བློ་བདེ་ཞིང་གུ་ཡངས་སོས་དལ་གྱི་ངང་ལ་སྐྱིད་ཉལ་ཆོག་པ་ཞིག་ཅི་ནས་གལ་ཆེ་ཞེས་འཕྲོས་དོན་དུ་སྨྲས་སོ། །དེ་ཡང་སེམས་ཀྱི་གནད་
ལུགས་བསྒོམ་པའི་ཚེ་ན་འདི་ལྟར་རང་གི་ངོ་བོ་ཡིས་མི་སྟོང་པའི་རྟག་པ་བདེན་གྲུབ་ཅན་ཞིག་བསྒོམ་རྒྱུ་ཡོདན་ཡོད་རྒྱུ་དེ་དེ་ལྟར་བསྒོམ་མོད་ཀྱང་། མཐའ་གཅིག་ཏུ་ཡོད་པའི་ཡོད་ཚུལ་དེ་ནམ་ཡང་མ་མཐོང་སྟེ། ཆོས་ཐམས་ཅད་དམིགས་བསམ་བརྗོད་པ་བྲལ་བའི་ངོ་བོ་ཀ་དག་སྟོང་པ་ཆེན་པོ་ལས་མ་གཡོས་པས་ཡོད་པའི་དངོས་པོ་རྡུལ་ཙམ་ཡང་མ་དམིགས་པའི་ཕྱིར། ཀུན་མཁྱེན་ཆོས་རྗེས། ཡང་བསམ་ཡང་གཞིགས་རིག་པས་དཔྱད་ན་ཡང་། །ཆ་ཤས་དངོས་མེད་རྡུལ་ཙམ་མི་རྙེད་ཅིང་། །སྐད་ཅིག་ཆ་མེད་གཟུང་དང་འཛིན་མེད་པ། །ད་ལྟའི་དུས་ནས་གཤིས་དོན་སྙིང་པོ་གནས། །ཞེས་དང་། དཔལ་རང་བྱུང་ཞབས་ཀྱིས། ཡོད་པ་མ་ཡིན་རྒྱལ་བས་ཀྱང་མ་གཟིགས། །ཞེས་གསུངས་པ་ལྟར་ཡིན་ལ། ཡང་ཅི་ཡང་མེད་པའི་སྟོང་པ་ཕྱང་ཆད་པ་ཁོ་ན་ཡིན་ན་དེ་ལྟར་མེད་པ་
རྐྱང་པ་ཞིག་ཕྱོགས་གཅིག་ཏུ་བཅད་དེ་བསྒོམ་མོད། འོན་ཀྱང་མཐའ་གཅིག་ཏུ་མེད་པ་རྐྱང་པའི་ཁ་ཚོན་ནི་ནམ་ཡང་མ་ཆོད་དེ། སེམས་ཉིད་འཁོར་བ་དང་མྱ་ངན་ལས་འདས་པའི་གཞིར་གྱུར་ཅིང་རང་གདངས་མ་འགགས་ལྷུན་གྲུབ་ཏུ་འདུག་སྟེ། ལྷན་གྲུབ་ངོ་བོ་སུས་ཀྱང་མ་བྱས་པར། །འཆར་ཚུལ་མ་འགགས་ཅིར་ཡང་སྣང་དུ་རུང་། །འཁོར་འདས་ཀུན་འབྱུང་སྔ་ཕྱི་ཐོག་མཐའ་བྲལ། །སྐྱེ་མེད་ལྷན་གྲུབ་མ་ངེས་དོན་གྱི་གཞི། །ཞེས་དང་། མེད་པ་མ་ཡིན་འཁོར་འདས་ཀུན་གྱི་གཞི། །ཞེས་སོགས་ཀྱིས་ཤེས་ནུས་ལ། དེ་བཞིན་དུ་ཡོད་མེད་གཉིས་ཀ་ནི་ཡིན་པའི་འགལ་འདུའི་དབྱེ་ཆོས་ཅན་ཡང་། སེམས་ཉིད་སྐྱེ་བ་མེད་པའི་གཤིས་ལ་ནི་ནམ་ཡང་མི་གནས་ཏེ། ཆོས་གཅིག་ལས་གཉིས་སུ་ཕྱེ་ན་གཉིས་ཆོས་ལས་མ་འངས་ཤིང་གཞི་སེམས་ཉིད་གཅིག་ལ་ཡོད་
མེད་དངོས་འགལ་ཅན་དུ་མི་འདུ་བའི་ཕྱིར། འགལ་འདུ་མ་ཡིན་བརྗོད་བྱའི་ཡུལ་ལས་འདས། །ཞེས་གསུངས་པ་ལྟར་དང་། ཡང་དེ་ལྟར་ཡོད་མེད་གཉིས་ཀ་ལས་བསྐལ་བའམ་དེ་གཉིས་མ་ཡིན་པའི་ཡོད་མིན་མེད་མིན་གྱི་ཤེས་བྱ་ཕུང་པོ་གསུམ་པའི་བདེན་གྲུབ་ཅིག་ཀྱང་ནམ་ཡང་མ་དམིགས་ཏེ། གལ་ཏེ་དེ་འདྲའི་ཕུང་གསུམ་བདེན་གྲུབ་ཅིག་ཡོད་ན། དེ་རྟག་པར་འགྱུར་བས་རྟག་པའི་དངོས་པོ་ཞིག་ཤེས་བྱ་ལ་མི་སྲིད་དོ། །དེས་ན་མན་ངག་གསེར་ཞུན་ལས། སེམས་དེ་ངོས་བཟུང་གང་ཡང་མེད། །ཡོད་ན་ཡོདཔ་དེ་བསྒོམ་སྟེ། །མེད་ན་མེད་པ་དེ་བསྒོམ་ཀྱང་། །དེ་གཉིས་གང་དུ་ཕྱོགས་མི་ཆོད། །ཅེས་དང་། གཉིས་ཀ་མ་ཡིན་གཉིས་ཆོས་སྤངས། །གཅིག་ཏུ་མ་ཆོད་གཉིས་ཀར་སྣང་། །འདི་ཞེས་དམིགས་པ་མེད་པ་འདི། །སེམས་ཉིད་རྒྱལ་པོ་རང་གི་
བབ། །ཅེས་དང་། ཨོ་རྒྱན་ཆེན་པོས། བལྟས་པས་མཐོང་རྒྱུ་མེད་པས་ནམ་མཁའ་འདྲ་།འདྲ་འམ་མི་འདྲ་རང་གི་སེམས་ལ་ལྟོས། །ཞེས་གསུངས་པ་ལྟར། འདི་ཡིན་འདི་མིན་གྱི་ཕྱོགས་སུ་ཆད་པའི་བསྒོམ་པར་བྱ་རྒྱུའི་ཡུལ་ཅུང་ཟད་ཙམ་ཡང་མ་རྙེད་ནས། སེམས་འཛིན་དམིགས་གཏད་ཅན་ཞིག་ཅི་ལ་བསྒོམ་སྟེ་བསྒོམ་དོན་མེད་དོ། །འོན་ཅི་ཡང་མ་རྙེད་པས་དེ་ལྟ་བུའི་བསྒོམ་དེ་རི་བོང་གི་རྭ་ལྟར་སུའི་བློ་ངོར་མི་འཆར་བ་ཞིག་ཡིན་ན་དེས་ཅི་ཕན་སྙམ་ན་དེ་ལྟར་མིན་ཏེ། དཔེར་ན་ཅ་ལག་ཞིག་བོར་སྟོར་སོང་ན། དེ་མ་རྙེད་ཀྱི་བར་དུ་དོན་མི་འགྲུབ་པ་ཡིན་ནའང་། འདི་ནི་དེ་ལྟ་བུ་མིན་ཏེ། འདི་བསྒོམ་དེ་བསྒོམ་གྱི་འཛིན་སྟངས་མ་ལུས་པ་ཞིག་སྟེ་ཅིར་ཡང་མཐོང་བ་མེད་པའི་མཐོང་དོན་མཆོག་ཏུ་གྱུར་པ་རྡོ་རྗེ་ནམ་མཁའི་དཀྱིལ་ལྟ་བུའི་གཤིས་ལུགས་སྤྲོས་མཚན་
དང་བྲལ་བར་ཡང་དག་པ་མཐོང་བའི་མོད་ལ་ད་དུང་དེའི་མ་ཚིམ་པར་ལྟ་བསྒོམ་འཚོལ་འདོད་ཀྱི་ཐང་ཆད་པའི་ངལ་དུབ་ཅུང་ཟད་ཙམ་ཡང་མེད་པར་རེ་རྩོལ་ཐམས་ཅད་ཟད་དེ། ཅི་ཡང་མ་རྙེད་པའི་གཤིས་ཅན་གྱི་ངང་ཚུལ་ཇི་ལྟ་བར་ཤེས་པའི་རྙེད་པ་རང་གི་ལག་ཏུ་མཆིས་པ་མངོན་སུམ་པ་ཡིན་པས། བག་ཡངས་སོས་དལ་བློ་བདེ་བའི་སྒོ་ནས། བརྗོད་མེད་རྙེད་དུ་མེད་པའི་གཤིས་ལུགས་དེ་ཡི་ངང་དུ་རང་བབས་སུ་གནས་པའི་ངོ་མཚར་བའི་ཉམས་ཤིག་སྐྱེའོ་ཞེས། ཨོ་རྒྱན་ཆེན་པོས། སེམས་ཉིད་མ་རྙེད་བྱ་བ་ཅི་ལ་ཟེར། །ཞེས་དང་། པདྨ་བི་ཛས། ངོ་བོ་ལ་རྟག་ཆད་མི་འདུག་ན། །རང་བཞིན་ལ་འཕོ་འགྱུར་མི་འདུག་ན། །ཆོས་དབྱིངས་ལ་བྲི་གང་མི་འདུགན། །འབྲས་བུ་ལཐོབ་ཤོར་མི་འདུག་ན། །ལམནོར་གོལ་བྱ་བ་ཅི་ལ་ཟེར། །སྒོམ་མ་བྱུང་བྱ་བ་ཅི་ལ་ཟེར། །གནད་མ་ཤེས་
བྱ་བ་ཅི་ལ་ཟེར། །དོན་མ་རྟོགས་བྱ་བ་ཅི་ལ་ཟེར། །ཞེས་གསུངས་པ་ལྟར། ཅི་ཡང་མ་མཐོང་བ་དེ་མཐོང་བ་དམ་པའི་མཆོག་ཏུ་གདམས་སོ། །དེ་ལྟར་ཀ་ནས་དག་པའི་སྟོང་སང་ཟང་ཐལ་དམིགས་གཏད་བསམ་བརྗོད་བྲལ་བ་ཡིན་ནའང་། ཅི་ཡང་མི་དྲན་མི་བསམ་མི་ཤེས་པའི་རིག་མེད་བེམ་སྟོང་ནམ་མཁའ་ལྟ་བུ་མིན་པར། ཇི་སྐད་དུ། རང་གི་རང་གསལ་ཉི་མའི་སྙིང་པོ་འདྲ། །འདྲའམ་མི་འདྲ་རང་གི་སེམས་ལ་ལྟོས། །ཞེས་དང་། དངོས་ཆོས་རྡུལ་ཙམ་མེད་པར་ཡང་། །ཀུན་གསལ་ཤེས་པའི་རྩལ་དང་ལྡན། །ཞེས་གསུངས་པ་ལྟར། འཁོར་འདས་ཀྱིས་བསྡུས་པའི་ཆོས་སྣཚོགས་སུ་སྣང་བའི་ཆ་ཐམས་ཅད་མ་འདྲེས་སོ་སོར་འབྱེད་ཤེས་པའི་འགྱུ་དྲན་གྱི་རིག་པའི་རྦ་རླབས་སམ་རོལ་རྩལ་འགགས་པ་མེད་པའི་ཤེས་རབ་རང་བྱུང་གི་མཁྱེན་ཆ་གཅིག་
ཡོད་ཅིག་ཡོད་མོད་དེ། འོན་ཀྱང་ད་ལྟའི་ཤར་ཐོག་ཏུ་གྲོལ་མ་ཤེས་པ་འདི་འདྲའི་གཟུང་དྲན་སྐུ་རྟོག་གི་འགྱུ་བ་ཁ་ཕྱིར་འགྱུས་པའི་བདག་འཛིན་དམ་བྲེང་ངེ་བ། སྐད་ཅིག་རེ་ལ་དགའ་སྡུག་གི་རྣམ་འགྱུར་བརྒྱ་ཡང་སྟོན་ཏེ་ཆགས་སྡང་མེ་ལྟར་འབར་བའི་ཧྲག་ཧྲག་རྩུབ་རྩུབ་ཅན་ཞིག་ཡིན་པའི་ཚོད་མི་སྣང་སྟེ། གནས་ལུགས་རིན་པོ་ཆེའི་མཛོད་ལས། ཤར་གྲོལ་རིས་མེད་བདེ་ཀློང་གཅིག་ཏུ་འཁྱིལ། །ཤར་བའི་དུས་ན་རང་ཤར་རང་ས་ཟིན། །གནས་པའི་དུས་ན་རང་གནས་རང་ས་ཟིན། །གྲོལ་བའི་དུས་ན་རང་གྲོལ་རང་ས་ཟིན། །ཆོས་ཉིད་ཀློང་ནས་ཤར་གནས་རང་གྲོལ་བས། །གཞན་ནས་མ་གཡོས་ཆོས་སྐུའི་རོལ་པ་ཙམ། །ཞེས་དང་། །གང་སྣང་ཅི་ཤར་འཕྲོ་གནས་ཐམས་ཅད་དང་། །དུག་ལྔ་ལ་སོགས་རིག་པའི་རྩལ་རྣམས་ལ། །ཇི་ལྟར་འཆར་བ་དེ་ཉིད་རང་དུས་
དེར། །ངོ་ཤེས་རྩལ་རྫོགས་རང་ཡལ་རྗེས་མེད་འགྲོ། །ཞེས་གསུངས་པ་ལྟར། དཔེར་ན་འཁྱགས་རོམ་ཆུ་བོ་ལ་ཞུ་བ་ཇི་ལྟ་བ་བཞིན་གང་སྣང་ཐམས་ཅད་ཤར་གྲོལ་རྗེས་མེད་འོད་གསལ་ཆོས་སྐུའི་ཀློང་ལས་མ་འདས་པས། མནར་མེད་དམྱལ་བའི་མེ་དང་འཕྲད་ཀྱང་ཉམས་ང་མེད་པའི་འཇམ་འཇམ་སྐྱིད་སྐྱིད་འཕྲོད་འཕྲོད་བདེ་ཕྱམ་ཕྱིམ་ཞིག་ཡིན་པར་བདག་འཇམ་དཔལ་དགྱེས་པའི་རྡོ་རྗེ་ལ་སྣང་ངོ་ཞེས། རྟོག་ཚོགས་ཐམས་ཅད་རང་སན་རང་གྲོལ་དུ་གནས་ཡོད་པ་ལ་དེ་ལྟར་མ་ཤེས་པར་ད་ལྟའི་བློ་དམན་ལས་དང་པོ་བ་རྣམས་ཀྱིས་ཨ་འཐས་བདེན་ཞེན་གྱིས་དགག་སྒྲུབ་བྱས་ཏེ་སེམས་རིག་ཤན་མ་ཕྱེད་པར་སེམས་རྟོག་གི་འགྱུ་བ་ལ་རིག་པར་རློམས་པའི་བློ་ངན་རྣམས་ཆེད་དུ་བསལ་བའོ། །དེ་ལྟར་འཁྲུལ་རྟོག་ཚོགས་བརྒྱད་ཀྱི་རྣམ་ཤེས་ནི་རྫོགས་པ་ཆེན་
པོའི་ལམ་གྱིས་གཏན་ལ་དབབ་བྱའི་དོན་དམ་པའི་ཆོས་མ་ཡིན་ལ། ཆོས་ཅན་སེམས་ཀྱི་ཆོས་ཉིད་རིག་སྟོང་གཉུག་མའི་ཡེ་ཤེས་རང་བྱུང་འདུས་མ་བྱས་པ་རང་བཞིན་གྱིས་འོད་གསལ་བའི་སེམསནི། གྲོལ་ལམ་བླ་མའི་མན་ངག་གིས་དབང་བཞི་པའི་དོན་དུ་ངོ་སྤྲོད་རྒྱུ་དང་། ཐབས་ལམ་རླུང་སེམས་དབང་བསྐུར་ཞུགས་པའི་ལག་རྗེས་ལ་འཆར་རྒྱུའི་དོན་གྱི་ལྷན་སྐྱེས་ཀྱང་ཡིན་གྱི། དེ་ལས་གཞན་དུ་འདུས་བྱས་ཀྱི་སེམས་སྐད་ཅིག་མ་དང་། དངོས་མེད་སྟོང་རྐྱང་གསར་སྦྱར་ལ་གནས་ལུགས་དོན་གྱི་ཡེ་ཤེས་སུ་གོ་བ་ལེན་པ་རྣམས་ཀྱིས་ནི། བླ་མའི་མན་ངག་མེད་པས་རིག་པ་ངོ་མ་འཕྲོད་པའི་མཚང་མངོན་སུམ་དུ་བསྟན་པ་ཡིན་པས། གསལ་བ་ཟེར་ན་འདུས་བྱས། སྟོང་པ་ཟེར་ན་དངོས་མེད་ཅིག་ལས་མི་འཆར་ཞིང་། ཟུང་འཇུག་ཟེར་ན་དངོས་དངོས་མེད་ལྷན་ཅིག་ཚོགས་པ་ཙམ་
ལས་དབྱེར་མེད་རོ་མཉམ་གཅིག་ཏུ་མི་ཤེས་པས། དེ་ཁོ་ན་ཉིདནི་དངོས་མེད་སྟོང་ཀྱང་ཞིག་ལ་བཟུང་། དེ་ཤེས་པ་པོའི་འདུས་བྱས་ཀྱི་བློ་ཞིག་ལ་གོ་བ་བླངསནས། མདོ་ཡི་སྟོང་ཉིད་བཤད་པ་ཡང་དེ་འཆད། སྔགས་ཀྱི་ལྷན་སྐྱེས་དང་འོད་གསལ་བཤད་ན་ཡང་། ལམ་གྱི་ཐབས་མི་འདྲ་བ་ཙམ་ལས་མཐར་ཐུག་དེ་ལས་བོགས་དབྱུང་རྒྱུ་མེད་པར་འདོད་པ་དག་གིསནི། མི་ཚེ་ཐོས་བསམ་ལ་བསྐྱལ་ཀྱང་དངོས་དངོས་མེད་ཀྱི་མཐའ་ལས་འདས་པ་དེ་ཁོ་ན་ཉིད་རང་བྱུང་ལྷན་སྐྱེས་པའི་ཡེ་ཤེས་རིག་སྟོང་ཟུང་འཇུག་གི་དོན་ལ་འཆི་བའི་མཐར་ཐུག་པའི་བར་དུ་གོ་ཡུལ་ཙམ་ཡང་སྐྱེད་མི་ནུས་ལ། དེ་ལྟར་མིན་པར་རིག་པ་ཟབ་མོ་ཇི་བཞིན་ངོ་འཕྲོད་པ་ན་དངོས་མེད་སྟོང་ཀྱང་ཙམ་དང་། འདུས་བྱས་སེམས་ཀྱི་གསལ་ཆ་ཙམ་ཞིག་མིན་པར་སྟོང་གསལ་སྤྲོས་པ་ཐམས་ཅད་
དང་བྲལ་བའི་རང་བྱུང་འདུས་མ་བྱས་པའི་ཡེ་ཤེས་ཡིན་པར་མངོན་སུམ་དུ་ཐག་ཆོད་དེ། སྤྲོས་བྲལ་དོན་གསལ་ཆེན་པོའི་རྒྱུད་ལས། རང་བྱུང་རིག་པ་ཆོས་སྐུ་དེ། །ཅི་ཡི་ངོ་བོར་མ་གྲུབ་པས། །མཚན་མ་འདུས་བྱས་ཐེ་ཚོམ་ཆོད། །ཅེས་དང་། ཆོས་སྐུ་རང་བྱུང་ཡེ་ཤེས་ལ། །རྒྱུ་རྐྱེན་མེད་པས་འདུས་བྱས་མེད། ། ཞེས་གསུངས་ཏེ། འདི་ལ་ཆོས་ཉིད་གཉུག་མའི་སེམས་ཞེས་བྱ་ཞིང་། རང་གསལ་གྱི་ཆ་ནས་སེམས་སམ་རིག་པའི་མིང་ཞེས་བསྟན་ཀྱང་འདུས་བྱས་ཚོགས་བརྒྱད་ཀྱིས་བསྡུས་པའི་སེམས་མ་ཡིན་ལ། དབྱིངས་རིག་དབྱེར་མེད་སོ་སོ་རང་གིས་རིག་པའི་གནས་ལུགས་དེའི་ངང་ནས་བག་ཆགས་སྣ་ཚོགས་འཛིན་པའི་འཕོ་འགྱུར་ཅན་གྱི་སེམས་མེད་པས་ཀུན་གཞིའི་རྣམ་ཤེས་ཇི་ལྟར་ཡིན། ཕྱི་ཚོགས་དྲུག་གི་ཡུལ་དང་། ནང་བདག་ཏུ་འཛིན་པའི་བློ་དང་། དེའི་
ཡུལ་དུ་གྱུར་པའི་མཚན་མ་ཅུང་ཟད་ཀྱང་མེད་པས་སྒོ་ལྔའི་རྣམ་ཤེས་དང་ཡིད་དང་ཉོན་ཡོད་ཇི་ལྟར་ཡིན་ཏེ། རྫོགས་ཆེན་ངེས་དོན་འདུས་པའི་རྒྱུད་ལས། སྔ་ཕྱི་མེད་པར་རང་བྱུང་སྐུ། །སེམས་ལས་མ་བྱུང་སངས་རྒྱས་ཡིན། །འཕོ་འགྱུར་མེད་པས་སྡུག་བསྔལ་བྲལ། །ཞེས་དང་། ད་ཡང་འདུས་པའི་སྙིང་པོ་ཉོན། །ངེས་དོན་སངས་རྒྱས་ཁྱད་པར་ཅན། །ཀུན་གཞི་མེད་ཕྱིར་སྣང་བ་མེད། །དེ་ཕྱིར་སེམས་མེད་རིག་པ་འདི། །སེམས་ལས་མ་བྱུང་སངས་རྒྱས་ཡིན། །ཐེག་དགུའི་ཆོས་ལས་ཁྱད་པར་འཕགས། །ཞེས་དང་། ཚོགས་བརྒྱད་མེད་ཕྱིར་སེམས་དང་བྲལ། །རང་བྱུང་སྙིང་པོའི་ཆོས་ཀྱི་སྐུ། །ཧཱུཾ། ཞེས་གསུངས་པ་ལྟར་ཡིན་ལ། དེ་ལྟ་བུའི་ཕྱི་དང་ནང་གི་མཚན་མ་ཅི་ཡང་མ་དམིགས་པ་ནམ་མཁའ་ལྟ་བུར་དངོས་པོ་དང་མཚན་མའི་ཆོས་གང་ཡང་མེད་
བཞིན་སྟོང་པ་ཟང་ཐལ་དུ་རང་གསལ་དུ་མངོན་སུམ་མཐོང་བ་ཡོད་ཀྱང་། གསལ་ཞིང་རིག་པའི་ངོ་བོ་ལ་དམིགས་གཏད་བྱ་བའི་གཞི་མཚན་མའི་རྣམ་པ་རྡུལ་ཙམ་ཡེནས་མེད་པ་དེ་ལ། རྒྱུ་གང་ལས་བྱུང་། རྐྱེན་གང་གིས་བསྐྱེད་པ་གདགས་སུ་མེད་པས་རང་བྱུང་ཡེ་སྟོང་ཆེན་པོ་རང་འོད་གསལ་བ་ཡིན་པས་རང་བྱུང་ཡེ་ཤེས་ཡིན་ལ། དེནི་ཆོས་ཉིད་ཀྱི་སེམས་སམ་འོད་གསལ་བའི་ཡེ་ཤེས་ཡིན་ཏེ། མན་ངག་མེད་པ་རྣམས་ཡིད་མ་ཆེས་ཏེ། ཆོས་ཉིད་ཀྱི་རིག་པ་དེ་ལྟ་བུ་མེད་ཚོ་པ་མ་ཡིན་ཏེ། སྔགས་སུ་མ་ཟད་ཐུན་མོང་གི་ཐེག་པར་ཡང་། མདོ་སྡེ་རྒྱན་དུ། ཆོས་ཉིད་སེམས་ལས་གཞན་པའི་སེམས་གཞན་ནི། །འོད་གསལ་མ་ཡིན་རང་བཞིན་ལ་བརྗོད་དོ། །ཞེས་དང་། རྒྱུད་བླ་མར། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དོ། །ཞེས་
སོགས་གསུངས་ཏེ། བདེ་གཤེགས་སྙིང་པོ་ཡང་འོད་གསལ་བའི་སེམས་འདི་ལ་བརྗོད་པ་ཡིན་ནོ། །དེ་ལྟ་བུའི་ཆོས་ཀྱི་ངང་ལས་སུ་ཡང་མ་གཡོས་ཀྱང་། རྩལ་སྣང་གློ་བུར་ལས་རླུང་དང་འགྲོགས་པའི་རྣམ་རྟོག་གི་སྣང་བ་ཤར་ཚེ། གཉིས་སྣང་ཅན་གྱི་ཡིད་འགྱུས་ནས་ང་བདག་ཏུ་འཛིན་པ་ལས་རྣམ་ཤེས་ཚོགས་བརྒྱད་བྱུང་བ་ལ་སེམས་ཞེས་བྱ་སྟེ། དེ་སོ་སོར་ཞེན་ནས་གཉུག་མའི་དེ་ཁོ་ན་ཉིད་མ་རྟོགས་པའི་གཉིས་སྣང་འཁྲུལ་བའི་འཁོར་བ་བྱུང་སྟེ་བག་ཆགས་སྣ་ཚོགས་བསགས་པའི་སྒོནས་རྟེན་འབྲེལ་ལུགས་འབྱུང་དུ་ཕྱིན་པས་ན། ནོར་བུ་ཕྲ་བཀོད་ལས། སེམསནི་བག་ཆགས་ཀུན་གྱི་རྩ་བ་སྟེ། །སེམས་ཅན་ཀུན་གྱི་དྲི་མ་དང་པོར་བསྟན། །ཡིདནི་རླུང་དང་འདྲ་སྟེ་བག་ཆགས་བསྡུད། །སེམས་ཅན་ཀུན་གྱི་དྲི་མ་གཉིས་པར་བཤད། དབུགས་ནི་ཆུ་དང་
འདྲ་སྟེ་བག་ཆགས་ཀུན་གྱི་གནས། སེམས་ཅན་ཀུན་གྱི་དྲི་མ་གསུམ་པའོ། །དུག་ལྔ་མེ་དང་འདྲ་སྟེ་སྣང་བ་ཡུལ་ལ་མཆེད། །སེམས་ཅན་ཀུན་གྱི་དྲི་མ་བཞི་པའོ། །འགྲོ་བ་ཀུན་ལ་དེ་བཞིན་རབ་ཏུ་གནས། །ཞེས་དང་། རྫོགས་ཆེན་ངེས་དོན་འདུས་པའི་རྒྱུད་ལས། སེམས་ལ་དུས་གསུམ་ཡོད་པའི་ཕྱིར། །ཚེ་ལ་སྔ་ཕྱི་ད་ལྟ་བྱུང་། །སེམས་ལ་འཕོ་འགྱུར་ཡོད་པའི་ཕྱིར། །དེ་ཕྱིར་ལུས་ལ་སྐྱེ་འཆི་བྱུང་། །ན་ཚ་བདེ་སྡུག་སྣ་ཚོགས་པ། །རང་སེམས་ཡིན་ཕྱིར་འཁོར་བར་སྨིན། །དེ་ཕྱིར་སེམས་ནི་སངས་རྒྱས་མིན། །ཞེས་དང་། རྒྱུན་འདུས་བྱས་མི་རྟག་ཕྱིར། །གཉེན་པོས་འཇིག་ཕྱིར་རྐྱེན་ཁར་འགྲོ། །ཞེས་དང་། ཀུན་གཞིའི་དོན་ནི་འདུས་བྱས་ལ། །དེ་ལ་གཉེན་པོ་མེད་མི་སྲིད། །ལྷག་མཐོང་རང་བྱུང་ཡེ་ཤེས་ཀྱིས། །ཀུན་གཞི་རྩད་ནས་འཇོམས་པར་བྱེད། །ཅེས་དང་། མ་རྟོགས་
རྨོངས་པའི་གང་ཟག་རྣམས། །ཆོས་སྐུ་རང་ཡང་སེམས་ཡིན་ཟེར། །དེ་ཕྱིར་ཚིག་ལས་དོན་མ་གོ། །མིང་ལས་ངེས་དོན་ཤེས་པ་དཀོན། །དེ་ཕྱིར་སེམས་ནི་སངས་མི་རྒྱ། །ཞེས་གནས་ལུགས་རང་བྱུང་གི་ཡེ་ཤེས་མ་རྟོགས་པར་སེམས་ཀྱིས་སངས་མི་རྒྱ་བར་གསུངས་ལ། མདོར་ན་རིག་པ་དང་སེམས་གཉིས་པོ་དེ་དཔེ་ཡིས་ཕྱེ་སྟེ་བསྟན་ན་འདི་ལྟར་རིག་པ་ནི་མ་རིག་པ་ཚོགས་བརྒྱད་དང་བཅས་པའི་རླབས་ཀྱིས་རྣམ་པར་མ་དཀྲུག་པའི་ཆོས་ཉིད་ཡངས་པ་ཆེན་པོ་རྒྱ་མཚོའི་ཆུ་ལྟ་བུ་ཡིན་པས་ཐེག་པའི་རྩེ་མོ་ཨ་ཏི་ཡོ་གའི་ལམ་དུ་ཞུགས་པ་རྣམས་ཀྱིས་དེ་ཉིད་ཐད་དྲང་དུ་སྐྱོང་ཤེས་ན་སེམས་རྟོག་ཆུ་ལ་རིམོ་བྲིས་པ་ལྟ་བུའི་སྤང་གཉེན་སྣ་ཚོགས་པ་ལ་ལྟོས་མི་དགོས་པར་ཆོས་སྐུའི་དགོངས་པ་ལས་འཕོ་འགྱུར་མེད་པ་དང་། ཉན་ཐོས་པ་རྣམས་ཀྱིས་འཁོར་
འདས་ལ་སྐྱོན་ཡོན་དུ་བལྟས་ནས་བདེན་པ་བཞིའི་བླང་དོར་ལ་བརྩོན་པ་ནས། ཨ་ནུའི་ལམ་དུ་བདེ་སྟོང་གི་རྫོགས་རིམ་སྒོམ་པའི་བར་གྱི་རིམ་པ་བརྒྱད་པོའི་ཐེག་པ་ཐམས་ཅད་དུནི། གདོད་མ་ནས་ཆོས་སྐུའི་གཤིས་ལ་གྲུབ་མ་མྱོང་བའི་སེམས་རྟོག་བློ་བུར་བ་ཆུའི་ཆུ་བུར་བཞིན་མི་རྟག་འགྱུར་བའི་ཆོས་ཅན་དེ་ལམ་དུ་བྱས་ཏེ་སེམས་ཀྱི་དྲི་མ་དང་བྲལ་བ་ཆོས་སྐུའི་ཡེ་ཤེས་གཟོད་མངོན་དུ་འགྱུར་བ་འདོད་པ་གཉིས་ཀྱི་ཁྱད་པར་ཏེ། རང་ཤར་ལས། རིག་པ་དང་མ་རིག་པའི་དཔེ་ནི་ཆུ་དང་རི་མོའི་ཚུལ་དེ། ཞེས་པ་དང་། སེམས་དང་རིག་པའི་དཔེ་ནི་ཆུ་ལ་ལྦུ་བའི་ཚུལ། སེམས་ཀྱི་དབང་དུ་མ་གྱུར་ཞེས་དང་། མུ་ཏིག་ཕྲེང་བ་ལས། སེམས་དང་ཡེ་ཤེས་དབྱེ་བ་ནི། །མཁས་པ་རྣམས་ཀྱི་ཤེས་པར་བྱ། །སེམས་ནི་བག་ཆགས་ཀུན་གྱི་གཞི། །ལུས་ཅན་རྣམས་ཀྱི་དྲི་མ་ཡིན། །གཟུང་བ་
ཡུལ་ལ་འཛིན་པ་སེམས། །དེ་ཕྱིར་འཁོར་བའི་ཆོས་ཉིད་དོ། །སེམས་དེ་བྲལ་ན་སངས་རྒྱས་ས། །ལུས་ཅན་ཀུན་གྱི་དྲི་མ་ཟད། །འགྲོ་བ་རྣམས་ནི་སེམས་དེས་འགྲོ། །དེ་མིན་འགྲོ་བར་ནུས་མིན་ཏེ། །དེ་ཕྱིར་འགྲོ་རྣམས་འཁྲུལ་འཁོར་བཞིན། །ཞེས་གསུངས་པ་ལྟར་དང་། གཞན་ཡང་རིག་པ་ནི་རྩལ་སྣང་ཡིད་ཀྱི་ཡུལ་ལ་མི་འཇུག་པས་སོ་སོ་རང་གི་རིག་པའི་ཡེ་ཤེས་ཞེས་བྱ་སྟེ། གནམ་སྟོང་ཟླ་བ་རང་འོད་ཕྱིར་མི་འཕྲོ་བར་གཏིང་ན་གསལ་བ་དང་འདྲ་བར་རང་གནས་ཀྱི་རིག་པའི་གསལ་ཆ་མ་འགགས་པ་ལ་ཡེ་ཤེས་ལྔ་པོ་ལྷན་གྲུབ་ཏུ་ཡོད་ཀྱང་ཡུལ་གྱི་རང་བཞིན་ལ་དང་པོར་མི་རྟོག་རྗེས་སུ་མི་དཔྱོད་རྒྱུན་ཆགས་སུ་མི་འཛིན་པས་རང་ངོ་ལ་མེ་ལོང་གི་གཟུགས་བརྙན་ལྟར་སྣང་ཡུལ་ཐམས་ཅད་མ་འགགས་པར་བཀྲ་ཡང་ཕར་ཡུལ་ཐོག་ཏུ་མི་འཆོར་
ལ། སེམས་ནི་ཁ་ཕྱིར་ལྟས་སུ་ཡུལ་སྣ་ཚོགས་པའི་རྗེས་སུ་འབྲངས་ནས་དེ་དང་དེར་འཛིན་ཅིང་དཔྱོད་པས་ཚེས་བཅོ་ལྔའི་ཟླ་བ་རང་འོད་ཕྱིར་འཕྲོས་ཏེ་ས་གཞིའི་བར་གྱི་ཡུལ་ཐམས་ཅད་ལ་ཁྱབ་ཅིང་འདྲེས་པ་དང་མཚུངས་པ་དང་། ཡང་རིག་པ་ནི་རྩལ་མ་འགགས་པ་སྣ་ཚོགས་སུ་སྣང་ཡང་རང་ངོ་དང་རྩལ་ཤར་བ་གཉིས་ཐ་དད་དུ་གྱེས་ཏེ་ཡུལ་གྱི་ཕྱི་བཞིན་རྟོག་པ་རྗེས་མཐུད་ནས་རྩ་བ་མ་ཆོད་པ་མ་ཡིན་པར་ཕྱིར་མ་དཔྱད། ནང་དུ་མ་བརྟགས། བར་དུ་མ་བཞག་པའི་ཆོས་ཉིད་རྗེན་པར་བུད་པ་ལས་གཞན་དུ་མི་འགྱུར་བས་འགྱུ་བ་ཐམས་ཅད་དངོས་མེད་རང་དག་ལ་འགྲོ་བའི་ཕྱིར་སྣང་ཆས་ཟིལ་གྱིས་མི་ནོན་པ་དཔེ་དངུལ་ཆུ་སར་ལྷུང་སྟེ་རྡུལ་གྱི་གསེབ་ཏུ་ཚུད་ཀྱང་དེ་རྡུལ་དང་མི་འདྲེ་བས་དེ་ལ་གོས་པ་མེད་པ་དང་འདྲ་བ་ཡིན་ལ་སེམས་ནི་ཡུལ་སྣང་རིག་པ་ལ་སྣང་དུས་རང་སྣང་
རང་བཞིན་མེད་པར་ངོ་ཤེས་པའི་ངང་མ་འཁྱོངས་ནས་ཡུལ་གྱི་རྣམ་པ་ལ་ཞེན་ཏེ་བཟུང་བ་དང་འཛིན་པའི་རྣམ་པར་རྟོག་པ་གཅིག་རྗེས་སུ་གཅིག་མཐུད་དེ་བཞིན་རྩ་མ་ཆོད་པར་སྲིད་པ་ཉེ་བར་ལེན་པའི་ཕྱོགས་དང་འདྲེས་ནས་ལས་བསགས་པར་འགྱུར་རོ། །ཀློང་དྲུག་པ་ལས། རང་རིག་བསམ་པ་བྲལ་བ་དང་། །སེམས་ཀྱི་བྱུང་ཚུལ་སྣ་ཚོགས་གཉིས། །འདྲ་འོ་འདྲ་འོནོར་ར་རེ། །ཤེས་རབ་རང་རྩལ་རྫོགས་པ་དང་། །ཡིད་ཀྱི་དྲན་པ་ཕྱིར་ཤོར་གཉིས། །འདྲ་འོ་འདྲ་འོནོར་ར་རེ། །ཞེས་སོ། །འོ་ན་སེམས་ཀྱི་འཆར་ཆ་མི་འགགས་པའམ་ཤར་གྲོལ་ཐུགས་རྗེའི་ཆ་དེ་ལམ་དུ་མི་བྱེད་དམ་ཞེ་ན། ཐུགས་རྗེའི་ཆ་འཆར་གཞིའི་རིག་པ་ཟང་མ་རང་མལ་ལས་མ་གཡོས་པ་ལ་ཟེར་བས་དེ་ལམ་དུ་བྱེད་ཀྱི། རྩོལ་ལས་སེམས་སུ་ཤར་ཟིན་རྟོག་པའི་ཆ་དེ་རྣམ་པ་ཐམས་ཅད་ནས་
ལམ་དུ་མི་བྱེད་དེ། ངོ་བོ་རིག་པ་ལ་བཞག་དུས་སེམས་གང་དགར་རང་སངས་ལ་བསྐྱར་བ་ཡིན་ནོ་ཞེས་སྔར་ཡང་ཡང་གསུངས་པས་གནད་འདི་ཤིན་ཏུ་གལ་ཆེ་སྟེ། ཐུན་མོང་གི་ཐེག་པར་ཡང་། དཀོན་མཆོག་བརྩེགས་པ་ལས། སེམས་དང་ཡིད་དང་རྣམ་པར་ཤེས་པ་དང་བྲལ་ལ། ཏིང་ངེ་འཛིན་གྱི་གནས་ཀྱང་མི་འདོར་བ་སྟེ་འདིའི་དེ་བཞིན་གཤེགས་པ་རྣམས་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པའོ། །ཞེས་དང་། ཚིག་གསལ་ལས། སེམས་དང་སེམས་ལས་བྱུང་བའི་སྤྲོས་པ་ཡང་རྒྱུན་ཆད་པ་དང་། ཞེས་དང་། སེམས་འགགས་པ་དེ་སྐུ་ཡིས་མངོན་སུམ་མཛད། །ཅེས་དངོས་པོའི་གནས་ལུགས་མངོན་དུ་གྱུར་པ་ན་སེམས་དང་བྲལ་བར་གསུངས་ཤིང་། དེ་བཞིན་དུ་རྫོགས་པ་ཆེན་པོ་ནམ་མཁའ་དང་མཉམ་པའི་རྒྱུད་ལས། པདྨ་འདམ་གྱིས་མ་གོས་ལྟར། །བྱང་ཆུབ་
སེམས་ཀྱི་ངོ་བོ་ལ། །གཟུང་འཛིན་དྲི་མ་གཞི་ལ་མེད། །དེ་ཕྱིར་རང་བྱུང་སྙིང་པོ་འདི། །སུས་ཀྱང་མ་བྱས་མཛད་བཅོས་མིན། །རང་བྱུང་རིག་པའི་རྒྱལ་པོ་ཡིན། །དེ་ཕྱིར་འདུས་མ་བྱས་པའི་ཐུགས། །དེ་ལ་གཉེན་པོས་མི་བཤིག་ཕྱིར། །བཞག་ཅིང་བླང་བར་ནུས་པ་མེད། །དེ་དོན་རྟོགས་པའི་རྣལ་འབྱོར་དེ། །མི་ཡི་ལུས་ལ་སངས་རྒྱས་ཐུགས། །རང་བྱུང་སྐུ་ལ་ཚངས་པའི་གསུང་། །དེ་མ་ཐག་ཏུ་ཀུན་བཟང་ཉིད། །ཅེས་དང་། དུས་གསུམ་སངས་རྒྱས་སེམས་དང་བྲལ། །ཚོགས་བརྒྱད་མེད་པས་སེམས་ཀྱང་མེད། །རང་བྱུང་སྙིང་པོ་ཆོས་ཀྱི་སྐུ། །སེམས་ལས་མ་བྱུང་ཡེ་ཤེས་ཡིན། །ཞེས་གསུངས་ཏེ། ཡེ་ཤེས་ནི་སེམས་ལས་བྱུང་བ་མ་ཡིན་ཏེ། སེམས་ཀྱི་གནས་ལུགས་རང་བཞིན་འོད་གསལ་ཡིན་པས་དངོས་པོ་ཀུན་གྱི་ཆོས་ཉིད་སྟོང་པ་ཉིདནི་དངོས་
པོའི་གནས་ལུགས་ཡིན་གྱི་དངོས་པོ་ལས་བྱུང་བ་མིན་པ་ལྟར་གོ་དགོས་ཏེ། རྫོགས་ཆེན་ལྟ་བ་ཡེ་ཤེས་གཏིང་རྫོགས་ཀྱི་རྒྱུད་ལས། ཡེ་ནས་གནས་པའི་རང་བྱུང་སྙིང་པོ་འདི། །རྒྱུ་ལས་མ་བྱུང་རྐྱེན་གྱིས་མ་བསྐྱེད་པས། །རྩོལ་བ་གང་ཡང་མ་བྱས་ཆོས་སྐུ་རུ། །རང་བྱུང་ཡེ་ཤེས་ཡིན་པར་ཡིད་ཀྱང་ཆེས། །ཞེས་དང་། རིག་པ་རང་ཤར་ཆེན་པོའི་རྒྱུད་ལས། བརྗོད་པའི་མཐའ་དང་བྲལ་བའི་ཆོས་སྐུ་ཆེན་པོ་འདི། །ཀུན་ལ་གནས་ཏེ་ཀུན་གྱི་རྟོགས་པ་མེད། །ཡིད་མེད་སེམས་མེད་མ་རིག་འཁྲུལ་པ་མེད། །ཅེས་དང་། སེམས་དང་བྲལ་བའི་རིག་པ་ལ། །སྣ་ཚོགས་སྣང་བ་དུས་གཅིག་རྫོགས། །ཞེས་དང་། རིག་པ་འགྱུར་མེད་ཤེསན་ཆོས་རྣམས་ཀུན་གྱི་འབྲས་བུ་ཡིན། །རིག་པ་སེམས་མེད་ཤེས་ན་ཆོས་རྣམས་ཀུན་གྱི་དྲི་མེད་ཡིན། །རིག་པའི་གྲོགས་ཟླ་ཤེས་ན་ཆོས་རྣམས་ཀུན་
གྱི་སྤང་བྱ་ཡིན། །རིག་པ་ཡེ་མེད་ཤེས་ན་ཆོས་རྣམས་ཀུན་གྱི་གཞི་མེད་ཡིན། །ཀུན་བྱེད་ལས། ངནི་ཡེ་ནས་བཟུང་འཛིན་བྲལ་བའི་ཕྱིར། །ཕྲ་བ་ཞེས་ནི་མིང་དུ་གདགས་སུ་མེད། །ངནི་ཡེ་ནས་རང་བྱུང་ཡེ་ཤེས་པས། །ང་ལ་གཞན་གྱིས་གཏན་ལ་དབབ་ཏུ་མེད། །ཅེས་དང་། སློབ་དཔོན་ཚད་མར་མ་གྱུར་སྤྲེའུ་འདྲ་ཡི། །ལུང་བསྟན་ལམནོར་ལོག་པས་ཟིན་ཏ་རེ། །དེ་བས་གསེར་ལ་ནག་ཚུར་གཏོང་བ་ཡི། །སློབ་དཔོན་ཡང་དག་བསྟོད་པའི་རིན་ཆེན་མཛོད། །རིན་ཐང་དཔག་ཏུ་མེད་པས་བསླུ་བར་འོས། །ཞེས་དང་། ཡོ་ག་ཤིན་ཏུ་རྣལ་འབྱོར་རྫོགས་ཆེན་ལ། །རྒྱུ་དང་འབྲས་བུ་ཡོད་ཟེར་སྨྲ་བྱེད་པ། །དེནིརྫོགས་ཆེན་རྟོགས་པའི་དོན་མི་ལྡན། །ཀུན་རྫོབ་དོན་དམ་གཉིས་སུ་སྨྲ་བྱེདན། །སྒྲོ་དང་སྐུར་པ་འདེབས་པའི་ཚིག་ཡིན་ཏེ། །དེ་ཡིས་གཉིས་སུ་མེད་
པར་རྟོགས་པ་མེད། །དུས་གསུམ་སངས་རྒྱས་རྣམས་ཀྱི་རྟོགས་པ་ཡང་། །གཉིས་སུ་མ་མཐོང་རྣམ་བཞག་ཉིད་དུ་འདོད། །ཅེས་དང་། རྩོལ་མེད་རིག་པ་མངོན་སུམ་ལྟ་བ་རྫོགས་པ་ཆེན་པོའི་ལམ་ལ་བསྟུནན་སེམས་འཛིན་གྱི་མཚན་བཅས་རྫོགས་རིམ་བསྒོམ་པ་ཆོད་ཆུང་བར་གསུངས་པ། ཕྲ་བའི་སྒོར་ཡོར་མིང་བཏགས་ཏེ། །སེམས་ཀྱི་དབེན་པའི་ལམ་འཚོལ་ཞིང་། །དགོན་པའི་རྒྱུད་དུ་དབེན་འཛིན་པ། །བརྟགན་རྣམ་པར་རྟོག་འགྱུར་བསྒོམ། །ཞེས་དང་། བྱང་ཆུབ་ཚོ་སེམསཞི་རྒྱུ་རྐྱེན་མེད་པའི་ཕྱིར། །འཇིག་རྟེན་སྐྱེ་འགགས་ཆོས་ལ་ཚོད་མི་བཟུང་། །བྱང་ཆུབ་སེམསཞི་རྐྱེན་གྱིས་མ་བསྐྱེད་པས། །འཇིག་རྟེན་རྐྱེན་སྐྱེད་ཆོས་ལ་དཔེ་མ་ལེན། །ཞེས་དང་། ཀུན་ཏུ་བཟང་པོའི་ཐུགས་ཀྱི་མེ་ལོང་གི་རྒྱུད་ལས། ཀུན་གཞི་ཆོས་སྐུར་འདོད་ན་ང་ལས་གོལ་བ་ཡིན། །སེམས་ལས་སངས་
རྒྱས་འདོད་ན་ང་ལས་གོལ་བ་ཡིན། །བསྒོམ་པ་ཡུལ་ཅན་འདོད་ན་ང་ལས་གོལ་བ་ཡིན། །སྟོང་པའི་ཡུལ་ལ་ཞེན་ན་ང་ལས་གོལ་བ་ཡིན། །མཚན་བཅས་གཞན་འབྱུང་བསྒོམ་ན་ང་ལས་གོལ་བ་ཡིན། །ཞེས་གསུངས་པ་སོགས་མདོར་ན་རྫོགས་པ་ཆེན་པོ་སེམས་ཀློང་མན་ངག་གི་སྡེ་ཐམས་ཅད་དུ་སེམས་ལས་འདས་པའི་ཡེ་ཤེས་རང་གསལ་གྱི་དོན་གཏན་ལ་དབབ་པ་ཡིན་ཞིང་། ཀུན་གཞི་དང་ཆོས་སྐུ། སེམས་དང་ཡེ་ཤེས། ཡིད་དང་ཤེས་རབ་ཀྱི་ཁྱད་པར་ཕྱེས་ནས་གཉུག་མ་རང་བྱུང་འོད་གསལ་གྱི་དོན་ངོ་སྤྲད་པ་ཡིན་པས་ལུགས་འདི་ཙམ་ལས་ཡི་གེ་མང་བས་མ་བྲིས་ཀྱང་། འདི་ཙམ་གྱི་གོ་ནུས་ལ། རྫོགས་པ་ཆེན་པོའི་རྒྱུད་དུ་མ་ཟད་གསང་བ་འདུས་པ་ལས་ཀྱང་། བདག་དང་ཕུང་པོ་རྣམ་རིག་གི། །ཆོས་བདག་མེད་པ་མཉམ་ཉིད་པས། །རང་སེམས་
གདོད་ནས་མ་སྐྱེས་པ། །སྟོང་པ་ཉིད་ཀྱི་མཚན་ཉིད་དོ། །ཞེས་དང་། ཀྱེ་རྡོ་རྗེ་ལས། ཏིང་འཛིན་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །ཞེས་དང་། འདིར་ནི་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་སྟེ། །འདིར་ནི་མཆོག་ཏུ་བདེ་ཆེན་ཉིད། །ཅེས་གསུངས་པ་འདི་ལྟ་བུ་ཞིག་གཏན་ལ་ཕེབས་ན་རྫོགས་ཆེན་གྱི་ལམ་ཡིན་གྱི། དེ་ལས་གཞན་དུ་སེམས་ཅན་གྱི་རྒྱུད་ལ་གཤེགས་སྙིང་རང་ཆས་སུ་མེད་པ་དང་། ཡོད་ཀྱང་འདུས་བྱས་ཀྱི་གསལ་ཆ་ཙམ་ལས་ཡོན་ཏན་ཡེ་ལྡན་དུ་མེད་པར་འདོད་པ་དང་། འཕགས་རྒྱུད་ཀྱི་ཡེ་ཤེས་དང་སངས་རྒྱས་ཀྱི་རྣམ་མཁྱེན་ཀྱང་ལམ་ཉམས་སུ་བླང་བ་ལ་བརྟེན་ནས་གསར་དུ་བྱུང་བའི་འགྱུར་བཅས་མི་རྟག་པས་བསྡུས་པའི་སེམས་དང་སེམས་བྱུང་གི་ཆ་ཞིག་ལ་གོ་བ་ལེན་པ་རྣམས་
ཀྱིས་ནི། མདོ་དགོངས་པ་འདུས་པ་ལས། ཅི་ཕྱིར་མ་འོངས་དུས་རྣམས་སུ། །གཡོན་ཅན་བཅོས་པའི་གསང་ཚིག་གིས། །དྲི་མེད་གསང་བའི་བསྟན་པ་རྣམས། །དཀྲུགས་འགྱུར་བཀའ་སླད་གཞུང་བོར་ནས། །དོན་མེད་ལོག་ཆོས་རྒྱས་པར་འགྱུར། །ཞེས་དང་། གོང་དུ་དམུས་ལོང་ལམ་ཞུགས་པ། །ཡིད་ཀྱིས་གོམས་པའི་ཚད་དཔག་ནས། །ཉམ་ངའི་ལམ་དུ་རྒྱུག་པ་ལྟར། །ཚོད་དཔག་ཙམ་ལ་ཚད་བཞིན་འབྱུང་། །ཞེས་གསུངས་པ་ལྟར། ངེས་དོན་གསང་བའི་བསྟན་པ་དཀྲུགས་ཤིང་དོན་རྒྱུད་ཀྱི་སྲོག་རྩ་བཅད་པའི་ལས་ལ་བརྩོན་པ་ལས་མ་མཆིས་ཤིང་། དེང་སང་གི་གང་ཟག་ཕལ་ཆེ་བ། རིག་པའི་ངོམ་འཕྲོད། རྒྱུད་ལུང་གི་གནད་མ་རྟོགས། གཞན་གྱི་གཡམ་ལ་རྒྱུག་པར་དགའ་བའི་བློ་ཆུང་ཅལ་སྒྲོགས་རྣམས་ཤིན་ཏུ་མི་རིགས་པའི་ལམ་
ངན་འདི་ལའང་རྗེས་བརྗོད་བྱེད་པ་མང་དུ་བྱུང་བའི་དུས་ངན་གྱི་བབ་ལས་ཏེ། རྫོགས་པ་ཆེན་པོ་ལྟ་བའི་ཡང་སྙིང་ནམ་མཁའ་ཀློང་ཡངས་ཀྱི་རྒྱུད་ལས། རྫོགས་ཆེན་སྐྱེ་མེད་དོན་ཟབ་ཀྱང་། །མ་རྟོགས་པ་ལ་སྡིག་མོར་ཆེ། །ནོར་བུ་རིན་ཆེན་རྙེད་དཀའ་བཞིན། །ཕྱི་མའི་དུས་ཀྱི་མི་ངན་རྣམས། །ངར་དྲག་ངང་ཐུང་ཚོར་རྐྱེན་ལ། །བཀའ་ཡི་དོན་ལ་ཡིད་མི་ཆེས། །གཞུང་མང་སྒྲིན་ཚིག་རྟོག་པ་ཟད། །བྱང་ཆུབ་བས་ཀྱང་ཁེ་གྲགས་བསྒྲུབ། །ལེ་ལོ་ཆེ་བས་གྲུབ་རྟགས་རིང་། །འཇུག་ལ་བརྩོན་ནས་འདོར་བ་རྐྱེན། །ངེས་པའི་དོན་ལ་གལ་ཆེན་འཛུགས། །བདེན་པའི་ཚིག་ལ་སྒྲོ་སྐུར་འདེབས། །ཚིག་ཏུ་ཞིབ་ལ་དོན་དུ་རྩིང་། །ཐོས་བསམ་པསཞི་ངོམ་པར་རིངས། །ཤེས་ནས་མི་སྒྲུབ་ཡལ་བར་འདོར། །གང་འོག་གཞུང་ནི་བསྲེས་ཏེ་སླད། །བཀའ་མིན་མི་ཆོས་དོན་དུ་བྱེད། །
མན་ངག་ཟབ་མོ་ཟོང་དུ་འཚོང་། །ཚིག་ཉུང་ཟབ་མོ་གཏིང་ཕྱིན་ལ། །ཤ་ཐང་མི་བྱེད་སྦོམ་ཞེས་ཁྲོ། །གདམས་ངག་བློ་ཆུད་མི་ཟོན་པར། །དེ་ཉིད་རྟོགས་པར་བྱེད་པ་ལ། །ཡིད་མི་ཆེས་པས་རིག་པ་འཛུག །མང་པོར་བཤད་ཀྱང་དོན་མེད་ལ། །མཁས་པ་ཡིན་ཞེས་ཡོན་ཏན་བརྗོད། །བླ་མ་སྨོད་པའི་གང་ཟག་ལ། །ཁོ་བདེན་ཟེར་ཞིང་རྗེས་སུ་འཇུག །གསང་བའི་མན་ངག་མ་གོ་བར། །སློབ་བུའི་མ་བྱས་སློབ་དཔོན་འཁེངས། །ཁུངས་ནས་བརྒྱུད་པའི་མན་ངག་ལ། །མངོན་པར་ཡིན་པར་མི་བརྩི་བར། །རང་བཟོ་ཁ་ཚབ་བསྲེས་པ་ལ། །ཡིད་ཆེས་བྱེད་ཅིང་དམ་པར་འཛིན། །ལྟ་དམན་རྣམས་ཀྱིས་ངོ་བསྲུང་བྱེད། །དེ་ལྟ་བུའི་དུས་བྱུང་ཚེ། །དོན་བསྟན་སྐད་ཅིག་དེ་ཉིད་ལ། །རྒྱུད་ལུང་སངས་རྒྱས་སྐྲག་ཅིང་སྔངས། །ཉན་ཐོས་མདོ་སྡེ་བརྒྱལ་ཞིང་།
འབོགས། །ལྷ་དང་ལྷ་མིན་སྲིན་པོའི་ཚོགས། །སྒྲོ་སྐུར་འདོགས་པའི་གང་ཟག་རྣམས། །འདི་ལ་ཚེ་ཡི་བར་ཆད་དང་། །གཏན་དུ་དམྱལ་བ་ཆེན་པོར་ལྟུང་། །འཇིགས་པ་སྣ་ཚོགས་དེ་ལ་འོང་། །མགོ་ལུས་ཚལ་པ་སྟོང་དུ་འགས། །རིག་འཛིན་རྣམས་ཀྱིས་སྤོང་བར་འགྱུར། །དེ་ཕྱིར་ཤིན་ཏུ་གསང་བའི་དོན། །སྣོད་ལྡན་སློབ་བུ་མི་རྙེད་དཀོན། །ཞེས་དང་། ངེས་དོན་ལྟ་བ་འཆད་པ་ལ། །ལྟ་དམན་ཚུལ་འཆོས་སྡེ་པ་ནི། །སྔགས་པར་ཁས་ཆེའི་མུ་སྟེགས་དང་། །དྲང་དོན་ཐེག་པ་ལ་ཞེན་རྣམས། །ཞེ་སྡང་བྱེད་པའི་དུས་བྱུང་ཚེ། །ཁ་ཟེར་ཕྱར་ཁ་གཏོང་བ་དང་། །ཞེས་སོགས་དང་། རྫོགས་ཆེན་ནམ་མཁའ་དང་མཉམ་པའི་རྒྱུད་ལས། རྣ་བརྒྱུད་མན་ངག་མི་ལྡནན། །རང་བརྟགས་བློ་ཡིས་ཅི་བརྟག་ཀྱང་། །ལུང་འདི་རྟོགས་པར་མི་འགྱུར་རོ། །ངེས་ལུང་གདམས་ངག་མེད་པ་ཡི། །རྣ་
བརྒྱུད་མེད་པའི་སློབ་དཔོན་གྱིས། །རང་ལ་ངེས་པའི་དོན་མེད་པས། །གཞན་འབྲེལ་གཉིས་ཀ་ཕུང་པའི་རྒྱུ། །ཞེས་དང་། གཞན་གྱིས་ནུབ་པར་མི་འགྱུར་ཏེ། །སེངྒེའི་ཁོག་པ་རང་འཇིག་ལྟར། །ང་ཡི་སྲས་སུ་ཁས་བླངས་པས། །གསང་བའི་ལུང་འདི་ནུབ་པར་བྱེད། །ཅེས་སོགས་རྒྱ་ཆེར་སྐུ། གསུངས་པ་དང་། ཡེ་ཤེས་གསང་བའི་སྒྲོན་མ་རིན་པོ་ཆེམན་ངག་གི་རྒྱུད་ལས། གྲུབ་མཐའ་ལོག་པ་ཆོས་ཀྱི་བདུད། །ངོ་བོ་མེད་པ་དམིགས་འཛིན་བྱས། །རང་བྱུང་ཉིད་ལ་རྒྱུ་ཡི་རྩལ། །མ་བཅོས་ཅི་ཡང་མ་ཡིན་ལ། །ཅིར་ཡང་འཛིན་པའི་བསམ་པས་བརྟག །བགྲོད་མེད་འབྲས་བུ་ལྷུན་གྲུབ་ལ། །ལམ་བརྒྱུད་བགྲོད་པས་བགྲོད་མེད་བསླད། །དེས་ན་མ་བཅོས་དངོས་པོ་ལ། །ལོག་རྟོག་འཛིན་པའི་བློ་ཡིསནི། །ཇི་ལྟར་དཔྱད་ཀྱང་མ་ཡིན་པས། །མ་དཔྱད་རང་བཞིན་
བཞག་པས་གོ། །ཞེས་གསུངས་པ་ལྟར། འདུས་བྱས་ཀྱི་སེམས་ཉིད་ཀྱི་འདུས་མ་བྱས་སྟོང་རྐྱང་ཡུལ་དུ་བྱས་པ་ཙམ་ལ་དེ་ཁོ་ན་ཉིད་དུ་འདོད་པ་ནི་བྱིས་པ་ཤེད་མ་བྱེ་བ་ཁོན་སྟེ། སོ་སོ་རང་རིག་རྗེས་མཐུན་ཙམ་ཡང་མ་སྐྱེས་པས་བློ་ལ་དེ་ཙམ་ལས་ཅི་ཡང་འཆར་མ་ནུས་ནས་རྣམ་རྟོག་གི་གྲུབ་མཐའ་བྱིས་པ་འདྲིད་པར་བྱེད་པ་ཡིན་པས་དེ་ཡི་ཕྱོགས་འཚོལ་བ་སྤང་སྟེ། ཟབ་མོ་རྣ་བརྒྱུད་ཀྱི་གདམས་པ་ཕྱག་རྫོགས་ཀྱི་གྲུབ་མཐའ་རྙིང་མའི་རིག་འཛིན་བླ་མ་དམ་པ་རྣམས་ཀྱི་ཞལ་ལས་མཉན་ཅིང་ཚུལ་བཞིན་དུ་རང་རྒྱུད་ལ་སྦྱར་བནི་ཅི་ནས་གལ་ཆེ་སྟེ། འཇམ་མགོན་མི་ཕམ་རིན་པོ་ཆེའི་ཟབ་ཁྲིད་དུ། མདོ་རྒྱུད་བརྒྱ་ཕྲག་འཆད་པའི་སྟོན་ཆེན་དང་། །ཀུན་གྱི་བླ་མར་བསྐུར་བ་ཕལ་མོ་ཆེས། །རང་སེམས་གནད་དུ་བཀུག་ནས་མ་བསྒོམ་པས། །ཕལ་བ་ལས་ཀྱང་ཅུང་ཟད་འཕགས་པ་མེད། །
ཀུན་རྟོག་མགོ་རྒོད་འདི་ཡང་དབང་ཆེ་ལ། །མཁྱེན་དང་ནུས་པའི་ཡོན་ཏན་ཀྱང་མ་ཐོབ། །དོན་མེད་ཆུ་རླབས་འཁྲུགས་འདིའི་རང་སེམས་ལ། །བལྟས་ཤིང་བལྟས་ནས་སྐྱོ་བ་ཆེར་བསྐྱེད་དེ། །དམ་པའི་མན་ངག་ཟབ་མོའི་རྗེས་ཞུགས་ནས། །རང་སེམས་ཁ་ལོ་དུལ་བའི་ཅང་ཤེས་ཀྱིས། །དོན་གཉིས་འབྲས་བུ་འབྱོར་ལྡན་ཡིད་འོང་གནས། །མྱུར་བ་ཉིད་དུ་མངོན་པར་ཐོབ་མཛོད་ཅིག །བརྩོན་པ་ཀུན་གྱི་ནང་ན་དོན་ཆེ་བ། །རང་སེམས་དུལ་བར་སྦྱོར་བ་དེ་ཁོ་ན། །བུམ་བཟང་དཔག་བསམ་ནོར་བུའི་གཏེར་གྱིས་ཀྱང་། །མཚོན་མིན་ཡོན་ཏན་ཆེན་པོའི་གནས་ཉིད་ཡིན། །དེ་ཕྱིར་འདི་དོན་ལེགས་རྟོགས་བསྐལ་བཟང་གིས། །སེམས་ཀྱི་རྣལ་འབྱོར་གནས་ལ་རབ་གུས་པས། །བྱ་བ་ཀུན་སྤངས་རྩེ་གཅིག་ཡིད་གྱུར་ཏེ། །དོན་བཟང་གཏན་གྱི་འདུན་མ་སྒྲུབས་
འཚལ་ལོ། །ཞེས་གསུངས་པ་ལྟར་ལགས་པས། མཆོག་དམན་མེད་པར་ཀུན་གྱི་སྙིང་བཅུད་དུ་འཆང་བ་ལ་ཐལ་མོ་སྦྱར་རོ། །མི་ཚེ་ཟད་ཟད་དུ་ཐོས་བསམ་ལ་བརྩོན་ཀྱང་། །ཐ་སྙད་གོ་ཡུལ་གྱི་རྟོག་གེ་དེས་བསྒྲིབསནས། །གནས་ལུགསཐིག་པོ་ཞིག་རྟོགས་དུས་མི་གདའ། །བདག་འདྲའི་སྐལ་མཉམ་རྣམས་རྟོག་གེ་ལ་མ་ཞེན། །ས་དགེ་དཀར་རྙིང་གི་བཞེད་གཞུངནི་གང་ལ། །རྩོལ་མེད་བློ་འདས་ཀྱི་གསང་ལམ་ཞིག་གདའ་བས། །ཕྱོགས་འཛིན་ཆགས་སྡང་གི་གྲུབ་མཐའ་དེ་བོར་ནས། །ཡབ་མེས་གོང་མ་ཡི་གཤེགས་ཤུལ་དེར་བཞུད་མཛོད། །ཅེས་རང་འདྲའི་སྐལ་མཉམ་རྣམས་ལ་ཅུང་ཟད་ཕན་དུ་སྙམས་ནས་ཡིག་ཚོགས་ལ་མ་འཛེམ་པར་གོང་འོག་བར་གྱི་གསལ་བྱེད་དུ་བྲིས་སོ། །གསུམ་པ་དེའི་ལམ་གཞན་དང་མཐུན་པ་དང་མི་མཐུན་པའི་ཚུལ་བཤད་པ་ལ། མི་མཐུན་
པའི་ཚུལ་དང་། མཐུན་པའི་ཚུལ། ཞུལ་བྱུང་ཁས་ལེན་མི་འགལ་བའི་ཚུལ། འགལ་བ་ལྟར་སྣང་བ་བསལ་བ་དང་བཞི་ལས། དང་པོ་ནི། དུས་གསུམ་རྫས་ཡོད་དུ་འདོད་པའི་བྱེ་བྲག་སྨྲ་བ་དང་། ཕྱི་དོན་རང་རིག་གཉིས་ཀ་བདེན་གྲུབ་ཏུ་འདོད་པའི་མདོ་སྡེ་པ། ཆོས་ཐམས་ཅདནང་ཤེས་པའི་བདག་ཉིད་དུ་འདོད་པ་སེམས་ཙམ་པའི་རྣམ་རིག་སྨྲ་བ་དང་། སྣང་སྟོང་ཕྱོགས་རེར་ཞེན་པའི་དབུ་མ་པ་ཕལ་གྱིས་ཏེ། དེ་ལྟར་རང་སྡེ་གྲུབ་མཐའ་སྨྲ་བ་དེ་དག་གིས་རྒྱ་ཆད་ཕྱོགས་ལྟུང་ཐམས་ཅད་བྲལ་བའི་གཤིས་ལུགས་རིག་ཁམས་དྲི་མེད་ཀྱི་ཡིད་བཞིན་ནོར་བུའི་གཟུགས་ལྟ་བུ་ལ་བྱེ་མདོས་ཕྱི་དོན་བེམ་པོ་བདེན་གྲུབ་ཀྱི་དངོས་པོར་འདོད་པས་ལམ་སྟོང་པ་ཉིད་ཀྱི་དར་ཟབ་ཀྱིས་བྱི་དོར་བྱར་མེད་པའི་ས་ཡི་གོང་བུ་ལྟ་བུར་མཐོང་། སེམས་ཙམ་པས་གསལ་ཞིང་རིག་པའི་ཤེས་
པ་དེ་ཕྱི་གཟུང་བའི་ཆོས་བཤིག་པའི་ཐོ་ཆེན་དུ་གྱུར་ཀྱང་། ནང་འཛིན་པ་སེམས་ཉིད་རང་གི་ངོ་བོ་ལ་ཚུར་མི་དཔྱོད་པར་འཛིན་པ་བདེན་གྲུབ་ཏུ་གཟུང་བ་དག་གི་དབང་གིས་མུས་ཀྱང་གཞིགས་དཀའ་བའི་ལྕགས་གོང་ངར་མ་ལྟ་བུར་མཐོང་། དབུ་མ་རང་རྒྱུད་པས་གཟུང་འཛིན་གཉིས་དོན་དམ་པར་མེད་ཀྱང་། ཐ་སྙད་མ་དུ་རང་གི་མཚན་ཉིད་ཚུགས་ཐུབ་ཀྱི་དངོས་པོར་འདོད་པས་རང་བཞིན་རང་ས་ན་ཡོད་ཡོད་དུ་བཀྲ་བའི་འོད་བཟང་པོའི་མར་མེ་ལྟ་བུར་འཛིན། རང་སྟོང་པས་ཆོས་ཐམས་ཅད་ཐ་སྙད་དུ་ཡང་མ་གྲུབ་པའི་མེད་དགག་སྟོང་རྐྱང་གི་དབྱིངས་སུ་རྒྱས་གདབ་པས། མེད་སྣང་སྟོང་གཟུགས་འཇའ་ཡི་དུམ་བུ་ལྟ་བུར་བཟུང་། གཞན་སྟོང་པས་ཆོས་ཐམས་ཅད་ཀྱི་གནས་ཚུལ་སྟོང་པ་ཉིད་འདི་ཡེ་ནས་ཆོས་ཉིད་ཀྱི་ཚུལ་དུ་བཞུགས་པས་རྟག་བརྟན་བདེན་གྲུབ་བོ་སྙམ་པའི་འཛིན་
ཞེན་གྱི་དམིགས་གཏད་ཀྱིས་ནམ་ཡང་མི་འགྱུར་མི་འཕོ་བའི་ནམ་མཁའི་འོད་མདངས་ལྟ་བུར་རྟོགས་ལ། ཡང་དབུ་མ་པ་ཁ་ཅིག་གིས་བདེན་པ་གཉིས་ལ་བཟང་ངན་ཅུང་ཟད་ཙམ་ཡང་མེད་པར་གཉིས་མེད་མཉམ་པ་ཉིད་དོ་སེམས་པའི་མངོན་ཞེན་གྱིས་ཕྱི་གསལ་ནང་གསལ་ཤེལ་གོང་དྲི་མ་མེད་པ་ལྟ་བུར་མཐོང་སྟེ་དེ་དང་དེ་ལྟ་བུའོ་ཞེས་རང་རང་གི་ཐ་སྙད་སྣ་ཚོགས་ཤིག་འདོགས་པར་བྱེད་ཀྱང་། ཆོས་ཐམས་ཅད་ཀྱི་གནས་ལུགས་དྲི་མ་མེད་པ་ཀུན་ཤོང་གི་རྫོགས་པ་ཆེན་པོ་རིག་སྟོང་ཟུང་འཇུག་རང་བྱུང་ཡེ་ཤེས་ཀྱི་ཁམས་ཡིད་བཞིན་ནོར་བུ་ལྟ་བུ་དེ་ནི་མཐོང་མ་མྱོང་བར་སྟོར་ནས་འདུག་གོ་ཞེས་བློས་བྱས་སེམས་ཀྱི་དྲྭ་བས་བློ་འདས་ཀྱི་ཡེ་ཤེས་སྒྲོགས་སུ་བཅུག་པས་བསྒྲིབས་ཏེ་དཔེར་ན་སྲིན་བུ་རང་ཉིད་ཀྱིས་ཁ་ཆུའི་བྱིང་ཞིང་འཆིང་བ་ལྟ་བུ་སྟེ། མན་ངག་གསེར་
ཞུན་ལས། སྟོང་པས་ཅི་ཕན་སྣང་བས་ཅི། །གཉིས་མེད་སུ་ཡིན་བསྒོམ་རྒྱུ་ཅི། །ཞེས་དང་། ཨོ་རྒྱན་ཆེན་པོས། འདི་ཉིད་རྟོགས་ན་བ་གླང་རྫི་ཡང་གྲོལ། །ཐེག་དགུའི་བཤད་པ་ཀུན་ལ་མཁས་གྱུར་ཀྱང་། །འདི་ཉིད་མ་རྟོགས་པཎྜི་ཏ་ཡང་འཁྲུལ། །ཞེས་གསུངས་པ་ལྟར་རོ། །གཉིས་པནི། ས་སྐྱ་དང་དགེ་ལྡན་ཀར་འབྲུག་གི་མཁས་གྲུབ་མང་པོས། གསལ་སྟོང་གཉིས་སུ་མེད་པའི་འཛིན་མེད་ཀྱི་གནས་ལུགས་དྭངས་མ་དང་རྣམ་ཀུན་མཆོག་ལྡན་གྱི་སྟོང་ཉིད་སྤྲོས་པ་དང་བྲལ་བའི་དབུ་མ་དང་། མ་བཅོས་གཉུག་མ་ལྷན་སྐྱེས་ཀྱི་ཆོས་སྐུ་ཕྱག་རྒྱ་ཆེན་པོ་ཞེས་མཚན་ཐ་དད་པ་རེ་བྱས་པ་དེ་དག་ཐམས་ཅད་ཀྱང་ཡོད་པ་མིན་ཅིང་མེད་པའང་མིན་པའི་རང་བཞིན་གྱི་ཚུལ་དུ་གྱུར་པས་ཁས་བླང་གི་རྣམ་པ་ཀུན་དང་བྲལ་བ་སོགས་དང་། གཞན་ཡང་། ཐིག་ལེ་ཉག་གཅིག་རང་བྱུང་ཡེ་
ཤེས། འདའ་ཀ་ཐུགས་ཀྱི་ཡེ་ཤེས། དང་པོའི་སངས་རྒྱས་ལ་སོགས་སྣ་ཚོགས་ཀྱི་མཚན་དང་། ངེད་ཀྱི་ལུགས་འདིའི་འཁོར་འདས་དབྱེར་མེད་དུ་ལྟ་བ་ཡིན་པས་གཞན་ལས་ཁྱད་པར་དུ་འཕགས་སོ་ལྟ་བུ་ལ་སོགས་པ་སྣ་ཚོགས་པའི་ཐ་སྙད་ཀྱི་ཞལ་ཕོ་འབྲུག་ལྟར་སྒྲོགས་པ་ནི་མང་མོད་ཀྱང་། དེ་དག་གི་ལྟ་བ་དེ་རང་རང་གི་གཞུང་དེ་དང་དེའི་དགོངས་པ་ལྟར་ལུང་རིགས་མན་ངག་དྲི་མ་མེད་པ་དང་རང་གི་མྱོང་བའི་སྟོབས་ཀྱིས་སེམས་ལས་འདས་པའི་བདེན་གཉིས་དབྱེར་མེད་ཀྱི་ཡེ་ཤེས་ཆོས་ཐམས་ཅད་ཀྱི་གཤིས་ལུགས་མ་ནོར་བ་ཞིག་ཡིན་ན་ནི་ཤིན་ཏུ་ལེགས་པས་བདག་ཀྱང་ཡི་རང་ངོ་ཞེས་གསུངས་པའི་ཤུགས་ལ་ཟབ་གསལ་གཉིས་མེད་ཀྱི་ཡེ་ཤེས་ཁས་ལེན་ཀུན་དང་བྲལ་བ་དང་། བརྗོད་མེད་བསམ་མེད་སོགས་ཁ་ནས་བསྒྲགས་ཤེས་པས་ཀྱང་
དོན་དུ་མྱོང་བ་ཐོན་མཁན་དཀའ་ཞེས་གདམས་པ་འདི་སྙིང་བཅུད་དུ་འཚང་འོས་སོ་ཏེ་ལྷག་བཅས་ཀྱི་སྒྲ་སྦྱར་ཏེ། དེ་ལྟར་གཤིས་ལུགས་ཐིག་པོ་ཞིག་མ་ཡིན་པར་ཁ་ནས་བརྗོད་ཤེས་པ་ཙམ་ལ་ཅི་ཆ་ཡོད་དེ། རང་རང་གི་གཞུང་འདིའི་དགོངས་པ་མ་ནོར་བ་ལོན་པའི་སྐྱེས་བུ་དམ་པ་ཡང་དག་པའི་ལྟ་བ་དང་ལྡན་པ་རྣམས་ཀྱིས་ཚིག་ཙམ་མིན་པར་གཞལ་ན་དོན་གྱི་མཛུབ་མོ་འཛུགས་ས་དེ་ཅི་འདྲ་བ་ཞིག་ཡིན་པར་འདུག་པས་ཏེ་སོམས་ཤིག་དང་། གསལ་སྟོང་དབྱེར་མེད། སྟོང་རྟེན་འབྱུང་ལྷན་སྐྱེས་ཡེ་ཤེས་སོགས་ཐ་སྙད་ཅི་བཏགས་ཀྱང་། མཚན་ལྡན་གྱི་བླ་མ་དམ་པས་འོད་གསལ་རྫོགས་པ་ཆེན་པོ་གཅར་ཐོག་ཏུ་ངོ་སྤྲད་པ་འདི་ག་རང་ལ་འབབ་པར་འདུག་ཅེས་པཎ་ཆེན་བློ་བཟང་ཆོས་རྒྱན་གྱིས་ལྷན་ཅིག་སྐྱེས་སྦྱོར་གའུ་མར། ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་
རྫོགས་ཆེན་དང་། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང་། །ངེས་དོན་ལུང་རིགས་ལ་མཁས་ཤིང་། །ཉམས་མྱོང་ཅན་གྱི་རྣལ་འབྱོར་པས། །དཔྱད་ན་དགོངས་དོན་གཅིག་ཏུ་འབབ། །ཅེས་གསུངས་པ་ལྟར། ཉམས་མྱོང་ཅན་གྱི་རྣལ་འབྱོར་པས་དཔྱད་ན་རྒྱ་བོད་གྲུབ་ཐོབ་ཐམས་ཅད་དགོངས་པ་གཅིག་ཏུ་འབབས་ཟེར་བ་ལྟར། ཐ་སྙད་ཅི་བཏགས་ཀྱང་མཛུབ་མོ་འཛུགས་ས་རིག་སྟོང་ཟུང་འཇུག་གི་དགོངས་པ་དེ་འདིག་རང་ཡིན་ཏེ། ཆོས་ཐམས་ཅད་ཀྱི་གནས་ལུགས་གཅིག་ལས་གཉིས་དང་གསུམ་སོགས་ཡོད་པར་མི་འཐད་པས། དེ་ཉིད་ལམ་གང་ནས་མཐོང་ཡང་མཐོང་དོན་ལ་མི་འདྲ་བའི་ཁྱད་པར་ཡོད་མི་རིགསཞེས་ཕྱག་རྫོགས་དབུ་གསུམ་དགོངས་པ་གཅིག་ཏུ་འབབ་པའི་དོན་ནོ། །གསུམ་པནི། ཕྱི་རོལ་གྱི་དོན་འདི་རྣམས་
ཐ་སྙད་ཙམ་དུ་ཡང་སྣང་མི་རུང་བའི་རྒྱང་ཆད་གཏན་མེད་ཀྱི་ཚུལ་དུ་དགག་པ་མིན་པས། ཕྱི་དོན་ལ་མངོན་པར་ཞེན་པའི་དོན་སྨྲ་སྡེ་གཉིས་རྣམ་ཡུལ་སྣང་རྣམས་སྤངས་མི་དགོས་པར་རང་ས་ནས་རང་གྲོལ་དུ་སོང་བའི་གནས་ལུགས་རྫོགས་པ་ཆེན་པོ་འདི་ལ་དགྱེས་དགྱེས་མཛོད་ཅིག །དེ་བཞིན་དུ་སེམས་ཉིད་རང་བཞིན་བབ་ཀྱིས་སྟོང་པར་འདུག་པས་གསལ་རིག་བདེན་གྲུབ་ཀྱི་དངོས་པོ་ཞིག་མེད་ན་ཡང་མཁྱེན་པའི་ཡེ་ཤེས་ཀྱི་ཆ་མ་འགགས་པར་རང་ཤར་བ་འདི་འཐད་པས། ཆོས་ཐམས་ཅད་རྣམ་པར་རིག་པ་ཙམ་དུ་སྨྲ་བའི་རང་རིག་རང་གསལ་ལ་ཞེན་པའི་སེམས་ཙམ་པ་ཀུན་དགྱེས་དགྱེས་མཛོད་ཅིག །འཁོར་འདས་ཀྱི་ཆོས་ཐམས་ཅད་དོན་ལ་ཐ་སྙད་ཙམ་དུ་ཡང་རང་གི་མཚན་ཉིད་ཀྱིས་མ་གྲུབ་པར་གདོད་ནས་སྤྲོས་པ་དང་བྲལ་བར་བཞུགསན་ཡང་སྣང་ཚུལ་རྟེན་འབྲེལ་གྱི་
འཆར་སྒོ་རྣམས་ཕན་ཚུན་མ་འདྲེས་པར་བཀྲ་བས་རང་རྒྱུད་ཤར་གསུམ་མཁན་པོ་སྟེ། ཡེ་ཤེས་སྙིང་པོ་མདོ་སྡེ་དཔྱོད་པ་དང་། ཞི་བ་འཚོ་དང་། ཀ་མ་ལ་ཤཱི་ལ་གཉིས་རྣལ་འབྱོར་སྤྱོད་པའི་དབུ་མ་པ་ཡིན་པས་དེ་དག་ཀུན་དགྱེས་དགྱེས་མཛོད་ཅིག །གཞི་ལམ་འབྲས་གསུམ་གྱི་ཆོས་ཐམས་ཅད་ཐ་སྙད་སྣང་ཚུལ་ཙམ་དུ་ཡོད་ཀྱང་བདེན་གྲུབ་ཀྱི་ཁས་ལེན་རྡུལ་ཙམ་ཡང་མེད་པས། ཆོས་ཐམས་ཅད་མེད་དགག་སྟོང་ཀྱང་དུ་སྨྲ་བའི་རང་སྟོང་ཕལ་པ་རྣམས་དགྱེས་དགྱེས་མཛོད་ཅིག །བྲལ་སྨིན་གྱི་ཡོན་ཏན་དྲུག་ཅུ་རྩ་བཞི་སོགས་མྱང་འདས་ཀྱི་ཡོན་ཏན་རྣམས་གསར་དུ་གནས་འགྱུར་གྱི་ཚུལ་དུ་ཐོབ་པ་ལྟར་སྣང་ཡང་དོན་ལ་བྲལ་ཐོབ་མེད་པར་རྡུལ་དང་སྐད་ཅིག་མའི་ཆོས་ལས་འངས་པའི་མཁའ་ཁྱབ་མཁའ་ཡི་རྡོ་རྗེ་དང་འདུ་བྲལ་མེད་པར་རང་བཞིན་ལྷན་གྲུབ་ཀྱི་ཚུལ་
དུ་བཞུགས་པས། སྟོང་ཉིད་རྟག་པར་སྨྲ་བའི་གཞན་སྟོང་ཕལ་པ་ཀུན་དགྱེས་དགྱེས་མཛོད་ཅིག །གནས་སྐབས་ཆོས་ཅན་དང་ཆོས་ཉིད་གནས་སྣང་སོགས་ཀྱི་ངོས་ནས་བདེན་པ་གཉིས་སོ་སོར་ཕྱེས་ན་ཡང་ངོ་བོའི་དོན་ལ་མི་འགལ་བ་ཐ་དད་མེད་པར་མཉམ་ཉིད་དུ་བསྲུངས་ཀྱང་ཆོག་གིས་བདེན་གཉིས་དབྱེར་མེད་ཀྱི་དོན་ལ་མངོན་པར་ཞེན་པའི་ཟུང་འཇུག་རབ་ཏུ་མི་གནས་པ་སྨྲ་བའི་དབུ་མ་ཕལ་པ་ཀུན་དགྱེས་དགྱེས་མཛོད་ཅིག །གསལ་སྟོང་འཛིན་མེད་ཀྱི་གནས་ལུགས་དེ་རིག་སྟོང་ཟུང་འཇུག་འདི་ལ་ཟེར་བས། ས་སྐྱའི་ལམ་འབྲས་སློབ་བཤད་བརྒྱུད་འཛིན་རྣམས་དགྱེས་དགྱེས་མཛོད་ཅིག །སྤྲོས་པ་ཐམས་ཅད་དང་བྲལ་བའི་ཟབ་མོ་དབུ་མའི་ལྟ་བའི་ཕུ་ཐག་མཐར་ཐུག་པ་དེ་རྫོགས་ཆེན་གྱི་གསང་ལམ་འདི་ནས་ཆོད་པས་བཀའ་གདམས་གསར་མ་རྣམས་ཀྱིས་མ་དཔྱད་བྱར་མེད་དུ་
བཞག་ན་ཧ་ཤང་གི་ལྟ་བར་འགྱུར་རོ་སྙམ་པའི་ངང་ཐུང་སྟེ་འཁུ་འཕྲིག་མ་བྱེད་ཅིག །ཅེས་དེ་ཡང་དབུ་ཕྱག་སོགས་ཐེག་པ་ཆེན་པོའི་ལམ་གང་ཡིན་ཡང་དངོས་གཞིའི་སྐབས་སུ་རྩོལ་མེད་རང་བབ་ཏུ་བཞག་པའི་སྒོ་ནས་བློ་འདས་ཡེ་ཤེས་མངོན་སུམ་དུ་མཐོང་བ་ལས། དཔྱད་རྟོག་གི་རང་དུས་ན་ཆོས་ཉིད་ནམ་ཡང་མཐོང་བ་མི་སྲིད་པས་བྱར་མེད་དང་སྤྲོས་བྲལ་ལ་རྣམ་པ་ཀུན་ཏུ་ཐན་དུ་བལྟ་ཆེ་ན་བལྟ་བ་པོ་རང་ཉིད་བློ་འདས་ཀྱི་ལམ་ལས་ཕྱིར་ཕྱོགས་པ་ཙམ་དུ་ཟད་དོ། །མ་བཅོས་ལྷན་སྐྱེས་ཀྱི་ཕྱག་རྒྱ་ཆེན་པོ་དེ་འདི་ལ་ཟེར་བས། རྟོགས་ལྡན་རྒན་པོ་རྣམས་ཀྱིས་དང་པོ་ཉིད་ནས་མ་བཅོས་པའི་ཡེ་ཤེས་ལ་རེ་བའི་ཨུ་ཚུགས་མི་མཛད་པར་ཡང་དག་པའི་གནས་ལུགས་ཐིག་པོ་ཞིག་མ་མཐོང་བར་དུ་ལུང་རིགས་དྲི་མ་མེད་པས་ཐེ་ཚོམ་ལྟ་བའི་གདར་ཤ་གཏིང་ནས་
ཆོད་པར་མཛོད་ཅིག །ཡང་དག་པའི་རིགས་ལམ་དྲི་མ་མེད་པའི་ཐོས་བསམ་གྱི་དཔྱད་པ་དེ་འདི་ལ་མཛའ་བས་ཡང་དག་ལྟ་བའི་དོན་ལ་ངེས་པ་ཅུང་ཟད་ཙམ་ཡང་མ་སྐྱེས་པར་ཐད་ཀར་སོར་བཞག་གི་བླུན་བསྒོམ་ཐ་མལ་དུ་བྱེད་པའི་ཐོས་པ་ཉུང་བ་རྣམས་སངས་རྒྱས་ཀྱི་བསྟན་པ་རིན་པོ་ཆེའི་མཚན་གཞི་ལུང་རྟོགས་རྣམ་པ་གཉིས་ལས། རྟོགས་པའི་སྔོན་དུ་འགྲོ་དགོས་པའི་ལུང་གི་བཤད་པ་འདི་ལ་མ་སྐྲག་གོ་ཞེས་གང་ཟག་དབང་རྣོན་གྱི་སྐལ་ལྡན་འགའ་ཞིག་མ་གཏོགས་ཐོས་བསམ་ལ་མ་བརྟེན་པར་དང་པོ་ཉིད་ནས་ལྷན་སྐྱེས་ཡེ་ཤེས་དེ་གཅིག་ཆར་དུ་མཐོང་བར་དཀའ་བས། དེས་ན་མང་ཐོས་ཡོན་ཏན་དང་ལྡན་པའི་བཤེས་གཉེན་དམ་པའི་མདུན་དུ་ཐོས་བསམ་ཕྱོགས་མེད་དུ་མཛད་ཅིང་ཐོས་དོན་སྙིང་པོར་རང་གི་རྒྱུད་ལ་སྦྱར་ཏེ། གྲུབ་མཐའི་ཁ་འཛིན་དང་ཐོས་པ་ཁ་ཁྱེར་གྱི་རླུང་
གིས་ཀྱང་མ་བདས་ཤིང་། བླུན་བསྒོམ་མུན་པའི་རུམ་དུ་གཉིད་དུ་ཡང་མ་ཡུར་བ་ཐོས་བསམ་བསྒོམ་གསུམ་གཅིག་དྲིལ་གྱིས་ཆོས་སྒོ་བརྒྱད་ཁྲི་བཞི་སྟོང་གི་རྩ་བར་སེམས་འདུལ་བ་འདི་ལ་འབད་པར་མཛོད་ཅིག །ཅེས་ཀུན་ལས་ཁྱད་འཕགས་ཀུན་དང་མི་འགལ་ཟེར་བའི་དཔེ་བཞིན་བསྟན་པ་ཐམས་ཅད་འགལ་མེད་ལམ་གྱི་གནད་གཅིག་ཏུ་རྟོགས་པའི་དོན་ཏོ། །བཞི་པ་ནི། དབུ་ཕྱག་རྫོགས་ གསུམ་སོགས་སྒྲུབ་བརྒྱུད ་ཤིང་རྟ་བརྒྱད་ཀྱི་དགོངས་པའི་བབ་སོ་ཐམས་ཅད་དོན་དུ་གཅིག་པ་ཡིན་མོད། འོན་ཀྱང་གནས་ལུགས་ཟབ་མོའི་དོན་ལ་གོམས་པ་ཆུང་བ་རྣམས། རང་རང་གི་འདོད་གཞུང་ཙམ་པོ་བ་དེ་ལ་ཆགས་ཤིང་ཞེན་ཏེ་གནས་སྐབས་ལྟ་བ་རྟོགས་བྱེད་ཀྱི་ཐབས་གདུལ་བྱའི་བསམ་པ་དང་མཐུན་པར་ཡང་དག་པའི་གདམས་ངག་ཟབ་མོའི་གནད་གསང་མི་འདྲ་
བ་སྟོན་པའི་བཀའ་སྲོལ་དུ་མ་ཞིག་ཡོད་པ་ཀུན། མཐར་རྟོགས་པའི་དངོས་གཞི་ཐོབ་ཚེ་དགོངས་པའི་ཆུ་བོ་ཐམས་ཅད་ཡེ་ཤེས་ཀྱི་ཀློང་དུ་འབབ་པར་མ་རྟོགས་པར་རྒྱལ་བས་བསྟན་པའི་མདོ་སྔགས་གྲུབ་མཐའི་རྣམ་བཞག་ཐམས་ཅད་སྤྱང་ཀུའི་གཟན་དུམ་ལྟར་ཁ་ཁ་སོ་སོའི་འགལ་འདུ་ཅན་དུ་བཟུང་བ་ཡིན་སྲིད་དེ། ཁོ་བོ་འཇམ་པའི་རྡོ་རྗེསནི་རྒྱལ་བ་ཀུན་ཏུ་བཟང་པོའི་བཀའ་བཞིན་ཡང་དག་པའི་ཤེས་རབ་ཀྱིས་མཐོང་བའི་དོན་ཚུལ་བཞིན་དུ་སྨྲས་པ་ཡིན་གྱི། ཁྱེད་ཅག་ལ་མི་གུས་པ་ཕྲ་མོ་ཙམ་ཡང་ཡོད་པ་མ་ལགས་ཀྱང་། རང་གི་ཞེ་འདོད་ཀྱི་གྲུབ་མཐའ་དང་མ་འགྲིགས་ནས་ཕོག་ཐུག་བྱུང་ན་ནི་བཟོད་པར་མཛོད་ཅིག་ཅེས་རང་གཞན་ཀུན་གྱི་ཕྱོགས་ཐམས་ཅད་ལ་གདམས་པ་སྟེ། དེ་ཡང་མེ་ཏོག་གང་ལ་ཕོག་པའི་ལྷ་སྐལ་རང་ཉིད་གང་གི་བསྟན་ཞབས་སུ་སྐྱེས་པ་དེ་ཡི་རྗེས་བརྗོད་བྱེད་
པ་ནི་ཡ་རབས་དམ་པའི་ལུགས་སྲོལ་ཡིན་པས་ཤིན་ཏུ་འོས་ཀྱང་། མཆོག་འཛིན་དང་ཕྱོགས་འཛིན་འདིན་ཐར་འདོད་རྣམས་ལ་གེགས་སུ་ཆེ་བས་རང་ཚུགས་མ་ཤོར་བར་གདམས་པའི་བཀའ་སྲོལ་ཀུན་གནད་དོན་གཅིག་ཏུ་འབབ་པར་ཤེས་ནས་ཆོས་མཛད་ཡོངས་ལ་དག་སྣང་འབྱང་བ་ཞིག་ཅི་ནས་གལ་ཆེ་ཞིང་། འོན་ཀྱང་གཞན་གྱི་གཡམ་རྒྱུགས་འབའ་ཞིག་གིས་རང་རང་གི་ལུགས་ཀྱི་ཆོས་དང་གྲུབ་མཐའ་དེ་དོར་ནནི་མཐར་གདམས་པའི་བཀའ་སྲོལ་ཀུན་ནུབ་པར་འགྱུར་བས་དེ་ལྟན་རྒྱལ་བའི་བསྟན་པ་རིན་པོ་ཆེའི་མཚན་གཞི་གང་ལ་འཇོག །དེསན་བསྟན་པའི་ཁུར་འཛིན་པའི་སྔོན་བྱོན་མཁས་གྲུབ་རྣམས་ཀྱིས་ཀྱང་རང་ལུགས་མཆོག་ཏུ་སྒྲུབ་ཅིང་གཞན་ལུགས་ཆེས་ཆེར་དགག་ཚུལ་མཛད་པ་ཡང་དགོས་པ་དེ་ཡི་དབང་གིས་བྱུང་བས་དགོངས་གནད་རྒྱུ་
ཆེན་པོ་ཡོད་པ་ཤེས་པར་བྱའོ། །བཞི་པ་དེ་ལྟར་མཐོང་བས་བློ་བདེ་སྐྱེས་ཚུལ་ལ། རྟོགས་པ་ཟབ་མོ་རྒྱུད་ལ་སྐྱེ་བའི་རྐྱེན་གཞུང་ལུགས་རྣམ་དག་ལ་བསམ་སྟེ་བློ་བདེ་བ། རྟོགས་པ་རང་རང་གི་ངོ་བོ་ལ་བསམ་སྟེ་བློ་བདེ་བ། དྲིན་ཅན་རྩ་བརྒྱུད་བླ་མ་ལ་བསམ་སྟེ་བློ་བདེ་བ། མ་རྒན་འགྲོ་བའི་ཕན་བདེ་ལ་བསམ་སྟེ་བློ་བདེ་བ་དང་བཞི་ལས། དང་པོནི། ཐེག་པ་ཐམས་ཅད་ཀྱི་རྩེ་རྒྱལ་གསང་ཆེན་ཨ་ཏིའི་ཡོ་གའི་དགོངས་པ་ཟབ་མོ་འདི་མི་ཕམ་པ་ཁོ་བོས་རང་སྟོབས་ཀྱིས་ཇི་བཞིན་དུ་རྟོགས་པ་མིན་ཀྱང་། ཕ་མེས་རོང་ཀློང་རྣམ་གཉིས་དང་། པད་འབྱུང་དགའ་རབ་སོགས་ཀྱི་གཞུང་ལུགས་དྲི་མེད་ཀྱི་རྟ་ཕོ་བཟང་པོ་ལྟ་བུ་དེ། དད་བརྩོན་ཤེས་རབ་ཀྱིས་བཞོན་ཚུལ་ལ་མཁས་པས་ཏེ། རཏ་གླིང་མཛོད་ཁང་གཉིས་པ་ལས། ཕུ་ཐག་མྱོང་བས་མ་བཅདན། །རྟོག་དཔྱོད་ཚིག་གི་ཡོ་ལང་ལ། གླང་
ཁུར་མང་པོ་བློར་ཆུད་ཀྱང་། །ཚིག་རྐྱང་ནམ་མཁའ་འདོམ་འཇལ་འདྲ། །གོ་བ་ཡིད་ཀྱི་རི་མོ་ཡིན། །རིག་པས་བརྟགས་ན་གང་ཡང་རུང་། །ཇི་སྲིད་འདུ་ཤེས་མ་ཟདན། །ཐ་སྙད་གོ་ཡུལ་ཟད་མི་འགྱུར། །ཚིག་གིས་ཇི་ལྟར་བརྟགས་དཔྱད་ཀྱང་། །ལུས་ཀྱི་དོན་ཡང་མི་རྟོགསན། །སེམས་ཀྱི་གནས་ལུགས་དེ་ལྟར་ཡིན། །ཞེས་གསུངས་པ་ལྟར། ཁ་ཕྱིར་བལྟས་ཀྱི་དཔྱད་པས་ཆོས་ཚུལ་ཀུན་ལ་མིང་འདོགས་ངོ་ཤེས་ཀྱང་། ནང་ཆོས་ཉིད་ཀྱི་དོན་གཅིག་ལ་སྡུག་པའི་ལམ་གྱི་གཡང་ས་ཐེ་ཚོམ་ཀུན་རྟོག་གི་འཕྲང་ལས་ཐར་ཏེ། དེ་ཡང་ཐལ་འགྱུར་ལས། གཅིག་ཤེས་པསནི་ཀུན་གྲོལ་ཕྱིར། །གཉིས་དང་གསུམ་གྱི་གྲངས་མཐའ་ཟད། །ཅེས་དང་། ཆོས་དབྱིངས་རིན་པོ་ཆེའི་མཛོད་ལས། ཇི་ལྟར་རི་རྒྱལ་རྩེ་མོར་ཕྱིན་པ་ན། །དམའ་བའི་ལུང་རྣམས་དུས་གཅིག་
མཐོང་བ་སྟེ། །ལུང་གི་རྩེ་མོའི་རང་བཞིན་མཐོང་དང་བྲལ། །དེ་བཞིན་ཨ་ཏི་རྡོ་རྗེ་སྙིང་པོ་ནི། །ཐེག་པའི་ཡང་རྩེ་དོན་ཀུན་གསལ་བར་མཐོང་། །འོག་མའི་ཐེག་པས་འདི་དོན་མཐོང་བ་མེད། །ཅེས་གསུངས་པ་ལྟར། འཁོར་འདས་གཉིས་ཀྱི་གསང་ལམ་སེམས་ཉིད་གཅིག་གི་དོན་ཤེས་པས་རི་རྒྱལ་རྩེ་ནས་རི་ཕྲན་མཐོང་བ་བཞིན་ཐེག་པ་བརྒྱད་ཀྱི་འགགས་གནད་ཀུན་རང་གྲོལ་བའི་ཨ་ཏི་རང་ལམ་གྱི་ལྟ་བསྒོམ་ཡངས་པའི་ཐང་ཆེན་ལ་སླེབས་སོ་གསུངས། གཉིས་པ་ནི། སེམས་ཉིད་ཀྱི་དོན་དེ་ཐག་རིང་པོར་གཞན་ཞིག་ནས་བཙལ་དགོས་པ་མི་འདུག་སྟེ་འཚལ་མཁན་རང་ཉིད་ལ་ཚུར་བལྟས་པས་དམིགས་གཏད་ངོས་བཟུང་དང་བྲལ་བ་འདི་ཀ་སེམས་ཉིད་ཀྱི་དོན་ཡིན་ལ། རྩལ་གང་ཤར་ལ་དགག་བསྒྲུབ་ཀྱི་མ་ཞེན་པས་རང་གིས་རང་མི་བསླུ་སྟེ། འཛིན་ཞེན་མེད་པར་རང་བབས་
སུ་བཞག་པས་གཞན་གཅིག་གིས་གྲོལ་བཅུག་མ་དགོས་པར་ཁོ་རང་རང་སར་རང་གྲོལ་དུ་འདུག་སྟེ། ཐལ་འགྱུར་ལས། རང་སེམས་གྲོལ་བ་ཞེས་བྱ་བ། །གཅིགནས་གཅིག་ཏུ་སོང་བ་མེད། །གང་གིས་བཅིང་གྲོལ་མེདཔའི་སེམས། །གཞི་གནསརྫོགས་པས་འགྲོ་འོང་མེད། །བརྟགས་པས་མ་རྙེད་རྒྱུ་མཚན་མེད། །གཞི་རྩ་མེད་པས་སྟོང་གསལ་གནས། །རང་གསལ་གནས་པའི་སེམས་དེ་ནི། །གནད་ཀྱིས་གྲོལ་བས་ཕྱོགས་རིས་མེད། །དུས་ཀྱིས་གྲོལ་བས་ལྟོས་གཞི་མེད། །འབད་མེད་གྲོལ་བས་བརྩོན་འགྲུས་མེད། །གདེང་གིས་གྲོལ་བས་འབད་རྩོལ་མེད། །ཅེས་དང་། ཁྱུང་ཆེན་ལས། གང་གིས་མ་བསླད་རང་རིག་གྲོལ་བའི་གནད། །ལུས་དང་སེམས་དང་ཉོན་མོངས་རང་གི་ཆོས། །མི་ཤེས་བྱིས་པ་རྣམས་ཀྱི་རྒྱུར་སྣང་ཡང་། །མ་བཞག་མ་
བཅོས་རྣལ་འབྱོར་རང་རིག་ལ། །ཡེ་ནས་རང་གྲོལ་སུས་ཀྱང་བཀྲོལ་བ་མེད། །མ་བཅོས་རང་སར་བཞག་པས་འབད་ཅི་དགོས། །ཞེས་དང་། མུ་ཏིག་ཕྲེང་བ་ལས། རྐྱེན་རྣམས་རྐྱེན་གྱིས་གྲོལ་བས་ན། །དམིགས་པའི་ཆོས་ལའང་ང་མི་ལྟོས། །ཡུལ་རྣམས་ཡུལ་གྱིས་གྲོལ་བ་ལ། །གཟུང་འཛིན་གཉིས་ལ་ང་མི་ལྟོས། །རྒྱུ་ཉིད་རྒྱ་ཡི་གྲོལ་བ་ལ། །འཁོར་འདས་གཉིས་ལ་ང་མི་ལྟོས། །ཆོས་རྣམས་ཆོས་ཀྱིས་གྲོལ་བ་ལ། །ཐ་སྙད་ཚིག་ལ་ང་མི་ལྟོས། །སེམས་ཉིད་སེམས་ཀྱིས་གྲོལ་བ་ལ། །མཚོན་བྱེད་བློ་ལ་ང་མི་ལྟོས། །ཞེས་གསུངས་པ་ལྟར་དང་། ཡུལ་གཟུགས་སྒྲ་སོགས་ཀྱི་སྣང་བ་ཅི་ཤར་ཡང་ཆེད་དུ་མི་འགོག་སྟེ་གང་ཤར་ཐམས་ཅད་མ་བཅོས་གཉུག་མ་གཞིའི་ཆོས་ལས་མ་འདས་པས། ཡོན་ཏན་རིན་པོ་ཆེའི་མཛོད་ལས། མེ་ལོང་ལྟ་བུར་དྭངས་བའི་ཤེས་པ་ལ། །སྣང་
ཡུལ་མ་འགགས་གཟའ་སྐར་བཞིན་བཀྲ་ཡང་། །རྣམ་པའི་བློ་ཡིས་གོས་པར་མ་གྱུར་ན། །གཟུང་བའི་ཡུལ་དང་འཛིན་སེམས་འབྲེལ་ཆད་པས། །སོ་སོ་རང་རིག་རྣམ་པར་མི་རྟོག་པའི། །ཡེ་ཤེས་བླ་མའི་ས་ལ་ད་ལྟ་ཕྱིན། །ཅེས་དང་། ཐལ་འགྱུར་ལས། དབང་པོའི་སྒོ་རྣམས་མ་བཅོས་པར། །ཅོག་གིས་བཞག་པ་གནད་ཡིན་ལ། །ཞེས་དང་། ཡི་གེ་མེད་པ་ལས། སེམས་འཛིན་ལྟ་བསྒོམ་མེད་ན་ཆོས་སྐུ་དངོས་པོ་ཡིན། །ལྟ་བའི་རྩལ་གསུམ་འབྱོངས་ན་སྣང་བ་ཆོས་སྐུའི་ཀློང་། །བྱ་བྱེད་གཡེང་བ་མེད་ན་ཆོས་ཉིད་བདེ་བའི་ས། །གཅིག་པུ་དལ་བར་འདུགན་རྩལ་གསུམ་རང་ལས་བྱུང་། །ཐད་ཀར་གྲོགས་སུ་ཤེས་ན་ཅོག་བཞག་གཅིག་གི་ངང་། །དེ་ཡང་རྒྱུན་དུ་གནས་ན་དེ་ལ་ཅི་ཞིག་བྱ། །སྣང་བ་ཆེན་པོ་ཀུན་ལ་ཡང་དག་གནས། །གསང་བའི་སྔགས་ཀྱི་
དངོས་པོ་དེ་ཉིད་དོ། །ཞེས་གསུངས་པ་ལྟར། རྟག་ཆད་ཀྱི་མཐའ་ཐམས་ཅད་དང་བྲལ་བའི་རང་གནས་རང་ཤར་གྱི་ཆོས་སྐུའི་ཡོ་ལང་དུ་འདུག་པ་དེ། ཆེད་འཛིན་དང་དགག་སྒྲུབ་མེད་པར་བསྐྱང་ངོ་ཞེས་ཚོགས་དྲུག་རང་གྲོལ་དང་། དུག་ལྔ་རང་གྲོལ་སོགས་ཀྱི་གདམས་པ་ཟབ་མོ་ཡང་བསྟན་ཏོ། །གསུམ་པ་ནི། སྔར་རང་གནས་རིག་པ་ཡེ་ཤེས་དེ་ཅུང་ཟད་ཙམ་མ་མཐོང་ཡང་ཀ་དག་ལྷུན་གྲུབ་ཟུང་འཇུག་ཅེས་པའི་མིང་སྙན་པོ་ཙམ་ཞིག་གི་རྗེས་སུ་བསྙེགས་ཏེ་ཡིད་དཔྱོད་ཀྱི་རྩོལ་བས་གཟུང་འཛིན་འཁོར་བའི་རྣམ་རྟོག་ལས་སྐད་ཅིག་གིས་སྐྱོབ་པའི་རིག་པ་དྲིན་ཅན་དེ་མ་མཐོང་བར་ཡུན་རིང་དུ་སྟོར་བ་དེ་ད་ལྟ་རང་སེམས་ཐ་མལ་གྱི་ཤེས་པ་འདི་དང་འབྲལ་མེད་ལྷན་ཅིག་ཏུ་བཞུགས་པར་མངོན་སུམ་དུ་སྣང་བ་འདི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མའི་དྲིན་ལས་བྱུང་
དྲི་མེད་ཀྱི་ནོར་བུའི་གཟུགས་ལ། །ཕྱི་དོན་བདེན་གྲུབ་ཀྱི་ས་ཡི་གོང་བུ། །འཛིན་པ་བདེན་བཟུང་གི་ལྕགས་གོང་ངར་མ།. །མཚན་ཉིད་ཚུགས་ཐུབ་ཀྱི་འོད་བཟང་མར་མེ། །མེད་དགག་སྟོང་རྐྱང་གི་འཇའ་ཡི་དུམ་བུ། །སྟོང་ཉིདབདེན་ཞེན་གྱིནམ་མཁའི་འོད་མདངས། །བདེན་གཉིས་མངོན་ཞེན་གྱི་ཤེལ་གོང་དྲི་མེད། །ཐ་སྙད་སྣ་ཚོགས་ཤིག་འདོགས་པར་བྱེད་ཀྱང་། །རིག་ཁམས་ནོར་བུ་དེ་སྟོར་ནས་འདུག་གོ། །ས་དགེ་ཀར་འབྲུག་གི་མཁས་གྲུབ་མང་པོས། །གསལ་སྟོང་འཛིན་མེད་ཀྱི་གནས་ལུགས་དྭངས་མ། །རྣམ་ཀུན་མཆོག་ལྡན་གྱི་སྟོང་ཉིད་སྤྲོས་བྲལ། །མ་བཅོས་ལྷན་སྐྱེས་ཀྱི་ཕྱག་རྒྱ་ཆེན་པོ། །ཡོད་མིན་མེད་མིན་གྱི་ཁས་བླངས་བྲལ་སོགས། །སྣ་ཚོགས་ཐ་སྙད་ཀྱི་ཞལ་ཕོ་སྒྲོགས་ཀྱང་། །ལུང་རིགས་མན་ངག་དང་མྱོང་བའི་སྟོབས་ཀྱིས། །སེམས་
འདས་ཡེ་ཤེས་ཤིག་ཡིན་ན་ལེགས་ཏེ། །མཛུབ་མོ་འཛུག་ས་དེ་ཅི་ཞིག་ཡིན་ཨང་། །ཕྱི་དོན་ཆུང་ཆད་དུ་དགག་པ་མིན་པས། །དོན་སྨྲ་སྡེ་གཉིས་རྣམས་དགྱེས་དགྱེས་མཛོད་ཅིག །རང་བཞིན་སྟོངན་ཡང་མཁྱེན་ཆ་འཐད་པས། །རྣམ་རིག་སྨྲ་བ་རྣམས་དགྱེས་དགྱེས་མཛོད་ཅིག །སྤྲོས་དང་བྲལན་ཡང་སྣང་ཚུལ་བཀྲ་བས། ཤར་གསུམ་མཁན་པོ་ཀུན་དགྱེས་དགྱེས་མཛོད་ཅིག །ཡོད་ཀྱང་བདེན་གྲུབ་ཀྱི་ཁས་ལེན་མེད་པས། མེད་དགག་སྒྲུབ་རྣམས་དགྱེས་དགྱེས་མཛོད་ཅིག །རྡུལ་དང་སྐད་ཅིག་མའི་ཆོས་ལས་འདས་པས། །སྟོང་ཉིད་རྟག་སྒྱུ་ཀུན་དགྱེས་དགྱེས་མཛོད་ཅིག །བདེན་པ་གཉིས་མི་འགལ་བར་བསྐྱུངས་ཀྱང་ཆོག་གིས། །བདེན་གཉིས་མངོན་ཞེན་ཀུན་དགྱེས་དགྱེས་མཛོད་ཅིག །གསལ་སྟོང་འཛིན་མེད་དེ་འདི་ལ་ཟེར་བས། །སློབ་བཤད་བརྒྱུད་འཛིན་རྣམས་དགྱེས་
སྟེ་མི་ཕམ་རྣམ་རྒྱལ་རྒྱ་མཚོའི་སྙིང་ལ་བསྒྱུར་བའི་ཚེ། ཨ་ལ་ལ་ཞེས་ཤིན་ཏུ་ངོ་མཚར་ཏེ་ཟབ་གསང་རྫོགས་པ་ཆེན་པོའི་གནས་ལུགས་རྗེན་པར་སྟོན་པའི་ཚིག་རྣམས་གབ་སྦས་མེད་པར་གང་ཤར་ཐོལ་བྱུང་གི་ཚུལ་དུ་ལྷུག་པར་སྨྲས་སོ་གསུངས། གཉིས་པ་ནི། ཞེས་པ་རྩོལ་བྲལ་རང་བྱུང་གི་རིག་པ་མངོན་སུམ་ངོ་ཤེས་ཀྱི་ལྟ་བའི་ཉམས་གླུ་སྒྲ་སྙན་གྱི་རོལ་མོ་ཞེས་བྱ་བ་འདིའང་རིགས་ཐམས་ཅད་ཀྱི་ཁྱབ་བདག་འཇམ་པའི་དབྱངས་དངོས་ཀུན་མཁྱེན་རྡོ་རྗེ་གཟི་བརྗིད་ཀྱིས། རྒྱལ་བ་ཙོང་ཁ་པའི་བསྟན་པར་ཞུགས་སོ་ཅོག་གི་ནང་ན་རྒྱལ་མཚན་གྱི་རྩེ་མོའི་ཏོག་ལྟར་མངོན་པར་མཐོ་བ་ལྕང་སྐྱ་རོལ་པའི་རྡོ་རྗེའི་དབུ་མའི་ལྟ་མགུར་གྱི་ཚིག་རིས་དང་ཅི་ནས་མཚུངས་པའི་རྙིང་མའི་ལྟ་མགུར་ཞིག་བྲིས་ཞེས་པའི་བཀའ་ལུང་སྤྱི་བོར་མཆོད་དེ་ཐེག་པ་ཐམས་ཅད་ཀྱི་རྩེ་རྒྱལ་
རྩོལ་བྲལ་ཨ་ཏིའི་ལྟ་བ་མཆོག་ལ་ལྷག་པར་མོས་པའི་མི་ཕམ་བློ་གྲོས་དྲི་མེད་ཅེས་བྱ་བས་མཁས་གྲུབ་བྱེ་བའི་བསྟི་གནས་རྫོང་གསར་བཀྲ་ཤིས་ལྷ་རྩེར་སྦྱར་བ་མངྒ་ལམ་སྟེ་བཀྲ་ཤིས་གསུངས། དེ་ཡན་ཆད་ཀྱིས་གཞུང་དོན་ཆ་ཚང་བར་ལེགས་པར་བཀྲལ་ཟིན་ཏོ། །སླར་སྨྲས་པ། ལྟ་ངན་སྙིགས་ལྔའི་མུན་པ་འཁྲིགས་པ་ན། །སྲས་བཅས་རྒྱལ་བའི་ཐུགས་བསྐྱེད་རྒྱ་མཚོ་ལས། །གསང་ཆེན་བསྟན་པའི་ཉི་མ་གསར་ཐོན་པ། །དོན་གྱི་འཇམ་དབྱངས་མི་ཕམ་ཆོས་རྗེར་འདུད། །གང་གི་མཁྱེན་པའི་ལམ་དུ་མ་སོང་བའི། །ཀུན་མཁྱེན་མཛོད་དུ་ཅུང་ཟད་ཡོད་མིན་ནའང་། །ཐུགས་ཀྱི་ཡང་ཞུན་རིན་ཆེན་སྙིང་པོའི་ཁམས། །གཏན་གྱི་དབུལ་སེལ་ཟབ་གསང་ལྟ་བའི་མགུར། །ཀུན་བཟང་དགོངས་པའི་ཐུགས་བཅུད་ཨ་མྲྀ་ཏ། །རང་བཟོ་རྟོག་གེའི་རྙོགས་མས་མ་བསླད་པའི། །བརྒྱུད་ལྡན་
རིག་འཛིན་ཞལ་རླངས་ཐོ་ལེ་བ། །དད་བསོད་གསེར་གྱི་ཡོལ་གོར་བསྐྱིལ་འདི་འོ། །མཚོན་བྱ་ཟབ་དོན་འོད་གསལ་གཉུག་མའི་གཤིས། །རིག་སྟོང་ཟུང་འཇུག་ལྷུན་མཉམ་ཁྱབ་བརྡལ་ཆེ། །གཟོད་ནས་བྲི་གང་བྲལ་བ་འཇམ་པའི་དབྱངས། །རང་ཞལ་མཇལ་རྣམས་ཡིད་ཆེས་ཁོང་ནས་རྙེད། །འདི་འདྲའི་ཚིག་ཟུར་ཙམ་ཡང་ཐོས་པ་ཡི། །སྐལ་ལྡན་དགའ་བའི་འཁྲི་ཤིང་གཡོ་བ་གང་། །སྟོང་གསུམ་གསེར་གྱིས་བརྡལ་ཡང་དེ་ལྟར་མིན། །དཔྱོད་བྲལ་དམུས་ལོང་ཕལ་ལ་ཅི་ཆ་ཡོད། །གང་ཞིག་ཆོས་ཚུལ་འདི་ལ་སྐད་ཅིག་ཙམ། །མོས་པ་དེ་ཡང་གྲངས་མེད་བསྐལ་པའི་བར། །ལེགས་བྱས་འབྲས་བུས་སྨིན་པའི་མཐུ་ཡིན་ན། །ཚུལ་བཞིན་སྤྱོད་པའི་བསོད་ནམས་ཇི་ལྟར་གཞལ། །དེས་ན་འདི་དོན་ཅུང་ཟད་བཀྲོལ་བ་ཡང་། །ཡང་དག་ཚད་མའི་རྒྱུད་
ལུང་དང་བསྟུན་ཏེ། །མཚན་ལྡན་བླ་མས་རྗེས་སུ་བཟུང་བའི་དྲིན། །མི་གཙང་འདམ་རྫབ་ཁྲོད་ན་ནོར་བུ་བཞིན། །འོན་ཀྱང་ཤིན་ཏུ་བརླིང་བའི་རྡོ་རྗེའི་ཚིག །ཟབ་གསང་དགོངས་པའི་དོན་ལ་མ་འབྱོར་བའི། །ཉེས་འགལ་གང་མཆིས་རང་བློའི་སྐྱོན་དུ་ཟད། །བླ་མ་མཆོག་དང་རྩ་གསུམ་ལྷ་ལ་བཤགས། །ལེགས་བྱས་དགེ་བའི་སྟོན་ཟླ་གསར་པའི་གཟིས། །འགྲོ་བློའི་རྨོངས་པའི་ཚ་གདུང་གཏན་བཅིལ་ཏེ། །ཡང་དག་སྣང་བ་དམ་པས་ས་གསུམ་ཁྱབ། །གསང་ཆེན་བསྟན་པའི་ཀུ་མུད་རྒྱས་གྱུར་ཅིག །བདག་ཀྱང་ཟབ་ལམ་འདི་དང་མི་འབྲལ་ཞིང་། །རྙེད་བཀུར་ཆོས་བརྒྱད་ཞགས་པས་འཆིང་མིན་པར། །སྲས་བཅས་རྒྱལ་དགོངས་འགྲེལ་ལ་མཐུ་ཐོབ་ནས། །འགྲོ་རྣམས་གདོད་མའི་རྒྱལ་སར་དཀྲི་བྱེད་ཤོག །རབ་འབྱམས་ཞིང་གི་སེམས་དཔའ་ཐམས་ཅད་ཀྱིས། །བདེན་
གསུང་མི་འགྱུར་སེང་གེའི་སྒྲ་ཆེན་པོས། །དུས་མཐའི་ལྟ་ངན་སྡེ་ཚོགས་འཇོམས་པ་དང་། །བཀྲ་ཤིས་རྟག་པ་དམ་པའི་འཆི་མེད་ལམ། །འོད་གསལ་ཉི་མས་རྨོངས་མུན་ཀུན་བསལ་ནས། །ཕན་བདེའི་སྣང་བ་འདོད་རྒུར་སྦྱིན་གྱུར་ཅིག །ཅེས་པའང་དྭགས་རྙིང་ཡོངས་ཀྱི་བསྟན་སྲོག་གཅིག་པུར་གྱུར་པ་༧སྐྱབས་རྗེ་རོལ་རྡོ་མཆོག་སྤྲུལ་རིན་པོ་ཆེའི་མདུན་ནས་བཀྲ་ཤིས་པའི་ལྷ་རེག་ཤེལ་བུམ་འབྲས་དཀར་གྱིས་བཀང་བའི་སྐྱེས་དང་བཅས་རྫོགས་ཆེན་ལྟ་མགུར་འདི་ལ་ཚིག་འགྲེལ་ཞིག་གྱིས་ཞེས་པའི་བཀའ་ལུང་གསེར་གྱི་ཅོད་པཎ་སྤྱི་བོར་སོན་པ་དང་། ༧དྲུང་ཆེན་རྡོ་རྗེ་འཆང་གི་ཡང་སྤྲུལ་རིན་པོ་ཆེ་དང་། སི་སྤྲུལ་ཨོ་རྒྱན་བསྟན་འཛིན་བཅས་ནས་ཀྱང་ཡང་ཡང་བཀའ་ནན་ཕེབས་པར་གུས་པས་དང་དུ་བླངས་ཏེ་སྔ་འགྱུར་བསྟན་པ་ཡོངས་རྫོགས་ཀྱི་མངའ་བདག་ཁམས་གསུམ་ཆོས་ཀྱི་རྒྱལ་པོ་ཆོས་རྗེ། རབ་འབྱམས་པ་ཡབ་སྲས་ཀྱི་གྲལ་མཐར་འཁོད་ཅིང་ཕྱིས་ཀྱི་
དུས་རྒྱལ་བསྟན་གསལ་བའི་ཉིན་བྱེད་འགྲན་ཟླ་དང་བྲལ་བ། རིགས་བདག་མཚུངས་པ་མེད་པ་༧འཇམ་མགོན་རིན་པོ་ཆེ་རྣམ་གཉིས་དང་། མཁན་ཆེན་རྡོ་རྗེ་འཆང་མཚན་བརྗོད་པར་དཀའ་བ་མཁྱེན་བརྩེ་བློ་གྲོས་དང་། ཨོ་རྒྱན་བསྟན་འཕེལ་བཅས་ཀྱི་ཞབས་རྡུལ་སྤྱི་བོས་ལེན་པའི་སྐལ་བཟང་དུ་ཐོབ་པ་ཕྱོགས་མེད་རིས་མེད་ཀྱི་དོན་ལ་རྩེ་གཅིག་ཏུ་སྨོན་པའི་ཨཀཱ་ར་ཤི་ལའི་༼འགྱུར་མེད་ཚུལ་ཁྲིམས་༽མིང་གིས་ཟུར་མང་བདུད་རྩི་རིལ་གྱི་ཕོ་བྲང་མཁར་རྒན་བཀྲ་ཤིས་ལེགས་བཤད་འབྱུང་བའི་དགའ་ཚལ་དུ་ལེགས་པར་བགྱིས་པ་འདིས་ཀྱང་དཔལ་ལྡན་བླ་མའི་སྐུ་ཚེ་རབ་ཏུ་བརྟན་ཅིང་གསང་ཆེན་ཐེག་པའི་རིང་ལུགས་ཤིན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག། །།